📅 2025-yil 8-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 8 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 8 апреля 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 8 April 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
Учқудуқ, Зарафшон, Нуробод шаҳарлари ва Конимех туманининг Зафаробод шаҳарчасидаги бюджет ташкилотлари ходимларига компенсация хусусиятига эга бўлган устама тўлаш тартиби тўғрисидаги низомни тасдиқлаш ҳақида
Ўзбекистон Республикасининг Меҳнат кодексига мувофиқ ноқулай табиий-иқлим шароитларида меҳнат қилаётган бюджет ташкилотлари ходимларини қўшимча рағбатлантириш мақсадида Вазирлар Маҳкамаси қарор қилади:
1. Қуйидагиларни назарда тутувчи Учқудуқ, Зарафшон, Нуробод шаҳарлари ва Конимех туманининг Зафаробод шаҳарчасидаги бюджет ташкилотлари ходимларига компенсация хусусиятига эга бўлган устама тўлаш тартиби тўғрисидаги низом иловага мувофиқ тасдиқлансин:
ноқулай табиий-иқлим шароитларида ишлаганлик учун бюджет ташкилотлари ходимларига ойлик устама миқдорларини белгилаш;
ойлик устамаларни олиш ҳуқуқини берувчи иш стажини ҳисоблаш;
ойлик устамаларни ҳисоблаш ва тўлаш тартиби.
2. Ўзбекистон Республикаси Камбағалликни қисқартириш ва бандлик вазирлиги манфаатдор вазирлик ва идоралар билан биргаликда икки ой муддатда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.
3. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж. А. Қўчқоров ҳамда Ўзбекистон Республикаси камбағалликни қисқартириш ва бандлик вазири Б. Э. Захидов зиммасига юклансин.
Вазирлар Маҳкамасининг 2025 йил 8 апрелдаги 206-сон қарорига ИЛОВА
Учқудуқ, Зарафшон, Нуробод шаҳарлари ва Конимех туманининг Зафаробод шаҳарчасидаги бюджет ташкилотлари ходимларига компенсация хусусиятига эга бўлган устама тўлаш тартиби тўғрисида
1. Мазкур Низом Учқудуқ, Зарафшон, Нуробод шаҳарлари ва Конимех тумани Зафаробод шаҳарчасидаги (кейинги ўринларда — шаҳарлар) бюджет ҳисобидан молиялаштириладиган ташкилотлар, шу жумладан маҳаллалар уюшмаси ва маҳаллалар (кейинги ўринларда — бюджет ташкилотлари) ходимларига компенсация хусусиятига эга бўлган устама тўлаш тартибини белгилайди.
2. Шаҳарлардаги бюджет ташкилотлари ходимларига ноқулай табиий-иқлим шароитларида ишлаганлик учун ойлик устама тўловлари (кейинги ўринларда — ойлик устама) бюджет ташкилотларида ишлаган иш стажидан келиб чиқиб, қуйидаги миқдорларда белгиланади:
3 йилгача иш стажига эга бўлган ходимларга тариф ставкасининг (лавозим маошининг) 0,25 коэффициенти;
3 йилдан 5 йилгача иш стажига эга бўлган ходимларга тариф ставкасининг (лавозим маошининг) 0,5 коэффициенти;
5 йилдан ортиқ иш стажига эга бўлган ходимларга тариф ставкасининг (лавозим маошининг) 0,75 коэффициенти.
3. Белгиланган миқдордаги ойлик устамаларни олиш ҳуқуқи ходимлар бюджет ташкилотларида ишлашни бошлаган вақтдан юзага келади.
4. Ойлик устамани олиш ҳуқуқини берувчи иш стажига қуйидагилар киритилади:
шаҳарлардаги бюджет ташкилотларида ходимнинг ишлаган даври;
ходим ҳақиқатда ишламаган бўлса ҳам, лекин қонунчиликка асосан шаҳарлардаги бюджет ташкилотларида ходимнинг иш жойи (лавозими) сақланган даври;
«Навоий кон-металлургия комбинати» акциядорлик жамияти, «Навоийуран» давлат корхонаси ва «Навоий кон-металлургия комбинати жамғармаси» давлат муассасаси тизимидан Ўзбекистон Республикаси Мактабгача ва мактаб таълим вазирлиги тизимига ўтказилган мактабгача таълим ташкилотлари ходимларининг ушбу корхоналарда ишлаган даври.
5. Ходимнинг меҳнат дафтарчаси ҳамда «Ягона миллий меҳнат тизими» идоралараро дастурий-аппарат комплексида автоматик тарзда шакллантириладиган, электрон рақамли имзо билан тасдиқланган электрон меҳнат дафтарчаси меҳнат стажини тасдиқловчи асосий ҳужжат ҳисобланади.
6. Ойлик устамалар бюджет маблағлари ҳисобидан иш ҳақи олувчи ходимнинг ойлик тариф ставкасидан ёки лавозим маошидан келиб чиқиб ҳисобланади.
7. Ойлик устамалар шу ой давомида ишлаган вақти, шунингдек, қонунчилик ҳужжатларига асосан ходимнинг тўлиқ ёки қисман ойлик иш ҳақи сақланган даврлари учун ҳам тўланади.
8. Агар ходимда календарь ой давомида ойлик устама олиш ҳуқуқи пайдо бўлса, ушбу устамани ходимга биринчи марта мазкур устамани олиш ҳуқуқи пайдо бўлгандан кейин ишлаган вақт учун ҳисобланади.
9. Ойлик устамалар ноқулай табиий-иқлим шароитларидаги иш учун меҳнатга ҳақ тўлаш коэффициенти қўлланадиган меҳнат ҳақига қўшиб ҳисобланади.
10. Ойлик устамалар иш берувчилар томонидан қонунчилик ҳужжатларида ҳамда бюджет ташкилоти жамоа шартномасида белгиланган муддатларда бюджет маблағлари ҳисобидан тўланади.
11. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Ўзбекистон Республикасининг Бош вазири А. АРИПОВ
Тошкент ш.,
2025 йил 8 апрель,
206-сон
Oʻzbekiston Respublikasi Vazirlar Mahkamasining
qarori
NIZOM
Uchquduq, Zarafshon, Nurobod shaharlari va Konimex tumanining Zafarobod shaharchasidagi budjet tashkilotlari xodimlariga kompensatsiya xususiyatiga ega boʻlgan ustama toʻlash tartibi toʻgʻrisidagi nizomni tasdiqlash haqida
Oʻzbekiston Respublikasining Mehnat kodeksiga muvofiq noqulay tabiiy-iqlim sharoitlarida mehnat qilayotgan budjet tashkilotlari xodimlarini qoʻshimcha ragʻbatlantirish maqsadida Vazirlar Mahkamasi qaror qiladi:
1. Quyidagilarni nazarda tutuvchi Uchquduq, Zarafshon, Nurobod shaharlari va Konimex tumanining Zafarobod shaharchasidagi budjet tashkilotlari xodimlariga kompensatsiya xususiyatiga ega boʻlgan ustama toʻlash tartibi toʻgʻrisidagi nizom ilovaga muvofiq tasdiqlansin:
noqulay tabiiy-iqlim sharoitlarida ishlaganlik uchun budjet tashkilotlari xodimlariga oylik ustama miqdorlarini belgilash;
oylik ustamalarni olish huquqini beruvchi ish stajini hisoblash;
oylik ustamalarni hisoblash va toʻlash tartibi.
2. Oʻzbekiston Respublikasi Kambagʻallikni qisqartirish va bandlik vazirligi manfaatdor vazirlik va idoralar bilan birgalikda ikki oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
3. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J. A. Qoʻchqorov hamda Oʻzbekiston Respublikasi kambagʻallikni qisqartirish va bandlik vaziri B. E. Zaxidov zimmasiga yuklansin.
Vazirlar Mahkamasining 2025-yil 8-apreldagi 206-son qaroriga ILOVA
Uchquduq, Zarafshon, Nurobod shaharlari va Konimex tumanining Zafarobod shaharchasidagi budjet tashkilotlari xodimlariga kompensatsiya xususiyatiga ega boʻlgan ustama toʻlash tartibi toʻgʻrisida
1. Mazkur Nizom Uchquduq, Zarafshon, Nurobod shaharlari va Konimex tumani Zafarobod shaharchasidagi (keyingi oʻrinlarda — shaharlar) budjet hisobidan moliyalashtiriladigan tashkilotlar, shu jumladan mahallalar uyushmasi va mahallalar (keyingi oʻrinlarda — budjet tashkilotlari) xodimlariga kompensatsiya xususiyatiga ega boʻlgan ustama toʻlash tartibini belgilaydi.
2. Shaharlardagi budjet tashkilotlari xodimlariga noqulay tabiiy-iqlim sharoitlarida ishlaganlik uchun oylik ustama toʻlovlari (keyingi oʻrinlarda — oylik ustama) budjet tashkilotlarida ishlagan ish stajidan kelib chiqib, quyidagi miqdorlarda belgilanadi:
3 yilgacha ish stajiga ega boʻlgan xodimlarga tarif stavkasining (lavozim maoshining) 0,25 koeffitsiyenti;
3 yildan 5 yilgacha ish stajiga ega boʻlgan xodimlarga tarif stavkasining (lavozim maoshining) 0,5 koeffitsiyenti;
5 yildan ortiq ish stajiga ega boʻlgan xodimlarga tarif stavkasining (lavozim maoshining) 0,75 koeffitsiyenti.
3. Belgilangan miqdordagi oylik ustamalarni olish huquqi xodimlar budjet tashkilotlarida ishlashni boshlagan vaqtdan yuzaga keladi.
4. Oylik ustamani olish huquqini beruvchi ish stajiga quyidagilar kiritiladi:
shaharlardagi budjet tashkilotlarida xodimning ishlagan davri;
xodim haqiqatda ishlamagan boʻlsa ham, lekin qonunchilikka asosan shaharlardagi budjet tashkilotlarida xodimning ish joyi (lavozimi) saqlangan davri;
“Navoiy kon-metallurgiya kombinati” aksiyadorlik jamiyati, “Navoiyuran” davlat korxonasi va “Navoiy kon-metallurgiya kombinati jamgʻarmasi” davlat muassasasi tizimidan Oʻzbekiston Respublikasi Maktabgacha va maktab taʼlim vazirligi tizimiga oʻtkazilgan maktabgacha taʼlim tashkilotlari xodimlarining ushbu korxonalarda ishlagan davri.
5. Xodimning mehnat daftarchasi hamda “Yagona milliy mehnat tizimi” idoralararo dasturiy-apparat kompleksida avtomatik tarzda shakllantiriladigan, elektron raqamli imzo bilan tasdiqlangan elektron mehnat daftarchasi mehnat stajini tasdiqlovchi asosiy hujjat hisoblanadi.
6. Oylik ustamalar budjet mablagʻlari hisobidan ish haqi oluvchi xodimning oylik tarif stavkasidan yoki lavozim maoshidan kelib chiqib hisoblanadi.
7. Oylik ustamalar shu oy davomida ishlagan vaqti, shuningdek, qonunchilik hujjatlariga asosan xodimning toʻliq yoki qisman oylik ish haqi saqlangan davrlari uchun ham toʻlanadi.
8. Agar xodimda kalendar oy davomida oylik ustama olish huquqi paydo boʻlsa, ushbu ustamani xodimga birinchi marta mazkur ustamani olish huquqi paydo boʻlgandan keyin ishlagan vaqt uchun hisoblanadi.
9. Oylik ustamalar noqulay tabiiy-iqlim sharoitlaridagi ish uchun mehnatga haq toʻlash koeffitsiyenti qoʻllanadigan mehnat haqiga qoʻshib hisoblanadi.
10. Oylik ustamalar ish beruvchilar tomonidan qonunchilik hujjatlarida hamda budjet tashkiloti jamoa shartnomasida belgilangan muddatlarda budjet mablagʻlari hisobidan toʻlanadi.
11. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 8-aprel,
206-son