UzbekAI

Ўзбекистон Республикаси иқтисодиёт ва молия вазирининг

буйруғи

НИЗОМ

Инсофсиз ижрочиларнинг ягона реестрини шакллантириш тартиби тўғрисидаги низомни тасдиқлаш ҳақида

Ўзбекистон Республикасининг «Давлат харидлари тўғрисида»ги Қонунига мувофиқ буюраман:

1. Инсофсиз ижрочиларнинг ягона реестрини шакллантириш тартиби тўғрисидаги низом иловага мувофиқ тасдиқлансин.

2. Мазкур буйруқ Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитаси, Коррупцияга қарши курашиш агентлиги, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ҳамда Ўзбекистон Савдо-саноат палатаси билан келишилган.

3. Мазкур буйруқ расмий эълон қилинган кундан эътиборан уч ой ўтгач кучга киради.

Келишилди:

Ўзбекистон Республикаси иқтисодиёт ва молия вазирининг 2024 йил 6 декабрдаги 200-сон буйруғига ИЛОВА

Инсофсиз ижрочиларнинг ягона реестрини шакллантириш тартиби тўғрисидаги

Ушбу Низом Инсофсиз ижрочиларнинг ягона реестрини (бундан буён матнда Реестр деб юритилади) шакллантириш ва юритиш тартибини белгилайди.

1-боб. Умумий қоидалар

1. Ушбу Низомда қуйидаги асосий тушунчалар қўлланилади:

давлат харидлари соҳасидаги ваколатли орган (бундан буён матнда ваколатли орган деб юритилади) — Ўзбекистон Республикаси Иқтисодиёт ва молия вазирлиги ;

инсофсиз ижрочи — Реестрга киритилган харид қилиш тартиб-таомиллари иштирокчиси (бундан буён матнда иштирокчи деб юритилади) ёки ғолиби (бундан буён матнда ғолиб деб юритилади) ёхуд давлат харидларининг ижрочиси (бундан буён матнда ижрочи деб юритилади) ҳисобланган Ўзбекистон Республикасининг резиденти ёки норезиденти бўлган жисмоний ёки юридик шахс;

Реестрга киритиш юзасидан мурожаатларни кўриб чиқиш бўйича ишчи комиссия (бундан буён матнда ишчи комиссия деб юритилади) — иштирокчи ёки ижрочи тўғрисидаги маълумотларни Реестрга киритиш юзасидан мурожаатларни кўриб чиқиш ва хулоса бериш бўйича ишчи орган;

мурожаатчи — иштирокчи ёки ижрочини Реестрга киритиш юзасидан ёзма ёки электрон шаклда мурожаат қилувчи давлат буюртмачиси ва (ёки) харид қилиш тартиб-таомиллари устидан давлат назоратини амалга оширувчи ваколатли давлат органлари, шунингдек жисмоний ва юридик шахслар.

2-боб. Реестрни шакллантириш асослари ва мурожаат қилиш тартиби

2. Реестр ваколатли орган томонидан шакллантириладиган рўйхатдан иборат бўлиб, унга қуйидаги маълумотлар киритилади:

харид қилиш тартиб-таомиллари якунлари бўйича белгиланган шартлар асосида давлат буюртмачиси билан шартнома тузишни ва давлат харидларини амалга оширишни рад этган ёки бошқача усулда бўйин товлаган харид қилиш тартиб-таомиллари ғолиблари тўғрисидаги;

мажбуриятларни бажармаганликда ёхуд тегишли тарзда бажармаганликда белгиланган тартибда айбдор деб топилган ижрочилар ҳақидаги, бундан мажбуриятлар бартараф этиб бўлмайдиган кучлар оқибатида бажарилмаган ёки тегишли тарзда бажарилмаган ҳоллар мустасно;

давлат харидлари жараёнида ёлғон ёки сохта ҳужжатларни тақдим этган, айни битта лотда иштирок этган аффилланган шахслар ёки манфаатлар тўқнашуви тўғрисида маълумотларни очиб бермаган иштирокчилар тўғрисидаги;

суднинг қарорига кўра фирибгарлик, сохталаштириш ва коррупция билан боғлиқ жиноятларни содир этганликда айбдор деб топилган ижрочилар тўғрисидаги.

3. Реестрга инсофсиз ижрочилар тўғрисидаги маълумотлар қуйидагилар асосида киритилади:

ваколатли органнинг иштирокчи ёки ижрочи тўғрисидаги маълумотларни Реестрга киритиш тўғрисидаги қарорига мувофиқ;

Давлат харидлари соҳасидаги шикоятларни кўриб чиқиш бўйича комиссиянинг ижрочи тўғрисидаги маълумотларни Реестрга киритиш тўғрисидаги қарорига мувофиқ;

харид қилиш тартиб-таомиллари якунлари бўйича белгиланган шартлар асосида давлат буюртмачиси билан шартнома тузишни ва давлат харидларини амалга оширишни рад этган ёки бошқача усулда бўйин товлаган ғолиб (захирадаги ғолиб бундан мустасно) тўғрисидаги маълумотлар автоматик тарзда Махсус ахборот портали орқали.

4. Мурожаатчи ваколатли органга иштирокчи ёки ижрочини Реестрга киритиш юзасидан ёзма ёки электрон шаклда ариза билан мурожаат қилиши мумкин.

Мурожаатчи аризасига иштирокчи ёки ижрочини Реестрга киритиш учун асос бўлган ҳужжатларни, шунингдек суднинг тегишли қарорини (агар мавжуд бўлса) илова қилади.

5. Мурожаат ваколатли органга келиб тушган кундан бошлаб ўн беш кун ичида кўриб чиқилади ва кўриб чиқиш натижаси бўйича ушбу муддат ичида мурожаатчига ёзма ёки электрон шаклда хабар берилади.

3-боб. Ишчи комиссия ва Реестрни шакллантириш тартиби

6. Иштирокчи ёки ижрочи тўғрисидаги маълумотларни Реестрга киритиш тўғрисидаги қарор ваколатли органнинг раҳбари ёки унинг вазифалари юкланган ўринбосари томонидан қабул қилинади.

Бунда, Реестрга киритиш тўғрисидаги қарор қабул қилинишига иштирокчи ёки ижрочи тўғрисидаги маълумотларни Реестрга киритиш ҳақидаги ишчи комиссиянинг хулосаси асос бўлади. Ишчи комиссия томонидан тегишли хулоса ўн кун муддатда тайёрланади.

7. Ишчи комиссия таркиби ваколатли орган раҳбарининг буйруғи билан ваколатли орган раҳбарининг ўринбосари ва ходимлари орасидан камида 7 кишидан иборат таркибда шакллантирилади.

8. Ишчи комиссия фаолиятини ташкил этиш, йиғилишларини ўтказиш ва уларга раҳбарлик қилиш ишчи комиссия раиси томонидан амалга оширилади.

Ишчи комиссия йиғилиши учун ташкилий тайёргарликни таъминлаш комиссия котиби зиммасига юкланади.

Ишчи комиссия йиғилишлари заруратга кўра ўтказилади. Йиғилишларда кун тартибига киритилган масалалар юзасидан коллегиал тарзда хулосалар қабул қилинади.

Ишчи комиссия йиғилишлари аъзоларнинг камида учдан икки қисми иштирок этганда ваколатли ҳисобланади.

Ишчи комиссия хулосалари йиғилишда иштирок этаётган аъзоларнинг кўпчилиги томонидан маъқулланган тақдирда, қабул қилинган ҳисобланади. Овозлар тенг бўлиб қолган тақдирда, ишчи комиссия раисининг овози ҳал қилувчи ҳисобланади.

9. Ишчи комиссия котиби томонидан иштирокчи ёки ижрочига, шунингдек мурожаатчига йиғилишдан уч кун олдин ишчи комиссия йиғилиши ҳақида хабар қилинади. Бунда, иштирокчи ёки ижрочи тўғрисидаги маълумотларни Реестрга киритиш тўғрисидаги масалани кўриб чиқишда иштирокчи ёки ижрочи, шунингдек мурожаатчи иштирок этиш ҳуқуқига эга.

10. Ишчи комиссия мурожаатчи томонидан тақдим этилган ҳужжатларда мазкур Низомнинг 2-бандида назарда тутилган ҳолатлар мавжудлигини ўрганади.

Бунда, тақдим этилган ҳужжатларнинг тўғрилиги ва ҳаққонийлиги учун мурожаатчи жавобгар ҳисобланади.

11. Ишчи комиссия томонидан мазкур Низомнинг 2-бандида назарда тутилган ҳолатлардан бошқа ҳолатлар кўриб чиқилмайди.

12. Ваколатли органнинг иштирокчи ёки ижрочи тўғрисидаги маълумотларни Реестрга киритиш тўғрисида қарор қабул қилинган кунда ваколатли орган Реестрга киритади.

13. Ваколатли орган томонидан қуйидаги ҳолларда иштирокчи ёки ижрочи тўғрисидаги маълумотларни Реестрга киритишни рад этиш тўғрисида қарор қабул қилинади:

мурожаатчининг аризаси ва унга илова қилинган ҳужжатларда иштирокчи ва ижрочини Реестрга киритиш учун мазкур Низомнинг 2-бандида назарда тутилган асослар мавжуд бўлмаса;

мурожаатчи томонидан тақдим этилган ҳужжатларнинг ҳақиқий эмаслиги ёки уларда нотўғри маълумотлар мавжудлиги аниқланганда.

14. Давлат харидлари соҳасидаги шикоятларни кўриб чиқиш бўйича комиссия томонидан ижрочини Реестрга киритиш тўғрисида қарор қабул қилинган тақдирда ваколатли орган қарор қабул қилинган куннинг ўзида мазкур қарор асосида ижрочи тўғрисидаги маълумотларни Реестрга киритади.

15. Давлат харидлари соҳасидаги шикоятларни кўриб чиқиш бўйича комиссия томонидан ижрочини Реестрга киритиш тўғрисидаги қарор Давлат харидлари соҳасидаги шикоятларни кўриб чиқиш тартиби тўғрисидаги низомда (рўйхат рақами 3013, 2018 йил 14 май) белгиланган тартибда қабул қилинади.

16. Ваколатли орган томонидан Реестрга киритилган куннинг ўзида инсофсиз ижрочига бу тўғрисида ёзма равишда ёки давлат харидлари электрон тизимидаги шахсий кабинети орқали (шахсий кабинети мавжуд бўлган тақдирда) электрон тарзда хабар берилади.

17. Ваколатли органнинг иштирокчи ёки ижрочи тўғрисидаги маълумотларни Реестрга киритиш тўғрисидаги қароридан норози бўлган иштирокчи ёки ижрочи, шунингдек ғолиб қонунчиликда белгиланган тартибда судга мурожаат қилиш ҳуқуқига эга.

18. Давлат харидлари электрон тизими оператори харид қилиш тартиб-таомиллари якунлари бўйича белгиланган шартлар асосида давлат буюртмачиси билан шартнома тузишни ва давлат харидларини амалга оширишни рад этган ёки бошқача усулда бўйин товлаган ғолиб тўғрисидаги ахборотни электрон маълумот алмашинуви орқали автоматик тарзда Махсус ахборот порталига (бундан буён матнда Портал деб юритилади) юборади.

Давлат харидлари электрон тизими операторлари томонидан юборилган инсофсиз ижрочилар тўғрисидаги маълумотлар автоматик тарзда Реестрга киритилади.

4-боб. Реестрни юритиш ҳамда инсофсиз ижрочини Реестрдан чиқариш тартиби

19. Реестр ваколатли орган томонидан Порталда юритилади.

20. Реестрда инсофсиз ижрочилар тўғрисидаги қуйидаги маълумотлар акс эттирилади:

юридик шахснинг номи, жойлашган жойи (почта манзили);

юридик шахснинг раҳбарини ҳамда бенефициар мулкдорининг фамилияси, исми, отасининг исми, яшаш жойи;

жисмоний шахснинг фамилияси, исми, отасининг исми, яшаш жойи (якка тартибдаги тадбиркор ва ўзини ўзи банд қилган шахслар учун);

СТИР (юридик шахслар учун), ЖШШИР (жисмоний шахслар учун);

суднинг, ваколат органнинг, Давлат харидлари соҳасидаги шикоятларни кўриб чиқиш бўйича комиссиясининг қарори санаси ва нусхаси (ғолиб реестрга автоматик тарзда киритилган ҳоллар бундан мустасно);

Реестрга киритиш ва ундан чиқариш санаси ва асоси.

Бунда, жисмоний шахсларнинг паспорт маълумотлари ҳамда юридик шахс муассисларининг, шунингдек жисмоний шахсларнинг яшаш жойи ҳақидаги ахборотдан бошқа маълумотлар очиқ ҳисобланади ҳамда фойдаланувчилар улардан эркин ва бепул танишиб чиқиши ва фойдаланиши мумкин.

21. Инсофсиз ижрочи Реестрга киритилганидан бошлаб икки йил муддат ўтгандан сўнг автоматик тарзда Реестрдан чиқарилади ҳамда шу куннинг ўзида ваколатли орган томонидан иштирокчи, ижрочига ёки ғолибга ёзма ёки электрон шаклда хабар берилади.

22. Инсофсиз ижрочи суднинг тегишли қарорига кўра Реестрдан чиқарилиши мумкин.

Бунда, суднинг тегишли қарори ваколатли органга келиб тушган кундан эътиборан бир иш кунидан кечиктирмаган муддатда ваколатли орган инсофсиз ижрочини Реестрдан чиқаради.

5-боб. Якуний қоида

23. Ушбу Низом талабларини бузганликда айбдор бўлган шахслар қонунчиликда белгиланган тартибда жавобгар бўладилар.

Вазир Д. КУЧКАРОВ

Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил Д. КАСИМОВ

Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси Ҳ. ТУРАХУЖАЕВ

Коррупцияга қарши курашиш агентлиги директори А. БУРХАНОВ

Савдо-саноат палатаси раиси Д. ВАХАБОВ

Тошкент ш.,

2024 йил 6 декабрь,

2024 йил 29 ноябрь

2024 йил 20 ноябрь

2024 йил 11 ноябрь

2024 йил 7 ноябрь

200-сон

(Қонунчилик маълумотлари миллий базаси, 17.01.2025 й., 10/25/3599/0044-сон)

lex.uz

Oʻzbekiston Respublikasi iqtisodiyot va moliya vazirining

buyrugʻi

NIZOM

Insofsiz ijrochilarning yagona reyestrini shakllantirish tartibi toʻgʻrisidagi nizomni tasdiqlash haqida

Oʻzbekiston Respublikasining “Davlat xaridlari toʻgʻrisida”gi Qonuniga muvofiq buyuraman:

1. Insofsiz ijrochilarning yagona reyestrini shakllantirish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi, Korrupsiyaga qarshi kurashish agentligi, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil hamda Oʻzbekiston Savdo-sanoat palatasi bilan kelishilgan.

3. Mazkur buyruq rasmiy eʼlon qilingan kundan eʼtiboran uch oy oʻtgach kuchga kiradi.

Kelishildi:

Oʻzbekiston Respublikasi iqtisodiyot va moliya vazirining 2024-yil 6-dekabrdagi 200-son buyrugʻiga ILOVA

Insofsiz ijrochilarning yagona reyestrini shakllantirish tartibi toʻgʻrisidagi

Ushbu Nizom Insofsiz ijrochilarning yagona reyestrini (bundan buyon matnda Reyestr deb yuritiladi) shakllantirish va yuritish tartibini belgilaydi.

1-bob. Umumiy qoidalar

1. Ushbu Nizomda quyidagi asosiy tushunchalar qoʻllaniladi:

davlat xaridlari sohasidagi vakolatli organ (bundan buyon matnda vakolatli organ deb yuritiladi) — Oʻzbekiston Respublikasi Iqtisodiyot va moliya vazirligi ;

insofsiz ijrochi — Reyestrga kiritilgan xarid qilish tartib-taomillari ishtirokchisi (bundan buyon matnda ishtirokchi deb yuritiladi) yoki gʻolibi (bundan buyon matnda gʻolib deb yuritiladi) yoxud davlat xaridlarining ijrochisi (bundan buyon matnda ijrochi deb yuritiladi) hisoblangan Oʻzbekiston Respublikasining rezidenti yoki norezidenti boʻlgan jismoniy yoki yuridik shaxs;

Reyestrga kiritish yuzasidan murojaatlarni koʻrib chiqish boʻyicha ishchi komissiya (bundan buyon matnda ishchi komissiya deb yuritiladi) — ishtirokchi yoki ijrochi toʻgʻrisidagi maʼlumotlarni Reyestrga kiritish yuzasidan murojaatlarni koʻrib chiqish va xulosa berish boʻyicha ishchi organ;

murojaatchi — ishtirokchi yoki ijrochini Reyestrga kiritish yuzasidan yozma yoki elektron shaklda murojaat qiluvchi davlat buyurtmachisi va (yoki) xarid qilish tartib-taomillari ustidan davlat nazoratini amalga oshiruvchi vakolatli davlat organlari, shuningdek jismoniy va yuridik shaxslar.

2-bob. Reyestrni shakllantirish asoslari va murojaat qilish tartibi

2. Reyestr vakolatli organ tomonidan shakllantiriladigan roʻyxatdan iborat boʻlib, unga quyidagi maʼlumotlar kiritiladi:

xarid qilish tartib-taomillari yakunlari boʻyicha belgilangan shartlar asosida davlat buyurtmachisi bilan shartnoma tuzishni va davlat xaridlarini amalga oshirishni rad etgan yoki boshqacha usulda boʻyin tovlagan xarid qilish tartib-taomillari gʻoliblari toʻgʻrisidagi;

majburiyatlarni bajarmaganlikda yoxud tegishli tarzda bajarmaganlikda belgilangan tartibda aybdor deb topilgan ijrochilar haqidagi, bundan majburiyatlar bartaraf etib boʻlmaydigan kuchlar oqibatida bajarilmagan yoki tegishli tarzda bajarilmagan hollar mustasno;

davlat xaridlari jarayonida yolgʻon yoki soxta hujjatlarni taqdim etgan, ayni bitta lotda ishtirok etgan affillangan shaxslar yoki manfaatlar toʻqnashuvi toʻgʻrisida maʼlumotlarni ochib bermagan ishtirokchilar toʻgʻrisidagi;

sudning qaroriga koʻra firibgarlik, soxtalashtirish va korrupsiya bilan bogʻliq jinoyatlarni sodir etganlikda aybdor deb topilgan ijrochilar toʻgʻrisidagi.

3. Reyestrga insofsiz ijrochilar toʻgʻrisidagi maʼlumotlar quyidagilar asosida kiritiladi:

vakolatli organning ishtirokchi yoki ijrochi toʻgʻrisidagi maʼlumotlarni Reyestrga kiritish toʻgʻrisidagi qaroriga muvofiq;

Davlat xaridlari sohasidagi shikoyatlarni koʻrib chiqish boʻyicha komissiyaning ijrochi toʻgʻrisidagi maʼlumotlarni Reyestrga kiritish toʻgʻrisidagi qaroriga muvofiq;

xarid qilish tartib-taomillari yakunlari boʻyicha belgilangan shartlar asosida davlat buyurtmachisi bilan shartnoma tuzishni va davlat xaridlarini amalga oshirishni rad etgan yoki boshqacha usulda boʻyin tovlagan gʻolib (zaxiradagi gʻolib bundan mustasno) toʻgʻrisidagi maʼlumotlar avtomatik tarzda Maxsus axborot portali orqali.

4. Murojaatchi vakolatli organga ishtirokchi yoki ijrochini Reyestrga kiritish yuzasidan yozma yoki elektron shaklda ariza bilan murojaat qilishi mumkin.

Murojaatchi arizasiga ishtirokchi yoki ijrochini Reyestrga kiritish uchun asos boʻlgan hujjatlarni, shuningdek sudning tegishli qarorini (agar mavjud boʻlsa) ilova qiladi.

5. Murojaat vakolatli organga kelib tushgan kundan boshlab oʻn besh kun ichida koʻrib chiqiladi va koʻrib chiqish natijasi boʻyicha ushbu muddat ichida murojaatchiga yozma yoki elektron shaklda xabar beriladi.

3-bob. Ishchi komissiya va Reyestrni shakllantirish tartibi

6. Ishtirokchi yoki ijrochi toʻgʻrisidagi maʼlumotlarni Reyestrga kiritish toʻgʻrisidagi qaror vakolatli organning rahbari yoki uning vazifalari yuklangan oʻrinbosari tomonidan qabul qilinadi.

Bunda, Reyestrga kiritish toʻgʻrisidagi qaror qabul qilinishiga ishtirokchi yoki ijrochi toʻgʻrisidagi maʼlumotlarni Reyestrga kiritish haqidagi ishchi komissiyaning xulosasi asos boʻladi. Ishchi komissiya tomonidan tegishli xulosa oʻn kun muddatda tayyorlanadi.

7. Ishchi komissiya tarkibi vakolatli organ rahbarining buyrugʻi bilan vakolatli organ rahbarining oʻrinbosari va xodimlari orasidan kamida 7 kishidan iborat tarkibda shakllantiriladi.

8. Ishchi komissiya faoliyatini tashkil etish, yigʻilishlarini oʻtkazish va ularga rahbarlik qilish ishchi komissiya raisi tomonidan amalga oshiriladi.

Ishchi komissiya yigʻilishi uchun tashkiliy tayyorgarlikni taʼminlash komissiya kotibi zimmasiga yuklanadi.

Ishchi komissiya yigʻilishlari zaruratga koʻra oʻtkaziladi. Yigʻilishlarda kun tartibiga kiritilgan masalalar yuzasidan kollegial tarzda xulosalar qabul qilinadi.

Ishchi komissiya yigʻilishlari aʼzolarning kamida uchdan ikki qismi ishtirok etganda vakolatli hisoblanadi.

Ishchi komissiya xulosalari yigʻilishda ishtirok etayotgan aʼzolarning koʻpchiligi tomonidan maʼqullangan taqdirda, qabul qilingan hisoblanadi. Ovozlar teng boʻlib qolgan taqdirda, ishchi komissiya raisining ovozi hal qiluvchi hisoblanadi.

9. Ishchi komissiya kotibi tomonidan ishtirokchi yoki ijrochiga, shuningdek murojaatchiga yigʻilishdan uch kun oldin ishchi komissiya yigʻilishi haqida xabar qilinadi. Bunda, ishtirokchi yoki ijrochi toʻgʻrisidagi maʼlumotlarni Reyestrga kiritish toʻgʻrisidagi masalani koʻrib chiqishda ishtirokchi yoki ijrochi, shuningdek murojaatchi ishtirok etish huquqiga ega.

10. Ishchi komissiya murojaatchi tomonidan taqdim etilgan hujjatlarda mazkur Nizomning 2-bandida nazarda tutilgan holatlar mavjudligini oʻrganadi.

Bunda, taqdim etilgan hujjatlarning toʻgʻriligi va haqqoniyligi uchun murojaatchi javobgar hisoblanadi.

11. Ishchi komissiya tomonidan mazkur Nizomning 2-bandida nazarda tutilgan holatlardan boshqa holatlar koʻrib chiqilmaydi.

12. Vakolatli organning ishtirokchi yoki ijrochi toʻgʻrisidagi maʼlumotlarni Reyestrga kiritish toʻgʻrisida qaror qabul qilingan kunda vakolatli organ Reyestrga kiritadi.

13. Vakolatli organ tomonidan quyidagi hollarda ishtirokchi yoki ijrochi toʻgʻrisidagi maʼlumotlarni Reyestrga kiritishni rad etish toʻgʻrisida qaror qabul qilinadi:

murojaatchining arizasi va unga ilova qilingan hujjatlarda ishtirokchi va ijrochini Reyestrga kiritish uchun mazkur Nizomning 2-bandida nazarda tutilgan asoslar mavjud boʻlmasa;

murojaatchi tomonidan taqdim etilgan hujjatlarning haqiqiy emasligi yoki ularda notoʻgʻri maʼlumotlar mavjudligi aniqlanganda.

14. Davlat xaridlari sohasidagi shikoyatlarni koʻrib chiqish boʻyicha komissiya tomonidan ijrochini Reyestrga kiritish toʻgʻrisida qaror qabul qilingan taqdirda vakolatli organ qaror qabul qilingan kunning oʻzida mazkur qaror asosida ijrochi toʻgʻrisidagi maʼlumotlarni Reyestrga kiritadi.

15. Davlat xaridlari sohasidagi shikoyatlarni koʻrib chiqish boʻyicha komissiya tomonidan ijrochini Reyestrga kiritish toʻgʻrisidagi qaror Davlat xaridlari sohasidagi shikoyatlarni koʻrib chiqish tartibi toʻgʻrisidagi nizomda (roʻyxat raqami 3013, 2018-yil 14-may) belgilangan tartibda qabul qilinadi.

16. Vakolatli organ tomonidan Reyestrga kiritilgan kunning oʻzida insofsiz ijrochiga bu toʻgʻrisida yozma ravishda yoki davlat xaridlari elektron tizimidagi shaxsiy kabineti orqali (shaxsiy kabineti mavjud boʻlgan taqdirda) elektron tarzda xabar beriladi.

17. Vakolatli organning ishtirokchi yoki ijrochi toʻgʻrisidagi maʼlumotlarni Reyestrga kiritish toʻgʻrisidagi qaroridan norozi boʻlgan ishtirokchi yoki ijrochi, shuningdek gʻolib qonunchilikda belgilangan tartibda sudga murojaat qilish huquqiga ega.

18. Davlat xaridlari elektron tizimi operatori xarid qilish tartib-taomillari yakunlari boʻyicha belgilangan shartlar asosida davlat buyurtmachisi bilan shartnoma tuzishni va davlat xaridlarini amalga oshirishni rad etgan yoki boshqacha usulda boʻyin tovlagan gʻolib toʻgʻrisidagi axborotni elektron maʼlumot almashinuvi orqali avtomatik tarzda Maxsus axborot portaliga (bundan buyon matnda Portal deb yuritiladi) yuboradi.

Davlat xaridlari elektron tizimi operatorlari tomonidan yuborilgan insofsiz ijrochilar toʻgʻrisidagi maʼlumotlar avtomatik tarzda Reyestrga kiritiladi.

4-bob. Reyestrni yuritish hamda insofsiz ijrochini Reyestrdan chiqarish tartibi

19. Reyestr vakolatli organ tomonidan Portalda yuritiladi.

20. Reyestrda insofsiz ijrochilar toʻgʻrisidagi quyidagi maʼlumotlar aks ettiriladi:

yuridik shaxsning nomi, joylashgan joyi (pochta manzili);

yuridik shaxsning rahbarini hamda benefitsiar mulkdorining familiyasi, ismi, otasining ismi, yashash joyi;

jismoniy shaxsning familiyasi, ismi, otasining ismi, yashash joyi (yakka tartibdagi tadbirkor va oʻzini oʻzi band qilgan shaxslar uchun);

STIR (yuridik shaxslar uchun), JSHSHIR (jismoniy shaxslar uchun);

sudning, vakolat organning, Davlat xaridlari sohasidagi shikoyatlarni koʻrib chiqish boʻyicha komissiyasining qarori sanasi va nusxasi (gʻolib reyestrga avtomatik tarzda kiritilgan hollar bundan mustasno);

Reyestrga kiritish va undan chiqarish sanasi va asosi.

Bunda, jismoniy shaxslarning pasport maʼlumotlari hamda yuridik shaxs muassislarining, shuningdek jismoniy shaxslarning yashash joyi haqidagi axborotdan boshqa maʼlumotlar ochiq hisoblanadi hamda foydalanuvchilar ulardan erkin va bepul tanishib chiqishi va foydalanishi mumkin.

21. Insofsiz ijrochi Reyestrga kiritilganidan boshlab ikki yil muddat oʻtgandan soʻng avtomatik tarzda Reyestrdan chiqariladi hamda shu kunning oʻzida vakolatli organ tomonidan ishtirokchi, ijrochiga yoki gʻolibga yozma yoki elektron shaklda xabar beriladi.

22. Insofsiz ijrochi sudning tegishli qaroriga koʻra Reyestrdan chiqarilishi mumkin.

Bunda, sudning tegishli qarori vakolatli organga kelib tushgan kundan eʼtiboran bir ish kunidan kechiktirmagan muddatda vakolatli organ insofsiz ijrochini Reyestrdan chiqaradi.

5-bob. Yakuniy qoida

23. Ushbu Nizom talablarini buzganlikda aybdor boʻlgan shaxslar qonunchilikda belgilangan tartibda javobgar boʻladilar.

Vazir D. KUCHKAROV

Tadbirkorlik subyektlarining huquqlari va qonuniy manfaatlarini himoya qilish boʻyicha vakil D. KASIMOV

Raqobatni rivojlantirish va isteʼmolchilar huquqlarini himoya qilish qoʻmitasi raisi H. TURAXUJAYEV

Korrupsiyaga qarshi kurashish agentligi direktori A. BURXANOV

Savdo-sanoat palatasi raisi D. VAXABOV

Toshkent sh.,

2024-yil 6-dekabr,

2024-yil 29-noyabr

2024-yil 20-noyabr

2024-yil 11-noyabr

2024-yil 7-noyabr

200-son

(Qonunchilik maʼlumotlari milliy bazasi, 17.01.2025-y., 10/25/3599/0044-son)

lex.uz