📅 2025-yil 26-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 26 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 26 июня 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 26 June 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Вазирлар Маҳкамасининг 2017 йил 1 декабрдаги 958-сон қарори билан тасдиқланган Ўзбекистон Республикаси Ички ишлар вазирлиги Академияси бакалавриатининг кундузги таълим шаклига номзодларни танлаш ва ўқишга қабул қилиш тартиби тўғрисидаги низомга ўзгартириш ва қўшимчалар киритиш ҳақида
Ўзбекистон Республикаси Президентининг « Ватан таянчи» болалар ва ўсмирлар ҳарбий-ватанпарварлик ҳаракати фаолиятини ташкил этиш тўғрисида » 2022 йил 2 мартдаги ПҚ-150-сон ҳамда « Рақамли технологиялар воситасида содир этиладиган жиноятларга қарши курашиш соҳаси учун профессионал кадрлар тайёрлаш тизимини жорий этиш чора-тадбирлари тўғрисида » 2025 йил 22 январдаги ПҚ-17-сон қарорлари ижросини таъминлаш мақсадида Вазирлар Маҳкамаси қарор қилади:
1. Қуйидагилар:
Ўзбекистон Республикаси Президентининг 2022 йил 2 мартдаги ПҚ-150-сон қарорига асосан «Ватан таянчи» ҳаракатининг тегишли тавсияномаларига эга бўлган отряд аъзолари Қуролли Кучлар таркибига кирувчи вазирлик ва идораларнинг олий ҳарбий таълим муассасалари ҳамда олий ҳарбийлаштирилган таълим муассасаларининг тегишли таълим йўналишларига ўқишга киришда тест синовлари ёки якка тартибдаги якуний суҳбат натижаларига кўра тўплаган балларининг 5 фоизи миқдорида қўшимча балл шаклида имтиёзга эга бўлиши;
Ўзбекистон Республикаси Президентининг 2025 йил 22 январдаги ПҚ-17-сон қарорига асосан Ички ишлар вазирлиги Академиясида бакалавриатнинг «юриспруденция» таълим йўналишида ўқиш муддати тўрт йилни ташкил этадиган «Рақамли технологиялар соҳасида жиноятларга қарши курашиш фаолияти» йўналиши ташкил этилгани маълумот учун қабул қилинсин.
2. Вазирлар Маҳкамасининг 2017 йил 1 декабрдаги 958-сон қарори билан тасдиқланган Ўзбекистон Республикаси Ички ишлар вазирлиги Академияси бакалавриатининг кундузги таълим шаклига номзодларни танлаш ва ўқишга қабул қилиш тартиби тўғрисидаги низомга иловага мувофиқ қуйидагиларни назарда тутувчи ўзгартириш ва қўшимчалар киритилсин:
«Ватан таянчи» ҳаракатининг тегишли тавсияномаларига эга бўлган номзодларга якка тартибдаги якуний суҳбат натижаларига кўра қўшимча балл бериш;
«Рақамли технологиялар соҳасида жиноятларга қарши курашиш фаолияти» бакалавриат таълим йўналишига номзодларни ўқишга қабул қилиш тартибини белгилаш.
3. Ушбу қарорнинг бажарилишини назорат қилиш Ўзбекистон Республикаси ички ишлар вазири А.А. Ташпулатов зиммасига юклансин.
Вазирлар Маҳкамасининг 2025 йил 26 июндаги 392-сон қарорига ИЛОВА
Вазирлар Маҳкамасининг 2017 йил 1 декабрдаги 958-сон қарори билан тасдиқланган Ўзбекистон Республикаси Ички ишлар вазирлиги Академияси бакалавриатининг кундузги таълим шаклига номзодларни танлаш ва ўқишга қабул қилиш тартиби тўғрисидаги низомга киритилаётган ўзгартириш ва қўшимчалар
1. 2-банднинг биринчи хатбошисидаги «вилоятлар кесимида» сўзлари «республика ёки вилоятлар кесимида» сўзлари билан алмаштирилсин.
2. 12 , 44 , 47 , 71 ва 72-бандлардаги «физика ва математика» сўзлари «физика, математика, информатика ва ахборот технологиялари» сўзлари билан алмаштирилсин.
3. 33-банд қуйидаги мазмундаги олтинчи хатбоши билан тўлдирилсин:
«Рақамли технологиялар соҳасида жиноятларга қарши курашиш фаолияти» йўналиши бўйича номзоднинг математика, информатика ва ахборот технологиялари фанлари бўйича ўқув дастурларини ўзлаштирганлик даражасини ҳар томонлама ва холисона баҳолаш»;
олтинчи хатбоши еттинчи хатбоши деб ҳисоблансин.
4. 34-банд қуйидаги мазмундаги ўн иккинчи — ўн бешинчи хатбошилар билан тўлдирилсин:
«Рақамли технологиялар соҳасида жиноятларга қарши курашиш фаолияти» йўналиши бўйича махсус касбий танлов қуйидаги тадбирларни ўз ичига олади:
ҳужжатларни ўрганиш;
тиббий кўрикдан ўтказиш;
математика, информатика ва ахборот технологиялари фанларини ўзлаштирганлик даражасини баҳолаш».
5. Қуйидаги мазмундаги 43 1 -банд билан тўлдирилсин:
«43 1 . Информатика ва ахборот технологиялари фанини ўзлаштирганлик даражаси тегишли мутахассисларни жалб этган ҳолда ушбу Низомга 9 1 -иловада келтирилган методикага асосан баҳоланади».
6. 46 ва 62-бандлар «физика» сўзидан кейин «, Рақамли технологиялар соҳасида жиноятларга қарши курашиш фаолияти» йўналишида математика, информатика ва ахборот технологиялари» сўзлари билан тўлдирилсин.
7. Қуйидаги мазмундаги 61 1 -банд билан тўлдирилсин:
«61 1 . Ўзбекистон Республикаси Президентининг «Ватан таянчи» болалар ва ўсмирлар ҳарбий-ватанпарварлик ҳаракати фаолиятини ташкил этиш тўғрисида» 2022 йил 2 мартдаги ПҚ-150-сон қарорига асосан «Ватан таянчи» ҳаракатининг тегишли тавсияномаларига эга бўлган номзодларга якка тартибдаги якуний суҳбат натижаларига кўра тўплаган балларининг 5 фоизи миқдорида қўшимча балл берилади».
8. 62 ва 65-бандлардаги «Ўзбекистон Республикаси таълим муассасаларига ўқишга қабул қилиш бўйича давлат комиссиясига» сўзлари «Ўзбекистон Республикаси таълим ташкилотларига қабул қилиш бўйича давлат комиссиясига» сўзлари билан алмаштирилсин.
9. 64-банд қуйидаги таҳрирда баён этилсин:
«64. Ўзбекистон Республикаси Президентининг «Иқтидорли ёшларни аниқлаш ва юқори малакали кадрлар тайёрлашнинг узлуксиз тизимини ташкил этиш чора-тадбирлари тўғрисида» 2019 йил 3 майдаги ПҚ-4306-сон қарори ҳамда Вазирлар Маҳкамасининг 2021 йил 9 сентябрдаги 562-сон қарори билан тасдиқланган Умумий ўрта таълим ташкилотлари, академик лицей ва касб-ҳунар мактаблари ўқувчилари ўртасида фан олимпиадаларини ташкил этиш, ўтказиш ҳамда халқаро олимпиадалар иштирокчиларини саралаш ва ғолибларни рағбатлантириш тартиби тўғрисидаги низомга мувофиқ:
халқаро ва республика олимпиадалари ғолиблари, «Мард ўғлон» давлат мукофоти соҳиблари, шунингдек, вазирлик академик лицейларининг ҳуқуқшунослик фани бўйича идоравий фан олимпиадаси ғолиблари дастлабки ва махсус касбий танловдан муваффақиятли ўтгандан сўнг;
«Рақамли технологиялар соҳасида жиноятларга қарши курашиш фаолияти» йўналишига ҳужжат топширган математика, информатика, дастурлаш ва ахборот технологиялари бўйича нуфузли халқаро, минтақавий ҳамда республика олимпиадалари совриндорлари дастлабки танловдан муваффақиятли ўтгач, Ўзбекистон Республикаси таълим ташкилотларига қабул қилиш бўйича давлат комиссиясининг қарорига кўра, белгиланган қабул квоталари доирасида ўқишга якка тартибдаги якуний суҳбатсиз қабул қилинадилар».
10. Қуйидаги мазмундаги 9 1 -илова билан тўлдирилсин:
«Ўзбекистон Республикаси Ички ишлар вазирлиги Академияси бакалавриатининг кундузги таълим шаклига номзодларни танлаш ва ўқишга қабул қилиш тартиби тўғрисидаги низомга 9 1 -ИЛОВА
Информатика ва ахборот технологиялари фанини ўзлаштирганликни баҳолаш методикаси
1. Номзоднинг информатика ва ахборот технологиялари фанини ўзлаштирганлик даражаси коллегиаллик принципи асосида тегишли мутахассислар томонидан баҳоланади.
2. Информатика ва ахборот технологиялари фанини ўзлаштирганлик даражаси номзод томонидан танлаб олинган билетдаги саволга жавоб бериш ва амалий топшириқни бажариш орқали баҳоланади.
3. Билетда информатика ва ахборот технологиялари фанидан 1 та назарий савол ва 1 та амалий топшириқ акс эттирилади.
Номзодларга бериладиган савол ва топшириқлар малакали мутахассислар томонидан умумий ўрта, ўрта махсус ва профессионал таълим фанларининг ўқув дастурларига мувофиқ ишлаб чиқилади ва қабул йилининг 30 майига қадар тайёрланади. Билетлардаги саволларнинг такрорланишига йўл қўйилмайди.
4. Савол ва топшириқлар Қабул комиссияси раиси томонидан 1 июнга қадар тасдиқланади.
5. Савол ва топшириқлар Қабул комиссияси котибида сақланади ва котиб уларнинг ошкор қилинмаслиги учун масъул ҳисобланади.
6. Номзодларнинг информатика ва ахборот технологиялари фанини ўзлаштирганлик даражаси ушбу фан бўйича камида уч нафар малакали мутахассис жалб этилган ҳолда баҳоланади.
7. Номзодлар имтиҳон топшириш учун рўйхат бўйича кетма-кетликда аудиторияга киритилади. Аудиториядаги номзодлар сони 5 нафардан ортиқ бўлишига йўл қўйилмайди.
8. Номзод билетлардан бирини танлайди ва билетнинг рақамини ўқиб эшиттиради ҳамда тайёрланиш учун ажратилган жойга бориб ўтиради.
9. Номзодга тайёрланиши учун 20 дақиқа вақт берилади. Номзод тайёрланиш учун ажратилган вақт тугашидан олдин жавоб беришга тайёрлигини билдирса, унга жавоб беришга рухсат берилади.
10. Информатика ва ахборот технологиялари фани бўйича номзоднинг билим ва амалий кўникмалари комиссиянинг ҳар бир аъзоси томонидан 30 баллик тизимда қуйидаги мезонлар асосида баҳоланади:
а) билетдаги биринчи назарий савол учун (15 баллик тизимда):
савол мазмун ва моҳиятини тўлиқ очиб берса, жавобни мантиқан ва кетма-кетликда изчил ифодаласа, жавобни ёритишда ишончли далилларга ҳавола қилса — 15 балл;
савол мазмун ва моҳиятини очиб берса, жавобни мантиқан ва кетма-кетликда изчил ифодаласа — 10 балл;
савол мазмун ва моҳиятини қисман очиб берса, жавобни ифодалашда мантиқийлик ва кетма-кетлик қисман бузилса — 5 балл;
савол мазмун ва моҳиятини очиб бера олмаса — 0 балл;
б) билетдаги иккинчи амалий топшириқ учун (15 баллик тизимда):
амалий топшириқ кетма-кетликка риоя қилинган ҳолда компьютер ёрдамида тўлиқ бажарилса, амалий дастурий воситалар тўғри танланса ва улар билан ишлаш қоидаларига ҳамда техника хавфсизлиги қоидаларига тўлиқ риоя қилинса, амалий топшириқни мантиқий фикрлаб, хатосиз ва камчиликларсиз бажарса — 15 балл;
амалий топшириқ кетма-кетликка риоя қилинган ҳолда компьютер ёрдамида тўлиқ бажарилса, амалий дастурий воситалар тўғри танланса ва улар билан ишлаш қоидаларига ҳамда техника хавфсизлиги қоидаларига риоя қилинса, амалий топшириқни мантиқий фикрлаб, 1-2 та қўпол бўлмаган хато ва камчиликлар билан бажарса — 10 балл;
амалий топшириқ кетма-кетликка қисман риоя қилинган ҳолда компьютер ёрдамида бажарилса, амалий дастурий воситалар тўғри танланса ва улар билан ишлаш қоидаларига ҳамда техника хавфсизлиги қоидаларига тўлиқ риоя қилинмаса, амалий топшириқни 3-4 та қўпол бўлмаган хато ва камчиликлар билан бажарса — 5 балл;
амалий топшириқ бажарилмаса, амалий дастурий воситалар нотўғри танланса ва улар билан ишлаш қоидаларига ҳамда техника хавфсизлиги қоидаларига риоя қилинмаса — 0 балл.
11. Комиссия аъзолари томонидан қўйилган баллар муҳокама қилиниб, ҳар бир номзодга ўртача арифметик балл қўйилади.
12. Ҳар бир номзоднинг оғзаки савол-жавоб натижалари ушбу Методикага иловага мувофиқ шаклдаги қайдномага комиссия котиби томонидан киритилади.
13. Қайднома комиссия аъзолари томонидан имзоланади ҳамда шу куннинг ўзида қабул комиссиясининг масъул котибига топширилади.
Информатика ва ахборот технологиялари фанини ўзлаштирганликни баҳолаш методикасига ИЛОВА
Информатика ва ахборот технологиялари фанини ўзлаштирганликни баҳолаш бўйича ҚАЙДНОМА 20__ йил «____» _______________ Т/р Номзоднинг Ф.И.О. Номзоднинг саволга берган жавоби ва топшириқни бажариши бўйича қўйилган баллар назарий савол амалий топшириқ номзоднинг тўплаган умумий бали 1. 2. 3. ... Комиссия аъзолари: _________________________ _____________ (Ф.И.О.) (имзо) _________________________ _____________ (Ф.И.О.) (имзо) _________________________ _____________ (Ф.И.О.) (имзо) ».
Ўзбекистон Республикасининг Бош вазири А. АРИПОВ
Тошкент ш.,
2025 йил 26 июнь,
392-сон
Oʻzbekiston Respublikasi Vazirlar Mahkamasining
qarori
Vazirlar Mahkamasining 2017-yil 1-dekabrdagi 958-son qarori bilan tasdiqlangan Oʻzbekiston Respublikasi Ichki ishlar vazirligi Akademiyasi bakalavriatining kunduzgi taʼlim shakliga nomzodlarni tanlash va oʻqishga qabul qilish tartibi toʻgʻrisidagi nizomga oʻzgartirish va qoʻshimchalar kiritish haqida
Oʻzbekiston Respublikasi Prezidentining “ Vatan tayanchi” bolalar va oʻsmirlar harbiy-vatanparvarlik harakati faoliyatini tashkil etish toʻgʻrisida ” 2022-yil 2-martdagi PQ-150-son hamda “ Raqamli texnologiyalar vositasida sodir etiladigan jinoyatlarga qarshi kurashish sohasi uchun professional kadrlar tayyorlash tizimini joriy etish chora-tadbirlari toʻgʻrisida ” 2025-yil 22-yanvardagi PQ-17-son qarorlari ijrosini taʼminlash maqsadida Vazirlar Mahkamasi qaror qiladi:
1. Quyidagilar:
Oʻzbekiston Respublikasi Prezidentining 2022-yil 2-martdagi PQ-150-son qaroriga asosan “Vatan tayanchi” harakatining tegishli tavsiyanomalariga ega boʻlgan otryad aʼzolari Qurolli Kuchlar tarkibiga kiruvchi vazirlik va idoralarning oliy harbiy taʼlim muassasalari hamda oliy harbiylashtirilgan taʼlim muassasalarining tegishli taʼlim yoʻnalishlariga oʻqishga kirishda test sinovlari yoki yakka tartibdagi yakuniy suhbat natijalariga koʻra toʻplagan ballarining 5 foizi miqdorida qoʻshimcha ball shaklida imtiyozga ega boʻlishi;
Oʻzbekiston Respublikasi Prezidentining 2025-yil 22-yanvardagi PQ-17-son qaroriga asosan Ichki ishlar vazirligi Akademiyasida bakalavriatning “yurisprudensiya” taʼlim yoʻnalishida oʻqish muddati toʻrt yilni tashkil etadigan “Raqamli texnologiyalar sohasida jinoyatlarga qarshi kurashish faoliyati” yoʻnalishi tashkil etilgani maʼlumot uchun qabul qilinsin.
2. Vazirlar Mahkamasining 2017-yil 1-dekabrdagi 958-son qarori bilan tasdiqlangan Oʻzbekiston Respublikasi Ichki ishlar vazirligi Akademiyasi bakalavriatining kunduzgi taʼlim shakliga nomzodlarni tanlash va oʻqishga qabul qilish tartibi toʻgʻrisidagi nizomga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:
“Vatan tayanchi” harakatining tegishli tavsiyanomalariga ega boʻlgan nomzodlarga yakka tartibdagi yakuniy suhbat natijalariga koʻra qoʻshimcha ball berish;
“Raqamli texnologiyalar sohasida jinoyatlarga qarshi kurashish faoliyati” bakalavriat taʼlim yoʻnalishiga nomzodlarni oʻqishga qabul qilish tartibini belgilash.
3. Ushbu qarorning bajarilishini nazorat qilish Oʻzbekiston Respublikasi ichki ishlar vaziri A.A. Tashpulatov zimmasiga yuklansin.
Vazirlar Mahkamasining 2025-yil 26-iyundagi 392-son qaroriga ILOVA
Vazirlar Mahkamasining 2017-yil 1-dekabrdagi 958-son qarori bilan tasdiqlangan Oʻzbekiston Respublikasi Ichki ishlar vazirligi Akademiyasi bakalavriatining kunduzgi taʼlim shakliga nomzodlarni tanlash va oʻqishga qabul qilish tartibi toʻgʻrisidagi nizomga kiritilayotgan oʻzgartirish va qoʻshimchalar
1. 2-bandning birinchi xatboshisidagi “viloyatlar kesimida” soʻzlari “respublika yoki viloyatlar kesimida” soʻzlari bilan almashtirilsin.
2. 12 , 44 , 47 , 71 va 72-bandlardagi “fizika va matematika” soʻzlari “fizika, matematika, informatika va axborot texnologiyalari” soʻzlari bilan almashtirilsin.
3. 33-band quyidagi mazmundagi oltinchi xatboshi bilan toʻldirilsin:
“Raqamli texnologiyalar sohasida jinoyatlarga qarshi kurashish faoliyati” yoʻnalishi boʻyicha nomzodning matematika, informatika va axborot texnologiyalari fanlari boʻyicha oʻquv dasturlarini oʻzlashtirganlik darajasini har tomonlama va xolisona baholash”;
oltinchi xatboshi yettinchi xatboshi deb hisoblansin.
4. 34-band quyidagi mazmundagi oʻn ikkinchi — oʻn beshinchi xatboshilar bilan toʻldirilsin:
“Raqamli texnologiyalar sohasida jinoyatlarga qarshi kurashish faoliyati” yoʻnalishi boʻyicha maxsus kasbiy tanlov quyidagi tadbirlarni oʻz ichiga oladi:
hujjatlarni oʻrganish;
tibbiy koʻrikdan oʻtkazish;
matematika, informatika va axborot texnologiyalari fanlarini oʻzlashtirganlik darajasini baholash”.
5. Quyidagi mazmundagi 43 1 -band bilan toʻldirilsin:
“43 1 . Informatika va axborot texnologiyalari fanini oʻzlashtirganlik darajasi tegishli mutaxassislarni jalb etgan holda ushbu Nizomga 9 1 -ilovada keltirilgan metodikaga asosan baholanadi”.
6. 46 va 62-bandlar “fizika” soʻzidan keyin “, Raqamli texnologiyalar sohasida jinoyatlarga qarshi kurashish faoliyati” yoʻnalishida matematika, informatika va axborot texnologiyalari” soʻzlari bilan toʻldirilsin.
7. Quyidagi mazmundagi 61 1 -band bilan toʻldirilsin:
“61 1 . Oʻzbekiston Respublikasi Prezidentining “Vatan tayanchi” bolalar va oʻsmirlar harbiy-vatanparvarlik harakati faoliyatini tashkil etish toʻgʻrisida” 2022-yil 2-martdagi PQ-150-son qaroriga asosan “Vatan tayanchi” harakatining tegishli tavsiyanomalariga ega boʻlgan nomzodlarga yakka tartibdagi yakuniy suhbat natijalariga koʻra toʻplagan ballarining 5 foizi miqdorida qoʻshimcha ball beriladi”.
8. 62 va 65-bandlardagi “Oʻzbekiston Respublikasi taʼlim muassasalariga oʻqishga qabul qilish boʻyicha davlat komissiyasiga” soʻzlari “Oʻzbekiston Respublikasi taʼlim tashkilotlariga qabul qilish boʻyicha davlat komissiyasiga” soʻzlari bilan almashtirilsin.
9. 64-band quyidagi tahrirda bayon etilsin:
“64. Oʻzbekiston Respublikasi Prezidentining “Iqtidorli yoshlarni aniqlash va yuqori malakali kadrlar tayyorlashning uzluksiz tizimini tashkil etish chora-tadbirlari toʻgʻrisida” 2019-yil 3-maydagi PQ-4306-son qarori hamda Vazirlar Mahkamasining 2021-yil 9-sentabrdagi 562-son qarori bilan tasdiqlangan Umumiy oʻrta taʼlim tashkilotlari, akademik litsey va kasb-hunar maktablari oʻquvchilari oʻrtasida fan olimpiadalarini tashkil etish, oʻtkazish hamda xalqaro olimpiadalar ishtirokchilarini saralash va gʻoliblarni ragʻbatlantirish tartibi toʻgʻrisidagi nizomga muvofiq:
xalqaro va respublika olimpiadalari gʻoliblari, “Mard oʻgʻlon” davlat mukofoti sohiblari, shuningdek, vazirlik akademik litseylarining huquqshunoslik fani boʻyicha idoraviy fan olimpiadasi gʻoliblari dastlabki va maxsus kasbiy tanlovdan muvaffaqiyatli oʻtgandan soʻng;
“Raqamli texnologiyalar sohasida jinoyatlarga qarshi kurashish faoliyati” yoʻnalishiga hujjat topshirgan matematika, informatika, dasturlash va axborot texnologiyalari boʻyicha nufuzli xalqaro, mintaqaviy hamda respublika olimpiadalari sovrindorlari dastlabki tanlovdan muvaffaqiyatli oʻtgach, Oʻzbekiston Respublikasi taʼlim tashkilotlariga qabul qilish boʻyicha davlat komissiyasining qaroriga koʻra, belgilangan qabul kvotalari doirasida oʻqishga yakka tartibdagi yakuniy suhbatsiz qabul qilinadilar”.
10. Quyidagi mazmundagi 9 1 -ilova bilan toʻldirilsin:
“Oʻzbekiston Respublikasi Ichki ishlar vazirligi Akademiyasi bakalavriatining kunduzgi taʼlim shakliga nomzodlarni tanlash va oʻqishga qabul qilish tartibi toʻgʻrisidagi nizomga 9 1 -ILOVA
Informatika va axborot texnologiyalari fanini oʻzlashtirganlikni baholash metodikasi
1. Nomzodning informatika va axborot texnologiyalari fanini oʻzlashtirganlik darajasi kollegiallik prinsipi asosida tegishli mutaxassislar tomonidan baholanadi.
2. Informatika va axborot texnologiyalari fanini oʻzlashtirganlik darajasi nomzod tomonidan tanlab olingan biletdagi savolga javob berish va amaliy topshiriqni bajarish orqali baholanadi.
3. Biletda informatika va axborot texnologiyalari fanidan 1 ta nazariy savol va 1 ta amaliy topshiriq aks ettiriladi.
Nomzodlarga beriladigan savol va topshiriqlar malakali mutaxassislar tomonidan umumiy oʻrta, oʻrta maxsus va professional taʼlim fanlarining oʻquv dasturlariga muvofiq ishlab chiqiladi va qabul yilining 30-mayiga qadar tayyorlanadi. Biletlardagi savollarning takrorlanishiga yoʻl qoʻyilmaydi.
4. Savol va topshiriqlar Qabul komissiyasi raisi tomonidan 1-iyunga qadar tasdiqlanadi.
5. Savol va topshiriqlar Qabul komissiyasi kotibida saqlanadi va kotib ularning oshkor qilinmasligi uchun masʼul hisoblanadi.
6. Nomzodlarning informatika va axborot texnologiyalari fanini oʻzlashtirganlik darajasi ushbu fan boʻyicha kamida uch nafar malakali mutaxassis jalb etilgan holda baholanadi.
7. Nomzodlar imtihon topshirish uchun roʻyxat boʻyicha ketma-ketlikda auditoriyaga kiritiladi. Auditoriyadagi nomzodlar soni 5 nafardan ortiq boʻlishiga yoʻl qoʻyilmaydi.
8. Nomzod biletlardan birini tanlaydi va biletning raqamini oʻqib eshittiradi hamda tayyorlanish uchun ajratilgan joyga borib oʻtiradi.
9. Nomzodga tayyorlanishi uchun 20 daqiqa vaqt beriladi. Nomzod tayyorlanish uchun ajratilgan vaqt tugashidan oldin javob berishga tayyorligini bildirsa, unga javob berishga ruxsat beriladi.
10. Informatika va axborot texnologiyalari fani boʻyicha nomzodning bilim va amaliy koʻnikmalari komissiyaning har bir aʼzosi tomonidan 30 ballik tizimda quyidagi mezonlar asosida baholanadi:
a) biletdagi birinchi nazariy savol uchun (15 ballik tizimda):
savol mazmun va mohiyatini toʻliq ochib bersa, javobni mantiqan va ketma-ketlikda izchil ifodalasa, javobni yoritishda ishonchli dalillarga havola qilsa — 15 ball;
savol mazmun va mohiyatini ochib bersa, javobni mantiqan va ketma-ketlikda izchil ifodalasa — 10 ball;
savol mazmun va mohiyatini qisman ochib bersa, javobni ifodalashda mantiqiylik va ketma-ketlik qisman buzilsa — 5 ball;
savol mazmun va mohiyatini ochib bera olmasa — 0 ball;
b) biletdagi ikkinchi amaliy topshiriq uchun (15 ballik tizimda):
amaliy topshiriq ketma-ketlikka rioya qilingan holda kompyuter yordamida toʻliq bajarilsa, amaliy dasturiy vositalar toʻgʻri tanlansa va ular bilan ishlash qoidalariga hamda texnika xavfsizligi qoidalariga toʻliq rioya qilinsa, amaliy topshiriqni mantiqiy fikrlab, xatosiz va kamchiliklarsiz bajarsa — 15 ball;
amaliy topshiriq ketma-ketlikka rioya qilingan holda kompyuter yordamida toʻliq bajarilsa, amaliy dasturiy vositalar toʻgʻri tanlansa va ular bilan ishlash qoidalariga hamda texnika xavfsizligi qoidalariga rioya qilinsa, amaliy topshiriqni mantiqiy fikrlab, 1-2 ta qoʻpol boʻlmagan xato va kamchiliklar bilan bajarsa — 10 ball;
amaliy topshiriq ketma-ketlikka qisman rioya qilingan holda kompyuter yordamida bajarilsa, amaliy dasturiy vositalar toʻgʻri tanlansa va ular bilan ishlash qoidalariga hamda texnika xavfsizligi qoidalariga toʻliq rioya qilinmasa, amaliy topshiriqni 3-4 ta qoʻpol boʻlmagan xato va kamchiliklar bilan bajarsa — 5 ball;
amaliy topshiriq bajarilmasa, amaliy dasturiy vositalar notoʻgʻri tanlansa va ular bilan ishlash qoidalariga hamda texnika xavfsizligi qoidalariga rioya qilinmasa — 0 ball.
11. Komissiya aʼzolari tomonidan qoʻyilgan ballar muhokama qilinib, har bir nomzodga oʻrtacha arifmetik ball qoʻyiladi.
12. Har bir nomzodning ogʻzaki savol-javob natijalari ushbu Metodikaga ilovaga muvofiq shakldagi qaydnomaga komissiya kotibi tomonidan kiritiladi.
13. Qaydnoma komissiya aʼzolari tomonidan imzolanadi hamda shu kunning oʻzida qabul komissiyasining masʼul kotibiga topshiriladi.
Informatika va axborot texnologiyalari fanini oʻzlashtirganlikni baholash metodikasiga ILOVA
Informatika va axborot texnologiyalari fanini oʻzlashtirganlikni baholash boʻyicha QAYDNOMA 20__ yil “____” _______________ T/r Nomzodning F.I.O. Nomzodning savolga bergan javobi va topshiriqni bajarishi boʻyicha qoʻyilgan ballar nazariy savol amaliy topshiriq nomzodning toʻplagan umumiy bali 1. 2. 3. ... Komissiya aʼzolari: _________________________ _____________ (F.I.O.) (imzo) _________________________ _____________ (F.I.O.) (imzo) _________________________ _____________ (F.I.O.) (imzo) ”.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 26-iyun,
392-son