UzbekAI

Ўзбекистон Республикаси Вазирлар Маҳкамасининг

қарори

ТАЛАБЛАРИ ВА ШАРТЛАРИ

НИЗОМ

ТУРЛАРИ ҲАМДА МИҚДОРЛАРИ

РЎЙХАТИ

Ўзбекистон Республикаси Президентининг «Лотереялар ва таваккалчиликка асосланган ўйинларни ташкил этиш ва ўтказишни тартибга солишни такомиллаштириш чора-тадбирлари тўғрисида» 2024 йил 19 апрелдаги ПФ-68-сон Фармони ижросини таъминлаш чора-тадбирлари тўғрисида

Ўзбекистон Республикаси Президентининг «Лотереялар ва таваккалчиликка асосланган ўйинларни ташкил этиш ва ўтказишни тартибга солишни такомиллаштириш чора-тадбирлари тўғрисида» 2024 йил 19 апрелдаги ПФ-68-сон Фармони ижросини таъминлаш, шунингдек, лотереялар ва таваккалчиликка асосланган ўйинларни ташкил этиш фаолиятини тартибга солиш тизимини янада такомиллаштириш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Лотереялар ва таваккалчиликка асосланган ўйинларни ташкил этиш ва ўтказишни тартибга солишни такомиллаштириш чора-тадбирлари тўғрисида» 2024 йил 19 апрелдаги ПФ-68-сон Фармонига мувофиқ:

2025 йил 1 январдан бошлаб Ўзбекистон Республикасида Интернет бутунжаҳон ахборот тармоғида таваккалчиликка асосланган ўйинларни (кейинги ўринларда — Интернет тармоғидаги ўйинлар) ташкил этиш ва букмекерлик фаолиятини амалга оширишга рухсат этилганлиги;

лотерея, Интернет тармоғидаги ўйинларни ва букмекерлик фаолияти Ўзбекистон Республикаси Истиқболли лойиҳалар миллий агентлиги (кейинги ўринларда — Агентлик) томонидан бериладиган лицензиялар асосида ташкил этилиши;

Агентлик лотерея, Интернет тармоғидаги ўйинларини ташкил этиш ва букмекерлик фаолиятини тартибга солиш ҳамда лицензиялаш бўйича ваколатли орган (кейинги ўринларда — лицензияловчи орган) этиб белгиланганлиги;

Агентлик томонидан лотерея, Интернет тармоғидаги ўйинларни ташкил этиш ва букмекерлик фаолиятини лицензиялаш тартиби белгиланиши назарда тутилганлиги маълумот учун қабул қилинсин.

2. Қуйидагилар:

Интернет бутунжаҳон ахборот тармоғида таваккалчиликка асосланган ўйинларни, лотереялар ташкил этиш фаолияти ва букмекерлик фаолиятини амалга оширишга қўйиладиган лицензия талаблари ҳамда шартлари 1-иловага мувофиқ;

Интернет бутунжаҳон ахборот тармоғида таваккалчиликка асосланган ўйинларни, лотереялар ташкил этиш ва ўтказишда ҳамда букмекерлик фаолиятидаги чекловлар 2-иловага мувофиқ;

Интернет бутунжаҳон ахборот тармоғида таваккалчиликка асосланган ўйинларни, лотереялар ва букмекерлик фаолиятини ташкил этиш фаолияти ташкилотчиларининг мижозларини рақамли (масофадан) идентификация қилиш тўғрисидаги низом 3-иловага мувофиқ;

Интернет бутунжаҳон ахборот тармоғида таваккалчиликка асосланган ўйинларни, лотереялар ташкил этиш фаолияти ва букмекерлик фаолиятини амалга оширишга оид айрим тўловлар турлари ҳамда миқдорлари 4-иловага мувофиқ тасдиқлансин.

3. Агентликнинг қуйидагиларни назарда тутувчи Ставкалар ва ўйинчиларнинг ягона давлат регистрини (кейинги ўринларда — Регистр) юритиш тартибини жорий этиш тўғрисидаги таклифига розилик берилсин:

Ўйинчилар ягона реестри;

Чекловлар (тақиқлар), шу жумладан, букмекерлик гаровларида ёки Интернет тармоғидаги ўйинларда сарфлаш (ютқазиш) мумкин бўлган маблағлар бўйича лимитлар ягона реестри;

Сотиб олинган лотерея чипталари, букмекерлик гаровлари учун қабул қилинган маблағлар ва Интернет тармоғидаги ўйинларга киритилган маблағлар билан боғлиқ молиявий транзакциялар реестри;

Ютуқлар бўйича тўловлар реестри.

Бунда:

а) қуйидагилар Регистрни ташкил этиш ва унинг фаолият кўрсатишининг асосий мақсадлари ҳисобланади:

Интернет тармоғидаги ўйинлар, лотереялар ташкил этиш ва букмекерлик фаолияти соҳасида пул айланмалари устидан назорат ҳамда консолидациялашган ҳисобни таъминлаш;

Интернет тармоғидаги ўйинлар, лотерея ва букмекерлик ташкилотчиси билан манфаатлар тўқнашуви ҳолатларида ўйинчининг манфаатларини ҳимоя қилишни таъминлаш;

ўйин қарамлигига қарши курашиш ва унинг олдини олиш;

б) Агентлик Регистрни ишлаб чиқиш бўйича буюртмачи вазифасини бажаради;

в) «Давлат ахборот тизимларини яратиш ва қўллаб-қувватлаш бўйича ягона интегратор «UZINFOCOM» МЧЖ Регистрни ишлаб чиқувчи ва унинг оператори ҳисобланади;

г) қуйидагилар молиялаштириш манбалари ҳисобланади:

Регистрни ишлаб чиқиш ишлари — Агентлик ёки Регистр операторининг маблағлари;

Регистрни техник қўллаб-қувватлаш ва ривожлантириш — ушбу қарорга 4-илованинг 5-бандида назарда тутилган маблағларнинг 50 фоизи.

4. Белгилансинки:

лицензияловчи орган томонидан берилган лицензиялар асосида ташкил этилган лотерея, Интернет тармоғидаги ўйинлар ва букмекерлик гаровларида қатнашиш қимор ва бошқа таваккалчиликка асосланган ўйинларда қонуний қатнашиш ҳисобланади;

лотереялар анъанавий (лотерея чипталарини қоғоз шаклда чиқариш) ва электрон шаклда ташкил этилади;

Интернет тармоғидаги ўйинлар, лотерея ташкил этиш ва букмекерлик фаолиятини амалга ошириш учун 5 йил муддатга намунавий (оддий) лицензиялар берилади;

Интернет тармоғидаги ўйинлар, лотерея ва букмекерлик фаолияти ташкилотчилари ўз хизматларини кўрсатиш учун Интернет жаҳон ахборот тармоғи миллий сегментидаги фақатгина битта домен номидан фойдаланиши мумкин;

Интернет тармоғидаги ўйинлар ташкилотчиларининг ўйинлар дастурий таъминоти ҳамда лотереялар ташкилотчиларининг тасодифий рақамлар генератори технологиялари лицензияловчи орган томонидан белгиланадиган тегишли мувофиқликни баҳолаш бўйича органларнинг ва синов лабораторияларнинг сертификатига эга бўлишлари шарт;

лотереялар ташкил этишдан йиғилган маблағлар ғолибларга ютуқ (соврин) сифатида анъанавий тарзда ташкил этилган лотереялар учун камида 50 фоиз ҳамда электрон шаклда эса — камида 75 фоиз миқдорида тақсимланади (тўланади);

Интернет тармоғидаги ўйинларни, лотерея ташкил этиш ва букмекерлик фаолиятини амалга оширишга лицензия беришдан ҳамда лицензияни ўзгартиришдан тушадиган давлат божининг 20 фоизи лицензияловчи органнинг ҳисобварағига ўтказилади.

5. Шундай тартиб ўрнатилсинки, унга мувофиқ:

а) бир вақтнинг ўзида қуйидаги мезонлардан камида иккитаси мавжуд бўлганда, қимор ва таваккалчиликка асосланган бошқа ўйинлар, шу жумладан, Интернет тармоғидаги ўйинлар, букмекерлик гарови ва лотереяларнинг (кейинги ўринларда — ўйинлар) ўтказиш жойи сифатида Ўзбекистон Республикаси тан олинади:

ўйинчи Ўзбекистон Республикасининг фуқароси бўлиши;

ўйин Ўзбекистон Республикасининг ҳудудида ташкил этилиши;

ўйинчи Ўзбекистон Республикасининг ҳудудидан ўйинда иштирок этиши;

ўйинга кириш учун Ўзбекистон Республикасининг ҳудудида рўйхатдан ўтган IP-манзилдан ва (ёки) Ўзбекистон Республикасининг халқаро коди мавжуд бўлган мобил телефон рақамидан фойдаланиш;

ўйинга пул киритиш ҳамда чиқариш учун Ўзбекистон Республикасининг тижорат банки томонидан эмиссия қилинган банк картасидан фойдаланилганда ёки тўловларга ишлов бериш ва уларнинг клиринги Ўзбекистон Республикаси ҳудудида амалга оширилганда;

ўйин Ўзбекистон Республикасининг ҳудудида яшовчи ўйинчилар учун мўлжалланганда, шу жумладан, давлат тилида тақдим этилганда ёки реклама қилинганда;

б) Интернет тармоғидаги ўйинлар, электрон шаклдаги лотереялар ва букмекерлик ташкилотчилари янги ўйинчиларни рўйхатдан ўтказиш ҳамда букмекерлик гаровларига ставкаларни қабул қилиш, интернет тармоғидаги ўйинларга пул киритиш фақат электрон шаклда Регистрдан фойдаланган ва ўйинчини шахси тасдиқланган ҳолда, ўзининг веб-сайти орқали амалга оширилади;

в) Агентликка қуйидаги ваколатлар берилади:

Ўзбекистон Республикаси резидентларига таваккалчиликка асосланган ўйинлар ва лотерея ташкил этиш ҳамда ўтказиш соҳасида ноқонуний хизматлар кўрсатувчи хорижий юридик шахсларнинг (кейинги ўринларда — хорижий юридик шахслар) фаолиятини текшириш. Бунда ушбу текширишларга Ўзбекистон Республикасининг тадбиркорлик субъектлари фаолияти устидан давлат назорати соҳасидаги қонунчилик ҳужжатлари татбиқ этилмайди;

лотерея ва таваккалчиликка асосланган ўйинларни ташкил этиш ҳамда ўтказиш соҳасидаги қонунчилик ҳужжатларини бузганлик учун хорижий юридик шахсларга нисбатан жарималар қўллаш. Бунда ушбу жариманинг 50 фоизи лицензияловчи органнинг ҳисобварағига йўналтирилади;

лотерея ва Интернет тармоғидаги ўйинларни ташкил этиш, букмекерлик фаолиятини лицензиялашда, шунингдек, лотереялар ва Интернет тармоғидаги ўйинларни ташкил этиш ва букмекерлик фаолиятини тартибга солиш ҳамда назорат қилишда асослантирилган мулоҳазадан фойдаланиш;

г) лицензияловчи орган томонидан қўйидагилар юритилади:

Интернет тармоғидаги таваккалчиликка асосланган ўйинлар, лотерея ва букмекерлик гаровларида қатнашиши тақиқланган Ўзбекистон Республикасининг фуқаролари ва чет эл фуқароларининг тоифалари рўйхати (кейинги ўринларда — чекловлар рўйхати);

таваккалчиликка асосланган ўйинларга қарамлиги мавжуд шахслар рўйхати. Мазкур рўйхатга жисмоний шахс ўз аризасига 6 ойдан 5 йилгача муддатга ёки унинг яқин қариндошининг аризасига мувофиқ суднинг қарори асосида 5 йил муддатга киритилади.

6. Агентлик манфаатдор вазирликлар ва идоралар билан биргаликда:

а) икки ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин;

б) уч ой муддатда фуқароларнинг ёши, соғлиғи, даромад манбаи ва бошқа маълумотларни инобатга олган ҳолда, Интернет жаҳон ахборот тармоғида таваккалчиликка асосланган ўйинлар, лотереялар ва букмекерлик гаровларда қатнашиши тақиқланган Ўзбекистон Республикаси фуқароларининг тоифалари рўйхатини ишлаб чиқсин ва тасдиқласин;

Рақамли технологиялар вазирлигининг техник кўмагида чекловлар рўйхати тасдиқланган сўнг икки ой муддатда Регистр тегишли маълумотлардан фойдаланиш учун вазирлик ва идораларининг ахборот тизимлари ҳамда базаларига уланишини таъминласин.

7. Агентлик 2025 йил 1 январга қадар Интернет бутунжаҳон ахборот тармоғида таваккалчиликка асосланган ўйинларни, лотерея ташкил этиш ва букмекерлик фаолиятини лицензиялаш, Лотереялар ташкил этиш ва ўтказиш, Букмекерлик фаолиятини ташкил этиш ва ўтказиш, Интернет бутунжаҳон ахборот тармоғида ўйинларни ташкил этиш ва ўтказиш тартиблари, Ставкалар ва ўйинчилар ягона давлат регистри тўғрисидаги низомларни, шунингдек, Интернет бутунжаҳон ахборот тармоғида таваккалчиликка асосланган ўйинлар, лотереялар ва букмекерлик фаолияти ташкилотчиларига ҳамда Ўзбекистон Республикаси резидентларига лотереялар ва таваккалчиликка асосланган ўйинларни ташкил этиш ва ўтказиш соҳасида ноқонуний хизматлар кўрсатувчи хорижий юридик шахсларга жарима қўллаш тартибини ишлаб чиқсин ва тасдиқласин.

8. Ўзбекистон Республикаси Ички ишлар вазирлиги, Марказий банк, Солиқ қўмитаси, Агентлик манфаатдор вазирлик ва идоралар билан биргаликда икки ой муддатда қонунга хилоф равишда қимор ўйинларини ташкил этиш ва ўтказиш, шу жумладан, қиморхоналар ташкил этиш ва уларни сақлашни ҳамда ўйинларга пул киритиш учун халқаро тўлов тизимларидан фойдаланиш ҳолатларини аниқлаш ва уларнинг олдини олиш бўйича комплекс чора-тадбирлар ишлаб чиқилиши ва амалга оширилишини таъминласин.

9. Ўзбекистон Республикаси Ҳукуматининг 5-иловага мувофиқ айрим қарорлари ўз кучини йўқотган деб ҳисоблансин.

10. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда Ўзбекистон Республикаси Истиқболли лойиҳалар миллий агентлиги директори Д.Р. Ли зиммасига юклансин.

Вазирлар Маҳкамасининг 2024 йил 6 декабрдаги 814-сон қарорига 1-ИЛОВА

Интернет бутунжаҳон ахборот тармоғида таваккалчиликка асосланган ўйинларни, лотереялар ташкил этиш фаолияти ва букмекерлик фаолиятини амалга оширишга қўйиладиган лицензия

Қуйидагилар Интернет бутунжаҳон ахборот тармоғида таваккалчиликка асосланган ўйинларни (кейинги ўринларда — Интернет тармоғидаги ўйинлар), лотереялар ташкил этиш фаолиятини ҳамда букмекерлик фаолиятини амалга оширишга қўйиладиган лицензия талаблари ва шартлари ҳисобланади:

а) фаолиятнинг фақат Ўзбекистон Республикасининг резидентлари — юридик шахслар томонидан амалга оширилиши;

б) Ўзбекистон Республикаси ҳудудидаги серверларда жойлашган электрон платформа мавжудлиги;

в) Интернет тармоғида ўйинларни ва лотерея ташкил этиш фаолияти ҳамда букмекерлик фаолияти ташкилотчилари фақат мазкур фаолият турлари билан шуғулланишга ҳақли. Бунда бир пайтнинг ўзида Интернет бутунжаҳон ахборот тармоғида таваккалчиликка асосланган ўйинларни ва лотереялар ташкил этиш фаолиятини ва букмекерлик фаолиятини амалга ошириш учун ҳар бир фаолият тури учун алоҳида лицензия олиш мумкин;

г) ариза берилган санада маблағ шаклида шакллантирилган қуйидаги устав капитали мавжудлиги:

Интернет тармоғида ўйинлар ва букмекерлик фаолияти ташкилотчиси учун базавий ҳисоблаш миқдорининг камида бир юз эллик минг баравари миқдорида;

лотерея ташкилотчиси — базавий ҳисоблаш миқдорининг камида эллик беш минг баравари миқдорида.

Устав капиталини шакллантириш учун кредитга, гаровга олинган маблағлардан ва мажбуриятлар юклатилган бошқа маблағлардан, шунингдек, жиноий фаолиятдан олинган маблағлардан фойдаланиш тақиқланади;

д) ютуқлар бўйича қарздорликни тўлаш, ставкаларни қайтариб бериш, солиқ мажбуриятлар ва бошқа қарздорликларни қоплаш мақсадида:

Интернет тармоғида ўйинлар ва букмекерлик фаолияти ташкилотчиси учун базавий ҳисоблаш миқдорининг камида етмиш беш минг баравари миқдорида, лотерея ташкилотчиси — базавий ҳисоблаш миқдорининг камида қирқ минг баравари миқдорида маблағ шаклида резерв фондини лицензияловчи органнинг Ўзбекистон Республикасининг тижорат банкида алоҳида ҳисобварақда захирага қўйиш;

мазкур банднинг иккинчи хатбошисида белгиланган тегишли суммага банк кафолати ёки суғурта ташкилотининг суғурта полисини тақдим қилиш;

е) Интернет тармоғида ўйинлар ва лотерея ташкил этиш фаолияти ҳамда букмекерлик фаолиятини амалга ошириш, жиноий фаолиятдан олинган даромадларни легаллаштириш, терроризмни молиялаштиришга ва оммавий қирғин қуролларининг тарқалишини молиялаштиришга қарши курашиш, шахсга доир маълумотларни сақлаш ва улардан фойдаланиш ҳамда реклама соҳасидаги Ўзбекистон Республикаси қонунчилик ҳужжатлари талабларига риоя қилиш;

ж) лицензиат фаолиятини амалга ошириш билан боғлиқ маълумотларни ваколатли органнинг сўровига биноан бепул тақдим этиш;

з) Интернет жаҳон ахборот тармоғи миллий сегментидаги фақат битта домен номидан фойдаланган ҳолда фаолиятни амалга ошириш;

и) Интернет тармоғида ўйинлар ва лотерея ташкил этиш фаолияти ҳамда букмекерлик фаолияти ташкилотчиларини бошқариши:

террористик фаолиятда ёки оммавий қирғин қуролларини тарқатишда иштирок этган ёки иштирок этишда гумон қилинаётган шахслар томонидан;

иқтисодий жиноятлар, шунингдек, жиноий фаолиятдан олинган даромадларни легаллаштириш, терроризм, оммавий қирғин қуролларини тарқатиш, уларни молиялаштириш, уюшган жиноятчилик, гиёҳванд моддалар ноқонуний савдоси, коррупция ва ахборот технологиялари билан боғлиқ жиноятларни содир этганлик учун гумонланаётган ёки судланганлиги олиб ташланмаган ёхуд судланганлик ҳолати тугалланмаган шахслар томонидан;

якка ҳолда ижро этувчи орган функцияларини бажарган, коллегиал ижро этувчи орган таркибига кирган, Интернет тармоғида ўйинларни ва лотереялар ташкил этиш фаолиятини ёки букмекерлик фаолиятни амалга оширган юридик шахсларнинг, ушбу шахсларнинг айби билан йўл қўйилган лицензия талаблари ва шартлари бузилганлиги учун кўрсатиб ўтилган юридик шахсларда фаолиятнинг тегишли турини амалга оширишга берилган лицензияларнинг амал қилиши тўхтатилган пайтда, агар бундай тўхташ пайтидан бошлаб уч йилдан кам вақт ўтган бўлса, муассислари ёки бош ҳисобчилари бўлган шахслар томонидан;

юридик шахс банкрот деб эътироф этилган пайтда ва эътироф этилган пайтдан бошлаб икки йил ўтмаган бўлса, якка ҳолда ижро этувчи орган функцияларини бажарган ёки коллегиал ижро этувчи орган таркибига кирган шахслар томонидан йўл қўймаслик;

к) Интернет тармоғида ўйинлар, лотереялар ташкил этиш фаолияти ҳамда букмекерлик фаолияти ташкилотчиларининг устав капиталида қуйидагиларнинг мулкдори ва (ёки) охирги бенефициар мулкдори:

«и» бандида кўрсатилган шахсларнинг;

жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида халқаро ҳамкорликда иштирок этмаётган давлатларда рўйхатдан ўтган компаниялар ҳамда доимий яшаётган, турган ёки рўйхатга олинган шахсларнинг бўлишига (иштирок этишига) йўл қўймаслик;

л) «и» ва «к» бандларда кўрсатилган шахсларнинг Интернет тармоғида ўйинлар ва лотереялар ташкил этиш фаолияти ҳамда букмекерлик фаолияти ташкилотчиларини бош ҳисобчи сифатида ишга қабул қилмаслик;

м) таъсисчилари бўлган юридик шахсларнинг ҳаддан ташқари (охирги бенефициар мулкдоргача учта поғонадан кўп) даражаларга табақалаштирилган Интернет тармоғида ўйинларни ва лотерея ташкил этиш фаолияти ҳамда букмеркерлик фаолияти ташкилотчиси фаолиятига йўл қўймаслик;

н) Интернет тармоғида ўйинлар, букмекерлик гаровларида иштирок этиш учун маблағларни қабул қилиш, лотерея чипталарини сотиб олиш ва ютуқларни тўлаш фақат Ставкалар ва ўйинчиларнинг ягона давлат регистри орқали амалга ошириш;

о) Интернет тармоғида ўйинлар, букмекерлик гаровлари ва лотерея чипталарини сотиб олиш учун маблағларни киритиш бўйича белгиланган лимитлар ҳамда интернет тармоғида таваккалчиликка асосланган ўйинларни лотереялар ташкил этиш ҳамда ўтказиш ва букмекерлик фаолиятидаги тақиқларга риоя қилиш;

п) Интернет тармоғида ўйинлар, лотереялар ва букмекерлик фаолияти ташкилотчисининг устав капиталидаги улушини жисмоний ва юридик шахсларга, шу жумладан, норезидентларга реализация қилиш масалаларини лицензияловчи орган билан келишиш;

р) Интернет тармоғида ўйинлар, лотереялар ва букмекерлик фаолияти ташкилотчисининг раҳбарияти (директори ва унинг ўринбосарлари), бош ҳисобчи, жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролларининг тарқалишини молиялаштиришга қарши курашиш бўйича таркибий бўлинма раҳбарини ўзгартириш масалаларини лицензияловчи орган билан келишиш.

Лотереялар ташкилотчиларига қўйиладиган қўшимча лицензия талаблари ва шартлари қуйидагилар ҳисобланади:

а) чиқарилаётган ва муомаладаги ўйин чипталари ҳажми фаолиятнинг биринчи йили мобайнида — лицензиат ўз сармоясининг беш бараваридан, фаолиятнинг иккинчи йили мобайнида — ўн бараваридан ва фаолиятнинг кейинги йилларида — йигирма беш бараваридан ортиқ бўлмаслиги керак. Лицензиатнинг ўз сармояси миқдори етарли бўлмаган тақдирда, лотереялар мўлжалланаётган ҳажмда фақат молия ташкилотларининг зарур миқдорларда таъминлаш кафолати мавжуд бўлганда ўтказилиши мумкин;

б) ўйинларни фақат лицензияловчи орган томонидан белгиланадиган тегишли мувофиқликни баҳолаш бўйича органларнинг ва синов лабораторияларнинг сертификатига эга ютуқли чипталарни тасодифий танлаб олиш жараёнига инсон омилининг бирон-бир таъсирини тўлиқ истисно қилувчи технологиялар ва жиҳозларни, шу жумладан, тасодифий рақамлар генераторини қўллаган ҳолда ўтказиш;

в) ютуқли лотерея чипталари ишлаб чиқариш давомида аниқланадиган ёхуд бир ёки бир неча чипталар учун қисман ўйинлар ўтказиладиган тиражсиз лотереяларни ўтказмаслик.

Хизматларни кўрсатиш учун фойдаланаётган ўйинларнинг дастурий таъминоти лицензияловчи орган томонидан белгиланадиган тегишли мувофиқликни баҳолаш бўйича органларнинг ва синов лабораторияларнинг сертификатига эга бўлиши Интернет тармоғидан ўйинлар ташкилотчисининг қўшимча лицензия талаби ва шарти ҳисобланади.

Вазирлар Маҳкамасининг 2024 йил 6 декабрдаги 814-сон қарорига 2-ИЛОВА

Интернет бутунжаҳон ахборот тармоғида таваккалчиликка асосланган ўйинларни, лотереялар ташкил этиш ва ўтказишда ҳамда букмекерлик фаолиятидаги чекловлар

Интернет бутунжаҳон ахборот тармоғида таваккалчиликка асосланган ўйинларни, лотерея ташкил этиш ва ўтказишдаги ҳамда букмекерлик фаолиятини амалга оширишда қуйидагилар тақиқланади:

1. Ўн саккиз ёшга тўлмаган шахсларга тегишли ҳисобрақамлардан, шу жумладан, банк картаси ҳисобрақамларидан, таваккалчиликка асосланган ўйинлар, лотереялар ва букмекерлик гаровларида иштирок этиши, ютиши ёки ютқазиши билан боғлиқ тўловлар амалга оширилиши.

2. Лотерея билетларни сотиш пунктларидан ташқари ўйинчилар бевосита иштироки ва бўлиши билан боғлиқ таваккалчиликка асосланган ўйинларни ўтказиш учун мўлжалланган стационар ёки кўчма ўйин заллари, казино, ўйин автоматлар заллари ёки бошқа ўйин муассасаларининг ташкил этилиши.

3. Қуйидаги букмекерлик гаровларини ташкил этиш ва ўтказиш:

Ўзбекистон Республикасининг ҳудудида ва Ўзбекистон Республикаси фуқаролари иштирокида ҳодисаларга (спорт ўйинлари ва мусобақалари, сиёсий жараёнлар, танловлар ва бошқалар), бундан халқаро федерациялар қоидалар асосида тегишли даражада тайёргарлик, назорат ва ҳакамликни таъминланган ҳолда, томошабинлар иштирокида ўтказиладиган спорт ўйинлари ва халқаро даражадаги ҳодисалар мустасно;

болалар ва ўсмирлар спорт мусобақаларига.

Вазирлар Маҳкамасининг 2024 йил 6 декабрдаги 814-сон қарорига 3-ИЛОВА

Интернет бутунжаҳон ахборот тармоғида таваккалчиликка асосланган ўйинларни, лотереялар ва букмекерлик фаолиятини ташкил этиш фаолияти ташкилотчиларининг мижозларини рақамли (масофадан) идентификация қилиш тўғрисида

1-боб. Умумий қоидалар

1. Мазкур Низом Ўзбекистон Республикасининг «Жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисида»ги Қонуни асосида ишлаб чиқилган бўлиб, Интернет таваккалчиликка асосланган ўйинлар, лотереялар ва букмекерлик фаолиятини кўрсатишни (кейинги ўринларда — ўйин) ташкил этиш бўйича хизматларни тақдим этиш вақтида Ўзбекистон Республикаси фуқаролари ҳамда чет эллик фуқароларни рақамли (масофадан) идентификация қилиш тартибини белгилайди.

2. Ушбу Низомда қуйидаги тушунчалардан фойдаланилади:

верификация — мижознинг идентификация маълумотларини текшириш тартиб-таомиллари;

идентификация — мижознинг идентификация маълумотларини аниқлаш тартиб-таомили;

ички назорат қоидалари — Интернет тармоғида таваккалчиликка асосланган ўйинлар, лотерея ва букмекерлик фаолияти ташкилотчилари учун жиноий фаолиятдан олинган даромадларни легаллаштириш, терроризмни молиялаштириш ва оммавий қирғин қуролини тарқатишни молиялаштиришга қарши курашиш бўйича ички назорат қоидалари;

мижоз — Интернетда таваккалчиликка асосланган ўйинларни, лотереялар ва букмекерлик фаолиятини ташкил этиш бўйича ташкилотчиларнинг контрагенти сифатида битимларни (операциялар) амалга оширувчи жисмоний шахс, шу жумладан, чет эллик жисмоний шахс.

платформа — ўйинлар билан боғлиқ хизматларни кўрсатиш бўйича электрон майдонча (платформа);

рақамли (масофадан) идентификация қилиш — ахборот тизимларидан фойдаланган ҳолда масофадан мижозларни идентификация қилиш ва шахсини аниқлаш;

рўйхат — терроризмга, оммавий қирғин қуролини тарқатишга қарши курашувчи давлат органлари ва Ўзбекистон Республикасининг бошқа ваколатли органлари тақдим этаётган маълумотлар, шунингдек, чет давлатларнинг ваколатли органлари ва халқаро ташкилотлари расмий каналлар орқали тақдим этаётган маълумотлар асосида Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти томонидан тузилган террорчилик фаолиятида ёки оммавий қирғин қуролини тарқатишда иштирок этаётган ёхуд иштирок этишда гумон қилинаётган шахслар рўйхати;

ўйин ташкилотчиси — Интернет тармоғида таваккалчиликка асосланган ўйинларни, лотереялар ва букмекерлик фаолияти ташкил этиш билан шуғулланиш учун белгиланган тартибда лицензия олган юридик шахс.

3. Ўйин ташкилотчиси мижозларни рақамли идентификация қилиш тизимини жорий этишдан аввал жиноий даромадларни легаллаштириш, терроризмни молиялаштириш ва оммавий қирғин қуролларини тарқатиш хавфи даражасини ўрганиш, таҳлил ва идентификация қилиш, баҳолаш, мониторингини юритиш, бошқариш, ҳужжатлаштириш бўйича ички қоидаларни, шунингдек, уларни қисқартириш бўйича чора-тадбирларни ўз ичига олувчи рақамли идентификация қилиш тартибини таъминлаши шарт.

2-боб. Мижозларни рақамли идентификация қилишни ташкил этиш

4. Мижозларни рақамли идентификация қилишда қуйидаги усуллардан фойдаланилади:

мижоз тақдим қилган маълумотларга асосланган ҳолда, мижоз шахсини ўйин ташкилотчиси масъул ходими томонидан текшириш ва идентификация қилиш;

ўйин ташкилотчиси ахборот тизимлари томонидан реал вақт режимида инсон омилисиз мижознинг шахсини текшириш ва идентификация қилиш.

5. Ўйин ташкилотчиси ушбу Низомнинг 4-банди учинчи хатбошисида қайд этилган усул бўйича мижознинг шахсини текшириш ва идентификация қилишда:

шахсни тасдиқловчи ҳужжатнинг (Ўзбекистон Республикаси фуқаролари учун биометрик паспорт ёки идентификацияловчи ID-карта ёки хорижий давлатлар фуқаролари учун уларга тенглаштирилган ҳужжатлар) ички назорат қоидалари талабларига мувофиқ тегишли маълумотларга эга бўлган қисмлари фотосуратларини мижоздан қабул қилади;

ушбу Низом талабларига мувофиқ мижознинг фотосурати ва (ёки) видеотасвирини қабул қилади;

Ўзбекистон Республикаси фуқаролари, чет эл фуқаролари ҳамда фуқаролиги бўлмаган шахслар, белгиланган тартибда Ўзбекистон ҳудудида доимий ёки вақтинча яшаб турган шахслар тўғрисидаги маълумотларни «Электрон ҳукумат» тизимининг жисмоний ва юридик шахслар марказий маълумотлар базаларига (кейинги ўринларда — марказий маълумотлар базаси) сўров юбориш орқали ундаги маълумотлар билан солиштиради;

чет эл фуқаролари томонидан тақдим этилган электрон тасвирлар ва ҳужжатлар нусхалари (кейинги ўринларда — верификация учун дастурий маҳсулотлар) ҳақиқийлигини таъминловчи дастурий маҳсулотлар (ахборот тизимлари)дан фойдаланган ҳолда маълумотларни солиштиради;

шахсни тасдиқловчи ҳужжатдаги фотосуратни ушбу Низомга мувофиқ қабул қилинган фотосурат ва (ёки) видеотасвир билан, шунингдек, марказий маълумотлар базасида жойлаштирилган фотосурат билан (агар мавжуд бўлса) солиштиради;

мижоз билан боғланишда фойдаланиладиган мобил телефон рақамини айнан ушбу мижоз томонидан фойдаланилаётганлигини аниқлаш имконини берувчи усул (мобил телефонга боғланиш, SMS хабар юбориш) ёрдамида текширади. Бунда хорижда жойлашган мижозларни идентификация қилишда мобил рақам ўрнига электрон почта манзилига жўнатилган код орқали тасдиқлашга йўл қўйилади;

мижознинг ички назорат қоидаларига мувофиқ юқори хавф тоифасига кирмаслигини аниқлаш учун текширишларни амалга оширади.

Мижоз тўғрисидаги маълумотлар марказий маълумотлар базасида топилмаган тақдирда, ўйин ташкилотчисига мижоз билан онлайн видеоконференцалоқани ўрнатиб, мижозни идентификация қилишига рухсат берилади. Бунда ўйин ташкилотчиси масъул ходими видеоконференцалоқа орқали қуйидагиларни аниқлаши ва видеотасвирга туширилишини таъминлаши лозим:

мижоз тўғрисидаги маълумотлар аниқ кўринадиган мижознинг шахсини тасдиқловчи ҳужжат;

мижоз ўз шахсини тасдиқловчи ҳужжатга эга бўлган давлат;

мижознинг ушбу ўйин ташкилотчисидан хизматларни олиш истагини аудиовизуал тасдиқлаш (мижознинг оғзаки нутқи).

Ўйин ташкилотчисининг масъул ходими мижоз билан онлайн видео конференция ташкил қилади ва мижоз томонидан тақдим этилган қўйидаги маълумотларнинг тўғрилигини текширади:

мижознинг маълумотлари аниқ кўринган шахсини тасдиқловчи ҳужжатини;

мижоз ушбу шахсини тасдиқловчи ҳужжатни ушлаб турган ҳолатини;

мижознинг шартнома имзолаш истагида эканлигини тасдиқловчи аудиовизуал тасдиқ (мижознинг оғзаки нутқи).

Ўйин ташкилотчисининг масъул ходими мижоз билан онлайн видеоконференцалоқани ўрнатиб, мижоз томонидан тақдим қилинган ахборотларнинг айнан унга тегишлилигини текширади.

6. Ўйин ташкилотчиси рақамли идентификация қилиш учун қуйидагиларни таъминлаши лозим:

а) рақамли идентификация қилиш тартибини, шунингдек, мижоз томонидан тақдим этилувчи маълумотларга (расм ёки файл ҳажми, ўқилиши, формати ва бошқалар) қўйилган талабларни белгиловчи ички ҳужжатларни ишлаб чиқиши ва тасдиқлаши;

б) конфиденциаллик ва шахсга доир маълумотлар ҳимоясини таъминлаши;

в) марказий маълумотлар базасига уланган бўлиши;

г) верификация учун дастурий маҳсулотлар мавжуд бўлиши;

д) шахсий платформаларига қуйидагиларни таъминловчи функциялари бўлиши шарт:

шахсга доир маълумотлар субъектининг унинг шахсга доир маълумотларини белгиланган тартибда узатиш ва қайта ишлашга розилигини олиш;

белгиланган тартибда сўровларни шакллантириш ва марказий маълумотлар базасидан жавобларни қабул қилишни автоматлаштириш;

мижоз томонидан тақдим этилган маълумотларни марказий маълумотлар базасидан ёки текшириш учун дастурий маҳсулотлардан олинган маълумотлар билан солиштириш;

мижоз томонидан киритилган маълумотларни рўйхат ҳамда Ставкалар ва ўйинчилар ягона давлат реестрининг чекловлар (тақиқлар) ягона реестри билан автоматик текшириш;

мижозлар ва амалга оширилган операциялар тўғрисидаги маълумотлар захира нусхаларини тизимли шакллантириш, маълумотларнинг ўзгармаслиги ва сақланишини ҳамда уларни қонунчилик ҳужжатларида белгиланган муддатларда кейинчалик сақлаш учун юкланиши.

7. Верификация қилиш учун дастурий маҳсулотларни танлашда чет эллик жисмоний шахс давлатининг ваколатли давлат органлари томонидан тақдим этилган шахсга доир маълумотларнинг ҳақиқийлигини тасдиқлаш бўйича хизматлар кўрсатувчи дастурий маҳсулотларга (ахборот тизимлари) устунлик берилиши лозим.

3-боб. Рақамли идентификация қилиш тартиби

8. Мижозларни рақамли идентификация қилиш ўйин ташкилотчиси томонидан амалий иш муносабатлари ўрнатилган ҳолатда амалга оширилади.

Бунда амалий иш муносабатларига кириш вақти сифатида мижознинг ўйинларда иштирок этиш учун ўйин ташкилотчиси платформасига маълумотларни киритишининг бошланиши ҳисобланади.

9. Мижознинг шахсини текшириш ва аниқлаш жараёнида ўйин ташкилотчиси томонидан ушбу Низомнинг 4-банди учинчи хатбошисида белгиланган тартибда мижозларни аниқлаш учун фойдаланиладиган ахборот тизими:

а) мижоздан шахсини тасдиқловчи ҳужжат (биометрик паспорт ёки идентификацияловчи ID-карта ёхуд хорижий давлатлар фуқаролари учун уларга тенглаштирилган ҳужжатлар) серияси ва рақамини ёки жисмоний шахснинг шахсий идентификация рақами ва туғилган санасини ёхуд ушбу маълумотлардан барчасини ҳамда ушбу Низомга мувофиқ фотосуратини ёки видеотасвирини реал вақт режимида олади;

б) марказий маълумотлар базасига сўров юборади ва мижознинг қуйидаги шахсга доир маълумотларини олади:

жисмоний шахснинг шахсий идентификация рақами (ЖШШИР), марказий маълумотлар базасида шахсини тасдиқлайдиган маълумотлари бўлмаган чет эл фуқаролари бундан мустасно;

биометрик паспорт ёки идентификацияловчи ID-карта ёхуд хорижий давлатлар фуқаролари учун уларга тенглаштирилган ҳужжатларнинг берилган санаси, амал қилиш муддати ҳамда берилган жойи;

давлат тилида фамилияси, исми, отасининг исми (лотин ёзувида);

жинси, туғилган мамлакати, туғилган жойи, миллати, фуқаролиги ҳамда доимий ёки вақтинча яшаш жойи ҳақидаги маълумотлар;

в) мижоздан реал вақт режимида олинган фотосуратни ёки видеотасвирдаги фотосуратни марказий маълумотлар базасидан олинган фотосурат билан (агар мавжуд бўлса) автоматлаштирилган ҳолда (инсон омилисиз) солиштиради;

г) мижоз билан боғланишда фойдаланиладиган мобил телефон рақами айнан ушбу мижоз томонидан фойдаланилаётганлигини аниқлаш имконини берувчи усул (мобил телефонга боғланиш, SMS хабар юбориш) ёрдамида текширади;

д) қабул қилинган маълумотларни ички назорат қоидаларига мувофиқ рўйхат билан автоматлаштирилган ҳолда (инсон омилисиз) солиштиради.

10. Ўйин ташкилотчиси мижозни рақамли идентификация қилишда ўз ахборот тизимларидан ёки шартнома асосида учинчи шахслар томонидан тақдим этилган ахборот тизимларидан фойдаланади.

11. Мижозларни рақамли идентификация қилиш учун фойдаланиладиган ахборот тизимлари:

Ўзбекистон Республикаси ҳудудидаги серверларда жойлашган бўлиши (мижоз билан онлайн видеоконференция сессиясини ўтказиш учун фойдаланиладиган серверлар бундан мустасно);

ахборотни узатишда ўзаро шифрлашни таъминлаши;

фақат реал вақт режимида яратилган фотосурат ва (ёки) видеотасвирдан фойдаланишни таъминлаши;

фотосурат ва (ёки) видеотасвир алмаштириш ҳамда бузишдан, илгари яратилган фотосурат ва (ёки) видеотасвирдан фойдаланишдан ҳимояланган бўлиши;

идентификация қилишда мижозлар томонидан бошқа мижозларнинг фотосурати ва (ёки) видеотасвиридан фойдаланишга бўлган уринишларни аниқлаш имконини бериши лозим.

12. Мижозни рақамли идентификация ва рақамли аутентификация қилишда:

фотосурат ва (ёки) видеотасвир рангли бўлиши;

видеотасвир товушли бўлиши;

мижознинг юзи қисман ёки тўлиқ яширилмаган бўлиши, мижознинг юзига соя тушмаслиги, шунингдек, мижоз юзни қоплайдиган кўзойнакда (шаффоф ойнали кўзойнакдан ташқари) бўлмаслиги;

видео фонни ўзгартириш ёки ретуш технологиясидан фойдаланмаслик;

фотосурат ва (ёки) видеотасвирда мижознинг юзи яққол кўриниши керак.

Ўйин ташкилотчиси томонидан мижозлар билан шартнома тузиш вақтида уларнинг шахсга доир маълумотларини олиш мақсадида Жиноий фаолиятдан олинган даромадларни легаллаштиришга қарши курашиш бўйича молиявий чоралар ишлаб чиқувчи гуруҳнинг (ФАТФ) талабларидан келиб чиқиб, «Ўз мижозингни бил» (KYC ва e-KYC) ва «Жиноий фаолиятдан олинган даромадларни легаллаштиришга ва терроризмни молиялаштиришга қарши курашиш» (AML/CFT) тизимларига мувофиқ мижозларни текшириш тизими амалга оширилади.

Мижоз томонидан тақдим этилган маълумотлар марказий маълумотлар базаси маълумотларига, шунингдек, текшириш учун дастурий маҳсулотлардан олинган маълумотларга мос келса ва ҳақиқий бўлса, мижоз идентификация қилинган ва маълумотлар верификациядан ўтган ҳисобланади.

13. Рақамли идентификация қилишдан ўтгандан сўнг мижозга нисбатан қонун ҳужжатларида белгиланган тартибда тегишли текшириш чоралари қўлланилади.

4-боб. Якунловчи қоидалар

14. Рақамли идентификация қилиш жараёнида мижоз анкетасини тўлдириш ва юритиш мижозларни тегишли даражада текширишни тартибга солувчи қонун талабларига мувофиқ амалга оширилади.

15. Қуйидаги ҳолатларда мижозлар рақамли идентификация қилинмайди:

мижоз томонидан тақдим этилган маълумотларнинг ишончлилигига шубҳа туғилган ҳолатларда;

шахс 18 ёшга тўлмаган бўлса;

Ўзбекистон Республикаси жисмоний шахсининг мобил телефон рақамидаги халқаро мамлакат коди билан миллий код ўртасидаги тафовут мавжуд бўлса, шунингдек, унинг IP-манзили Ўзбекистон Республикасидан ташқарида жойлашган бўлса;

телефон рақамини рўйхатга олиш давомида чет эллик жисмоний шахс томонидан фуқаролиги кўрсатилган давлатнинг халқаро кодига мос келмайдиган мобил телефон рақами кўрсатилса ёки унинг IP-манзили бошқа давлатда жойлашган бўлса;

шахсни тасдиқловчи ҳужжатдаги фотосуратнинг ушбу Низомга мувофиқ тайёрланган фотосурат ва (ёки) видеоёзувга ҳамда марказий маълумотлар базасига жойлаштирилган фотосуратга мос келишига шубҳа мавжуд бўлганда;

мижоздан олинган маълумотлар ва марказий маълумотлар базасида жойлашган маълумотлар ўртасидаги тафовут бўлса;

фотосуратлар ва (ёки) видеоёзувларнинг ушбу Низом талабларига мос келмаса;

мижознинг шубҳали хатти-ҳаракати, шу жумладан, платформада мижоз томонидан тақдим этилган видеода унинг учинчи шахслар кўрсатмалари бўйича ҳаракат қилаётганлиги, алкоголь маҳсулотлари ёки гиёҳванд моддаларидан мастлик ҳолатида эканлиги, шунингдек, бошқа шубҳали хатти-ҳаракатлар белгилари мавжуд бўлган ҳолатларда.

16. Ўйин ташкилотчиси рақамли идентификация қилишдан ўтган мижозларга нисбатан мижозлардан олинган фотосуратлар ва (ёки) видео ёзувларни, текширишнинг аниқ санаси ва вақти кўрсатилган ҳужжатларни, шунингдек, марказий маълумотлар базасини ишлатган ҳолда маълумотлар ҳаққонийлигини текшириш натижаларини, текшириш учун ишлатилган дастурий маҳсулотларни мижозлар сўровномалари билан биргаликда ички назорат қоидаларига мувофиқ камида беш йил муддат сақлашлари шарт.

Ўйин ташкилотчиси лицензияловчи орган ёки махсус ваколатли органнинг талабига (сўрови) кўра мижозни рақамли идентификация қилиш билан боғлиқ барча маълумотлар ва материалларни тақдим этишлари шарт.

17. Мижозларни рақамли идентификация қилишнинг тўлиқлиги ва сифати учун ўйин ташкилотчилари жавобгардир.

Ўйин ташкилотчиси верификация учун дастурий маҳсулотлардан фойдаланганда, улардан фойдаланиш билан боғлиқ барча хавфларни ўз зиммасига олади.

18. Мазкур Низом талабларини бузганликда айбдор шахслар қонунчилик ҳужжатларида белгиланган тартибда жавоб берадилар.

Вазирлар Маҳкамасининг 2024 йил 6 декабрдаги 814-сон қарорига 4-ИЛОВА

Интернет бутунжаҳон ахборот тармоғида таваккалчиликка асосланган ўйинларни, лотереялар ташкил этиш фаолияти ва букмекерлик фаолиятини амалга оширишга оид айрим тўловлар

1. Интернет бутунжаҳон ахборот тармоғида таваккалчиликка асосланган ўйинларни, лотереялар ташкил этиш фаолияти ва букмекерлик фаолиятини амалга оширишга лицензия қайта расмийлаштирилганлиги учун ариза берилган кунидаги базавий ҳисоблаш миқдорининг 500 баравари миқдорида йиғим.

2. Лицензияни ўзгартирилганлиги учун тегишли лицензияни расмийлаштирилганлиги учун тўланадиган сумманинг 50 фоизи миқдорида давлат божи.

3. Лотереяни ўтказиш шартлари тасдиқланганлиги учун лотерея ташкилотчиси ўтказиладиган ўйин ҳажмининг 0,1 фоизи миқдорида лицензияловчи органнинг ҳисобварағига тўланадиган йиғим. Илгари тасдиқланган шартларга ўзгартириш ва қўшимчалар киритилганда (чиқариладиган лотереялар умумий суммасининг ўзгартирилиши ва тўлдирилишидан ташқари, бунда йиғим тўлиқ миқдорда тўланади), йиғим ушбу шартларни тасдиқлаш учун тўланган сумманинг 50 фоизи миқдорида тўланади.

4. Лицензияловчи орган Интернет тармоғидаги ўйинлар, лотерея ва букмекерлик фаолияти ташкилотчиси томонидан лотереялар ва таваккалчиликка асосланган бошқа ўйинлар тўғрисидаги қонунчилик, шу жумладан, жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисидаги қонунчилик бузилганлиги учун Интернет тармоғидаги ўйинлар, лотерея ва букмекерлик фаолияти ташкилотчисининг устав фонди (устав капитали) энг кам миқдорининг 1 фоизидан ошмаган миқдорда белгиланган тартибда ундириладиган жарима.

Бунда ушбу жариманинг 50 фоизи лицензияловчи органнинг ҳисобварағига йўналтирилади.

5. Ўйинчи томонидан букмекерлик гаровларига ва Интернет тармоғида ўйинига киритилган маблағларнинг суммасидан ҳамда сотилган ҳар бир лотерея чиптасининг нархидан 1 фоизи миқдорида лицензияловчи органнинг ҳисобварағига йўналтириладиган ажратма.

Вазирлар Маҳкамасининг 2024 йил 6 декабрдаги 814-сон қарорига 5-ИЛОВА

Ўзбекистон Республикаси Ҳукуматининг ўз кучини йўқотган деб эътироф этилаётган айрим қарорлари

1. Вазирлар Маҳкамасининг «Пул-буюм лотереялари ўтказишни ташкил этишни такомиллаштириш чора-тадбирлари тўғрисида» 2002 йил 15 ноябрдаги 396-сон қарори .

2. Вазирлар Маҳкамасининг «Лотереялар ўтказишни ташкил этишни такомиллаштиришга доир қўшимча чора-тадбирлар тўғрисида» 2005 йил 2 августдаги 182-сон қарори .

4. Вазирлар Маҳкамасининг «Солиқ имтиёзлари тартибга солиниши муносабати билан Ўзбекистон Республикаси Ҳукуматининг айрим қарорларига ўзгартиришлар киритиш ва баъзиларини ўз кучини йўқотган деб ҳисоблаш тўғрисида» 2009 йил 17 июндаги 168-сон қарорига 2-илованинг 29-банди .

5. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш, шунингдек, баъзиларини ўз кучини йўқотган деб ҳисоблаш тўғрисида («Ўзбекистон Республикасининг айрим қонун ҳужжатларига ўзгартиш ва қўшимчалар киритиш, шунингдек, айрим қонун ҳужжатларини ўз кучини йўқотган деб топиш тўғрисида» 2017 йил 14 сентябрдаги ЎРҚ-446-сон Ўзбекистон Республикасининг Қонуни)» 2018 йил 19 январдаги 34-сон қарорига 1-илованинг 15-банди .

6. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида (Ўзбекистон Республикаси Президентининг «Жаҳон банки ва Халқаро молия корпорациясининг «Бизнес юритиш» йиллик ҳисоботида Ўзбекистон Республикасининг рейтингини яхшилашга доир қўшимча чора-тадбирлар тўғрисида» 2019 йил 5 февралдаги ПҚ-4160-сон қарори)» 2019 йил 10 августдаги 661-сон қарорига илованинг 2-банди .

7. Вазирлар Маҳкамасининг «Онлайн назорат-касса машиналари ва виртуал касса тизими қўлланилишини таъминлаш чора-тадбирлари тўғрисида» 2019 йил 23 ноябрдаги 943-сон қарорига 5-илованинг 5-банди .

8. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикаси Президентининг «Меҳнатга ҳақ тўлаш, пенсиялар ва бошқа тўловлар миқдорларини аниқлаш тартибини такомиллаштириш тўғрисида» 2019 йил 21 майдаги ПФ-5723-сон Фармони)» 2019 йил 28 декабрдаги 1046-сон қарорига илованинг 39-банди .

9. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш шунингдек, баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Давлат активларини бошқариш, монополияга қарши курашишни тартибга солиш тизимини ва капитал бозорини тубдан такомиллаштириш чора-тадбирлари тўғрисида» 2019 йил 14 январдаги ПФ-5630-сон ва «2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Фаол инвестициялар ва ижтимоий ривожланиш йили»да амалга оширишга оид Давлат дастури тўғрисида» 2019 йил 17 январдаги ПФ-5635-сон Фармонлари)» 2020 йил 14 апрелдаги 217-сон қарорига 1-илованинг 11-банди .

10. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикасининг «Норматив-ҳуқуқий ҳужжатлар тўғрисида» 2021 йил 20 апрелдаги ЎРҚ-682-сон Қонуни)» 2022 йил 4 апрелдаги 153-сон қарорига илованинг 86-банди .

11. Вазирлар Маҳкамасининг «2022 — 2026 йилларда Хоразм вилояти ҳудудларини комплекс ижтимоий-иқтисодий ривожлантириш ва аҳоли турмуш даражасини янада яхшилашга доир қўшимча чора-тадбирлар тўғрисида» 2022 йил 4 апрелдаги 154-сон қарорига 2-илованинг 31-позицияси.

Ўзбекистон Республикасининг Бош вазири А. АРИПОВ

Тошкент ш.,

2024 йил 6 декабрь,

814-сон

(Қонунчилик маълумотлари миллий базаси, 12.12.2024 й., 09/24/814/1019-сон; 16.12.2025 й., 09/25/791/1167-сон)

lex.uz

Oʻzbekiston Respublikasi Vazirlar Mahkamasining

qarori

TALABLARI VA SHARTLARI

NIZOM

TURLARI HAMDA MIQDORLARI

ROʻYXATI

Oʻzbekiston Respublikasi Prezidentining “Lotereyalar va tavakkalchilikka asoslangan oʻyinlarni tashkil etish va oʻtkazishni tartibga solishni takomillashtirish chora-tadbirlari toʻgʻrisida” 2024-yil 19-apreldagi PF-68-son Farmoni ijrosini taʼminlash chora-tadbirlari toʻgʻrisida

Oʻzbekiston Respublikasi Prezidentining “Lotereyalar va tavakkalchilikka asoslangan oʻyinlarni tashkil etish va oʻtkazishni tartibga solishni takomillashtirish chora-tadbirlari toʻgʻrisida” 2024-yil 19-apreldagi PF-68-son Farmoni ijrosini taʼminlash, shuningdek, lotereyalar va tavakkalchilikka asoslangan oʻyinlarni tashkil etish faoliyatini tartibga solish tizimini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Lotereyalar va tavakkalchilikka asoslangan oʻyinlarni tashkil etish va oʻtkazishni tartibga solishni takomillashtirish chora-tadbirlari toʻgʻrisida” 2024-yil 19-apreldagi PF-68-son Farmoniga muvofiq:

2025-yil 1-yanvardan boshlab Oʻzbekiston Respublikasida Internet butunjahon axborot tarmogʻida tavakkalchilikka asoslangan oʻyinlarni (keyingi oʻrinlarda — Internet tarmogʻidagi oʻyinlar) tashkil etish va bukmekerlik faoliyatini amalga oshirishga ruxsat etilganligi;

lotereya, Internet tarmogʻidagi oʻyinlarni va bukmekerlik faoliyati Oʻzbekiston Respublikasi Istiqbolli loyihalar milliy agentligi (keyingi oʻrinlarda — Agentlik) tomonidan beriladigan litsenziyalar asosida tashkil etilishi;

Agentlik lotereya, Internet tarmogʻidagi oʻyinlarini tashkil etish va bukmekerlik faoliyatini tartibga solish hamda litsenziyalash boʻyicha vakolatli organ (keyingi oʻrinlarda — litsenziyalovchi organ) etib belgilanganligi;

Agentlik tomonidan lotereya, Internet tarmogʻidagi oʻyinlarni tashkil etish va bukmekerlik faoliyatini litsenziyalash tartibi belgilanishi nazarda tutilganligi maʼlumot uchun qabul qilinsin.

2. Quyidagilar:

Internet butunjahon axborot tarmogʻida tavakkalchilikka asoslangan oʻyinlarni, lotereyalar tashkil etish faoliyati va bukmekerlik faoliyatini amalga oshirishga qoʻyiladigan litsenziya talablari hamda shartlari 1-ilovaga muvofiq;

Internet butunjahon axborot tarmogʻida tavakkalchilikka asoslangan oʻyinlarni, lotereyalar tashkil etish va oʻtkazishda hamda bukmekerlik faoliyatidagi cheklovlar 2-ilovaga muvofiq;

Internet butunjahon axborot tarmogʻida tavakkalchilikka asoslangan oʻyinlarni, lotereyalar va bukmekerlik faoliyatini tashkil etish faoliyati tashkilotchilarining mijozlarini raqamli (masofadan) identifikatsiya qilish toʻgʻrisidagi nizom 3-ilovaga muvofiq;

Internet butunjahon axborot tarmogʻida tavakkalchilikka asoslangan oʻyinlarni, lotereyalar tashkil etish faoliyati va bukmekerlik faoliyatini amalga oshirishga oid ayrim toʻlovlar turlari hamda miqdorlari 4-ilovaga muvofiq tasdiqlansin.

3. Agentlikning quyidagilarni nazarda tutuvchi Stavkalar va oʻyinchilarning yagona davlat registrini (keyingi oʻrinlarda — Registr) yuritish tartibini joriy etish toʻgʻrisidagi taklifiga rozilik berilsin:

Oʻyinchilar yagona reyestri;

Cheklovlar (taqiqlar), shu jumladan, bukmekerlik garovlarida yoki Internet tarmogʻidagi oʻyinlarda sarflash (yutqazish) mumkin boʻlgan mablagʻlar boʻyicha limitlar yagona reyestri;

Sotib olingan lotereya chiptalari, bukmekerlik garovlari uchun qabul qilingan mablagʻlar va Internet tarmogʻidagi oʻyinlarga kiritilgan mablagʻlar bilan bogʻliq moliyaviy tranzaksiyalar reyestri;

Yutuqlar boʻyicha toʻlovlar reyestri.

Bunda:

a) quyidagilar Registrni tashkil etish va uning faoliyat koʻrsatishining asosiy maqsadlari hisoblanadi:

Internet tarmogʻidagi oʻyinlar, lotereyalar tashkil etish va bukmekerlik faoliyati sohasida pul aylanmalari ustidan nazorat hamda konsolidatsiyalashgan hisobni taʼminlash;

Internet tarmogʻidagi oʻyinlar, lotereya va bukmekerlik tashkilotchisi bilan manfaatlar toʻqnashuvi holatlarida oʻyinchining manfaatlarini himoya qilishni taʼminlash;

oʻyin qaramligiga qarshi kurashish va uning oldini olish;

b) Agentlik Registrni ishlab chiqish boʻyicha buyurtmachi vazifasini bajaradi;

v) “Davlat axborot tizimlarini yaratish va qoʻllab-quvvatlash boʻyicha yagona integrator “UZINFOCOM” MCHJ Registrni ishlab chiquvchi va uning operatori hisoblanadi;

g) quyidagilar moliyalashtirish manbalari hisoblanadi:

Registrni ishlab chiqish ishlari — Agentlik yoki Registr operatorining mablagʻlari;

Registrni texnik qoʻllab-quvvatlash va rivojlantirish — ushbu qarorga 4-ilovaning 5-bandida nazarda tutilgan mablagʻlarning 50 foizi.

4. Belgilansinki:

litsenziyalovchi organ tomonidan berilgan litsenziyalar asosida tashkil etilgan lotereya, Internet tarmogʻidagi oʻyinlar va bukmekerlik garovlarida qatnashish qimor va boshqa tavakkalchilikka asoslangan oʻyinlarda qonuniy qatnashish hisoblanadi;

lotereyalar anʼanaviy (lotereya chiptalarini qogʻoz shaklda chiqarish) va elektron shaklda tashkil etiladi;

Internet tarmogʻidagi oʻyinlar, lotereya tashkil etish va bukmekerlik faoliyatini amalga oshirish uchun 5 yil muddatga namunaviy (oddiy) litsenziyalar beriladi;

Internet tarmogʻidagi oʻyinlar, lotereya va bukmekerlik faoliyati tashkilotchilari oʻz xizmatlarini koʻrsatish uchun Internet jahon axborot tarmogʻi milliy segmentidagi faqatgina bitta domen nomidan foydalanishi mumkin;

Internet tarmogʻidagi oʻyinlar tashkilotchilarining oʻyinlar dasturiy taʼminoti hamda lotereyalar tashkilotchilarining tasodifiy raqamlar generatori texnologiyalari litsenziyalovchi organ tomonidan belgilanadigan tegishli muvofiqlikni baholash boʻyicha organlarning va sinov laboratoriyalarning sertifikatiga ega boʻlishlari shart;

lotereyalar tashkil etishdan yigʻilgan mablagʻlar gʻoliblarga yutuq (sovrin) sifatida anʼanaviy tarzda tashkil etilgan lotereyalar uchun kamida 50 foiz hamda elektron shaklda esa — kamida 75 foiz miqdorida taqsimlanadi (toʻlanadi);

Internet tarmogʻidagi oʻyinlarni, lotereya tashkil etish va bukmekerlik faoliyatini amalga oshirishga litsenziya berishdan hamda litsenziyani oʻzgartirishdan tushadigan davlat bojining 20 foizi litsenziyalovchi organning hisobvaragʻiga oʻtkaziladi.

5. Shunday tartib oʻrnatilsinki, unga muvofiq:

a) bir vaqtning oʻzida quyidagi mezonlardan kamida ikkitasi mavjud boʻlganda, qimor va tavakkalchilikka asoslangan boshqa oʻyinlar, shu jumladan, Internet tarmogʻidagi oʻyinlar, bukmekerlik garovi va lotereyalarning (keyingi oʻrinlarda — oʻyinlar) oʻtkazish joyi sifatida Oʻzbekiston Respublikasi tan olinadi:

oʻyinchi Oʻzbekiston Respublikasining fuqarosi boʻlishi;

oʻyin Oʻzbekiston Respublikasining hududida tashkil etilishi;

oʻyinchi Oʻzbekiston Respublikasining hududidan oʻyinda ishtirok etishi;

oʻyinga kirish uchun Oʻzbekiston Respublikasining hududida roʻyxatdan oʻtgan IP-manzildan va (yoki) Oʻzbekiston Respublikasining xalqaro kodi mavjud boʻlgan mobil telefon raqamidan foydalanish;

oʻyinga pul kiritish hamda chiqarish uchun Oʻzbekiston Respublikasining tijorat banki tomonidan emissiya qilingan bank kartasidan foydalanilganda yoki toʻlovlarga ishlov berish va ularning kliringi Oʻzbekiston Respublikasi hududida amalga oshirilganda;

oʻyin Oʻzbekiston Respublikasining hududida yashovchi oʻyinchilar uchun moʻljallanganda, shu jumladan, davlat tilida taqdim etilganda yoki reklama qilinganda;

b) Internet tarmogʻidagi oʻyinlar, elektron shakldagi lotereyalar va bukmekerlik tashkilotchilari yangi oʻyinchilarni roʻyxatdan oʻtkazish hamda bukmekerlik garovlariga stavkalarni qabul qilish, internet tarmogʻidagi oʻyinlarga pul kiritish faqat elektron shaklda Registrdan foydalangan va oʻyinchini shaxsi tasdiqlangan holda, oʻzining veb-sayti orqali amalga oshiriladi;

v) Agentlikka quyidagi vakolatlar beriladi:

Oʻzbekiston Respublikasi rezidentlariga tavakkalchilikka asoslangan oʻyinlar va lotereya tashkil etish hamda oʻtkazish sohasida noqonuniy xizmatlar koʻrsatuvchi xorijiy yuridik shaxslarning (keyingi oʻrinlarda — xorijiy yuridik shaxslar) faoliyatini tekshirish. Bunda ushbu tekshirishlarga Oʻzbekiston Respublikasining tadbirkorlik subyektlari faoliyati ustidan davlat nazorati sohasidagi qonunchilik hujjatlari tatbiq etilmaydi;

lotereya va tavakkalchilikka asoslangan oʻyinlarni tashkil etish hamda oʻtkazish sohasidagi qonunchilik hujjatlarini buzganlik uchun xorijiy yuridik shaxslarga nisbatan jarimalar qoʻllash. Bunda ushbu jarimaning 50 foizi litsenziyalovchi organning hisobvaragʻiga yoʻnaltiriladi;

lotereya va Internet tarmogʻidagi oʻyinlarni tashkil etish, bukmekerlik faoliyatini litsenziyalashda, shuningdek, lotereyalar va Internet tarmogʻidagi oʻyinlarni tashkil etish va bukmekerlik faoliyatini tartibga solish hamda nazorat qilishda asoslantirilgan mulohazadan foydalanish;

g) litsenziyalovchi organ tomonidan qoʻyidagilar yuritiladi:

Internet tarmogʻidagi tavakkalchilikka asoslangan oʻyinlar, lotereya va bukmekerlik garovlarida qatnashishi taqiqlangan Oʻzbekiston Respublikasining fuqarolari va chet el fuqarolarining toifalari roʻyxati (keyingi oʻrinlarda — cheklovlar roʻyxati);

tavakkalchilikka asoslangan oʻyinlarga qaramligi mavjud shaxslar roʻyxati. Mazkur roʻyxatga jismoniy shaxs oʻz arizasiga 6 oydan 5 yilgacha muddatga yoki uning yaqin qarindoshining arizasiga muvofiq sudning qarori asosida 5 yil muddatga kiritiladi.

6. Agentlik manfaatdor vazirliklar va idoralar bilan birgalikda:

a) ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin;

b) uch oy muddatda fuqarolarning yoshi, sogʻligʻi, daromad manbai va boshqa maʼlumotlarni inobatga olgan holda, Internet jahon axborot tarmogʻida tavakkalchilikka asoslangan oʻyinlar, lotereyalar va bukmekerlik garovlarda qatnashishi taqiqlangan Oʻzbekiston Respublikasi fuqarolarining toifalari roʻyxatini ishlab chiqsin va tasdiqlasin;

Raqamli texnologiyalar vazirligining texnik koʻmagida cheklovlar roʻyxati tasdiqlangan soʻng ikki oy muddatda Registr tegishli maʼlumotlardan foydalanish uchun vazirlik va idoralarining axborot tizimlari hamda bazalariga ulanishini taʼminlasin.

7. Agentlik 2025-yil 1-yanvarga qadar Internet butunjahon axborot tarmogʻida tavakkalchilikka asoslangan oʻyinlarni, lotereya tashkil etish va bukmekerlik faoliyatini litsenziyalash, Lotereyalar tashkil etish va oʻtkazish, Bukmekerlik faoliyatini tashkil etish va oʻtkazish, Internet butunjahon axborot tarmogʻida oʻyinlarni tashkil etish va oʻtkazish tartiblari, Stavkalar va oʻyinchilar yagona davlat registri toʻgʻrisidagi nizomlarni, shuningdek, Internet butunjahon axborot tarmogʻida tavakkalchilikka asoslangan oʻyinlar, lotereyalar va bukmekerlik faoliyati tashkilotchilariga hamda Oʻzbekiston Respublikasi rezidentlariga lotereyalar va tavakkalchilikka asoslangan oʻyinlarni tashkil etish va oʻtkazish sohasida noqonuniy xizmatlar koʻrsatuvchi xorijiy yuridik shaxslarga jarima qoʻllash tartibini ishlab chiqsin va tasdiqlasin.

8. Oʻzbekiston Respublikasi Ichki ishlar vazirligi, Markaziy bank, Soliq qoʻmitasi, Agentlik manfaatdor vazirlik va idoralar bilan birgalikda ikki oy muddatda qonunga xilof ravishda qimor oʻyinlarini tashkil etish va oʻtkazish, shu jumladan, qimorxonalar tashkil etish va ularni saqlashni hamda oʻyinlarga pul kiritish uchun xalqaro toʻlov tizimlaridan foydalanish holatlarini aniqlash va ularning oldini olish boʻyicha kompleks chora-tadbirlar ishlab chiqilishi va amalga oshirilishini taʼminlasin.

9. Oʻzbekiston Respublikasi Hukumatining 5-ilovaga muvofiq ayrim qarorlari oʻz kuchini yoʻqotgan deb hisoblansin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda Oʻzbekiston Respublikasi Istiqbolli loyihalar milliy agentligi direktori D.R. Li zimmasiga yuklansin.

Vazirlar Mahkamasining 2024-yil 6-dekabrdagi 814-son qaroriga 1-ILOVA

Internet butunjahon axborot tarmogʻida tavakkalchilikka asoslangan oʻyinlarni, lotereyalar tashkil etish faoliyati va bukmekerlik faoliyatini amalga oshirishga qoʻyiladigan litsenziya

Quyidagilar Internet butunjahon axborot tarmogʻida tavakkalchilikka asoslangan oʻyinlarni (keyingi oʻrinlarda — Internet tarmogʻidagi oʻyinlar), lotereyalar tashkil etish faoliyatini hamda bukmekerlik faoliyatini amalga oshirishga qoʻyiladigan litsenziya talablari va shartlari hisoblanadi:

a) faoliyatning faqat Oʻzbekiston Respublikasining rezidentlari — yuridik shaxslar tomonidan amalga oshirilishi;

b) Oʻzbekiston Respublikasi hududidagi serverlarda joylashgan elektron platforma mavjudligi;

v) Internet tarmogʻida oʻyinlarni va lotereya tashkil etish faoliyati hamda bukmekerlik faoliyati tashkilotchilari faqat mazkur faoliyat turlari bilan shugʻullanishga haqli. Bunda bir paytning oʻzida Internet butunjahon axborot tarmogʻida tavakkalchilikka asoslangan oʻyinlarni va lotereyalar tashkil etish faoliyatini va bukmekerlik faoliyatini amalga oshirish uchun har bir faoliyat turi uchun alohida litsenziya olish mumkin;

g) ariza berilgan sanada mablagʻ shaklida shakllantirilgan quyidagi ustav kapitali mavjudligi:

Internet tarmogʻida oʻyinlar va bukmekerlik faoliyati tashkilotchisi uchun bazaviy hisoblash miqdorining kamida bir yuz ellik ming baravari miqdorida;

lotereya tashkilotchisi — bazaviy hisoblash miqdorining kamida ellik besh ming baravari miqdorida.

Ustav kapitalini shakllantirish uchun kreditga, garovga olingan mablagʻlardan va majburiyatlar yuklatilgan boshqa mablagʻlardan, shuningdek, jinoiy faoliyatdan olingan mablagʻlardan foydalanish taqiqlanadi;

d) yutuqlar boʻyicha qarzdorlikni toʻlash, stavkalarni qaytarib berish, soliq majburiyatlar va boshqa qarzdorliklarni qoplash maqsadida:

Internet tarmogʻida oʻyinlar va bukmekerlik faoliyati tashkilotchisi uchun bazaviy hisoblash miqdorining kamida yetmish besh ming baravari miqdorida, lotereya tashkilotchisi — bazaviy hisoblash miqdorining kamida qirq ming baravari miqdorida mablagʻ shaklida rezerv fondini litsenziyalovchi organning Oʻzbekiston Respublikasining tijorat bankida alohida hisobvaraqda zaxiraga qoʻyish;

mazkur bandning ikkinchi xatboshisida belgilangan tegishli summaga bank kafolati yoki sugʻurta tashkilotining sugʻurta polisini taqdim qilish;

e) Internet tarmogʻida oʻyinlar va lotereya tashkil etish faoliyati hamda bukmekerlik faoliyatini amalga oshirish, jinoiy faoliyatdan olingan daromadlarni legallashtirish, terrorizmni moliyalashtirishga va ommaviy qirgʻin qurollarining tarqalishini moliyalashtirishga qarshi kurashish, shaxsga doir maʼlumotlarni saqlash va ulardan foydalanish hamda reklama sohasidagi Oʻzbekiston Respublikasi qonunchilik hujjatlari talablariga rioya qilish;

j) litsenziat faoliyatini amalga oshirish bilan bogʻliq maʼlumotlarni vakolatli organning soʻroviga binoan bepul taqdim etish;

z) Internet jahon axborot tarmogʻi milliy segmentidagi faqat bitta domen nomidan foydalangan holda faoliyatni amalga oshirish;

i) Internet tarmogʻida oʻyinlar va lotereya tashkil etish faoliyati hamda bukmekerlik faoliyati tashkilotchilarini boshqarishi:

terroristik faoliyatda yoki ommaviy qirgʻin qurollarini tarqatishda ishtirok etgan yoki ishtirok etishda gumon qilinayotgan shaxslar tomonidan;

iqtisodiy jinoyatlar, shuningdek, jinoiy faoliyatdan olingan daromadlarni legallashtirish, terrorizm, ommaviy qirgʻin qurollarini tarqatish, ularni moliyalashtirish, uyushgan jinoyatchilik, giyohvand moddalar noqonuniy savdosi, korrupsiya va axborot texnologiyalari bilan bogʻliq jinoyatlarni sodir etganlik uchun gumonlanayotgan yoki sudlanganligi olib tashlanmagan yoxud sudlanganlik holati tugallanmagan shaxslar tomonidan;

yakka holda ijro etuvchi organ funksiyalarini bajargan, kollegial ijro etuvchi organ tarkibiga kirgan, Internet tarmogʻida oʻyinlarni va lotereyalar tashkil etish faoliyatini yoki bukmekerlik faoliyatni amalga oshirgan yuridik shaxslarning, ushbu shaxslarning aybi bilan yoʻl qoʻyilgan litsenziya talablari va shartlari buzilganligi uchun koʻrsatib oʻtilgan yuridik shaxslarda faoliyatning tegishli turini amalga oshirishga berilgan litsenziyalarning amal qilishi toʻxtatilgan paytda, agar bunday toʻxtash paytidan boshlab uch yildan kam vaqt oʻtgan boʻlsa, muassislari yoki bosh hisobchilari boʻlgan shaxslar tomonidan;

yuridik shaxs bankrot deb eʼtirof etilgan paytda va eʼtirof etilgan paytdan boshlab ikki yil oʻtmagan boʻlsa, yakka holda ijro etuvchi organ funksiyalarini bajargan yoki kollegial ijro etuvchi organ tarkibiga kirgan shaxslar tomonidan yoʻl qoʻymaslik;

k) Internet tarmogʻida oʻyinlar, lotereyalar tashkil etish faoliyati hamda bukmekerlik faoliyati tashkilotchilarining ustav kapitalida quyidagilarning mulkdori va (yoki) oxirgi benefitsiar mulkdori:

“i” bandida koʻrsatilgan shaxslarning;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish sohasida xalqaro hamkorlikda ishtirok etmayotgan davlatlarda roʻyxatdan oʻtgan kompaniyalar hamda doimiy yashayotgan, turgan yoki roʻyxatga olingan shaxslarning boʻlishiga (ishtirok etishiga) yoʻl qoʻymaslik;

l) “i” va “k” bandlarda koʻrsatilgan shaxslarning Internet tarmogʻida oʻyinlar va lotereyalar tashkil etish faoliyati hamda bukmekerlik faoliyati tashkilotchilarini bosh hisobchi sifatida ishga qabul qilmaslik;

m) taʼsischilari boʻlgan yuridik shaxslarning haddan tashqari (oxirgi benefitsiar mulkdorgacha uchta pogʻonadan koʻp) darajalarga tabaqalashtirilgan Internet tarmogʻida oʻyinlarni va lotereya tashkil etish faoliyati hamda bukmerkerlik faoliyati tashkilotchisi faoliyatiga yoʻl qoʻymaslik;

n) Internet tarmogʻida oʻyinlar, bukmekerlik garovlarida ishtirok etish uchun mablagʻlarni qabul qilish, lotereya chiptalarini sotib olish va yutuqlarni toʻlash faqat Stavkalar va oʻyinchilarning yagona davlat registri orqali amalga oshirish;

o) Internet tarmogʻida oʻyinlar, bukmekerlik garovlari va lotereya chiptalarini sotib olish uchun mablagʻlarni kiritish boʻyicha belgilangan limitlar hamda internet tarmogʻida tavakkalchilikka asoslangan oʻyinlarni lotereyalar tashkil etish hamda oʻtkazish va bukmekerlik faoliyatidagi taqiqlarga rioya qilish;

p) Internet tarmogʻida oʻyinlar, lotereyalar va bukmekerlik faoliyati tashkilotchisining ustav kapitalidagi ulushini jismoniy va yuridik shaxslarga, shu jumladan, norezidentlarga realizatsiya qilish masalalarini litsenziyalovchi organ bilan kelishish;

r) Internet tarmogʻida oʻyinlar, lotereyalar va bukmekerlik faoliyati tashkilotchisining rahbariyati (direktori va uning oʻrinbosarlari), bosh hisobchi, jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurollarining tarqalishini moliyalashtirishga qarshi kurashish boʻyicha tarkibiy boʻlinma rahbarini oʻzgartirish masalalarini litsenziyalovchi organ bilan kelishish.

Lotereyalar tashkilotchilariga qoʻyiladigan qoʻshimcha litsenziya talablari va shartlari quyidagilar hisoblanadi:

a) chiqarilayotgan va muomaladagi oʻyin chiptalari hajmi faoliyatning birinchi yili mobaynida — litsenziat oʻz sarmoyasining besh baravaridan, faoliyatning ikkinchi yili mobaynida — oʻn baravaridan va faoliyatning keyingi yillarida — yigirma besh baravaridan ortiq boʻlmasligi kerak. Litsenziatning oʻz sarmoyasi miqdori yetarli boʻlmagan taqdirda, lotereyalar moʻljallanayotgan hajmda faqat moliya tashkilotlarining zarur miqdorlarda taʼminlash kafolati mavjud boʻlganda oʻtkazilishi mumkin;

b) oʻyinlarni faqat litsenziyalovchi organ tomonidan belgilanadigan tegishli muvofiqlikni baholash boʻyicha organlarning va sinov laboratoriyalarning sertifikatiga ega yutuqli chiptalarni tasodifiy tanlab olish jarayoniga inson omilining biron-bir taʼsirini toʻliq istisno qiluvchi texnologiyalar va jihozlarni, shu jumladan, tasodifiy raqamlar generatorini qoʻllagan holda oʻtkazish;

v) yutuqli lotereya chiptalari ishlab chiqarish davomida aniqlanadigan yoxud bir yoki bir necha chiptalar uchun qisman oʻyinlar oʻtkaziladigan tirajsiz lotereyalarni oʻtkazmaslik.

Xizmatlarni koʻrsatish uchun foydalanayotgan oʻyinlarning dasturiy taʼminoti litsenziyalovchi organ tomonidan belgilanadigan tegishli muvofiqlikni baholash boʻyicha organlarning va sinov laboratoriyalarning sertifikatiga ega boʻlishi Internet tarmogʻidan oʻyinlar tashkilotchisining qoʻshimcha litsenziya talabi va sharti hisoblanadi.

Vazirlar Mahkamasining 2024-yil 6-dekabrdagi 814-son qaroriga 2-ILOVA

Internet butunjahon axborot tarmogʻida tavakkalchilikka asoslangan oʻyinlarni, lotereyalar tashkil etish va oʻtkazishda hamda bukmekerlik faoliyatidagi cheklovlar

Internet butunjahon axborot tarmogʻida tavakkalchilikka asoslangan oʻyinlarni, lotereya tashkil etish va oʻtkazishdagi hamda bukmekerlik faoliyatini amalga oshirishda quyidagilar taqiqlanadi:

1. Oʻn sakkiz yoshga toʻlmagan shaxslarga tegishli hisobraqamlardan, shu jumladan, bank kartasi hisobraqamlaridan, tavakkalchilikka asoslangan oʻyinlar, lotereyalar va bukmekerlik garovlarida ishtirok etishi, yutishi yoki yutqazishi bilan bogʻliq toʻlovlar amalga oshirilishi.

2. Lotereya biletlarni sotish punktlaridan tashqari oʻyinchilar bevosita ishtiroki va boʻlishi bilan bogʻliq tavakkalchilikka asoslangan oʻyinlarni oʻtkazish uchun moʻljallangan statsionar yoki koʻchma oʻyin zallari, kazino, oʻyin avtomatlar zallari yoki boshqa oʻyin muassasalarining tashkil etilishi.

3. Quyidagi bukmekerlik garovlarini tashkil etish va oʻtkazish:

Oʻzbekiston Respublikasining hududida va Oʻzbekiston Respublikasi fuqarolari ishtirokida hodisalarga (sport oʻyinlari va musobaqalari, siyosiy jarayonlar, tanlovlar va boshqalar), bundan xalqaro federatsiyalar qoidalar asosida tegishli darajada tayyorgarlik, nazorat va hakamlikni taʼminlangan holda, tomoshabinlar ishtirokida oʻtkaziladigan sport oʻyinlari va xalqaro darajadagi hodisalar mustasno;

bolalar va oʻsmirlar sport musobaqalariga.

Vazirlar Mahkamasining 2024-yil 6-dekabrdagi 814-son qaroriga 3-ILOVA

Internet butunjahon axborot tarmogʻida tavakkalchilikka asoslangan oʻyinlarni, lotereyalar va bukmekerlik faoliyatini tashkil etish faoliyati tashkilotchilarining mijozlarini raqamli (masofadan) identifikatsiya qilish toʻgʻrisida

1-bob. Umumiy qoidalar

1. Mazkur Nizom Oʻzbekiston Respublikasining “Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisida”gi Qonuni asosida ishlab chiqilgan boʻlib, Internet tavakkalchilikka asoslangan oʻyinlar, lotereyalar va bukmekerlik faoliyatini koʻrsatishni (keyingi oʻrinlarda — oʻyin) tashkil etish boʻyicha xizmatlarni taqdim etish vaqtida Oʻzbekiston Respublikasi fuqarolari hamda chet ellik fuqarolarni raqamli (masofadan) identifikatsiya qilish tartibini belgilaydi.

2. Ushbu Nizomda quyidagi tushunchalardan foydalaniladi:

verifikatsiya — mijozning identifikatsiya maʼlumotlarini tekshirish tartib-taomillari;

identifikatsiya — mijozning identifikatsiya maʼlumotlarini aniqlash tartib-taomili;

ichki nazorat qoidalari — Internet tarmogʻida tavakkalchilikka asoslangan oʻyinlar, lotereya va bukmekerlik faoliyati tashkilotchilari uchun jinoiy faoliyatdan olingan daromadlarni legallashtirish, terrorizmni moliyalashtirish va ommaviy qirgʻin qurolini tarqatishni moliyalashtirishga qarshi kurashish boʻyicha ichki nazorat qoidalari;

mijoz — Internetda tavakkalchilikka asoslangan oʻyinlarni, lotereyalar va bukmekerlik faoliyatini tashkil etish boʻyicha tashkilotchilarning kontragenti sifatida bitimlarni (operatsiyalar) amalga oshiruvchi jismoniy shaxs, shu jumladan, chet ellik jismoniy shaxs.

platforma — oʻyinlar bilan bogʻliq xizmatlarni koʻrsatish boʻyicha elektron maydoncha (platforma);

raqamli (masofadan) identifikatsiya qilish — axborot tizimlaridan foydalangan holda masofadan mijozlarni identifikatsiya qilish va shaxsini aniqlash;

roʻyxat — terrorizmga, ommaviy qirgʻin qurolini tarqatishga qarshi kurashuvchi davlat organlari va Oʻzbekiston Respublikasining boshqa vakolatli organlari taqdim etayotgan maʼlumotlar, shuningdek, chet davlatlarning vakolatli organlari va xalqaro tashkilotlari rasmiy kanallar orqali taqdim etayotgan maʼlumotlar asosida Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti tomonidan tuzilgan terrorchilik faoliyatida yoki ommaviy qirgʻin qurolini tarqatishda ishtirok etayotgan yoxud ishtirok etishda gumon qilinayotgan shaxslar roʻyxati;

oʻyin tashkilotchisi — Internet tarmogʻida tavakkalchilikka asoslangan oʻyinlarni, lotereyalar va bukmekerlik faoliyati tashkil etish bilan shugʻullanish uchun belgilangan tartibda litsenziya olgan yuridik shaxs.

3. Oʻyin tashkilotchisi mijozlarni raqamli identifikatsiya qilish tizimini joriy etishdan avval jinoiy daromadlarni legallashtirish, terrorizmni moliyalashtirish va ommaviy qirgʻin qurollarini tarqatish xavfi darajasini oʻrganish, tahlil va identifikatsiya qilish, baholash, monitoringini yuritish, boshqarish, hujjatlashtirish boʻyicha ichki qoidalarni, shuningdek, ularni qisqartirish boʻyicha chora-tadbirlarni oʻz ichiga oluvchi raqamli identifikatsiya qilish tartibini taʼminlashi shart.

2-bob. Mijozlarni raqamli identifikatsiya qilishni tashkil etish

4. Mijozlarni raqamli identifikatsiya qilishda quyidagi usullardan foydalaniladi:

mijoz taqdim qilgan maʼlumotlarga asoslangan holda, mijoz shaxsini oʻyin tashkilotchisi masʼul xodimi tomonidan tekshirish va identifikatsiya qilish;

oʻyin tashkilotchisi axborot tizimlari tomonidan real vaqt rejimida inson omilisiz mijozning shaxsini tekshirish va identifikatsiya qilish.

5. Oʻyin tashkilotchisi ushbu Nizomning 4-bandi uchinchi xatboshisida qayd etilgan usul boʻyicha mijozning shaxsini tekshirish va identifikatsiya qilishda:

shaxsni tasdiqlovchi hujjatning (Oʻzbekiston Respublikasi fuqarolari uchun biometrik pasport yoki identifikatsiyalovchi ID-karta yoki xorijiy davlatlar fuqarolari uchun ularga tenglashtirilgan hujjatlar) ichki nazorat qoidalari talablariga muvofiq tegishli maʼlumotlarga ega boʻlgan qismlari fotosuratlarini mijozdan qabul qiladi;

ushbu Nizom talablariga muvofiq mijozning fotosurati va (yoki) videotasvirini qabul qiladi;

Oʻzbekiston Respublikasi fuqarolari, chet el fuqarolari hamda fuqaroligi boʻlmagan shaxslar, belgilangan tartibda Oʻzbekiston hududida doimiy yoki vaqtincha yashab turgan shaxslar toʻgʻrisidagi maʼlumotlarni “Elektron hukumat” tizimining jismoniy va yuridik shaxslar markaziy maʼlumotlar bazalariga (keyingi oʻrinlarda — markaziy maʼlumotlar bazasi) soʻrov yuborish orqali undagi maʼlumotlar bilan solishtiradi;

chet el fuqarolari tomonidan taqdim etilgan elektron tasvirlar va hujjatlar nusxalari (keyingi oʻrinlarda — verifikatsiya uchun dasturiy mahsulotlar) haqiqiyligini taʼminlovchi dasturiy mahsulotlar (axborot tizimlari)dan foydalangan holda maʼlumotlarni solishtiradi;

shaxsni tasdiqlovchi hujjatdagi fotosuratni ushbu Nizomga muvofiq qabul qilingan fotosurat va (yoki) videotasvir bilan, shuningdek, markaziy maʼlumotlar bazasida joylashtirilgan fotosurat bilan (agar mavjud boʻlsa) solishtiradi;

mijoz bilan bogʻlanishda foydalaniladigan mobil telefon raqamini aynan ushbu mijoz tomonidan foydalanilayotganligini aniqlash imkonini beruvchi usul (mobil telefonga bogʻlanish, SMS xabar yuborish) yordamida tekshiradi. Bunda xorijda joylashgan mijozlarni identifikatsiya qilishda mobil raqam oʻrniga elektron pochta manziliga joʻnatilgan kod orqali tasdiqlashga yoʻl qoʻyiladi;

mijozning ichki nazorat qoidalariga muvofiq yuqori xavf toifasiga kirmasligini aniqlash uchun tekshirishlarni amalga oshiradi.

Mijoz toʻgʻrisidagi maʼlumotlar markaziy maʼlumotlar bazasida topilmagan taqdirda, oʻyin tashkilotchisiga mijoz bilan onlayn videokonferensaloqani oʻrnatib, mijozni identifikatsiya qilishiga ruxsat beriladi. Bunda oʻyin tashkilotchisi masʼul xodimi videokonferensaloqa orqali quyidagilarni aniqlashi va videotasvirga tushirilishini taʼminlashi lozim:

mijoz toʻgʻrisidagi maʼlumotlar aniq koʻrinadigan mijozning shaxsini tasdiqlovchi hujjat;

mijoz oʻz shaxsini tasdiqlovchi hujjatga ega boʻlgan davlat;

mijozning ushbu oʻyin tashkilotchisidan xizmatlarni olish istagini audiovizual tasdiqlash (mijozning ogʻzaki nutqi).

Oʻyin tashkilotchisining masʼul xodimi mijoz bilan onlayn video konferensiya tashkil qiladi va mijoz tomonidan taqdim etilgan qoʻyidagi maʼlumotlarning toʻgʻriligini tekshiradi:

mijozning maʼlumotlari aniq koʻringan shaxsini tasdiqlovchi hujjatini;

mijoz ushbu shaxsini tasdiqlovchi hujjatni ushlab turgan holatini;

mijozning shartnoma imzolash istagida ekanligini tasdiqlovchi audiovizual tasdiq (mijozning ogʻzaki nutqi).

Oʻyin tashkilotchisining masʼul xodimi mijoz bilan onlayn videokonferensaloqani oʻrnatib, mijoz tomonidan taqdim qilingan axborotlarning aynan unga tegishliligini tekshiradi.

6. Oʻyin tashkilotchisi raqamli identifikatsiya qilish uchun quyidagilarni taʼminlashi lozim:

a) raqamli identifikatsiya qilish tartibini, shuningdek, mijoz tomonidan taqdim etiluvchi maʼlumotlarga (rasm yoki fayl hajmi, oʻqilishi, formati va boshqalar) qoʻyilgan talablarni belgilovchi ichki hujjatlarni ishlab chiqishi va tasdiqlashi;

b) konfidensiallik va shaxsga doir maʼlumotlar himoyasini taʼminlashi;

v) markaziy maʼlumotlar bazasiga ulangan boʻlishi;

g) verifikatsiya uchun dasturiy mahsulotlar mavjud boʻlishi;

d) shaxsiy platformalariga quyidagilarni taʼminlovchi funksiyalari boʻlishi shart:

shaxsga doir maʼlumotlar subyektining uning shaxsga doir maʼlumotlarini belgilangan tartibda uzatish va qayta ishlashga roziligini olish;

belgilangan tartibda soʻrovlarni shakllantirish va markaziy maʼlumotlar bazasidan javoblarni qabul qilishni avtomatlashtirish;

mijoz tomonidan taqdim etilgan maʼlumotlarni markaziy maʼlumotlar bazasidan yoki tekshirish uchun dasturiy mahsulotlardan olingan maʼlumotlar bilan solishtirish;

mijoz tomonidan kiritilgan maʼlumotlarni roʻyxat hamda Stavkalar va oʻyinchilar yagona davlat reyestrining cheklovlar (taqiqlar) yagona reyestri bilan avtomatik tekshirish;

mijozlar va amalga oshirilgan operatsiyalar toʻgʻrisidagi maʼlumotlar zaxira nusxalarini tizimli shakllantirish, maʼlumotlarning oʻzgarmasligi va saqlanishini hamda ularni qonunchilik hujjatlarida belgilangan muddatlarda keyinchalik saqlash uchun yuklanishi.

7. Verifikatsiya qilish uchun dasturiy mahsulotlarni tanlashda chet ellik jismoniy shaxs davlatining vakolatli davlat organlari tomonidan taqdim etilgan shaxsga doir maʼlumotlarning haqiqiyligini tasdiqlash boʻyicha xizmatlar koʻrsatuvchi dasturiy mahsulotlarga (axborot tizimlari) ustunlik berilishi lozim.

3-bob. Raqamli identifikatsiya qilish tartibi

8. Mijozlarni raqamli identifikatsiya qilish oʻyin tashkilotchisi tomonidan amaliy ish munosabatlari oʻrnatilgan holatda amalga oshiriladi.

Bunda amaliy ish munosabatlariga kirish vaqti sifatida mijozning oʻyinlarda ishtirok etish uchun oʻyin tashkilotchisi platformasiga maʼlumotlarni kiritishining boshlanishi hisoblanadi.

9. Mijozning shaxsini tekshirish va aniqlash jarayonida oʻyin tashkilotchisi tomonidan ushbu Nizomning 4-bandi uchinchi xatboshisida belgilangan tartibda mijozlarni aniqlash uchun foydalaniladigan axborot tizimi:

a) mijozdan shaxsini tasdiqlovchi hujjat (biometrik pasport yoki identifikatsiyalovchi ID-karta yoxud xorijiy davlatlar fuqarolari uchun ularga tenglashtirilgan hujjatlar) seriyasi va raqamini yoki jismoniy shaxsning shaxsiy identifikatsiya raqami va tugʻilgan sanasini yoxud ushbu maʼlumotlardan barchasini hamda ushbu Nizomga muvofiq fotosuratini yoki videotasvirini real vaqt rejimida oladi;

b) markaziy maʼlumotlar bazasiga soʻrov yuboradi va mijozning quyidagi shaxsga doir maʼlumotlarini oladi:

jismoniy shaxsning shaxsiy identifikatsiya raqami (JSHSHIR), markaziy maʼlumotlar bazasida shaxsini tasdiqlaydigan maʼlumotlari boʻlmagan chet el fuqarolari bundan mustasno;

biometrik pasport yoki identifikatsiyalovchi ID-karta yoxud xorijiy davlatlar fuqarolari uchun ularga tenglashtirilgan hujjatlarning berilgan sanasi, amal qilish muddati hamda berilgan joyi;

davlat tilida familiyasi, ismi, otasining ismi (lotin yozuvida);

jinsi, tugʻilgan mamlakati, tugʻilgan joyi, millati, fuqaroligi hamda doimiy yoki vaqtincha yashash joyi haqidagi maʼlumotlar;

v) mijozdan real vaqt rejimida olingan fotosuratni yoki videotasvirdagi fotosuratni markaziy maʼlumotlar bazasidan olingan fotosurat bilan (agar mavjud boʻlsa) avtomatlashtirilgan holda (inson omilisiz) solishtiradi;

g) mijoz bilan bogʻlanishda foydalaniladigan mobil telefon raqami aynan ushbu mijoz tomonidan foydalanilayotganligini aniqlash imkonini beruvchi usul (mobil telefonga bogʻlanish, SMS xabar yuborish) yordamida tekshiradi;

d) qabul qilingan maʼlumotlarni ichki nazorat qoidalariga muvofiq roʻyxat bilan avtomatlashtirilgan holda (inson omilisiz) solishtiradi.

10. Oʻyin tashkilotchisi mijozni raqamli identifikatsiya qilishda oʻz axborot tizimlaridan yoki shartnoma asosida uchinchi shaxslar tomonidan taqdim etilgan axborot tizimlaridan foydalanadi.

11. Mijozlarni raqamli identifikatsiya qilish uchun foydalaniladigan axborot tizimlari:

Oʻzbekiston Respublikasi hududidagi serverlarda joylashgan boʻlishi (mijoz bilan onlayn videokonferensiya sessiyasini oʻtkazish uchun foydalaniladigan serverlar bundan mustasno);

axborotni uzatishda oʻzaro shifrlashni taʼminlashi;

faqat real vaqt rejimida yaratilgan fotosurat va (yoki) videotasvirdan foydalanishni taʼminlashi;

fotosurat va (yoki) videotasvir almashtirish hamda buzishdan, ilgari yaratilgan fotosurat va (yoki) videotasvirdan foydalanishdan himoyalangan boʻlishi;

identifikatsiya qilishda mijozlar tomonidan boshqa mijozlarning fotosurati va (yoki) videotasviridan foydalanishga boʻlgan urinishlarni aniqlash imkonini berishi lozim.

12. Mijozni raqamli identifikatsiya va raqamli autentifikatsiya qilishda:

fotosurat va (yoki) videotasvir rangli boʻlishi;

videotasvir tovushli boʻlishi;

mijozning yuzi qisman yoki toʻliq yashirilmagan boʻlishi, mijozning yuziga soya tushmasligi, shuningdek, mijoz yuzni qoplaydigan koʻzoynakda (shaffof oynali koʻzoynakdan tashqari) boʻlmasligi;

video fonni oʻzgartirish yoki retush texnologiyasidan foydalanmaslik;

fotosurat va (yoki) videotasvirda mijozning yuzi yaqqol koʻrinishi kerak.

Oʻyin tashkilotchisi tomonidan mijozlar bilan shartnoma tuzish vaqtida ularning shaxsga doir maʼlumotlarini olish maqsadida Jinoiy faoliyatdan olingan daromadlarni legallashtirishga qarshi kurashish boʻyicha moliyaviy choralar ishlab chiquvchi guruhning (FATF) talablaridan kelib chiqib, “Oʻz mijozingni bil” (KYC va e-KYC) va “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish” (AML/CFT) tizimlariga muvofiq mijozlarni tekshirish tizimi amalga oshiriladi.

Mijoz tomonidan taqdim etilgan maʼlumotlar markaziy maʼlumotlar bazasi maʼlumotlariga, shuningdek, tekshirish uchun dasturiy mahsulotlardan olingan maʼlumotlarga mos kelsa va haqiqiy boʻlsa, mijoz identifikatsiya qilingan va maʼlumotlar verifikatsiyadan oʻtgan hisoblanadi.

13. Raqamli identifikatsiya qilishdan oʻtgandan soʻng mijozga nisbatan qonun hujjatlarida belgilangan tartibda tegishli tekshirish choralari qoʻllaniladi.

4-bob. Yakunlovchi qoidalar

14. Raqamli identifikatsiya qilish jarayonida mijoz anketasini toʻldirish va yuritish mijozlarni tegishli darajada tekshirishni tartibga soluvchi qonun talablariga muvofiq amalga oshiriladi.

15. Quyidagi holatlarda mijozlar raqamli identifikatsiya qilinmaydi:

mijoz tomonidan taqdim etilgan maʼlumotlarning ishonchliligiga shubha tugʻilgan holatlarda;

shaxs 18 yoshga toʻlmagan boʻlsa;

Oʻzbekiston Respublikasi jismoniy shaxsining mobil telefon raqamidagi xalqaro mamlakat kodi bilan milliy kod oʻrtasidagi tafovut mavjud boʻlsa, shuningdek, uning IP-manzili Oʻzbekiston Respublikasidan tashqarida joylashgan boʻlsa;

telefon raqamini roʻyxatga olish davomida chet ellik jismoniy shaxs tomonidan fuqaroligi koʻrsatilgan davlatning xalqaro kodiga mos kelmaydigan mobil telefon raqami koʻrsatilsa yoki uning IP-manzili boshqa davlatda joylashgan boʻlsa;

shaxsni tasdiqlovchi hujjatdagi fotosuratning ushbu Nizomga muvofiq tayyorlangan fotosurat va (yoki) videoyozuvga hamda markaziy maʼlumotlar bazasiga joylashtirilgan fotosuratga mos kelishiga shubha mavjud boʻlganda;

mijozdan olingan maʼlumotlar va markaziy maʼlumotlar bazasida joylashgan maʼlumotlar oʻrtasidagi tafovut boʻlsa;

fotosuratlar va (yoki) videoyozuvlarning ushbu Nizom talablariga mos kelmasa;

mijozning shubhali xatti-harakati, shu jumladan, platformada mijoz tomonidan taqdim etilgan videoda uning uchinchi shaxslar koʻrsatmalari boʻyicha harakat qilayotganligi, alkogol mahsulotlari yoki giyohvand moddalaridan mastlik holatida ekanligi, shuningdek, boshqa shubhali xatti-harakatlar belgilari mavjud boʻlgan holatlarda.

16. Oʻyin tashkilotchisi raqamli identifikatsiya qilishdan oʻtgan mijozlarga nisbatan mijozlardan olingan fotosuratlar va (yoki) video yozuvlarni, tekshirishning aniq sanasi va vaqti koʻrsatilgan hujjatlarni, shuningdek, markaziy maʼlumotlar bazasini ishlatgan holda maʼlumotlar haqqoniyligini tekshirish natijalarini, tekshirish uchun ishlatilgan dasturiy mahsulotlarni mijozlar soʻrovnomalari bilan birgalikda ichki nazorat qoidalariga muvofiq kamida besh yil muddat saqlashlari shart.

Oʻyin tashkilotchisi litsenziyalovchi organ yoki maxsus vakolatli organning talabiga (soʻrovi) koʻra mijozni raqamli identifikatsiya qilish bilan bogʻliq barcha maʼlumotlar va materiallarni taqdim etishlari shart.

17. Mijozlarni raqamli identifikatsiya qilishning toʻliqligi va sifati uchun oʻyin tashkilotchilari javobgardir.

Oʻyin tashkilotchisi verifikatsiya uchun dasturiy mahsulotlardan foydalanganda, ulardan foydalanish bilan bogʻliq barcha xavflarni oʻz zimmasiga oladi.

18. Mazkur Nizom talablarini buzganlikda aybdor shaxslar qonunchilik hujjatlarida belgilangan tartibda javob beradilar.

Vazirlar Mahkamasining 2024-yil 6-dekabrdagi 814-son qaroriga 4-ILOVA

Internet butunjahon axborot tarmogʻida tavakkalchilikka asoslangan oʻyinlarni, lotereyalar tashkil etish faoliyati va bukmekerlik faoliyatini amalga oshirishga oid ayrim toʻlovlar

1. Internet butunjahon axborot tarmogʻida tavakkalchilikka asoslangan oʻyinlarni, lotereyalar tashkil etish faoliyati va bukmekerlik faoliyatini amalga oshirishga litsenziya qayta rasmiylashtirilganligi uchun ariza berilgan kunidagi bazaviy hisoblash miqdorining 500 baravari miqdorida yigʻim.

2. Litsenziyani oʻzgartirilganligi uchun tegishli litsenziyani rasmiylashtirilganligi uchun toʻlanadigan summaning 50 foizi miqdorida davlat boji.

3. Lotereyani oʻtkazish shartlari tasdiqlanganligi uchun lotereya tashkilotchisi oʻtkaziladigan oʻyin hajmining 0,1 foizi miqdorida litsenziyalovchi organning hisobvaragʻiga toʻlanadigan yigʻim. Ilgari tasdiqlangan shartlarga oʻzgartirish va qoʻshimchalar kiritilganda (chiqariladigan lotereyalar umumiy summasining oʻzgartirilishi va toʻldirilishidan tashqari, bunda yigʻim toʻliq miqdorda toʻlanadi), yigʻim ushbu shartlarni tasdiqlash uchun toʻlangan summaning 50 foizi miqdorida toʻlanadi.

4. Litsenziyalovchi organ Internet tarmogʻidagi oʻyinlar, lotereya va bukmekerlik faoliyati tashkilotchisi tomonidan lotereyalar va tavakkalchilikka asoslangan boshqa oʻyinlar toʻgʻrisidagi qonunchilik, shu jumladan, jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisidagi qonunchilik buzilganligi uchun Internet tarmogʻidagi oʻyinlar, lotereya va bukmekerlik faoliyati tashkilotchisining ustav fondi (ustav kapitali) eng kam miqdorining 1 foizidan oshmagan miqdorda belgilangan tartibda undiriladigan jarima.

Bunda ushbu jarimaning 50 foizi litsenziyalovchi organning hisobvaragʻiga yoʻnaltiriladi.

5. Oʻyinchi tomonidan bukmekerlik garovlariga va Internet tarmogʻida oʻyiniga kiritilgan mablagʻlarning summasidan hamda sotilgan har bir lotereya chiptasining narxidan 1 foizi miqdorida litsenziyalovchi organning hisobvaragʻiga yoʻnaltiriladigan ajratma.

Vazirlar Mahkamasining 2024-yil 6-dekabrdagi 814-son qaroriga 5-ILOVA

Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan ayrim qarorlari

1. Vazirlar Mahkamasining “Pul-buyum lotereyalari oʻtkazishni tashkil etishni takomillashtirish chora-tadbirlari toʻgʻrisida” 2002-yil 15-noyabrdagi 396-son qarori .

2. Vazirlar Mahkamasining “Lotereyalar oʻtkazishni tashkil etishni takomillashtirishga doir qoʻshimcha chora-tadbirlar toʻgʻrisida” 2005-yil 2-avgustdagi 182-son qarori .

4. Vazirlar Mahkamasining “Soliq imtiyozlari tartibga solinishi munosabati bilan Oʻzbekiston Respublikasi Hukumatining ayrim qarorlariga oʻzgartirishlar kiritish va baʼzilarini oʻz kuchini yoʻqotgan deb hisoblash toʻgʻrisida” 2009-yil 17-iyundagi 168-son qaroriga 2-ilovaning 29-bandi .

5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida (“Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish, shuningdek, ayrim qonun hujjatlarini oʻz kuchini yoʻqotgan deb topish toʻgʻrisida” 2017-yil 14-sentabrdagi OʻRQ-446-son Oʻzbekiston Respublikasining Qonuni)” 2018-yil 19-yanvardagi 34-son qaroriga 1-ilovaning 15-bandi .

6. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Jahon banki va Xalqaro moliya korporatsiyasining “Biznes yuritish” yillik hisobotida Oʻzbekiston Respublikasining reytingini yaxshilashga doir qoʻshimcha chora-tadbirlar toʻgʻrisida” 2019-yil 5-fevraldagi PQ-4160-son qarori)” 2019-yil 10-avgustdagi 661-son qaroriga ilovaning 2-bandi .

7. Vazirlar Mahkamasining “Onlayn nazorat-kassa mashinalari va virtual kassa tizimi qoʻllanilishini taʼminlash chora-tadbirlari toʻgʻrisida” 2019-yil 23-noyabrdagi 943-son qaroriga 5-ilovaning 5-bandi .

8. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasi Prezidentining “Mehnatga haq toʻlash, pensiyalar va boshqa toʻlovlar miqdorlarini aniqlash tartibini takomillashtirish toʻgʻrisida” 2019-yil 21-maydagi PF-5723-son Farmoni)” 2019-yil 28-dekabrdagi 1046-son qaroriga ilovaning 39-bandi .

9. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish shuningdek, baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Davlat aktivlarini boshqarish, monopoliyaga qarshi kurashishni tartibga solish tizimini va kapital bozorini tubdan takomillashtirish chora-tadbirlari toʻgʻrisida” 2019-yil 14-yanvardagi PF-5630-son va “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturi toʻgʻrisida” 2019-yil 17-yanvardagi PF-5635-son Farmonlari)” 2020-yil 14-apreldagi 217-son qaroriga 1-ilovaning 11-bandi .

10. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasining “Normativ-huquqiy hujjatlar toʻgʻrisida” 2021-yil 20-apreldagi OʻRQ-682-son Qonuni)” 2022-yil 4-apreldagi 153-son qaroriga ilovaning 86-bandi .

11. Vazirlar Mahkamasining “2022 — 2026-yillarda Xorazm viloyati hududlarini kompleks ijtimoiy-iqtisodiy rivojlantirish va aholi turmush darajasini yanada yaxshilashga doir qoʻshimcha chora-tadbirlar toʻgʻrisida” 2022-yil 4-apreldagi 154-son qaroriga 2-ilovaning 31-pozitsiyasi.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 6-dekabr,

814-son

(Qonunchilik maʼlumotlari milliy bazasi, 12.12.2024-y., 09/24/814/1019-son; 16.12.2025-y., 09/25/791/1167-son)

lex.uz