UzbekAI

ЎЗБЕКИСТОН РЕСПУБЛИКАСИ ИСТИҚБОЛЛИ ЛОЙИҲАЛАР МИЛЛИЙ АГЕНТЛИГИ ДИРЕКТОРИНИНГ

БУЙРУҒИ

НИЗОМ

Интернет бутунжаҳон ахборот тармоғида таваккалчиликка асосланган ўйинларни ташкил этиш ва ўтказиш тартиби тўғрисидаги низомни тасдиқлаш ҳақида

Ўзбекистон Республикасининг «Лицензиялаш, рухсат бериш ва хабардор қилиш тартиб-таомиллари тўғрисида»ги Қонуни , Ўзбекистон Республикаси Президентининг 2024 йил 19 апрелдаги ПФ-68-сон «Лотереялар ва таваккалчиликка асосланган ўйинларни ташкил этиш ва ўтказишни тартибга солишни такомиллаштириш чора-тадбирлари тўғрисида»ги Фармони ва Ўзбекистон Республикаси Вазирлар Маҳкамасининг 2024 йил 6 декабрдаги 814-сон «Ўзбекистон Республикаси Президентининг «Лотереялар ва таваккалчиликка асосланган ўйинларни ташкил этиш ва ўтказишни тартибга солишни такомиллаштириш чора-тадбирлари тўғрисида» 2024 йил 19 апрелдаги ПФ-68-сон Фармони ижросини таъминлаш чора-тадбирлари тўғрисида»ги қарорига мувофиқ буюраман:

1. Интернет бутунжаҳон ахборот тармоғида таваккалчиликка асосланган ўйинларни ташкил этиш ва ўтказиш тартиби тўғрисидаги низом иловага мувофиқ тасдиқлансин.

2. Мазкур буйруқ расмий эълон қилинган кундан эътиборан кучга киради.

Ўзбекистон Республикаси Истиқболли лойиҳалар миллий агентлиги директорининг 2025 йил 25 июндаги 15-сон буйруғига ИЛОВА

Интернет бутунжаҳон ахборот тармоғида таваккалчиликка асосланган ўйинларни ташкил этиш ва ўтказиш тартиби тўғрисидаги

Мазкур Низом Интернет бутунжаҳон ахборот тармоғида таваккалчиликка асосланган ўйинларни (бундан буён матнда Интернет тармоғидаги ўйинлар деб юритилади) ташкил этиш ва ўтказиш тартибини белгилайди.

1-боб. Умумий қоидалар

1. Мазкур Низомда қуйидаги асосий тушунчалар қўлланилади:

бонус — ўйинчини ўйинга жалб қилиш, сақлаб қолиш ва рағбатлантириш учун унга ҳар қандай шаклда тақдим этиладиган таклифлар (воситалар);

ўйин сессияси — ўйинчи томонидан муайян ўйин (унинг қисми, бўлими) бошланган пайтдан натижа аниқланган, ютуқ тўланган ва (ёки) битим тугаллангунига қадар бўлган давр;

ўйин ускунаси — Интернет тармоғидаги ўйинларни ташкил этиш, ўтказиш, ҳисобини юритиш ва назорат қилиш учун мўлжалланган аппарат ва техник воситалар, дастурий таъминот мажмуи;

ваколатли орган — Ўзбекистон Республикаси Истиқболли лойиҳалар миллий агентлиги;

Интернет тармоғидаги ўйинлар ташкилотчиси (бундан буён матнда ўйинлар ташкилотчиси деб юритилади) — Интернет тармоғидаги ўйинларни ташкил этиш фаолиятини амалга ошириш учун лицензия олган Ўзбекистон Республикасининг резиденти бўлган юридик шахс;

ўйинлар ташкилотчисининг электрон платформаси (бундан буён матнда электрон платформа деб юритилади) — ўйинлар ташкилотчисининг Ставкалар ва ўйинчиларнинг ягона давлат регистри билан интеграция қилинган қуйидагилар амалга ошириладиган ахборот тизими ва (ёки) дастурий-аппарат мажмуаси:

ўйинчини рақамли (масофадан) идентификация қилиш;

ўйинчининг шахсий кабинетини яратиш;

битим тузиш ва рўйхатдан ўтказиш;

Ставкалар ва ўйинчиларнинг ягона давлат регистри (бундан буён матнда Регистр деб юритилади) орқали депозитни қабул қилишни, битимлар бўйича ютуқларни ҳисоблашни ва тўлашни қайд этиш;

Интернет тармоғидаги ўйинларнинг ва (ёки) ўйин сессиясининг натижасини аниқлаш;

Интернет тармоғидаги ўйинларга киришни таъминлаш;

ўйинчига Интернет тармоғидаги ўйинлар ва ўйинлар ташкилотчиси фаолияти ҳақида маълумот бериш ва уни хабардор қилиш;

ўйинлар ташкилотчисининг фаолияти бўйича ҳисоботларни тайёрлаш ва шакллантириш;

битимларни тузиш ва бажариш учун зарур бўлган маълумотларни сақлаш, қайта ишлаш ва ошкор қилиш;

ўйинлар ташкилотчисининг фаолияти билан боғлиқ бошқа функцияларни бажариш.

2. Ўйинлар ташкилотчиси ўз фаолиятини фақат тегишли лицензия асосида ва лицензияда кўрсатилган домен номи орқали амалга ошириши мумкин.

3. Ўйинлар ташкилотчиси:

ўз фаолиятини қонунчилик талабларига мувофиқ амалга ошириш;

электрон платформанинг зарур даражада ишлашини ва киберхавфсизлигини таъминлаш, шунингдек мазкур электрон платформани ҳимоя қилиш ва унга рухсатсиз киришнинг олдини олиш чораларини кўриш;

ўз фаолиятини амалга ошириш учун Регистр билан интеграция қилишни таъминлаш;

ўйинчиларнинг мурожаатларини ва Регистр операторининг сўровларини қабул қилиш, кўриб чиқиш ва уларга жавоб бериш;

ўйинчиларга улар мажбурий рақамли (масофадан) идентификациядан ўтганидан ҳамда Интернет тармоғидаги ўйинлар, лотереялар ташкил этиш ва букмекерлик фаолияти соҳасидаги қонунчиликка мувофиқ бошқа чоралар қўлланилганидан сўнг ўйинга киришига рухсат бериш;

электрон платформа фаолияти билан боғлиқ хавфларни баҳолаш ва хавфсизлик аудитини мунтазам равишда ўтказиш;

барча операциялар, шу жумладан идентификация маълумотлари, ўйинчилар билан амалга оширилган ўзаро муносабатлар ҳақидаги маълумотларни беш йил давомида сақлаш;

Интернет тармоғидаги ўйинлар, лотереялар ташкил этиш ва букмекерлик фаолияти соҳасидаги қонунчиликда белгиланган реклама талабларига риоя қилиш;

ўйинлар ташкилотчисининг ходимлари ва улар томонидан фуқаролик-ҳуқуқий шартномалар асосида бевосита Интернет тармоғидаги ўйинлар фаолиятини амалга ошириш учун жалб қилинган шахсларнинг Интернет тармоғидаги ўйинлар, лотереялар ташкил этиш ва букмекерлик фаолиятини тартибга солувчи, жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасидаги қонунчилик ҳужжатлари ва ўйинлар ташкилотчиси томонидан тасдиқланадиган ички ҳужжатларини билиш даражасини доимий ошириб бориш;

электрон платформага Регистр операторининг ички ҳужжатлари билан белгиланган талабларга мувофиқ ўзгартиришлар киритишга мажбур.

Ўйинлар ташкилотчиси зиммасига қонунчиликка мувофиқ бошқа мажбуриятлар ҳам юклатилиши мумкин.

4. Ўйинлар ташкилотчиси:

кўрсатиладиган хизматлар учун мукофот олиш;

ўйинчи томонидан қонунчилик ёки ўйинлар ташкилотчисининг ички ҳужжатлари талаблари бузилганлиги аниқланган тақдирда, уни рақамли (масофадан) идентификация қилишни рад этиш, у билан ўзаро муносабатларни тугатиш ва (ёки) унинг электрон платформага киришини чеклаш;

Регистр операторига ва (ёки) ваколатли органга сўровлар юбориш ва улар юзасидан тушунтиришлар олиш ҳуқуқига эга.

Ўйинлар ташкилотчиси қонунчиликка мувофиқ бошқа ҳуқуқларга ҳам эга бўлиши мумкин.

5. Ўйинлар ташкилотчиси қуйидагиларни назарда тутувчи ички ҳужжатларни ишлаб чиқиши ва тасдиқлаши керак:

ўйинчиларни рақамли (масофадан) идентификация қилиш тартиби;

ўйинчи билан муносабатлар ўрнатиш, шунингдек уни электрон платформага киритиш (чиқариш) тартиби;

Интернет тармоғидаги ўйинларни ташкил этиш тартиби;

ютуқларни тўлаш ва пул маблағларини қайтариш тартиби;

жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш бўйича ички назорат қоидалари;

масъулиятли ўйин тамойили қоидалари ва тартиби;

ўйинчиларнинг мурожаатларини кўриб чиқиш тартиби.

Ички ҳужжатлар давлат тилида ишлаб чиқилиши ва ўйинлар ташкилотчисининг раҳбари томонидан имзоланиши (тасдиқланиши) керак.

Ички ҳужжатлар бошқа тилларда ҳам қабул қилиниши мумкин.

6. Ўйинлар ташкилотчиси электрон платформада амалга оширилаётган операцияларни доимий равишда назорат қилади.

Ўйинлар ташкилотчиси томонидан қонунчилик, мазкур Низом ва ички ҳужжатлар талаблари бузилганлиги аниқланган тақдирда, уларни бартараф этиш ва келгусида йўл қўймаслик чоралари кўрилиши керак.

Қонунчилик, мазкур Низом ва ички ҳужжатлар талаблари бузилишининг ҳар бир факти тўғрисидаги маълумот ўйинлар ташкилотчиси томонидан ушбу факт аниқланган кундан бошлаб камида 5 йил давомида сақланиши керак.

Ваколатли орган ва (ёки) Регистр операторининг сўровларига биноан ўйинлар ташкилотчиси тегишли сўров олинган кундан бошлаб беш иш кунидан кечиктирмасдан ваколатли орган ва (ёки) Регистр операторига маълумотни тақдим этиши шарт.

Жиноят аломатлари аниқланган тақдирда, ўйинлар ташкилотчиси дарҳол Регистр операторига ва ҳуқуқни муҳофаза қилувчи органларга қонунчилик ҳужжатларига мувофиқ ёзма ва (ёки) электрон шаклда хабар беришга мажбур.

7. Ўйинлар ташкилотчисига:

қонунчилик талабларига жавоб бермайдиган ўйин ускунаси орқали Интернет тармоғидаги ўйинлар ташкил этиш ва ўтказиш;

лицензияда кўрсатилмаган домен номи орқали ўз хизматларини кўрсатиш;

айланмаси лицензиялаш, рухсат бериш ва (ёки) хабардор қилиш тартиб-қоидалари талаб қилинадиган товарларни (ишларни, хизматларни) ютуқ сифатида ёки ютуқни тўлаш эвазига таклиф қилиш;

лотереялар ва (ёки) букмекерлик гаровлари белгиларига эга бўлган ҳодисалар ва (ёки) ўйинлар бўйича битимлар тузиш;

ўйинчиларга кредит, бўлиб тўлаш ва (ёки) қарз маблағлари тақдим этиш орқали, шу жумладан учинчи шахсларнинг маблағларидан фойдаланган ҳолда кейинчалик тўлаш шарти билан битимларни тузиш ва (ёки) таклиф этиш;

депозитларни қабул қилиш, битимларни тузиш ва ютуқларни тўлашда қонунчилик ва Регистр операторининг ички ҳужжатлари билан тақиқланган нақд шаклдаги ва (ёки) бошқа шакллардаги пул маблағларидан фойдаланиш тақиқланади.

2-боб. Ўйинчи билан муносабатлар ўрнатиш тартиби

8. Ўйинлар ташкилотчиси ўйинчилар билан муносабатларни шартнома асосида ўрнатади.

Шартномада қуйидаги шартлар назарда тутилиши керак:

мазкур Низомнинг 6-бандида назарда тутилган маълумотларни ваколатли орган ва (ёки) Регистр операторига тақдим этиш;

ўйинчилар билан музокараларни уларнинг розилиги билан аудио ёки видеоёзувга олиш, шу жумладан ёзишмаларни ёзиб бориш ҳамда ушбу маълумотларнинг камида беш йил давомида сақлаш;

Интернет тармоғидаги ўйинларда иштирок этиш хавфлари, шу жумладан киритилган маблағларни тўлиқ (қисман) йўқотиш ҳақида огоҳлантириш;

ўйинга кириши тақиқланган (чекланган) Ўзбекистон Республикаси фуқароларининг тоифалари ва чет эл давлатлари (юрисдикциялар) резидентлари рўйхатини келтириш;

шахсга доир маълумотларни ҳимоя қилиш ва улардан фойдаланиш талабларига риоя қилиш;

рағбатлантириш чораларини амалга ошириш;

қонунчилик ҳужжатлари, мазкур Низом ва ўйинлар ташкилотчисининг ички ҳужжатларида назарда тутилган бошқа шартларни белгилаш.

9. Ўйинчиларни рақамли (масофадан) идентификация қилиш Вазирлар Маҳкамасининг 2024 йил 6 декабрдаги 814-сон қарори билан тасдиқланган Интернет бутунжаҳон ахборот тармоғида таваккалчиликка асосланган ўйинларни, лотереялар ва букмекерлик фаолиятини ташкил этиш фаолияти ташкилотчиларининг мижозларини рақамли (масофадан) идентификация қилиш тўғрисидаги низомга мувофиқ амалга оширилади.

10. Ўйинлар ташкилотчиси вояга етмаган шахслар ва қуйидаги рўйхатларга киритилган шахслар билан муносабатлар ўрнатишга ҳақли эмас:

Терроризмга, оммавий қирғин қуролини тарқатишга қарши курашишни амалга оширувчи давлат органлари ва Ўзбекистон Республикасининг бошқа ваколатли органларидан тақдим этилаётган маълумотлар, шунингдек чет давлатларнинг ваколатли органлари ва халқаро ташкилотларидан расмий каналлар орқали тақдим этилаётган маълумотлар асосида махсус ваколатли давлат органи томонидан тузилган террорчилик фаолиятида ёки оммавий қирғин қуролини тарқатишда иштирок этаётган ёки иштирок этишда гумон қилинаётган шахслар рўйхати;

Интернет тармоғидаги таваккалчиликка асосланган ўйинлар, лотерея ва букмекерлик гаровларида қатнашиши тақиқланган Ўзбекистон Республикасининг фуқаролари ва чет эл фуқароларининг тоифалари рўйхати;

таваккалчиликка асосланган ўйинларга қарам бўлган шахслар рўйхати.

Ўйинлар ташкилотчиси ички ҳужжатлари билан ўйинга кириши тақиқланган (чекланган) бошқа шахслар тоифаларини белгилашга ҳақли.

11. Муносабатлар ўрнатилиши натижасида ўйинчи учун электрон платформада қуйидагиларни назарда тутувчи шахсий кабинет (аккаунт) яратилади:

ўйинчининг аккаунтини бошқариш;

масъулиятли ўйин тамойили қоидалари ва тартиби билан таништириш ҳамда мазкур хизматини тақдим этиш;

Регистр орқали депозитларни киритиш, ютуқларни қабул қилиш ва маблағларни қайтариб олиш бўйича операцияларни амалга ошириш;

депозитлар, битимлар ва бонусларни кузатиб бориш;

ўйин ташкилотчиси билан ўзаро алоқа қилиш;

мурожаатларни юбориш ва улар бўйича жавобларни қабул қилиш.

Бир ўйинчига ўйинлар ташкилотчисининг электрон платформасида икки ва ундан ортиқ шахсий кабинет (аккаунт) яратиш тақиқланади.

3-боб. Ўйин ускунасига қўйиладиган талаблар

12. Ўйинлар ташкилотчиси томонидан фойдаланиладиган ўйин ускунаси ваколатли орган томонидан белгиланадиган ўйин ускуналарини (дастурий таъминотларни) сертификатлаш соҳасида Ўзбекистон Республикаси ҳудудида тан олинадиган мувофиқликни баҳолаш бўйича органлар ва синов лабораторияларининг сертификатига эга бўлиши лозим.

13. Ўйинлар ташкилотчиси ўйин ускунасини мустақил равишда сертификатлаштиришни таъминлаши ёки бундай ўйин ускунасига бўлган мутлақ ҳуқуқларнинг эгасига берилган ўйин ускунасининг сертификатини тақдим этиши мумкин.

14. Ўйин ускунаси Регистр операторининг ички ҳужжатлари талабларига мувофиқ Регистр билан интеграция қилинган ўйин ташкилотчисининг электрон платформасига уланиши лозим.

15. Қуйидагилар:

ўйин ускунасига унинг ишлаб чиқувчиси билан келишилмаган ёки ўйин ускунасининг техник ва дастурий ҳужжатларида назарда тутилмаган ўзгартиришлар (модификациялар) киритиш;

ўйин ускунасига унинг техник ҳужжатларида назарда тутилмаган элементларни (ускуналарни) улаш, бундан қонунчилик ва Регистр операторининг ички ҳужжатларида кўрсатилган ҳоллар мустасно, тақиқланади.

4-боб. Интернет тармоғидаги ўйинларни ташкил этиш

16. Ўйинлар ташкилотчиси ўз электрон платформаси орқали қонунчилик, ўйинлар ташкилотчиси ва Регистр операторининг ички ҳужжатлари талабларига мувофиқ ўйинчига Интернет тармоғидаги ўйинларга кириш имкониятини тақдим этади.

Электрон платформага кириш шартнома асосида тақдим этилади.

Ўйинчи томонидан мазкур Низом, шартнома ёки ички ҳужжатлар билан белгиланган талаблар ва шартлар бузилган тақдирда, ўйинлар ташкилотчиси томонидан ушбу ўйинчи бундай бузилиш аниқланган пайтдан бошлаб уч ойга четлаштиради.

Ўйинчини электрон платформага киритиш ва (ёки) уни четлатиш тартиби ўйинлар ташкилотчисининг ички ҳужжатлари билан белгиланади.

17. Ўйинлар ташкилотчиси электрон платформада қуйидагиларни назарда тутувчи Интернет тармоғидаги ўйинлар каталогини жойлаштиради:

а) Интернет тармоғидаги ўйиннинг умумий маълумотлари:

Интернет тармоғидаги ўйиннинг номи, тури ва қисқача тавсифи;

Интернет тармоғидаги ҳар бир ўйин учун минимал (максимал) ставкалар;

Интернет тармоғидаги ўйиннинг жараёнлари, мақсадлари ва хусусиятларининг батафсил тавсифи;

Интернет тармоғидаги ўйин қоидалари, шу жумладан ютуқ комбинациялари, ставкалар қилиш тартиби, бонуслар шартлари (агар мавжуд бўлса) ва бошқа махсус қоидалар (талаблар);

б) Интернет тармоғидаги ўйиннинг ишлаб чиқувчиси (провайдери) ва техник таъминоти ҳақидаги маълумотлар:

Интернет тармоғидаги ўйиннинг ишлаб чиқувчиси (провайдери)нинг номи;

ўйин ускунасининг сертификатлаштирилганлиги тўғрисидаги маълумотлар;

Интернет тармоғидаги ўйиннинг турли қурилмалар, операцион тизимлар билан мослиги тўғрисидаги маълумотлар ва Интернет тармоғига уланишга қўйиладиган талаблар.

Интернет тармоғидаги ўйинлар жонли моделлар иштирокида (контент яратиш ва (ёки) трансляция қилиш) ташкил этилганда, қўшимча равишда ўйин (ҳодиса)ларнинг санаси ва вақти ҳамда ўйинлар ўтказиладиган тил бўйича маълумотлар эълон қилинади.

18. Ўйинчи Интернет тармоғидаги ўйинни танлайди, ставка миқдорини белгилайди ва ўйинда иштирок этишини тасдиқлайди ҳамда пул маблағларини Регистр операторининг ҳисоб-китоб-клиринг палатасига ўтказади.

19. Ўйинлар ташкилотчиси ўйин сессиясининг санаси, вақти ва ноёб идентификаторини қайд этишни таъминлайди.

Депозитни қабул қилиш вақти ёпилгандан сўнг ставкани ўзгартиришга йўл қўйилмайди.

Бунда, муайян ўйин қоидалари ва (ёки) ўйинлар ташкилотчисининг ички ҳужжатларига мувофиқ қўшимча ставкалар қабул қилиниши мумкин.

20. Ютуқ ўйин натижаси аниқланганидан сўнг автоматик равишда ҳисобланади ва дарҳол ўйинчига ўтказилади.

5-боб. Масъулиятли ўйин тамойилини амалга ошириш

21. Интернет тармоғидаги ўйинларнинг салбий таъсирини камайтириш мақсадида ўйинлар ташкилотчиси:

масъулиятли ўйин тамойилига амал қилиши;

Интернет тармоғидаги ўйинларда иштирок этиш билан боғлиқ хавфлар ҳақида доимий равишда ўйинчиларни хабардор қилиши ва огоҳлантириши;

ўйинчининг Интернет тармоғидаги таваккалчиликка асосланган ўйинлар, лотерея ва букмекерлик гаровларида қатнашиши тақиқланган Ўзбекистон Республикасининг фуқаролари ва чет эл фуқароларининг тоифалари рўйхатига киритилганлиги тўғрисида хабарнома олинганда, хабарномада кўрсатилган сана ва вақтдан бошлаб ушбу ўйинчи билан битимлар тузишни тўхтатиши;

Интернет тармоғидаги ўйинларда иштирок этиш билан боғлиқ салбий оқибатларни камайтириш бўйича бошқа ҳаракатларни амалга ошириши керак.

6-боб. Электрон платформада жойлаштириладиган маълумотлар

22. Ўйинлар ташкилотчисининг электрон платформасида:

ўйинлар ташкилотчиси ҳақидаги умумий маълумотлар, шу жумладан юридик шахс тўғрисидаги маълумотлар, унинг жойлашган манзили, телефон рақами ва электрон почта манзили;

лицензия нусхаси;

ўйинчининг Интернет тармоғидаги ўйинларда иштирок этиши, ютуқларни тўлаш тартиби ва муддатларини белгиловчи ички ҳужжатлар;

вояга етмаган шахсларнинг Интернет тармоғидаги ўйинларда иштирок этиши тақиқланганлиги ҳақидаги огоҳлантиришлар;

Интернет тармоғидаги ўйинларда иштирок этиш билан боғлиқ хавфлар ҳақидаги маълумотлар;

қонунчиликда белгиланган бошқа маълумотлар жойлаштирилиши керак.

7-боб. Якуний қоида

23. Мазкур Низом талабларининг бузилишида айбдор бўлган шахслар қонунчиликда белгиланган тартибда жавобгар бўладилар.

Директор Д. ЛИ

Тошкент ш.,

2025 йил 25 июнь,

15-сон

(Қонунчилик маълумотлари миллий базаси, 08.07.2025 й., 10/25/3641/0580-сон)

lex.uz

OʻZBEKISTON RESPUBLIKASI ISTIQBOLLI LOYIHALAR MILLIY AGENTLIGI DIREKTORINING

BUYRUGʻI

NIZOM

Internet butunjahon axborot tarmogʻida tavakkalchilikka asoslangan oʻyinlarni tashkil etish va oʻtkazish tartibi toʻgʻrisidagi nizomni tasdiqlash haqida

Oʻzbekiston Respublikasining “Litsenziyalash, ruxsat berish va xabardor qilish tartib-taomillari toʻgʻrisida”gi Qonuni , Oʻzbekiston Respublikasi Prezidentining 2024-yil 19-apreldagi PF-68-son “Lotereyalar va tavakkalchilikka asoslangan oʻyinlarni tashkil etish va oʻtkazishni tartibga solishni takomillashtirish chora-tadbirlari toʻgʻrisida”gi Farmoni va Oʻzbekiston Respublikasi Vazirlar Mahkamasining 2024-yil 6-dekabrdagi 814-son “Oʻzbekiston Respublikasi Prezidentining “Lotereyalar va tavakkalchilikka asoslangan oʻyinlarni tashkil etish va oʻtkazishni tartibga solishni takomillashtirish chora-tadbirlari toʻgʻrisida” 2024-yil 19-apreldagi PF-68-son Farmoni ijrosini taʼminlash chora-tadbirlari toʻgʻrisida”gi qaroriga muvofiq buyuraman:

1. Internet butunjahon axborot tarmogʻida tavakkalchilikka asoslangan oʻyinlarni tashkil etish va oʻtkazish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Oʻzbekiston Respublikasi Istiqbolli loyihalar milliy agentligi direktorining 2025-yil 25-iyundagi 15-son buyrugʻiga ILOVA

Internet butunjahon axborot tarmogʻida tavakkalchilikka asoslangan oʻyinlarni tashkil etish va oʻtkazish tartibi toʻgʻrisidagi

Mazkur Nizom Internet butunjahon axborot tarmogʻida tavakkalchilikka asoslangan oʻyinlarni (bundan buyon matnda Internet tarmogʻidagi oʻyinlar deb yuritiladi) tashkil etish va oʻtkazish tartibini belgilaydi.

1-bob. Umumiy qoidalar

1. Mazkur Nizomda quyidagi asosiy tushunchalar qoʻllaniladi:

bonus — oʻyinchini oʻyinga jalb qilish, saqlab qolish va ragʻbatlantirish uchun unga har qanday shaklda taqdim etiladigan takliflar (vositalar);

oʻyin sessiyasi — oʻyinchi tomonidan muayyan oʻyin (uning qismi, boʻlimi) boshlangan paytdan natija aniqlangan, yutuq toʻlangan va (yoki) bitim tugallanguniga qadar boʻlgan davr;

oʻyin uskunasi — Internet tarmogʻidagi oʻyinlarni tashkil etish, oʻtkazish, hisobini yuritish va nazorat qilish uchun moʻljallangan apparat va texnik vositalar, dasturiy taʼminot majmui;

vakolatli organ — Oʻzbekiston Respublikasi Istiqbolli loyihalar milliy agentligi;

Internet tarmogʻidagi oʻyinlar tashkilotchisi (bundan buyon matnda oʻyinlar tashkilotchisi deb yuritiladi) — Internet tarmogʻidagi oʻyinlarni tashkil etish faoliyatini amalga oshirish uchun litsenziya olgan Oʻzbekiston Respublikasining rezidenti boʻlgan yuridik shaxs;

oʻyinlar tashkilotchisining elektron platformasi (bundan buyon matnda elektron platforma deb yuritiladi) — oʻyinlar tashkilotchisining Stavkalar va oʻyinchilarning yagona davlat registri bilan integratsiya qilingan quyidagilar amalga oshiriladigan axborot tizimi va (yoki) dasturiy-apparat majmuasi:

oʻyinchini raqamli (masofadan) identifikatsiya qilish;

oʻyinchining shaxsiy kabinetini yaratish;

bitim tuzish va roʻyxatdan oʻtkazish;

Stavkalar va oʻyinchilarning yagona davlat registri (bundan buyon matnda Registr deb yuritiladi) orqali depozitni qabul qilishni, bitimlar boʻyicha yutuqlarni hisoblashni va toʻlashni qayd etish;

Internet tarmogʻidagi oʻyinlarning va (yoki) oʻyin sessiyasining natijasini aniqlash;

Internet tarmogʻidagi oʻyinlarga kirishni taʼminlash;

oʻyinchiga Internet tarmogʻidagi oʻyinlar va oʻyinlar tashkilotchisi faoliyati haqida maʼlumot berish va uni xabardor qilish;

oʻyinlar tashkilotchisining faoliyati boʻyicha hisobotlarni tayyorlash va shakllantirish;

bitimlarni tuzish va bajarish uchun zarur boʻlgan maʼlumotlarni saqlash, qayta ishlash va oshkor qilish;

oʻyinlar tashkilotchisining faoliyati bilan bogʻliq boshqa funksiyalarni bajarish.

2. Oʻyinlar tashkilotchisi oʻz faoliyatini faqat tegishli litsenziya asosida va litsenziyada koʻrsatilgan domen nomi orqali amalga oshirishi mumkin.

3. Oʻyinlar tashkilotchisi:

oʻz faoliyatini qonunchilik talablariga muvofiq amalga oshirish;

elektron platformaning zarur darajada ishlashini va kiberxavfsizligini taʼminlash, shuningdek mazkur elektron platformani himoya qilish va unga ruxsatsiz kirishning oldini olish choralarini koʻrish;

oʻz faoliyatini amalga oshirish uchun Registr bilan integratsiya qilishni taʼminlash;

oʻyinchilarning murojaatlarini va Registr operatorining soʻrovlarini qabul qilish, koʻrib chiqish va ularga javob berish;

oʻyinchilarga ular majburiy raqamli (masofadan) identifikatsiyadan oʻtganidan hamda Internet tarmogʻidagi oʻyinlar, lotereyalar tashkil etish va bukmekerlik faoliyati sohasidagi qonunchilikka muvofiq boshqa choralar qoʻllanilganidan soʻng oʻyinga kirishiga ruxsat berish;

elektron platforma faoliyati bilan bogʻliq xavflarni baholash va xavfsizlik auditini muntazam ravishda oʻtkazish;

barcha operatsiyalar, shu jumladan identifikatsiya maʼlumotlari, oʻyinchilar bilan amalga oshirilgan oʻzaro munosabatlar haqidagi maʼlumotlarni besh yil davomida saqlash;

Internet tarmogʻidagi oʻyinlar, lotereyalar tashkil etish va bukmekerlik faoliyati sohasidagi qonunchilikda belgilangan reklama talablariga rioya qilish;

oʻyinlar tashkilotchisining xodimlari va ular tomonidan fuqarolik-huquqiy shartnomalar asosida bevosita Internet tarmogʻidagi oʻyinlar faoliyatini amalga oshirish uchun jalb qilingan shaxslarning Internet tarmogʻidagi oʻyinlar, lotereyalar tashkil etish va bukmekerlik faoliyatini tartibga soluvchi, jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish sohasidagi qonunchilik hujjatlari va oʻyinlar tashkilotchisi tomonidan tasdiqlanadigan ichki hujjatlarini bilish darajasini doimiy oshirib borish;

elektron platformaga Registr operatorining ichki hujjatlari bilan belgilangan talablarga muvofiq oʻzgartirishlar kiritishga majbur.

Oʻyinlar tashkilotchisi zimmasiga qonunchilikka muvofiq boshqa majburiyatlar ham yuklatilishi mumkin.

4. Oʻyinlar tashkilotchisi:

koʻrsatiladigan xizmatlar uchun mukofot olish;

oʻyinchi tomonidan qonunchilik yoki oʻyinlar tashkilotchisining ichki hujjatlari talablari buzilganligi aniqlangan taqdirda, uni raqamli (masofadan) identifikatsiya qilishni rad etish, u bilan oʻzaro munosabatlarni tugatish va (yoki) uning elektron platformaga kirishini cheklash;

Registr operatoriga va (yoki) vakolatli organga soʻrovlar yuborish va ular yuzasidan tushuntirishlar olish huquqiga ega.

Oʻyinlar tashkilotchisi qonunchilikka muvofiq boshqa huquqlarga ham ega boʻlishi mumkin.

5. Oʻyinlar tashkilotchisi quyidagilarni nazarda tutuvchi ichki hujjatlarni ishlab chiqishi va tasdiqlashi kerak:

oʻyinchilarni raqamli (masofadan) identifikatsiya qilish tartibi;

oʻyinchi bilan munosabatlar oʻrnatish, shuningdek uni elektron platformaga kiritish (chiqarish) tartibi;

Internet tarmogʻidagi oʻyinlarni tashkil etish tartibi;

yutuqlarni toʻlash va pul mablagʻlarini qaytarish tartibi;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish boʻyicha ichki nazorat qoidalari;

masʼuliyatli oʻyin tamoyili qoidalari va tartibi;

oʻyinchilarning murojaatlarini koʻrib chiqish tartibi.

Ichki hujjatlar davlat tilida ishlab chiqilishi va oʻyinlar tashkilotchisining rahbari tomonidan imzolanishi (tasdiqlanishi) kerak.

Ichki hujjatlar boshqa tillarda ham qabul qilinishi mumkin.

6. Oʻyinlar tashkilotchisi elektron platformada amalga oshirilayotgan operatsiyalarni doimiy ravishda nazorat qiladi.

Oʻyinlar tashkilotchisi tomonidan qonunchilik, mazkur Nizom va ichki hujjatlar talablari buzilganligi aniqlangan taqdirda, ularni bartaraf etish va kelgusida yoʻl qoʻymaslik choralari koʻrilishi kerak.

Qonunchilik, mazkur Nizom va ichki hujjatlar talablari buzilishining har bir fakti toʻgʻrisidagi maʼlumot oʻyinlar tashkilotchisi tomonidan ushbu fakt aniqlangan kundan boshlab kamida 5 yil davomida saqlanishi kerak.

Vakolatli organ va (yoki) Registr operatorining soʻrovlariga binoan oʻyinlar tashkilotchisi tegishli soʻrov olingan kundan boshlab besh ish kunidan kechiktirmasdan vakolatli organ va (yoki) Registr operatoriga maʼlumotni taqdim etishi shart.

Jinoyat alomatlari aniqlangan taqdirda, oʻyinlar tashkilotchisi darhol Registr operatoriga va huquqni muhofaza qiluvchi organlarga qonunchilik hujjatlariga muvofiq yozma va (yoki) elektron shaklda xabar berishga majbur.

7. Oʻyinlar tashkilotchisiga:

qonunchilik talablariga javob bermaydigan oʻyin uskunasi orqali Internet tarmogʻidagi oʻyinlar tashkil etish va oʻtkazish;

litsenziyada koʻrsatilmagan domen nomi orqali oʻz xizmatlarini koʻrsatish;

aylanmasi litsenziyalash, ruxsat berish va (yoki) xabardor qilish tartib-qoidalari talab qilinadigan tovarlarni (ishlarni, xizmatlarni) yutuq sifatida yoki yutuqni toʻlash evaziga taklif qilish;

lotereyalar va (yoki) bukmekerlik garovlari belgilariga ega boʻlgan hodisalar va (yoki) oʻyinlar boʻyicha bitimlar tuzish;

oʻyinchilarga kredit, boʻlib toʻlash va (yoki) qarz mablagʻlari taqdim etish orqali, shu jumladan uchinchi shaxslarning mablagʻlaridan foydalangan holda keyinchalik toʻlash sharti bilan bitimlarni tuzish va (yoki) taklif etish;

depozitlarni qabul qilish, bitimlarni tuzish va yutuqlarni toʻlashda qonunchilik va Registr operatorining ichki hujjatlari bilan taqiqlangan naqd shakldagi va (yoki) boshqa shakllardagi pul mablagʻlaridan foydalanish taqiqlanadi.

2-bob. Oʻyinchi bilan munosabatlar oʻrnatish tartibi

8. Oʻyinlar tashkilotchisi oʻyinchilar bilan munosabatlarni shartnoma asosida oʻrnatadi.

Shartnomada quyidagi shartlar nazarda tutilishi kerak:

mazkur Nizomning 6-bandida nazarda tutilgan maʼlumotlarni vakolatli organ va (yoki) Registr operatoriga taqdim etish;

oʻyinchilar bilan muzokaralarni ularning roziligi bilan audio yoki videoyozuvga olish, shu jumladan yozishmalarni yozib borish hamda ushbu maʼlumotlarning kamida besh yil davomida saqlash;

Internet tarmogʻidagi oʻyinlarda ishtirok etish xavflari, shu jumladan kiritilgan mablagʻlarni toʻliq (qisman) yoʻqotish haqida ogohlantirish;

oʻyinga kirishi taqiqlangan (cheklangan) Oʻzbekiston Respublikasi fuqarolarining toifalari va chet el davlatlari (yurisdiksiyalar) rezidentlari roʻyxatini keltirish;

shaxsga doir maʼlumotlarni himoya qilish va ulardan foydalanish talablariga rioya qilish;

ragʻbatlantirish choralarini amalga oshirish;

qonunchilik hujjatlari, mazkur Nizom va oʻyinlar tashkilotchisining ichki hujjatlarida nazarda tutilgan boshqa shartlarni belgilash.

9. Oʻyinchilarni raqamli (masofadan) identifikatsiya qilish Vazirlar Mahkamasining 2024-yil 6-dekabrdagi 814-son qarori bilan tasdiqlangan Internet butunjahon axborot tarmogʻida tavakkalchilikka asoslangan oʻyinlarni, lotereyalar va bukmekerlik faoliyatini tashkil etish faoliyati tashkilotchilarining mijozlarini raqamli (masofadan) identifikatsiya qilish toʻgʻrisidagi nizomga muvofiq amalga oshiriladi.

10. Oʻyinlar tashkilotchisi voyaga yetmagan shaxslar va quyidagi roʻyxatlarga kiritilgan shaxslar bilan munosabatlar oʻrnatishga haqli emas:

Terrorizmga, ommaviy qirgʻin qurolini tarqatishga qarshi kurashishni amalga oshiruvchi davlat organlari va Oʻzbekiston Respublikasining boshqa vakolatli organlaridan taqdim etilayotgan maʼlumotlar, shuningdek chet davlatlarning vakolatli organlari va xalqaro tashkilotlaridan rasmiy kanallar orqali taqdim etilayotgan maʼlumotlar asosida maxsus vakolatli davlat organi tomonidan tuzilgan terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxati;

Internet tarmogʻidagi tavakkalchilikka asoslangan oʻyinlar, lotereya va bukmekerlik garovlarida qatnashishi taqiqlangan Oʻzbekiston Respublikasining fuqarolari va chet el fuqarolarining toifalari roʻyxati;

tavakkalchilikka asoslangan oʻyinlarga qaram boʻlgan shaxslar roʻyxati.

Oʻyinlar tashkilotchisi ichki hujjatlari bilan oʻyinga kirishi taqiqlangan (cheklangan) boshqa shaxslar toifalarini belgilashga haqli.

11. Munosabatlar oʻrnatilishi natijasida oʻyinchi uchun elektron platformada quyidagilarni nazarda tutuvchi shaxsiy kabinet (akkaunt) yaratiladi:

oʻyinchining akkauntini boshqarish;

masʼuliyatli oʻyin tamoyili qoidalari va tartibi bilan tanishtirish hamda mazkur xizmatini taqdim etish;

Registr orqali depozitlarni kiritish, yutuqlarni qabul qilish va mablagʻlarni qaytarib olish boʻyicha operatsiyalarni amalga oshirish;

depozitlar, bitimlar va bonuslarni kuzatib borish;

oʻyin tashkilotchisi bilan oʻzaro aloqa qilish;

murojaatlarni yuborish va ular boʻyicha javoblarni qabul qilish.

Bir oʻyinchiga oʻyinlar tashkilotchisining elektron platformasida ikki va undan ortiq shaxsiy kabinet (akkaunt) yaratish taqiqlanadi.

3-bob. Oʻyin uskunasiga qoʻyiladigan talablar

12. Oʻyinlar tashkilotchisi tomonidan foydalaniladigan oʻyin uskunasi vakolatli organ tomonidan belgilanadigan oʻyin uskunalarini (dasturiy taʼminotlarni) sertifikatlash sohasida Oʻzbekiston Respublikasi hududida tan olinadigan muvofiqlikni baholash boʻyicha organlar va sinov laboratoriyalarining sertifikatiga ega boʻlishi lozim.

13. Oʻyinlar tashkilotchisi oʻyin uskunasini mustaqil ravishda sertifikatlashtirishni taʼminlashi yoki bunday oʻyin uskunasiga boʻlgan mutlaq huquqlarning egasiga berilgan oʻyin uskunasining sertifikatini taqdim etishi mumkin.

14. Oʻyin uskunasi Registr operatorining ichki hujjatlari talablariga muvofiq Registr bilan integratsiya qilingan oʻyin tashkilotchisining elektron platformasiga ulanishi lozim.

15. Quyidagilar:

oʻyin uskunasiga uning ishlab chiquvchisi bilan kelishilmagan yoki oʻyin uskunasining texnik va dasturiy hujjatlarida nazarda tutilmagan oʻzgartirishlar (modifikatsiyalar) kiritish;

oʻyin uskunasiga uning texnik hujjatlarida nazarda tutilmagan elementlarni (uskunalarni) ulash, bundan qonunchilik va Registr operatorining ichki hujjatlarida koʻrsatilgan hollar mustasno, taqiqlanadi.

4-bob. Internet tarmogʻidagi oʻyinlarni tashkil etish

16. Oʻyinlar tashkilotchisi oʻz elektron platformasi orqali qonunchilik, oʻyinlar tashkilotchisi va Registr operatorining ichki hujjatlari talablariga muvofiq oʻyinchiga Internet tarmogʻidagi oʻyinlarga kirish imkoniyatini taqdim etadi.

Elektron platformaga kirish shartnoma asosida taqdim etiladi.

Oʻyinchi tomonidan mazkur Nizom, shartnoma yoki ichki hujjatlar bilan belgilangan talablar va shartlar buzilgan taqdirda, oʻyinlar tashkilotchisi tomonidan ushbu oʻyinchi bunday buzilish aniqlangan paytdan boshlab uch oyga chetlashtiradi.

Oʻyinchini elektron platformaga kiritish va (yoki) uni chetlatish tartibi oʻyinlar tashkilotchisining ichki hujjatlari bilan belgilanadi.

17. Oʻyinlar tashkilotchisi elektron platformada quyidagilarni nazarda tutuvchi Internet tarmogʻidagi oʻyinlar katalogini joylashtiradi:

a) Internet tarmogʻidagi oʻyinning umumiy maʼlumotlari:

Internet tarmogʻidagi oʻyinning nomi, turi va qisqacha tavsifi;

Internet tarmogʻidagi har bir oʻyin uchun minimal (maksimal) stavkalar;

Internet tarmogʻidagi oʻyinning jarayonlari, maqsadlari va xususiyatlarining batafsil tavsifi;

Internet tarmogʻidagi oʻyin qoidalari, shu jumladan yutuq kombinatsiyalari, stavkalar qilish tartibi, bonuslar shartlari (agar mavjud boʻlsa) va boshqa maxsus qoidalar (talablar);

b) Internet tarmogʻidagi oʻyinning ishlab chiquvchisi (provayderi) va texnik taʼminoti haqidagi maʼlumotlar:

Internet tarmogʻidagi oʻyinning ishlab chiquvchisi (provayderi)ning nomi;

oʻyin uskunasining sertifikatlashtirilganligi toʻgʻrisidagi maʼlumotlar;

Internet tarmogʻidagi oʻyinning turli qurilmalar, operatsion tizimlar bilan mosligi toʻgʻrisidagi maʼlumotlar va Internet tarmogʻiga ulanishga qoʻyiladigan talablar.

Internet tarmogʻidagi oʻyinlar jonli modellar ishtirokida (kontent yaratish va (yoki) translyatsiya qilish) tashkil etilganda, qoʻshimcha ravishda oʻyin (hodisa)larning sanasi va vaqti hamda oʻyinlar oʻtkaziladigan til boʻyicha maʼlumotlar eʼlon qilinadi.

18. Oʻyinchi Internet tarmogʻidagi oʻyinni tanlaydi, stavka miqdorini belgilaydi va oʻyinda ishtirok etishini tasdiqlaydi hamda pul mablagʻlarini Registr operatorining hisob-kitob-kliring palatasiga oʻtkazadi.

19. Oʻyinlar tashkilotchisi oʻyin sessiyasining sanasi, vaqti va noyob identifikatorini qayd etishni taʼminlaydi.

Depozitni qabul qilish vaqti yopilgandan soʻng stavkani oʻzgartirishga yoʻl qoʻyilmaydi.

Bunda, muayyan oʻyin qoidalari va (yoki) oʻyinlar tashkilotchisining ichki hujjatlariga muvofiq qoʻshimcha stavkalar qabul qilinishi mumkin.

20. Yutuq oʻyin natijasi aniqlanganidan soʻng avtomatik ravishda hisoblanadi va darhol oʻyinchiga oʻtkaziladi.

5-bob. Masʼuliyatli oʻyin tamoyilini amalga oshirish

21. Internet tarmogʻidagi oʻyinlarning salbiy taʼsirini kamaytirish maqsadida oʻyinlar tashkilotchisi:

masʼuliyatli oʻyin tamoyiliga amal qilishi;

Internet tarmogʻidagi oʻyinlarda ishtirok etish bilan bogʻliq xavflar haqida doimiy ravishda oʻyinchilarni xabardor qilishi va ogohlantirishi;

oʻyinchining Internet tarmogʻidagi tavakkalchilikka asoslangan oʻyinlar, lotereya va bukmekerlik garovlarida qatnashishi taqiqlangan Oʻzbekiston Respublikasining fuqarolari va chet el fuqarolarining toifalari roʻyxatiga kiritilganligi toʻgʻrisida xabarnoma olinganda, xabarnomada koʻrsatilgan sana va vaqtdan boshlab ushbu oʻyinchi bilan bitimlar tuzishni toʻxtatishi;

Internet tarmogʻidagi oʻyinlarda ishtirok etish bilan bogʻliq salbiy oqibatlarni kamaytirish boʻyicha boshqa harakatlarni amalga oshirishi kerak.

6-bob. Elektron platformada joylashtiriladigan maʼlumotlar

22. Oʻyinlar tashkilotchisining elektron platformasida:

oʻyinlar tashkilotchisi haqidagi umumiy maʼlumotlar, shu jumladan yuridik shaxs toʻgʻrisidagi maʼlumotlar, uning joylashgan manzili, telefon raqami va elektron pochta manzili;

litsenziya nusxasi;

oʻyinchining Internet tarmogʻidagi oʻyinlarda ishtirok etishi, yutuqlarni toʻlash tartibi va muddatlarini belgilovchi ichki hujjatlar;

voyaga yetmagan shaxslarning Internet tarmogʻidagi oʻyinlarda ishtirok etishi taqiqlanganligi haqidagi ogohlantirishlar;

Internet tarmogʻidagi oʻyinlarda ishtirok etish bilan bogʻliq xavflar haqidagi maʼlumotlar;

qonunchilikda belgilangan boshqa maʼlumotlar joylashtirilishi kerak.

7-bob. Yakuniy qoida

23. Mazkur Nizom talablarining buzilishida aybdor boʻlgan shaxslar qonunchilikda belgilangan tartibda javobgar boʻladilar.

Direktor D. LI

Toshkent sh.,

2025-yil 25-iyun,

15-son

(Qonunchilik maʼlumotlari milliy bazasi, 08.07.2025-y., 10/25/3641/0580-son)

lex.uz