📅 2025-yil 15-may · Vazirlik va idoralar hujjatlari · Istiqbolli loyihalar milliy agentligi direktori
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 15 май · Вазирлик ва идоралар ҳужжатлари · Истиқболли лойиҳалар миллий агентлиги директори
Расмий матн. Расмий ҳужжат. Таҳририй изоҳлар киритилмаган.
📅 15 мая 2025 г. · Документы министерств и ведомств · Директор национального агентства перспективных проектов
Официальный текст. Официальный документ. Редакционные примечания не включены.
📅 15 May 2025 · Ministry and agency documents · Istiqbolli loyihalar milliy agentligi direktori
Official text. Official document. Editorial notes are not included.
Ўзбекистон Республикаси истиқболли лойиҳалар миллий агентлиги директорининг
Буйруғи
ЙЎРИҚНОМА
Ҳужжатли қимматли қоғозларни йўқ қилиш бўйича йўриқномани тасдиқлаш тўғрисида
Ўзбекистон Республикасининг «Қимматли қоғозлар бозори тўғрисида»ги Қонуни ва Ўзбекистон Республикаси Президентининг 2023 йил 2 сентябрдаги ПҚ-291-сон «Капитал бозорини ривожлантиришнинг қўшимча чора-тадбирлари тўғрисида»ги қарорига асосан буюраман:
1. Ҳужжатли қимматли қоғозларни йўқ қилиш бўйича йўриқнома иловага мувофиқ тасдиқлансин.
2. Мазкур буйруқ Ўзбекистон Республикаси Марказий банки, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ҳамда Ўзбекистон Республикаси Савдо-саноат палатаси билан келишилган.
3. Мазкур буйруқ 2025 йил 1 июлдан эътиборан кучга киради.
Келишилди:
Ўзбекистон Республикаси Истиқболли лойиҳалар миллий агентлиги директорининг 2025 йил 15 майдаги 4-сон буйруғига ИЛОВА
Ҳужжатли қимматли қоғозларни йўқ қилиш бўйича
Мазкур Йўриқнома бланкалар тарзидаги ҳужжатли қимматли қоғозларни (бундан буён матнда ҳужжатли қимматли қоғозлар деб юритилади) муомаладан чиқариш ва уларни йўқ қилиш тартибини белгилайди.
1-боб. Умумий қоидалар
1. Ҳужжатли қимматли қоғозларни муомаладан чиқариш ва уларни йўқ қилиш эмитент томонидан қуйидаги ҳолатларда амалга оширилади:
ҳужжатли қимматли қоғозлар эмитенти тугатилганда;
эмитентнинг номи ўзгарганда;
облигациялар тўлиқ сўндирилганда;
ҳужжатли қимматли қоғозларнинг чиқарилиши ҳужжатли шаклдан ҳужжатсиз шаклга ўтказилганда;
қонунчилик ҳужжатларида белгиланган бошқа ҳолатларда.
2. Ҳужжатли қимматли қоғозлар йўқ қилиш кўзда тутилган санадан бир ой олдин эмитент бу тўғрисида қимматли қоғозлар бозорини тартибга солиш бўйича ваколатли давлат органини хабардор қилиши шарт. Бунда, эмитент қимматли қоғозлар бозорини тартибга солиш бўйича ваколатли давлат органига йўқ қилиш учун асос бўлган ҳужжатларни тақдим этади.
Қимматли қоғозлар бозорини тартибга солиш бўйича ваколатли давлат органи бир ой ичида қимматли қоғозларни йўқ қилиш учун асос бўлган ҳужжатларни текширади ва «Қимматли қоғозлар марказий депозитарийси» АЖга (бундан буён матнда Марказий депозитарий деб юритилади) 15 кун ичида эмитент томонидан йўқ қилинадиган ҳужжатли қимматли қоғозларни муомаладан чиқарилиши тўғрисидаги маълумотни тақдим этиши ва ҳужжатли қимматли қоғозлар эгалари хабардор этилганлигини текшириши тўғрисида кўрсатма беради.
2-боб. Ҳужжатли қимматли қоғозларни йўқ қилиш бўйича комиссияни шакллантириш ва қимматли қоғозларни йўқ қилиш тартиби
3. Ҳужжатли қимматли қоғозларни йўқ қилиш эмитент томонидан ташкил этиладиган камида беш кишидан иборат комиссия (бундан буён матнда комиссия деб юритилади) томонидан амалга оширилади.
Комиссия таркибига эмитентнинг, қимматли қоғозлар бозорини тартибга солиш бўйича ваколатли давлат органининг ва Марказий депозитарийнинг вакиллари киради.
4. Ҳужжатли қимматли қоғозлар ёқиб юбориш ёки уларни жисмоний майдалаш йўли билан йўқ қилинади.
5. Ҳужжатли қимматли қоғозларни йўқ қилиш натижалари комиссия аъзолари томонидан имзоланадиган далолатнома билан расмийлаштирилади.
6. Ушбу Йўриқноманинг 5-бандида назарда тутилган далолатнома қуйидаги маълумотларни ўз ичига олиши лозим:
эгаллаган лавозимларини кўрсатган ҳолда ҳужжатли қимматли қоғозларни йўқ қилиш бўйича комиссияси аъзоларининг таркиби;
ҳужжатли қимматли қоғозлари йўқ қилиниши лозим бўлган эмитентнинг тўлиқ номи;
ҳужжатли қимматли қоғозларни йўқ қилиш учун асос;
ҳужжатли қимматли қоғозлар бекор қилинган тақдирда, уларнинг чиқарилганлиги давлат рўйхатидан ўтказилган санаси;
қимматли қоғозларни йўқ қилиш санаси;
ҳужжатли қимматли қоғозларнинг тури ҳамда ушбу қимматли қоғозлар чиқарилишининг давлат рўйхати рақами;
йўқ қилиниши лозим бўлган ҳужжатли қимматли қоғозлар чиқарилишини давлат рўйхатидан ўтказган қимматли қоғозлар бозорини тартибга солиш бўйича ваколатли давлат органининг номи;
йўқ қилинадиган ҳужжатли қимматли қоғозларнинг умумий сони, улар эгаларининг тўлиқ номи ва реквизитлари (жисмоний шахсларнинг фамилияси, исми, отасининг исми ҳамда шахсини тасдиқловчи ҳужжат маълумотлари);
чиқарилиши ҳужжатли шаклдан ҳужжатсиз шаклга ўзгартирилган қимматли қоғозлар бўйича депо ҳисобварақларининг рақамлари.
7. Ҳужжатли қимматли қоғозларни йўқ қилиш тўғрисидаги далолатнома қимматли қоғозлар бозорини тартибга солиш бўйича ваколатли давлат органи, Марказий депозитарий ҳамда эмитентда сақлаш учун уч нусхада тузилади.
8. Мазкур Йўриқноманинг 7-бандидаги далолатномаларнинг мазмунида тафовутлар мавжуд бўлганда, қимматли қоғозлар бозорини тартибга солиш бўйича ваколатли давлат органига тақдим этилган далолатноманинг нусхаси устувор ҳисобланади.
9. Эмитентлар ҳужжатли қимматли қоғозларни йўқ қилиш тўғрисидаги далолатномани, шунингдек қимматли қоғозларни йўқ қилиш билан боғлиқ бошқа ҳужжатларни уч йилдан кам бўлмаган муддатга сақлашга мажбур.
3-боб. Якуний қоида
10. Мазкур Йўриқнома талабларининг бузилишида айбдор бўлган шахслар қонунчилик ҳужжатларига мувофиқ жавобгар бўладилар.
Директор Д. ЛИ
Марказий банк раисининг биринчи ўринбосари Н. САЙДУЛЛАЕВ
Савдо-саноат палатаси раиси Д. ВАХАБОВ
Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ўринбосари Ж. УРУНОВ
Тошкент ш.,
2025 йил 15 май,
2025 йил 6 май
2025 йил 21 апрель
2025 йил 15 апрель
4-сон
Oʻzbekiston Respublikasi istiqbolli loyihalar milliy agentligi direktorining
Buyrugʻi
YOʻRIQNOMA
Hujjatli qimmatli qogʻozlarni yoʻq qilish boʻyicha yoʻriqnomani tasdiqlash toʻgʻrisida
Oʻzbekiston Respublikasining “Qimmatli qogʻozlar bozori toʻgʻrisida”gi Qonuni va Oʻzbekiston Respublikasi Prezidentining 2023-yil 2-sentabrdagi PQ-291-son “Kapital bozorini rivojlantirishning qoʻshimcha chora-tadbirlari toʻgʻrisida”gi qaroriga asosan buyuraman:
1. Hujjatli qimmatli qogʻozlarni yoʻq qilish boʻyicha yoʻriqnoma ilovaga muvofiq tasdiqlansin.
2. Mazkur buyruq Oʻzbekiston Respublikasi Markaziy banki, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil hamda Oʻzbekiston Respublikasi Savdo-sanoat palatasi bilan kelishilgan.
3. Mazkur buyruq 2025-yil 1-iyuldan eʼtiboran kuchga kiradi.
Kelishildi:
Oʻzbekiston Respublikasi Istiqbolli loyihalar milliy agentligi direktorining 2025-yil 15-maydagi 4-son buyrugʻiga ILOVA
Hujjatli qimmatli qogʻozlarni yoʻq qilish boʻyicha
Mazkur Yoʻriqnoma blankalar tarzidagi hujjatli qimmatli qogʻozlarni (bundan buyon matnda hujjatli qimmatli qogʻozlar deb yuritiladi) muomaladan chiqarish va ularni yoʻq qilish tartibini belgilaydi.
1-bob. Umumiy qoidalar
1. Hujjatli qimmatli qogʻozlarni muomaladan chiqarish va ularni yoʻq qilish emitent tomonidan quyidagi holatlarda amalga oshiriladi:
hujjatli qimmatli qogʻozlar emitenti tugatilganda;
emitentning nomi oʻzgarganda;
obligatsiyalar toʻliq soʻndirilganda;
hujjatli qimmatli qogʻozlarning chiqarilishi hujjatli shakldan hujjatsiz shaklga oʻtkazilganda;
qonunchilik hujjatlarida belgilangan boshqa holatlarda.
2. Hujjatli qimmatli qogʻozlar yoʻq qilish koʻzda tutilgan sanadan bir oy oldin emitent bu toʻgʻrisida qimmatli qogʻozlar bozorini tartibga solish boʻyicha vakolatli davlat organini xabardor qilishi shart. Bunda, emitent qimmatli qogʻozlar bozorini tartibga solish boʻyicha vakolatli davlat organiga yoʻq qilish uchun asos boʻlgan hujjatlarni taqdim etadi.
Qimmatli qogʻozlar bozorini tartibga solish boʻyicha vakolatli davlat organi bir oy ichida qimmatli qogʻozlarni yoʻq qilish uchun asos boʻlgan hujjatlarni tekshiradi va “Qimmatli qogʻozlar markaziy depozitariysi” AJga (bundan buyon matnda Markaziy depozitariy deb yuritiladi) 15 kun ichida emitent tomonidan yoʻq qilinadigan hujjatli qimmatli qogʻozlarni muomaladan chiqarilishi toʻgʻrisidagi maʼlumotni taqdim etishi va hujjatli qimmatli qogʻozlar egalari xabardor etilganligini tekshirishi toʻgʻrisida koʻrsatma beradi.
2-bob. Hujjatli qimmatli qogʻozlarni yoʻq qilish boʻyicha komissiyani shakllantirish va qimmatli qogʻozlarni yoʻq qilish tartibi
3. Hujjatli qimmatli qogʻozlarni yoʻq qilish emitent tomonidan tashkil etiladigan kamida besh kishidan iborat komissiya (bundan buyon matnda komissiya deb yuritiladi) tomonidan amalga oshiriladi.
Komissiya tarkibiga emitentning, qimmatli qogʻozlar bozorini tartibga solish boʻyicha vakolatli davlat organining va Markaziy depozitariyning vakillari kiradi.
4. Hujjatli qimmatli qogʻozlar yoqib yuborish yoki ularni jismoniy maydalash yoʻli bilan yoʻq qilinadi.
5. Hujjatli qimmatli qogʻozlarni yoʻq qilish natijalari komissiya aʼzolari tomonidan imzolanadigan dalolatnoma bilan rasmiylashtiriladi.
6. Ushbu Yoʻriqnomaning 5-bandida nazarda tutilgan dalolatnoma quyidagi maʼlumotlarni oʻz ichiga olishi lozim:
egallagan lavozimlarini koʻrsatgan holda hujjatli qimmatli qogʻozlarni yoʻq qilish boʻyicha komissiyasi aʼzolarining tarkibi;
hujjatli qimmatli qogʻozlari yoʻq qilinishi lozim boʻlgan emitentning toʻliq nomi;
hujjatli qimmatli qogʻozlarni yoʻq qilish uchun asos;
hujjatli qimmatli qogʻozlar bekor qilingan taqdirda, ularning chiqarilganligi davlat roʻyxatidan oʻtkazilgan sanasi;
qimmatli qogʻozlarni yoʻq qilish sanasi;
hujjatli qimmatli qogʻozlarning turi hamda ushbu qimmatli qogʻozlar chiqarilishining davlat roʻyxati raqami;
yoʻq qilinishi lozim boʻlgan hujjatli qimmatli qogʻozlar chiqarilishini davlat roʻyxatidan oʻtkazgan qimmatli qogʻozlar bozorini tartibga solish boʻyicha vakolatli davlat organining nomi;
yoʻq qilinadigan hujjatli qimmatli qogʻozlarning umumiy soni, ular egalarining toʻliq nomi va rekvizitlari (jismoniy shaxslarning familiyasi, ismi, otasining ismi hamda shaxsini tasdiqlovchi hujjat maʼlumotlari);
chiqarilishi hujjatli shakldan hujjatsiz shaklga oʻzgartirilgan qimmatli qogʻozlar boʻyicha depo hisobvaraqlarining raqamlari.
7. Hujjatli qimmatli qogʻozlarni yoʻq qilish toʻgʻrisidagi dalolatnoma qimmatli qogʻozlar bozorini tartibga solish boʻyicha vakolatli davlat organi, Markaziy depozitariy hamda emitentda saqlash uchun uch nusxada tuziladi.
8. Mazkur Yoʻriqnomaning 7-bandidagi dalolatnomalarning mazmunida tafovutlar mavjud boʻlganda, qimmatli qogʻozlar bozorini tartibga solish boʻyicha vakolatli davlat organiga taqdim etilgan dalolatnomaning nusxasi ustuvor hisoblanadi.
9. Emitentlar hujjatli qimmatli qogʻozlarni yoʻq qilish toʻgʻrisidagi dalolatnomani, shuningdek qimmatli qogʻozlarni yoʻq qilish bilan bogʻliq boshqa hujjatlarni uch yildan kam boʻlmagan muddatga saqlashga majbur.
3-bob. Yakuniy qoida
10. Mazkur Yoʻriqnoma talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladilar.
Direktor D. LI
Markaziy bank raisining birinchi oʻrinbosari N. SAYDULLAYEV
Savdo-sanoat palatasi raisi D. VAXABOV
Tadbirkorlik subyektlarining huquqlari va qonuniy manfaatlarini himoya qilish boʻyicha vakil oʻrinbosari J. URUNOV
Toshkent sh.,
2025-yil 15-may,
2025-yil 6-may
2025-yil 21-aprel
2025-yil 15-aprel
4-son