📅 2025-yil 27-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 27 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 мая 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 27 May 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НАМУНАВИЙ ТУЗИЛМАСИ
Қишлоқ хўжалигига мўлжалланган ер участкаларини ижарага беришни янги тизим доирасида ташкил этишнинг қўшимча чора-тадбирлари тўғрисида
Ўзбекистон Республикаси Президентининг «Қишлоқ хўжалиги экин майдонлари унумдорлигини ошириш, тармоққа инвестициялар жалб қилиш учун қулай шарт-шароит яратиш бўйича навбатдаги чора-тадбирлар тўғрисида» 2025 йил 3 февралдаги ПФ-18-сон Фармонига мувофиқ қишлоқ хўжалигига мўлжалланган ерлардан оқилона фойдаланишнинг самарали тизимини жорий этиш мақсадида Вазирлар Маҳкамаси қарор қилади:
1. Қуйидагилар:
Ўзбекистон Республикаси Иқтисодиёт ва молия вазирлиги ҳузурида «Қишлоқ хўжалигида ер ислоҳотларини амалга ошириш лойиҳа офиси» (кейинги ўринларда — Лойиҳа офиси);
Қорақалпоғистон Республикаси Вазирлар Кенгаши, Андижон, Жиззах, Наманган, Тошкент ва Фарғона вилоятлари ҳокимликлари ҳузурида «Ижарага берилган қишлоқ хўжалиги ерларига хизмат кўрсатиш дирекцияси» ташкил этилганлиги маълумот учун қабул қилинсин.
2. Белгилансинки, Ўзбекистон Республикаси Иқтисодиёт ва молия вазирлигининг бошқарув ходимлари штат бирликлари доирасида юридик шахс бўлмаган ҳолда Лойиҳа офиси ташкил этилади.
Бунда меҳнатга ҳақ тўлаш миқдорлари ҳамда лавозим маошини белгилашда тариф коэффициенти, моддий рағбатлантириш ва ижтимоий ҳимоя қилиш шартлари бўйича Лойиҳа офиси раҳбари — Иқтисодиёт ва молия вазирлигининг бўлим бошлиғига, мутахассис ходимлари — вазирликнинг тегишли мутахассисларига тенглаштирилади.
Иқтисодиёт ва молия вазирлиги икки ҳафта муддатда Лойиҳа офиси тўғрисидаги низомни ҳамда унинг тузилмаси ва штат бирликларини тасдиқласин.
3. Қуйидагилар Лойиҳа офисининг асосий вазифалари этиб белгилансин:
«Ижарага берилган қишлоқ хўжалиги ерларига хизмат кўрсатиш дирекцияси» масъулияти чекланган жамиятлари фаолиятини мувофиқлаштириш;
тегишли вазирлик ва идоралар билан ҳамкорликда янги тизим самарадорлигини таҳлил қилиб бориш;
давлат дастурлари доирасида ажратилиши белгиланган имтиёзли кредитлардан фойдаланишда ижарачиларга ҳар томонлама кўмаклашиш;
қишлоқ хўжалигига мўлжалланган ер участкаларини сотишдан ҳақиқатда тушган маблағлар ҳисобини юритиш ва уларнинг белгиланган тартибда мақсадли сарфланишини таъминлаш;
заруратга кўра 2025 йилнинг кузги экиш мавсуми ва ундан кейинги даврларда бошқа ҳудудларда янги тизим жорий этиладиган қишлоқ хўжалигига мўлжалланган ер участкалари рўйхатини шакллантириш;
хорижий тажрибаларни ўрганган ҳолда соҳани янада ривожлантиришга қаратилган таклифларни ишлаб чиқиш;
қишлоқ хўжалигига мўлжалланган ер участкаларига ижара ҳуқуқини электрон онлайн-аукцион савдода сотишдан тушган маблағлардан Ўзбекистон Республикаси Иқтисодиёт ва молия вазирлиги томонидан тасдиқланадиган Лойиҳа офиси тўғрисидаги низомда белгиланадиган мақсадларда фойдаланиш;
ер ислоҳотларини давом эттириш, ижарага берилган қишлоқ хўжалигига мўлжалланган ер участкаларидан самарали фойдаланишни ташкил этиш, хусусан, соҳада инновацияларни жорий қилиш мақсадида хорижий экспертларни жалб қилиш.
4. Қорақалпоғистон Республикаси Вазирлар Кенгаши, Андижон, Жиззах, Наманган, Тошкент, Фарғона, Сирдарё ва Қашқадарё вилоятлари ҳокимликлари муассислигида ташкил этиладиган «Ижарага берилган қишлоқ хўжалиги ерларига хизмат кўрсатиш дирекцияси» масъулияти чекланган жамиятининг намунавий тузилмаси иловага мувофиқ тасдиқлансин.
5. Қорақалпоғистон Республикаси Вазирлар Кенгаши, Андижон, Жиззах, Наманган, Тошкент, Фарғона, Сирдарё ва Қашқадарё вилоятлари ҳокимликлари Ўзбекистон Республикаси Давлат активларини бошқариш агентлиги билан биргаликда:
2025 йил 10 июнга қадар «Ижарага берилган қишлоқ хўжалиги ерларига хизмат кўрсатиш дирекцияси» масъулияти чекланган жамиятлари (кейинги ўринларда — Дирекция) белгиланган тартибда давлат рўйхатидан ўтказилишини таъминласин;
2025 йил 15 июнга қадар Лойиҳа офиси томонидан ишлаб чиқилган намунавий низом асосида Дирекциялар фаолиятини ташкил этиш тўғрисидаги низомларни тасдиқласин;
2025 йил 1 июлга қадар 5 та штат бирлигидан иборат Дирекция фаолиятини йўлга қўйсин.
6. Белгилаб қўйилсинки:
Дирекция директори тегишлича Қорақалпоғистон Республикаси Вазирлар Кенгаши Раиси, вилоятлар ҳокимлари томонидан Ўзбекистон Республикаси Иқтисодиёт ва молия вазирлиги билан келишилган ҳолда лавозимга тайинланади ҳамда лавозимдан озод қилинади;
Дирекциялар фаолияти бўйича Ўзбекистон Республикаси Иқтисодиёт ва молия вазирлиги ҳузуридаги Лойиҳа офисига ҳамда Қорақалпоғистон Республикаси Вазирлар Кенгаши Раисининг ва вилоятлар ҳокимларининг молия-иқтисодиёт ва камбағалликни қисқартириш масалалари бўйича биринчи ўринбосарига ҳисобдор ҳисобланади;
Дирекцияга бюджетдан ташқари маблағлар ҳисобидан маҳаллий ҳамда хорижий мутахассислар ва экспертларни жалб қилиш ваколати берилади.
7. Қуйидагилар Дирекциянинг асосий вазифалари этиб белгилансин:
ижарага берилган қишлоқ хўжалигига мўлжалланган ерлардан самарали фойдаланишни ташкил этиш;
қишлоқ хўжалигига мўлжалланган ер участкаларини ижарага олувчиларнинг ижара шартномасида белгиланган ҳуқуқлардан амалда фойдаланишини кафолатлаш;
сув етказиб бериш лимитларига риоя қилинмаслиги натижасида қишлоқ хўжалигига мўлжалланган ер участкаларини ижарага олувчиларга етказилган зарарни дарҳол қоплаб бериш ва кейинчалик ушбу маблағларни сув етказиб берувчи ташкилотлардан регресс тартибда ундириб олиш;
ўз танловига кўра ижарага берилган қишлоқ хўжалигига мўлжалланган ерларнинг суғориш тизимларини яхшилаш, электр энергияси таъминоти объектларини қуриш ва реконструкция қилиш, техникалар ҳаракати учун ички хўжалик йўлларининг ҳолатини яхшилаш каби ишларга маблағ ажратиш, ушбу тадбирларда буюртмачи вазифасини бажариш;
Дирекцияга ижара ҳуқуқи асосида берилган қишлоқ хўжалигига мўлжалланган ер участкасини ёки унинг бир қисмини маҳаллий ва чет эллик инвесторлар, шу жумладан, чет эл инвестицияси иштирокидаги корхоналар, чет эллик юридик ва жисмоний шахсларга қонунчилик ҳужжатларида белгиланган тартибда иккиламчи ижарага бериш (учинчи шахсларга бериш ҳуқуқисиз);
қишлоқ хўжалигига мўлжалланган ер участкаларини ижарага олувчиларга ердан фойдаланиш бўйича кўмаклашиш ва уларнинг фаолиятини доимий таҳлил қилиб бориш ҳамда самарадорлигини ошириш юзасидан таклифлар ишлаб чиқиш;
2025 йилнинг кузги экиш мавсумини ва ундан кейинги даврларни янги тизим доирасида ташкил қилиш истаги бўлган қишлоқ хўжалиги субъектлари ҳамда туман ҳокимликлари захирасидаги бўш турган қишлоқ хўжалигига мўлжалланган ер участкалари рўйхатини шакллантириш ва электрон онлайн-аукцион савдоларига чиқариш учун таклифлар киритиш;
соҳага илғор инновация технологияларини фаол жорий этиш мақсадида инвестицияларни, шунингдек, хорижий ҳамда маҳаллий мутахассислар ва экспертларни жалб қилиш.
8. Дирекция фаолиятини молиялаштириш манбалари этиб қуйидагилар белгилансин:
қишлоқ хўжалигига мўлжалланган ер участкаларига ижара ҳуқуқини электрон онлайн-аукцион савдоларида сотишдан тушган маблағларнинг 25 фоизи (оператор харажатлари чегириб қолинган ҳолда);
сув етказиб бериш лимитларига риоя қилинмаслиги натижасида қишлоқ хўжалигига мўлжалланган ер участкаларини ижарага олувчиларга етказилган зарарни қоплаб бериш учун регресс тартибда ундириб олинган маблағлар;
ҳисобварақда вақтинча бўш турган маблағларни депозитга жойлаштиришдан олинадиган даромадлар;
юридик ва жисмоний шахсларнинг, шу жумладан, норезидентларнинг ҳомийлик хайриялари;
халқаро молия ташкилотлари ва хорижий ҳукумат молия ташкилотларининг грантлари ҳамда техник кўмак маблағлари;
қонунчилик ҳужжатлари билан тақиқланмаган бошқа маблағлар.
9. Дирекциянинг шахсий ғазна ҳисобварағидаги маблағлари Лойиҳа офиси билан келишилган ҳолда қуйидаги мақсадларга сарфланади:
сув етказиб бериш лимитларига риоя қилинмаслиги натижасида ер участкасини ижарага олувчига етказилган зарарни қоплаб бериш;
ижарага берилган ерларнинг суғориш тизимларини яхшилаш, электр энергияси таъминоти объектларини қуриш ва реконструкция қилиш, техникалар ҳаракати учун ички хўжалик йўллари ҳолатини яхшилаш ишларини молиялаштириш;
жалб қилинган хорижий ҳамда маҳаллий мутахассислар ва экспертларнинг меҳнатига қонунчилик ҳужжатларида белгиланган тартибда ҳақ тўлаш;
Дирекциянинг жорий фаолиятини молиялаштириш, шу жумладан, уларга тегишли бино ва иншоотларни сақлаш, ходимлар меҳнатига ҳақ тўлаш, шунингдек, мебель, алоқа воситалари, компьютер техникалари ва бошқа зарур инвентарлар билан таъминлаш.
10. Ўзбекистон Республикаси Иқтисодиёт ва молия вазирлиги манфаатдор вазирлик ва идоралар билан биргаликда ушбу қарорда назарда тутилган тизим доирасида амалга оширилган ишлар натижаларига кўра ушбу тизимни республиканинг бошқа ҳудудларида жорий қилиш тўғрисида 2026 йил 1 декабрга қадар Вазирлар Маҳкамасига таклифлар киритсин.
11. Ушбу қарорнинг ижросини самарали ташкил қилишга масъул ва шахсий жавобгар этиб Қорақалпоғистон Республикаси Вазирлар Кенгаши Раиси ҳамда Андижон, Жиззах, Наманган, Тошкент, Фарғона, Сирдарё ва Қашқадарё вилоятлари ҳокимлари белгилансин.
Қарор ижросини муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.
Вазирлар Маҳкамасининг 2025 йил 27 майдаги 332-сон қарорига ИЛОВА
«Ижарага берилган қишлоқ хўжалиги ерларига хизмат кўрсатиш дирекцияси» масъулияти чекланган жамиятининг
Ўзбекистон Республикасининг Бош вазири А. АРИПОВ
Тошкент ш.,
2025 йил 27 май,
332-сон
Oʻzbekiston Respublikasi Vazirlar Mahkamasining
qarori
NAMUNAVIY TUZILMASI
Qishloq xoʻjaligiga moʻljallangan yer uchastkalarini ijaraga berishni yangi tizim doirasida tashkil etishning qoʻshimcha chora-tadbirlari toʻgʻrisida
Oʻzbekiston Respublikasi Prezidentining “Qishloq xoʻjaligi ekin maydonlari unumdorligini oshirish, tarmoqqa investitsiyalar jalb qilish uchun qulay shart-sharoit yaratish boʻyicha navbatdagi chora-tadbirlar toʻgʻrisida” 2025-yil 3-fevraldagi PF-18-son Farmoniga muvofiq qishloq xoʻjaligiga moʻljallangan yerlardan oqilona foydalanishning samarali tizimini joriy etish maqsadida Vazirlar Mahkamasi qaror qiladi:
1. Quyidagilar:
Oʻzbekiston Respublikasi Iqtisodiyot va moliya vazirligi huzurida “Qishloq xoʻjaligida yer islohotlarini amalga oshirish loyiha ofisi” (keyingi oʻrinlarda — Loyiha ofisi);
Qoraqalpogʻiston Respublikasi Vazirlar Kengashi, Andijon, Jizzax, Namangan, Toshkent va Fargʻona viloyatlari hokimliklari huzurida “Ijaraga berilgan qishloq xoʻjaligi yerlariga xizmat koʻrsatish direksiyasi” tashkil etilganligi maʼlumot uchun qabul qilinsin.
2. Belgilansinki, Oʻzbekiston Respublikasi Iqtisodiyot va moliya vazirligining boshqaruv xodimlari shtat birliklari doirasida yuridik shaxs boʻlmagan holda Loyiha ofisi tashkil etiladi.
Bunda mehnatga haq toʻlash miqdorlari hamda lavozim maoshini belgilashda tarif koeffitsiyenti, moddiy ragʻbatlantirish va ijtimoiy himoya qilish shartlari boʻyicha Loyiha ofisi rahbari — Iqtisodiyot va moliya vazirligining boʻlim boshligʻiga, mutaxassis xodimlari — vazirlikning tegishli mutaxassislariga tenglashtiriladi.
Iqtisodiyot va moliya vazirligi ikki hafta muddatda Loyiha ofisi toʻgʻrisidagi nizomni hamda uning tuzilmasi va shtat birliklarini tasdiqlasin.
3. Quyidagilar Loyiha ofisining asosiy vazifalari etib belgilansin:
“Ijaraga berilgan qishloq xoʻjaligi yerlariga xizmat koʻrsatish direksiyasi” masʼuliyati cheklangan jamiyatlari faoliyatini muvofiqlashtirish;
tegishli vazirlik va idoralar bilan hamkorlikda yangi tizim samaradorligini tahlil qilib borish;
davlat dasturlari doirasida ajratilishi belgilangan imtiyozli kreditlardan foydalanishda ijarachilarga har tomonlama koʻmaklashish;
qishloq xoʻjaligiga moʻljallangan yer uchastkalarini sotishdan haqiqatda tushgan mablagʻlar hisobini yuritish va ularning belgilangan tartibda maqsadli sarflanishini taʼminlash;
zaruratga koʻra 2025-yilning kuzgi ekish mavsumi va undan keyingi davrlarda boshqa hududlarda yangi tizim joriy etiladigan qishloq xoʻjaligiga moʻljallangan yer uchastkalari roʻyxatini shakllantirish;
xorijiy tajribalarni oʻrgangan holda sohani yanada rivojlantirishga qaratilgan takliflarni ishlab chiqish;
qishloq xoʻjaligiga moʻljallangan yer uchastkalariga ijara huquqini elektron onlayn-auksion savdoda sotishdan tushgan mablagʻlardan Oʻzbekiston Respublikasi Iqtisodiyot va moliya vazirligi tomonidan tasdiqlanadigan Loyiha ofisi toʻgʻrisidagi nizomda belgilanadigan maqsadlarda foydalanish;
yer islohotlarini davom ettirish, ijaraga berilgan qishloq xoʻjaligiga moʻljallangan yer uchastkalaridan samarali foydalanishni tashkil etish, xususan, sohada innovatsiyalarni joriy qilish maqsadida xorijiy ekspertlarni jalb qilish.
4. Qoraqalpogʻiston Respublikasi Vazirlar Kengashi, Andijon, Jizzax, Namangan, Toshkent, Fargʻona, Sirdaryo va Qashqadaryo viloyatlari hokimliklari muassisligida tashkil etiladigan “Ijaraga berilgan qishloq xoʻjaligi yerlariga xizmat koʻrsatish direksiyasi” masʼuliyati cheklangan jamiyatining namunaviy tuzilmasi ilovaga muvofiq tasdiqlansin.
5. Qoraqalpogʻiston Respublikasi Vazirlar Kengashi, Andijon, Jizzax, Namangan, Toshkent, Fargʻona, Sirdaryo va Qashqadaryo viloyatlari hokimliklari Oʻzbekiston Respublikasi Davlat aktivlarini boshqarish agentligi bilan birgalikda:
2025-yil 10-iyunga qadar “Ijaraga berilgan qishloq xoʻjaligi yerlariga xizmat koʻrsatish direksiyasi” masʼuliyati cheklangan jamiyatlari (keyingi oʻrinlarda — Direksiya) belgilangan tartibda davlat roʻyxatidan oʻtkazilishini taʼminlasin;
2025-yil 15-iyunga qadar Loyiha ofisi tomonidan ishlab chiqilgan namunaviy nizom asosida Direksiyalar faoliyatini tashkil etish toʻgʻrisidagi nizomlarni tasdiqlasin;
2025-yil 1-iyulga qadar 5 ta shtat birligidan iborat Direksiya faoliyatini yoʻlga qoʻysin.
6. Belgilab qoʻyilsinki:
Direksiya direktori tegishlicha Qoraqalpogʻiston Respublikasi Vazirlar Kengashi Raisi, viloyatlar hokimlari tomonidan Oʻzbekiston Respublikasi Iqtisodiyot va moliya vazirligi bilan kelishilgan holda lavozimga tayinlanadi hamda lavozimdan ozod qilinadi;
Direksiyalar faoliyati boʻyicha Oʻzbekiston Respublikasi Iqtisodiyot va moliya vazirligi huzuridagi Loyiha ofisiga hamda Qoraqalpogʻiston Respublikasi Vazirlar Kengashi Raisining va viloyatlar hokimlarining moliya-iqtisodiyot va kambagʻallikni qisqartirish masalalari boʻyicha birinchi oʻrinbosariga hisobdor hisoblanadi;
Direksiyaga budjetdan tashqari mablagʻlar hisobidan mahalliy hamda xorijiy mutaxassislar va ekspertlarni jalb qilish vakolati beriladi.
7. Quyidagilar Direksiyaning asosiy vazifalari etib belgilansin:
ijaraga berilgan qishloq xoʻjaligiga moʻljallangan yerlardan samarali foydalanishni tashkil etish;
qishloq xoʻjaligiga moʻljallangan yer uchastkalarini ijaraga oluvchilarning ijara shartnomasida belgilangan huquqlardan amalda foydalanishini kafolatlash;
suv yetkazib berish limitlariga rioya qilinmasligi natijasida qishloq xoʻjaligiga moʻljallangan yer uchastkalarini ijaraga oluvchilarga yetkazilgan zararni darhol qoplab berish va keyinchalik ushbu mablagʻlarni suv yetkazib beruvchi tashkilotlardan regress tartibda undirib olish;
oʻz tanloviga koʻra ijaraga berilgan qishloq xoʻjaligiga moʻljallangan yerlarning sugʻorish tizimlarini yaxshilash, elektr energiyasi taʼminoti obyektlarini qurish va rekonstruksiya qilish, texnikalar harakati uchun ichki xoʻjalik yoʻllarining holatini yaxshilash kabi ishlarga mablagʻ ajratish, ushbu tadbirlarda buyurtmachi vazifasini bajarish;
Direksiyaga ijara huquqi asosida berilgan qishloq xoʻjaligiga moʻljallangan yer uchastkasini yoki uning bir qismini mahalliy va chet ellik investorlar, shu jumladan, chet el investitsiyasi ishtirokidagi korxonalar, chet ellik yuridik va jismoniy shaxslarga qonunchilik hujjatlarida belgilangan tartibda ikkilamchi ijaraga berish (uchinchi shaxslarga berish huquqisiz);
qishloq xoʻjaligiga moʻljallangan yer uchastkalarini ijaraga oluvchilarga yerdan foydalanish boʻyicha koʻmaklashish va ularning faoliyatini doimiy tahlil qilib borish hamda samaradorligini oshirish yuzasidan takliflar ishlab chiqish;
2025-yilning kuzgi ekish mavsumini va undan keyingi davrlarni yangi tizim doirasida tashkil qilish istagi boʻlgan qishloq xoʻjaligi subyektlari hamda tuman hokimliklari zaxirasidagi boʻsh turgan qishloq xoʻjaligiga moʻljallangan yer uchastkalari roʻyxatini shakllantirish va elektron onlayn-auksion savdolariga chiqarish uchun takliflar kiritish;
sohaga ilgʻor innovatsiya texnologiyalarini faol joriy etish maqsadida investitsiyalarni, shuningdek, xorijiy hamda mahalliy mutaxassislar va ekspertlarni jalb qilish.
8. Direksiya faoliyatini moliyalashtirish manbalari etib quyidagilar belgilansin:
qishloq xoʻjaligiga moʻljallangan yer uchastkalariga ijara huquqini elektron onlayn-auksion savdolarida sotishdan tushgan mablagʻlarning 25 foizi (operator xarajatlari chegirib qolingan holda);
suv yetkazib berish limitlariga rioya qilinmasligi natijasida qishloq xoʻjaligiga moʻljallangan yer uchastkalarini ijaraga oluvchilarga yetkazilgan zararni qoplab berish uchun regress tartibda undirib olingan mablagʻlar;
hisobvaraqda vaqtincha boʻsh turgan mablagʻlarni depozitga joylashtirishdan olinadigan daromadlar;
yuridik va jismoniy shaxslarning, shu jumladan, norezidentlarning homiylik xayriyalari;
xalqaro moliya tashkilotlari va xorijiy hukumat moliya tashkilotlarining grantlari hamda texnik koʻmak mablagʻlari;
qonunchilik hujjatlari bilan taqiqlanmagan boshqa mablagʻlar.
9. Direksiyaning shaxsiy gʻazna hisobvaragʻidagi mablagʻlari Loyiha ofisi bilan kelishilgan holda quyidagi maqsadlarga sarflanadi:
suv yetkazib berish limitlariga rioya qilinmasligi natijasida yer uchastkasini ijaraga oluvchiga yetkazilgan zararni qoplab berish;
ijaraga berilgan yerlarning sugʻorish tizimlarini yaxshilash, elektr energiyasi taʼminoti obyektlarini qurish va rekonstruksiya qilish, texnikalar harakati uchun ichki xoʻjalik yoʻllari holatini yaxshilash ishlarini moliyalashtirish;
jalb qilingan xorijiy hamda mahalliy mutaxassislar va ekspertlarning mehnatiga qonunchilik hujjatlarida belgilangan tartibda haq toʻlash;
Direksiyaning joriy faoliyatini moliyalashtirish, shu jumladan, ularga tegishli bino va inshootlarni saqlash, xodimlar mehnatiga haq toʻlash, shuningdek, mebel, aloqa vositalari, kompyuter texnikalari va boshqa zarur inventarlar bilan taʼminlash.
10. Oʻzbekiston Respublikasi Iqtisodiyot va moliya vazirligi manfaatdor vazirlik va idoralar bilan birgalikda ushbu qarorda nazarda tutilgan tizim doirasida amalga oshirilgan ishlar natijalariga koʻra ushbu tizimni respublikaning boshqa hududlarida joriy qilish toʻgʻrisida 2026-yil 1-dekabrga qadar Vazirlar Mahkamasiga takliflar kiritsin.
11. Ushbu qarorning ijrosini samarali tashkil qilishga masʼul va shaxsiy javobgar etib Qoraqalpogʻiston Respublikasi Vazirlar Kengashi Raisi hamda Andijon, Jizzax, Namangan, Toshkent, Fargʻona, Sirdaryo va Qashqadaryo viloyatlari hokimlari belgilansin.
Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Vazirlar Mahkamasining 2025-yil 27-maydagi 332-son qaroriga ILOVA
“Ijaraga berilgan qishloq xoʻjaligi yerlariga xizmat koʻrsatish direksiyasi” masʼuliyati cheklangan jamiyatining
Oʻzbekiston Respublikasining Bosh vaziri A. ARIPOV
Toshkent sh.,
2025-yil 27-may,
332-son