📅 2025-yil 28-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 28 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 28 января 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 28 January 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТАРКИБИ
Риштон анъанавий кулолчилиги тарихи музейи фаолиятини йўлга қўйиш тўғрисида
Мамлакатимизда ривожланиб келаётган кулолчилик анъаналарини асраб-авайлаш, кулоллар фаолиятини янада қўллаб-қувватлаш, соҳа вакилларининг нуфузини ошириш, арзон ва сифатли кулолчилик маҳсулотларини ишлаб чиқариш, ички ва ташқи бозорларда сотиш учун қулай шарт-шароитлар яратиш, шунингдек, Ўзбекистон Республикаси Президентининг «Ўзбекистон Республикаси Президентининг тадбиркорлар билан тўртинчи очиқ мулоқотида белгиланган вазифаларни амалга ошириш чора-тадбирлари тўғрисида» 2024 йил 30 августдаги ПФ-132-сон Фармони ижросини таъминлаш мақсадида Вазирлар Маҳкамаси қарор қилади:
1. Фарғона вилояти ҳокимлиги, Ўзбекистон Республикаси Маданий мерос агентлиги ва Савдо-саноат палатасининг Фарғона вилояти Риштон туманининг «М. Топиволдиев» МФЙ Тўқимачи кўчасидаги 20а-уйда жойлашган, Савдо-саноат палатасига тегишли бўлган бинода Риштон анъанавий кулолчилиги тарихи нодавлат музейини (кейинги ўринларда — музей) ташкил қилиш тўғрисидаги таклифи маъқуллансин.
2. Қуйидагилар музейнинг асосий вазифалари этиб белгилансин:
музей ашёлари ва коллекцияларини аниқлаш, тўплаш ва сақлаш;
маданий, маърифий, илмий ва таълим фаолиятини амалга ошириш;
ёшларни «устоз-шогирд» анъаналари асосида кулолчилик ҳунарига ўргатиш;
кулолчиликнинг бой маданий мероси, инсоният тарихидаги ролини ҳаққоний ёритиш;
экспозицияларни ташкил этишда замонавий ахборот технологияларидан кенг фойдаланиш;
чет эл музейлари билан кўргазмалар ташкил этиш борасида ўзаро манфаатли ҳамкорлик ўрнатиш.
3. Риштон анъанавий кулолчилиги тарихи музейини ташкил этиш бўйича ишчи гуруҳ таркиби иловага мувофиқ тасдиқлансин.
Қуйидагилар ишчи гуруҳнинг асосий вазифалари этиб белгилансин:
музей концепциясини ишлаб чиқиш ва тасдиқлаш;
музей фаолиятини йўлга қўйиш;
музей фонди таркибига киритилган музей ашёлари ва коллекцияларининг бут сақланишини таъминлаш ҳамда текшириб бориш;
музейнинг аҳоли ва сайёҳларга сифатли хизмат кўрсатиши учун барча зарур шарт-шароитларни яратиш;
музейда маданий-маърифий, тарғибот-ташвиқот, илмий-тадқиқот ишлари савиясини ошириш, унинг моддий-техник базасини мустаҳкамлаш учун ҳомийлар маблағларини жалб этиш;
хорижий тажрибаларни ўрганган ҳолда, доимий равишда музей фаолиятини такомиллаштириб бориш;
музейни замонавий интерфаол ахборот-коммуникация технологиялари билан таъминлаш;
музейни малакали кадрлар билан тўлдириш.
4. Ишчи гуруҳ:
бир ой муддатда музей концепциясини ишлаб чиқиб, Ўзбекистон Республикаси Маданий мерос агентлиги, Фарғона вилояти ҳокимлиги, Туризм қўмитаси, «Ҳунарманд» уюшмаси ва Савдо-саноат палатасига тасдиқлаш учун киритсин ҳамда музей фаолияти билан боғлиқ барча чора-тадбирларни амалга оширсин;
2025 йил 1 апрелга қадар Фарғона вилоятининг Риштон тумани «М. Топиволдиев» МФЙ Тўқимачи кўчасидаги 20а-уйда жойлашган, Савдо-саноат палатасига тегишли бўлган бинонинг тоифасини музей фаолиятига тўлиқ мослаштирсин.
5. Ўзбекистон Республикаси Савдо-саноат палатасига музейни ташкил этиш ва унинг фаолият юритишини таъминлаш, шу жумладан:
музейнинг моддий-техник базасини (иморатлар, коммуникациялар, жиҳозлар, музей фондининг ашё ва коллекциялари, бошқалар) бойитишга;
музей фондининг ашё ва коллекцияларини аниқлаш, тўплаш ва сақлашга;
музейда маданий, маърифий, илмий ва таълим фаолиятини амалга оширишга;
музейнинг бино ва иншоотларини техника хавфсизлиги ҳамда санитария нормалари ва қоидаларига мувофиқ жиҳозлашга;
қонунчилик ҳужжатларида тақиқланмаган соҳага доир бошқа чора-тадбирларни амалга ошириш билан боғлиқ харажатларни қоплаш учун Ҳунармандчилик ва касаначиликни қўллаб-қувватлаш жамғармасидан Тармоқларни қўллаб-қувватлаш жамғармасига амалга ошириладиган ажратмалар ҳисобидан зарур маблағларни ажратишга рухсат берилсин.
6. Фарғона вилояти ҳокимлиги, Ўзбекистон Республикаси Туризм қўмитаси ва «Ҳунарманд» уюшмаси ҳамкорликда Риштон анъанавий кулолчилиги тарихи музейи ҳамда Риштон Халқаро кулоллар марказида «Уста-шогирд» анъаналари асосида ёшларга кулолчилик ҳунарини ўргатишни ташкил қилсин.
7. Ўзбекистон Республикаси Савдо-саноат палатаси ҳамда «Ҳунарманд» уюшмасига Ўзбекистон Республикаси Президентининг «Аҳолини ҳунармандчиликка жалб қилиш ва ҳунармандчилик фаолиятини ривожлантириш учун қулай шарт-шароитлар яратиш чора-тадбирлари тўғрисида» 2023 йил 12 июндаги ПФ-91-сон Фармонига мувофиқ Риштон туманида:
«Уста-шогирд» анъаналари асосида ёшларга кулолчилик ҳунарини ўргатаётган ҳунармандларга — шогирдлар тайёрлаш, зарур хомашё сотиб олиш ва шогирдларни иш ҳақи билан таъминлаш учун базавий ҳисоблаш миқдорининг 2 баравари миқдорида;
кулолчилик ҳунарини ўрганган шогирдларга — мустақил кулолчилик фаолиятини бошлаш ҳамда зарур асбоб-ускуна ва жиҳозларни сотиб олиш учун харажатларнинг 50 фоизи, бироқ базавий ҳисоблаш миқдорининг 25 бараваридан кўп бўлмаган миқдорда субсидия ажратиш тавсия этилсин.
8. Ўзбекистон Республикаси Иқтисодиёт ва молия вазирлиги Савдо-саноат палатаси ҳамда «Ҳунарманд» уюшмаси билан биргаликда икки ой муддатда ҳунармандчиликни, жумладан, кулолчиликни ривожлантиришга қаратилган имтиёзлар бериш, шунингдек, мавжуд имтиёзларнинг амал қилиш муддатини узайтиришга қаратилган таклифларни белгиланган тартибда Вазирлар Маҳкамасига киритсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.
Вазирлар Маҳкамасининг 2025 йил 28 январдаги 41-сон қарорига ИЛОВА
Риштон анъанавий кулолчилиги тарихи музейини ташкил этиш бўйича ишчи гуруҳ
1. Х. Бозаров — Фарғона вилояти ҳокими — ишчи гуруҳ раҳбари 2. Х. Сафаров — Савдо-саноат палатаси раиси ўринбосари в.б. 3. Б. Абдикаримов — Маданий мерос агентлиги директори 4. Р. Мирзаахмедов — «Ҳунарманд» уюшмаси раиси 5. Н. Хусанов — Давлат активларини бошқариш агентлиги директорининг биринчи ўринбосари 6. А. Назиров — уста-кулол (Фарғона вилояти) 7. Ш. Ахмаджонов — «Mingboshi Ceramic» оилавий корхонаси раҳбари (Фарғона вилояти)
Ўзбекистон Республикасининг Бош вазири А. АРИПОВ
Тошкент ш.,
2025 йил 28 январь,
41-сон
Oʻzbekiston Respublikasi Vazirlar Mahkamasining
qarori
TARKIBI
Rishton anʼanaviy kulolchiligi tarixi muzeyi faoliyatini yoʻlga qoʻyish toʻgʻrisida
Mamlakatimizda rivojlanib kelayotgan kulolchilik anʼanalarini asrab-avaylash, kulollar faoliyatini yanada qoʻllab-quvvatlash, soha vakillarining nufuzini oshirish, arzon va sifatli kulolchilik mahsulotlarini ishlab chiqarish, ichki va tashqi bozorlarda sotish uchun qulay shart-sharoitlar yaratish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining tadbirkorlar bilan toʻrtinchi ochiq muloqotida belgilangan vazifalarni amalga oshirish chora-tadbirlari toʻgʻrisida” 2024-yil 30-avgustdagi PF-132-son Farmoni ijrosini taʼminlash maqsadida Vazirlar Mahkamasi qaror qiladi:
1. Fargʻona viloyati hokimligi, Oʻzbekiston Respublikasi Madaniy meros agentligi va Savdo-sanoat palatasining Fargʻona viloyati Rishton tumanining “M. Topivoldiyev” MFY Toʻqimachi koʻchasidagi 20a-uyda joylashgan, Savdo-sanoat palatasiga tegishli boʻlgan binoda Rishton anʼanaviy kulolchiligi tarixi nodavlat muzeyini (keyingi oʻrinlarda — muzey) tashkil qilish toʻgʻrisidagi taklifi maʼqullansin.
2. Quyidagilar muzeyning asosiy vazifalari etib belgilansin:
muzey ashyolari va kolleksiyalarini aniqlash, toʻplash va saqlash;
madaniy, maʼrifiy, ilmiy va taʼlim faoliyatini amalga oshirish;
yoshlarni “ustoz-shogird” anʼanalari asosida kulolchilik hunariga oʻrgatish;
kulolchilikning boy madaniy merosi, insoniyat tarixidagi rolini haqqoniy yoritish;
ekspozitsiyalarni tashkil etishda zamonaviy axborot texnologiyalaridan keng foydalanish;
chet el muzeylari bilan koʻrgazmalar tashkil etish borasida oʻzaro manfaatli hamkorlik oʻrnatish.
3. Rishton anʼanaviy kulolchiligi tarixi muzeyini tashkil etish boʻyicha ishchi guruh tarkibi ilovaga muvofiq tasdiqlansin.
Quyidagilar ishchi guruhning asosiy vazifalari etib belgilansin:
muzey konsepsiyasini ishlab chiqish va tasdiqlash;
muzey faoliyatini yoʻlga qoʻyish;
muzey fondi tarkibiga kiritilgan muzey ashyolari va kolleksiyalarining but saqlanishini taʼminlash hamda tekshirib borish;
muzeyning aholi va sayyohlarga sifatli xizmat koʻrsatishi uchun barcha zarur shart-sharoitlarni yaratish;
muzeyda madaniy-maʼrifiy, targʻibot-tashviqot, ilmiy-tadqiqot ishlari saviyasini oshirish, uning moddiy-texnik bazasini mustahkamlash uchun homiylar mablagʻlarini jalb etish;
xorijiy tajribalarni oʻrgangan holda, doimiy ravishda muzey faoliyatini takomillashtirib borish;
muzeyni zamonaviy interfaol axborot-kommunikatsiya texnologiyalari bilan taʼminlash;
muzeyni malakali kadrlar bilan toʻldirish.
4. Ishchi guruh:
bir oy muddatda muzey konsepsiyasini ishlab chiqib, Oʻzbekiston Respublikasi Madaniy meros agentligi, Fargʻona viloyati hokimligi, Turizm qoʻmitasi, “Hunarmand” uyushmasi va Savdo-sanoat palatasiga tasdiqlash uchun kiritsin hamda muzey faoliyati bilan bogʻliq barcha chora-tadbirlarni amalga oshirsin;
2025-yil 1-aprelga qadar Fargʻona viloyatining Rishton tumani “M. Topivoldiyev” MFY Toʻqimachi koʻchasidagi 20a-uyda joylashgan, Savdo-sanoat palatasiga tegishli boʻlgan binoning toifasini muzey faoliyatiga toʻliq moslashtirsin.
5. Oʻzbekiston Respublikasi Savdo-sanoat palatasiga muzeyni tashkil etish va uning faoliyat yuritishini taʼminlash, shu jumladan:
muzeyning moddiy-texnik bazasini (imoratlar, kommunikatsiyalar, jihozlar, muzey fondining ashyo va kolleksiyalari, boshqalar) boyitishga;
muzey fondining ashyo va kolleksiyalarini aniqlash, toʻplash va saqlashga;
muzeyda madaniy, maʼrifiy, ilmiy va taʼlim faoliyatini amalga oshirishga;
muzeyning bino va inshootlarini texnika xavfsizligi hamda sanitariya normalari va qoidalariga muvofiq jihozlashga;
qonunchilik hujjatlarida taqiqlanmagan sohaga doir boshqa chora-tadbirlarni amalga oshirish bilan bogʻliq xarajatlarni qoplash uchun Hunarmandchilik va kasanachilikni qoʻllab-quvvatlash jamgʻarmasidan Tarmoqlarni qoʻllab-quvvatlash jamgʻarmasiga amalga oshiriladigan ajratmalar hisobidan zarur mablagʻlarni ajratishga ruxsat berilsin.
6. Fargʻona viloyati hokimligi, Oʻzbekiston Respublikasi Turizm qoʻmitasi va “Hunarmand” uyushmasi hamkorlikda Rishton anʼanaviy kulolchiligi tarixi muzeyi hamda Rishton Xalqaro kulollar markazida “Usta-shogird” anʼanalari asosida yoshlarga kulolchilik hunarini oʻrgatishni tashkil qilsin.
7. Oʻzbekiston Respublikasi Savdo-sanoat palatasi hamda “Hunarmand” uyushmasiga Oʻzbekiston Respublikasi Prezidentining “Aholini hunarmandchilikka jalb qilish va hunarmandchilik faoliyatini rivojlantirish uchun qulay shart-sharoitlar yaratish chora-tadbirlari toʻgʻrisida” 2023-yil 12-iyundagi PF-91-son Farmoniga muvofiq Rishton tumanida:
“Usta-shogird” anʼanalari asosida yoshlarga kulolchilik hunarini oʻrgatayotgan hunarmandlarga — shogirdlar tayyorlash, zarur xomashyo sotib olish va shogirdlarni ish haqi bilan taʼminlash uchun bazaviy hisoblash miqdorining 2 baravari miqdorida;
kulolchilik hunarini oʻrgangan shogirdlarga — mustaqil kulolchilik faoliyatini boshlash hamda zarur asbob-uskuna va jihozlarni sotib olish uchun xarajatlarning 50 foizi, biroq bazaviy hisoblash miqdorining 25 baravaridan koʻp boʻlmagan miqdorda subsidiya ajratish tavsiya etilsin.
8. Oʻzbekiston Respublikasi Iqtisodiyot va moliya vazirligi Savdo-sanoat palatasi hamda “Hunarmand” uyushmasi bilan birgalikda ikki oy muddatda hunarmandchilikni, jumladan, kulolchilikni rivojlantirishga qaratilgan imtiyozlar berish, shuningdek, mavjud imtiyozlarning amal qilish muddatini uzaytirishga qaratilgan takliflarni belgilangan tartibda Vazirlar Mahkamasiga kiritsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Vazirlar Mahkamasining 2025-yil 28-yanvardagi 41-son qaroriga ILOVA
Rishton anʼanaviy kulolchiligi tarixi muzeyini tashkil etish boʻyicha ishchi guruh
1. X. Bozarov — Fargʻona viloyati hokimi — ishchi guruh rahbari 2. X. Safarov — Savdo-sanoat palatasi raisi oʻrinbosari v.b. 3. B. Abdikarimov — Madaniy meros agentligi direktori 4. R. Mirzaaxmedov — “Hunarmand” uyushmasi raisi 5. N. Xusanov — Davlat aktivlarini boshqarish agentligi direktorining birinchi oʻrinbosari 6. A. Nazirov — usta-kulol (Fargʻona viloyati) 7. Sh. Axmadjonov — “Mingboshi Ceramic” oilaviy korxonasi rahbari (Fargʻona viloyati)
Oʻzbekiston Respublikasining Bosh vaziri A. ARIPOV
Toshkent sh.,
2025-yil 28-yanvar,
41-son