📅 2025-yil 20-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 20 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 20 января 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 20 January 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
РЎЙХАТИ
Ўзбекистон Республикасида маҳсулот ва хизматларни ихтиёрий экологик маркировкалаш тизимини такомиллаштириш чора-тадбирлари тўғрисида
Ўзбекистон Республикаси Президентининг «Экология ва атроф-муҳитни муҳофаза қилиш соҳасини трансформация қилиш ва ваколатли давлат органи фаолиятини ташкил этиш чора-тадбирлари тўғрисида» 2023 йил 31 майдаги ПФ-81-сон Фармони , «Экология, атроф-муҳитни муҳофаза қилиш ва иқлим ўзгариши вазирлиги фаолиятини самарали ташкил этиш чора-тадбирлари тўғрисида» 2023 йил 31 майдаги ПҚ-171-сон қарори ҳамда «Ўзбекистон-2030» стратегиясини «Ёшлар ва бизнесни қўллаб-қувватлаш йили»да амалга оширишга оид давлат дастури тўғрисида» 2024 йил 21 февралдаги ПФ-37-сон Фармони ижросини таъминлаш, шунингдек, экологик маркировкалашнинг самарали тизимини жорий этиш мақсадида Вазирлар Маҳкамаси қарор қилади:
1. Ўзбекистон Республикаси Экология ва иқлим ўзгариши миллий қўмитаси (кейинги ўринларда — Экология қўмитаси) ҳамда Инвестициялар, саноат ва савдо вазирлигининг:
Ўзбекистон Республикаси ҳудудида ISO 14024 халқаро стандартига мувофиқ бутун ҳаётий давр бўйича (I тип) «Yashil belgi» маҳсулот ва хизматларни ягона ихтиёрий экологик маркировкалаш тизимини (кейинги ўринларда — экологик маркировкалаш тизими);
маҳсулот ва хизматларнинг экологик маркировкалаш стандартларига мувофиқлигини экологик маркировкалаш тизимида авторизациядан ўтган юридик шахслар (кейинги ўринларда — экологик маркировкалаш органи) томонидан баҳолаш тартибини жорий этиш тўғрисидаги таклифлари маъқуллансин.
2. Экология қўмитаси экологик маркировкалаш тизимини тартибга солиш соҳасида ваколатли давлат органи этиб белгилансин ҳамда унга қуйидаги вазифалар юклансин:
экологик маркировкалаш тизимини тартибга солиш ҳужжатларини, шу жумладан, экологик маркировкалаш тизими қоидалари, экологик маркировкалаш органини авторизациядан ўтказиш, хорижий давлатларнинг экологик маркировка тизимларини тан олиш ҳамда экологик маркировка белгисини қўллаш тартибларини тасдиқлаш;
экологик маркировкалаш органларига қўйиладиган талабларни тасдиқлаш;
экологик маркировкалаш стандартларига мувофиқ экологик жиҳатдан афзал, шу жумладан, ресурсларни тежовчи, кам чиқитли ва чиқиндисиз, атроф-муҳитга салбий таъсири камайтирилган маҳсулотларни кенг ишлаб чиқаришни рағбатлантиришга қаратилган таклифларни ишлаб чиқиш ва киритиш;
экологик маркировкалаш стандартларини ишлаб чиқиш;
экологик маркировкалаш соҳасида фаолият юритувчи ходимларни қайта тайёрлаш ва уларнинг малакасини оширишни ташкил этиш.
3. Экология қўмитаси ҳузуридаги «Давлат экологик сертификатлаштириш ва стандартлаштириш маркази» масъулияти чекланган жамияти экологик маркировкалаш тизимининг оператори этиб белгилансин ҳамда унга қуйидаги вазифалар юклансин:
Экологик маркировкалаш органларини экологик маркировкалаш тизимида авторизациядан ўтказиш;
экологик маркировкалаш стандартларини амалиётга татбиқ этиш;
маҳсулот ва хизматларга берилган экологик маркировкалаш сертификатининг ҳақиқийлиги ва амал қилиш муддатлари тўғрисидаги маълумотларни тасдиқлаш ҳамда очиқлигини таъминлаш мақсадида ушбу сертификатлар реестрини юритиш;
экологик маркировкалаш органлари манфаатларини ҳимоя қилиш бўйича экологик маркировка белгисидан тўғри фойдаланилишини оммалаштириш ҳамда унинг халқаро миқёсдаги нуфузини ошириш;
халқаро экологик сертификатлаштириш ва стандартлаштириш ташкилотлари, уюшмалар ва ишчи гуруҳларда экологик маркировкалаш тизимини тақдимот қилиш;
экологик маркировкалаш органлари мутахассислари малакасини ошириш ва уларнинг халқаро экологик сертификатлаштириш ҳамда стандартлаштириш ташкилотларида тажриба алмашишини ташкил этиш.
4. Экологик маркировка белгиси 1-иловага мувофиқ тасдиқлансин.
5. Шундай тартиб ўрнатилсинки, унга мувофиқ:
а) экологик маркировкалаш органи экологик маркировкалаш тизимининг оператори билан тузиладиган шартнома асосида авторизациядан ўтказилади. Бунда экологик маркировкалаш органининг қуйидаги талабларга жавоб бериши баҳоланади:
экологик маркировкалаш органининг маркировкалаш жараёнлари ISO 14024 халқаро стандартига мувофиқ бўлиши;
экологик маркировкалаш органининг сертификатлаштириш фаолиятига оид ички тартиб ва қоидалари Экологик маркировкалаш тизими қоидалари ҳамда экологик маркировка белгисини қўллаш қоидаларига мувофиқ бўлиши;
асосий иш жойи ушбу юридик шахсда ҳисобланган тегишли мутахассислар ISO 14024 халқаро стандарти бўйича билим ва кўникмаларга эга бўлиши;
б) экологик маркировкалаш сертификатисиз маҳсулотларнинг номи, қадоғи, кузатув ҳужжатлари ва рекламасида ҳамда хўжалик юритувчи субъектнинг номида экологик маркировка белгисидан фойдаланиш ёки бундай маҳсулот ва хизматларни реализация қилиш тақиқланади;
в) сертификатлаштириш ишлари ихтиёрий равишда тадбиркорлик субъектларининг мурожаатига мувофиқ экологик маркировкалаш органи билан тузилган шартнома асосида амалга оширилади;
г) экологик маркировка белгисидан маҳсулотнинг номи, қадоғи, кузатув ҳужжатлари, шунингдек, уни реклама қилишда фойдаланиш, маҳсулот ишлаб чиқарувчилар томонидан тегишли маҳсулотлар учун экологик маркировкалаш сертификати олингандан кейин Экологик маркировкалаш тизими оператори билан тузилган шартнома асосида амалга оширилади.
6. Белгилансинки, экологик маркировкалаш тизими қуйидаги талабларга мос келиши лозим:
ISO 14024 халқаро стандартига мувофиқ маҳсулотнинг бутун ҳаётий даврини кўриб чиқишга асосланган бўлиши;
экологик жиҳатдан афзал маҳсулотни, яъни ишлаб чиқариш, фойдаланиш, истеъмол қилиш, транспортда ташиш, сақлаш ва утилизация қилишда бир турдаги маҳсулот гуруҳи доирасида ўхшашига нисбатан атроф-муҳитга экологик маркировкалаш стандартларига мувофиқ кам таъсир кўрсатувчи маҳсулотни ажратиши;
атроф-муҳитни муҳофаза қилиш соҳасидаги қонунчилик нормаларига риоя этиладиган маҳсулотларни экологик маркировкалашни кўзда тутиши;
экологик маркировка белгисини қўллаш қоидаларини кўзда тутиши ҳамда мазкур қоидалар бажарилиши устидан назоратни амалга ошириши;
барча манфаатдор томонлар учун экологик маркировкалаш тизимининг асосий элементлари, шу жумладан, экологик маркировкалаш тизимида сертификатлаштириш ишлари ўтказиладиган стандартлар ва сертификатлаштириш жараёнлари, шунингдек, экологик маркировка белгисини қўллаш қоидаларининг шаффофлиги ҳамда тушунарлилигини таъминлаши.
7. Белгилаб қўйилсинки, бир турдаги маҳсулот гуруҳи учун экологик маркировкалаш стандартлари қонунчилик ҳужжатларида белгиланган талаблардан ташқари қуйидаги талабларга жавоб бериши лозим:
аниқ ўлчанадиган сифат ва миқдорий экологик афзаллик мезонлари ҳамда уларни текшириш услубларига эга бўлиши;
бир турдаги маҳсулотларнинг маълум бир гуруҳига оид маҳсулот ҳаётий даврининг асосий босқичларига қўйиладиган талабларни, шу жумладан, ишлаб чиқариш, фойдаланиш, истеъмол қилиш, транспортда ташиш, сақлаш ва утилизация қилишни қамраб олиши;
экологик маркировкалаш сертификатига эга ва эга бўлмаган маҳсулотлар ўртасида ўлчанадиган кўрсаткичлар фарқни акс эттириши.
8. Экология қўмитаси манфаатдор вазирлик ва идоралар билан биргаликда:
а) экологик маркировкалаш соҳасидаги қонунбузарлик ҳолатларини аниқлаш ва уларни бартараф этиш чораларини кўрсин;
б) икки ой муддатда қуйидагиларни назарда тутувчи норматив-ҳуқуқий ҳужжатларни ишлаб чиқсин ва тасдиқласин:
экологик маркировкалаш тизими қоидалари;
экологик маркировкалаш органини авторизациядан ўтказиш тартиби;
хорижий давлатларнинг экологик маркировка тизимларини тан олиш тартиби;
экологик маркировка белгисини қўллаш тартиби;
в) уч ой муддатда қуйидагиларни назарда тутувчи норматив-ҳуқуқий ҳужжат лойиҳасини Вазирлар Маҳкамасига киритсин:
экологик маркировкалашни рағбатлантириш бўйича чора-тадбирларни;
давлат харидларини амалга оширишда экологик маркировкалаш сертификатига эга бўлган маҳсулотларнинг устуворлигини;
экологик маркировка белгисидан экологик маркировкалаш сертификатисиз фойдаланганлик учун жавобгарликни белгилаш.
9. Ўзбекистон Миллий ахборот агентлиги, Ўзбекистон Миллий телерадиокомпаниясига Экология вазирлиги билан биргаликда мазкур қарорнинг мазмун-моҳиятини оммавий ахборот воситаларида кенг ёритиш, экологик маркировкалаш тартиботлари, талаблари ва экологик маркировкалаш стандартларини кенг тарғиб қилиш учун тематик даврий дастурларни амалга ошириш тавсия этилсин.
10. Вазирлар Маҳкамасининг 2020 йил 20 мартдаги 175-сон қарори билан тасдиқланган Ваколатли органларнинг мева-сабзавотлар, тўқимачилик маҳсулотлари ва буюмларини экспорт қилиш учун зарур рухсатнома ва сертификатларни расмийлаштириш билан боғлиқ харажатларини қоплаб бериш тартиби тўғрисидаги низомга 2-иловага мувофиқ қўшимчалар киритилсин.
11. Ўзбекистон Республикаси Ҳукуматининг 3-иловага мувофиқ айрим қарорлари ўз кучини йўқотган деб ҳисоблансин.
12. Мазкур қарор расмий эълон қилинган кундан эътиборан уч ой ўтгач кучга киради.
13. Мазкур қарорнинг бажарилишини назорат қилиш Ўзбекистон Республикаси экология, атроф-муҳитни муҳофаза қилиш ва иқлим ўзгариши вазири А.А. Абдухакимов зиммасига юклансин.
Вазирлар Маҳкамасининг 2025 йил 20 январдаги 20-сон қарорига 1-ИЛОВА
Экологик маркировка белгиси
Экологик маркировка белгисининг умумий тавсифи
1. Экологик маркировка белгиси — оқ фонда тўқ яшил рангдаги «YASHIL BELGI» сўзларидан ҳамда тўқ яшил ва оч яшил ранглардаги иккита барг тасвиридан иборат бўлиб, улар тўқ яшил рангдаги тўртбурчак шакл ичида жойлаштирилган. Бунда:
барглар тасвири «YASHIL BELGI» сўзларининг юқори қисмига жойлаштирилган;
«YASHIL BELGI» сўзлари экологик маркировкалаш тизимини англатади;
тўртбурчак шакли экологик маркировкалаш тизими аниқ талаб ва чегараларни белгилайдиган стандартларга асосланганлигини ифодалайди.
2. Маҳсулот ёки хизматлар хусусиятларидан келиб чиқиб экологик маркировка белгиси оқ-қора ёхуд монохром рангларда тасвирланиши мумкин.
Монохром кўринишидаги экологик маркировкалаш белгиси фақат тўқ яшил ёки оч яшил рангда бўлишига рухсат этилади.
Вазирлар Маҳкамасининг 2025 йил 20 январдаги 20-сон қарорига 2-ИЛОВА
Вазирлар Маҳкамасининг 2020 йил 20 мартдаги 175-сон қарори билан тасдиқланган Ваколатли органларнинг мева-сабзавотлар, тўқимачилик маҳсулотлари ва буюмларини экспорт қилиш учун зарур рухсатнома ва сертификатларни расмийлаштириш билан боғлиқ харажатларини қоплаб бериш тартиби тўғрисидаги низомга киритилаётган қўшимчалар
1. 2-банднинг иккинчи хатбошиси «Экология, атроф-муҳитни муҳофаза қилиш ва иқлим ўзгариши вазирлиги ҳузуридаги «Давлат экологик сертификатлаштириш ва стандартлаштириш маркази» МЧЖ» сўзлари билан тўлдирилсин.
2. 1-илова «1-босқич» позициясининг «Масъул ижрочилар» устуни «Ўзбекэкспертиза» АЖ» сўзларидан кейин «Экология, атроф-муҳитни муҳофаза қилиш ва иқлим ўзгариши вазирлиги ҳузуридаги «Давлат экологик сертификатлаштириш ва стандартлаштириш маркази» МЧЖ» сўзлари билан тўлдирилсин.
Вазирлар Маҳкамасининг 2025 йил 20 январдаги 20-сон қарорига 3-ИЛОВА
Ўзбекистон Республикаси Ҳукуматининг ўз кучини йўқотган деб эътироф этилаётган қарорлари
1. Вазирлар Маҳкамасининг «Ўзбекистон Республикасида маҳсулотларни ихтиёрий экологик маркировкалаш тизимини жорий этиш тўғрисида» 2019 йил 27 майдаги 435-сон қарори .
2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикасининг «Норматив-ҳуқуқий ҳужжатлар тўғрисида» 2021 йил 20 апрелдаги ЎРҚ-682-сон Қонуни)» 2022 йил 4 апрелдаги 153-сон қарорига илованинг 632-банди .
Ўзбекистон Республикасининг Бош вазири А. АРИПОВ
Тошкент ш.,
2025 йил 20 январь,
20-сон
Oʻzbekiston Respublikasi Vazirlar Mahkamasining
qarori
ROʻYXATI
Oʻzbekiston Respublikasida mahsulot va xizmatlarni ixtiyoriy ekologik markirovkalash tizimini takomillashtirish chora-tadbirlari toʻgʻrisida
Oʻzbekiston Respublikasi Prezidentining “Ekologiya va atrof-muhitni muhofaza qilish sohasini transformatsiya qilish va vakolatli davlat organi faoliyatini tashkil etish chora-tadbirlari toʻgʻrisida” 2023-yil 31-maydagi PF-81-son Farmoni , “Ekologiya, atrof-muhitni muhofaza qilish va iqlim oʻzgarishi vazirligi faoliyatini samarali tashkil etish chora-tadbirlari toʻgʻrisida” 2023-yil 31-maydagi PQ-171-son qarori hamda “Oʻzbekiston-2030” strategiyasini “Yoshlar va biznesni qoʻllab-quvvatlash yili”da amalga oshirishga oid davlat dasturi toʻgʻrisida” 2024-yil 21-fevraldagi PF-37-son Farmoni ijrosini taʼminlash, shuningdek, ekologik markirovkalashning samarali tizimini joriy etish maqsadida Vazirlar Mahkamasi qaror qiladi:
1. Oʻzbekiston Respublikasi Ekologiya va iqlim oʻzgarishi milliy qoʻmitasi (keyingi oʻrinlarda — Ekologiya qoʻmitasi) hamda Investitsiyalar, sanoat va savdo vazirligining:
Oʻzbekiston Respublikasi hududida ISO 14024 xalqaro standartiga muvofiq butun hayotiy davr boʻyicha (I tip) “Yashil belgi” mahsulot va xizmatlarni yagona ixtiyoriy ekologik markirovkalash tizimini (keyingi oʻrinlarda — ekologik markirovkalash tizimi);
mahsulot va xizmatlarning ekologik markirovkalash standartlariga muvofiqligini ekologik markirovkalash tizimida avtorizatsiyadan oʻtgan yuridik shaxslar (keyingi oʻrinlarda — ekologik markirovkalash organi) tomonidan baholash tartibini joriy etish toʻgʻrisidagi takliflari maʼqullansin.
2. Ekologiya qoʻmitasi ekologik markirovkalash tizimini tartibga solish sohasida vakolatli davlat organi etib belgilansin hamda unga quyidagi vazifalar yuklansin:
ekologik markirovkalash tizimini tartibga solish hujjatlarini, shu jumladan, ekologik markirovkalash tizimi qoidalari, ekologik markirovkalash organini avtorizatsiyadan oʻtkazish, xorijiy davlatlarning ekologik markirovka tizimlarini tan olish hamda ekologik markirovka belgisini qoʻllash tartiblarini tasdiqlash;
ekologik markirovkalash organlariga qoʻyiladigan talablarni tasdiqlash;
ekologik markirovkalash standartlariga muvofiq ekologik jihatdan afzal, shu jumladan, resurslarni tejovchi, kam chiqitli va chiqindisiz, atrof-muhitga salbiy taʼsiri kamaytirilgan mahsulotlarni keng ishlab chiqarishni ragʻbatlantirishga qaratilgan takliflarni ishlab chiqish va kiritish;
ekologik markirovkalash standartlarini ishlab chiqish;
ekologik markirovkalash sohasida faoliyat yurituvchi xodimlarni qayta tayyorlash va ularning malakasini oshirishni tashkil etish.
3. Ekologiya qoʻmitasi huzuridagi “Davlat ekologik sertifikatlashtirish va standartlashtirish markazi” masʼuliyati cheklangan jamiyati ekologik markirovkalash tizimining operatori etib belgilansin hamda unga quyidagi vazifalar yuklansin:
Ekologik markirovkalash organlarini ekologik markirovkalash tizimida avtorizatsiyadan oʻtkazish;
ekologik markirovkalash standartlarini amaliyotga tatbiq etish;
mahsulot va xizmatlarga berilgan ekologik markirovkalash sertifikatining haqiqiyligi va amal qilish muddatlari toʻgʻrisidagi maʼlumotlarni tasdiqlash hamda ochiqligini taʼminlash maqsadida ushbu sertifikatlar reyestrini yuritish;
ekologik markirovkalash organlari manfaatlarini himoya qilish boʻyicha ekologik markirovka belgisidan toʻgʻri foydalanilishini ommalashtirish hamda uning xalqaro miqyosdagi nufuzini oshirish;
xalqaro ekologik sertifikatlashtirish va standartlashtirish tashkilotlari, uyushmalar va ishchi guruhlarda ekologik markirovkalash tizimini taqdimot qilish;
ekologik markirovkalash organlari mutaxassislari malakasini oshirish va ularning xalqaro ekologik sertifikatlashtirish hamda standartlashtirish tashkilotlarida tajriba almashishini tashkil etish.
4. Ekologik markirovka belgisi 1-ilovaga muvofiq tasdiqlansin.
5. Shunday tartib oʻrnatilsinki, unga muvofiq:
a) ekologik markirovkalash organi ekologik markirovkalash tizimining operatori bilan tuziladigan shartnoma asosida avtorizatsiyadan oʻtkaziladi. Bunda ekologik markirovkalash organining quyidagi talablarga javob berishi baholanadi:
ekologik markirovkalash organining markirovkalash jarayonlari ISO 14024 xalqaro standartiga muvofiq boʻlishi;
ekologik markirovkalash organining sertifikatlashtirish faoliyatiga oid ichki tartib va qoidalari Ekologik markirovkalash tizimi qoidalari hamda ekologik markirovka belgisini qoʻllash qoidalariga muvofiq boʻlishi;
asosiy ish joyi ushbu yuridik shaxsda hisoblangan tegishli mutaxassislar ISO 14024 xalqaro standarti boʻyicha bilim va koʻnikmalarga ega boʻlishi;
b) ekologik markirovkalash sertifikatisiz mahsulotlarning nomi, qadogʻi, kuzatuv hujjatlari va reklamasida hamda xoʻjalik yurituvchi subyektning nomida ekologik markirovka belgisidan foydalanish yoki bunday mahsulot va xizmatlarni realizatsiya qilish taqiqlanadi;
v) sertifikatlashtirish ishlari ixtiyoriy ravishda tadbirkorlik subyektlarining murojaatiga muvofiq ekologik markirovkalash organi bilan tuzilgan shartnoma asosida amalga oshiriladi;
g) ekologik markirovka belgisidan mahsulotning nomi, qadogʻi, kuzatuv hujjatlari, shuningdek, uni reklama qilishda foydalanish, mahsulot ishlab chiqaruvchilar tomonidan tegishli mahsulotlar uchun ekologik markirovkalash sertifikati olingandan keyin Ekologik markirovkalash tizimi operatori bilan tuzilgan shartnoma asosida amalga oshiriladi.
6. Belgilansinki, ekologik markirovkalash tizimi quyidagi talablarga mos kelishi lozim:
ISO 14024 xalqaro standartiga muvofiq mahsulotning butun hayotiy davrini koʻrib chiqishga asoslangan boʻlishi;
ekologik jihatdan afzal mahsulotni, yaʼni ishlab chiqarish, foydalanish, isteʼmol qilish, transportda tashish, saqlash va utilizatsiya qilishda bir turdagi mahsulot guruhi doirasida oʻxshashiga nisbatan atrof-muhitga ekologik markirovkalash standartlariga muvofiq kam taʼsir koʻrsatuvchi mahsulotni ajratishi;
atrof-muhitni muhofaza qilish sohasidagi qonunchilik normalariga rioya etiladigan mahsulotlarni ekologik markirovkalashni koʻzda tutishi;
ekologik markirovka belgisini qoʻllash qoidalarini koʻzda tutishi hamda mazkur qoidalar bajarilishi ustidan nazoratni amalga oshirishi;
barcha manfaatdor tomonlar uchun ekologik markirovkalash tizimining asosiy elementlari, shu jumladan, ekologik markirovkalash tizimida sertifikatlashtirish ishlari oʻtkaziladigan standartlar va sertifikatlashtirish jarayonlari, shuningdek, ekologik markirovka belgisini qoʻllash qoidalarining shaffofligi hamda tushunarliligini taʼminlashi.
7. Belgilab qoʻyilsinki, bir turdagi mahsulot guruhi uchun ekologik markirovkalash standartlari qonunchilik hujjatlarida belgilangan talablardan tashqari quyidagi talablarga javob berishi lozim:
aniq oʻlchanadigan sifat va miqdoriy ekologik afzallik mezonlari hamda ularni tekshirish uslublariga ega boʻlishi;
bir turdagi mahsulotlarning maʼlum bir guruhiga oid mahsulot hayotiy davrining asosiy bosqichlariga qoʻyiladigan talablarni, shu jumladan, ishlab chiqarish, foydalanish, isteʼmol qilish, transportda tashish, saqlash va utilizatsiya qilishni qamrab olishi;
ekologik markirovkalash sertifikatiga ega va ega boʻlmagan mahsulotlar oʻrtasida oʻlchanadigan koʻrsatkichlar farqni aks ettirishi.
8. Ekologiya qoʻmitasi manfaatdor vazirlik va idoralar bilan birgalikda:
a) ekologik markirovkalash sohasidagi qonunbuzarlik holatlarini aniqlash va ularni bartaraf etish choralarini koʻrsin;
b) ikki oy muddatda quyidagilarni nazarda tutuvchi normativ-huquqiy hujjatlarni ishlab chiqsin va tasdiqlasin:
ekologik markirovkalash tizimi qoidalari;
ekologik markirovkalash organini avtorizatsiyadan oʻtkazish tartibi;
xorijiy davlatlarning ekologik markirovka tizimlarini tan olish tartibi;
ekologik markirovka belgisini qoʻllash tartibi;
v) uch oy muddatda quyidagilarni nazarda tutuvchi normativ-huquqiy hujjat loyihasini Vazirlar Mahkamasiga kiritsin:
ekologik markirovkalashni ragʻbatlantirish boʻyicha chora-tadbirlarni;
davlat xaridlarini amalga oshirishda ekologik markirovkalash sertifikatiga ega boʻlgan mahsulotlarning ustuvorligini;
ekologik markirovka belgisidan ekologik markirovkalash sertifikatisiz foydalanganlik uchun javobgarlikni belgilash.
9. Oʻzbekiston Milliy axborot agentligi, Oʻzbekiston Milliy teleradiokompaniyasiga Ekologiya vazirligi bilan birgalikda mazkur qarorning mazmun-mohiyatini ommaviy axborot vositalarida keng yoritish, ekologik markirovkalash tartibotlari, talablari va ekologik markirovkalash standartlarini keng targʻib qilish uchun tematik davriy dasturlarni amalga oshirish tavsiya etilsin.
10. Vazirlar Mahkamasining 2020-yil 20-martdagi 175-son qarori bilan tasdiqlangan Vakolatli organlarning meva-sabzavotlar, toʻqimachilik mahsulotlari va buyumlarini eksport qilish uchun zarur ruxsatnoma va sertifikatlarni rasmiylashtirish bilan bogʻliq xarajatlarini qoplab berish tartibi toʻgʻrisidagi nizomga 2-ilovaga muvofiq qoʻshimchalar kiritilsin.
11. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.
12. Mazkur qaror rasmiy eʼlon qilingan kundan eʼtiboran uch oy oʻtgach kuchga kiradi.
13. Mazkur qarorning bajarilishini nazorat qilish Oʻzbekiston Respublikasi ekologiya, atrof-muhitni muhofaza qilish va iqlim oʻzgarishi vaziri A.A. Abduxakimov zimmasiga yuklansin.
Vazirlar Mahkamasining 2025-yil 20-yanvardagi 20-son qaroriga 1-ILOVA
Ekologik markirovka belgisi
Ekologik markirovka belgisining umumiy tavsifi
1. Ekologik markirovka belgisi — oq fonda toʻq yashil rangdagi “YASHIL BELGI” soʻzlaridan hamda toʻq yashil va och yashil ranglardagi ikkita barg tasviridan iborat boʻlib, ular toʻq yashil rangdagi toʻrtburchak shakl ichida joylashtirilgan. Bunda:
barglar tasviri “YASHIL BELGI” soʻzlarining yuqori qismiga joylashtirilgan;
“YASHIL BELGI” soʻzlari ekologik markirovkalash tizimini anglatadi;
toʻrtburchak shakli ekologik markirovkalash tizimi aniq talab va chegaralarni belgilaydigan standartlarga asoslanganligini ifodalaydi.
2. Mahsulot yoki xizmatlar xususiyatlaridan kelib chiqib ekologik markirovka belgisi oq-qora yoxud monoxrom ranglarda tasvirlanishi mumkin.
Monoxrom koʻrinishidagi ekologik markirovkalash belgisi faqat toʻq yashil yoki och yashil rangda boʻlishiga ruxsat etiladi.
Vazirlar Mahkamasining 2025-yil 20-yanvardagi 20-son qaroriga 2-ILOVA
Vazirlar Mahkamasining 2020-yil 20-martdagi 175-son qarori bilan tasdiqlangan Vakolatli organlarning meva-sabzavotlar, toʻqimachilik mahsulotlari va buyumlarini eksport qilish uchun zarur ruxsatnoma va sertifikatlarni rasmiylashtirish bilan bogʻliq xarajatlarini qoplab berish tartibi toʻgʻrisidagi nizomga kiritilayotgan qoʻshimchalar
1. 2-bandning ikkinchi xatboshisi “Ekologiya, atrof-muhitni muhofaza qilish va iqlim oʻzgarishi vazirligi huzuridagi “Davlat ekologik sertifikatlashtirish va standartlashtirish markazi” MCHJ” soʻzlari bilan toʻldirilsin.
2. 1-ilova “1-bosqich” pozitsiyasining “Masʼul ijrochilar” ustuni “Oʻzbekekspertiza” AJ” soʻzlaridan keyin “Ekologiya, atrof-muhitni muhofaza qilish va iqlim oʻzgarishi vazirligi huzuridagi “Davlat ekologik sertifikatlashtirish va standartlashtirish markazi” MCHJ” soʻzlari bilan toʻldirilsin.
Vazirlar Mahkamasining 2025-yil 20-yanvardagi 20-son qaroriga 3-ILOVA
Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan qarorlari
1. Vazirlar Mahkamasining “Oʻzbekiston Respublikasida mahsulotlarni ixtiyoriy ekologik markirovkalash tizimini joriy etish toʻgʻrisida” 2019-yil 27-maydagi 435-son qarori .
2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasining “Normativ-huquqiy hujjatlar toʻgʻrisida” 2021-yil 20-apreldagi OʻRQ-682-son Qonuni)” 2022-yil 4-apreldagi 153-son qaroriga ilovaning 632-bandi .
Oʻzbekiston Respublikasining Bosh vaziri A. ARIPOV
Toshkent sh.,
2025-yil 20-yanvar,
20-son