📅 2025-yil 2-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 2 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 2 апреля 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 2 April 2025 · Cabinet of Ministers resolutions
Official text. Official document. Editorial notes are not included.
ЎЗБЕКИСТОН РЕСПУБЛИКАСИ ВАЗИРЛАР МАҲКАМАСИНИНГ
ҚАРОРИ
НИЗОМ
ҚОИДАЛАРИ
РЎЙХАТИ
Автомобиль транспортида йўловчи ташиш фаолиятини тартибга солиш бўйича қўшимча чора-тадбирлар тўғрисида
Автомобиль транспортида йўловчи ташиш фаолиятини тартибга солиш ва лицензиялаш тартиб-таомилларини такомиллаштириш, аҳолига бу борада қўшимча қулайликлар яратиш, шунингдек, мазкур йўналишда кўрсатилаётган хизматлар сифатини, рақамлаштириш даражасини, йўловчи ташиш хавфсизлиги ҳамда аҳоли бандлигини янада ошириш мақсадида Вазирлар Маҳкамаси қарор қилади:
1. Қуйидагилар:
а) Ўзбекистон Республикаси Президентининг «Хизматлар соҳаси барқарор ривожланиши учун қулай шарт-шароитлар яратишга оид қўшимча чора-тадбирлар тўғрисида» 2025 йил 27 февралдаги ПҚ-78-сон қарорига мувофиқ енгил автотранспорт воситасида йўловчиларни шаҳар, шаҳар атрофи ва шаҳарлараро ташиш фаолияти ўзини ўзи банд қилган шахслар лицензия варақасига асосан шуғулланиши мумкин бўлган фаолият (ишлар, хизматлар) турлари рўйхатига киритилганлиги;
б) Вазирлар Маҳкамасининг «Ўзбекистон Республикасида электрон тижорат соҳасини янада ривожлантириш чора-тадбирлари тўғрисида» 2024 йил 26 декабрдаги 885-сон қарорига мувофиқ 2025 йил 1 июлдан бошлаб:
электрон тижорат операторлари, шу жумладан, ташувчиларга мижозларни излаш бўйича хизмат кўрсатувчи агрегаторлар фаолиятини амалга ошириши учун хабардор қилиш тартиби жорий қилиниши;
электрон тижорат субъектлари реестри Ўзбекистон Республикаси Истиқболли лойиҳалар миллий агентлиги томонидан юритилиши;
электрон тижорат операторлари фаолиятини хабардор қилиш тартибида амалга ошириш учун талаб ва шартлар белгиланганлиги маълумот учун қабул қилинсин.
2. Ташувчиларга мижозларни излаш бўйича хизмат кўрсатувчи агрегаторлар фаолияти учун қуйидаги қўшимча талаб ва шартлар белгилансин:
хизматларни фақат тегишли лицензия варақасига эга бўлган ташувчиларга кўрсатиш ва буюртмаларни ташувчининг лицензия варақасида кўрсатилган ҳамда унга туташ ҳудудларда (Қорақалпоғистон Республикаси, вилоятлар ва Тошкент шаҳри) қабул қилинишини таъминлаш;
электрон фискал чек маълумотларини шакллантириш бўйича солиқ органларининг ахборот тизимлари билан интеграция қилинган электрон платформага эга бўлиш;
агрегаторлар ахборот тизимларини Транспорт вазирлиги ҳамда Истиқболли лойиҳалар миллий агентлигининг тегишли ахборот тизимларига интеграция қилиш.
Ушбу банддаги талаб ва шартлар Вазирлар Маҳкамасининг «Транспорт хизматларидан фойдаланиш имкониятларини кенгайтириш орқали кўриш ва ҳаракатланиш билан боғлиқ касалликларга чалинган алоҳида таълим эҳтиёжлари бўлган болалар учун таълим олиш шароитларини яхшилаш тўғрисида» 2025 йил 28 февралдаги 132-сон қарорига мувофиқ жорий этилган агрегаторларнинг ижтимоий аҳамиятга эга транспорт хизматини кўрсатиш фаолиятига нисбатан татбиқ этилмайди.
3. Юридик шахсларга тегишли йўналишсиз таксиларга:
йўловчиларни олиш ва тушириш мақсадида «Тўхташ тақиқланган» йўл белгиси амал қилиш ҳудудида, шу жумладан, аэропорт ва вокзалларга туташ ҳудудларда тўхташ;
аэропортлар, темир йўл вокзаллари, автовокзаллар, устав фондида (устав капиталида) давлат улуши 50 фоиз ва ундан ортиқ бўлган қурилиш моллари, деҳқон ва буюм бозорлари ҳамда савдо мажмуаларининг пулли тўхташ жойларига йўловчиларни олиш ва тушириш учун бепул кириш;
йўналишли транспорт воситалари учун ажратилган махсус ҳаракатланиш йўлаги бўйлаб ҳаракатланиш ҳуқуқи берилсин.
4. Қуйидагилар:
Йўналишсиз такси фаолиятини тартибга солиш тўғрисидаги низом 1-иловага мувофиқ;
Автомобиль транспортида йўловчиларни буюртма асосида ташиш қоидалари 2-иловага мувофиқ тасдиқлансин.
5. Белгилансинки, ўзини ўзи банд қилган шахсларнинг солиқ даврида ишларни бажаришдан (хизматлар кўрсатишдан) олган даромадлари юз миллион сўмдан ошганда, улар тўлаши лозим бўлган солиқлар солиқ органларининг юридик шахсларга юборилган хабарномаси асосида юридик шахслар (солиқ агенти) томонидан тўлов манбаида ушлаб қолинади.
6. Транспорт вазирлиги Ички ишлар вазирлиги билан биргаликда тўрт ой муддатда мазкур қарор талабларидан келиб чиқиб, енгил автомобиль транспортида йўловчи ташишда лицензия талаб ва шартларини биринчи марта бузганлик учун алоҳида жавобгарликни ҳамда давлат божи миқдорларини белгилаш бўйича қонун лойиҳасини Вазирлар Маҳкамасига киритсин.
7. Адлия вазирлиги тўрт ой муддатда буюртмалар агрегатори операторлари томонидан:
лицензия варақасида кўрсатилган ҳудуддан ташқарида хизмат кўрсатилганлиги учун;
лицензияси ёхуд рухсат этиш хусусиятига эга ҳужжати мавжуд бўлмаган ҳолда ташувчилик фаолияти билан шуғулланган шахсларнинг йўловчи ташиш фаолияти давомида йўловчининг ҳаёти, соғлиғи ва (ёки) мол-мулкига зарар етказилган тақдирда, етказилган зарарни агрегатор билан биргаликда (субсидиар) жавобгар бўлишини белгилаш бўйича қонун лойиҳасини Вазирлар Маҳкамасига киритсин.
8. 2025 йил 15 апрелдан 2026 йил якунига қадар эксперимент тариқасида Тошкент шаҳрида турлари Транспорт вазирлиги томонидан тасдиқланадиган, ҳайдовчидан ташқари тўрттадан ортиқ ва саккизтадан кўп бўлмаган ўриндиқларга ҳамда юқори қулайликларга эга автотранспорт воситаларида ўзини ўзи банд қилган шахслар томонидан йўналишсиз такси фаолиятини амалга оширишга рухсат этилсин. Бунда ўзини ўзи банд қилган ташувчиларга лицензия варақаси берилганлиги учун давлат божи йилига базавий ҳисоблаш миқдорининг уч баробари миқдорида ундирилади.
9. Транспорт вазирлиги:
икки ҳафта муддатда ўзини ўзи банд қилган шахслар томонидан йўловчиларни ташишда фойдаланиладиган ҳайдовчидан ташқари тўрттадан ортиқ ва саккизтадан кўп бўлмаган ўриндиқларга ҳамда юқори қулайликларга эга автотранспорт воситалари турларини тасдиқлаб, ўзининг расмий веб саҳифасига жойлаштирилишини таъминласин;
Ички ишлар вазирлиги билан биргаликда 2026 йил 1 октябрга қадар мазкур қарорнинг 8-бандига асосан амалга оширилган эксперимент натижаларига кўра йўловчиларни автомобиль транспортида ташиш соҳасини янада такомиллаштириш бўйича Вазирлар Маҳкамасига таклиф киритсин.
10. Вазирлар Маҳкамасининг 2019 йил 30 июлдаги 636-сон қарори билан тасдиқланган Автомобиль транспортида йўловчиларни шаҳарда, шаҳар атрофида, шаҳарлараро, халқаро, шунингдек, юкларни халқаро йўналишлар бўйича ташиш фаолиятини лицензиялаш юзасидан давлат хизматлари кўрсатишнинг маъмурий регламентига 3-иловага мувофиқ ўзгартириш ва қўшимчалар киритилсин.
11. Ўзбекистон Республикаси Ҳукуматининг 4-иловага мувофиқ айрим қарорлари ўз кучини йўқотган деб ҳисоблансин.
12. Транспорт вазирлиги Ички ишлар вазирлиги ҳамда Ўзбекистон Миллий ахборот агентлиги билан биргаликда мазкур қарорнинг мазмун ва моҳияти оммавий ахборот воситаларида кенг ёритилишини таъминласин.
13. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов, транспорт вазири И.Р. Махкамов ҳамда ички ишлар вазири А.А. Ташпулатов зиммасига юклансин.
Вазирлар Маҳкамасининг 2025 йил 2 апрелдаги 200-сон қарорига 1-ИЛОВА
Йўналишсиз такси фаолиятини тартибга солиш тўғрисида
1-боб. Умумий қоидалар
1. Мазкур Низом енгил автомобиль транспортида йўналишсиз такси фаолиятини ташкил этиш тартибини белгилайди.
2. Йўналишсиз такси фаолияти юридик ва жисмоний шахслар (ўзини ўзи банд қилган шахслар) томонидан амалга оширилади.
Ушбу Низом йўналишли таксиларга нисбатан татбиқ этилмайди.
3. Мазкур Низомда қуйидаги тушунчалар қўлланилади:
агрегатор — йўловчи ташувчиларга мижозларни излаш бўйича интерактив хизматларни кўрсатувчи юридик шахс;
йўналишсиз такси — йўловчиларнинг буюртманомаларига кўра йўловчиларни ва уларнинг багажини ташиш учун ҳақ эвазига хизматлар кўрсатадиган, ҳайдовчидан ташқари тўрттадан ортиқ бўлмаган ўриндиқларга ҳамда лицензия варақасига эга бўлган енгил автотранспорт воситаси;
йўналишсиз таксиларнинг махсус жиҳозланган тўхташ жойи — маълумотлар кўрсаткичлари билан жиҳозланган, тегишли йўл белгилари қўйилган ҳамда йўловчиларни ўтқазиш (тушириш) ва йўналишсиз таксиларнинг тўхтаб туриши учун мўлжалланган, кўчаларнинг йўловчи юрмайдиган қисмидаги махсус майдонча;
лицензия варақаси — лицензия талаблари ва шартларига мажбурий риоя қилинган ҳолда, йўловчиларни ташишда фойдаланиладиган ҳар бир автотранспорт воситасига лицензияланадиган фаолият турини амалга ошириш учун бериладиган рухсатнома (лицензия);
ҳайдовчи — автотранспорт воситасини бошқарувчи шахс.
2-боб. Ягона таниш белгилари
4. Ташқи ва ички маълумотлар билан жиҳозлаш белгилари йўналишсиз таксилар учун ягона таниш белгилари ҳисобланади.
5. Ягона таниш белгилари транспорт оқимида автотранспорт воситасининг ажралиб туришини ва танилишини таъминлаш учун мўлжалланган ҳамда улар йўналишсиз таксиларда йўловчиларни ташийдиган барча ташувчилар учун мажбурий ҳисобланади.
6. Йўналишсиз таксиларни ташқи маълумотлар билан жиҳозлаш қуйидагиларни ўз ичига олади:
автотранспорт воситасининг тепасига ушбу Низомга 1-иловага мувофиқ ўрнатиладиган «TAXI» таниш белгисини ўрнатиш;
юридик шахсларга тегишли йўналишсиз таксилар учун мўлжалланган махсус сериядаги автотранспорт воситасининг давлат рақами белгиси, шунингдек, мазкур Низомга 2-иловага мувофиқ йўналишсиз таксиларнинг олд ва орқа эшикларига чизиладиган қора квадратлар ҳамда композиция туширилганлиги (ёпиштирилганлиги).
7. Юридик шахс номи, манзили, ўзини ўзи банд қилган ташувчи ёки ҳайдовчининг фамилияси, исми, отасининг исми, фотосурати, фаолият ҳудуди, телефон рақами, автотранспорт воситасининг давлат рақами белгиси, ишлаб чиқарилган йили ҳамда лицензия варақаси ҳақидаги (рақами ва амал қилиш муддати) маълумотларни ўз ичига олган ушбу Низомга 3-иловага мувофиқ шаклдаги такси паспорти йўналишсиз таксиларни ички маълумотлар билан жиҳозлаш белгилари ҳисобланади.
Такси паспорти автотранспорт воситаси ичида йўловчилар бемалол ўқий оладиган ҳолатда ўрнатилади.
Такси паспорти ўзини ўзи банд қилган шахсларга лицензия варақаси билан бирга бепул берилади.
3-боб. Йўналишсиз таксига қўйиладиган талаблар
8. Йўналишсиз такси сифатида фойдаланиладиган ҳар бир автотранспорт воситаси техник жиҳатдан соз ҳолатда бўлиши ва Автомобиль транспортида йўловчилар ва багажни ташиш қоидаларида белгиланган талабларга мувофиқ бўлиши, шунингдек, қуйидаги талабларга жавоб бериши керак:
ушбу Низомнинг 6 ва 7-бандларида белгиланган ягона таниш белгиларининг мавжуд бўлиши;
тўловларни агрегатор ёки бошқа электрон тўлов тизимлари орқали қабул қилиш имконияти яратилган бўлиши;
йўналишсиз такси техник ҳолати ва жиҳозларининг йўл ҳаракати хавфсизлигини таъминлаш бўйича қонунчилик ҳужжатлари талабларига мувофиқ бўлиши;
шаҳар йўналишларида автотранспорт воситасининг эксплуатацияси 15 йилдан ортиқ бўлмаслиги;
ташувчининг фуқаролик жавобгарлигини мажбурий суғуртаси мавжуд бўлиши;
таксометр функцияларини таъминлайдиган махсус иловага эга мосламалар (шу жумладан, уяли телефонлар, планшетлар) билан таъминланган бўлиши.
Вагон типидаги («Дамас» ва шу типдаги) автотранспорт воситаларида йўналишсиз такси сифатида йўловчи ташиш фаолияти билан шуғулланиш тақиқланади.
9. Жисмоний ва юридик шахсларга тегишли йўналишсиз таксилар сифатида фойдаланиладиган ҳамда ягона таниш белгилари билан жиҳозланган автотранспорт воситаларида йўловчиларни олиш ва тушириш мақсадида «Тўхташ тақиқланган» йўл белгиси амал қилиш ҳудудида йўловчиларни тушириш-чиқаришга (юкларни ортиш-туширишга) рухсат этилади.
Юридик шахсларга тегишли йўналишсиз таксилар сифатида фойдаланиладиган ҳамда ягона таниш белгилари билан жиҳозланган автотранспорт воситаларига:
йўловчиларни олиш ва тушириш мақсадида «Тўхташ тақиқланган» йўл белгиси амал қилиш ҳудудида, шу жумладан, аэропорт ва вокзалларга туташ ҳудудларда тўхташ;
аэропортлар, темир йўл вокзаллари, автовокзаллар, устав фондида (устав капиталида) давлат улуши 50 фоиз ва ундан ортиқ бўлган қурилиш моллари, деҳқон ва буюм бозорлари ҳамда савдо мажмуаларининг пулли тўхташ жойларига йўловчиларни олиш ва тушириш учун бепул кириш;
йўналишли транспорт воситалари учун ажратилган махсус ҳаракатланиш йўлаги бўйлаб ҳаракатланиш ҳуқуқи берилади.
Мазкур банд ушбу Низомнинг 6 ва 7-бандларида белгиланган ягона таниш белгилари билан жиҳозланмаган, йўловчиларни буюртма асосида ташишда фойдаланиладиган ҳамда лицензия варақасига эга бўлмаган енгил автотранспорт воситаларига нисбатан татбиқ этилмайди.
4-боб. Йўналишсиз таксилар ҳайдовчиларига қўйиладиган талаблар
10. Йўловчилар ташиш учун мўлжалланган йўналишсиз таксиларни бошқаришга ҳайдовчилик гувоҳномасида «B» тоифаси бўлган, 21 ёшга тўлган, тиббий кўрикдан ўтган ва камида уч йиллик ҳайдовчилик стажига эга ҳамда Ўзбекистон Республикаси фуқароси бўлган шахслар қўйилади.
11. Ҳайдовчи фаолиятини меҳнат ва дам олиш режимига риоя этган ҳолда амалга оширади.
12. Амалга оширилиши учун лицензия берилган фаолият тури билан фақат шу лицензияни олган жисмоний ёки юридик шахс шуғулланиши мумкин. Лицензияларни ёки уларга доир ҳуқуқларни бошқа шахсларга бериш тақиқланади.
13. Юридик шахсларга тегишли йўналишсиз таксиларнинг ҳайдовчилари ишлаётганда тегишли лицензия варақасига ҳамда йўлга чиқишдан олдин автотранспорт воситасининг белгиланган тартибда техник кўрикдан ва ҳайдовчиларнинг тиббий кўрикдан ўтказилганлиги тўғрисида йўл варақасига эга бўлиши шарт.
Ўзини ўзи банд қилган шахслар:
ўз автотранспорт воситасини бир йилда бир маротаба техник кўрикдан ўтказиши;
бир йилда бир маротаба тиббий кўрикдан ўтиши ва тиббий кўрикдан ўтганлиги тўғрисидаги маълумотномага эга бўлиши шарт.
14. Ҳайдовчи фаолиятини лицензия варақасида кўрсатилган ҳудудда ва унга туташ ҳудудда амалга ошириши мумкин.
Бунда лицензия варақасида кўрсатилган ҳудуд автотранспорт воситасига берилган давлат рақами белгиларининг ҳудудий кодларидан келиб чиқиб аниқланади.
15. Йўналишсиз таксида мунтазам йўналишларда фаолият юритувчи жамоат транспортининг йўналиш схемаларига мувофиқ (мунтазам йўналишларда) ёки трафарет қўйган ҳолда йўловчи ташиши тақиқланади.
16. Йўналишсиз такси ҳайдовчисининг белгиланган талабларга номувофиқлиги аниқланган ҳолларда ҳайдовчига нисбатан қонунчиликда назарда тутилган чоралар қўлланилади.
5-боб. Йўналишсиз таксиларда йўловчилар ва багажни ташиш
17. Йўналишсиз таксиларга йўловчилар уларнинг талабига кўра Йўл ҳаракати қоидаларига риоя қилган ҳолда чиқарилади ва туширилади.
18. Йўналишсиз таксиларнинг йўловчилар ҳамда багажни ташиш тарифлари миқдори автотранспорт воситалари турлари ва хизматларига қараб белгиланади.
19. Йўл ҳақи йўловчи томонидан сафар тугагандан кейин ва багаж туширилгандан кейин у билан келган йўловчилар ҳамда ташиб келтирилган багаж сонидан қатъи назар, тўловни амалга ошириш имкониятини берувчи, шунингдек, таксометр функцияларини таъминлайдиган махсус иловага эга мосламалар (шу жумладан, уяли телефонлар, планшетлар) кўрсаткичи бўйича тўланади. Бунда хизмат кўрсатилганлиги учун тўлов ташувчи ёки агрегатор томонидан белгиланган қоидаларга мувофиқ хизмат кўрсатиш тугагунга қадар қисмларга бўлиб амалга оширилиши мумкин.
Ҳайдовчи билан ҳисоб-китоб нақд пул, ҳисоб-китоб терминалидан фойдаланган ҳолда банк пластик карталари ёхуд электрон тўлов воситаси ёрдамида амалга оширилади.
Йўналишсиз такси бир неча йўловчилар (навбатда турган биринчи йўловчининг розилиги билан) томонидан тўхташ жойида ёлланган ёки таксини ёллаган йўловчи розилиги билан йўли бир бўлган йўловчи чиқарилган тақдирда, йўл ҳақи тўловининг умумий суммаси йўловчилар ўртасида ҳар бир йўловчининг босиб ўтган масофасига мутаносиб равишда тақсимланади.
20. Йўналишсиз таксига йўловчиларни чиқаришда ҳайдовчи уларнинг буюмлари ва багажини жойлаштиришга ҳамда сафар тугаганда уларни туширишга ёрдамлашиши лозим.
21. Йўналишсиз такси томонларнинг ўзаро келишувига ёки таксометр функцияларини таъминлайдиган махсус иловага эга мосламалар (шу жумладан, уяли телефонлар, планшетлар) кўрсаткичига кўра алоҳида тўлов эвазига йўловчининг буюртмасига биноан кутиб туради.
22. Йўналишсиз таксиларнинг салонида автомобиль эшиги орқали бемалол сиғадиган, салон қопламасини ҳамда унинг ускуналарини бузмайдиган ва ифлос қилмайдиган, ҳайдовчининг автомобилни бошқаришига ҳамда орқани кўриш кўзгусидан фойдаланишига халақит бермайдиган буюмлар ва ашёларни ташишига рухсат берилади.
Мушуклар, итларни тизгин ва тўшаги мавжуд бўлганда тумшуқбоғларда, кичик жониворларни саватларда, сумкаларда ҳамда қушларни қафасларда ташишга рухсат берилади.
23. Йўналишсиз таксиларда багаж ташиганлик учун ҳақ олинмайди.
6-боб. Йўналишсиз таксиларда йўловчиларни ташиш бўйича назорат
24. Юридик ва жисмоний шахсларга йўналишсиз таксиларда йўловчиларни ташиш бўйича фаолиятни амалга ошириш учун лицензия варақалари Ўзбекистон Республикаси Транспорт вазирлиги томонидан берилади.
Юридик ва жисмоний шахслар (лицензиатлар) томонидан белгиланган лицензия талаб ва шартларига риоя этилиши юзасидан назорат Ўзбекистон Республикаси Транспорт вазирлиги ҳузуридаги Транспорт назорати инспекцияси томонидан амалга оширилади.
25. Ўзбекистон Республикаси Ички ишлар вазирлиги ушбу Низом талабларига риоя этилишини:
йўналишсиз таксилар учун мўлжалланган бошқа енгил автомобиллардан фарқланувчи давлат рақами белгиси ажратилиши юзасидан;
йўналишсиз таксиларда йўналишсиз таксилар учун ягона таниш белгилари билан жиҳозланганлиги юзасидан;
йўналишсиз такси техник ҳолати ва жиҳозларининг йўл ҳаракати хавфсизлигини таъминлаш бўйича норматив-ҳуқуқий ҳужжатлар талабларига мувофиқлиги юзасидан;
йўловчилар ташиш учун мўлжалланган йўналишсиз таксиларни бошқаришга ҳайдовчилик гувоҳномасида «В» рухсат белгиси бўлган, 21 ёшга тўлган, тиббий кўрикдан ўтган ва камида уч йиллик ҳайдовчилик стажига эга бўлган шахсларнинг қўйилиши юзасидан назорат қилади.
26. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари йўналишсиз таксиларнинг махсус жиҳозланган тўхташ жойларини қуриш (барпо этиш) бўйича ушбу Низом талабларига риоя этилишини назорат қиладилар.
27. Мазкур Низом талабларига риоя этилишини назорат қилиш бўйича ишлар Ўзбекистон Республикаси Транспорт вазирлиги томонидан умумий мувофиқлаштириб борилади.
7-боб. Якунловчи қоидалар
29. Ушбу Низомни қўллашда юзага келадиган низолар қонунчиликда белгиланган тартибда ҳал этилади.
30. Мазкур Низом талабларининг бузилишида айбдор бўлган шахслар қонунчилик ҳужжатларига мувофиқ жавоб берадилар.
Йўналишсиз такси фаолиятини тартибга солиш тўғрисидаги низомга 1-ИЛОВА
«TAХI» таниш белгисининг тасвири
Йўналишсиз такси фаолиятини тартибга солиш тўғрисидаги низомга 2-ИЛОВА
Йўналишсиз таксиларнинг олд ва орқа эшикларига чизиладиган қора квадратлар ҳамда композициянинг тасвири ва ўлчамлари (см)
Йўналишсиз такси фаолиятини тартибга солиш тўғрисидаги низомга 3-ИЛОВА
ТАКСИ ПАСПОРТИ
Вазирлар Маҳкамасининг 2025 йил 2 апрелдаги 200-сон қарорига 2-ИЛОВА
Автомобиль транспортида йўловчиларни буюртма асосида ташиш
1-боб. Умумий қоидалар
1. Мазкур Қоидалар йўловчиларни буюртма асосида (тўй, туристик йўналишларда, шартнома асосида, оммавий ва бошқа тадбирларда) енгил автотранспорт воситаларида (кейинги ўринларда — автотранспорт воситалари) ташиш тартибини белгилайди.
2. Автотранспорт воситаларида йўловчиларни буюртма асосида ташиш фақат юридик шахслар томонидан амалга оширилади.
3. Мазкур Қоидалар йўналишсиз ҳамда йўналишли таксиларга нисбатан татбиқ этилмайди.
4. Автотранспорт воситаларида йўловчиларни буюртма асосида ташиш шаҳар, шаҳар атрофида ва шаҳарлараро йўналишларда амалга оширилади.
5. Йўловчиларни талабига кўра автотранспорт воситаларига чиқариш ва тушириш Йўл ҳаракати қоидаларига риоя қилган ҳолда амалга оширилади.
6. Автотранспорт воситаларида йўловчиларни буюртма асосида ташиш мижоз билан ташувчи ўртасида тузилган шартнома асосида ёки томонларнинг ўзаро келишувига кўра амалга оширилади.
7. Томонларнинг келишувига кўра автотранспорт воситаларига қўшимча талаблар ҳамда бошқа талаблар ҳам белгиланиши мумкин.
8. Ҳайдовчи йўловчиларга хизмат кўрсатиш вақтида уларнинг буюмлари ва багажини жойлаштиришга ҳамда сафар тугаганда уларни туширишга ёрдамлашиши лозим.
9. Автотранспорт воситаларининг салонида автомобиль эшиги орқали бемалол сиғадиган, салон қопламасини ҳамда унинг ускуналарини бузмайдиган ва ифлос қилмайдиган, ҳайдовчининг автомобилни бошқаришига ҳамда орқани кўриш кўзгусидан фойдаланишига халақит бермайдиган буюмлар ва ашёларни ташишига рухсат берилади.
10. Буюртма асосида фаолият юритувчи автотранспорт воситаларидан йўналишсиз такси сифатида фойдаланиш тақиқланади. Бу ҳолат фаолиятни лицензиясиз амалга оширганликка тенглаштирилади.
11. Мушуклар, итларни тизгин ва тўшаги мавжуд бўлганда тумшуқбоғларда, кичик жониворларни саватларда, сумкаларда ҳамда қушларни қафасларда ташишга рухсат берилади.
2-боб. Буюртма асосида фаолият юритувчи автотранспорт воситаларига қўйиладиган талаблар
12. Буюртма асосида фаолият юритувчи автотранспорт воситалари техник жиҳатдан соз ҳолатда бўлиши ҳамда қонунчилик ҳужжатларида белгиланган тартибда техник кўрикдан ўтган бўлиши лозим.
13. Буюртма асосида фаолият юритувчи автотранспорт воситалари юқори классда бўлиши лозим.
Вагон типидаги («Дамас» ва шу типдаги) автотранспорт воситаларига буюртма асосида йўловчи ташиш фаолияти билан шуғулланиш тақиқланади.
14. Буюртма асосида автотранспорт воситаларида ташиш хизматларини кўрсатишда аэропортлар, темир йўл вокзаллари, автовокзаллар, устав фондида (устав капиталида) давлат улуши 50 фоиз ва ундан ортиқ бўлган қурилиш моллари, деҳқон ва буюм бозорлари ҳамда савдо мажмуаларининг пулли тўхташ жойларига йўловчиларни олиш ва тушириш учун бепул киришга рухсат берилади.
15. Ўзбекистон Республикаси Транспорт вазирлиги томонидан буюртма асосида фаолият юритувчи автотранспорт воситаларининг турлари ҳамда ишлаб чиқилган йили бўйича рўйхат шакллантирилади ҳамда вазирликнинг расмий веб-сайтида жойлаштирилиб, мунтазам равишда янгилаб борилади.
16. Буюртма асосида фаолият юритувчи автотранспорт воситалари мунтазам йўналишларда фаолият юритувчи жамоат транспортининг йўналиш схемаларига мувофиқ (мунтазам йўналишларда) ёки трафарет қўйган ҳолда ҳамда йўналишсиз такси сифатида фаолият юритиши тақиқланади.
3-боб. Буюртма асосида фаолият юритувчи автотранспорт воситалари ҳайдовчиларига қўйиладиган талаблар
17. Буюртма асосида фаолият юритувчи автотранспорт воситаларини бошқаришга ҳайдовчилик гувоҳномасида «B» тоифаси бўлган, 21 ёшга тўлган, тиббий кўрикдан ўтган ва камида уч йиллик ҳайдовчилик стажига эга ҳамда Ўзбекистон Республикаси фуқароси бўлган шахсларга рухсат берилади.
Ҳайдовчилар меҳнат ва дам олиш режимига риоя этган ҳолда фаолиятини амалга оширади.
18. Буюртма асосида фаолият юритувчи автотранспорт воситаларининг ҳайдовчилари йўлга чиқишдан олдин автотранспорт воситасининг белгиланган тартибда техник кўрикдан ва ҳайдовчиларнинг тиббий кўрикдан ўтказилганлиги тўғрисида йўл варақасига эга бўлиши керак.
19. Буюртма асосида фаолият юритувчи автотранспорт воситалари ҳайдовчисининг белгиланган талабларга номувофиқлиги аниқланган ҳолларда унга нисбатан қонунчиликда назарда тутилган чоралар қўлланилади.
4-боб. Автотранспорт воситаларида йўловчиларни буюртма асосида ташиш бўйича назорат
20. Автотранспорт воситаларида йўловчиларни буюртма асосида ташувчи юридик шахсларга йўловчиларни ташиш бўйича фаолиятни амалга ошириш учун «буюртма асосида» сўзлари акс эттирилган лицензия варақалари Ўзбекистон Республикаси Транспорт вазирлиги томонидан берилади.
Автотранспорт воситаларида йўловчиларни буюртма асосида ташувчи юридик шахслар (лицензиатлар) томонидан белгиланган лицензия талаб ва шартларига риоя этилиши юзасидан назорат Ўзбекистон Республикаси Транспорт вазирлиги ҳузуридаги Транспорт назорати инспекцияси томонидан амалга оширилади.
21. Ўзбекистон Республикаси Ички ишлар вазирлиги:
буюртма асосида фаолият юритувчи автотранспорт воситаларининг техник ҳолати ва жиҳозларининг йўл ҳаракати хавфсизлигини таъминлаш бўйича норматив-ҳуқуқий ҳужжатлар талабларига мувофиқлиги юзасидан;
буюртма асосида фаолият юритувчи автотранспорт воситаларини бошқаришга ҳайдовчилик гувоҳномасида «B» тоифаси бўлган, 21 ёшга тўлган, тиббий кўрикдан ўтган ва камида уч йиллик ҳайдовчилик стажига эга бўлган шахсларнинг қўйилиши юзасидан назорат қилади.
Вазирлар Маҳкамасининг 2025 йил 2 апрелдаги 200-сон қарорига 3-ИЛОВА
Вазирлар Маҳкамасининг 2019 йил 30 июлдаги 636-сон қарори билан тасдиқланган Автомобиль транспортида йўловчиларни шаҳарда, шаҳар атрофида, шаҳарлараро, халқаро, шунингдек, юкларни халқаро йўналишлар бўйича ташиш фаолиятини лицензиялаш юзасидан давлат хизматлари кўрсатишнинг маъмурий регламентига киритилаётган ўзгартириш ва қўшимчалар
1. 3-банднинг иккинчи хатбошиси қуйидаги мазмундаги жумла билан тўлдирилсин:
«Бунда йўловчиларни шаҳарда, шаҳар атрофида ва шаҳарлараро ташиш фаолияти ўзини ўзи банд қилган шахслар томонидан ҳам амалга оширилиши мумкин».
2. 9-банд қуйидаги мазмундаги хатбоши билан тўлдирилсин:
«Амалдаги лицензия варақасига эга автотранспорт воситасига бошқа бир юридик ёки жисмоний шахсларнинг аризасига мувофиқ лицензия варақалари берилиши тақиқланади».
3. 7-иловада :
а) 5-позициянинг учинчи устуни қуйидаги мазмундаги «в» кичик банд билан тўлдирилсин:
«в) ўзини ўзи банд қилган шахснинг бир йил ичида тиббий кўрикдан ўтганлиги тўғрисидаги маълумот»;
б) 7-позициянинг учинчи устуни 2-бандидаги жадвал қуйидаги мазмундаги позиция билан тўлдирилсин:
« ҳайдовчидан ташқари тўрттадан ортиқ бўлмаган ўриндиқларга эга бўлган енгил автотранспорт воситасида ўзини-ўзи банд қилган ҳолда йўловчиларни шаҳар, шаҳар атрофи ва шаҳарлараро ташиш БҲМнинг 1 баравари » ;
в) 8-позициянинг учинчи устуни қуйидаги мазмундаги хатбоши билан тўлдирилсин:
«Ўзини ўзи банд қилган шахслар учун 1 иш куни»;
г) 9-позициянинг учинчи устунида:
«к» кичик банд қуйидаги таҳрирда баён этилсин:
«к) йўналишсиз таксиларнинг ҳамда йўловчиларни буюртма асосида ташувчи енгил автотранспорт воситаларининг қонунчилик ҳужжатларида белгиланган талабларга мувофиқлиги»;
қуйидаги мазмундаги «м» ва «н» кичик бандлар билан тўлдирилсин:
«м) ўзини ўзи банд қилган ташувчилар ўз автотранспорт воситасини бир йилда бир маротаба техник кўрикдан ўтказиши ҳамда бир йилда бир маротаба тиббий кўрикдан ўтиши.
н) йўналишсиз таксиларнинг лицензия варақасида кўрсатилган ҳудудда ёки ёндош ҳудудда (Қорақалпоғистон Республикаси, вилоятлар ва Тошкент шаҳри) фаолият кўрсатиши»;
д) 12-позициянинг учинчи устуни қуйидаги мазмундаги хатбоши билан тўлдирилсин:
«Ўзини ўзи банд қилган шахслардан аризани кўриб чиқиш учун йиғим ундирилмайди».
Вазирлар Маҳкамасининг 2025 йил 2 апрелдаги 200-сон қарорига 4-ИЛОВА
Ўзбекистон Республикаси Ҳукуматининг ўз кучини йўқотган деб ҳисобланаётган айрим қарорлари
1. Вазирлар Маҳкамасининг «Йўналишсиз таксилар фаолиятини тартибга солиш чора-тадбирлари тўғрисида» 2011 йил 18 майдаги 139-сон қарори .
2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш ҳамда баъзиларини ўз кучини йўқотган деб ҳисоблаш тўғрисида («Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида» Ўзбекистон Республикасининг 2013 йил 30 апрелдаги ЎРҚ-352-сон Қонуни)» 2014 йил 3 мартдаги 45-сон қарорига 1-илованинг 29-банди .
3. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Транспорт соҳасида давлат бошқаруви тизимини тубдан такомиллаштириш чора-тадбирлари тўғрисида» 2019 йил 1 февралдаги ПФ-5647-сон Фармони ва Ўзбекистон Республикаси Президентининг «Юк ва йўловчи ташиш тизимини тубдан такомиллаштириш чора-тадбирлари тўғрисида» 2019 йил 6 мартдаги ПҚ-4230-сон қарори)» 2020 йил 8 майдаги 271-сон қарорига 1-илованинг 16-банди .
4. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикасининг «Норматив-ҳуқуқий ҳужжатлар тўғрисида» 2021 йил 20 апрелдаги ЎРҚ-682-сон Қонуни)» 2022 йил 4 апрелдаги 153-сон қарорига илованинг 263-банди .
5. Вазирлар Маҳкамасининг «Жамоат транспортини молиялаштиришнинг янги тизимини ташкил этиш чора-тадбирлари тўғрисида» 2023 йил 18 мартдаги 116-сон қарорига 3-илованинг 2-банди .
Ўзбекистон Республикасининг Бош вазири А. АРИПОВ
Тошкент ш.,
2025 йил 2 апрель,
200-сон
OʻZBEKISTON RESPUBLIKASI VAZIRLAR MAHKAMASINING
QARORI
NIZOM
QOIDALARI
ROʻYXATI
Avtomobil transportida yoʻlovchi tashish faoliyatini tartibga solish boʻyicha qoʻshimcha chora-tadbirlar toʻgʻrisida
Avtomobil transportida yoʻlovchi tashish faoliyatini tartibga solish va litsenziyalash tartib-taomillarini takomillashtirish, aholiga bu borada qoʻshimcha qulayliklar yaratish, shuningdek, mazkur yoʻnalishda koʻrsatilayotgan xizmatlar sifatini, raqamlashtirish darajasini, yoʻlovchi tashish xavfsizligi hamda aholi bandligini yanada oshirish maqsadida Vazirlar Mahkamasi qaror qiladi:
1. Quyidagilar:
a) Oʻzbekiston Respublikasi Prezidentining “Xizmatlar sohasi barqaror rivojlanishi uchun qulay shart-sharoitlar yaratishga oid qoʻshimcha chora-tadbirlar toʻgʻrisida” 2025-yil 27-fevraldagi PQ-78-son qaroriga muvofiq yengil avtotransport vositasida yoʻlovchilarni shahar, shahar atrofi va shaharlararo tashish faoliyati oʻzini oʻzi band qilgan shaxslar litsenziya varaqasiga asosan shugʻullanishi mumkin boʻlgan faoliyat (ishlar, xizmatlar) turlari roʻyxatiga kiritilganligi;
b) Vazirlar Mahkamasining “Oʻzbekiston Respublikasida elektron tijorat sohasini yanada rivojlantirish chora-tadbirlari toʻgʻrisida” 2024-yil 26-dekabrdagi 885-son qaroriga muvofiq 2025-yil 1-iyuldan boshlab:
elektron tijorat operatorlari, shu jumladan, tashuvchilarga mijozlarni izlash boʻyicha xizmat koʻrsatuvchi agregatorlar faoliyatini amalga oshirishi uchun xabardor qilish tartibi joriy qilinishi;
elektron tijorat subyektlari reyestri Oʻzbekiston Respublikasi Istiqbolli loyihalar milliy agentligi tomonidan yuritilishi;
elektron tijorat operatorlari faoliyatini xabardor qilish tartibida amalga oshirish uchun talab va shartlar belgilanganligi maʼlumot uchun qabul qilinsin.
2. Tashuvchilarga mijozlarni izlash boʻyicha xizmat koʻrsatuvchi agregatorlar faoliyati uchun quyidagi qoʻshimcha talab va shartlar belgilansin:
xizmatlarni faqat tegishli litsenziya varaqasiga ega boʻlgan tashuvchilarga koʻrsatish va buyurtmalarni tashuvchining litsenziya varaqasida koʻrsatilgan hamda unga tutash hududlarda (Qoraqalpogʻiston Respublikasi, viloyatlar va Toshkent shahri) qabul qilinishini taʼminlash;
elektron fiskal chek maʼlumotlarini shakllantirish boʻyicha soliq organlarining axborot tizimlari bilan integratsiya qilingan elektron platformaga ega boʻlish;
agregatorlar axborot tizimlarini Transport vazirligi hamda Istiqbolli loyihalar milliy agentligining tegishli axborot tizimlariga integratsiya qilish.
Ushbu banddagi talab va shartlar Vazirlar Mahkamasining “Transport xizmatlaridan foydalanish imkoniyatlarini kengaytirish orqali koʻrish va harakatlanish bilan bogʻliq kasalliklarga chalingan alohida taʼlim ehtiyojlari boʻlgan bolalar uchun taʼlim olish sharoitlarini yaxshilash toʻgʻrisida” 2025-yil 28-fevraldagi 132-son qaroriga muvofiq joriy etilgan agregatorlarning ijtimoiy ahamiyatga ega transport xizmatini koʻrsatish faoliyatiga nisbatan tatbiq etilmaydi.
3. Yuridik shaxslarga tegishli yoʻnalishsiz taksilarga:
yoʻlovchilarni olish va tushirish maqsadida “Toʻxtash taqiqlangan” yoʻl belgisi amal qilish hududida, shu jumladan, aeroport va vokzallarga tutash hududlarda toʻxtash;
aeroportlar, temir yoʻl vokzallari, avtovokzallar, ustav fondida (ustav kapitalida) davlat ulushi 50 foiz va undan ortiq boʻlgan qurilish mollari, dehqon va buyum bozorlari hamda savdo majmualarining pulli toʻxtash joylariga yoʻlovchilarni olish va tushirish uchun bepul kirish;
yoʻnalishli transport vositalari uchun ajratilgan maxsus harakatlanish yoʻlagi boʻylab harakatlanish huquqi berilsin.
4. Quyidagilar:
Yoʻnalishsiz taksi faoliyatini tartibga solish toʻgʻrisidagi nizom 1-ilovaga muvofiq;
Avtomobil transportida yoʻlovchilarni buyurtma asosida tashish qoidalari 2-ilovaga muvofiq tasdiqlansin.
5. Belgilansinki, oʻzini oʻzi band qilgan shaxslarning soliq davrida ishlarni bajarishdan (xizmatlar koʻrsatishdan) olgan daromadlari yuz million soʻmdan oshganda, ular toʻlashi lozim boʻlgan soliqlar soliq organlarining yuridik shaxslarga yuborilgan xabarnomasi asosida yuridik shaxslar (soliq agenti) tomonidan toʻlov manbaida ushlab qolinadi.
6. Transport vazirligi Ichki ishlar vazirligi bilan birgalikda toʻrt oy muddatda mazkur qaror talablaridan kelib chiqib, yengil avtomobil transportida yoʻlovchi tashishda litsenziya talab va shartlarini birinchi marta buzganlik uchun alohida javobgarlikni hamda davlat boji miqdorlarini belgilash boʻyicha qonun loyihasini Vazirlar Mahkamasiga kiritsin.
7. Adliya vazirligi toʻrt oy muddatda buyurtmalar agregatori operatorlari tomonidan:
litsenziya varaqasida koʻrsatilgan hududdan tashqarida xizmat koʻrsatilganligi uchun;
litsenziyasi yoxud ruxsat etish xususiyatiga ega hujjati mavjud boʻlmagan holda tashuvchilik faoliyati bilan shugʻullangan shaxslarning yoʻlovchi tashish faoliyati davomida yoʻlovchining hayoti, sogʻligʻi va (yoki) mol-mulkiga zarar yetkazilgan taqdirda, yetkazilgan zararni agregator bilan birgalikda (subsidiar) javobgar boʻlishini belgilash boʻyicha qonun loyihasini Vazirlar Mahkamasiga kiritsin.
8. 2025-yil 15-apreldan 2026-yil yakuniga qadar eksperiment tariqasida Toshkent shahrida turlari Transport vazirligi tomonidan tasdiqlanadigan, haydovchidan tashqari toʻrttadan ortiq va sakkiztadan koʻp boʻlmagan oʻrindiqlarga hamda yuqori qulayliklarga ega avtotransport vositalarida oʻzini oʻzi band qilgan shaxslar tomonidan yoʻnalishsiz taksi faoliyatini amalga oshirishga ruxsat etilsin. Bunda oʻzini oʻzi band qilgan tashuvchilarga litsenziya varaqasi berilganligi uchun davlat boji yiliga bazaviy hisoblash miqdorining uch barobari miqdorida undiriladi.
9. Transport vazirligi:
ikki hafta muddatda oʻzini oʻzi band qilgan shaxslar tomonidan yoʻlovchilarni tashishda foydalaniladigan haydovchidan tashqari toʻrttadan ortiq va sakkiztadan koʻp boʻlmagan oʻrindiqlarga hamda yuqori qulayliklarga ega avtotransport vositalari turlarini tasdiqlab, oʻzining rasmiy veb sahifasiga joylashtirilishini taʼminlasin;
Ichki ishlar vazirligi bilan birgalikda 2026-yil 1-oktabrga qadar mazkur qarorning 8-bandiga asosan amalga oshirilgan eksperiment natijalariga koʻra yoʻlovchilarni avtomobil transportida tashish sohasini yanada takomillashtirish boʻyicha Vazirlar Mahkamasiga taklif kiritsin.
10. Vazirlar Mahkamasining 2019-yil 30-iyuldagi 636-son qarori bilan tasdiqlangan Avtomobil transportida yoʻlovchilarni shaharda, shahar atrofida, shaharlararo, xalqaro, shuningdek, yuklarni xalqaro yoʻnalishlar boʻyicha tashish faoliyatini litsenziyalash yuzasidan davlat xizmatlari koʻrsatishning maʼmuriy reglamentiga 3-ilovaga muvofiq oʻzgartirish va qoʻshimchalar kiritilsin.
11. Oʻzbekiston Respublikasi Hukumatining 4-ilovaga muvofiq ayrim qarorlari oʻz kuchini yoʻqotgan deb hisoblansin.
12. Transport vazirligi Ichki ishlar vazirligi hamda Oʻzbekiston Milliy axborot agentligi bilan birgalikda mazkur qarorning mazmun va mohiyati ommaviy axborot vositalarida keng yoritilishini taʼminlasin.
13. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov, transport vaziri I.R. Maxkamov hamda ichki ishlar vaziri A.A. Tashpulatov zimmasiga yuklansin.
Vazirlar Mahkamasining 2025-yil 2-apreldagi 200-son qaroriga 1-ILOVA
Yoʻnalishsiz taksi faoliyatini tartibga solish toʻgʻrisida
1-bob. Umumiy qoidalar
1. Mazkur Nizom yengil avtomobil transportida yoʻnalishsiz taksi faoliyatini tashkil etish tartibini belgilaydi.
2. Yoʻnalishsiz taksi faoliyati yuridik va jismoniy shaxslar (oʻzini oʻzi band qilgan shaxslar) tomonidan amalga oshiriladi.
Ushbu Nizom yoʻnalishli taksilarga nisbatan tatbiq etilmaydi.
3. Mazkur Nizomda quyidagi tushunchalar qoʻllaniladi:
agregator — yoʻlovchi tashuvchilarga mijozlarni izlash boʻyicha interaktiv xizmatlarni koʻrsatuvchi yuridik shaxs;
yoʻnalishsiz taksi — yoʻlovchilarning buyurtmanomalariga koʻra yoʻlovchilarni va ularning bagajini tashish uchun haq evaziga xizmatlar koʻrsatadigan, haydovchidan tashqari toʻrttadan ortiq boʻlmagan oʻrindiqlarga hamda litsenziya varaqasiga ega boʻlgan yengil avtotransport vositasi;
yoʻnalishsiz taksilarning maxsus jihozlangan toʻxtash joyi — maʼlumotlar koʻrsatkichlari bilan jihozlangan, tegishli yoʻl belgilari qoʻyilgan hamda yoʻlovchilarni oʻtqazish (tushirish) va yoʻnalishsiz taksilarning toʻxtab turishi uchun moʻljallangan, koʻchalarning yoʻlovchi yurmaydigan qismidagi maxsus maydoncha;
litsenziya varaqasi — litsenziya talablari va shartlariga majburiy rioya qilingan holda, yoʻlovchilarni tashishda foydalaniladigan har bir avtotransport vositasiga litsenziyalanadigan faoliyat turini amalga oshirish uchun beriladigan ruxsatnoma (litsenziya);
haydovchi — avtotransport vositasini boshqaruvchi shaxs.
2-bob. Yagona tanish belgilari
4. Tashqi va ichki maʼlumotlar bilan jihozlash belgilari yoʻnalishsiz taksilar uchun yagona tanish belgilari hisoblanadi.
5. Yagona tanish belgilari transport oqimida avtotransport vositasining ajralib turishini va tanilishini taʼminlash uchun moʻljallangan hamda ular yoʻnalishsiz taksilarda yoʻlovchilarni tashiydigan barcha tashuvchilar uchun majburiy hisoblanadi.
6. Yoʻnalishsiz taksilarni tashqi maʼlumotlar bilan jihozlash quyidagilarni oʻz ichiga oladi:
avtotransport vositasining tepasiga ushbu Nizomga 1-ilovaga muvofiq oʻrnatiladigan “TAXI” tanish belgisini oʻrnatish;
yuridik shaxslarga tegishli yoʻnalishsiz taksilar uchun moʻljallangan maxsus seriyadagi avtotransport vositasining davlat raqami belgisi, shuningdek, mazkur Nizomga 2-ilovaga muvofiq yoʻnalishsiz taksilarning old va orqa eshiklariga chiziladigan qora kvadratlar hamda kompozitsiya tushirilganligi (yopishtirilganligi).
7. Yuridik shaxs nomi, manzili, oʻzini oʻzi band qilgan tashuvchi yoki haydovchining familiyasi, ismi, otasining ismi, fotosurati, faoliyat hududi, telefon raqami, avtotransport vositasining davlat raqami belgisi, ishlab chiqarilgan yili hamda litsenziya varaqasi haqidagi (raqami va amal qilish muddati) maʼlumotlarni oʻz ichiga olgan ushbu Nizomga 3-ilovaga muvofiq shakldagi taksi pasporti yoʻnalishsiz taksilarni ichki maʼlumotlar bilan jihozlash belgilari hisoblanadi.
Taksi pasporti avtotransport vositasi ichida yoʻlovchilar bemalol oʻqiy oladigan holatda oʻrnatiladi.
Taksi pasporti oʻzini oʻzi band qilgan shaxslarga litsenziya varaqasi bilan birga bepul beriladi.
3-bob. Yoʻnalishsiz taksiga qoʻyiladigan talablar
8. Yoʻnalishsiz taksi sifatida foydalaniladigan har bir avtotransport vositasi texnik jihatdan soz holatda boʻlishi va Avtomobil transportida yoʻlovchilar va bagajni tashish qoidalarida belgilangan talablarga muvofiq boʻlishi, shuningdek, quyidagi talablarga javob berishi kerak:
ushbu Nizomning 6 va 7-bandlarida belgilangan yagona tanish belgilarining mavjud boʻlishi;
toʻlovlarni agregator yoki boshqa elektron toʻlov tizimlari orqali qabul qilish imkoniyati yaratilgan boʻlishi;
yoʻnalishsiz taksi texnik holati va jihozlarining yoʻl harakati xavfsizligini taʼminlash boʻyicha qonunchilik hujjatlari talablariga muvofiq boʻlishi;
shahar yoʻnalishlarida avtotransport vositasining ekspluatatsiyasi 15 yildan ortiq boʻlmasligi;
tashuvchining fuqarolik javobgarligini majburiy sugʻurtasi mavjud boʻlishi;
taksometr funksiyalarini taʼminlaydigan maxsus ilovaga ega moslamalar (shu jumladan, uyali telefonlar, planshetlar) bilan taʼminlangan boʻlishi.
Vagon tipidagi (“Damas” va shu tipdagi) avtotransport vositalarida yoʻnalishsiz taksi sifatida yoʻlovchi tashish faoliyati bilan shugʻullanish taqiqlanadi.
9. Jismoniy va yuridik shaxslarga tegishli yoʻnalishsiz taksilar sifatida foydalaniladigan hamda yagona tanish belgilari bilan jihozlangan avtotransport vositalarida yoʻlovchilarni olish va tushirish maqsadida “Toʻxtash taqiqlangan” yoʻl belgisi amal qilish hududida yoʻlovchilarni tushirish-chiqarishga (yuklarni ortish-tushirishga) ruxsat etiladi.
Yuridik shaxslarga tegishli yoʻnalishsiz taksilar sifatida foydalaniladigan hamda yagona tanish belgilari bilan jihozlangan avtotransport vositalariga:
yoʻlovchilarni olish va tushirish maqsadida “Toʻxtash taqiqlangan” yoʻl belgisi amal qilish hududida, shu jumladan, aeroport va vokzallarga tutash hududlarda toʻxtash;
aeroportlar, temir yoʻl vokzallari, avtovokzallar, ustav fondida (ustav kapitalida) davlat ulushi 50 foiz va undan ortiq boʻlgan qurilish mollari, dehqon va buyum bozorlari hamda savdo majmualarining pulli toʻxtash joylariga yoʻlovchilarni olish va tushirish uchun bepul kirish;
yoʻnalishli transport vositalari uchun ajratilgan maxsus harakatlanish yoʻlagi boʻylab harakatlanish huquqi beriladi.
Mazkur band ushbu Nizomning 6 va 7-bandlarida belgilangan yagona tanish belgilari bilan jihozlanmagan, yoʻlovchilarni buyurtma asosida tashishda foydalaniladigan hamda litsenziya varaqasiga ega boʻlmagan yengil avtotransport vositalariga nisbatan tatbiq etilmaydi.
4-bob. Yoʻnalishsiz taksilar haydovchilariga qoʻyiladigan talablar
10. Yoʻlovchilar tashish uchun moʻljallangan yoʻnalishsiz taksilarni boshqarishga haydovchilik guvohnomasida “B” toifasi boʻlgan, 21 yoshga toʻlgan, tibbiy koʻrikdan oʻtgan va kamida uch yillik haydovchilik stajiga ega hamda Oʻzbekiston Respublikasi fuqarosi boʻlgan shaxslar qoʻyiladi.
11. Haydovchi faoliyatini mehnat va dam olish rejimiga rioya etgan holda amalga oshiradi.
12. Amalga oshirilishi uchun litsenziya berilgan faoliyat turi bilan faqat shu litsenziyani olgan jismoniy yoki yuridik shaxs shugʻullanishi mumkin. Litsenziyalarni yoki ularga doir huquqlarni boshqa shaxslarga berish taqiqlanadi.
13. Yuridik shaxslarga tegishli yoʻnalishsiz taksilarning haydovchilari ishlayotganda tegishli litsenziya varaqasiga hamda yoʻlga chiqishdan oldin avtotransport vositasining belgilangan tartibda texnik koʻrikdan va haydovchilarning tibbiy koʻrikdan oʻtkazilganligi toʻgʻrisida yoʻl varaqasiga ega boʻlishi shart.
Oʻzini oʻzi band qilgan shaxslar:
oʻz avtotransport vositasini bir yilda bir marotaba texnik koʻrikdan oʻtkazishi;
bir yilda bir marotaba tibbiy koʻrikdan oʻtishi va tibbiy koʻrikdan oʻtganligi toʻgʻrisidagi maʼlumotnomaga ega boʻlishi shart.
14. Haydovchi faoliyatini litsenziya varaqasida koʻrsatilgan hududda va unga tutash hududda amalga oshirishi mumkin.
Bunda litsenziya varaqasida koʻrsatilgan hudud avtotransport vositasiga berilgan davlat raqami belgilarining hududiy kodlaridan kelib chiqib aniqlanadi.
15. Yoʻnalishsiz taksida muntazam yoʻnalishlarda faoliyat yurituvchi jamoat transportining yoʻnalish sxemalariga muvofiq (muntazam yoʻnalishlarda) yoki trafaret qoʻygan holda yoʻlovchi tashishi taqiqlanadi.
16. Yoʻnalishsiz taksi haydovchisining belgilangan talablarga nomuvofiqligi aniqlangan hollarda haydovchiga nisbatan qonunchilikda nazarda tutilgan choralar qoʻllaniladi.
5-bob. Yoʻnalishsiz taksilarda yoʻlovchilar va bagajni tashish
17. Yoʻnalishsiz taksilarga yoʻlovchilar ularning talabiga koʻra Yoʻl harakati qoidalariga rioya qilgan holda chiqariladi va tushiriladi.
18. Yoʻnalishsiz taksilarning yoʻlovchilar hamda bagajni tashish tariflari miqdori avtotransport vositalari turlari va xizmatlariga qarab belgilanadi.
19. Yoʻl haqi yoʻlovchi tomonidan safar tugagandan keyin va bagaj tushirilgandan keyin u bilan kelgan yoʻlovchilar hamda tashib keltirilgan bagaj sonidan qatʼi nazar, toʻlovni amalga oshirish imkoniyatini beruvchi, shuningdek, taksometr funksiyalarini taʼminlaydigan maxsus ilovaga ega moslamalar (shu jumladan, uyali telefonlar, planshetlar) koʻrsatkichi boʻyicha toʻlanadi. Bunda xizmat koʻrsatilganligi uchun toʻlov tashuvchi yoki agregator tomonidan belgilangan qoidalarga muvofiq xizmat koʻrsatish tugagunga qadar qismlarga boʻlib amalga oshirilishi mumkin.
Haydovchi bilan hisob-kitob naqd pul, hisob-kitob terminalidan foydalangan holda bank plastik kartalari yoxud elektron toʻlov vositasi yordamida amalga oshiriladi.
Yoʻnalishsiz taksi bir necha yoʻlovchilar (navbatda turgan birinchi yoʻlovchining roziligi bilan) tomonidan toʻxtash joyida yollangan yoki taksini yollagan yoʻlovchi roziligi bilan yoʻli bir boʻlgan yoʻlovchi chiqarilgan taqdirda, yoʻl haqi toʻlovining umumiy summasi yoʻlovchilar oʻrtasida har bir yoʻlovchining bosib oʻtgan masofasiga mutanosib ravishda taqsimlanadi.
20. Yoʻnalishsiz taksiga yoʻlovchilarni chiqarishda haydovchi ularning buyumlari va bagajini joylashtirishga hamda safar tugaganda ularni tushirishga yordamlashishi lozim.
21. Yoʻnalishsiz taksi tomonlarning oʻzaro kelishuviga yoki taksometr funksiyalarini taʼminlaydigan maxsus ilovaga ega moslamalar (shu jumladan, uyali telefonlar, planshetlar) koʻrsatkichiga koʻra alohida toʻlov evaziga yoʻlovchining buyurtmasiga binoan kutib turadi.
22. Yoʻnalishsiz taksilarning salonida avtomobil eshigi orqali bemalol sigʻadigan, salon qoplamasini hamda uning uskunalarini buzmaydigan va iflos qilmaydigan, haydovchining avtomobilni boshqarishiga hamda orqani koʻrish koʻzgusidan foydalanishiga xalaqit bermaydigan buyumlar va ashyolarni tashishiga ruxsat beriladi.
Mushuklar, itlarni tizgin va toʻshagi mavjud boʻlganda tumshuqbogʻlarda, kichik jonivorlarni savatlarda, sumkalarda hamda qushlarni qafaslarda tashishga ruxsat beriladi.
23. Yoʻnalishsiz taksilarda bagaj tashiganlik uchun haq olinmaydi.
6-bob. Yoʻnalishsiz taksilarda yoʻlovchilarni tashish boʻyicha nazorat
24. Yuridik va jismoniy shaxslarga yoʻnalishsiz taksilarda yoʻlovchilarni tashish boʻyicha faoliyatni amalga oshirish uchun litsenziya varaqalari Oʻzbekiston Respublikasi Transport vazirligi tomonidan beriladi.
Yuridik va jismoniy shaxslar (litsenziatlar) tomonidan belgilangan litsenziya talab va shartlariga rioya etilishi yuzasidan nazorat Oʻzbekiston Respublikasi Transport vazirligi huzuridagi Transport nazorati inspeksiyasi tomonidan amalga oshiriladi.
25. Oʻzbekiston Respublikasi Ichki ishlar vazirligi ushbu Nizom talablariga rioya etilishini:
yoʻnalishsiz taksilar uchun moʻljallangan boshqa yengil avtomobillardan farqlanuvchi davlat raqami belgisi ajratilishi yuzasidan;
yoʻnalishsiz taksilarda yoʻnalishsiz taksilar uchun yagona tanish belgilari bilan jihozlanganligi yuzasidan;
yoʻnalishsiz taksi texnik holati va jihozlarining yoʻl harakati xavfsizligini taʼminlash boʻyicha normativ-huquqiy hujjatlar talablariga muvofiqligi yuzasidan;
yoʻlovchilar tashish uchun moʻljallangan yoʻnalishsiz taksilarni boshqarishga haydovchilik guvohnomasida “V” ruxsat belgisi boʻlgan, 21 yoshga toʻlgan, tibbiy koʻrikdan oʻtgan va kamida uch yillik haydovchilik stajiga ega boʻlgan shaxslarning qoʻyilishi yuzasidan nazorat qiladi.
26. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari yoʻnalishsiz taksilarning maxsus jihozlangan toʻxtash joylarini qurish (barpo etish) boʻyicha ushbu Nizom talablariga rioya etilishini nazorat qiladilar.
27. Mazkur Nizom talablariga rioya etilishini nazorat qilish boʻyicha ishlar Oʻzbekiston Respublikasi Transport vazirligi tomonidan umumiy muvofiqlashtirib boriladi.
7-bob. Yakunlovchi qoidalar
29. Ushbu Nizomni qoʻllashda yuzaga keladigan nizolar qonunchilikda belgilangan tartibda hal etiladi.
30. Mazkur Nizom talablarining buzilishida aybdor boʻlgan shaxslar qonunchilik hujjatlariga muvofiq javob beradilar.
Yoʻnalishsiz taksi faoliyatini tartibga solish toʻgʻrisidagi nizomga 1-ILOVA
“TAXI” tanish belgisining tasviri
Yoʻnalishsiz taksi faoliyatini tartibga solish toʻgʻrisidagi nizomga 2-ILOVA
Yoʻnalishsiz taksilarning old va orqa eshiklariga chiziladigan qora kvadratlar hamda kompozitsiyaning tasviri va oʻlchamlari (sm)
Yoʻnalishsiz taksi faoliyatini tartibga solish toʻgʻrisidagi nizomga 3-ILOVA
TAKSI PASPORTI
Vazirlar Mahkamasining 2025-yil 2-apreldagi 200-son qaroriga 2-ILOVA
Avtomobil transportida yoʻlovchilarni buyurtma asosida tashish
1-bob. Umumiy qoidalar
1. Mazkur Qoidalar yoʻlovchilarni buyurtma asosida (toʻy, turistik yoʻnalishlarda, shartnoma asosida, ommaviy va boshqa tadbirlarda) yengil avtotransport vositalarida (keyingi oʻrinlarda — avtotransport vositalari) tashish tartibini belgilaydi.
2. Avtotransport vositalarida yoʻlovchilarni buyurtma asosida tashish faqat yuridik shaxslar tomonidan amalga oshiriladi.
3. Mazkur Qoidalar yoʻnalishsiz hamda yoʻnalishli taksilarga nisbatan tatbiq etilmaydi.
4. Avtotransport vositalarida yoʻlovchilarni buyurtma asosida tashish shahar, shahar atrofida va shaharlararo yoʻnalishlarda amalga oshiriladi.
5. Yoʻlovchilarni talabiga koʻra avtotransport vositalariga chiqarish va tushirish Yoʻl harakati qoidalariga rioya qilgan holda amalga oshiriladi.
6. Avtotransport vositalarida yoʻlovchilarni buyurtma asosida tashish mijoz bilan tashuvchi oʻrtasida tuzilgan shartnoma asosida yoki tomonlarning oʻzaro kelishuviga koʻra amalga oshiriladi.
7. Tomonlarning kelishuviga koʻra avtotransport vositalariga qoʻshimcha talablar hamda boshqa talablar ham belgilanishi mumkin.
8. Haydovchi yoʻlovchilarga xizmat koʻrsatish vaqtida ularning buyumlari va bagajini joylashtirishga hamda safar tugaganda ularni tushirishga yordamlashishi lozim.
9. Avtotransport vositalarining salonida avtomobil eshigi orqali bemalol sigʻadigan, salon qoplamasini hamda uning uskunalarini buzmaydigan va iflos qilmaydigan, haydovchining avtomobilni boshqarishiga hamda orqani koʻrish koʻzgusidan foydalanishiga xalaqit bermaydigan buyumlar va ashyolarni tashishiga ruxsat beriladi.
10. Buyurtma asosida faoliyat yurituvchi avtotransport vositalaridan yoʻnalishsiz taksi sifatida foydalanish taqiqlanadi. Bu holat faoliyatni litsenziyasiz amalga oshirganlikka tenglashtiriladi.
11. Mushuklar, itlarni tizgin va toʻshagi mavjud boʻlganda tumshuqbogʻlarda, kichik jonivorlarni savatlarda, sumkalarda hamda qushlarni qafaslarda tashishga ruxsat beriladi.
2-bob. Buyurtma asosida faoliyat yurituvchi avtotransport vositalariga qoʻyiladigan talablar
12. Buyurtma asosida faoliyat yurituvchi avtotransport vositalari texnik jihatdan soz holatda boʻlishi hamda qonunchilik hujjatlarida belgilangan tartibda texnik koʻrikdan oʻtgan boʻlishi lozim.
13. Buyurtma asosida faoliyat yurituvchi avtotransport vositalari yuqori klassda boʻlishi lozim.
Vagon tipidagi (“Damas” va shu tipdagi) avtotransport vositalariga buyurtma asosida yoʻlovchi tashish faoliyati bilan shugʻullanish taqiqlanadi.
14. Buyurtma asosida avtotransport vositalarida tashish xizmatlarini koʻrsatishda aeroportlar, temir yoʻl vokzallari, avtovokzallar, ustav fondida (ustav kapitalida) davlat ulushi 50 foiz va undan ortiq boʻlgan qurilish mollari, dehqon va buyum bozorlari hamda savdo majmualarining pulli toʻxtash joylariga yoʻlovchilarni olish va tushirish uchun bepul kirishga ruxsat beriladi.
15. Oʻzbekiston Respublikasi Transport vazirligi tomonidan buyurtma asosida faoliyat yurituvchi avtotransport vositalarining turlari hamda ishlab chiqilgan yili boʻyicha roʻyxat shakllantiriladi hamda vazirlikning rasmiy veb-saytida joylashtirilib, muntazam ravishda yangilab boriladi.
16. Buyurtma asosida faoliyat yurituvchi avtotransport vositalari muntazam yoʻnalishlarda faoliyat yurituvchi jamoat transportining yoʻnalish sxemalariga muvofiq (muntazam yoʻnalishlarda) yoki trafaret qoʻygan holda hamda yoʻnalishsiz taksi sifatida faoliyat yuritishi taqiqlanadi.
3-bob. Buyurtma asosida faoliyat yurituvchi avtotransport vositalari haydovchilariga qoʻyiladigan talablar
17. Buyurtma asosida faoliyat yurituvchi avtotransport vositalarini boshqarishga haydovchilik guvohnomasida “B” toifasi boʻlgan, 21 yoshga toʻlgan, tibbiy koʻrikdan oʻtgan va kamida uch yillik haydovchilik stajiga ega hamda Oʻzbekiston Respublikasi fuqarosi boʻlgan shaxslarga ruxsat beriladi.
Haydovchilar mehnat va dam olish rejimiga rioya etgan holda faoliyatini amalga oshiradi.
18. Buyurtma asosida faoliyat yurituvchi avtotransport vositalarining haydovchilari yoʻlga chiqishdan oldin avtotransport vositasining belgilangan tartibda texnik koʻrikdan va haydovchilarning tibbiy koʻrikdan oʻtkazilganligi toʻgʻrisida yoʻl varaqasiga ega boʻlishi kerak.
19. Buyurtma asosida faoliyat yurituvchi avtotransport vositalari haydovchisining belgilangan talablarga nomuvofiqligi aniqlangan hollarda unga nisbatan qonunchilikda nazarda tutilgan choralar qoʻllaniladi.
4-bob. Avtotransport vositalarida yoʻlovchilarni buyurtma asosida tashish boʻyicha nazorat
20. Avtotransport vositalarida yoʻlovchilarni buyurtma asosida tashuvchi yuridik shaxslarga yoʻlovchilarni tashish boʻyicha faoliyatni amalga oshirish uchun “buyurtma asosida” soʻzlari aks ettirilgan litsenziya varaqalari Oʻzbekiston Respublikasi Transport vazirligi tomonidan beriladi.
Avtotransport vositalarida yoʻlovchilarni buyurtma asosida tashuvchi yuridik shaxslar (litsenziatlar) tomonidan belgilangan litsenziya talab va shartlariga rioya etilishi yuzasidan nazorat Oʻzbekiston Respublikasi Transport vazirligi huzuridagi Transport nazorati inspeksiyasi tomonidan amalga oshiriladi.
21. Oʻzbekiston Respublikasi Ichki ishlar vazirligi:
buyurtma asosida faoliyat yurituvchi avtotransport vositalarining texnik holati va jihozlarining yoʻl harakati xavfsizligini taʼminlash boʻyicha normativ-huquqiy hujjatlar talablariga muvofiqligi yuzasidan;
buyurtma asosida faoliyat yurituvchi avtotransport vositalarini boshqarishga haydovchilik guvohnomasida “B” toifasi boʻlgan, 21 yoshga toʻlgan, tibbiy koʻrikdan oʻtgan va kamida uch yillik haydovchilik stajiga ega boʻlgan shaxslarning qoʻyilishi yuzasidan nazorat qiladi.
Vazirlar Mahkamasining 2025-yil 2-apreldagi 200-son qaroriga 3-ILOVA
Vazirlar Mahkamasining 2019-yil 30-iyuldagi 636-son qarori bilan tasdiqlangan Avtomobil transportida yoʻlovchilarni shaharda, shahar atrofida, shaharlararo, xalqaro, shuningdek, yuklarni xalqaro yoʻnalishlar boʻyicha tashish faoliyatini litsenziyalash yuzasidan davlat xizmatlari koʻrsatishning maʼmuriy reglamentiga kiritilayotgan oʻzgartirish va qoʻshimchalar
1. 3-bandning ikkinchi xatboshisi quyidagi mazmundagi jumla bilan toʻldirilsin:
“Bunda yoʻlovchilarni shaharda, shahar atrofida va shaharlararo tashish faoliyati oʻzini oʻzi band qilgan shaxslar tomonidan ham amalga oshirilishi mumkin”.
2. 9-band quyidagi mazmundagi xatboshi bilan toʻldirilsin:
“Amaldagi litsenziya varaqasiga ega avtotransport vositasiga boshqa bir yuridik yoki jismoniy shaxslarning arizasiga muvofiq litsenziya varaqalari berilishi taqiqlanadi”.
3. 7-ilovada :
a) 5-pozitsiyaning uchinchi ustuni quyidagi mazmundagi “v” kichik band bilan toʻldirilsin:
“v) oʻzini oʻzi band qilgan shaxsning bir yil ichida tibbiy koʻrikdan oʻtganligi toʻgʻrisidagi maʼlumot”;
b) 7-pozitsiyaning uchinchi ustuni 2-bandidagi jadval quyidagi mazmundagi pozitsiya bilan toʻldirilsin:
“ haydovchidan tashqari toʻrttadan ortiq boʻlmagan oʻrindiqlarga ega boʻlgan yengil avtotransport vositasida oʻzini-oʻzi band qilgan holda yoʻlovchilarni shahar, shahar atrofi va shaharlararo tashish BHMning 1 baravari ” ;
v) 8-pozitsiyaning uchinchi ustuni quyidagi mazmundagi xatboshi bilan toʻldirilsin:
“Oʻzini oʻzi band qilgan shaxslar uchun 1 ish kuni”;
g) 9-pozitsiyaning uchinchi ustunida:
“k” kichik band quyidagi tahrirda bayon etilsin:
“k) yoʻnalishsiz taksilarning hamda yoʻlovchilarni buyurtma asosida tashuvchi yengil avtotransport vositalarining qonunchilik hujjatlarida belgilangan talablarga muvofiqligi”;
quyidagi mazmundagi “m” va “n” kichik bandlar bilan toʻldirilsin:
“m) oʻzini oʻzi band qilgan tashuvchilar oʻz avtotransport vositasini bir yilda bir marotaba texnik koʻrikdan oʻtkazishi hamda bir yilda bir marotaba tibbiy koʻrikdan oʻtishi.
n) yoʻnalishsiz taksilarning litsenziya varaqasida koʻrsatilgan hududda yoki yondosh hududda (Qoraqalpogʻiston Respublikasi, viloyatlar va Toshkent shahri) faoliyat koʻrsatishi”;
d) 12-pozitsiyaning uchinchi ustuni quyidagi mazmundagi xatboshi bilan toʻldirilsin:
“Oʻzini oʻzi band qilgan shaxslardan arizani koʻrib chiqish uchun yigʻim undirilmaydi”.
Vazirlar Mahkamasining 2025-yil 2-apreldagi 200-son qaroriga 4-ILOVA
Oʻzbekiston Respublikasi Hukumatining oʻz kuchini yoʻqotgan deb hisoblanayotgan ayrim qarorlari
1. Vazirlar Mahkamasining “Yoʻnalishsiz taksilar faoliyatini tartibga solish chora-tadbirlari toʻgʻrisida” 2011-yil 18-maydagi 139-son qarori .
2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish hamda baʼzilarini oʻz kuchini yoʻqotgan deb hisoblash toʻgʻrisida (“Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida” Oʻzbekiston Respublikasining 2013-yil 30-apreldagi OʻRQ-352-son Qonuni)” 2014-yil 3-martdagi 45-son qaroriga 1-ilovaning 29-bandi .
3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Transport sohasida davlat boshqaruvi tizimini tubdan takomillashtirish chora-tadbirlari toʻgʻrisida” 2019-yil 1-fevraldagi PF-5647-son Farmoni va Oʻzbekiston Respublikasi Prezidentining “Yuk va yoʻlovchi tashish tizimini tubdan takomillashtirish chora-tadbirlari toʻgʻrisida” 2019-yil 6-martdagi PQ-4230-son qarori)” 2020-yil 8-maydagi 271-son qaroriga 1-ilovaning 16-bandi .
4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasining “Normativ-huquqiy hujjatlar toʻgʻrisida” 2021-yil 20-apreldagi OʻRQ-682-son Qonuni)” 2022-yil 4-apreldagi 153-son qaroriga ilovaning 263-bandi .
5. Vazirlar Mahkamasining “Jamoat transportini moliyalashtirishning yangi tizimini tashkil etish chora-tadbirlari toʻgʻrisida” 2023-yil 18-martdagi 116-son qaroriga 3-ilovaning 2-bandi .
Oʻzbekiston Respublikasining Bosh vaziri A. ARIPOV
Toshkent sh.,
2025-yil 2-aprel,
200-son