UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

РЎЙХАТИ

Тарихий объектлар ва туризм ривожланмаган ҳудудларда меҳмонхоналар фаолиятини ривожлантириш чора-тадбирлари тўғрисида

Ўзбекистон Республикаси Президентининг «Ўзбекистон Республикасида туризм инфратузилмасини яхшилаш ва хорижий туристлар оқимини янада оширишга қаратилган қўшимча чора-тадбирлар тўғрисида» 2024 йил 18 июлдаги ПФ-102-сон Фармони ижросини таъминлаш, шунингдек, ҳудудларда туризм инфратузилмасини янада ривожлантириш мақсадида Вазирлар Маҳкамаси қарор қилади:

1. Қуйидагилар:

ЮНЕСКОнинг Умумжаҳон маданий мероси рўйхатига киритилган ҳудудларда меҳмонхоналар қуриш ҳамда меҳмонхона мавжуд бўлмаган туман (шаҳар)ларда кичик отеллар қуриш ва уларни жиҳозлаш харажатларининг бир қисмини қоплаш учун субсидия ажратиш тартиби тўғрисидаги низом 1-иловаг а мувофиқ;

Меҳмонхона мавжуд бўлмаган туман (шаҳар)лар рўйхати 2-иловага мувофиқ тасдиқлансин.

2. Белгилансинки:

ЮНЕСКОнинг Умумжаҳон маданий мероси рўйхатига киритилган ҳудудларда тоифали (юлдузли) меҳмонхоналарни қуриш харажатларини қоплаш;

мазкур қарорга 2-иловадаги туман (шаҳар)ларда кичик отеллар қуриш ва уларни жиҳозлаш харажатларининг бир қисмини қоплаш учун Ўзбекистон Республикасининг Давлат бюджетидан бир марталик субсидия ажратилади.

Бунда субсидия меҳмонхоналарнинг тоифаси ҳамда кичик отелларнинг хоналар сонидан келиб чиққан ҳолда, 2025 йил 1 январдан 2026 йил 31 декабрга қадар бўлган муддатда мувофиқлик сертификати берилган янги қурилган (реконструкция қилинмаган) меҳмонхоналар ва кичик отеллар учун ажратилади.

3. Ўзбекистон Республикаси Туризм қўмитаси:

а) Рақамли технологиялар вазирлиги билан биргаликда икки ой муддатда:

мазкур қарор билан тасдиқланган Низомга мувофиқ давлат хизматини кўрсатиш давлат хизматлари марказлари ва Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали жорий этилишини таъминласин;

ЯИДХПда давлат хизматини кўрсатишнинг ҳар бир босқичида мурожаатларни кўриб чиқишни кузатиб бориш тартибини жорий этсин.

б) ўзининг расмий веб-сайтида тарихий объектлар ва туризм ривожланмаган ҳудудларда меҳмонхоналар фаолиятини ривожлантириш бўйича амалга оширилган лойиҳалар тўғрисидаги маълумотлар мунтазам равишда янгилаб борилишини таъминласин.

4. Мазкур қарорнинг бажарилишини назорат қилиш Ўзбекистон Республикаси Туризм қўмитаси раиси А.Ў. Аққулов зиммасига юклансин.

Вазирлар Маҳкамасининг 2024 йил 30 декабрдаги 919-сон қарорига 1-ИЛОВА

1-боб. Умумий қоидалар

1. Ушбу Низом ЮНЕСКОнинг Умумжаҳон маданий мероси рўйхатига киритилган ҳудудларда қуриладиган меҳмонхоналар ҳамда республиканинг меҳмонхона мавжуд бўлмаган туман (шаҳар)ларида кичик отеллар қуриш ва уларни жиҳозлаш харажатларининг бир қисмини қоплаш мақсадида Ўзбекистон Республикасининг Давлат бюджети ҳисобидан (кейинги ўринларда — Давлат бюджети) ажратиладиган маблағлар доирасида субсидия ажратиш тартибини белгилайди.

2. Ушбу Низомда қуйидаги тушунчалар қўлланилади:

инвестор — меҳмонхона қуриш ва уни жиҳозлаш учун сарфланган харажатларнинг бир қисмини қоплаш мақсадида мурожаат қилган тадбиркорлик субъекти;

кичик отель — ҳудуднинг туристик имкониятларидан келиб чиқиб, жойлаштириш воситасининг тўлақонли ишлаши учун сиғими 10 тадан 30 та хонагача бўлган меҳмонхона;

субсидия — инвесторларга ЮНЕСКОнинг Умумжаҳон маданий мероси рўйхатига киритилган ҳудудларда меҳмонхоналар ва республиканинг меҳмонхона мавжуд бўлмаган туман (шаҳар)ларида кичик отеллар қуриш (реконструкция қилиш бундан мустасно) ва уларни жиҳозлаш харажатларининг бир қисмини қоплаш мақсадида Давлат бюджетидан бир марта ажратиладиган маблағлар;

тарихий объектлар буфер зонаси — ЮНЕСКОнинг Умумжаҳон мероси маркази томонидан бериладиган хулосага кўра тарихий объектларга туташ ҳудуд;

янги қурилган меҳмонхона (кейинги ўринларда — меҳмонхона) — тасдиқланган лойиҳа асосида капитал бино ва иншоот сифатида қурилган ёки охирги ўн йилда меҳмонхона фондида мавжуд бўлмаган ҳолда қайта қурилган ёхуд қурилиш жараёнида ўзгартирилган лойиҳа бўйича жойлаштириш воситаси сифатида янги қурилиб ишга туширилган кўчмас мулк объекти, реконструкция қилинган меҳмонхона бундан мустасно.

3. Субсидия ЮНЕСКОнинг Умумжаҳон маданий мероси рўйхатига киритилган ҳудудларда қуриладиган қаватлар сонидан қатъий назар меҳмонхоналарнинг тоифаси ва меҳмонхона мавжуд бўлмаган 22 та туман (шаҳар)ларда янги қурилган кичик отелларнинг хоналар сонидан келиб чиққан ҳолда ажратилади.

4. 2025 йил 1 январдан 2026 йил 31 декабрга қадар бўлган муддатда мувофиқлик сертификати берилган меҳмонхона ва кичик отелларга Давлат бюджети ҳисобидан қуйидаги миқдорларда субсидия ажратилади:

а) ЮНЕСКОнинг Умумжаҳон маданий мероси рўйхатига киритилган ҳудудлардаги меҳмонхоналарга Ўзбекистон Республикаси Президентининг «Туризм йўналишидаги ислоҳотларни янада жадаллаштириш ва соҳада давлат бошқаруви тизимини самарали ташкил қилиш чора-тадбирлари тўғрисида» 2023 йил 27 июлдаги ПҚ-238-сон қарори доирасида ҳамда Вазирлар Маҳкамасининг «Меҳмонхона хўжалиги фаолиятини давлат томонидан қўллаб-қувватлаш соҳасидаги айрим норматив-ҳуқуқий ҳужжатларни тасдиқлаш тўғрисида» 2024 йил 7 сентябрдаги 550-сон қарори талаблари асосида;

б) республиканинг меҳмонхона мавжуд бўлмаган 22 та туман (шаҳар)ларидаги кичик отелларнинг умумий хоналари сони:

10 тадан кам бўлмаган ҳолда, ҳар бир хона учун — 10 млн сўм;

15 тадан кам бўлмаган ҳолда, ҳар бир хона учун — 15 млн сўм;

20 тадан кам бўлмаган ҳолда, ҳар бир хона учун — 20 млн сўм миқдорларда.

5. Инвестор субсидия олиш учун қуйидаги талабларга жавоб бериши лозим:

Ўзбекистон Республикасининг Солиқ кодексида назарда тутилган солиқ ва йиғимлар бўйича муддати ўтган қарздорлиги бўлмаслиги;

қайта ташкил этиш ёки тугатиш жараёнида бўлмаслиги;

фаолияти қонунчилик ҳужжатларида белгиланган тартибда вақтинча тўхтатилган бўлмаслиги;

суд қарори асосида тўловга қобилиятсиз деб эълон қилинган бўлмаслиги.

2-боб. Субсидия олиш учун ариза бериш ва уни кўриб чиқиш тартиби

6. Субсидия ушбу Низомга 1-иловага мувофиқ схема бўйича ажратилади.

7. Инвестор ёки унинг вакили (ариза берувчи) давлат хизматидан фойдаланиш учун давлат хизматлари марказига шахсан келиб мурожаат этади ёки давлат хизматларидан электрон шаклда фойдаланиш учун Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали рўйхатдан ўтади.

Ариза берувчи ўзи келиб мурожаат этган тақдирда, давлат хизматлари маркази ходими унинг номидан, ЯИДХП орқали мурожаат этган тақдирда эса, мустақил равишда ушбу Низомга 2-иловада келтирилган шаклга мувофиқ давлат хизматидан фойдаланиш учун аризани электрон шаклда тўлдиради.

Субсидия олиш мақсадида тақдим этилган аризадаги маълумотларнинг тўғрилиги ва ҳақиқийлиги учун ариза берувчи масъул ҳисобланади.

8. Ариза тўлдирилганидан сўнг ариза берувчи маълумотлар тўғрилигини текширади ва имзоларни идентификация қилишнинг замонавий воситалари (дактилоскопия, электрон рақамли имзо, мобил-ID ва бошқалар) билан тасдиқлайди.

Ариза берувчи ЯИДХП орқали мурожаат этган тақдирда, аризани электрон рақамли имзо билан тасдиқлаш талаб этилмайди.

9. Ўзбекистон Республикаси Туризм қўмитаси (кейинги ўринларда — қўмита) ариза келиб тушган кундан бошлаб ўн иш кунида унинг мазкур Низомда белгиланган талабларга мослигини жойига чиққан ҳолда ўрганади.

10. Қўмита ариза берувчининг аризасини ўрганиш даврида қуйидаги ҳужжатларни масъул давлат органлари ва ташкилотлардан мустақил равишда, шу жумладан, «Электрон ҳукумат» тизимининг идоралараро интеграция платформаси орқали реал вақт режимида олади:

юридик шахс бўлган тадбиркорнинг номи, жойлашган жойи (почта манзили), унинг рўйхатдан ўтиш рақами, санаси, гувоҳнома берган орган номи, СТИР ва тижорат банкидаги ҳисобварағи реквизитлари;

меҳмонхонага (кичик отель) берилган мувофиқлик сертификати.

11. Қўмита ўрганиш натижалари бўйича субсидия бериш ёки субсидия беришни рад этиш тўғрисида (рад этиш асосларини кўрсатган ҳолда) қарор қабул қилади ҳамда қарорнинг электрон нусхасини тегишли давлат хизматлари марказига (ўзи келиб мурожаат этганда) ёки ариза берувчининг (электрон тарзда мурожаат этганда) ЯИДХПдаги шахсий кабинетига юборади.

12. Субсидия бериш тўғрисидаги қарорда субсидия миқдори, меҳмонхона (кичик отель) номи, хоналар фонди, жойлашган жойи (почта манзили) ва унинг кадастр рақами, субсидия олаётган инвестор (юридик шахс) номи ва СТИР ҳамда тижорат банкидаги ҳисобварағи кўрсатилади.

13. Субсидия бериш қуйидаги асосларга кўра рад этилади:

аризада ушбу Низомга 2-иловада кўрсатилган маълумотлар тўлиқ кўрсатилмаганлиги ёки нотўғри кўрсатилганлиги;

инвестор ва меҳмонхона (кичик отель) ушбу Низомнинг 3 ва 5-бандларида кўрсатилган талабларга жавоб бермаслиги;

субсидия ажратилган объектга субсидия олиш учун такроран мурожаат қилинганлиги.

Субсидия беришни ушбу бандда кўрсатилмаган асослар бўйича рад этишга йўл қўйилмайди.

14. Ариза берувчи субсидия беришни рад этиш тўғрисидаги қарор нусхасини олган кундан бошлаб икки ой ичида қарорда кўрсатилган камчиликларни бартараф этиши ҳамда уларнинг бартараф этилганлигини тасдиқловчи ҳужжатларни илова қилган ҳолда, субсидия олиш учун такроран мурожаат қилиши мумкин.

15. Ариза такроран тақдим этилган кундан бошлаб беш иш кунида қайта кўриб чиқилади. Бунда субсидия беришни янги асослар бўйича рад этишга йўл қўйилмайди.

16. Ушбу Низомнинг 14-бандида кўрсатилган муддат тугагандан сўнг тақдим этилган ариза янги берилган деб ҳисобланади.

3-боб. Давлат бюджетидан субсидия ажратиш тартиби

17. Субсидия бериш тўғрисида қарор қабул қилинган кундан бошлаб қўмита бир иш кунида субсидия ажратиш учун Ўзбекистон Республикаси Иқтисодиёт ва молия вазирлигига инвесторлар тўғрисидаги маълумотлар ва ажратилиши лозим бўлган маблағларнинг ҳисоб-китоби кўрсатилган буюртманомани тақдим этади.

18. Ўзбекистон Республикаси Иқтисодиёт ва молия вазирлиги буюртманомани уч иш кунида кўриб чиқади ҳамда маблағлар қўмитанинг тегишли ғазна ҳисобварақларига ажратилишини таъминлайди.

19. Маблағлар келиб тушганидан сўнг беш иш кунида қўмита уларни инвесторнинг тижорат банкларидаги ҳисобварақларига ўтказиб беради.

20. Йил якунида қўмитанинг шахсий ғазна ҳисобварақларида фойдаланилмай қолган бюджет маблағлари тегишли молия йили якунига қадар Давлат бюджетига қайтарилади.

4-боб. Якунловчи қоидалар

21. Субсидия бериш учун Давлат бюджетидан маблағ ажратилган инвесторлар рўйхати (реестри) қўмитанинг расмий веб-сайтига жойлаштирилади.

Давлат бюджетидан ажратилган маблағлар миқдори ва қўшимча равишда ташкил этилаётган хоналар фонди тўғрисидаги маълумот ҳар ой якуни бўйича янгилаб борилади ҳамда ойлар ва инвесторлар кесимида акс эттирилади.

22. Инвестор субсидия олиш учун тақдим этилган маълумотлар ва ҳужжатларнинг тўғрилиги учун масъул ҳисобланади.

23. Қўмита субсидия бериш ишларини ташкил этиш, мувофиқлаштириш, мониторинг қилиш ва Давлат бюджетидан ажратилган маблағларнинг инвесторга етказилиши учун масъул ҳисобланади.

24. Меҳмонхона (кичик отель) субсидия ажратилган даврдан бошлаб беш йилдан кам бўлмаган муддатда фаолият юритиши, тоифали меҳмонхона бўлган тақдирда, камида беш йил ушбу тоифани сақлаб қолиши лозим.

Инвестор беш йил мобайнида меҳмонхона хизматларини ташкил қила олмаган тақдирда, ажратилган субсидияни фаолият юритган даврига мутаносиб равишда чегирган ҳолда, қолган маблағларни Давлат бюджетига қайтаради.

Қўмита мазкур банднинг биринчи хатбошисида кўрсатилган талабларга риоя этилиши ҳамда субсидиядан мақсадли фойдаланилиши юзасидан мониторинг юритади.

Ушбу талабга риоя этилмаган тақдирда, қўмита Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти ҳузуридаги Давлат молиявий назорати инспекциясига тақдимнома киритади ҳамда субсидия сифатида ажратилган маблағларни инвестордан Давлат бюджетига қонунчиликда белгиланган тартибда қайтариш чоралари кўрилади.

25. Давлат хизматлари марказлари ва қўмита ўз фаолиятини амалга ошириши натижасида олинган маълумотлар сир сақланишини таъминлайди.

26. Инвестор давлат органлари ва бошқа ташкилотлар ходимларининг хатти-ҳаракатлари устидан қонунчиликда белгиланган тартибда шикоят қилиши мумкин.

27. Ушбу Низом талаблари бузилишида айбдор бўлган шахслар қонунчилик ҳужжатларига мувофиқ жавоб берадилар.

Босқичлар Субъектлар Тадбирлар Бажариш муддатлари 1-босқич Инвестор (ариза берувчи) Ўзбекистон Республикаси Туризм қўмитасига (кейинги ўринларда — Қўмита) давлат хизматлари маркази ёки Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали субсидия олиш тўғрисида сўровнома билан мурожаат қилади. Ўз хоҳишига кўра 2-босқич Қўмита Сўровномани кўриб чиқади ва субсидия бериш ёки беришни рад этиш тўғрисида қарор қабул қилади ҳамда давлат хизматлари марказига ёки инвесторнинг ЯИДХПдаги шахсий кабинетига юборади. Ўн иш кунида 3-босқич Инвестор (ариза берувчи) Субсидия беришни рад этиш тўғрисидаги қарорни олганда, қарорда кўрсатиб ўтилган камчиликларни бартараф этиш ва уларнинг бартараф этилганини тасдиқловчи тегишли ҳужжатларни илова қилган ҳолда, Қўмитага такроран давлат хизматлари маркази ёки ЯИДХП орқали мурожаат қилади. Икки ой ичида 4-босқич Қўмита 1. Ариза такроран тақдим этилганда, уни қайта кўриб чиқади. Беш иш кунида 2. Субсидия бериш тўғрисида қарор қабул қилинганда, Иқтисодиёт ва молия вазирлигига субсидия ажратиш тўғрисида буюртманома юборади. Бир иш кунида 5-босқич Иқтисодиёт ва молия вазирлиги Буюртманомани кўриб чиқади ва маблағларни Қўмитанинг тегишли шахсий ғазна ҳисобварағига ўтказади. Уч иш кунида 6-босқич Қўмита Инвесторнинг тижорат банкларидаги ҳисобварақларига маблағларни ўтказиб беради. Беш иш кунида

Ўзбекистон Республикаси Туризм қўмитасига АРИЗА _________________________________________________________________________________________ (юридик шахсни рўйхатдан ўтказиш тўғрисидаги гувоҳномага мувофиқ ариза берувчининг тўлиқ номи) _________________________________________________________________________________________ (манзил, телефон, факс, электрон почта) _____________________________________________________________ манзил бўйича рўйхатдан ўтган _________________________________________________________________________________________ (рўйхатдан ўтиш рақами, санаси, гувоҳнома берган орган номи) _____________________________________________________________________ манзилида жойлашган (вилоят, туман, шаҳар, кўча, бино рақами) меҳмонхона (кичик отель) қуриш ва уни жиҳозлаш учун Ўзбекистон Республикаси Давлат бюджетидан субсидия ажратишингизни сўрайман. Меҳмонхона (кичик отель) хоналарининг сони: ________________________________________________ Мувофиқлик сертификати олинган сана ва рақами: _____________________________________________ Юридик шахснинг жойлашган жойи (почта манзили): __________________________________________ СТИР: ___________________________________________________________________________________ Электрон почта манзили: __________________________________________________________________ Банк ҳисобварағи: ________________________________________________________________________ Илова: ______ варақда ________________________________________________ _______________ (ариза берувчининг лавозими, Ф.И.О.) (имзо) 20 _____ йил ______________

Вазирлар Маҳкамасининг 2024 йил 30 декабрдаги 919-сон қарорига 2-ИЛОВА

Меҳмонхона мавжуд бўлмаган туман (шаҳар)лар

Т/р Ҳудуд номи Туман (шаҳар) номи 1. Қорақалпоғистон Республикаси Беруний тумани 2. Нукус тумани 3. Хўжайли тумани 4. Чимбой тумани 5. Андижон вилояти Хўжаобод тумани 6. Асака тумани 7. Бухоро вилояти Пешку тумани 8. Қоровулбозор тумани 9. Жиззах вилояти Ғаллаорол тумани 10. Қашқадарё вилояти Яккабоғ тумани 11. Навоий вилояти Қизилтепа тумани 12. Навбаҳор тумани 13. Томди тумани 14. Наманган вилояти Тўрақўрғон тумани 15. Янги Наманган тумани 16. Самарқанд вилояти Пайариқ тумани 17. Нуробод тумани 18. Сирдарё вилояти Янгиер шаҳри 19. Тошкент вилояти Паркент тумани 20. Фарғона вилояти Учкўприк тумани 21. Бешариқ тумани 22. Хоразм вилояти Шовот тумани

Ўзбекистон Республикасининг Бош вазири А. АРИПОВ

Тошкент ш.,

2024 йил 30 декабрь,

919-сон

(Қонунчилик маълумотлари миллий базаси, 13.01.2025 й., 09/24/919/0025-сон; 17.03.2026 й., 09/26/105/0244-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

SXEMASI

ROʻYXATI

Tarixiy obyektlar va turizm rivojlanmagan hududlarda mehmonxonalar faoliyatini rivojlantirish chora-tadbirlari toʻgʻrisida

Oʻzbekiston Respublikasi Prezidentining “Oʻzbekiston Respublikasida turizm infratuzilmasini yaxshilash va xorijiy turistlar oqimini yanada oshirishga qaratilgan qoʻshimcha chora-tadbirlar toʻgʻrisida” 2024-yil 18-iyuldagi PF-102-son Farmoni ijrosini taʼminlash, shuningdek, hududlarda turizm infratuzilmasini yanada rivojlantirish maqsadida Vazirlar Mahkamasi qaror qiladi:

1. Quyidagilar:

YUNESKOning Umumjahon madaniy merosi roʻyxatiga kiritilgan hududlarda mehmonxonalar qurish hamda mehmonxona mavjud boʻlmagan tuman (shahar)larda kichik otellar qurish va ularni jihozlash xarajatlarining bir qismini qoplash uchun subsidiya ajratish tartibi toʻgʻrisidagi nizom 1-ilovag a muvofiq;

Mehmonxona mavjud boʻlmagan tuman (shahar)lar roʻyxati 2-ilovaga muvofiq tasdiqlansin.

2. Belgilansinki:

YUNESKOning Umumjahon madaniy merosi roʻyxatiga kiritilgan hududlarda toifali (yulduzli) mehmonxonalarni qurish xarajatlarini qoplash;

mazkur qarorga 2-ilovadagi tuman (shahar)larda kichik otellar qurish va ularni jihozlash xarajatlarining bir qismini qoplash uchun Oʻzbekiston Respublikasining Davlat budjetidan bir martalik subsidiya ajratiladi.

Bunda subsidiya mehmonxonalarning toifasi hamda kichik otellarning xonalar sonidan kelib chiqqan holda, 2025-yil 1-yanvardan 2026-yil 31-dekabrga qadar boʻlgan muddatda muvofiqlik sertifikati berilgan yangi qurilgan (rekonstruksiya qilinmagan) mehmonxonalar va kichik otellar uchun ajratiladi.

3. Oʻzbekiston Respublikasi Turizm qoʻmitasi:

a) Raqamli texnologiyalar vazirligi bilan birgalikda ikki oy muddatda:

mazkur qaror bilan tasdiqlangan Nizomga muvofiq davlat xizmatini koʻrsatish davlat xizmatlari markazlari va Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali joriy etilishini taʼminlasin;

YIDXPda davlat xizmatini koʻrsatishning har bir bosqichida murojaatlarni koʻrib chiqishni kuzatib borish tartibini joriy etsin.

b) oʻzining rasmiy veb-saytida tarixiy obyektlar va turizm rivojlanmagan hududlarda mehmonxonalar faoliyatini rivojlantirish boʻyicha amalga oshirilgan loyihalar toʻgʻrisidagi maʼlumotlar muntazam ravishda yangilab borilishini taʼminlasin.

4. Mazkur qarorning bajarilishini nazorat qilish Oʻzbekiston Respublikasi Turizm qoʻmitasi raisi A.Oʻ. Aqqulov zimmasiga yuklansin.

Vazirlar Mahkamasining 2024-yil 30-dekabrdagi 919-son qaroriga 1-ILOVA

1-bob. Umumiy qoidalar

1. Ushbu Nizom YUNESKOning Umumjahon madaniy merosi roʻyxatiga kiritilgan hududlarda quriladigan mehmonxonalar hamda respublikaning mehmonxona mavjud boʻlmagan tuman (shahar)larida kichik otellar qurish va ularni jihozlash xarajatlarining bir qismini qoplash maqsadida Oʻzbekiston Respublikasining Davlat budjeti hisobidan (keyingi oʻrinlarda — Davlat budjeti) ajratiladigan mablagʻlar doirasida subsidiya ajratish tartibini belgilaydi.

2. Ushbu Nizomda quyidagi tushunchalar qoʻllaniladi:

investor — mehmonxona qurish va uni jihozlash uchun sarflangan xarajatlarning bir qismini qoplash maqsadida murojaat qilgan tadbirkorlik subyekti;

kichik otel — hududning turistik imkoniyatlaridan kelib chiqib, joylashtirish vositasining toʻlaqonli ishlashi uchun sigʻimi 10 tadan 30 ta xonagacha boʻlgan mehmonxona;

subsidiya — investorlarga YUNESKOning Umumjahon madaniy merosi roʻyxatiga kiritilgan hududlarda mehmonxonalar va respublikaning mehmonxona mavjud boʻlmagan tuman (shahar)larida kichik otellar qurish (rekonstruksiya qilish bundan mustasno) va ularni jihozlash xarajatlarining bir qismini qoplash maqsadida Davlat budjetidan bir marta ajratiladigan mablagʻlar;

tarixiy obyektlar bufer zonasi — YUNESKOning Umumjahon merosi markazi tomonidan beriladigan xulosaga koʻra tarixiy obyektlarga tutash hudud;

yangi qurilgan mehmonxona (keyingi oʻrinlarda — mehmonxona) — tasdiqlangan loyiha asosida kapital bino va inshoot sifatida qurilgan yoki oxirgi oʻn yilda mehmonxona fondida mavjud boʻlmagan holda qayta qurilgan yoxud qurilish jarayonida oʻzgartirilgan loyiha boʻyicha joylashtirish vositasi sifatida yangi qurilib ishga tushirilgan koʻchmas mulk obyekti, rekonstruksiya qilingan mehmonxona bundan mustasno.

3. Subsidiya YUNESKOning Umumjahon madaniy merosi roʻyxatiga kiritilgan hududlarda quriladigan qavatlar sonidan qatʼiy nazar mehmonxonalarning toifasi va mehmonxona mavjud boʻlmagan 22 ta tuman (shahar)larda yangi qurilgan kichik otellarning xonalar sonidan kelib chiqqan holda ajratiladi.

4. 2025-yil 1-yanvardan 2026-yil 31-dekabrga qadar boʻlgan muddatda muvofiqlik sertifikati berilgan mehmonxona va kichik otellarga Davlat budjeti hisobidan quyidagi miqdorlarda subsidiya ajratiladi:

a) YUNESKOning Umumjahon madaniy merosi roʻyxatiga kiritilgan hududlardagi mehmonxonalarga Oʻzbekiston Respublikasi Prezidentining “Turizm yoʻnalishidagi islohotlarni yanada jadallashtirish va sohada davlat boshqaruvi tizimini samarali tashkil qilish chora-tadbirlari toʻgʻrisida” 2023-yil 27-iyuldagi PQ-238-son qarori doirasida hamda Vazirlar Mahkamasining “Mehmonxona xoʻjaligi faoliyatini davlat tomonidan qoʻllab-quvvatlash sohasidagi ayrim normativ-huquqiy hujjatlarni tasdiqlash toʻgʻrisida” 2024-yil 7-sentabrdagi 550-son qarori talablari asosida;

b) respublikaning mehmonxona mavjud boʻlmagan 22 ta tuman (shahar)laridagi kichik otellarning umumiy xonalari soni:

10 tadan kam boʻlmagan holda, har bir xona uchun — 10 mln soʻm;

15 tadan kam boʻlmagan holda, har bir xona uchun — 15 mln soʻm;

20 tadan kam boʻlmagan holda, har bir xona uchun — 20 mln soʻm miqdorlarda.

5. Investor subsidiya olish uchun quyidagi talablarga javob berishi lozim:

Oʻzbekiston Respublikasining Soliq kodeksida nazarda tutilgan soliq va yigʻimlar boʻyicha muddati oʻtgan qarzdorligi boʻlmasligi;

qayta tashkil etish yoki tugatish jarayonida boʻlmasligi;

faoliyati qonunchilik hujjatlarida belgilangan tartibda vaqtincha toʻxtatilgan boʻlmasligi;

sud qarori asosida toʻlovga qobiliyatsiz deb eʼlon qilingan boʻlmasligi.

2-bob. Subsidiya olish uchun ariza berish va uni koʻrib chiqish tartibi

6. Subsidiya ushbu Nizomga 1-ilovaga muvofiq sxema boʻyicha ajratiladi.

7. Investor yoki uning vakili (ariza beruvchi) davlat xizmatidan foydalanish uchun davlat xizmatlari markaziga shaxsan kelib murojaat etadi yoki davlat xizmatlaridan elektron shaklda foydalanish uchun Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali roʻyxatdan oʻtadi.

Ariza beruvchi oʻzi kelib murojaat etgan taqdirda, davlat xizmatlari markazi xodimi uning nomidan, YIDXP orqali murojaat etgan taqdirda esa, mustaqil ravishda ushbu Nizomga 2-ilovada keltirilgan shaklga muvofiq davlat xizmatidan foydalanish uchun arizani elektron shaklda toʻldiradi.

Subsidiya olish maqsadida taqdim etilgan arizadagi maʼlumotlarning toʻgʻriligi va haqiqiyligi uchun ariza beruvchi masʼul hisoblanadi.

8. Ariza toʻldirilganidan soʻng ariza beruvchi maʼlumotlar toʻgʻriligini tekshiradi va imzolarni identifikatsiya qilishning zamonaviy vositalari (daktiloskopiya, elektron raqamli imzo, mobil-ID va boshqalar) bilan tasdiqlaydi.

Ariza beruvchi YIDXP orqali murojaat etgan taqdirda, arizani elektron raqamli imzo bilan tasdiqlash talab etilmaydi.

9. Oʻzbekiston Respublikasi Turizm qoʻmitasi (keyingi oʻrinlarda — qoʻmita) ariza kelib tushgan kundan boshlab oʻn ish kunida uning mazkur Nizomda belgilangan talablarga mosligini joyiga chiqqan holda oʻrganadi.

10. Qoʻmita ariza beruvchining arizasini oʻrganish davrida quyidagi hujjatlarni masʼul davlat organlari va tashkilotlardan mustaqil ravishda, shu jumladan, “Elektron hukumat” tizimining idoralararo integratsiya platformasi orqali real vaqt rejimida oladi:

yuridik shaxs boʻlgan tadbirkorning nomi, joylashgan joyi (pochta manzili), uning roʻyxatdan oʻtish raqami, sanasi, guvohnoma bergan organ nomi, STIR va tijorat bankidagi hisobvaragʻi rekvizitlari;

mehmonxonaga (kichik otel) berilgan muvofiqlik sertifikati.

11. Qoʻmita oʻrganish natijalari boʻyicha subsidiya berish yoki subsidiya berishni rad etish toʻgʻrisida (rad etish asoslarini koʻrsatgan holda) qaror qabul qiladi hamda qarorning elektron nusxasini tegishli davlat xizmatlari markaziga (oʻzi kelib murojaat etganda) yoki ariza beruvchining (elektron tarzda murojaat etganda) YIDXPdagi shaxsiy kabinetiga yuboradi.

12. Subsidiya berish toʻgʻrisidagi qarorda subsidiya miqdori, mehmonxona (kichik otel) nomi, xonalar fondi, joylashgan joyi (pochta manzili) va uning kadastr raqami, subsidiya olayotgan investor (yuridik shaxs) nomi va STIR hamda tijorat bankidagi hisobvaragʻi koʻrsatiladi.

13. Subsidiya berish quyidagi asoslarga koʻra rad etiladi:

arizada ushbu Nizomga 2-ilovada koʻrsatilgan maʼlumotlar toʻliq koʻrsatilmaganligi yoki notoʻgʻri koʻrsatilganligi;

investor va mehmonxona (kichik otel) ushbu Nizomning 3 va 5-bandlarida koʻrsatilgan talablarga javob bermasligi;

subsidiya ajratilgan obyektga subsidiya olish uchun takroran murojaat qilinganligi.

Subsidiya berishni ushbu bandda koʻrsatilmagan asoslar boʻyicha rad etishga yoʻl qoʻyilmaydi.

14. Ariza beruvchi subsidiya berishni rad etish toʻgʻrisidagi qaror nusxasini olgan kundan boshlab ikki oy ichida qarorda koʻrsatilgan kamchiliklarni bartaraf etishi hamda ularning bartaraf etilganligini tasdiqlovchi hujjatlarni ilova qilgan holda, subsidiya olish uchun takroran murojaat qilishi mumkin.

15. Ariza takroran taqdim etilgan kundan boshlab besh ish kunida qayta koʻrib chiqiladi. Bunda subsidiya berishni yangi asoslar boʻyicha rad etishga yoʻl qoʻyilmaydi.

16. Ushbu Nizomning 14-bandida koʻrsatilgan muddat tugagandan soʻng taqdim etilgan ariza yangi berilgan deb hisoblanadi.

3-bob. Davlat budjetidan subsidiya ajratish tartibi

17. Subsidiya berish toʻgʻrisida qaror qabul qilingan kundan boshlab qoʻmita bir ish kunida subsidiya ajratish uchun Oʻzbekiston Respublikasi Iqtisodiyot va moliya vazirligiga investorlar toʻgʻrisidagi maʼlumotlar va ajratilishi lozim boʻlgan mablagʻlarning hisob-kitobi koʻrsatilgan buyurtmanomani taqdim etadi.

18. Oʻzbekiston Respublikasi Iqtisodiyot va moliya vazirligi buyurtmanomani uch ish kunida koʻrib chiqadi hamda mablagʻlar qoʻmitaning tegishli gʻazna hisobvaraqlariga ajratilishini taʼminlaydi.

19. Mablagʻlar kelib tushganidan soʻng besh ish kunida qoʻmita ularni investorning tijorat banklaridagi hisobvaraqlariga oʻtkazib beradi.

20. Yil yakunida qoʻmitaning shaxsiy gʻazna hisobvaraqlarida foydalanilmay qolgan budjet mablagʻlari tegishli moliya yili yakuniga qadar Davlat budjetiga qaytariladi.

4-bob. Yakunlovchi qoidalar

21. Subsidiya berish uchun Davlat budjetidan mablagʻ ajratilgan investorlar roʻyxati (reyestri) qoʻmitaning rasmiy veb-saytiga joylashtiriladi.

Davlat budjetidan ajratilgan mablagʻlar miqdori va qoʻshimcha ravishda tashkil etilayotgan xonalar fondi toʻgʻrisidagi maʼlumot har oy yakuni boʻyicha yangilab boriladi hamda oylar va investorlar kesimida aks ettiriladi.

22. Investor subsidiya olish uchun taqdim etilgan maʼlumotlar va hujjatlarning toʻgʻriligi uchun masʼul hisoblanadi.

23. Qoʻmita subsidiya berish ishlarini tashkil etish, muvofiqlashtirish, monitoring qilish va Davlat budjetidan ajratilgan mablagʻlarning investorga yetkazilishi uchun masʼul hisoblanadi.

24. Mehmonxona (kichik otel) subsidiya ajratilgan davrdan boshlab besh yildan kam boʻlmagan muddatda faoliyat yuritishi, toifali mehmonxona boʻlgan taqdirda, kamida besh yil ushbu toifani saqlab qolishi lozim.

Investor besh yil mobaynida mehmonxona xizmatlarini tashkil qila olmagan taqdirda, ajratilgan subsidiyani faoliyat yuritgan davriga mutanosib ravishda chegirgan holda, qolgan mablagʻlarni Davlat budjetiga qaytaradi.

Qoʻmita mazkur bandning birinchi xatboshisida koʻrsatilgan talablarga rioya etilishi hamda subsidiyadan maqsadli foydalanilishi yuzasidan monitoring yuritadi.

Ushbu talabga rioya etilmagan taqdirda, qoʻmita Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti huzuridagi Davlat moliyaviy nazorati inspeksiyasiga taqdimnoma kiritadi hamda subsidiya sifatida ajratilgan mablagʻlarni investordan Davlat budjetiga qonunchilikda belgilangan tartibda qaytarish choralari koʻriladi.

25. Davlat xizmatlari markazlari va qoʻmita oʻz faoliyatini amalga oshirishi natijasida olingan maʼlumotlar sir saqlanishini taʼminlaydi.

26. Investor davlat organlari va boshqa tashkilotlar xodimlarining xatti-harakatlari ustidan qonunchilikda belgilangan tartibda shikoyat qilishi mumkin.

27. Ushbu Nizom talablari buzilishida aybdor boʻlgan shaxslar qonunchilik hujjatlariga muvofiq javob beradilar.

Bosqichlar Subyektlar Tadbirlar Bajarish muddatlari 1-bosqich Investor (ariza beruvchi) Oʻzbekiston Respublikasi Turizm qoʻmitasiga (keyingi oʻrinlarda — Qoʻmita) davlat xizmatlari markazi yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali subsidiya olish toʻgʻrisida soʻrovnoma bilan murojaat qiladi. Oʻz xohishiga koʻra 2-bosqich Qoʻmita Soʻrovnomani koʻrib chiqadi va subsidiya berish yoki berishni rad etish toʻgʻrisida qaror qabul qiladi hamda davlat xizmatlari markaziga yoki investorning YIDXPdagi shaxsiy kabinetiga yuboradi. Oʻn ish kunida 3-bosqich Investor (ariza beruvchi) Subsidiya berishni rad etish toʻgʻrisidagi qarorni olganda, qarorda koʻrsatib oʻtilgan kamchiliklarni bartaraf etish va ularning bartaraf etilganini tasdiqlovchi tegishli hujjatlarni ilova qilgan holda, Qoʻmitaga takroran davlat xizmatlari markazi yoki YIDXP orqali murojaat qiladi. Ikki oy ichida 4-bosqich Qoʻmita 1. Ariza takroran taqdim etilganda, uni qayta koʻrib chiqadi. Besh ish kunida 2. Subsidiya berish toʻgʻrisida qaror qabul qilinganda, Iqtisodiyot va moliya vazirligiga subsidiya ajratish toʻgʻrisida buyurtmanoma yuboradi. Bir ish kunida 5-bosqich Iqtisodiyot va moliya vazirligi Buyurtmanomani koʻrib chiqadi va mablagʻlarni Qoʻmitaning tegishli shaxsiy gʻazna hisobvaragʻiga oʻtkazadi. Uch ish kunida 6-bosqich Qoʻmita Investorning tijorat banklaridagi hisobvaraqlariga mablagʻlarni oʻtkazib beradi. Besh ish kunida

Oʻzbekiston Respublikasi Turizm qoʻmitasiga ARIZA _________________________________________________________________________________________ (yuridik shaxsni roʻyxatdan oʻtkazish toʻgʻrisidagi guvohnomaga muvofiq ariza beruvchining toʻliq nomi) _________________________________________________________________________________________ (manzil, telefon, faks, elektron pochta) _____________________________________________________________ manzil boʻyicha roʻyxatdan oʻtgan _________________________________________________________________________________________ (roʻyxatdan oʻtish raqami, sanasi, guvohnoma bergan organ nomi) _____________________________________________________________________ manzilida joylashgan (viloyat, tuman, shahar, koʻcha, bino raqami) mehmonxona (kichik otel) qurish va uni jihozlash uchun Oʻzbekiston Respublikasi Davlat budjetidan subsidiya ajratishingizni soʻrayman. Mehmonxona (kichik otel) xonalarining soni: ________________________________________________ Muvofiqlik sertifikati olingan sana va raqami: _____________________________________________ Yuridik shaxsning joylashgan joyi (pochta manzili): __________________________________________ STIR: ___________________________________________________________________________________ Elektron pochta manzili: __________________________________________________________________ Bank hisobvaragʻi: ________________________________________________________________________ Ilova: ______ varaqda ________________________________________________ _______________ (ariza beruvchining lavozimi, F.I.O.) (imzo) 20 _____ yil ______________

Vazirlar Mahkamasining 2024-yil 30-dekabrdagi 919-son qaroriga 2-ILOVA

Mehmonxona mavjud boʻlmagan tuman (shahar)lar

T/r Hudud nomi Tuman (shahar) nomi 1. Qoraqalpogʻiston Respublikasi Beruniy tumani 2. Nukus tumani 3. Xoʻjayli tumani 4. Chimboy tumani 5. Andijon viloyati Xoʻjaobod tumani 6. Asaka tumani 7. Buxoro viloyati Peshku tumani 8. Qorovulbozor tumani 9. Jizzax viloyati Gʻallaorol tumani 10. Qashqadaryo viloyati Yakkabogʻ tumani 11. Navoiy viloyati Qiziltepa tumani 12. Navbahor tumani 13. Tomdi tumani 14. Namangan viloyati Toʻraqoʻrgʻon tumani 15. Yangi Namangan tumani 16. Samarqand viloyati Payariq tumani 17. Nurobod tumani 18. Sirdaryo viloyati Yangiyer shahri 19. Toshkent viloyati Parkent tumani 20. Fargʻona viloyati Uchkoʻprik tumani 21. Beshariq tumani 22. Xorazm viloyati Shovot tumani

Oʻzbekiston Respublikasining Bosh vaziri A. ARIPOV

Toshkent sh.,

2024-yil 30-dekabr,

919-son

(Qonunchilik maʼlumotlari milliy bazasi, 13.01.2025-y., 09/24/919/0025-son; 17.03.2026-y., 09/26/105/0244-son)

lex.uz