📅 2025-yil 27-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 27 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 мая 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 27 May 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Қорақалпоғистон Республикасида кунжут ва мош экинларини етиштириш тизимини такомиллаштириш тўғрисида
Қорақалпоғистон Республикасида юқори даромадли ва экспортбоп қишлоқ хўжалиги маҳсулотларини етиштириш фаолияти билан шуғулланувчи хусусий сектор вакилларига кўмаклашиш, соҳанинг экспорт салоҳиятини янада юксалтириш ҳамда аҳоли бандлиги ва даромадларини ошириш механизмини таъминлайдиган ташкилий тизимни йўлга қўйиш мақсадида Вазирлар Маҳкамаси қарор қилади:
1. Белгилансинки, 2025 йилдан бошлаб Қорақалпоғистон Республикасида:
а) ҳар бир туманда камида 50 гектар майдонда «бир контур — бир маҳсулот» тамойили асосида кунжут ва мош экинларини етиштириш бўйича намунавий лойиҳалар (кейинги ўринларда — намунавий лойиҳалар) амалга оширилади;
б) намунавий лойиҳалар учун Ўзбекистон Республикаси Президентининг «Қорақалпоғистон Республикасида тадбиркорликни янада қўллаб-қувватлаш ҳамда аҳоли фаровонлигини таъминлаш учун янги имкониятларни яратиш бўйича қўшимча чора-тадбирлар тўғрисида» 2025 йил 27 январдаги ПФ-10-сон Фармонига мувофиқ Ўзбекистон Республикаси Президентининг «Мева-сабзавотчилик соҳасини давлат томонидан қўллаб-қувватлаш, тармоқда кластер ва кооперация тизимини янада ривожлантириш чора-тадбирлари тўғрисида» 2021 йил 15 декабрдаги ПҚ-52-сон қарорининг 1-банди «а» кичик бандида назарда тутилган имтиёзли кредитлар суғурта таъминоти билан гаровсиз ажратилади;
в) кунжут ва мош экинларини етиштириш учун:
«Агроплатформа» ахборот тизими «Рақамли қишлоқ хўжалиги» ягона интеграцион платформаси (кейинги ўринларда — Агропортал) орқали имтиёзли кредитларни ажратишда тупроқнинг бир бонитет баллига нисбатан норматив ҳосилдорлик гектарига 0,27 центнерни ташкил қилади;
Ўзбекистон Республикаси Қишлоқ хўжалиги вазирлиги томонидан эълон қилинадиган кунжут ва мош экинининг тавсиявий сотиш нархлари имтиёзли кредитларни ажратишда ҳосил қиймати сифатида қабул қилинади.
2. Қорақалпоғистон Республикаси Вазирлар Кенгаши Ўзбекистон Республикаси Қишлоқ хўжалиги вазирлиги билан биргаликда бир ҳафта муддатда:
намунавий лойиҳаларни амалга оширадиган қишлоқ хўжалиги маҳсулотларини етиштирувчилар ҳамда экин майдонларининг контурлари рўйхатини тасдиқласин;
Агропорталда қишлоқ хўжалиги маҳсулотларини етиштирувчиларнинг таклифлари қабул қилинишини ҳамда кунжут ва мош экинларининг электрон жойлаштирилишини таъминласин;
имтиёзли кредитлар ҳисобидан кунжут ва мош экинларини етиштириш истагини билдирган қишлоқ хўжалиги маҳсулотларини етиштирувчиларнинг ариза ва кредит буюртманомаларини электрон шаклда хизмат кўрсатувчи тижорат банкларига тақдим этиш учун зарур шарт-шароитларни яратсин.
3. Ўзбекистон Республикаси Марказий банки ҳамда Иқтисодиёт ва молия вазирлиги ҳузуридаги Қишлоқ хўжалигини давлат томонидан қўллаб-қувватлаш жамғармаси:
Агропортал орқали тижорат банкларидан кредит ресурсларини ажратиш бўйича электрон буюртмалар қабул қилинишини ҳамда ушбу буюртмаларга асосан тижорат банкларига кредит ресурслари жойлаштирилишини;
қишлоқ хўжалиги маҳсулотларини етиштирувчилар тақдим этган электрон буюртмаларга асосан тижорат банклари томонидан имтиёзли кредитлар ажратиб борилишини таъминласин;
кредит қарздорликларини муддатидан ўтиб бартараф этган ва салбий кредит тарихига эга бўлган қишлоқ хўжалиги маҳсулотларини етиштирувчиларга, истисно тариқасида, имтиёзли кредитлар ажратиш тавсия этилсин.
4. Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалигида билим ва инновациялар миллий маркази хорижий илмий марказлар билан ҳамкорликда кунжут ва мош экинлари селекциясини йўлга қўйган ҳолда маҳаллий тупроқ-иқлим шароитларига мос, ҳосилдор янги навларни яратиш бўйича илмий изланишларни жадаллаштирсин.
5. Ўзбекистон Республикаси Қишлоқ хўжалиги вазирлиги Вазирлар Маҳкамаси ҳузуридаги Агросаноат мажмуи устидан назорат қилиш инспекцияси ва Қорақалпоғистон Республикаси Вазирлар Кенгаши билан биргаликда намунавий лойиҳалар доирасида кунжут ва мош экинларининг жойлаштирилишини, белгиланган агротехник тадбирлар ўз вақтида бажарилишини ҳамда зарур моддий-техника ресурсларининг етказиб берилишини ташкил этсин.
6. Ўзбекистон Республикаси Инвестициялар, саноат ва савдо вазирлиги Қорақалпоғистон Республикаси Вазирлар Кенгаши манфаатдор вазирлик ва идоралар билан биргаликда етиштирилган қишлоқ хўжалиги маҳсулотларининг экспорт имкониятларини кенгайтириш, реализациясини соддалаштириш ҳамда ташиш ва сотиш жараёнларини оптималлаштириш чораларини кўрсин.
7. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев ва Қорақалпоғистон Республикаси Вазирлар Кенгаши Раиси Ф.Ў. Эрманов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2025 йил 27 май,
331-сон
Oʻzbekiston Respublikasi Vazirlar Mahkamasining
qarori
Qoraqalpogʻiston Respublikasida kunjut va mosh ekinlarini yetishtirish tizimini takomillashtirish toʻgʻrisida
Qoraqalpogʻiston Respublikasida yuqori daromadli va eksportbop qishloq xoʻjaligi mahsulotlarini yetishtirish faoliyati bilan shugʻullanuvchi xususiy sektor vakillariga koʻmaklashish, sohaning eksport salohiyatini yanada yuksaltirish hamda aholi bandligi va daromadlarini oshirish mexanizmini taʼminlaydigan tashkiliy tizimni yoʻlga qoʻyish maqsadida Vazirlar Mahkamasi qaror qiladi:
1. Belgilansinki, 2025-yildan boshlab Qoraqalpogʻiston Respublikasida:
a) har bir tumanda kamida 50 gektar maydonda “bir kontur — bir mahsulot” tamoyili asosida kunjut va mosh ekinlarini yetishtirish boʻyicha namunaviy loyihalar (keyingi oʻrinlarda — namunaviy loyihalar) amalga oshiriladi;
b) namunaviy loyihalar uchun Oʻzbekiston Respublikasi Prezidentining “Qoraqalpogʻiston Respublikasida tadbirkorlikni yanada qoʻllab-quvvatlash hamda aholi farovonligini taʼminlash uchun yangi imkoniyatlarni yaratish boʻyicha qoʻshimcha chora-tadbirlar toʻgʻrisida” 2025-yil 27-yanvardagi PF-10-son Farmoniga muvofiq Oʻzbekiston Respublikasi Prezidentining “Meva-sabzavotchilik sohasini davlat tomonidan qoʻllab-quvvatlash, tarmoqda klaster va kooperatsiya tizimini yanada rivojlantirish chora-tadbirlari toʻgʻrisida” 2021-yil 15-dekabrdagi PQ-52-son qarorining 1-bandi “a” kichik bandida nazarda tutilgan imtiyozli kreditlar sugʻurta taʼminoti bilan garovsiz ajratiladi;
v) kunjut va mosh ekinlarini yetishtirish uchun:
“Agroplatforma” axborot tizimi “Raqamli qishloq xoʻjaligi” yagona integratsion platformasi (keyingi oʻrinlarda — Agroportal) orqali imtiyozli kreditlarni ajratishda tuproqning bir bonitet balliga nisbatan normativ hosildorlik gektariga 0,27 sentnerni tashkil qiladi;
Oʻzbekiston Respublikasi Qishloq xoʻjaligi vazirligi tomonidan eʼlon qilinadigan kunjut va mosh ekinining tavsiyaviy sotish narxlari imtiyozli kreditlarni ajratishda hosil qiymati sifatida qabul qilinadi.
2. Qoraqalpogʻiston Respublikasi Vazirlar Kengashi Oʻzbekiston Respublikasi Qishloq xoʻjaligi vazirligi bilan birgalikda bir hafta muddatda:
namunaviy loyihalarni amalga oshiradigan qishloq xoʻjaligi mahsulotlarini yetishtiruvchilar hamda ekin maydonlarining konturlari roʻyxatini tasdiqlasin;
Agroportalda qishloq xoʻjaligi mahsulotlarini yetishtiruvchilarning takliflari qabul qilinishini hamda kunjut va mosh ekinlarining elektron joylashtirilishini taʼminlasin;
imtiyozli kreditlar hisobidan kunjut va mosh ekinlarini yetishtirish istagini bildirgan qishloq xoʻjaligi mahsulotlarini yetishtiruvchilarning ariza va kredit buyurtmanomalarini elektron shaklda xizmat koʻrsatuvchi tijorat banklariga taqdim etish uchun zarur shart-sharoitlarni yaratsin.
3. Oʻzbekiston Respublikasi Markaziy banki hamda Iqtisodiyot va moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi:
Agroportal orqali tijorat banklaridan kredit resurslarini ajratish boʻyicha elektron buyurtmalar qabul qilinishini hamda ushbu buyurtmalarga asosan tijorat banklariga kredit resurslari joylashtirilishini;
qishloq xoʻjaligi mahsulotlarini yetishtiruvchilar taqdim etgan elektron buyurtmalarga asosan tijorat banklari tomonidan imtiyozli kreditlar ajratib borilishini taʼminlasin;
kredit qarzdorliklarini muddatidan oʻtib bartaraf etgan va salbiy kredit tarixiga ega boʻlgan qishloq xoʻjaligi mahsulotlarini yetishtiruvchilarga, istisno tariqasida, imtiyozli kreditlar ajratish tavsiya etilsin.
4. Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi xorijiy ilmiy markazlar bilan hamkorlikda kunjut va mosh ekinlari seleksiyasini yoʻlga qoʻygan holda mahalliy tuproq-iqlim sharoitlariga mos, hosildor yangi navlarni yaratish boʻyicha ilmiy izlanishlarni jadallashtirsin.
5. Oʻzbekiston Respublikasi Qishloq xoʻjaligi vazirligi Vazirlar Mahkamasi huzuridagi Agrosanoat majmui ustidan nazorat qilish inspeksiyasi va Qoraqalpogʻiston Respublikasi Vazirlar Kengashi bilan birgalikda namunaviy loyihalar doirasida kunjut va mosh ekinlarining joylashtirilishini, belgilangan agrotexnik tadbirlar oʻz vaqtida bajarilishini hamda zarur moddiy-texnika resurslarining yetkazib berilishini tashkil etsin.
6. Oʻzbekiston Respublikasi Investitsiyalar, sanoat va savdo vazirligi Qoraqalpogʻiston Respublikasi Vazirlar Kengashi manfaatdor vazirlik va idoralar bilan birgalikda yetishtirilgan qishloq xoʻjaligi mahsulotlarining eksport imkoniyatlarini kengaytirish, realizatsiyasini soddalashtirish hamda tashish va sotish jarayonlarini optimallashtirish choralarini koʻrsin.
7. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev va Qoraqalpogʻiston Respublikasi Vazirlar Kengashi Raisi F.Oʻ. Ermanov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 27-may,
331-son