UzbekAI

Ўзбекистон Республикасининг Қонуни

Ўзбекистон Республикасининг айрим қонун ҳужжатларига жонли ижро санъатини янада ривожлантиришга қаратилган ўзгартириш ва қўшимчалар киритиш тўғрисида

Қонунчилик палатаси томонидан 2024 йил 18 октябрда қабул қилинган Сенат томонидан 2025 йил 24 январда маъқулланган

Кейинги йилларда мамлакатимизда концерт-томоша соҳасини янада тараққий эттириш, ушбу соҳада фаолият олиб бораётган шахслар учун шарт-шароитлар яратиш, миллий эстрада санъатини янада оммалаштириш, маданият ва санъатни инновацион жиҳатдан ривожлантиришга қаратилган тизимли чора-тадбирлар амалга оширилмоқда.

Шу билан бирга жонли ижро санъатини ривожлантиришни изчил давом эттириш, аҳолининг жонли ижрога бўлган эҳтиёжини қаноатлантириш ва унинг истеъмолчи сифатидаги ҳуқуқларини ҳимоя қилиш, жонли ижрони рағбатлантиришнинг янги механизмларини жорий этиш зарурати юзага келмоқда.

Мазкур Қонун билан «Маданий фаолият ва маданият ташкилотлари тўғрисида»ги Ўзбекистон Республикаси Қонунига Ўзбекистон Республикаси Маданият вазирлигининг жонли ижро санъатини ривожлантириш йўналишидаги ваколатларини, шунингдек концерт-томоша тадбирларида фонограммадан фойдаланиш даражасига қараб мусиқий ва бошқа асарларни ижро этиш усулларини аниқлаштиришни назарда тутувчи ўзгартириш ва қўшимчалар киритилмоқда.

Бундан ташқари « Истеъмолчиларнинг ҳуқуқларини ҳимоя қилиш тўғрисида »ги ва « Реклама тўғрисида »ги Ўзбекистон Республикаси қонунларига концерт-томоша тадбирларида фонограммадан фойдаланиш даражаси ҳақида ахборот бериш тартибини белгиловчи ўзгартиришлар киритилмоқда.

Ушбу Қонун концерт-томоша тадбирларини ташкил этиш самарадорлигини оширишга, жонли ижро санъатини ривожлантиришга, истеъдодли ижрочиларни қўллаб-қувватлашга, жонли ижрони рағбатлантиришнинг янги механизмларини жорий этишга хизмат қилади.

1-модда. Ўзбекистон Республикасининг 1996 йил 26 апрелда қабул қилинган «Истеъмолчиларнинг ҳуқуқларини ҳимоя қилиш тўғрисида»ги 221-I-сонли Қонунининг (Ўзбекистон Республикаси Олий Мажлисининг Ахборотномаси, 1996 йил, № 5-6, 59-модда; 2002 йил, № 4-5, 74-модда; 2003 йил, № 5, 67-модда; Ўзбекистон Республикаси Олий Мажлиси палаталарининг Ахборотномаси, 2005 йил, № 12, 413-модда; 2006 йил, № 10, 536-модда; 2008 йил, № 4, 183-модда; 2010 йил, № 10, 380-модда; 2013 йил, № 10, 263-модда; 2014 йил, № 1, 2-модда; 2016 йил, № 4, 125-модда; 2017 йил, № 6, 300-модда, № 9, 510-модда; 2018 йил, № 1, 1-модда; 2019 йил, № 12, 891-модда; 2021 йил, 4-сонга илова; 2022 йил, № 1, 4-модда; 2023 йил, № 2, 106-модда; 2024 йил, № 2, 111-модда) 6-моддасига қуйидаги ўзгартиришлар ва қўшимча киритилсин:

иккинчи қисмнинг ўн тўртинчи хатбошисидаги «театр-концерт» деган сўзлар «концерт-томоша» деган сўзлар билан алмаштирилсин;

қуйидаги мазмундаги учинчи қисм билан тўлдирилсин:

«Концерт-томоша тадбирининг дастурида ижрочилар ва асар муаллифлари тўғрисидаги маълумотлар кўрсатилиши шарт»;

учинчи , тўртинчи ва бешинчи қисмлар тегишинча тўртинчи, бешинчи ва олтинчи қисмлар деб ҳисоблансин.

2-модда. Ўзбекистон Республикасининг 2021 йил 20 январда қабул қилинган «Маданий фаолият ва маданият ташкилотлари тўғрисида»ги ЎРҚ-668-сонли Қонунига (Ўзбекистон Республикаси Олий Мажлиси палаталарининг Ахборотномаси, 2021 йил, № 1, 15-модда) қуйидаги қўшимчалар ва ўзгартириш киритилсин:

1) 8-модданинг биринчи қисми :

қуйидаги мазмундаги ўн иккинчи — ўн бешинчи хатбошилар билан тўлдирилсин:

«жонли ижрони тарғиб қилиш ҳамда жонли ижро этиш орқали миллий санъат ва маданиятнинг нуфузини оширишга хизмат қилаётган санъаткорларни, ижодкорларни ҳамда ижрочиларни қўллаб-қувватлаш юзасидан таклифлар ишлаб чиқади;

давлат маданий концерт-томоша тадбирларини ташкил этиш ва ўтказишда жонли ижро ва фонограммадан фойдаланиш даражасини ҳамда усулларини белгилайди;

концерт-томоша тадбирларида фонограммалардан ва муаллифлик асарларидан фойдаланишда ижрочилар томонидан амалдаги қонунчиликка риоя этилиши юзасидан мониторинг юритади;

мусиқа санъатини ҳар томонлама ривожлантириш, концерт-томоша тадбирларини юқори савияда ташкил этиш, ижрочиларга ўз салоҳиятини тўлақонли намойиш этиши учун шарт-шароитлар яратиш мақсадида ўз концерт дастурларини жонли ижро усулида амалга оширувчи хонандалар, созандалар ва бошқа ижрочилар фаолиятини рағбатлантириш бўйича чора-тадбирларни амалга оширади»;

ўн иккинчи — ўн бешинчи хатбошилари тегишинча ўн олтинчи — ўн тўққизинчи хатбошилар деб ҳисоблансин;

2) 21-модда қуйидаги мазмундаги учинчи қисм билан тўлдирилсин:

«Концерт-томоша тадбирларида мусиқали ва бошқа асарларни ижро этишда фонограммадан фойдаланиш даражасига қараб, ижрочилар томонидан қуйидаги усуллар билан ижро амалга оширилиши мумкин:

жонли ижро — мусиқали ёки бошқа асар барча ижрочилар (хонандалар, созандалар, бошловчилар, сўз усталари ва бошқа ижрочилар) томонидан рақамли ёки аналог ахборот ташувчилардаги олдиндан ёзиб олинган аудиоёзувлардан фойдаланмаган ҳолда, ўз овози билан куйлаш ёки ўқиш, шунингдек мусиқий асбобларда ижро этиш йўли билан реал вақт режимида ижро этилади;

фонограммадан қисман фойдаланилган ҳолда — мусиқали ёки бошқа асар товуш элементларининг бир қисми олдиндан ёзиб олинган аудиоёзувлардан фойдаланган ҳолда, қолган элементлар эса реал вақт режимида саҳнада мусиқачилар ва вокалчилар томонидан ижро этилади;

фонограммадан фойдаланилган ҳолда — мусиқали ёки бошқа асарнинг барча товуш элементлари олдиндан ёзиб олинган аудиоёзувлардан фойдаланилади ҳамда мусиқий асарнинг ижросига вокал, чолғу ёки вокал-чолғу ижрочиси (ижрочилари) томонидан бир вақтнинг ўзида тақлид қилинади».

3-модда . Ўзбекистон Республикасининг 2022 йил 7 июнда қабул қилинган «Реклама тўғрисида»ги ЎРҚ-776-сонли Қонунига (Ўзбекистон Республикаси Олий Мажлиси палаталарининг Ахборотномаси, 2022 йил, № 6, 571-модда; 2024 йил, № 2, 108-модда, № 9, 964-модда) қуйидаги ўзгартиришлар киритилсин:

1) 19-модданинг биринчи қисмидаги «театр-концерт» деган сўзлар «концерт-томоша» деган сўзлар билан алмаштирилсин;

2) 44-моддаси қуйидаги таҳрирда баён этилсин:

«44-модда. Концерт-томоша тадбирлари рекламасида фонограммадан фойдаланилиши тўғрисидаги ахборот

Концерт-томоша тадбирларида фонограммадан фойдаланилганда ушбу тадбир рекламасида фонограммадан фойдаланиш даражаси тўғрисидаги ахборот келтирилиши керак.

Ташқи реклама орқали жойлаштириладиган концерт-томоша тадбири рекламасида фонограммадан фойдаланиш даражаси тўғрисидаги ахборот умумий реклама майдонининг (сатҳининг) камида ўн фоизини ташкил этиши керак.

Концерт-томоша тадбири ташкилотчилари бевосита томоша бошланишидан олдин фонограммадан фойдаланилиш даражаси тўғрисидаги ахборотни ўз ичига олган аудиохабар тарқатилишини таъминлайди».

4-модда. Ўзбекистон Республикаси Маданият вазирлиги ва бошқа манфаатдор ташкилотлар ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.

5-модда. Ўзбекистон Республикаси Вазирлар Маҳкамаси:

ҳукумат қарорларини ушбу Қонунга мувофиқлаштирсин;

республика ижро этувчи ҳокимият органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.

6-модда. Ушбу Қонун расмий эълон қилинган кундан эътиборан кучга киради.

Ўзбекистон Республикасининг Президенти Ш. МИРЗИЁЕВ

Тошкент ш.,

2025 йил 11 март,

ЎРҚ-1046-сон

(Қонунчилик маълумотлари миллий базаси, 12.03.2025 й., 03/25/1046/0229-сон)

lex.uz

Oʻzbekiston Respublikasining Qonuni

Oʻzbekiston Respublikasining ayrim qonun hujjatlariga jonli ijro sanʼatini yanada rivojlantirishga qaratilgan oʻzgartirish va qoʻshimchalar kiritish toʻgʻrisida

Qonunchilik palatasi tomonidan 2024-yil 18-oktabrda qabul qilingan Senat tomonidan 2025-yil 24-yanvarda maʼqullangan

Keyingi yillarda mamlakatimizda konsert-tomosha sohasini yanada taraqqiy ettirish, ushbu sohada faoliyat olib borayotgan shaxslar uchun shart-sharoitlar yaratish, milliy estrada sanʼatini yanada ommalashtirish, madaniyat va sanʼatni innovatsion jihatdan rivojlantirishga qaratilgan tizimli chora-tadbirlar amalga oshirilmoqda.

Shu bilan birga jonli ijro sanʼatini rivojlantirishni izchil davom ettirish, aholining jonli ijroga boʻlgan ehtiyojini qanoatlantirish va uning isteʼmolchi sifatidagi huquqlarini himoya qilish, jonli ijroni ragʻbatlantirishning yangi mexanizmlarini joriy etish zarurati yuzaga kelmoqda.

Mazkur Qonun bilan “Madaniy faoliyat va madaniyat tashkilotlari toʻgʻrisida”gi Oʻzbekiston Respublikasi Qonuniga Oʻzbekiston Respublikasi Madaniyat vazirligining jonli ijro sanʼatini rivojlantirish yoʻnalishidagi vakolatlarini, shuningdek konsert-tomosha tadbirlarida fonogrammadan foydalanish darajasiga qarab musiqiy va boshqa asarlarni ijro etish usullarini aniqlashtirishni nazarda tutuvchi oʻzgartirish va qoʻshimchalar kiritilmoqda.

Bundan tashqari “ Isteʼmolchilarning huquqlarini himoya qilish toʻgʻrisida ”gi va “ Reklama toʻgʻrisida ”gi Oʻzbekiston Respublikasi qonunlariga konsert-tomosha tadbirlarida fonogrammadan foydalanish darajasi haqida axborot berish tartibini belgilovchi oʻzgartirishlar kiritilmoqda.

Ushbu Qonun konsert-tomosha tadbirlarini tashkil etish samaradorligini oshirishga, jonli ijro sanʼatini rivojlantirishga, isteʼdodli ijrochilarni qoʻllab-quvvatlashga, jonli ijroni ragʻbatlantirishning yangi mexanizmlarini joriy etishga xizmat qiladi.

1-modda. Oʻzbekiston Respublikasining 1996-yil 26-aprelda qabul qilingan “Isteʼmolchilarning huquqlarini himoya qilish toʻgʻrisida”gi 221-I-sonli Qonunining (Oʻzbekiston Respublikasi Oliy Majlisining Axborotnomasi, 1996-yil, № 5-6, 59-modda; 2002-yil, № 4-5, 74-modda; 2003-yil, № 5, 67-modda; Oʻzbekiston Respublikasi Oliy Majlisi palatalarining Axborotnomasi, 2005-yil, № 12, 413-modda; 2006-yil, № 10, 536-modda; 2008-yil, № 4, 183-modda; 2010-yil, № 10, 380-modda; 2013-yil, № 10, 263-modda; 2014-yil, № 1, 2-modda; 2016-yil, № 4, 125-modda; 2017-yil, № 6, 300-modda, № 9, 510-modda; 2018-yil, № 1, 1-modda; 2019-yil, № 12, 891-modda; 2021-yil, 4-songa ilova; 2022-yil, № 1, 4-modda; 2023-yil, № 2, 106-modda; 2024-yil, № 2, 111-modda) 6-moddasiga quyidagi oʻzgartirishlar va qoʻshimcha kiritilsin:

ikkinchi qismning oʻn toʻrtinchi xatboshisidagi “teatr-konsert” degan soʻzlar “konsert-tomosha” degan soʻzlar bilan almashtirilsin;

quyidagi mazmundagi uchinchi qism bilan toʻldirilsin:

“Konsert-tomosha tadbirining dasturida ijrochilar va asar mualliflari toʻgʻrisidagi maʼlumotlar koʻrsatilishi shart”;

uchinchi , toʻrtinchi va beshinchi qismlar tegishincha toʻrtinchi, beshinchi va oltinchi qismlar deb hisoblansin.

2-modda. Oʻzbekiston Respublikasining 2021-yil 20-yanvarda qabul qilingan “Madaniy faoliyat va madaniyat tashkilotlari toʻgʻrisida”gi OʻRQ-668-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2021-yil, № 1, 15-modda) quyidagi qoʻshimchalar va oʻzgartirish kiritilsin:

1) 8-moddaning birinchi qismi :

quyidagi mazmundagi oʻn ikkinchi — oʻn beshinchi xatboshilar bilan toʻldirilsin:

“jonli ijroni targʻib qilish hamda jonli ijro etish orqali milliy sanʼat va madaniyatning nufuzini oshirishga xizmat qilayotgan sanʼatkorlarni, ijodkorlarni hamda ijrochilarni qoʻllab-quvvatlash yuzasidan takliflar ishlab chiqadi;

davlat madaniy konsert-tomosha tadbirlarini tashkil etish va oʻtkazishda jonli ijro va fonogrammadan foydalanish darajasini hamda usullarini belgilaydi;

konsert-tomosha tadbirlarida fonogrammalardan va mualliflik asarlaridan foydalanishda ijrochilar tomonidan amaldagi qonunchilikka rioya etilishi yuzasidan monitoring yuritadi;

musiqa sanʼatini har tomonlama rivojlantirish, konsert-tomosha tadbirlarini yuqori saviyada tashkil etish, ijrochilarga oʻz salohiyatini toʻlaqonli namoyish etishi uchun shart-sharoitlar yaratish maqsadida oʻz konsert dasturlarini jonli ijro usulida amalga oshiruvchi xonandalar, sozandalar va boshqa ijrochilar faoliyatini ragʻbatlantirish boʻyicha chora-tadbirlarni amalga oshiradi”;

oʻn ikkinchi — oʻn beshinchi xatboshilari tegishincha oʻn oltinchi — oʻn toʻqqizinchi xatboshilar deb hisoblansin;

2) 21-modda quyidagi mazmundagi uchinchi qism bilan toʻldirilsin:

“Konsert-tomosha tadbirlarida musiqali va boshqa asarlarni ijro etishda fonogrammadan foydalanish darajasiga qarab, ijrochilar tomonidan quyidagi usullar bilan ijro amalga oshirilishi mumkin:

jonli ijro — musiqali yoki boshqa asar barcha ijrochilar (xonandalar, sozandalar, boshlovchilar, soʻz ustalari va boshqa ijrochilar) tomonidan raqamli yoki analog axborot tashuvchilardagi oldindan yozib olingan audioyozuvlardan foydalanmagan holda, oʻz ovozi bilan kuylash yoki oʻqish, shuningdek musiqiy asboblarda ijro etish yoʻli bilan real vaqt rejimida ijro etiladi;

fonogrammadan qisman foydalanilgan holda — musiqali yoki boshqa asar tovush elementlarining bir qismi oldindan yozib olingan audioyozuvlardan foydalangan holda, qolgan elementlar esa real vaqt rejimida sahnada musiqachilar va vokalchilar tomonidan ijro etiladi;

fonogrammadan foydalanilgan holda — musiqali yoki boshqa asarning barcha tovush elementlari oldindan yozib olingan audioyozuvlardan foydalaniladi hamda musiqiy asarning ijrosiga vokal, cholgʻu yoki vokal-cholgʻu ijrochisi (ijrochilari) tomonidan bir vaqtning oʻzida taqlid qilinadi”.

3-modda . Oʻzbekiston Respublikasining 2022-yil 7-iyunda qabul qilingan “Reklama toʻgʻrisida”gi OʻRQ-776-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2022-yil, № 6, 571-modda; 2024-yil, № 2, 108-modda, № 9, 964-modda) quyidagi oʻzgartirishlar kiritilsin:

1) 19-moddaning birinchi qismidagi “teatr-konsert” degan soʻzlar “konsert-tomosha” degan soʻzlar bilan almashtirilsin;

2) 44-moddasi quyidagi tahrirda bayon etilsin:

“44-modda. Konsert-tomosha tadbirlari reklamasida fonogrammadan foydalanilishi toʻgʻrisidagi axborot

Konsert-tomosha tadbirlarida fonogrammadan foydalanilganda ushbu tadbir reklamasida fonogrammadan foydalanish darajasi toʻgʻrisidagi axborot keltirilishi kerak.

Tashqi reklama orqali joylashtiriladigan konsert-tomosha tadbiri reklamasida fonogrammadan foydalanish darajasi toʻgʻrisidagi axborot umumiy reklama maydonining (sathining) kamida oʻn foizini tashkil etishi kerak.

Konsert-tomosha tadbiri tashkilotchilari bevosita tomosha boshlanishidan oldin fonogrammadan foydalanilish darajasi toʻgʻrisidagi axborotni oʻz ichiga olgan audioxabar tarqatilishini taʼminlaydi”.

4-modda. Oʻzbekiston Respublikasi Madaniyat vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

5-modda. Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

6-modda. Ushbu Qonun rasmiy eʼlon qilingan kundan eʼtiboran kuchga kiradi.

Oʻzbekiston Respublikasining Prezidenti Sh. MIRZIYOYEV

Toshkent sh.,

2025-yil 11-mart,

OʻRQ-1046-son

(Qonunchilik maʼlumotlari milliy bazasi, 12.03.2025-y., 03/25/1046/0229-son)

lex.uz

Закон Республики Узбекистан

О внесении изменений и дополнений в некоторые законодательные акты Республики Узбекистан, направленных на дальнейшее развитие искусства живого исполнения

Принят Законодательной палатой 18 октября 2024 года Одобрен Сенатом 24 января 2025 года

В последние годы в нашей стране реализуются системные меры, направленные на дальнейшее развитие концертно-зрелищной сферы, создание условий для людей, работающих в этой сфере, популяризацию национального эстрадного искусства, инновационное развитие культуры и искусства.

Вместе с тем возникает необходимость в последовательном продолжении развития искусства живого исполнения, удовлетворении потребности населения в живом исполнении и защите его права как потребителя, внедрении новых механизмов стимулирования живого исполнения.

Данным Законом в Закон Республики Узбекистан «О культурной деятельности и культурных организациях» вносятся изменения и дополнения, предусматривающие определение полномочий Министерства культуры Республики Узбекистан в направлении развития искусства живого исполнения, а также уточнение способов исполнения музыкальных и других произведений в зависимости от степени использования фонограммы на концертно-зрелищных мероприятиях.

Кроме того, в законы Республики Узбекистан « О защите прав потребителей » и « О рекламе » вносятся изменения, определяющие порядок предоставления информации о степени использования фонограммы на концертно-зрелищных мероприятиях.

Настоящий Закон послужит повышению эффективности организации концертно-зрелищных мероприятий, развитию искусства живого исполнения, поддержке талантливых исполнителей, внедрению новых механизмов стимулирования живого исполнения.

Статья 1. Внести в статью 6 Закона Республики Узбекистан от 26 апреля 1996 года № 221-I «О защите прав потребителей» (Ведомости Олий Мажлиса Республики Узбекистан, 1996 г., № 5-6, ст. 59; 2002 г., № 4-5, ст. 74; 2003 г., № 5, ст. 67; Ведомости палат Олий Мажлиса Республики Узбекистан, 2005 г., № 12, ст. 413; 2006 г., № 10, ст. 536; 2008 г., № 4, ст. 183; 2010 г., № 10, ст. 380; 2013 г., № 10, ст. 263; 2014 г., № 1, ст. 2; 2016 г., № 4, ст. 125; 2017 г., № 6, ст. 300, № 9, ст. 510; 2018 г., № 1, ст. 1; 2019 г., № 12, ст. 891; 2021 г., приложение к № 4; 2022 г., № 1, ст. 4; 2023 г., № 2, ст. 106; 2024 г., № 2, ст. 111) следующие изменения и дополнение:

в абзаце четырнадцатом части второй слова «театрально-концертных» заменить словами «концертно-зрелищных»;

дополнить частью третьей следующего содержания:

«В программе концертно-зрелищного мероприятия должна быть указана информация об исполнителях и авторах произведения»;

части третью , четвертую и пятую считать соответственно частями четвертой, пятой и шестой.

Статья 2. Внести в Закон Республики Узбекистан от 20 января 2021 года № ЗРУ-668 «О культурной деятельности и организациях культуры» (Ведомости палат Олий Мажлиса Республики Узбекистан, 2021 г., № 1, ст. 15) следующие дополнения и изменение:

1) в части первой статьи 8:

дополнить абзацами двенадцатым — пятнадцатым следующего содержания:

«разрабатывает предложения по поддержке артистов, творческих работников и исполнителей, служащих повышению престижа национального искусства и культуры путем пропаганды живого исполнения и живым исполнением;

определяет степень и способы живого исполнения и использования фонограммы при организации и проведении государственных культурных концертно-зрелищных мероприятий;

ведет мониторинг соблюдения исполнителями действующего законодательства при использовании фонограмм и авторских произведений на концертно-зрелищных мероприятиях;

в целях всестороннего развития музыкального искусства, организации концертно-зрелищных мероприятий на высоком уровне, создания исполнителям условий для полноценной демонстрации своего потенциала осуществляет меры по стимулированию деятельности певцов, музыкантов и других исполнителей, которые исполняют свои концертные программы способом живого исполнения»;

абзацы двенадцатый — пятнадцатый считать соответственно абзацами шестнадцатым — девятнадцатым;

2) статью 21 дополнить частью третьей следующего содержания:

«По степени использования фонограммы при исполнение музыкальных и других произведений на концертно-зрелищных мероприятиях исполнение может осуществляться исполнителями следующими способами:

живое исполнение — музыкальное или иное произведение исполняется в режиме реального времени всеми исполнителями (певцами, музыкантами, ведущими, мастерами слова и другими исполнителями) путем пения или чтения своим голосом, а также исполнения на музыкальных инструментах без использования предварительно записанных аудиозаписей на цифровых или аналоговых носителях информации;

с частичным использованием фонограммы — часть звуковых элементов музыкального или иного произведения исполняется с использованием предварительно записанных аудиозаписей, а остальные элементы — музыкантами и вокалистами на сцене в режиме реального времени;

с использованием фонограммы — используются предварительно записанные аудиозаписи всех звуковых элементов музыкального или иного произведения и одновременно имитируется исполнение музыкального произведения вокальным, инструментальным или вокально-инструментальным исполнителем (исполнителями)».

Статья 3. Внести в Закон Республики Узбекистан от 7 июня 2022 года № ЗРУ-776 «О рекламе» (Ведомости палат Олий Мажлиса Республики Узбекистан, 2022 г., № 6, ст. 571; 2024 г., № 2, ст. 108, № 9, ст. 964) следующие изменения:

1) в части первой статьи 19 слова «театрально-концертных» заменить словами «концертно-зрелищных»;

2) статью 44 изложить в следующей редакции:

«Статья 44. Информация об использовании фонограммы при рекламе концертно-зрелищных мероприятий

При использовании фонограммы на концертно-зрелищных мероприятиях реклама данных мероприятий должна содержать информацию о степени использования фонограммы.

Информация о степени использования фонограммы в рекламе концертно-зрелищного мероприятия, размещаемой посредством наружной рекламы, должна составлять не менее десяти процентов от общей рекламной площади (пространства).

Непосредственно перед началом представления организаторами концертно-зрелищного мероприятия обеспечивается распространение аудиосообщения, содержащего информацию о степени использования фонограммы».

Статья 4. Министерству культуры Республики Узбекистан и другим заинтересованным организациям обеспечить исполнение, доведение до исполнителей и разъяснение среди населения сути и значения настоящего Закона.

Статья 5. Кабинету Министров Республики Узбекистан:

привести решения правительства в соответствие с настоящим Законом;

обеспечить пересмотр и отмену республиканскими органами исполнительной власти их нормативно-правовых актов, противоречащих настоящему Закону.

Статья 6. Настоящий Закон вступает в силу со дня его официального опубликования.

Президент Республики Узбекистан Ш. МИРЗИЁЕВ

г. Ташкент,

11 марта 2025 г.,

№ ЗРУ-1046

(Национальная база данных законодательства, 12.03.2025 г., № 03/25/1046/0229)

lex.uz