📅 2025-yil 23-may · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 23 май · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 23 мая 2025 г. · Постановления Президента
Официальный текст. Официальный документ. Редакционные примечания не включены.
📅 23 May 2025 · Presidential resolutions
Official text. Official document. Editorial notes are not included.
Ўзбекистон Республикаси Президентининг
қарори
Мамлакатимизда қайта суғурта тизимини янада такомиллаштириш чора-тадбирлари тўғрисида
Миллий қайта суғурта бозори ҳажмини янада ошириш, таваккалчиликларни мўътадил тақсимлаш, суғурта қилдирувчилар ҳуқуқларини ҳимоя қилишни кучайтириш ва қайта суғурта тизимини янада такомиллаштириш мақсадида қарор қиламан:
I. Мақсадлар
1. Қуйидагилар қайта суғурта тизимини 2025 йилда янада такомиллаштиришнинг асосий мақсадлари этиб белгилансин:
(а) миллий қайта суғурта бозори ҳажмини 4 трлн сўмга етказиш;
(б) қайта суғурта хизматлари экспортини камида 30 фоизга ошириш;
(в) халқаро ҳамкорликни кенгайтириш ва қайта суғурта соҳасига жалб қилинадиган инвестициялар ҳажмини 150,0 млрд сўмгача ошириш.
II. Миллий қайта суғурта компаниясини ташкил этиш
2. Истиқболли лойиҳалар миллий агентлиги (кейинги ўринларда — Агентлик), Иқтисодиёт ва молия вазирлигининг «Oʻzbekiston qayta sugʻurta kompaniyasi» миллий қайта суғурта ташкилотини (кейинги ўринларда — Компания) ташкил этиш ва унинг фаолиятининг асосий йўналишлари этиб қуйидагиларни белгилаш тўғрисидаги таклифига розилик берилсин:
(а) суғурта фаолияти тўғрисидаги қонунчиликка мувофиқ барча қайта суғурта қилиш турларини амалга ошириш;
(б) хорижий ва маҳаллий инвесторларнинг республика иқтисодиётига киритадиган тўғридан-тўғри ва портфель инвестицияларининг ҳамда инвестиция лойиҳалари бўйича таваккалчиликларнинг комплекс қайта суғурта ҳимоясини таъминлаш;
(в) хорижий мамлакатларнинг суғурта ва қайта суғурта компаниялари билан қайта суғурта масалаларида ҳамкорлик қилиш ва қайта суғурта операцияларини амалга ошириш.
3. Белгилансинки:
(а) Компания акциядорлик жамияти шаклида ташкил қилинади ҳамда қонунчилик ҳужжатларида ўрнатилган тартибда қайта суғурта фаолиятини амалга оширади;
(б) Компаниянинг устав капитали 300 миллиард сўмдан кам бўлмаган миқдорда шакллантирилади, унинг эллик фоизини давлат улуши ва эллик фоизини хусусий инвесторлар улуши ташкил этади;
(в) Агентлик Компаниядаги давлат улуши бўйича акциядор функциясини амалга оширилади.
4. Белгилаб қўйилсинки:
(а) Агентлик ўз маблағлари ҳисобидан Компания устав капиталидаги давлат улушининг беш фоизини Компания ташкил этилганидан сўнг бир ой муддатда, қолган қисмини чораклик тенг улушларда бир йил давомида киритади;
(б) Иқтисодиёт ва молия вазирлиги Компаниянинг суғурта мажбуриятлари бўйича Ўзбекистон Республикаси Ҳукумати номидан Компания устав капиталининг шакллантирилмаган қисмига кафил ҳисобланади.
III. Қарор ижросини ташкил этиш, таъминлаш ва назорат
5. Агентлик Иқтисодиёт ва молия вазирлиги билан биргаликда икки ой муддатда қуйидагиларни Вазирлар Маҳкамасига киритсин:
(а) Компания фаолиятини ташкил этиш масалаларига оид Ҳукумат қарори лойиҳасини;
(б) қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида таклифларни.
6. Ўзбекистон Республикаси Президентининг 2019 йил 2 августдаги «Ўзбекистон Республикасининг суғурта бозорини ислоҳ қилиш ва унинг жадал ривожланишини таъминлаш чора-тадбирлари тўғрисида»ги ПҚ-4412-сон қарорининг 5-бандига иловага мувофиқ ўзгартиришлар киритилсин.
7. Мазкур қарорнинг ижросини назорат қилиш Ўзбекистон Республикаси Бош вазири А.Н. Арипов зиммасига юклансин.
Ўзбекистон Республикаси Президентининг 2025 йил 23 майдаги ПҚ-191-сон қарорига ИЛОВА
Ўзбекистон Республикаси Президентининг 2019 йил 2 августдаги «Ўзбекистон Республикасининг суғурта бозорини ислоҳ қилиш ва унинг жадал ривожланишини таъминлаш чора-тадбирлари тўғрисида»ги ПҚ-4412-сон қарорининг 5-бандига киритилаётган ўзгартиришлар
1. Биринчи хатбоши қуйидаги таҳрирда баён этилсин:
«5. 2025 йил 1 сентябрдан бошлаб шундай тартиб жорий қилинсинки, унга мувофиқ қайта суғурта қилдирувчилар суғурта воситачилари иштирокисиз, шунингдек, суғурта (қайта суғурта) брокерлари суғурта мажбуриятларини қайта суғурталаш учун хорижий суғурта ташкилотларига беришдан аввал бериладиган суғурта мажбуриятлари бўйича қайта суғурталаш бўйича офертани (қайта суғурталаш шартномаларини тузиш таклифларини) ваколатли давлат органи таъсисчилигида ташкил этилган қайта суғурта ташкилотларига юбориши, кейинчалик (рад этилган ҳолатда ёки қолган қисмини) Ўзбекистон Республикаси ҳудудида қайта суғурталаш фаолиятини амалга ошириш ҳуқуқига эга бўлган суғурта ташкилотларига юбориши шарт. Бунда:».
2. Олтинчи хатбошидан «облигатор қайта суғурталашга татбиқ этилмайди ҳамда» сўзлари чиқариб ташлансин.
Ўзбекистон Республикаси Президенти Ш. МИРЗИЁЕВ
Тошкент ш.,
2025 йил 23 май,
ПҚ- 191 -сон
Oʻzbekiston Respublikasi Prezidentining
qarori
Mamlakatimizda qayta sugʻurta tizimini yanada takomillashtirish chora-tadbirlari toʻgʻrisida
Milliy qayta sugʻurta bozori hajmini yanada oshirish, tavakkalchiliklarni moʻtadil taqsimlash, sugʻurta qildiruvchilar huquqlarini himoya qilishni kuchaytirish va qayta sugʻurta tizimini yanada takomillashtirish maqsadida qaror qilaman:
I. Maqsadlar
1. Quyidagilar qayta sugʻurta tizimini 2025-yilda yanada takomillashtirishning asosiy maqsadlari etib belgilansin:
(a) milliy qayta sugʻurta bozori hajmini 4 trln soʻmga yetkazish;
(b) qayta sugʻurta xizmatlari eksportini kamida 30 foizga oshirish;
(v) xalqaro hamkorlikni kengaytirish va qayta sugʻurta sohasiga jalb qilinadigan investitsiyalar hajmini 150,0 mlrd soʻmgacha oshirish.
II. Milliy qayta sugʻurta kompaniyasini tashkil etish
2. Istiqbolli loyihalar milliy agentligi (keyingi oʻrinlarda — Agentlik), Iqtisodiyot va moliya vazirligining “Oʻzbekiston qayta sugʻurta kompaniyasi” milliy qayta sugʻurta tashkilotini (keyingi oʻrinlarda — Kompaniya) tashkil etish va uning faoliyatining asosiy yoʻnalishlari etib quyidagilarni belgilash toʻgʻrisidagi taklifiga rozilik berilsin:
(a) sugʻurta faoliyati toʻgʻrisidagi qonunchilikka muvofiq barcha qayta sugʻurta qilish turlarini amalga oshirish;
(b) xorijiy va mahalliy investorlarning respublika iqtisodiyotiga kiritadigan toʻgʻridan-toʻgʻri va portfel investitsiyalarining hamda investitsiya loyihalari boʻyicha tavakkalchiliklarning kompleks qayta sugʻurta himoyasini taʼminlash;
(v) xorijiy mamlakatlarning sugʻurta va qayta sugʻurta kompaniyalari bilan qayta sugʻurta masalalarida hamkorlik qilish va qayta sugʻurta operatsiyalarini amalga oshirish.
3. Belgilansinki:
(a) Kompaniya aksiyadorlik jamiyati shaklida tashkil qilinadi hamda qonunchilik hujjatlarida oʻrnatilgan tartibda qayta sugʻurta faoliyatini amalga oshiradi;
(b) Kompaniyaning ustav kapitali 300 milliard soʻmdan kam boʻlmagan miqdorda shakllantiriladi, uning ellik foizini davlat ulushi va ellik foizini xususiy investorlar ulushi tashkil etadi;
(v) Agentlik Kompaniyadagi davlat ulushi boʻyicha aksiyador funksiyasini amalga oshiriladi.
4. Belgilab qoʻyilsinki:
(a) Agentlik oʻz mablagʻlari hisobidan Kompaniya ustav kapitalidagi davlat ulushining besh foizini Kompaniya tashkil etilganidan soʻng bir oy muddatda, qolgan qismini choraklik teng ulushlarda bir yil davomida kiritadi;
(b) Iqtisodiyot va moliya vazirligi Kompaniyaning sugʻurta majburiyatlari boʻyicha Oʻzbekiston Respublikasi Hukumati nomidan Kompaniya ustav kapitalining shakllantirilmagan qismiga kafil hisoblanadi.
III. Qaror ijrosini tashkil etish, taʼminlash va nazorat
5. Agentlik Iqtisodiyot va moliya vazirligi bilan birgalikda ikki oy muddatda quyidagilarni Vazirlar Mahkamasiga kiritsin:
(a) Kompaniya faoliyatini tashkil etish masalalariga oid Hukumat qarori loyihasini;
(b) qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflarni.
6. Oʻzbekiston Respublikasi Prezidentining 2019-yil 2-avgustdagi “Oʻzbekiston Respublikasining sugʻurta bozorini isloh qilish va uning jadal rivojlanishini taʼminlash chora-tadbirlari toʻgʻrisida”gi PQ-4412-son qarorining 5-bandiga ilovaga muvofiq oʻzgartirishlar kiritilsin.
7. Mazkur qarorning ijrosini nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidentining 2025-yil 23-maydagi PQ-191-son qaroriga ILOVA
Oʻzbekiston Respublikasi Prezidentining 2019-yil 2-avgustdagi “Oʻzbekiston Respublikasining sugʻurta bozorini isloh qilish va uning jadal rivojlanishini taʼminlash chora-tadbirlari toʻgʻrisida”gi PQ-4412-son qarorining 5-bandiga kiritilayotgan oʻzgartirishlar
1. Birinchi xatboshi quyidagi tahrirda bayon etilsin:
“5. 2025-yil 1-sentabrdan boshlab shunday tartib joriy qilinsinki, unga muvofiq qayta sugʻurta qildiruvchilar sugʻurta vositachilari ishtirokisiz, shuningdek, sugʻurta (qayta sugʻurta) brokerlari sugʻurta majburiyatlarini qayta sugʻurtalash uchun xorijiy sugʻurta tashkilotlariga berishdan avval beriladigan sugʻurta majburiyatlari boʻyicha qayta sugʻurtalash boʻyicha ofertani (qayta sugʻurtalash shartnomalarini tuzish takliflarini) vakolatli davlat organi taʼsischiligida tashkil etilgan qayta sugʻurta tashkilotlariga yuborishi, keyinchalik (rad etilgan holatda yoki qolgan qismini) Oʻzbekiston Respublikasi hududida qayta sugʻurtalash faoliyatini amalga oshirish huquqiga ega boʻlgan sugʻurta tashkilotlariga yuborishi shart. Bunda:”.
2. Oltinchi xatboshidan “obligator qayta sugʻurtalashga tatbiq etilmaydi hamda” soʻzlari chiqarib tashlansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2025-yil 23-may,
PQ- 191 -son
Президента Республики Узбекистан
Постановление
О мерах по дальнейшему совершенствованию системы перестрахования в стране
В целях дальнейшего увеличения объема национального рынка перестрахования, сбалансированного распределения рисков, усиления защиты прав страхователей и дальнейшего совершенствования системы перестрахования постановляю:
I. Цели
1. Определить основными целями дальнейшего совершенствования системы перестрахования на 2025 год:
(а) доведение объема национального рынка перестрахования до 4 трлн сумов;
(б) увеличение экспорта услуг перестрахования минимум на 30 процентов;
(в) расширение международного сотрудничества и увеличение объема инвестиций, привлекаемых в сферу перестрахования, до 150,0 млрд сумов.
II. Создание Национальной перестраховочной компании
2. Согласиться с предложением Национального агентства перспективных проектов (далее — Агентство), Министерства экономики и финансов о создании национальной перестраховочной организации «Oʻzbekiston qayta sugʻurta kompaniyasi» (далее — Компания) и определении основными направлениями ее деятельности:
(a) осуществления всех видов перестрахования в соответствии с законодательством о страховой деятельности;
(б) обеспечения комплексной перестраховочной защиты прямых и портфельных инвестиций, рисков при реализации инвестиционных проектов иностранных и местных инвесторов в экономику республики;
(в) осуществления сотрудничества по вопросам перестрахования и проведения перестраховочных операций со страховыми и перестраховочными компаниями зарубежных стран.
3. Установить, что:
(а) Компания создается в форме акционерного общества и осуществляет перестраховочную деятельность в порядке, установленном актами законодательства;
(б) уставный капитал Компании формируется в размере не менее 300 миллиардов сумов, из них пятьдесят процентов составляет государственная доля, пятьдесят процентов — доля частных инвесторов;
(в) Агентство выполняет функцию акционера по государственной доле в Компании.
4. Определить, что:
(а) Агентство за счет собственных средств в месячный срок после создания Компании вносит пять процентов государственной доли в уставном капитале Компании, остальную часть — ежеквартально равными долями в течение одного года;
(б) Министерство экономики и финансов является гарантом по страховым обязательствам Компании по несформированной части уставного капитала Компании от имени Правительства Республики Узбекистан.
III. Организация, обеспечение исполнения постановления и контроль
5. Агентству совместно с Министерством экономики и финансов в двухмесячный срок внести в Кабинет Министров:
(а) проект постановления Правительства по вопросам организации деятельности Компании;
(б) предложения об изменениях и дополнениях в акты законодательства, вытекающих из настоящего постановления.
6. Внести изменения в пункт 5 постановления Президента Республики Узбекистан от 2 августа 2019 года № ПП-4412 «О мерах по реформированию и обеспечению ускоренного развития страхового рынка Республики Узбекистан» согласно приложению .
7. Контроль за исполнением настоящего постановления возложить на Премьер-министра Республики Узбекистан А.Н. Арипова.
ПРИЛОЖЕНИЕ к постановлению Президента Республики Узбекистан от 23 мая 2025 года № ПП-191
Изменения, вносимые в пункт 5 постановления Президента Республики Узбекистан от 2 августа 2019 года № ПП-4412 «О мерах по реформированию и обеспечению ускоренного развития страхового рынка Республики Узбекистан»
1. Абзац первый изложить в следующей редакции:
«5. Внедрить с 1 сентября 2025 года порядок, в соответствии с которым до передачи страховых обязательств в перестрахование иностранным страховым организациям перестрахователи без участия страховых посредников, а также страховочные (перестраховочные) брокеры обязаны направить оферты (предложения заключить договоры перестрахования) по перестрахованию перестраховочным организациям, созданным при учредительстве уполномоченного государственного органа, в последующем (в случае отказа или оставшуюся часть) — страховым организациям, имеющим право осуществлять перестраховочную деятельность на территории Республики Узбекистан. При этом:».
2. Из абзаца шестого слова «не распространяются на облигаторное перестрахование и» исключить.
Президент Республики Узбекистан Ш. МИРЗИЁЕВ
г. Ташкент,
23 мая 2025 г.,
№ ПП- 191