📅 2024-yil 27-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 27 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 декабря 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 27 December 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тошкент шаҳар кўп тармоқли шифохонасини ташкил этиш тўғрисида
Соғлиқни сақлаш объектларидан самарали фойдаланиш ҳамда аҳолига замонавий, юқори технологик, ихтисослаштирилган тиббий ёрдам кўрсатиш тизимини янада такомиллаштириш мақсадида Вазирлар Маҳкамаси қарор қилади:
1. Қуйидагилар:
а) Вазирлар Маҳкамасининг «Тошкент шаҳар болалар кўп тармоқли шифохонасини ташкил этиш тўғрисида» 2024 йил 24 июлдаги 446-сон қарорига мувофиқ:
«Зангиота-2» шифохонаси фаолияти тугатилиб, унинг бино ва иншоотларида Давлат бюджети ҳисобидан молиялаштириладиган давлат муассасаси шаклидаги 500 ўринга мўлжалланган Тошкент шаҳар болалар кўп тармоқли шифохонаси (кейинги ўринларда — Болалар шифохонаси) ташкил этилганлиги;
«Зангиота-2» шифохонасининг бино ва иншоотлари тегишли ҳудуди билан биргаликда Болалар шифохонасига оператив бошқарув ҳуқуқи асосида бепул берилганлиги;
б) Тошкент шаҳар болалар кўп тармоқли шифохонасининг бино ва иншоотларида 1 000 ўринга мўлжалланган қувват мавжуд эканлиги;
в) Ўзбекистон Республикаси Президентининг «Давлат тиббий суғуртаси механизмларини жорий этишга оид чора-тадбирлар тўғрисида» 2024 йил 5 сентябрдаги ПҚ-311-сон қарорига мувофиқ 2024 йил 1 октябрдан Тошкент шаҳрида Давлат бюджети маблағлари ҳисобидан қопланадиган тиббий ёрдамнинг кафолатланган ҳажмлари (кейинги ўринларда — кафолатланган пакет) доирасидаги тиббий хизматлар ва дори воситалари Давлат тиббий суғуртаси жамғармаси (кейинги ўринларда — Жамғарма) маблағлари ҳисобидан қопланиши маълумот учун қабул қилинсин.
2. Соғлиқни сақлаш вазирлиги, Иқтисодиёт ва молия вазирлиги ҳамда Тошкент шаҳар ҳокимлигининг Болалар шифохонаси негизида 700 ўринга мўлжалланган Тошкент шаҳар кўп тармоқли шифохонасини (кейинги ўринларда — Шифохона) ташкил этиш тўғрисидаги таклифига розилик берилсин.
Бунда қўшимча ташкил этиладиган 100 та ўрин Тошкент шаҳар давлат тиббиёт муассасалари шифо ўринларини мақбуллаштириш ҳисобидан ва 100 та ўрин пулли хизмат кўрсатиш ҳисобидан ташкил этилади.
3. Қуйидагилар Шифохонанинг асосий вазифалари этиб белгилансин:
болалар ва катта ёшдаги аҳоли ўртасида энг кўп тарқалган касалликларнинг асосий йўналишлари (хирургия, педиатрия, лор, терапия, кардиология, неврология, пульмонология, эндокринология ва бошқалар) бўйича ихтисослаштирилган, юқори технологияли диагностика, даволаш ва профилактика тиббий ёрдами кўрсатишга бўлган эҳтиёжни қондириш;
аҳолига кафолатланган пакетга киритилган тиббий хизматлар кўрсатиш;
Тошкент шаҳар туман тиббиёт бирлашмаларига амалий-методик ёрдам кўрсатиш;
Тошкент шаҳар тиббиёт муассасалари амалиётига замонавий тиббиёт технологиялари ва бошқарув усулларини жорий этишда кўмаклашиш;
Тошкент шаҳар тиббиёт муассасаларида тиббий хизматлар кўрсатишнинг замонавий методлари ва технологиялари жорий этилишини методик таъминлаш;
тиббиёт соҳасидаги таълим муассасалари билан ҳамкорликда тиббиёт кадрларини тайёрлашда иштирок этиш;
фундаментал, амалий ва инновацион илмий изланиш ҳамда тадқиқотлар олиб бориш, уларнинг натижаларини кенг жорий этиш бўйича таклифлар ишлаб чиқиш;
хорижий илмий-тадқиқот тиббиёт марказлари, клиникалар ва таълим муассасалари билан ҳамкорлик алоқаларини ривожлантириш, қўшма илмий лойиҳаларни амалга ошириш;
тиббий туризм соҳасида тиббий хизматлар ва юқори малакали тиббиёт кадрларини тайёрлаш, мазкур хизматларни экспорт қилиш.
4. Қуйидагилар Шифохона фаолиятини молиялаштириш манбалари этиб белгилансин:
кафолатланган пакетга киритилган тиббий хизматлар учун Давлат тиббий суғуртаси жамғармаси томонидан ажратиладиган маблағлар;
пулли тиббий хизмат кўрсатишдан олинадиган маблағлар;
жисмоний ва юридик шахсларнинг ҳомийлик хайриялари;
қонунчилик ҳужжатлари билан тақиқланмаган бошқа манбалар.
5. Шифохонага қуйидаги ҳуқуқлар берилсин:
чет эллик ва маҳаллий мутахассисларни бошқарувчи, маслаҳатчи (консультант), тиббиёт ходими сифатида жалб қилиш ва уларга меҳнат бозорининг амалдаги конъюнктурасини ҳисобга олган ҳолда, лавозим маоши ҳамда бошқа тўловларни белгилаш ва тўлаш;
штатлар жадвалини мустақил равишда ишлаб чиқиш ва тасдиқлаш, Шифохона ходимлари меҳнатига ҳақ тўлаш ва уларни моддий рағбатлантириш шартларини бажариладиган ишларнинг мураккаблик даражаси, сифати ва ҳажмига нисбатан табақалаштирилган тарзда мустақил белгилаш;
Шифохона ўринлари сонини эҳтиёждан келиб чиқиб, ўзгартириш ва бўлимлардаги шифо ўринлари сонини белгилаш.
6. Соғлиқни сақлаш вазирлиги:
а) икки ҳафта муддатда:
Шифохонанинг тузилмаси ва уставини тасдиқласин ҳамда унинг белгиланган тартибда давлат рўйхатидан ўтказилишини таъминласин;
Шифохонанинг жиҳозлаш табелини ишлаб чиқиб, тасдиқласин;
б) уч ой муддатда Шифохона фаолиятини йўлга қўйиш учун зарур бўладиган жиҳозлар ҳамда тиббий техника билан таъминлаш чораларини кўрсин.
7. Белгилансинки:
а) Шифохонани сақлаш билан боғлиқ харажатлар Ўзбекистон Республикаси Соғлиқни сақлаш вазирлигига республика бюджетидан ажратилган маблағлар доирасида амалга оширилади.
Бунда мазкур маблағлар Соғлиқни сақлаш вазирлиги томонидан Давлат тиббий суғурта жамғармасига ўтказиб берилади;
б) Шифохона Болалар шифохонасининг ҳуқуқ ва мажбуриятлари, шунингдек, тузилган шартномалари бўйича ҳуқуқий вориси ҳисобланади.
8. Тошкент шаҳар ҳокимлиги уч ой муддатда Шифохонанинг бино ва иншоотларида зарур қурилиш ҳамда таъмирлаш ишларини амалга ошириш орқали уни тегишли тиббий ёрдам кўрсатишга мослаштириш чораларини кўрсин.
9. Вазирлар Маҳкамасининг «Тошкент шаҳар болалар кўп тармоқли шифохонасини ташкил этиш тўғрисида» 2024 йил 24 июлдаги 446-сон қарори ўз кучини йўқотган деб ҳисоблансин.
10. Мазкур қарорнинг бажарилишини назорат қилиш Ўзбекистон Республикаси соғлиқни сақлаш вазири А.А. Худаяров ҳамда Тошкент шаҳар ҳокими Ш.Б. Умурзаков зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 27 декабрь,
890-сон
Oʻzbekiston Respublikasi Vazirlar Mahkamasining
qarori
Toshkent shahar koʻp tarmoqli shifoxonasini tashkil etish toʻgʻrisida
Sogʻliqni saqlash obyektlaridan samarali foydalanish hamda aholiga zamonaviy, yuqori texnologik, ixtisoslashtirilgan tibbiy yordam koʻrsatish tizimini yanada takomillashtirish maqsadida Vazirlar Mahkamasi qaror qiladi:
1. Quyidagilar:
a) Vazirlar Mahkamasining “Toshkent shahar bolalar koʻp tarmoqli shifoxonasini tashkil etish toʻgʻrisida” 2024-yil 24-iyuldagi 446-son qaroriga muvofiq:
“Zangiota-2” shifoxonasi faoliyati tugatilib, uning bino va inshootlarida Davlat budjeti hisobidan moliyalashtiriladigan davlat muassasasi shaklidagi 500 oʻringa moʻljallangan Toshkent shahar bolalar koʻp tarmoqli shifoxonasi (keyingi oʻrinlarda — Bolalar shifoxonasi) tashkil etilganligi;
“Zangiota-2” shifoxonasining bino va inshootlari tegishli hududi bilan birgalikda Bolalar shifoxonasiga operativ boshqaruv huquqi asosida bepul berilganligi;
b) Toshkent shahar bolalar koʻp tarmoqli shifoxonasining bino va inshootlarida 1 000 oʻringa moʻljallangan quvvat mavjud ekanligi;
v) Oʻzbekiston Respublikasi Prezidentining “Davlat tibbiy sugʻurtasi mexanizmlarini joriy etishga oid chora-tadbirlar toʻgʻrisida” 2024-yil 5-sentabrdagi PQ-311-son qaroriga muvofiq 2024-yil 1-oktabrdan Toshkent shahrida Davlat budjeti mablagʻlari hisobidan qoplanadigan tibbiy yordamning kafolatlangan hajmlari (keyingi oʻrinlarda — kafolatlangan paket) doirasidagi tibbiy xizmatlar va dori vositalari Davlat tibbiy sugʻurtasi jamgʻarmasi (keyingi oʻrinlarda — Jamgʻarma) mablagʻlari hisobidan qoplanishi maʼlumot uchun qabul qilinsin.
2. Sogʻliqni saqlash vazirligi, Iqtisodiyot va moliya vazirligi hamda Toshkent shahar hokimligining Bolalar shifoxonasi negizida 700 oʻringa moʻljallangan Toshkent shahar koʻp tarmoqli shifoxonasini (keyingi oʻrinlarda — Shifoxona) tashkil etish toʻgʻrisidagi taklifiga rozilik berilsin.
Bunda qoʻshimcha tashkil etiladigan 100 ta oʻrin Toshkent shahar davlat tibbiyot muassasalari shifo oʻrinlarini maqbullashtirish hisobidan va 100 ta oʻrin pulli xizmat koʻrsatish hisobidan tashkil etiladi.
3. Quyidagilar Shifoxonaning asosiy vazifalari etib belgilansin:
bolalar va katta yoshdagi aholi oʻrtasida eng koʻp tarqalgan kasalliklarning asosiy yoʻnalishlari (xirurgiya, pediatriya, lor, terapiya, kardiologiya, nevrologiya, pulmonologiya, endokrinologiya va boshqalar) boʻyicha ixtisoslashtirilgan, yuqori texnologiyali diagnostika, davolash va profilaktika tibbiy yordami koʻrsatishga boʻlgan ehtiyojni qondirish;
aholiga kafolatlangan paketga kiritilgan tibbiy xizmatlar koʻrsatish;
Toshkent shahar tuman tibbiyot birlashmalariga amaliy-metodik yordam koʻrsatish;
Toshkent shahar tibbiyot muassasalari amaliyotiga zamonaviy tibbiyot texnologiyalari va boshqaruv usullarini joriy etishda koʻmaklashish;
Toshkent shahar tibbiyot muassasalarida tibbiy xizmatlar koʻrsatishning zamonaviy metodlari va texnologiyalari joriy etilishini metodik taʼminlash;
tibbiyot sohasidagi taʼlim muassasalari bilan hamkorlikda tibbiyot kadrlarini tayyorlashda ishtirok etish;
fundamental, amaliy va innovatsion ilmiy izlanish hamda tadqiqotlar olib borish, ularning natijalarini keng joriy etish boʻyicha takliflar ishlab chiqish;
xorijiy ilmiy-tadqiqot tibbiyot markazlari, klinikalar va taʼlim muassasalari bilan hamkorlik aloqalarini rivojlantirish, qoʻshma ilmiy loyihalarni amalga oshirish;
tibbiy turizm sohasida tibbiy xizmatlar va yuqori malakali tibbiyot kadrlarini tayyorlash, mazkur xizmatlarni eksport qilish.
4. Quyidagilar Shifoxona faoliyatini moliyalashtirish manbalari etib belgilansin:
kafolatlangan paketga kiritilgan tibbiy xizmatlar uchun Davlat tibbiy sugʻurtasi jamgʻarmasi tomonidan ajratiladigan mablagʻlar;
pulli tibbiy xizmat koʻrsatishdan olinadigan mablagʻlar;
jismoniy va yuridik shaxslarning homiylik xayriyalari;
qonunchilik hujjatlari bilan taqiqlanmagan boshqa manbalar.
5. Shifoxonaga quyidagi huquqlar berilsin:
chet ellik va mahalliy mutaxassislarni boshqaruvchi, maslahatchi (konsultant), tibbiyot xodimi sifatida jalb qilish va ularga mehnat bozorining amaldagi konyunkturasini hisobga olgan holda, lavozim maoshi hamda boshqa toʻlovlarni belgilash va toʻlash;
shtatlar jadvalini mustaqil ravishda ishlab chiqish va tasdiqlash, Shifoxona xodimlari mehnatiga haq toʻlash va ularni moddiy ragʻbatlantirish shartlarini bajariladigan ishlarning murakkablik darajasi, sifati va hajmiga nisbatan tabaqalashtirilgan tarzda mustaqil belgilash;
Shifoxona oʻrinlari sonini ehtiyojdan kelib chiqib, oʻzgartirish va boʻlimlardagi shifo oʻrinlari sonini belgilash.
6. Sogʻliqni saqlash vazirligi:
a) ikki hafta muddatda:
Shifoxonaning tuzilmasi va ustavini tasdiqlasin hamda uning belgilangan tartibda davlat roʻyxatidan oʻtkazilishini taʼminlasin;
Shifoxonaning jihozlash tabelini ishlab chiqib, tasdiqlasin;
b) uch oy muddatda Shifoxona faoliyatini yoʻlga qoʻyish uchun zarur boʻladigan jihozlar hamda tibbiy texnika bilan taʼminlash choralarini koʻrsin.
7. Belgilansinki:
a) Shifoxonani saqlash bilan bogʻliq xarajatlar Oʻzbekiston Respublikasi Sogʻliqni saqlash vazirligiga respublika budjetidan ajratilgan mablagʻlar doirasida amalga oshiriladi.
Bunda mazkur mablagʻlar Sogʻliqni saqlash vazirligi tomonidan Davlat tibbiy sugʻurta jamgʻarmasiga oʻtkazib beriladi;
b) Shifoxona Bolalar shifoxonasining huquq va majburiyatlari, shuningdek, tuzilgan shartnomalari boʻyicha huquqiy vorisi hisoblanadi.
8. Toshkent shahar hokimligi uch oy muddatda Shifoxonaning bino va inshootlarida zarur qurilish hamda taʼmirlash ishlarini amalga oshirish orqali uni tegishli tibbiy yordam koʻrsatishga moslashtirish choralarini koʻrsin.
9. Vazirlar Mahkamasining “Toshkent shahar bolalar koʻp tarmoqli shifoxonasini tashkil etish toʻgʻrisida” 2024-yil 24-iyuldagi 446-son qarori oʻz kuchini yoʻqotgan deb hisoblansin.
10. Mazkur qarorning bajarilishini nazorat qilish Oʻzbekiston Respublikasi sogʻliqni saqlash vaziri A.A. Xudayarov hamda Toshkent shahar hokimi Sh.B. Umurzakov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 27-dekabr,
890-son