UzbekAI

Ўзбекистон Республикаси Истиқболли лойиҳалар миллий агентлиги директорининг

буйруғи

НИЗОМ

Букмекерлик фаолиятини ташкил этиш ва амалга ошириш тартиби тўғрисидаги низомни тасдиқлаш ҳақида

Ўзбекистон Республикасининг «Лицензиялаш, рухсат бериш ва хабардор қилиш тартиб-таомиллари тўғрисида»ги Қонуни , Ўзбекистон Республикаси Президентининг 2024 йил 19 апрелдаги ПФ-68-сон «Лотереялар ва таваккалчиликка асосланган ўйинларни ташкил этиш ва ўтказишни тартибга солишни такомиллаштириш чора-тадбирлари тўғрисида»ги Фармони ва Ўзбекистон Республикаси Вазирлар Маҳкамасининг 2024 йил 6 декабрдаги 814-сон «Ўзбекистон Республикаси Президентининг «Лотереялар ва таваккалчиликка асосланган ўйинларни ташкил этиш ва ўтказишни тартибга солишни такомиллаштириш чора-тадбирлари тўғрисида» 2024 йил 19 апрелдаги ПФ-68-сон Фармони ижросини таъминлаш чора-тадбирлари тўғрисида»ги қарорига мувофиқ буюраман:

1. Букмекерлик фаолиятини ташкил этиш ва амалга ошириш тартиби тўғрисидаги низом иловага мувофиқ тасдиқлансин.

2. Мазкур буйруқ расмий эълон қилинган кундан эътиборан кучга киради.

Ўзбекистон Республикаси Истиқболли лойиҳалар миллий агентлиги директорининг 2025 йил 25 июндаги 16-сон буйруғига ИЛОВА

Букмекерлик фаолиятини ташкил этиш ва амалга ошириш тартиби тўғрисидаги

Мазкур Низом букмекерлик фаолиятини ташкил этиш ва амалга ошириш тартибини белгилайди.

1-боб. Умумий қоидалар

1. Ушбу Низомда қуйидаги асосий тушунчалар қўлланилади:

букмекерлик фаолияти — букмекерлик гаровларини тузиш ва ўтказиш фаолияти;

букмекерлик гарови — букмекерлик фаолияти ташкилотчиси ва ўйинчи ўртасида маълум бир ҳодиса (спорт мусобақаси, танлов, табиат ҳодисаси ва бошқалар) содир бўлиши тўғрисидаги келишувни ўз ичига олган таваккалчиликка асосланган ўйин тури бўлиб, унда ютуқнинг ҳажми (миқдори) ўйинчининг олдиндан тузилган кўрсаткич бўйича аниқ бир воқеанинг ҳақиқий натижасига мос келадиган башорати натижасида аниқланади;

келишилган ўйинлар — натижаси олдиндан белгилаб қўйилган ва иштирокчилар ўртасида келишиб олинган спорт тадбири (мусобақаси);

инсайдер ахборот — оммага очиқ бўлмаган ва унга эга бўлганларни бошқа ўйинчилар билан солиштирганда афзал ҳолатга қўядиган маълумот;

коэффициент — букмекерлик фаолияти ташкилотчиси томонидан ҳодисанинг ҳар бир натижаси учун белгиланадиган ва ўйинчининг потенциал ютуқлари миқдорини аниқлайдиган рақамли кўрсаткич;

ҳодисалар қатори (рўйхати) — букмекерлик фаолияти ташкилотчиси томонидан унинг электрон платформасида жойлаштириладиган, букмекерлик гаровини тузиш мумкин бўлган ҳодисаларнинг натижалари ва белгиланган коэффициентларни кўрсатувчи тизимлаштирилган рўйхат;

букмекерлик гаровлари ҳақидаги маълумотларни манипуляция қилиш (бундан буён матнда манипуляция қилиш деб юритилади) — ўйинчиларнинг хатти-ҳаракатларига (ҳодисалар) таъсир кўрсатадиган, шунингдек ҳодисаларнинг натижаси бўйича чалғитувчи ҳаракатларни амалга ошириш;

букмекерлик фаолияти ташкилотчиси (бундан буён матнда ташкилотчи деб юритилади) — букмекерлик фаолиятини амалга ошириш учун лицензия олган Ўзбекистон Республикасининг резиденти бўлган юридик шахс;

ташкилотчининг электрон платформаси (бундан буён матнда электрон платформа деб юритилади) — ташкилотчининг Ставкалар ва ўйинчиларнинг ягона давлат регистри билан интеграция қилинган қуйидагилар амалга ошириладиган ахборот тизими ва (ёки) дастурий-аппарат мажмуаси:

ўйинчини рақамли (масофадан) идентификация қилиш;

ўйинчининг шахсий кабинетини яратиш;

букмекерлик гаровларини қабул қилиш ва рўйхатдан ўтказиш;

Ставкалар ва ўйинчиларнинг ягона давлат регистри (бундан буён матнда Регистр деб юритилади) орқали депозитни қабул қилишни, битимлар бўйича ютуқларни ҳисоблашни ва тўлашни қайд этиш;

букмекерлик гарови натижасини аниқлаш;

букмекерлик гаровига киришни таъминлаш;

ўйинчига букмекерлик гаровлари ва ҳодисалар ҳақида маълумот бериш ҳамда уни хабардор қилиш;

ташкилотчининг фаолияти тўғрисида ҳисоботларни тайёрлаш ва шакллантириш;

букмекерлик гаровларини тузиш ва бажариш учун зарур бўлган маълумотларни сақлаш, қайта ишлаш ва ошкор қилиш;

ташкилотчининг фаолияти билан боғлиқ бошқа функцияларни бажариш;

ваколатли орган — Ўзбекистон Республикаси Истиқболли лойиҳалар миллий агентлиги.

2. Ташкилотчи ўз фаолиятини фақат тегишли лицензия асосида ва лицензияда кўрсатилган домен номи орқали амалга ошириши мумкин.

3. Ташкилотчи:

ўз фаолиятини қонунчилик талабларига мувофиқ амалга ошириш;

электрон платформанинг зарур даражада ишлашини ва киберхавфсизлигини таъминлаш, шунингдек мазкур электрон платформани ҳимоя қилиш ва унга рухсатсиз киришнинг олдини олиш чораларини кўриш;

ўз фаолиятини амалга ошириш учун Регистр билан интеграция қилишни таъминлаш;

ўйинчиларнинг мурожаатларини ва Регистр операторининг сўровларини қабул қилиш, кўриб чиқиш ва уларга жавоб бериш;

ўйинчиларга улар мажбурий рақамли (масофадан) идентификациядан ўтганидан ҳамда Интернет тармоғидаги ўйинлар, лотереялар ташкил этиш ва букмекерлик фаолияти соҳасидаги қонунчиликка мувофиқ бошқа чоралар қўлланилганидан сўнг букмекерлик гаровларини тузишга рухсат бериш;

электрон платформа фаолияти билан боғлиқ хавфларни баҳолаш ва хавфсизлик аудитини мунтазам равишда ўтказиш;

барча операциялар, шу жумладан идентификация маълумотлари, ўйинчилар билан амалга оширилган ўзаро муносабатлар ҳақидаги маълумотларни беш йил давомида сақлаш;

Интернет тармоғидаги ўйинлар, лотереялар ташкил этиш ва букмекерлик фаолияти соҳасидаги қонунчиликда белгиланган реклама талабларига риоя қилиш;

ташкилотчининг ходимлари ва улар томонидан фуқаролик-ҳуқуқий шартномалар асосида бевосита букмекерлик фаолиятини амалга ошириш учун жалб қилинган шахсларнинг Интернет тармоғидаги ўйинлар, лотереялар ташкил этиш ва букмекерлик фаолиятини тартибга солувчи, жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасидаги қонунчилик ҳужжатлари ва ташкилотчи томонидан тасдиқланадиган ички ҳужжатларини билиш даражасини доимий ошириб бориш;

электрон платформага Регистр операторининг ички ҳужжатлари билан белгиланган талабларга мувофиқ ўзгартиришлар киритишга мажбур.

Ташкилотчи зиммасига қонунчиликка мувофиқ бошқа мажбуриятлар ҳам юклатилиши мумкин.

4. Ташкилотчи:

кўрсатиладиган хизматлар учун мукофот олиш;

ўйинчи томонидан қонунчилик ёки ташкилотчининг ички ҳужжатлари талаблари бузилганлиги аниқланган тақдирда, уни рақамли (масофадан) идентификация қилишни рад этиш, у билан ўзаро муносабатларни тугатиш ва (ёки) унинг электрон платформага киришини чеклаш;

Регистр операторига ва (ёки) ваколатли органга сўровлар юбориш ва улар юзасидан тушунтиришлар олиш ҳуқуқига эга.

Ташкилотчи қонунчиликка мувофиқ бошқа ҳуқуқларга ҳам эга бўлиши мумкин.

5. Ташкилотчи қуйидагиларни назарда тутувчи ички ҳужжатларни ишлаб чиқиши ва тасдиқлаши керак:

ўйинчиларни рақамли (масофадан) идентификация қилиш тартиби;

ўйинчи билан муносабатлар ўрнатиш, шунингдек уни электрон платформага киритиш (чиқариш) тартиби;

букмекерлик гаровларини тузиш ва ўтказиш тартиби;

ютуқларни тўлаш ва пул маблағларини қайтариш тартиби;

жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш бўйича ички назорат қоидалари;

масъулиятли ўйин тамойили қоидалари ва тартиби;

ўйинчиларнинг мурожаатларини кўриб чиқиш тартиби.

Ички ҳужжатлар давлат тилида ишлаб чиқилиши ва ташкилотчининг раҳбари томонидан имзоланиши (тасдиқланиши) керак.

Ички ҳужжатлар бошқа тилларда ҳам қабул қилиниши мумкин.

6. Ташкилотчи электрон платформада амалга оширилаётган операцияларни доимий равишда назорат қилади.

Ташкилотчи томонидан қонунчилик, мазкур Низом ва ички ҳужжатлар талаблари бузилганлиги аниқланган тақдирда, уларни бартараф этиш ва келгусида йўл қўймаслик чоралари кўрилиши керак.

Қонунчилик, мазкур Низом ва ички ҳужжатлар талаблари бузилишининг ҳар бир факти тўғрисидаги маълумот ташкилотчи томонидан ушбу факт аниқланган кундан бошлаб камида 5 йил давомида сақланиши керак.

Ваколатли орган ва (ёки) Регистр операторининг сўровларига биноан ташкилотчи тегишли сўров олинган кундан бошлаб беш иш кунидан кечиктирмасдан ваколатли орган ва (ёки) Регистр операторига маълумотни тақдим этиши шарт.

Жиноят аломатлари аниқланган тақдирда, ташкилотчи дарҳол Регистр операторига ва ҳуқуқни муҳофаза қилувчи органларга қонунчилик ҳужжатларига мувофиқ ёзма ва (ёки) электрон шаклда хабар беришга мажбур.

7. Ташкилотчига:

а) лицензияда кўрсатилмаган домен номи орқали ўз хизматларини кўрсатиш;

б) букмекерлик гаровларини қуйидаги бўйича тузиш ва (ёки) ўтказиш:

келишилган ўйинлар;

Ўзбекистон Республикасининг ҳудудида ва Ўзбекистон Республикаси фуқаролари иштирокида ҳодисаларга (спорт ўйинлари (шу жумладан киберспорт) ва мусобақалари, сиёсий жараёнлар, танловлар ва бошқалар), бундан халқаро федерациялар қоидалар асосида тегишли даражада тайёргарлик, назорат ва ҳакамликни таъминланган ҳолда, томошабинлар иштирокида ўтказиладиган спорт ўйинлари ва халқаро даражадаги ҳодисалар мустасно;

болалар ва ўсмирлар спорт мусобақалари;

лотерея ўйинлари натижалари;

в) айланмаси лицензиялаш, рухсат бериш ва (ёки) хабардор қилиш тартиб-қоидалари талаб қилинадиган товарларни (ишларни, хизматларни) ютуқ сифатида ёки ютуқни тўлаш эвазига таклиф қилиш;

г) лотереялар ва (ёки) Интернет тармоғидаги ўйинларнинг белгиларига эга бўлган ҳодисалар ва (ёки) ўйинлар бўйича битимлар тузиш;

д) ўйинчиларга кредит, бўлиб тўлаш ва (ёки) қарз маблағлари тақдим этиш орқали, шу жумладан учинчи шахсларнинг маблағларидан фойдаланган ҳолда кейинчалик тўлаш шарти билан битимларни тузиш ва (ёки) таклиф этиш;

е) депозитларни қабул қилиш, битимларни тузиш ва ютуқларни тўлашда қонунчилик ва Регистр операторининг ички ҳужжатлари билан тақиқланган нақд шаклдаги ва (ёки) бошқа шакллардаги пул маблағларидан фойдаланиш тақиқланади.

2-боб. Ўйинчи билан муносабатларни ўрнатиш тартиби

8. Ташкилотчи ўйинчилар билан муносабатларни шартнома асосида ўрнатади.

Шартномада қуйидаги шартлар назарда тутилиши керак:

мазкур Низомнинг 6-бандида назарда тутилган маълумотларни ваколатли орган ва (ёки) Регистр операторига тақдим этиш;

ўйинчилар билан музокараларни уларнинг розилиги билан аудио ёки видеоёзувга олиш, шу жумладан ёзишмаларни ёзиб бориш ҳамда ушбу маълумотларнинг камида беш йил давомида сақлаш;

букмекерлик гаровларида иштирок этиш хавфлари, шу жумладан киритилган маблағларни тўлиқ (қисман) йўқотиш ҳақида огоҳлантириш;

ўйинга кириши тақиқланган (чекланган) Ўзбекистон Республикаси фуқароларининг тоифалари ва чет эл давлатлари (юрисдикциялар) резидентлари рўйхатини келтириш;

шахсга доир маълумотларни ҳимоя қилиш ва улардан фойдаланиш талабларига риоя қилиш;

рағбатлантириш чораларини амалга ошириш;

қонунчилик ҳужжатлари, мазкур Низом ва ташкилотчининг ички ҳужжатларида назарда тутилган бошқа шартларни белгилаш.

9. Ўйинчиларни рақамли (масофадан) идентификация қилиш Вазирлар Маҳкамасининг 2024 йил 6 декабрдаги 814-сон қарори билан тасдиқланган Интернет бутунжаҳон ахборот тармоғида таваккалчиликка асосланган ўйинларни, лотереялар ва букмекерлик фаолиятини ташкил этиш фаолияти ташкилотчиларининг мижозларини рақамли (масофадан) идентификация қилиш тўғрисидаги низомга мувофиқ амалга оширилади.

10. Ташкилотчи вояга етмаган шахслар ва қуйидаги рўйхатларга киритилган шахслар билан муносабатлар ўрнатишга ҳақли эмас:

Терроризмга, оммавий қирғин қуролини тарқатишга қарши курашишни амалга оширувчи давлат органлари ва Ўзбекистон Республикасининг бошқа ваколатли органларидан тақдим этилаётган маълумотлар, шунингдек чет давлатларнинг ваколатли органлари ва халқаро ташкилотларидан расмий каналлар орқали тақдим этилаётган маълумотлар асосида махсус ваколатли давлат органи томонидан тузилган террорчилик фаолиятида ёки оммавий қирғин қуролини тарқатишда иштирок этаётган ёки иштирок этишда гумон қилинаётган шахслар рўйхати;

Интернет тармоғидаги таваккалчиликка асосланган ўйинлар, лотерея ва букмекерлик гаровларида қатнашиши тақиқланган Ўзбекистон Республикасининг фуқаролари ва чет эл фуқароларининг тоифалари рўйхати;

таваккалчиликка асосланган ўйинларга қарам бўлган шахслар рўйхати.

Ташкилотчи ички ҳужжатлари билан ўйинга кириши тақиқланган (чекланган) бошқа шахслар тоифаларини белгилашга ҳақли.

11. Муносабатлар ўрнатилиши натижасида ўйинчи учун электрон платформада қуйидагиларни назарда тутувчи шахсий кабинет (аккаунт) яратилади:

ўйинчининг аккаунтини бошқариш;

масъулиятли ўйин тамойили қоидалари ва тартиби билан таништириш ҳамда мазкур хизматни тақдим этиш;

Регистр орқали депозитларни киритиш, ютуқларни қабул қилиш ва маблағларни қайтариб олиш бўйича операцияларни амалга ошириш;

депозитлар, букмекерлик гаровлари ва бонусларни кузатиб бориш;

ташкилотчи билан ўзаро алоқа қилиш;

мурожаатларни юбориш ва улар бўйича жавобларни қабул қилиш.

Бир ўйинчига ташкилотчининг электрон платформасида икки ва ундан ортиқ шахсий кабинет (аккаунт) яратиш тақиқланади.

12. Ташкилотчи мазкур Низом ва ички ҳужжатларга мувофиқ манипуляция қилиш ҳамда инсайдер ахборотларни аниқлаш, олдини олиш, тўхтатиш ва уларнинг оқибатларини бартараф этишга қаратилган чораларни кўриши шарт.

Инсайдер ахборотга эга бўлган шахсларга куйидагилар киради:

ташкилотнинг бошқарув органлари аъзолари ва бошқа ходимлари;

электрон платформанинг ишлаб чиқарувчилари ва (ёки) ҳодисалар қатори (рўйхати)ни етказиб берувчилар;

ўзининг хизмат мавқеи, меҳнат мажбуриятлари ёки ташкилотчи билан тузилган фуқаролик-ҳуқуқий шартномалар асосида мазкур маълумотга эга бўлган бошқа шахслар.

3-боб. Букмекерлик гаровини тузиш

13. Ташкилотчи ўз электрон платформаси орқали қонунчилик, ташкилотчи ва Регистр операторининг ички ҳужжатлари талабларига мувофиқ ўйинчига букмекерлик гаровларига (ставкаларига) кириш имкониятини тақдим этади.

Электрон платформага кириш шартнома асосида тақдим этилади.

Ўйинчи томонидан мазкур Низом, шартнома ёки ички ҳужжатлар билан белгиланган талаблар ва шартлар бузилган тақдирда, ташкилотчи томонидан ушбу ўйинчи бундай бузилиш аниқланган пайтдан бошлаб уч ойга четлаштирилади.

Ўйинчини электрон платформага киритиш ва (ёки) уни четлатиш тартиби ташкилотчининг ички ҳужжатлари билан белгиланади.

14. Ташкилотчи электрон платформада қуйидагиларни назарда тутувчи ҳодисалар қатори (рўйхати)ни жойлаштиради:

а) букмекерлик гаровлари (ставкалари)нинг рўйхати;

б) ҳодисалар ҳақидаги умумий маълумотлар:

ҳодисанинг тўлиқ номи, тури (кўриниши) ва қисқача тавсифи;

ҳодиса бошланган сана ва вақт;

ҳодиса ўтказиладиган жой ва (ёки) ҳодисанинг реал вақт режимида трансляция қилиш тўғрисидаги маълумотлар (агар мавжуд бўлса);

в) коэффициентлар ва букмекерлик гаровлари (ставкалар)ни қабул қилишнинг охирги муддати тўғрисидаги маълумотлар;

г) ҳодисаларнинг натижалари тўғрисидаги маълумотлар;

д) букмекерлик гаровларини тузиш қоидалари;

е) қонунчилик ҳужжатлари, ушбу Низом ва ички ҳужжатлар билан тақиқланмаган бошқа маълумотлар.

15. Ҳодисаларнинг коэффициентларига ўзгартириш киритиш шартнома шартлари ва (ёки) ташкилотчининг ички ҳужжатларига мувофиқ амалга оширилади.

Коэффициент букмекерлик гаровини тузиш вақтида қайд этилади ва қабул қилинганлиги тасдиқлангандан кейин ўзгартирилмайди.

16. Ўйинчиларни букмекерлик гаровларини амалга оширишга ундайдиган, ҳодисаларнинг самарадорлиги (даромади) ҳақидаги ваъда ва (ёки) кафолатларни ўз ичига олган ҳодисаларнинг прогнозларини эълон қилишга йўл қўйилмайди.

17. Ўйинчи ҳодисани танлайди, букмекерлик гарови (ставкаси) миқдорини белгилайди ва букмекерлик гаровида иштирок этишини тасдиқлайди ҳамда пул маблағларини Регистр операторининг ҳисоб-китоб-клиринг палатасига ўтказади.

18. Ташкилотчи букмекерлик гарови тузилган сана, вақт, коэффициент ва ягона гаров идентификатори белгиланишини таъминлаганидан сўнг букмекерлик гарови қабул қилинган ҳисобланади.

19. Ташкилотчининг ички ҳужжатлари ва (ёки) шартнома шартларида белгиланган тақдирда, ўйинчи букмекерлик гаровини тузишнинг охирги муддатидан олдин букмекерлик гаровини бекор қилишга ҳақли.

Букмекерлик гарови бекор қилинган тақдирда, ташкилотчи уни алоҳида қайд этилишини ва гаров суммасини ўйинчининг балансига қайтарилишини таъминлайди.

20. Ташкилотчи:

ҳодиса бекор қилинганда, гаров суммасини ўйинчининг балансига қайтаради;

ҳодисани ўтказиш муддати кўчирилганида, ўйинчига гаровни ўтказиш ёки гаров суммасини унинг балансига қайтариш имкониятини тақдим этади.

21. Ютуқ ҳодиса натижаси аниқланганидан сўнг автоматик равишда ҳисобланади ва дарҳол ўйинчига ўтказилади.

4-боб. Масъулиятли ўйин тамойилини амалга ошириш

22. Букмекерлик гаровларида иштирок этишнинг салбий таъсирини камайтириш мақсадида ташкилотчи:

масъулиятли ўйин тамойилига амал қилиши;

қимор ва таваккалчиликка асосланган бошқа ўйинларда иштирок этиш билан боғлиқ бўлган хавф-хатарлар ҳақида мунтазам равишда маълумот бериш ва хабардор қилиши;

ўйинчининг Интернет тармоғидаги таваккалчиликка асосланган ўйинлар, лотерея ва букмекерлик гаровларида қатнашиши тақиқланган Ўзбекистон Республикасининг фуқаролари ва чет эл фуқароларининг тоифалари рўйхатига киритилганлиги тўғрисида хабарнома олинганда, хабарномада кўрсатилган сана ва вақтдан бошлаб ушбу ўйинчи билан битимлар тузишни тўхтатиши;

букмекерлик гаровларида иштирок этиш билан боғлиқ салбий оқибатларни камайтириш бўйича бошқа ҳаракатларни амалга ошириши керак.

5-боб. Электрон платформада жойлаштириладиган маълумотлар

23. Ташкилотчининг электрон платформасида:

ташкилотчи ҳақидаги умумий маълумотлар, шу жумладан юридик шахс тўғрисидаги маълумотлар, унинг жойлашган манзили, телефон рақами ва электрон почта манзили;

лицензия нусхаси;

ўйинчининг букмекерлик гаровларида иштирок этиши, ютуқларни тўлаш тартиби ва муддатларини белгиловчи ички ҳужжатлар;

вояга етмаган шахсларнинг букмекерлик гаровларида иштирок этиши тақиқланганлиги ҳақидаги огоҳлантиришлар;

букмекерлик гаровларида иштирок этиш билан боғлиқ хавфлар ҳақидаги маълумотлар;

қонунчиликда белгиланган бошқа маълумотлар жойлаштирилиши керак.

6-боб. Якуний қоида

24. Мазкур Низом талабларининг бузилишида айбдор бўлган шахслар қонунчиликда белгиланган тартибда жавобгар бўладилар.

Директор Д. ЛИ

Тошкент ш.,

2025 йил 25 июнь,

16-сон

(Қонунчилик маълумотлари миллий базаси, 08.07.2025 й., 10/25/3640/0579-сон)

lex.uz

Oʻzbekiston Respublikasi Istiqbolli loyihalar milliy agentligi direktorining

buyrugʻi

NIZOM

Bukmekerlik faoliyatini tashkil etish va amalga oshirish tartibi toʻgʻrisidagi nizomni tasdiqlash haqida

Oʻzbekiston Respublikasining “Litsenziyalash, ruxsat berish va xabardor qilish tartib-taomillari toʻgʻrisida”gi Qonuni , Oʻzbekiston Respublikasi Prezidentining 2024-yil 19-apreldagi PF-68-son “Lotereyalar va tavakkalchilikka asoslangan oʻyinlarni tashkil etish va oʻtkazishni tartibga solishni takomillashtirish chora-tadbirlari toʻgʻrisida”gi Farmoni va Oʻzbekiston Respublikasi Vazirlar Mahkamasining 2024-yil 6-dekabrdagi 814-son “Oʻzbekiston Respublikasi Prezidentining “Lotereyalar va tavakkalchilikka asoslangan oʻyinlarni tashkil etish va oʻtkazishni tartibga solishni takomillashtirish chora-tadbirlari toʻgʻrisida” 2024-yil 19-apreldagi PF-68-son Farmoni ijrosini taʼminlash chora-tadbirlari toʻgʻrisida”gi qaroriga muvofiq buyuraman:

1. Bukmekerlik faoliyatini tashkil etish va amalga oshirish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Oʻzbekiston Respublikasi Istiqbolli loyihalar milliy agentligi direktorining 2025-yil 25-iyundagi 16-son buyrugʻiga ILOVA

Bukmekerlik faoliyatini tashkil etish va amalga oshirish tartibi toʻgʻrisidagi

Mazkur Nizom bukmekerlik faoliyatini tashkil etish va amalga oshirish tartibini belgilaydi.

1-bob. Umumiy qoidalar

1. Ushbu Nizomda quyidagi asosiy tushunchalar qoʻllaniladi:

bukmekerlik faoliyati — bukmekerlik garovlarini tuzish va oʻtkazish faoliyati;

bukmekerlik garovi — bukmekerlik faoliyati tashkilotchisi va oʻyinchi oʻrtasida maʼlum bir hodisa (sport musobaqasi, tanlov, tabiat hodisasi va boshqalar) sodir boʻlishi toʻgʻrisidagi kelishuvni oʻz ichiga olgan tavakkalchilikka asoslangan oʻyin turi boʻlib, unda yutuqning hajmi (miqdori) oʻyinchining oldindan tuzilgan koʻrsatkich boʻyicha aniq bir voqeaning haqiqiy natijasiga mos keladigan bashorati natijasida aniqlanadi;

kelishilgan oʻyinlar — natijasi oldindan belgilab qoʻyilgan va ishtirokchilar oʻrtasida kelishib olingan sport tadbiri (musobaqasi);

insayder axborot — ommaga ochiq boʻlmagan va unga ega boʻlganlarni boshqa oʻyinchilar bilan solishtirganda afzal holatga qoʻyadigan maʼlumot;

koeffitsiyent — bukmekerlik faoliyati tashkilotchisi tomonidan hodisaning har bir natijasi uchun belgilanadigan va oʻyinchining potensial yutuqlari miqdorini aniqlaydigan raqamli koʻrsatkich;

hodisalar qatori (roʻyxati) — bukmekerlik faoliyati tashkilotchisi tomonidan uning elektron platformasida joylashtiriladigan, bukmekerlik garovini tuzish mumkin boʻlgan hodisalarning natijalari va belgilangan koeffitsiyentlarni koʻrsatuvchi tizimlashtirilgan roʻyxat;

bukmekerlik garovlari haqidagi maʼlumotlarni manipulyatsiya qilish (bundan buyon matnda manipulyatsiya qilish deb yuritiladi) — oʻyinchilarning xatti-harakatlariga (hodisalar) taʼsir koʻrsatadigan, shuningdek hodisalarning natijasi boʻyicha chalgʻituvchi harakatlarni amalga oshirish;

bukmekerlik faoliyati tashkilotchisi (bundan buyon matnda tashkilotchi deb yuritiladi) — bukmekerlik faoliyatini amalga oshirish uchun litsenziya olgan Oʻzbekiston Respublikasining rezidenti boʻlgan yuridik shaxs;

tashkilotchining elektron platformasi (bundan buyon matnda elektron platforma deb yuritiladi) — tashkilotchining Stavkalar va oʻyinchilarning yagona davlat registri bilan integratsiya qilingan quyidagilar amalga oshiriladigan axborot tizimi va (yoki) dasturiy-apparat majmuasi:

oʻyinchini raqamli (masofadan) identifikatsiya qilish;

oʻyinchining shaxsiy kabinetini yaratish;

bukmekerlik garovlarini qabul qilish va roʻyxatdan oʻtkazish;

Stavkalar va oʻyinchilarning yagona davlat registri (bundan buyon matnda Registr deb yuritiladi) orqali depozitni qabul qilishni, bitimlar boʻyicha yutuqlarni hisoblashni va toʻlashni qayd etish;

bukmekerlik garovi natijasini aniqlash;

bukmekerlik garoviga kirishni taʼminlash;

oʻyinchiga bukmekerlik garovlari va hodisalar haqida maʼlumot berish hamda uni xabardor qilish;

tashkilotchining faoliyati toʻgʻrisida hisobotlarni tayyorlash va shakllantirish;

bukmekerlik garovlarini tuzish va bajarish uchun zarur boʻlgan maʼlumotlarni saqlash, qayta ishlash va oshkor qilish;

tashkilotchining faoliyati bilan bogʻliq boshqa funksiyalarni bajarish;

vakolatli organ — Oʻzbekiston Respublikasi Istiqbolli loyihalar milliy agentligi.

2. Tashkilotchi oʻz faoliyatini faqat tegishli litsenziya asosida va litsenziyada koʻrsatilgan domen nomi orqali amalga oshirishi mumkin.

3. Tashkilotchi:

oʻz faoliyatini qonunchilik talablariga muvofiq amalga oshirish;

elektron platformaning zarur darajada ishlashini va kiberxavfsizligini taʼminlash, shuningdek mazkur elektron platformani himoya qilish va unga ruxsatsiz kirishning oldini olish choralarini koʻrish;

oʻz faoliyatini amalga oshirish uchun Registr bilan integratsiya qilishni taʼminlash;

oʻyinchilarning murojaatlarini va Registr operatorining soʻrovlarini qabul qilish, koʻrib chiqish va ularga javob berish;

oʻyinchilarga ular majburiy raqamli (masofadan) identifikatsiyadan oʻtganidan hamda Internet tarmogʻidagi oʻyinlar, lotereyalar tashkil etish va bukmekerlik faoliyati sohasidagi qonunchilikka muvofiq boshqa choralar qoʻllanilganidan soʻng bukmekerlik garovlarini tuzishga ruxsat berish;

elektron platforma faoliyati bilan bogʻliq xavflarni baholash va xavfsizlik auditini muntazam ravishda oʻtkazish;

barcha operatsiyalar, shu jumladan identifikatsiya maʼlumotlari, oʻyinchilar bilan amalga oshirilgan oʻzaro munosabatlar haqidagi maʼlumotlarni besh yil davomida saqlash;

Internet tarmogʻidagi oʻyinlar, lotereyalar tashkil etish va bukmekerlik faoliyati sohasidagi qonunchilikda belgilangan reklama talablariga rioya qilish;

tashkilotchining xodimlari va ular tomonidan fuqarolik-huquqiy shartnomalar asosida bevosita bukmekerlik faoliyatini amalga oshirish uchun jalb qilingan shaxslarning Internet tarmogʻidagi oʻyinlar, lotereyalar tashkil etish va bukmekerlik faoliyatini tartibga soluvchi, jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish sohasidagi qonunchilik hujjatlari va tashkilotchi tomonidan tasdiqlanadigan ichki hujjatlarini bilish darajasini doimiy oshirib borish;

elektron platformaga Registr operatorining ichki hujjatlari bilan belgilangan talablarga muvofiq oʻzgartirishlar kiritishga majbur.

Tashkilotchi zimmasiga qonunchilikka muvofiq boshqa majburiyatlar ham yuklatilishi mumkin.

4. Tashkilotchi:

koʻrsatiladigan xizmatlar uchun mukofot olish;

oʻyinchi tomonidan qonunchilik yoki tashkilotchining ichki hujjatlari talablari buzilganligi aniqlangan taqdirda, uni raqamli (masofadan) identifikatsiya qilishni rad etish, u bilan oʻzaro munosabatlarni tugatish va (yoki) uning elektron platformaga kirishini cheklash;

Registr operatoriga va (yoki) vakolatli organga soʻrovlar yuborish va ular yuzasidan tushuntirishlar olish huquqiga ega.

Tashkilotchi qonunchilikka muvofiq boshqa huquqlarga ham ega boʻlishi mumkin.

5. Tashkilotchi quyidagilarni nazarda tutuvchi ichki hujjatlarni ishlab chiqishi va tasdiqlashi kerak:

oʻyinchilarni raqamli (masofadan) identifikatsiya qilish tartibi;

oʻyinchi bilan munosabatlar oʻrnatish, shuningdek uni elektron platformaga kiritish (chiqarish) tartibi;

bukmekerlik garovlarini tuzish va oʻtkazish tartibi;

yutuqlarni toʻlash va pul mablagʻlarini qaytarish tartibi;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish boʻyicha ichki nazorat qoidalari;

masʼuliyatli oʻyin tamoyili qoidalari va tartibi;

oʻyinchilarning murojaatlarini koʻrib chiqish tartibi.

Ichki hujjatlar davlat tilida ishlab chiqilishi va tashkilotchining rahbari tomonidan imzolanishi (tasdiqlanishi) kerak.

Ichki hujjatlar boshqa tillarda ham qabul qilinishi mumkin.

6. Tashkilotchi elektron platformada amalga oshirilayotgan operatsiyalarni doimiy ravishda nazorat qiladi.

Tashkilotchi tomonidan qonunchilik, mazkur Nizom va ichki hujjatlar talablari buzilganligi aniqlangan taqdirda, ularni bartaraf etish va kelgusida yoʻl qoʻymaslik choralari koʻrilishi kerak.

Qonunchilik, mazkur Nizom va ichki hujjatlar talablari buzilishining har bir fakti toʻgʻrisidagi maʼlumot tashkilotchi tomonidan ushbu fakt aniqlangan kundan boshlab kamida 5 yil davomida saqlanishi kerak.

Vakolatli organ va (yoki) Registr operatorining soʻrovlariga binoan tashkilotchi tegishli soʻrov olingan kundan boshlab besh ish kunidan kechiktirmasdan vakolatli organ va (yoki) Registr operatoriga maʼlumotni taqdim etishi shart.

Jinoyat alomatlari aniqlangan taqdirda, tashkilotchi darhol Registr operatoriga va huquqni muhofaza qiluvchi organlarga qonunchilik hujjatlariga muvofiq yozma va (yoki) elektron shaklda xabar berishga majbur.

7. Tashkilotchiga:

a) litsenziyada koʻrsatilmagan domen nomi orqali oʻz xizmatlarini koʻrsatish;

b) bukmekerlik garovlarini quyidagi boʻyicha tuzish va (yoki) oʻtkazish:

kelishilgan oʻyinlar;

Oʻzbekiston Respublikasining hududida va Oʻzbekiston Respublikasi fuqarolari ishtirokida hodisalarga (sport oʻyinlari (shu jumladan kibersport) va musobaqalari, siyosiy jarayonlar, tanlovlar va boshqalar), bundan xalqaro federatsiyalar qoidalar asosida tegishli darajada tayyorgarlik, nazorat va hakamlikni taʼminlangan holda, tomoshabinlar ishtirokida oʻtkaziladigan sport oʻyinlari va xalqaro darajadagi hodisalar mustasno;

bolalar va oʻsmirlar sport musobaqalari;

lotereya oʻyinlari natijalari;

v) aylanmasi litsenziyalash, ruxsat berish va (yoki) xabardor qilish tartib-qoidalari talab qilinadigan tovarlarni (ishlarni, xizmatlarni) yutuq sifatida yoki yutuqni toʻlash evaziga taklif qilish;

g) lotereyalar va (yoki) Internet tarmogʻidagi oʻyinlarning belgilariga ega boʻlgan hodisalar va (yoki) oʻyinlar boʻyicha bitimlar tuzish;

d) oʻyinchilarga kredit, boʻlib toʻlash va (yoki) qarz mablagʻlari taqdim etish orqali, shu jumladan uchinchi shaxslarning mablagʻlaridan foydalangan holda keyinchalik toʻlash sharti bilan bitimlarni tuzish va (yoki) taklif etish;

e) depozitlarni qabul qilish, bitimlarni tuzish va yutuqlarni toʻlashda qonunchilik va Registr operatorining ichki hujjatlari bilan taqiqlangan naqd shakldagi va (yoki) boshqa shakllardagi pul mablagʻlaridan foydalanish taqiqlanadi.

2-bob. Oʻyinchi bilan munosabatlarni oʻrnatish tartibi

8. Tashkilotchi oʻyinchilar bilan munosabatlarni shartnoma asosida oʻrnatadi.

Shartnomada quyidagi shartlar nazarda tutilishi kerak:

mazkur Nizomning 6-bandida nazarda tutilgan maʼlumotlarni vakolatli organ va (yoki) Registr operatoriga taqdim etish;

oʻyinchilar bilan muzokaralarni ularning roziligi bilan audio yoki videoyozuvga olish, shu jumladan yozishmalarni yozib borish hamda ushbu maʼlumotlarning kamida besh yil davomida saqlash;

bukmekerlik garovlarida ishtirok etish xavflari, shu jumladan kiritilgan mablagʻlarni toʻliq (qisman) yoʻqotish haqida ogohlantirish;

oʻyinga kirishi taqiqlangan (cheklangan) Oʻzbekiston Respublikasi fuqarolarining toifalari va chet el davlatlari (yurisdiksiyalar) rezidentlari roʻyxatini keltirish;

shaxsga doir maʼlumotlarni himoya qilish va ulardan foydalanish talablariga rioya qilish;

ragʻbatlantirish choralarini amalga oshirish;

qonunchilik hujjatlari, mazkur Nizom va tashkilotchining ichki hujjatlarida nazarda tutilgan boshqa shartlarni belgilash.

9. Oʻyinchilarni raqamli (masofadan) identifikatsiya qilish Vazirlar Mahkamasining 2024-yil 6-dekabrdagi 814-son qarori bilan tasdiqlangan Internet butunjahon axborot tarmogʻida tavakkalchilikka asoslangan oʻyinlarni, lotereyalar va bukmekerlik faoliyatini tashkil etish faoliyati tashkilotchilarining mijozlarini raqamli (masofadan) identifikatsiya qilish toʻgʻrisidagi nizomga muvofiq amalga oshiriladi.

10. Tashkilotchi voyaga yetmagan shaxslar va quyidagi roʻyxatlarga kiritilgan shaxslar bilan munosabatlar oʻrnatishga haqli emas:

Terrorizmga, ommaviy qirgʻin qurolini tarqatishga qarshi kurashishni amalga oshiruvchi davlat organlari va Oʻzbekiston Respublikasining boshqa vakolatli organlaridan taqdim etilayotgan maʼlumotlar, shuningdek chet davlatlarning vakolatli organlari va xalqaro tashkilotlaridan rasmiy kanallar orqali taqdim etilayotgan maʼlumotlar asosida maxsus vakolatli davlat organi tomonidan tuzilgan terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxati;

Internet tarmogʻidagi tavakkalchilikka asoslangan oʻyinlar, lotereya va bukmekerlik garovlarida qatnashishi taqiqlangan Oʻzbekiston Respublikasining fuqarolari va chet el fuqarolarining toifalari roʻyxati;

tavakkalchilikka asoslangan oʻyinlarga qaram boʻlgan shaxslar roʻyxati.

Tashkilotchi ichki hujjatlari bilan oʻyinga kirishi taqiqlangan (cheklangan) boshqa shaxslar toifalarini belgilashga haqli.

11. Munosabatlar oʻrnatilishi natijasida oʻyinchi uchun elektron platformada quyidagilarni nazarda tutuvchi shaxsiy kabinet (akkaunt) yaratiladi:

oʻyinchining akkauntini boshqarish;

masʼuliyatli oʻyin tamoyili qoidalari va tartibi bilan tanishtirish hamda mazkur xizmatni taqdim etish;

Registr orqali depozitlarni kiritish, yutuqlarni qabul qilish va mablagʻlarni qaytarib olish boʻyicha operatsiyalarni amalga oshirish;

depozitlar, bukmekerlik garovlari va bonuslarni kuzatib borish;

tashkilotchi bilan oʻzaro aloqa qilish;

murojaatlarni yuborish va ular boʻyicha javoblarni qabul qilish.

Bir oʻyinchiga tashkilotchining elektron platformasida ikki va undan ortiq shaxsiy kabinet (akkaunt) yaratish taqiqlanadi.

12. Tashkilotchi mazkur Nizom va ichki hujjatlarga muvofiq manipulyatsiya qilish hamda insayder axborotlarni aniqlash, oldini olish, toʻxtatish va ularning oqibatlarini bartaraf etishga qaratilgan choralarni koʻrishi shart.

Insayder axborotga ega boʻlgan shaxslarga kuyidagilar kiradi:

tashkilotning boshqaruv organlari aʼzolari va boshqa xodimlari;

elektron platformaning ishlab chiqaruvchilari va (yoki) hodisalar qatori (roʻyxati)ni yetkazib beruvchilar;

oʻzining xizmat mavqeyi, mehnat majburiyatlari yoki tashkilotchi bilan tuzilgan fuqarolik-huquqiy shartnomalar asosida mazkur maʼlumotga ega boʻlgan boshqa shaxslar.

3-bob. Bukmekerlik garovini tuzish

13. Tashkilotchi oʻz elektron platformasi orqali qonunchilik, tashkilotchi va Registr operatorining ichki hujjatlari talablariga muvofiq oʻyinchiga bukmekerlik garovlariga (stavkalariga) kirish imkoniyatini taqdim etadi.

Elektron platformaga kirish shartnoma asosida taqdim etiladi.

Oʻyinchi tomonidan mazkur Nizom, shartnoma yoki ichki hujjatlar bilan belgilangan talablar va shartlar buzilgan taqdirda, tashkilotchi tomonidan ushbu oʻyinchi bunday buzilish aniqlangan paytdan boshlab uch oyga chetlashtiriladi.

Oʻyinchini elektron platformaga kiritish va (yoki) uni chetlatish tartibi tashkilotchining ichki hujjatlari bilan belgilanadi.

14. Tashkilotchi elektron platformada quyidagilarni nazarda tutuvchi hodisalar qatori (roʻyxati)ni joylashtiradi:

a) bukmekerlik garovlari (stavkalari)ning roʻyxati;

b) hodisalar haqidagi umumiy maʼlumotlar:

hodisaning toʻliq nomi, turi (koʻrinishi) va qisqacha tavsifi;

hodisa boshlangan sana va vaqt;

hodisa oʻtkaziladigan joy va (yoki) hodisaning real vaqt rejimida translyatsiya qilish toʻgʻrisidagi maʼlumotlar (agar mavjud boʻlsa);

v) koeffitsiyentlar va bukmekerlik garovlari (stavkalar)ni qabul qilishning oxirgi muddati toʻgʻrisidagi maʼlumotlar;

g) hodisalarning natijalari toʻgʻrisidagi maʼlumotlar;

d) bukmekerlik garovlarini tuzish qoidalari;

e) qonunchilik hujjatlari, ushbu Nizom va ichki hujjatlar bilan taqiqlanmagan boshqa maʼlumotlar.

15. Hodisalarning koeffitsiyentlariga oʻzgartirish kiritish shartnoma shartlari va (yoki) tashkilotchining ichki hujjatlariga muvofiq amalga oshiriladi.

Koeffitsiyent bukmekerlik garovini tuzish vaqtida qayd etiladi va qabul qilinganligi tasdiqlangandan keyin oʻzgartirilmaydi.

16. Oʻyinchilarni bukmekerlik garovlarini amalga oshirishga undaydigan, hodisalarning samaradorligi (daromadi) haqidagi vaʼda va (yoki) kafolatlarni oʻz ichiga olgan hodisalarning prognozlarini eʼlon qilishga yoʻl qoʻyilmaydi.

17. Oʻyinchi hodisani tanlaydi, bukmekerlik garovi (stavkasi) miqdorini belgilaydi va bukmekerlik garovida ishtirok etishini tasdiqlaydi hamda pul mablagʻlarini Registr operatorining hisob-kitob-kliring palatasiga oʻtkazadi.

18. Tashkilotchi bukmekerlik garovi tuzilgan sana, vaqt, koeffitsiyent va yagona garov identifikatori belgilanishini taʼminlaganidan soʻng bukmekerlik garovi qabul qilingan hisoblanadi.

19. Tashkilotchining ichki hujjatlari va (yoki) shartnoma shartlarida belgilangan taqdirda, oʻyinchi bukmekerlik garovini tuzishning oxirgi muddatidan oldin bukmekerlik garovini bekor qilishga haqli.

Bukmekerlik garovi bekor qilingan taqdirda, tashkilotchi uni alohida qayd etilishini va garov summasini oʻyinchining balansiga qaytarilishini taʼminlaydi.

20. Tashkilotchi:

hodisa bekor qilinganda, garov summasini oʻyinchining balansiga qaytaradi;

hodisani oʻtkazish muddati koʻchirilganida, oʻyinchiga garovni oʻtkazish yoki garov summasini uning balansiga qaytarish imkoniyatini taqdim etadi.

21. Yutuq hodisa natijasi aniqlanganidan soʻng avtomatik ravishda hisoblanadi va darhol oʻyinchiga oʻtkaziladi.

4-bob. Masʼuliyatli oʻyin tamoyilini amalga oshirish

22. Bukmekerlik garovlarida ishtirok etishning salbiy taʼsirini kamaytirish maqsadida tashkilotchi:

masʼuliyatli oʻyin tamoyiliga amal qilishi;

qimor va tavakkalchilikka asoslangan boshqa oʻyinlarda ishtirok etish bilan bogʻliq boʻlgan xavf-xatarlar haqida muntazam ravishda maʼlumot berish va xabardor qilishi;

oʻyinchining Internet tarmogʻidagi tavakkalchilikka asoslangan oʻyinlar, lotereya va bukmekerlik garovlarida qatnashishi taqiqlangan Oʻzbekiston Respublikasining fuqarolari va chet el fuqarolarining toifalari roʻyxatiga kiritilganligi toʻgʻrisida xabarnoma olinganda, xabarnomada koʻrsatilgan sana va vaqtdan boshlab ushbu oʻyinchi bilan bitimlar tuzishni toʻxtatishi;

bukmekerlik garovlarida ishtirok etish bilan bogʻliq salbiy oqibatlarni kamaytirish boʻyicha boshqa harakatlarni amalga oshirishi kerak.

5-bob. Elektron platformada joylashtiriladigan maʼlumotlar

23. Tashkilotchining elektron platformasida:

tashkilotchi haqidagi umumiy maʼlumotlar, shu jumladan yuridik shaxs toʻgʻrisidagi maʼlumotlar, uning joylashgan manzili, telefon raqami va elektron pochta manzili;

litsenziya nusxasi;

oʻyinchining bukmekerlik garovlarida ishtirok etishi, yutuqlarni toʻlash tartibi va muddatlarini belgilovchi ichki hujjatlar;

voyaga yetmagan shaxslarning bukmekerlik garovlarida ishtirok etishi taqiqlanganligi haqidagi ogohlantirishlar;

bukmekerlik garovlarida ishtirok etish bilan bogʻliq xavflar haqidagi maʼlumotlar;

qonunchilikda belgilangan boshqa maʼlumotlar joylashtirilishi kerak.

6-bob. Yakuniy qoida

24. Mazkur Nizom talablarining buzilishida aybdor boʻlgan shaxslar qonunchilikda belgilangan tartibda javobgar boʻladilar.

Direktor D. LI

Toshkent sh.,

2025-yil 25-iyun,

16-son

(Qonunchilik maʼlumotlari milliy bazasi, 08.07.2025-y., 10/25/3640/0579-son)

lex.uz