📅 2025-yil 2-aprel · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 2 апрель · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 2 апреля 2025 г. · Постановления Президента
Официальный текст. Официальный документ. Редакционные примечания не включены.
📅 2 April 2025 · Presidential resolutions
Official text. Official document. Editorial notes are not included.
ЎЗБЕКИСТОН РЕСПУБЛИКАСИ ПРЕЗИДЕНТИНИНГ
ҚАРОРИ
Ёқилғи-энергетика соҳасида бозор механизмларини жорий этишда эҳтиёжманд аҳолини давлат томонидан қўллаб-қувватлашнинг қўшимча чора-тадбирлари тўғрисида
Мамлакатимизда ёқилғи-энергетика ресурслари нархлари шаклланишини босқичма-босқич бозор тамойилларига ўтказиш даврида аҳолини давлат томонидан қўллаб-қувватлаш мақсадида қарор қиламан:
I. Давлат томонидан қўллаб-қувватлаш чора-тадбирлари
1. Белгилансинки, 2027 йил 1 апрелга қадар Ижтимоий реестрга (кейинги ўринларда — Реестр) киритилган, шунингдек, Реестрга киритилмаган, бироқ моддий аҳволи бўйича «давлат таъминотидаги оила» ёки «камбағал оила» тоифадаги оилалар мезонларига тўғри келувчи, оиладаги жон бошига даромади минимал истеъмол харажатларининг 1,5 баробаридан ошмайдиган оилаларга.
(а) электр энергияси истеъмоли бўйича — ойига базавий меъёрдан 150 кВт соатгача;
(б) табиий газ истеъмоли бўйича — иситиш мавсумида ойига базавий меъёрдан 250 куб метргача, бошқа даврларда ойига базавий меъёрдан 150 куб метргача ортиқ фойдаланилган қисми учун базавий меъёр доирасидаги ҳамда базавий меъёрдан ошган нархлар ўртасидаги фарқ компенсация қилиб берилади.
2. 2025/2026 йилги иситиш мавсумида аҳолининг эҳтиёжманд қатламини қўшимча моддий жиҳатдан қўллаб-қувватлаш мақсадида жорий йилнинг ноябрь ойида қуйидаги оилаларга 1 миллион сўмдан бир марталик моддий ёрдам ажратилсин:
(а) Реестрга киритилган оилаларга;
(б) «маҳалла еттилиги» хулосаси асосида Реестрга киритилмаган, бироқ ёрдамга муҳтож оилаларга. Бунда:
(i) «маҳалла еттилиги» томонидан қўшимча рўйхат шакллантирилишида биринчи навбатда, боқувчисини йўқотган оилалар, аъзолари I ёки II гуруҳ ногирони бўлган шахслардан иборат бўлган оилалар, ногиронлиги бўлган болаларни парваришлаётган оилалар, узоқ муддатли даволанишни талаб этадиган касалликлар билан касалланган шахслар яшовчи оилалар, ўзгалар парваришига муҳтож бўлган ёлғиз яшовчи шахслар ҳамда ёлғиз яшовчи кексалар ва ногиронлиги бўлган шахслар, уч ва ундан ортиқ оила яшайдиган хонадонларда ҳамда газ таъминоти бўлмаган ва марказлаштирилган тартибда иситилмайдиган кўп қаватли уйларда яшовчи оилалар инобатга олинади;
(ii) қўшимча равишда шакллантириладиган рўйхатдаги оилалар сони Реестрга киритилган оилалар сонининг 40 фоизидан ошмаслиги лозим.
3. Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари Ижтимоий ҳимоя миллий агентлиги ҳамда Ўзбекистон маҳаллалари уюшмаси билан биргаликда 2025 йил 1 октябрга қадар «маҳалла еттиликлари» томонидан республика бўйича ҳар бир маҳалла кесимида қўшимча рўйхатлар шакллантирилишини таъминласин. Бунда ҳокимликлар тегишли туман (шаҳар) бўйича Реестрга киритилган оилалар сонининг 40 фоизидан ошмаган ҳолда эҳтиёжманд оилалар сонига маҳаллалар кесимида ўзгартириш киритиши мумкин.
II. Молиявий ресурслар
4. Иқтисодиёт ва молия вазирлиги мазкур қарор билан белгиланаётган моддий ёрдам ва компенсация тўловларини ҳамда ушбу тўловлар бўйича АТ «Халқ банки» хизматига ҳақ тўлаш харажатларини молиялаштириш учун Ўзбекистон Республикаси республика бюджети маблағлари ҳисобидан Ижтимоий ҳимоя миллий агентлигига зарур маблағларни ажратсин.
III. Қарор ижросини ташкил этиш, таъминлаш ва назорат
5. Вазирлар Маҳкамаси бир ҳафта муддатда ушбу қарорга мувофиқ қўшимча рўйхатларни шакллантириш ҳамда компенсация ва моддий ёрдам тўловларини тўлаш тартибини тасдиқласин. Бунда туман (шаҳар) ҳокимликлари, Ўзбекистон маҳаллалари уюшмасининг туман (шаҳар) бўлимлари, «Инсон» ижтимоий хизматлар марказлари ҳамда «маҳалла еттилиги»нинг вазифалари аниқ белгилансин.
6. Ижтимоий ҳимоя миллий агентлиги:
(а) электр энергияси ва табиий газ бўйича компенсация тўловлари ўз вақтида тўланишини;
(б) АТ «Халқ банки» билан биргаликда жорий йил ноябрь ойида бир марталик моддий ёрдам тўланишини;
(в) Иқтисодиёт ва молия вазирлиги, Ўзбекистон Миллий ахборот агентлиги, Ўзбекистон Миллий телерадиокомпанияси ҳамда Ахборот ва оммавий коммуникациялар агентлиги билан биргаликда ушбу қарорнинг мақсади, вазифалари ва ундан кутилаётган натижалар оммавий ахборот воситалари, интернет ва ижтимоий тармоқларда кенг ёритилишини ташкил қилсин.
7. Вазирлар Маҳкамаси ҳузуридаги Электр энергияси, нефть маҳсулотлари ва газдан фойдаланишни назорат қилиш инспекцияси, Энергетика вазирлиги бир ҳафта муддатда аҳоли томонидан электр энергияси ва табиий газдан самарали фойдаланишни йўлга қўйиш орқали энергия ресурсларини иқтисод қилишга қаратилган манзилли чора-тадбирлар режасини ишлаб чиқиб, тасдиқлаш учун Вазирлар Маҳкамасига киритсин.
8. Ўзбекистон маҳаллалари уюшмаси (К. Куранбаев), Ижтимоий ҳимоя миллий агентлиги (М. Оллоёров)нинг:
(а) камбағал оилалар ва эҳтиёжманд аҳолини қўшимча қўллаб-қувватлаш чоралари билан тўлиқ қамраб олиш мақсадида маҳаллаларда манзилли тарғибот ишларини кучайтириш;
(б) аҳолига моддий ёрдам ажратишда маҳалла раислари томонидан шаффофлик ва адолатлилик таъминланишини кафолатлаши ва шахсий жавобгарлиги белгилансин.
9. Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимлари бир марталик моддий ёрдамни тўлаш бўйича қўшимча рўйхатларнинг тўғри шакллантирилишига ҳамда тўловларнинг ўз вақтида амалга оширилишига шахсан жавобгар этиб белгилансин.
10. Бош прокуратура (И. Адхамов) ушбу қарорга мувофиқ ажратиладиган маблағларнинг мақсадли ишлатилиши устидан доимий назорат ўрнатсин.
11. Мазкур қарорнинг ижросини самарали ташкил қилишга масъул ва жавобгар этиб Бош вазир ўринбосари Ж.А. Қўчқоров ҳамда Ўзбекистон Республикаси Президентининг маслаҳатчиси — Ижтимоий ҳимоя миллий агентлиги директори М.П. Оллоёров белгилансин.
12. Ушбу қарор ижросини назорат қилиш ва ижро учун масъул ташкилотлар фаолиятини мувофиқлаштириш Ўзбекистон Республикаси Бош вазири А.Н. Арипов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2025 йил 2 апрель,
ПҚ-134-сон
OʻZBEKISTON RESPUBLIKASI PREZIDENTINING
QARORI
Yoqilgʻi-energetika sohasida bozor mexanizmlarini joriy etishda ehtiyojmand aholini davlat tomonidan qoʻllab-quvvatlashning qoʻshimcha chora-tadbirlari toʻgʻrisida
Mamlakatimizda yoqilgʻi-energetika resurslari narxlari shakllanishini bosqichma-bosqich bozor tamoyillariga oʻtkazish davrida aholini davlat tomonidan qoʻllab-quvvatlash maqsadida qaror qilaman:
I. Davlat tomonidan qoʻllab-quvvatlash chora-tadbirlari
1. Belgilansinki, 2027-yil 1-aprelga qadar Ijtimoiy reyestrga (keyingi oʻrinlarda — Reyestr) kiritilgan, shuningdek, Reyestrga kiritilmagan, biroq moddiy ahvoli boʻyicha “davlat taʼminotidagi oila” yoki “kambagʻal oila” toifadagi oilalar mezonlariga toʻgʻri keluvchi, oiladagi jon boshiga daromadi minimal isteʼmol xarajatlarining 1,5 barobaridan oshmaydigan oilalarga.
(a) elektr energiyasi isteʼmoli boʻyicha — oyiga bazaviy meʼyordan 150 kVt soatgacha;
(b) tabiiy gaz isteʼmoli boʻyicha — isitish mavsumida oyiga bazaviy meʼyordan 250 kub metrgacha, boshqa davrlarda oyiga bazaviy meʼyordan 150 kub metrgacha ortiq foydalanilgan qismi uchun bazaviy meʼyor doirasidagi hamda bazaviy meʼyordan oshgan narxlar oʻrtasidagi farq kompensatsiya qilib beriladi.
2. 2025/2026-yilgi isitish mavsumida aholining ehtiyojmand qatlamini qoʻshimcha moddiy jihatdan qoʻllab-quvvatlash maqsadida joriy yilning noyabr oyida quyidagi oilalarga 1 million soʻmdan bir martalik moddiy yordam ajratilsin:
(a) Reyestrga kiritilgan oilalarga;
(b) “mahalla yettiligi” xulosasi asosida Reyestrga kiritilmagan, biroq yordamga muhtoj oilalarga. Bunda:
(i) “mahalla yettiligi” tomonidan qoʻshimcha roʻyxat shakllantirilishida birinchi navbatda, boquvchisini yoʻqotgan oilalar, aʼzolari I yoki II guruh nogironi boʻlgan shaxslardan iborat boʻlgan oilalar, nogironligi boʻlgan bolalarni parvarishlayotgan oilalar, uzoq muddatli davolanishni talab etadigan kasalliklar bilan kasallangan shaxslar yashovchi oilalar, oʻzgalar parvarishiga muhtoj boʻlgan yolgʻiz yashovchi shaxslar hamda yolgʻiz yashovchi keksalar va nogironligi boʻlgan shaxslar, uch va undan ortiq oila yashaydigan xonadonlarda hamda gaz taʼminoti boʻlmagan va markazlashtirilgan tartibda isitilmaydigan koʻp qavatli uylarda yashovchi oilalar inobatga olinadi;
(ii) qoʻshimcha ravishda shakllantiriladigan roʻyxatdagi oilalar soni Reyestrga kiritilgan oilalar sonining 40 foizidan oshmasligi lozim.
3. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari Ijtimoiy himoya milliy agentligi hamda Oʻzbekiston mahallalari uyushmasi bilan birgalikda 2025-yil 1-oktabrga qadar “mahalla yettiliklari” tomonidan respublika boʻyicha har bir mahalla kesimida qoʻshimcha roʻyxatlar shakllantirilishini taʼminlasin. Bunda hokimliklar tegishli tuman (shahar) boʻyicha Reyestrga kiritilgan oilalar sonining 40 foizidan oshmagan holda ehtiyojmand oilalar soniga mahallalar kesimida oʻzgartirish kiritishi mumkin.
II. Moliyaviy resurslar
4. Iqtisodiyot va moliya vazirligi mazkur qaror bilan belgilanayotgan moddiy yordam va kompensatsiya toʻlovlarini hamda ushbu toʻlovlar boʻyicha AT “Xalq banki” xizmatiga haq toʻlash xarajatlarini moliyalashtirish uchun Oʻzbekiston Respublikasi respublika budjeti mablagʻlari hisobidan Ijtimoiy himoya milliy agentligiga zarur mablagʻlarni ajratsin.
III. Qaror ijrosini tashkil etish, taʼminlash va nazorat
5. Vazirlar Mahkamasi bir hafta muddatda ushbu qarorga muvofiq qoʻshimcha roʻyxatlarni shakllantirish hamda kompensatsiya va moddiy yordam toʻlovlarini toʻlash tartibini tasdiqlasin. Bunda tuman (shahar) hokimliklari, Oʻzbekiston mahallalari uyushmasining tuman (shahar) boʻlimlari, “Inson” ijtimoiy xizmatlar markazlari hamda “mahalla yettiligi”ning vazifalari aniq belgilansin.
6. Ijtimoiy himoya milliy agentligi:
(a) elektr energiyasi va tabiiy gaz boʻyicha kompensatsiya toʻlovlari oʻz vaqtida toʻlanishini;
(b) AT “Xalq banki” bilan birgalikda joriy yil noyabr oyida bir martalik moddiy yordam toʻlanishini;
(v) Iqtisodiyot va moliya vazirligi, Oʻzbekiston Milliy axborot agentligi, Oʻzbekiston Milliy teleradiokompaniyasi hamda Axborot va ommaviy kommunikatsiyalar agentligi bilan birgalikda ushbu qarorning maqsadi, vazifalari va undan kutilayotgan natijalar ommaviy axborot vositalari, internet va ijtimoiy tarmoqlarda keng yoritilishini tashkil qilsin.
7. Vazirlar Mahkamasi huzuridagi Elektr energiyasi, neft mahsulotlari va gazdan foydalanishni nazorat qilish inspeksiyasi, Energetika vazirligi bir hafta muddatda aholi tomonidan elektr energiyasi va tabiiy gazdan samarali foydalanishni yoʻlga qoʻyish orqali energiya resurslarini iqtisod qilishga qaratilgan manzilli chora-tadbirlar rejasini ishlab chiqib, tasdiqlash uchun Vazirlar Mahkamasiga kiritsin.
8. Oʻzbekiston mahallalari uyushmasi (K. Kuranbayev), Ijtimoiy himoya milliy agentligi (M. Olloyorov)ning:
(a) kambagʻal oilalar va ehtiyojmand aholini qoʻshimcha qoʻllab-quvvatlash choralari bilan toʻliq qamrab olish maqsadida mahallalarda manzilli targʻibot ishlarini kuchaytirish;
(b) aholiga moddiy yordam ajratishda mahalla raislari tomonidan shaffoflik va adolatlilik taʼminlanishini kafolatlashi va shaxsiy javobgarligi belgilansin.
9. Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlari bir martalik moddiy yordamni toʻlash boʻyicha qoʻshimcha roʻyxatlarning toʻgʻri shakllantirilishiga hamda toʻlovlarning oʻz vaqtida amalga oshirilishiga shaxsan javobgar etib belgilansin.
10. Bosh prokuratura (I. Adxamov) ushbu qarorga muvofiq ajratiladigan mablagʻlarning maqsadli ishlatilishi ustidan doimiy nazorat oʻrnatsin.
11. Mazkur qarorning ijrosini samarali tashkil qilishga masʼul va javobgar etib Bosh vazir oʻrinbosari J.A. Qoʻchqorov hamda Oʻzbekiston Respublikasi Prezidentining maslahatchisi — Ijtimoiy himoya milliy agentligi direktori M.P. Olloyorov belgilansin.
12. Ushbu qaror ijrosini nazorat qilish va ijro uchun masʼul tashkilotlar faoliyatini muvofiqlashtirish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2025-yil 2-aprel,
PQ-134-son