📅 2025-yil 22-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 22 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 22 января 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 22 January 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
Норматив-ҳуқуқий ҳужжатлар лойиҳаларининг илмий асосланганлик даражасини ошириш чора-тадбирлари тўғрисида
Ўзбекистон Республикаси Президентининг « «Ўзбекистон-2030» стратегиясини Ёшлар ва бизнесни қўллаб-қувватлаш йили»да амалга оширишга оид давлат дастури тўғрисида » 2024 йил 21 февралдаги ПФ-37-сон ҳамда « Ижтимоий муносабатларни ҳуқуқий тартибга солишнинг барқарорлигини таъминлаш, сифати ва самарадорлигини ошириш чора-тадбирлари тўғрисида » 2024 йил 16 августдаги ПФ-111-сон фармонлари ижросини таъминлаш, шунингдек, норматив-ҳуқуқий ҳужжатлар лойиҳаларининг илмий асосланганлик даражасини ошириш орқали сифатини яхшилаш мақсадида Вазирлар Маҳкамаси қарор қилади:
1. Қуйидагилар:
Ўзбекистон Республикаси Президентининг ««Ўзбекистон — 2030» стратегиясини «Ёшлар ва бизнесни қўллаб-қувватлаш йили»да амалга оширишга оид давлат дастури тўғрисида» 2024 йил 21 февралдаги ПФ-37-сон Фармонида норматив-ҳуқуқий ҳужжатлар лойиҳаларини ишлаб чиқишда манфаатдор шахслар таклифларини ўрганиш механизмларини жорий қилиш белгиланганлиги;
Ўзбекистон Республикаси Президентининг «Ижтимоий муносабатларни ҳуқуқий тартибга солишнинг барқарорлигини таъминлаш, сифати ва самарадорлигини ошириш чора-тадбирлари тўғрисида» 2024 йил 16 августдаги ПФ-111-сон Фармонида :
давлат органлари томонидан қонун лойиҳалари бўйича ушбу соҳадаги давлат экспертлик илмий-тадқиқот муассасалари хулосалари олиниши;
давлат экспертлик илмий-тадқиқот муассасалари хулосалари ва муҳокама натижалари бўйича материаллар лойиҳани Адлия вазирлиги ҳамда ҳужжатни қабул қилувчи органларга киритишда илова қилиниши белгиланганлиги маълумот учун қабул қилинсин.
2. Белгилансинки:
а) норматив-ҳуқуқий ҳужжатлар лойиҳалари:
қонун лойиҳалари бўйича — тегишли соҳадаги давлат экспертлик илмий-тадқиқот муассасалари томонидан беғараз асосда;
қонуности ҳужжатлари лойиҳалари бўйича — тегишли соҳадаги давлат экспертлик илмий-тадқиқот муассасалари, давлат илмий-тадқиқот муассасалари ҳамда давлат олий таълим муассасалари томонидан келишув асосида илмий экспертизадан ўтказилади;
б) норматив-ҳуқуқий ҳужжат лойиҳасини илмий экспертизадан ўтказиш натижалари бўйича хулоса тавсиявий хусусиятга эга бўлиб, хулоса лойиҳани ишлаб чиқувчи ташкилот томонидан кўриб чиқилади;
в) лойиҳани ишлаб чиқувчи ташкилот илмий экспертиза хулосасида кўрсатилган таклиф, эътироз ва фикр-мулоҳазалар ёки уларнинг бир қисмини инобатга олмаган тақдирда, улар юзасидан тегишли тушунтиришлар берилган ҳолда келишмовчиликлар жадвалини тайёрлайди.
3. Шундай тартиб ўрнатилсинки, унга мувофиқ:
Адлия вазирлиги томонидан Норматив-ҳуқуқий ҳужжатлар лойиҳаларини ишлаб чиқиш ва келишишнинг ягона электрон тизимида норматив-ҳуқуқий ҳужжатлар лойиҳаларини илмий экспертизадан ўтказувчи тегишли соҳадаги давлат экспертлик илмий-тадқиқот муассасалари, давлат илмий-тадқиқот муассасалари ҳамда давлат олий таълим муассасаларининг электрон реестри юритилади;
норматив-ҳуқуқий ҳужжатлар лойиҳаларининг илмий экспертизаси натижалари бўйича хулоса Норматив-ҳуқуқий ҳужжатлар лойиҳаларини ишлаб чиқиш ва келишишнинг ягона электрон тизими орқали тақдим этилади.
Адлия вазирлиги икки ой муддатда электрон реестрни юритиш, норматив-ҳуқуқий ҳужжатлар лойиҳаларини илмий экспертизадан ўтказиш учун тақдим этиш ва натижалари бўйича хулоса тақдим қилишни Норматив-ҳуқуқий ҳужжатлар лойиҳаларини ишлаб чиқиш ва келишишнинг ягона электрон тизимида жорий этиш чораларини кўрсин.
4. Норматив-ҳуқуқий ҳужжатлар лойиҳаларини ишлаб чиқишда манфаатдор шахслар таклифларини ўрганиш механизмларини жорий қилиш мақсадида республика ва маҳаллий ижро этувчи ҳокимият органлари бир ой муддатда:
ишлаб чиқилаётган ёки ишлаб чиқилиши режалаштирилаётган норматив-ҳуқуқий ҳужжатлар лойиҳалари тўғрисидаги маълумотларни, лойиҳа бўйича таклифларни юбориш манзили, муддатларини, олинган таклифлар юзасидан тўлдирилган жадвални ўзларининг расмий веб-сайтларига жойлаштириб борсин (давлат сирлари ёки қонун билан қўриқланадиган бошқа сир билан боғлиқ бўлган, шунингдек, хизмат доирасида фойдаланиш учун грифига эга лойиҳалар бундан мустасно);
зарур ҳолларда, норматив-ҳуқуқий ҳужжатлар лойиҳаларини манфаатдор томонларни таклиф этган ҳолда, улар иштирокида муҳокама қилиш ҳамда уларнинг таклиф ва тавсияларини кўриб чиқиш амалиётини жорий этсин.
Бунда норматив-ҳуқуқий ҳужжатлар лойиҳаларини Адлия вазирлигига ҳуқуқий экспертизадан ўтказиш учун киритишда лойиҳа ишлаб чиқувчиларининг расмий веб-сайтларида расмий эълон қилинганлиги, манфаатдор томонлар иштирокида муҳокама қилинганлиги тўғрисидаги маълумотлар ҳамда олинган таклифлар юзасидан тегишли таҳлилий жадваллар тақдим қилинади.
5. Адлия вазирлиги:
уч ой муддатда норматив-ҳуқуқий ҳужжатлар лойиҳаларини илмий экспертизадан ўтказиш бўйича намунавий услубиётни тасдиқласин;
вазирлик ва идоралар билан биргаликда илмий экспертиза институтини ривожлантириш, фаол илмий экспертларни рағбатлантириш бўйича чораларни кўрсин ҳамда лойиҳани илмий экспертизадан ўтказиш бўйича амалий семинарларни мунтазам ташкил этсин.
6. Норматив-ҳуқуқий ҳужжатлар лойиҳаларини илмий экспертизадан ўтказиш тартиби тўғрисидаги низом иловага мувофиқ тасдиқлансин.
7. Мазкур қарорнинг бажарилишини назорат қилиш Ўзбекистон Республикаси адлия вазири А.Ж. Ташкулов зиммасига юклансин.
Вазирлар Маҳкамасининг 2025 йил 22 январдаги 29-сон қарорига ИЛОВА
Норматив-ҳуқуқий ҳужжатлар лойиҳаларини илмий экспертизадан ўтказиш тартиби тўғрисидаги
1-боб. Умумий қоидалар
1. Мазкур Низом норматив-ҳуқуқий ҳужжатлар лойиҳаларини (кейинги ўринларда — лойиҳалар) илмий экспертизадан ўтказиш тартибини белгилайди.
2. Лойиҳаларнинг илмий экспертизаси қуйидаги мақсадларда ўтказилади:
ижтимоий муносабатларни белгилашга, ўзгартиришга ёки бекор қилишга қаратилган нормаларни норматив-ҳуқуқий ҳужжатда белгилаш зарурати, унинг самарадорлиги, атроф-муҳит, инсон ҳаёти, ҳуқуқ ва эркинликларига таъсирини замонавий илм-фан ютуқлари нуқтаи назаридан илмий асосланганлигини ўрганиш;
ижтимоий муносабатлардан келиб чиқаётган муаммоларга лойиҳада таклиф этилаётган ечимларнинг шаклан ва мазмунан илмий услубларга мувофиқ ишлаб чиқилганлигини атрофлича баҳолаш;
қонун ижодкорлиги, ҳуқуқни қўллаш амалиёти, ислоҳотларни ҳуқуқий таъминлаш жараёнларининг самарадорлигини ошириш ва илмий жиҳатдан асосланганлигини таъминлаш.
3. Лойиҳаларнинг илмий экспертизаси қонунийлик, мустақиллик, холислик ва комплекслик каби асосий принципларни ҳисобга олган ҳолда ўтказилади.
4. Лойиҳаларни илмий экспертизадан ўтказишни таъминлаш лойиҳани ишлаб чиқувчи ташкилотга (кейинги ўринларда — ишлаб чиқувчи) юкланади.
2-боб. Лойиҳаларни илмий экспертизадан ўтказувчи ташкилотлар ва уларнинг электрон реестри
5. Лойиҳаларни илмий экспертизадан ўтказиш:
қонун лойиҳалари бўйича — тегишли соҳадаги давлат экспертлик илмий-тадқиқот муассасалари томонидан беғараз ҳамда давлат олий таълим муассасалари томонидан келишув асосида;
қонуности ҳужжатлари лойиҳалари бўйича — тегишли соҳадаги давлат экспертлик илмий-тадқиқот муассасалари, давлат илмий-тадқиқот муассасалари ҳамда давлат олий таълим муассасалари томонидан келишув асосида амалга оширилади.
6. Адлия вазирлиги томонидан лойиҳаларни илмий экспертизадан ўтказувчи давлат экспертлик илмий-тадқиқот муассасалари, давлат илмий-тадқиқот муассасалари ҳамда давлат олий таълим муассасаларининг электрон реестри (кейинги ўринларда — реестр) юритилади.
Реестр Норматив-ҳуқуқий ҳужжатлар лойиҳаларини ишлаб чиқиш ва келишишнинг ягона электрон тизимига (кейинги ўринларда — электрон тизим) интеграция қилинади.
7. Лойиҳани илмий экспертизадан ўтказувчи ташкилотлар аризасига (сўровига) кўра Адлия вазирлиги томонидан реестрга киритилади.
Аризада (сўровда) лойиҳани илмий экспертизадан ўтказувчи ташкилотнинг асосий илмий фаолият йўналиши, ташкилот таркибидаги экспертлар тўғрисидаги маълумотлар (исми, фамилияси, отасининг исми, маълумот даражаси, илмий фаолиятдаги стажи, илмий-публицистик фаолияти натижалари) кўрсатилади.
Ариза (сўров) Адлия вазирлиги томонидан етти кун ичида кўриб чиқилади.
8. Мазкур Низомнинг 7-бандида назарда тутилган маълумотлар тақдим этилмаган тақдирда, ариза (сўров) рад қилинади. Лойиҳани илмий экспертизадан ўтказувчи ташкилотлар зарур маълумотларни аризада (сўровда) кўрсатган ҳолда қайта мурожаат қилиш ҳуқуқига эга.
3-боб. Лойиҳаларни илмий экспертизадан ўтказиш
9. Лойиҳанинг илмий экспертизаси қоида тариқасида лойиҳа ишлаб чиқувчи томонидан манфаатдор ташкилотлар билан келишилгандан ва жамоатчилик муҳокамасидан ўтказилгандан сўнг амалга оширилади.
10. Ишлаб чиқувчи лойиҳани илмий экспертизадан ўтказиш мақсадида реестрга киритилган ташкилотга электрон тизим орқали юборади.
11. Лойиҳанинг ҳуқуқий жиҳатдан тартибга солиш предмети биттадан ортиқ соҳаларни қамраб олган тақдирда, лойиҳа унда белгиланаётган асосий соҳага мос йўналишда илмий фаолият олиб борадиган ташкилотга илмий экспертизадан ўтказиш учун юборилади.
Ишлаб чиқувчи лойиҳанинг мураккаблиги ва комплекслигини инобатга олиб, бир нечта илмий ташкилотлар вакилларидан иборат ишчи гуруҳ тузган ҳолда илмий экспертизани ташкил этиши мумкин.
12. Лойиҳани илмий экспертизадан ўтказувчи ташкилот лойиҳа келиб тушган кундан бошлаб етти кун ичида лойиҳа юзасидан илмий асосланган хулосасини ишлаб чиқувчига электрон тизим орқали тақдим этади.
13. Лойиҳани илмий экспертизадан ўтказувчи ташкилот:
лойиҳани замонавий, инновацион илмий услублар ва ёндашувга асосланган ҳолда, бетарафлик асосида илмий экспертизадан ўтказади;
илмий экспертиза натижалари бўйича лойиҳа юзасидан тўлиқ, холис ва илмий жиҳатдан асосланган хулоса беради;
лойиҳани ўз фикр-мулоҳазалари асосида ишлаб чиқувчи билан биргаликда маромига етказиш чораларини кўради;
илмий экспертизани ўтказиш давомида ўзига маълум бўлган маълумотнинг ошкор этилмаслигини таъминлайди.
14. Лойиҳани илмий экспертизадан ўтказувчи ташкилот қуйидаги ҳуқуқларга эга:
ишлаб чиқувчидан илмий экспертизани ўтказиш учун барча зарур ахборот ва материалларни, шу жумладан, илмий экспертизани ўтказиш жараёнида юзага келадиган масалалар бўйича материалларни сўраб олиш;
илмий экспертиза объекти бўлган лойиҳа бўйича илмий экспертиза буюртмачиси бўлган давлат органидан маслаҳатлар ва зарур услубий ёрдам олиш;
лойиҳанинг сифатли илмий экспертизадан ўтказилишини таъминлаш мақсадида зарур ҳолларда илмий экспертизани ўтказиш давомида учинчи шахсларни жалб этиш.
15. Илмий экспертиза натижалари бўйича хулоса илмий экспертизани ўтказган ташкилотнинг расмий бланкасида расмийлаштирилади.
16. Илмий экспертиза натижалари бўйича хулосада қуйидагилар акс эттирилади:
лойиҳада келтирилган масалаларнинг назарий ва илмий асосларга мувофиқлигини ўрганиш натижалари;
лойиҳада назарда тутилаётган масалаларнинг тегишли соҳада мамлакатни ривожлантириш концепция ва стратегиялари, замонавий ёндашувларга мослигини ўрганиш натижалари;
лойиҳани такомиллаштириш бўйича таклифлар;
лойиҳани кўриб чиқиш давомида аниқланган муаммолар ҳамда уларнинг ечимларини аниқлаш учун қўлланилган илмий услуб, ёндашув ва механизмлар;
илмий экспертизани ўтказган, шу жумладан, қўшимча жалб этилган экспертлар тўғрисидаги маълумотлар;
хулоса беришда фойдаланилган манбалар;
илмий экспертизани ўтказиш давомида аниқланган, норматив-ҳуқуқий ҳужжатни қабул қилиш натижасида юзага келиши мумкин бўлган бошқа масалалар таҳлили.
17. Илмий экспертиза натижаларига кўра қуйидаги хулосалардан бири тайёрланади:
лойиҳа илмий асосланган;
лойиҳа етарли даражада илмий асосланмаган;
лойиҳа илмий асосланмаган.
18. Илмий экспертиза натижалари бўйича хулоса экспертизани ўтказган ташкилот раҳбари (истисно ҳолларда — унинг ўринбосари) томонидан имзоланади.
19. Лойиҳани илмий экспертизадан ўтказиш натижалари бўйича хулоса тавсиявий хусусиятга эга бўлиб, хулоса ишлаб чиқувчи томонидан кўриб чиқилади.
20. Ишлаб чиқувчи томонидан илмий экспертиза хулосасида кўрсатилган таклиф, эътироз ва фикр-мулоҳазалар ёки уларнинг бир қисми инобатга олинмаган тақдирда, улар юзасидан тегишли тушунтиришлар берилган ҳолда келишмовчиликлар жадвали тайёрланади.
21. Қонун лойиҳаларини илмий экспертизадан ўтказиш натижалари бўйича давлат экспертлик илмий-тадқиқот муассасасининг хулосаси лойиҳани Адлия вазирлиги ҳамда ҳужжатни қабул қилувчи органларга киритишда мажбурий тартибда илова қилинади.
22. Норматив-ҳуқуқий ҳужжатни қабул қилувчи органнинг қарорига кўра лойиҳа қайта ёки қўшимча илмий экспертизадан ўтказилиши мумкин.
23. Адлия вазирлиги ёки норматив-ҳуқуқий ҳужжатни қабул қилувчи орган илмий экспертизани ўтказган ташкилотга хулосада берилган таклиф, эътироз, фикр-мулоҳазаларга аниқлик киритиш мақсадида сўров юбориши мумкин.
4-боб. Якунловчи қоида
24. Мазкур Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.
Ўзбекистон Республикасининг Бош вазири А. АРИПОВ
Тошкент ш.,
2025 йил 22 январь,
29-сон
Oʻzbekiston Respublikasi Vazirlar Mahkamasining
qarori
NIZOM
Normativ-huquqiy hujjatlar loyihalarining ilmiy asoslanganlik darajasini oshirish chora-tadbirlari toʻgʻrisida
Oʻzbekiston Respublikasi Prezidentining “ “Oʻzbekiston-2030” strategiyasini Yoshlar va biznesni qoʻllab-quvvatlash yili”da amalga oshirishga oid davlat dasturi toʻgʻrisida ” 2024-yil 21-fevraldagi PF-37-son hamda “ Ijtimoiy munosabatlarni huquqiy tartibga solishning barqarorligini taʼminlash, sifati va samaradorligini oshirish chora-tadbirlari toʻgʻrisida ” 2024-yil 16-avgustdagi PF-111-son farmonlari ijrosini taʼminlash, shuningdek, normativ-huquqiy hujjatlar loyihalarining ilmiy asoslanganlik darajasini oshirish orqali sifatini yaxshilash maqsadida Vazirlar Mahkamasi qaror qiladi:
1. Quyidagilar:
Oʻzbekiston Respublikasi Prezidentining ““Oʻzbekiston — 2030” strategiyasini “Yoshlar va biznesni qoʻllab-quvvatlash yili”da amalga oshirishga oid davlat dasturi toʻgʻrisida” 2024-yil 21-fevraldagi PF-37-son Farmonida normativ-huquqiy hujjatlar loyihalarini ishlab chiqishda manfaatdor shaxslar takliflarini oʻrganish mexanizmlarini joriy qilish belgilanganligi;
Oʻzbekiston Respublikasi Prezidentining “Ijtimoiy munosabatlarni huquqiy tartibga solishning barqarorligini taʼminlash, sifati va samaradorligini oshirish chora-tadbirlari toʻgʻrisida” 2024-yil 16-avgustdagi PF-111-son Farmonida :
davlat organlari tomonidan qonun loyihalari boʻyicha ushbu sohadagi davlat ekspertlik ilmiy-tadqiqot muassasalari xulosalari olinishi;
davlat ekspertlik ilmiy-tadqiqot muassasalari xulosalari va muhokama natijalari boʻyicha materiallar loyihani Adliya vazirligi hamda hujjatni qabul qiluvchi organlarga kiritishda ilova qilinishi belgilanganligi maʼlumot uchun qabul qilinsin.
2. Belgilansinki:
a) normativ-huquqiy hujjatlar loyihalari:
qonun loyihalari boʻyicha — tegishli sohadagi davlat ekspertlik ilmiy-tadqiqot muassasalari tomonidan begʻaraz asosda;
qonunosti hujjatlari loyihalari boʻyicha — tegishli sohadagi davlat ekspertlik ilmiy-tadqiqot muassasalari, davlat ilmiy-tadqiqot muassasalari hamda davlat oliy taʼlim muassasalari tomonidan kelishuv asosida ilmiy ekspertizadan oʻtkaziladi;
b) normativ-huquqiy hujjat loyihasini ilmiy ekspertizadan oʻtkazish natijalari boʻyicha xulosa tavsiyaviy xususiyatga ega boʻlib, xulosa loyihani ishlab chiquvchi tashkilot tomonidan koʻrib chiqiladi;
v) loyihani ishlab chiquvchi tashkilot ilmiy ekspertiza xulosasida koʻrsatilgan taklif, eʼtiroz va fikr-mulohazalar yoki ularning bir qismini inobatga olmagan taqdirda, ular yuzasidan tegishli tushuntirishlar berilgan holda kelishmovchiliklar jadvalini tayyorlaydi.
3. Shunday tartib oʻrnatilsinki, unga muvofiq:
Adliya vazirligi tomonidan Normativ-huquqiy hujjatlar loyihalarini ishlab chiqish va kelishishning yagona elektron tizimida normativ-huquqiy hujjatlar loyihalarini ilmiy ekspertizadan oʻtkazuvchi tegishli sohadagi davlat ekspertlik ilmiy-tadqiqot muassasalari, davlat ilmiy-tadqiqot muassasalari hamda davlat oliy taʼlim muassasalarining elektron reyestri yuritiladi;
normativ-huquqiy hujjatlar loyihalarining ilmiy ekspertizasi natijalari boʻyicha xulosa Normativ-huquqiy hujjatlar loyihalarini ishlab chiqish va kelishishning yagona elektron tizimi orqali taqdim etiladi.
Adliya vazirligi ikki oy muddatda elektron reyestrni yuritish, normativ-huquqiy hujjatlar loyihalarini ilmiy ekspertizadan oʻtkazish uchun taqdim etish va natijalari boʻyicha xulosa taqdim qilishni Normativ-huquqiy hujjatlar loyihalarini ishlab chiqish va kelishishning yagona elektron tizimida joriy etish choralarini koʻrsin.
4. Normativ-huquqiy hujjatlar loyihalarini ishlab chiqishda manfaatdor shaxslar takliflarini oʻrganish mexanizmlarini joriy qilish maqsadida respublika va mahalliy ijro etuvchi hokimiyat organlari bir oy muddatda:
ishlab chiqilayotgan yoki ishlab chiqilishi rejalashtirilayotgan normativ-huquqiy hujjatlar loyihalari toʻgʻrisidagi maʼlumotlarni, loyiha boʻyicha takliflarni yuborish manzili, muddatlarini, olingan takliflar yuzasidan toʻldirilgan jadvalni oʻzlarining rasmiy veb-saytlariga joylashtirib borsin (davlat sirlari yoki qonun bilan qoʻriqlanadigan boshqa sir bilan bogʻliq boʻlgan, shuningdek, xizmat doirasida foydalanish uchun grifiga ega loyihalar bundan mustasno);
zarur hollarda, normativ-huquqiy hujjatlar loyihalarini manfaatdor tomonlarni taklif etgan holda, ular ishtirokida muhokama qilish hamda ularning taklif va tavsiyalarini koʻrib chiqish amaliyotini joriy etsin.
Bunda normativ-huquqiy hujjatlar loyihalarini Adliya vazirligiga huquqiy ekspertizadan oʻtkazish uchun kiritishda loyiha ishlab chiquvchilarining rasmiy veb-saytlarida rasmiy eʼlon qilinganligi, manfaatdor tomonlar ishtirokida muhokama qilinganligi toʻgʻrisidagi maʼlumotlar hamda olingan takliflar yuzasidan tegishli tahliliy jadvallar taqdim qilinadi.
5. Adliya vazirligi:
uch oy muddatda normativ-huquqiy hujjatlar loyihalarini ilmiy ekspertizadan oʻtkazish boʻyicha namunaviy uslubiyotni tasdiqlasin;
vazirlik va idoralar bilan birgalikda ilmiy ekspertiza institutini rivojlantirish, faol ilmiy ekspertlarni ragʻbatlantirish boʻyicha choralarni koʻrsin hamda loyihani ilmiy ekspertizadan oʻtkazish boʻyicha amaliy seminarlarni muntazam tashkil etsin.
6. Normativ-huquqiy hujjatlar loyihalarini ilmiy ekspertizadan oʻtkazish tartibi toʻgʻrisidagi nizom ilovaga muvofiq tasdiqlansin.
7. Mazkur qarorning bajarilishini nazorat qilish Oʻzbekiston Respublikasi adliya vaziri A.J. Tashkulov zimmasiga yuklansin.
Vazirlar Mahkamasining 2025-yil 22-yanvardagi 29-son qaroriga ILOVA
Normativ-huquqiy hujjatlar loyihalarini ilmiy ekspertizadan oʻtkazish tartibi toʻgʻrisidagi
1-bob. Umumiy qoidalar
1. Mazkur Nizom normativ-huquqiy hujjatlar loyihalarini (keyingi oʻrinlarda — loyihalar) ilmiy ekspertizadan oʻtkazish tartibini belgilaydi.
2. Loyihalarning ilmiy ekspertizasi quyidagi maqsadlarda oʻtkaziladi:
ijtimoiy munosabatlarni belgilashga, oʻzgartirishga yoki bekor qilishga qaratilgan normalarni normativ-huquqiy hujjatda belgilash zarurati, uning samaradorligi, atrof-muhit, inson hayoti, huquq va erkinliklariga taʼsirini zamonaviy ilm-fan yutuqlari nuqtai nazaridan ilmiy asoslanganligini oʻrganish;
ijtimoiy munosabatlardan kelib chiqayotgan muammolarga loyihada taklif etilayotgan yechimlarning shaklan va mazmunan ilmiy uslublarga muvofiq ishlab chiqilganligini atroflicha baholash;
qonun ijodkorligi, huquqni qoʻllash amaliyoti, islohotlarni huquqiy taʼminlash jarayonlarining samaradorligini oshirish va ilmiy jihatdan asoslanganligini taʼminlash.
3. Loyihalarning ilmiy ekspertizasi qonuniylik, mustaqillik, xolislik va komplekslik kabi asosiy prinsiplarni hisobga olgan holda oʻtkaziladi.
4. Loyihalarni ilmiy ekspertizadan oʻtkazishni taʼminlash loyihani ishlab chiquvchi tashkilotga (keyingi oʻrinlarda — ishlab chiquvchi) yuklanadi.
2-bob. Loyihalarni ilmiy ekspertizadan oʻtkazuvchi tashkilotlar va ularning elektron reyestri
5. Loyihalarni ilmiy ekspertizadan oʻtkazish:
qonun loyihalari boʻyicha — tegishli sohadagi davlat ekspertlik ilmiy-tadqiqot muassasalari tomonidan begʻaraz hamda davlat oliy taʼlim muassasalari tomonidan kelishuv asosida;
qonunosti hujjatlari loyihalari boʻyicha — tegishli sohadagi davlat ekspertlik ilmiy-tadqiqot muassasalari, davlat ilmiy-tadqiqot muassasalari hamda davlat oliy taʼlim muassasalari tomonidan kelishuv asosida amalga oshiriladi.
6. Adliya vazirligi tomonidan loyihalarni ilmiy ekspertizadan oʻtkazuvchi davlat ekspertlik ilmiy-tadqiqot muassasalari, davlat ilmiy-tadqiqot muassasalari hamda davlat oliy taʼlim muassasalarining elektron reyestri (keyingi oʻrinlarda — reyestr) yuritiladi.
Reyestr Normativ-huquqiy hujjatlar loyihalarini ishlab chiqish va kelishishning yagona elektron tizimiga (keyingi oʻrinlarda — elektron tizim) integratsiya qilinadi.
7. Loyihani ilmiy ekspertizadan oʻtkazuvchi tashkilotlar arizasiga (soʻroviga) koʻra Adliya vazirligi tomonidan reyestrga kiritiladi.
Arizada (soʻrovda) loyihani ilmiy ekspertizadan oʻtkazuvchi tashkilotning asosiy ilmiy faoliyat yoʻnalishi, tashkilot tarkibidagi ekspertlar toʻgʻrisidagi maʼlumotlar (ismi, familiyasi, otasining ismi, maʼlumot darajasi, ilmiy faoliyatdagi staji, ilmiy-publitsistik faoliyati natijalari) koʻrsatiladi.
Ariza (soʻrov) Adliya vazirligi tomonidan yetti kun ichida koʻrib chiqiladi.
8. Mazkur Nizomning 7-bandida nazarda tutilgan maʼlumotlar taqdim etilmagan taqdirda, ariza (soʻrov) rad qilinadi. Loyihani ilmiy ekspertizadan oʻtkazuvchi tashkilotlar zarur maʼlumotlarni arizada (soʻrovda) koʻrsatgan holda qayta murojaat qilish huquqiga ega.
3-bob. Loyihalarni ilmiy ekspertizadan oʻtkazish
9. Loyihaning ilmiy ekspertizasi qoida tariqasida loyiha ishlab chiquvchi tomonidan manfaatdor tashkilotlar bilan kelishilgandan va jamoatchilik muhokamasidan oʻtkazilgandan soʻng amalga oshiriladi.
10. Ishlab chiquvchi loyihani ilmiy ekspertizadan oʻtkazish maqsadida reyestrga kiritilgan tashkilotga elektron tizim orqali yuboradi.
11. Loyihaning huquqiy jihatdan tartibga solish predmeti bittadan ortiq sohalarni qamrab olgan taqdirda, loyiha unda belgilanayotgan asosiy sohaga mos yoʻnalishda ilmiy faoliyat olib boradigan tashkilotga ilmiy ekspertizadan oʻtkazish uchun yuboriladi.
Ishlab chiquvchi loyihaning murakkabligi va kompleksligini inobatga olib, bir nechta ilmiy tashkilotlar vakillaridan iborat ishchi guruh tuzgan holda ilmiy ekspertizani tashkil etishi mumkin.
12. Loyihani ilmiy ekspertizadan oʻtkazuvchi tashkilot loyiha kelib tushgan kundan boshlab yetti kun ichida loyiha yuzasidan ilmiy asoslangan xulosasini ishlab chiquvchiga elektron tizim orqali taqdim etadi.
13. Loyihani ilmiy ekspertizadan oʻtkazuvchi tashkilot:
loyihani zamonaviy, innovatsion ilmiy uslublar va yondashuvga asoslangan holda, betaraflik asosida ilmiy ekspertizadan oʻtkazadi;
ilmiy ekspertiza natijalari boʻyicha loyiha yuzasidan toʻliq, xolis va ilmiy jihatdan asoslangan xulosa beradi;
loyihani oʻz fikr-mulohazalari asosida ishlab chiquvchi bilan birgalikda maromiga yetkazish choralarini koʻradi;
ilmiy ekspertizani oʻtkazish davomida oʻziga maʼlum boʻlgan maʼlumotning oshkor etilmasligini taʼminlaydi.
14. Loyihani ilmiy ekspertizadan oʻtkazuvchi tashkilot quyidagi huquqlarga ega:
ishlab chiquvchidan ilmiy ekspertizani oʻtkazish uchun barcha zarur axborot va materiallarni, shu jumladan, ilmiy ekspertizani oʻtkazish jarayonida yuzaga keladigan masalalar boʻyicha materiallarni soʻrab olish;
ilmiy ekspertiza obyekti boʻlgan loyiha boʻyicha ilmiy ekspertiza buyurtmachisi boʻlgan davlat organidan maslahatlar va zarur uslubiy yordam olish;
loyihaning sifatli ilmiy ekspertizadan oʻtkazilishini taʼminlash maqsadida zarur hollarda ilmiy ekspertizani oʻtkazish davomida uchinchi shaxslarni jalb etish.
15. Ilmiy ekspertiza natijalari boʻyicha xulosa ilmiy ekspertizani oʻtkazgan tashkilotning rasmiy blankasida rasmiylashtiriladi.
16. Ilmiy ekspertiza natijalari boʻyicha xulosada quyidagilar aks ettiriladi:
loyihada keltirilgan masalalarning nazariy va ilmiy asoslarga muvofiqligini oʻrganish natijalari;
loyihada nazarda tutilayotgan masalalarning tegishli sohada mamlakatni rivojlantirish konsepsiya va strategiyalari, zamonaviy yondashuvlarga mosligini oʻrganish natijalari;
loyihani takomillashtirish boʻyicha takliflar;
loyihani koʻrib chiqish davomida aniqlangan muammolar hamda ularning yechimlarini aniqlash uchun qoʻllanilgan ilmiy uslub, yondashuv va mexanizmlar;
ilmiy ekspertizani oʻtkazgan, shu jumladan, qoʻshimcha jalb etilgan ekspertlar toʻgʻrisidagi maʼlumotlar;
xulosa berishda foydalanilgan manbalar;
ilmiy ekspertizani oʻtkazish davomida aniqlangan, normativ-huquqiy hujjatni qabul qilish natijasida yuzaga kelishi mumkin boʻlgan boshqa masalalar tahlili.
17. Ilmiy ekspertiza natijalariga koʻra quyidagi xulosalardan biri tayyorlanadi:
loyiha ilmiy asoslangan;
loyiha yetarli darajada ilmiy asoslanmagan;
loyiha ilmiy asoslanmagan.
18. Ilmiy ekspertiza natijalari boʻyicha xulosa ekspertizani oʻtkazgan tashkilot rahbari (istisno hollarda — uning oʻrinbosari) tomonidan imzolanadi.
19. Loyihani ilmiy ekspertizadan oʻtkazish natijalari boʻyicha xulosa tavsiyaviy xususiyatga ega boʻlib, xulosa ishlab chiquvchi tomonidan koʻrib chiqiladi.
20. Ishlab chiquvchi tomonidan ilmiy ekspertiza xulosasida koʻrsatilgan taklif, eʼtiroz va fikr-mulohazalar yoki ularning bir qismi inobatga olinmagan taqdirda, ular yuzasidan tegishli tushuntirishlar berilgan holda kelishmovchiliklar jadvali tayyorlanadi.
21. Qonun loyihalarini ilmiy ekspertizadan oʻtkazish natijalari boʻyicha davlat ekspertlik ilmiy-tadqiqot muassasasining xulosasi loyihani Adliya vazirligi hamda hujjatni qabul qiluvchi organlarga kiritishda majburiy tartibda ilova qilinadi.
22. Normativ-huquqiy hujjatni qabul qiluvchi organning qaroriga koʻra loyiha qayta yoki qoʻshimcha ilmiy ekspertizadan oʻtkazilishi mumkin.
23. Adliya vazirligi yoki normativ-huquqiy hujjatni qabul qiluvchi organ ilmiy ekspertizani oʻtkazgan tashkilotga xulosada berilgan taklif, eʼtiroz, fikr-mulohazalarga aniqlik kiritish maqsadida soʻrov yuborishi mumkin.
4-bob. Yakunlovchi qoida
24. Mazkur Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 22-yanvar,
29-son