UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

БАЁННОМАСИ

Хавфли ишлаб чиқариш объектларидан фойдаланувчи ташкилотларнинг раҳбар ва муҳандис-техник ходимларини аттестациядан ўтказиш тартибини такомиллаштириш тўғрисида

Ўзбекистон Республикасининг «Хавфли ишлаб чиқариш объектларининг саноат хавфсизлиги тўғрисида»ги Қонуни ҳамда Ўзбекистон Республикаси Президентининг «Вазирлар Маҳкамаси ҳузуридаги Саноат, радиация ва ядро хавфсизлиги қўмитаси фаолиятини самарали ташкил этиш чора-тадбирлари тўғрисида» 2024 йил 24 майдаги ПҚ-186-сон қарорига мувофиқ Вазирлар Маҳкамаси қарор қилади:

1. Қуйидагиларни назарда тутувчи Хавфли ишлаб чиқариш объектларидан фойдаланувчи ташкилотларнинг раҳбар ва муҳандис-техник ходимларини тайёрлаш, қайта тайёрлаш, уларнинг малакасини ошириш ҳамда аттестациядан ўтказиш тартиби тўғрисидаги низом иловага мувофиқ тасдиқлансин:

хавфли ишлаб чиқариш объектларидан фойдаланувчи ташкилотларнинг раҳбар ва муҳандис-техник ходимларини тайёрлаш, қайта тайёрлаш, уларнинг малакасини ошириш тартиби, муддатлари ва уларни амалга оширувчи ташкилотлар;

хавфли ишлаб чиқариш объектларидан фойдаланувчи ташкилотларнинг раҳбар ва муҳандис-техник ходимларини аттестациядан ўтказиш тартиби, муддатлари, аттестация турлари ҳамда аттестациядан ўтказиладиган ходимлар тоифалари;

аттестация комиссиясининг таркибини шакллантириш ва фаолиятини ташкил этиш;

аттестация натижалари бўйича аппеляция бериш ва уни кўриб чиқиш қоидалари.

2. Вазирлар Маҳкамаси ҳузуридаги Саноат, радиация ва ядро хавфсизлиги қўмитаси манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни ва техник жиҳатдан тартибга солиш соҳасидаги норматив ҳужжатлар бир ой муддатда ушбу қарорга мувофиқлаштирилишини таъминласин.

3. Ушбу қарор расмий эълон қилинган кундан эътиборан уч ой ўтгач кучга киради.

4. Мазкур қарорнинг бажарилишини назорат қилиш Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитаси раиси А.В. Рафиқов зиммасига юклансин.

Вазирлар Маҳкамасининг 2025 йил 21 январдаги 26-сон қарорига ИЛОВА

Хавфли ишлаб чиқариш объектларидан фойдаланувчи ташкилотларнинг раҳбар ва муҳандис-техник ходимларини тайёрлаш, қайта тайёрлаш, уларнинг малакасини ошириш ҳамда аттестациядан ўтказиш тартиби тўғрисида

1-боб. Умумий қоидалар

1. Ушбу Низом хавфли ишлаб чиқариш объектларидан фойдаланувчи ташкилотларнинг раҳбар ва муҳандис-техник ходимларини (кейинги ўринларда — ходимлар) тайёрлаш, қайта тайёрлаш, уларнинг малакасини ошириш ҳамда аттестациядан ўтказиш тартибини белгилайди.

2. Мазкур Низомда қуйидаги асосий тушунчалар қўлланилади:

ариза — ходимларни ушбу Низомда белгиланган тартибда аттестациядан ўтказиш тўғрисидаги мурожаати;

аттестация гувоҳномаси — ходим аттестациядан ўтганлигини тасдиқловчи ҳужжат;

аттестация комиссияси — махсус ваколатли органда, унинг ҳудудий бошқармаларида (саноат-техника инспекцияларида) ва хавфли ишлаб чиқариш объектларидан фойдаланувчи ташкилотларда ташкил этиладиган ва доимий асосда ишлайдиган ходимларни аттестациядан ўтказиш комиссияси;

«Контехназоратўқув» давлат муассасаси (кейинги ўринларда — «Контехназоратўқув» ДМ) — техника ва технологияларнинг жадал ривожланишини ҳисобга олган ҳолда саноат, радиация ва ядро хавфсизлиги ҳамда лифтлар ва аттракционлар хавфсизлигини таъминлаш соҳаларида фаолият юритувчи мутахассис (эксперт)ларни тайёрлаш, қайта тайёрлаш, уларнинг малакасини ошириш фаолиятини амалга оширувчи давлат муассасаси;

малака ошириш — касбий билим ва кўникмаларни янгилаш ҳамда чуқурлаштиришга йўналтирилган фаолият;

малака талаблари — тингловчиларнинг касбий билим ва амалий кўникмалари даражасига қўйиладиган талаблар мажмуи;

махсус ваколатли орган — Вазирлар Маҳкамаси ҳузуридаги Саноат, радиация ва ядро хавфсизлиги қўмитаси;

хавфли ишлаб чиқариш объекти (кейинги ўринларда — ХИЧО) — Ўзбекистон Республикасининг «Хавфли ишлаб чиқариш объектларининг саноат хавфсизлиги тўғрисида»ги Қонуни 4-моддасида белгиланган корхоналар ёки уларнинг цехлари, участкалари, майдончалари, шунингдек, бошқа ишлаб чиқариш объектлари;

ХИЧОдан фойдаланувчи ташкилот — ташкилий-ҳуқуқий шаклидан қатъи назар, барча хусусий мулк ёки бошқа ашёвий ҳуқуқлар асосида унга тегишли бўлган ХИЧОдан фойдаланувчи ташкилот;

ходимларни тайёрлаш — ходимларнинг саноат хавфсизлигини таъминлаш бўйича нормалар ва қоидалар талабларига амал қилган ҳолда, ХИЧО билан боғлиқ ишларни бажаришда талаб этиладиган даражадаги хавфсизлик маданияти, билим, малака ва кўникмаларни шакллантириш фаолияти;

ходимларни қайта тайёрлаш — саноат хавфсизлиги соҳасида тайинланган лавозими бўйича махсус касбий билимларга эга бўлмаган ходимларни етарли даражадаги касбий билимлар, амалий кўникмалар ва тажрибаларни ўзлаштиришга йўналтирилган фаолият;

ўқув дастури — ХИЧОдан фойдаланувчи ташкилотлар ходимларининг лавозим мажбуриятларини саноат хавфсизлиги соҳасидаги қонунчилик ҳужжатлари ва техник жиҳатдан тартибга солиш соҳасидаги норматив ҳужжатлар талабларига мувофиқ амалга ошириш учун зарур касбий билим олиш, амалий кўникма ва малакага эга бўлишнинг умумий тартибини белгиловчи ходимларни тайёрлашни ташкил этишга йўналтирилган дастур;

ўқув режаси — ўқув курсларининг таркиби, уларни ўрганишнинг изчиллиги ва соатлардаги ҳажмини белгилайдиган ҳужжат.

2-боб. Ходимларни тайёрлаш, қайта тайёрлаш ва малакасини ошириш

3. Ходимларни саноат, радиация ва ядро хавфсизлиги соҳалари бўйича ўқув курсларида тайёрлаш, қайта тайёрлаш ва малакасини ошириш белгиланган тартибда «Контехназоратўқув» ДМ томонидан анъанавий ва (ёки) масофавий шаклда мазкур муассаса билан тегишли ходимлар фаолият юритаётган ташкилот ўртасида тузиладиган шартнома (буюртма)лар асосида амалга оширилади.

Бунда ходимларни тайёрлаш, қайта тайёрлаш ва уларнинг малакасини ошириш билан боғлиқ харажатлар учун тўланиши керак бўлган тўловларнинг миқдори тегишли ўқув курсларининг давомийлигидан ҳамда уларнинг шаклидан келиб чиқиб, томонлар ўртасида тузиладиган шартнома билан белгиланади.

4. Ходимларни:

а) тайёрлаш — ишга янги қабул қилинганда;

б) қайта тайёрлаш:

танланган ёки турдош касб бўйича бошланғич касбий таълим бўлмаганда;

тегишли касбий таълимни талаб қилувчи бошқа лавозимга ўтказишда;

в) малакасини ошириш улар томонидан лавозим мажбуриятлари бажарилиши учун зарур бўлган касбий билимлар ва амалий кўникмаларни сақлаб туриш мақсадида уч йилда камида бир марта амалга оширилади.

5. Ходимларни тайёрлаш, қайта тайёрлаш ва уларнинг малакасини ошириш даврида ходимларга уларнинг иш жойи бўйича ўртача иш ҳақи ва лавозими сақланади. Агар мазкур тадбирлар учун ходим яшаш жойидан бошқа ҳудудга юборилса, унга мазкур ходимни юбораётган ташкилот томонидан қонунчиликда белгиланган барча зарур шарт-шароитлар яратилиши, шу жумладан сарф-харажатлар қопланиши лозим.

6. ХИЧО ходимларини тайёрлаш, қайта тайёрлаш ва уларнинг малакасини ошириш бўйича ўқув дастурлари «Контехназоратўқув» ДМ томонидан ишлаб чиқилади ва махсус ваколатли орган ҳамда ходимларнинг вакиллик органлари (меҳнатни муҳофаза қилиш хизмати ва касаба уюшмалари) билан белгиланган тартибда келишилгандан кейин тасдиқланади.

7. Ўқув курслари тўлиқ тамомлангандан сўнг «Контехназоратўқув» ДМда ходим имтиҳондан ўтказилади. Имтиҳон тест кўринишида ўтказилиши мумкин.

8. Имтиҳондан ўта олмаган ходимларга бир ой давомида имтиҳонни қайта топширишга рухсат берилади. Қайта имтиҳондан ўта олмаганлар ўқув курсида такроран ўқитилади.

9. «Контехназоратўқув» ДМ қайта имтиҳондан ўта олмаган ходимлар тўғрисидаги маълумотларни уч иш куни мобайнида қайта имтиҳон натижалари тўғрисидаги далолатномани илова қилган ҳолда, ХИЧОдан фойдаланувчи ташкилотга юборади. ХИЧОдан фойдаланувчи ташкилот мазкур маълумотлар асосида ходим билан тузилган меҳнат шартномасини белгиланган тартибда бекор қилиш ёки ходимни қуйи лавозимга ўтказиш масаласини кўриб чиқишга ҳақлидир.

10. Ходимларни тайёрлаш ва қайта тайёрлаш якунига кўра имтиҳондан ўтганларга ушбу Низомга 1-иловада келтирилган шаклда гувоҳнома, ходимлар малакасини ошириш якунига кўра имтиҳондан ўтганларга мазкур Низомга 2-иловада келтирилган шаклда сертификат расмийлаштирилади.

11. Махсус ваколатли орган ХИЧОдан фойдаланувчи ташкилот ходимларини тайёрлаш ва қайта тайёрлаш, уларнинг малакасини ошириш ҳамда аттестациядан ўтказиш тўғрисидаги маълумотлар базасини марказлаштирилган тартибда шакллантиради ва юритади.

12. «Контехназоратўқув» ДМ тайёрлаш, қайта тайёрлаш ва малака ошириш ўқув курсларини битирган ходимлар тўғрисидаги маълумотларни ҳар чоракда махсус ваколатли органга тақдим этиб боради.

3-боб. Ходимларни аттестациядан ўтказиш

13. ХИЧОдан фойдаланувчи ташкилот ходимлари саноат хавфсизлиги соҳасида уларнинг касбига муносиблиги даражасини холисона баҳолаш, белгиланган малака талабларига мувофиқлигини аниқлаш, зиммасига юкланган вазифалар ва функцияларни бажариш имкониятини баҳолаш мақсадида аттестациядан ўтказилади.

14. Ходимлар саноат хавфсизлиги соҳасида аттестациядан махсус ваколатли органда, унинг ҳудудий бошқармаларида (саноат-техника инспекцияларида) ҳамда ХИЧОдан фойдаланувчи ташкилотларда ташкил этиладиган аттестация комиссиялари томонидан бирламчи, даврий ёки навбатдан ташқари кўринишларда мазкур Низомга 3 ва 4-иловалардаги схемаларга мувофиқ ўтказилади.

15. Ходимлар бирламчи аттестациядан ишга янги қабул қилинганда ёки лавозимга тайинланганда уч ой муддатда ўтказилади.

16. Ходимлар даврий аттестациядан қуйидаги муддатларда ўтказилади:

ХИЧОдан фойдаланувчи ташкилотларнинг раҳбар ходимлари, ХИЧОдан фойдаланувчи ташкилотларнинг марказий аттестация комиссиялари раислари ва раис ўринбосарлари — беш йилда бир марта;

муҳандис-техник ходимлар, шунингдек, аттестация комиссиялари аъзолари — уч йилда бир марта;

ХИЧОдан фойдаланувчи ташкилотларда фаолият юритадиган, мазкур банднинг иккинчи ва учинчи хатбошларида назарда тутилмаган бошқа ишчи-ходимлар — бир йилда бир марта.

17. Ушбу Низомнинг 16-банди иккинчи хатбошисида кўрсатилган ходимлар махсус ваколатли орган аттестация комиссияси ва 16-банди учинчи хатбошисида кўрсатилган ходимлар махсус ваколатли органнинг ҳудудий бошқармалари (саноат-техника инспекциялари) аттестация комиссияси, мазкур Низомнинг 16-банди тўртинчи хатбошисида кўрсатилган ходимлар ХИЧОдан фойдаланувчи ташкилот аттестация комиссияси томонидан бирламчи, даврий ва навбатдан ташқари аттестациядан ўтказилади.

18. Махсус ваколатли органда ташкил этиладиган аттестация комиссияси камида 7 нафар аъзодан ва тоқ сондан иборат таркибда бўлади ҳамда унинг таркибига:

махсус ваколатли орган раҳбарининг биринчи ўринбосари аттестация комиссиясининг раиси;

махсус ваколатли органнинг тегишли таркибий бўлинмалари (бошқарма ёки бўлим) раҳбарлари — аттестация комиссияси раисининг ўринбосари;

Ўзбекистон Касаба уюшмалари Федерацияси вакили;

саноат хавфсизлиги соҳасида алоҳида ваколатларга эга бўлган давлат органлари вакиллари киритилади;

19. Махсус ваколатли органнинг ҳудудий бошқармаларида (саноат-техника инспекцияларида) ташкил этиладиган аттестация комиссиялари камида 5 кишидан ва тоқ сондан иборат бўлади ҳамда таркибига:

тегишли ҳудудий бошқарма (саноат-техника инспекция) бошлиғи (аттестация комиссиясининг раиси);

ХИЧОдан фойдаланувчи ташкилот раҳбари ёки унинг ўринбосари (аттестация комиссиясининг раиси ўринбосари);

махсус ваколатли органнинг давлат инспекторлари (тегишли йўналишлар бўйича);

ХИЧОдан фойдаланувчи ташкилотнинг юқори турувчи ташкилоти вакили;

тармоқ касаба уюшмалари республика кенгашлари ва (ёки) ҳудудий касаба уюшмалари ташкилотлари бирлашмалари вакили киритилади.

20. ХИЧОдан фойдаланувчи ташкилотларда ташкил этиладиган аттестация комиссиялари камида 5 нафар аъзодан ва тоқ сондан иборат таркибда бўлади ҳамда таркибига:

ташкилот раҳбари ёки бош муҳандиси (аттестация комиссияси раиси);

махсус ваколатли орган томонидан ушбу ташкилотда давлат назоратини амалга ошириш юкланган давлат инспектори (аттестация комиссияси раисининг ўринбосари);

ишлаб чиқариш ва ички назоратни амалга оширувчи ходимлар, бошқарма, бўлим бошлиқлари ва раҳбарлар, авария-қутқарув хизмати вакиллари ва бошқа юқори малакали мутахассислар;

ҳудудий касаба уюшмалари ташкилотлари бирлашмалари вакили ва (ёки) ташкилотнинг касаба уюшмаси қўмитаси раиси.

21. Аттестация комиссияси раиси:

аттестация комиссияси мажлисларида раислик қилади;

аттестацияни ўтказиш жойи ва муддатларини белгилайди;

аттестациядан ўтказилиши лозим бўлган ходимлари рўйхатини тасдиқлайди;

аттестацияни ўтказиш бўйича бошқа ташкилий масалаларни ҳал қилади.

Аттестация комиссияси раиси бўлмаган тақдирда, унинг вазифаларини раис ўринбосари амалга оширади.

22. Махсус ваколатли орган, унинг ҳудудий бошқармалари (саноат-техника инспекциялари) ҳамда ХИЧОдан фойдаланувчи ташкилотнинг тегишли таркибий бўлинмаси (масъул ходими) аттестация комиссиясининг ишчи органи ҳисобланади. Ишчи орган:

ходимларни аттестациядан ўтказиш жадвалини тузади ва тасдиқлаш учун аттестация комиссияси раисига тақдим этади;

ходимлар анкеталарини шакллантиради ва тайёрлайди;

аттестация комиссияси томонидан бериладиган саволларни тузади;

аттестацияни ўтказиш санаси ва жойи тўғрисидаги маълумотларни аттестация комиссияси аъзоларига ҳамда ходимларга бевосита етказади ёки почта орқали юборади;

аттестация комиссияси фаолиятини ташкил этишга доир бошқа функцияларни амалга оширади.

23. ХИЧОдан фойдаланувчи ташкилотларда тузилган аттестация комиссияси аъзоларининг рўйхати ишлаб чиқилиб, аттестацияни ўтказиш муддатидан ўн кун аввал махсус ваколатли орган билан келишилади.

24. Ходимларни аттестациядан ўтказиш учун ташкилот томонидан тегишлилиги бўйича махсус ваколатли орган ёки унинг ҳудудий бошқармалари (саноат-техника инспекциялари) аттестация комиссиясига мазкур Низомга 5-иловага мувофиқ қоғоз ёки электрон шаклда ариза билан аттестация ўтказиш муддатидан уч ой олдин мурожаат қилинади.

Аризага қуйидаги ҳужжатлар илова қилинади:

мазкур Низомга 6-иловадаги шакл бўйича расмийлаштирилган сўровнома;

ходимларни тайёрлаш (қайта тайёрлаш) ва малака ошириш ўқув курсини тамомлаганлиги тўғрисидаги гувоҳнома ёки сертификат нусхаси;

ходимларнинг иш жойидан (ишламаётган ходимлар учун охирги иш жойидан) берилган фаолияти тўғрисидаги тавсифнома.

25. ХИЧОдан фойдаланувчи ташкилот масъул раҳбари ва тегишли таркибий бўлинмаси ходими аттестация комиссиясига ходимларни аттестациядан ўтказиш учун нотўғри маълумотлар тақдим этганлиги учун қонунчилик ҳужжатларига мувофиқ жавоб беради.

26. Аттестация комиссияси ариза тушган кундан бошлаб уч иш кунида ходимни аттестацияга қўйиш ёки қўйишни рад этиш тўғрисида қарор қабул қилади.

Тақдим этилган ариза мазкур Низомнинг 24-бандига мувофиқ тақдим этилмаган тақдирда, аттестация комиссияси томонидан аттестацияга қўйишни рад этиш тўғрисида рад этишнинг аниқ сабаблари кўрсатилган қарор қабул қилинади ва ушбу қарорнинг нусхаси бир иш кунида ХИЧОдан фойдаланувчи ташкилотга юборилади.

Рад этиш тўғрисида қарорда кўрсатилган сабабларни бартараф этиб, аризани қайта кўриб чиқишга тақдим этиш учун камида ўн кун, бироқ бир ойдан ортиқ бўлмаган муддат берилади.

27. Аттестация комиссияси аттестация ўтказиладиган жой ва вақт тўғрисида ХИЧОдан фойдаланувчи ташкилотни камида ўн беш иш куни аввал ёзма равишда хабардор қилиши лозим.

28. Ариза мазкур Низомнинг 24-бандига мувофиқ тақдим этилган тақдирда, ходим ХИЧОдан фойдаланувчи ташкилот томонидан тегишли ҳужжатлар аттестация комиссиясига тақдим этилган кундан бошлаб тўртинчи ойнинг биринчи 10-санасидан кечикмай аттестациядан ўтказилиши шарт.

29. Ҳужжатлари аттестациядан ўтишга тақдим этилган ҳамда аттестацияга узрли сабабга кўра (меҳнатга лаёқатсизлик варақаси ёки ходим фаолият юритаётган ХИЧОдан фойдаланувчи ташкилот ва бошқа юридик шахс раҳбарлари маълумотномаси) келмаган ходимлар аттестация комиссиясининг кейинги навбатдаги мажлисида аттестациядан ўтказилади.

Аттестацияга узрсиз сабабга кўра келмаган ходимлар бўйича улар ишлаётган ХИЧОдан фойдаланувчи ташкилот раҳбарлари номига билдиришнома юборилади ва ушбу ҳолат такроранланган тақдирда, аттестация комиссияси тақдим этилган ҳужжатлар асосида ходимларни аттестациядан ўтмаган деб ҳисоблаш ҳақидаги қарор чиқаришга ҳақли.

30. Ходим унинг шахсини тасдиқловчи ҳужжатни (паспорт, идентификацияловчи ID-карта ёки шахсни тасдиқловчи бошқа ҳужжат) кўрсатган ҳолда аттестациядан ўтишга киритилади.

31. Аттестация жараёни махсус ваколатли органнинг расмий веб-сайтида онлайн трансляция қилинади, техник жиҳатдан трансляция қилиш имкони мавжуд бўлмаган ҳолларда, ушбу жараён аудио ва видеоёзувларда қайд этилади.

32. Аттестация комиссиясининг йиғилиши аттестация комиссияси тасдиқланган таркибининг учдан икки қисми қатнашганда ваколатли ҳисобланади.

Ходимларнинг ҳужжатлари аттестация комиссияси аъзоларига таништирилади.

33. Аттестациядан ўтказиш жараёнида ходимларга қуйидагилар тақиқланади:

норматив-ҳуқуқий ва техник жиҳатдан тартибга солиш соҳасидаги норматив ҳужжатлар, махсус адабиётлар ёки бошқа материаллардан фойдаланиш;

уяли алоқа ёки бошқа алоқа воситаларидан фойдаланиш;

узрли сабабларсиз аттестация ўтказилаётган хонадан ташқарига чиқиш.

Мазкур бандда назарда тутилган талабларни бузган ходимлар аттестация ўтказилаётган хонадан чиқариб юборилади ва аттестациядан ўтмаган ҳисобланади.

Бегона шахсларга аттестацияда иштирок этишга рухсат берилмайди.

34. Аттестация суҳбат шаклида ўтказилади. Ҳар бир ходимга 10 та саволдан иборат имтиҳон варақаси берилади.

35. Аттестация комиссиясининг қарорлари аттестация комиссиясининг мажлисида қатнашган аъзоларининг оддий кўпчилик овози билан қабул қилинади. Овоз бериш ходимнинг иштирокисиз ўтказилади. Овозлар тенг бўлган тақдирда, аттестация комиссияси раисининг овози ҳал қилувчи овоз ҳисобланади.

36. Аттестация комиссияси аттестация натижаларини ҳисобга олиб:

ходимларни аттестациядан ўтди деб эътироф этиш ва унга аттестациядан ўтганлик тўғрисидаги гувоҳномани бериш ҳақида;

ходимни аттестациядан ўтмади деб эътироф этиш ҳақида қарор қабул қилади.

37. Аттестация натижалари овоз бериш жараёни тугаганидан сўнг дарҳол эълон қилинади.

38. Аттестация натижалари аттестация комиссияси раиси, раис ўринбосари ва аттестация комиссияси аъзолари томонидан имзоланадиган, мазкур Низомга 7-иловада келтирилган шаклга мувофиқ баённома билан расмийлаштирилади.

Аттестация комиссиясининг тасдиқланган баённомаси нусхаси аттестация комиссиясининг ишчи органи томонидан ходимларнинг иш жойига юборилади.

39. Баённома тайёрланган кундан бошлаб уч иш куни муддатида аттестациядан ўтган ходимларга мазкур Низомга 8-иловада келтирилган шаклга мувофиқ аттестация гувоҳномаси расмийлаштирилади.

Аттестация гувоҳномасининг амал қилиш муддати ушбу Низомнинг 16-бандида кўрсатилган аттестацияни ўтказиш даврийлигига мутаносиб равишда белгиланади.

40. Ходимларнинг аттестация гувоҳномаси мазкур Низомга 9-иловада келтирилган Аттестациядан ўтган ходимлар реестрида ҳисобга олинади ва юритилади.

41. Аттестация гувоҳномаси йўқотилганда ёки яроқсиз ҳолга келиб қолганда ходимнинг аризасига кўра уч иш кунида аттестация комиссияси томонидан унинг дубликати берилади.

42. Аттестация гувоҳномаси дубликатида унинг аввалги ҳисобга олиш рақами ва илгари белгиланган амал қилиш муддати ёзилади, юқоридаги бурчагига «ДУБЛИКАТ» ёзуви киритилади.

43. Аттестациядан ўтмаган ходимларни такрорий аттестациядан ўтказиш учун ХИЧОдан фойдаланувчи ташкилот аттестация ўтказилган кундан камида икки ой ўтгач мурожаат қилиши мумкин.

Бунда аттестациядан ўтмаган ходим эгаллаб турган лавозимидан вақтинча четлаштирилиши лозим.

44. Иккинчи марта ҳам аттестациядан ўтмаган ходимни аттестациядан ўтмаган деб эътироф этиш тўғрисида аттестация комиссияси томонидан қарор қабул қилиниб, ХИЧОдан фойдаланувчи ташкилотга ушбу ходимни меҳнат қонунчилигига мувофиқ эгаллаб турган лавозимидан озод қилиш ёхуд бошқа ишга ўтказиш масаласини кўриб чиқиш тўғрисида бажарилиши мажбурий бўлган тақдимнома юборилади.

45. Ходимларнинг аттестациядан ўтганлиги тўғрисидаги аттестация гувоҳномасининг амал қилиш муддати тугаганда, ходим даврий аттестациядан ўтказилади.

46. ХИЧОдан фойдаланувчи ташкилот раҳбари ходимнинг аттестация комиссияси томонидан белгиланган муддатларда аттестацияда иштирокини таъминлаш учун жавобгар ҳисобланади.

47. ХИЧОдан фойдаланувчи ташкилотларнинг аттестация комиссиясида ўз ходимлари аттестациядан ХИЧОдан фойдаланувчи ташкилот раҳбари томонидан тасдиқланган ва касаба уюшмаси қўмитаси (ёхуд унинг вакили) билан келишилган жадвал асосида ўтказилади. Аттестациядан ўтиши лозим бўлган ходимлар жадвал билан камида бир ой олдин таништирилиши лозим.

48. Аттестация саволлари махсус ваколатли орган билан келишилган ҳолда, ташкилот раҳбари томонидан тасдиқланади.

49. Аттестациядан ўтиши лозим бўлган ходимлар аттестация ўтказиладиган жой ва вақт тўғрисида аттестация комиссияси томонидан камида ўн беш иш куни олдин хабардор қилинади.

Аттестация мазкур Низомнинг 29 — 35-бандларида белгиланган тартибда ўтказилиши лозим.

50. Аттестация комиссияси ходимларнинг билимларини ҳисобга олиб:

ходимларни аттестациядан ўтмади деб эътироф этиш ҳақида қарор қабул қилади.

51. Аттестация натижалари аттестация комиссияси раиси, унинг ўринбосари ва аттестация комиссияси аъзолари томонидан имзоланадиган, мазкур Низомга 7-иловада келтирилган шаклга мувофиқ баённома билан расмийлаштирилади ва ходимнинг шахсий варақасига тегишли қайд киритилади.

52. ХИЧОдан фойдаланувчи ташкилот раҳбари аттестациянинг ўз вақтида ўтказилишига жавобгар ҳисобланади.

53. Ходимлар навбатдан ташқари аттестациядан тегишли аттестация комиссияси томонидан қуйидаги ҳолларда ўтказилади:

саноат хавфсизлиги соҳасидаги нормалар ва қоидалар талаблари ўзгарганда;

илгари қўлланилмаган хавф туғдирувчи янги техник қурилмалар ёки технологиялар киритилганда;

ходим олти ойдан ортиқ муддатга ишдан ажралган ҳолларда;

ходим саноат хавфсизлигини таъминлаш соҳасида белгиланган талаблар бўйича етарли даражада билимга эга эмаслиги аниқланганда, махсус ваколатли органнинг саноат хавфсизлиги ҳолатини текшириш ваколатига эга масъул шахсининг ёзма кўрсатмасига биноан.

54. ХИЧОдан фойдаланувчи ташкилотнинг қуйидаги ходимлари махсус ваколатли орган аттестация комиссиясида навбатдан ташқари аттестациядан ўтиши лозим:

авария ёки оқибати ўлим билан тугаган бахтсиз ҳодиса содир бўлган ташкилот раҳбарлари ҳамда бу ҳодисага алоқадор ходимлар;

авария ёки оқибати ўлим билан тугаган бахтсиз ҳодисанинг содир этилишида айбдор бўлган шахсни ёки жабрланувчини касбий тайёргарликдан ўтказган ташкилот раҳбарлари ҳамда ўқитишга тааллуқли бўлган ходимлар.

55. Ушбу Низомнинг 53-бандида кўрсатилган ҳолатларда аттестация тегишлилиги бўйича махсус ваколатли орган, унинг ҳудудий бошқармалари (саноат-техника инспекциялари) ҳамда ХИЧОдан фойдаланувчи ташкилот аттестация комиссиялари томонидан ўтказилади.

Ушбу Низомнинг 54-бандида кўрсатилган ҳолатларда аттестация махсус ваколатли орган аттестация комиссияси томонидан ўтказилади.

56. Ходимлар навбатдан ташқари аттестациядан мазкур Низомнинг 3-бобида белгиланган тартибда ўтказилади.

57. Аттестация комиссиясининг қароридан норози бўлган шахслар аттестация ўтказилган кундан бошлаб ўттиз иш кунида махсус ваколатли орган ҳузурида тузиладиган аппелляция комиссиясига ёзма равишда апелляция шикояти бериш ҳуқуқига эга.

Апелляция комиссияси таркиби махсус ваколатли орган раҳбари томонидан тасдиқланади. Аттестация комиссияси аъзолари апелляция комиссияси таркибига киритилмайди.

58. Аппелляция комиссияси берилган апелляцияни етти иш кунида уни берган ходимлар иштирокида кўриб чиқади ва қабул қилинган қарор ҳақида уларга ёзма хабар юборади.

59. Агар аттестация давомида ходимларнинг билими нотўғри баҳоланганлиги аниқланса, апелляция комиссияси аризани қаноатлантиради ва аттестация натижаларини ўзгартириш тўғрисида қарор қабул қилади, ходимларнинг апелляцияси бошқа асосларга кўра тўғри (асосли) деб топилса, апелляция комиссияси уни мазкур Низомда белгиланган тартибда қайта аттестациядан ўтказиш тўғрисида қарор қабул қилади.

Аттестация мазкур Низом талабларига зид равишда ўтказилмаганлиги ҳамда ходимларнинг билими тўғри баҳоланганлиги аниқланган тақдирда, апелляция комиссияси апелляция аризасини рад этиш тўғрисида қарор қабул қилади.

60. Аттестация комиссияси ёки апелляция комиссияси қарори юзасидан қонунчилик ҳужжатларида белгиланган тартибда судга шикоят қилиниши мумкин.

4-боб. Якунловчи қоида

61. Мазкур Низомнинг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Ўзбекистон Республикасининг Давлат герби OʻZBEKISTON RESPUBLIKASI Tayyorlash (qayta tayyorlash) boʻyicha taʼlim olganlik toʻgʻrisida GUVOHNOMA QT № 000000000 __________________________________________________________________________________________________________ (bitiruvchining familiyasi, ismi va otasining ismi) 20____-yil ________ _______________________________dan 20____-yil _________ _______________________________gacha ________________________________________________________________________________________________________ da (taʼlim tashkilotining nomi) _____________ soatga moʻljallangan _____________________________________________________________________________ (kurs hajmi) _____________________________________________________________________ tayyorlash (qayta tayyorlash) kursini tamomladi ______________________ (tayyorlash (qayta tayyorlash) kursining nomi) Taʼlim tashkiloti rahbari: _____________________ ____________ ____________ _______________________________ ______________________________________________ (imzo) _______________________ (familiyasi, ismi va otasining ismi) Roʻyxatdan oʻtkazish raqami: ____________________ Berilgan sanasi: ______________________________ _______________________ (kun, oy, yil)

Ўзбекистон Республикасининг Давлат герби OʻZBEKISTON RESPUBLIKASI Malaka oshirish boʻyicha taʼlim olganlik toʻgʻrisida SERTIFIKAT MO № 000000000 __________________________________________________________________________________________________________ (bitiruvchining familiyasi, ismi va otasining ismi) 20____ yil __________ _____________________________dan 20____-yil ___________ _____________________________gacha ________________________________________________________________________________________________________ da (taʼlim tashkilotining nomi) __________________ soatga moʻljallangan ______________________________________________________________________ (kurs hajmi) ______________________________________________________________________________ malaka oshirish kursini tamomladi (malaka oshirish kursining nomi) Taʼlim tashkiloti rahbari: ______________________________ ____________ ____________ ______________________________ _______________________________________________________ (imzo) ______________________ (familiyasi, ismi va otasining ismi) Roʻyxatdan oʻtkazish raqami: ____________________ Berilgan sanasi: _______________________________ ______________________ (kun, oy, yil)

Махсус ваколатли орган ва унинг ҳудудий бошқармалари аттестация комиссиялари томонидан ходимларни аттестациядан ўтказиш тартиби

Босқичлар Субъектлар Тадбирлар Бажариш муддатлари 1-босқич Хавфли ишлаб чиқариш объектларидан фойдаланувчи ташкилотлар Ходимларни аттестациядан ўтказиш учун махсус ваколатли орган, унинг ҳудудий бошқармаларида (саноат-техника инспекцияларида) ташкил этиладиган аттестация комиссияларига бирламчи, даврий ёки навбатдан ташқари аттестациядан ўтиш учун зарур ҳужжатларни илова қилган ҳолда ариза тақдим этади. Аттестацияни ўтказиш муддатидан 3 ой олдин. 2-босқич Махсус ваколатли орган, унинг ҳудудий бошқармаларида (саноат-техника инспекцияларида) ташкил этиладиган аттестация комиссиялари 1. Зарур ҳужжатлар илова қилинган аризани кўриб чиқади ҳамда ходимларни аттестацияга қўйилиши ёки қўйилишини рад этиш ҳақида қарор қабул қилади. Аризани қабул қилгандан сўнг 3 иш кунида. 2. Аттестацияга қўйишни рад этишнинг аниқ сабаблари кўрсатилган қарор нусхасини ташкилотга юборади. 1 иш кунида. 3. Аттестация ўтказилиш жойи ва вақти тўғрисида ташкилотни ёзма равишда хабардор қилади. Аттестация ўтказилишидан камида 15 иш куни олдин. 3-босқич Махсус ваколатли орган, унинг ҳудудий бошқармаларида (саноат-техника инспекцияларида) ташкил этиладиган аттестация комиссиялари 1. Аттестацияни суҳбат шаклида ўтказади. Ҳужжатлар олинган кундан бошлаб тўртинчи ойнинг биринчи 10 кунлигидан кечикмай. 2. Аттестация натижалари бўйича ходимлар аттестациядан ўтганлиги ёки ўтмади деб топилганлиги ҳақида қарор қабул қилади ва баённома расмийлаштиради. Аттестация натижалари бўйича овоз бериш жараёни тамом бўлгандан кейин дарҳол. 3. Аттестациядан ўтган ходимга аттестация гувоҳномасини расмийлаштиради ва аттестациядан ўтган ходимлар реестрида тегишли маълумотларни қайд этади. 3 иш кунида. 4. Аттестациядан ўтмаган ходимни эгаллаб турган лавозимидан вақтинча четлаштириш тўғрисида хавфли ишлаб чиқариш объектларидан фойдаланувчи ташкилотларнинг раҳбарига билдиришнома юборади. 1 иш кунида. 4-босқич Хавфли ишлаб чиқариш объектларидан фойдаланувчи ташкилотлар Аттестациядан ўтмаган ташкилот ходимини такрорий аттестациядан ўтказиш учун зарур ҳужжатларни илова қилган ҳолда ариза тақдим этади. Камида 2 ой ўтгач.

Хавфли ишлаб чиқариш объектларидан фойдаланувчи ташкилотларнинг аттестация комиссиялари томонидан ходимларни аттестациядан ўтказиш тартиби

Босқичлар Субъектлар Тадбирлар Бажариш муддатлари 1-босқич Хавфли ишлаб чиқариш объектларидан фойдаланувчи ташкилотларнинг аттестация комиссияси ишчи органи 1. Аттестация ўтказиш жадвалини тузади ва уни тасдиқлаш учун аттестация комиссияси раисига тақдим этади. 1. Аттестация ўтказишдан 3 ой олдин. 2. Аттестациядан ўтиши лозим бўлган ходимларни жадвал билан таништиради. 2. Аттестация ўтказишдан 2 ой олдин. 3. Аттестацияни ўтказиш санаси ва жойи тўғрисидаги маълумотларни аттестация комиссияси аъзоларига ҳамда ходимга бевосита топширади ёки почта орқали юборади. 3. Аттестация ўтказишдан камида 15 иш куни олдин. 2-босқич Хавфли ишлаб чиқариш объектларидан фойдаланувчи ташкилотларнинг аттестация комиссияси 1. Аттестацияни суҳбат шаклида ўтказади. 1. Аттестация ўтказиш жадвалида кўрсатилган муддатларда. 2. Аттестация натижалари бўйича ходимлар аттестациядан ўтганлиги ёки ўтмади деб топилганлиги ҳақида қарор қабул қилади ва баённома расмийлаштиради. 2. Синов (аттестация) натижалари овоз бериш жараёни тамом бўлгандан кейин дарҳол. 3. Аттестациядан ўтмаган ходимни иккинчи марта аттестациядан ўтказади. 3. Камида 2 ой ўтгач, бироқ 6 ойдан кам бўлган муддатда.

______________________________________ га (махсус ваколатли орган ёки унинг тегишли ҳудудий бошқармаси (саноат-техника инспекцияси номи) ___________________________ дан (ташкилот номи) АРИЗА Сиздан __________________________________________________________________________ да (ташкилот номи) _________________________________________________________________________________ сифатида (лавозим номи) фаолият юритаётган (янги ишга қабул қилинган ёки бошқа лавозимга тайинланган) _______________________________________________________________________________________ ни (ходимнинг Ф.И.О.) _________________________________________________________________________________ соҳасида (тегишли соҳа йўналиши номи) аттестация (такрорий аттестация)дан ўтказиб беришингизни сўралади. Илова: 1. Ходимнинг сўровномаси. 2. Тайёрлаш (қайта тайёрлаш), малака ошириш ўқув курсини тамомлаганлиги тўғрисидаги гувоҳнома ёки сертификат нусхаси. 3. Иш жойидан (ишламаётганлар учун охирги иш жойидан) берилган меҳнат фаолияти тўғрисидаги тавсифнома. Ташкилот раҳбари ________ ____________________________ (имзо) (Ф.И.О.) 20__ й. «____» _______________

СЎРОВНОМА 1. Фамилияси ______________________________ __ __ Исми ____________________________________ __ ___ Фотосурат ўрни Отасининг исми ______________________________ __ 2. Туғилган санаси ____________________________ __ (йили, куни, ойи рақамлар билан ёзилади) 3. Паспорт (идентификацияловчи ID-карта) серияси ___ _ _ рақами ___ _ _____ Берилган санаси ____________________________________ ____ ___ Ким томондан берилган _________________________________ ___ 4. Маълумоти: __________________________________ _____ _____ (олий таълим ташкилоти номи ва факультети) Тамомлаган йили ___________ _ _____ диплом № _____________ __ Диплом бўйича мутахассислиги __________________ ____ _______ Илмий даражаси, илмий унвони _________________ ____ ________ 5. Фаолияти ҳақидаги маълумотлар: Т/р Ишга кирган вақти Ишдан кетган вақти Ташкилот номи, идоравий мансублик, шаҳар номи Лавозими Асосий вазифалари 1. 2. 6. Тайёрлаш, қайта тайёрлаш ва малака ошириш ўқув курсларини тамомлагани ҳақидаги маълумотлар Т/р Ўқув курси номи Ўқув курси ўтказган ташкилот, шаҳар Ўқув курслари тамомлаганини тасдиқловчи ҳужжат номи, рақами ва берилган санаси Изоҳ 7. Илмий ишлари Т/р Йили Номи Изоҳ 8. Уй манзили: ___________________________________________________ _______________________ _ __________________________________________________________________ ______________________ 9. Боғланиш учун телефони _____ _ _____ _______ _ ___ Факс: _ _ ____ _____ _ _____ (коди) (рақами) (коди) (рақами) 10. Сўровнома тўлдирилган сана: 20___ й. «____» _____________________. Имзо ____________________________________

Хавфли ишлаб чиқариш объектларидан фойдаланувчи ташкилотларнинг ходимларини аттестациядан ўтказиш комиссиясининг _____-сон

____________ _ _ 20___ йил «____»_________ ___ (шаҳар, туман) Аттестация комиссияси раиси: ___________________ _________ (Ф.И.О.) (имзо) Аттестация комиссияси раиси ўринбосари: ___________________ _________ (Ф.И.О.) (имзо) Аттестация комиссияси аъзолари: ___________________ _________ (Ф.И.О.) (имзо) ___________________ _________ (Ф.И.О.) (имзо) Аттестация комиссияси котиби: ___________________ _________ (Ф.И.О.) (имзо) ____________________________________________________________________________ (аттестация комиссиясининг номи) аттестация комиссияси 20__ йил «__» ______даги мажлис якунлари бўйича ҚАРОР ҚИЛАДИ: Т/р Аттестациядан ўтказилган ходимнинг Ф.И.О. Ходим фаолият юритаётган ташкилот Ходимнинг лавозими Аттестация комиссиясининг хулосаси Аттестация комиссияси раиси __________________________ (имзо) Аттестация комиссияси котиби __________________________ (имзо) Аттестациядан ўтказиш комиссиясининг _____-сон баённомаси билан танишдим. 20 ___йил «____» _____________ ________ ________________________ ________ __________ ________________________________________ (аттестациядан ўтувчи Ф.И.О.) _______________ (имзо)

Attestatsiyadan oʻtgan xodimga beriladigan attestatsiya guvohnomasining shakli

__________________________________________________ (kim tomonidan berilgan) _______-son ATTESTATSIYA GUVOHNOMASI Berildi ushbu guvohnoma ______ __________ _______________ (familiyasi) _________________ ____ ______ (ismi) _________________________ ga (otasining ismi) Xodim ____________________ _____________ __________________________________________da (ish joyi) ______________________________________ ___________________________ _____ boʻlib faoliyat yuritadi. (lavozimi) _______________________________________________________ __________________________ ______da (attestatsiya komissiyasining nomi) Attestatsiya komissiyasi raisi: ______________ ___________________________ (imzo) (familiyasi, ismi va otasining ismi) M.Oʻ. Berilgan vaqti: 20___-yil “____”_________________ XODIMNING BOSHQA ISHGA OʻTKAZILISHI YOKI BOSHQA LAVOZIMGA TAYINLANISHI TOʻGʻRISIDA MAʼLUMOTLAR T/r Ishga oʻtkazilgan joyi Kasbi (lavozimi) Tashkilot rahbarining F.I.O. Tashkilot rahbarining imzosi 1. 2.

___________________________________________________ (аттестация комиссиясининг номи) АТТЕСТАЦИЯДАН ЎТГАН ХОДИМЛАР РЕЕСТРИ 20__ й. «___» ___________________да бошланди. 20__ й. «___» ___________________да тугади. Аттестациядан ўтган ходимлар реестрининг навбатдаги варақларини расмийлаштириш Т/р Аттестациядан ўтган ходимнинг Ф.И.О. Ходимнинг лавозими (касби), иш стажи Аттестациядан ўтиш вақти ва даврийлиги Аттестациядан ўтиш соҳаси Аттестация комиссиясининг хулосаси 1. 2.

Ўзбекистон Республикасининг Бош вазири А. АРИПОВ

Тошкент ш.,

2025 йил 21 январь,

26-сон

(Қонунчилик маълумотлари миллий базаси, 24.01.2025 й., 09/25/26/0067-сон; 06.05.2026 й., 09/26/224/0457-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

SXEMASI

BAYONNOMASI

Xavfli ishlab chiqarish obyektlaridan foydalanuvchi tashkilotlarning rahbar va muhandis-texnik xodimlarini attestatsiyadan oʻtkazish tartibini takomillashtirish toʻgʻrisida

Oʻzbekiston Respublikasining “Xavfli ishlab chiqarish obyektlarining sanoat xavfsizligi toʻgʻrisida”gi Qonuni hamda Oʻzbekiston Respublikasi Prezidentining “Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi faoliyatini samarali tashkil etish chora-tadbirlari toʻgʻrisida” 2024-yil 24-maydagi PQ-186-son qaroriga muvofiq Vazirlar Mahkamasi qaror qiladi:

1. Quyidagilarni nazarda tutuvchi Xavfli ishlab chiqarish obyektlaridan foydalanuvchi tashkilotlarning rahbar va muhandis-texnik xodimlarini tayyorlash, qayta tayyorlash, ularning malakasini oshirish hamda attestatsiyadan oʻtkazish tartibi toʻgʻrisidagi nizom ilovaga muvofiq tasdiqlansin:

xavfli ishlab chiqarish obyektlaridan foydalanuvchi tashkilotlarning rahbar va muhandis-texnik xodimlarini tayyorlash, qayta tayyorlash, ularning malakasini oshirish tartibi, muddatlari va ularni amalga oshiruvchi tashkilotlar;

xavfli ishlab chiqarish obyektlaridan foydalanuvchi tashkilotlarning rahbar va muhandis-texnik xodimlarini attestatsiyadan oʻtkazish tartibi, muddatlari, attestatsiya turlari hamda attestatsiyadan oʻtkaziladigan xodimlar toifalari;

attestatsiya komissiyasining tarkibini shakllantirish va faoliyatini tashkil etish;

attestatsiya natijalari boʻyicha appelyatsiya berish va uni koʻrib chiqish qoidalari.

2. Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni va texnik jihatdan tartibga solish sohasidagi normativ hujjatlar bir oy muddatda ushbu qarorga muvofiqlashtirilishini taʼminlasin.

3. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.

4. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi raisi A.V. Rafiqov zimmasiga yuklansin.

Vazirlar Mahkamasining 2025-yil 21-yanvardagi 26-son qaroriga ILOVA

Xavfli ishlab chiqarish obyektlaridan foydalanuvchi tashkilotlarning rahbar va muhandis-texnik xodimlarini tayyorlash, qayta tayyorlash, ularning malakasini oshirish hamda attestatsiyadan oʻtkazish tartibi toʻgʻrisida

1-bob. Umumiy qoidalar

1. Ushbu Nizom xavfli ishlab chiqarish obyektlaridan foydalanuvchi tashkilotlarning rahbar va muhandis-texnik xodimlarini (keyingi oʻrinlarda — xodimlar) tayyorlash, qayta tayyorlash, ularning malakasini oshirish hamda attestatsiyadan oʻtkazish tartibini belgilaydi.

2. Mazkur Nizomda quyidagi asosiy tushunchalar qoʻllaniladi:

ariza — xodimlarni ushbu Nizomda belgilangan tartibda attestatsiyadan oʻtkazish toʻgʻrisidagi murojaati;

attestatsiya guvohnomasi — xodim attestatsiyadan oʻtganligini tasdiqlovchi hujjat;

attestatsiya komissiyasi — maxsus vakolatli organda, uning hududiy boshqarmalarida (sanoat-texnika inspeksiyalarida) va xavfli ishlab chiqarish obyektlaridan foydalanuvchi tashkilotlarda tashkil etiladigan va doimiy asosda ishlaydigan xodimlarni attestatsiyadan oʻtkazish komissiyasi;

“Kontexnazoratoʻquv” davlat muassasasi (keyingi oʻrinlarda — “Kontexnazoratoʻquv” DM) — texnika va texnologiyalarning jadal rivojlanishini hisobga olgan holda sanoat, radiatsiya va yadro xavfsizligi hamda liftlar va attraksionlar xavfsizligini taʼminlash sohalarida faoliyat yurituvchi mutaxassis (ekspert)larni tayyorlash, qayta tayyorlash, ularning malakasini oshirish faoliyatini amalga oshiruvchi davlat muassasasi;

malaka oshirish — kasbiy bilim va koʻnikmalarni yangilash hamda chuqurlashtirishga yoʻnaltirilgan faoliyat;

malaka talablari — tinglovchilarning kasbiy bilim va amaliy koʻnikmalari darajasiga qoʻyiladigan talablar majmui;

maxsus vakolatli organ — Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi;

xavfli ishlab chiqarish obyekti (keyingi oʻrinlarda — XICHO) — Oʻzbekiston Respublikasining “Xavfli ishlab chiqarish obyektlarining sanoat xavfsizligi toʻgʻrisida”gi Qonuni 4-moddasida belgilangan korxonalar yoki ularning sexlari, uchastkalari, maydonchalari, shuningdek, boshqa ishlab chiqarish obyektlari;

XICHOdan foydalanuvchi tashkilot — tashkiliy-huquqiy shaklidan qatʼi nazar, barcha xususiy mulk yoki boshqa ashyoviy huquqlar asosida unga tegishli boʻlgan XICHOdan foydalanuvchi tashkilot;

xodimlarni tayyorlash — xodimlarning sanoat xavfsizligini taʼminlash boʻyicha normalar va qoidalar talablariga amal qilgan holda, XICHO bilan bogʻliq ishlarni bajarishda talab etiladigan darajadagi xavfsizlik madaniyati, bilim, malaka va koʻnikmalarni shakllantirish faoliyati;

xodimlarni qayta tayyorlash — sanoat xavfsizligi sohasida tayinlangan lavozimi boʻyicha maxsus kasbiy bilimlarga ega boʻlmagan xodimlarni yetarli darajadagi kasbiy bilimlar, amaliy koʻnikmalar va tajribalarni oʻzlashtirishga yoʻnaltirilgan faoliyat;

oʻquv dasturi — XICHOdan foydalanuvchi tashkilotlar xodimlarining lavozim majburiyatlarini sanoat xavfsizligi sohasidagi qonunchilik hujjatlari va texnik jihatdan tartibga solish sohasidagi normativ hujjatlar talablariga muvofiq amalga oshirish uchun zarur kasbiy bilim olish, amaliy koʻnikma va malakaga ega boʻlishning umumiy tartibini belgilovchi xodimlarni tayyorlashni tashkil etishga yoʻnaltirilgan dastur;

oʻquv rejasi — oʻquv kurslarining tarkibi, ularni oʻrganishning izchilligi va soatlardagi hajmini belgilaydigan hujjat.

2-bob. Xodimlarni tayyorlash, qayta tayyorlash va malakasini oshirish

3. Xodimlarni sanoat, radiatsiya va yadro xavfsizligi sohalari boʻyicha oʻquv kurslarida tayyorlash, qayta tayyorlash va malakasini oshirish belgilangan tartibda “Kontexnazoratoʻquv” DM tomonidan anʼanaviy va (yoki) masofaviy shaklda mazkur muassasa bilan tegishli xodimlar faoliyat yuritayotgan tashkilot oʻrtasida tuziladigan shartnoma (buyurtma)lar asosida amalga oshiriladi.

Bunda xodimlarni tayyorlash, qayta tayyorlash va ularning malakasini oshirish bilan bogʻliq xarajatlar uchun toʻlanishi kerak boʻlgan toʻlovlarning miqdori tegishli oʻquv kurslarining davomiyligidan hamda ularning shaklidan kelib chiqib, tomonlar oʻrtasida tuziladigan shartnoma bilan belgilanadi.

4. Xodimlarni:

a) tayyorlash — ishga yangi qabul qilinganda;

b) qayta tayyorlash:

tanlangan yoki turdosh kasb boʻyicha boshlangʻich kasbiy taʼlim boʻlmaganda;

tegishli kasbiy taʼlimni talab qiluvchi boshqa lavozimga oʻtkazishda;

v) malakasini oshirish ular tomonidan lavozim majburiyatlari bajarilishi uchun zarur boʻlgan kasbiy bilimlar va amaliy koʻnikmalarni saqlab turish maqsadida uch yilda kamida bir marta amalga oshiriladi.

5. Xodimlarni tayyorlash, qayta tayyorlash va ularning malakasini oshirish davrida xodimlarga ularning ish joyi boʻyicha oʻrtacha ish haqi va lavozimi saqlanadi. Agar mazkur tadbirlar uchun xodim yashash joyidan boshqa hududga yuborilsa, unga mazkur xodimni yuborayotgan tashkilot tomonidan qonunchilikda belgilangan barcha zarur shart-sharoitlar yaratilishi, shu jumladan sarf-xarajatlar qoplanishi lozim.

6. XICHO xodimlarini tayyorlash, qayta tayyorlash va ularning malakasini oshirish boʻyicha oʻquv dasturlari “Kontexnazoratoʻquv” DM tomonidan ishlab chiqiladi va maxsus vakolatli organ hamda xodimlarning vakillik organlari (mehnatni muhofaza qilish xizmati va kasaba uyushmalari) bilan belgilangan tartibda kelishilgandan keyin tasdiqlanadi.

7. Oʻquv kurslari toʻliq tamomlangandan soʻng “Kontexnazoratoʻquv” DMda xodim imtihondan oʻtkaziladi. Imtihon test koʻrinishida oʻtkazilishi mumkin.

8. Imtihondan oʻta olmagan xodimlarga bir oy davomida imtihonni qayta topshirishga ruxsat beriladi. Qayta imtihondan oʻta olmaganlar oʻquv kursida takroran oʻqitiladi.

9. “Kontexnazoratoʻquv” DM qayta imtihondan oʻta olmagan xodimlar toʻgʻrisidagi maʼlumotlarni uch ish kuni mobaynida qayta imtihon natijalari toʻgʻrisidagi dalolatnomani ilova qilgan holda, XICHOdan foydalanuvchi tashkilotga yuboradi. XICHOdan foydalanuvchi tashkilot mazkur maʼlumotlar asosida xodim bilan tuzilgan mehnat shartnomasini belgilangan tartibda bekor qilish yoki xodimni quyi lavozimga oʻtkazish masalasini koʻrib chiqishga haqlidir.

10. Xodimlarni tayyorlash va qayta tayyorlash yakuniga koʻra imtihondan oʻtganlarga ushbu Nizomga 1-ilovada keltirilgan shaklda guvohnoma, xodimlar malakasini oshirish yakuniga koʻra imtihondan oʻtganlarga mazkur Nizomga 2-ilovada keltirilgan shaklda sertifikat rasmiylashtiriladi.

11. Maxsus vakolatli organ XICHOdan foydalanuvchi tashkilot xodimlarini tayyorlash va qayta tayyorlash, ularning malakasini oshirish hamda attestatsiyadan oʻtkazish toʻgʻrisidagi maʼlumotlar bazasini markazlashtirilgan tartibda shakllantiradi va yuritadi.

12. “Kontexnazoratoʻquv” DM tayyorlash, qayta tayyorlash va malaka oshirish oʻquv kurslarini bitirgan xodimlar toʻgʻrisidagi maʼlumotlarni har chorakda maxsus vakolatli organga taqdim etib boradi.

3-bob. Xodimlarni attestatsiyadan oʻtkazish

13. XICHOdan foydalanuvchi tashkilot xodimlari sanoat xavfsizligi sohasida ularning kasbiga munosibligi darajasini xolisona baholash, belgilangan malaka talablariga muvofiqligini aniqlash, zimmasiga yuklangan vazifalar va funksiyalarni bajarish imkoniyatini baholash maqsadida attestatsiyadan oʻtkaziladi.

14. Xodimlar sanoat xavfsizligi sohasida attestatsiyadan maxsus vakolatli organda, uning hududiy boshqarmalarida (sanoat-texnika inspeksiyalarida) hamda XICHOdan foydalanuvchi tashkilotlarda tashkil etiladigan attestatsiya komissiyalari tomonidan birlamchi, davriy yoki navbatdan tashqari koʻrinishlarda mazkur Nizomga 3 va 4-ilovalardagi sxemalarga muvofiq oʻtkaziladi.

15. Xodimlar birlamchi attestatsiyadan ishga yangi qabul qilinganda yoki lavozimga tayinlanganda uch oy muddatda oʻtkaziladi.

16. Xodimlar davriy attestatsiyadan quyidagi muddatlarda oʻtkaziladi:

XICHOdan foydalanuvchi tashkilotlarning rahbar xodimlari, XICHOdan foydalanuvchi tashkilotlarning markaziy attestatsiya komissiyalari raislari va rais oʻrinbosarlari — besh yilda bir marta;

muhandis-texnik xodimlar, shuningdek, attestatsiya komissiyalari aʼzolari — uch yilda bir marta;

XICHOdan foydalanuvchi tashkilotlarda faoliyat yuritadigan, mazkur bandning ikkinchi va uchinchi xatboshlarida nazarda tutilmagan boshqa ishchi-xodimlar — bir yilda bir marta.

17. Ushbu Nizomning 16-bandi ikkinchi xatboshisida koʻrsatilgan xodimlar maxsus vakolatli organ attestatsiya komissiyasi va 16-bandi uchinchi xatboshisida koʻrsatilgan xodimlar maxsus vakolatli organning hududiy boshqarmalari (sanoat-texnika inspeksiyalari) attestatsiya komissiyasi, mazkur Nizomning 16-bandi toʻrtinchi xatboshisida koʻrsatilgan xodimlar XICHOdan foydalanuvchi tashkilot attestatsiya komissiyasi tomonidan birlamchi, davriy va navbatdan tashqari attestatsiyadan oʻtkaziladi.

18. Maxsus vakolatli organda tashkil etiladigan attestatsiya komissiyasi kamida 7 nafar aʼzodan va toq sondan iborat tarkibda boʻladi hamda uning tarkibiga:

maxsus vakolatli organ rahbarining birinchi oʻrinbosari attestatsiya komissiyasining raisi;

maxsus vakolatli organning tegishli tarkibiy boʻlinmalari (boshqarma yoki boʻlim) rahbarlari — attestatsiya komissiyasi raisining oʻrinbosari;

Oʻzbekiston Kasaba uyushmalari Federatsiyasi vakili;

sanoat xavfsizligi sohasida alohida vakolatlarga ega boʻlgan davlat organlari vakillari kiritiladi;

19. Maxsus vakolatli organning hududiy boshqarmalarida (sanoat-texnika inspeksiyalarida) tashkil etiladigan attestatsiya komissiyalari kamida 5 kishidan va toq sondan iborat boʻladi hamda tarkibiga:

tegishli hududiy boshqarma (sanoat-texnika inspeksiya) boshligʻi (attestatsiya komissiyasining raisi);

XICHOdan foydalanuvchi tashkilot rahbari yoki uning oʻrinbosari (attestatsiya komissiyasining raisi oʻrinbosari);

maxsus vakolatli organning davlat inspektorlari (tegishli yoʻnalishlar boʻyicha);

XICHOdan foydalanuvchi tashkilotning yuqori turuvchi tashkiloti vakili;

tarmoq kasaba uyushmalari respublika kengashlari va (yoki) hududiy kasaba uyushmalari tashkilotlari birlashmalari vakili kiritiladi.

20. XICHOdan foydalanuvchi tashkilotlarda tashkil etiladigan attestatsiya komissiyalari kamida 5 nafar aʼzodan va toq sondan iborat tarkibda boʻladi hamda tarkibiga:

tashkilot rahbari yoki bosh muhandisi (attestatsiya komissiyasi raisi);

maxsus vakolatli organ tomonidan ushbu tashkilotda davlat nazoratini amalga oshirish yuklangan davlat inspektori (attestatsiya komissiyasi raisining oʻrinbosari);

ishlab chiqarish va ichki nazoratni amalga oshiruvchi xodimlar, boshqarma, boʻlim boshliqlari va rahbarlar, avariya-qutqaruv xizmati vakillari va boshqa yuqori malakali mutaxassislar;

hududiy kasaba uyushmalari tashkilotlari birlashmalari vakili va (yoki) tashkilotning kasaba uyushmasi qoʻmitasi raisi.

21. Attestatsiya komissiyasi raisi:

attestatsiya komissiyasi majlislarida raislik qiladi;

attestatsiyani oʻtkazish joyi va muddatlarini belgilaydi;

attestatsiyadan oʻtkazilishi lozim boʻlgan xodimlari roʻyxatini tasdiqlaydi;

attestatsiyani oʻtkazish boʻyicha boshqa tashkiliy masalalarni hal qiladi.

Attestatsiya komissiyasi raisi boʻlmagan taqdirda, uning vazifalarini rais oʻrinbosari amalga oshiradi.

22. Maxsus vakolatli organ, uning hududiy boshqarmalari (sanoat-texnika inspeksiyalari) hamda XICHOdan foydalanuvchi tashkilotning tegishli tarkibiy boʻlinmasi (masʼul xodimi) attestatsiya komissiyasining ishchi organi hisoblanadi. Ishchi organ:

xodimlarni attestatsiyadan oʻtkazish jadvalini tuzadi va tasdiqlash uchun attestatsiya komissiyasi raisiga taqdim etadi;

xodimlar anketalarini shakllantiradi va tayyorlaydi;

attestatsiya komissiyasi tomonidan beriladigan savollarni tuzadi;

attestatsiyani oʻtkazish sanasi va joyi toʻgʻrisidagi maʼlumotlarni attestatsiya komissiyasi aʼzolariga hamda xodimlarga bevosita yetkazadi yoki pochta orqali yuboradi;

attestatsiya komissiyasi faoliyatini tashkil etishga doir boshqa funksiyalarni amalga oshiradi.

23. XICHOdan foydalanuvchi tashkilotlarda tuzilgan attestatsiya komissiyasi aʼzolarining roʻyxati ishlab chiqilib, attestatsiyani oʻtkazish muddatidan oʻn kun avval maxsus vakolatli organ bilan kelishiladi.

24. Xodimlarni attestatsiyadan oʻtkazish uchun tashkilot tomonidan tegishliligi boʻyicha maxsus vakolatli organ yoki uning hududiy boshqarmalari (sanoat-texnika inspeksiyalari) attestatsiya komissiyasiga mazkur Nizomga 5-ilovaga muvofiq qogʻoz yoki elektron shaklda ariza bilan attestatsiya oʻtkazish muddatidan uch oy oldin murojaat qilinadi.

Arizaga quyidagi hujjatlar ilova qilinadi:

mazkur Nizomga 6-ilovadagi shakl boʻyicha rasmiylashtirilgan soʻrovnoma;

xodimlarni tayyorlash (qayta tayyorlash) va malaka oshirish oʻquv kursini tamomlaganligi toʻgʻrisidagi guvohnoma yoki sertifikat nusxasi;

xodimlarning ish joyidan (ishlamayotgan xodimlar uchun oxirgi ish joyidan) berilgan faoliyati toʻgʻrisidagi tavsifnoma.

25. XICHOdan foydalanuvchi tashkilot masʼul rahbari va tegishli tarkibiy boʻlinmasi xodimi attestatsiya komissiyasiga xodimlarni attestatsiyadan oʻtkazish uchun notoʻgʻri maʼlumotlar taqdim etganligi uchun qonunchilik hujjatlariga muvofiq javob beradi.

26. Attestatsiya komissiyasi ariza tushgan kundan boshlab uch ish kunida xodimni attestatsiyaga qoʻyish yoki qoʻyishni rad etish toʻgʻrisida qaror qabul qiladi.

Taqdim etilgan ariza mazkur Nizomning 24-bandiga muvofiq taqdim etilmagan taqdirda, attestatsiya komissiyasi tomonidan attestatsiyaga qoʻyishni rad etish toʻgʻrisida rad etishning aniq sabablari koʻrsatilgan qaror qabul qilinadi va ushbu qarorning nusxasi bir ish kunida XICHOdan foydalanuvchi tashkilotga yuboriladi.

Rad etish toʻgʻrisida qarorda koʻrsatilgan sabablarni bartaraf etib, arizani qayta koʻrib chiqishga taqdim etish uchun kamida oʻn kun, biroq bir oydan ortiq boʻlmagan muddat beriladi.

27. Attestatsiya komissiyasi attestatsiya oʻtkaziladigan joy va vaqt toʻgʻrisida XICHOdan foydalanuvchi tashkilotni kamida oʻn besh ish kuni avval yozma ravishda xabardor qilishi lozim.

28. Ariza mazkur Nizomning 24-bandiga muvofiq taqdim etilgan taqdirda, xodim XICHOdan foydalanuvchi tashkilot tomonidan tegishli hujjatlar attestatsiya komissiyasiga taqdim etilgan kundan boshlab toʻrtinchi oyning birinchi 10-sanasidan kechikmay attestatsiyadan oʻtkazilishi shart.

29. Hujjatlari attestatsiyadan oʻtishga taqdim etilgan hamda attestatsiyaga uzrli sababga koʻra (mehnatga layoqatsizlik varaqasi yoki xodim faoliyat yuritayotgan XICHOdan foydalanuvchi tashkilot va boshqa yuridik shaxs rahbarlari maʼlumotnomasi) kelmagan xodimlar attestatsiya komissiyasining keyingi navbatdagi majlisida attestatsiyadan oʻtkaziladi.

Attestatsiyaga uzrsiz sababga koʻra kelmagan xodimlar boʻyicha ular ishlayotgan XICHOdan foydalanuvchi tashkilot rahbarlari nomiga bildirishnoma yuboriladi va ushbu holat takroranlangan taqdirda, attestatsiya komissiyasi taqdim etilgan hujjatlar asosida xodimlarni attestatsiyadan oʻtmagan deb hisoblash haqidagi qaror chiqarishga haqli.

30. Xodim uning shaxsini tasdiqlovchi hujjatni (pasport, identifikatsiyalovchi ID-karta yoki shaxsni tasdiqlovchi boshqa hujjat) koʻrsatgan holda attestatsiyadan oʻtishga kiritiladi.

31. Attestatsiya jarayoni maxsus vakolatli organning rasmiy veb-saytida onlayn translyatsiya qilinadi, texnik jihatdan translyatsiya qilish imkoni mavjud boʻlmagan hollarda, ushbu jarayon audio va videoyozuvlarda qayd etiladi.

32. Attestatsiya komissiyasining yigʻilishi attestatsiya komissiyasi tasdiqlangan tarkibining uchdan ikki qismi qatnashganda vakolatli hisoblanadi.

Xodimlarning hujjatlari attestatsiya komissiyasi aʼzolariga tanishtiriladi.

33. Attestatsiyadan oʻtkazish jarayonida xodimlarga quyidagilar taqiqlanadi:

normativ-huquqiy va texnik jihatdan tartibga solish sohasidagi normativ hujjatlar, maxsus adabiyotlar yoki boshqa materiallardan foydalanish;

uyali aloqa yoki boshqa aloqa vositalaridan foydalanish;

uzrli sabablarsiz attestatsiya oʻtkazilayotgan xonadan tashqariga chiqish.

Mazkur bandda nazarda tutilgan talablarni buzgan xodimlar attestatsiya oʻtkazilayotgan xonadan chiqarib yuboriladi va attestatsiyadan oʻtmagan hisoblanadi.

Begona shaxslarga attestatsiyada ishtirok etishga ruxsat berilmaydi.

34. Attestatsiya suhbat shaklida oʻtkaziladi. Har bir xodimga 10 ta savoldan iborat imtihon varaqasi beriladi.

35. Attestatsiya komissiyasining qarorlari attestatsiya komissiyasining majlisida qatnashgan aʼzolarining oddiy koʻpchilik ovozi bilan qabul qilinadi. Ovoz berish xodimning ishtirokisiz oʻtkaziladi. Ovozlar teng boʻlgan taqdirda, attestatsiya komissiyasi raisining ovozi hal qiluvchi ovoz hisoblanadi.

36. Attestatsiya komissiyasi attestatsiya natijalarini hisobga olib:

xodimlarni attestatsiyadan oʻtdi deb eʼtirof etish va unga attestatsiyadan oʻtganlik toʻgʻrisidagi guvohnomani berish haqida;

xodimni attestatsiyadan oʻtmadi deb eʼtirof etish haqida qaror qabul qiladi.

37. Attestatsiya natijalari ovoz berish jarayoni tugaganidan soʻng darhol eʼlon qilinadi.

38. Attestatsiya natijalari attestatsiya komissiyasi raisi, rais oʻrinbosari va attestatsiya komissiyasi aʼzolari tomonidan imzolanadigan, mazkur Nizomga 7-ilovada keltirilgan shaklga muvofiq bayonnoma bilan rasmiylashtiriladi.

Attestatsiya komissiyasining tasdiqlangan bayonnomasi nusxasi attestatsiya komissiyasining ishchi organi tomonidan xodimlarning ish joyiga yuboriladi.

39. Bayonnoma tayyorlangan kundan boshlab uch ish kuni muddatida attestatsiyadan oʻtgan xodimlarga mazkur Nizomga 8-ilovada keltirilgan shaklga muvofiq attestatsiya guvohnomasi rasmiylashtiriladi.

Attestatsiya guvohnomasining amal qilish muddati ushbu Nizomning 16-bandida koʻrsatilgan attestatsiyani oʻtkazish davriyligiga mutanosib ravishda belgilanadi.

40. Xodimlarning attestatsiya guvohnomasi mazkur Nizomga 9-ilovada keltirilgan Attestatsiyadan oʻtgan xodimlar reyestrida hisobga olinadi va yuritiladi.

41. Attestatsiya guvohnomasi yoʻqotilganda yoki yaroqsiz holga kelib qolganda xodimning arizasiga koʻra uch ish kunida attestatsiya komissiyasi tomonidan uning dublikati beriladi.

42. Attestatsiya guvohnomasi dublikatida uning avvalgi hisobga olish raqami va ilgari belgilangan amal qilish muddati yoziladi, yuqoridagi burchagiga “DUBLIKAT” yozuvi kiritiladi.

43. Attestatsiyadan oʻtmagan xodimlarni takroriy attestatsiyadan oʻtkazish uchun XICHOdan foydalanuvchi tashkilot attestatsiya oʻtkazilgan kundan kamida ikki oy oʻtgach murojaat qilishi mumkin.

Bunda attestatsiyadan oʻtmagan xodim egallab turgan lavozimidan vaqtincha chetlashtirilishi lozim.

44. Ikkinchi marta ham attestatsiyadan oʻtmagan xodimni attestatsiyadan oʻtmagan deb eʼtirof etish toʻgʻrisida attestatsiya komissiyasi tomonidan qaror qabul qilinib, XICHOdan foydalanuvchi tashkilotga ushbu xodimni mehnat qonunchiligiga muvofiq egallab turgan lavozimidan ozod qilish yoxud boshqa ishga oʻtkazish masalasini koʻrib chiqish toʻgʻrisida bajarilishi majburiy boʻlgan taqdimnoma yuboriladi.

45. Xodimlarning attestatsiyadan oʻtganligi toʻgʻrisidagi attestatsiya guvohnomasining amal qilish muddati tugaganda, xodim davriy attestatsiyadan oʻtkaziladi.

46. XICHOdan foydalanuvchi tashkilot rahbari xodimning attestatsiya komissiyasi tomonidan belgilangan muddatlarda attestatsiyada ishtirokini taʼminlash uchun javobgar hisoblanadi.

47. XICHOdan foydalanuvchi tashkilotlarning attestatsiya komissiyasida oʻz xodimlari attestatsiyadan XICHOdan foydalanuvchi tashkilot rahbari tomonidan tasdiqlangan va kasaba uyushmasi qoʻmitasi (yoxud uning vakili) bilan kelishilgan jadval asosida oʻtkaziladi. Attestatsiyadan oʻtishi lozim boʻlgan xodimlar jadval bilan kamida bir oy oldin tanishtirilishi lozim.

48. Attestatsiya savollari maxsus vakolatli organ bilan kelishilgan holda, tashkilot rahbari tomonidan tasdiqlanadi.

49. Attestatsiyadan oʻtishi lozim boʻlgan xodimlar attestatsiya oʻtkaziladigan joy va vaqt toʻgʻrisida attestatsiya komissiyasi tomonidan kamida oʻn besh ish kuni oldin xabardor qilinadi.

Attestatsiya mazkur Nizomning 29 — 35-bandlarida belgilangan tartibda oʻtkazilishi lozim.

50. Attestatsiya komissiyasi xodimlarning bilimlarini hisobga olib:

xodimlarni attestatsiyadan oʻtdi deb eʼtirof etish va unga attestatsiyadan oʻtganlik toʻgʻrisidagi guvohnomani berish haqida;

xodimlarni attestatsiyadan oʻtmadi deb eʼtirof etish haqida qaror qabul qiladi.

51. Attestatsiya natijalari attestatsiya komissiyasi raisi, uning oʻrinbosari va attestatsiya komissiyasi aʼzolari tomonidan imzolanadigan, mazkur Nizomga 7-ilovada keltirilgan shaklga muvofiq bayonnoma bilan rasmiylashtiriladi va xodimning shaxsiy varaqasiga tegishli qayd kiritiladi.

52. XICHOdan foydalanuvchi tashkilot rahbari attestatsiyaning oʻz vaqtida oʻtkazilishiga javobgar hisoblanadi.

53. Xodimlar navbatdan tashqari attestatsiyadan tegishli attestatsiya komissiyasi tomonidan quyidagi hollarda oʻtkaziladi:

sanoat xavfsizligi sohasidagi normalar va qoidalar talablari oʻzgarganda;

ilgari qoʻllanilmagan xavf tugʻdiruvchi yangi texnik qurilmalar yoki texnologiyalar kiritilganda;

xodim olti oydan ortiq muddatga ishdan ajralgan hollarda;

xodim sanoat xavfsizligini taʼminlash sohasida belgilangan talablar boʻyicha yetarli darajada bilimga ega emasligi aniqlanganda, maxsus vakolatli organning sanoat xavfsizligi holatini tekshirish vakolatiga ega masʼul shaxsining yozma koʻrsatmasiga binoan.

54. XICHOdan foydalanuvchi tashkilotning quyidagi xodimlari maxsus vakolatli organ attestatsiya komissiyasida navbatdan tashqari attestatsiyadan oʻtishi lozim:

avariya yoki oqibati oʻlim bilan tugagan baxtsiz hodisa sodir boʻlgan tashkilot rahbarlari hamda bu hodisaga aloqador xodimlar;

avariya yoki oqibati oʻlim bilan tugagan baxtsiz hodisaning sodir etilishida aybdor boʻlgan shaxsni yoki jabrlanuvchini kasbiy tayyorgarlikdan oʻtkazgan tashkilot rahbarlari hamda oʻqitishga taalluqli boʻlgan xodimlar.

55. Ushbu Nizomning 53-bandida koʻrsatilgan holatlarda attestatsiya tegishliligi boʻyicha maxsus vakolatli organ, uning hududiy boshqarmalari (sanoat-texnika inspeksiyalari) hamda XICHOdan foydalanuvchi tashkilot attestatsiya komissiyalari tomonidan oʻtkaziladi.

Ushbu Nizomning 54-bandida koʻrsatilgan holatlarda attestatsiya maxsus vakolatli organ attestatsiya komissiyasi tomonidan oʻtkaziladi.

56. Xodimlar navbatdan tashqari attestatsiyadan mazkur Nizomning 3-bobida belgilangan tartibda oʻtkaziladi.

57. Attestatsiya komissiyasining qaroridan norozi boʻlgan shaxslar attestatsiya oʻtkazilgan kundan boshlab oʻttiz ish kunida maxsus vakolatli organ huzurida tuziladigan appellyatsiya komissiyasiga yozma ravishda apellyatsiya shikoyati berish huquqiga ega.

Apellyatsiya komissiyasi tarkibi maxsus vakolatli organ rahbari tomonidan tasdiqlanadi. Attestatsiya komissiyasi aʼzolari apellyatsiya komissiyasi tarkibiga kiritilmaydi.

58. Appellyatsiya komissiyasi berilgan apellyatsiyani yetti ish kunida uni bergan xodimlar ishtirokida koʻrib chiqadi va qabul qilingan qaror haqida ularga yozma xabar yuboradi.

59. Agar attestatsiya davomida xodimlarning bilimi notoʻgʻri baholanganligi aniqlansa, apellyatsiya komissiyasi arizani qanoatlantiradi va attestatsiya natijalarini oʻzgartirish toʻgʻrisida qaror qabul qiladi, xodimlarning apellyatsiyasi boshqa asoslarga koʻra toʻgʻri (asosli) deb topilsa, apellyatsiya komissiyasi uni mazkur Nizomda belgilangan tartibda qayta attestatsiyadan oʻtkazish toʻgʻrisida qaror qabul qiladi.

Attestatsiya mazkur Nizom talablariga zid ravishda oʻtkazilmaganligi hamda xodimlarning bilimi toʻgʻri baholanganligi aniqlangan taqdirda, apellyatsiya komissiyasi apellyatsiya arizasini rad etish toʻgʻrisida qaror qabul qiladi.

60. Attestatsiya komissiyasi yoki apellyatsiya komissiyasi qarori yuzasidan qonunchilik hujjatlarida belgilangan tartibda sudga shikoyat qilinishi mumkin.

4-bob. Yakunlovchi qoida

61. Mazkur Nizomning buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Oʻzbekiston Respublikasining Davlat gerbi OʻZBEKISTON RESPUBLIKASI Tayyorlash (qayta tayyorlash) boʻyicha taʼlim olganlik toʻgʻrisida GUVOHNOMA QT № 000000000 __________________________________________________________________________________________________________ (bitiruvchining familiyasi, ismi va otasining ismi) 20____-yil ________ _______________________________dan 20____-yil _________ _______________________________gacha ________________________________________________________________________________________________________ da (taʼlim tashkilotining nomi) _____________ soatga moʻljallangan _____________________________________________________________________________ (kurs hajmi) _____________________________________________________________________ tayyorlash (qayta tayyorlash) kursini tamomladi ______________________ (tayyorlash (qayta tayyorlash) kursining nomi) Taʼlim tashkiloti rahbari: _____________________ ____________ ____________ _______________________________ ______________________________________________ (imzo) _______________________ (familiyasi, ismi va otasining ismi) Roʻyxatdan oʻtkazish raqami: ____________________ Berilgan sanasi: ______________________________ _______________________ (kun, oy, yil)

Oʻzbekiston Respublikasining Davlat gerbi OʻZBEKISTON RESPUBLIKASI Malaka oshirish boʻyicha taʼlim olganlik toʻgʻrisida SERTIFIKAT MO № 000000000 __________________________________________________________________________________________________________ (bitiruvchining familiyasi, ismi va otasining ismi) 20____ yil __________ _____________________________dan 20____-yil ___________ _____________________________gacha ________________________________________________________________________________________________________ da (taʼlim tashkilotining nomi) __________________ soatga moʻljallangan ______________________________________________________________________ (kurs hajmi) ______________________________________________________________________________ malaka oshirish kursini tamomladi (malaka oshirish kursining nomi) Taʼlim tashkiloti rahbari: ______________________________ ____________ ____________ ______________________________ _______________________________________________________ (imzo) ______________________ (familiyasi, ismi va otasining ismi) Roʻyxatdan oʻtkazish raqami: ____________________ Berilgan sanasi: _______________________________ ______________________ (kun, oy, yil)

Maxsus vakolatli organ va uning hududiy boshqarmalari attestatsiya komissiyalari tomonidan xodimlarni attestatsiyadan oʻtkazish tartibi

Bosqichlar Subyektlar Tadbirlar Bajarish muddatlari 1-bosqich Xavfli ishlab chiqarish obyektlaridan foydalanuvchi tashkilotlar Xodimlarni attestatsiyadan oʻtkazish uchun maxsus vakolatli organ, uning hududiy boshqarmalarida (sanoat-texnika inspeksiyalarida) tashkil etiladigan attestatsiya komissiyalariga birlamchi, davriy yoki navbatdan tashqari attestatsiyadan oʻtish uchun zarur hujjatlarni ilova qilgan holda ariza taqdim etadi. Attestatsiyani oʻtkazish muddatidan 3 oy oldin. 2-bosqich Maxsus vakolatli organ, uning hududiy boshqarmalarida (sanoat-texnika inspeksiyalarida) tashkil etiladigan attestatsiya komissiyalari 1. Zarur hujjatlar ilova qilingan arizani koʻrib chiqadi hamda xodimlarni attestatsiyaga qoʻyilishi yoki qoʻyilishini rad etish haqida qaror qabul qiladi. Arizani qabul qilgandan soʻng 3 ish kunida. 2. Attestatsiyaga qoʻyishni rad etishning aniq sabablari koʻrsatilgan qaror nusxasini tashkilotga yuboradi. 1 ish kunida. 3. Attestatsiya oʻtkazilish joyi va vaqti toʻgʻrisida tashkilotni yozma ravishda xabardor qiladi. Attestatsiya oʻtkazilishidan kamida 15 ish kuni oldin. 3-bosqich Maxsus vakolatli organ, uning hududiy boshqarmalarida (sanoat-texnika inspeksiyalarida) tashkil etiladigan attestatsiya komissiyalari 1. Attestatsiyani suhbat shaklida oʻtkazadi. Hujjatlar olingan kundan boshlab toʻrtinchi oyning birinchi 10 kunligidan kechikmay. 2. Attestatsiya natijalari boʻyicha xodimlar attestatsiyadan oʻtganligi yoki oʻtmadi deb topilganligi haqida qaror qabul qiladi va bayonnoma rasmiylashtiradi. Attestatsiya natijalari boʻyicha ovoz berish jarayoni tamom boʻlgandan keyin darhol. 3. Attestatsiyadan oʻtgan xodimga attestatsiya guvohnomasini rasmiylashtiradi va attestatsiyadan oʻtgan xodimlar reyestrida tegishli maʼlumotlarni qayd etadi. 3 ish kunida. 4. Attestatsiyadan oʻtmagan xodimni egallab turgan lavozimidan vaqtincha chetlashtirish toʻgʻrisida xavfli ishlab chiqarish obyektlaridan foydalanuvchi tashkilotlarning rahbariga bildirishnoma yuboradi. 1 ish kunida. 4-bosqich Xavfli ishlab chiqarish obyektlaridan foydalanuvchi tashkilotlar Attestatsiyadan oʻtmagan tashkilot xodimini takroriy attestatsiyadan oʻtkazish uchun zarur hujjatlarni ilova qilgan holda ariza taqdim etadi. Kamida 2 oy oʻtgach.

Xavfli ishlab chiqarish obyektlaridan foydalanuvchi tashkilotlarning attestatsiya komissiyalari tomonidan xodimlarni attestatsiyadan oʻtkazish tartibi

Bosqichlar Subyektlar Tadbirlar Bajarish muddatlari 1-bosqich Xavfli ishlab chiqarish obyektlaridan foydalanuvchi tashkilotlarning attestatsiya komissiyasi ishchi organi 1. Attestatsiya oʻtkazish jadvalini tuzadi va uni tasdiqlash uchun attestatsiya komissiyasi raisiga taqdim etadi. 1. Attestatsiya oʻtkazishdan 3 oy oldin. 2. Attestatsiyadan oʻtishi lozim boʻlgan xodimlarni jadval bilan tanishtiradi. 2. Attestatsiya oʻtkazishdan 2 oy oldin. 3. Attestatsiyani oʻtkazish sanasi va joyi toʻgʻrisidagi maʼlumotlarni attestatsiya komissiyasi aʼzolariga hamda xodimga bevosita topshiradi yoki pochta orqali yuboradi. 3. Attestatsiya oʻtkazishdan kamida 15 ish kuni oldin. 2-bosqich Xavfli ishlab chiqarish obyektlaridan foydalanuvchi tashkilotlarning attestatsiya komissiyasi 1. Attestatsiyani suhbat shaklida oʻtkazadi. 1. Attestatsiya oʻtkazish jadvalida koʻrsatilgan muddatlarda. 2. Attestatsiya natijalari boʻyicha xodimlar attestatsiyadan oʻtganligi yoki oʻtmadi deb topilganligi haqida qaror qabul qiladi va bayonnoma rasmiylashtiradi. 2. Sinov (attestatsiya) natijalari ovoz berish jarayoni tamom boʻlgandan keyin darhol. 3. Attestatsiyadan oʻtmagan xodimni ikkinchi marta attestatsiyadan oʻtkazadi. 3. Kamida 2 oy oʻtgach, biroq 6 oydan kam boʻlgan muddatda.

______________________________________ ga (maxsus vakolatli organ yoki uning tegishli hududiy boshqarmasi (sanoat-texnika inspeksiyasi nomi) ___________________________ dan (tashkilot nomi) ARIZA Sizdan __________________________________________________________________________ da (tashkilot nomi) _________________________________________________________________________________ sifatida (lavozim nomi) faoliyat yuritayotgan (yangi ishga qabul qilingan yoki boshqa lavozimga tayinlangan) _______________________________________________________________________________________ ni (xodimning F.I.O.) _________________________________________________________________________________ sohasida (tegishli soha yoʻnalishi nomi) attestatsiya (takroriy attestatsiya)dan oʻtkazib berishingizni soʻraladi. Ilova: 1. Xodimning soʻrovnomasi. 2. Tayyorlash (qayta tayyorlash), malaka oshirish oʻquv kursini tamomlaganligi toʻgʻrisidagi guvohnoma yoki sertifikat nusxasi. 3. Ish joyidan (ishlamayotganlar uchun oxirgi ish joyidan) berilgan mehnat faoliyati toʻgʻrisidagi tavsifnoma. Tashkilot rahbari ________ ____________________________ (imzo) (F.I.O.) 20__ y. “____” _______________

SOʻROVNOMA 1. Familiyasi ______________________________ __ __ Ismi ____________________________________ __ ___ Fotosurat oʻrni Otasining ismi ______________________________ __ 2. Tugʻilgan sanasi ____________________________ __ (yili, kuni, oyi raqamlar bilan yoziladi) 3. Pasport (identifikatsiyalovchi ID-karta) seriyasi ___ _ _ raqami ___ _ _____ Berilgan sanasi ____________________________________ ____ ___ Kim tomondan berilgan _________________________________ ___ 4. Maʼlumoti: __________________________________ _____ _____ (oliy taʼlim tashkiloti nomi va fakulteti) Tamomlagan yili ___________ _ _____ diplom № _____________ __ Diplom boʻyicha mutaxassisligi __________________ ____ _______ Ilmiy darajasi, ilmiy unvoni _________________ ____ ________ 5. Faoliyati haqidagi maʼlumotlar: T/r Ishga kirgan vaqti Ishdan ketgan vaqti Tashkilot nomi, idoraviy mansublik, shahar nomi Lavozimi Asosiy vazifalari 1. 2. 6. Tayyorlash, qayta tayyorlash va malaka oshirish oʻquv kurslarini tamomlagani haqidagi maʼlumotlar T/r Oʻquv kursi nomi Oʻquv kursi oʻtkazgan tashkilot, shahar Oʻquv kurslari tamomlaganini tasdiqlovchi hujjat nomi, raqami va berilgan sanasi Izoh 7. Ilmiy ishlari T/r Yili Nomi Izoh 8. Uy manzili: ___________________________________________________ _______________________ _ __________________________________________________________________ ______________________ 9. Bogʻlanish uchun telefoni _____ _ _____ _______ _ ___ Faks: _ _ ____ _____ _ _____ (kodi) (raqami) (kodi) (raqami) 10. Soʻrovnoma toʻldirilgan sana: 20___ y. “____” _____________________. Imzo ____________________________________

Xavfli ishlab chiqarish obyektlaridan foydalanuvchi tashkilotlarning xodimlarini attestatsiyadan oʻtkazish komissiyasining _____-son

____________ _ _ 20___ yil “____”_________ ___ (shahar, tuman) Attestatsiya komissiyasi raisi: ___________________ _________ (F.I.O.) (imzo) Attestatsiya komissiyasi raisi oʻrinbosari: ___________________ _________ (F.I.O.) (imzo) Attestatsiya komissiyasi aʼzolari: ___________________ _________ (F.I.O.) (imzo) ___________________ _________ (F.I.O.) (imzo) Attestatsiya komissiyasi kotibi: ___________________ _________ (F.I.O.) (imzo) ____________________________________________________________________________ (attestatsiya komissiyasining nomi) attestatsiya komissiyasi 20__ yil “__” ______dagi majlis yakunlari boʻyicha QAROR QILADI: T/r Attestatsiyadan oʻtkazilgan xodimning F.I.O. Xodim faoliyat yuritayotgan tashkilot Xodimning lavozimi Attestatsiya komissiyasining xulosasi Attestatsiya komissiyasi raisi __________________________ (imzo) Attestatsiya komissiyasi kotibi __________________________ (imzo) Attestatsiyadan oʻtkazish komissiyasining _____-son bayonnomasi bilan tanishdim. 20 ___yil “____” _____________ ________ ________________________ ________ __________ ________________________________________ (attestatsiyadan oʻtuvchi F.I.O.) _______________ (imzo)

Attestatsiyadan oʻtgan xodimga beriladigan attestatsiya guvohnomasining shakli

___________________________________________________ (attestatsiya komissiyasining nomi) ATTESTATSIYADAN OʻTGAN XODIMLAR REYESTRI 20__ y. “___” ___________________da boshlandi. 20__ y. “___” ___________________da tugadi. Attestatsiyadan oʻtgan xodimlar reyestrining navbatdagi varaqlarini rasmiylashtirish T/r Attestatsiyadan oʻtgan xodimning F.I.O. Xodimning lavozimi (kasbi), ish staji Attestatsiyadan oʻtish vaqti va davriyligi Attestatsiyadan oʻtish sohasi Attestatsiya komissiyasining xulosasi 1. 2.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 21-yanvar,

26-son

(Qonunchilik maʼlumotlari milliy bazasi, 24.01.2025-y., 09/25/26/0067-son; 06.05.2026-y., 09/26/224/0457-son)

lex.uz