UzbekAI

Ўзбекистон Республикаси Вазирлар Маҳкамасининг

қарори

Ихтисослаштирилган таълим муассасалари агентлиги тизимида ахборот технологиялари йўналишига ихтисослаштирилган мактаблар тармоғини кенгайтириш чора-тадбирлари тўғрисида

Ўзбекистон Республикаси Президентининг «Ихтисослаштирилган мактаблар тармоғини кенгайтириш ва уларнинг фаолиятини янада такомиллаштириш чора-тадбирлари тўғрисида» 2024 йил 1 апрелдаги ПФ-55-сон Фармонига мувофиқ ахборот технологиялари соҳасида малакали кадрлар тайёрлашнинг узлуксиз тизимини яратиш ҳамда соҳа бўйича иқтидорли ўқувчиларни аниқлаш механизмларини янада такомиллаштириш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Президентининг 2024 йил 1 апрелдаги ПФ-55-сон Фармони билан Мактабгача ва мактаб таълими вазирлигининг Ўзбекистон Республикаси Президентининг 2022 йил 14 апрелдаги ПФ-106-сон Фармонининг 4 ва 7-иловаларига мувофиқ қурилиши назарда тутилган 13 та ихтисослаштирилган мактаб-интернат негизида Муҳаммад ал-Хоразмий номидаги ихтисослаштирилган мактабнинг филиалларини ташкил этиш тўғрисидаги таклифлари маъқулланганлиги;

Ўзбекистон Республикаси Президентининг 2022 йил 14 апрелдаги ПФ-106-сон Фармонига мувофиқ Вазирлар Маҳкамасига зарур ҳолларда, мазкур Фармоннинг 1 — 4-иловаларига ўзгартириш ва қўшимчалар киритиш, шу жумладан Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари таклифига асосан Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги (кейинги ўринларда — Агентлик) тизимида ташкил этиладиган ихтисослаштирилган мактаб-интернатлар ва ихтисослаштирилган мактаблар сонини ошириш ҳуқуқи берилганлиги маълумот учун қабул қилинсин.

2. Мактабгача ва мактаб таълими вазирлиги, Сурхондарё вилояти ҳокимлиги ҳамда Сирдарё вилояти ҳокимлигининг Ўзбекистон Республикаси Президентининг 2022 йил 14 апрелдаги ПФ-106-сон Фармони билан ташкил этилган Термиз шаҳар ихтисослаштирилган мактаби ва Гулистон шаҳар 2-сон ихтисослаштирилган мактаб-интернатларини Муҳаммад ал-Хоразмий номидаги ихтисослаштирилган мактабнинг филиаллари (кейинги ўринларда — филиаллар) сифатида қайта ташкил этиш тўғрисидаги таклифига розилик берилсин.

3. Белгилансинки:

Тошкент шаҳридаги Муҳаммад ал-Хоразмий номидаги ихтисослаштирилган мактаб ахборот технологиялари йўналиши бўйича таянч мактаб ҳисобланади;

таянч мактаб директори ва филиал ижрочи директори Агентлик директори томонидан тайинланади;

таянч мактабга ва филиалларга раҳбар кадрлар икки босқичли (саралаш ва суҳбат), педагог кадрлар уч босқичли (саралаш, тест синови ва суҳбат) танлов асосида ишга қабул қилинади;

таянч мактабга ва филиалларга бир синфда ўқувчиларнинг энг кўп сони 24 нафардан ошмаслигини ҳисобга олган ҳолда, қабул параметрлари Агентлик томонидан белгиланади;

филиалларга ўқувчилар таянч мактаб учун белгиланган тартиб асосида саралаб олинади;

филиалларда ўқувчилар учун аутсорсинг асосида белгиланган тартибда бепул соғлом овқатлантириш ташкил этилади;

филиалларнинг қурилиш ишлари таянч мактабнинг шароитидан кам бўлмаган ягона ёндашув асосида 2025 йилда Қорақалпоғистон Республикаси Вазирлар Кенгаши, вилоятлар ҳокимликлари томонидан Агентлик билан келишилган ҳолда амалга оширилади;

филиаллар замонавий талабларга мувофиқ пластик қопламали (HPL панел) синф столи, пластик қопламали эгри елимланган фанерали синф стуллари билан жиҳозланади.

4. Мактабгача ва мактаб таълими вазирлиги:

2025 йил 1 августга қадар таянч мактаб ҳамда филиаллар учун лавозимлар ва штат бирликларининг намунавий штат жадвалини тасдиқласин;

ўқувчиларнинг инновацион ғоялари ва ишланмаларини ривожлантириш, замонавий касбларга ўргатиш учун уларнинг қизиқиши ва қобилиятларини инобатга олган ҳолда зарур шарт-шароитлар яратсин;

математика, информатика ва ахборот технологиялари, робототехника фанлари қўшимча ўқув дастурлари асосида ўқитилишини таъминласин;

Рақамли технологиялар вазирлиги билан биргаликда 2025 йил 1 августга қадар ахборот технологиялари йўналиши бўйича таълим дастурларини IT бозорида юқори талабга эга касбларга ўқитиш дастурлари ва ўқув қўлланмаларидан келиб чиққан ҳолда такомиллаштирсин.

5. Мактабгача ва мактаб таълими вазирлиги Қорақалпоғистон Республикаси Вазирлар Кенгаши, Андижон ва Самарқанд вилоятлари ҳокимликлари билан биргаликда 2025 йил 1 сентябрга қадар филиал сифатида ташкил этилаётган Нукус шаҳар 2-сон, Андижон шаҳар 2-сон ҳамда Самарқанд шаҳар 2-сон ихтисослаштирилган мактаб-интернатларининг табиий фанлар йўналишида таълим олаётган ўқувчиларини Агентлик тизимидаги бошқа мактабларга жойлаштириш чораларини кўрсин.

6. Иқтисодиёт ва молия вазирлиги мазкур филиаллар таъминоти учун зарур харажатларни 2025 йилдан бошлаб белгиланган тартибда Давлат бюджети параметрларида назарда тутсин.

7. Ушбу қарорнинг бажарилишини назорат қилиш Ўзбекистон Республикаси мактабгача ва мактаб таълими вазири Ҳ.Ў. Умарова ҳамда рақамли технологиялар вазири Ш.Х. Шерматов зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2025 йил 14 июнь,

364-сон

(Қонунчилик маълумотлари миллий базаси, 16.06.2025 й., 09/25/364/0508-сон)

lex.uz

Oʻzbekiston Respublikasi Vazirlar Mahkamasining

qarori

Ixtisoslashtirilgan taʼlim muassasalari agentligi tizimida axborot texnologiyalari yoʻnalishiga ixtisoslashtirilgan maktablar tarmogʻini kengaytirish chora-tadbirlari toʻgʻrisida

Oʻzbekiston Respublikasi Prezidentining “Ixtisoslashtirilgan maktablar tarmogʻini kengaytirish va ularning faoliyatini yanada takomillashtirish chora-tadbirlari toʻgʻrisida” 2024-yil 1-apreldagi PF-55-son Farmoniga muvofiq axborot texnologiyalari sohasida malakali kadrlar tayyorlashning uzluksiz tizimini yaratish hamda soha boʻyicha iqtidorli oʻquvchilarni aniqlash mexanizmlarini yanada takomillashtirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Prezidentining 2024-yil 1-apreldagi PF-55-son Farmoni bilan Maktabgacha va maktab taʼlimi vazirligining Oʻzbekiston Respublikasi Prezidentining 2022-yil 14-apreldagi PF-106-son Farmonining 4 va 7-ilovalariga muvofiq qurilishi nazarda tutilgan 13 ta ixtisoslashtirilgan maktab-internat negizida Muhammad al-Xorazmiy nomidagi ixtisoslashtirilgan maktabning filiallarini tashkil etish toʻgʻrisidagi takliflari maʼqullanganligi;

Oʻzbekiston Respublikasi Prezidentining 2022-yil 14-apreldagi PF-106-son Farmoniga muvofiq Vazirlar Mahkamasiga zarur hollarda, mazkur Farmonning 1 — 4-ilovalariga oʻzgartirish va qoʻshimchalar kiritish, shu jumladan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari taklifiga asosan Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi (keyingi oʻrinlarda — Agentlik) tizimida tashkil etiladigan ixtisoslashtirilgan maktab-internatlar va ixtisoslashtirilgan maktablar sonini oshirish huquqi berilganligi maʼlumot uchun qabul qilinsin.

2. Maktabgacha va maktab taʼlimi vazirligi, Surxondaryo viloyati hokimligi hamda Sirdaryo viloyati hokimligining Oʻzbekiston Respublikasi Prezidentining 2022-yil 14-apreldagi PF-106-son Farmoni bilan tashkil etilgan Termiz shahar ixtisoslashtirilgan maktabi va Guliston shahar 2-son ixtisoslashtirilgan maktab-internatlarini Muhammad al-Xorazmiy nomidagi ixtisoslashtirilgan maktabning filiallari (keyingi oʻrinlarda — filiallar) sifatida qayta tashkil etish toʻgʻrisidagi taklifiga rozilik berilsin.

3. Belgilansinki:

Toshkent shahridagi Muhammad al-Xorazmiy nomidagi ixtisoslashtirilgan maktab axborot texnologiyalari yoʻnalishi boʻyicha tayanch maktab hisoblanadi;

tayanch maktab direktori va filial ijrochi direktori Agentlik direktori tomonidan tayinlanadi;

tayanch maktabga va filiallarga rahbar kadrlar ikki bosqichli (saralash va suhbat), pedagog kadrlar uch bosqichli (saralash, test sinovi va suhbat) tanlov asosida ishga qabul qilinadi;

tayanch maktabga va filiallarga bir sinfda oʻquvchilarning eng koʻp soni 24 nafardan oshmasligini hisobga olgan holda, qabul parametrlari Agentlik tomonidan belgilanadi;

filiallarga oʻquvchilar tayanch maktab uchun belgilangan tartib asosida saralab olinadi;

filiallarda oʻquvchilar uchun autsorsing asosida belgilangan tartibda bepul sogʻlom ovqatlantirish tashkil etiladi;

filiallarning qurilish ishlari tayanch maktabning sharoitidan kam boʻlmagan yagona yondashuv asosida 2025-yilda Qoraqalpogʻiston Respublikasi Vazirlar Kengashi, viloyatlar hokimliklari tomonidan Agentlik bilan kelishilgan holda amalga oshiriladi;

filiallar zamonaviy talablarga muvofiq plastik qoplamali (HPL panel) sinf stoli, plastik qoplamali egri yelimlangan fanerali sinf stullari bilan jihozlanadi.

4. Maktabgacha va maktab taʼlimi vazirligi:

2025-yil 1-avgustga qadar tayanch maktab hamda filiallar uchun lavozimlar va shtat birliklarining namunaviy shtat jadvalini tasdiqlasin;

oʻquvchilarning innovatsion gʻoyalari va ishlanmalarini rivojlantirish, zamonaviy kasblarga oʻrgatish uchun ularning qiziqishi va qobiliyatlarini inobatga olgan holda zarur shart-sharoitlar yaratsin;

matematika, informatika va axborot texnologiyalari, robototexnika fanlari qoʻshimcha oʻquv dasturlari asosida oʻqitilishini taʼminlasin;

Raqamli texnologiyalar vazirligi bilan birgalikda 2025-yil 1-avgustga qadar axborot texnologiyalari yoʻnalishi boʻyicha taʼlim dasturlarini IT bozorida yuqori talabga ega kasblarga oʻqitish dasturlari va oʻquv qoʻllanmalaridan kelib chiqqan holda takomillashtirsin.

5. Maktabgacha va maktab taʼlimi vazirligi Qoraqalpogʻiston Respublikasi Vazirlar Kengashi, Andijon va Samarqand viloyatlari hokimliklari bilan birgalikda 2025-yil 1-sentabrga qadar filial sifatida tashkil etilayotgan Nukus shahar 2-son, Andijon shahar 2-son hamda Samarqand shahar 2-son ixtisoslashtirilgan maktab-internatlarining tabiiy fanlar yoʻnalishida taʼlim olayotgan oʻquvchilarini Agentlik tizimidagi boshqa maktablarga joylashtirish choralarini koʻrsin.

6. Iqtisodiyot va moliya vazirligi mazkur filiallar taʼminoti uchun zarur xarajatlarni 2025-yildan boshlab belgilangan tartibda Davlat budjeti parametrlarida nazarda tutsin.

7. Ushbu qarorning bajarilishini nazorat qilish Oʻzbekiston Respublikasi maktabgacha va maktab taʼlimi vaziri H.Oʻ. Umarova hamda raqamli texnologiyalar vaziri Sh.X. Shermatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 14-iyun,

364-son

(Qonunchilik maʼlumotlari milliy bazasi, 16.06.2025-y., 09/25/364/0508-son)

lex.uz