📅 2025-yil 27-fevral · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 27 февраль · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 27 февраля 2025 г. · Постановления Президента
Официальный текст. Официальный документ. Редакционные примечания не включены.
📅 27 February 2025 · Presidential resolutions
Official text. Official document. Editorial notes are not included.
Ўзбекистон Республикаси Президентининг
қарори
Муборак Рамазон ойини муносиб тарзда ўтказиш тўғрисида
Кейинги йилларда мамлакатимизда виждон эркинлигини таъминлаш, муқаддас ислом динининг инсонпарварлик моҳиятини ўзида мужассам этадиган қадрият ва анъаналарни безавол сақлаш ҳамда келгуси авлодларга етказиш, юртимизда ҳукм сураётган тинчлик-осойишталик, миллатлар ва динлараро тотувлик ва ҳамжиҳатлик муҳитини мустаҳкамлаш, кўмакка муҳтож, ногиронлиги бўлган ва эҳтиёжманд инсонларни ҳар томонлама қўллаб-қувватлаш борасида улкан ишлар олиб борилмоқда. Бу каби эзгу амаллар муборак Рамазон ойида айниқса ёрқин намоён бўлмоқда.
Халқимиз учун азалдан меҳр-оқибат, шукроналик ва бағрикенглик тимсоли бўлиб келган муборак Рамазон ойини муносиб кутиб олиш ва юқори савияда ўтказиш мақсадида:
1. 2025 йилда муборак Рамазон ойининг бошланиши 1 март кунига тўғри келиши ҳақидаги Ўзбекистон мусулмонлари идорасининг ахбороти маълумот учун қабул қилинсин.
2. Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари Дин ишлари бўйича қўмита, Ижтимоий ҳимоя миллий агентлиги, Ўзбекистон маҳаллалари уюшмаси, Ўзбекистон фахрийларининг ижтимоий фаолиятини қўллаб-қувватлаш «Нуроний» жамғармаси ва бошқа ҳамкор ташкилотлар билан биргаликда ҳудудларда Рамазон ойини миллий анъана ва қадриятларга мос тарзда ўтказишга доир чора-тадбирларни амалга оширсин.
Ушбу фазилатли ойда «Рамазон — саховат, бирдамлик ва бағрикенглик ойи» ғояси асосида:
эҳтиёжмандлар ҳамда илм-маърифат йўлида изланаётган ёшларга ёрдам бериш бўйича ташаббусларни қўллаб-қувватлашга;
оилавий ришталарни мустаҳкамлаш, маҳаллаларда ўзаро тушуниш ва ишонч муҳитини кучайтириш ҳамда ҳурмат ва меҳр-оқибат қадриятларини тараннум этишга;
атроф-муҳитни асраш, муқаддас қадамжо, зиёратгоҳ ва қабристонларни ободонлаштириш, кўчатлар экишга ҳамда Рамазон ойи билан боғлиқ тадбирларда меъёрга амал қилиш ва исрофгарчиликка йўл қўймасликка алоҳида эътибор берилсин.
3. Ўзбекистон Миллий телерадиокомпанияси, Ўзбекистон Миллий ахборот агентлиги ва бошқа оммавий ахборот воситаларига Рамазон ойини ўтказиш билан боғлиқ тадбирларни кенг ёритиш тавсия этилсин.
4. Мазкур қарорнинг ижросини назорат қилиш Ўзбекистон Республикаси Бош вазири А.Н. Арипов ва Ўзбекистон Республикаси Президентининг маслаҳатчиси Р.Қ. Давлетов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2025 йил 27 февраль,
ПҚ-76-сон
Oʻzbekiston Respublikasi Prezidentining
qarori
Muborak Ramazon oyini munosib tarzda oʻtkazish toʻgʻrisida
Keyingi yillarda mamlakatimizda vijdon erkinligini taʼminlash, muqaddas islom dinining insonparvarlik mohiyatini oʻzida mujassam etadigan qadriyat va anʼanalarni bezavol saqlash hamda kelgusi avlodlarga yetkazish, yurtimizda hukm surayotgan tinchlik-osoyishtalik, millatlar va dinlararo totuvlik va hamjihatlik muhitini mustahkamlash, koʻmakka muhtoj, nogironligi boʻlgan va ehtiyojmand insonlarni har tomonlama qoʻllab-quvvatlash borasida ulkan ishlar olib borilmoqda. Bu kabi ezgu amallar muborak Ramazon oyida ayniqsa yorqin namoyon boʻlmoqda.
Xalqimiz uchun azaldan mehr-oqibat, shukronalik va bagʻrikenglik timsoli boʻlib kelgan muborak Ramazon oyini munosib kutib olish va yuqori saviyada oʻtkazish maqsadida:
1. 2025-yilda muborak Ramazon oyining boshlanishi 1-mart kuniga toʻgʻri kelishi haqidagi Oʻzbekiston musulmonlari idorasining axboroti maʼlumot uchun qabul qilinsin.
2. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari Din ishlari boʻyicha qoʻmita, Ijtimoiy himoya milliy agentligi, Oʻzbekiston mahallalari uyushmasi, Oʻzbekiston faxriylarining ijtimoiy faoliyatini qoʻllab-quvvatlash “Nuroniy” jamgʻarmasi va boshqa hamkor tashkilotlar bilan birgalikda hududlarda Ramazon oyini milliy anʼana va qadriyatlarga mos tarzda oʻtkazishga doir chora-tadbirlarni amalga oshirsin.
Ushbu fazilatli oyda “Ramazon — saxovat, birdamlik va bagʻrikenglik oyi” gʻoyasi asosida:
ehtiyojmandlar hamda ilm-maʼrifat yoʻlida izlanayotgan yoshlarga yordam berish boʻyicha tashabbuslarni qoʻllab-quvvatlashga;
oilaviy rishtalarni mustahkamlash, mahallalarda oʻzaro tushunish va ishonch muhitini kuchaytirish hamda hurmat va mehr-oqibat qadriyatlarini tarannum etishga;
atrof-muhitni asrash, muqaddas qadamjo, ziyoratgoh va qabristonlarni obodonlashtirish, koʻchatlar ekishga hamda Ramazon oyi bilan bogʻliq tadbirlarda meʼyorga amal qilish va isrofgarchilikka yoʻl qoʻymaslikka alohida eʼtibor berilsin.
3. Oʻzbekiston Milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalariga Ramazon oyini oʻtkazish bilan bogʻliq tadbirlarni keng yoritish tavsiya etilsin.
4. Mazkur qarorning ijrosini nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidentining maslahatchisi R.Q. Davletov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2025-yil 27-fevral,
PQ-76-son
Президента Республики Узбекистан
Постановление
О проведении священного месяца Рамазан на достойном уровне
В последние годы в стране ведется масштабная работа по обеспечению свободы совести, бережному сохранению и донесению до будущих поколений ценностей и традиций, олицетворяющих гуманистическую сущность священной религии ислам, укреплению царящей в нашей стране атмосферы мира и спокойствия, межнационального согласия и религиозной толерантности, а также всесторонней поддержке малообеспеченных, нуждающихся граждан и лиц с инвалидностью. Подобные благородные деяния особенно ярко отражаются во время священного месяца Рамазан.
В целях достойной встречи и проведения на высоком уровне месяца Рамазан, издревле являющегося для нашего народа символом доброты и милосердия, щедрости и великодушия:
1. Принять к сведению информацию Управления мусульман Узбекистана о совпадении начала священного месяца Рамазан 2025 года с 1 марта.
2. Совету Министров Республики Каракалпакстан, хокимиятам областей и города Ташкента совместно с Комитетом по делам религий, Национальным агентством социальной защиты, Ассоциацией махаллей Узбекистана, Фондом по поддержке общественной деятельности ветеранов Узбекистана «Нуроний» и другими организациями-партнерами реализовать меры по проведению месяца Рамазан в регионах в соответствии с национальными традициями и ценностями.
В этот благословенный месяц на основе идеи «Рамазан — месяц щедрости, единства и великодушия» уделять особое внимание:
поддержке инициатив по оказанию помощи нуждающимся людям и стремящейся к знаниям и просвещению молодежи;
укреплению семейных уз, усилению атмосферы взаимного понимания и доверия в махаллях, а также прославлению таких ценностей, как проявление уважения, милосердия и человечности;
охране окружающей среды, благоустройству священных мест паломничества и поклонения, кладбищ, посадке саженцев, а также соблюдению меры и недопущению расточительства в мероприятиях, связанных с месяцем Рамазан.
3. Рекомендовать Национальной телерадиокомпании Узбекистана, Национальному информационному агентству Узбекистана и другим средствам массовой информации широко освещать мероприятия, связанные с проведением месяца Рамазан.
4. Контроль за исполнением настоящего постановления возложить на Премьер-министра Республики Узбекистан А.Н. Арипова и советника Президента Республики Узбекистан Р.К. Давлетова.
Президент Республики Узбекистан Ш. МИРЗИЁЕВ
г. Ташкент,
27 февраля 2025 г.,
№ ПП-76