📅 2025-yil 17-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 17 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 17 января 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 17 January 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Кўп квартирали уйнинг ертўласидан фойдаланиш тартиби тўғрисидаги низомга ўзгартириш ва қўшимчалар киритиш ҳақиида
Республиканинг барча ҳудудларида тадбиркорликни ривожлантириш, кўп квартирали уйларнинг ертўла қисмларидан фойдаланган ҳолда, тадбиркорлик фаолиятини амалга ошириш учун кенг имкониятлар яратиш ҳамда ушбу жараённи янада тартибга солиш, мавжуд кўп квартирали уйларнинг ертўла қисмлари ҳисобини юритиш, кўп квартирали уйларнинг бошқарув органлари томонидан уйларнинг ертўла қисмларини ижарага беришда тўланадиган мажбурий бадал ва тўловларни амалга ошириш жараёни шаффоф бўлишини таъминлаш мақсадида Вазирлар Маҳкамаси қарор қилади:
1. Вазирлар Маҳкамасининг 2021 йил 15 октябрдаги 648-сон қарори билан тасдиқланган Кўп квартирали уйнинг ертўласидан фойдаланиш тартиби тўғрисидаги низомга иловага мувофиқ қуйидагиларни назарда тутувчи ўзгартириш ва қўшимча киритилсин:
кўп квартирали уйларнинг ертўлалари жисмоний ва юридик шахсларга фойдаланишга берилганда, ижара учун тўловлар ҳисобини «Менинг уйим» биллинг тизимида юритиш;
кўп квартирали уйнинг ертўласини ижарага беришда кўп квартирали уйдаги умумий мол-мулкка бўлган ҳуқуқларни ушбу жойлар мулкдорларининг номига давлат рўйхатидан ўтказиш.
2. Қурилиш ва уй-жой коммунал хўжалиги вазирлиги:
Иқтисодиёт ва молия вазирлиги ҳузуридаги Кадастр агентлиги билан биргаликда «UZCAD» ва «Менинг уйим» тизимларини интеграция қилган ҳолда, кўп квартирали уйлардаги жойлар мулкдорларининг номига давлат рўйхатидан ўтказилган умумий мол-мулк ва ҳар бир кўп квартирали уй жойлашган ва унга туташ ер участкалари ҳақидаги;
Солиқ қўмитаси билан биргаликда Солиқ қўмитасининг тегишли электрон тизимини «Менинг уйим» биллинг тизимига интеграция қилиш орқали бошқариш органларининг умумий мол-мулкдан фойдаланувчилари билан ижарага ёки текин фойдаланишга бериш тўғрисида тузилган шартномалар бўйича маълумотлар алмашинувини йўлга қўйсин.
Бунда Иқтисодиёт ва молия вазирлиги ҳузуридаги Кадастр агентлиги 2025 йил якунига қадар кўп квартирали уйларнинг умумий мол-мулк ва ертўла ҳақидаги электрон маълумотлар базасини шакллантирсин ва «Менинг уйим» биллинг тизимига киритилишини таъминласин.
3. Қурилиш ва уй-жой коммунал хўжалиги вазирлиги, манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов ва қурилиш ва уй-жой коммунал хўжалиги вазири Ш.С. Хидоятов зиммасига юклансин.
Вазирлар Маҳкамасининг 2025 йил 17 январдаги 17-сон қарорига ИЛОВА
Вазирлар Маҳкамасининг 2021 йил 15 октябрдаги 648-сон қарори билан тасдиқланган Кўп квартирали уйнинг ертўласидан фойдаланиш тартиби тўғрисидаги низомга киритилаётган ўзгартириш ва қўшимчалар
1. 3-банд қуйидаги мазмундаги иккинчи ва учинчи хатбошилар билан тўлдирилсин:
«Бунда фойдаланишга берилаётган умумий мол-мулкка бўлган ҳуқуқлар ушбу жойлар мулкдорларининг номига давлат рўйхатидан ўтказилган бўлиши шарт.
Кўп квартирали уйларни бошқариш органи ертўладан фойдаланувчи билан тузилган ижарага ёки текин фойдаланишга бериш тўғрисидаги шартномаларни солиқ хизмати органларининг электрон тизимларида ҳисобга қўйилишини таъминлайди».
2. 9-банд қуйидаги мазмундаги иккинчи ва учинчи хатбошилар билан тўлдирилсин:
«Ертўладан фойдаланганлик учун тўлаб бериладиган ижара тўловларининг алоҳида ҳисоби «Менинг уйим» биллинг тизимида юритилиб, ижара тўловлари ушбу тизим орқали ёки қонунчиликда тақиқланмаган бошқа тартибда амалга оширилиши мумкин.
Кўп квартирали уйларни бошқариш органи жисмоний ва юридик шахсларнинг ертўлани фойдаланишга олиш учун ёзма мурожаати, умумий йиғилиш баёни, фаолият тури, ижарага олинган майдон ҳамда ертўладан фойдаланганлик учун тўланадиган ижара тўловлари тўғрисидаги маълумотларни «Менинг уйим» биллинг тизимига киритади».
3. 18-банд қуйидаги таҳрирда баён этилсин:
«18. Кўп квартирали уйларнинг ертўла қисмида реконструкция ишларини амалга ошириш, таянч ва таянч бўлмаган деворларни бузиш, кавлаш, муҳандислик коммуникацияларининг схемаси бузилишига олиб келадиган ҳар қандай ўзгартиришларни амалга ошириш қатъиян тақиқланади, мазкур банднинг иккинчи ва учинчи хатбошиларда назарда тутилган ҳоллар бундан мустасно.
Шаҳарсозлик нормалари ва ёнғин хавфсизлиги қоидаларига зид бўлмаган енгил материаллардан фойдаланиб, муҳандислик тармоқларига хизмат кўрсатиш имкониятини чеклаб қўймасдан, ертўла ички қисмида ораёпма деворларни фақат белгиланган тартибда келишилган лойиҳа ҳужжатлари асосида ўрнатишга йўл қўйилади;
Кўп квартирали уйларнинг ертўла қисмининг жисмоний эскириши туфайли юзага келган йўқотишлар ўрнини тўлдириш учун таъмирлаш ишлари бажарилиши мумкин;
Кўп квартирали уйни бошқариш органи, туман (шаҳар) қурилиш ва уй-жой коммунал хўжалиги бўлими ҳамда Қурилиш ва уй-жой коммунал хўжалиги соҳасида ҳудудий назорат қилиш инспекцияси ертўладан фойдаланиш учун қўйиладиган талаблар устидан назоратни амалга оширади».
Ўзбекистон Республикасининг Бош вазири А. АРИПОВ
Тошкент ш.,
2025 йил 17 январь,
17-сон
Oʻzbekiston Respublikasi Vazirlar Mahkamasining
qarori
Koʻp kvartirali uyning yertoʻlasidan foydalanish tartibi toʻgʻrisidagi nizomga oʻzgartirish va qoʻshimchalar kiritish haqiida
Respublikaning barcha hududlarida tadbirkorlikni rivojlantirish, koʻp kvartirali uylarning yertoʻla qismlaridan foydalangan holda, tadbirkorlik faoliyatini amalga oshirish uchun keng imkoniyatlar yaratish hamda ushbu jarayonni yanada tartibga solish, mavjud koʻp kvartirali uylarning yertoʻla qismlari hisobini yuritish, koʻp kvartirali uylarning boshqaruv organlari tomonidan uylarning yertoʻla qismlarini ijaraga berishda toʻlanadigan majburiy badal va toʻlovlarni amalga oshirish jarayoni shaffof boʻlishini taʼminlash maqsadida Vazirlar Mahkamasi qaror qiladi:
1. Vazirlar Mahkamasining 2021-yil 15-oktabrdagi 648-son qarori bilan tasdiqlangan Koʻp kvartirali uyning yertoʻlasidan foydalanish tartibi toʻgʻrisidagi nizomga ilovaga muvofiq quyidagilarni nazarda tutuvchi oʻzgartirish va qoʻshimcha kiritilsin:
koʻp kvartirali uylarning yertoʻlalari jismoniy va yuridik shaxslarga foydalanishga berilganda, ijara uchun toʻlovlar hisobini “Mening uyim” billing tizimida yuritish;
koʻp kvartirali uyning yertoʻlasini ijaraga berishda koʻp kvartirali uydagi umumiy mol-mulkka boʻlgan huquqlarni ushbu joylar mulkdorlarining nomiga davlat roʻyxatidan oʻtkazish.
2. Qurilish va uy-joy kommunal xoʻjaligi vazirligi:
Iqtisodiyot va moliya vazirligi huzuridagi Kadastr agentligi bilan birgalikda “UZCAD” va “Mening uyim” tizimlarini integratsiya qilgan holda, koʻp kvartirali uylardagi joylar mulkdorlarining nomiga davlat roʻyxatidan oʻtkazilgan umumiy mol-mulk va har bir koʻp kvartirali uy joylashgan va unga tutash yer uchastkalari haqidagi;
Soliq qoʻmitasi bilan birgalikda Soliq qoʻmitasining tegishli elektron tizimini “Mening uyim” billing tizimiga integratsiya qilish orqali boshqarish organlarining umumiy mol-mulkdan foydalanuvchilari bilan ijaraga yoki tekin foydalanishga berish toʻgʻrisida tuzilgan shartnomalar boʻyicha maʼlumotlar almashinuvini yoʻlga qoʻysin.
Bunda Iqtisodiyot va moliya vazirligi huzuridagi Kadastr agentligi 2025-yil yakuniga qadar koʻp kvartirali uylarning umumiy mol-mulk va yertoʻla haqidagi elektron maʼlumotlar bazasini shakllantirsin va “Mening uyim” billing tizimiga kiritilishini taʼminlasin.
3. Qurilish va uy-joy kommunal xoʻjaligi vazirligi, manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov va qurilish va uy-joy kommunal xoʻjaligi vaziri Sh.S. Xidoyatov zimmasiga yuklansin.
Vazirlar Mahkamasining 2025-yil 17-yanvardagi 17-son qaroriga ILOVA
Vazirlar Mahkamasining 2021-yil 15-oktabrdagi 648-son qarori bilan tasdiqlangan Koʻp kvartirali uyning yertoʻlasidan foydalanish tartibi toʻgʻrisidagi nizomga kiritilayotgan oʻzgartirish va qoʻshimchalar
1. 3-band quyidagi mazmundagi ikkinchi va uchinchi xatboshilar bilan toʻldirilsin:
“Bunda foydalanishga berilayotgan umumiy mol-mulkka boʻlgan huquqlar ushbu joylar mulkdorlarining nomiga davlat roʻyxatidan oʻtkazilgan boʻlishi shart.
Koʻp kvartirali uylarni boshqarish organi yertoʻladan foydalanuvchi bilan tuzilgan ijaraga yoki tekin foydalanishga berish toʻgʻrisidagi shartnomalarni soliq xizmati organlarining elektron tizimlarida hisobga qoʻyilishini taʼminlaydi”.
2. 9-band quyidagi mazmundagi ikkinchi va uchinchi xatboshilar bilan toʻldirilsin:
“Yertoʻladan foydalanganlik uchun toʻlab beriladigan ijara toʻlovlarining alohida hisobi “Mening uyim” billing tizimida yuritilib, ijara toʻlovlari ushbu tizim orqali yoki qonunchilikda taqiqlanmagan boshqa tartibda amalga oshirilishi mumkin.
Koʻp kvartirali uylarni boshqarish organi jismoniy va yuridik shaxslarning yertoʻlani foydalanishga olish uchun yozma murojaati, umumiy yigʻilish bayoni, faoliyat turi, ijaraga olingan maydon hamda yertoʻladan foydalanganlik uchun toʻlanadigan ijara toʻlovlari toʻgʻrisidagi maʼlumotlarni “Mening uyim” billing tizimiga kiritadi”.
3. 18-band quyidagi tahrirda bayon etilsin:
“18. Koʻp kvartirali uylarning yertoʻla qismida rekonstruksiya ishlarini amalga oshirish, tayanch va tayanch boʻlmagan devorlarni buzish, kavlash, muhandislik kommunikatsiyalarining sxemasi buzilishiga olib keladigan har qanday oʻzgartirishlarni amalga oshirish qatʼiyan taqiqlanadi, mazkur bandning ikkinchi va uchinchi xatboshilarda nazarda tutilgan hollar bundan mustasno.
Shaharsozlik normalari va yongʻin xavfsizligi qoidalariga zid boʻlmagan yengil materiallardan foydalanib, muhandislik tarmoqlariga xizmat koʻrsatish imkoniyatini cheklab qoʻymasdan, yertoʻla ichki qismida orayopma devorlarni faqat belgilangan tartibda kelishilgan loyiha hujjatlari asosida oʻrnatishga yoʻl qoʻyiladi;
Koʻp kvartirali uylarning yertoʻla qismining jismoniy eskirishi tufayli yuzaga kelgan yoʻqotishlar oʻrnini toʻldirish uchun taʼmirlash ishlari bajarilishi mumkin;
Koʻp kvartirali uyni boshqarish organi, tuman (shahar) qurilish va uy-joy kommunal xoʻjaligi boʻlimi hamda Qurilish va uy-joy kommunal xoʻjaligi sohasida hududiy nazorat qilish inspeksiyasi yertoʻladan foydalanish uchun qoʻyiladigan talablar ustidan nazoratni amalga oshiradi”.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 17-yanvar,
17-son