UzbekAI

Ўзбекистон Республикаси Вазирлар Маҳкамасининг

қарори

НИЗОМ

Маърифий фаолиятни амалга ошириш тартиби тўғрисидаги низомни тасдиқлаш ҳақида

Ўзбекистон Республикасининг «Таълим тўғрисида»ги Қонунига мувофиқ, шунингдек, фуқароларнинг шахсий, интеллектуал ва маънавий ривожланишга бўлган эҳтиёжларини қондириш, мамлакатимизда маърифий фаолиятни амалга оширишнинг ҳуқуқий асосларини яратиш, ушбу соҳа иштирокчилари фаолият кўрсатишининг аниқ тартибини белгилаш мақсадида Вазирлар Маҳкамаси қарор қилади:

1. Қуйидагиларни назарда тутувчи Маърифий фаолиятни амалга ошириш тартиби тўғрисидаги низом 1-иловага мувофиқ тасдиқлансин:

маърифий фаолиятни амалга оширишнинг ташкилий-ҳуқуқий шакллари ҳамда ушбу фаолиятни амалга оширувчиларга нисбатан қўйиладиган талаблар;

маърифий фаолиятни амалга ошириш шакллари (маъруза, тақдимот, семинар, маҳорат дарси, курс, лекция, марафон, давра суҳбатлари ҳамда қонунчиликда тақиқланмаган бошқа шаклларда, бевосита ёки онлайн, якка тартибда ёки гуруҳларда, пулли ёки бепул);

маърифий фаолиятни амалга ошириш тартиби, шу жумладан, ушбу фаолият тингловчилари орасида вояга етмаган шахс мавжуд бўлса, мажбурий тартибда маърифий фаолият дастурини ишлаб чиқиш талаби;

маърифий фаолият иштирокчиларининг ҳуқуқлари, мажбуриятлари ва маърифий фаолиятни амалга оширишда тақиқланадиган хатти-ҳаракатлар.

2. Белгилансинки:

маърифий фаолият билан юридик шахс ташкил этиб ёки якка тартибдаги тадбиркор сифатида рўйхатдан ўтиб шуғулланиш мумкин;

маърифий фаолият билан ёзма ёки электрон шаклда тузиладиган шартномага мувофиқ пулли асосда шуғулланилади;

маърифий фаолият тадбирлари 100 нафар ва ундан кўп кишиларнинг иштирокидаги гуруҳларда Вазирлар Маҳкамасининг 2014 йил 29 июлдаги 205-сон қарори билан тасдиқланган Оммавий тадбирларни ўтказиш қоидаларига мувофиқ ўтказилади;

ўн тўрт ёшдан кичик шахсларнинг маърифий фаолият тадбирларида тингловчи сифатида иштирок этишларига уларнинг ота-онаси (қонуний вакиллари) ёзма розилиги билан йўл қўйилади.

3. Манфаатдор вазирлик ва идоралар ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.

4. Ўзбекистон Республикаси Ҳукуматининг 2-иловага мувофиқ айрим қарорларига қўшимчалар киритилсин.

5. Мазкур қарорнинг бажарилишини назорат қилиш Вазирлар Маҳкамасининг «Маҳалла еттилиги», ёшлар сиёсати ва маънавият масалалари департаментига юклансин.

Вазирлар Маҳкамасининг 2025 йил 11 февралдаги 76-сон қарорига 1-ИЛОВА

Маърифий фаолиятни амалга ошириш тартиби тўғрисида

1-боб. Умумий қоидалар

1. Ушбу Низом маърифий фаолиятни амалга ошириш тартиби ва шаклларини белгилайди.

2. Мазкур Низомнинг амал қилиши давлат органлари, таълим, илмий ва диний ташкилотлар томонидан маърифий фаолият билан боғлиқ тадбирларни ўтказишга нисбатан татбиқ этилмайди.

3. Ушбу Низомда қуйидаги асосий тушунчалар қўлланилади:

маърифий фаолият — инсонни шахсий, интеллектуал ва маънавий ривожлантириш, ижтимоий ва иқтисодий фаоллигини ошириш, интеллектуал ва ижодий салоҳиятини намоён этиш, индивидуал салоҳияти, имкониятлари, коммуникатив қобилиятларини яхшилаш учун зарур кўникма ва малакани шакллантиришга қаратилган ҳамда давлат таълим стандартлари билан қамраб олинмайдиган фаолият тури;

маърифий фаолият дастури — маърифий фаолиятни амалга оширишнинг мақсади ва мазмуни, вазифалари, муддатлари, шакллари ва жойлари, ўқув фаолиятини ташкил этувчи ҳамда уни амалга оширишда иштирок этадиган шахслар тўғрисидаги маълумотларни ва мазкур дастурни молиялаштириш манбаларини акс эттирувчи ҳужжат;

маърифий фаолият тингловчиси — ўзининг шахсий, ижтимоий ва иқтисодий фаоллигини янада ошириш, ижодий ва интеллектуал қобилиятини намоён этиш, индивидуал салоҳияти, имконияти, коммуникатив қобилиятини ривожлантириш учун маърифий фаолиятда иштирок этувчи шахслар.

4. Маърифий фаолият республика ва маҳаллий ижро этувчи ҳокимият органлари, фуқароларнинг ўзини ўзи бошқариш органлари, юридик шахслар ёки якка тартибдаги тадбиркор сифатида рўйхатдан ўтган жисмоний шахслар (кейинги ўринларда — маърифий фаолиятни амалга оширувчилар) томонидан Ўзбекистон Республикасининг қонунчилик ҳужжатларида ва ушбу Низомда назарда тутилган талабларга мувофиқ амалга оширилади.

5. Маърифий фаолиятни амалга оширувчилар ушбу фаолият давомида бошқа фаолият турларини ҳам амалга оширса, мазкур фаолият турлари учун қонунчилик ҳужжатларида белгиланган талабларга (лицензия, рухсатнома, малака сертификатига эга бўлиш ва бошқалар) риоя этиши шарт.

2-боб. Маърифий фаолиятни амалга ошириш шакллари ва тартиби

6. Маърифий фаолият:

маъруза, тақдимот, семинар, маҳорат дарси, курс, лекция, марафон, давра суҳбатлари ҳамда қонунчилик ҳужжатларида тақиқланмаган бошқа шаклларда;

анъанавий (бевосита) ёки ахборот-коммуникация технологияларидан фойдаланган ҳолда (онлайн);

якка тартибда ёки гуруҳларда;

пулли ёки бепул асосда амалга оширилиши мумкин.

7. Маърифий фаолият тадбирлари 100 ва ундан кўп кишиларнинг иштирокидаги гуруҳларда Вазирлар Маҳкамасининг 2014 йил 29 июлдаги 205-сон қарори билан тасдиқланган Оммавий тадбирларни ўтказиш қоидаларига мувофиқ ўтказилиши керак.

8. Маърифий фаолият пулли асосда ёзма ёки электрон шаклда тузиладиган шартномага мувофиқ амалга оширилади.

Маърифий фаолиятни амалга ошириш ҳақидаги шартномада тарафларнинг номи, манзили, уларнинг ҳуқуқ ва мажбуриятлари, жавобгарлиги, тўловни амалга ошириш тартиби, маърифий фаолиятнинг шакли, низоларни ҳал қилиш, шартномани бекор қилиш тартиби, сифатсиз ёки тўлиқ бўлмаган маърифий фаолият учун тўловни тўлиқ ёки қисман қайтариш шартлари ва муддатлари ҳамда бошқа маълумотлар кўрсатилади.

9. Ўн тўрт ёшдан кичик шахсларнинг маърифий фаолият тадбирларида тингловчи сифатида иштирок этишларига уларнинг ота-онаси (қонуний вакиллари) ёзма розилиги билан йўл қўйилади.

3-боб. Маърифий фаолият иштирокчиларининг ҳуқуқ ва мажбуриятлари

10. Маърифий фаолиятни амалга оширувчилар қуйидаги ҳуқуқларга эга:

ўзини ўзи банд қилган шахс сифатида рўйхатдан ўтиш;

ўз шаъни, қадр-қиммати ва ишчанлик обрўсини ҳимоя қилиш;

маърифий фаолиятни ахборот-коммуникация технологияларидан фойдаланган ҳолда амалга ошириш;

маърифий фаолиятнинг ушбу Низомнинг 6-бандида белгиланган шаклларини мустақил танлаш;

маърифий фаолият пулли асосда амалга оширилганда, тўлов миқдорини мустақил белгилаш ҳамда ушбу фаолият учун шартномага мувофиқ ҳақ олиш;

республика ва маҳаллий ижро этувчи ҳокимият органларидан маърифий фаолиятни амалга ошириш учун зарур бўлган ахборотни, шу жумладан, статистика маълумотларини белгиланган тартибда сўраш ва олиш;

маърифий фаолият тингловчиларини маърифий фаолиятни амалга оширишда зарур материаллар билан таъминлаш.

Маърифий фаолиятни амалга оширувчилар қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

11. Маърифий фаолиятни амалга оширувчилар:

маърифий фаолият тингловчиларига ушбу фаолият ҳақида ахборот тақдим этиши, шунингдек, уларнинг талабига кўра ўз маълумоти ва малакасини тасдиқлайдиган ҳужжатларни (мавжуд бўлса) тақдим этиши;

маърифий фаолият тингловчиларига нисбатан инсоний муомалада бўлиши, уларнинг шаъни, қадр-қиммати ва ишчанлик обрўсини ҳурмат қилиши;

қонунчилик ҳужжатларида белгиланган солиқларни ва бошқа мажбурий тўловларни ўз вақтида тўлаши;

қонунчилик ҳужжатларида, шу жумладан, ушбу Низомнинг 12-бандида белгиланган тақиқ ва чекловларга риоя этиши;

маърифий фаолият тингловчиларига нисбатан тазйиқ ўтказмаслиги ҳамда жисмоний ва (ёки) руҳий зўравонлик ишлатмаслиги;

маърифий фаолиятни ҳақ эвазига амалга оширганда, маърифий фаолият тингловчиси билан ёзма ёки электрон шаклда шартнома тузиши лозим.

Маърифий фаолиятни амалга оширувчилар зиммасига қонунчилик ҳужжатларига мувофиқ бошқа мажбуриятлар ҳам юкланиши мумкин.

12. Маърифий фаолиятни амалга оширувчиларга қуйидагилар тақиқланади:

Ўзбекистон Республикасининг амалдаги конституциявий тузумини, ҳудудий яхлитлигини зўрлик билан ўзгартиришга, оммавий тартибсизликларга, ноқонуний йиғилишлар, митинглар, кўча юришлари ва намойишларда иштирок этишга даъват қилиш;

давлат сирларини ёки қонун билан қўриқланадиган бошқа сирни ташкил этувчи маълумотларни ошкор этиш;

уруш, терроризм, экстремизм, сепаратизм ва фундаментализм ғояларини, порнография, зўравонлик, шафқатсизликни ёки ижтимоий ахлоққа зид қарашларни тарғиб қилиш;

алкоголли ва тамаки маҳсулотларини, гиёҳвандлик воситаларини, уларнинг аналогларини, психотроп моддаларни ёки ақл-иродага таъсир этувчи бошқа моддаларни истеъмол қилишни тарғиб қилиш;

виждон эркинлиги ва диний ташкилотлар тўғрисидаги қонунчилик талабларини бузиш, шу жумладан, диний таълимотдан сабоқ бериш, диний ақида ва ғояларни тарғиб қилиш, диний мазмундаги материалларни тарқатиш, муайян динга устуворлик бериш ёхуд камситиш;

жинс бўйича камситиш ёки давлат рамзларига нисбатан ҳурматсизлик қилиш;

жамоат тартибига ёки хавфсизлигига таҳдид солувчи, миллий, ирқий, этник ёки диний адоват қўзғатувчи, фуқароларнинг шаъни ва қадр-қимматига ёки ишчанлик обрўсига путур етказувчи, шунингдек, ҳақоратли сўзларни ўз ичига олган ахборотни тарқатиш;

маърифий фаолиятни амалга оширишда ҳақиқатга тўғри келмайдиган ва ёлғон маълумотлардан фойдаланиш;

ҳуқуқбузарлик ёки жиноятни содир этишга, ўз жонига суиқасд қилишга, қимор ва таваккалчиликка асосланган бошқа ўйинлар, фоҳишалик, тиланчилик ёки ғайриижтимоий хатти-ҳаракатнинг бошқа шакллари билан шуғулланишга даъват қилиш;

одамларга ёки ҳайвонларга нисбатан зўравонлик ва шафқатсизлик қилиш мумкинлигини асослаш ёки оқлаш ёхуд шундай ҳаракатларни амалга оширишга ундаш;

фуқароларни уларнинг ҳаётига ва (ёки) соғлиғига ёхуд ўзга шахсларнинг ҳаётига ва (ёки) соғлиғига таҳдид солувчи ғайриҳуқуқий ҳаракатларни содир этишга ундаш ёки бошқача тарзда жалб қилиш;

маърифий фаолиятда вояга етмаганлар иштирок этганда, жинсий муносабатларни тасвирлаш ёки баён этиш ёхуд уларда қўрқув, ваҳима ёки саросима уйғотадиган ахборотни тарқатиш.

13. Маърифий фаолият тингловчилари қуйидаги ҳуқуқларга эга:

маърифий фаолиятни амалга оширувчилар томонидан ўзига нисбатан инсоний ва ҳурмат билан муносабат кўрсатилишини талаб қилиш;

маърифий фаолиятни амалга оширувчининг маълумоти ва малакасини тасдиқлайдиган ҳужжатлар (мавжуд бўлса) билан танишиш;

маърифий фаолиятда иштирок этиш, маърифий фаолиятни амалга оширувчилардан маърифий фаолиятга оид зарур материалларни сўраш ва олиш;

шартномада кўрсатилган шаклларда ва тартибда маърифий фаолиятни амалга оширишда иштирок этиш.

Маърифий фаолият тингловчилари қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

14. Маърифий фаолият тингловчилари:

маърифий фаолият даврида маърифий фаолиятни амалга оширувчилар билан ўзаро ҳурматга асосланган муносабатда бўлиши;

маърифий фаолиятни амалга оширувчиларнинг шаъни, қадр-қиммати ва ишчанлик обрўсини ҳурмат қилиши;

маърифий фаолиятни амалга оширувчилар билан тузилган шартномага мувофиқ ҳақ тўлаши шарт.

Маърифий фаолият тингловчилари зиммасига қонунчилик ҳужжатлари ва шартномага мувофиқ бошқа мажбуриятлар ҳам юкланиши мумкин.

4-боб. Якунловчи қоида

15. Мазкур Низом талаблари бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.

Вазирлар Маҳкамасининг 2025 йил 11 февралдаги 76-сон қарорига 2-ИЛОВА

Ўзбекистон Республикаси Ҳукуматининг айрим қарорларига киритилаётган қўшимчалар

1. Вазирлар Маҳкамасининг 2011 йил 7 январдаги 6-сон қарори билан тасдиқланган Якка тартибдаги тадбиркорлар шуғулланиши мумкин бўлган фаолият турлари рўйхати қуйидаги мазмундаги 91-позиция билан тўлдирилсин:

«маърифий фаолиятни амалга ошириш».

2. Вазирлар Маҳкамасининг 2014 йил 29 июлдаги 205-сон қарори билан тасдиқланган Оммавий тадбирларни ўтказиш қоидаларининг 3-банди учинчи хатбошиси «маданий-оммавий» сўзларидан кейин «маърифий» сўзи билан тўлдирилсин.

3. Вазирлар Маҳкамасининг 2022 йил 22 февралдаги 86-сон қарори билан тасдиқланган Махсус электрон тизим орқали рухсат этиш хусусиятига эга айрим ҳужжатларни бериш тартиб-таомиллари тўғрисидаги ягона низом 11-иловага мувофиқ Оммавий тадбирларни ўтказиш учун рухсатнома паспортининг 5-позицияси «маърифий фаолият кўрсатиш ҳақида шартнома тузилганлиги тўғрисидаги маълумотлар (маърифий фаолият кўрсатиш бўйича тадбир ўтказилаётганда)» сўзлари билан тўлдирилсин.

Ўзбекистон Республикасининг Бош вазири А. АРИПОВ

Тошкент ш.,

2025 йил 11 февраль,

76-сон

(Қонунчилик маълумотлари миллий базаси, 11.02.2025 й., 09/25/76/0124-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Maʼrifiy faoliyatni amalga oshirish tartibi toʻgʻrisidagi nizomni tasdiqlash haqida

Oʻzbekiston Respublikasining “Taʼlim toʻgʻrisida”gi Qonuniga muvofiq, shuningdek, fuqarolarning shaxsiy, intellektual va maʼnaviy rivojlanishga boʻlgan ehtiyojlarini qondirish, mamlakatimizda maʼrifiy faoliyatni amalga oshirishning huquqiy asoslarini yaratish, ushbu soha ishtirokchilari faoliyat koʻrsatishining aniq tartibini belgilash maqsadida Vazirlar Mahkamasi qaror qiladi:

1. Quyidagilarni nazarda tutuvchi Maʼrifiy faoliyatni amalga oshirish tartibi toʻgʻrisidagi nizom 1-ilovaga muvofiq tasdiqlansin:

maʼrifiy faoliyatni amalga oshirishning tashkiliy-huquqiy shakllari hamda ushbu faoliyatni amalga oshiruvchilarga nisbatan qoʻyiladigan talablar;

maʼrifiy faoliyatni amalga oshirish shakllari (maʼruza, taqdimot, seminar, mahorat darsi, kurs, leksiya, marafon, davra suhbatlari hamda qonunchilikda taqiqlanmagan boshqa shakllarda, bevosita yoki onlayn, yakka tartibda yoki guruhlarda, pulli yoki bepul);

maʼrifiy faoliyatni amalga oshirish tartibi, shu jumladan, ushbu faoliyat tinglovchilari orasida voyaga yetmagan shaxs mavjud boʻlsa, majburiy tartibda maʼrifiy faoliyat dasturini ishlab chiqish talabi;

maʼrifiy faoliyat ishtirokchilarining huquqlari, majburiyatlari va maʼrifiy faoliyatni amalga oshirishda taqiqlanadigan xatti-harakatlar.

2. Belgilansinki:

maʼrifiy faoliyat bilan yuridik shaxs tashkil etib yoki yakka tartibdagi tadbirkor sifatida roʻyxatdan oʻtib shugʻullanish mumkin;

maʼrifiy faoliyat bilan yozma yoki elektron shaklda tuziladigan shartnomaga muvofiq pulli asosda shugʻullaniladi;

maʼrifiy faoliyat tadbirlari 100 nafar va undan koʻp kishilarning ishtirokidagi guruhlarda Vazirlar Mahkamasining 2014-yil 29-iyuldagi 205-son qarori bilan tasdiqlangan Ommaviy tadbirlarni oʻtkazish qoidalariga muvofiq oʻtkaziladi;

oʻn toʻrt yoshdan kichik shaxslarning maʼrifiy faoliyat tadbirlarida tinglovchi sifatida ishtirok etishlariga ularning ota-onasi (qonuniy vakillari) yozma roziligi bilan yoʻl qoʻyiladi.

3. Manfaatdor vazirlik va idoralar oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

4. Oʻzbekiston Respublikasi Hukumatining 2-ilovaga muvofiq ayrim qarorlariga qoʻshimchalar kiritilsin.

5. Mazkur qarorning bajarilishini nazorat qilish Vazirlar Mahkamasining “Mahalla yettiligi”, yoshlar siyosati va maʼnaviyat masalalari departamentiga yuklansin.

Vazirlar Mahkamasining 2025-yil 11-fevraldagi 76-son qaroriga 1-ILOVA

Maʼrifiy faoliyatni amalga oshirish tartibi toʻgʻrisida

1-bob. Umumiy qoidalar

1. Ushbu Nizom maʼrifiy faoliyatni amalga oshirish tartibi va shakllarini belgilaydi.

2. Mazkur Nizomning amal qilishi davlat organlari, taʼlim, ilmiy va diniy tashkilotlar tomonidan maʼrifiy faoliyat bilan bogʻliq tadbirlarni oʻtkazishga nisbatan tatbiq etilmaydi.

3. Ushbu Nizomda quyidagi asosiy tushunchalar qoʻllaniladi:

maʼrifiy faoliyat — insonni shaxsiy, intellektual va maʼnaviy rivojlantirish, ijtimoiy va iqtisodiy faolligini oshirish, intellektual va ijodiy salohiyatini namoyon etish, individual salohiyati, imkoniyatlari, kommunikativ qobiliyatlarini yaxshilash uchun zarur koʻnikma va malakani shakllantirishga qaratilgan hamda davlat taʼlim standartlari bilan qamrab olinmaydigan faoliyat turi;

maʼrifiy faoliyat dasturi — maʼrifiy faoliyatni amalga oshirishning maqsadi va mazmuni, vazifalari, muddatlari, shakllari va joylari, oʻquv faoliyatini tashkil etuvchi hamda uni amalga oshirishda ishtirok etadigan shaxslar toʻgʻrisidagi maʼlumotlarni va mazkur dasturni moliyalashtirish manbalarini aks ettiruvchi hujjat;

maʼrifiy faoliyat tinglovchisi — oʻzining shaxsiy, ijtimoiy va iqtisodiy faolligini yanada oshirish, ijodiy va intellektual qobiliyatini namoyon etish, individual salohiyati, imkoniyati, kommunikativ qobiliyatini rivojlantirish uchun maʼrifiy faoliyatda ishtirok etuvchi shaxslar.

4. Maʼrifiy faoliyat respublika va mahalliy ijro etuvchi hokimiyat organlari, fuqarolarning oʻzini oʻzi boshqarish organlari, yuridik shaxslar yoki yakka tartibdagi tadbirkor sifatida roʻyxatdan oʻtgan jismoniy shaxslar (keyingi oʻrinlarda — maʼrifiy faoliyatni amalga oshiruvchilar) tomonidan Oʻzbekiston Respublikasining qonunchilik hujjatlarida va ushbu Nizomda nazarda tutilgan talablarga muvofiq amalga oshiriladi.

5. Maʼrifiy faoliyatni amalga oshiruvchilar ushbu faoliyat davomida boshqa faoliyat turlarini ham amalga oshirsa, mazkur faoliyat turlari uchun qonunchilik hujjatlarida belgilangan talablarga (litsenziya, ruxsatnoma, malaka sertifikatiga ega boʻlish va boshqalar) rioya etishi shart.

2-bob. Maʼrifiy faoliyatni amalga oshirish shakllari va tartibi

6. Maʼrifiy faoliyat:

maʼruza, taqdimot, seminar, mahorat darsi, kurs, leksiya, marafon, davra suhbatlari hamda qonunchilik hujjatlarida taqiqlanmagan boshqa shakllarda;

anʼanaviy (bevosita) yoki axborot-kommunikatsiya texnologiyalaridan foydalangan holda (onlayn);

yakka tartibda yoki guruhlarda;

pulli yoki bepul asosda amalga oshirilishi mumkin.

7. Maʼrifiy faoliyat tadbirlari 100 va undan koʻp kishilarning ishtirokidagi guruhlarda Vazirlar Mahkamasining 2014-yil 29-iyuldagi 205-son qarori bilan tasdiqlangan Ommaviy tadbirlarni oʻtkazish qoidalariga muvofiq oʻtkazilishi kerak.

8. Maʼrifiy faoliyat pulli asosda yozma yoki elektron shaklda tuziladigan shartnomaga muvofiq amalga oshiriladi.

Maʼrifiy faoliyatni amalga oshirish haqidagi shartnomada taraflarning nomi, manzili, ularning huquq va majburiyatlari, javobgarligi, toʻlovni amalga oshirish tartibi, maʼrifiy faoliyatning shakli, nizolarni hal qilish, shartnomani bekor qilish tartibi, sifatsiz yoki toʻliq boʻlmagan maʼrifiy faoliyat uchun toʻlovni toʻliq yoki qisman qaytarish shartlari va muddatlari hamda boshqa maʼlumotlar koʻrsatiladi.

9. Oʻn toʻrt yoshdan kichik shaxslarning maʼrifiy faoliyat tadbirlarida tinglovchi sifatida ishtirok etishlariga ularning ota-onasi (qonuniy vakillari) yozma roziligi bilan yoʻl qoʻyiladi.

3-bob. Maʼrifiy faoliyat ishtirokchilarining huquq va majburiyatlari

10. Maʼrifiy faoliyatni amalga oshiruvchilar quyidagi huquqlarga ega:

oʻzini oʻzi band qilgan shaxs sifatida roʻyxatdan oʻtish;

oʻz shaʼni, qadr-qimmati va ishchanlik obroʻsini himoya qilish;

maʼrifiy faoliyatni axborot-kommunikatsiya texnologiyalaridan foydalangan holda amalga oshirish;

maʼrifiy faoliyatning ushbu Nizomning 6-bandida belgilangan shakllarini mustaqil tanlash;

maʼrifiy faoliyat pulli asosda amalga oshirilganda, toʻlov miqdorini mustaqil belgilash hamda ushbu faoliyat uchun shartnomaga muvofiq haq olish;

respublika va mahalliy ijro etuvchi hokimiyat organlaridan maʼrifiy faoliyatni amalga oshirish uchun zarur boʻlgan axborotni, shu jumladan, statistika maʼlumotlarini belgilangan tartibda soʻrash va olish;

maʼrifiy faoliyat tinglovchilarini maʼrifiy faoliyatni amalga oshirishda zarur materiallar bilan taʼminlash.

Maʼrifiy faoliyatni amalga oshiruvchilar qonunchilik hujjatlariga muvofiq boshqa huquqlarga ham ega boʻlishi mumkin.

11. Maʼrifiy faoliyatni amalga oshiruvchilar:

maʼrifiy faoliyat tinglovchilariga ushbu faoliyat haqida axborot taqdim etishi, shuningdek, ularning talabiga koʻra oʻz maʼlumoti va malakasini tasdiqlaydigan hujjatlarni (mavjud boʻlsa) taqdim etishi;

maʼrifiy faoliyat tinglovchilariga nisbatan insoniy muomalada boʻlishi, ularning shaʼni, qadr-qimmati va ishchanlik obroʻsini hurmat qilishi;

qonunchilik hujjatlarida belgilangan soliqlarni va boshqa majburiy toʻlovlarni oʻz vaqtida toʻlashi;

qonunchilik hujjatlarida, shu jumladan, ushbu Nizomning 12-bandida belgilangan taqiq va cheklovlarga rioya etishi;

maʼrifiy faoliyat tinglovchilariga nisbatan tazyiq oʻtkazmasligi hamda jismoniy va (yoki) ruhiy zoʻravonlik ishlatmasligi;

maʼrifiy faoliyatni haq evaziga amalga oshirganda, maʼrifiy faoliyat tinglovchisi bilan yozma yoki elektron shaklda shartnoma tuzishi lozim.

Maʼrifiy faoliyatni amalga oshiruvchilar zimmasiga qonunchilik hujjatlariga muvofiq boshqa majburiyatlar ham yuklanishi mumkin.

12. Maʼrifiy faoliyatni amalga oshiruvchilarga quyidagilar taqiqlanadi:

Oʻzbekiston Respublikasining amaldagi konstitutsiyaviy tuzumini, hududiy yaxlitligini zoʻrlik bilan oʻzgartirishga, ommaviy tartibsizliklarga, noqonuniy yigʻilishlar, mitinglar, koʻcha yurishlari va namoyishlarda ishtirok etishga daʼvat qilish;

davlat sirlarini yoki qonun bilan qoʻriqlanadigan boshqa sirni tashkil etuvchi maʼlumotlarni oshkor etish;

urush, terrorizm, ekstremizm, separatizm va fundamentalizm gʻoyalarini, pornografiya, zoʻravonlik, shafqatsizlikni yoki ijtimoiy axloqqa zid qarashlarni targʻib qilish;

alkogolli va tamaki mahsulotlarini, giyohvandlik vositalarini, ularning analoglarini, psixotrop moddalarni yoki aql-irodaga taʼsir etuvchi boshqa moddalarni isteʼmol qilishni targʻib qilish;

vijdon erkinligi va diniy tashkilotlar toʻgʻrisidagi qonunchilik talablarini buzish, shu jumladan, diniy taʼlimotdan saboq berish, diniy aqida va gʻoyalarni targʻib qilish, diniy mazmundagi materiallarni tarqatish, muayyan dinga ustuvorlik berish yoxud kamsitish;

jins boʻyicha kamsitish yoki davlat ramzlariga nisbatan hurmatsizlik qilish;

jamoat tartibiga yoki xavfsizligiga tahdid soluvchi, milliy, irqiy, etnik yoki diniy adovat qoʻzgʻatuvchi, fuqarolarning shaʼni va qadr-qimmatiga yoki ishchanlik obroʻsiga putur yetkazuvchi, shuningdek, haqoratli soʻzlarni oʻz ichiga olgan axborotni tarqatish;

maʼrifiy faoliyatni amalga oshirishda haqiqatga toʻgʻri kelmaydigan va yolgʻon maʼlumotlardan foydalanish;

huquqbuzarlik yoki jinoyatni sodir etishga, oʻz joniga suiqasd qilishga, qimor va tavakkalchilikka asoslangan boshqa oʻyinlar, fohishalik, tilanchilik yoki gʻayriijtimoiy xatti-harakatning boshqa shakllari bilan shugʻullanishga daʼvat qilish;

odamlarga yoki hayvonlarga nisbatan zoʻravonlik va shafqatsizlik qilish mumkinligini asoslash yoki oqlash yoxud shunday harakatlarni amalga oshirishga undash;

fuqarolarni ularning hayotiga va (yoki) sogʻligʻiga yoxud oʻzga shaxslarning hayotiga va (yoki) sogʻligʻiga tahdid soluvchi gʻayrihuquqiy harakatlarni sodir etishga undash yoki boshqacha tarzda jalb qilish;

maʼrifiy faoliyatda voyaga yetmaganlar ishtirok etganda, jinsiy munosabatlarni tasvirlash yoki bayon etish yoxud ularda qoʻrquv, vahima yoki sarosima uygʻotadigan axborotni tarqatish.

13. Maʼrifiy faoliyat tinglovchilari quyidagi huquqlarga ega:

maʼrifiy faoliyatni amalga oshiruvchilar tomonidan oʻziga nisbatan insoniy va hurmat bilan munosabat koʻrsatilishini talab qilish;

maʼrifiy faoliyatni amalga oshiruvchining maʼlumoti va malakasini tasdiqlaydigan hujjatlar (mavjud boʻlsa) bilan tanishish;

maʼrifiy faoliyatda ishtirok etish, maʼrifiy faoliyatni amalga oshiruvchilardan maʼrifiy faoliyatga oid zarur materiallarni soʻrash va olish;

shartnomada koʻrsatilgan shakllarda va tartibda maʼrifiy faoliyatni amalga oshirishda ishtirok etish.

Maʼrifiy faoliyat tinglovchilari qonunchilik hujjatlariga muvofiq boshqa huquqlarga ham ega boʻlishi mumkin.

14. Maʼrifiy faoliyat tinglovchilari:

maʼrifiy faoliyat davrida maʼrifiy faoliyatni amalga oshiruvchilar bilan oʻzaro hurmatga asoslangan munosabatda boʻlishi;

maʼrifiy faoliyatni amalga oshiruvchilarning shaʼni, qadr-qimmati va ishchanlik obroʻsini hurmat qilishi;

maʼrifiy faoliyatni amalga oshiruvchilar bilan tuzilgan shartnomaga muvofiq haq toʻlashi shart.

Maʼrifiy faoliyat tinglovchilari zimmasiga qonunchilik hujjatlari va shartnomaga muvofiq boshqa majburiyatlar ham yuklanishi mumkin.

4-bob. Yakunlovchi qoida

15. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

Vazirlar Mahkamasining 2025-yil 11-fevraldagi 76-son qaroriga 2-ILOVA

Oʻzbekiston Respublikasi Hukumatining ayrim qarorlariga kiritilayotgan qoʻshimchalar

1. Vazirlar Mahkamasining 2011-yil 7-yanvardagi 6-son qarori bilan tasdiqlangan Yakka tartibdagi tadbirkorlar shugʻullanishi mumkin boʻlgan faoliyat turlari roʻyxati quyidagi mazmundagi 91-pozitsiya bilan toʻldirilsin:

“maʼrifiy faoliyatni amalga oshirish”.

2. Vazirlar Mahkamasining 2014-yil 29-iyuldagi 205-son qarori bilan tasdiqlangan Ommaviy tadbirlarni oʻtkazish qoidalarining 3-bandi uchinchi xatboshisi “madaniy-ommaviy” soʻzlaridan keyin “maʼrifiy” soʻzi bilan toʻldirilsin.

3. Vazirlar Mahkamasining 2022-yil 22-fevraldagi 86-son qarori bilan tasdiqlangan Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari toʻgʻrisidagi yagona nizom 11-ilovaga muvofiq Ommaviy tadbirlarni oʻtkazish uchun ruxsatnoma pasportining 5-pozitsiyasi “maʼrifiy faoliyat koʻrsatish haqida shartnoma tuzilganligi toʻgʻrisidagi maʼlumotlar (maʼrifiy faoliyat koʻrsatish boʻyicha tadbir oʻtkazilayotganda)” soʻzlari bilan toʻldirilsin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 11-fevral,

76-son

(Qonunchilik maʼlumotlari milliy bazasi, 11.02.2025-y., 09/25/76/0124-son)

lex.uz