📅 2025-yil 12-fevral · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 12 февраль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 12 февраля 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 12 February 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ҚОИДАЛАРИ
СХЕМАСИ
МИҚДОРЛАРИ
СХЕМАСИ
КЛАССИФИКАТОРИ
«ЙЎЛ ХАРИТАСИ»
Шаҳарсозлик фаолиятини геоахборот билан таъминлаш механизмини такомиллаштириш чора-тадбирлари тўғрисида
Ўзбекистон Республикаси Президентининг «Шаҳарсозлик фаолияти соҳасида давлат бошқаруви тизимини янада такомиллаштириш ҳамда 2023 — 2027 йилларда аҳоли пунктларининг шаҳарсозлик ҳужжатларини ишлаб чиқиш дастурларини тасдиқлаш чора-тадбирлари тўғрисида» 2023 йил 11 сентябрдаги ПҚ-299-сон қарори ижросини таъминлаш ҳамда шаҳарсозлик фаолиятининг геоахборот таъминотини самарали ташкил қилиш, шаҳарсозлик фаолияти мониторингини юритиш ва соҳага инновацион технологияларни кенг жорий этиш мақсадида Вазирлар Маҳкамаси қарор қилади:
1. Қуйидагилар:
Шаҳарсозлик фаолиятини геоахборот билан таъминлаш учун марказлаштирилган топографик маълумотлар базасини яратиш ва юритиш қоидалари 1-иловага мувофиқ;
Йирик масштабли топографик режалар учун шартли белгилар классификатори 2-иловага мувофиқ;
Марказлаштирилган топографик маълумотлар базасини ишга тушириш ва янада ривожлантириш бўйича «йўл харитаси» 3-иловага мувофиқ тасдиқлансин.
2. Қурилишда муҳандислик қидирувлари, геоахборот ва шаҳарсозлик кадастри илмий-текшириш институти Рақамли технологиялар вазирлиги, Иқтисодиёт ва молия вазирлиги ҳузуридаги Кадастр агентлиги ва бошқа манфаатдор вазирлик ва идоралар билан биргаликда 2025 йил 1 июлга қадар:
ўз маблағлари ҳисобидан шаҳарсозлик фаолиятини геоахборот билан таъминлаш учун ишлаб чиқилаётган барча турдаги йирик масштабли топографик тасвирлар ва режалар «топография» маълумотлар базасига киритиб борилишини таъминловчи ўз веб-платформасининг дастлабки версиясини ишлаб чиқиб, ишга туширсин;
«топография» маълумотлар базасини «Ўзбекистон Республикаси давлат шаҳарсозлик кадастри» географик ахборот тизими, Кадастр агентлигининг давлат геодезия ва картография фонди маълумотлар базаси ҳамда бошқа давлат ахборот тизимлари ва маълумотлар базалари билан интеграция қилишни ташкил этсин.
3. Шундай тартиб ўрнатилсинки, унга мувофиқ 2025 йил 1 июлдан бошлаб (давлат сирини ташкил этувчи объектлар бундан мустасно):
республика ҳудудида мулкчилик шаклидан қатъи назар, қурилиши тугалланган барча объектларда ижровий топографик тасвирга олиш жараёнлари бажарилади ва «топография» маълумотлар базасига киритилади;
идоравий бўйсуниши ва мулкчилик шаклидан қатъи назар, барча ташкилотлар ва корхоналар томонидан амалга оширилган йирик масштабли топографик тасвирлар ва режалар «топография» маълумотлар базасига киритилади;
йирик масштабли топографик тасвирлар ва режалар, жумладан, қурилиши тугалланган объектларнинг ижровий топографик тасвирлари давлат геодезия координаталар тизими, халқаро (WGS-84) координаталар тизими ёхуд давлат геодезия координаталари тизими билан ўзаро боғлиқлиги таъминланган маҳаллий координаталар тизимида бажарилади;
«топография» маълумотлар базасига киритилмаган топографик режалардан фойдаланилган ишчи лойиҳа ҳужжатларини экспертизадан ўтказишга йўл қўйилмайди;
«топография» маълумотлар базасига киритилган ижровий топографик тасвирлари мавжуд бўлмаган қурилиш ва (ёки) реконструкцияси тугалланган объектлар фойдаланишга қабул қилинмайди;
жой ҳолатининг ўзгариши билан боғлиқ бўлган, ҳудудни ободонлаштириш ва бузишга оид барча турдаги ишлар якунлангач, ижровий топографик тасвирга олиш жараёнлари бажарилиб, якуний топографик режалар «Топография» маълумотлар базасига киритилади;
ҳудудларда амалга оширилган бузиш ва (ёки) ободонлаштириш ишлари якуни бўйича «Топография» маълумотлар базасига киритилган ижровий топографик тасвирлари мавжуд бўлмаган ишлар учун ишларни қабул қилиш далолатномаларини расмийлаштириш қатъиян тақиқланади;
қурилиши якунланган объектларнинг ижровий топографик тасвирлари объект бўйича пудрат ташкилоти ва геодезия фаолиятини амалга ошириш ваколатига эга юридик шахслар ўртасида тузилган шартномалар асосида ишлаб чиқилади.
4. Ўзбекистон Республикаси Қурилиш ва уй-жой коммунал хўжалиги вазирлиги манфаатдор вазирлик ва идоралар билан биргаликда икки ой муддатда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А. Ж. Раматов ва қурилиш ва уй-жой коммунал хўжалиги вазири Ш.С. Хидоятов зиммасига юклансин.
Вазирлар Маҳкамасининг 2025 йил 12 февралдаги 85-сон қарорига 1-ИЛОВА
Шаҳарсозлик фаолиятини геоахборот билан таъминлаш учун марказлаштирилган топографик маълумотлар базасини яратиш ва юритиш
1-боб. Умумий қоидалар
1. Ушбу Қоидалар шаҳарсозлик фаолиятини геоахборот билан таъминлаш учун олиб бориладиган муҳандислик-геодезик қидирувлари жараёнида ишлаб чиқиладиган йирик масштабли: 1:200, 1:500 ва 1:1000 масштабли топографик тасвирлар ва режаларининг марказлаштирилган топографик маълумотлар базасини (кейинги ўринларда — «Топография» маълумотлар базаси) шакллантириш, юритиш ва ундан фойдаланиш тартибини белгилайди.
2. Ушбу Қоидаларда қуйидаги асосий тушунчалар қўлланилади:
ариза берувчи — топографик ишлар тугагандан сўнг якуний топографик маълумотларни «Топография» маълумотлар базасига киритиш ёки «Топография» маълумотлар базасида мавжуд маълумотларни олиш учун мурожаат этувчи ихтисослашган ташкилот;
буюртмачи — топографик ишларни бажаришга буюртма берган жисмоний ёки юридик шахс;
геодезия мутахассиси — ихтисослашган ташкилот ходими, геодезия ишларини бажаришга ваколатли масъул шахс;
ижровий топографик тасвир — ушбу Қоидаларда ҳамда шаҳарсозлик норма ва қоидаларида кўрсатилган талабларни ҳисобга олган ҳолда, ҳудудларда амалга оширилаётган қурилиш, бузиш ва ободонлаштириш ишлари вақтида ва (ёки) якунида ҳудуддаги бино ва иншоотлар, муҳандислик коммуникация тармоқлари ва жойнинг ҳолати тўғрисидаги топографик маълумотлар;
ихтисослашган ташкилот — белгиланган тартибда геодезия ва (ёки) картография фаолиятини амалга оширувчи юридик шахс;
«Топография» маълумотлар базаси иштирокчиси (иштирокчи) — идоравий ахборот тизимлари «Топография» маълумотлар базасига интеграция қилинган вазирликлар ва идоралар;
«Топография» маълумотлар базаси оператори (оператор) — Қурилишда муҳандислик қидирувлари, геоахборот ва шаҳарсозлик кадастри илмий-текшириш институти («Топография» маълумотлар базасини шакллантириш ва топографик маълумотларни сақлаш бўйича ижрочи ташкилот);
«Топография» маълумотлар базаси фойдаланувчиси (фойдаланувчи) — «Топография» маълумотлар базаси маълумотларидан фойдаланувчи жисмоний ва юридик шахслар;
топографик маълумотлар — жой ҳолатининг йирик (1:200, 1:500 ва 1:1000) масштабли топографик режалари, қурилиши ва (ёки) реконструкцияси тугалланган объектларнинг ижровий топографик тасвирлари;
шахсий кабинет — ариза берувчи ва экспертларга «Топография» маълумотлар базасида маълумотларни киритиш, юклаш, сақлаш, юбориш ва қайта ишлаш функцияларини амалга ошириш мақсадида бириктирилган саҳифа;
чизиқли объектлар — янги қурилган ёки демонтаж қилинган муҳандислик коммуникацияларининг ижровий топографик тасвирлари;
қурилиши ва (ёки) реконструкцияси тугалланган объектлар — бинолар ва иншоотларни, муҳандислик коммуникацияларини қуриш ёки реконструкция қилиш, жойнинг ўзгариши билан боғлиқ бузиш ёки ободонлаштириш ишлари бажарилган барча объектлар.
3. Йирик (1:200, 1:500 ва 1:1000) масштабда амалга оширилган барча топографик маълумотлар, жой ҳолатининг топографик режалари, қурилиши ва (ёки) реконструкцияси тугалланган объектларнинг ижровий топографик тасвирлари «Топография» маълумотлар базасига киритилиши шарт.
4. Топографик режалар ва ижровий топографик тасвирлар мазкур Қоидаларда белгиланган тартибда текширилиб, «Топография» маълумотлар базасига киритилгандан сўнг амал қилади.
Топографик режалар «Топография» маълумотлар базасига киритилган кундан бошлаб бир йил давомида амал қилади.
Ижровий топографик тасвирларнинг амал қилиш муддати чекланмаган.
2-боб. Топографик маълумотларни текшириш ва «Топография» маълумотлар базасига киритишда электрон хизматлар кўрсатиш тартиби
5. Топографик маълумотларни текшириш ва «Топография» маълумотлар базасига киритишда электрон хизматлар кўрсатиш ахборот-коммуникация тизимлари ёрдамида операторнинг веб-платформасида қуйидагилар орқали амалга оширилади:
ариза берувчининг шахсий кабинети;
экспертларнинг шахсий кабинети.
Шахсий кабинетга қонунчилик ҳужжатларида белгиланган тартибда Ягона идентификация тизими орқали кирилади.
6. Топографик ишлар тугагандан сўнг ихтисослашган ташкилот операторнинг веб-платформасида ўзининг шахсий кабинети орқали «Топография» маълумотлар базасига топографик маълумотларни киритиш учун ариза беради.
Аризада қуйидаги маълумотлар кўрсатилади:
объект номи;
объектнинг жойлашуви ёки манзили;
координата ва баландлик тизими;
топографик тасвир ёки режанинг масштаби;
иш ҳажми (майдонли объектлар гектарда, чизиқли объектлар метрда);
топографик ишлар якунланган сана;
топографик ишлар мақсади;
буюртмачи реквизитлари.
Бунда ариза берувчи топографик маълумотларни рақамли кўринишда, AutoCAD дастурий таъминотининг DWG вектор форматида юклайди.
Ушбу бандда назарда тутилмаган бошқа ҳужжатларни талаб қилишга йўл қўйилмайди.
7. Топографик маълумотларда топографик ишлар амалга оширилган ҳудуд чегараси кўрсатилиши шарт. Аризада кўрсатилган иш ҳажми топографик ишлар амалга оширилган ҳудуд чегараси майдонига мос келиши керак.
8. Ариза берувчининг шахсий кабинети электрон хизматлардан фойдаланиш, электрон хизматлар кўрсатиш жараёнини кузатиш, шахсий маълумотларни сақлаш ва қайта ишлаш имкониятини беради.
9. «Топография» маълумотлар базасига топографик маълумотларни киритиш учун ариза тўлдиргандан сўнг ариза берувчи кўрсатиладиган хизматлар учун тўлов ҳисоб-варақасини олади. Ариза берувчи беш иш куни ичида кўрсатиладиган хизматлар учун операторнинг ҳисобрақамига тўловни амалга ошириши шарт. Кўрсатиладиган хизматлар учун тўлов амалга оширилгандан сўнг, оператор тақдим этилган топографик маълумотларни текшириш ва «Топография» маълумотлар базасига киритиш жараёнини бошлайди.
10. Оператор қуйидагиларни текширади:
топографик маълумотлар элементларининг таркиби йирик масштабли топографик режалар учун шартли белгилар классификатори талабларига мувофиқлиги;
топографик маълумотлар ва унда кўрсатилган жой ҳолатининг «Топография» маълумотлар базасидаги мавжуд маълумотларга мослиги;
топографик маълумотларнинг топологик тартиби — топографик элементларнинг ўзаро жойлашуви, уларнинг жойдаги объектларнинг ўзаро геометрик жойлашув ҳолатига мослиги;
аризада кўрсатилган маълумотларга, координата ва баландлик тизимларига топографик маълумотларнинг мослиги.
11. Тақдим қилинган топографик маълумотларни текшириш учун топографик тасвирга олиш жараёни амалга оширилган ҳудуднинг ҳажмига (майдонига ёки узунлигига) қараб қуйидаги муддатлар белгиланади:
майдони 0,5 гектаргача ёки узунлиги 300 метргача (чизиқли объектлар учун) — беш иш куни;
майдони 0,5 гектардан 2,0 гектаргача ёки узунлиги 300 метрдан 1000 метргача (чизиқли объектлар учун) — етти иш куни;
майдони 2,0 гектардан 5,0 гектаргача ёки узунлиги 1000 метрдан 2500 метргача (чизиқли объектлар учун) — саккиз иш куни;
майдони 5,0 гектардан 10,0 гектаргача ёки узунлиги 2500 метрдан 5000 метргача (чизиқли объектлар учун) — ўн иш куни;
майдони 10 гектардан 50 гектаргача ёки узунлиги 5000 метрдан 50 000 метргача (чизиқли объектлар учун) — ўн беш иш куни;
50 гектардан ортиқ майдон — йигирма иш куни.
12. Тақдим қилинган топографик маълумотларни экспертлар томонидан текшириш жараёнида номувофиқликлар аниқланса, топографик маълумот файлининг ўзида алоҳида қатламда номувофиқликларни кўрсатган ҳолда топографик маълумотлар бир иш куни ичида ариза берувчига қайтарилади.
13. Ариза берувчи кўрсатилган номувофиқликларни йигирма кун муддатда бартараф қилади (тузатади) ҳамда топографик маълумотларни текшириш ва «Топография» маълумотлар базасига киритиш учун оператор веб-платформасидаги шахсий кабинети орқали қайта юборади.
Кўрсатилган номувофиқликлар йигирма кун муддат ичида бартараф этилиб, топографик маълумотлар қайта юборилганда, оператор хизматлари учун тўлов олинмайди.
14. Текширувдан муваффақиятли ўтган топографик маълумотларга такрорланмайдиган ягона рўйхатга олиш рақами берилади ва бу ишни бажарган ихтисослашган ташкилотга унинг топографик маълумотлари «Топография» маълумотлар базасига киритилганлиги тўғрисида QR-кодли хабар юборилади.
Топографик маълумотларни текшириш ва «Топография» маълумотлар базасига киритишда электрон хизматлар мазкур Қоидаларга 1-иловада келтирилган схемага асосан кўрсатилади.
15. Экспертларнинг шахсий кабинети қабул қилинган аризаларни қайта ишлаш учун мўлжалланган бўлиб, электрон хизматлар кўрсатишда зарур ҳужжатлар ва маълумотларни тайёрлаш, таҳрир қилиш, қидириш ва аризага жавоб бериш имкониятини беради.
16. Топографик маълумотларни текшириш, «Топография» маълумотлар базасига киритиш ва «Топография» маълумотлар базасида мавжуд маълумотларни тақдим этишга оид электрон хизматлар оператор ва ихтисослашган ташкилот ўртасида тузиладиган оммавий шартнома асосида кўрсатилади. Топографик маълумотларни текшириш, «Топография» маълумотлар базасига киритиш ва «Топография» маълумотлар базасида мавжуд маълумотларни тақдим этишга оид электрон хизматларни кўрсатиш учун тўлов миқдорлари ушбу Қоидаларга 2-иловага мувофиқ белгиланади.
17. Оператор қуйидаги ҳолатларда амалга оширилган тўловни қайтариб бермасдан, «Топография» маълумотлар базасига топографик маълумотларни киритишни рад этиши мумкин:
ариза берувчи ўз шахсий кабинети орқали оператор томонидан юборилган номувофиқликларни олган кундан бошлаб йигирма кун муддат ичида топографик маълумотларнинг ўзгартирилган (тузатилган) файлини операторга қайта юбормаса;
ариза берувчи топографик маълумот файлида кўрсатилган номувофиқликларни бартараф этмасдан қайта юборса.
Ушбу бандда кўрсатилмаган бошқа сабабларга кўра амалга оширилган тўловни қайтариб бермасдан, «Топография» маълумотлар базасига топографик маълумотларни киритишни рад этиш тақиқланади.
18. Агар «Топография» маълумотлар базасига топографик маълумотларни киритишни рад этиш тўғрисида қарор қабул қилинса, рад этиш сабаблари кўрсатилиб, ариза берувчининг шахсий кабинетига рад этиш тўғрисида хабар юборилади ва ушбу хабарни ариза берувчининг электрон почта манзилига такрорлаш мумкин.
19. Ариза берувчи топографик маълумотларни «Топография» маълумотлар базасига киритишни рад этиш учун асос бўлган сабабларни бартараф этганидан кейин қайта мурожаат қилган тақдирда, ариза берувчи томонидан берилган ариза янги ариза сифатида қабул қилинади ва оператор томонидан белгиланган тартибда кўриб чиқилади.
20. Агар оператор ушбу Қоидаларнинг 11-бандида белгиланган муддатда аризани кўриб чиқиб, тақдим этилган топографик маълумотлар «Топография» маълумотлар базасига киритилганлиги ёхуд рад этилганлиги тўғрисида хабарнома бермаса, белгиланган муддат тугагандан сўнг тизим автоматик равишда тақдим этилган топографик маълумотларни «Топография» маълумотлар базасига киритади ва ариза берувчига тақдим этилган топографик маълумотлар автоматик равишда «Топография» маълумотлар базасига киритилганлиги тўғрисида QR-кодли хабар юборади.
21. Топографик маълумотларни текшириш ва «Топография» маълумотлар базасига киритиш муддатлари хизматлар кўрсатганлик учун ҳақ тўланган кундан бошлаб ҳисобланади. Агар оператор текшириш вақтида номувофиқликларни аниқласа ва топографик маълумотларни қайта кўриб чиқиш (тузатиш) учун қайтарса, бу ҳолда топографик маълумотларни текшириш муддати кўрсатилган номувофиқликлар бартараф этилиб, тузатилган топографик маълумот қайта тақдим этилгунга қадар тўхтатиб турилади. Тузатилган топографик маълумот қайта тақдим этилган кундан эътиборан текшириш муддатларининг ўтиши давом этади.
22. Топографик маълумотлар «Топография» маълумотлар базасига киритилгандан сўнг қурилиш вақтида мавжуд ер ости муҳандислик тармоқларининг жойлашуви ёхуд уларнинг белгиланиши, жойнинг ҳолати «Топография» маълумотлар базасига киритилган топографик режада акс эттирилган ҳолатга мос келмаслиги аниқланса, топографик тасвирга олиш жараёни буюртмачиси бу ҳақда дарҳол ушбу ҳудуднинг топографик режасини ишлаб чиққан ихтисослашган ташкилотга хабар беради.
Ихтисослашган ташкилот беш иш куни мобайнида топографик ишлар қайта бажарилишини ташкил этиши ва буюртмачи ҳамда тегишли коммуникация тармоғи вакили иштирокида номувофиқликлар бартараф этилганлиги тўғрисида далолатнома имзолаган ҳолда, топографик режанинг янги (тузатилган) версиясини тузиши шарт.
Топографик ишлар якунлангандан сўнг ихтисослашган ташкилот операторнинг веб-платформасидаги ўз шахсий кабинети орқали янгиланган топографик маълумотларни «Топография» маълумотлар базасига киритиш учун мазкур ҳужжатда белгиланган тартибда ариза беради.
3-боб. Топографик маълумотлар «Топография» маълумотлар базасига киритилганлиги тўғрисидаги электрон хабарлар репозиторийси
23. Электрон хизматлар кўрсатиш натижалари, яъни топографик маълумотлар «Топография» маълумотлар базасига киритилганлиги тўғрисида юборилган электрон хабарлар «Топография» маълумотлар базасининг электрон ҳужжатлар репозиторийсида сақланади.
24. Ариза берувчи ўзининг шахсий кабинетидан фойдаланган ҳолда, операторнинг веб-платформасида яратилган электрон хабарлар нусхасини олиш имкониятига эга бўлади.
25. Давлат органлари операторнинг веб-платформасида яратилган электрон хабарнинг ягона рўйхатга олиш рақамини электрон ҳужжатлар репозиторийси расмий веб-саҳифасига киритиш ёхуд электрон хабарда кўрсатилган QR-кодни сканер қилиш орқали мурожаат этувчилардан олинган электрон хабарлар нусхаларининг ҳақиқийлигини текшириш ва улар ҳақидаги маълумотларни олиш имкониятига эга бўлади.
4-боб. «Топография» маълумотлар базасида сақланадиган маълумотларнинг таркиби
26. Оператор ҳар бир ариза бўйича текширилган ва «Топография» маълумотлар базасига киритилган топографик маълумотларнинг ҳисобини юритади ва унда қуйидаги маълумотларни кўрсатади:
объект номи;
объектнинг жойлашуви ёки манзили;
координата ва баландлик тизими;
топографик тасвир ёки режанинг масштаби;
иш ҳажми (майдонли объектлар гектарда, чизиқли объектлар метрда);
топографик ишлар бажарилган (якунланган) сана;
топографик ишлар мақсади;
буюртмачи реквизитлари;
рўйхатга олиш рақами.
Оператор бу маълумотларни геодезия ва картография фаолияти соҳасидаги махсус ваколатли давлат органи, Мудофаа вазирлиги, суд ва ҳуқуқни муҳофаза қилиш органларининг сўровига биноан тақдим этади.
27. Оператор топографик маълумотларни «Топография» маълумотлар базасида алоҳида файллар ҳолатида сақлайди.
Маҳаллий ёки давлат геодезия координаталар тизимида тегишли масштабдаги топографик тасвирлар ва режаларнинг номенклатура варақларига мос ҳолда алоҳида топширилган файлларни йиғиш ва навбатчи топографик режалар кўринишида сақлаш мумкин.
Оператор топографик тасвирлар ва режаларнинг номенклатура варақлари жойлашув схемасини ўз веб-платформасида эълон қилади.
28. «Топография» маълумотлар базаси 1:200, 1:500 ва 1:1000 масштаблар қаторига мос ҳолда, ҳар бир масштаб қатори учун алоҳида юритилади.
29. Оператор маълумотларни захиралашни ва «Топография» маълумотлар базасида сақлашни таъминлайди. Маълумотларни сақлаш муддати — 10 йил.
30. «Топография» маълумотлар базаси тугатилган тақдирда, унинг маълумотлари белгиланган тартибда сақлаш учун давлат картография-геодезия фондига ўтказилади.
5-боб. Бошқа ахборот тизимлари билан ўзаро ахборот алмашинуви
31. «Топография» маълумотлар базаси давлат органларининг қуйидаги ахборот тизимлари билан ўзаро боғлиқ ҳолда ташкил этилади:
«Шаффоф қурилиш» миллий ахборот тизими;
Давлат шаҳарсозлик кадастри географик ахборот тизими геопортали;
Давлат геодезия ва картография фонди маълумотлар базаси;
«Электрон ҳукумат» тизими фойдаланувчиларини идентификация қилишнинг ягона ахборот тизими;
«Лицензия» ахборот тизими.
32. Оператор ҳар бир иш куни якунлангач, иш куни давомида «Топография» маълумотлар базасига киритилган топографик маълумотларни «FТР» файл узатиш протоколи сервери (кейинги ўринларда — FТР-сервер) ёрдамида Давлат геодезия ва картография фонди маълумотлар базасига тақдим этади.
Томонлар (маълумотлар базаси эгалари) ўзаро келишув асосида топографик маълумотларни узатишнинг бошқа усулларидан фойдаланишлари мумкин.
33. Топографик маълумотлар рақамли кўринишда, AutoCAD дастурий таъминотининг DWG вектор форматида тақдим этилади.
6-боб. «Топография» маълумотлар базасидаги маълумотларни фойдаланувчиларга тақдим этиш тартиби
34. «Топография» маълумотлар базасидан сўралган маълумотлар қуйидаги услубларда тақдим этилиши мумкин:
оператор веб-платформаси орқали;
FТР-серверлардан фойдаланган ҳолда;
электрон почта хизматидан фойдаланган ҳолда;
қоғоз шаклида (буюртма асосида қоғозга чоп этиш).
35. Оператор фойдаланувчининг аризаси асосида топографик маълумотларни қуйидаги электрон файл форматларида тайёрлайди ва тақдим этади:
AutoCAD дастурий таъминотининг DWG вектор формати;
портатив ҳужжат файл формати (PDF);
тасвирли растр файл формати (JPEG ёки PNG).
36. «Топография» маълумотлар базасида мавжуд маълумотларни олиш учун фойдаланувчи операторнинг веб-платформасида ўзининг шахсий кабинети орқали аризани юборади.
Аризада қуйидаги маълумотлар кўрсатилади:
маълумот сўралаётган ҳудуд жойлашув ўрни, аниқ чегараси кўрсатилган ҳолда;
сўралаётган маълумот тури: топографик маълумот/геодезик пунктлар;
сўралаётган топографик маълумот масштаби;
маълумотларни тақдим этиш услуби ва формати;
маълумотлардан фойдаланиш мақсади;
буюртмачи реквизитлари.
Бунда маълумотлар сўралаётган ҳудуд майдони ариза берувчи томонидан кўрсатилган чегара асосида автоматик равишда тизим томонидан ҳисобланади.
37. Оператор уч иш куни давомида аризада кўрсатилган ҳудуд учун «Топография» маълумотлар базасида мавжуд маълумотларни ўрганади ва ўрганишлар натижаси асосида:
мавжуд маълумотларни тақдим этиш бўйича электрон хизматлар учун тўлов ҳисоб-варақасини ва тақдим этиладиган маълумотлар рўйхатини шакллантиради ҳамда ариза берувчига жўнатади;
аризада кўрсатилган ҳудуд учун «Топография» маълумотлар базасида маълумотлар мавжуд бўлмаса, ариза берувчига маълумотлар мавжуд эмаслиги тўғрисида хабар юборади ва мазкур ариза якунланган ҳисобланади.
38. Ариза берувчи маълумотларни тақдим этишга оид хизматлар учун тўлов ҳисобварақасини ва тақдим этиладиган маълумотлар рўйхатини олгандан сўнг ихтиёрига кўра беш иш куни давомида кўрсатиладиган хизматлар учун операторнинг ҳисобрақамига тўловни амалга оширади. Белгиланган муддатда тўлов амалга оширилмаса, мазкур ариза бўйича электрон хизмат амалга оширилмайди ва ариза якунланган ҳисобланади.
39. Ариза берувчи «Топография» маълумотлар базасида мавжуд маълумотларни тақдим этишга оид хизматлар учун тўловни амалга оширган тақдирда оператор уч иш куни давомида ариза берувчининг сўровига асосан тақдим этиладиган маълумотларни мазкур Қоидаларда ва аризада белгиланган услубда ва форматда ариза берувчига тақдим этади ҳамда ариза берувчининг шахсий кабинетига унинг аризасига асосан маълумотлар тақдим этилганлиги тўғрисида хабар юборади. Ушбу хабарни ариза берувчининг электрон почта манзилига такрорлаш мумкин.
«Топография» маълумотлар базасидаги маълумотларни фойдаланувчиларга тақдим этишда электрон хизматлар кўрсатиш схемаси мазкур Қоидаларга 3-иловада келтирилган.
7-боб. Якунловчи қоидалар
40. Ариза берувчи ўзи тақдим этган топографик маълумотларнинг ҳақиқийлиги за актуаллигини таъминлаш учун жавобгардир.
41. Давлат органлари ўзларининг идоравий ахборот тизимлари ва маълумотлар базаларидан олинган маълумотларнинг ҳаққонийлиги ва актуаллигини таъминлайди.
42. Тизим иштирокчилари ва фойдаланувчиларига ахборот тизимига кириш учун берилган рўйхатга олиш маълумотларини (фойдаланувчи номлари, логинлар, пароллар ва бошқаларни) бошқа учинчи шахсларга бериш тақиқланади.
43. Ушбу Қоидалар талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Шаҳарсозлик фаолиятини геоахборот билан таъминлаш учун марказлаштирилган топографик маълумотлар базасини яратиш ва юритиш қоидаларига 1-ИЛОВА
Топографик маълумотларни текшириш ва «Топография» маълумотлар базасига киритишда электрон хизматлар кўрсатиш
Босқичлар Субъектлар Тадбирлар Ижро муддатлари 1-босқич Ариза берувчи Топографик ишлар тугагандан сўнг ихтисослашган ташкилот операторнинг веб-платформасида ўзининг шахсий кабинети орқали «Топография» маълумотлар базасига топографик маълумотларни киритиш учун ариза беради ва талаб этилган маълумотларни юклайди. Ихтиёрига кўра 2-босқич Оператор Кўрсатиладиган электрон хизматлар учун тўлов ҳисоб-варақасини шакллантиради ва ариза берувчига жўнатади. Бир соат 3-босқич Ариза берувчи Тўлов ҳисобварақасида кўрсатилган тўловни амалга оширади. Беш иш куни 4-босқич Оператор Тақдим этилган топографик маълумотларни текширади ва текширувдан муваффақиятли ўтган топографик маълумотларни рўйхатга олиб, ариза берувчига топографик маълумотлар «Топография» маълумотлар базасига киритилганлиги тўғрисида QR-кодли хабар юборади. Текширувда номувофиқликлар аниқланса, топографик маълумотни тузатмалар киритиш учун қайтаради. Қоидаларнинг 11-бандида кўрсатилган муддатларда 4а-босқич Ариза берувчи Кўрсатилган номувофиқликларни бартараф этган ҳолда, топографик маълумотни янги версиясини қайта киритади. Йигирма кун 4б-босқич Оператор Қайта тақдим этилган топографик маълумотларни текширади ва текширувдан муваффақиятли ўтган топографик маълумотларни рўйхатга олиб, ариза берувчига топографик маълумотлар «Топография» маълумотлар базасига киритилганлиги тўғрисида QR-кодли хабар юборади. Текширув жараёнида олдин кўрсатилган номувофиқликлар тўлиқ бартараф этилмаганлиги аниқланса, тақдим қилинган топографик маълумотларни «Топография» маълумотлар базасига киритиш рад этилади Қоидаларнинг 11-бандида кўрсатилган муддатларда
Шаҳарсозлик фаолиятини геоахборот билан таъминлаш учун марказлаштирилган топографик маълумотлар базасини яратиш ва юритиш қоидаларига 2-ИЛОВА
Топографик маълумотларни текшириш, «Топография» маълумотлар базасига киритиш ва «Топография» маълумотлар базасида мавжуд маълумотларни тақдим этишга оид электрон хизматларни кўрсатиш учун тўлов
Т/р Хизмат тури Ўлчов бирлиги Хизмат нархи * (БҲМ ҳисобида) 1. Маълумотлар базасида мавжуд маълумотларни тақдим этиш 1.1. Топографик маълумотлар 1 файл ** 0,3 1.2. Геодезик пунктларнинг координаталари (x, y, z) 1 пункт 0,1 2. Топографик маълумотларни қабул қилиш, текшириш ва «Топография» маълумотлар базасига киритиш 2.1. майдони 0,5 га ва ундан кичик 1 объект *** 0,5 2.2. майдони 0,5 га дан 1,0 га гача 1 объект 0,8 2.3. майдони 1,0 га дан 2,0 га гача 1 объект 1,0 2.4. майдони 2,0 га дан 5,0 га гача 1 объект 1,3 2.5. майдони 5,0 га дан ортиқ бўлган объектларнинг қўшимча ҳар бир гектари учун 1 объект 0,2 3. Муҳандислик коммуникацияларининг ижровий топографик тасвирларини қабул қилиш, текшириш, «Топография» маълумотлар базасига киритиш ва навбатчи харитани янгилаш. Муҳандислик коммуникациясининг узунлиги 3.1. 50 метргача 1 объект 0,2 3.2. 51 метрдан 300 метргача 1 объект 0,5 3.3. 300 метрдан ортиқ бўлганда қўшимча ҳар 100 метр учун 1 объект 0,1 4. Демонтаж қилинган муҳандислик коммуникацияларининг далолатномаларини ва ижровий топографик тасвирларини қабул қилиш, текшириш, «Топография» маълумотлар базасига киритиш ва навбатчи харитани янгилаш. Муҳандислик коммуникациясининг узунлиги 4.1. 50 метргача 1 объект 0,15 4.2. 51 метрдан 300 метргача 1 объект 0,3 4.3. 300 метрдан ортиқ бўлганда қўшимча ҳар 100 метр учун 1 объект 0,05
Шаҳарсозлик фаолиятини геоахборот билан таъминлаш учун марказлаштирилган топографик маълумотлар базасини яратиш ва юритиш қоидаларига 3-ИЛОВА
«Топография» маълумотлар базасидаги маълумотларни фойдаланувчиларга тақдим этишда электрон хизматлар кўрсатиш
Босқичлар Субъектлар Тадбирлар Ижро муддатлари 1-босқич Ариза берувчи Операторнинг веб-платформасида ўзининг шахсий кабинети орқали «Топография» маълумотлар базасида мавжуд маълумотларни олиш учун ариза беради. Ихтиёрига кўра 2-босқич Оператор Аризада кўрсатилган ҳудуд учун «Топография» маълумотлар базасида мавжуд маълумотларни ўрганади, маълумотларни тақдим этиш бўйича электрон хизматлар учун тўлов ҳисобварақасини ва тақдим этиладиган маълумотлар рўйхатини шакллантиради ҳамда ариза берувчига жўнатади. Аризада кўрсатилган ҳудуд учун «Топография» маълумотлар базасида маълумотлар мавжуд бўлмаса, аризачига маълумотлар мавжуд эмаслиги тўғрисида хабар юборади. Уч иш куни 3-босқич Ариза берувчи Ҳисоб-варақасида кўрсатилган тўловни амалга оширади. Ихтиёрига кўра ўн иш куни давомида 4-босқич Оператор Аризачининг шахсий кабинетига унинг сўровига асосан маълумотлар тақдим этилганлиги тўғрисида хабар юборилади ва ушбу хабарни аризачининг электрон почта манзилига такрорлаш мумкин уч иш куни
Вазирлар Маҳкамасининг 2025 йил 12 февралдаги 85-сон қарорига 2-ИЛОВА
Йирик масштабли топографик режалар учун шартли белгилар
Вазирлар Маҳкамасининг 2025 йил 12 февралдаги 85-сон қарорига 3-ИЛОВА
Марказлаштирилган топографик маълумотлар базасини ишга тушириш ва янада ривожлантириш бўйича
Т/р Чора-тадбирлар номи Амалга ошириш механизми Ижро муддати Ижро учун масъуллар 1. Йирик масштабли топографик тасвирлар ва режалар марказлаштирилган топографик маълумотлар базасига (кейинги ўринларда — «Топография» маълумотлар базаси) киритиб борилишини таъминловчи веб-платформани ишлаб чиқиш ва ишга тушириш. 1. Веб-платформани ишлаб чиқиш учун концепция, техник топшириқни шакллантириш ва ўрнатилган тартибда келишиш. 2025 йил апрель Қурилиш ва уй-жой коммунал хўжалиги вазирлиги, Қурилишда муҳандислик қидирувлари, геоахборот ва шаҳарсозлик кадастри илмий-текшириш институти 2. Веб-платформани ишлаб чиқиш ва тест режимида ишга тушириш. 2025 йил июль 3. Веб-платформадан фойдаланиш бўйича қўлланмаларни ишлаб чиқиш. 2025 йил июль 2. «Топография» маълумотлар базасини бошқа ахборот тизимлари ва маълумотлар базалари билан интеграция қилиш ҳамда ахборот алмашинуви бўйича ҳамкорликни таъминлаш. 1. «Электрон ҳукумат» ахборот тизими фойдаланувчиларини идентификация қилишнинг ягона ахборот тизими билан интеграция қилинишини таъминлаш. 2025 йил июнь Қурилиш ва уй-жой коммунал хўжалиги вазирлиги, Қурилишда муҳандислик қидирувлари, геоахборот ва шаҳарсозлик кадастри илмий-текшириш институти, Рақамли технологиялар вазирлиги, Адлия вазирлиги, Солиқ қўмитаси, Кадастр агентлиги, тегишли вазирлик ва идоралар 2. «Лицензия» ахборот тизими билан интеграция қилинишини таъминлаш. 2025 йил июнь 3. Юридик шахсларнинг маълумотлар базалари билан интеграция қилинишини таъминлаш. 2025 йил июнь 4. «Шаффоф қурилиш» миллий ахборот тизими билан интеграция қилинишини таъминлаш. 2025 йил июнь 5. Давлат шаҳарсозлик кадастри географик ахборот тизими геопортали билан интеграция қилинишини таъминлаш. 2025 йил июнь 6. Давлат геодезия ва картография фонди маълумотлар базаси билан интеграция қилинишини таъминлаш. 2025 йил июнь 7. Зарурат тугилганда бошқа ахборот тизимлари ва маълумотлар базалари билан интеграция қилинишини таъминлаш. Заруратга кўра 3. «Топография» маълумотлар базасидан фойдаланиш бўйича ўқув-амалий семинарларни ташкил этиш. Қуйидаги ҳудудий ташкилотлар ва идоралар ходимлари учун «Топография» маълумотлар базасидан фойдаланиш зарурати, мазкур қарор ижросини таъминлашдаги аҳамияти бўйича ўқув-амалий семинарларни ташкил этиш ва ўтказиш: геодезия ишларини бажаришга ихтисослашган ташкилотлар; лойиҳа ташкилотлари; шаҳарсозлик ҳужжатлари экспертизаси ташкилотлари; буюртмачи хизматлари; муҳандислик-коммуникация тармоқларининг эксплуатация ташкилотлари; қурилиш соҳасида назорат инспекциялари; қурилиши тугалланган объектларни эксплуатацияга қабул қилиш комиссияси аъзолари ва бошқалар. График асосида (2025 йил июль — сентябрь) Қорақалпоғистон Республикаси Вазирлар Кенгаши, Тошкент шаҳри ва вилоятлар ҳокимликлари, Қурилиш ва уй-жой коммунал хўжалиги вазирлиги, Қурилишда муҳандислик қидирувлари, геоахборот ва шаҳарсозлик кадастри илмий-текшириш институти, тегишли вазирлик, идора ва ташкилотлар 4. «Топография» маълумотлар базасини модернизация қилиш ва янада такомиллаштириш. «Топография» маълумотлар базасини модернизация қилиш ва янада такомиллаштириш бўйича техник ва ташкилий чоралар амалга оширилишини таъминлаш. Доимий равишда Қурилишда муҳандислик қидирувлари, геоахборот ва шаҳарсозлик кадастри илмий-текшириш институти
Ўзбекистон Республикасининг Бош вазири А. АРИПОВ
Тошкент ш.,
2025 йил 12 февраль,
85-сон
Oʻzbekiston Respublikasi Vazirlar Mahkamasining
qarori
QOIDALARI
SXEMASI
MIQDORLARI
SXEMASI
KLASSIFIKATORI
“YOʻL XARITASI”
Shaharsozlik faoliyatini geoaxborot bilan taʼminlash mexanizmini takomillashtirish chora-tadbirlari toʻgʻrisida
Oʻzbekiston Respublikasi Prezidentining “Shaharsozlik faoliyati sohasida davlat boshqaruvi tizimini yanada takomillashtirish hamda 2023 — 2027-yillarda aholi punktlarining shaharsozlik hujjatlarini ishlab chiqish dasturlarini tasdiqlash chora-tadbirlari toʻgʻrisida” 2023-yil 11-sentabrdagi PQ-299-son qarori ijrosini taʼminlash hamda shaharsozlik faoliyatining geoaxborot taʼminotini samarali tashkil qilish, shaharsozlik faoliyati monitoringini yuritish va sohaga innovatsion texnologiyalarni keng joriy etish maqsadida Vazirlar Mahkamasi qaror qiladi:
1. Quyidagilar:
Shaharsozlik faoliyatini geoaxborot bilan taʼminlash uchun markazlashtirilgan topografik maʼlumotlar bazasini yaratish va yuritish qoidalari 1-ilovaga muvofiq;
Yirik masshtabli topografik rejalar uchun shartli belgilar klassifikatori 2-ilovaga muvofiq;
Markazlashtirilgan topografik maʼlumotlar bazasini ishga tushirish va yanada rivojlantirish boʻyicha “yoʻl xaritasi” 3-ilovaga muvofiq tasdiqlansin.
2. Qurilishda muhandislik qidiruvlari, geoaxborot va shaharsozlik kadastri ilmiy-tekshirish instituti Raqamli texnologiyalar vazirligi, Iqtisodiyot va moliya vazirligi huzuridagi Kadastr agentligi va boshqa manfaatdor vazirlik va idoralar bilan birgalikda 2025-yil 1-iyulga qadar:
oʻz mablagʻlari hisobidan shaharsozlik faoliyatini geoaxborot bilan taʼminlash uchun ishlab chiqilayotgan barcha turdagi yirik masshtabli topografik tasvirlar va rejalar “topografiya” maʼlumotlar bazasiga kiritib borilishini taʼminlovchi oʻz veb-platformasining dastlabki versiyasini ishlab chiqib, ishga tushirsin;
“topografiya” maʼlumotlar bazasini “Oʻzbekiston Respublikasi davlat shaharsozlik kadastri” geografik axborot tizimi, Kadastr agentligining davlat geodeziya va kartografiya fondi maʼlumotlar bazasi hamda boshqa davlat axborot tizimlari va maʼlumotlar bazalari bilan integratsiya qilishni tashkil etsin.
3. Shunday tartib oʻrnatilsinki, unga muvofiq 2025-yil 1-iyuldan boshlab (davlat sirini tashkil etuvchi obyektlar bundan mustasno):
respublika hududida mulkchilik shaklidan qatʼi nazar, qurilishi tugallangan barcha obyektlarda ijroviy topografik tasvirga olish jarayonlari bajariladi va “topografiya” maʼlumotlar bazasiga kiritiladi;
idoraviy boʻysunishi va mulkchilik shaklidan qatʼi nazar, barcha tashkilotlar va korxonalar tomonidan amalga oshirilgan yirik masshtabli topografik tasvirlar va rejalar “topografiya” maʼlumotlar bazasiga kiritiladi;
yirik masshtabli topografik tasvirlar va rejalar, jumladan, qurilishi tugallangan obyektlarning ijroviy topografik tasvirlari davlat geodeziya koordinatalar tizimi, xalqaro (WGS-84) koordinatalar tizimi yoxud davlat geodeziya koordinatalari tizimi bilan oʻzaro bogʻliqligi taʼminlangan mahalliy koordinatalar tizimida bajariladi;
“topografiya” maʼlumotlar bazasiga kiritilmagan topografik rejalardan foydalanilgan ishchi loyiha hujjatlarini ekspertizadan oʻtkazishga yoʻl qoʻyilmaydi;
“topografiya” maʼlumotlar bazasiga kiritilgan ijroviy topografik tasvirlari mavjud boʻlmagan qurilish va (yoki) rekonstruksiyasi tugallangan obyektlar foydalanishga qabul qilinmaydi;
joy holatining oʻzgarishi bilan bogʻliq boʻlgan, hududni obodonlashtirish va buzishga oid barcha turdagi ishlar yakunlangach, ijroviy topografik tasvirga olish jarayonlari bajarilib, yakuniy topografik rejalar “Topografiya” maʼlumotlar bazasiga kiritiladi;
hududlarda amalga oshirilgan buzish va (yoki) obodonlashtirish ishlari yakuni boʻyicha “Topografiya” maʼlumotlar bazasiga kiritilgan ijroviy topografik tasvirlari mavjud boʻlmagan ishlar uchun ishlarni qabul qilish dalolatnomalarini rasmiylashtirish qatʼiyan taqiqlanadi;
qurilishi yakunlangan obyektlarning ijroviy topografik tasvirlari obyekt boʻyicha pudrat tashkiloti va geodeziya faoliyatini amalga oshirish vakolatiga ega yuridik shaxslar oʻrtasida tuzilgan shartnomalar asosida ishlab chiqiladi.
4. Oʻzbekiston Respublikasi Qurilish va uy-joy kommunal xoʻjaligi vazirligi manfaatdor vazirlik va idoralar bilan birgalikda ikki oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A. J. Ramatov va qurilish va uy-joy kommunal xoʻjaligi vaziri Sh.S. Xidoyatov zimmasiga yuklansin.
Vazirlar Mahkamasining 2025-yil 12-fevraldagi 85-son qaroriga 1-ILOVA
Shaharsozlik faoliyatini geoaxborot bilan taʼminlash uchun markazlashtirilgan topografik maʼlumotlar bazasini yaratish va yuritish
1-bob. Umumiy qoidalar
1. Ushbu Qoidalar shaharsozlik faoliyatini geoaxborot bilan taʼminlash uchun olib boriladigan muhandislik-geodezik qidiruvlari jarayonida ishlab chiqiladigan yirik masshtabli: 1:200, 1:500 va 1:1000 masshtabli topografik tasvirlar va rejalarining markazlashtirilgan topografik maʼlumotlar bazasini (keyingi oʻrinlarda — “Topografiya” maʼlumotlar bazasi) shakllantirish, yuritish va undan foydalanish tartibini belgilaydi.
2. Ushbu Qoidalarda quyidagi asosiy tushunchalar qoʻllaniladi:
ariza beruvchi — topografik ishlar tugagandan soʻng yakuniy topografik maʼlumotlarni “Topografiya” maʼlumotlar bazasiga kiritish yoki “Topografiya” maʼlumotlar bazasida mavjud maʼlumotlarni olish uchun murojaat etuvchi ixtisoslashgan tashkilot;
buyurtmachi — topografik ishlarni bajarishga buyurtma bergan jismoniy yoki yuridik shaxs;
geodeziya mutaxassisi — ixtisoslashgan tashkilot xodimi, geodeziya ishlarini bajarishga vakolatli masʼul shaxs;
ijroviy topografik tasvir — ushbu Qoidalarda hamda shaharsozlik norma va qoidalarida koʻrsatilgan talablarni hisobga olgan holda, hududlarda amalga oshirilayotgan qurilish, buzish va obodonlashtirish ishlari vaqtida va (yoki) yakunida hududdagi bino va inshootlar, muhandislik kommunikatsiya tarmoqlari va joyning holati toʻgʻrisidagi topografik maʼlumotlar;
ixtisoslashgan tashkilot — belgilangan tartibda geodeziya va (yoki) kartografiya faoliyatini amalga oshiruvchi yuridik shaxs;
“Topografiya” maʼlumotlar bazasi ishtirokchisi (ishtirokchi) — idoraviy axborot tizimlari “Topografiya” maʼlumotlar bazasiga integratsiya qilingan vazirliklar va idoralar;
“Topografiya” maʼlumotlar bazasi operatori (operator) — Qurilishda muhandislik qidiruvlari, geoaxborot va shaharsozlik kadastri ilmiy-tekshirish instituti (“Topografiya” maʼlumotlar bazasini shakllantirish va topografik maʼlumotlarni saqlash boʻyicha ijrochi tashkilot);
“Topografiya” maʼlumotlar bazasi foydalanuvchisi (foydalanuvchi) — “Topografiya” maʼlumotlar bazasi maʼlumotlaridan foydalanuvchi jismoniy va yuridik shaxslar;
topografik maʼlumotlar — joy holatining yirik (1:200, 1:500 va 1:1000) masshtabli topografik rejalari, qurilishi va (yoki) rekonstruksiyasi tugallangan obyektlarning ijroviy topografik tasvirlari;
shaxsiy kabinet — ariza beruvchi va ekspertlarga “Topografiya” maʼlumotlar bazasida maʼlumotlarni kiritish, yuklash, saqlash, yuborish va qayta ishlash funksiyalarini amalga oshirish maqsadida biriktirilgan sahifa;
chiziqli obyektlar — yangi qurilgan yoki demontaj qilingan muhandislik kommunikatsiyalarining ijroviy topografik tasvirlari;
qurilishi va (yoki) rekonstruksiyasi tugallangan obyektlar — binolar va inshootlarni, muhandislik kommunikatsiyalarini qurish yoki rekonstruksiya qilish, joyning oʻzgarishi bilan bogʻliq buzish yoki obodonlashtirish ishlari bajarilgan barcha obyektlar.
3. Yirik (1:200, 1:500 va 1:1000) masshtabda amalga oshirilgan barcha topografik maʼlumotlar, joy holatining topografik rejalari, qurilishi va (yoki) rekonstruksiyasi tugallangan obyektlarning ijroviy topografik tasvirlari “Topografiya” maʼlumotlar bazasiga kiritilishi shart.
4. Topografik rejalar va ijroviy topografik tasvirlar mazkur Qoidalarda belgilangan tartibda tekshirilib, “Topografiya” maʼlumotlar bazasiga kiritilgandan soʻng amal qiladi.
Topografik rejalar “Topografiya” maʼlumotlar bazasiga kiritilgan kundan boshlab bir yil davomida amal qiladi.
Ijroviy topografik tasvirlarning amal qilish muddati cheklanmagan.
2-bob. Topografik maʼlumotlarni tekshirish va “Topografiya” maʼlumotlar bazasiga kiritishda elektron xizmatlar koʻrsatish tartibi
5. Topografik maʼlumotlarni tekshirish va “Topografiya” maʼlumotlar bazasiga kiritishda elektron xizmatlar koʻrsatish axborot-kommunikatsiya tizimlari yordamida operatorning veb-platformasida quyidagilar orqali amalga oshiriladi:
ariza beruvchining shaxsiy kabineti;
ekspertlarning shaxsiy kabineti.
Shaxsiy kabinetga qonunchilik hujjatlarida belgilangan tartibda Yagona identifikatsiya tizimi orqali kiriladi.
6. Topografik ishlar tugagandan soʻng ixtisoslashgan tashkilot operatorning veb-platformasida oʻzining shaxsiy kabineti orqali “Topografiya” maʼlumotlar bazasiga topografik maʼlumotlarni kiritish uchun ariza beradi.
Arizada quyidagi maʼlumotlar koʻrsatiladi:
obyekt nomi;
obyektning joylashuvi yoki manzili;
koordinata va balandlik tizimi;
topografik tasvir yoki rejaning masshtabi;
ish hajmi (maydonli obyektlar gektarda, chiziqli obyektlar metrda);
topografik ishlar yakunlangan sana;
topografik ishlar maqsadi;
buyurtmachi rekvizitlari.
Bunda ariza beruvchi topografik maʼlumotlarni raqamli koʻrinishda, AutoCAD dasturiy taʼminotining DWG vektor formatida yuklaydi.
Ushbu bandda nazarda tutilmagan boshqa hujjatlarni talab qilishga yoʻl qoʻyilmaydi.
7. Topografik maʼlumotlarda topografik ishlar amalga oshirilgan hudud chegarasi koʻrsatilishi shart. Arizada koʻrsatilgan ish hajmi topografik ishlar amalga oshirilgan hudud chegarasi maydoniga mos kelishi kerak.
8. Ariza beruvchining shaxsiy kabineti elektron xizmatlardan foydalanish, elektron xizmatlar koʻrsatish jarayonini kuzatish, shaxsiy maʼlumotlarni saqlash va qayta ishlash imkoniyatini beradi.
9. “Topografiya” maʼlumotlar bazasiga topografik maʼlumotlarni kiritish uchun ariza toʻldirgandan soʻng ariza beruvchi koʻrsatiladigan xizmatlar uchun toʻlov hisob-varaqasini oladi. Ariza beruvchi besh ish kuni ichida koʻrsatiladigan xizmatlar uchun operatorning hisobraqamiga toʻlovni amalga oshirishi shart. Koʻrsatiladigan xizmatlar uchun toʻlov amalga oshirilgandan soʻng, operator taqdim etilgan topografik maʼlumotlarni tekshirish va “Topografiya” maʼlumotlar bazasiga kiritish jarayonini boshlaydi.
10. Operator quyidagilarni tekshiradi:
topografik maʼlumotlar elementlarining tarkibi yirik masshtabli topografik rejalar uchun shartli belgilar klassifikatori talablariga muvofiqligi;
topografik maʼlumotlar va unda koʻrsatilgan joy holatining “Topografiya” maʼlumotlar bazasidagi mavjud maʼlumotlarga mosligi;
topografik maʼlumotlarning topologik tartibi — topografik elementlarning oʻzaro joylashuvi, ularning joydagi obyektlarning oʻzaro geometrik joylashuv holatiga mosligi;
arizada koʻrsatilgan maʼlumotlarga, koordinata va balandlik tizimlariga topografik maʼlumotlarning mosligi.
11. Taqdim qilingan topografik maʼlumotlarni tekshirish uchun topografik tasvirga olish jarayoni amalga oshirilgan hududning hajmiga (maydoniga yoki uzunligiga) qarab quyidagi muddatlar belgilanadi:
maydoni 0,5 gektargacha yoki uzunligi 300 metrgacha (chiziqli obyektlar uchun) — besh ish kuni;
maydoni 0,5 gektardan 2,0 gektargacha yoki uzunligi 300 metrdan 1000 metrgacha (chiziqli obyektlar uchun) — yetti ish kuni;
maydoni 2,0 gektardan 5,0 gektargacha yoki uzunligi 1000 metrdan 2500 metrgacha (chiziqli obyektlar uchun) — sakkiz ish kuni;
maydoni 5,0 gektardan 10,0 gektargacha yoki uzunligi 2500 metrdan 5000 metrgacha (chiziqli obyektlar uchun) — oʻn ish kuni;
maydoni 10 gektardan 50 gektargacha yoki uzunligi 5000 metrdan 50 000 metrgacha (chiziqli obyektlar uchun) — oʻn besh ish kuni;
50 gektardan ortiq maydon — yigirma ish kuni.
12. Taqdim qilingan topografik maʼlumotlarni ekspertlar tomonidan tekshirish jarayonida nomuvofiqliklar aniqlansa, topografik maʼlumot faylining oʻzida alohida qatlamda nomuvofiqliklarni koʻrsatgan holda topografik maʼlumotlar bir ish kuni ichida ariza beruvchiga qaytariladi.
13. Ariza beruvchi koʻrsatilgan nomuvofiqliklarni yigirma kun muddatda bartaraf qiladi (tuzatadi) hamda topografik maʼlumotlarni tekshirish va “Topografiya” maʼlumotlar bazasiga kiritish uchun operator veb-platformasidagi shaxsiy kabineti orqali qayta yuboradi.
Koʻrsatilgan nomuvofiqliklar yigirma kun muddat ichida bartaraf etilib, topografik maʼlumotlar qayta yuborilganda, operator xizmatlari uchun toʻlov olinmaydi.
14. Tekshiruvdan muvaffaqiyatli oʻtgan topografik maʼlumotlarga takrorlanmaydigan yagona roʻyxatga olish raqami beriladi va bu ishni bajargan ixtisoslashgan tashkilotga uning topografik maʼlumotlari “Topografiya” maʼlumotlar bazasiga kiritilganligi toʻgʻrisida QR-kodli xabar yuboriladi.
Topografik maʼlumotlarni tekshirish va “Topografiya” maʼlumotlar bazasiga kiritishda elektron xizmatlar mazkur Qoidalarga 1-ilovada keltirilgan sxemaga asosan koʻrsatiladi.
15. Ekspertlarning shaxsiy kabineti qabul qilingan arizalarni qayta ishlash uchun moʻljallangan boʻlib, elektron xizmatlar koʻrsatishda zarur hujjatlar va maʼlumotlarni tayyorlash, tahrir qilish, qidirish va arizaga javob berish imkoniyatini beradi.
16. Topografik maʼlumotlarni tekshirish, “Topografiya” maʼlumotlar bazasiga kiritish va “Topografiya” maʼlumotlar bazasida mavjud maʼlumotlarni taqdim etishga oid elektron xizmatlar operator va ixtisoslashgan tashkilot oʻrtasida tuziladigan ommaviy shartnoma asosida koʻrsatiladi. Topografik maʼlumotlarni tekshirish, “Topografiya” maʼlumotlar bazasiga kiritish va “Topografiya” maʼlumotlar bazasida mavjud maʼlumotlarni taqdim etishga oid elektron xizmatlarni koʻrsatish uchun toʻlov miqdorlari ushbu Qoidalarga 2-ilovaga muvofiq belgilanadi.
17. Operator quyidagi holatlarda amalga oshirilgan toʻlovni qaytarib bermasdan, “Topografiya” maʼlumotlar bazasiga topografik maʼlumotlarni kiritishni rad etishi mumkin:
ariza beruvchi oʻz shaxsiy kabineti orqali operator tomonidan yuborilgan nomuvofiqliklarni olgan kundan boshlab yigirma kun muddat ichida topografik maʼlumotlarning oʻzgartirilgan (tuzatilgan) faylini operatorga qayta yubormasa;
ariza beruvchi topografik maʼlumot faylida koʻrsatilgan nomuvofiqliklarni bartaraf etmasdan qayta yuborsa.
Ushbu bandda koʻrsatilmagan boshqa sabablarga koʻra amalga oshirilgan toʻlovni qaytarib bermasdan, “Topografiya” maʼlumotlar bazasiga topografik maʼlumotlarni kiritishni rad etish taqiqlanadi.
18. Agar “Topografiya” maʼlumotlar bazasiga topografik maʼlumotlarni kiritishni rad etish toʻgʻrisida qaror qabul qilinsa, rad etish sabablari koʻrsatilib, ariza beruvchining shaxsiy kabinetiga rad etish toʻgʻrisida xabar yuboriladi va ushbu xabarni ariza beruvchining elektron pochta manziliga takrorlash mumkin.
19. Ariza beruvchi topografik maʼlumotlarni “Topografiya” maʼlumotlar bazasiga kiritishni rad etish uchun asos boʻlgan sabablarni bartaraf etganidan keyin qayta murojaat qilgan taqdirda, ariza beruvchi tomonidan berilgan ariza yangi ariza sifatida qabul qilinadi va operator tomonidan belgilangan tartibda koʻrib chiqiladi.
20. Agar operator ushbu Qoidalarning 11-bandida belgilangan muddatda arizani koʻrib chiqib, taqdim etilgan topografik maʼlumotlar “Topografiya” maʼlumotlar bazasiga kiritilganligi yoxud rad etilganligi toʻgʻrisida xabarnoma bermasa, belgilangan muddat tugagandan soʻng tizim avtomatik ravishda taqdim etilgan topografik maʼlumotlarni “Topografiya” maʼlumotlar bazasiga kiritadi va ariza beruvchiga taqdim etilgan topografik maʼlumotlar avtomatik ravishda “Topografiya” maʼlumotlar bazasiga kiritilganligi toʻgʻrisida QR-kodli xabar yuboradi.
21. Topografik maʼlumotlarni tekshirish va “Topografiya” maʼlumotlar bazasiga kiritish muddatlari xizmatlar koʻrsatganlik uchun haq toʻlangan kundan boshlab hisoblanadi. Agar operator tekshirish vaqtida nomuvofiqliklarni aniqlasa va topografik maʼlumotlarni qayta koʻrib chiqish (tuzatish) uchun qaytarsa, bu holda topografik maʼlumotlarni tekshirish muddati koʻrsatilgan nomuvofiqliklar bartaraf etilib, tuzatilgan topografik maʼlumot qayta taqdim etilgunga qadar toʻxtatib turiladi. Tuzatilgan topografik maʼlumot qayta taqdim etilgan kundan eʼtiboran tekshirish muddatlarining oʻtishi davom etadi.
22. Topografik maʼlumotlar “Topografiya” maʼlumotlar bazasiga kiritilgandan soʻng qurilish vaqtida mavjud yer osti muhandislik tarmoqlarining joylashuvi yoxud ularning belgilanishi, joyning holati “Topografiya” maʼlumotlar bazasiga kiritilgan topografik rejada aks ettirilgan holatga mos kelmasligi aniqlansa, topografik tasvirga olish jarayoni buyurtmachisi bu haqda darhol ushbu hududning topografik rejasini ishlab chiqqan ixtisoslashgan tashkilotga xabar beradi.
Ixtisoslashgan tashkilot besh ish kuni mobaynida topografik ishlar qayta bajarilishini tashkil etishi va buyurtmachi hamda tegishli kommunikatsiya tarmogʻi vakili ishtirokida nomuvofiqliklar bartaraf etilganligi toʻgʻrisida dalolatnoma imzolagan holda, topografik rejaning yangi (tuzatilgan) versiyasini tuzishi shart.
Topografik ishlar yakunlangandan soʻng ixtisoslashgan tashkilot operatorning veb-platformasidagi oʻz shaxsiy kabineti orqali yangilangan topografik maʼlumotlarni “Topografiya” maʼlumotlar bazasiga kiritish uchun mazkur hujjatda belgilangan tartibda ariza beradi.
3-bob. Topografik maʼlumotlar “Topografiya” maʼlumotlar bazasiga kiritilganligi toʻgʻrisidagi elektron xabarlar repozitoriysi
23. Elektron xizmatlar koʻrsatish natijalari, yaʼni topografik maʼlumotlar “Topografiya” maʼlumotlar bazasiga kiritilganligi toʻgʻrisida yuborilgan elektron xabarlar “Topografiya” maʼlumotlar bazasining elektron hujjatlar repozitoriysida saqlanadi.
24. Ariza beruvchi oʻzining shaxsiy kabinetidan foydalangan holda, operatorning veb-platformasida yaratilgan elektron xabarlar nusxasini olish imkoniyatiga ega boʻladi.
25. Davlat organlari operatorning veb-platformasida yaratilgan elektron xabarning yagona roʻyxatga olish raqamini elektron hujjatlar repozitoriysi rasmiy veb-sahifasiga kiritish yoxud elektron xabarda koʻrsatilgan QR-kodni skaner qilish orqali murojaat etuvchilardan olingan elektron xabarlar nusxalarining haqiqiyligini tekshirish va ular haqidagi maʼlumotlarni olish imkoniyatiga ega boʻladi.
4-bob. “Topografiya” maʼlumotlar bazasida saqlanadigan maʼlumotlarning tarkibi
26. Operator har bir ariza boʻyicha tekshirilgan va “Topografiya” maʼlumotlar bazasiga kiritilgan topografik maʼlumotlarning hisobini yuritadi va unda quyidagi maʼlumotlarni koʻrsatadi:
obyekt nomi;
obyektning joylashuvi yoki manzili;
koordinata va balandlik tizimi;
topografik tasvir yoki rejaning masshtabi;
ish hajmi (maydonli obyektlar gektarda, chiziqli obyektlar metrda);
topografik ishlar bajarilgan (yakunlangan) sana;
topografik ishlar maqsadi;
buyurtmachi rekvizitlari;
roʻyxatga olish raqami.
Operator bu maʼlumotlarni geodeziya va kartografiya faoliyati sohasidagi maxsus vakolatli davlat organi, Mudofaa vazirligi, sud va huquqni muhofaza qilish organlarining soʻroviga binoan taqdim etadi.
27. Operator topografik maʼlumotlarni “Topografiya” maʼlumotlar bazasida alohida fayllar holatida saqlaydi.
Mahalliy yoki davlat geodeziya koordinatalar tizimida tegishli masshtabdagi topografik tasvirlar va rejalarning nomenklatura varaqlariga mos holda alohida topshirilgan fayllarni yigʻish va navbatchi topografik rejalar koʻrinishida saqlash mumkin.
Operator topografik tasvirlar va rejalarning nomenklatura varaqlari joylashuv sxemasini oʻz veb-platformasida eʼlon qiladi.
28. “Topografiya” maʼlumotlar bazasi 1:200, 1:500 va 1:1000 masshtablar qatoriga mos holda, har bir masshtab qatori uchun alohida yuritiladi.
29. Operator maʼlumotlarni zaxiralashni va “Topografiya” maʼlumotlar bazasida saqlashni taʼminlaydi. Maʼlumotlarni saqlash muddati — 10 yil.
30. “Topografiya” maʼlumotlar bazasi tugatilgan taqdirda, uning maʼlumotlari belgilangan tartibda saqlash uchun davlat kartografiya-geodeziya fondiga oʻtkaziladi.
5-bob. Boshqa axborot tizimlari bilan oʻzaro axborot almashinuvi
31. “Topografiya” maʼlumotlar bazasi davlat organlarining quyidagi axborot tizimlari bilan oʻzaro bogʻliq holda tashkil etiladi:
“Shaffof qurilish” milliy axborot tizimi;
Davlat shaharsozlik kadastri geografik axborot tizimi geoportali;
Davlat geodeziya va kartografiya fondi maʼlumotlar bazasi;
“Elektron hukumat” tizimi foydalanuvchilarini identifikatsiya qilishning yagona axborot tizimi;
“Litsenziya” axborot tizimi.
32. Operator har bir ish kuni yakunlangach, ish kuni davomida “Topografiya” maʼlumotlar bazasiga kiritilgan topografik maʼlumotlarni “FTR” fayl uzatish protokoli serveri (keyingi oʻrinlarda — FTR-server) yordamida Davlat geodeziya va kartografiya fondi maʼlumotlar bazasiga taqdim etadi.
Tomonlar (maʼlumotlar bazasi egalari) oʻzaro kelishuv asosida topografik maʼlumotlarni uzatishning boshqa usullaridan foydalanishlari mumkin.
33. Topografik maʼlumotlar raqamli koʻrinishda, AutoCAD dasturiy taʼminotining DWG vektor formatida taqdim etiladi.
6-bob. “Topografiya” maʼlumotlar bazasidagi maʼlumotlarni foydalanuvchilarga taqdim etish tartibi
34. “Topografiya” maʼlumotlar bazasidan soʻralgan maʼlumotlar quyidagi uslublarda taqdim etilishi mumkin:
operator veb-platformasi orqali;
FTR-serverlardan foydalangan holda;
elektron pochta xizmatidan foydalangan holda;
qogʻoz shaklida (buyurtma asosida qogʻozga chop etish).
35. Operator foydalanuvchining arizasi asosida topografik maʼlumotlarni quyidagi elektron fayl formatlarida tayyorlaydi va taqdim etadi:
AutoCAD dasturiy taʼminotining DWG vektor formati;
portativ hujjat fayl formati (PDF);
tasvirli rastr fayl formati (JPEG yoki PNG).
36. “Topografiya” maʼlumotlar bazasida mavjud maʼlumotlarni olish uchun foydalanuvchi operatorning veb-platformasida oʻzining shaxsiy kabineti orqali arizani yuboradi.
Arizada quyidagi maʼlumotlar koʻrsatiladi:
maʼlumot soʻralayotgan hudud joylashuv oʻrni, aniq chegarasi koʻrsatilgan holda;
soʻralayotgan maʼlumot turi: topografik maʼlumot/geodezik punktlar;
soʻralayotgan topografik maʼlumot masshtabi;
maʼlumotlarni taqdim etish uslubi va formati;
maʼlumotlardan foydalanish maqsadi;
buyurtmachi rekvizitlari.
Bunda maʼlumotlar soʻralayotgan hudud maydoni ariza beruvchi tomonidan koʻrsatilgan chegara asosida avtomatik ravishda tizim tomonidan hisoblanadi.
37. Operator uch ish kuni davomida arizada koʻrsatilgan hudud uchun “Topografiya” maʼlumotlar bazasida mavjud maʼlumotlarni oʻrganadi va oʻrganishlar natijasi asosida:
mavjud maʼlumotlarni taqdim etish boʻyicha elektron xizmatlar uchun toʻlov hisob-varaqasini va taqdim etiladigan maʼlumotlar roʻyxatini shakllantiradi hamda ariza beruvchiga joʻnatadi;
arizada koʻrsatilgan hudud uchun “Topografiya” maʼlumotlar bazasida maʼlumotlar mavjud boʻlmasa, ariza beruvchiga maʼlumotlar mavjud emasligi toʻgʻrisida xabar yuboradi va mazkur ariza yakunlangan hisoblanadi.
38. Ariza beruvchi maʼlumotlarni taqdim etishga oid xizmatlar uchun toʻlov hisobvaraqasini va taqdim etiladigan maʼlumotlar roʻyxatini olgandan soʻng ixtiyoriga koʻra besh ish kuni davomida koʻrsatiladigan xizmatlar uchun operatorning hisobraqamiga toʻlovni amalga oshiradi. Belgilangan muddatda toʻlov amalga oshirilmasa, mazkur ariza boʻyicha elektron xizmat amalga oshirilmaydi va ariza yakunlangan hisoblanadi.
39. Ariza beruvchi “Topografiya” maʼlumotlar bazasida mavjud maʼlumotlarni taqdim etishga oid xizmatlar uchun toʻlovni amalga oshirgan taqdirda operator uch ish kuni davomida ariza beruvchining soʻroviga asosan taqdim etiladigan maʼlumotlarni mazkur Qoidalarda va arizada belgilangan uslubda va formatda ariza beruvchiga taqdim etadi hamda ariza beruvchining shaxsiy kabinetiga uning arizasiga asosan maʼlumotlar taqdim etilganligi toʻgʻrisida xabar yuboradi. Ushbu xabarni ariza beruvchining elektron pochta manziliga takrorlash mumkin.
“Topografiya” maʼlumotlar bazasidagi maʼlumotlarni foydalanuvchilarga taqdim etishda elektron xizmatlar koʻrsatish sxemasi mazkur Qoidalarga 3-ilovada keltirilgan.
7-bob. Yakunlovchi qoidalar
40. Ariza beruvchi oʻzi taqdim etgan topografik maʼlumotlarning haqiqiyligi za aktualligini taʼminlash uchun javobgardir.
41. Davlat organlari oʻzlarining idoraviy axborot tizimlari va maʼlumotlar bazalaridan olingan maʼlumotlarning haqqoniyligi va aktualligini taʼminlaydi.
42. Tizim ishtirokchilari va foydalanuvchilariga axborot tizimiga kirish uchun berilgan roʻyxatga olish maʼlumotlarini (foydalanuvchi nomlari, loginlar, parollar va boshqalarni) boshqa uchinchi shaxslarga berish taqiqlanadi.
43. Ushbu Qoidalar talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Shaharsozlik faoliyatini geoaxborot bilan taʼminlash uchun markazlashtirilgan topografik maʼlumotlar bazasini yaratish va yuritish qoidalariga 1-ILOVA
Topografik maʼlumotlarni tekshirish va “Topografiya” maʼlumotlar bazasiga kiritishda elektron xizmatlar koʻrsatish
Bosqichlar Subyektlar Tadbirlar Ijro muddatlari 1-bosqich Ariza beruvchi Topografik ishlar tugagandan soʻng ixtisoslashgan tashkilot operatorning veb-platformasida oʻzining shaxsiy kabineti orqali “Topografiya” maʼlumotlar bazasiga topografik maʼlumotlarni kiritish uchun ariza beradi va talab etilgan maʼlumotlarni yuklaydi. Ixtiyoriga koʻra 2-bosqich Operator Koʻrsatiladigan elektron xizmatlar uchun toʻlov hisob-varaqasini shakllantiradi va ariza beruvchiga joʻnatadi. Bir soat 3-bosqich Ariza beruvchi Toʻlov hisobvaraqasida koʻrsatilgan toʻlovni amalga oshiradi. Besh ish kuni 4-bosqich Operator Taqdim etilgan topografik maʼlumotlarni tekshiradi va tekshiruvdan muvaffaqiyatli oʻtgan topografik maʼlumotlarni roʻyxatga olib, ariza beruvchiga topografik maʼlumotlar “Topografiya” maʼlumotlar bazasiga kiritilganligi toʻgʻrisida QR-kodli xabar yuboradi. Tekshiruvda nomuvofiqliklar aniqlansa, topografik maʼlumotni tuzatmalar kiritish uchun qaytaradi. Qoidalarning 11-bandida koʻrsatilgan muddatlarda 4a-bosqich Ariza beruvchi Koʻrsatilgan nomuvofiqliklarni bartaraf etgan holda, topografik maʼlumotni yangi versiyasini qayta kiritadi. Yigirma kun 4b-bosqich Operator Qayta taqdim etilgan topografik maʼlumotlarni tekshiradi va tekshiruvdan muvaffaqiyatli oʻtgan topografik maʼlumotlarni roʻyxatga olib, ariza beruvchiga topografik maʼlumotlar “Topografiya” maʼlumotlar bazasiga kiritilganligi toʻgʻrisida QR-kodli xabar yuboradi. Tekshiruv jarayonida oldin koʻrsatilgan nomuvofiqliklar toʻliq bartaraf etilmaganligi aniqlansa, taqdim qilingan topografik maʼlumotlarni “Topografiya” maʼlumotlar bazasiga kiritish rad etiladi Qoidalarning 11-bandida koʻrsatilgan muddatlarda
Shaharsozlik faoliyatini geoaxborot bilan taʼminlash uchun markazlashtirilgan topografik maʼlumotlar bazasini yaratish va yuritish qoidalariga 2-ILOVA
Topografik maʼlumotlarni tekshirish, “Topografiya” maʼlumotlar bazasiga kiritish va “Topografiya” maʼlumotlar bazasida mavjud maʼlumotlarni taqdim etishga oid elektron xizmatlarni koʻrsatish uchun toʻlov
T/r Xizmat turi Oʻlchov birligi Xizmat narxi * (BHM hisobida) 1. Maʼlumotlar bazasida mavjud maʼlumotlarni taqdim etish 1.1. Topografik maʼlumotlar 1 fayl ** 0,3 1.2. Geodezik punktlarning koordinatalari (x, y, z) 1 punkt 0,1 2. Topografik maʼlumotlarni qabul qilish, tekshirish va “Topografiya” maʼlumotlar bazasiga kiritish 2.1. maydoni 0,5 ga va undan kichik 1 obyekt *** 0,5 2.2. maydoni 0,5 ga dan 1,0 ga gacha 1 obyekt 0,8 2.3. maydoni 1,0 ga dan 2,0 ga gacha 1 obyekt 1,0 2.4. maydoni 2,0 ga dan 5,0 ga gacha 1 obyekt 1,3 2.5. maydoni 5,0 ga dan ortiq boʻlgan obyektlarning qoʻshimcha har bir gektari uchun 1 obyekt 0,2 3. Muhandislik kommunikatsiyalarining ijroviy topografik tasvirlarini qabul qilish, tekshirish, “Topografiya” maʼlumotlar bazasiga kiritish va navbatchi xaritani yangilash. Muhandislik kommunikatsiyasining uzunligi 3.1. 50 metrgacha 1 obyekt 0,2 3.2. 51 metrdan 300 metrgacha 1 obyekt 0,5 3.3. 300 metrdan ortiq boʻlganda qoʻshimcha har 100 metr uchun 1 obyekt 0,1 4. Demontaj qilingan muhandislik kommunikatsiyalarining dalolatnomalarini va ijroviy topografik tasvirlarini qabul qilish, tekshirish, “Topografiya” maʼlumotlar bazasiga kiritish va navbatchi xaritani yangilash. Muhandislik kommunikatsiyasining uzunligi 4.1. 50 metrgacha 1 obyekt 0,15 4.2. 51 metrdan 300 metrgacha 1 obyekt 0,3 4.3. 300 metrdan ortiq boʻlganda qoʻshimcha har 100 metr uchun 1 obyekt 0,05
Shaharsozlik faoliyatini geoaxborot bilan taʼminlash uchun markazlashtirilgan topografik maʼlumotlar bazasini yaratish va yuritish qoidalariga 3-ILOVA
“Topografiya” maʼlumotlar bazasidagi maʼlumotlarni foydalanuvchilarga taqdim etishda elektron xizmatlar koʻrsatish
Bosqichlar Subyektlar Tadbirlar Ijro muddatlari 1-bosqich Ariza beruvchi Operatorning veb-platformasida oʻzining shaxsiy kabineti orqali “Topografiya” maʼlumotlar bazasida mavjud maʼlumotlarni olish uchun ariza beradi. Ixtiyoriga koʻra 2-bosqich Operator Arizada koʻrsatilgan hudud uchun “Topografiya” maʼlumotlar bazasida mavjud maʼlumotlarni oʻrganadi, maʼlumotlarni taqdim etish boʻyicha elektron xizmatlar uchun toʻlov hisobvaraqasini va taqdim etiladigan maʼlumotlar roʻyxatini shakllantiradi hamda ariza beruvchiga joʻnatadi. Arizada koʻrsatilgan hudud uchun “Topografiya” maʼlumotlar bazasida maʼlumotlar mavjud boʻlmasa, arizachiga maʼlumotlar mavjud emasligi toʻgʻrisida xabar yuboradi. Uch ish kuni 3-bosqich Ariza beruvchi Hisob-varaqasida koʻrsatilgan toʻlovni amalga oshiradi. Ixtiyoriga koʻra oʻn ish kuni davomida 4-bosqich Operator Arizachining shaxsiy kabinetiga uning soʻroviga asosan maʼlumotlar taqdim etilganligi toʻgʻrisida xabar yuboriladi va ushbu xabarni arizachining elektron pochta manziliga takrorlash mumkin uch ish kuni
Vazirlar Mahkamasining 2025-yil 12-fevraldagi 85-son qaroriga 2-ILOVA
Yirik masshtabli topografik rejalar uchun shartli belgilar
Vazirlar Mahkamasining 2025-yil 12-fevraldagi 85-son qaroriga 3-ILOVA
Markazlashtirilgan topografik maʼlumotlar bazasini ishga tushirish va yanada rivojlantirish boʻyicha
T/r Chora-tadbirlar nomi Amalga oshirish mexanizmi Ijro muddati Ijro uchun masʼullar 1. Yirik masshtabli topografik tasvirlar va rejalar markazlashtirilgan topografik maʼlumotlar bazasiga (keyingi oʻrinlarda — “Topografiya” maʼlumotlar bazasi) kiritib borilishini taʼminlovchi veb-platformani ishlab chiqish va ishga tushirish. 1. Veb-platformani ishlab chiqish uchun konsepsiya, texnik topshiriqni shakllantirish va oʻrnatilgan tartibda kelishish. 2025-yil aprel Qurilish va uy-joy kommunal xoʻjaligi vazirligi, Qurilishda muhandislik qidiruvlari, geoaxborot va shaharsozlik kadastri ilmiy-tekshirish instituti 2. Veb-platformani ishlab chiqish va test rejimida ishga tushirish. 2025-yil iyul 3. Veb-platformadan foydalanish boʻyicha qoʻllanmalarni ishlab chiqish. 2025-yil iyul 2. “Topografiya” maʼlumotlar bazasini boshqa axborot tizimlari va maʼlumotlar bazalari bilan integratsiya qilish hamda axborot almashinuvi boʻyicha hamkorlikni taʼminlash. 1. “Elektron hukumat” axborot tizimi foydalanuvchilarini identifikatsiya qilishning yagona axborot tizimi bilan integratsiya qilinishini taʼminlash. 2025-yil iyun Qurilish va uy-joy kommunal xoʻjaligi vazirligi, Qurilishda muhandislik qidiruvlari, geoaxborot va shaharsozlik kadastri ilmiy-tekshirish instituti, Raqamli texnologiyalar vazirligi, Adliya vazirligi, Soliq qoʻmitasi, Kadastr agentligi, tegishli vazirlik va idoralar 2. “Litsenziya” axborot tizimi bilan integratsiya qilinishini taʼminlash. 2025-yil iyun 3. Yuridik shaxslarning maʼlumotlar bazalari bilan integratsiya qilinishini taʼminlash. 2025-yil iyun 4. “Shaffof qurilish” milliy axborot tizimi bilan integratsiya qilinishini taʼminlash. 2025-yil iyun 5. Davlat shaharsozlik kadastri geografik axborot tizimi geoportali bilan integratsiya qilinishini taʼminlash. 2025-yil iyun 6. Davlat geodeziya va kartografiya fondi maʼlumotlar bazasi bilan integratsiya qilinishini taʼminlash. 2025-yil iyun 7. Zarurat tugilganda boshqa axborot tizimlari va maʼlumotlar bazalari bilan integratsiya qilinishini taʼminlash. Zaruratga koʻra 3. “Topografiya” maʼlumotlar bazasidan foydalanish boʻyicha oʻquv-amaliy seminarlarni tashkil etish. Quyidagi hududiy tashkilotlar va idoralar xodimlari uchun “Topografiya” maʼlumotlar bazasidan foydalanish zarurati, mazkur qaror ijrosini taʼminlashdagi ahamiyati boʻyicha oʻquv-amaliy seminarlarni tashkil etish va oʻtkazish: geodeziya ishlarini bajarishga ixtisoslashgan tashkilotlar; loyiha tashkilotlari; shaharsozlik hujjatlari ekspertizasi tashkilotlari; buyurtmachi xizmatlari; muhandislik-kommunikatsiya tarmoqlarining ekspluatatsiya tashkilotlari; qurilish sohasida nazorat inspeksiyalari; qurilishi tugallangan obyektlarni ekspluatatsiyaga qabul qilish komissiyasi aʼzolari va boshqalar. Grafik asosida (2025-yil iyul — sentabr) Qoraqalpogʻiston Respublikasi Vazirlar Kengashi, Toshkent shahri va viloyatlar hokimliklari, Qurilish va uy-joy kommunal xoʻjaligi vazirligi, Qurilishda muhandislik qidiruvlari, geoaxborot va shaharsozlik kadastri ilmiy-tekshirish instituti, tegishli vazirlik, idora va tashkilotlar 4. “Topografiya” maʼlumotlar bazasini modernizatsiya qilish va yanada takomillashtirish. “Topografiya” maʼlumotlar bazasini modernizatsiya qilish va yanada takomillashtirish boʻyicha texnik va tashkiliy choralar amalga oshirilishini taʼminlash. Doimiy ravishda Qurilishda muhandislik qidiruvlari, geoaxborot va shaharsozlik kadastri ilmiy-tekshirish instituti
Oʻzbekiston Respublikasining Bosh vaziri A. ARIPOV
Toshkent sh.,
2025-yil 12-fevral,
85-son