📅 2025-yil 24-fevral · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 24 февраль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 24 февраля 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 24 February 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
Давлат харидларини корпоратив банк карталари орқали амалга ошириш тартиби тўғрисидаги низомни тасдиқлаш ҳақида
Ўзбекистон Республикаси Президентининг «Коррупцияга қарши курашиш тизимини янада такомиллаштириш ҳамда давлат органлари ва ташкилотлари фаолияти устидан жамоатчилик назорати тизими самарадорлигини ошириш чора-тадбирлари тўғрисида» 2023 йил 27 ноябрдаги ПФ-200-сон Фармони ҳамда «Давлат харидлари тизимини такомиллаштириш ва унда кичик тадбиркорлик субъектлари иштирокини рағбатлантириш чора-тадбирлари тўғрисида» 2024 йил 10 июлдаги ПҚ-249-сон қарори ижросини таъминлаш, шунингдек, давлат харидларини амалга ошириш жараёнини соддалаштириш орқали давлат буюртмачилари ва тадбиркорлик субъектлари учун қўшимча имкониятлар яратиш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Давлат харидлари тизимини такомиллаштириш ва унда кичик тадбиркорлик субъектлари иштирокини рағбатлантириш чора-тадбирлари тўғрисида» 2024 йил 10 июлдаги ПҚ-249-сон қарорининг 6-бандида давлат буюртмачилари томонидан корпоратив банк карталаридан («харид карталари») фойдаланган ҳолда, харидларни амалга ошириш тартибини ишлаб чиқиш белгиланганлиги маълумот учун қабул қилинсин.
2. Қуйидагиларни назарда тутувчи Давлат харидларини корпоратив банк карталари орқали амалга ошириш тартиби тўғрисидаги низом 1-иловага мувофиқ тасдиқлансин:
хизмат сафарлари, шу жумладан, транспорт ва яшаш харажатлари учун тўловларни амалга ошириш;
бензин, суюлтирилган ва сиқилган газ, авиа ва дизель ёқилғисида ҳаракатланувчи транспорт воситаларига ёқилғи қуйиш, электромобилларни электр энергияси билан қувватлантириш билан боғлиқ харидлар.
3. Ўзбекистон Республикаси Иқтисодиёт ва молия вазирлиги Рақамли технологиялар вазирлиги ҳамда тўлов тизими операторлари билан биргаликда 2025 йил 1 июлга қадар давлат харидлари махсус ахборот порталида корпоратив банк карталари орқали амалга ошириладиган давлат харидларининг ҳисобини юритиш имконини берувчи алоҳида ахборот тизимини яратсин ҳамда унинг тегишли вазирлик ва идоралар ахборот тизимлари билан интеграция қилинишини таъминласин.
4. Вазирлар Маҳкамасининг 2022 йил 24 июндаги 345-сон қарори билан тасдиқланган Таъсисчиси бюджет ташкилотлари бўлган унитар корхоналарга ғазначилик орқали хизмат кўрсатиш тартиби тўғрисидаги низомга 2-иловага мувофиқ ўзгартиришлар киритилсин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А.Қўчқоров зиммасига юклансин.
Вазирлар Маҳкамасининг 2025 йил 24 февралдаги 108-сон қарорига 1-ИЛОВА
Давлат харидларини корпоратив банк карталари орқали амалга ошириш тартиби тўғрисида
1-боб. Умумий қоидалар
1. Мазкур Низом давлат буюртмачиларининг миллий валютада нақд пулсиз шаклда корпоратив банк карталари (харид карталари) орқали давлат харидларини амалга ошириш тартибини белгилайди.
2. Ушбу Низомда қуйидаги асосий тушунчалардан фойдаланилади:
корпоратив банк картаси (кейинги ўринларда — харид картаси) — давлат буюртмачисига банк томонидан бериладиган, харид картасини сақловчига карта ҳисобварағида ҳисобда турган маблағларни тасарруф этган ҳолда товарлар, ишлар ёки хизматларни сотиб олиш учун нақд пулсиз шаклда миллий валютада тўловларни тўлаш ҳуқуқини берувчи банк картаси;
шахсий кабинет — электрон давлат харидларида иштирок этишни, зарур ахборотни жойлаштиришни ва ундан фойдаланишни таъминлайдиган давлат харидлари субъектлари ва харид қилиш тартиб-таомилларининг давлат назоратини амалга оширувчи давлат органларининг махсус ахборот порталидаги индивидуал саҳифаси;
харид картасини сақловчи — давлат буюртмачиси ва эмитент банк ўртасидаги шартнома асосида харид картасидан фойдаланувчи давлат буюртмачиси ёки у ваколат берган шахс;
ҳисобдор шахс — давлат буюртмачиси томонидан харид картасидан фойдаланиш ҳуқуқи берилган жисмоний шахс.
3. Давлат буюртмачиси харид картасидан фойдаланган ҳолда, давлат харидларини амалга ошириш мақсадида харид картаси ҳисобварағини очиш учун қонунчиликда белгиланган тартибда эмитент банкка мурожаат қилади. Бунда бюджет буюртмачисининг ҳар бир тегишли шахсий ғазна ҳисобварағи бўйича эмитент банкда алоҳида банк транзит ҳисобварағи очилади.
4. Қуйидаги товарлар (ишлар, хизматлар) харид карталаридан фойдаланган ҳолда харид қилиниши мумкин:
а) Ўзбекистон Республикаси ҳудудида давлат буюртмачиси фаолиятини амалга ошириш билан боғлиқ бўлган хизмат сафарлари ва бошқалар учун чипталар (авиа, темирйўл ва йўналиш транспорти) ҳамда яшаш харажатлари.
Бунда ушбу кичик бандга мувофиқ давлат харидлари Вазирлар Маҳкамасининг «Ўзбекистон Республикаси ҳудудида хизмат сафарлари тўғрисидаги низомни тасдиқлаш ҳақида» 2022 йил 2 августдаги 424-сон қарорида белгиланган тартибда амалга оширилади;
б) давлат буюртмачисининг эҳтиёжлари учун белгиланган тартибда талаб этиладиган бензин, суюлтирилган ва сиқилган газ, авиа ва дизель ёқилғисида ҳаракатланувчи транспорт воситаларига ёқилғи қуйиш, электромобилларни электр энергияси билан қувватлантириш харажатлари;
в) корпоратив буюртмачилар томонидан қонунчиликка мувофиқ тўғридан-тўғри шартномалар тузиш ҳуқуқи берилган ҳолларда товарларнинг (ишларнинг, хизматларнинг) бир молия йили давомида базавий ҳисоблаш миқдорининг бир минг баравари миқдоригача амалга ошириладиган давлат харидлари, ушбу банднинг «а» ва «б» кичик бандлари кўрсатилган харидлар бундан мустасно.
5. Давлат буюртмачилари томонидан харид картасига иш ҳақи ва унга тенглаштирилган тўловлар, пенсиялар, нафақалар, стипендиялар ва дивидендлар ўтказилишига, шунингдек, харид картаси ёрдамида нақд пул берилиши ва (ёки) чет эл валютаси сотиб олинишига йўл қўйилмайди.
Давлат буюртмачилари томонидан бошланғич нархни пасайтириш учун ўтказиладиган аукцион савдоларида иштирок этиб, харидларни амалга ошириш учун харид картасидан фойдаланиш тақиқланади.
6. Харид картасидан фойдаланиш ҳуқуқига эга бўлган ҳисобдор шахслар рўйхати давлат буюртмачиси раҳбарининг буйруғи (фармойиши) билан белгиланади. Ҳисобдор шахслар мазкур давлат буюртмачиларининг ходимлари бўлиши шарт.
7. Харид картасига маблағларнинг илк бор ҳисобга киритилиши ва кейинчалик тўлдирилиши учун давлат буюртмачисида белгиланган тартибда раҳбар ёки у ваколат берган шахснинг буйруғи асос бўлади.
8. Харид картасининг эмитент банки харид картасини сақловчига юборилган ва ундан олинган хабарномаларнинг ушбу хабарномалар юборилган ва олинган кундан эътиборан уч йилдан кам бўлмаган муддат мобайнида сақланишини таъминлайди.
9. Давлат харидлари соҳасидаги ваколатли орган томонидан давлат харидлари бўйича махсус ахборот порталида очилган кабинет орқали харид картасига Ўзбекистон Республикаси Иқтисодий фаолият турларининг умумдавлат таснифлагичига (кейинги ўринларда — ИФУТ) мувофиқ ушбу Низомнинг 4-бандида назарда тутилмаган давлат харидларини амалга оширишга чекловлар ўрнатилади, бунда ўрнатилган чекловлар харид карталари учун доимий бўлиб, банк пул ўтказмаларидан аввал жорий этилади.
2-боб. Корпоратив буюртмачилар томонидан харид картасидан фойдаланилган ҳолда давлат харидларини амалга ошириш тартиби
10. Корпоратив буюртмачиларнинг харид карталаридан фойдаланилган ҳолдаги давлат харидлари мазкур Низомнинг умумий қоидаларини инобатга олган ҳолда, ушбу бобда назарда тутилган тартибда амалга оширилади.
11. Корпоратив буюртмачилар ушбу Низомнинг 4-бандида назарда тутилган давлат харидлари учун банк транзит ҳисобварағига тўлов топшириқномаси асосида маблағлар ўтказади.
12. Корпоратив буюртмачилар ўз тасарруфида бўлган харид картасига режалаштирилган маблағлар доирасида фойдаланиш чекловларини қўйиши мумкин.
13. Ҳисобдор шахслар харид картаси орқали ушбу Низомнинг 4-бандида белгиланган давлат харидларини амалга оширади.
14. Харид картаси орқали амалга ошириладиган давлат харидлари тўғрисидаги ахборот Ўзбекистон Республикаси Солиқ қўмитасининг ахборот тизими орқали махсус ахборот порталида очилган шахсий кабинетга юборилади.
Бунда махсус ахборот порталида очилган шахсий кабинетга келиб тушган барча ахборотлар ҳисобот кўринишига келтирилади ва электрон шаклда автоматик равишда шартномаларнинг ягона реестрида шакллантирилади.
15. Корпоратив буюртмачи томонидан харид картаси ёрдамида амалга ошириладиган давлат харидлари тўғрисидаги ахборот электрон маълумотлар алмашинуви йўли билан давлат харидларининг махсус ахборот порталида акс эттирилади. Бунда харид картасини сақловчи томонидан харид картаси ёрдамида амалга оширилган давлат харидлари тўғрисидаги ҳисобот давлат буюртмачисининг бухгалтериясига тақдим этилиши талаб этилмайди.
3-боб. Бюджет буюртмачиси томонидан харид карталардан фойдаланилган ҳолда давлат харидларини амалга ошириш тартиби
16. Бюджет буюртмачисининг харид картасидан фойдаланилган ҳолдаги давлат харидлари ушбу Низомнинг умумий қоидаларини инобатга олган ҳолда, ушбу бобда назарда тутилган тартибда амалга оширилади.
17. Бюджет буюртмачиси харид картасига маблағларни ўтказиш учун «UzASBO» ДМда юридик мажбуриятларни рўйхатдан ўтказишга (ҳисобга олишга) буюртма (кейинги ўринларда — буюртма) шакллантиради ва электрон ҳужжат шаклида Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитаси (кейинги ўринларда — Ғазначилик хизмати) бўлимларига юборади.
Бунда маблағлар бюджет буюртмачиларининг харажатлар сметасида ушбу Низомнинг 4-банди «а» ва «б» кичик бандларида назарда тутилган давлат харидлари учун режалаштирилган маблағлар доирасида банк транзит ҳисобварағига буюртма ва тўлов топшириқномаси асосида ўтказиб берилади.
18. Бюджет буюртмачилари томонидан рўйхатдан ўтказиш учун электрон шаклда юборилган буюртмалар Ғазначилик хизмати бўлимлари томонидан бир иш куни ичида Ўзбекистон Республикаси Иқтисодиёт ва молия вазирлигининг давлат молиясини бошқариш ахборот тизимида (кейинги ўринларда — ДМБАТ) электрон шаклда рўйхатдан ўтказилади ёки ҳисобга олинади. Камчиликлар аниқланган тақдирда, тегишли камчиликлар кўрсатилган ҳолда, электрон шаклда бюджет буюртмачиларига қайтарилади.
19. Ғазначилик хизмати бўлимлари томонидан рўйхатдан ўтказилган ёки ҳисобга олинган буюртмаларга асосан бюджет буюртмачилари тўлов топшириқномаларини «UzASBO» ДМда шакллантиради ва электрон шаклда Ғазначилик хизмати бўлимларига юборади.
Ушбу тўлов топшириқномасида назарда тутилган маблағлар Ғазначилик хизмати бўлимлари томонидан бир иш куни мобайнида бюджет буюртмачисининг рўйхатдан ўтказилган буюртмаси доирасида эмитент банкда очилган тегишли (рўйхатдан ўтказилган ёки ҳисобга олинган буюртманинг ҳисобварағи) банк транзит ҳисобварағига ўтказилади. Камчиликлар аниқланганда эса, тегишли камчиликлари кўрсатилган ҳолда электрон шаклда бюджет буюртмачиларига қайтарилади.
Бюджет буюртмачиларнинг харид картасига кирим қилиш мақсадида банк транзит ҳисобварағига маблағларнинг тўғри ўтказилишини назорат қилиш Ғазначилик хизмати бўлимларига юкланади.
20. Бюджет буюртмачилари ўз тасарруфида бўлган харид картасидаги маблағлардан фойдаланиш учун тегишли чекловларни қўйиши мумкин.
21. Бюджет буюртмачисининг ҳисобдор шахслари харид картаси орқали ушбу Низом 4-бандининг «а» ва «б» кичик бандларида белгиланган давлат харидларини амалга оширади.
22. Бюджет буюртмачисига очилган харид картаси орқали амалга ошириладиган давлат харидлари тўғрисидаги ахборот Ўзбекистон Республикаси Солиқ қўмитасининг ахборот тизими орқали махсус ахборот порталида очилган шахсий кабинетга юборилади.
Бунда махсус ахборот порталида очилган шахсий кабинетга келиб тушган барча ахборотлар ҳисобот кўринишига келтирилиб, ДМБАТга ва «UzASBO» ДМга юборилгандан сўнг мазкур ҳисобот электрон шаклда автоматик равишда шартномаларнинг ягона реестрида шакллантирилади.
23. Харид картаси ёрдамида амалга ошириладиган давлат харидлари тўғрисидаги ахборот электрон маълумотлар алмашинуви йўли билан давлат харидларининг махсус ахборот порталида, шунингдек, бюджет буюртмачилари бўйича ДМБАТда ва «UzASBO» ДМда ҳам акс эттирилади. Бунда харид картасини сақловчи томонидан харид картаси ёрдамида амалга оширилган давлат харидлари тўғрисидаги ҳисобот бюджет буюртмачисининг бухгалтериясига тақдим этилиши талаб этилмайди.
4-боб. Якунловчи қоидалар
24. Давлат буюртмачиси ушбу Низомда белгиланган давлат харидларини Ўзбекистон Республикасининг «Давлат харидлари тўғрисида»ги Қонунида белгиланган давлат харидларининг асосий принципларига, хусусан, молиявий маблағлардан фойдаланишнинг оқилоналиги, тежамкорлиги ва самарадорлиги принципига мувофиқ амалга ошириши шарт.
Ушбу Низомда қайд этилмаган товарларнинг (ишлар, хизматлар) харид картаси орқали харид қилиниши ва харид картасидаги маблағлардан бошқа мақсадларда фойдаланиш тақиқланади.
25. Жорий молия йили якунига кўра харид картасидаги фойдаланилмаган маблағлар белгиланган тартибда тегишли ҳисобвараққа (бюджет буюртмачиларнинг тегишли шахсий ғазна ҳисобварағига) қайтарилади ва ундан тўловларни тўлаш ушбу Низом билан тартибга солинади.
26. Харид картаси йўқолган (ўғирланган, шикастланган) тақдирда, ушбу карта сақловчиси карта йўқолгани (ўғирлангани, шикастлангани) ҳақида давлат буюртмачисининг раҳбарига дарҳол хабар бериши шарт ва у операцияларни блокировкалаш мақсадида карта йўқолгани (ўғирлангани, шикастлангани) тўғрисида эмитент банкни ёзма равишда ёки шартномада назарда тутилган бошқа усулда огоҳлантиради. Карта бўйича хизматлар кўрсатилиши эмитент банк билан тузилган шартномада белгиланган муддатда тўхтатилади.
Бунда давлат буюртмачисининг бош ҳисобчиси махсус ахборот порталида очилган шахсий кабинети орқали харид картасидан ҳар қандай тўловларни ўтказишни тўхтатиш мақсадида блоклайди.
27. Харид картасини чиқариш ва ундан фойдаланиш билан боғлиқ муносабатлар қонунчилик ҳужжатларига мувофиқ амалга оширилади.
28. Давлат буюртмачиси харид картасидаги маблағлар ҳисобидан давлат харидлари қонунчилик талаблари доирасида амалга оширилиши ҳамда ундаги маблағлар мақсадли сарфланишига, шунингдек, харид картасидан фойдаланиш қоидаларини бузганлик учун белгиланган тартибда жавобгар бўлади.
Ушбу Низомда белгиланган талабларга риоя этилиши бўйича жавобгарлик банк картасини сақловчи ва унинг ҳисобдор шахси зиммасига юкланади.
29. Ушбу Низомда белгиланган талабларнинг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Вазирлар Маҳкамасининг 2025 йил 24 февралдаги 108-сон қарорига 2-ИЛОВА
Вазирлар Маҳкамасининг 2022 йил 24 июндаги 345-сон қарори билан тасдиқланган Таъсисчиси бюджет ташкилотлари бўлган унитар корхоналарга ғазначилик орқали хизмат кўрсатиш тартиби тўғрисидаги низомга киритилаётган ўзгартиришлар
1. 2-банд қуйидаги таҳрирда баён этилсин:
«2. Ушбу Низомда қуйидаги асосий тушунчалардан фойдаланилади:
юридик мажбуриятлар — унитар корхоналар томонидан тузилган шартномалар, шунингдек, тегишли давлат ҳокимияти ва бошқаруви органларининг қарорлари асосида унитар корхоналарда юзага келадиган мажбуриятлар;
молиявий мажбуриятлар — унитар корхоналардан маблағларни ўтказиш мажбуриятини юкловчи ҳужжатлар, шу жумладан, ижро ҳужжатлари асосида юзага келадиган мажбуриятлар».
2. 5-боб ўз кучини йўқотган деб топилсин.
Ўзбекистон Республикасининг Бош вазири А. АРИПОВ
Тошкент ш.,
2025 йил 24 февраль,
108-сон
Oʻzbekiston Respublikasi Vazirlar Mahkamasining
qarori
NIZOM
Davlat xaridlarini korporativ bank kartalari orqali amalga oshirish tartibi toʻgʻrisidagi nizomni tasdiqlash haqida
Oʻzbekiston Respublikasi Prezidentining “Korrupsiyaga qarshi kurashish tizimini yanada takomillashtirish hamda davlat organlari va tashkilotlari faoliyati ustidan jamoatchilik nazorati tizimi samaradorligini oshirish chora-tadbirlari toʻgʻrisida” 2023-yil 27-noyabrdagi PF-200-son Farmoni hamda “Davlat xaridlari tizimini takomillashtirish va unda kichik tadbirkorlik subyektlari ishtirokini ragʻbatlantirish chora-tadbirlari toʻgʻrisida” 2024-yil 10-iyuldagi PQ-249-son qarori ijrosini taʼminlash, shuningdek, davlat xaridlarini amalga oshirish jarayonini soddalashtirish orqali davlat buyurtmachilari va tadbirkorlik subyektlari uchun qoʻshimcha imkoniyatlar yaratish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Davlat xaridlari tizimini takomillashtirish va unda kichik tadbirkorlik subyektlari ishtirokini ragʻbatlantirish chora-tadbirlari toʻgʻrisida” 2024-yil 10-iyuldagi PQ-249-son qarorining 6-bandida davlat buyurtmachilari tomonidan korporativ bank kartalaridan (“xarid kartalari”) foydalangan holda, xaridlarni amalga oshirish tartibini ishlab chiqish belgilanganligi maʼlumot uchun qabul qilinsin.
2. Quyidagilarni nazarda tutuvchi Davlat xaridlarini korporativ bank kartalari orqali amalga oshirish tartibi toʻgʻrisidagi nizom 1-ilovaga muvofiq tasdiqlansin:
xizmat safarlari, shu jumladan, transport va yashash xarajatlari uchun toʻlovlarni amalga oshirish;
benzin, suyultirilgan va siqilgan gaz, avia va dizel yoqilgʻisida harakatlanuvchi transport vositalariga yoqilgʻi quyish, elektromobillarni elektr energiyasi bilan quvvatlantirish bilan bogʻliq xaridlar.
3. Oʻzbekiston Respublikasi Iqtisodiyot va moliya vazirligi Raqamli texnologiyalar vazirligi hamda toʻlov tizimi operatorlari bilan birgalikda 2025-yil 1-iyulga qadar davlat xaridlari maxsus axborot portalida korporativ bank kartalari orqali amalga oshiriladigan davlat xaridlarining hisobini yuritish imkonini beruvchi alohida axborot tizimini yaratsin hamda uning tegishli vazirlik va idoralar axborot tizimlari bilan integratsiya qilinishini taʼminlasin.
4. Vazirlar Mahkamasining 2022-yil 24-iyundagi 345-son qarori bilan tasdiqlangan Taʼsischisi budjet tashkilotlari boʻlgan unitar korxonalarga gʻaznachilik orqali xizmat koʻrsatish tartibi toʻgʻrisidagi nizomga 2-ilovaga muvofiq oʻzgartirishlar kiritilsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A.Qoʻchqorov zimmasiga yuklansin.
Vazirlar Mahkamasining 2025-yil 24-fevraldagi 108-son qaroriga 1-ILOVA
Davlat xaridlarini korporativ bank kartalari orqali amalga oshirish tartibi toʻgʻrisida
1-bob. Umumiy qoidalar
1. Mazkur Nizom davlat buyurtmachilarining milliy valyutada naqd pulsiz shaklda korporativ bank kartalari (xarid kartalari) orqali davlat xaridlarini amalga oshirish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
korporativ bank kartasi (keyingi oʻrinlarda — xarid kartasi) — davlat buyurtmachisiga bank tomonidan beriladigan, xarid kartasini saqlovchiga karta hisobvaragʻida hisobda turgan mablagʻlarni tasarruf etgan holda tovarlar, ishlar yoki xizmatlarni sotib olish uchun naqd pulsiz shaklda milliy valyutada toʻlovlarni toʻlash huquqini beruvchi bank kartasi;
shaxsiy kabinet — elektron davlat xaridlarida ishtirok etishni, zarur axborotni joylashtirishni va undan foydalanishni taʼminlaydigan davlat xaridlari subyektlari va xarid qilish tartib-taomillarining davlat nazoratini amalga oshiruvchi davlat organlarining maxsus axborot portalidagi individual sahifasi;
xarid kartasini saqlovchi — davlat buyurtmachisi va emitent bank oʻrtasidagi shartnoma asosida xarid kartasidan foydalanuvchi davlat buyurtmachisi yoki u vakolat bergan shaxs;
hisobdor shaxs — davlat buyurtmachisi tomonidan xarid kartasidan foydalanish huquqi berilgan jismoniy shaxs.
3. Davlat buyurtmachisi xarid kartasidan foydalangan holda, davlat xaridlarini amalga oshirish maqsadida xarid kartasi hisobvaragʻini ochish uchun qonunchilikda belgilangan tartibda emitent bankka murojaat qiladi. Bunda budjet buyurtmachisining har bir tegishli shaxsiy gʻazna hisobvaragʻi boʻyicha emitent bankda alohida bank tranzit hisobvaragʻi ochiladi.
4. Quyidagi tovarlar (ishlar, xizmatlar) xarid kartalaridan foydalangan holda xarid qilinishi mumkin:
a) Oʻzbekiston Respublikasi hududida davlat buyurtmachisi faoliyatini amalga oshirish bilan bogʻliq boʻlgan xizmat safarlari va boshqalar uchun chiptalar (avia, temiryoʻl va yoʻnalish transporti) hamda yashash xarajatlari.
Bunda ushbu kichik bandga muvofiq davlat xaridlari Vazirlar Mahkamasining “Oʻzbekiston Respublikasi hududida xizmat safarlari toʻgʻrisidagi nizomni tasdiqlash haqida” 2022-yil 2-avgustdagi 424-son qarorida belgilangan tartibda amalga oshiriladi;
b) davlat buyurtmachisining ehtiyojlari uchun belgilangan tartibda talab etiladigan benzin, suyultirilgan va siqilgan gaz, avia va dizel yoqilgʻisida harakatlanuvchi transport vositalariga yoqilgʻi quyish, elektromobillarni elektr energiyasi bilan quvvatlantirish xarajatlari;
v) korporativ buyurtmachilar tomonidan qonunchilikka muvofiq toʻgʻridan-toʻgʻri shartnomalar tuzish huquqi berilgan hollarda tovarlarning (ishlarning, xizmatlarning) bir moliya yili davomida bazaviy hisoblash miqdorining bir ming baravari miqdorigacha amalga oshiriladigan davlat xaridlari, ushbu bandning “a” va “b” kichik bandlari koʻrsatilgan xaridlar bundan mustasno.
5. Davlat buyurtmachilari tomonidan xarid kartasiga ish haqi va unga tenglashtirilgan toʻlovlar, pensiyalar, nafaqalar, stipendiyalar va dividendlar oʻtkazilishiga, shuningdek, xarid kartasi yordamida naqd pul berilishi va (yoki) chet el valyutasi sotib olinishiga yoʻl qoʻyilmaydi.
Davlat buyurtmachilari tomonidan boshlangʻich narxni pasaytirish uchun oʻtkaziladigan auksion savdolarida ishtirok etib, xaridlarni amalga oshirish uchun xarid kartasidan foydalanish taqiqlanadi.
6. Xarid kartasidan foydalanish huquqiga ega boʻlgan hisobdor shaxslar roʻyxati davlat buyurtmachisi rahbarining buyrugʻi (farmoyishi) bilan belgilanadi. Hisobdor shaxslar mazkur davlat buyurtmachilarining xodimlari boʻlishi shart.
7. Xarid kartasiga mablagʻlarning ilk bor hisobga kiritilishi va keyinchalik toʻldirilishi uchun davlat buyurtmachisida belgilangan tartibda rahbar yoki u vakolat bergan shaxsning buyrugʻi asos boʻladi.
8. Xarid kartasining emitent banki xarid kartasini saqlovchiga yuborilgan va undan olingan xabarnomalarning ushbu xabarnomalar yuborilgan va olingan kundan eʼtiboran uch yildan kam boʻlmagan muddat mobaynida saqlanishini taʼminlaydi.
9. Davlat xaridlari sohasidagi vakolatli organ tomonidan davlat xaridlari boʻyicha maxsus axborot portalida ochilgan kabinet orqali xarid kartasiga Oʻzbekiston Respublikasi Iqtisodiy faoliyat turlarining umumdavlat tasniflagichiga (keyingi oʻrinlarda — IFUT) muvofiq ushbu Nizomning 4-bandida nazarda tutilmagan davlat xaridlarini amalga oshirishga cheklovlar oʻrnatiladi, bunda oʻrnatilgan cheklovlar xarid kartalari uchun doimiy boʻlib, bank pul oʻtkazmalaridan avval joriy etiladi.
2-bob. Korporativ buyurtmachilar tomonidan xarid kartasidan foydalanilgan holda davlat xaridlarini amalga oshirish tartibi
10. Korporativ buyurtmachilarning xarid kartalaridan foydalanilgan holdagi davlat xaridlari mazkur Nizomning umumiy qoidalarini inobatga olgan holda, ushbu bobda nazarda tutilgan tartibda amalga oshiriladi.
11. Korporativ buyurtmachilar ushbu Nizomning 4-bandida nazarda tutilgan davlat xaridlari uchun bank tranzit hisobvaragʻiga toʻlov topshiriqnomasi asosida mablagʻlar oʻtkazadi.
12. Korporativ buyurtmachilar oʻz tasarrufida boʻlgan xarid kartasiga rejalashtirilgan mablagʻlar doirasida foydalanish cheklovlarini qoʻyishi mumkin.
13. Hisobdor shaxslar xarid kartasi orqali ushbu Nizomning 4-bandida belgilangan davlat xaridlarini amalga oshiradi.
14. Xarid kartasi orqali amalga oshiriladigan davlat xaridlari toʻgʻrisidagi axborot Oʻzbekiston Respublikasi Soliq qoʻmitasining axborot tizimi orqali maxsus axborot portalida ochilgan shaxsiy kabinetga yuboriladi.
Bunda maxsus axborot portalida ochilgan shaxsiy kabinetga kelib tushgan barcha axborotlar hisobot koʻrinishiga keltiriladi va elektron shaklda avtomatik ravishda shartnomalarning yagona reyestrida shakllantiriladi.
15. Korporativ buyurtmachi tomonidan xarid kartasi yordamida amalga oshiriladigan davlat xaridlari toʻgʻrisidagi axborot elektron maʼlumotlar almashinuvi yoʻli bilan davlat xaridlarining maxsus axborot portalida aks ettiriladi. Bunda xarid kartasini saqlovchi tomonidan xarid kartasi yordamida amalga oshirilgan davlat xaridlari toʻgʻrisidagi hisobot davlat buyurtmachisining buxgalteriyasiga taqdim etilishi talab etilmaydi.
3-bob. Budjet buyurtmachisi tomonidan xarid kartalardan foydalanilgan holda davlat xaridlarini amalga oshirish tartibi
16. Budjet buyurtmachisining xarid kartasidan foydalanilgan holdagi davlat xaridlari ushbu Nizomning umumiy qoidalarini inobatga olgan holda, ushbu bobda nazarda tutilgan tartibda amalga oshiriladi.
17. Budjet buyurtmachisi xarid kartasiga mablagʻlarni oʻtkazish uchun “UzASBO” DMda yuridik majburiyatlarni roʻyxatdan oʻtkazishga (hisobga olishga) buyurtma (keyingi oʻrinlarda — buyurtma) shakllantiradi va elektron hujjat shaklida Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasi (keyingi oʻrinlarda — Gʻaznachilik xizmati) boʻlimlariga yuboradi.
Bunda mablagʻlar budjet buyurtmachilarining xarajatlar smetasida ushbu Nizomning 4-bandi “a” va “b” kichik bandlarida nazarda tutilgan davlat xaridlari uchun rejalashtirilgan mablagʻlar doirasida bank tranzit hisobvaragʻiga buyurtma va toʻlov topshiriqnomasi asosida oʻtkazib beriladi.
18. Budjet buyurtmachilari tomonidan roʻyxatdan oʻtkazish uchun elektron shaklda yuborilgan buyurtmalar Gʻaznachilik xizmati boʻlimlari tomonidan bir ish kuni ichida Oʻzbekiston Respublikasi Iqtisodiyot va moliya vazirligining davlat moliyasini boshqarish axborot tizimida (keyingi oʻrinlarda — DMBAT) elektron shaklda roʻyxatdan oʻtkaziladi yoki hisobga olinadi. Kamchiliklar aniqlangan taqdirda, tegishli kamchiliklar koʻrsatilgan holda, elektron shaklda budjet buyurtmachilariga qaytariladi.
19. Gʻaznachilik xizmati boʻlimlari tomonidan roʻyxatdan oʻtkazilgan yoki hisobga olingan buyurtmalarga asosan budjet buyurtmachilari toʻlov topshiriqnomalarini “UzASBO” DMda shakllantiradi va elektron shaklda Gʻaznachilik xizmati boʻlimlariga yuboradi.
Ushbu toʻlov topshiriqnomasida nazarda tutilgan mablagʻlar Gʻaznachilik xizmati boʻlimlari tomonidan bir ish kuni mobaynida budjet buyurtmachisining roʻyxatdan oʻtkazilgan buyurtmasi doirasida emitent bankda ochilgan tegishli (roʻyxatdan oʻtkazilgan yoki hisobga olingan buyurtmaning hisobvaragʻi) bank tranzit hisobvaragʻiga oʻtkaziladi. Kamchiliklar aniqlanganda esa, tegishli kamchiliklari koʻrsatilgan holda elektron shaklda budjet buyurtmachilariga qaytariladi.
Budjet buyurtmachilarning xarid kartasiga kirim qilish maqsadida bank tranzit hisobvaragʻiga mablagʻlarning toʻgʻri oʻtkazilishini nazorat qilish Gʻaznachilik xizmati boʻlimlariga yuklanadi.
20. Budjet buyurtmachilari oʻz tasarrufida boʻlgan xarid kartasidagi mablagʻlardan foydalanish uchun tegishli cheklovlarni qoʻyishi mumkin.
21. Budjet buyurtmachisining hisobdor shaxslari xarid kartasi orqali ushbu Nizom 4-bandining “a” va “b” kichik bandlarida belgilangan davlat xaridlarini amalga oshiradi.
22. Budjet buyurtmachisiga ochilgan xarid kartasi orqali amalga oshiriladigan davlat xaridlari toʻgʻrisidagi axborot Oʻzbekiston Respublikasi Soliq qoʻmitasining axborot tizimi orqali maxsus axborot portalida ochilgan shaxsiy kabinetga yuboriladi.
Bunda maxsus axborot portalida ochilgan shaxsiy kabinetga kelib tushgan barcha axborotlar hisobot koʻrinishiga keltirilib, DMBATga va “UzASBO” DMga yuborilgandan soʻng mazkur hisobot elektron shaklda avtomatik ravishda shartnomalarning yagona reyestrida shakllantiriladi.
23. Xarid kartasi yordamida amalga oshiriladigan davlat xaridlari toʻgʻrisidagi axborot elektron maʼlumotlar almashinuvi yoʻli bilan davlat xaridlarining maxsus axborot portalida, shuningdek, budjet buyurtmachilari boʻyicha DMBATda va “UzASBO” DMda ham aks ettiriladi. Bunda xarid kartasini saqlovchi tomonidan xarid kartasi yordamida amalga oshirilgan davlat xaridlari toʻgʻrisidagi hisobot budjet buyurtmachisining buxgalteriyasiga taqdim etilishi talab etilmaydi.
4-bob. Yakunlovchi qoidalar
24. Davlat buyurtmachisi ushbu Nizomda belgilangan davlat xaridlarini Oʻzbekiston Respublikasining “Davlat xaridlari toʻgʻrisida”gi Qonunida belgilangan davlat xaridlarining asosiy prinsiplariga, xususan, moliyaviy mablagʻlardan foydalanishning oqilonaligi, tejamkorligi va samaradorligi prinsipiga muvofiq amalga oshirishi shart.
Ushbu Nizomda qayd etilmagan tovarlarning (ishlar, xizmatlar) xarid kartasi orqali xarid qilinishi va xarid kartasidagi mablagʻlardan boshqa maqsadlarda foydalanish taqiqlanadi.
25. Joriy moliya yili yakuniga koʻra xarid kartasidagi foydalanilmagan mablagʻlar belgilangan tartibda tegishli hisobvaraqqa (budjet buyurtmachilarning tegishli shaxsiy gʻazna hisobvaragʻiga) qaytariladi va undan toʻlovlarni toʻlash ushbu Nizom bilan tartibga solinadi.
26. Xarid kartasi yoʻqolgan (oʻgʻirlangan, shikastlangan) taqdirda, ushbu karta saqlovchisi karta yoʻqolgani (oʻgʻirlangani, shikastlangani) haqida davlat buyurtmachisining rahbariga darhol xabar berishi shart va u operatsiyalarni blokirovkalash maqsadida karta yoʻqolgani (oʻgʻirlangani, shikastlangani) toʻgʻrisida emitent bankni yozma ravishda yoki shartnomada nazarda tutilgan boshqa usulda ogohlantiradi. Karta boʻyicha xizmatlar koʻrsatilishi emitent bank bilan tuzilgan shartnomada belgilangan muddatda toʻxtatiladi.
Bunda davlat buyurtmachisining bosh hisobchisi maxsus axborot portalida ochilgan shaxsiy kabineti orqali xarid kartasidan har qanday toʻlovlarni oʻtkazishni toʻxtatish maqsadida bloklaydi.
27. Xarid kartasini chiqarish va undan foydalanish bilan bogʻliq munosabatlar qonunchilik hujjatlariga muvofiq amalga oshiriladi.
28. Davlat buyurtmachisi xarid kartasidagi mablagʻlar hisobidan davlat xaridlari qonunchilik talablari doirasida amalga oshirilishi hamda undagi mablagʻlar maqsadli sarflanishiga, shuningdek, xarid kartasidan foydalanish qoidalarini buzganlik uchun belgilangan tartibda javobgar boʻladi.
Ushbu Nizomda belgilangan talablarga rioya etilishi boʻyicha javobgarlik bank kartasini saqlovchi va uning hisobdor shaxsi zimmasiga yuklanadi.
29. Ushbu Nizomda belgilangan talablarning buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Vazirlar Mahkamasining 2025-yil 24-fevraldagi 108-son qaroriga 2-ILOVA
Vazirlar Mahkamasining 2022-yil 24-iyundagi 345-son qarori bilan tasdiqlangan Taʼsischisi budjet tashkilotlari boʻlgan unitar korxonalarga gʻaznachilik orqali xizmat koʻrsatish tartibi toʻgʻrisidagi nizomga kiritilayotgan oʻzgartirishlar
1. 2-band quyidagi tahrirda bayon etilsin:
“2. Ushbu Nizomda quyidagi asosiy tushunchalardan foydalaniladi:
yuridik majburiyatlar — unitar korxonalar tomonidan tuzilgan shartnomalar, shuningdek, tegishli davlat hokimiyati va boshqaruvi organlarining qarorlari asosida unitar korxonalarda yuzaga keladigan majburiyatlar;
moliyaviy majburiyatlar — unitar korxonalardan mablagʻlarni oʻtkazish majburiyatini yuklovchi hujjatlar, shu jumladan, ijro hujjatlari asosida yuzaga keladigan majburiyatlar”.
2. 5-bob oʻz kuchini yoʻqotgan deb topilsin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 24-fevral,
108-son