UzbekAI

Ўзбекистон Республикаси Вазирлар Маҳкамасининг

қарори

ВАҚТИНЧАЛИК НИЗОМ

СХЕМАСИ

Кичик бизнесга кўмаклашиш марказлари ёрдамида ишлаб чиқилган лойиҳалар доирасида импорт қилинадиган асбоб-ускуналарни суғурталаш ҳамда хом ашё ва материалларни сертификатлаш харажатларининг бир қисмини қоплаб бериш тартиби тўғрисидаги вақтинчалик низомни тасдиқлаш ҳақида

1. Қуйидагилар:

Ўзбекистон Республикаси Президентининг «Давлат харидлари тизимини такомиллаштириш ва унда кичик тадбиркорлик субъектлари иштирокини рағбатлантириш чора-тадбирлари тўғрисида» 2024 йил 10 июлдаги ПҚ-249-сон қарорининг 2-бандида 2025 йил 31 декабрга қадар «Бизнесни ривожлантириш банки» АТБ ҳузуридаги кичик бизнесга кўмаклашиш марказлари ёрдамида ишлаб чиқилган лойиҳалар доирасида импорт қилинадиган асбоб-ускуналарни суғурталаш ҳамда хом ашё ва материалларни сертификатлаш харажатларининг 50 фоизигача қисмини, бироқ базавий ҳисоблаш миқдорининг ўттиз бараваридан ошмаган миқдорда Аҳолини тадбиркорликка жалб қилиш жамғармаси маблағлари ҳисобидан қоплаб бериш тартибини жорий этиш;

Ўзбекистон Республикаси Президентининг ««Камбағалликдан фаровонлик сари» дастурини амалга ошириш бўйича биринчи навбатдаги чора-тадбирлар тўғрисида» 2024 йил 23 сентябрдаги ПҚ-330-сон қарорига мувофиқ Жамоат ишлари жамғармаси, Ҳунармандчилик ва касаначиликни қўллаб-қувватлаш жамғармаси ҳамда Аҳолини тадбиркорликка жалб қилиш жамғармаси негизида юридик шахс мақомига эга бўлган Камбағалликни қисқартириш давлат мақсадли жамғармаси ташкил этилганлиги маълумот учун қабул қилинсин.

2. Қуйидагиларни назарда тутувчи Кичик бизнесга кўмаклашиш марказлари ёрдамида ишлаб чиқилган лойиҳалар доирасида импорт қилинадиган асбоб-ускуналарни суғурталаш ҳамда хом ашё ва материалларни сертификатлаш харажатларининг бир қисмини қоплаб бериш тартиби тўғрисидаги вақтинчалик низом иловага мувофиқ тасдиқлансин:

суғурталаш ва сертификатлаш харажатларини қоплаб бериш учун талаб этиладиган ҳужжатлар ҳамда уларни кўриб чиқиш тартиби;

суғурталаш ва сертификатлаш харажатларини қоплаб бериш учун тўловларни тўлаш шартлари.

3. Ўзбекистон Республикаси Иқтисодиёт ва молия вазирлиги Камбағалликни қисқартириш ва бандлик вазирлиги билан биргаликда ушбу қарорнинг моҳияти ва аҳамияти тадбиркорлик субъектлари ўртасида кенг тушунтирилишини таъминласин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.

Вазирлар Маҳкамасининг 2025 йил 24 февралдаги 107-сон қарорига ИЛОВА

1-боб. Умумий қоидалар

1. Мазкур Вақтинчалик низом (кейинги ўринларда — Низом) Камбағалликни қисқартириш давлат мақсадли жамғармаси маблағлари ҳисобидан (кейинги ўринларда — Жамғарма) кичик бизнес лойиҳаларини амалга оширувчи тадбиркорлик субъектларининг кичик бизнесга кўмаклашиш марказлари ёрдамида ишлаб чиқилган лойиҳалар доирасида импорт қилинадиган асбоб-ускуналарни суғурталаш, хом ашё ва материалларни сертификатлаш харажатларининг бир қисмини қоплаб бериш тартибини белгилайди.

2. Ушбу Низомда қуйидаги асосий тушунчалардан фойдаланилади:

баҳолаш гуруҳи — Вазирлар Маҳкамасининг 2024 йил 20 январдаги 37-сон қарори билан тасдиқланган «Кичик бизнесни узлуксиз қўллаб-қувватлаш» комплекс дастури ташаббускорларини танлаш, уларнинг лойиҳаларини қўллаб-қувватлаш ва молиялаштириш тўғрисидаги низомга мувофиқ истиқболли лойиҳаларни танлаб олиш, тоифаларга ажратиш ва бизнес лойиҳани баҳолаш учун масъул марказлар ҳузуридаги Лойиҳаларни баҳолаш ва танлаш гуруҳи;

Бизнес портал — «Кичик бизнесни узлуксиз қўллаб-қувватлаш» комплекс дастурида иштирок этиш билан боғлиқ бизнес жараёнларни автоматлаштирилган ҳолда ташкил этиш ва мувофиқлаштириб борувчи электрон платформа;

Дастур — «Кичик бизнесни узлуксиз қўллаб-қувватлаш» комплекс дастури;

импорт контракти — маҳсулотлар импорти учун импорт қилувчи билан Ўзбекистон Республикасининг норезиденти ўртасида тузилган контракт;

марказ — Қорақалпоғистон Республикаси, вилоятлар ва Тошкент шаҳрида кичик бизнес субъектларини молиявий ва консультатив қўллаб-қувватлашни назарда тутувчи Дастур доирасида ташаббускорларни ўқитиш, лойиҳаларни амалга оширишга кўмаклашиш ва уларнинг мониторингини юритишга масъул бўлган «Кичик бизнесга кўмаклашиш маркази» МЧЖлар;

маҳсулотлар — кичик бизнесга кўмаклашиш марказлари ёрдамида ишлаб чиқилган лойиҳалар доирасида ва уларни амалга ошириш учун фойдаланиладиган, импорт ҳисобидан олиб келинадиган асбоб-ускуналар ҳамда (ёки) хом ашё ва материаллар;

маҳсулотлар импорти — маҳсулотларни қайтариб олиб чиқиш мажбуриятисиз Ўзбекистон Республикасининг божхона ҳудудига олиб кириш;

суғурталовчи — тегишли турдаги суғуртани амалга ошириш учун лицензияга эга бўлган ва суғурта шартномасига мувофиқ суғурта товони (суғурта тўлови)ни амалга ошириш мажбуриятини олувчи тижорат ташкилоти бўлган юридик шахс;

суғурта шартномаси — хорижий мамлакатларда ишлаб чиқарилган маҳсулотларни импорт қилиш билан боғлиқ фаолиятни сиёсий ва тижорат таваккалчиликларидан суғурта қилиш бўйича ёзма келишув;

талабгор — Дастур доирасида танлаб олинган лойиҳа бўйича асбоб-ускуналар ёки хом ашё ва материалларни хорижий мамлакатлардан импорт контрактларига (инвойсга) мувофиқ сотиб олувчи, шунингдек, импорт контрактларига биноан юк қабул қилувчининг суғурталаш ҳамда хом ашё ва материалларни сертификатлаш харажатларини қоплаб бериш бўйича ариза билан мурожаат қилган тадбиркорлик субъекти.

3. Ушбу Низомга мувофиқ марказлар ёрдамида ишлаб чиқилган лойиҳалар доирасида импорт қилинадиган асбоб-ускуналарни суғурталаш ҳамда хом ашё ва материалларни сертификатлаш харажатларининг (кейинги ўринларда — суғурталаш ва сертификатлаш харажатлари) 50 фоизигача қисми, бироқ базавий ҳисоблаш миқдорининг ўттиз бараваридан ошмаган миқдори 2025 йил 31 декабрга қадар қоплаб берилади.

2-боб. Суғурталаш ва сертификатлаш харажатларининг бир қисмини қоплаб бериш учун талаб этиладиган ҳужжатлар ва уларни кўриб чиқиш тартиби

4. Суғурталаш ва сертификатлаш харажатларининг бир қисми мазкур Низомга иловада келтирилган схемага мувофиқ қоплаб берилади.

5. Талабгор суғурталаш ва сертификатлаш харажатларининг бир қисмини қоплаш учун Бизнес портал орқали электрон (онлайн) ариза ва буюртманома тўлдириб, қуйидаги ҳужжатларни илова қилган ҳолда марказга мурожаат қилади:

а) импорт қилинадиган асбоб-ускуналарнинг суғурталаш харажатларининг бир қисмини қоплаб бериш йўналишида:

божхона юк декларацияси нусхаси;

суғурта мукофоти тўланганлигини тасдиқловчи ҳужжатлар — суғурта шартномаси ва суғурта полисининг нусхаси, тўлов тўланганлиги тўғрисидаги ҳужжат ва хизмат кўрсатилганлигини тасдиқловчи ҳисобварақ-фактура нусхаси;

б) импорт қилинган хом ашё ва материалларни сертификатлаш харажатларининг бир қисмини қоплаб бериш йўналишида талабгорнинг етказиб берувчилар билан тузилган импорт контрактига асосан харид қилинган хом ашё ва материалларни сертификатлаш харажатларини тасдиқловчи ҳужжатлар — сертификатлаш бўйича шартнома, ҳисобварақ-фактура, тўлов топшириқнома нусхалари.

Талабгор ҳар бир лойиҳа доирасида ҳам суғурталаш, ҳам сертификатлаш харажатларининг бир қисмини қоплаш учун мурожаат қилиши мумкин.

Суғурталаш ва сертификатлаш харажатларининг бир қисмини қоплаб бериш учун Бизнес портал орқали ариза бепул топширилади ва кўриб чиқилади.

6. Талабгордан ушбу Низомда назарда тутилмаган ҳужжатларни тақдим этишни талаб қилишга йўл қўйилмайди.

7. Марказ Вазирлар Маҳкамасининг 2024 йил 20 январдаги 37-сон қарори билан тасдиқланган «Кичик бизнесни узлуксиз қўллаб-қувватлаш» комплекс дастури ташаббускорларини танлаш, уларнинг лойиҳаларини қўллаб-қувватлаш ва молиялаштириш тўғрисидаги низомга мувофиқ сертификатлаш харажатлари қоплаб берилиши сўралаётган хом ашё ва материаллар ҳамда (ёки) суғурта харажатлари қоплаб берилиши сўралаётган асбоб-ускуналар баҳолаш гуруҳи томонидан танлаб олинган талабгорнинг лойиҳасини амалга ошириш учун фойдаланиладиган маҳсулот эканлигини Бизнес портал орқали мустақил равишда текширади.

8. Аризага илова қилинган ҳужжатларнинг ҳаққонийлиги учун талабгор жавобгар ҳисобланади.

9. Марказ аризани беш иш куни ичида кўриб чиқади ҳамда суғурталаш ва сертификатлаш харажатларининг бир қисмини қоплаб бериш ёки қоплаб беришни рад этиш тўғрисида Бизнес портал орқали электрон хулоса тайёрлайди ва бу ҳақида талабгорни хабардор қилади.

Рад этиш учун асослар мавжуд бўлган тақдирда, хабарномада рад этишнинг барча сабаблари кўрсатилиши лозим.

3-боб. Суғурталаш ва сертификатлаш харажатларининг бир қисмини қоплаб беришни рад этиш

10. Қуйидаги ҳолатларнинг камида биттаси мавжудлиги суғурталаш ва сертификатлаш харажатларини қоплаб беришни рад этиш учун асос бўлади:

талабгор томонидан ушбу Низомнинг 5-бандида белгиланган ҳужжатлар тўлиқ тақдим этилмаганлиги;

сертификатлаш харажатлари қоплаб бериладиган хом ашё ва материаллар ва (ёки) суғурталаш харажатлари қоплаб бериладиган асбоб-ускуналар баҳолаш гуруҳи томонидан танлаб олинган ташаббускорнинг лойиҳасида назарда тутилмаганлиги;

талабгор томонидан сохта ҳужжатлар, нотўғри ёки ёлғон маълумотлар тақдим этилганлиги.

Мазкур бандда назарда тутилмаган сабабларга кўра суғурталаш ва сертификатлаш харажатларини қоплаб беришни рад этишга йўл қўйилмайди.

11. Талабгор суғурталаш ва сертификатлаш харажатларини қоплаб беришни рад этиш учун асос бўлган сабабларни бартараф этиб, ушбу Низомда назарда тутилган ҳужжатларни, шу жумладан, рад этишнинг илгари кўрсатилган сабаблари бартараф этилганлигини тасдиқловчи ҳужжатларни қайта кўриб чиқиш учун Марказга электрон (онлайн) топшириш ҳуқуқига эга.

12. Талабгор суғурталаш ва сертификатлаш харажатларининг бир қисмини қоплаб беришни рад этиш учун асос бўлган сабабларни бартараф этган тақдирда, ҳужжатлар Марказ томонидан такрорий ариза олинган кундан бошлаб уч иш кунидан кўп бўлмаган муддатда қайта кўриб чиқилади.

13. Аризани қайта кўриб чиқишда марказ томонидан илгари берилган рад этиш тўғрисидаги хулосада қайд этилмаган сабабларни кўрсатишга йўл қўйилмайди, илгари кўрсатилган сабаблар бартараф этилганлигини тасдиқловчи ҳужжатлар билан боғлиқ рад этиш сабаблари бундан мустасно.

14. Талабгор суғурталаш ва сертификатлаш харажатларининг бир қисмини қоплаб беришни рад этиш тўғрисидаги хулоса, шунингдек, марказнинг мансабдор шахслари ҳаракати (ҳаракатсизлиги) юзасидан қонунчилик ҳужжатларида белгиланган тартибда шикоят қилиш ҳуқуқига эга.

4-боб. Суғурталаш ва сертификатлаш харажатларининг бир қисмини қоплаб бериш учун тўловларни тўлаш тартиби

15. Марказ ушбу Низомнинг 10-бандида кўрсатилган суғурталаш ва сертификатлаш харажатларининг бир қисмини қоплаб бериш бўйича аризани рад этиш учун асослар мавжуд бўлмаган ҳолларда, мазкур харажатларни қоплаб бериш тўғрисида хулоса (талабгорнинг банк ҳисобварағини кўрсатган ҳолда) тайёрлайди.

16. Марказ суғурталаш ва сертификатлаш харажатларининг бир қисмини қоплаб бериш тўғрисидаги хулосаларни илова қилган ҳолда, ҳафта якуни бўйича кейинги ҳафтанинг биринчи иш кунида Жамғармага буюртманома юборади ва бу ҳақида талабгорларни хабардор қилади.

17. Жамғарма тақдим этилган буюртманомага мувофиқ уч иш куни давомида хулосада кўрсатилган талабгорнинг банк ҳисобварағига тегишли маблағларни ўтказиб беради.

5-боб. Якунловчи қоидалар

18. Талабгор давлат органлари ва бошқа ташкилотлар ходимларининг хатти-ҳаракатлари ёки ҳаракатсизлиги устидан қонунчиликда белгиланган тартибда шикоят қилиши мумкин.

19. Ушбу Низомнинг қоидаларини бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

20. Мазкур Низом 2025 йил 31 декабрга қадар амал қилади.

Босқичлар Субъектлар Амалга ошириладиган ишлар Муддатлар 1-босқич Талабгор (тадбиркорлик субъекти) Бизнес портал орқали қуйидагиларни илова қилган ҳолда, Кичик бизнесга кўмаклашиш марказларига ариза юборади: суғурталаш бўйича ҳужжатлар: божхона юк декларацияси, суғурта шартномаси ва суғурта полисининг нусхаси, тўлов тўланганлиги тўғрисидаги ҳужжат, хизмат кўрсатилганлигини тасдиқловчи ҳисобварақ-фактура нусхаси; сертификатлаш бўйича ҳужжатлар: божхона юк декларацияси, талабгорнинг етказиб берувчилар билан тузилган импорт контрактига асосан харид қилинган хом ашё ва материалларни сертификатлаш харажатларини тасдиқловчи ҳужжатлар — сертификатлаш бўйича шартнома, ҳисобварақ-фактура, тўлов топшириқнома нусхалари. Ўз хоҳишига кўра 2-босқич Кичик бизнесга кўмаклашиш маркази Аризани кўриб чиқиб, суғурталаш ва сертификатлаш харажатларини қоплаш ёки қоплашни рад этиш тўғрисида хулоса тайёрлайди. 5 иш куни ичида 3-босқич Кичик бизнесга кўмаклашиш маркази Суғурталаш ва сертификатлаш харажатларини қоплаб бериш тўғрисидаги хулосаларни илова қилган ҳолда, Жамғармага буюртманома юборади. Ҳафтанинг биринчи иш кунида 4-босқич Камбағалликни қисқартириш давлат мақсадли жамғармаси Талабгорнинг банк ҳисобварағига маблағларни ўтказиб беради. 3 иш куни ичида

Ўзбекистон Республикасининг Бош вазири А. АРИПОВ

Тошкент ш.,

2025 йил 24 февраль,

107-сон

(Қонунчилик маълумотлари миллий базаси, 25.02.2025 й., 09/25/107/0176-сон)

lex.uz

Oʻzbekiston Respublikasi Vazirlar Mahkamasining

qarori

VAQTINCHALIK NIZOM

SXEMASI

Kichik biznesga koʻmaklashish markazlari yordamida ishlab chiqilgan loyihalar doirasida import qilinadigan asbob-uskunalarni sugʻurtalash hamda xom ashyo va materiallarni sertifikatlash xarajatlarining bir qismini qoplab berish tartibi toʻgʻrisidagi vaqtinchalik nizomni tasdiqlash haqida

1. Quyidagilar:

Oʻzbekiston Respublikasi Prezidentining “Davlat xaridlari tizimini takomillashtirish va unda kichik tadbirkorlik subyektlari ishtirokini ragʻbatlantirish chora-tadbirlari toʻgʻrisida” 2024-yil 10-iyuldagi PQ-249-son qarorining 2-bandida 2025-yil 31-dekabrga qadar “Biznesni rivojlantirish banki” ATB huzuridagi kichik biznesga koʻmaklashish markazlari yordamida ishlab chiqilgan loyihalar doirasida import qilinadigan asbob-uskunalarni sugʻurtalash hamda xom ashyo va materiallarni sertifikatlash xarajatlarining 50 foizigacha qismini, biroq bazaviy hisoblash miqdorining oʻttiz baravaridan oshmagan miqdorda Aholini tadbirkorlikka jalb qilish jamgʻarmasi mablagʻlari hisobidan qoplab berish tartibini joriy etish;

Oʻzbekiston Respublikasi Prezidentining ““Kambagʻallikdan farovonlik sari” dasturini amalga oshirish boʻyicha birinchi navbatdagi chora-tadbirlar toʻgʻrisida” 2024-yil 23-sentabrdagi PQ-330-son qaroriga muvofiq Jamoat ishlari jamgʻarmasi, Hunarmandchilik va kasanachilikni qoʻllab-quvvatlash jamgʻarmasi hamda Aholini tadbirkorlikka jalb qilish jamgʻarmasi negizida yuridik shaxs maqomiga ega boʻlgan Kambagʻallikni qisqartirish davlat maqsadli jamgʻarmasi tashkil etilganligi maʼlumot uchun qabul qilinsin.

2. Quyidagilarni nazarda tutuvchi Kichik biznesga koʻmaklashish markazlari yordamida ishlab chiqilgan loyihalar doirasida import qilinadigan asbob-uskunalarni sugʻurtalash hamda xom ashyo va materiallarni sertifikatlash xarajatlarining bir qismini qoplab berish tartibi toʻgʻrisidagi vaqtinchalik nizom ilovaga muvofiq tasdiqlansin:

sugʻurtalash va sertifikatlash xarajatlarini qoplab berish uchun talab etiladigan hujjatlar hamda ularni koʻrib chiqish tartibi;

sugʻurtalash va sertifikatlash xarajatlarini qoplab berish uchun toʻlovlarni toʻlash shartlari.

3. Oʻzbekiston Respublikasi Iqtisodiyot va moliya vazirligi Kambagʻallikni qisqartirish va bandlik vazirligi bilan birgalikda ushbu qarorning mohiyati va ahamiyati tadbirkorlik subyektlari oʻrtasida keng tushuntirilishini taʼminlasin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.

Vazirlar Mahkamasining 2025-yil 24-fevraldagi 107-son qaroriga ILOVA

1-bob. Umumiy qoidalar

1. Mazkur Vaqtinchalik nizom (keyingi oʻrinlarda — Nizom) Kambagʻallikni qisqartirish davlat maqsadli jamgʻarmasi mablagʻlari hisobidan (keyingi oʻrinlarda — Jamgʻarma) kichik biznes loyihalarini amalga oshiruvchi tadbirkorlik subyektlarining kichik biznesga koʻmaklashish markazlari yordamida ishlab chiqilgan loyihalar doirasida import qilinadigan asbob-uskunalarni sugʻurtalash, xom ashyo va materiallarni sertifikatlash xarajatlarining bir qismini qoplab berish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

baholash guruhi — Vazirlar Mahkamasining 2024-yil 20-yanvardagi 37-son qarori bilan tasdiqlangan “Kichik biznesni uzluksiz qoʻllab-quvvatlash” kompleks dasturi tashabbuskorlarini tanlash, ularning loyihalarini qoʻllab-quvvatlash va moliyalashtirish toʻgʻrisidagi nizomga muvofiq istiqbolli loyihalarni tanlab olish, toifalarga ajratish va biznes loyihani baholash uchun masʼul markazlar huzuridagi Loyihalarni baholash va tanlash guruhi;

Biznes portal — “Kichik biznesni uzluksiz qoʻllab-quvvatlash” kompleks dasturida ishtirok etish bilan bogʻliq biznes jarayonlarni avtomatlashtirilgan holda tashkil etish va muvofiqlashtirib boruvchi elektron platforma;

Dastur — “Kichik biznesni uzluksiz qoʻllab-quvvatlash” kompleks dasturi;

import kontrakti — mahsulotlar importi uchun import qiluvchi bilan Oʻzbekiston Respublikasining norezidenti oʻrtasida tuzilgan kontrakt;

markaz — Qoraqalpogʻiston Respublikasi, viloyatlar va Toshkent shahrida kichik biznes subyektlarini moliyaviy va konsultativ qoʻllab-quvvatlashni nazarda tutuvchi Dastur doirasida tashabbuskorlarni oʻqitish, loyihalarni amalga oshirishga koʻmaklashish va ularning monitoringini yuritishga masʼul boʻlgan “Kichik biznesga koʻmaklashish markazi” MCHJlar;

mahsulotlar — kichik biznesga koʻmaklashish markazlari yordamida ishlab chiqilgan loyihalar doirasida va ularni amalga oshirish uchun foydalaniladigan, import hisobidan olib kelinadigan asbob-uskunalar hamda (yoki) xom ashyo va materiallar;

mahsulotlar importi — mahsulotlarni qaytarib olib chiqish majburiyatisiz Oʻzbekiston Respublikasining bojxona hududiga olib kirish;

sugʻurtalovchi — tegishli turdagi sugʻurtani amalga oshirish uchun litsenziyaga ega boʻlgan va sugʻurta shartnomasiga muvofiq sugʻurta tovoni (sugʻurta toʻlovi)ni amalga oshirish majburiyatini oluvchi tijorat tashkiloti boʻlgan yuridik shaxs;

sugʻurta shartnomasi — xorijiy mamlakatlarda ishlab chiqarilgan mahsulotlarni import qilish bilan bogʻliq faoliyatni siyosiy va tijorat tavakkalchiliklaridan sugʻurta qilish boʻyicha yozma kelishuv;

talabgor — Dastur doirasida tanlab olingan loyiha boʻyicha asbob-uskunalar yoki xom ashyo va materiallarni xorijiy mamlakatlardan import kontraktlariga (invoysga) muvofiq sotib oluvchi, shuningdek, import kontraktlariga binoan yuk qabul qiluvchining sugʻurtalash hamda xom ashyo va materiallarni sertifikatlash xarajatlarini qoplab berish boʻyicha ariza bilan murojaat qilgan tadbirkorlik subyekti.

3. Ushbu Nizomga muvofiq markazlar yordamida ishlab chiqilgan loyihalar doirasida import qilinadigan asbob-uskunalarni sugʻurtalash hamda xom ashyo va materiallarni sertifikatlash xarajatlarining (keyingi oʻrinlarda — sugʻurtalash va sertifikatlash xarajatlari) 50 foizigacha qismi, biroq bazaviy hisoblash miqdorining oʻttiz baravaridan oshmagan miqdori 2025-yil 31-dekabrga qadar qoplab beriladi.

2-bob. Sugʻurtalash va sertifikatlash xarajatlarining bir qismini qoplab berish uchun talab etiladigan hujjatlar va ularni koʻrib chiqish tartibi

4. Sugʻurtalash va sertifikatlash xarajatlarining bir qismi mazkur Nizomga ilovada keltirilgan sxemaga muvofiq qoplab beriladi.

5. Talabgor sugʻurtalash va sertifikatlash xarajatlarining bir qismini qoplash uchun Biznes portal orqali elektron (onlayn) ariza va buyurtmanoma toʻldirib, quyidagi hujjatlarni ilova qilgan holda markazga murojaat qiladi:

a) import qilinadigan asbob-uskunalarning sugʻurtalash xarajatlarining bir qismini qoplab berish yoʻnalishida:

bojxona yuk deklaratsiyasi nusxasi;

sugʻurta mukofoti toʻlanganligini tasdiqlovchi hujjatlar — sugʻurta shartnomasi va sugʻurta polisining nusxasi, toʻlov toʻlanganligi toʻgʻrisidagi hujjat va xizmat koʻrsatilganligini tasdiqlovchi hisobvaraq-faktura nusxasi;

b) import qilingan xom ashyo va materiallarni sertifikatlash xarajatlarining bir qismini qoplab berish yoʻnalishida talabgorning yetkazib beruvchilar bilan tuzilgan import kontraktiga asosan xarid qilingan xom ashyo va materiallarni sertifikatlash xarajatlarini tasdiqlovchi hujjatlar — sertifikatlash boʻyicha shartnoma, hisobvaraq-faktura, toʻlov topshiriqnoma nusxalari.

Talabgor har bir loyiha doirasida ham sugʻurtalash, ham sertifikatlash xarajatlarining bir qismini qoplash uchun murojaat qilishi mumkin.

Sugʻurtalash va sertifikatlash xarajatlarining bir qismini qoplab berish uchun Biznes portal orqali ariza bepul topshiriladi va koʻrib chiqiladi.

6. Talabgordan ushbu Nizomda nazarda tutilmagan hujjatlarni taqdim etishni talab qilishga yoʻl qoʻyilmaydi.

7. Markaz Vazirlar Mahkamasining 2024-yil 20-yanvardagi 37-son qarori bilan tasdiqlangan “Kichik biznesni uzluksiz qoʻllab-quvvatlash” kompleks dasturi tashabbuskorlarini tanlash, ularning loyihalarini qoʻllab-quvvatlash va moliyalashtirish toʻgʻrisidagi nizomga muvofiq sertifikatlash xarajatlari qoplab berilishi soʻralayotgan xom ashyo va materiallar hamda (yoki) sugʻurta xarajatlari qoplab berilishi soʻralayotgan asbob-uskunalar baholash guruhi tomonidan tanlab olingan talabgorning loyihasini amalga oshirish uchun foydalaniladigan mahsulot ekanligini Biznes portal orqali mustaqil ravishda tekshiradi.

8. Arizaga ilova qilingan hujjatlarning haqqoniyligi uchun talabgor javobgar hisoblanadi.

9. Markaz arizani besh ish kuni ichida koʻrib chiqadi hamda sugʻurtalash va sertifikatlash xarajatlarining bir qismini qoplab berish yoki qoplab berishni rad etish toʻgʻrisida Biznes portal orqali elektron xulosa tayyorlaydi va bu haqida talabgorni xabardor qiladi.

Rad etish uchun asoslar mavjud boʻlgan taqdirda, xabarnomada rad etishning barcha sabablari koʻrsatilishi lozim.

3-bob. Sugʻurtalash va sertifikatlash xarajatlarining bir qismini qoplab berishni rad etish

10. Quyidagi holatlarning kamida bittasi mavjudligi sugʻurtalash va sertifikatlash xarajatlarini qoplab berishni rad etish uchun asos boʻladi:

talabgor tomonidan ushbu Nizomning 5-bandida belgilangan hujjatlar toʻliq taqdim etilmaganligi;

sertifikatlash xarajatlari qoplab beriladigan xom ashyo va materiallar va (yoki) sugʻurtalash xarajatlari qoplab beriladigan asbob-uskunalar baholash guruhi tomonidan tanlab olingan tashabbuskorning loyihasida nazarda tutilmaganligi;

talabgor tomonidan soxta hujjatlar, notoʻgʻri yoki yolgʻon maʼlumotlar taqdim etilganligi.

Mazkur bandda nazarda tutilmagan sabablarga koʻra sugʻurtalash va sertifikatlash xarajatlarini qoplab berishni rad etishga yoʻl qoʻyilmaydi.

11. Talabgor sugʻurtalash va sertifikatlash xarajatlarini qoplab berishni rad etish uchun asos boʻlgan sabablarni bartaraf etib, ushbu Nizomda nazarda tutilgan hujjatlarni, shu jumladan, rad etishning ilgari koʻrsatilgan sabablari bartaraf etilganligini tasdiqlovchi hujjatlarni qayta koʻrib chiqish uchun Markazga elektron (onlayn) topshirish huquqiga ega.

12. Talabgor sugʻurtalash va sertifikatlash xarajatlarining bir qismini qoplab berishni rad etish uchun asos boʻlgan sabablarni bartaraf etgan taqdirda, hujjatlar Markaz tomonidan takroriy ariza olingan kundan boshlab uch ish kunidan koʻp boʻlmagan muddatda qayta koʻrib chiqiladi.

13. Arizani qayta koʻrib chiqishda markaz tomonidan ilgari berilgan rad etish toʻgʻrisidagi xulosada qayd etilmagan sabablarni koʻrsatishga yoʻl qoʻyilmaydi, ilgari koʻrsatilgan sabablar bartaraf etilganligini tasdiqlovchi hujjatlar bilan bogʻliq rad etish sabablari bundan mustasno.

14. Talabgor sugʻurtalash va sertifikatlash xarajatlarining bir qismini qoplab berishni rad etish toʻgʻrisidagi xulosa, shuningdek, markazning mansabdor shaxslari harakati (harakatsizligi) yuzasidan qonunchilik hujjatlarida belgilangan tartibda shikoyat qilish huquqiga ega.

4-bob. Sugʻurtalash va sertifikatlash xarajatlarining bir qismini qoplab berish uchun toʻlovlarni toʻlash tartibi

15. Markaz ushbu Nizomning 10-bandida koʻrsatilgan sugʻurtalash va sertifikatlash xarajatlarining bir qismini qoplab berish boʻyicha arizani rad etish uchun asoslar mavjud boʻlmagan hollarda, mazkur xarajatlarni qoplab berish toʻgʻrisida xulosa (talabgorning bank hisobvaragʻini koʻrsatgan holda) tayyorlaydi.

16. Markaz sugʻurtalash va sertifikatlash xarajatlarining bir qismini qoplab berish toʻgʻrisidagi xulosalarni ilova qilgan holda, hafta yakuni boʻyicha keyingi haftaning birinchi ish kunida Jamgʻarmaga buyurtmanoma yuboradi va bu haqida talabgorlarni xabardor qiladi.

17. Jamgʻarma taqdim etilgan buyurtmanomaga muvofiq uch ish kuni davomida xulosada koʻrsatilgan talabgorning bank hisobvaragʻiga tegishli mablagʻlarni oʻtkazib beradi.

5-bob. Yakunlovchi qoidalar

18. Talabgor davlat organlari va boshqa tashkilotlar xodimlarining xatti-harakatlari yoki harakatsizligi ustidan qonunchilikda belgilangan tartibda shikoyat qilishi mumkin.

19. Ushbu Nizomning qoidalarini buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

20. Mazkur Nizom 2025-yil 31-dekabrga qadar amal qiladi.

Bosqichlar Subyektlar Amalga oshiriladigan ishlar Muddatlar 1-bosqich Talabgor (tadbirkorlik subyekti) Biznes portal orqali quyidagilarni ilova qilgan holda, Kichik biznesga koʻmaklashish markazlariga ariza yuboradi: sugʻurtalash boʻyicha hujjatlar: bojxona yuk deklaratsiyasi, sugʻurta shartnomasi va sugʻurta polisining nusxasi, toʻlov toʻlanganligi toʻgʻrisidagi hujjat, xizmat koʻrsatilganligini tasdiqlovchi hisobvaraq-faktura nusxasi; sertifikatlash boʻyicha hujjatlar: bojxona yuk deklaratsiyasi, talabgorning yetkazib beruvchilar bilan tuzilgan import kontraktiga asosan xarid qilingan xom ashyo va materiallarni sertifikatlash xarajatlarini tasdiqlovchi hujjatlar — sertifikatlash boʻyicha shartnoma, hisobvaraq-faktura, toʻlov topshiriqnoma nusxalari. Oʻz xohishiga koʻra 2-bosqich Kichik biznesga koʻmaklashish markazi Arizani koʻrib chiqib, sugʻurtalash va sertifikatlash xarajatlarini qoplash yoki qoplashni rad etish toʻgʻrisida xulosa tayyorlaydi. 5 ish kuni ichida 3-bosqich Kichik biznesga koʻmaklashish markazi Sugʻurtalash va sertifikatlash xarajatlarini qoplab berish toʻgʻrisidagi xulosalarni ilova qilgan holda, Jamgʻarmaga buyurtmanoma yuboradi. Haftaning birinchi ish kunida 4-bosqich Kambagʻallikni qisqartirish davlat maqsadli jamgʻarmasi Talabgorning bank hisobvaragʻiga mablagʻlarni oʻtkazib beradi. 3 ish kuni ichida

Oʻzbekiston Respublikasining Bosh vaziri A. ARIPOV

Toshkent sh.,

2025-yil 24-fevral,

107-son

(Qonunchilik maʼlumotlari milliy bazasi, 25.02.2025-y., 09/25/107/0176-son)

lex.uz