📅 2025-yil 19-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 19 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 19 апреля 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 19 April 2025 · Cabinet of Ministers resolutions
Official text. Official document. Editorial notes are not included.
ЎЗБЕКИСТОН РЕСПУБЛИКАСИ ВАЗИРЛАР МАҲКАМАСИ
ҚАРОРИ
МИҚДОРИЙ НОРМАЛАРИ
МИҚДОРИЙ НОРМАЛАРИ
НИЗОМ
СХЕМАСИ
РЎЙХАТИ
Айрим турдаги товарларни божхона чегараси орқали олиб ўтиш тартибини янада такомиллаштириш чора-тадбирлари тўғрисида
Ўзбекистон Республикаси Президентининг «Ишлаб чиқариш, экспорт ва тадбиркорлик фаолиятини рағбатлантириш, савдо ва саноат сиёсати самарадорлигини ошириш чора-тадбирлари тўғрисида» 2025 йил 18 апрелдаги ПФ-67-сон Фармони билан товарларнинг божхона қийматини аниқлашда асоссиз имтиёзлар ёки махсус божхона расмийлаштируви тартибларини қўллашга йўл қўйилмаслиги ҳамда божсиз олиб кириш меъёрлари ва божхона расмийлаштируви шартлари жаҳон стандартларидан келиб чиққан ҳолда белгиланишини эътиборга олиб, Вазирлар Маҳкамаси қарор қилади:
1. 2025 йил 1 майдан эътиборан жисмоний шахслар томонидан шахсий эҳтиёжи учун нотижорат мақсадларида республикага олиб кириладиган товарларнинг божсиз олиб кириш нормалари қуйидаги миқдорларда белгилансин:
ҳаво транспортида — 1000 АҚШ доллари;
темир йўл ва дарё транспортида — 500 АҚШ доллари;
автомобиль (пиёда) ўтказиш пунктлари орқали — 300 АҚШ доллари;
халқаро курьерлик жўнатмалари орқали — 200 АҚШ доллари;
халқаро почта жўнатмалари орқали — 100 АҚШ доллари.
2. Қуйидагилар:
Жисмоний шахслар томонидан республикага божсиз олиб кириладиган айрим товарларнинг миқдорий нормалари 1-иловага мувофиқ;
Жисмоний шахслар томонидан айрим турдаги товарларни республикадан божсиз олиб чиқишнинг миқдорий нормалари 2-иловага мувофиқ;
Жисмоний шахслар томонидан Ўзбекистон Республикаси божхона чегараси орқали товарларни олиб ўтиш мақсадини аниқлаш тартиби тўғрисидаги низом 3-иловага мувофиқ;
Эркин муомалага чиқариш (импорт) божхона режимига жойлаштиришда божхона қиймати ва миқдори алоҳида назорат қилинадиган товарлар рўйхати 4-иловага мувофиқ тасдиқлансин.
3. Белгилансинки:
а) темир йўл ва дарё транспортида ҳамда автомобиль ўтказиш пунктлари орқали нотижорат мақсадларида товарларни олиб кираётган шахс хорижий давлатда икки календарь кундан, ҳаво транспортида уч календарь кундан кам муддат бўлганда, божсиз олиб кириш нормалари қўлланилмайди, бунда ушбу товарларга божсиз олиб кириш нормасидан ортиқ деб қаралади ҳамда товарнинг тўлиқ қийматидан ягона божхона тўлови ундирилади;
б) халқаро курьерлик жўнатмалари орқали жисмоний шахслар номига олиб келинадиган товарларга нисбатан божсиз олиб киришнинг белгиланган нормалари бир календарь ой давомида қўлланади;
в) жисмоний шахслар томонидан қиймати 5 000 АҚШ доллари эквивалентигача бўлган товарлар божхона декларациясини тақдим этмаган ҳолда республикадан олиб чиқилиши мумкин, қонунчилик ҳужжатлари билан экспорт божхона божи ставкалари белгиланган товарлар бундан мустасно.
Бунда ушбу қиймат доирасидаги тижорат мақсадидаги товарлар товарнинг кузатув ҳужжатларидан фойдаланилган ҳолда статистик мақсадлар учун божхона органлари томонидан ҳисоби юритилади ҳамда республика экспорт ҳажмида инобатга олинади;
г) жисмоний шахслар Ўзбекистон Республикасида ишлаб чиқарилган қимматбаҳо металлардан тайёрланган ўлчовли ёмбилар ва Марказий банкнинг қимматбаҳо металлардан тайёрланган тангаларни уларнинг сертификатлари мавжуд бўлган ҳолларда, республика ҳудудидан ташқарига чекловларсиз олиб чиқишга ва уларнинг қиймати ушбу банднинг «в» кичик бандида белгиланган қийматдан ошганда, йўловчи божхона декларациясини тўлдириб олиб чиқишга рухсат берилади;
д) ушбу қарорга 4-иловада келтирилган товарларнинг божхона юк декларациялари охирги тўқсон календарь кун ичида декларация қилинган шунга ўхшаш товарларнинг ўртача божхона қийматининг 80 фоизидан кам бўлмаган ҳолларда расмийлаштирилади;
е) 2025 йил 1 майдан эътиборан чет элдан республика ҳудудига қуруқ сут олиб киришга қўйилган чеклов бекор қилинади.
4. Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров Божхона қўмитаси билан биргаликда ички бозорда тенг рақобат муҳитини таъминлаш учун ушбу қарорга 4-иловада келтирилган товарларга нисбатан уларнинг қиймати ва миқдорини назорат қилишнинг самарали механизмини жорий қилиш ва ҳар қандай истиснолар татбиқ этилишига йўл қўймаслик чораларини кўрсин.
Бунда божхона чегараси орқали олиб кирилаётган мазкур турдаги товарларни инспекцион кўрик мажмуалари ва бошқа техник воситалар орқали назоратдан ўтказиш чоралари кўрилсин.
5. Ўзбекистон Миллий ахборот агентлиги ва Ўзбекистон Миллий телерадиокомпанияси Божхона қўмитаси билан биргаликда оммавий ахборот воситалари орқали ушбу қарорнинг мазмун-моҳиятини тушунтириш бўйича мавзуга оид туркум материаллар чоп этилиши, эшиттиришлар ва теледастурлар эфирга узатилишини ташкил этсин.
6. Транспорт вазирлиги «Uzbekistan airways» АЖ ва «Ўзбекистон темир йўллари» АЖ билан биргаликда ушбу қарор билан тасдиқланаётган Жисмоний шахслар томонидан республикага божсиз олиб кириладиган айрим товарларнинг миқдорий нормалари бўйича ахборотларни йўловчиларга ташиш вақтида етказиш чораларини кўрсин.
7. Ички ишлар вазирлиги ва Миллий гвардия чегара божхона постларида фуқаролар томонидан ваколатли давлат органлари мансабдор шахсларининг қонуний талабларига бўйсунмаслик, уюшган ҳолда қаршилик қилиш ҳамда жамоат тартибини бузиш ҳолатларининг олдини олиш бўйича Божхона қўмитаси билан ҳамкорликни йўлга қўйсин.
8. Соғлиқни сақлаш вазирлиги Божхона қўмитаси билан биргаликда жисмоний шахслар томонидан аввал фойдаланишда бўлган товарларда инсон учун хавф туғдирувчи воситалар олиб кирилишининг олдини олиш бўйича чора-тадбирларни белгиласин.
9. Божхона қўмитаси:
а) ушбу қарор билан жорий этилаётган нормалар ва тартиботларни амалиётда тўғри қўллаш юзасидан божхона органлари ходимлари ўртасида мавзули ўқув машғулотларини ташкил этсин;
б) божхона назорати ва расмийлаштируви жараёнларини соддалаштириш ва рақамлаштириш мақсадида чегара божхона постларини инфокиоск ҳамда планшетлар билан таъминлаш чораларини кўрсин;
в) божхона қийматини пасайтириш хавфи даражаси юқори бўлган товарларни аниқлаш мақсадида импорт божхона юк декларацияларини хорижий мамлакатлар экспорт декларациялари билан солиштириш тизимини йўлга қўйиш чораларини кўрсин;
г) уч ой муддатда манфаатдор вазирлик ва идоралар билан биргаликда:
халқаро почта ва курьерлик жўнатмаларини электрон маълумотлар асосида соддалаштирилган тартибда божхона назорати ва расмийлаштирувидан ўтказиш тартибини белгиловчи Ҳукумат қарори лойиҳасини;
қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисидаги таклифларни Вазирлар Маҳкамасига киритсин.
10. Вазирлар Маҳкамасининг «Жисмоний шахслар томонидан Ўзбекистон Республикаси божхона чегараси орқали товарларни олиб ўтиш мақсадини аниқлаш тартиби тўғрисидаги низомни тасдиқлаш ҳақида» 2020 йил 12 майдаги 281-сон қарори ўз кучини йўқотган деб ҳисоблансин.
11. Ушбу қарор расмий эълон қилинган кундан эътиборан уч ой ўтгач кучга киради.
Ушбу қарорнинг 1-банди , 2-бандининг бешинчи хатбошиси , 3-бандининг «д» ва «е» кичик бандлари ҳамда унга 4-илова 2025 йил 1 майдан эътиборан амал қилади.
12. Мазкур қарорнинг бажарилишини назорат қилиш Ўзбекистон Республикасининг Бош вазири ўринбосари — иқтисодиёт ва молия вазири Ж.А. Қўчқоров зиммасига юклансин.
Вазирлар Маҳкамасининг 2025 йил 19 апрелдаги 244-сон қарорига 1-ИЛОВА
Жисмоний шахслар томонидан республикага божсиз олиб кириладиган айрим товарларнинг
Т/р Товарнинг номи Чекланган миқдор (сони, ҳажми) 1. Ўзбекистон Республикаси ТИФ ТН 2203-2208 товар позициясида таснифланувчи алкоголь маҳсулоти, шу жумладан, пиво 2 литр 2. Қуйидаги тамаки маҳсулотларидан бири: Ўзбекистон Республикаси ТИФ ТН 2402 20 товар позициясида таснифланувчи сигарет; 200 дона Ўзбекистон Республикаси ТИФ ТН 2402 10 0 00 0 товар позициясида таснифланувчи сигара; 5 дона Ўзбекистон Республикаси ТИФ ТН 2403 товар позициясида таснифланувчи тамаки (табак) 100 гр 3. Ўзбекистон Республикаси ТИФ ТН 3303 товар позициясида таснифланувчи атир ва ифор тарқатувчи сувлар 3 дона (300 мл.дан ошмаган миқдорда) 4. Биологик фаол қўшимчалар: 10 та турли номдаги ва бирламчи қадоқда бўлган (умумий оғирлиги 3 кг дан ҳамда ҳар бир номдаги биологик фаол қўшимча 1 та қадоқдан ошмаган миқдорда)
Вазирлар Маҳкамасининг 2025 йил 19 апрелдаги 244-сон қарорига 2-ИЛОВА
Жисмоний шахслар томонидан айрим турдаги товарларни республикадан божсиз олиб чиқишнинг
Т/р Товарнинг номи Миқдори 1. Гуруч Умумий оғирлиги 3 кгдан кўп бўлмаган 2. Нон-булка маҳсулотлари Умумий оғирлиги 5 кгдан кўп бўлмаган 3. Гўшт ва гўшт озиқ-овқат маҳсулотлари Умумий оғирлиги 2 кгдан кўп бўлмаган 4. Шакар Умумий оғирлиги 2 кгдан кўп бўлмаган 5. Ўсимлик ёғи Умумий оғирлиги 2 кгдан кўп бўлмаган 6. Янги узилган мева-сабзавот маҳсулотлари, узум, полиз экинлари, дуккакли ўсимликлар ҳамда қуритилган сабзавот ва мевалар Умумий оғирлиги 40 кгдан кўп бўлмаган
Вазирлар Маҳкамасининг 2025 йил 19 апрелдаги 244-сон қарорига 3-ИЛОВА
Жисмоний шахслар томонидан Ўзбекистон Республикаси божхона чегараси орқали товарларни олиб ўтиш мақсадини аниқлаш тартиби тўғрисида
1-боб. Умумий қоидалар
1. Ушбу Низом Жисмоний шахслар томонидан Ўзбекистон Республикаси божхона чегараси (кейинги ўринларда — божхона чегараси) орқали товарларни олиб ўтиш мақсадини аниқлаш тартибини белгилайди.
2. Ушбу Низомда қуйидаги асосий тушунчалардан фойдаланилади:
нотижорат мақсадлар учун товарлар — жисмоний шахслар томонидан божхона чегараси орқали олиб ўтиладиган шахсий, оилавий (ота-онаси, турмуш ўртоғи ва фарзандлари) эҳтиёжлари учун мўлжалланган ҳамда тадбиркорлик ёки бошқа тижорат фаолиятини амалга ошириш билан боғлиқ бўлмаган товарлар;
тижорат мақсадлар учун товарлар — божхона чегараси орқали олиб ўтиладиган ишлаб чиқариш, тадбиркорлик ёки бошқа тижорат фаолияти учун мўлжалланган товарлар.
3. Жисмоний шахслар томонидан божхона чегараси орқали олиб ўтиладиган товарлар нотижорат мақсадлари учун товарлар тоифасига жисмоний шахс (ўн олти ёшга тўлмаган жисмоний шахслар томонидан олиб ўтиладиган товарларни уларни кузатиб бораётган шахс) томонидан декларациялаш йўли билан киритилади.
4. Ушбу Низом қоидалари қуйидаги тоифадаги товарларга нисбатан татбиқ этилмайди:
маълум тоифадаги шахслар (халқаро ташишлар билан банд бўлган ҳайдовчилар, хизмат сафари бўйича ҳаракатланаётган шахслар ва делегация аъзолари), шунингдек, хорижий давлатлардан Ўзбекистон Республикасига доимий яшаш учун кўчиб келаётган шахслар томонидан олиб ўтиладиган товарлар;
илгари фойдаланишда бўлган нотижорат мақсадларига мўлжалланган товарлар, транспорт воситалари бундан мустасно.
Қуйидагилар илгари фойдаланишда бўлган нотижорат мақсадлари учун мўлжалланган товарлар ҳисобланади:
Ўзбекистон Республикасида доимий яшаш жойига эга бўлган шахс томонидан Ўзбекистон Республикасидан жўнаб кетишда ва Ўзбекистон Республикасига қайтиб келишда ўзи билан бирга бўлган фойдаланилган шахсий товарлар;
Ўзбекистон Республикасида доимий яшаш жойига эга бўлмаган шахслар томонидан Ўзбекистон Республикасига кириб келишда ва Ўзбекистон Республикасидан жўнаб кетишда ўзи билан бирга бўлган фойдаланилган шахсий товарлар.
5. Жисмоний шахслар томонидан Ўзбекистон Республикаси божхона чегараси орқали товарларни олиб ўтишда божхона расмийлаштируви ушбу Низомга иловага мувофиқ схема асосида амалга оширилади.
2-боб. Жисмоний шахслар томонидан божхона чегараси орқали товарларни олиб ўтиш мақсадини аниқлаш
6. Жисмоний шахслар томонидан божхона чегараси орқали товарларни олиб ўтиш мақсадини божхона органининг мансабдор шахси товарларнинг миқдори, хусусияти ва олиб ўтилишининг такрорийлиги ва сафарнинг ҳолатлари, шунингдек, божхона чегараси орқали олиб ўтиладиган товарлар жисмоний шахс ва унинг оила аъзолари шахсий эҳтиёжлари учун мўлжалланганлигини инобатга олиб, шу жумладан, хавфни бошқариш тизимини қўллаган ҳолда аниқлайди.
7. Божхона органи мансабдор шахси товарни олиб ўтиш мақсадини аниқлаш тўғрисида қарор қабул қилишда қуйидаги мезонларга асосланади:
товарларнинг хусусияти — товарларнинг истеъмол хусусиятлари, тижорат мақсадида фойдаланиш билан боғлиқ бўлмаган, жисмоний шахсларнинг шахсий, оилавий ва маиший эҳтиёжларини қондириш учун мўлжаллангани инобатга олинади;
товарларнинг миқдори — товарларни олиб ўтаётган жисмоний шахс ва унинг оила аъзолари эҳтиёжларидан ортиқ миқдордаги бир турдаги (бир номда, бир ўлчамдаги, бир шакл, ҳамда рангда ва бошқалар, шунингдек, бир кишилик кийим жамланмасидан (комплектдан) ортиқ бўлган) товарларга, агар товарларни олиб ўтаётган шахс аксини исботлаб бермаса, тижорат мақсадида фойдаланиш учун олиб кирилаётган товарлар деб эътироф этилади;
товарларни олиб ўтишнинг такрорийлиги — айни бир жисмоний шахс томонидан бир турдаги товарлар оз миқдорда бўлса-да, бир неча бор олиб кирилишига, агар товарларни олиб ўтаётган шахс аксини исботлаб бермаса, тижорат мақсадида фойдаланиш учун олиб кирилаётган товарлар деб эътироф этилади. Чегара хизмати органлари томонидан чет элга чиқиш биометрик паспортига қўйиладиган белги (штамп) ёки рўйхатга олиш ҳақидаги электрон маълумот Ўзбекистон Республикаси Давлат чегараси орқали ўтказиш пунктидан ўтиш такрорийлигини аниқлаш учун асос ҳисобланади;
сафарнинг ҳолатлари — сафарнинг мақсади ва давомийлиги, келиш давлати инобатга олинади;
ҳуқуқни муҳофаза қилувчи органлардан товарлар ва уларни олиб ўтаётган жисмоний шахслар тўғрисида келиб тушган маълумотлар;
халқаро почта ва халқаро курьерлик жўнатмаларини олувчи жисмоний шахснинг (шу жумладан, унинг 16 ёшга тўлмаган фарзандларининг) ёши товарларнинг хусусиятлари билан мувофиқлиги;
бир манзилда яшовчи бир ёки бир неча жисмоний шахс томонидан олиб ўтиладиган бир хил турдаги товарларни олиб ўтиш такрорийлиги. Товарларни олиб ўтиш мақсадини аниқлаш тўғрисида қарор қабул қилишда оила таркиби (товарларни олиб ўтаётган шахс томонидан тасдиқланган тақдирда), кўрсатиб ўтилган товар турларига шахснинг одатий эҳтиёжи ва олиб ўтиладиган товарлар турлари ҳам инобатга олинади;
халқаро почта ва халқаро курьерлик жўнатмалари учун божхона юк декларациясида кўрсатилган товарларни қабул қилувчи манзилнинг жисмоний шахс ҳақиқатда рўйхатдан ўтган жойи билан фарқлилиги.
8. Ушбу Низомнинг 7-бандида кўрсатилган мезонлардан бирининг мавжудлиги, божхона чегараси орқали жисмоний шахс ва унинг оила аъзолари томонидан олиб ўтиладиган товарлар белгиланган нормалардан ортиқ бўлганда, улар нотижорат мақсадлари учун мўлжалланмаган товарлар деб (шахсий фойдаланиш ёки истеъмол мақсадида эмаслиги) тахмин қилишга асос бўлади.
9. Ўзбекистон Республикаси божхона ҳудудига кузатиб борилаётган ва (ёки) кузатиб борилмаётган багажларда нотижорат мақсадлари учун товарларни божсиз олиб кириш нормалари йўналиш ва етиб бориш манзилида зарур ҳамда илгари фойдаланишда бўлган шахсий эҳтиёжлар учун мўлжалланган товарларни ҳисобга олмаган ҳолда қуйидаги мезонлар асосида аниқланади:
йўналиш ва (ёки) етиб бориш манзилида анъанавий (одатда) тартибда фойдаланиш амалиёти, шунингдек, мавсумийлиги, саёҳат мақсади, транспорт тури, давлат божхона чегарасидан ўтиш такрорийлиги;
эскириш ва бошқа ишлатилганлик белгилари (қирилиш, букилиш ва бошқа механик шикаст) мавжудлиги;
биркалар, ёрлиқлар, ишлаб чиқарувчи ўрови мавжуд эмаслиги;
товарларни одатий тартибда фойдаланиш учун етарли бўлган даражада битта ёки бошқа миқдорда, шу жумладан мавсумийлиги, саёҳат мақсади, транспорт тури, йўналиш давомида ёки етиб бориш манзилида объектив заруратлилиги.
3-боб. Жисмоний шахслар томонидан божхона чегараси орқали олиб ўтиладиган товарларга нисбатан божхона тўловларини тўлаш
10. Жисмоний шахслар томонидан олиб кирилаётган товарлар божсиз олиб кириш нормасидан ва Жисмоний шахслар томонидан республикага божсиз олиб кириладиган айрим товарларнинг миқдорий нормаларидан ортганда, Ўзбекистон Республикаси Ташқи иқтисодий фаолият товар номенклатураси кодидан ва келиб чиқиш мамлакатидан қатъи назар, ушбу товарларнинг божхона қийматидан келиб чиққан ҳолда, мазкур нормалардан ортиқ қисмига нисбатан ягона божхона тўлови ундирилади.
11. Темир йўл ва дарё транспортида ҳамда автомобиль ўтказиш пунктлари орқали нотижорат мақсадларида товарларни олиб кираётган шахс хорижий давлатда икки календарь кундан, ҳаво транспортида уч календарь кундан кам муддат бўлган тақдирда ва (ёки) бир календарь ой давомида хорижий давлатда уч ва ундан ортиқ маротаба бўлганда, божсиз олиб кириш нормалари қўлланилмайди ва товарнинг тўлиқ қийматидан ягона божхона тўлови ундирилади.
12. Жисмоний шахслар томонидан тижорат мақсадларида товарлар божхона чегараси орқали олиб ўтилганда, уларга нисбатан божхона қонунчилик ҳужжатларида белгиланган умумий божхона расмийлаштируви қоидалари олиб ўтилаётган товарларнинг умумий миқдорига нисбатан қўлланади.
Бунда товарларнинг божхона қиймати базавий ҳисоблаш миқдорининг ўттиз бараваридан кам бўлганда, уларга нотариф чоралари қўлланилмаган ҳолда ва божхона тўловлари умумий белгиланган ставкаларда божхона кирим ордери орқали божхона расмийлаштирувидан ўтказилади.
Товарларнинг божхона қиймати базавий ҳисоблаш миқдорининг ўттиз бараваридан кўп бўлганда, уларга нотариф чоралар қўлланилган ва божхона тўловлари умумий белгиланган ставкаларда божхона юк декларацияси орқали божхона расмийлаштирувидан ўтказилади.
13. Жисмоний шахс божхона органи мансабдор шахсининг божхона чегараси орқали товарларни олиб ўтиш мақсадини аниқлаш бўйича қабул қилган қарори юзасидан қонунчиликда белгиланган тартибда юқори турувчи мансабдор шахсга ҳамда судга шикоят билан мурожаат қилиши мумкин.
4-боб. Якунловчи қоидалар
14. Мазкур Низом қоидалари жисмоний шахслар томонидан нотижорат мақсадлари учун товарларни олиб ўтишда икки йўлакли тизимда ҳам қўлланилади.
15. Жисмоний шахслар нотижорат мақсадлари учун товарларни «яшил» йўлак орқали қиймати ва (ёки) миқдори божсиз олиб кириш нормасидан ортадиган товарларни олиб ўтаётгани гумон қилинганда ёхуд бу ҳақида ахборот мавжуд бўлса, божхона органининг мансабдор шахси бундай шахсга нисбатан божхона қонунчилигига риоя этилишини таъминлайдиган божхона назорати шаклини қўллаш ҳуқуқига эга.
16. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Жисмоний шахслар томонидан Ўзбекистон Республикаси божхона чегараси орқали товарларни олиб ўтиш мақсадини аниқлаш тартиби тўғрисидаги низомга ИЛОВА
Жисмоний шахслар томонидан Ўзбекистон Республикаси божхона чегараси орқали товарларни олиб ўтишда божхона расмийлаштирувчи
Вазирлар Маҳкамасининг 2025 йил 19 апрелдаги 244-сон қарорига 4-ИЛОВА
Эркин муомалага чиқариш (импорт) божхона режимига жойлаштиришда божхона қиймати ва миқдори алоҳида назорат қилинадиган товарлар
Т/р ТИФ ТН коди Товарнинг номи Тўқимачилик маҳсулотлари 1. 5208490000, 5208520000, 5209590000 Пахтадан тайёрланган матолар (таркибидаги пахта толаси 85 мас. фоиз ва ундан ортиқ) 2. 5407209000, 5407410000, 5407611000, 5407613000, 5407615000, 5407619000, 5407730000, 5512910000, 5515123000 Синтетик иплардан ва толалардан тайёрланган матолар 3. 5516140000 Сунъий толалардан тайёрланган матолар (таркибидаги сунъий толалар 85 мас. фоиз ёки ундан ортиқ) 4. 5603141001, 5603141009, 5603149000 Нотўқима матолар (юза зичлиги 150 г/м² дан ортиқ) 5. 5804101000, 5804109000, 5804219000 Тюль ва бошқа сеткасимон матолар ҳамда машинада кимёвий иплардан тўқилган кружева (тамбур машинасида тайёрланганлардан ташқари) 6. 5903209000 Пластмасса билан қопланган текстил маҳсулотлари 7. 6001920000, 6004100000 Машина ёки қўлда тўқилган трикотаж матолар 8. 6106200000, 6204430000, 6204440000, 6205300000 Эркаклар-ўғил болалар ҳамда аёллар-қизлар учун кўйлаклар 9. 6110209900, 6110309100, 6110309900 Свитерлар, пуловерлар, кардиганлар, жилетлар ва шу каби буюмлар 10. 6111209000, 6111309000 Болалар кийимлари ва болалар кийимлари учун жиҳозлар 11. 6112120000 Спорт костюмлари 12. 6203423100, 6203423300, 6203423500, 6203429000 Эркаклар ёки ўғил болалар учун шимлар, бриджи ва шортилар 13. 6204530000 Аёллар ёки қизлар учун юбка ва юбка-шим 14. 6208990000, 6212109000 Аёллар ёки қизлар учун тунги ва ички кийимлар 15. 6301401000, 6301409000 Одеяллар ва саёҳат пледлари 16. 6302210000 Ётоқхона, бельёлари (чойшаб, ёстиқ жилд, ва бошқалар) Электротехника ва унинг қисмлари 17. 8415109000 Кондиционерлар 18. 8418211000, 8418215900, 8418219100 Совутгич ва музлатгич 19. 8443312000, 8443318000 Принтерлар, нусха кўчириш аппаратлари ва факсимиль аппаратлари 20. 8450111100, 8450111900, 8450119000 Тўлиқ автоматик кир ювиш машиналари сиғими 10 кг дан кўп бўлмаган 21. 8471300000 Планшет ва ноутбуклар 22. 8471410000 Моноблок ва сенсорли интерактив доскалар 23. 8507102003 Аккумуляторлар (оғирлиги 5 кг дан кўп) 24. 8509400000 Озиқ-овқатларни майдалагичлар ва миксерлар 25. 8509900000 Маиший электромеханик машиналар қисмлари 26. 8511100009 Ўт олдириш свечалари 27. 8516291000, 8516295000, 8516299100, 8516299900 Электр иситкичлар (радиатор ва бошқалар) 28. 8516500000 Микротўлқинли печлар 29. 8516400000 Электр дазмоллар 30. 8516601010, 8516601090, 8516605000, 8516608000, 8516609000 Электр плита, печ ва духовкалар 31. 8516607000 Гриллар ва ростеллар 32. 8525891900, 8525893000, 8525899109, 8525899900 Телевизион, рақамли ва видеокамералар 33. 8528722001, 8528724000, 8528726000, 8528728000 Телевизорлар 34. 8528521000, 8528529000 Мониторлар 35. 8541430000 Фотогальваник элементлар Озиқ-овқат маҳсулотлари 36. 0201202000 Қорамол гўшти 37. 0204210000 Қўй гўшти 38. 0803901000 Банан 39. 0805210000 Мандарин 40. 0805501000, 0805509000 Лимон ва лайм 41. 0808108001, 0808108002, 0808108003, 0808108005, 0808108006, 0808108007, 0808108008 Олма 42. 0808309000 Нок 43. 1701991001, 1701991009 Шакар 44. 2008191300, 2008191900, 2008199300, 2008199500 Тайёрланган ёнғоқлар Пластмасса ва резина маҳсулотлари 45. 3901209000 Полиэтилен 46. 3920431000, 3920439000 Пластмасса плита, лист, плёнка ва ленталар 47. 4011100003, 4011100009, 4011201000, 4011209000 Шиналар Оёқ кийим, тери ва мўйна маҳсулотлари 48. 4202221000, 4202229000 Чемодан, сумка, ғилоф, ҳамёнлар ва бошқалар 49. 4203300000 Табиий ёки композит чармдан тайёрланган камарлар ва бошқалар 50. 6402993900, 6402999100, 6402999600, 6402999800 Резина пластмассадан тайёрланган оёқ кийимлар 51. 6403511100, 6403511900, 6403911600, 6403911800, 6403919100, 6403919800 Табиий чармдан бўлган оёқ кийимлар 52. 6404110000 Тўқимачилик материалларидан тайёрланган оёқ кийимлар 53. 6405901000 Бошқа турдаги оёқ кийимлар Тош, керамика ва шиша буюмлари 54. 6805200000 Фақат қоғоз ва картон асосидаги табиий ёки сунъий абразив кукун ёки дон (наждак қоғоз) 55. 6911100000 Чиннидан тайёрланган ошхона идишлари 56. 6912002100, 6912002500, 6912002900, 6912008900 Керамикадан тайёрланган ошхона ва бошқа хўжалик ҳамда ҳожатхона буюмлари 57. 7013289000, 7013371000, 7013379900, 7013491000, 7013499900 Шишадан тайёрланган ошхона буюмлари Металл ва металл буюмлар 58. 7210701000 Металл прокат 59. 7308909809 Металл конструкциялар ва шунга ўхшаш буюмлар 60. 7318129000 Металл шуруплар 61. 7323930000 Металлдан ясалган ошхона буюмлари 62. 8308100000 Кийим-кечаклар учун аксессуарлар Кимё саноати маҳсулотлари 63. 3303001000, 3303009000 Атирлар (духи ва пардоз суви) 64. 3304990000 Косметика воситалар 65. 3402500000 Тозалаш ва ювиш воситалари (порошок, гель ва бошқалар) Кимё саноати маҳсулотлари 66. 2710198200, 2710198400, 2710198600, 2710198800, 2710199200, 2710199800, 3403199000 Мойлаш (мотор, трансмиссия ва бошқалар) воситалари 67. 4814200000 Гулқоғозлар 68. 9503001001, 9503001009, 9503002100, 9503003000, 9503003500, 9503003900, 9503004100, 9503004900, 9503005500, 9503006100, 9503006900, 9503007000, 9503007500, 9503007900, 9503008100, 9503008500, 9503009500, 9503009901, 9503009909 Ўйинчоқлар 69. 9617000001, 9617000009 Термослар 70. 9619003000, 9619005001, 9619007109, 9619007901, 9619007909, 9619008101, 9619008109, 9619008901 Аёллар ва эркаклар ҳамда болалар учун гигиеник прокладка ва тагликлар
Ўзбекистон Республикасининг Бош вазири А. АРИПОВ
Тошкент ш.,
2025 йил 19 апрель,
244-сон
OʻZBEKISTON RESPUBLIKASI VAZIRLAR MAHKAMASI
QARORI
MIQDORIY NORMALARI
MIQDORIY NORMALARI
NIZOM
SXEMASI
ROʻYXATI
Ayrim turdagi tovarlarni bojxona chegarasi orqali olib oʻtish tartibini yanada takomillashtirish chora-tadbirlari toʻgʻrisida
Oʻzbekiston Respublikasi Prezidentining “Ishlab chiqarish, eksport va tadbirkorlik faoliyatini ragʻbatlantirish, savdo va sanoat siyosati samaradorligini oshirish chora-tadbirlari toʻgʻrisida” 2025-yil 18-apreldagi PF-67-son Farmoni bilan tovarlarning bojxona qiymatini aniqlashda asossiz imtiyozlar yoki maxsus bojxona rasmiylashtiruvi tartiblarini qoʻllashga yoʻl qoʻyilmasligi hamda bojsiz olib kirish meʼyorlari va bojxona rasmiylashtiruvi shartlari jahon standartlaridan kelib chiqqan holda belgilanishini eʼtiborga olib, Vazirlar Mahkamasi qaror qiladi:
1. 2025-yil 1-maydan eʼtiboran jismoniy shaxslar tomonidan shaxsiy ehtiyoji uchun notijorat maqsadlarida respublikaga olib kiriladigan tovarlarning bojsiz olib kirish normalari quyidagi miqdorlarda belgilansin:
havo transportida — 1000 AQSH dollari;
temir yoʻl va daryo transportida — 500 AQSH dollari;
avtomobil (piyoda) oʻtkazish punktlari orqali — 300 AQSH dollari;
xalqaro kuryerlik joʻnatmalari orqali — 200 AQSH dollari;
xalqaro pochta joʻnatmalari orqali — 100 AQSH dollari.
2. Quyidagilar:
Jismoniy shaxslar tomonidan respublikaga bojsiz olib kiriladigan ayrim tovarlarning miqdoriy normalari 1-ilovaga muvofiq;
Jismoniy shaxslar tomonidan ayrim turdagi tovarlarni respublikadan bojsiz olib chiqishning miqdoriy normalari 2-ilovaga muvofiq;
Jismoniy shaxslar tomonidan Oʻzbekiston Respublikasi bojxona chegarasi orqali tovarlarni olib oʻtish maqsadini aniqlash tartibi toʻgʻrisidagi nizom 3-ilovaga muvofiq;
Erkin muomalaga chiqarish (import) bojxona rejimiga joylashtirishda bojxona qiymati va miqdori alohida nazorat qilinadigan tovarlar roʻyxati 4-ilovaga muvofiq tasdiqlansin.
3. Belgilansinki:
a) temir yoʻl va daryo transportida hamda avtomobil oʻtkazish punktlari orqali notijorat maqsadlarida tovarlarni olib kirayotgan shaxs xorijiy davlatda ikki kalendar kundan, havo transportida uch kalendar kundan kam muddat boʻlganda, bojsiz olib kirish normalari qoʻllanilmaydi, bunda ushbu tovarlarga bojsiz olib kirish normasidan ortiq deb qaraladi hamda tovarning toʻliq qiymatidan yagona bojxona toʻlovi undiriladi;
b) xalqaro kuryerlik joʻnatmalari orqali jismoniy shaxslar nomiga olib kelinadigan tovarlarga nisbatan bojsiz olib kirishning belgilangan normalari bir kalendar oy davomida qoʻllanadi;
v) jismoniy shaxslar tomonidan qiymati 5 000 AQSH dollari ekvivalentigacha boʻlgan tovarlar bojxona deklaratsiyasini taqdim etmagan holda respublikadan olib chiqilishi mumkin, qonunchilik hujjatlari bilan eksport bojxona boji stavkalari belgilangan tovarlar bundan mustasno.
Bunda ushbu qiymat doirasidagi tijorat maqsadidagi tovarlar tovarning kuzatuv hujjatlaridan foydalanilgan holda statistik maqsadlar uchun bojxona organlari tomonidan hisobi yuritiladi hamda respublika eksport hajmida inobatga olinadi;
g) jismoniy shaxslar Oʻzbekiston Respublikasida ishlab chiqarilgan qimmatbaho metallardan tayyorlangan oʻlchovli yombilar va Markaziy bankning qimmatbaho metallardan tayyorlangan tangalarni ularning sertifikatlari mavjud boʻlgan hollarda, respublika hududidan tashqariga cheklovlarsiz olib chiqishga va ularning qiymati ushbu bandning “v” kichik bandida belgilangan qiymatdan oshganda, yoʻlovchi bojxona deklaratsiyasini toʻldirib olib chiqishga ruxsat beriladi;
d) ushbu qarorga 4-ilovada keltirilgan tovarlarning bojxona yuk deklaratsiyalari oxirgi toʻqson kalendar kun ichida deklaratsiya qilingan shunga oʻxshash tovarlarning oʻrtacha bojxona qiymatining 80 foizidan kam boʻlmagan hollarda rasmiylashtiriladi;
e) 2025-yil 1-maydan eʼtiboran chet eldan respublika hududiga quruq sut olib kirishga qoʻyilgan cheklov bekor qilinadi.
4. Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov Bojxona qoʻmitasi bilan birgalikda ichki bozorda teng raqobat muhitini taʼminlash uchun ushbu qarorga 4-ilovada keltirilgan tovarlarga nisbatan ularning qiymati va miqdorini nazorat qilishning samarali mexanizmini joriy qilish va har qanday istisnolar tatbiq etilishiga yoʻl qoʻymaslik choralarini koʻrsin.
Bunda bojxona chegarasi orqali olib kirilayotgan mazkur turdagi tovarlarni inspeksion koʻrik majmualari va boshqa texnik vositalar orqali nazoratdan oʻtkazish choralari koʻrilsin.
5. Oʻzbekiston Milliy axborot agentligi va Oʻzbekiston Milliy teleradiokompaniyasi Bojxona qoʻmitasi bilan birgalikda ommaviy axborot vositalari orqali ushbu qarorning mazmun-mohiyatini tushuntirish boʻyicha mavzuga oid turkum materiallar chop etilishi, eshittirishlar va teledasturlar efirga uzatilishini tashkil etsin.
6. Transport vazirligi “Uzbekistan airways” AJ va “Oʻzbekiston temir yoʻllari” AJ bilan birgalikda ushbu qaror bilan tasdiqlanayotgan Jismoniy shaxslar tomonidan respublikaga bojsiz olib kiriladigan ayrim tovarlarning miqdoriy normalari boʻyicha axborotlarni yoʻlovchilarga tashish vaqtida yetkazish choralarini koʻrsin.
7. Ichki ishlar vazirligi va Milliy gvardiya chegara bojxona postlarida fuqarolar tomonidan vakolatli davlat organlari mansabdor shaxslarining qonuniy talablariga boʻysunmaslik, uyushgan holda qarshilik qilish hamda jamoat tartibini buzish holatlarining oldini olish boʻyicha Bojxona qoʻmitasi bilan hamkorlikni yoʻlga qoʻysin.
8. Sogʻliqni saqlash vazirligi Bojxona qoʻmitasi bilan birgalikda jismoniy shaxslar tomonidan avval foydalanishda boʻlgan tovarlarda inson uchun xavf tugʻdiruvchi vositalar olib kirilishining oldini olish boʻyicha chora-tadbirlarni belgilasin.
9. Bojxona qoʻmitasi:
a) ushbu qaror bilan joriy etilayotgan normalar va tartibotlarni amaliyotda toʻgʻri qoʻllash yuzasidan bojxona organlari xodimlari oʻrtasida mavzuli oʻquv mashgʻulotlarini tashkil etsin;
b) bojxona nazorati va rasmiylashtiruvi jarayonlarini soddalashtirish va raqamlashtirish maqsadida chegara bojxona postlarini infokiosk hamda planshetlar bilan taʼminlash choralarini koʻrsin;
v) bojxona qiymatini pasaytirish xavfi darajasi yuqori boʻlgan tovarlarni aniqlash maqsadida import bojxona yuk deklaratsiyalarini xorijiy mamlakatlar eksport deklaratsiyalari bilan solishtirish tizimini yoʻlga qoʻyish choralarini koʻrsin;
g) uch oy muddatda manfaatdor vazirlik va idoralar bilan birgalikda:
xalqaro pochta va kuryerlik joʻnatmalarini elektron maʼlumotlar asosida soddalashtirilgan tartibda bojxona nazorati va rasmiylashtiruvidan oʻtkazish tartibini belgilovchi Hukumat qarori loyihasini;
qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisidagi takliflarni Vazirlar Mahkamasiga kiritsin.
10. Vazirlar Mahkamasining “Jismoniy shaxslar tomonidan Oʻzbekiston Respublikasi bojxona chegarasi orqali tovarlarni olib oʻtish maqsadini aniqlash tartibi toʻgʻrisidagi nizomni tasdiqlash haqida” 2020-yil 12-maydagi 281-son qarori oʻz kuchini yoʻqotgan deb hisoblansin.
11. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.
Ushbu qarorning 1-bandi , 2-bandining beshinchi xatboshisi , 3-bandining “d” va “e” kichik bandlari hamda unga 4-ilova 2025-yil 1-maydan eʼtiboran amal qiladi.
12. Mazkur qarorning bajarilishini nazorat qilish Oʻzbekiston Respublikasining Bosh vaziri oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Vazirlar Mahkamasining 2025-yil 19-apreldagi 244-son qaroriga 1-ILOVA
Jismoniy shaxslar tomonidan respublikaga bojsiz olib kiriladigan ayrim tovarlarning
T/r Tovarning nomi Cheklangan miqdor (soni, hajmi) 1. Oʻzbekiston Respublikasi TIF TN 2203-2208 tovar pozitsiyasida tasniflanuvchi alkogol mahsuloti, shu jumladan, pivo 2 litr 2. Quyidagi tamaki mahsulotlaridan biri: Oʻzbekiston Respublikasi TIF TN 2402 20 tovar pozitsiyasida tasniflanuvchi sigaret; 200 dona Oʻzbekiston Respublikasi TIF TN 2402 10 0 00 0 tovar pozitsiyasida tasniflanuvchi sigara; 5 dona Oʻzbekiston Respublikasi TIF TN 2403 tovar pozitsiyasida tasniflanuvchi tamaki (tabak) 100 gr 3. Oʻzbekiston Respublikasi TIF TN 3303 tovar pozitsiyasida tasniflanuvchi atir va ifor tarqatuvchi suvlar 3 dona (300 ml.dan oshmagan miqdorda) 4. Biologik faol qoʻshimchalar: 10 ta turli nomdagi va birlamchi qadoqda boʻlgan (umumiy ogʻirligi 3 kg dan hamda har bir nomdagi biologik faol qoʻshimcha 1 ta qadoqdan oshmagan miqdorda)
Vazirlar Mahkamasining 2025-yil 19-apreldagi 244-son qaroriga 2-ILOVA
Jismoniy shaxslar tomonidan ayrim turdagi tovarlarni respublikadan bojsiz olib chiqishning
T/r Tovarning nomi Miqdori 1. Guruch Umumiy ogʻirligi 3 kgdan koʻp boʻlmagan 2. Non-bulka mahsulotlari Umumiy ogʻirligi 5 kgdan koʻp boʻlmagan 3. Goʻsht va goʻsht oziq-ovqat mahsulotlari Umumiy ogʻirligi 2 kgdan koʻp boʻlmagan 4. Shakar Umumiy ogʻirligi 2 kgdan koʻp boʻlmagan 5. Oʻsimlik yogʻi Umumiy ogʻirligi 2 kgdan koʻp boʻlmagan 6. Yangi uzilgan meva-sabzavot mahsulotlari, uzum, poliz ekinlari, dukkakli oʻsimliklar hamda quritilgan sabzavot va mevalar Umumiy ogʻirligi 40 kgdan koʻp boʻlmagan
Vazirlar Mahkamasining 2025-yil 19-apreldagi 244-son qaroriga 3-ILOVA
Jismoniy shaxslar tomonidan Oʻzbekiston Respublikasi bojxona chegarasi orqali tovarlarni olib oʻtish maqsadini aniqlash tartibi toʻgʻrisida
1-bob. Umumiy qoidalar
1. Ushbu Nizom Jismoniy shaxslar tomonidan Oʻzbekiston Respublikasi bojxona chegarasi (keyingi oʻrinlarda — bojxona chegarasi) orqali tovarlarni olib oʻtish maqsadini aniqlash tartibini belgilaydi.
2. Ushbu Nizomda quyidagi asosiy tushunchalardan foydalaniladi:
notijorat maqsadlar uchun tovarlar — jismoniy shaxslar tomonidan bojxona chegarasi orqali olib oʻtiladigan shaxsiy, oilaviy (ota-onasi, turmush oʻrtogʻi va farzandlari) ehtiyojlari uchun moʻljallangan hamda tadbirkorlik yoki boshqa tijorat faoliyatini amalga oshirish bilan bogʻliq boʻlmagan tovarlar;
tijorat maqsadlar uchun tovarlar — bojxona chegarasi orqali olib oʻtiladigan ishlab chiqarish, tadbirkorlik yoki boshqa tijorat faoliyati uchun moʻljallangan tovarlar.
3. Jismoniy shaxslar tomonidan bojxona chegarasi orqali olib oʻtiladigan tovarlar notijorat maqsadlari uchun tovarlar toifasiga jismoniy shaxs (oʻn olti yoshga toʻlmagan jismoniy shaxslar tomonidan olib oʻtiladigan tovarlarni ularni kuzatib borayotgan shaxs) tomonidan deklaratsiyalash yoʻli bilan kiritiladi.
4. Ushbu Nizom qoidalari quyidagi toifadagi tovarlarga nisbatan tatbiq etilmaydi:
maʼlum toifadagi shaxslar (xalqaro tashishlar bilan band boʻlgan haydovchilar, xizmat safari boʻyicha harakatlanayotgan shaxslar va delegatsiya aʼzolari), shuningdek, xorijiy davlatlardan Oʻzbekiston Respublikasiga doimiy yashash uchun koʻchib kelayotgan shaxslar tomonidan olib oʻtiladigan tovarlar;
ilgari foydalanishda boʻlgan notijorat maqsadlariga moʻljallangan tovarlar, transport vositalari bundan mustasno.
Quyidagilar ilgari foydalanishda boʻlgan notijorat maqsadlari uchun moʻljallangan tovarlar hisoblanadi:
Oʻzbekiston Respublikasida doimiy yashash joyiga ega boʻlgan shaxs tomonidan Oʻzbekiston Respublikasidan joʻnab ketishda va Oʻzbekiston Respublikasiga qaytib kelishda oʻzi bilan birga boʻlgan foydalanilgan shaxsiy tovarlar;
Oʻzbekiston Respublikasida doimiy yashash joyiga ega boʻlmagan shaxslar tomonidan Oʻzbekiston Respublikasiga kirib kelishda va Oʻzbekiston Respublikasidan joʻnab ketishda oʻzi bilan birga boʻlgan foydalanilgan shaxsiy tovarlar.
5. Jismoniy shaxslar tomonidan Oʻzbekiston Respublikasi bojxona chegarasi orqali tovarlarni olib oʻtishda bojxona rasmiylashtiruvi ushbu Nizomga ilovaga muvofiq sxema asosida amalga oshiriladi.
2-bob. Jismoniy shaxslar tomonidan bojxona chegarasi orqali tovarlarni olib oʻtish maqsadini aniqlash
6. Jismoniy shaxslar tomonidan bojxona chegarasi orqali tovarlarni olib oʻtish maqsadini bojxona organining mansabdor shaxsi tovarlarning miqdori, xususiyati va olib oʻtilishining takroriyligi va safarning holatlari, shuningdek, bojxona chegarasi orqali olib oʻtiladigan tovarlar jismoniy shaxs va uning oila aʼzolari shaxsiy ehtiyojlari uchun moʻljallanganligini inobatga olib, shu jumladan, xavfni boshqarish tizimini qoʻllagan holda aniqlaydi.
7. Bojxona organi mansabdor shaxsi tovarni olib oʻtish maqsadini aniqlash toʻgʻrisida qaror qabul qilishda quyidagi mezonlarga asoslanadi:
tovarlarning xususiyati — tovarlarning isteʼmol xususiyatlari, tijorat maqsadida foydalanish bilan bogʻliq boʻlmagan, jismoniy shaxslarning shaxsiy, oilaviy va maishiy ehtiyojlarini qondirish uchun moʻljallangani inobatga olinadi;
tovarlarning miqdori — tovarlarni olib oʻtayotgan jismoniy shaxs va uning oila aʼzolari ehtiyojlaridan ortiq miqdordagi bir turdagi (bir nomda, bir oʻlchamdagi, bir shakl, hamda rangda va boshqalar, shuningdek, bir kishilik kiyim jamlanmasidan (komplektdan) ortiq boʻlgan) tovarlarga, agar tovarlarni olib oʻtayotgan shaxs aksini isbotlab bermasa, tijorat maqsadida foydalanish uchun olib kirilayotgan tovarlar deb eʼtirof etiladi;
tovarlarni olib oʻtishning takroriyligi — ayni bir jismoniy shaxs tomonidan bir turdagi tovarlar oz miqdorda boʻlsa-da, bir necha bor olib kirilishiga, agar tovarlarni olib oʻtayotgan shaxs aksini isbotlab bermasa, tijorat maqsadida foydalanish uchun olib kirilayotgan tovarlar deb eʼtirof etiladi. Chegara xizmati organlari tomonidan chet elga chiqish biometrik pasportiga qoʻyiladigan belgi (shtamp) yoki roʻyxatga olish haqidagi elektron maʼlumot Oʻzbekiston Respublikasi Davlat chegarasi orqali oʻtkazish punktidan oʻtish takroriyligini aniqlash uchun asos hisoblanadi;
safarning holatlari — safarning maqsadi va davomiyligi, kelish davlati inobatga olinadi;
huquqni muhofaza qiluvchi organlardan tovarlar va ularni olib oʻtayotgan jismoniy shaxslar toʻgʻrisida kelib tushgan maʼlumotlar;
xalqaro pochta va xalqaro kuryerlik joʻnatmalarini oluvchi jismoniy shaxsning (shu jumladan, uning 16 yoshga toʻlmagan farzandlarining) yoshi tovarlarning xususiyatlari bilan muvofiqligi;
bir manzilda yashovchi bir yoki bir necha jismoniy shaxs tomonidan olib oʻtiladigan bir xil turdagi tovarlarni olib oʻtish takroriyligi. Tovarlarni olib oʻtish maqsadini aniqlash toʻgʻrisida qaror qabul qilishda oila tarkibi (tovarlarni olib oʻtayotgan shaxs tomonidan tasdiqlangan taqdirda), koʻrsatib oʻtilgan tovar turlariga shaxsning odatiy ehtiyoji va olib oʻtiladigan tovarlar turlari ham inobatga olinadi;
xalqaro pochta va xalqaro kuryerlik joʻnatmalari uchun bojxona yuk deklaratsiyasida koʻrsatilgan tovarlarni qabul qiluvchi manzilning jismoniy shaxs haqiqatda roʻyxatdan oʻtgan joyi bilan farqliligi.
8. Ushbu Nizomning 7-bandida koʻrsatilgan mezonlardan birining mavjudligi, bojxona chegarasi orqali jismoniy shaxs va uning oila aʼzolari tomonidan olib oʻtiladigan tovarlar belgilangan normalardan ortiq boʻlganda, ular notijorat maqsadlari uchun moʻljallanmagan tovarlar deb (shaxsiy foydalanish yoki isteʼmol maqsadida emasligi) taxmin qilishga asos boʻladi.
9. Oʻzbekiston Respublikasi bojxona hududiga kuzatib borilayotgan va (yoki) kuzatib borilmayotgan bagajlarda notijorat maqsadlari uchun tovarlarni bojsiz olib kirish normalari yoʻnalish va yetib borish manzilida zarur hamda ilgari foydalanishda boʻlgan shaxsiy ehtiyojlar uchun moʻljallangan tovarlarni hisobga olmagan holda quyidagi mezonlar asosida aniqlanadi:
yoʻnalish va (yoki) yetib borish manzilida anʼanaviy (odatda) tartibda foydalanish amaliyoti, shuningdek, mavsumiyligi, sayohat maqsadi, transport turi, davlat bojxona chegarasidan oʻtish takroriyligi;
eskirish va boshqa ishlatilganlik belgilari (qirilish, bukilish va boshqa mexanik shikast) mavjudligi;
birkalar, yorliqlar, ishlab chiqaruvchi oʻrovi mavjud emasligi;
tovarlarni odatiy tartibda foydalanish uchun yetarli boʻlgan darajada bitta yoki boshqa miqdorda, shu jumladan mavsumiyligi, sayohat maqsadi, transport turi, yoʻnalish davomida yoki yetib borish manzilida obyektiv zaruratliligi.
3-bob. Jismoniy shaxslar tomonidan bojxona chegarasi orqali olib oʻtiladigan tovarlarga nisbatan bojxona toʻlovlarini toʻlash
10. Jismoniy shaxslar tomonidan olib kirilayotgan tovarlar bojsiz olib kirish normasidan va Jismoniy shaxslar tomonidan respublikaga bojsiz olib kiriladigan ayrim tovarlarning miqdoriy normalaridan ortganda, Oʻzbekiston Respublikasi Tashqi iqtisodiy faoliyat tovar nomenklaturasi kodidan va kelib chiqish mamlakatidan qatʼi nazar, ushbu tovarlarning bojxona qiymatidan kelib chiqqan holda, mazkur normalardan ortiq qismiga nisbatan yagona bojxona toʻlovi undiriladi.
11. Temir yoʻl va daryo transportida hamda avtomobil oʻtkazish punktlari orqali notijorat maqsadlarida tovarlarni olib kirayotgan shaxs xorijiy davlatda ikki kalendar kundan, havo transportida uch kalendar kundan kam muddat boʻlgan taqdirda va (yoki) bir kalendar oy davomida xorijiy davlatda uch va undan ortiq marotaba boʻlganda, bojsiz olib kirish normalari qoʻllanilmaydi va tovarning toʻliq qiymatidan yagona bojxona toʻlovi undiriladi.
12. Jismoniy shaxslar tomonidan tijorat maqsadlarida tovarlar bojxona chegarasi orqali olib oʻtilganda, ularga nisbatan bojxona qonunchilik hujjatlarida belgilangan umumiy bojxona rasmiylashtiruvi qoidalari olib oʻtilayotgan tovarlarning umumiy miqdoriga nisbatan qoʻllanadi.
Bunda tovarlarning bojxona qiymati bazaviy hisoblash miqdorining oʻttiz baravaridan kam boʻlganda, ularga notarif choralari qoʻllanilmagan holda va bojxona toʻlovlari umumiy belgilangan stavkalarda bojxona kirim orderi orqali bojxona rasmiylashtiruvidan oʻtkaziladi.
Tovarlarning bojxona qiymati bazaviy hisoblash miqdorining oʻttiz baravaridan koʻp boʻlganda, ularga notarif choralar qoʻllanilgan va bojxona toʻlovlari umumiy belgilangan stavkalarda bojxona yuk deklaratsiyasi orqali bojxona rasmiylashtiruvidan oʻtkaziladi.
13. Jismoniy shaxs bojxona organi mansabdor shaxsining bojxona chegarasi orqali tovarlarni olib oʻtish maqsadini aniqlash boʻyicha qabul qilgan qarori yuzasidan qonunchilikda belgilangan tartibda yuqori turuvchi mansabdor shaxsga hamda sudga shikoyat bilan murojaat qilishi mumkin.
4-bob. Yakunlovchi qoidalar
14. Mazkur Nizom qoidalari jismoniy shaxslar tomonidan notijorat maqsadlari uchun tovarlarni olib oʻtishda ikki yoʻlakli tizimda ham qoʻllaniladi.
15. Jismoniy shaxslar notijorat maqsadlari uchun tovarlarni “yashil” yoʻlak orqali qiymati va (yoki) miqdori bojsiz olib kirish normasidan ortadigan tovarlarni olib oʻtayotgani gumon qilinganda yoxud bu haqida axborot mavjud boʻlsa, bojxona organining mansabdor shaxsi bunday shaxsga nisbatan bojxona qonunchiligiga rioya etilishini taʼminlaydigan bojxona nazorati shaklini qoʻllash huquqiga ega.
16. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Jismoniy shaxslar tomonidan Oʻzbekiston Respublikasi bojxona chegarasi orqali tovarlarni olib oʻtish maqsadini aniqlash tartibi toʻgʻrisidagi nizomga ILOVA
Jismoniy shaxslar tomonidan Oʻzbekiston Respublikasi bojxona chegarasi orqali tovarlarni olib oʻtishda bojxona rasmiylashtiruvchi
Vazirlar Mahkamasining 2025-yil 19-apreldagi 244-son qaroriga 4-ILOVA
Erkin muomalaga chiqarish (import) bojxona rejimiga joylashtirishda bojxona qiymati va miqdori alohida nazorat qilinadigan tovarlar
T/r TIF TN kodi Tovarning nomi Toʻqimachilik mahsulotlari 1. 5208490000, 5208520000, 5209590000 Paxtadan tayyorlangan matolar (tarkibidagi paxta tolasi 85 mas. foiz va undan ortiq) 2. 5407209000, 5407410000, 5407611000, 5407613000, 5407615000, 5407619000, 5407730000, 5512910000, 5515123000 Sintetik iplardan va tolalardan tayyorlangan matolar 3. 5516140000 Sunʼiy tolalardan tayyorlangan matolar (tarkibidagi sunʼiy tolalar 85 mas. foiz yoki undan ortiq) 4. 5603141001, 5603141009, 5603149000 Notoʻqima matolar (yuza zichligi 150 g/m² dan ortiq) 5. 5804101000, 5804109000, 5804219000 Tyul va boshqa setkasimon matolar hamda mashinada kimyoviy iplardan toʻqilgan krujeva (tambur mashinasida tayyorlanganlardan tashqari) 6. 5903209000 Plastmassa bilan qoplangan tekstil mahsulotlari 7. 6001920000, 6004100000 Mashina yoki qoʻlda toʻqilgan trikotaj matolar 8. 6106200000, 6204430000, 6204440000, 6205300000 Erkaklar-oʻgʻil bolalar hamda ayollar-qizlar uchun koʻylaklar 9. 6110209900, 6110309100, 6110309900 Sviterlar, puloverlar, kardiganlar, jiletlar va shu kabi buyumlar 10. 6111209000, 6111309000 Bolalar kiyimlari va bolalar kiyimlari uchun jihozlar 11. 6112120000 Sport kostumlari 12. 6203423100, 6203423300, 6203423500, 6203429000 Erkaklar yoki oʻgʻil bolalar uchun shimlar, bridji va shortilar 13. 6204530000 Ayollar yoki qizlar uchun yubka va yubka-shim 14. 6208990000, 6212109000 Ayollar yoki qizlar uchun tungi va ichki kiyimlar 15. 6301401000, 6301409000 Odeyallar va sayohat pledlari 16. 6302210000 Yotoqxona, belyolari (choyshab, yostiq jild, va boshqalar) Elektrotexnika va uning qismlari 17. 8415109000 Konditsionerlar 18. 8418211000, 8418215900, 8418219100 Sovutgich va muzlatgich 19. 8443312000, 8443318000 Printerlar, nusxa koʻchirish apparatlari va faksimil apparatlari 20. 8450111100, 8450111900, 8450119000 Toʻliq avtomatik kir yuvish mashinalari sigʻimi 10 kg dan koʻp boʻlmagan 21. 8471300000 Planshet va noutbuklar 22. 8471410000 Monoblok va sensorli interaktiv doskalar 23. 8507102003 Akkumulyatorlar (ogʻirligi 5 kg dan koʻp) 24. 8509400000 Oziq-ovqatlarni maydalagichlar va mikserlar 25. 8509900000 Maishiy elektromexanik mashinalar qismlari 26. 8511100009 Oʻt oldirish svechalari 27. 8516291000, 8516295000, 8516299100, 8516299900 Elektr isitkichlar (radiator va boshqalar) 28. 8516500000 Mikrotoʻlqinli pechlar 29. 8516400000 Elektr dazmollar 30. 8516601010, 8516601090, 8516605000, 8516608000, 8516609000 Elektr plita, pech va duxovkalar 31. 8516607000 Grillar va rostellar 32. 8525891900, 8525893000, 8525899109, 8525899900 Televizion, raqamli va videokameralar 33. 8528722001, 8528724000, 8528726000, 8528728000 Televizorlar 34. 8528521000, 8528529000 Monitorlar 35. 8541430000 Fotogalvanik elementlar Oziq-ovqat mahsulotlari 36. 0201202000 Qoramol goʻshti 37. 0204210000 Qoʻy goʻshti 38. 0803901000 Banan 39. 0805210000 Mandarin 40. 0805501000, 0805509000 Limon va laym 41. 0808108001, 0808108002, 0808108003, 0808108005, 0808108006, 0808108007, 0808108008 Olma 42. 0808309000 Nok 43. 1701991001, 1701991009 Shakar 44. 2008191300, 2008191900, 2008199300, 2008199500 Tayyorlangan yongʻoqlar Plastmassa va rezina mahsulotlari 45. 3901209000 Polietilen 46. 3920431000, 3920439000 Plastmassa plita, list, plyonka va lentalar 47. 4011100003, 4011100009, 4011201000, 4011209000 Shinalar Oyoq kiyim, teri va moʻyna mahsulotlari 48. 4202221000, 4202229000 Chemodan, sumka, gʻilof, hamyonlar va boshqalar 49. 4203300000 Tabiiy yoki kompozit charmdan tayyorlangan kamarlar va boshqalar 50. 6402993900, 6402999100, 6402999600, 6402999800 Rezina plastmassadan tayyorlangan oyoq kiyimlar 51. 6403511100, 6403511900, 6403911600, 6403911800, 6403919100, 6403919800 Tabiiy charmdan boʻlgan oyoq kiyimlar 52. 6404110000 Toʻqimachilik materiallaridan tayyorlangan oyoq kiyimlar 53. 6405901000 Boshqa turdagi oyoq kiyimlar Tosh, keramika va shisha buyumlari 54. 6805200000 Faqat qogʻoz va karton asosidagi tabiiy yoki sunʼiy abraziv kukun yoki don (najdak qogʻoz) 55. 6911100000 Chinnidan tayyorlangan oshxona idishlari 56. 6912002100, 6912002500, 6912002900, 6912008900 Keramikadan tayyorlangan oshxona va boshqa xoʻjalik hamda hojatxona buyumlari 57. 7013289000, 7013371000, 7013379900, 7013491000, 7013499900 Shishadan tayyorlangan oshxona buyumlari Metall va metall buyumlar 58. 7210701000 Metall prokat 59. 7308909809 Metall konstruksiyalar va shunga oʻxshash buyumlar 60. 7318129000 Metall shuruplar 61. 7323930000 Metalldan yasalgan oshxona buyumlari 62. 8308100000 Kiyim-kechaklar uchun aksessuarlar Kimyo sanoati mahsulotlari 63. 3303001000, 3303009000 Atirlar (duxi va pardoz suvi) 64. 3304990000 Kosmetika vositalar 65. 3402500000 Tozalash va yuvish vositalari (poroshok, gel va boshqalar) Kimyo sanoati mahsulotlari 66. 2710198200, 2710198400, 2710198600, 2710198800, 2710199200, 2710199800, 3403199000 Moylash (motor, transmissiya va boshqalar) vositalari 67. 4814200000 Gulqogʻozlar 68. 9503001001, 9503001009, 9503002100, 9503003000, 9503003500, 9503003900, 9503004100, 9503004900, 9503005500, 9503006100, 9503006900, 9503007000, 9503007500, 9503007900, 9503008100, 9503008500, 9503009500, 9503009901, 9503009909 Oʻyinchoqlar 69. 9617000001, 9617000009 Termoslar 70. 9619003000, 9619005001, 9619007109, 9619007901, 9619007909, 9619008101, 9619008109, 9619008901 Ayollar va erkaklar hamda bolalar uchun gigiyenik prokladka va tagliklar
Oʻzbekiston Respublikasining Bosh vaziri A. ARIPOV
Toshkent sh.,
2025-yil 19-aprel,
244-son