📅 2025-yil 18-mart · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 18 март · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 18 марта 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 18 March 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
РЕЙТИНГ БАЛЛАРИ
НАМУНАВИЙ ШАКЛИ
РЎЙХАТИ
Қишлоқ хўжалиги экинлари уруғчилиги соҳасида «E-urugʻ» ахборот тизимини жорий этиш чора-тадбирлари тўғрисида
Ўзбекистон Республикаси Президентининг «Пахтачиликда уруғчилик тизимини ривожлантириш ҳамда пахта ҳосилдорлигини оширишнинг қўшимча чора-тадбирлари тўғрисида» 2023 йил 15 декабрдаги ПҚ-391-сон қарори ижросини таъминлаш, шунингдек, қишлоқ хўжалиги экинлари уруғликларини етиштириш ҳуқуқига эга бўлиш бўйича танловларни замонавий ахборот-коммуникация технологияларидан фойдаланган ҳолда ташкил этиш мақсадида Вазирлар Маҳкамаси қарор қилади:
1. Қуйидагиларни назарда тутувчи Қишлоқ хўжалиги экинлари уруғликларини етиштириш ҳуқуқига эга бўлиш бўйича танловларни «E-urugʻ» ахборот тизимида ташкил этиш ва ўтказиш тартиби тўғрисидаги низом 1-иловага мувофиқ тасдиқлансин:
қишлоқ хўжалиги экинлари уруғликларини етиштириш ҳуқуқига эга бўлиш бўйича танловларни «E-urugʻ» ахборот тизимида ўтказиш ҳақидаги хабарни эълон қилиш ва электрон танловларни ташкил этиш;
қишлоқ хўжалиги экинлари уруғликларини етиштириш ҳуқуқига эга бўлиш бўйича электрон танлов ғолибларини аниқлаш ва танлов натижаларини расмийлаштириш.
2. Қишлоқ хўжалиги экинлари уруғликларини етиштириш ҳуқуқига эга бўлиш бўйича электрон танловларни ўтказишда зарур бўладиган маълумотларни «E-urugʻ» ахборот тизимига интеграция қиладиган вазирлик ва идоралар рўйхати 2-иловага мувофиқ тасдиқлансин.
3. Ўзбекистон Республикаси Қишлоқ хўжалиги вазирлиги манфаатдор вазирликлар ва идоралар билан биргаликда қишлоқ хўжалиги экинлари уруғликларини етиштириш ҳуқуқига эга бўлиш бўйича электрон танловларни ўтказишда, шунингдек, уруғликлар ҳажми, сифати, селекция нави ва авлодлари бўйича маълумотларни юритишда «E-urugʻ» ахборот тизими кенг жорий этилишини таъминласин.
4. Ўзбекистон Республикаси Ҳукуматининг 3-иловага мувофиқ айрим қарорларига ўзгартиришлар киритилсин.
5. Ўзбекистон Республикаси Қишлоқ хўжалиги вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.
Вазирлар Маҳкамасининг 2025 йил 18 мартдаги 166-сон қарорига 1-ИЛОВА
Қишлоқ хўжалиги экинлари уруғликларини етиштириш ҳуқуқига эга бўлиш бўйича танловларни «E-urugʻ» ахборот тизимида ташкил этиш ва ўтказиш тартиби тўғрисида
1-боб. Умумий қоидалар
1. Ушбу Низом қишлоқ хўжалиги экинлари уруғликларини етиштириш ҳуқуқига эга бўлиш бўйича фермер хўжаликлари ва бошқа қишлоқ хўжалиги субъектлари ўртасида танловларни «E-urugʻ» ахборот тизимида ташкил этиш ҳамда ўтказиш тартибини белгилайди.
2. Мазкур Низом талаблари қишлоқ хўжалиги экинларининг янги ва истиқболли навларини оригинал уруғларини кўпайтириш ва дастлабки кўпайтириш ҳамда районлашган навларнинг бирламчи (элита) уруғчилигини ташкил этиш билан шуғулланувчи қуйидагиларга:
а) Қишлоқ хўжалиги вазирлиги ҳузуридаги Уруғчиликни ривожлантириш маркази тизимидаги ҳамда хусусий секторга ўтказилган элита уруғчилик хўжаликлари;
б) илмий-тадқиқот муассасалари ва уларнинг илмий-тажриба станциялари (экин турига қараб) ҳамда олий таълим муассасалари;
в) Ўзбекистон Республикаси Президенти ҳузуридаги Пахтачилик кенгаши томонидан ташкил этилган хусусий уруғчилик корхоналарига нисбатан татбиқ этилмайди.
3. Ушбу Низомда қуйидаги асосий тушунчалар қўлланилади:
ариза — фермер хўжаликлари ва бошқа қишлоқ хўжалиги субъектлари томонидан қишлоқ хўжалиги экинлари уруғликларини етиштириш ҳуқуқига эга бўлиш учун (махсус элита уруғчилик хўжаликлари бундан мустасно) тақдим этилган электрон ариза;
«E-urugʻ» ахборот тизимидаги техник узилишлар — «E-urugʻ» ахборот тизимидаги электрон танловлар жараёнида бир ёки бир нечта иштирокчининг қатнашиши ёхуд мазкур Низом талаблари асосида техник операторнинг хизматлар кўрсатиш имконини чеклаб қўядиган техник носозликлар;
«E-urugʻ» ахборот тизими — Қишлоқ хўжалиги вазирлигининг «Рақамли қишлоқ хўжалиги» ягона интеграцион платформаси таркибига кирувчи, электрон танловларни ташкил этиш ҳамда ўтказиш, мониторинг ва апробация тадбирлари учун зарур ахборотни киритиш, сақлаш ва қайта ишлаш, қишлоқ хўжалиги экинлари уруғликлари базасини шакллантириш, шунингдек, юридик шахсларнинг ушбу жараёнларда қатнашиш имконини таъминлайдиган ахборот тизими;
иштирокчи — оригинал, элита ва кейинги авлодларга мансуб қишлоқ хўжалиги экинлари уруғликларини етиштириш ҳуқуқига эга бўлиш учун «E-urugʻ» ахборот тизими орқали белгиланган тартибда ариза юборган қишлоқ хўжалиги субъектлари;
иштирокчини аутентификациялаш — аввал идентификация қилинган фойдаланувчидан реал вақт режимида олинган дастлабки идентификация маълумотлари билан автоматлаштирилган ҳолда (инсон омилисиз) солиштириш орқали фойдаланувчининг шахсини текшириш ва тасдиқлаш жараёни;
оммавий оферта — тизимдан фойдаланиш бўйича хизматлар кўрсатиш шартномасини тузиш юзасидан иштирокчига билдирилган расмий таклиф;
техник оператор — «E-urugʻ» ахборот тизимини ишлаб чиқадиган ҳамда ишга тушириш, техник ва дастурий жиҳатдан қўллаб-қувватлашни амалга оширадиган «Агросаноатни рақамлаштириш маркази» МЧЖ;
тўлов — электрон танловда қатнашиш, аризани қабул қилиш, танловни ташкил этиш ва баённомани расмийлаштириш учун иштирокчи томонидан тўланадиган пул маблағи;
фойдаланувчини идентификациялаш — шахсий маълумотлар ёрдамида фойдаланувчининг шахсини тасдиқлаб, масофадан туриб «E-urugʻ» ахборот тизими хизматларидан фойдаланиш имконини яратувчи механизм;
хусусий уруғчилик корхоналари — Ўзбекистон Республикаси Президенти ҳузуридаги Пахтачилик кенгашининг тегишли қарорларига асосан ташкил этилган субъектлар;
ҳуқуқий оператор — «E-urugʻ» ахборот тизими иштирокчилари ўртасида шартномавий муносабатларни мувофиқлаштирувчи Қишлоқ хўжалиги вазирлиги ҳузуридаги Уруғчиликни ривожлантириш маркази;
электрон рақамли имзо — электрон ҳужжатдаги ахборотни электрон рақамли имзонинг ёпиқ калитидан фойдаланган ҳолда махсус ўзгартириш натижасида ҳосил қилинган ҳамда электрон рақамли имзонинг очиқ калити ёрдамида электрон ҳужжатдаги ахборотда хатолик йўқлигини аниқлаш ва электрон рақамли имзо ёпиқ калитининг эгасини идентификациялаш имконини берадиган имзо;
электрон танлов ғолиби — электрон танлов мезонлари ва шартларига мувофиқ ўтиш балини тўплаган иштирокчи;
«Электрон ҳукумат» идоралараро интеграцион платформаси — жисмоний ва юридик шахсларнинг ҳақиқий идентификациялаш, шунингдек, идоралараро электрон ҳамкорликда мансабдор шахсларнинг ахборот тизимлари ва маълумотлар базаларидан рухсат олиб фойдаланишини таъминловчи давлат ахборот тизими;
QR-код — ваколатли орган томонидан электрон танлов натижалари бўйича баённомаларга жаҳон интернет тармоғи орқали жойлаштириладиган ҳавола.
4. Қишлоқ хўжалиги вазирлиги ҳузуридаги Уруғчиликни ривожлантириш марказининг ҳудудий бошқармаларининг электрон танловларни ўтказиш бўйича эълонлари асосида техник оператор томонидан электрон танловлар «E-urugʻ» ахборот тизимида мазкур Низом талабларига мувофиқ ташкил этилади ва ўтказилади.
5. Техник оператор интеграция қилиш орқали шаклланган маълумотлар ва ҳужжатларнинг ҳаққонийлиги ва ишончлиги учун жавобгар ҳисобланмайди.
Техник оператор иштирокчининг шартномада (офертада) белгиланган шахсий маълумотлари сир сақланишини ва махфийлигини таъминлайди.
6. Техник оператор электрон танловни ташкил этиш ва ўтказишда «E-urugʻ» ахборот тизими орқали амалга оширилган операциялар рўйхатга олинишини, операциялар тўғрисидаги ҳисоботлар ва маълумотлар шакллантирилишини ҳамда юборилган ёки қабул қилинган шаклда унинг яхлитлиги ва ўзгармаслигини таъминлаган ҳолда беш йилдан кам бўлмаган муддатда сақланишини таъминлайди.
7. Ҳуқуқий оператор ўзига юкланган вазифаларга мувофиқ қуйидаги мажбуриятларни бажаради:
электрон танловни белгиланган вақтда ташкил этиш;
техник оператор билан биргаликда электрон танловнинг инсон омили аралашувисиз «E-urugʻ» ахборот тизимида ўтказилишини таъминлаш;
электрон танлов якунланганлиги тўғрисидаги ахборотни эълон қилиш;
техник оператор билан биргаликда бошқа шахсларнинг электрон ҳужжат ва хабарларга, шунингдек, иштирокчининг шахсий маълумотларига рухсатсиз киришидан ҳимоялаш чораларини кўриш;
электрон ҳужжат ва хабарларни ҳамда иштирокчининг шахсий маълумотларини учинчи шахсларга бермаслик (қонунчилик ҳужжатларида назарда тутилган ҳолатлар бундан мустасно);
техник оператор билан биргаликда электрон танлов натижалари деб эътироф этиладиган электрон баённомаларни шакллантириш ҳамда электрон баённомаларни электрон танлов ғолибларининг шахсий кабинетлари орқали тақдим этиш;
аҳоли ва тадбиркорлик субъектларини электрон танловларда иштирок этиш тартиби тўғрисида оммавий ва бошқа ахборот воситалари орқали мунтазам равишда таништириб бориш;
иштирокчи ва электрон танловга алоқадор бошқа шахсларни электрон танловга оид маълумотлар билан тезкор ва қулай равишда хабардор қилиш;
иштирокчиларга «E-urugʻ» ахборот тизимидаги электрон танловларда қатнашиш имкониятларининг тенглигини таъминлаш;
электрон танловни ўтказиш тартиби бузилишини олдини олиш ҳамда бундай ҳолатлар аниқланганда уларни тезкор бартараф этиш чораларини кўриш.
Ҳуқуқий операторга қонунчилик ҳужжатларига мувофиқ бошқа мажбуриятлар ҳам юкланиши мумкин.
8. Техник оператор ўзига юкланган вазифаларга мувофиқ қуйидаги мажбуриятларни бажаради:
«E-urugʻ» ахборот тизимини узлуксиз ишлашини таъминлаш;
ўтказилган электрон танловга оид барча маълумотларни (иштирокчининг шахсини ошкор қилмаган ҳолда) ўзининг ахборот тизимида кунлик ва мунтазам (ҳафталик, ойлик ва чораклик) даврийлик билан битимлар реестри кўринишида умумий фойдаланиладиган ва машинада ўқиладиган форматларда юклаб олиш имкониятини яратиш;
иштирокчи «E-urugʻ» ахборот тизимини янада қулайроқ ишлаши борасида ўз фикрини эркин ва ошкора билдириши учун мессенжер ва бошқа тармоқлардан фойдаланишини ҳамда ушбу мақсадларда кенг фойдаланиладиган бошқа сервис ва имкониятлар доимий ишлашини таъминлаш.
Техник операторга қонунчилик ҳужжатларига мувофиқ бошқа мажбуриятлар ҳам юкланиши мумкин.
9. Ҳуқуқий оператор ва унинг ҳудудий бошқармалари ҳамда иштирокчи «E-urugʻ» ахборот тизимида рўйхатдан ўтади.
«E-urugʻ» ахборот тизимида рўйхатдан ўтишда қуйидаги маълумотлар кўрсатилиши шарт:
Ўзбекистон Республикаси резиденти ҳисобланган юридик шахслар, юридик шахс ҳисобланмайдиган тадбиркорлик субъектлари учун — солиқ тўловчининг идентификация рақами, банкдаги ҳисобварағи реквизитлари, боғланиш учун маълумотлар (почта манзили, шу жумладан, электрон почта манзили, мобил телефон рақами) «Электрон ҳукумат» идоралараро интеграцион платформасига жойланганлиги;
рўйхатдан ўтиш маълумотлари тўлдирилгандан сўнг, шахсни идентификациялаш электрон рақамли имзо асосида амалга оширилиши.
Иштирокчи ва Қишлоқ хўжалиги вазирлиги ҳузуридаги Уруғчиликни ривожлантириш маркази идентификациялаш жараёнида электрон танловни ўтказиш тартиби билан танишганлиги, «E-urugʻ» ахборот тизимининг ўзига хос жиҳатлари ва тартиб-таомилларини қабул қилганлиги тўғрисида техник ва ҳуқуқий оператор билан электрон танловларни ташкил этиш ҳамда ўтказиш бўйича электрон шартнома (оферта)ни электрон рақамли имзо билан тасдиқлайди.
Ушбу шартнома «E-urugʻ» ахборот тизимида рўйхатга олинади ва ҳисоботи юритилади.
«E-urugʻ» ахборот тизимида рўйхатдан ўтмаган (идентификация қилинмаган) ва мазкур Низом талабларига мос келмаган юридик шахс электрон танловда қатнашиш учун ариза бериш ҳуқуқига эга бўлмайди ҳамда электрон танловда иштирок этмайди.
10. Рўйхатдан ўтган иштирокчига «E-urugʻ» ахборот тизимида шахсий кабинет очилади.
11. Иштирокчи электрон танловда қатнашиш, электрон танлов ҳақидаги маълумот ва ҳужжатлар билан танишиш, тегишли ташкилотлардан қўшимча маълумотларни сўраб олиш, банк ҳисобварағидаги фойдаланилмай қолган маблағнинг комиссия тўловларидан чегирилган қисмини олишга ҳақли ҳисобланади.
12. Техник оператор электрон танлов ўтказилиши тўғрисидаги хабарнома эълон қилинган вақтдан бошлаб иштирокчига ариза бериш учун «E-urugʻ» ахборот тизимига эркин кириш имконини яратади.
13. Иштирокчининг электрон танловда қатнашиш бўйича аризаси хабарномада келтирилган аризани қабул қилиш бошланадиган кундан аризани қабул қилиш якунланадиган куни соат 23:59 гача (GMT+5) «E-urugʻ» ахборот тизими орқали қабул қилинади.
14. Пахтачилик ва ғаллачилик йўналишидаги иштирокчиларга 20 гектардан 100 гектаргача бўлган майдонда уруғлик етиштириш учун ариза топшириш имкони берилади.
Бошқа турдаги қишлоқ хўжалиги экинлари учун уруғлик майдонлари бўйича чекловлар белгиланмайди.
Пахтачилик ва ғаллачилик йўналишидаги иштирокчилар электрон танловда қатнашиш учун «E-urugʻ» ахборот тизимида очилган ҳисобварағига базавий ҳисоблаш миқдорининг икки бараварига тенг маблағни жойлаштирган ҳолда ариза беради.
Электрон танловда қатнашиш учун тўлов миқдори электрон танлов ўтказилиши тўғрисидаги хабарнома эълон қилинган кундаги базавий ҳисоблаш миқдорида амалга оширилади.
Бошқа турдаги қишлоқ хўжалиги экинлари бўйича электрон танловларда қатнашиш учун тўловлар ундирилмайди.
15. Иштирокчининг ҳисобварағидаги маблағ тўлов учун етарли бўлмаганда, техник оператор бу ҳақда иштирокчини «E-urugʻ» ахборот тизими орқали хабардор қилади.
Иштирокчини хабарнома билан ўз вақтида танишмаганлиги учун техник оператор жавобгар ҳисобланмайди.
16. Иштирокчи электрон танловда қатнашиш бўйича аризани «E-urugʻ» ахборот тизимида электрон шаклда тўлдиради ва юборади.
Иштирокчи ушбу Низом талабларига мувофиқ келганда, техник оператор электрон танловда қатнашиш учун рухсат беради ҳамда бу ҳақда иштирокчини унинг шахсий кабинети ёки электрон почта манзили орқали хабардор қилади.
Ҳар бир иштирокчига электрон танловда қатнашиш ва шахсни ошкор этувчи маълумотларнинг махфийлигини таъминлаш учун махсус рақам берилади.
17. Иштирокчи электрон танловда қатнашиш бўйича аризасини қабул қилиш муддати тугашидан беш кун олдин қайтариб олиши, шунингдек, заруратга кўра унга тегишли ўзгартиришлар киритган ҳолда такроран юбориши мумкин.
Иштирокчи электрон танловда қатнашиш бўйича аризани қайтариб олганда, техник операторга хабарнома юбориши лозим.
Техник оператор иштирокчининг сўровига кўра, электрон танловда қатнашиш учун амалга оширилган тўлов маблағини (комиссия тўловлари чегирилган ҳолда) бир иш куни ичида иштирокчининг тижорат банкидаги ҳисобварағига (ёки пластик картасига) қайтарилишини таъминлайди.
18. Электрон танловда қатнашиш бўйича аризаларни қабул қилиш муддати тугагандан сўнг, электрон танловлар якунлангунга қадар иштирокчининг аризаси ва тўловларни қайтариб олишга йўл қўйилмайди.
19. «E-urugʻ» ахборот тизимида электрон танловлар ушбу Низомга 1-иловага мувофиқ схема бўйича ташкил этилади ва ўтказилади.
2-боб. Электрон танловни ташкил этиш ва ўтказиш
Электрон танловни ўтказилиши ҳақидаги хабарномани эълон қилиш тартиби
20. Электрон танлов ўтказилиши тўғрисидаги эълонлар ҳуқуқий операторнинг ҳудудий бошқармалари томонидан «E-urugʻ» ахборот тизимида ҳамда оммавий ва маҳаллий ахборот воситаларида эълон қилинади.
21. Қишлоқ хўжалиги вазирлиги ҳузуридаги Уруғчиликни ривожлантириш маркази ва туман (Қувасой шаҳар) ҳокимликлари электрон танлов ўтказилиши тўғрисидаги хабарномани ўз расмий веб-сайтида жойлаштириши мумкин.
Эълонда Ўзбекистон Республикаси Президентининг «Қишлоқ хўжалиги экинлари уруғчилигини янада ривожлантириш бўйича қўшимча чора-тадбирлар тўғрисида» 2022 йил 28 январдаги ПҚ-106-сон қарорига 5-илова билан тасдиқланган Қишлоқ хўжалиги экинлари уруғликларини етиштиришга ихтисослаштириладиган ҳудудлардаги майдонларнинг прогноз кўрсаткичларидан келиб чиққан ҳолда уруғлик етиштириладиган туман (Қувасой шаҳар), ихтисослашган массивлар, экин майдонлари (гектар) тўғрисидаги маълумотлар берилади.
«E-urugʻ» ахборот тизимига жойлаштирилган электрон танловга ушбу тизим орқали автоматик равишда махсус рақам берилади.
22. Электрон танлов ўтказиладиган кун ҳуқуқий операторнинг ҳудудий бошқармалари томонидан берилган эълонларда белгиланади.
Байрам ва дам олиш кунларида электрон танловлар ўтказилмайди.
Электрон танловни ўтказиш ва ғолибларни аниқлаш тартиби
23. Электрон танловда мазкур Низом талабларига мос келувчи барча иштирокчилар қатнашиши ва ариза бериши мумкин.
Бунда иштирокчини «E-urugʻ» ахборот тизимида рўйхатга олиш, идентификациялаш ва аутентификациялаш «Электрон ҳукумат» идоралараро интеграцион платформаси орқали амалга оширилади.
24. Иштирокчи ҳар йили пахта ва бошқа қишлоқ хўжалиги экинлари уруғликларини етиштириш учун — 15 январдан 5 февралга қадар (2025 йилда 19 мартдан 25 мартга қадар), бошоқли дон экинлари уруғликларини етиштириш учун — 15 июлдан 5 августга қадар ариза топширади.
25. Иштирокчига тегишли маълумотлар қатъий равишда интеграция қилинган вазирлик ва идораларнинг маълумотлари асосида шакллантирилади.
Бунда иштирокчининг барқарорлик рейтинги ҳамда электрон танловга алоқадор вазирлик ва идораларнинг маълумотлари «Электрон ҳукумат» идоралараро интеграцион платформасидан, иштирокчининг умумий ер майдони, электрон танловда кўрсатилган экин жойлаштириладиган майдон, сув билан таъминланганлиги, тупроқ унумдорлигига оид маълумотлар Қишлоқ хўжалиги вазирлиги ва унинг тизим ташкилотларини «Agro.gov.uz», «CropAgro», «Ҳосил қабули», «eFito» ва бошқа ахборот тизимларидан олинади.
26. Интеграция қилиш орқали шакллантириладиган маълумотлар асосида иштирокчига балл берилади ва ушбу Низомга 2-иловада мувофиқ баҳолаш рейтинги ёрдамида баллар тақсимланади.
27. Иштирокчи ҳар бир мезон бўйича йиғган баллари билан ариза бериш жараёнида танишади ва заруратга кўра аризани электрон рақамли имзо билан тасдиқлайди.
28. «E-urugʻ» ахборот тизимига келиб тушган ҳар бир аризага махсус рақам (идентификация рақами) автоматик равишда бириктирилади.
29. Иштирокчи аризасининг ҳолати ҳақидаги маълумотлар унинг шахсий кабинети орқали маълум қилиб борилади.
30. Электрон танлов ихтисослашган массивларда жойлашган экин майдонларида уруғлик етиштириш учун ўтказилади.
Ушбу массивлар Қишлоқ хўжалиги вазирлиги ҳузуридаги Уруғчиликни ривожлантириш марказининг ҳудудий бошқармалари эълонларида кўрсатилади.
31. Эълонда берилган параметрлардан келиб чиқиб, электрон танлов ғолиби ва ғолиб бўлмаганларни ажратадиган чегара аниқланади.
Агар мазкур чегаранинг икки тарафида бир хил балл тўплаган иштирокчилар бўлса, бунда аризани олдин топширган иштирокчи электрон танлов ғолиби деб эътироф этилади.
32. Электрон танлов натижалари бўйича ахборот электрон танлов ўтказилган куни соат 10:00 да (GMT+5) «E-urugʻ» ахборот тизимида автоматик равишда эълон қилинади.
Бунда «E-urugʻ» ахборот тизимида автоматик равишда электрон танлов якунланган вақт ва унинг натижалари тўғрисидаги ахборот шакллантирилади.
33. Электрон танлов натижалари бўйича ахборотда қуйидагилар баён этилади:
электрон танлов ҳақида маълумотлар;
электрон танлов ғолиблари рўйхати ва уларнинг ер майдонлари;
электрон танловда иштирок этиш учун ариза топширилган сана ва вақти.
34. «E-urugʻ» ахборот тизимида электрон танлов якунлангандан кейин беш иш кунида электрон танлов натижалари бўйича баённома расмийлаштирилади.
35. Электрон танлов ғолиби деб топилмаган иштирокчининг тўлов маблағи электрон танлов якунланган деб топилган кундан эътиборан уч иш куни ичида «E-urugʻ» ахборот тизими орқали иштирокчининг тижорат банкидаги ҳисобварағига (ёки пластик картасига) тўлиқ қайтарилади.
Иштирокчининг тижорат банкидаги ҳисобварағи (ёки пластик карта рақами) нотўғри кўрсатилиши ёки бошқа сабабларга кўра маблағлар ҳуқуқий операторнинг тижорат банкидаги ҳисобварағига қайтиб тушган ҳолларда, техник оператор бу ҳақда «E-urugʻ» ахборот тизими орқали иштирокчини хабардор қилади.
36. Электрон танловда қатнашиш учун тўлов, иштирокчини аризасини юбориш, электрон танловларни ташкил этиш учун назарда тутилган маблағлар Қишлоқ хўжалиги вазирлиги ҳузуридаги Уруғчиликнинг ривожлантириш маркази ва «Агросаноатни рақамлаштириш маркази» МЧЖга тенг миқдорларда тақсимланади.
3-боб. Электрон танлов натижаларини расмийлаштириш тартиби
37. Техник оператор мазкур Низомда белгиланган тартибда электрон танлов натижалари бўйича баённома QR-код билан расмийлаштиради.
Электрон танлов натижалари бўйича баённома мазкур Низомга 3-иловадаги намунавий шаклга мувофиқ расмийлаштирилади.
Баённомада қуйидаги маълумотлар кўрсатилади:
электрон танлов санаси;
баённома расмийлаштирилган сана;
электрон танлов ғолиби ҳақида маълумотлар;
қонунчилик ҳужжатларида тақиқланмаган ҳамда ушбу Низомда белгиланган бошқа маълумотлар.
Баённома электрон танлов ғолиби ҳамда ҳуқуқий операторнинг ҳудудий бошқармасини шахсий кабинетига электрон шаклда юборилади.
38. Баённома «E-urugʻ» ахборот тизими томонидан юритиладиган электрон танлов натижалари тўғрисидаги баённомалар реестрига автоматик равишда киритилади.
Электрон танлов натижалари бўйича баённомалар реестрига жаҳон интернет тармоғи орқали QR-код ҳаволаси жойлаштирилади.
Электрон танлов ғолибининг сўровига кўра баённома қоғоз шаклида, ҳуқуқий операторнинг муҳри босилган ҳолда тақдим этилиши ёки почта орқали юборилиши мумкин.
4-боб. Электрон танлов ғолибининг вазифалари ва функциялари
39. Қуйидагилар уруғлик қишлоқ хўжалиги экинларини етиштириш ҳуқуқига эга бўлган электрон танлов ғолибининг вазифалари ҳисобланади:
ғўза навлари ва дурагайлари уруғликларини белгиланган талабларга мувофиқ етиштириш, кўпайтириш, Ўзбекистон Республикаси ҳудудида фойдаланиш ва реализация қилишни лицензия шартномаси асосида патент эгасининг рухсати билан амалга ошириш;
тузиладиган шартномага асосан навлар бўйича зарур ҳажмдаги, амалдаги стандартлар талабларига мос келувчи нав уруғларининг авлодларини ҳисобга олган ҳолда етиштириш;
фақат уруғлик, бир авлодга мансуб бўлган битта нав экилишини таъминлаш;
кўпайтирилаётган навнинг қимматли хўжалик белгилари ва технологик хусусиятларини сақлаш;
юқори сифатли ва нав софлигига эга бўлган авлодли уруғлар етиштириш;
авлодли уруғликларни етиштириш тартиби ва қоидаларига амал қилиш;
нав оригинатори томонидан ишлаб чиқилган илмий асосланган тавсиялар асосида агротехник тадбирлар белгиланган муддатларда ва меъёрларда сифатли ўтказилишини таъминлаш;
уруғлик тайёрлаш корхоналари томонидан экиш учун сарфланган (сотилган) уруғлик (чигит, дон) миқдорлари бўйича «Ҳисоб-далолатнома»ни Қишлоқ хўжалиги вазирлиги ҳузуридаги Уруғчиликни ривожлантириш марказига, нав оригинатори ва муаллифига ҳамда уруғчилик субъектларига топшириш муддати ҳар йили 1 июлга қадар, устама ҳақларини якуний тўлаб бериш муддати ҳар йили 1 августга қадар топшириш.
Қуйидагилар қишлоқ хўжалиги экинлари уруғликларини етиштириш ҳуқуқига эга бўлган электрон танлов ғолибининг функциялари ҳисобланади:
уруғлик учун экиладиган қишлоқ хўжалиги экинларини унумдор тупроқли, механизмлар ёрдамида ишлов беришга қулай, сув билан яхши таъминланган, шўрланмаган ва текис далаларга жойлаштириш;
алмашлаб экиш ва агротехник тадбирларни ўз вақтида ўтказиш бўйича режа-жадвални тузиш ва амалга ошириш;
хўжаликда уруғчилик бўйича агроном ёки агроном мутахассиси бўлишини таъминлаш (хўжалик раҳбари уруғчилик бўйича агроном ёки агроном бўлганда ушбу талаб қўлланилмайди);
фойдаланишга рухсат этилган кимёвий препаратлар билан қайта ишланган (зарарсизлантирилган) уруғлик материалларини экиш (махсус элита уруғчилик хўжаликлари бундан мустасно);
уруғлик майдонларини бегона нав ва ўсимликлардан тозалаш;
касаллик келтириб чиқарувчи бегона экинларни уруғлик майдонлар атрофига экмаслик ҳамда бошқа навлар билан чатишишга йўл қўймаслик;
уруғлик пахта майдонларда уруғлик ҳосили тўлиқ йиғиштириб олингандан сўнг ғўза дефолиациясини ўтказиш;
уруғлик пахта майдонларида ғўзанинг ҳар тупида ўрта толали навларда 3 — 8-ҳосил шохларининг 1-2 ўринларидан, ингичка толали навларда 3 — 13-ҳосил шохларининг тўлиқ пишиб очилган кўсакларидан қўл билан, машиналар ёрдамида кўсаклар 60 — 65 фоиз очилганда уруғлик пахта ҳосилини териш;
уруғлик учун экилган бошоқли дон экинлари майдонларини уруғлик дон ўриш учун ажратилган комбайнларда ўриш, уруғлик донни уруғлик дон ташиш учун ажратилган автомашиналар билан ташиш;
йиғиштириб олинган қишлоқ хўжалиги экинлари уруғликларини авлодлари бўйича амалдаги стандартлар талабларига кўра уруғлик қабул қилувчи корхоналарга топшириш.
40. Электрон танлов ғолиби томонидан мазкур Низом талаблари ёки агротехника қоидалари мунтазам равишда бузилганда, қишлоқ хўжалиги экинлари уруғликлари етиштирилаётган майдонлар туман (Қувасой шаҳар) апробация комиссияси томонидан яроқсиз деб топилади ҳамда уруғлик етиштириш ҳуқуқидан маҳрум этилади.
Электрон танлов ғолиби томонидан уруғлик майдонларда ғўза ва бошоқли дон экинларининг битта навини иккита авлоди экилган тақдирда, устама тўлашдаги фарқлар инобатга олинган ҳолда туман (Қувасой шаҳар) апробация комиссияси томонидан кейинги авлодга расмийлаштирилади.
Уруғлик майдонларда илмий асосланган тавсияларга амал қилган ҳолда кўчат қалинлигини таъминлаш талаб этилади.
Мазкур талабларга амал қилинмаган ҳолларда туман (Қувасой шаҳар) апробация комиссияси томонидан қишлоқ хўжалиги экинлари уруғликларини етиштирувчи уруғлик етиштириш ҳуқуқидан маҳрум этилади.
5-боб. Якунловчи қоидалар
41. Қишлоқ хўжалиги экинлари уруғликларини етиштириш ҳуқуқига эга бўлиш бўйича электрон танловлар жараёнида юзага келадиган низолар ва келишмовчиликлар қонунчилик ҳужжатларида белгиланган тартибда ҳал этилади.
42. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Қишлоқ хўжалиги экинлари уруғликларини етиштириш ҳуқуқига эга бўлиш бўйича танловларни «E-urugʻ» ахборот тизимида ташкил этиш ва ўтказиш тартиби тўғрисидаги низомга 1-ИЛОВА
Қишлоқ хўжалиги экинлари уруғликларини етиштириш ҳуқуқига эга бўлиш бўйича фермер хўжаликлари ва бошқа қишлоқ хўжалиги субъектлари ўртасида электрон танловларни ўтказиш
Босқичлар Субъектлар Тадбирлар Муддатлар 1-босқич Уруғчиликни ривожлантириш марказининг ҳудудий бошқармалари Қишлоқ хўжалиги экинлари уруғликларини етиштириш ҳуқуқига эга бўлиш бўйича электрон танловларни ўтказиш тўғрисида «E-urugʻ» ахборот тизимида ҳамда маҳаллий ва оммавий ахборот воситаларида эълон беради. Ариза топшириш бошланишидан камида 5 кун олдин 2-босқич Иштирокчилар Қишлоқ хўжалиги экинлари уруғликларини етиштириш ҳуқуқига эга бўлиш бўйича электрон танловда иштирок этиш учун «E-urugʻ» ахборот тизими орқали ариза топширади. Уруғлик пахта хом ашёси ва бошқа қишлоқ хўжалиги экинлари бўйича — 15 январдан 5 февралга қадар (2025 йилда 19 мартдан 25 мартга қадар), бошоқли дон экинлари бўйича — 15 июлдан 5 августга қадар 3-босқич «E-urugʻ» ахборот тизими Қишлоқ хўжалиги экинлари уруғликларини етиштириш ҳуқуқига эга бўлиш бўйича ф ермер хўжаликлари ва бошқа қишлоқ хўжалиги субъектлари ўртасида электрон танловларни ўтказади. Ҳужжат қабул қилиш якунлангандан кейин 1 иш кунида 4-босқич Техник оператор Танлов ғ олиб лари учун QR - кодли баённома расмийлаштирилади . Танлов ўтказилгандан сўнг 5 иш кунида 5-босқич «E-urugʻ» ахборот тизими Танловда ғолиб бўлганлар нинг аризасига берилган ноёб идентификация рақамлари рўйхати эълон қилинади. Танлов ўтказилгандан сўнг 2 иш кунида
Қишлоқ хўжалиги экинлари уруғликларини етиштириш ҳуқуқига эга бўлиш бўйича танловларни «E-urugʻ» ахборот тизимида ташкил этиш ва ўтказиш тартиби тўғрисидаги низомга 2-ИЛОВА
Қишлоқ хўжалиги экинлари уруғликларини етиштириш ҳуқуқига эга бўлиш бўйича электрон танловларни ўтказишда фермер хўжаликлари ва бошқа қишлоқ хўжалиги субъектлари имкониятларини баҳолаш учун
Т/р Баҳоланадиган имкониятлар (ҳолатлар) Рейтинг кўрсаткичлари Рейтинг баллар Тақдим этиладиган маълумотлар (тўғридан-тўғри ёки «Рақамли ҳукумат» марказининг идоралараро интеграциялашув платформаси орқали) 1. Тупроқ унумдорлиги ( балл бонитет) 90 — 100 10 балл Қишлоқ хўжалиги вазирлигининг «C ropAgro » ахборот тизими маълумотлари (контурлар кесимида) 80 — 89 9 балл 70 — 79 8 балл 60 — 69 7 балл 50 — 59 6 балл 40 —49 5 балл 2. Сув таъминоти яхши (80 фоиз ва ундан юқори) 10 балл Қишлоқ хўжалиги вазирлигининг «C ropAgro » ахборот тизими маълумотлари (хўжаликлар кесимида) ўрта (50 дан 80 фоизгача) 5 балл ёмон (50 фоиздан кам) 0 балл 3. Хўжаликнинг экин майдони касалликларга чалин ма ганлиги 2 йил ичида 4 балл Ўсимликлар карантини ва ҳимояси агентлигининг «eFito» ахборот тизими маълумотлари (т уман ва хўжаликлар кесимида) 1 йил ичида 2 балл Хўжаликнинг экин майдони зараркунандалар билан зарарлан ма ганлиги 2 йил ичида 4 балл 1 йил ичида 2 балл Хўжаликнинг экин майдони да бегона ўт - лар тарқал ма ганлиги 2 йил ичида 2 балл 1 йил ичида 1 балл 4 . Хўжаликнинг ташкил этилган муддати 20 йилдан юқори 10 балл Солиқ қўмитаси маълумотлари 10 йилдан 20 йилгача 7 балл 3 йилдан 10 йилгача 4 балл 5 . Иштирокчининг мавжуд қишлоқ хўжалиги техника си ва агрегат лари (техник кўрикдан ўтказилган) ҳайдов трактори 2 балл Агросаноат мажмуи устидан назорат қилиш инспекцияси маълумотлари ч опиқ трактори 3 балл дон ўриш комбайни 1 балл лазерли ер текислагич 1 балл уруғ экиш сеялкаси 2 балл ОВХ, штангали пуркагич 1 балл 6 . Сўнгги йилда етиштирилган пахта ҳосилдорлиги нинг ўртача кўрсаткичи (уруғлик пахта танлови учун) 50 центнер ва ундан юқори 10 балл Қишлоқ хўжалиги вазирлигининг «Ҳосил қабул» ахборот тизими маълумотлари (туман ва хўжаликлар кесимида) 40 центнердан 50 центнергача 6 балл 35 центнердан 40 центнергача 3 балл 30 центнердан 35 центнергача 1 балл 7 . Иштирокчининг барқарорлик рейтинги (ариза юборилган кундаги рейтинг кўрсаткичи) 0 дан 100 гача Рейтинг кўрсаткичи 10 га бўлинади Солиқ қўмитасининг «Тадбиркорларнинг барқарорлик рейтинги» электрон платформаси маълумотлари
Қишлоқ хўжалиги экинлари уруғликларини етиштириш ҳуқуқига эга бўлиш бўйича танловларни «E-urugʻ» ахборот тизимида ташкил этиш ва ўтказиш тартиби тўғрисидаги низомга 3-ИЛОВА
Қишлоқ хўжалиги экинлари уруғликларини етиштириш ҳуқуқига эга бўлиш бўйича электрон танлов натижалари расмийлаштириладиган баённоманинг
«Уруғчиликни ривожлантириш маркази» ДМ «Агросаноатни рақамлаштириш маркази» МЧЖ ЭЛЕКТРОН ТАНЛОВ НАТИЖАЛАРИ ТЎҒРИСИДА БАЁННОМА № _____ Электрон танлов ўтказилган сана: ___________________ Баённома расмийлаштирилган сана: _________________ Танлов №: ________________ Танлов тури: ____________ (пахта, ғалла ва бошқа экинлар бўйича) Танлов ўтказилган ҳудуд: ____________ вилояти, ____________ тумани Туман учун прогноз кўрсаткичлари асосидаги майдон: ____ гектар. ТАНЛОВ ҒОЛИБЛАРИ ВА ИШТИРОКЧИЛАРИ РЎЙХАТИ Т/р Ариза рақами Санаси Иштирокчи (фермер хўжалиги) номи Иштирокчининг СТИРи Тўпланган рейтинг балл Ер майдони (га) Тақсимот бўйича майдон (га) Танлов ғолиблари рўйхати 1. 2. 3. Ғолиб бўлмаганлар рўйхати 1. 2. 3. QR-код учун жой
Вазирлар Маҳкамасининг 2025 йил 18 мартдаги 166-сон қарорига 2-ИЛОВА
Қишлоқ хўжалиги экинлари уруғликларини етиштириш ҳуқуқига эга бўлиш бўйича электрон танловларни ўтказишда зарур бўладиган маълумотларни «E-urugʻ» ахборот тизимига интеграция қиладиган вазирлик ва идоралар
1. Ўзбекистон Республикаси Қишлоқ хўжалиги вазирлиги.
2. Ўзбекистон Республикаси Рақамли технологиялар вазирлиги ва унинг ҳузуридаги «Рақамли ҳукумат лойиҳаларини бошқариш маркази» давлат муассасаси.
3. Ўзбекистон Республикаси Камбағалликни қисқартириш ва бандлик вазирлиги.
4. Ўзбекистон Республикаси Солиқ қўмитаси.
5. Вазирлар Маҳкамаси ҳузуридаги Агросаноат мажмуи устидан назорат қилиш инспекцияси.
6. Ўзбекистон Республикаси Қишлоқ хўжалиги вазирлиги ҳузуридаги Ўсимликлар карантини ва ҳимояси агентлиги.
7. Ўзбекистон республика товар-хом ашё биржаси.
Вазирлар Маҳкамасининг 2025 йил 18 мартдаги 166-сон қарорига 3-ИЛОВА
Ўзбекистон Республикаси Ҳукуматининг айрим қарорларига киритилаётган ўзгартиришлар
1. Вазирлар Маҳкамасининг «Қишлоқ хўжалиги экинлари уруғчилигига оид айрим норматив-ҳуқуқий ҳужжатларни тасдиқлаш тўғрисида» 2021 йил 12 октябрдаги 641-сон қарорида :
а) 1-банднинг иккинчи хатбошиси чиқариб ташлансин;
б) 1-илова чиқариб ташлансин.
2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида (Ўзбекистон Республикаси Президентининг «Қишлоқ хўжалиги экинлари уруғчилигини янада ривожлантириш бўйича қўшимча чора-тадбирлар тўғрисида» 2022 йил 28 январдаги ПҚ-106-сон қарори)» 2022 йил 9 июндаги 320-сон қарорига иловада :
3-бандда :
а) «а» кичик банднинг биринчи-иккинчи хатбошилари чиқариб ташлансин;
б) «б» банди чиқариб ташлансин.
Ўзбекистон Республикасининг Бош вазири А. АРИПОВ
Тошкент ш.,
2025 йил 18 март,
166-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
REYTING BALLARI
NAMUNAVIY SHAKLI
ROʻYXATI
Qishloq xoʻjaligi ekinlari urugʻchiligi sohasida “E-urugʻ” axborot tizimini joriy etish chora-tadbirlari toʻgʻrisida
Oʻzbekiston Respublikasi Prezidentining “Paxtachilikda urugʻchilik tizimini rivojlantirish hamda paxta hosildorligini oshirishning qoʻshimcha chora-tadbirlari toʻgʻrisida” 2023-yil 15-dekabrdagi PQ-391-son qarori ijrosini taʼminlash, shuningdek, qishloq xoʻjaligi ekinlari urugʻliklarini yetishtirish huquqiga ega boʻlish boʻyicha tanlovlarni zamonaviy axborot-kommunikatsiya texnologiyalaridan foydalangan holda tashkil etish maqsadida Vazirlar Mahkamasi qaror qiladi:
1. Quyidagilarni nazarda tutuvchi Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha tanlovlarni “E-urugʻ” axborot tizimida tashkil etish va oʻtkazish tartibi toʻgʻrisidagi nizom 1-ilovaga muvofiq tasdiqlansin:
qishloq xoʻjaligi ekinlari urugʻliklarini yetishtirish huquqiga ega boʻlish boʻyicha tanlovlarni “E-urugʻ” axborot tizimida oʻtkazish haqidagi xabarni eʼlon qilish va elektron tanlovlarni tashkil etish;
qishloq xoʻjaligi ekinlari urugʻliklarini yetishtirish huquqiga ega boʻlish boʻyicha elektron tanlov gʻoliblarini aniqlash va tanlov natijalarini rasmiylashtirish.
2. Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha elektron tanlovlarni oʻtkazishda zarur boʻladigan maʼlumotlarni “E-urugʻ” axborot tizimiga integratsiya qiladigan vazirlik va idoralar roʻyxati 2-ilovaga muvofiq tasdiqlansin.
3. Oʻzbekiston Respublikasi Qishloq xoʻjaligi vazirligi manfaatdor vazirliklar va idoralar bilan birgalikda qishloq xoʻjaligi ekinlari urugʻliklarini yetishtirish huquqiga ega boʻlish boʻyicha elektron tanlovlarni oʻtkazishda, shuningdek, urugʻliklar hajmi, sifati, seleksiya navi va avlodlari boʻyicha maʼlumotlarni yuritishda “E-urugʻ” axborot tizimi keng joriy etilishini taʼminlasin.
4. Oʻzbekiston Respublikasi Hukumatining 3-ilovaga muvofiq ayrim qarorlariga oʻzgartirishlar kiritilsin.
5. Oʻzbekiston Respublikasi Qishloq xoʻjaligi vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.
Vazirlar Mahkamasining 2025-yil 18-martdagi 166-son qaroriga 1-ILOVA
Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha tanlovlarni “E-urugʻ” axborot tizimida tashkil etish va oʻtkazish tartibi toʻgʻrisida
1-bob. Umumiy qoidalar
1. Ushbu Nizom qishloq xoʻjaligi ekinlari urugʻliklarini yetishtirish huquqiga ega boʻlish boʻyicha fermer xoʻjaliklari va boshqa qishloq xoʻjaligi subyektlari oʻrtasida tanlovlarni “E-urugʻ” axborot tizimida tashkil etish hamda oʻtkazish tartibini belgilaydi.
2. Mazkur Nizom talablari qishloq xoʻjaligi ekinlarining yangi va istiqbolli navlarini original urugʻlarini koʻpaytirish va dastlabki koʻpaytirish hamda rayonlashgan navlarning birlamchi (elita) urugʻchiligini tashkil etish bilan shugʻullanuvchi quyidagilarga:
a) Qishloq xoʻjaligi vazirligi huzuridagi Urugʻchilikni rivojlantirish markazi tizimidagi hamda xususiy sektorga oʻtkazilgan elita urugʻchilik xoʻjaliklari;
b) ilmiy-tadqiqot muassasalari va ularning ilmiy-tajriba stansiyalari (ekin turiga qarab) hamda oliy taʼlim muassasalari;
v) Oʻzbekiston Respublikasi Prezidenti huzuridagi Paxtachilik kengashi tomonidan tashkil etilgan xususiy urugʻchilik korxonalariga nisbatan tatbiq etilmaydi.
3. Ushbu Nizomda quyidagi asosiy tushunchalar qoʻllaniladi:
ariza — fermer xoʻjaliklari va boshqa qishloq xoʻjaligi subyektlari tomonidan qishloq xoʻjaligi ekinlari urugʻliklarini yetishtirish huquqiga ega boʻlish uchun (maxsus elita urugʻchilik xoʻjaliklari bundan mustasno) taqdim etilgan elektron ariza;
“E-urugʻ” axborot tizimidagi texnik uzilishlar — “E-urugʻ” axborot tizimidagi elektron tanlovlar jarayonida bir yoki bir nechta ishtirokchining qatnashishi yoxud mazkur Nizom talablari asosida texnik operatorning xizmatlar koʻrsatish imkonini cheklab qoʻyadigan texnik nosozliklar;
“E-urugʻ” axborot tizimi — Qishloq xoʻjaligi vazirligining “Raqamli qishloq xoʻjaligi” yagona integratsion platformasi tarkibiga kiruvchi, elektron tanlovlarni tashkil etish hamda oʻtkazish, monitoring va aprobatsiya tadbirlari uchun zarur axborotni kiritish, saqlash va qayta ishlash, qishloq xoʻjaligi ekinlari urugʻliklari bazasini shakllantirish, shuningdek, yuridik shaxslarning ushbu jarayonlarda qatnashish imkonini taʼminlaydigan axborot tizimi;
ishtirokchi — original, elita va keyingi avlodlarga mansub qishloq xoʻjaligi ekinlari urugʻliklarini yetishtirish huquqiga ega boʻlish uchun “E-urugʻ” axborot tizimi orqali belgilangan tartibda ariza yuborgan qishloq xoʻjaligi subyektlari;
ishtirokchini autentifikatsiyalash — avval identifikatsiya qilingan foydalanuvchidan real vaqt rejimida olingan dastlabki identifikatsiya maʼlumotlari bilan avtomatlashtirilgan holda (inson omilisiz) solishtirish orqali foydalanuvchining shaxsini tekshirish va tasdiqlash jarayoni;
ommaviy oferta — tizimdan foydalanish boʻyicha xizmatlar koʻrsatish shartnomasini tuzish yuzasidan ishtirokchiga bildirilgan rasmiy taklif;
texnik operator — “E-urugʻ” axborot tizimini ishlab chiqadigan hamda ishga tushirish, texnik va dasturiy jihatdan qoʻllab-quvvatlashni amalga oshiradigan “Agrosanoatni raqamlashtirish markazi” MCHJ;
toʻlov — elektron tanlovda qatnashish, arizani qabul qilish, tanlovni tashkil etish va bayonnomani rasmiylashtirish uchun ishtirokchi tomonidan toʻlanadigan pul mablagʻi;
foydalanuvchini identifikatsiyalash — shaxsiy maʼlumotlar yordamida foydalanuvchining shaxsini tasdiqlab, masofadan turib “E-urugʻ” axborot tizimi xizmatlaridan foydalanish imkonini yaratuvchi mexanizm;
xususiy urugʻchilik korxonalari — Oʻzbekiston Respublikasi Prezidenti huzuridagi Paxtachilik kengashining tegishli qarorlariga asosan tashkil etilgan subyektlar;
huquqiy operator — “E-urugʻ” axborot tizimi ishtirokchilari oʻrtasida shartnomaviy munosabatlarni muvofiqlashtiruvchi Qishloq xoʻjaligi vazirligi huzuridagi Urugʻchilikni rivojlantirish markazi;
elektron raqamli imzo — elektron hujjatdagi axborotni elektron raqamli imzoning yopiq kalitidan foydalangan holda maxsus oʻzgartirish natijasida hosil qilingan hamda elektron raqamli imzoning ochiq kaliti yordamida elektron hujjatdagi axborotda xatolik yoʻqligini aniqlash va elektron raqamli imzo yopiq kalitining egasini identifikatsiyalash imkonini beradigan imzo;
elektron tanlov gʻolibi — elektron tanlov mezonlari va shartlariga muvofiq oʻtish balini toʻplagan ishtirokchi;
“Elektron hukumat” idoralararo integratsion platformasi — jismoniy va yuridik shaxslarning haqiqiy identifikatsiyalash, shuningdek, idoralararo elektron hamkorlikda mansabdor shaxslarning axborot tizimlari va maʼlumotlar bazalaridan ruxsat olib foydalanishini taʼminlovchi davlat axborot tizimi;
QR-kod — vakolatli organ tomonidan elektron tanlov natijalari boʻyicha bayonnomalarga jahon internet tarmogʻi orqali joylashtiriladigan havola.
4. Qishloq xoʻjaligi vazirligi huzuridagi Urugʻchilikni rivojlantirish markazining hududiy boshqarmalarining elektron tanlovlarni oʻtkazish boʻyicha eʼlonlari asosida texnik operator tomonidan elektron tanlovlar “E-urugʻ” axborot tizimida mazkur Nizom talablariga muvofiq tashkil etiladi va oʻtkaziladi.
5. Texnik operator integratsiya qilish orqali shakllangan maʼlumotlar va hujjatlarning haqqoniyligi va ishonchligi uchun javobgar hisoblanmaydi.
Texnik operator ishtirokchining shartnomada (ofertada) belgilangan shaxsiy maʼlumotlari sir saqlanishini va maxfiyligini taʼminlaydi.
6. Texnik operator elektron tanlovni tashkil etish va oʻtkazishda “E-urugʻ” axborot tizimi orqali amalga oshirilgan operatsiyalar roʻyxatga olinishini, operatsiyalar toʻgʻrisidagi hisobotlar va maʼlumotlar shakllantirilishini hamda yuborilgan yoki qabul qilingan shaklda uning yaxlitligi va oʻzgarmasligini taʼminlagan holda besh yildan kam boʻlmagan muddatda saqlanishini taʼminlaydi.
7. Huquqiy operator oʻziga yuklangan vazifalarga muvofiq quyidagi majburiyatlarni bajaradi:
elektron tanlovni belgilangan vaqtda tashkil etish;
texnik operator bilan birgalikda elektron tanlovning inson omili aralashuvisiz “E-urugʻ” axborot tizimida oʻtkazilishini taʼminlash;
elektron tanlov yakunlanganligi toʻgʻrisidagi axborotni eʼlon qilish;
texnik operator bilan birgalikda boshqa shaxslarning elektron hujjat va xabarlarga, shuningdek, ishtirokchining shaxsiy maʼlumotlariga ruxsatsiz kirishidan himoyalash choralarini koʻrish;
elektron hujjat va xabarlarni hamda ishtirokchining shaxsiy maʼlumotlarini uchinchi shaxslarga bermaslik (qonunchilik hujjatlarida nazarda tutilgan holatlar bundan mustasno);
texnik operator bilan birgalikda elektron tanlov natijalari deb eʼtirof etiladigan elektron bayonnomalarni shakllantirish hamda elektron bayonnomalarni elektron tanlov gʻoliblarining shaxsiy kabinetlari orqali taqdim etish;
aholi va tadbirkorlik subyektlarini elektron tanlovlarda ishtirok etish tartibi toʻgʻrisida ommaviy va boshqa axborot vositalari orqali muntazam ravishda tanishtirib borish;
ishtirokchi va elektron tanlovga aloqador boshqa shaxslarni elektron tanlovga oid maʼlumotlar bilan tezkor va qulay ravishda xabardor qilish;
ishtirokchilarga “E-urugʻ” axborot tizimidagi elektron tanlovlarda qatnashish imkoniyatlarining tengligini taʼminlash;
elektron tanlovni oʻtkazish tartibi buzilishini oldini olish hamda bunday holatlar aniqlanganda ularni tezkor bartaraf etish choralarini koʻrish.
Huquqiy operatorga qonunchilik hujjatlariga muvofiq boshqa majburiyatlar ham yuklanishi mumkin.
8. Texnik operator oʻziga yuklangan vazifalarga muvofiq quyidagi majburiyatlarni bajaradi:
“E-urugʻ” axborot tizimini uzluksiz ishlashini taʼminlash;
oʻtkazilgan elektron tanlovga oid barcha maʼlumotlarni (ishtirokchining shaxsini oshkor qilmagan holda) oʻzining axborot tizimida kunlik va muntazam (haftalik, oylik va choraklik) davriylik bilan bitimlar reyestri koʻrinishida umumiy foydalaniladigan va mashinada oʻqiladigan formatlarda yuklab olish imkoniyatini yaratish;
ishtirokchi “E-urugʻ” axborot tizimini yanada qulayroq ishlashi borasida oʻz fikrini erkin va oshkora bildirishi uchun messenjer va boshqa tarmoqlardan foydalanishini hamda ushbu maqsadlarda keng foydalaniladigan boshqa servis va imkoniyatlar doimiy ishlashini taʼminlash.
Texnik operatorga qonunchilik hujjatlariga muvofiq boshqa majburiyatlar ham yuklanishi mumkin.
9. Huquqiy operator va uning hududiy boshqarmalari hamda ishtirokchi “E-urugʻ” axborot tizimida roʻyxatdan oʻtadi.
“E-urugʻ” axborot tizimida roʻyxatdan oʻtishda quyidagi maʼlumotlar koʻrsatilishi shart:
Oʻzbekiston Respublikasi rezidenti hisoblangan yuridik shaxslar, yuridik shaxs hisoblanmaydigan tadbirkorlik subyektlari uchun — soliq toʻlovchining identifikatsiya raqami, bankdagi hisobvaragʻi rekvizitlari, bogʻlanish uchun maʼlumotlar (pochta manzili, shu jumladan, elektron pochta manzili, mobil telefon raqami) “Elektron hukumat” idoralararo integratsion platformasiga joylanganligi;
roʻyxatdan oʻtish maʼlumotlari toʻldirilgandan soʻng, shaxsni identifikatsiyalash elektron raqamli imzo asosida amalga oshirilishi.
Ishtirokchi va Qishloq xoʻjaligi vazirligi huzuridagi Urugʻchilikni rivojlantirish markazi identifikatsiyalash jarayonida elektron tanlovni oʻtkazish tartibi bilan tanishganligi, “E-urugʻ” axborot tizimining oʻziga xos jihatlari va tartib-taomillarini qabul qilganligi toʻgʻrisida texnik va huquqiy operator bilan elektron tanlovlarni tashkil etish hamda oʻtkazish boʻyicha elektron shartnoma (oferta)ni elektron raqamli imzo bilan tasdiqlaydi.
Ushbu shartnoma “E-urugʻ” axborot tizimida roʻyxatga olinadi va hisoboti yuritiladi.
“E-urugʻ” axborot tizimida roʻyxatdan oʻtmagan (identifikatsiya qilinmagan) va mazkur Nizom talablariga mos kelmagan yuridik shaxs elektron tanlovda qatnashish uchun ariza berish huquqiga ega boʻlmaydi hamda elektron tanlovda ishtirok etmaydi.
10. Roʻyxatdan oʻtgan ishtirokchiga “E-urugʻ” axborot tizimida shaxsiy kabinet ochiladi.
11. Ishtirokchi elektron tanlovda qatnashish, elektron tanlov haqidagi maʼlumot va hujjatlar bilan tanishish, tegishli tashkilotlardan qoʻshimcha maʼlumotlarni soʻrab olish, bank hisobvaragʻidagi foydalanilmay qolgan mablagʻning komissiya toʻlovlaridan chegirilgan qismini olishga haqli hisoblanadi.
12. Texnik operator elektron tanlov oʻtkazilishi toʻgʻrisidagi xabarnoma eʼlon qilingan vaqtdan boshlab ishtirokchiga ariza berish uchun “E-urugʻ” axborot tizimiga erkin kirish imkonini yaratadi.
13. Ishtirokchining elektron tanlovda qatnashish boʻyicha arizasi xabarnomada keltirilgan arizani qabul qilish boshlanadigan kundan arizani qabul qilish yakunlanadigan kuni soat 23:59 gacha (GMT+5) “E-urugʻ” axborot tizimi orqali qabul qilinadi.
14. Paxtachilik va gʻallachilik yoʻnalishidagi ishtirokchilarga 20 gektardan 100 gektargacha boʻlgan maydonda urugʻlik yetishtirish uchun ariza topshirish imkoni beriladi.
Boshqa turdagi qishloq xoʻjaligi ekinlari uchun urugʻlik maydonlari boʻyicha cheklovlar belgilanmaydi.
Paxtachilik va gʻallachilik yoʻnalishidagi ishtirokchilar elektron tanlovda qatnashish uchun “E-urugʻ” axborot tizimida ochilgan hisobvaragʻiga bazaviy hisoblash miqdorining ikki baravariga teng mablagʻni joylashtirgan holda ariza beradi.
Elektron tanlovda qatnashish uchun toʻlov miqdori elektron tanlov oʻtkazilishi toʻgʻrisidagi xabarnoma eʼlon qilingan kundagi bazaviy hisoblash miqdorida amalga oshiriladi.
Boshqa turdagi qishloq xoʻjaligi ekinlari boʻyicha elektron tanlovlarda qatnashish uchun toʻlovlar undirilmaydi.
15. Ishtirokchining hisobvaragʻidagi mablagʻ toʻlov uchun yetarli boʻlmaganda, texnik operator bu haqda ishtirokchini “E-urugʻ” axborot tizimi orqali xabardor qiladi.
Ishtirokchini xabarnoma bilan oʻz vaqtida tanishmaganligi uchun texnik operator javobgar hisoblanmaydi.
16. Ishtirokchi elektron tanlovda qatnashish boʻyicha arizani “E-urugʻ” axborot tizimida elektron shaklda toʻldiradi va yuboradi.
Ishtirokchi ushbu Nizom talablariga muvofiq kelganda, texnik operator elektron tanlovda qatnashish uchun ruxsat beradi hamda bu haqda ishtirokchini uning shaxsiy kabineti yoki elektron pochta manzili orqali xabardor qiladi.
Har bir ishtirokchiga elektron tanlovda qatnashish va shaxsni oshkor etuvchi maʼlumotlarning maxfiyligini taʼminlash uchun maxsus raqam beriladi.
17. Ishtirokchi elektron tanlovda qatnashish boʻyicha arizasini qabul qilish muddati tugashidan besh kun oldin qaytarib olishi, shuningdek, zaruratga koʻra unga tegishli oʻzgartirishlar kiritgan holda takroran yuborishi mumkin.
Ishtirokchi elektron tanlovda qatnashish boʻyicha arizani qaytarib olganda, texnik operatorga xabarnoma yuborishi lozim.
Texnik operator ishtirokchining soʻroviga koʻra, elektron tanlovda qatnashish uchun amalga oshirilgan toʻlov mablagʻini (komissiya toʻlovlari chegirilgan holda) bir ish kuni ichida ishtirokchining tijorat bankidagi hisobvaragʻiga (yoki plastik kartasiga) qaytarilishini taʼminlaydi.
18. Elektron tanlovda qatnashish boʻyicha arizalarni qabul qilish muddati tugagandan soʻng, elektron tanlovlar yakunlangunga qadar ishtirokchining arizasi va toʻlovlarni qaytarib olishga yoʻl qoʻyilmaydi.
19. “E-urugʻ” axborot tizimida elektron tanlovlar ushbu Nizomga 1-ilovaga muvofiq sxema boʻyicha tashkil etiladi va oʻtkaziladi.
2-bob. Elektron tanlovni tashkil etish va oʻtkazish
Elektron tanlovni oʻtkazilishi haqidagi xabarnomani eʼlon qilish tartibi
20. Elektron tanlov oʻtkazilishi toʻgʻrisidagi eʼlonlar huquqiy operatorning hududiy boshqarmalari tomonidan “E-urugʻ” axborot tizimida hamda ommaviy va mahalliy axborot vositalarida eʼlon qilinadi.
21. Qishloq xoʻjaligi vazirligi huzuridagi Urugʻchilikni rivojlantirish markazi va tuman (Quvasoy shahar) hokimliklari elektron tanlov oʻtkazilishi toʻgʻrisidagi xabarnomani oʻz rasmiy veb-saytida joylashtirishi mumkin.
Eʼlonda Oʻzbekiston Respublikasi Prezidentining “Qishloq xoʻjaligi ekinlari urugʻchiligini yanada rivojlantirish boʻyicha qoʻshimcha chora-tadbirlar toʻgʻrisida” 2022-yil 28-yanvardagi PQ-106-son qaroriga 5-ilova bilan tasdiqlangan Qishloq xoʻjaligi ekinlari urugʻliklarini yetishtirishga ixtisoslashtiriladigan hududlardagi maydonlarning prognoz koʻrsatkichlaridan kelib chiqqan holda urugʻlik yetishtiriladigan tuman (Quvasoy shahar), ixtisoslashgan massivlar, ekin maydonlari (gektar) toʻgʻrisidagi maʼlumotlar beriladi.
“E-urugʻ” axborot tizimiga joylashtirilgan elektron tanlovga ushbu tizim orqali avtomatik ravishda maxsus raqam beriladi.
22. Elektron tanlov oʻtkaziladigan kun huquqiy operatorning hududiy boshqarmalari tomonidan berilgan eʼlonlarda belgilanadi.
Bayram va dam olish kunlarida elektron tanlovlar oʻtkazilmaydi.
Elektron tanlovni oʻtkazish va gʻoliblarni aniqlash tartibi
23. Elektron tanlovda mazkur Nizom talablariga mos keluvchi barcha ishtirokchilar qatnashishi va ariza berishi mumkin.
Bunda ishtirokchini “E-urugʻ” axborot tizimida roʻyxatga olish, identifikatsiyalash va autentifikatsiyalash “Elektron hukumat” idoralararo integratsion platformasi orqali amalga oshiriladi.
24. Ishtirokchi har yili paxta va boshqa qishloq xoʻjaligi ekinlari urugʻliklarini yetishtirish uchun — 15-yanvardan 5-fevralga qadar (2025-yilda 19-martdan 25-martga qadar), boshoqli don ekinlari urugʻliklarini yetishtirish uchun — 15-iyuldan 5-avgustga qadar ariza topshiradi.
25. Ishtirokchiga tegishli maʼlumotlar qatʼiy ravishda integratsiya qilingan vazirlik va idoralarning maʼlumotlari asosida shakllantiriladi.
Bunda ishtirokchining barqarorlik reytingi hamda elektron tanlovga aloqador vazirlik va idoralarning maʼlumotlari “Elektron hukumat” idoralararo integratsion platformasidan, ishtirokchining umumiy yer maydoni, elektron tanlovda koʻrsatilgan ekin joylashtiriladigan maydon, suv bilan taʼminlanganligi, tuproq unumdorligiga oid maʼlumotlar Qishloq xoʻjaligi vazirligi va uning tizim tashkilotlarini “Agro.gov.uz”, “CropAgro”, “Hosil qabuli”, “eFito” va boshqa axborot tizimlaridan olinadi.
26. Integratsiya qilish orqali shakllantiriladigan maʼlumotlar asosida ishtirokchiga ball beriladi va ushbu Nizomga 2-ilovada muvofiq baholash reytingi yordamida ballar taqsimlanadi.
27. Ishtirokchi har bir mezon boʻyicha yigʻgan ballari bilan ariza berish jarayonida tanishadi va zaruratga koʻra arizani elektron raqamli imzo bilan tasdiqlaydi.
28. “E-urugʻ” axborot tizimiga kelib tushgan har bir arizaga maxsus raqam (identifikatsiya raqami) avtomatik ravishda biriktiriladi.
29. Ishtirokchi arizasining holati haqidagi maʼlumotlar uning shaxsiy kabineti orqali maʼlum qilib boriladi.
30. Elektron tanlov ixtisoslashgan massivlarda joylashgan ekin maydonlarida urugʻlik yetishtirish uchun oʻtkaziladi.
Ushbu massivlar Qishloq xoʻjaligi vazirligi huzuridagi Urugʻchilikni rivojlantirish markazining hududiy boshqarmalari eʼlonlarida koʻrsatiladi.
31. Eʼlonda berilgan parametrlardan kelib chiqib, elektron tanlov gʻolibi va gʻolib boʻlmaganlarni ajratadigan chegara aniqlanadi.
Agar mazkur chegaraning ikki tarafida bir xil ball toʻplagan ishtirokchilar boʻlsa, bunda arizani oldin topshirgan ishtirokchi elektron tanlov gʻolibi deb eʼtirof etiladi.
32. Elektron tanlov natijalari boʻyicha axborot elektron tanlov oʻtkazilgan kuni soat 10:00 da (GMT+5) “E-urugʻ” axborot tizimida avtomatik ravishda eʼlon qilinadi.
Bunda “E-urugʻ” axborot tizimida avtomatik ravishda elektron tanlov yakunlangan vaqt va uning natijalari toʻgʻrisidagi axborot shakllantiriladi.
33. Elektron tanlov natijalari boʻyicha axborotda quyidagilar bayon etiladi:
elektron tanlov haqida maʼlumotlar;
elektron tanlov gʻoliblari roʻyxati va ularning yer maydonlari;
elektron tanlovda ishtirok etish uchun ariza topshirilgan sana va vaqti.
34. “E-urugʻ” axborot tizimida elektron tanlov yakunlangandan keyin besh ish kunida elektron tanlov natijalari boʻyicha bayonnoma rasmiylashtiriladi.
35. Elektron tanlov gʻolibi deb topilmagan ishtirokchining toʻlov mablagʻi elektron tanlov yakunlangan deb topilgan kundan eʼtiboran uch ish kuni ichida “E-urugʻ” axborot tizimi orqali ishtirokchining tijorat bankidagi hisobvaragʻiga (yoki plastik kartasiga) toʻliq qaytariladi.
Ishtirokchining tijorat bankidagi hisobvaragʻi (yoki plastik karta raqami) notoʻgʻri koʻrsatilishi yoki boshqa sabablarga koʻra mablagʻlar huquqiy operatorning tijorat bankidagi hisobvaragʻiga qaytib tushgan hollarda, texnik operator bu haqda “E-urugʻ” axborot tizimi orqali ishtirokchini xabardor qiladi.
36. Elektron tanlovda qatnashish uchun toʻlov, ishtirokchini arizasini yuborish, elektron tanlovlarni tashkil etish uchun nazarda tutilgan mablagʻlar Qishloq xoʻjaligi vazirligi huzuridagi Urugʻchilikning rivojlantirish markazi va “Agrosanoatni raqamlashtirish markazi” MCHJga teng miqdorlarda taqsimlanadi.
3-bob. Elektron tanlov natijalarini rasmiylashtirish tartibi
37. Texnik operator mazkur Nizomda belgilangan tartibda elektron tanlov natijalari boʻyicha bayonnoma QR-kod bilan rasmiylashtiradi.
Elektron tanlov natijalari boʻyicha bayonnoma mazkur Nizomga 3-ilovadagi namunaviy shaklga muvofiq rasmiylashtiriladi.
Bayonnomada quyidagi maʼlumotlar koʻrsatiladi:
elektron tanlov sanasi;
bayonnoma rasmiylashtirilgan sana;
elektron tanlov gʻolibi haqida maʼlumotlar;
qonunchilik hujjatlarida taqiqlanmagan hamda ushbu Nizomda belgilangan boshqa maʼlumotlar.
Bayonnoma elektron tanlov gʻolibi hamda huquqiy operatorning hududiy boshqarmasini shaxsiy kabinetiga elektron shaklda yuboriladi.
38. Bayonnoma “E-urugʻ” axborot tizimi tomonidan yuritiladigan elektron tanlov natijalari toʻgʻrisidagi bayonnomalar reyestriga avtomatik ravishda kiritiladi.
Elektron tanlov natijalari boʻyicha bayonnomalar reyestriga jahon internet tarmogʻi orqali QR-kod havolasi joylashtiriladi.
Elektron tanlov gʻolibining soʻroviga koʻra bayonnoma qogʻoz shaklida, huquqiy operatorning muhri bosilgan holda taqdim etilishi yoki pochta orqali yuborilishi mumkin.
4-bob. Elektron tanlov gʻolibining vazifalari va funksiyalari
39. Quyidagilar urugʻlik qishloq xoʻjaligi ekinlarini yetishtirish huquqiga ega boʻlgan elektron tanlov gʻolibining vazifalari hisoblanadi:
gʻoʻza navlari va duragaylari urugʻliklarini belgilangan talablarga muvofiq yetishtirish, koʻpaytirish, Oʻzbekiston Respublikasi hududida foydalanish va realizatsiya qilishni litsenziya shartnomasi asosida patent egasining ruxsati bilan amalga oshirish;
tuziladigan shartnomaga asosan navlar boʻyicha zarur hajmdagi, amaldagi standartlar talablariga mos keluvchi nav urugʻlarining avlodlarini hisobga olgan holda yetishtirish;
faqat urugʻlik, bir avlodga mansub boʻlgan bitta nav ekilishini taʼminlash;
koʻpaytirilayotgan navning qimmatli xoʻjalik belgilari va texnologik xususiyatlarini saqlash;
yuqori sifatli va nav sofligiga ega boʻlgan avlodli urugʻlar yetishtirish;
avlodli urugʻliklarni yetishtirish tartibi va qoidalariga amal qilish;
nav originatori tomonidan ishlab chiqilgan ilmiy asoslangan tavsiyalar asosida agrotexnik tadbirlar belgilangan muddatlarda va meʼyorlarda sifatli oʻtkazilishini taʼminlash;
urugʻlik tayyorlash korxonalari tomonidan ekish uchun sarflangan (sotilgan) urugʻlik (chigit, don) miqdorlari boʻyicha “Hisob-dalolatnoma”ni Qishloq xoʻjaligi vazirligi huzuridagi Urugʻchilikni rivojlantirish markaziga, nav originatori va muallifiga hamda urugʻchilik subyektlariga topshirish muddati har yili 1-iyulga qadar, ustama haqlarini yakuniy toʻlab berish muddati har yili 1-avgustga qadar topshirish.
Quyidagilar qishloq xoʻjaligi ekinlari urugʻliklarini yetishtirish huquqiga ega boʻlgan elektron tanlov gʻolibining funksiyalari hisoblanadi:
urugʻlik uchun ekiladigan qishloq xoʻjaligi ekinlarini unumdor tuproqli, mexanizmlar yordamida ishlov berishga qulay, suv bilan yaxshi taʼminlangan, shoʻrlanmagan va tekis dalalarga joylashtirish;
almashlab ekish va agrotexnik tadbirlarni oʻz vaqtida oʻtkazish boʻyicha reja-jadvalni tuzish va amalga oshirish;
xoʻjalikda urugʻchilik boʻyicha agronom yoki agronom mutaxassisi boʻlishini taʼminlash (xoʻjalik rahbari urugʻchilik boʻyicha agronom yoki agronom boʻlganda ushbu talab qoʻllanilmaydi);
foydalanishga ruxsat etilgan kimyoviy preparatlar bilan qayta ishlangan (zararsizlantirilgan) urugʻlik materiallarini ekish (maxsus elita urugʻchilik xoʻjaliklari bundan mustasno);
urugʻlik maydonlarini begona nav va oʻsimliklardan tozalash;
kasallik keltirib chiqaruvchi begona ekinlarni urugʻlik maydonlar atrofiga ekmaslik hamda boshqa navlar bilan chatishishga yoʻl qoʻymaslik;
urugʻlik paxta maydonlarda urugʻlik hosili toʻliq yigʻishtirib olingandan soʻng gʻoʻza defoliatsiyasini oʻtkazish;
urugʻlik paxta maydonlarida gʻoʻzaning har tupida oʻrta tolali navlarda 3 — 8-hosil shoxlarining 1-2 oʻrinlaridan, ingichka tolali navlarda 3 — 13-hosil shoxlarining toʻliq pishib ochilgan koʻsaklaridan qoʻl bilan, mashinalar yordamida koʻsaklar 60 — 65 foiz ochilganda urugʻlik paxta hosilini terish;
urugʻlik uchun ekilgan boshoqli don ekinlari maydonlarini urugʻlik don oʻrish uchun ajratilgan kombaynlarda oʻrish, urugʻlik donni urugʻlik don tashish uchun ajratilgan avtomashinalar bilan tashish;
yigʻishtirib olingan qishloq xoʻjaligi ekinlari urugʻliklarini avlodlari boʻyicha amaldagi standartlar talablariga koʻra urugʻlik qabul qiluvchi korxonalarga topshirish.
40. Elektron tanlov gʻolibi tomonidan mazkur Nizom talablari yoki agrotexnika qoidalari muntazam ravishda buzilganda, qishloq xoʻjaligi ekinlari urugʻliklari yetishtirilayotgan maydonlar tuman (Quvasoy shahar) aprobatsiya komissiyasi tomonidan yaroqsiz deb topiladi hamda urugʻlik yetishtirish huquqidan mahrum etiladi.
Elektron tanlov gʻolibi tomonidan urugʻlik maydonlarda gʻoʻza va boshoqli don ekinlarining bitta navini ikkita avlodi ekilgan taqdirda, ustama toʻlashdagi farqlar inobatga olingan holda tuman (Quvasoy shahar) aprobatsiya komissiyasi tomonidan keyingi avlodga rasmiylashtiriladi.
Urugʻlik maydonlarda ilmiy asoslangan tavsiyalarga amal qilgan holda koʻchat qalinligini taʼminlash talab etiladi.
Mazkur talablarga amal qilinmagan hollarda tuman (Quvasoy shahar) aprobatsiya komissiyasi tomonidan qishloq xoʻjaligi ekinlari urugʻliklarini yetishtiruvchi urugʻlik yetishtirish huquqidan mahrum etiladi.
5-bob. Yakunlovchi qoidalar
41. Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha elektron tanlovlar jarayonida yuzaga keladigan nizolar va kelishmovchiliklar qonunchilik hujjatlarida belgilangan tartibda hal etiladi.
42. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha tanlovlarni “E-urugʻ” axborot tizimida tashkil etish va oʻtkazish tartibi toʻgʻrisidagi nizomga 1-ILOVA
Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha fermer xoʻjaliklari va boshqa qishloq xoʻjaligi subyektlari oʻrtasida elektron tanlovlarni oʻtkazish
Bosqichlar Subyektlar Tadbirlar Muddatlar 1-bosqich Urugʻchilikni rivojlantirish markazining hududiy boshqarmalari Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha elektron tanlovlarni oʻtkazish toʻgʻrisida “E-urugʻ” axborot tizimida hamda mahalliy va ommaviy axborot vositalarida eʼlon beradi. Ariza topshirish boshlanishidan kamida 5 kun oldin 2-bosqich Ishtirokchilar Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha elektron tanlovda ishtirok etish uchun “E-urugʻ” axborot tizimi orqali ariza topshiradi. Urugʻlik paxta xom ashyosi va boshqa qishloq xoʻjaligi ekinlari boʻyicha — 15-yanvardan 5-fevralga qadar (2025-yilda 19-martdan 25-martga qadar), boshoqli don ekinlari boʻyicha — 15-iyuldan 5-avgustga qadar 3-bosqich “E-urugʻ” axborot tizimi Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha f yermer xoʻjaliklari va boshqa qishloq xoʻjaligi subyektlari oʻrtasida elektron tanlovlarni oʻtkazadi. Hujjat qabul qilish yakunlangandan keyin 1 ish kunida 4-bosqich Texnik operator Tanlov gʻ olib lari uchun QR - kodli bayonnoma rasmiylashtiriladi . Tanlov oʻtkazilgandan soʻng 5 ish kunida 5-bosqich “E-urugʻ” axborot tizimi Tanlovda gʻolib boʻlganlar ning arizasiga berilgan noyob identifikatsiya raqamlari roʻyxati eʼlon qilinadi. Tanlov oʻtkazilgandan soʻng 2 ish kunida
Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha tanlovlarni “E-urugʻ” axborot tizimida tashkil etish va oʻtkazish tartibi toʻgʻrisidagi nizomga 2-ILOVA
Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha elektron tanlovlarni oʻtkazishda fermer xoʻjaliklari va boshqa qishloq xoʻjaligi subyektlari imkoniyatlarini baholash uchun
T/r Baholanadigan imkoniyatlar (holatlar) Reyting koʻrsatkichlari Reyting ballar Taqdim etiladigan maʼlumotlar (toʻgʻridan-toʻgʻri yoki “Raqamli hukumat” markazining idoralararo integratsiyalashuv platformasi orqali) 1. Tuproq unumdorligi ( ball bonitet) 90 — 100 10 ball Qishloq xoʻjaligi vazirligining “C ropAgro ” axborot tizimi maʼlumotlari (konturlar kesimida) 80 — 89 9 ball 70 — 79 8 ball 60 — 69 7 ball 50 — 59 6 ball 40 —49 5 ball 2. Suv taʼminoti yaxshi (80 foiz va undan yuqori) 10 ball Qishloq xoʻjaligi vazirligining “C ropAgro ” axborot tizimi maʼlumotlari (xoʻjaliklar kesimida) oʻrta (50 dan 80 foizgacha) 5 ball yomon (50 foizdan kam) 0 ball 3. Xoʻjalikning ekin maydoni kasalliklarga chalin ma ganligi 2 yil ichida 4 ball Oʻsimliklar karantini va himoyasi agentligining “eFito” axborot tizimi maʼlumotlari (t uman va xoʻjaliklar kesimida) 1 yil ichida 2 ball Xoʻjalikning ekin maydoni zararkunandalar bilan zararlan ma ganligi 2 yil ichida 4 ball 1 yil ichida 2 ball Xoʻjalikning ekin maydoni da begona oʻt - lar tarqal ma ganligi 2 yil ichida 2 ball 1 yil ichida 1 ball 4 . Xoʻjalikning tashkil etilgan muddati 20 yildan yuqori 10 ball Soliq qoʻmitasi maʼlumotlari 10 yildan 20 yilgacha 7 ball 3 yildan 10 yilgacha 4 ball 5 . Ishtirokchining mavjud qishloq xoʻjaligi texnika si va agregat lari (texnik koʻrikdan oʻtkazilgan) haydov traktori 2 ball Agrosanoat majmui ustidan nazorat qilish inspeksiyasi maʼlumotlari ch opiq traktori 3 ball don oʻrish kombayni 1 ball lazerli yer tekislagich 1 ball urugʻ ekish seyalkasi 2 ball OVX, shtangali purkagich 1 ball 6 . Soʻnggi yilda yetishtirilgan paxta hosildorligi ning oʻrtacha koʻrsatkichi (urugʻlik paxta tanlovi uchun) 50 sentner va undan yuqori 10 ball Qishloq xoʻjaligi vazirligining “Hosil qabul” axborot tizimi maʼlumotlari (tuman va xoʻjaliklar kesimida) 40 sentnerdan 50 sentnergacha 6 ball 35 sentnerdan 40 sentnergacha 3 ball 30 sentnerdan 35 sentnergacha 1 ball 7 . Ishtirokchining barqarorlik reytingi (ariza yuborilgan kundagi reyting koʻrsatkichi) 0 dan 100 gacha Reyting koʻrsatkichi 10 ga boʻlinadi Soliq qoʻmitasining “Tadbirkorlarning barqarorlik reytingi” elektron platformasi maʼlumotlari
Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha tanlovlarni “E-urugʻ” axborot tizimida tashkil etish va oʻtkazish tartibi toʻgʻrisidagi nizomga 3-ILOVA
Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha elektron tanlov natijalari rasmiylashtiriladigan bayonnomaning
“Urugʻchilikni rivojlantirish markazi” DM “Agrosanoatni raqamlashtirish markazi” MCHJ ELEKTRON TANLOV NATIJALARI TOʻGʻRISIDA BAYONNOMA № _____ Elektron tanlov oʻtkazilgan sana: ___________________ Bayonnoma rasmiylashtirilgan sana: _________________ Tanlov №: ________________ Tanlov turi: ____________ (paxta, gʻalla va boshqa ekinlar boʻyicha) Tanlov oʻtkazilgan hudud: ____________ viloyati, ____________ tumani Tuman uchun prognoz koʻrsatkichlari asosidagi maydon: ____ gektar. TANLOV GʻOLIBLARI VA ISHTIROKCHILARI ROʻYXATI T/r Ariza raqami Sanasi Ishtirokchi (fermer xoʻjaligi) nomi Ishtirokchining STIRi Toʻplangan reyting ball Yer maydoni (ga) Taqsimot boʻyicha maydon (ga) Tanlov gʻoliblari roʻyxati 1. 2. 3. Gʻolib boʻlmaganlar roʻyxati 1. 2. 3. QR-kod uchun joy
Vazirlar Mahkamasining 2025-yil 18-martdagi 166-son qaroriga 2-ILOVA
Qishloq xoʻjaligi ekinlari urugʻliklarini yetishtirish huquqiga ega boʻlish boʻyicha elektron tanlovlarni oʻtkazishda zarur boʻladigan maʼlumotlarni “E-urugʻ” axborot tizimiga integratsiya qiladigan vazirlik va idoralar
1. Oʻzbekiston Respublikasi Qishloq xoʻjaligi vazirligi.
2. Oʻzbekiston Respublikasi Raqamli texnologiyalar vazirligi va uning huzuridagi “Raqamli hukumat loyihalarini boshqarish markazi” davlat muassasasi.
3. Oʻzbekiston Respublikasi Kambagʻallikni qisqartirish va bandlik vazirligi.
4. Oʻzbekiston Respublikasi Soliq qoʻmitasi.
5. Vazirlar Mahkamasi huzuridagi Agrosanoat majmui ustidan nazorat qilish inspeksiyasi.
6. Oʻzbekiston Respublikasi Qishloq xoʻjaligi vazirligi huzuridagi Oʻsimliklar karantini va himoyasi agentligi.
7. Oʻzbekiston respublika tovar-xom ashyo birjasi.
Vazirlar Mahkamasining 2025-yil 18-martdagi 166-son qaroriga 3-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirishlar
1. Vazirlar Mahkamasining “Qishloq xoʻjaligi ekinlari urugʻchiligiga oid ayrim normativ-huquqiy hujjatlarni tasdiqlash toʻgʻrisida” 2021-yil 12-oktabrdagi 641-son qarorida :
a) 1-bandning ikkinchi xatboshisi chiqarib tashlansin;
b) 1-ilova chiqarib tashlansin.
2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Qishloq xoʻjaligi ekinlari urugʻchiligini yanada rivojlantirish boʻyicha qoʻshimcha chora-tadbirlar toʻgʻrisida” 2022-yil 28-yanvardagi PQ-106-son qarori)” 2022-yil 9-iyundagi 320-son qaroriga ilovada :
3-bandda :
a) “a” kichik bandning birinchi-ikkinchi xatboshilari chiqarib tashlansin;
b) “b” bandi chiqarib tashlansin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 18-mart,
166-son