UzbekAI

Ўзбекистон Республикаси Вазирлар Маҳкамасининг

қарори

НИЗОМ

Концерт-томоша фаолиятида жонли ижрони янада рағбатлантириш бўйича қўшимча чора-тадбирлар тўғрисида

Ўзбекистон Республикаси Президентининг «Маданият ва санъат соҳасининг жамият ҳаётидаги ўрни ва таъсирини янада ошириш чора-тадбирлари тўғрисида» 2020 йил 26 майдаги ПФ-6000-сон Фармонига мувофиқ мамлакатимизда концерт-томоша фаолиятида жонли ижрони оммалаштиришни изчил давом эттириш, аҳолининг жонли ижрога бўлган эҳтиёжини инобатга олиш ва уларнинг истеъмолчи сифатидаги ҳуқуқларини ҳимоя қилиш, жонли ижрони рағбатлантиришнинг янги механизмларини жорий этиш ҳамда ушбу йўналишда жамоатчилик назоратини янада кучайтириш мақсадида Вазирлар Маҳкамаси қарор қилади:

1. Ўзбекистон Республикаси Президентининг 2020 йил 26 майдаги ПФ-6000-сон Фармони билан 2020 йил 1 сентябрдан бошлаб давлат органлари ва ташкилотлари тизимидаги концерт, маданият саройлари ва бошқа муассасаларда тўлиқ жонли ижро асосида ўтказилган концерт дастурлари учун ижара тўловидан 50 фоиз чегирма бериш тартиби жорий этилганлиги маълумот учун қабул қилинсин.

2. Маданият вазирлигининг Жонли ижрочиларнинг реестрини (кейинги ўринларда — Реестр) юритиш, Давлат бюджети ва бюджетдан ташқари маблағлар ҳисобидан ўтказиладиган тадбирларда фонограммадан фойдаланишни босқичма-босқич чеклаш ҳамда ушбу йўналишда жамоатчилик назоратини таъминлаш тўғрисидаги таклифи маъқуллансин.

3. Маданият вазирлиги бир ой муддатда:

а) қуйидагиларни назарда тутган ҳолда Ўзбекистон Республикаси Маданият вазирлиги ҳузуридаги «Ўзбекконцерт» давлат муассасасининг (кейинги ўринларда — «Ўзбекконцерт» ДМ) уставини қайта ишлаб чиқиб, белгиланган тартибда тасдиқлаш ҳамда давлат рўйхатидан ўтказиш чораларини кўрсин:

концерт-томоша фаолиятида жонли ижрони оммалаштириш ва рағбатлантириш бўйича ташаббусларни илгари суриш, фонограммадан фойдаланиш тенденцияларини тизимли равишда таҳлил қилиш;

жонли ижрога тўсқинлик қилаётган тизимли муаммо ва камчиликларни таҳлил қилиш ҳамда бу борада маданият вакиллари билан учрашувлар ўтказиб бориш;

фонограммадан фойдаланишда қонунчилик ҳужжатларига риоя этилиши устидан назорат қилиш бўйича жамоат ташкилотлари билан ҳамкорлик қилиш;

Реестрни юритиш, шунингдек, жонли ижрочиларнинг миллий рўйхатини шакллантириш ҳамда расмий веб-сайтлар ва ижтимоий тармоқлардаги расмий саҳифаларда доимий равишда эълон қилиб бориш;

маданият ходимлари ўртасида жонли ижрони оммалаштириш бўйича кенг тарғибот-ташвиқот ишларини амалга ошириш;

б) «Ўзбекконцерт» ДМ марказий аппарати тузилмасида бошқарув ходимларининг белгиланган умумий чекланган сони ва меҳнатга ҳақ тўлаш фонди доирасида 3 та штат бирлигидан иборат Жонли ижрони оммалаштириш бўлимини ташкил этсин;

в) Жонли ижрочиларнинг реестрини юритиш тартибини ишлаб чиқсин ва белгиланган тартибда тасдиқласин.

3. Қуйидагиларни назарда тутувчи Ўзбекистон Республикасида жонли ижрода ва фонограммадан қисман фойдаланилган ҳолда ҳамда фонограммадан фойдаланилган ҳолда концерт-томоша тадбирларини ташкил этиш ва ўтказиш тартиби тўғрисидаги низом иловага мувофиқ тасдиқлансин:

жонли ижродаги концерт-томоша тадбирларини ташкил этиш ва ўтказиш тартиби;

фонограммадан қисман фойдаланилган ҳолда ўтказиладиган концерт-томоша тадбирларини ташкил этиш ва ўтказиш тартиби;

фонограммадан фойдаланилган ҳолда концерт-томоша тадбирларини ташкил этиш ва ўтказиш тартиби;

жонли ижрода ва фонограммадан қисман фойдаланилган ҳолда ташкил этилган концерт-томоша тадбирлари ташкилотчиларига имтиёзлар бериш тартиби.

4. Шундай тартиб ўрнатилсинки, унга мувофиқ:

а) 2025 йил 1 майдан бошлаб:

Давлат бюджети ва бюджетдан ташқари маблағлар ҳисобидан молиялаштириладиган барча концерт-томоша тадбирларида фонограммадан фойдаланиш босқичма-босқич чекланади;

концерт-томоша тадбирлари рекламаларида тегишлича «Жонли ижро», «Фонограммадан фойдаланган ҳолда жонли овоз» ёки «Фонограммали концерт дастури» деб аниқ кўрсатилиши лозим;

Маданият вазирлиги томонидан ижодкорларни «Ўзбекистон Республикаси халқ артисти», «Ўзбекистон Республикасида хизмат кўрсатган артист» ва «Ўзбекистон Республикаси халқ ҳофизи» давлат мукофотларига тавсия этишда, биринчи навбатда, уларнинг жонли ижро эта олиш қобилияти инобатга олинади;

б) 2025 йил 1 июндан бошлаб «Ўзбекконцерт» ДМ томонидан Реестр юритилади ва унда жонли ижро этувчи шахсларнинг лицензияси рақами ва берилган санаси, унинг ижро этган асарлари, тадбирлардаги иштироки ҳамда оммавий ахборот воситаларидаги чиқишлари тўғрисидаги маълумотлар қайд этилади;

в) 2025 йил 1 июлдан бошлаб:

жонли ижрода ташкил этиладиган концерт-томоша тадбирлари бўйича рекламаларни Ўзбекистон миллий телерадиокомпанияси (кейинги ўринларда — Ўзбекистон МТРК) тизимидаги телерадиоканалларда эфирга бериш учун тадбир ташкилотчисига 30 фоиз миқдорида чегирма берилади;

фонограммадан қисман фойдаланилган ҳолда ташкил этиладиган концерт-томоша тадбирлари ташкилотчилари учун ижара тўловидан (коммунал тўловлар бундан мустасно) 25 фоиз миқдорида чегирма берилади;

фонограммадан қисман фойдаланилган ҳолда ташкил этиладиган концерт-томоша тадбирлари бўйича рекламаларни Ўзбекистон МТРК тизимидаги телерадиоканалларда эфирга бериш учун тадбир ташкилотчисига 15 фоиз миқдорида чегирма берилади;

жонли ижрода ва фонограммадан қисман фойдаланилган ҳолда ташкил этиладиган концерт-томоша тадбирлари Ўзбекистон МТРК тизимидаги телерадиоканалларда тегишли телерадиоканал Бадиий кенгашининг ижобий хулосаси асосида бепул эфирга узатилади.

5. Маданият вазирлигининг 2025 йил 1 июлдан бошлаб ҳар чоракда республиканинг барча ҳудудларида «Жонли ижро ҳафталиги»ни ўтказиш тўғрисидаги таклифига розилик берилсин.

«Жонли ижро ҳафталиги» доирасида:

маданият ва санъат йўналишидаги таълим ташкилотларида жонли ижронинг аҳамиятини тушунтириш бўйича таниқли санъаткорлар иштирокида ижодий учрашувлар ўтказилади;

Ўзбекистон МТРК тизимидаги телерадиоканалларда соҳа экспертлари иштирокида жонли ижронинг аҳамияти ва фонограмманинг салбий жиҳатларига бағишланган «ток-шоулар» ташкил қилинади;

давлат органлари ва ташкилотлари тизимидаги концерт, маданият саройлари ва бошқа муассасаларда жонли ижрода ва фонограммадан қисман фойдаланилган ҳолда концерт-томоша тадбирлари ўтказилади.

6. Давлат органлари ва ташкилотлари бир ой муддатда тизимидаги концерт, маданият саройлари ва бошқа маданият муассасаларида жонли ижрода ва фонограммадан қисман фойдаланилган ҳолда ўтказиладиган концерт-томоша тадбирлари ташкилотчилари учун ижара тўловидан чегирма бериш масаласини кўриб чиқиш бўйича маданият ва санъат соҳаси мутахассислари ҳамда жамоатчилик вакилларидан иборат таркибда комиссияларни ташкил этсин.

7. Маданият вазирлиги:

Рақобатни ривожлантириш ва истеъмолчилар ҳуқуқларини ҳимоя қилиш қўмитаси ҳамда жамоат ташкилотлари билан биргаликда бир ой муддатда фонограммадан фойдаланишда қонунчилик ҳужжатларига риоя этилишини назорат қилиш бўйича 2025-2026 йилларга мўлжалланган комплекс чора-тадбирлар дастурини ишлаб чиқсин ва тасдиқласин;

давлат органлари ва ташкилотлари тизимидаги концерт, маданият саройлари ва бошқа муассасаларда жонли ижрода ва фонограммадан қисман фойдаланилган ҳолда ўтказиладиган концерт-томоша тадбирлари ташкилотчилари учун ижара тўловидан чегирма бериш бўйича кенг жамоатчилик ўртасида тарғибот тадбирларини амалга оширсин;

манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

8. Ушбу қарорнинг бажарилишини назорат қилиш Ўзбекистон Республикаси маданият вазири О.А. Назарбеков зиммасига юклансин.

Вазирлар Маҳкамасининг 2025 йил 8 апрелдаги 207-сон қарорига ИЛОВА

Ўзбекистон Республикасида жонли ижрода ва фонограммадан қисман фойдаланилган ҳолда ҳамда фонограммадан фойдаланилган ҳолда концерт-томоша тадбирларини ташкил этиш ва ўтказиш тартиби тўғрисида

1-боб. Умумий қоидалар

1. Ушбу Низом Ўзбекистон Республикасида жонли ижрода ва фонограммадан қисман фойдаланилган ҳолда ҳамда фонограммадан фойдаланилган ҳолда концерт-томоша тадбирларини ташкил этиш ва ўтказиш тартибини белгилайди.

2. Ушбу Низомда қуйидаги асосий тушунчалардан фойдаланилади:

жонли ижро — мусиқали ёки бошқа асар барча ижрочилар (хонандалар, созандалар, бошловчилар, сўз усталари ва бошқа ижрочилар) томонидан рақамли ёки аналог ахборот ташувчилардаги олдиндан ёзиб олинган аудиоёзувлардан фойдаланмаган ҳолда, ўз овози билан куйлаш ёки ўқиш, шунингдек мусиқий асбобларда ижро этиш йўли билан реал вақт режимида ижро этилади;

комиссия — жонли ижрода ва фонограммадан қисман фойдаланилган ҳолда ўтказиладиган концерт-томоша тадбирлари ташкилотчилари учун оммавий тадбирни ўтказиш объектининг ижара тўловидан чегирма бериш масаласини кўриб чиқиш бўйича комиссия;

концерт-томоша тадбири — мусиқа санъатидаги яккахонлик, якканавозлик ёки жамоа бўлиб кўпчилик томонидан ижро этиладиган, шунингдек, саҳналаштирувчилар томонидан танланган мавзуни ёритадиган, тингловчи ва томошабинлар учун тарбиявий аҳамиятга эга тадбир;

оммавий тадбир — 100 нафар ва ундан ортиқ иштирокчилар қатнашадиган ижтимоий-сиёсий (анжуманлар, конференциялар, съездлар ва бошқалар), маданий-оммавий ва кўнгилочар-томоша дастурлари (мусиқий, адабий ва бошқа фестиваллар, концерт, театр, спорт, реклама тадбирлари, халқ сайиллари, цирк, миллий намойишлар ва ўйинлар, кўрик-танловлар ва бошқалар), шунингдек, умумхалқ, диний, касб байрамларини ўтказиш мақсадида оммавий тадбирни ўтказиш объектида ташкил қилинадиган тадбирлар;

оммавий тадбирни ўтказиш объекти — оммавий тадбирларни ўтказиш учун махсус мўлжалланган ёки мослаштирилган, ёнгинга қарши техник ҳимоя воситалари, тез тиббий ёрдам кўрсатиш, тезкор кўчириш, коммуникация, муҳандис-техник ҳимоя воситалари ва оммавий тадбир иштирокчиларининг хавфсизлигини таъминлашнинг бошқа воситалари ҳамда тизимлари билан жиҳозланган, алоҳида, биринчи ва иккинчи тоифадаги оммавий тадбирларни ўтказиш объектлари рўйхатларига киритилган очиқ жой участкалари, бинолар, иншоотлар, шунингдек, оммавий тадбирлар ўтказишга қулай бўлган кенг майдонлар (маданият-маърифат муассасалари, спорт мажмуалари, тарихий обидалар, далалар, истироҳат боғлари, хиёбонлар ва бошқалар);

оммавий тадбирни ўтказиш объектининг маъмурияти — тасарруфида, фойдаланишида, ихтиёрида оммавий тадбирни ўтказиш объекти жойлашган давлат органи ва ташкилоти, жисмоний ёки юридик шахс;

тадбир ташкилотчиси — концерт-томоша тадбирини ташкил қиладиган ва ўтказадиган давлат органлари ва ташкилотлари, 18 ёшга етган жисмоний шахс, юридик шахс;

фонограммадан қисман фойдаланилган ҳолда — мусиқали ёки бошқа асар товуш элементларининг бир қисми олдиндан ёзиб олинган аудиоёзувлардан фойдаланган ҳолда, қолган элементлар эса реал вақт режимида саҳнада мусиқачилар ва вокалчилар томонидан ижро этилади;

фонограммадан фойдаланилган ҳолда — мусиқали ёки бошқа асарнинг барча товуш элементлари олдиндан ёзиб олинган аудиоёзувлардан фойдаланилади ҳамда мусиқий асарнинг ижросига вокал, чолғу ёки вокал-чолғу ижрочиси (ижрочилари) томонидан бир вақтнинг ўзида тақлид қилинади.

3. Ўзбекистон Республикасида жонли ижрода ва фонограммадан қисман фойдаланилган ҳолда ҳамда фонограммадан фойдаланилган ҳолда концерт-томоша тадбирлари Вазирлар Маҳкамасининг 2014 йил 29 июлдаги 205-сон қарори билан тасдиқланган Оммавий тадбирларни ўтказиш қоидаларига мувофиқ ташкил этилади ва ўтказилади.

2-боб. Концерт-томоша тадбирларини ташкил этиш ва ўтказиш

1-§. Жонли ижродаги концерт-томоша тадбирларини ташкил этиш ва ўтказиш

4. Концерт-томоша тадбирини жонли ижрода ташкил этиш ва ўтказиш тадбир ташкилотчиси томонидан белгиланади.

5. Жонли ижрода ташкил этилган концерт-томоша тадбирида фонограммадан фойдаланишга йўл қўйилмайди.

Бунда концерт-томоша тадбири тўлиқ жонли ижрода ўтказилиши учун тадбир ташкилотчиси масъул ҳисобланади.

6. Тадбир ташкилотчиси ўтказилиши режалаштирилган концерт-томоша тадбирининг жонли ижрода эканлигини оммавий ахборот воситаларида ва ижтимоий тармоқларда ёритиб бориши лозим.

7. Жонли ижродаги концерт-томоша тадбири ташкилотчисига қуйидаги имтиёзлар берилади:

комиссия хулосаси асосида оммавий тадбирни ўтказиш объектида белгиланган ижара тўловидан (коммунал тўловлар бундан мустасно) 50 фоиз миқдорида чегирма;

концерт-томоша тадбири бўйича рекламаларни Ўзбекистон миллий телерадиокомпанияси (кейинги ўринларда — Ўзбекистон МТРК) тизимидаги телерадиоканалларда эфирга бериш учун 30 фоиз миқдорида чегирма;

концерт-томоша тадбирини Ўзбекистон МТРК тизимидаги телерадиоканалларда тегишли телерадиоканал Бадиий кенгашининг ижобий хулосаси асосида бепул эфирга узатиш.

2-§. Фонограммадан қисман фойдаланилган ҳолда ўтказиладиган концерт-томоша тадбирларини ташкил этиш ва ўтказиш

8. Концерт-томоша тадбирини фонограммадан қисман фойдаланилган ҳолда ташкил этиш ва ўтказиш тадбир ташкилотчиси томонидан белгиланади.

Ушбу концерт-томоша тадбирини ўтказишда фонограммадан қисман фойдаланишга рухсат берилади.

Бунда концерт-томоша тадбири фонограммадан қисман фойдаланилган ҳолда ўтказилиши учун тадбир ташкилотчиси масъул ҳисобланади.

9. Тадбир ташкилотчиси ўтказилиши режалаштирилган концерт-томоша тадбирининг фонограммадан қисман фойдаланилган ҳолда ташкил этилишини оммавий ахборот воситаларида ва ижтимоий тармоқларда ёритиб бориши лозим.

10. Фонограммадан қисман фойдаланилган ҳолда ташкил этилган концерт-томоша тадбири ташкилотчисига қуйидаги имтиёзлар берилади:

комиссия хулосаси асосида оммавий тадбирни ўтказиш объектида белгиланган ижара тўловидан (коммунал тўловлар бундан мустасно) 25 фоиз миқдорида чегирма;

концерт-томоша тадбири бўйича рекламаларни Ўзбекистон МТРК тизимидаги телерадиоканалларда эфирга бериш учун 15 фоиз миқдорида чегирма;

концерт-томоша тадбирини Ўзбекистон МТРК тизимидаги телерадиоканалларда тегишли телерадиоканал Бадиий кенгашининг ижобий хулосаси асосида бепул эфирга узатиш.

11. Фонограммадан қисман фойдаланилган ҳолда ташкил этилган концерт-томоша тадбирида жонли ижродан фойдаланилиши мумкин.

3-§. Фонограммадан фойдаланилган ҳолда концерт-томоша тадбирларини ташкил этиш ва ўтказиш

12. Концерт-томоша тадбирини фонограммадан фойдаланилган ҳолда ташкил этиш ва ўтказиш тадбир ташкилотчиси томонидан белгиланади.

13. Тадбир ташкилотчиси ўтказилиши режалаштирилган концерт-томоша тадбирини фонограммадан фойдаланилган ҳолда ўтказилишини оммавий ахборот воситаларида ва ижтимоий тармоқларда ёритиб бориши лозим.

14. Фонограммадан фойдаланилган ҳолда ташкил этилган концерт-томоша тадбири ташкилотчисига жонли ижрода ва фонограммадан қисман фойдаланилган ҳолда ўтказилган концерт-томоша тадбирлари учун белгиланган имтиёзлар қўлланмайди.

15. Фонограммадан фойдаланилган ҳолда ташкил этилган концерт-томоша тадбирида жонли ижро ёки фонограммадан қисман фойдаланилиши мумкин.

3-боб. Комиссия фаолиятини ташкил этиш

16. Комиссия оммавий тадбирни ўтказиш объектининг маъмурияти томонидан маданият ва санъат соҳаси мутахассислари ҳамда жамоатчилик вакиллари иштирокида камида 7 нафар аъзодан иборат таркибда тузилади.

Комиссия аъзоларидан камида уч нафари маданият ва санъат соҳаси мутахассисларидан иборат бўлади.

Комиссия жамоатчилик асосида фаолият юритади.

17. Комиссия аъзоси бир вақтнинг ўзида бошқа бир оммавий тадбирни ўтказиш объектида ташкил этилган комиссия таркибига киритилишига йўл қўйилмайди.

18. Комиссия таркиби комиссия раиси, комиссия раисининг ўринбосари, комиссия аъзолари ва масъул котибидан иборат бўлади.

Комиссия раиси комиссиянинг ишига умумий раҳбарлик қилади, комиссия мажлисларини чақиради ва олиб боради, кун тартибидаги масалаларни овозга қўяди, комиссия томонидан қабул қилинган хулосаларни эълон қилади, комиссия мажлисларининг баённомалари ва бошқа тегишли ҳужжатларни имзолайди ҳамда тасдиқлайди.

Комиссия раиси бўлмаган тақдирда, унинг вазифаларини комиссия раисининг ўринбосари ёки комиссия раиси томонидан ваколат берилган аъзоларидан бири бажаради.

Комиссиянинг ҳар бир аъзоси овоз беришда ёқлаб ёки қарши овоз бериш ҳуқуқига эга.

19. Комиссия мажлиси унинг аъзолари умумий сонининг учдан икки қисми иштирок этган тақдирда, ваколатли ҳисобланади.

Комиссия хулосаси комиссия мажлисида қатнашаётган аъзолар умумий сонининг кўпчилик овози билан қабул қилинади.

20. Комиссия жонли ижрода ёки фонограммадан қисман фойдаланилган ҳолда ўтказиладиган концерт-томоша тадбири ташкилотчиси учун оммавий тадбирни ўтказиш объектининг ижара тўловидан чегирма бериш ёхуд чегирма бермаслик тўғрисида хулоса беради.

Хулоса ўтказилаётган концерт-томоша тадбирини тўлиқ видеога олиш, реал вақт режимида тўлиқ ўрганиш ва таҳлил қилиш натижалари бўйича тайёрланади ҳамда комиссия аъзолари томонидан имзоланади.

21. Комиссия хулосаси уч нусхада расмийлаштирилади ва унинг бир нусхаси тадбир ташкилотчисига, бир нусхаси оммавий тадбирни ўтказиш объектининг маъмуриятига тақдим этилади ҳамда бир нусхаси Комиссияда сақланади.

22. Тадбир ташкилотчиси комиссиянинг хулосасидан норози бўлган тақдирда, белгиланган тартибда ёки суд тартибида шикоят қилиши мумкин.

4-боб. Якунловчи қоида

23. Ушбу Низом талаблари бузилишида айбдор бўлган шахслар қонунчилик ҳужжатларига мувофиқ жавоб беради.

Ўзбекистон Республикасининг Бош вазири А. АРИПОВ

Тошкент ш.,

2025 йил 8 апрель,

207-сон

(Қонунчилик маълумотлари миллий базаси, 09.04.2025 й., 09/25/207/0315-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Konsert-tomosha faoliyatida jonli ijroni yanada ragʻbatlantirish boʻyicha qoʻshimcha chora-tadbirlar toʻgʻrisida

Oʻzbekiston Respublikasi Prezidentining “Madaniyat va sanʼat sohasining jamiyat hayotidagi oʻrni va taʼsirini yanada oshirish chora-tadbirlari toʻgʻrisida” 2020-yil 26-maydagi PF-6000-son Farmoniga muvofiq mamlakatimizda konsert-tomosha faoliyatida jonli ijroni ommalashtirishni izchil davom ettirish, aholining jonli ijroga boʻlgan ehtiyojini inobatga olish va ularning isteʼmolchi sifatidagi huquqlarini himoya qilish, jonli ijroni ragʻbatlantirishning yangi mexanizmlarini joriy etish hamda ushbu yoʻnalishda jamoatchilik nazoratini yanada kuchaytirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2020-yil 26-maydagi PF-6000-son Farmoni bilan 2020-yil 1-sentabrdan boshlab davlat organlari va tashkilotlari tizimidagi konsert, madaniyat saroylari va boshqa muassasalarda toʻliq jonli ijro asosida oʻtkazilgan konsert dasturlari uchun ijara toʻlovidan 50 foiz chegirma berish tartibi joriy etilganligi maʼlumot uchun qabul qilinsin.

2. Madaniyat vazirligining Jonli ijrochilarning reyestrini (keyingi oʻrinlarda — Reyestr) yuritish, Davlat budjeti va budjetdan tashqari mablagʻlar hisobidan oʻtkaziladigan tadbirlarda fonogrammadan foydalanishni bosqichma-bosqich cheklash hamda ushbu yoʻnalishda jamoatchilik nazoratini taʼminlash toʻgʻrisidagi taklifi maʼqullansin.

3. Madaniyat vazirligi bir oy muddatda:

a) quyidagilarni nazarda tutgan holda Oʻzbekiston Respublikasi Madaniyat vazirligi huzuridagi “Oʻzbekkonsert” davlat muassasasining (keyingi oʻrinlarda — “Oʻzbekkonsert” DM) ustavini qayta ishlab chiqib, belgilangan tartibda tasdiqlash hamda davlat roʻyxatidan oʻtkazish choralarini koʻrsin:

konsert-tomosha faoliyatida jonli ijroni ommalashtirish va ragʻbatlantirish boʻyicha tashabbuslarni ilgari surish, fonogrammadan foydalanish tendensiyalarini tizimli ravishda tahlil qilish;

jonli ijroga toʻsqinlik qilayotgan tizimli muammo va kamchiliklarni tahlil qilish hamda bu borada madaniyat vakillari bilan uchrashuvlar oʻtkazib borish;

fonogrammadan foydalanishda qonunchilik hujjatlariga rioya etilishi ustidan nazorat qilish boʻyicha jamoat tashkilotlari bilan hamkorlik qilish;

Reyestrni yuritish, shuningdek, jonli ijrochilarning milliy roʻyxatini shakllantirish hamda rasmiy veb-saytlar va ijtimoiy tarmoqlardagi rasmiy sahifalarda doimiy ravishda eʼlon qilib borish;

madaniyat xodimlari oʻrtasida jonli ijroni ommalashtirish boʻyicha keng targʻibot-tashviqot ishlarini amalga oshirish;

b) “Oʻzbekkonsert” DM markaziy apparati tuzilmasida boshqaruv xodimlarining belgilangan umumiy cheklangan soni va mehnatga haq toʻlash fondi doirasida 3 ta shtat birligidan iborat Jonli ijroni ommalashtirish boʻlimini tashkil etsin;

v) Jonli ijrochilarning reyestrini yuritish tartibini ishlab chiqsin va belgilangan tartibda tasdiqlasin.

3. Quyidagilarni nazarda tutuvchi Oʻzbekiston Respublikasida jonli ijroda va fonogrammadan qisman foydalanilgan holda hamda fonogrammadan foydalanilgan holda konsert-tomosha tadbirlarini tashkil etish va oʻtkazish tartibi toʻgʻrisidagi nizom ilovaga muvofiq tasdiqlansin:

jonli ijrodagi konsert-tomosha tadbirlarini tashkil etish va oʻtkazish tartibi;

fonogrammadan qisman foydalanilgan holda oʻtkaziladigan konsert-tomosha tadbirlarini tashkil etish va oʻtkazish tartibi;

fonogrammadan foydalanilgan holda konsert-tomosha tadbirlarini tashkil etish va oʻtkazish tartibi;

jonli ijroda va fonogrammadan qisman foydalanilgan holda tashkil etilgan konsert-tomosha tadbirlari tashkilotchilariga imtiyozlar berish tartibi.

4. Shunday tartib oʻrnatilsinki, unga muvofiq:

a) 2025-yil 1-maydan boshlab:

Davlat budjeti va budjetdan tashqari mablagʻlar hisobidan moliyalashtiriladigan barcha konsert-tomosha tadbirlarida fonogrammadan foydalanish bosqichma-bosqich cheklanadi;

konsert-tomosha tadbirlari reklamalarida tegishlicha “Jonli ijro”, “Fonogrammadan foydalangan holda jonli ovoz” yoki “Fonogrammali konsert dasturi” deb aniq koʻrsatilishi lozim;

Madaniyat vazirligi tomonidan ijodkorlarni “Oʻzbekiston Respublikasi xalq artisti”, “Oʻzbekiston Respublikasida xizmat koʻrsatgan artist” va “Oʻzbekiston Respublikasi xalq hofizi” davlat mukofotlariga tavsiya etishda, birinchi navbatda, ularning jonli ijro eta olish qobiliyati inobatga olinadi;

b) 2025-yil 1-iyundan boshlab “Oʻzbekkonsert” DM tomonidan Reyestr yuritiladi va unda jonli ijro etuvchi shaxslarning litsenziyasi raqami va berilgan sanasi, uning ijro etgan asarlari, tadbirlardagi ishtiroki hamda ommaviy axborot vositalaridagi chiqishlari toʻgʻrisidagi maʼlumotlar qayd etiladi;

v) 2025-yil 1-iyuldan boshlab:

jonli ijroda tashkil etiladigan konsert-tomosha tadbirlari boʻyicha reklamalarni Oʻzbekiston milliy teleradiokompaniyasi (keyingi oʻrinlarda — Oʻzbekiston MTRK) tizimidagi teleradiokanallarda efirga berish uchun tadbir tashkilotchisiga 30 foiz miqdorida chegirma beriladi;

fonogrammadan qisman foydalanilgan holda tashkil etiladigan konsert-tomosha tadbirlari tashkilotchilari uchun ijara toʻlovidan (kommunal toʻlovlar bundan mustasno) 25 foiz miqdorida chegirma beriladi;

fonogrammadan qisman foydalanilgan holda tashkil etiladigan konsert-tomosha tadbirlari boʻyicha reklamalarni Oʻzbekiston MTRK tizimidagi teleradiokanallarda efirga berish uchun tadbir tashkilotchisiga 15 foiz miqdorida chegirma beriladi;

jonli ijroda va fonogrammadan qisman foydalanilgan holda tashkil etiladigan konsert-tomosha tadbirlari Oʻzbekiston MTRK tizimidagi teleradiokanallarda tegishli teleradiokanal Badiiy kengashining ijobiy xulosasi asosida bepul efirga uzatiladi.

5. Madaniyat vazirligining 2025-yil 1-iyuldan boshlab har chorakda respublikaning barcha hududlarida “Jonli ijro haftaligi”ni oʻtkazish toʻgʻrisidagi taklifiga rozilik berilsin.

“Jonli ijro haftaligi” doirasida:

madaniyat va sanʼat yoʻnalishidagi taʼlim tashkilotlarida jonli ijroning ahamiyatini tushuntirish boʻyicha taniqli sanʼatkorlar ishtirokida ijodiy uchrashuvlar oʻtkaziladi;

Oʻzbekiston MTRK tizimidagi teleradiokanallarda soha ekspertlari ishtirokida jonli ijroning ahamiyati va fonogrammaning salbiy jihatlariga bagʻishlangan “tok-shoular” tashkil qilinadi;

davlat organlari va tashkilotlari tizimidagi konsert, madaniyat saroylari va boshqa muassasalarda jonli ijroda va fonogrammadan qisman foydalanilgan holda konsert-tomosha tadbirlari oʻtkaziladi.

6. Davlat organlari va tashkilotlari bir oy muddatda tizimidagi konsert, madaniyat saroylari va boshqa madaniyat muassasalarida jonli ijroda va fonogrammadan qisman foydalanilgan holda oʻtkaziladigan konsert-tomosha tadbirlari tashkilotchilari uchun ijara toʻlovidan chegirma berish masalasini koʻrib chiqish boʻyicha madaniyat va sanʼat sohasi mutaxassislari hamda jamoatchilik vakillaridan iborat tarkibda komissiyalarni tashkil etsin.

7. Madaniyat vazirligi:

Raqobatni rivojlantirish va isteʼmolchilar huquqlarini himoya qilish qoʻmitasi hamda jamoat tashkilotlari bilan birgalikda bir oy muddatda fonogrammadan foydalanishda qonunchilik hujjatlariga rioya etilishini nazorat qilish boʻyicha 2025-2026-yillarga moʻljallangan kompleks chora-tadbirlar dasturini ishlab chiqsin va tasdiqlasin;

davlat organlari va tashkilotlari tizimidagi konsert, madaniyat saroylari va boshqa muassasalarda jonli ijroda va fonogrammadan qisman foydalanilgan holda oʻtkaziladigan konsert-tomosha tadbirlari tashkilotchilari uchun ijara toʻlovidan chegirma berish boʻyicha keng jamoatchilik oʻrtasida targʻibot tadbirlarini amalga oshirsin;

manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

8. Ushbu qarorning bajarilishini nazorat qilish Oʻzbekiston Respublikasi madaniyat vaziri O.A. Nazarbekov zimmasiga yuklansin.

Vazirlar Mahkamasining 2025-yil 8-apreldagi 207-son qaroriga ILOVA

Oʻzbekiston Respublikasida jonli ijroda va fonogrammadan qisman foydalanilgan holda hamda fonogrammadan foydalanilgan holda konsert-tomosha tadbirlarini tashkil etish va oʻtkazish tartibi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasida jonli ijroda va fonogrammadan qisman foydalanilgan holda hamda fonogrammadan foydalanilgan holda konsert-tomosha tadbirlarini tashkil etish va oʻtkazish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

jonli ijro — musiqali yoki boshqa asar barcha ijrochilar (xonandalar, sozandalar, boshlovchilar, soʻz ustalari va boshqa ijrochilar) tomonidan raqamli yoki analog axborot tashuvchilardagi oldindan yozib olingan audioyozuvlardan foydalanmagan holda, oʻz ovozi bilan kuylash yoki oʻqish, shuningdek musiqiy asboblarda ijro etish yoʻli bilan real vaqt rejimida ijro etiladi;

komissiya — jonli ijroda va fonogrammadan qisman foydalanilgan holda oʻtkaziladigan konsert-tomosha tadbirlari tashkilotchilari uchun ommaviy tadbirni oʻtkazish obyektining ijara toʻlovidan chegirma berish masalasini koʻrib chiqish boʻyicha komissiya;

konsert-tomosha tadbiri — musiqa sanʼatidagi yakkaxonlik, yakkanavozlik yoki jamoa boʻlib koʻpchilik tomonidan ijro etiladigan, shuningdek, sahnalashtiruvchilar tomonidan tanlangan mavzuni yoritadigan, tinglovchi va tomoshabinlar uchun tarbiyaviy ahamiyatga ega tadbir;

ommaviy tadbir — 100 nafar va undan ortiq ishtirokchilar qatnashadigan ijtimoiy-siyosiy (anjumanlar, konferensiyalar, syezdlar va boshqalar), madaniy-ommaviy va koʻngilochar-tomosha dasturlari (musiqiy, adabiy va boshqa festivallar, konsert, teatr, sport, reklama tadbirlari, xalq sayillari, sirk, milliy namoyishlar va oʻyinlar, koʻrik-tanlovlar va boshqalar), shuningdek, umumxalq, diniy, kasb bayramlarini oʻtkazish maqsadida ommaviy tadbirni oʻtkazish obyektida tashkil qilinadigan tadbirlar;

ommaviy tadbirni oʻtkazish obyekti — ommaviy tadbirlarni oʻtkazish uchun maxsus moʻljallangan yoki moslashtirilgan, yonginga qarshi texnik himoya vositalari, tez tibbiy yordam koʻrsatish, tezkor koʻchirish, kommunikatsiya, muhandis-texnik himoya vositalari va ommaviy tadbir ishtirokchilarining xavfsizligini taʼminlashning boshqa vositalari hamda tizimlari bilan jihozlangan, alohida, birinchi va ikkinchi toifadagi ommaviy tadbirlarni oʻtkazish obyektlari roʻyxatlariga kiritilgan ochiq joy uchastkalari, binolar, inshootlar, shuningdek, ommaviy tadbirlar oʻtkazishga qulay boʻlgan keng maydonlar (madaniyat-maʼrifat muassasalari, sport majmualari, tarixiy obidalar, dalalar, istirohat bogʻlari, xiyobonlar va boshqalar);

ommaviy tadbirni oʻtkazish obyektining maʼmuriyati — tasarrufida, foydalanishida, ixtiyorida ommaviy tadbirni oʻtkazish obyekti joylashgan davlat organi va tashkiloti, jismoniy yoki yuridik shaxs;

tadbir tashkilotchisi — konsert-tomosha tadbirini tashkil qiladigan va oʻtkazadigan davlat organlari va tashkilotlari, 18 yoshga yetgan jismoniy shaxs, yuridik shaxs;

fonogrammadan qisman foydalanilgan holda — musiqali yoki boshqa asar tovush elementlarining bir qismi oldindan yozib olingan audioyozuvlardan foydalangan holda, qolgan elementlar esa real vaqt rejimida sahnada musiqachilar va vokalchilar tomonidan ijro etiladi;

fonogrammadan foydalanilgan holda — musiqali yoki boshqa asarning barcha tovush elementlari oldindan yozib olingan audioyozuvlardan foydalaniladi hamda musiqiy asarning ijrosiga vokal, cholgʻu yoki vokal-cholgʻu ijrochisi (ijrochilari) tomonidan bir vaqtning oʻzida taqlid qilinadi.

3. Oʻzbekiston Respublikasida jonli ijroda va fonogrammadan qisman foydalanilgan holda hamda fonogrammadan foydalanilgan holda konsert-tomosha tadbirlari Vazirlar Mahkamasining 2014-yil 29-iyuldagi 205-son qarori bilan tasdiqlangan Ommaviy tadbirlarni oʻtkazish qoidalariga muvofiq tashkil etiladi va oʻtkaziladi.

2-bob. Konsert-tomosha tadbirlarini tashkil etish va oʻtkazish

1-§. Jonli ijrodagi konsert-tomosha tadbirlarini tashkil etish va oʻtkazish

4. Konsert-tomosha tadbirini jonli ijroda tashkil etish va oʻtkazish tadbir tashkilotchisi tomonidan belgilanadi.

5. Jonli ijroda tashkil etilgan konsert-tomosha tadbirida fonogrammadan foydalanishga yoʻl qoʻyilmaydi.

Bunda konsert-tomosha tadbiri toʻliq jonli ijroda oʻtkazilishi uchun tadbir tashkilotchisi masʼul hisoblanadi.

6. Tadbir tashkilotchisi oʻtkazilishi rejalashtirilgan konsert-tomosha tadbirining jonli ijroda ekanligini ommaviy axborot vositalarida va ijtimoiy tarmoqlarda yoritib borishi lozim.

7. Jonli ijrodagi konsert-tomosha tadbiri tashkilotchisiga quyidagi imtiyozlar beriladi:

komissiya xulosasi asosida ommaviy tadbirni oʻtkazish obyektida belgilangan ijara toʻlovidan (kommunal toʻlovlar bundan mustasno) 50 foiz miqdorida chegirma;

konsert-tomosha tadbiri boʻyicha reklamalarni Oʻzbekiston milliy teleradiokompaniyasi (keyingi oʻrinlarda — Oʻzbekiston MTRK) tizimidagi teleradiokanallarda efirga berish uchun 30 foiz miqdorida chegirma;

konsert-tomosha tadbirini Oʻzbekiston MTRK tizimidagi teleradiokanallarda tegishli teleradiokanal Badiiy kengashining ijobiy xulosasi asosida bepul efirga uzatish.

2-§. Fonogrammadan qisman foydalanilgan holda oʻtkaziladigan konsert-tomosha tadbirlarini tashkil etish va oʻtkazish

8. Konsert-tomosha tadbirini fonogrammadan qisman foydalanilgan holda tashkil etish va oʻtkazish tadbir tashkilotchisi tomonidan belgilanadi.

Ushbu konsert-tomosha tadbirini oʻtkazishda fonogrammadan qisman foydalanishga ruxsat beriladi.

Bunda konsert-tomosha tadbiri fonogrammadan qisman foydalanilgan holda oʻtkazilishi uchun tadbir tashkilotchisi masʼul hisoblanadi.

9. Tadbir tashkilotchisi oʻtkazilishi rejalashtirilgan konsert-tomosha tadbirining fonogrammadan qisman foydalanilgan holda tashkil etilishini ommaviy axborot vositalarida va ijtimoiy tarmoqlarda yoritib borishi lozim.

10. Fonogrammadan qisman foydalanilgan holda tashkil etilgan konsert-tomosha tadbiri tashkilotchisiga quyidagi imtiyozlar beriladi:

komissiya xulosasi asosida ommaviy tadbirni oʻtkazish obyektida belgilangan ijara toʻlovidan (kommunal toʻlovlar bundan mustasno) 25 foiz miqdorida chegirma;

konsert-tomosha tadbiri boʻyicha reklamalarni Oʻzbekiston MTRK tizimidagi teleradiokanallarda efirga berish uchun 15 foiz miqdorida chegirma;

konsert-tomosha tadbirini Oʻzbekiston MTRK tizimidagi teleradiokanallarda tegishli teleradiokanal Badiiy kengashining ijobiy xulosasi asosida bepul efirga uzatish.

11. Fonogrammadan qisman foydalanilgan holda tashkil etilgan konsert-tomosha tadbirida jonli ijrodan foydalanilishi mumkin.

3-§. Fonogrammadan foydalanilgan holda konsert-tomosha tadbirlarini tashkil etish va oʻtkazish

12. Konsert-tomosha tadbirini fonogrammadan foydalanilgan holda tashkil etish va oʻtkazish tadbir tashkilotchisi tomonidan belgilanadi.

13. Tadbir tashkilotchisi oʻtkazilishi rejalashtirilgan konsert-tomosha tadbirini fonogrammadan foydalanilgan holda oʻtkazilishini ommaviy axborot vositalarida va ijtimoiy tarmoqlarda yoritib borishi lozim.

14. Fonogrammadan foydalanilgan holda tashkil etilgan konsert-tomosha tadbiri tashkilotchisiga jonli ijroda va fonogrammadan qisman foydalanilgan holda oʻtkazilgan konsert-tomosha tadbirlari uchun belgilangan imtiyozlar qoʻllanmaydi.

15. Fonogrammadan foydalanilgan holda tashkil etilgan konsert-tomosha tadbirida jonli ijro yoki fonogrammadan qisman foydalanilishi mumkin.

3-bob. Komissiya faoliyatini tashkil etish

16. Komissiya ommaviy tadbirni oʻtkazish obyektining maʼmuriyati tomonidan madaniyat va sanʼat sohasi mutaxassislari hamda jamoatchilik vakillari ishtirokida kamida 7 nafar aʼzodan iborat tarkibda tuziladi.

Komissiya aʼzolaridan kamida uch nafari madaniyat va sanʼat sohasi mutaxassislaridan iborat boʻladi.

Komissiya jamoatchilik asosida faoliyat yuritadi.

17. Komissiya aʼzosi bir vaqtning oʻzida boshqa bir ommaviy tadbirni oʻtkazish obyektida tashkil etilgan komissiya tarkibiga kiritilishiga yoʻl qoʻyilmaydi.

18. Komissiya tarkibi komissiya raisi, komissiya raisining oʻrinbosari, komissiya aʼzolari va masʼul kotibidan iborat boʻladi.

Komissiya raisi komissiyaning ishiga umumiy rahbarlik qiladi, komissiya majlislarini chaqiradi va olib boradi, kun tartibidagi masalalarni ovozga qoʻyadi, komissiya tomonidan qabul qilingan xulosalarni eʼlon qiladi, komissiya majlislarining bayonnomalari va boshqa tegishli hujjatlarni imzolaydi hamda tasdiqlaydi.

Komissiya raisi boʻlmagan taqdirda, uning vazifalarini komissiya raisining oʻrinbosari yoki komissiya raisi tomonidan vakolat berilgan aʼzolaridan biri bajaradi.

Komissiyaning har bir aʼzosi ovoz berishda yoqlab yoki qarshi ovoz berish huquqiga ega.

19. Komissiya majlisi uning aʼzolari umumiy sonining uchdan ikki qismi ishtirok etgan taqdirda, vakolatli hisoblanadi.

Komissiya xulosasi komissiya majlisida qatnashayotgan aʼzolar umumiy sonining koʻpchilik ovozi bilan qabul qilinadi.

20. Komissiya jonli ijroda yoki fonogrammadan qisman foydalanilgan holda oʻtkaziladigan konsert-tomosha tadbiri tashkilotchisi uchun ommaviy tadbirni oʻtkazish obyektining ijara toʻlovidan chegirma berish yoxud chegirma bermaslik toʻgʻrisida xulosa beradi.

Xulosa oʻtkazilayotgan konsert-tomosha tadbirini toʻliq videoga olish, real vaqt rejimida toʻliq oʻrganish va tahlil qilish natijalari boʻyicha tayyorlanadi hamda komissiya aʼzolari tomonidan imzolanadi.

21. Komissiya xulosasi uch nusxada rasmiylashtiriladi va uning bir nusxasi tadbir tashkilotchisiga, bir nusxasi ommaviy tadbirni oʻtkazish obyektining maʼmuriyatiga taqdim etiladi hamda bir nusxasi Komissiyada saqlanadi.

22. Tadbir tashkilotchisi komissiyaning xulosasidan norozi boʻlgan taqdirda, belgilangan tartibda yoki sud tartibida shikoyat qilishi mumkin.

4-bob. Yakunlovchi qoida

23. Ushbu Nizom talablari buzilishida aybdor boʻlgan shaxslar qonunchilik hujjatlariga muvofiq javob beradi.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 8-aprel,

207-son

(Qonunchilik maʼlumotlari milliy bazasi, 09.04.2025-y., 09/25/207/0315-son)

lex.uz