UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

НИЗОМ

СХЕМАСИ

РЎЙХАТИ

Ўзбекистон Республикаси Давлат чегараси орқали жисмоний шахслар ҳаракатланиши ҳамда улар томонидан товар ва транспорт воситаларини олиб ўтиш жараёнларини янада соддалаштириш тўғрисида

Сўнгги йилларда мамлакатимизнинг туризм жозибадорлигини ошириш, фуқаролар ва автотранспорт воситаларини божхона расмийлаштирувидан ўтказиш шароитларининг жаҳон стандартларига мувофиқлигини таъминлаш, божхона тартиб-таомилларини соддалаштиришда рақамли илғор технологияларни кенг жорий этиш натижасида божхона назоратидан ўтиш жараёнини кескин қисқартиришга эришилди.

Шу билан бирга, чегара ўтказиш пунктларида фуқароларнинг ҳаракатланиш оқими ошиб бораётганлигидан келиб чиқиб ва божхона назорати тартиботларини халқаро стандартларга мослаштириш мақсадида Ўзбекистон Республикасининг божхона чегараси орқали ўтказиш пунктларида икки йўлакли тизимни қўллаш тартиби жорий этилган.

Чегара ўтказиш пунктлари орқали жисмоний шахсларнинг ҳаракатланиши, улар томонидан товар ва транспорт воситаларини олиб ўтиш жараёнларини автоматлаштириш ҳамда чегара ўтказиш пунктлари олдида автотранспорт воситалари тирбандлигининг олдини олиш мақсадида Вазирлар Маҳкамаси қарор қилади:

1. Қуйидагилар:

«Электрон навбат» автоматлаштирилган ахборот тизимидан фойдаланган ҳолда, автотранспорт воситаларининг Давлат чегараси орқали ўтказиш пунктидан ҳаракатланиш тартиби тўғрисидаги низом 1-иловага ;

Жисмоний шахсларнинг Давлат чегараси орқали ўтказиш пунктидан ҳаракатланишида «Fast-track» хизматидан фойдаланиш тартиби тўғрисидаги низом 2-иловага ;

«Электрон навбат» автоматлаштирилган ахборот тизими биринчи навбатда жорий этиладиган Давлат чегараси орқали ўтказиш пунктлари рўйхати 3-иловага мувофиқ тасдиқлансин.

2. Белгилансинки, 2025 йил 1 майдан:

жисмоний шахслар учун «Fast-track» хизмати мазкур қарорга 3-иловада қайд этилган чегара ўтказиш пунктларида амалиётга жорий этилади;

автотранспорт воситалари учун «Электрон навбат» автоматлаштирилган ахборот тизими мазкур қарорга 3-иловада қайд этилган чегара ўтказиш пунктларида, республиканинг қолган чегара ўтказиш пунктларида эса автотранспорт воситаларининг ҳаракатланиш оқимидан келиб чиқиб, босқичма-босқич жорий этилади.

3. Иқтисодиёт ва молия вазирлиги ҳузуридаги Божхона қўмитаси 2025 йил 1 майга қадар барча зарур ахборот тизимларини Божхона қўмитасининг «Божхона-сервис» давлат муассасасини ягона оператор этиб белгилаган ҳолда, ишга тушириш чораларини кўрсин.

4. Қорақалпоғистон Республикаси Вазирлар Кенгаши, вилоятлар ҳокимликлари икки ой муддатда Транспорт вазирлиги ҳузуридаги Автомобиль йўллари қўмитаси, Иқтисодиёт ва молия вазирлиги ҳузуридаги Божхона қўмитаси билан келишган ҳолда, мазкур қарорга 3-иловада қайд этилган чегара ўтказиш пунктлари яқинида автотураргоҳлар ташкил этилиши учун бўш турган ва захирага олинган ер майдонларини белгиланган тартибда электрон онлайн-аукцион савдоларига чиқариш чораларини кўрсин.

5. Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси доимий фойдаланиш ҳуқуқи асосида ажратилган ер майдонларида тўғридан-тўғри музокаралар натижалари бўйича аниқланадиган хусусий шерик билан давлат-хусусий шериклик асосида автотураргоҳларни ташкил этиш чораларини кўрсин.

6. Ўзбекистон Республикаси Ташқи ишлар вазирлиги Иқтисодиёт ва молия вазирлиги ҳузуридаги Божхона қўмитаси билан биргаликда дипломатик каналлар орқали мазкур қарорга мувофиқ амалиётга жорий этилаётган тартиб тўғрисида хорижий давлатларни хабардор этиш чораларини кўрсин.

7. Мазкур қарорнинг бажарилишини назорат қилиш Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси раиси А.Ю. Мавлонов зиммасига юклансин.

Вазирлар Маҳкамасининг 2025 йил 29 январдаги 44-сон қарорига 1-ИЛОВА

«Электрон навбат» автоматлаштирилган ахборот тизимидан фойдаланган ҳолда, автотранспорт воситаларининг Давлат чегараси орқали ўтказиш пунктидан ҳаракатланиш тартиби тўғрисида

1-боб. Умумий қоидалар

1. Ушбу Низом «Электрон навбат» автоматлаштирилган ахборот тизимидан фойдаланган ҳолда, автотранспорт воситаларининг Давлат чегараси орқали ўтказиш пунктидан (кейинги ўринларда — ўтказиш пункти) ҳаракатланиш тартибини белгилайди.

2. Мазкур Низомда қуйидаги асосий тушунчалардан фойдаланилади:

автотранспорт воситаси — автомобиль йўллари ҳамда уларда жойлашган ўтказиш пунктлари орқали товарлар ва йўловчиларни ташишга мўлжалланган барча турдаги автотранспорт воситалари;

кутиш зонаси — навбатларни бошқариш тизими жорий этилган ҳамда мазкур Низом талабларига жавоб берадиган автотураргоҳлар ёки божхона терминаллари;

назорат тартиб-таомиллари — давлат назорати органлари томонидан Давлат чегараси орқали ўтадиган шахслар, транспорт воситалари ва товарларга нисбатан ўз ваколатлари доирасида амалга ошириладиган чора-тадбирлар;

навбат варақаси — мазкур Низомга асосан транспорт воситаси учун навбат олинган вақтда тақдим этиладиган махсус штрих код, ID-рақам ва бошқа маълумотлар акс этган электрон варақа;

навбатларни бошқариш тизими — чегара ўтказиш пунктлари орқали республика ҳудудидан чиқиб кетаётган автотранспорт воситаларига марказлашган ҳолда навбатларни шакллантириш имконини берувчи «Электрон навбат» автоматлаштирилган ахборот тизими;

Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг ягона автоматлаштирилган ахборот тизими (кейинги ўринларда — ЯААТ) — божхона чегараси орқали олиб ўтиладиган товар ва транспорт воситаларининг божхона назоратини амалга ошириш учун уларга доир ҳужжатлар ва маълумотларнинг киритилишини, ҳисобга олинишини ҳамда мониторинг қилинишини назарда тутувчи Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг автоматлаштирилган ахборот тизими.

3. «Электрон навбат» автоматлаштирилган ахборот тизими жорий этилган Давлат чегараси орқали ўтказиш пунктидан автотранспорт воситалари республика ҳудудидан чиқиш йўналишида фақатгина «Электрон навбат» автоматлаштирилган ахборот тизимида қайд этилган навбатлар асосида ҳаракатланади.

4. Ушбу Низомга мувофиқ кўрсатиладиган хизматдан фойдаланиш учун ваколатли шахс Интернет жаҳон ахборот тармоғидан фойдаланган ҳолда, Божхона қўмитасининг расмий веб-сайти ёки навбатларни бошқариш тизими жорий этилган кутиш зоналарида навбат олиши мумкин.

5. Навбатларни бошқариш тизими орқали берилган навбат варақаси автотранспорт воситасини ўтказиш пунктига киритиш учун асос бўлади. Ушбу автотранспорт воситаси навбатларни бошқариш тизимида белгиланган вақтда етиб келмаганда, олинган электрон навбат ўз кучини йўқотади.

Белгиланган вақтда ўтказиш пунктига етиб келмаган автотранспорт воситаси учун такроран навбат олиниши мумкин. Такроран навбат умумбелгиланган тартибда олинади.

2-боб. Навбатларни бошқариш ҳамда мувофиқлаштириб бориш

6. Навбатлар ЯААТ орқали назорат қилинади, автотранспорт воситаси ва ташилаётган товарлардан келиб чиқиб, ЯААТдаги алгоритм асосида мувофиқлаштирилиб борилади.

Бунда амалдаги қонунчилик ҳужжатларига мувофиқ Давлат чегарасидан устувор тартибда ўтказиладиган товарлар ва автотранспорт воситалари инобатга олинади.

7. Автотранспорт воситасига электрон навбат беришда ЯААТ Божхона қўмитасининг идоралараро ахборот алмашинув базасида қуйидаги маълумотларнинг мавжудлигини таққослайди:

мурожаат қилган шахснинг маълумотлари;

мурожаатда қайд этилган транспорт воситасининг маълумотлари;

мурожаатда қайд этилган транспорт воситаси ва мурожаатчининг қидирувда бўлмаслиги;

мурожаатчига расмийлаштирилган автотранспорт воситасига эгалик қилиш ёки ундан фойдаланиш ёхуд уни тасарруф этиш ҳуқуқини берувчи ҳужжатнинг мавжудлиги;

фуқаролик-ҳуқуқий жавобгарликнинг суғурталанганлиги;

мурожаат қилган шахсда солиқлар, божхона тўловлари ва бошқа мажбурий тўловлар бўйича қарздорликнинг мавжуд эмаслиги;

тақдим этилган мобил телефон рақамнинг мавжудлиги.

Мазкур банднинг иккинчи , учинчи ва бешинчи хатбошиларидаги талаблар хорижий фуқароларга нисбатан қўлланилмайди.

8. Навбатларни бошқариш тизими орқали электрон навбат олган автотранспорт воситаси ҳайдовчиси навбатларни бошқариш тизими томонидан ўтказиш пунктига бориши мумкин бўлган вақтдан 20 дақиқадан аввал навбатларни бошқариш тизими жорий этилган кутиш зонасига етиб келиб, бу ҳақида кутиш зонаси операторини огоҳлантириши лозим. Агар мазкур бандда қайд этилган муддатда электрон навбат олган автотранспорт воситаси навбатларни бошқариш тизими жорий этилган кутиш зонасига етиб келмаса олинган электрон навбат ўз кучини йўқотади.

Электрон навбат олиш учун автотранспорт воситалари махсус ташкил этилган кутиш зонасига жойлаштирилганда, тегишли тўловлар ундирилиши мумкин. Бунда ундирилган тўловлар қуйидаги миқдорда навбатларни бошқариш тизими томонидан автоматик тарзда тақсимланади:

ундирилган тўловларнинг 80 фоизи кутиш зонаси ҳисобига;

ундирилган тўловларнинг 20 фоизи навбатларни бошқариш тизими операторига.

Агарда автотранспорт воситаси ҳайдовчиси навбатларни бошқариш тизими жорий этилган кутиш зонаси ҳудудида 30 дақиқадан кам муддат турган бўлса, ушбу давр учун мазкур бандда кўрсатилган тўловлар ундирилмайди.

9. Олинган навбат буюртма қилинган вақтга қадар бекор қилиниши мумкин.

10. Амалдаги қонунчилик ҳужжатларида ўтказиш пунктини устувор тартибда кесиб ўтиши белгиланган шахслар, улар кетаётган автотранспорт воситалари электрон навбатдан фойдаланмаган ҳолда, устувор тартибда ўтказиш пунктига киритилади.

11. Ўтказиш пунктида техник, табиий ва бошқа турдаги сабабларга кўра жисмоний шахслар ва транспорт воситаларини назоратдан ўтказиш вақтинча тўхтатилган тақдирда, электрон навбатлар ўзгармаган ҳолда сақланиб қолади ҳамда мутаносиб равишда ортга сурилади, бу тўғрисида навбат олишда рўйхатдан ўтказилган телефон рақами ёки электрон почта манзилига ўзбек, рус ва инглиз тилларида хабар юборилади.

Табиий офат, енгиб бўлмас куч таъсирида ёки бошқа ҳолларда ўтказиш пункти фаолияти тўхтатилганда ёхуд тугатилганда, мазкур ўтказиш пунктидан ҳаракатланиш мақсадида олинган навбатлар божхона органи томонидан бекор қилинади ва бу тўғрисида навбат олишда рўйхатдан ўтказилган телефон рақами ёки электрон почта манзилига ўзбек, рус ва инглиз тилларида хабар юборилади.

3-боб. Навбатларни бошқариш тизими жорий этилган кутиш зоналарига қўйиладиган минимал талаблар

12. Навбатларни бошқариш тизими жорий этиладиган кутиш зоналари ўтказиш пункти яқинида ёки унга элтувчи йўл бўйларида ташкил этилади ва бир вақтда камида 100 та автотранспорт воситасини сақлаш имкониятига эга бўлиши лозим.

13. Кутиш зоналари ҳудудида юк ортилган автотранспорт воситаларининг божхона назорати остида сақланишини таъминлаш мақсадида зарур шарт-шароит яратилади.

14. Навбатларни бошқариш тизими йўлга қўйиладиган кутиш зонасига қўйиладиган минимал талаблар:

Ўзбекистон Республикасининг қонунчилик ҳужжатларида белгиланган техник, санитария қоидалари ва меъёрларига жавоб бериши;

ёнғин хавфсизлиги талабларига мос бўлган ёнғинни ўчириш тизими қонунчиликда белгиланган ҳолларда ёнғин назорати сигнализациялари ва воситаларига эга бўлиши;

транспорт воситалари ва уларда ташилаётган товарлар ҳамда божхона идентификация воситалари бутлиги ва хавфсизлигини таъминлаш;

ёритиш воситалари билан тўлиқ таъминланиши;

автотранспорт воситалари манёвр қилиши учун шарт-шароитлар бўлиши;

замонавий табло, монитор ва белгилар билан жиҳозланиши;

кутиш зонаси бутун ҳудуди периметри баландлиги 3 метрдан кам бўлмаган қатъий ўрнатилган яхлит тўсиқлар билан айлантириб тўсилиши, автотранспорт воситалари ҳаракатланиши ва сақланиши мўлжалланган ҳудудларга қаттиқ (асфальт/бетон) қоплама ётқизилиши, сувни тиндирадиган ёмғир канализацияси ва ахлат тўплаш учун контейнерлар мавжудлиги;

ҳудудга кириш ва ундан чиқиш учун махсус ажратилган жойлар мавжудлиги. Кириш (чиқиш) жойлари йўл ҳаракати хавфсизлиги талабларини таъминлаш ҳисобга олинган ҳолда ажратилиши керак;

агар ҳудуд бир неча қаторга жойлаштириладиган транспорт воситаларини сақлаш имконини берса, у ҳолда ҳудуд ичида транспорт воситаларининг хавфсиз ҳаракатланиши учун полосалар ажратилиши керак;

кириш (чиқиш)нинг ажратилган жойига назоратчи операторнинг хонаси туташган бўлиши керак, у ерда кўринарли жойда ташқи томонга транспорт воситаларини сақлаш хизматларини кўрсатишнинг тарифлари ва шартлари тўғрисида йирик ҳарфларда (ҳарфларнинг катталиги камида 3 см бўлиши керак) маълумот жойлаштирилади;

ногиронлиги бўлган шахслар учун махсус жиҳозланган транспорт воситалари учун камида иккита тўхташ жойи мавжудлиги;

битта транспорт воситасининг тўхташ жойи учун ҳисобланган майдон 20 кв метрга тенг деб қабул қилинади;

бинолар ва сақланаётган транспорт воситалари ўртасидаги ёнғинга қарши оралиқ лойиҳалаштириш нормалари талабларига мувофиқ, бироқ камида 6 метр бўлиши керак;

автотранспорт воситаларининг кутиш зонасига етиб келганлигини тасдиқлаш учун маълумотларни навбатларни бошқариш тизимига узатиш имконига эга бўлган, автотранспорт воситасининг давлат рақами белгисини аниқлаш тизими билан жиҳозланиши;

кутиш зонаси ҳудуди божхона органлари томонидан онлайн кузатиш ва назорат қилиш имконини берувчи ҳамда узлуксиз видеоёзувларнинг уч ой давомида сақланишини таъминлайдиган видеокузатув тизими билан жиҳозланиши;

кузатув камералари, ёритиш қурилмалари ва бошқа тизимларнинг доимий ишлаб туришини таъминловчи муқобил манбалар (электр генератор, қуёш батареялари ва бошқалар) билан таъминланиши лозим.

Мазкур талабларга жавоб берган кутиш зонасида навбатларни бошқариш тизимини жорий қилиш бўйича ушбу қарор билан тасдиқланган ягона оператор билан шартнома тузилади. Ушбу шартнома асосида ягона оператор томонидан кутиш зонасига «Электрон навбат» автоматлаштирилган ахборот тизими фойдаланиш учун тақдим этилади.

15. Навбатларни бошқариш тизими йўлга қўйиладиган кутиш зонасида ҳайдовчилар учун санитария қоидалари ва меъёрларига жавоб берадиган қуйидаги минимал шарт-шароитлар яратилади:

дам олиш хонаси;

овқатланиш хонаси;

ювиниш хонаси;

савдо шохобчалари;

биринчи тез тиббий ёрдам кўрсатиш учун зарур воситалар билан таъминланган хона;

санузеллар (эркаклар ва аёллар учун алоҳида);

автотранспорт воситаларини бирламчи таъмирлаш имкониятига эга устахона ва автоювиш жойлари, намозхона ҳамда бепул «Wi-Fi» ҳудудлари.

16. Навбатларни бошқариш тизими йўлга қўйилган кутиш зоналари «Электрон навбат» автоматлаштирилган ахборот тизимига интеграция қилинган электрон табло ва мониторлар ҳамда уларга элтувчи йўлбўйларига навбатларни бошқариш тизими жорий этилганлигини билдирувчи белгилар кутиш зоналарини ташкил этган хўжалик юритувчи субъектлар томонидан ўрнатилади.

4-боб. Навбатларни бошқариш тизими орқали олдиндан навбат буюртма қилиш

17. Электрон навбат олиш жараёни ушбу Низомга иловадаги схемага мувофиқ амалга оширилади.

18. Олдиндан электрон навбат олиш учун жисмоний шахс ёки юридик шахснинг вакили Интернет жаҳон ахборот тармоғи орқали Божхона қўмитасининг расмий веб-сайтида рўйхатдан ўтиши ва электрон навбат олиши мумкин.

5-боб. Давлат назорат органлари томонидан назорат тартиб-таомилларидан ўтказиш тартиби

19. Ўтказиш пункти орқали электрон навбат асосида ҳаракатланаётган автотранспорт воситалари ҳамда уларда ташилаётган товарлар амалдаги норматив-ҳуқуқий ҳужжатлар талабларига мувофиқ назорат тартиб-таомилларидан ўтказилади.

6-боб. Якунловчи қоида

20. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

«Электрон навбат» автоматлаштирилган ахборот тизимидан фойдаланган ҳолда, автотранспорт воситаларининг Давлат чегараси орқали ўтказиш пунктидан ҳаракатланиш тартиби тўғрисидаги низомга ИЛОВА

«Электрон навбат» тизимидан фойдаланиш

Босқичлар Субъектлар Тадбирлар Бажариш муддатлари 1-босқич «Электрон навбат» автоматлаштирилган ахборот тизимидан фойдаланадиган шахс 1. Тартиб билан танишиб чиқади. 1. Хоҳишига кўра 2. «Электрон навбат» автоматлаштирилган ахборот тизимидан фойдаланиш учун Божхона қўмитасининг расмий веб-сайтида рўйхатдан ўтади. 2. Мурожаат қилганда 2-босқич «Электрон навбат» автоматлаштирилган ахборот тизимидан фойдаланадиган шахс 1. Электрон сўровнома бандларини тўлдиради. 2. Э лектрон навбат олиш учун оферта шартномаси билан танишади ва тасдиқлайди. Электрон навбат олаётганда 3-босқич «Электрон навбат» автоматлаштирилган ахборот тизими 1. Тизимга юборилган электрон мурожаат бандларидаги маълумотлар тўлиқ кўрсатилганлиги ЯААТдаги форматли-мантиқий назоратдан ўтказади. 2. ЯААТдаги форматли-мантиқий назоратдан ижобий ўтган мурожаатни қабул қилади, номувофиқ бўлганда шахсга тўғрилаш учун қайтаради. Автоматик равишда 4-босқич «Электрон навбат» автоматлаштирилган ахборот тизими 1. Қабул қилинган мурожаат бўйича электрон навбатга қўйилганлиги тўғрисида махсус штрих код акс этган «Навбат варақаси»ни юборади. Автоматик равишда 2. Электрон навбат олган шахс божхона чегарасини кесиб ўтиши белгиланган вақтга қадар олган навбатини бекор қилиши мумкин. Офлайн равишда

Вазирлар Маҳкамасининг 2025 йил 29 январдаги 44-сон қарорига 2-ИЛОВА

Жисмоний шахсларнинг Давлат чегараси орқали ўтказиш пунктидан ҳаракатланишида «Fast-track» хизматидан фойдаланиш тартиби тўғрисида

1-боб. Умумий қоидалар

1. Ушбу Низом жисмоний шахсларнинг Давлат чегараси орқали ўтказиш пунктидан (кейинги ўринларда — ўтказиш пункти) ҳаракатланишида «Fast-track» хизматидан (кейинги ўринларда — хизмат) фойдаланиш тартибини белгилайди.

2. Ушбу Низомга мувофиқ кўрсатиладиган хизматдан фойдаланиш учун жисмоний шахслар ёки юридик шахснинг вакили Божхона қўмитасининг расмий веб-сайти ёки электрон тўлов тизимлари орқали ҳаракатланишдан олдин электрон ёки ўтказиш пунктига ҳаракатланиш чоғида оғзаки равишда мурожаат қилади.

3. Хизматдан фойдаланадиган шахслар ҳамда уларнинг қўл юки ва багажлари назорати ушбу хизмат учун ажратилган алоҳида жойларда (йўлак, VIP зал ва бошқалар) давлат назорати органлари томонидан навбатсиз амалга оширилади, мазкур хизматдан фойдаланаётган жисмоний шахслар навбати бундан мустасно.

4. Хизматдан фойдаланганлик учун тўлов 18 ёшга тўлган ҳар бир жисмоний шахс учун навбат олинадиган кундаги базавий ҳисоблаш миқдорининг ўн беш фоизи миқдорида тўланади, тўловлар ушбу хизматдан фойдаланишдан олдин мобил иловалар орқали ёки ўтказиш пунктида мавжуд тижорат банклари шохобчасида амалга оширилиши мумкин.

Хизматдан фойдаланувчи шахслар ҳамроҳлигида ҳаракатланаётган 18 ёшга тўлмаган шахслар, шунингдек, кузатувчисиз ҳаракатлана олмайдиган ақли заиф ёки жисмоний имконияти чекланган (ногирон) жисмоний шахслар ушбу хизмат учун тўлов тўламаган ҳолда ҳаракатланади.

5. Хизматни кенгайтириш ҳамда ўтказиш пунктларида жисмоний шахсларга қулай шарт-шароитлар яратиш учун ўтказиш пунктларини замонавий назорат-техник воситалар билан таъминлаш мақсадида ушбу хизматдан фойдаланганлик учун ундириладиган тўловларнинг:

80 фоизи — Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг Моддий ёрдам, ижтимоий ҳимоя, божхона органларини ривожлантириш ва кўзда тутилмаган харажатлар махсус жамғармаси ҳисобига;

20 фоизи — Давлат хавфсизлик хизматининг Чегара қўшинлари ҳисобига ўтказилади.

6. Хизмат доирасида жисмоний шахсларга қуйидаги қулайликлар яратилади:

автотранспорт воситаларида Ўзбекистон Республикаси Давлат чегарасини кесиб ўтаётган жисмоний шахсларнинг навбатдан ташқари паспорт ва божхона назорати жараёнларини тезлаштирган тартибда амалга ошириш учун алоҳида йўлак;

банк шохобчаси;

она-бола хонаси;

намозхона;

санузел (эркаклар ва аёллар учун алоҳида);

таом ва ичимликлар харид қилиш бурчаги (бар);

шахсларнинг дам олиши ва овқатланиши учун «VIР» зал (юмшоқ ўриндиқ ва стол-стуллар, телевизор, бепул «Wi-Fi» ҳудудлари ҳамда бошқалар билан жиҳозланган);

чегарадош давлатлар, уларнинг географик-этник жойлашуви ҳамда ўтказиш пунктидаги мавжуд шарт-шароитни инобатга олган ҳолда, жисмоний шахсларга янада қулай шарт-шароитлар яратиш мақсадида бошқа хоналар ва хизматлар ташкил этилиши мумкин.

Мазкур бандда назарда тутилган хизматларни ташкил этиш билан боғлиқ харажатлар Давлат бюджетидан ажратилган маблағлар ва (ёки) Божхона қўмитасининг бюджетдан ташқари жамғармаси ҳамда қонунчиликда тақиқланмаган манбалар ҳисобидан молиялаштирилади.

2-боб. Хизматдан фойдаланишни бекор қилиш ва тўланган тўловларни қайтариб олиш тартиби

7. Жисмоний шахслар ўтказиш пункти орқали белгиланган ҳаракатланиш вақтига қадар ўтказиш пункти орқали ҳаракатланиш учун буюртмани бекор қилишлари мумкин.

Буюртма қилинган вақтга қадар электрон навбат бекор қилинганда, амалга оширилган тўлов мурожаатда келтирилган банк реквизитлари ёки тўлов карталарига автоматик тарзда қайтарилади. Ушбу Низомнинг 10-бандида кўрсатилган ҳолатлар бундан мустасно.

8. Тўланган тўлов буюртма қилинган вақтга қадар буюртма берган шахс томонидан тўлов қайтариладиган банк реквизитлари, тўлов карталари ҳамда электрон навбатни бекор қилиш сабабини кўрсатган ҳолда, Божхона қўмитасининг расмий веб-сайтига мурожаат қилиш орқали қайтарилади. Мурожаат ЯААТдаги форматли-мантиқий назоратдан ижобий ўтганда, тўланган тўлов автоматик қайтарилади.

9. Хизматдан фойдаланадиган шахслар ўтказиш пунктида мавжуд хизматдан фойдаланаётган жисмоний шахсларнинг навбати доирасида ўтказилади.

10. Агарда ўтказиш пунктида юзага келган техник, табиий ва бошқа турдаги сабабларга кўра жисмоний шахсларни назоратдан ўтказиш вақтинча тўхтатилган тақдирда, хизматдан фойдаланиш учун олинган варақалар сақланиб қолади.

Табиий офат, енгиб бўлмас куч таъсирида ёки бошқа ҳолларда ўтказиш пункти фаолияти тўхтатилганда ёки ёпилган тақдирда, мазкур ўтказиш пунктидан ҳаракатланиш мақсадида олинган навбатлар божхона органи томонидан бекор қилинади ва бу тўғрисида навбат олишда рўйхатдан ўтказилган телефон рақами ёки электрон почта манзилига ўзбек, рус ва инглиз тилларида хабар юборилади.

Бундай холларда тўланган тўловлар навбат олган жисмоний шахслар томонидан юборилган электрон ариза асосида ушбу Низомга мувофиқ қайтарилади.

3-боб. Хизматдан фойдаланиш учун зарур ҳужжатлар

11. Хизматдан фойдаланиш имкониятига эга бўлиш учун жисмоний шахс ёки юридик шахснинг ваколат берилган вакили Божхона қўмитасининг расмий веб-сайтида қуйидаги маълумотларни кўрсатган ҳолда, рўйхатдан ўтади ва тўловни амалга оширади:

жисмоний шахс ўзи ва ҳамроҳлигидаги шахслар тўғрисидаги маълумотлар (Ф.И.О, телефон рақамлари);

жисмоний шахс ўзи ва ҳамроҳлигидаги шахснинг шахсини тасдиқловчи ҳужжати тўғрисидаги (паспорт ёки туғилганлик тўғрисидаги гувоҳнома рақами, берилган санаси) маълумотлар;

жисмоний шахс ўзи ва ҳамроҳлигидаги шахснинг туғилган санаси;

хизматдан фойдаланишнинг тахминий вақти (ўтказиш пунктини кесиб ўтиш санаси) тўғрисидаги маълумотлар;

айнан қайси ўтказиш пункти орқали ҳаракатланиши;

ўтказиш пунктини кесиб ўтишда тақдим этилиши зарур бўлган бошқа ҳужжатлар тўғрисидаги маълумотлар.

12. Тақдим этилган маълумотлар нотўғри ёки бузиб кўрсатилганлиги аниқланган тақдирда, ушбу Низомнинг 15-бандига мувофиқ мурожаат рад этилади.

Бундай ҳолларда шахслар хизматдан фойдаланиш учун такроран мурожаат этишлари мумкин.

Хизматдан фойдаланишда сўровнома маълумотларидаги хатоликлар хизматдан фойдаланиш вақтига қадар ўзгартирилиши ёки уларга қўшимчалар киритилиши мумкин.

4-боб. Хизматдан фойдаланиш тартиби

13. Хизматдан фойдаланиш жараёни ушбу Низомга иловадаги схемага мувофиқ амалга оширилади.

14. Хизматдан фойдаланиш учун Божхона қўмитасининг расмий веб-сайти ёки электрон тўлов тизимлари орқали рўйхатдан ўтиб ва тўловни амалга ошириб, хизматдан фойдаланиш учун навбат олиш мумкин.

15. Божхона қўмитасининг расмий веб-сайти ёки тўлов тизимлари орқали мурожаатга киритилган маълумотлар автоматик тарзда ЯААТдаги форматли-мантиқий назоратдан ўтади ва номувофиқликлар аниқланган тақдирда, мурожаат рад этилади.

ЯААТдаги форматли-мантиқий назоратдан ижобий ўтган мурожаатлар белгиланган тўловлар тўланганидан сўнг инсон омилисиз хизматдан фойдаланиш навбатига қўшилади ва сўровнома автоматик тарзда ваколатли органга келиб тушади, фойдаланувчига махсус штрих кодли электрон кўринишдаги хизматдан фойдаланиш варақаси ўзбек, рус ва инглиз тилларида автоматик тарзда шаклланади ва тақдим этилади.

Хизматдан фойдаланиш учун олинган электрон навбат бир марталик ҳисобланиб, навбат олинган кундан эътиборан бир йил давомида амал қилади.

16. Хизматдан фойдаланиш учун ўтказиш пунктига келгандан сўнг мурожаат қилинганда, шахслар ўтказиш пунктларида мавжуд тижорат банклари шохобчалари орқали тўловни амалга оширади ва тўлов варақаси асосида ҳаракатланадилар.

Турли сабабларга кўра хизматдан фойдаланиш учун тўлов амалга оширилмаган тақдирда, шахслар ортга қайтарилади ва умумий белгиланган тартибда ўтказилади.

5-боб. Хизматдан фойдаланадиган шахсларни давлат назорат органлари томонидан назорат тартиб-таомилларидан ўтказиш тартиби

17. Хизматдан фойдаланган ҳолда ҳаракатланадиган шахслар ҳамда улар ҳаракатланадиган автотранспорт воситаси ўтказиш пункти ҳудудига устувор тартибда киритилади.

Хизматдан фойдаланган ҳолда ҳаракатланадиган шахс ўз бошқарувидаги автотранспорт воситасида электрон навбатга мўлжаллаган алоҳида йўлаклар орқали ҳаракатланиши мумкин.

18. Ўтказиш пункти орқали хизматдан фойдаланган ҳолда ўтадиган шахслар ва улар томонидан олиб ўтиладиган товарлар ҳамда транспорт воситалари амалдаги норматив-ҳуқуқий ҳужжатлар талабларига мувофиқ тегишли назорат тартиб-таомилларидан ўтказилади.

19. Ўтказиш пункти орқали хизматдан фойдаланган ҳолда ҳаракатланадиган шахслар ҳамда уларнинг қўл юки ва багажлари назорат тартиб-таомилларидан тезкор равишда қуйидаги устувор тартибда ўтказилади:

а) божхона органлари томонидан хизматдан фойдаланиш учун Божхона қўмитасининг расмий веб-сайт орқали тўлдирилган сўровнома асосида тегишли маълумотлар ҳамда хизматдан фойдаланиш учун тўланиши лозим бўлган тўловлар тўланганлиги текширилади;

б) чегара назорати бўлинмалари томонидан Давлат чегарасини кесиб ўтиш ҳуқуқини берувчи ҳужжатлар мавжудлиги текширилади ва паспорт назоратидан ўтказилади;

в) санитария-карантин бўлинмаси томонидан назоратдан ўтказилади;

г) божхона назоратидан ўтказиш жараёнида божхона органлари фитосанитария ва ветеринария назорати органларининг қуйидаги вазифаларини ҳам амалга оширади:

фитосанитария ва ветеринария назорати предметлари мавжудлиги тўғрисида оғзаки сўровни амалга ошириш;

фитосанитария ва ветеринария назорати талаб қилинадиган товарларни олиб ўтиш учун рухсат этувчи ҳужжатлар мавжудлигини ўрганиш;

қўл юки ва багажни назорат қилиш жараёнида фитосанитария ва ветеринария назорати объектлари ҳамда олиб ўтилиши тақиқланган товарларнинг мавжудлигини назорат техник воситалари ёрдамида кўздан кечириш;

фитосанитария ва ветеринария назорати объектларининг ҳужжатлари назоратини амалга ошириш.

Йўловчиларнинг қўл юки ва багажини божхона назоратидан ўтказиш жараёнида божхона органи томонидан фитосанитария ҳамда ветеринария назоратига тушадиган объектлар аниқланганда, назорат тартиб-таомилларини амалга ошириш учун тегишли давлат назорат органи жалб қилинади. Ушбу ҳолатда божхона органининг талабига асосан фитосанитария ва ветеринария назорати ходимлари божхона назорати жараёнида иштирок этади.

20. Хизматдан фойдаланган ҳолда устувор тартибда ҳаракатланаётган шахслар томонидан қонунчилик ҳужжатларининг бузилиш ҳолатлари аниқланганда, амалдаги қонунчилик ҳужжатларига мувофиқ улар жавобгарликка тортилади, бундай ҳолларда хизматдан фойдаланиш учун тўланган тўлов суммаси қайтарилмайди.

6-боб. Якунловчи қоида

21. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Жисмоний шахсларнинг Давлат чегараси орқали ўтказиш пунктидан ҳаракатланишида «Fast-track» хизматидан фойдаланиш тартиби тўғрисидаги низомга ИЛОВА

Давлат чегарасини «Fast-track» хизматидан фойдаланган ҳолда кесиб ўтиш

Босқичлар Субъектлар Тадбирлар Бажариш муддатлари 1-босқич Хизматдан фойдаланадиган шахс 1. Хизмат дан фойдаланиш учун Божхона қўмитасининг расмий веб-сайтда рўйхатдан ўтади. 1. Хоҳишига кўра 2. Тартиб билан танишиб чиқади. 2. Мурожаат қилганда 2-босқич Хизматдан фойдаланадиган шахс 1. Мурожаат бандларини сўралган маълумотлар билан тўлдиради. 2. Хизмат дан фойдаланиш учун оферта шартнома билан танишади ва тасдиқлайди. 3. Тўланиши лозим бўлган т ўловни тўлайди ва мурожаатни ваколатли органлар кўриб чиқиши учун юборади. Мурожаат қилганда 3-босқич Ваколатли орган 1. Юборилган мурожаат бандларидаги маълумотлар тўғри шакллантирилганлиги ва тўлов суммаси тўлиқ тўланганлиги тизим томонидан автоматик тарзда ЯААТдаги форматли-мантиқий назоратдан ўтказилади. 2. ЯААТдаги форматли-мантиқий назоратдан ижобий ўтказилган мурожаатни қабул қилади, номувофиқ бўлганда тўғрилаш учун қайтаради. 3. Қабул қилинган қарор тўғрисида мурожаатчига Божхона қўмитасининг расмий веб-сайти орқали рад этилганлиги сабаблари кўрсатилган ҳолда, онлайн режимда автоматик тарзда жавоб қайтаради. Автоматик равишда 4-босқич Хизматдан фойдаланиш учун тўланган тўловни қайтариш 1. Божхона қўмитасининг расмий веб-сайтида электрон ариза бандлари тўлдирилади. 2 . Хизмат дан фойдаланиш учун тўланган тўловни қабул қилувчи банк реквизитлари, тўлов карталари рақами аниқ кўрсатилади ва мурожаат юборилади. 3. Мурожаат ЯААТдаги форматли-мантиқий назоратдан ижобий ўтганда, тўланган тўлов автоматик қайтарилади. Автоматик равишда

Вазирлар Маҳкамасининг 2025 йил 29 январдаги 44-сон қарорига 3-ИЛОВА

«Электрон навбат» автоматлаштирилган ахборот тизими биринчи навбатда жорий этиладиган Давлат чегараси орқали ўтказиш пунктлари

Т /р Чегара божхона пости жойлашган ҳудуд Чегарадош давлат Чегара божхона пости Чегара ўтказиш пункти 1. Қорақалпоғистон Республикаси Қозоғистон Довут-ота Даут-Ата 2. Андижон вилояти Қирғизистон Дўстлик Дўстлик 3. Бухоро вилояти Туркманистон Олот Олот 4. Сирдарё вилояти Қозоғистон Сирдарё Гулистон 5. Сурхондарё вилояти Афғонистон Айритом Термиз 6. Сурхондарё вилояти Тожикистон Сариосиё Сариосиё 7. Тошкент вилояти Қозоғистон Яллама Яллама 8. Тошкент вилояти Қозоғистон С. Нажимов Тошкент 9. Тошкент вилояти Қозоғистон Навоий Зангиота 10. Тошкент вилояти Қозоғистон Ғишткўприк Ғишткўприк 11. Тошкент вилояти Тожикистон Ойбек Ойбек 12. Фарғона вилояти Қирғизистон Ўзбекистон Ўзбекистон

Ўзбекистон Республикасининг Бош вазири А. АРИПОВ

Тошкент ш.,

2025 йил 29 январь,

44-сон

(Қонунчилик маълумотлари миллий базаси, 03.02.2025 й., 09/25/44/0101-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

SXEMASI

NIZOM

SXEMASI

ROʻYXATI

Oʻzbekiston Respublikasi Davlat chegarasi orqali jismoniy shaxslar harakatlanishi hamda ular tomonidan tovar va transport vositalarini olib oʻtish jarayonlarini yanada soddalashtirish toʻgʻrisida

Soʻnggi yillarda mamlakatimizning turizm jozibadorligini oshirish, fuqarolar va avtotransport vositalarini bojxona rasmiylashtiruvidan oʻtkazish sharoitlarining jahon standartlariga muvofiqligini taʼminlash, bojxona tartib-taomillarini soddalashtirishda raqamli ilgʻor texnologiyalarni keng joriy etish natijasida bojxona nazoratidan oʻtish jarayonini keskin qisqartirishga erishildi.

Shu bilan birga, chegara oʻtkazish punktlarida fuqarolarning harakatlanish oqimi oshib borayotganligidan kelib chiqib va bojxona nazorati tartibotlarini xalqaro standartlarga moslashtirish maqsadida Oʻzbekiston Respublikasining bojxona chegarasi orqali oʻtkazish punktlarida ikki yoʻlakli tizimni qoʻllash tartibi joriy etilgan.

Chegara oʻtkazish punktlari orqali jismoniy shaxslarning harakatlanishi, ular tomonidan tovar va transport vositalarini olib oʻtish jarayonlarini avtomatlashtirish hamda chegara oʻtkazish punktlari oldida avtotransport vositalari tirbandligining oldini olish maqsadida Vazirlar Mahkamasi qaror qiladi:

1. Quyidagilar:

“Elektron navbat” avtomatlashtirilgan axborot tizimidan foydalangan holda, avtotransport vositalarining Davlat chegarasi orqali oʻtkazish punktidan harakatlanish tartibi toʻgʻrisidagi nizom 1-ilovaga ;

Jismoniy shaxslarning Davlat chegarasi orqali oʻtkazish punktidan harakatlanishida “Fast-track” xizmatidan foydalanish tartibi toʻgʻrisidagi nizom 2-ilovaga ;

“Elektron navbat” avtomatlashtirilgan axborot tizimi birinchi navbatda joriy etiladigan Davlat chegarasi orqali oʻtkazish punktlari roʻyxati 3-ilovaga muvofiq tasdiqlansin.

2. Belgilansinki, 2025-yil 1-maydan:

jismoniy shaxslar uchun “Fast-track” xizmati mazkur qarorga 3-ilovada qayd etilgan chegara oʻtkazish punktlarida amaliyotga joriy etiladi;

avtotransport vositalari uchun “Elektron navbat” avtomatlashtirilgan axborot tizimi mazkur qarorga 3-ilovada qayd etilgan chegara oʻtkazish punktlarida, respublikaning qolgan chegara oʻtkazish punktlarida esa avtotransport vositalarining harakatlanish oqimidan kelib chiqib, bosqichma-bosqich joriy etiladi.

3. Iqtisodiyot va moliya vazirligi huzuridagi Bojxona qoʻmitasi 2025-yil 1-mayga qadar barcha zarur axborot tizimlarini Bojxona qoʻmitasining “Bojxona-servis” davlat muassasasini yagona operator etib belgilagan holda, ishga tushirish choralarini koʻrsin.

4. Qoraqalpogʻiston Respublikasi Vazirlar Kengashi, viloyatlar hokimliklari ikki oy muddatda Transport vazirligi huzuridagi Avtomobil yoʻllari qoʻmitasi, Iqtisodiyot va moliya vazirligi huzuridagi Bojxona qoʻmitasi bilan kelishgan holda, mazkur qarorga 3-ilovada qayd etilgan chegara oʻtkazish punktlari yaqinida avtoturargohlar tashkil etilishi uchun boʻsh turgan va zaxiraga olingan yer maydonlarini belgilangan tartibda elektron onlayn-auksion savdolariga chiqarish choralarini koʻrsin.

5. Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi doimiy foydalanish huquqi asosida ajratilgan yer maydonlarida toʻgʻridan-toʻgʻri muzokaralar natijalari boʻyicha aniqlanadigan xususiy sherik bilan davlat-xususiy sheriklik asosida avtoturargohlarni tashkil etish choralarini koʻrsin.

6. Oʻzbekiston Respublikasi Tashqi ishlar vazirligi Iqtisodiyot va moliya vazirligi huzuridagi Bojxona qoʻmitasi bilan birgalikda diplomatik kanallar orqali mazkur qarorga muvofiq amaliyotga joriy etilayotgan tartib toʻgʻrisida xorijiy davlatlarni xabardor etish choralarini koʻrsin.

7. Mazkur qarorning bajarilishini nazorat qilish Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi raisi A.Yu. Mavlonov zimmasiga yuklansin.

Vazirlar Mahkamasining 2025-yil 29-yanvardagi 44-son qaroriga 1-ILOVA

“Elektron navbat” avtomatlashtirilgan axborot tizimidan foydalangan holda, avtotransport vositalarining Davlat chegarasi orqali oʻtkazish punktidan harakatlanish tartibi toʻgʻrisida

1-bob. Umumiy qoidalar

1. Ushbu Nizom “Elektron navbat” avtomatlashtirilgan axborot tizimidan foydalangan holda, avtotransport vositalarining Davlat chegarasi orqali oʻtkazish punktidan (keyingi oʻrinlarda — oʻtkazish punkti) harakatlanish tartibini belgilaydi.

2. Mazkur Nizomda quyidagi asosiy tushunchalardan foydalaniladi:

avtotransport vositasi — avtomobil yoʻllari hamda ularda joylashgan oʻtkazish punktlari orqali tovarlar va yoʻlovchilarni tashishga moʻljallangan barcha turdagi avtotransport vositalari;

kutish zonasi — navbatlarni boshqarish tizimi joriy etilgan hamda mazkur Nizom talablariga javob beradigan avtoturargohlar yoki bojxona terminallari;

nazorat tartib-taomillari — davlat nazorati organlari tomonidan Davlat chegarasi orqali oʻtadigan shaxslar, transport vositalari va tovarlarga nisbatan oʻz vakolatlari doirasida amalga oshiriladigan chora-tadbirlar;

navbat varaqasi — mazkur Nizomga asosan transport vositasi uchun navbat olingan vaqtda taqdim etiladigan maxsus shtrix kod, ID-raqam va boshqa maʼlumotlar aks etgan elektron varaqa;

navbatlarni boshqarish tizimi — chegara oʻtkazish punktlari orqali respublika hududidan chiqib ketayotgan avtotransport vositalariga markazlashgan holda navbatlarni shakllantirish imkonini beruvchi “Elektron navbat” avtomatlashtirilgan axborot tizimi;

Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining yagona avtomatlashtirilgan axborot tizimi (keyingi oʻrinlarda — YAAAT) — bojxona chegarasi orqali olib oʻtiladigan tovar va transport vositalarining bojxona nazoratini amalga oshirish uchun ularga doir hujjatlar va maʼlumotlarning kiritilishini, hisobga olinishini hamda monitoring qilinishini nazarda tutuvchi Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining avtomatlashtirilgan axborot tizimi.

3. “Elektron navbat” avtomatlashtirilgan axborot tizimi joriy etilgan Davlat chegarasi orqali oʻtkazish punktidan avtotransport vositalari respublika hududidan chiqish yoʻnalishida faqatgina “Elektron navbat” avtomatlashtirilgan axborot tizimida qayd etilgan navbatlar asosida harakatlanadi.

4. Ushbu Nizomga muvofiq koʻrsatiladigan xizmatdan foydalanish uchun vakolatli shaxs Internet jahon axborot tarmogʻidan foydalangan holda, Bojxona qoʻmitasining rasmiy veb-sayti yoki navbatlarni boshqarish tizimi joriy etilgan kutish zonalarida navbat olishi mumkin.

5. Navbatlarni boshqarish tizimi orqali berilgan navbat varaqasi avtotransport vositasini oʻtkazish punktiga kiritish uchun asos boʻladi. Ushbu avtotransport vositasi navbatlarni boshqarish tizimida belgilangan vaqtda yetib kelmaganda, olingan elektron navbat oʻz kuchini yoʻqotadi.

Belgilangan vaqtda oʻtkazish punktiga yetib kelmagan avtotransport vositasi uchun takroran navbat olinishi mumkin. Takroran navbat umumbelgilangan tartibda olinadi.

2-bob. Navbatlarni boshqarish hamda muvofiqlashtirib borish

6. Navbatlar YAAAT orqali nazorat qilinadi, avtotransport vositasi va tashilayotgan tovarlardan kelib chiqib, YAAATdagi algoritm asosida muvofiqlashtirilib boriladi.

Bunda amaldagi qonunchilik hujjatlariga muvofiq Davlat chegarasidan ustuvor tartibda oʻtkaziladigan tovarlar va avtotransport vositalari inobatga olinadi.

7. Avtotransport vositasiga elektron navbat berishda YAAAT Bojxona qoʻmitasining idoralararo axborot almashinuv bazasida quyidagi maʼlumotlarning mavjudligini taqqoslaydi:

murojaat qilgan shaxsning maʼlumotlari;

murojaatda qayd etilgan transport vositasining maʼlumotlari;

murojaatda qayd etilgan transport vositasi va murojaatchining qidiruvda boʻlmasligi;

murojaatchiga rasmiylashtirilgan avtotransport vositasiga egalik qilish yoki undan foydalanish yoxud uni tasarruf etish huquqini beruvchi hujjatning mavjudligi;

fuqarolik-huquqiy javobgarlikning sugʻurtalanganligi;

murojaat qilgan shaxsda soliqlar, bojxona toʻlovlari va boshqa majburiy toʻlovlar boʻyicha qarzdorlikning mavjud emasligi;

taqdim etilgan mobil telefon raqamning mavjudligi.

Mazkur bandning ikkinchi , uchinchi va beshinchi xatboshilaridagi talablar xorijiy fuqarolarga nisbatan qoʻllanilmaydi.

8. Navbatlarni boshqarish tizimi orqali elektron navbat olgan avtotransport vositasi haydovchisi navbatlarni boshqarish tizimi tomonidan oʻtkazish punktiga borishi mumkin boʻlgan vaqtdan 20 daqiqadan avval navbatlarni boshqarish tizimi joriy etilgan kutish zonasiga yetib kelib, bu haqida kutish zonasi operatorini ogohlantirishi lozim. Agar mazkur bandda qayd etilgan muddatda elektron navbat olgan avtotransport vositasi navbatlarni boshqarish tizimi joriy etilgan kutish zonasiga yetib kelmasa olingan elektron navbat oʻz kuchini yoʻqotadi.

Elektron navbat olish uchun avtotransport vositalari maxsus tashkil etilgan kutish zonasiga joylashtirilganda, tegishli toʻlovlar undirilishi mumkin. Bunda undirilgan toʻlovlar quyidagi miqdorda navbatlarni boshqarish tizimi tomonidan avtomatik tarzda taqsimlanadi:

undirilgan toʻlovlarning 80 foizi kutish zonasi hisobiga;

undirilgan toʻlovlarning 20 foizi navbatlarni boshqarish tizimi operatoriga.

Agarda avtotransport vositasi haydovchisi navbatlarni boshqarish tizimi joriy etilgan kutish zonasi hududida 30 daqiqadan kam muddat turgan boʻlsa, ushbu davr uchun mazkur bandda koʻrsatilgan toʻlovlar undirilmaydi.

9. Olingan navbat buyurtma qilingan vaqtga qadar bekor qilinishi mumkin.

10. Amaldagi qonunchilik hujjatlarida oʻtkazish punktini ustuvor tartibda kesib oʻtishi belgilangan shaxslar, ular ketayotgan avtotransport vositalari elektron navbatdan foydalanmagan holda, ustuvor tartibda oʻtkazish punktiga kiritiladi.

11. Oʻtkazish punktida texnik, tabiiy va boshqa turdagi sabablarga koʻra jismoniy shaxslar va transport vositalarini nazoratdan oʻtkazish vaqtincha toʻxtatilgan taqdirda, elektron navbatlar oʻzgarmagan holda saqlanib qoladi hamda mutanosib ravishda ortga suriladi, bu toʻgʻrisida navbat olishda roʻyxatdan oʻtkazilgan telefon raqami yoki elektron pochta manziliga oʻzbek, rus va ingliz tillarida xabar yuboriladi.

Tabiiy ofat, yengib boʻlmas kuch taʼsirida yoki boshqa hollarda oʻtkazish punkti faoliyati toʻxtatilganda yoxud tugatilganda, mazkur oʻtkazish punktidan harakatlanish maqsadida olingan navbatlar bojxona organi tomonidan bekor qilinadi va bu toʻgʻrisida navbat olishda roʻyxatdan oʻtkazilgan telefon raqami yoki elektron pochta manziliga oʻzbek, rus va ingliz tillarida xabar yuboriladi.

3-bob. Navbatlarni boshqarish tizimi joriy etilgan kutish zonalariga qoʻyiladigan minimal talablar

12. Navbatlarni boshqarish tizimi joriy etiladigan kutish zonalari oʻtkazish punkti yaqinida yoki unga eltuvchi yoʻl boʻylarida tashkil etiladi va bir vaqtda kamida 100 ta avtotransport vositasini saqlash imkoniyatiga ega boʻlishi lozim.

13. Kutish zonalari hududida yuk ortilgan avtotransport vositalarining bojxona nazorati ostida saqlanishini taʼminlash maqsadida zarur shart-sharoit yaratiladi.

14. Navbatlarni boshqarish tizimi yoʻlga qoʻyiladigan kutish zonasiga qoʻyiladigan minimal talablar:

Oʻzbekiston Respublikasining qonunchilik hujjatlarida belgilangan texnik, sanitariya qoidalari va meʼyorlariga javob berishi;

yongʻin xavfsizligi talablariga mos boʻlgan yongʻinni oʻchirish tizimi qonunchilikda belgilangan hollarda yongʻin nazorati signalizatsiyalari va vositalariga ega boʻlishi;

transport vositalari va ularda tashilayotgan tovarlar hamda bojxona identifikatsiya vositalari butligi va xavfsizligini taʼminlash;

yoritish vositalari bilan toʻliq taʼminlanishi;

avtotransport vositalari manyovr qilishi uchun shart-sharoitlar boʻlishi;

zamonaviy tablo, monitor va belgilar bilan jihozlanishi;

kutish zonasi butun hududi perimetri balandligi 3 metrdan kam boʻlmagan qatʼiy oʻrnatilgan yaxlit toʻsiqlar bilan aylantirib toʻsilishi, avtotransport vositalari harakatlanishi va saqlanishi moʻljallangan hududlarga qattiq (asfalt/beton) qoplama yotqizilishi, suvni tindiradigan yomgʻir kanalizatsiyasi va axlat toʻplash uchun konteynerlar mavjudligi;

hududga kirish va undan chiqish uchun maxsus ajratilgan joylar mavjudligi. Kirish (chiqish) joylari yoʻl harakati xavfsizligi talablarini taʼminlash hisobga olingan holda ajratilishi kerak;

agar hudud bir necha qatorga joylashtiriladigan transport vositalarini saqlash imkonini bersa, u holda hudud ichida transport vositalarining xavfsiz harakatlanishi uchun polosalar ajratilishi kerak;

kirish (chiqish)ning ajratilgan joyiga nazoratchi operatorning xonasi tutashgan boʻlishi kerak, u yerda koʻrinarli joyda tashqi tomonga transport vositalarini saqlash xizmatlarini koʻrsatishning tariflari va shartlari toʻgʻrisida yirik harflarda (harflarning kattaligi kamida 3 sm boʻlishi kerak) maʼlumot joylashtiriladi;

nogironligi boʻlgan shaxslar uchun maxsus jihozlangan transport vositalari uchun kamida ikkita toʻxtash joyi mavjudligi;

bitta transport vositasining toʻxtash joyi uchun hisoblangan maydon 20 kv metrga teng deb qabul qilinadi;

binolar va saqlanayotgan transport vositalari oʻrtasidagi yongʻinga qarshi oraliq loyihalashtirish normalari talablariga muvofiq, biroq kamida 6 metr boʻlishi kerak;

avtotransport vositalarining kutish zonasiga yetib kelganligini tasdiqlash uchun maʼlumotlarni navbatlarni boshqarish tizimiga uzatish imkoniga ega boʻlgan, avtotransport vositasining davlat raqami belgisini aniqlash tizimi bilan jihozlanishi;

kutish zonasi hududi bojxona organlari tomonidan onlayn kuzatish va nazorat qilish imkonini beruvchi hamda uzluksiz videoyozuvlarning uch oy davomida saqlanishini taʼminlaydigan videokuzatuv tizimi bilan jihozlanishi;

kuzatuv kameralari, yoritish qurilmalari va boshqa tizimlarning doimiy ishlab turishini taʼminlovchi muqobil manbalar (elektr generator, quyosh batareyalari va boshqalar) bilan taʼminlanishi lozim.

Mazkur talablarga javob bergan kutish zonasida navbatlarni boshqarish tizimini joriy qilish boʻyicha ushbu qaror bilan tasdiqlangan yagona operator bilan shartnoma tuziladi. Ushbu shartnoma asosida yagona operator tomonidan kutish zonasiga “Elektron navbat” avtomatlashtirilgan axborot tizimi foydalanish uchun taqdim etiladi.

15. Navbatlarni boshqarish tizimi yoʻlga qoʻyiladigan kutish zonasida haydovchilar uchun sanitariya qoidalari va meʼyorlariga javob beradigan quyidagi minimal shart-sharoitlar yaratiladi:

dam olish xonasi;

ovqatlanish xonasi;

yuvinish xonasi;

savdo shoxobchalari;

birinchi tez tibbiy yordam koʻrsatish uchun zarur vositalar bilan taʼminlangan xona;

sanuzellar (erkaklar va ayollar uchun alohida);

avtotransport vositalarini birlamchi taʼmirlash imkoniyatiga ega ustaxona va avtoyuvish joylari, namozxona hamda bepul “Wi-Fi” hududlari.

16. Navbatlarni boshqarish tizimi yoʻlga qoʻyilgan kutish zonalari “Elektron navbat” avtomatlashtirilgan axborot tizimiga integratsiya qilingan elektron tablo va monitorlar hamda ularga eltuvchi yoʻlboʻylariga navbatlarni boshqarish tizimi joriy etilganligini bildiruvchi belgilar kutish zonalarini tashkil etgan xoʻjalik yurituvchi subyektlar tomonidan oʻrnatiladi.

4-bob. Navbatlarni boshqarish tizimi orqali oldindan navbat buyurtma qilish

17. Elektron navbat olish jarayoni ushbu Nizomga ilovadagi sxemaga muvofiq amalga oshiriladi.

18. Oldindan elektron navbat olish uchun jismoniy shaxs yoki yuridik shaxsning vakili Internet jahon axborot tarmogʻi orqali Bojxona qoʻmitasining rasmiy veb-saytida roʻyxatdan oʻtishi va elektron navbat olishi mumkin.

5-bob. Davlat nazorat organlari tomonidan nazorat tartib-taomillaridan oʻtkazish tartibi

19. Oʻtkazish punkti orqali elektron navbat asosida harakatlanayotgan avtotransport vositalari hamda ularda tashilayotgan tovarlar amaldagi normativ-huquqiy hujjatlar talablariga muvofiq nazorat tartib-taomillaridan oʻtkaziladi.

6-bob. Yakunlovchi qoida

20. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

“Elektron navbat” avtomatlashtirilgan axborot tizimidan foydalangan holda, avtotransport vositalarining Davlat chegarasi orqali oʻtkazish punktidan harakatlanish tartibi toʻgʻrisidagi nizomga ILOVA

“Elektron navbat” tizimidan foydalanish

Bosqichlar Subyektlar Tadbirlar Bajarish muddatlari 1-bosqich “Elektron navbat” avtomatlashtirilgan axborot tizimidan foydalanadigan shaxs 1. Tartib bilan tanishib chiqadi. 1. Xohishiga koʻra 2. “Elektron navbat” avtomatlashtirilgan axborot tizimidan foydalanish uchun Bojxona qoʻmitasining rasmiy veb-saytida roʻyxatdan oʻtadi. 2. Murojaat qilganda 2-bosqich “Elektron navbat” avtomatlashtirilgan axborot tizimidan foydalanadigan shaxs 1. Elektron soʻrovnoma bandlarini toʻldiradi. 2. E lektron navbat olish uchun oferta shartnomasi bilan tanishadi va tasdiqlaydi. Elektron navbat olayotganda 3-bosqich “Elektron navbat” avtomatlashtirilgan axborot tizimi 1. Tizimga yuborilgan elektron murojaat bandlaridagi maʼlumotlar toʻliq koʻrsatilganligi YAAATdagi formatli-mantiqiy nazoratdan oʻtkazadi. 2. YAAATdagi formatli-mantiqiy nazoratdan ijobiy oʻtgan murojaatni qabul qiladi, nomuvofiq boʻlganda shaxsga toʻgʻrilash uchun qaytaradi. Avtomatik ravishda 4-bosqich “Elektron navbat” avtomatlashtirilgan axborot tizimi 1. Qabul qilingan murojaat boʻyicha elektron navbatga qoʻyilganligi toʻgʻrisida maxsus shtrix kod aks etgan “Navbat varaqasi”ni yuboradi. Avtomatik ravishda 2. Elektron navbat olgan shaxs bojxona chegarasini kesib oʻtishi belgilangan vaqtga qadar olgan navbatini bekor qilishi mumkin. Oflayn ravishda

Vazirlar Mahkamasining 2025-yil 29-yanvardagi 44-son qaroriga 2-ILOVA

Jismoniy shaxslarning Davlat chegarasi orqali oʻtkazish punktidan harakatlanishida “Fast-track” xizmatidan foydalanish tartibi toʻgʻrisida

1-bob. Umumiy qoidalar

1. Ushbu Nizom jismoniy shaxslarning Davlat chegarasi orqali oʻtkazish punktidan (keyingi oʻrinlarda — oʻtkazish punkti) harakatlanishida “Fast-track” xizmatidan (keyingi oʻrinlarda — xizmat) foydalanish tartibini belgilaydi.

2. Ushbu Nizomga muvofiq koʻrsatiladigan xizmatdan foydalanish uchun jismoniy shaxslar yoki yuridik shaxsning vakili Bojxona qoʻmitasining rasmiy veb-sayti yoki elektron toʻlov tizimlari orqali harakatlanishdan oldin elektron yoki oʻtkazish punktiga harakatlanish chogʻida ogʻzaki ravishda murojaat qiladi.

3. Xizmatdan foydalanadigan shaxslar hamda ularning qoʻl yuki va bagajlari nazorati ushbu xizmat uchun ajratilgan alohida joylarda (yoʻlak, VIP zal va boshqalar) davlat nazorati organlari tomonidan navbatsiz amalga oshiriladi, mazkur xizmatdan foydalanayotgan jismoniy shaxslar navbati bundan mustasno.

4. Xizmatdan foydalanganlik uchun toʻlov 18 yoshga toʻlgan har bir jismoniy shaxs uchun navbat olinadigan kundagi bazaviy hisoblash miqdorining oʻn besh foizi miqdorida toʻlanadi, toʻlovlar ushbu xizmatdan foydalanishdan oldin mobil ilovalar orqali yoki oʻtkazish punktida mavjud tijorat banklari shoxobchasida amalga oshirilishi mumkin.

Xizmatdan foydalanuvchi shaxslar hamrohligida harakatlanayotgan 18 yoshga toʻlmagan shaxslar, shuningdek, kuzatuvchisiz harakatlana olmaydigan aqli zaif yoki jismoniy imkoniyati cheklangan (nogiron) jismoniy shaxslar ushbu xizmat uchun toʻlov toʻlamagan holda harakatlanadi.

5. Xizmatni kengaytirish hamda oʻtkazish punktlarida jismoniy shaxslarga qulay shart-sharoitlar yaratish uchun oʻtkazish punktlarini zamonaviy nazorat-texnik vositalar bilan taʼminlash maqsadida ushbu xizmatdan foydalanganlik uchun undiriladigan toʻlovlarning:

80 foizi — Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining Moddiy yordam, ijtimoiy himoya, bojxona organlarini rivojlantirish va koʻzda tutilmagan xarajatlar maxsus jamgʻarmasi hisobiga;

20 foizi — Davlat xavfsizlik xizmatining Chegara qoʻshinlari hisobiga oʻtkaziladi.

6. Xizmat doirasida jismoniy shaxslarga quyidagi qulayliklar yaratiladi:

avtotransport vositalarida Oʻzbekiston Respublikasi Davlat chegarasini kesib oʻtayotgan jismoniy shaxslarning navbatdan tashqari pasport va bojxona nazorati jarayonlarini tezlashtirgan tartibda amalga oshirish uchun alohida yoʻlak;

bank shoxobchasi;

ona-bola xonasi;

namozxona;

sanuzel (erkaklar va ayollar uchun alohida);

taom va ichimliklar xarid qilish burchagi (bar);

shaxslarning dam olishi va ovqatlanishi uchun “VIR” zal (yumshoq oʻrindiq va stol-stullar, televizor, bepul “Wi-Fi” hududlari hamda boshqalar bilan jihozlangan);

chegaradosh davlatlar, ularning geografik-etnik joylashuvi hamda oʻtkazish punktidagi mavjud shart-sharoitni inobatga olgan holda, jismoniy shaxslarga yanada qulay shart-sharoitlar yaratish maqsadida boshqa xonalar va xizmatlar tashkil etilishi mumkin.

Mazkur bandda nazarda tutilgan xizmatlarni tashkil etish bilan bogʻliq xarajatlar Davlat budjetidan ajratilgan mablagʻlar va (yoki) Bojxona qoʻmitasining budjetdan tashqari jamgʻarmasi hamda qonunchilikda taqiqlanmagan manbalar hisobidan moliyalashtiriladi.

2-bob. Xizmatdan foydalanishni bekor qilish va toʻlangan toʻlovlarni qaytarib olish tartibi

7. Jismoniy shaxslar oʻtkazish punkti orqali belgilangan harakatlanish vaqtiga qadar oʻtkazish punkti orqali harakatlanish uchun buyurtmani bekor qilishlari mumkin.

Buyurtma qilingan vaqtga qadar elektron navbat bekor qilinganda, amalga oshirilgan toʻlov murojaatda keltirilgan bank rekvizitlari yoki toʻlov kartalariga avtomatik tarzda qaytariladi. Ushbu Nizomning 10-bandida koʻrsatilgan holatlar bundan mustasno.

8. Toʻlangan toʻlov buyurtma qilingan vaqtga qadar buyurtma bergan shaxs tomonidan toʻlov qaytariladigan bank rekvizitlari, toʻlov kartalari hamda elektron navbatni bekor qilish sababini koʻrsatgan holda, Bojxona qoʻmitasining rasmiy veb-saytiga murojaat qilish orqali qaytariladi. Murojaat YAAATdagi formatli-mantiqiy nazoratdan ijobiy oʻtganda, toʻlangan toʻlov avtomatik qaytariladi.

9. Xizmatdan foydalanadigan shaxslar oʻtkazish punktida mavjud xizmatdan foydalanayotgan jismoniy shaxslarning navbati doirasida oʻtkaziladi.

10. Agarda oʻtkazish punktida yuzaga kelgan texnik, tabiiy va boshqa turdagi sabablarga koʻra jismoniy shaxslarni nazoratdan oʻtkazish vaqtincha toʻxtatilgan taqdirda, xizmatdan foydalanish uchun olingan varaqalar saqlanib qoladi.

Tabiiy ofat, yengib boʻlmas kuch taʼsirida yoki boshqa hollarda oʻtkazish punkti faoliyati toʻxtatilganda yoki yopilgan taqdirda, mazkur oʻtkazish punktidan harakatlanish maqsadida olingan navbatlar bojxona organi tomonidan bekor qilinadi va bu toʻgʻrisida navbat olishda roʻyxatdan oʻtkazilgan telefon raqami yoki elektron pochta manziliga oʻzbek, rus va ingliz tillarida xabar yuboriladi.

Bunday xollarda toʻlangan toʻlovlar navbat olgan jismoniy shaxslar tomonidan yuborilgan elektron ariza asosida ushbu Nizomga muvofiq qaytariladi.

3-bob. Xizmatdan foydalanish uchun zarur hujjatlar

11. Xizmatdan foydalanish imkoniyatiga ega boʻlish uchun jismoniy shaxs yoki yuridik shaxsning vakolat berilgan vakili Bojxona qoʻmitasining rasmiy veb-saytida quyidagi maʼlumotlarni koʻrsatgan holda, roʻyxatdan oʻtadi va toʻlovni amalga oshiradi:

jismoniy shaxs oʻzi va hamrohligidagi shaxslar toʻgʻrisidagi maʼlumotlar (F.I.O, telefon raqamlari);

jismoniy shaxs oʻzi va hamrohligidagi shaxsning shaxsini tasdiqlovchi hujjati toʻgʻrisidagi (pasport yoki tugʻilganlik toʻgʻrisidagi guvohnoma raqami, berilgan sanasi) maʼlumotlar;

jismoniy shaxs oʻzi va hamrohligidagi shaxsning tugʻilgan sanasi;

xizmatdan foydalanishning taxminiy vaqti (oʻtkazish punktini kesib oʻtish sanasi) toʻgʻrisidagi maʼlumotlar;

aynan qaysi oʻtkazish punkti orqali harakatlanishi;

oʻtkazish punktini kesib oʻtishda taqdim etilishi zarur boʻlgan boshqa hujjatlar toʻgʻrisidagi maʼlumotlar.

12. Taqdim etilgan maʼlumotlar notoʻgʻri yoki buzib koʻrsatilganligi aniqlangan taqdirda, ushbu Nizomning 15-bandiga muvofiq murojaat rad etiladi.

Bunday hollarda shaxslar xizmatdan foydalanish uchun takroran murojaat etishlari mumkin.

Xizmatdan foydalanishda soʻrovnoma maʼlumotlaridagi xatoliklar xizmatdan foydalanish vaqtiga qadar oʻzgartirilishi yoki ularga qoʻshimchalar kiritilishi mumkin.

4-bob. Xizmatdan foydalanish tartibi

13. Xizmatdan foydalanish jarayoni ushbu Nizomga ilovadagi sxemaga muvofiq amalga oshiriladi.

14. Xizmatdan foydalanish uchun Bojxona qoʻmitasining rasmiy veb-sayti yoki elektron toʻlov tizimlari orqali roʻyxatdan oʻtib va toʻlovni amalga oshirib, xizmatdan foydalanish uchun navbat olish mumkin.

15. Bojxona qoʻmitasining rasmiy veb-sayti yoki toʻlov tizimlari orqali murojaatga kiritilgan maʼlumotlar avtomatik tarzda YAAATdagi formatli-mantiqiy nazoratdan oʻtadi va nomuvofiqliklar aniqlangan taqdirda, murojaat rad etiladi.

YAAATdagi formatli-mantiqiy nazoratdan ijobiy oʻtgan murojaatlar belgilangan toʻlovlar toʻlanganidan soʻng inson omilisiz xizmatdan foydalanish navbatiga qoʻshiladi va soʻrovnoma avtomatik tarzda vakolatli organga kelib tushadi, foydalanuvchiga maxsus shtrix kodli elektron koʻrinishdagi xizmatdan foydalanish varaqasi oʻzbek, rus va ingliz tillarida avtomatik tarzda shakllanadi va taqdim etiladi.

Xizmatdan foydalanish uchun olingan elektron navbat bir martalik hisoblanib, navbat olingan kundan eʼtiboran bir yil davomida amal qiladi.

16. Xizmatdan foydalanish uchun oʻtkazish punktiga kelgandan soʻng murojaat qilinganda, shaxslar oʻtkazish punktlarida mavjud tijorat banklari shoxobchalari orqali toʻlovni amalga oshiradi va toʻlov varaqasi asosida harakatlanadilar.

Turli sabablarga koʻra xizmatdan foydalanish uchun toʻlov amalga oshirilmagan taqdirda, shaxslar ortga qaytariladi va umumiy belgilangan tartibda oʻtkaziladi.

5-bob. Xizmatdan foydalanadigan shaxslarni davlat nazorat organlari tomonidan nazorat tartib-taomillaridan oʻtkazish tartibi

17. Xizmatdan foydalangan holda harakatlanadigan shaxslar hamda ular harakatlanadigan avtotransport vositasi oʻtkazish punkti hududiga ustuvor tartibda kiritiladi.

Xizmatdan foydalangan holda harakatlanadigan shaxs oʻz boshqaruvidagi avtotransport vositasida elektron navbatga moʻljallagan alohida yoʻlaklar orqali harakatlanishi mumkin.

18. Oʻtkazish punkti orqali xizmatdan foydalangan holda oʻtadigan shaxslar va ular tomonidan olib oʻtiladigan tovarlar hamda transport vositalari amaldagi normativ-huquqiy hujjatlar talablariga muvofiq tegishli nazorat tartib-taomillaridan oʻtkaziladi.

19. Oʻtkazish punkti orqali xizmatdan foydalangan holda harakatlanadigan shaxslar hamda ularning qoʻl yuki va bagajlari nazorat tartib-taomillaridan tezkor ravishda quyidagi ustuvor tartibda oʻtkaziladi:

a) bojxona organlari tomonidan xizmatdan foydalanish uchun Bojxona qoʻmitasining rasmiy veb-sayt orqali toʻldirilgan soʻrovnoma asosida tegishli maʼlumotlar hamda xizmatdan foydalanish uchun toʻlanishi lozim boʻlgan toʻlovlar toʻlanganligi tekshiriladi;

b) chegara nazorati boʻlinmalari tomonidan Davlat chegarasini kesib oʻtish huquqini beruvchi hujjatlar mavjudligi tekshiriladi va pasport nazoratidan oʻtkaziladi;

v) sanitariya-karantin boʻlinmasi tomonidan nazoratdan oʻtkaziladi;

g) bojxona nazoratidan oʻtkazish jarayonida bojxona organlari fitosanitariya va veterinariya nazorati organlarining quyidagi vazifalarini ham amalga oshiradi:

fitosanitariya va veterinariya nazorati predmetlari mavjudligi toʻgʻrisida ogʻzaki soʻrovni amalga oshirish;

fitosanitariya va veterinariya nazorati talab qilinadigan tovarlarni olib oʻtish uchun ruxsat etuvchi hujjatlar mavjudligini oʻrganish;

qoʻl yuki va bagajni nazorat qilish jarayonida fitosanitariya va veterinariya nazorati obyektlari hamda olib oʻtilishi taqiqlangan tovarlarning mavjudligini nazorat texnik vositalari yordamida koʻzdan kechirish;

fitosanitariya va veterinariya nazorati obyektlarining hujjatlari nazoratini amalga oshirish.

Yoʻlovchilarning qoʻl yuki va bagajini bojxona nazoratidan oʻtkazish jarayonida bojxona organi tomonidan fitosanitariya hamda veterinariya nazoratiga tushadigan obyektlar aniqlanganda, nazorat tartib-taomillarini amalga oshirish uchun tegishli davlat nazorat organi jalb qilinadi. Ushbu holatda bojxona organining talabiga asosan fitosanitariya va veterinariya nazorati xodimlari bojxona nazorati jarayonida ishtirok etadi.

20. Xizmatdan foydalangan holda ustuvor tartibda harakatlanayotgan shaxslar tomonidan qonunchilik hujjatlarining buzilish holatlari aniqlanganda, amaldagi qonunchilik hujjatlariga muvofiq ular javobgarlikka tortiladi, bunday hollarda xizmatdan foydalanish uchun toʻlangan toʻlov summasi qaytarilmaydi.

6-bob. Yakunlovchi qoida

21. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Jismoniy shaxslarning Davlat chegarasi orqali oʻtkazish punktidan harakatlanishida “Fast-track” xizmatidan foydalanish tartibi toʻgʻrisidagi nizomga ILOVA

Davlat chegarasini “Fast-track” xizmatidan foydalangan holda kesib oʻtish

Bosqichlar Subyektlar Tadbirlar Bajarish muddatlari 1-bosqich Xizmatdan foydalanadigan shaxs 1. Xizmat dan foydalanish uchun Bojxona qoʻmitasining rasmiy veb-saytda roʻyxatdan oʻtadi. 1. Xohishiga koʻra 2. Tartib bilan tanishib chiqadi. 2. Murojaat qilganda 2-bosqich Xizmatdan foydalanadigan shaxs 1. Murojaat bandlarini soʻralgan maʼlumotlar bilan toʻldiradi. 2. Xizmat dan foydalanish uchun oferta shartnoma bilan tanishadi va tasdiqlaydi. 3. Toʻlanishi lozim boʻlgan t oʻlovni toʻlaydi va murojaatni vakolatli organlar koʻrib chiqishi uchun yuboradi. Murojaat qilganda 3-bosqich Vakolatli organ 1. Yuborilgan murojaat bandlaridagi maʼlumotlar toʻgʻri shakllantirilganligi va toʻlov summasi toʻliq toʻlanganligi tizim tomonidan avtomatik tarzda YAAATdagi formatli-mantiqiy nazoratdan oʻtkaziladi. 2. YAAATdagi formatli-mantiqiy nazoratdan ijobiy oʻtkazilgan murojaatni qabul qiladi, nomuvofiq boʻlganda toʻgʻrilash uchun qaytaradi. 3. Qabul qilingan qaror toʻgʻrisida murojaatchiga Bojxona qoʻmitasining rasmiy veb-sayti orqali rad etilganligi sabablari koʻrsatilgan holda, onlayn rejimda avtomatik tarzda javob qaytaradi. Avtomatik ravishda 4-bosqich Xizmatdan foydalanish uchun toʻlangan toʻlovni qaytarish 1. Bojxona qoʻmitasining rasmiy veb-saytida elektron ariza bandlari toʻldiriladi. 2 . Xizmat dan foydalanish uchun toʻlangan toʻlovni qabul qiluvchi bank rekvizitlari, toʻlov kartalari raqami aniq koʻrsatiladi va murojaat yuboriladi. 3. Murojaat YAAATdagi formatli-mantiqiy nazoratdan ijobiy oʻtganda, toʻlangan toʻlov avtomatik qaytariladi. Avtomatik ravishda

Vazirlar Mahkamasining 2025-yil 29-yanvardagi 44-son qaroriga 3-ILOVA

“Elektron navbat” avtomatlashtirilgan axborot tizimi birinchi navbatda joriy etiladigan Davlat chegarasi orqali oʻtkazish punktlari

T /r Chegara bojxona posti joylashgan hudud Chegaradosh davlat Chegara bojxona posti Chegara oʻtkazish punkti 1. Qoraqalpogʻiston Respublikasi Qozogʻiston Dovut-ota Daut-Ata 2. Andijon viloyati Qirgʻiziston Doʻstlik Doʻstlik 3. Buxoro viloyati Turkmaniston Olot Olot 4. Sirdaryo viloyati Qozogʻiston Sirdaryo Guliston 5. Surxondaryo viloyati Afgʻoniston Ayritom Termiz 6. Surxondaryo viloyati Tojikiston Sariosiyo Sariosiyo 7. Toshkent viloyati Qozogʻiston Yallama Yallama 8. Toshkent viloyati Qozogʻiston S. Najimov Toshkent 9. Toshkent viloyati Qozogʻiston Navoiy Zangiota 10. Toshkent viloyati Qozogʻiston Gʻishtkoʻprik Gʻishtkoʻprik 11. Toshkent viloyati Tojikiston Oybek Oybek 12. Fargʻona viloyati Qirgʻiziston Oʻzbekiston Oʻzbekiston

Oʻzbekiston Respublikasining Bosh vaziri A. ARIPOV

Toshkent sh.,

2025-yil 29-yanvar,

44-son

(Qonunchilik maʼlumotlari milliy bazasi, 03.02.2025-y., 09/25/44/0101-son)

lex.uz