UzbekAI

Ўзбекистон Республикаси Вазирлар Маҳкамасининг

қарори

НИЗОМ

Ихтиро, фойдали модель ва саноат намунасига патент бериш ҳақидаги талабномаларни давлат экспертизасидан ўтказишни аутсорсинг асосида ташкил этиш тартиби тўғрисидаги низомни тасдиқлаш ҳақида

Ўзбекистон Республикаси Президентининг «Маъмурий ислоҳотлар доирасида адлия органлари ва муассасаларининг масъулиятини янада ошириш ҳамда ихчам бошқарув тизимини шакллантириш тўғрисида» 2024 йил 24 майдаги ПФ-80-сон Фармони ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг 2024 йил 24 майдаги ПФ-80-сон Фармони билан тасдиқланган Адлия органлари фаолиятини трансформация қилиш, давлат хизматларини кўрсатиш ва норма ижодкорлигини такомиллаштириш бўйича чора-тадбирлар режасининг 18-бандида ихтиро ва фойдали модель ҳамда саноат намуналарини рўйхатдан ўтказиш талабномалари бўйича ўтказиладиган давлат экспертизаси жараёнларига аутсорсинг усулларини жорий қилиш белгиланганлиги маълумот учун қабул қилинсин.

2. Белгилансинки, ихтиро, фойдали модель ва саноат намунасига патент бериш ҳақидаги талабномаларни давлат экспертизасидан ўтказишни аутсорсинг асосида ташкил этишда:

жисмоний ва юридик шахслар энг яхши таклифларни танлаш орқали жалб этилади;

аутсорсинг шартномаси Ўзбекистон Республикаси Адлия вазирлиги ҳузуридаги «Интеллектуал мулк маркази» давлат муассасаси (кейинги ўринларда — буюртмачи) ва жисмоний ёки юридик шахс (кейинги ўринларда — аутсорсер) ўртасида тузилади;

аутсорсинг асосида хизмат кўрсатиш бўйича шартнома буюртмачи ва аутсорсер ўртасида патент бериш ҳақидаги ҳар бир талабнома учун алоҳида тузилади;

аутсорсинг асосида хизмат нархи Ўзбекистон Республикаси Адлия вазирлиги томонидан белгиланадиган иш юкламалари ва вақт сарфи меъёрлари ҳамда патент бериш ҳақидаги талабнома экспертизаси мураккаблигидан келиб чиқиб, буюртмачи томонидан шакллантирилади ҳамда бошланғич нархнинг асослиги учун буюртмачи жавобгар ҳисобланади;

аутсорсинг асосида кўрсатиладиган хизматлар буюртмачи ҳисобидан молиялаштирилади.

3. Қуйидагиларни назарда тутувчи Ихтиро, фойдали модель ва саноат намунасига патент бериш ҳақидаги талабномаларни давлат экспертизасидан ўтказишни аутсорсинг асосида ташкил этиш тартиби тўғрисидаги низом иловага мувофиқ тасдиқлансин:

аутсорсинг татбиқ этиладиган ҳолатлар;

аутсорсерни танлаш, у билан шартнома тузиш ва ҳисоб-китобларни амалга ошириш;

аутсорсер ва буюртмачининг ҳуқуқлари ва мажбуриятлари;

аутсорсинг хизмати кўрсатилиши юзасидан мониторингни амалга ошириш тартиби.

4. Мазкур қарорнинг бажарилишини назорат қилиш Ўзбекистон Республикаси адлия вазири А.Ж. Ташкулов зиммасига юклансин.

Вазирлар Маҳкамасининг 2025 йил 26 мартдаги 185-сон қарорига ИЛОВА

Ихтиро, фойдали модель ва саноат намунасига патент бериш ҳақидаги талабномаларни давлат экспертизасидан ўтказишни аутсорсинг асосида ташкил этиш тартиби тўғрисида

1-боб. Умумий қоидалар

1. Ушбу Низом Ўзбекистон Республикаси Адлия вазирлиги ҳузуридаги «Интеллектуал мулк маркази» давлат муассасаси томонидан фойдали модель ҳақидаги талабнома экспертизаси ҳамда ихтиро ҳақидаги талабноманинг ёки саноат намунаси ҳақидаги талабноманинг моҳияти бўйича илмий-техника экспертизасини (кейинги ўринларда — моҳияти бўйича экспертиза) аутсорсинг асосида ташкил этиш тартибини белгилайди.

2. Ушбу Низомда қуйидаги асосий тушунчалар қўлланилади:

аутсорсинг — буюртмачининг айрим функцияларини ёки функцияларининг бир қисмини шартнома асосида аутсорсерга ўтказиш;

аутсорсер — шартнома асосида буюртмачига хизмат кўрсатувчи жисмоний ёки юридик шахс;

буюртмачи — Ўзбекистон Республикаси Адлия вазирлиги ҳузуридаги «Интеллектуал мулк маркази» давлат муассасаси;

саноат мулки объектлари — ихтиро, фойдали модель ва саноат намунаси;

талабгор — буюртмачига аутсорсинг асосида хизмат кўрсатиш ҳамда ушбу Низомга мувофиқ танлашда иштирок этиш истагини билдирган жисмоний ёки юридик шахс.

3. Мазкур Низомнинг амал қилиши саноат мулки объектларига патент бериш ҳақидаги талабнома бўйича расмий экспертизадан ўтказишга нисбатан татбиқ этилмайди.

4. Буюртмачи иш ҳажми ҳаддан ортиб кетганда ёки штат бирлигида тегишли соҳа бўйича мутахассис мавжуд бўлмаганда, саноат мулки объектларига патент бериш ҳақидаги талабноманинг моҳияти бўйича экспертизани аутсорсинг асосида ўтказиш бўйича қарор қабул қилади.

5. Аутсорсинг асосида кўрсатилган хизматлар буюртмачи ҳисобидан молиялаштирилади.

6. Буюртмачи айрим функцияларини ёки функцияларининг бир қисмини аутсорсингга ўтказишда қуйидаги шартларга риоя қилиши шарт:

аутсорсерни давлат харидлари тўғрисидаги қонунчилик ҳужжатлари асосида танлаб олиш;

коррупция ва манфаатлар тўқнашуви ҳолатларига йўл қўймаслик;

аутсорсерга ўтказиладиган функциялар ёки функцияларнинг бир қисми сифатли бажарилишини назорат қилиш.

7. Аутсорсинг асосида хизмат кўрсатиш жараёнида махфийлик тартибига риоя этиш буюртмачи томонидан таъминланади.

2-боб. Аутсорсерни танлаш, у билан шартнома тузиш ва ҳисоб-китобларни амалга ошириш

8. Аутсорсерни танлаш, у билан шартнома тузиш ва унга ҳақ тўлаш Ўзбекистон Республикасининг «Давлат харидлари тўғрисида»ги Қонуни ва бошқа қонунчилик ҳужжатларига мувофиқ амалга оширилади.

9. Жисмоний шахс ҳисобланган талабгорларга нисбатан қуйидаги шартлар қўйилади:

олий маълумотли бўлиши (илмий даражага эга бўлганларга устунлик берилади);

интеллектуал мулк соҳасида билим ва кўникмаларга эга бўлиши (Бутунжаҳон интеллектуал мулк ташкилотининг тегишли ўқув курсларида малака оширганлигини тасдиқловчи ҳужжат ёки/ва талабнома топшириш тажрибасига эга бўлиши);

келиб тушган талабнома соҳасида камида беш йил фаолият юритган бўлиши.

10. Талабгор юридик шахс бўлганда, у илмий-тадқиқот муассасаси бўлиши ёки фаолиятида келиб тушган талабнома соҳаси бўйича тадқиқот ишлари ва (ёки) ишлаб чиқариш йўлга қўйилганлиги ҳамда унда мазкур Низомнинг 9-бандида белгиланган талабларга жавоб берадиган ходимлар меҳнат шартномаси асосида ишлаётган бўлиши керак.

11. Аутсорсинг асосида хизмат кўрсатиш бўйича шартнома буюртмачи ва аутсорсер ўртасида патент бериш ҳақидаги ҳар бир талабнома учун алоҳида тузилади.

12. Аутсорсинг шартномаси бўйича хизматлар кўрсатиш муддати қонунчилик ҳужжатларида белгиланган ихтиро, фойдали модель ва саноат намунасига патент бериш ҳақидаги талабномаларни давлат экспертизасидан ўтказиш муддати доирасида белгиланади.

13. Аутсорсинг асосида кўрсатилган хизматларга ҳақ тўлаш тартиби ва миқдори буюртмачи ҳамда аутсорсер ўртасида расмийлаштириладиган шартномада белгиланади.

3-боб. Аутсорсер ва буюртмачининг ҳуқуқлари ва мажбуриятлари

14. Аутсорсер қуйидаги ҳуқуқларга эга:

буюртмачидан талабномага оид ҳужжатлар, намуналар ва бошқа маълумотларни сўраш ва олиш;

моҳияти бўйича экспертизани ўтказиш учун зарур бўладиган, буюртмачига тегишли ахборот тизимлари, асбоб-ускуналардан ва буюртмачидаги мавжуд услубий қўлланмалардан фойдаланиш;

буюртмачи орқали талабнома берувчи билан талабнома бўйича ёзишмаларни амалга ошириш;

хизматлар учун тўловни шартномада белгиланган миқдор ва муддатда талаб қилиш;

буюртмачидан шартнома шартларининг бажарилишини талаб қилиш.

Аутсорсер қонунчилик ҳужжатларига ҳамда шартномага мувофиқ бошқа ҳуқуқларга ҳам эга бўлиши мумкин.

15. Аутсорсер қуйидагиларга мажбур:

аутсорсинг хизматини кўрсатишда интеллектуал мулк соҳасидаги қонунчилик ҳужжатларга қатъий риоя этиш;

моҳияти бўйича экспертизани услубий қўлланмалар асосида ўтказиш;

талабномага оид ҳужжатлар, намуналар ва бошқа материалларни буюртмачи рухсатисиз унинг биносидан олиб чиқмаслик;

хизматларнинг сифатли кўрсатилишини ва буюртмачига етказилишини таъминлаш;

шартномага амал қилиш муддати ва ундан кейинги давр мобайнида махфийлик тартибига қатъий риоя қилиш ва саноат мулки объекти давлат рўйхатидан ўтказилганлиги тўғрисидаги маълумотларни расмий равишда эълон қилингунга қадар ошкор этмаслик;

шартнома шартлари бажарилмагани ёки лозим даражада бажарилмагани натижасида буюртмачига етказилган зарар ўрнини қоплаш;

шартномани бекор қилиш ҳақида буюртмачини икки ой олдин ёзма равишда огоҳлантириш, ушбу муддат тугагунига қадар эса буюртмачининг тегишли хизматларини узлуксиз ташкил этишни таъминлаш.

Аутсорсер зиммасига қонунчилик ҳужжатларига ва шартномага мувофиқ бошқа мажбуриятлар ҳам юкланиши мумкин.

16. Буюртмачи қуйидаги ҳуқуқларга эга:

хизматлар сифатли кўрсатилишини;

шартномада белгиланган муддатларда хизматларнинг кўрсатилишини;

аутсорсернинг фаолиятига аралашмаган ҳолда, шартнома шартларининг бажарилишини;

талабнома ва унга алоқадор ёзишмалар аутсорсер томонидан ўз вақтида кўриб чиқилишини;

аутсорсер томонидан шартнома шартлари бажарилмагани ёки лозим даражада бажарилмагани натижасида ўзига етказилган зарар ўрни қопланишини талаб қилиш.

Буюртмачи қонунчилик ҳужжатларига ҳамда шартномага мувофиқ бошқа ҳуқуқларга ҳам эга бўлиши мумкин.

17. Буюртмачи қуйидагиларга мажбур:

талабномага оид ҳужжатлар, намуналар ва бошқа маълумотларни аутсорсерга бериш;

моҳияти бўйича экспертизани ўтказиш учун аутсорсерга зарур бўладиган тегишли ахборот тизимлари, асбоб-ускуналардан ва ўзидаги мавжуд услубий қўлланмалардан фойдаланиш имкониятини яратиш;

аутсорсер ва талабнома берувчи ўртасида талабнома бўйича ёзишмалар ўз вақтида амалга оширилишини таъминлаш;

шартномага мувофиқ белгиланган муддат ва шартлар асосида аутсорсерга кўрсатилган хизматлар учун тўловларни амалга оширишни таъминлаш.

Буюртмачи зиммасига қонунчилик ҳужжатлари ва шартномага мувофиқ бошқа мажбуриятлар ҳам юкланиши мумкин.

4-боб. Аутсорсинг хизмати кўрсатилиши юзасидан назорат ва мониторингни амалга ошириш

18. Аутсорсинг хизмати кўрсатилиши юзасидан назорат ва мониторинг буюртмачи томонидан шартномада белгиланган шартларда ва муддатларда амалга оширилади.

19. Аутсорсинг хизмати кўрсатилиши юзасидан мониторинг буюртмачининг тегишли таркибий бўлинмаси раҳбари томонидан амалга оширилади.

20. Буюртмачининг тегишли таркибий бўлинмаси раҳбари:

аутсорсинг хизмати кўрсатилиши юзасидан доимий мониторингни амалга оширади;

мониторинг натижаларидан келиб чиқиб, буюртмачи ва аутсорсерга тегишли таклиф ва тавсиялар киритади.

5-боб. Якунловчи қоидалар

21. Ушбу Низомда назарда тутилган талабларнинг бузилиши буюртмачи ва аутсорсер ўртасида тузилган шартноманинг белгиланган тартибда бекор қилинишига асос бўлади.

22. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.

Ўзбекистон Республикасининг Бош вазири А. АРИПОВ

Тошкент ш.,

2025 йил 26 март,

185-сон

(Қонунчилик маълумотлари миллий базаси, 29.03.2025 й., 09/25/185/0284-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Ixtiro, foydali model va sanoat namunasiga patent berish haqidagi talabnomalarni davlat ekspertizasidan oʻtkazishni autsorsing asosida tashkil etish tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining “Maʼmuriy islohotlar doirasida adliya organlari va muassasalarining masʼuliyatini yanada oshirish hamda ixcham boshqaruv tizimini shakllantirish toʻgʻrisida” 2024-yil 24-maydagi PF-80-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2024-yil 24-maydagi PF-80-son Farmoni bilan tasdiqlangan Adliya organlari faoliyatini transformatsiya qilish, davlat xizmatlarini koʻrsatish va norma ijodkorligini takomillashtirish boʻyicha chora-tadbirlar rejasining 18-bandida ixtiro va foydali model hamda sanoat namunalarini roʻyxatdan oʻtkazish talabnomalari boʻyicha oʻtkaziladigan davlat ekspertizasi jarayonlariga autsorsing usullarini joriy qilish belgilanganligi maʼlumot uchun qabul qilinsin.

2. Belgilansinki, ixtiro, foydali model va sanoat namunasiga patent berish haqidagi talabnomalarni davlat ekspertizasidan oʻtkazishni autsorsing asosida tashkil etishda:

jismoniy va yuridik shaxslar eng yaxshi takliflarni tanlash orqali jalb etiladi;

autsorsing shartnomasi Oʻzbekiston Respublikasi Adliya vazirligi huzuridagi “Intellektual mulk markazi” davlat muassasasi (keyingi oʻrinlarda — buyurtmachi) va jismoniy yoki yuridik shaxs (keyingi oʻrinlarda — autsorser) oʻrtasida tuziladi;

autsorsing asosida xizmat koʻrsatish boʻyicha shartnoma buyurtmachi va autsorser oʻrtasida patent berish haqidagi har bir talabnoma uchun alohida tuziladi;

autsorsing asosida xizmat narxi Oʻzbekiston Respublikasi Adliya vazirligi tomonidan belgilanadigan ish yuklamalari va vaqt sarfi meʼyorlari hamda patent berish haqidagi talabnoma ekspertizasi murakkabligidan kelib chiqib, buyurtmachi tomonidan shakllantiriladi hamda boshlangʻich narxning asosligi uchun buyurtmachi javobgar hisoblanadi;

autsorsing asosida koʻrsatiladigan xizmatlar buyurtmachi hisobidan moliyalashtiriladi.

3. Quyidagilarni nazarda tutuvchi Ixtiro, foydali model va sanoat namunasiga patent berish haqidagi talabnomalarni davlat ekspertizasidan oʻtkazishni autsorsing asosida tashkil etish tartibi toʻgʻrisidagi nizom ilovaga muvofiq tasdiqlansin:

autsorsing tatbiq etiladigan holatlar;

autsorserni tanlash, u bilan shartnoma tuzish va hisob-kitoblarni amalga oshirish;

autsorser va buyurtmachining huquqlari va majburiyatlari;

autsorsing xizmati koʻrsatilishi yuzasidan monitoringni amalga oshirish tartibi.

4. Mazkur qarorning bajarilishini nazorat qilish Oʻzbekiston Respublikasi adliya vaziri A.J. Tashkulov zimmasiga yuklansin.

Vazirlar Mahkamasining 2025-yil 26-martdagi 185-son qaroriga ILOVA

Ixtiro, foydali model va sanoat namunasiga patent berish haqidagi talabnomalarni davlat ekspertizasidan oʻtkazishni autsorsing asosida tashkil etish tartibi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Adliya vazirligi huzuridagi “Intellektual mulk markazi” davlat muassasasi tomonidan foydali model haqidagi talabnoma ekspertizasi hamda ixtiro haqidagi talabnomaning yoki sanoat namunasi haqidagi talabnomaning mohiyati boʻyicha ilmiy-texnika ekspertizasini (keyingi oʻrinlarda — mohiyati boʻyicha ekspertiza) autsorsing asosida tashkil etish tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

autsorsing — buyurtmachining ayrim funksiyalarini yoki funksiyalarining bir qismini shartnoma asosida autsorserga oʻtkazish;

autsorser — shartnoma asosida buyurtmachiga xizmat koʻrsatuvchi jismoniy yoki yuridik shaxs;

buyurtmachi — Oʻzbekiston Respublikasi Adliya vazirligi huzuridagi “Intellektual mulk markazi” davlat muassasasi;

sanoat mulki obyektlari — ixtiro, foydali model va sanoat namunasi;

talabgor — buyurtmachiga autsorsing asosida xizmat koʻrsatish hamda ushbu Nizomga muvofiq tanlashda ishtirok etish istagini bildirgan jismoniy yoki yuridik shaxs.

3. Mazkur Nizomning amal qilishi sanoat mulki obyektlariga patent berish haqidagi talabnoma boʻyicha rasmiy ekspertizadan oʻtkazishga nisbatan tatbiq etilmaydi.

4. Buyurtmachi ish hajmi haddan ortib ketganda yoki shtat birligida tegishli soha boʻyicha mutaxassis mavjud boʻlmaganda, sanoat mulki obyektlariga patent berish haqidagi talabnomaning mohiyati boʻyicha ekspertizani autsorsing asosida oʻtkazish boʻyicha qaror qabul qiladi.

5. Autsorsing asosida koʻrsatilgan xizmatlar buyurtmachi hisobidan moliyalashtiriladi.

6. Buyurtmachi ayrim funksiyalarini yoki funksiyalarining bir qismini autsorsingga oʻtkazishda quyidagi shartlarga rioya qilishi shart:

autsorserni davlat xaridlari toʻgʻrisidagi qonunchilik hujjatlari asosida tanlab olish;

korrupsiya va manfaatlar toʻqnashuvi holatlariga yoʻl qoʻymaslik;

autsorserga oʻtkaziladigan funksiyalar yoki funksiyalarning bir qismi sifatli bajarilishini nazorat qilish.

7. Autsorsing asosida xizmat koʻrsatish jarayonida maxfiylik tartibiga rioya etish buyurtmachi tomonidan taʼminlanadi.

2-bob. Autsorserni tanlash, u bilan shartnoma tuzish va hisob-kitoblarni amalga oshirish

8. Autsorserni tanlash, u bilan shartnoma tuzish va unga haq toʻlash Oʻzbekiston Respublikasining “Davlat xaridlari toʻgʻrisida”gi Qonuni va boshqa qonunchilik hujjatlariga muvofiq amalga oshiriladi.

9. Jismoniy shaxs hisoblangan talabgorlarga nisbatan quyidagi shartlar qoʻyiladi:

oliy maʼlumotli boʻlishi (ilmiy darajaga ega boʻlganlarga ustunlik beriladi);

intellektual mulk sohasida bilim va koʻnikmalarga ega boʻlishi (Butunjahon intellektual mulk tashkilotining tegishli oʻquv kurslarida malaka oshirganligini tasdiqlovchi hujjat yoki/va talabnoma topshirish tajribasiga ega boʻlishi);

kelib tushgan talabnoma sohasida kamida besh yil faoliyat yuritgan boʻlishi.

10. Talabgor yuridik shaxs boʻlganda, u ilmiy-tadqiqot muassasasi boʻlishi yoki faoliyatida kelib tushgan talabnoma sohasi boʻyicha tadqiqot ishlari va (yoki) ishlab chiqarish yoʻlga qoʻyilganligi hamda unda mazkur Nizomning 9-bandida belgilangan talablarga javob beradigan xodimlar mehnat shartnomasi asosida ishlayotgan boʻlishi kerak.

11. Autsorsing asosida xizmat koʻrsatish boʻyicha shartnoma buyurtmachi va autsorser oʻrtasida patent berish haqidagi har bir talabnoma uchun alohida tuziladi.

12. Autsorsing shartnomasi boʻyicha xizmatlar koʻrsatish muddati qonunchilik hujjatlarida belgilangan ixtiro, foydali model va sanoat namunasiga patent berish haqidagi talabnomalarni davlat ekspertizasidan oʻtkazish muddati doirasida belgilanadi.

13. Autsorsing asosida koʻrsatilgan xizmatlarga haq toʻlash tartibi va miqdori buyurtmachi hamda autsorser oʻrtasida rasmiylashtiriladigan shartnomada belgilanadi.

3-bob. Autsorser va buyurtmachining huquqlari va majburiyatlari

14. Autsorser quyidagi huquqlarga ega:

buyurtmachidan talabnomaga oid hujjatlar, namunalar va boshqa maʼlumotlarni soʻrash va olish;

mohiyati boʻyicha ekspertizani oʻtkazish uchun zarur boʻladigan, buyurtmachiga tegishli axborot tizimlari, asbob-uskunalardan va buyurtmachidagi mavjud uslubiy qoʻllanmalardan foydalanish;

buyurtmachi orqali talabnoma beruvchi bilan talabnoma boʻyicha yozishmalarni amalga oshirish;

xizmatlar uchun toʻlovni shartnomada belgilangan miqdor va muddatda talab qilish;

buyurtmachidan shartnoma shartlarining bajarilishini talab qilish.

Autsorser qonunchilik hujjatlariga hamda shartnomaga muvofiq boshqa huquqlarga ham ega boʻlishi mumkin.

15. Autsorser quyidagilarga majbur:

autsorsing xizmatini koʻrsatishda intellektual mulk sohasidagi qonunchilik hujjatlarga qatʼiy rioya etish;

mohiyati boʻyicha ekspertizani uslubiy qoʻllanmalar asosida oʻtkazish;

talabnomaga oid hujjatlar, namunalar va boshqa materiallarni buyurtmachi ruxsatisiz uning binosidan olib chiqmaslik;

xizmatlarning sifatli koʻrsatilishini va buyurtmachiga yetkazilishini taʼminlash;

shartnomaga amal qilish muddati va undan keyingi davr mobaynida maxfiylik tartibiga qatʼiy rioya qilish va sanoat mulki obyekti davlat roʻyxatidan oʻtkazilganligi toʻgʻrisidagi maʼlumotlarni rasmiy ravishda eʼlon qilingunga qadar oshkor etmaslik;

shartnoma shartlari bajarilmagani yoki lozim darajada bajarilmagani natijasida buyurtmachiga yetkazilgan zarar oʻrnini qoplash;

shartnomani bekor qilish haqida buyurtmachini ikki oy oldin yozma ravishda ogohlantirish, ushbu muddat tugaguniga qadar esa buyurtmachining tegishli xizmatlarini uzluksiz tashkil etishni taʼminlash.

Autsorser zimmasiga qonunchilik hujjatlariga va shartnomaga muvofiq boshqa majburiyatlar ham yuklanishi mumkin.

16. Buyurtmachi quyidagi huquqlarga ega:

xizmatlar sifatli koʻrsatilishini;

shartnomada belgilangan muddatlarda xizmatlarning koʻrsatilishini;

autsorserning faoliyatiga aralashmagan holda, shartnoma shartlarining bajarilishini;

talabnoma va unga aloqador yozishmalar autsorser tomonidan oʻz vaqtida koʻrib chiqilishini;

autsorser tomonidan shartnoma shartlari bajarilmagani yoki lozim darajada bajarilmagani natijasida oʻziga yetkazilgan zarar oʻrni qoplanishini talab qilish.

Buyurtmachi qonunchilik hujjatlariga hamda shartnomaga muvofiq boshqa huquqlarga ham ega boʻlishi mumkin.

17. Buyurtmachi quyidagilarga majbur:

talabnomaga oid hujjatlar, namunalar va boshqa maʼlumotlarni autsorserga berish;

mohiyati boʻyicha ekspertizani oʻtkazish uchun autsorserga zarur boʻladigan tegishli axborot tizimlari, asbob-uskunalardan va oʻzidagi mavjud uslubiy qoʻllanmalardan foydalanish imkoniyatini yaratish;

autsorser va talabnoma beruvchi oʻrtasida talabnoma boʻyicha yozishmalar oʻz vaqtida amalga oshirilishini taʼminlash;

shartnomaga muvofiq belgilangan muddat va shartlar asosida autsorserga koʻrsatilgan xizmatlar uchun toʻlovlarni amalga oshirishni taʼminlash.

Buyurtmachi zimmasiga qonunchilik hujjatlari va shartnomaga muvofiq boshqa majburiyatlar ham yuklanishi mumkin.

4-bob. Autsorsing xizmati koʻrsatilishi yuzasidan nazorat va monitoringni amalga oshirish

18. Autsorsing xizmati koʻrsatilishi yuzasidan nazorat va monitoring buyurtmachi tomonidan shartnomada belgilangan shartlarda va muddatlarda amalga oshiriladi.

19. Autsorsing xizmati koʻrsatilishi yuzasidan monitoring buyurtmachining tegishli tarkibiy boʻlinmasi rahbari tomonidan amalga oshiriladi.

20. Buyurtmachining tegishli tarkibiy boʻlinmasi rahbari:

autsorsing xizmati koʻrsatilishi yuzasidan doimiy monitoringni amalga oshiradi;

monitoring natijalaridan kelib chiqib, buyurtmachi va autsorserga tegishli taklif va tavsiyalar kiritadi.

5-bob. Yakunlovchi qoidalar

21. Ushbu Nizomda nazarda tutilgan talablarning buzilishi buyurtmachi va autsorser oʻrtasida tuzilgan shartnomaning belgilangan tartibda bekor qilinishiga asos boʻladi.

22. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 26-mart,

185-son

(Qonunchilik maʼlumotlari milliy bazasi, 29.03.2025-y., 09/25/185/0284-son)

lex.uz