📅 2025-yil 14-may · Vazirlik va idoralar hujjatlari · Bosh prokurori
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 14 май · Вазирлик ва идоралар ҳужжатлари · Бош прокурори
Расмий матн. Расмий ҳужжат. Таҳририй изоҳлар киритилмаган.
📅 14 мая 2025 г. · Документы министерств и ведомств · Генерального прокурора
Официальный текст. Официальный документ. Редакционные примечания не включены.
📅 14 May 2025 · Ministry and agency documents · Bosh prokurori
Official text. Official document. Editorial notes are not included.
Ўзбекистон Республикаси Бош прокурорининг
буйруғи
НИЗОМ
Давлат ижрочиларини ижро йиғими ҳисобидан моддий рағбатлантириш тартиби тўғрисидаги низомни тасдиқлаш ҳақида
Ўзбекистон Республикасининг «Прокуратура тўғрисида»ги Қонуни ҳамда Ўзбекистон Республикаси Президентининг 2024 йил 3 январдаги ПФ-1-сон «Суд ҳужжатлари ва бошқа органлар ҳужжатларини ижро этиш тизимини ислоҳ этиш ва соҳани рақамлаштириш бўйича қўшимча чора-тадбирлар тўғрисида»ги Фармонига мувофиқ буюраман:
1. Давлат ижрочиларини ижро йиғими ҳисобидан моддий рағбатлантириш тартиби тўғрисидаги низом иловага мувофиқ тасдиқлансин.
2. Мазкур буйруқ Ўзбекистон Республикаси Иқтисодиёт ва молия вазирлиги билан келишилган.
3. Мазкур буйруқ расмий эълон қилинган кундан эътиборан кучга киради.
Келишилди:
Ўзбекистон Республикаси Бош прокурорининг 2025 йил 14 майдаги 26-Б-сон буйруғига ИЛОВА
Давлат ижрочиларини ижро йиғими ҳисобидан моддий рағбатлантириш тартиби тўғрисидаги
Мазкур Низом Ўзбекистон Республикаси Бош прокуратураси ҳузуридаги Мажбурий ижро бюросининг (бундан буён матнда Бюро деб юритилади) давлат ижрочилари ва давлат ижрочиси мақомига эга бўлган ходимларини ижро йиғими ҳисобидан моддий рағбатлантириш (бундан буён матнда моддий рағбатлантириш деб юритилади) тартибини белгилайди .
1-боб. Умумий қоидалар
1. Моддий рағбатлантириш суд ҳужжатлари ва бошқа органлар ҳужжатларини мажбурий ижро этишни таъминлаш самарадорлигини ошириш мақсадида қарздордан ундирилган ижро йиғимининг бир қисмини давлат ижрочилари ва давлат ижрочиси мақомига эга бўлган ходимларга ажратма сифатида қолдириш орқали амалга оширилади.
2. Моддий рағбатлантириш қонунийлик, адолатлилик, холисоналик ва ошкоралик принциплари асосида амалга оширилади.
2-боб. Моддий рағбатлантириш асослари
3. Давлат ижрочилари ва давлат ижрочиси мақомига эга бўлган ходимларга бериладиган моддий рағбатлантириш миқдорлари Ижро иши юритувлари ягона электрон базаси (бундан буён матнда дастурий таъминот деб юритилади) орқали автоматик тарзда ҳар ой якуни бўйича ҳисоблаб борилади.
4. Моддий рағбатлантириш тўловлари давлат ижрочиси ва давлат ижрочиси мақомига эга бўлган ходимларнинг иш юритувида бўлган тамомланган ижро ишларидан ой давомида тўлов тизимлари орқали ундирилган ижро йиғимининг бир қисмини ажратиш орқали амалга оширилади.
Бунда, ижро йиғимининг тўғри ва ҳаққоний қўлланилиши, тақсимланиши ва ўтказилишига давлат ижрочиси ва давлат ижрочиси мақомига эга бўлган ходим масъул ҳисобланади.
5. Моддий рағбатлантириш қисман ёки соддалаштирилган тартибда ундирув амалга оширилган, ижроси тўхтатилган ёхуд кечиктирилган, шунингдек бошқа ҳудудга юборилган ҳамда ижросиз қайтарилган ижро ишларига нисбатан татбиқ этилмайди.
6. Айрим тоифадаги қарздорлардан ундириладиган ижро йиғими ажратма сифатида қолдирилмайди ёки ажратилмайди. Бундай тоифадаги қарздорлар рўйхати Бюро директори томонидан Ўзбекистон Республикаси Бош прокуратураси билан келишилган ҳолда тасдиқланади.
7. Хизмат сафаридаги ёки ротация қилинган давлат ижрочилари ва давлат ижрочиси мақомига эга бўлган ходимларга моддий рағбатлантириш тўловлари ишлаб турган ҳудуд ҳамда муқаддам ишлаган ҳудуддаги иш юритувидаги ижро ишларининг натижалари инобатга олган ҳолда ҳисобланади.
Бунда, хизмат сафаридаги ёки ротация қилинган давлат ижрочилари ва давлат ижрочиси мақомига эга бўлган ходимларнинг ишлаб турган ҳудуд ҳамда муқаддам ишлаган ҳудуддаги амалга оширган ижро ишлари дастурий таъминотда ҳисоблаб борилади.
3-боб. Моддий рағбатлантириш тартиби
8. Моддий рағбатлантириш ҳар ой якуни бўйича Бюро директори ва ҳудудий бошқарма бошлиғининг буйруғига асосан кейинги ойнинг 10 санасига қадар амалга оширилади.
9. Моддий рағбатлантириш учун харажатлар Мажбурий ижро бюросини ривожлантириш жамғармасига келиб тушган ижро йиғими маблағларининг 10 фоизи миқдоридаги ажратма ҳисобидан амалга оширилади.
10. Моддий рағбатлантириш харажатлари учун ажратма мулкий характерга эга бўлган ижро ҳужжатлари бўйича қуйидаги миқдорларда тақсимланади:
1) Бюронинг марказий аппаратида:
ажратманинг 80 фоизи, бироқ меҳнатга ҳақ тўлашнинг энг кам миқдорининг уч бараваридан ошмаган миқдорда бевосита ижро йиғимини ундирган давлат ижрочиси мақомига эга бўлган ходимга;
ажратманинг 20 фоизи, бироқ меҳнатга ҳақ тўлашнинг энг кам миқдорининг уч бараваридан ошмаган миқдорда давлат ижрочиси мақомига эга бўлган бошқа ходимларга;
2) Бюронинг ҳудудий бошқармаларида:
ажратманинг 80 фоизи, бироқ меҳнатга ҳақ тўлашнинг энг кам миқдорининг уч бараваридан ошмаган миқдорда бевосита ижро йиғимини ундирган давлат ижрочиси мақомига эга бўлган ходимга;
ажратманинг 20 фоизи, бироқ меҳнатга ҳақ тўлашнинг энг кам миқдорининг уч бараваридан ошмаган миқдорда бошқа давлат ижрочиси мақомига эга бўлган ходимларга;
3) Бюронинг туман (шаҳар) бўлимларида:
ажратманинг 80 фоизи, бироқ меҳнатга ҳақ тўлашнинг энг кам миқдорининг тўрт бараваридан ошмаган миқдорда бевосита ижро йиғимини ундирган давлат ижрочисига;
ажратманинг 20 фоизи, бироқ меҳнатга ҳақ тўлашнинг энг кам миқдорининг тўрт бараваридан ошмаган миқдорда Бюронинг туман (шаҳар) бўлимлари бошқа давлат ижрочилари ва давлат ижрочиси мақомига эга бўлган ходимларига.
Мазкур бандда кўрсатилган ходимларни рағбатлантиришнинг умумий миқдори 1 ва 2-кичик бандлари бўйича меҳнатга ҳақ тўлашнинг энг кам миқдорининг уч бараваридан, 3-кичик банди бўйича меҳнатга ҳақ тўлашнинг энг кам миқдорининг тўрт бараваридан ошмайди.
Моддий рағбатлантириш харажатлари учун ажратманинг 20 фоизи қўлланиладиган бошқа давлат ижрочилари ва давлат ижрочиси мақомига эга бўлган ходимларнинг лавозимлари рўйхати Бюро директори томонидан тасдиқланади.
11. Мулкий характерга эга бўлмаган ижро ҳужжатлари бўйича ундирилган ижро йиғимидан ажратма давлат ижрочисига тўлиқ миқдорда, бироқ меҳнатга ҳақ тўлашнинг энг кам миқдорининг тўрт бараваридан ошмаган миқдорда йўналтирилади.
12. Ижро йиғимини қўллаш тўғрисидаги қарор бекор қилинган ёки ҳақиқий эмас деб топилганда, ижро йиғимини қайтариш харажатлари кейинги давр учун тўланадиган ажратма ҳисобидан қайта ҳисоб-китоб қилинади.
Давлат ижрочиси ва давлат ижрочиси мақомига эга бўлган ходим прокуратура органлари тизимидан бўшатилган ва у билан якуний ҳисоб-китоб амалга оширилмаган бўлса, ижро йиғимини қайтариш харажатлари якуний ҳисоб-китоб даврида ушлаб қолинади ҳамда агар у билан якуний ҳисоб-китоб амалга оширилган бўлса, харажатлар қонунчиликда белгиланган тартибда ундирилади.
13. Моддий рағбатлантириш тўловлари меҳнатга ҳақ тўлаш тизимида назарда тутилган тўловлар жумласига киради ва интизомий жазо амал қилиб турган муддат мобайнида ҳам қўлланилади.
14. Моддий рағбатлантириш тўловлари давлат ижрочиси ва давлат ижрочиси мақомига эга бўлган ходим дастурий таъминотга нотўғри маълумотлар киритганлиги аниқланганда ёки бир ойдан ортиқ вақт мобайнида асосий вазифасига киришмаганда (ўқув муассасасида таҳсил олаётган, ҳомиладорлик, туғиш ва бола парваришлаш таътилида бўлган, касаллиги сабабли даволанаётган ёки бошқа ҳолларда) қўлланилмайди.
4-боб. Якуний қоида
15. Мазкур Низом талабларининг бузилишида айбдор бўлган шахслар белгиланган тартибда жавобгар бўладилар.
Бош прокурор Н. ЙЎЛДОШЕВ
Иқтисодиёт ва молия вазири Д. КУЧКАРОВ
Тошкент ш.,
2025 йил 14 май,
2025 йил 14 май
26-Б-сон
Oʻzbekiston Respublikasi Bosh prokurorining
buyrugʻi
NIZOM
Davlat ijrochilarini ijro yigʻimi hisobidan moddiy ragʻbatlantirish tartibi toʻgʻrisidagi nizomni tasdiqlash haqida
Oʻzbekiston Respublikasining “Prokuratura toʻgʻrisida”gi Qonuni hamda Oʻzbekiston Respublikasi Prezidentining 2024-yil 3-yanvardagi PF-1-son “Sud hujjatlari va boshqa organlar hujjatlarini ijro etish tizimini isloh etish va sohani raqamlashtirish boʻyicha qoʻshimcha chora-tadbirlar toʻgʻrisida”gi Farmoniga muvofiq buyuraman:
1. Davlat ijrochilarini ijro yigʻimi hisobidan moddiy ragʻbatlantirish tartibi toʻgʻrisidagi nizom ilovaga muvofiq tasdiqlansin.
2. Mazkur buyruq Oʻzbekiston Respublikasi Iqtisodiyot va moliya vazirligi bilan kelishilgan.
3. Mazkur buyruq rasmiy eʼlon qilingan kundan eʼtiboran kuchga kiradi.
Kelishildi:
Oʻzbekiston Respublikasi Bosh prokurorining 2025-yil 14-maydagi 26-B-son buyrugʻiga ILOVA
Davlat ijrochilarini ijro yigʻimi hisobidan moddiy ragʻbatlantirish tartibi toʻgʻrisidagi
Mazkur Nizom Oʻzbekiston Respublikasi Bosh prokuraturasi huzuridagi Majburiy ijro byurosining (bundan buyon matnda Byuro deb yuritiladi) davlat ijrochilari va davlat ijrochisi maqomiga ega boʻlgan xodimlarini ijro yigʻimi hisobidan moddiy ragʻbatlantirish (bundan buyon matnda moddiy ragʻbatlantirish deb yuritiladi) tartibini belgilaydi .
1-bob. Umumiy qoidalar
1. Moddiy ragʻbatlantirish sud hujjatlari va boshqa organlar hujjatlarini majburiy ijro etishni taʼminlash samaradorligini oshirish maqsadida qarzdordan undirilgan ijro yigʻimining bir qismini davlat ijrochilari va davlat ijrochisi maqomiga ega boʻlgan xodimlarga ajratma sifatida qoldirish orqali amalga oshiriladi.
2. Moddiy ragʻbatlantirish qonuniylik, adolatlilik, xolisonalik va oshkoralik prinsiplari asosida amalga oshiriladi.
2-bob. Moddiy ragʻbatlantirish asoslari
3. Davlat ijrochilari va davlat ijrochisi maqomiga ega boʻlgan xodimlarga beriladigan moddiy ragʻbatlantirish miqdorlari Ijro ishi yurituvlari yagona elektron bazasi (bundan buyon matnda dasturiy taʼminot deb yuritiladi) orqali avtomatik tarzda har oy yakuni boʻyicha hisoblab boriladi.
4. Moddiy ragʻbatlantirish toʻlovlari davlat ijrochisi va davlat ijrochisi maqomiga ega boʻlgan xodimlarning ish yurituvida boʻlgan tamomlangan ijro ishlaridan oy davomida toʻlov tizimlari orqali undirilgan ijro yigʻimining bir qismini ajratish orqali amalga oshiriladi.
Bunda, ijro yigʻimining toʻgʻri va haqqoniy qoʻllanilishi, taqsimlanishi va oʻtkazilishiga davlat ijrochisi va davlat ijrochisi maqomiga ega boʻlgan xodim masʼul hisoblanadi.
5. Moddiy ragʻbatlantirish qisman yoki soddalashtirilgan tartibda undiruv amalga oshirilgan, ijrosi toʻxtatilgan yoxud kechiktirilgan, shuningdek boshqa hududga yuborilgan hamda ijrosiz qaytarilgan ijro ishlariga nisbatan tatbiq etilmaydi.
6. Ayrim toifadagi qarzdorlardan undiriladigan ijro yigʻimi ajratma sifatida qoldirilmaydi yoki ajratilmaydi. Bunday toifadagi qarzdorlar roʻyxati Byuro direktori tomonidan Oʻzbekiston Respublikasi Bosh prokuraturasi bilan kelishilgan holda tasdiqlanadi.
7. Xizmat safaridagi yoki rotatsiya qilingan davlat ijrochilari va davlat ijrochisi maqomiga ega boʻlgan xodimlarga moddiy ragʻbatlantirish toʻlovlari ishlab turgan hudud hamda muqaddam ishlagan hududdagi ish yurituvidagi ijro ishlarining natijalari inobatga olgan holda hisoblanadi.
Bunda, xizmat safaridagi yoki rotatsiya qilingan davlat ijrochilari va davlat ijrochisi maqomiga ega boʻlgan xodimlarning ishlab turgan hudud hamda muqaddam ishlagan hududdagi amalga oshirgan ijro ishlari dasturiy taʼminotda hisoblab boriladi.
3-bob. Moddiy ragʻbatlantirish tartibi
8. Moddiy ragʻbatlantirish har oy yakuni boʻyicha Byuro direktori va hududiy boshqarma boshligʻining buyrugʻiga asosan keyingi oyning 10 sanasiga qadar amalga oshiriladi.
9. Moddiy ragʻbatlantirish uchun xarajatlar Majburiy ijro byurosini rivojlantirish jamgʻarmasiga kelib tushgan ijro yigʻimi mablagʻlarining 10 foizi miqdoridagi ajratma hisobidan amalga oshiriladi.
10. Moddiy ragʻbatlantirish xarajatlari uchun ajratma mulkiy xarakterga ega boʻlgan ijro hujjatlari boʻyicha quyidagi miqdorlarda taqsimlanadi:
1) Byuroning markaziy apparatida:
ajratmaning 80 foizi, biroq mehnatga haq toʻlashning eng kam miqdorining uch baravaridan oshmagan miqdorda bevosita ijro yigʻimini undirgan davlat ijrochisi maqomiga ega boʻlgan xodimga;
ajratmaning 20 foizi, biroq mehnatga haq toʻlashning eng kam miqdorining uch baravaridan oshmagan miqdorda davlat ijrochisi maqomiga ega boʻlgan boshqa xodimlarga;
2) Byuroning hududiy boshqarmalarida:
ajratmaning 80 foizi, biroq mehnatga haq toʻlashning eng kam miqdorining uch baravaridan oshmagan miqdorda bevosita ijro yigʻimini undirgan davlat ijrochisi maqomiga ega boʻlgan xodimga;
ajratmaning 20 foizi, biroq mehnatga haq toʻlashning eng kam miqdorining uch baravaridan oshmagan miqdorda boshqa davlat ijrochisi maqomiga ega boʻlgan xodimlarga;
3) Byuroning tuman (shahar) boʻlimlarida:
ajratmaning 80 foizi, biroq mehnatga haq toʻlashning eng kam miqdorining toʻrt baravaridan oshmagan miqdorda bevosita ijro yigʻimini undirgan davlat ijrochisiga;
ajratmaning 20 foizi, biroq mehnatga haq toʻlashning eng kam miqdorining toʻrt baravaridan oshmagan miqdorda Byuroning tuman (shahar) boʻlimlari boshqa davlat ijrochilari va davlat ijrochisi maqomiga ega boʻlgan xodimlariga.
Mazkur bandda koʻrsatilgan xodimlarni ragʻbatlantirishning umumiy miqdori 1 va 2-kichik bandlari boʻyicha mehnatga haq toʻlashning eng kam miqdorining uch baravaridan, 3-kichik bandi boʻyicha mehnatga haq toʻlashning eng kam miqdorining toʻrt baravaridan oshmaydi.
Moddiy ragʻbatlantirish xarajatlari uchun ajratmaning 20 foizi qoʻllaniladigan boshqa davlat ijrochilari va davlat ijrochisi maqomiga ega boʻlgan xodimlarning lavozimlari roʻyxati Byuro direktori tomonidan tasdiqlanadi.
11. Mulkiy xarakterga ega boʻlmagan ijro hujjatlari boʻyicha undirilgan ijro yigʻimidan ajratma davlat ijrochisiga toʻliq miqdorda, biroq mehnatga haq toʻlashning eng kam miqdorining toʻrt baravaridan oshmagan miqdorda yoʻnaltiriladi.
12. Ijro yigʻimini qoʻllash toʻgʻrisidagi qaror bekor qilingan yoki haqiqiy emas deb topilganda, ijro yigʻimini qaytarish xarajatlari keyingi davr uchun toʻlanadigan ajratma hisobidan qayta hisob-kitob qilinadi.
Davlat ijrochisi va davlat ijrochisi maqomiga ega boʻlgan xodim prokuratura organlari tizimidan boʻshatilgan va u bilan yakuniy hisob-kitob amalga oshirilmagan boʻlsa, ijro yigʻimini qaytarish xarajatlari yakuniy hisob-kitob davrida ushlab qolinadi hamda agar u bilan yakuniy hisob-kitob amalga oshirilgan boʻlsa, xarajatlar qonunchilikda belgilangan tartibda undiriladi.
13. Moddiy ragʻbatlantirish toʻlovlari mehnatga haq toʻlash tizimida nazarda tutilgan toʻlovlar jumlasiga kiradi va intizomiy jazo amal qilib turgan muddat mobaynida ham qoʻllaniladi.
14. Moddiy ragʻbatlantirish toʻlovlari davlat ijrochisi va davlat ijrochisi maqomiga ega boʻlgan xodim dasturiy taʼminotga notoʻgʻri maʼlumotlar kiritganligi aniqlanganda yoki bir oydan ortiq vaqt mobaynida asosiy vazifasiga kirishmaganda (oʻquv muassasasida tahsil olayotgan, homiladorlik, tugʻish va bola parvarishlash taʼtilida boʻlgan, kasalligi sababli davolanayotgan yoki boshqa hollarda) qoʻllanilmaydi.
4-bob. Yakuniy qoida
15. Mazkur Nizom talablarining buzilishida aybdor boʻlgan shaxslar belgilangan tartibda javobgar boʻladilar.
Bosh prokuror N. YOʻLDOSHEV
Iqtisodiyot va moliya vaziri D. KUCHKAROV
Toshkent sh.,
2025-yil 14-may,
2025-yil 14-may
26-B-son