📅 2025-yil 31-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 31 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 31 января 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 31 January 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Электродвигателга эга бўлган транспорт воситалари аккумулятор батареяларини утилизация қилиш инфратузилмасини ташкил этиш ишларини молиялаштириш бўйича қўшимча чора-тадбирлар тўғрисида
Мамлакатимизда «яшил» технологиялардан фойдаланишни кенгайтириш, электромобилларнинг яроқсиз ҳолга келиб қолган батареяларини атроф-муҳитга кескин зарар етказмаган ҳолда утилизация қилинишини таъминлаш ҳамда соҳада маҳаллийлаштириш ишларини янада жадаллаштириш мақсадида Вазирлар Маҳкамаси қарор қилади:
1. Ўзбекистон Республикаси Инвестициялар, саноат ва савдо вазирлиги, Иқтисодиёт ва молия вазирлиги, Экология, атроф-муҳитни муҳофаза қилиш ва иқлим ўзгариши вазирлигининг мазкур қарор кучга кирган кундан эътиборан электродвигателга эга бўлган транспорт воситалари (ТИФ ТН коди 8703 80) (кейинги ўринларда — электромобиллар) нисбатан утилизация йиғими миқдорларини:
ишлаб чиқарилган муддатидан бошлаб 3 йилдан ортиқ бўлмаган электромобиллар учун базавий ҳисоблаш миқдорининг 120 баравари;
ишлаб чиқарилган муддатидан бошлаб 3 йилдан ортиқ бўлган электромобиллар учун базавий ҳисоблаш миқдорининг 210 баравари этиб белгилаш тўғрисидаги таклифлари маъқуллансин.
2. Ўзбекистон Республикаси Иқтисодиёт ва молия вазирлиги Инвестициялар, саноат ва савдо вазирлиги билан биргаликда икки ой муддатда ушбу қарорда белгиланган утилизация йиғимларини йиғиш ҳамда улардан самарали фойдаланиш тартибини ишлаб чиқсин.
3. Вазирлар Маҳкамасининг 2020 йил 2 июндаги 347-сон қарори билан тасдиқланган Утилизация йиғимининг миқдорлари ва утилизация йиғими тўланадиган ғилдиракли транспорт воситалари, ўзиюрар машиналар ва уларнинг тиркамаларининг турлари ва тоифалари рўйхатининг «III. М1 тоифали транспорт воситалари, шу жумладан юқори ўтувчан G тоифали транспорт воситалари: енгил автомобиллар» блоки «Электродвигателга эга бўлган транспорт воситалари, гибрид қувватли транспорт воситалари бундан мустасно» позицияси «Транспорт воситалари, ўзиюрар машиналар ва ускуналарга нисбатан утилизация йиғими миқдорлари (БҲМда)» устунидаги «30» ва «90» рақамлари тегишлича «120» ва «210» рақамлари билан алмаштирилсин.
4. Мазкур қарор 2025 йил 1 майдан эътиборан кучга киради.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2025 йил 31 январь,
52-сон
Oʻzbekiston Respublikasi Vazirlar Mahkamasining
qarori
Elektrodvigatelga ega boʻlgan transport vositalari akkumulyator batareyalarini utilizatsiya qilish infratuzilmasini tashkil etish ishlarini moliyalashtirish boʻyicha qoʻshimcha chora-tadbirlar toʻgʻrisida
Mamlakatimizda “yashil” texnologiyalardan foydalanishni kengaytirish, elektromobillarning yaroqsiz holga kelib qolgan batareyalarini atrof-muhitga keskin zarar yetkazmagan holda utilizatsiya qilinishini taʼminlash hamda sohada mahalliylashtirish ishlarini yanada jadallashtirish maqsadida Vazirlar Mahkamasi qaror qiladi:
1. Oʻzbekiston Respublikasi Investitsiyalar, sanoat va savdo vazirligi, Iqtisodiyot va moliya vazirligi, Ekologiya, atrof-muhitni muhofaza qilish va iqlim oʻzgarishi vazirligining mazkur qaror kuchga kirgan kundan eʼtiboran elektrodvigatelga ega boʻlgan transport vositalari (TIF TN kodi 8703 80) (keyingi oʻrinlarda — elektromobillar) nisbatan utilizatsiya yigʻimi miqdorlarini:
ishlab chiqarilgan muddatidan boshlab 3 yildan ortiq boʻlmagan elektromobillar uchun bazaviy hisoblash miqdorining 120 baravari;
ishlab chiqarilgan muddatidan boshlab 3 yildan ortiq boʻlgan elektromobillar uchun bazaviy hisoblash miqdorining 210 baravari etib belgilash toʻgʻrisidagi takliflari maʼqullansin.
2. Oʻzbekiston Respublikasi Iqtisodiyot va moliya vazirligi Investitsiyalar, sanoat va savdo vazirligi bilan birgalikda ikki oy muddatda ushbu qarorda belgilangan utilizatsiya yigʻimlarini yigʻish hamda ulardan samarali foydalanish tartibini ishlab chiqsin.
3. Vazirlar Mahkamasining 2020-yil 2-iyundagi 347-son qarori bilan tasdiqlangan Utilizatsiya yigʻimining miqdorlari va utilizatsiya yigʻimi toʻlanadigan gʻildirakli transport vositalari, oʻziyurar mashinalar va ularning tirkamalarining turlari va toifalari roʻyxatining “III. M1 toifali transport vositalari, shu jumladan yuqori oʻtuvchan G toifali transport vositalari: yengil avtomobillar” bloki “Elektrodvigatelga ega boʻlgan transport vositalari, gibrid quvvatli transport vositalari bundan mustasno” pozitsiyasi “Transport vositalari, oʻziyurar mashinalar va uskunalarga nisbatan utilizatsiya yigʻimi miqdorlari (BHMda)” ustunidagi “30” va “90” raqamlari tegishlicha “120” va “210” raqamlari bilan almashtirilsin.
4. Mazkur qaror 2025-yil 1-maydan eʼtiboran kuchga kiradi.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 31-yanvar,
52-son