UzbekAI

Ўзбекистон Республикаси Вазирлар Маҳкамасининг

қарори

ТАРКИБИ

Ҳудудларда микросаноат марказлари фаолиятини ташкил этиш чора-тадбирлари тўғрисида

1. Ўзбекистон Республикаси Президентининг «2025 йилда аҳоли бандлигини таъминлаш ва камбағалликни қисқартириш чора-тадбирлари тўғрисида» 2025 йил 17 январдаги ПҚ-12-сон қарорига мувофиқ 2025-2026 йилларда Қорақалпоғистон Республикаси, вилоятлар ва Тошкент шаҳрида микросаноат марказларини (кейинги ўринларда — Микросаноат марказлари) барпо этиш лойиҳаларининг манзилли рўйхати тасдиқлангани маълумот учун қабул қилинсин.

2. Белгилаб қўйилсинки:

Микросаноат марказлари ҳудудларнинг ихтисослашуви ва тадбиркорлик анъаналарини (ҳудудларнинг драйвери), юқори даромадли иш ўринларини яратишни, шунингдек, хорижий давлатлар (Хитой, Жанубий Корея, Туркия) тажрибаси асосида қуриш инобатга олинган ҳолда ишлаб чиқиладиган алоҳида концепцияга мувофиқ барпо этилади;

Микросаноат марказларида ҳунармандчилик, тикувчилик, пойабзалчилик, қандолатчилик ва бошқа тадбиркорлик фаолияти турлари билан шуғулланадиган кичик ва ўрта тадбиркорлик субъектлари (кейинги ўринларда — тадбиркорлик субъектлари) жойлаштирилади;

Микросаноат марказларига ишлаб чиқаришларни жойлаштиришда табиий газга муқобил бўлган ёқилғи турларидан ва энергия тежамкор технологиялардан (гелиоколлектор, иссиқлик насоси, қуёш панеллари, иссиқликни қайта тиклаш-рекуперация қилиш ва бошқалар) фойдаланишга устуворлик берилади;

Микросаноат марказларининг лойиҳа концепцияси Бандликка кўмаклашиш давлат жамғармаси маблағлари ҳисобидан Ўзбекистон Республикаси Камбағалликни қисқартириш ва бандлик вазирлиги томонидан лойиҳа ташкилотларини жалб қилиш орқали ишлаб чиқилади ва тасдиқланади;

Микросаноат марказларини қуриш учун ер участкалари тасдиқланган лойиҳа концепцияси асосида ишлаб чиқариш бино ва иншоотларини тайёр ҳолда қуриш ва кейинчалик уларга тадбиркорлик субъектларини жойлаштириш учун ташаббускор пудрат ташкилотларига электрон онлайн-аукцион савдолари орқали сотилади;

электрон онлайн-аукцион савдолари Ўзбекистон Республикаси Президентининг 2025 йил 17 январдаги ПҚ-12-сон қарори билан тасдиқланган 2025-2026 йилларда Қорақалпоғистон Республикаси, вилоятлар ва Тошкент шаҳрида микросаноат марказларини барпо этиш лойиҳаларининг манзилли рўйхати асосида ўтказилади;

электрон онлайн-аукцион савдолари ғолиби бўлган пудрат ташкилотлари билан Ўзбекистон Республикаси Камбағалликни қисқартириш ва бандлик вазирлиги ҳамда туман (шаҳар) ҳокимликлари ўртасида Микросаноат марказларини тасдиқланган лойиҳа концепцияси асосида қуриш ва уларга тадбиркорлик субъектларини жойлаштириш шартлари (ижарага (лизингга) бериш, кредит, тўлиқ ёки бўлиб-бўлиб тўлаш орқали сотиш) тўғрисида уч томонлама битим тузилади;

Микросаноат марказларида яратиладиган ишлаб чиқариш майдонлари тадбиркорлик субъектларига пудрат ташкилотлари томонидан уч томонлама битимда кўрсатилган шартлар асосида таклиф этилади;

Микросаноат марказларини муҳандислик-коммуникация инфратузилмаси билан таъминлаш бўйича харажатлар маҳаллий бюджетларнинг қўшимча манбалари, шу жумладан, маҳаллий бюджетларга ушбу қарорга мувофиқ ерларни электрон онлайн-аукцион савдолари орқали сотишдан тушган маблағлар ва қонунчиликда тақиқланмаган бошқа манбалар ҳисобидан амалга оширилади.

3. Ҳудудларда микросаноат марказларини барпо этиш ҳамда уларга кичик ва ўрта тадбиркорлик субъектларини жойлаштириш бўйича ишчи гуруҳларнинг намунавий таркиби (кейинги ўринларда — ишчи гуруҳлар) иловага мувофиқ тасдиқлансин.

4. Қуйидагилар ишчи гуруҳларнинг асосий вазифалари этиб белгилансин:

Ўзбекистон Республикаси Президентининг «2025 йилда аҳоли бандлигини таъминлаш ва камбағалликни қисқартириш чора-тадбирлари тўғрисида» 2025 йил 17 январдаги ПҚ-12-сон қарорига мувофиқ микросаноат марказларини барпо этиш учун белгиланган ҳудудлардан туман (шаҳар) ҳокимликлари захирасидаги қишлоқ хўжалигига мўлжалланмаган бўш ер участкаларини (кейинги ўринларда — ер участкалари) танлаш;

Микросаноат марказларини лойиҳа концепцияси асосида қуриш учун танланган ер участкаларининг белгиланган тартибда электрон онлайн-аукцион савдоларига чиқарилишини ташкил этиш;

Микросаноат марказлари пудрат ташкилотлари томонидан белгиланган муддатларда қурилиши устидан доимий мониторинг юритиш;

Микросаноат марказларига тадбиркорлик субъектларини жойлаштириш ва уларнинг фаолиятини ташкил этишда ёрдам кўрсатиш;

Микросаноат марказларини барпо этиш лойиҳалари доирасида янги иш ўринлари яратилишини назорат қилиш.

5. Ўзбекистон Республикаси Камбағалликни қисқартириш ва бандлик вазирлиги:

а) ишчи гуруҳлар билан биргаликда:

ҳудудларнинг имкониятидан келиб чиққан ҳолда, Микросаноат марказлари ихтисослашувини белгилаш ва Микросаноат марказлари лойиҳа концепциясини ишлаб чиқиш ва тасдиқлаш;

Микросаноат марказларининг лойиҳа концепциясида ишлаб чиқариш майдонлари билан бир қаторда шоурум, омборхона, офис ва ўқув-ишлаб чиқариш хоналари ташкил этилишини инобатга олиш;

Микросаноат марказларининг ихтисослашувидан келиб чиқиб, уларга тадбиркорлик субъектларининг лойиҳаларини жойлаштириш учун тажрибали мутахассисларни, шу жумладан, хорижий консультантларни Бандликка кўмаклашиш давлат жамғармаси маблағлари ҳисобидан белгиланган тартибда жалб қилиш;

маҳаллаларда тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича туман (шаҳар) ҳокими ёрдамчилари кўмагида тадбиркорлик субъектлари ишлаб чиқарган маҳсулотларни онлайн платформалар орқали сотишга кўмаклашиш;

зарур ҳолларда Микросаноат марказлари ҳудудида тадбиркорлик субъектлари билан биргаликда уларнинг ихтисослашуви бўйича Бандликка кўмаклашиш давлат жамғармаси маблағлари ҳисобидан дуал таълим тизимини ташкил этиш орқали камбағал ва ишсиз фуқароларни касб-ҳунарга ўқитиш ҳамда ишга жойлаштириш;

б) Марказий банк, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари билан биргаликда:

Микросаноат марказларига тадбиркорларни жалб қилиш, уларнинг бизнес-режалари асосида янги лойиҳаларни ишлаб чиқиш, лойиҳаларга тижорат банклари томонидан кредит ажратиш ва лойиҳаларни амалга оширишда кўмаклашиш;

маҳалла банкирлари орқали банк хизматларини тарғиб қилиш, тадбиркорларни молиявий қўллаб-қувватлаш ва янги мижозларни жалб қилиш;

Микросаноат марказларининг ихтисослашуви ва шарт-шароитларидан келиб чиқиб, бошқа ҳудудлардаги ижобий тажрибаларни оммалаштириш чораларини кўрсин.

6. Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари Микросаноат марказларининг лойиҳа концепцияси тасдиқланганидан сўнг:

манфаатдор вазирлик ва идоралар билан биргаликда Микросаноат марказларини лойиҳа концепцияси асосида қуриш учун танланган ер участкаларининг белгиланган тартибда электрон онлайн-аукцион савдоларига чиқарилишини таъминласин. Бунда электрон онлайн-аукцион савдолари ишчи гуруҳ хулосасига асосан салоҳиятли пудрат ташкилотлари ўртасида ёпиқ шаклда ўтказилиши мумкин;

Ўзбекистон Республикаси Энергетика вазирлиги, Транспорт вазирлиги ҳузуридаги Автомобиль йўллари қўмитаси, Рақамли технологиялар вазирлиги ҳамда «Ўзсувтаъминот» АЖ билан биргаликда икки ҳафта муддатда Микросаноат марказларини муҳандислик-коммуникация тармоқларига улаш бўйича тармоқ жадвалларини ишлаб чиқсин ва тасдиқласин;

Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси билан биргаликда Микросаноат марказларида бажариладиган қурилиш-монтаж ишларининг сифати устидан давлат архитектура-қурилиш назорати ўрнатилишини таъминласин.

7. Ўзбекистон Республикаси Камбағалликни қисқартириш ва бандлик вазирлиги:

ҳар чоракда Микросаноат марказлари фаолиятини ташкил этишда юзага келадиган муаммоларни жойларга чиққан ҳолда ўрганиб борсин ва уларни бартараф этиш бўйича ишчи гуруҳлар ҳамда мутасадди вазирлик ва идоралар билан тегишли чоралар кўрсин;

2025 йил якунига қадар Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари билан биргаликда аҳолини даромадли меҳнат билан таъминлаш дастурлари доирасида Микросаноат марказларини барпо этиш лойиҳаларини янада кенгайтириш бўйича таклифларни Вазирлар Маҳкамасига киритсин.

8. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда камбағалликни қисқартириш ва бандлик вазири Б.Э. Захидов зиммасига юклансин.

Вазирлар Маҳкамасининг 2025 йил 8 майдаги 308-сон қарорига ИЛОВА

Ҳудудларда микросаноат марказларини барпо этиш ҳамда уларга кичик ва ўрта тадбиркорлик субъектларини жойлаштириш бўйича ишчи гуруҳларнинг намунавий

1. Лавозимига кўра — Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳар ҳокимларининг молия-иқтисодиёт ва камбағалликни қисқартириш масалалари бўйича биринчи ўринбосарлари — Қорақалпоғистон Республикаси иқтисодиёт ва молия вазири, вилоятлар ва Тошкент шаҳар иқтисодиёт ва молия бош бошқармалари бошлиқлари, ишчи гуруҳ раҳбари 2. Лавозимига кўра — Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳар ҳокимларининг қурилиш, тўсиқларсиз муҳит яратиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосарлари, ишчи гуруҳ раҳбари ўринбосари 3. Лавозимига кўра — Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳар ҳокимларининг ўринбосари — вилоятлар ва Тошкент шаҳар инвестициялар, саноат ва савдо бошқармалари бошлиқлари 4. Лавозимига кўра — Қорақалпоғистон Республикаси камбағалликни қисқартириш ва бандлик вазири, вилоятлар ва Тошкент шаҳар камбағалликни қисқартириш ва бандлик бошқармалари бошлиқлари 5. Лавозимига кўра — Қорақалпоғистон Республикаси, вилоятлар ва Тошкент шаҳар Қурилиш ва уй-жой коммунал хўжалиги соҳасида назорат қилиш ҳудудий инспекциялари бошлиқлари 6. Лавозимига кўра — Марказий банкнинг ҳудудий бош бошқармалари бошлиқлари 7. Лавозимига кўра — Давлат активларини бошқариш агентлигининг ҳудудий бошқармалари бошлиқлари 8. Лавозимига кўра — Кадастр агентлигининг ҳудудий бошқармалари бошлиқлари 9. Лавозимига кўра — Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузуридаги «Ягона буюртмачи хизмати» инжиниринг компаниялари директорлари

Ўзбекистон Республикасининг Бош вазири А. АРИПОВ

Тошкент ш.,

2025 йил 8 май,

308-сон

(Қонунчилик маълумотлари миллий базаси, 12.05.2025 й., 09/25/308/0429-сон)

lex.uz

Oʻzbekiston Respublikasi Vazirlar Mahkamasining

qarori

TARKIBI

Hududlarda mikrosanoat markazlari faoliyatini tashkil etish chora-tadbirlari toʻgʻrisida

1. Oʻzbekiston Respublikasi Prezidentining “2025-yilda aholi bandligini taʼminlash va kambagʻallikni qisqartirish chora-tadbirlari toʻgʻrisida” 2025-yil 17-yanvardagi PQ-12-son qaroriga muvofiq 2025-2026-yillarda Qoraqalpogʻiston Respublikasi, viloyatlar va Toshkent shahrida mikrosanoat markazlarini (keyingi oʻrinlarda — Mikrosanoat markazlari) barpo etish loyihalarining manzilli roʻyxati tasdiqlangani maʼlumot uchun qabul qilinsin.

2. Belgilab qoʻyilsinki:

Mikrosanoat markazlari hududlarning ixtisoslashuvi va tadbirkorlik anʼanalarini (hududlarning drayveri), yuqori daromadli ish oʻrinlarini yaratishni, shuningdek, xorijiy davlatlar (Xitoy, Janubiy Koreya, Turkiya) tajribasi asosida qurish inobatga olingan holda ishlab chiqiladigan alohida konsepsiyaga muvofiq barpo etiladi;

Mikrosanoat markazlarida hunarmandchilik, tikuvchilik, poyabzalchilik, qandolatchilik va boshqa tadbirkorlik faoliyati turlari bilan shugʻullanadigan kichik va oʻrta tadbirkorlik subyektlari (keyingi oʻrinlarda — tadbirkorlik subyektlari) joylashtiriladi;

Mikrosanoat markazlariga ishlab chiqarishlarni joylashtirishda tabiiy gazga muqobil boʻlgan yoqilgʻi turlaridan va energiya tejamkor texnologiyalardan (geliokollektor, issiqlik nasosi, quyosh panellari, issiqlikni qayta tiklash-rekuperatsiya qilish va boshqalar) foydalanishga ustuvorlik beriladi;

Mikrosanoat markazlarining loyiha konsepsiyasi Bandlikka koʻmaklashish davlat jamgʻarmasi mablagʻlari hisobidan Oʻzbekiston Respublikasi Kambagʻallikni qisqartirish va bandlik vazirligi tomonidan loyiha tashkilotlarini jalb qilish orqali ishlab chiqiladi va tasdiqlanadi;

Mikrosanoat markazlarini qurish uchun yer uchastkalari tasdiqlangan loyiha konsepsiyasi asosida ishlab chiqarish bino va inshootlarini tayyor holda qurish va keyinchalik ularga tadbirkorlik subyektlarini joylashtirish uchun tashabbuskor pudrat tashkilotlariga elektron onlayn-auksion savdolari orqali sotiladi;

elektron onlayn-auksion savdolari Oʻzbekiston Respublikasi Prezidentining 2025-yil 17-yanvardagi PQ-12-son qarori bilan tasdiqlangan 2025-2026-yillarda Qoraqalpogʻiston Respublikasi, viloyatlar va Toshkent shahrida mikrosanoat markazlarini barpo etish loyihalarining manzilli roʻyxati asosida oʻtkaziladi;

elektron onlayn-auksion savdolari gʻolibi boʻlgan pudrat tashkilotlari bilan Oʻzbekiston Respublikasi Kambagʻallikni qisqartirish va bandlik vazirligi hamda tuman (shahar) hokimliklari oʻrtasida Mikrosanoat markazlarini tasdiqlangan loyiha konsepsiyasi asosida qurish va ularga tadbirkorlik subyektlarini joylashtirish shartlari (ijaraga (lizingga) berish, kredit, toʻliq yoki boʻlib-boʻlib toʻlash orqali sotish) toʻgʻrisida uch tomonlama bitim tuziladi;

Mikrosanoat markazlarida yaratiladigan ishlab chiqarish maydonlari tadbirkorlik subyektlariga pudrat tashkilotlari tomonidan uch tomonlama bitimda koʻrsatilgan shartlar asosida taklif etiladi;

Mikrosanoat markazlarini muhandislik-kommunikatsiya infratuzilmasi bilan taʼminlash boʻyicha xarajatlar mahalliy budjetlarning qoʻshimcha manbalari, shu jumladan, mahalliy budjetlarga ushbu qarorga muvofiq yerlarni elektron onlayn-auksion savdolari orqali sotishdan tushgan mablagʻlar va qonunchilikda taqiqlanmagan boshqa manbalar hisobidan amalga oshiriladi.

3. Hududlarda mikrosanoat markazlarini barpo etish hamda ularga kichik va oʻrta tadbirkorlik subyektlarini joylashtirish boʻyicha ishchi guruhlarning namunaviy tarkibi (keyingi oʻrinlarda — ishchi guruhlar) ilovaga muvofiq tasdiqlansin.

4. Quyidagilar ishchi guruhlarning asosiy vazifalari etib belgilansin:

Oʻzbekiston Respublikasi Prezidentining “2025-yilda aholi bandligini taʼminlash va kambagʻallikni qisqartirish chora-tadbirlari toʻgʻrisida” 2025-yil 17-yanvardagi PQ-12-son qaroriga muvofiq mikrosanoat markazlarini barpo etish uchun belgilangan hududlardan tuman (shahar) hokimliklari zaxirasidagi qishloq xoʻjaligiga moʻljallanmagan boʻsh yer uchastkalarini (keyingi oʻrinlarda — yer uchastkalari) tanlash;

Mikrosanoat markazlarini loyiha konsepsiyasi asosida qurish uchun tanlangan yer uchastkalarining belgilangan tartibda elektron onlayn-auksion savdolariga chiqarilishini tashkil etish;

Mikrosanoat markazlari pudrat tashkilotlari tomonidan belgilangan muddatlarda qurilishi ustidan doimiy monitoring yuritish;

Mikrosanoat markazlariga tadbirkorlik subyektlarini joylashtirish va ularning faoliyatini tashkil etishda yordam koʻrsatish;

Mikrosanoat markazlarini barpo etish loyihalari doirasida yangi ish oʻrinlari yaratilishini nazorat qilish.

5. Oʻzbekiston Respublikasi Kambagʻallikni qisqartirish va bandlik vazirligi:

a) ishchi guruhlar bilan birgalikda:

hududlarning imkoniyatidan kelib chiqqan holda, Mikrosanoat markazlari ixtisoslashuvini belgilash va Mikrosanoat markazlari loyiha konsepsiyasini ishlab chiqish va tasdiqlash;

Mikrosanoat markazlarining loyiha konsepsiyasida ishlab chiqarish maydonlari bilan bir qatorda shourum, omborxona, ofis va oʻquv-ishlab chiqarish xonalari tashkil etilishini inobatga olish;

Mikrosanoat markazlarining ixtisoslashuvidan kelib chiqib, ularga tadbirkorlik subyektlarining loyihalarini joylashtirish uchun tajribali mutaxassislarni, shu jumladan, xorijiy konsultantlarni Bandlikka koʻmaklashish davlat jamgʻarmasi mablagʻlari hisobidan belgilangan tartibda jalb qilish;

mahallalarda tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman (shahar) hokimi yordamchilari koʻmagida tadbirkorlik subyektlari ishlab chiqargan mahsulotlarni onlayn platformalar orqali sotishga koʻmaklashish;

zarur hollarda Mikrosanoat markazlari hududida tadbirkorlik subyektlari bilan birgalikda ularning ixtisoslashuvi boʻyicha Bandlikka koʻmaklashish davlat jamgʻarmasi mablagʻlari hisobidan dual taʼlim tizimini tashkil etish orqali kambagʻal va ishsiz fuqarolarni kasb-hunarga oʻqitish hamda ishga joylashtirish;

b) Markaziy bank, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda:

Mikrosanoat markazlariga tadbirkorlarni jalb qilish, ularning biznes-rejalari asosida yangi loyihalarni ishlab chiqish, loyihalarga tijorat banklari tomonidan kredit ajratish va loyihalarni amalga oshirishda koʻmaklashish;

mahalla bankirlari orqali bank xizmatlarini targʻib qilish, tadbirkorlarni moliyaviy qoʻllab-quvvatlash va yangi mijozlarni jalb qilish;

Mikrosanoat markazlarining ixtisoslashuvi va shart-sharoitlaridan kelib chiqib, boshqa hududlardagi ijobiy tajribalarni ommalashtirish choralarini koʻrsin.

6. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari Mikrosanoat markazlarining loyiha konsepsiyasi tasdiqlanganidan soʻng:

manfaatdor vazirlik va idoralar bilan birgalikda Mikrosanoat markazlarini loyiha konsepsiyasi asosida qurish uchun tanlangan yer uchastkalarining belgilangan tartibda elektron onlayn-auksion savdolariga chiqarilishini taʼminlasin. Bunda elektron onlayn-auksion savdolari ishchi guruh xulosasiga asosan salohiyatli pudrat tashkilotlari oʻrtasida yopiq shaklda oʻtkazilishi mumkin;

Oʻzbekiston Respublikasi Energetika vazirligi, Transport vazirligi huzuridagi Avtomobil yoʻllari qoʻmitasi, Raqamli texnologiyalar vazirligi hamda “Oʻzsuvtaʼminot” AJ bilan birgalikda ikki hafta muddatda Mikrosanoat markazlarini muhandislik-kommunikatsiya tarmoqlariga ulash boʻyicha tarmoq jadvallarini ishlab chiqsin va tasdiqlasin;

Vazirlar Mahkamasi huzuridagi Qurilish va uy-joy kommunal xoʻjaligi sohasida nazorat qilish inspeksiyasi bilan birgalikda Mikrosanoat markazlarida bajariladigan qurilish-montaj ishlarining sifati ustidan davlat arxitektura-qurilish nazorati oʻrnatilishini taʼminlasin.

7. Oʻzbekiston Respublikasi Kambagʻallikni qisqartirish va bandlik vazirligi:

har chorakda Mikrosanoat markazlari faoliyatini tashkil etishda yuzaga keladigan muammolarni joylarga chiqqan holda oʻrganib borsin va ularni bartaraf etish boʻyicha ishchi guruhlar hamda mutasaddi vazirlik va idoralar bilan tegishli choralar koʻrsin;

2025-yil yakuniga qadar Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda aholini daromadli mehnat bilan taʼminlash dasturlari doirasida Mikrosanoat markazlarini barpo etish loyihalarini yanada kengaytirish boʻyicha takliflarni Vazirlar Mahkamasiga kiritsin.

8. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda kambagʻallikni qisqartirish va bandlik vaziri B.E. Zaxidov zimmasiga yuklansin.

Vazirlar Mahkamasining 2025-yil 8-maydagi 308-son qaroriga ILOVA

Hududlarda mikrosanoat markazlarini barpo etish hamda ularga kichik va oʻrta tadbirkorlik subyektlarini joylashtirish boʻyicha ishchi guruhlarning namunaviy

1. Lavozimiga koʻra — Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining moliya-iqtisodiyot va kambagʻallikni qisqartirish masalalari boʻyicha birinchi oʻrinbosarlari — Qoraqalpogʻiston Respublikasi iqtisodiyot va moliya vaziri, viloyatlar va Toshkent shahar iqtisodiyot va moliya bosh boshqarmalari boshliqlari, ishchi guruh rahbari 2. Lavozimiga koʻra — Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosarlari, ishchi guruh rahbari oʻrinbosari 3. Lavozimiga koʻra — Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining oʻrinbosari — viloyatlar va Toshkent shahar investitsiyalar, sanoat va savdo boshqarmalari boshliqlari 4. Lavozimiga koʻra — Qoraqalpogʻiston Respublikasi kambagʻallikni qisqartirish va bandlik vaziri, viloyatlar va Toshkent shahar kambagʻallikni qisqartirish va bandlik boshqarmalari boshliqlari 5. Lavozimiga koʻra — Qoraqalpogʻiston Respublikasi, viloyatlar va Toshkent shahar Qurilish va uy-joy kommunal xoʻjaligi sohasida nazorat qilish hududiy inspeksiyalari boshliqlari 6. Lavozimiga koʻra — Markaziy bankning hududiy bosh boshqarmalari boshliqlari 7. Lavozimiga koʻra — Davlat aktivlarini boshqarish agentligining hududiy boshqarmalari boshliqlari 8. Lavozimiga koʻra — Kadastr agentligining hududiy boshqarmalari boshliqlari 9. Lavozimiga koʻra — Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi “Yagona buyurtmachi xizmati” injiniring kompaniyalari direktorlari

Oʻzbekiston Respublikasining Bosh vaziri A. ARIPOV

Toshkent sh.,

2025-yil 8-may,

308-son

(Qonunchilik maʼlumotlari milliy bazasi, 12.05.2025-y., 09/25/308/0429-son)

lex.uz