UzbekAI

Ўзбекистон Республикасининг Қонуни

Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш тўғрисида

Қонунчилик палатаси томонидан 2024 йил 15 октябрда қабул қилинган Сенат томонидан 2025 йил 24 январда маъқулланган

1-боб. Умумий қоидалар

1-модда. Ушбу Қонуннинг мақсади

Ушбу Қонуннинг мақсади Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш билан боғлиқ муносабатларни тартибга солишдан иборат.

2-модда. Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш тўғрисидаги қонунчилик

Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш тўғрисидаги қонунчилик ушбу Қонун ва бошқа қонунчилик ҳужжатларидан иборатдир.

Агар Ўзбекистон Республикасининг халқаро шартномасида Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш тўғрисидаги Ўзбекистон Республикаси қонунчилигида назарда тутилганидан бошқача қоидалар белгиланган бўлса, халқаро шартнома қоидалари қўлланилади.

3-модда. Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш асослари

Ўзбекистон Республикаси фуқароларининг, шунингдек қонуний асосларда Ўзбекистон Республикаси ҳудудида бўлиб турган чет эл фуқароларининг ҳамда фуқаролиги бўлмаган шахсларнинг Ўзбекистон Республикаси бўйлаб эркин ҳаракатланишга, турар ва яшаш жойини танлашга доир конституциявий ҳуқуқини, бошқа ҳуқуқлари ва эркинликларини амалга ошириш учун зарур шарт-шароитларни, шунингдек улар томонидан бошқа шахслар, давлат ва жамият олдидаги мажбуриятлар бажарилишини таъминлаш мақсадида Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш (бундан буён матнда яшаш жойи ва турган жой бўйича рўйхатдан ўтказиш деб юритилади) амалга оширилади.

Яшаш жойи ва турган жой бўйича рўйхатдан ўтказиш рухсат этиш хусусиятига эга эмас.

Ўзбекистон Республикаси фуқароларининг, чет эл фуқароларининг ҳамда фуқаролиги бўлмаган шахсларнинг яшаш жойи ёки турган жойи бўйича рўйхатдан ўтмаганлиги, агар қонунчиликда бошқача қоида назарда тутилмаган бўлса, уларнинг ҳуқуқлари ва эркинликларини чеклаш учун асос бўлмайди.

4-модда. Яшаш жойи ва турган жой тушунчалари

Шахс мулкдор сифатида, ижара (иккиламчи ижара), текин фойдаланиш шартномаси бўйича ёки қонунчиликда назарда тутилган бошқа асосларга кўра доимий равишда (асосан) яшайдиган ҳамда ўзи яшаш жойи бўйича рўйхатдан ўтган уй, квартира, хизмат турар жойи, махсус уй (ётоқхона, вақтинчалик уй-жой фонди уйи ёки ногиронлар, фахрийлар, ёлғиз қариялар учун интернат-уй, шунингдек болалар уйи ёки бошқа махсус мақсадли уй) ёхуд бошқа турар жой яшаш жойидир.

Шахс қонунчиликда назарда тутилган асосларда вақтинча яшайдиган жойлаштириш воситаси, даволаш муассасаси ёки шахснинг яшаш жойи ҳисобланмайдиган турар жой турган жойдир.

Ўн тўрт ёшга тўлмаган вояга етмаган шахсларнинг ёки васийликдаги шахсларнинг қонуний вакиллари — тегишинча ота-оналари (ёлғиз отаси ёки онаси), фарзандликка олувчилари ёки васийлари яшайдиган жой мазкур вояга етмаган шахсларнинг ёки васийликдаги шахсларнинг яшаш жойи ҳисобланади.

Ўн тўрт ёшдан ўн олти ёшга қадар бўлган вояга етмаган шахсларнинг ёки ҳомийликдаги шахсларнинг қонуний вакиллари — тегишинча ота-оналари (ёлғиз отаси ёки онаси), фарзандликка олувчилари ёки ҳомийлари яшайдиган жой мазкур вояга етмаган шахсларнинг ёки ҳомийликдаги шахсларнинг яшаш жойи ҳисобланади.

5-модда. Асосий тушунчалар

Ушбу Қонунда қуйидаги асосий тушунчалар қўлланилади:

бола — ўн саккиз ёшга тўлгунга (вояга етгунга) қадар бўлган шахс;

васийликдаги ёки ҳомийликдаги бола (бундан буён матнда васийликдаги (ҳомийликдаги) бола деб юритилади) — ўзига нисбатан васийлик ёки ҳомийлик белгиланган бола;

даволаш муассасалари — санаторийлар, даволаш пансионатлари, давлат клиникалари ва хусусий клиникалар, шифохоналар, касалхоналар ва бошқа тиббиёт муассасалари;

ёлғиз ота ёки она — болани тарбиялаётган ота (она), башарти боланинг туғилганлиги тўғрисидаги расмий ҳужжатларда ота-онасидан бири ҳақидаги маълумотлар мавжуд бўлмаса ёхуд бундай маълумотлар болани тарбиялаётган отанинг (онанинг) сўзларига асосан киритилган бўлса;

жойлаштириш воситалари — меҳмонхоналар, туристик базалар ва мажмуалар, дам олиш уйлари ва зоналари, пансионатлар, кемпинглар, мотеллар, меҳмон уйлари, ўтов ва чодирли оромгоҳлар, санаторийлар ҳамда меҳмонхона хизматлари (жойлаштириш бўйича хизматлар) кўрсатиладиган бошқа объектлар;

идентификацияловчи ID-карта (бундан буён матнда идентификацияловчи карта деб юритилади) — Ўзбекистон Республикаси ҳудудида идентификацияловчи карта эгасининг шахсини ва фуқаролигини, яшаш жойи бўйича рўйхатдан ўтказилганлигини тасдиқлайдиган, эгасининг шахсига доир биографик ва биометрик маълумотлар киритилган электрон жисмга (чипга) эга бўлган, Ўзбекистон Республикаси фуқаросига, чет эл фуқаросига ёки фуқаролиги бўлмаган шахсга бериладиган ҳужжат;

турган жой бўйича рўйхатдан ўтказиш — Ўзбекистон Республикаси фуқаросининг, чет эл фуқаросининг ёки фуқаролиги бўлмаган шахснинг турган жойи тўғрисидаги маълумотларни белгиланган тартибда қайд этиш;

фуқаролиги бўлмаган шахс — Ўзбекистон Республикасининг фуқароси бўлмаган ва ўзининг чет давлат фуқаролигига мансублигига доир далилга эга бўлмаган шахс;

чет эл фуқароси — Ўзбекистон Республикасининг фуқаролигига эга бўлмаган, бошқа давлат фуқаролигига ва ўзининг бошқа давлат фуқаролигига мансублигига доир далилга эга бўлган шахс;

яшаш жойи бўйича рўйхатдан ўтказиш — Ўзбекистон Республикаси фуқаросининг, шунингдек Ўзбекистон Республикасида доимий яшовчи чет эл фуқаросининг ёки фуқаролиги бўлмаган шахснинг яшаш жойи тўғрисидаги маълумотларни белгиланган тартибда қайд этиш;

Ўзбекистон Республикасининг хорижда доимий яшовчи фуқароси — Ўзбекистон Республикасидаги яшаш жойи бўйича рўйхатдан ўтганлиги бекор қилинган ҳамда хорижга доимий яшаш учун чиқиб кетишга доир рухсатнома расмийлаштирган Ўзбекистон Республикаси фуқароси;

ҳаракатланиш ҳужжатлари — миллий паспортлар, шунингдек уларнинг ўрнини босувчи бошқа ҳужжатлар бўлиб, улар асосида чет эл фуқаролари ва фуқаролиги бўлмаган шахслар Ўзбекистон Республикасининг қонунчилигига ҳамда халқаро шартномаларига мувофиқ Ўзбекистон Республикаси ҳудудига кириш (ундан чиқиш) ва унинг ҳудудида бўлиш ҳуқуқига эга бўлади;

«Е-mehmon» автоматлаштирилган ахборот тизими (бундан буён матнда «Е-mehmon» тизими деб юритилади) — жойлаштириш воситаларида ва даволаш муассасаларида фойдаланиладиган, жойлаштириш воситаларида яшовчи ёки даволаш муассасаларида стационар шароитда даволанаётган шахсларни турган жойи бўйича хабардор қилиш тартибида рўйхатдан ўтказишни амалга ошириш учун мўлжалланган автоматлаштирилган ахборот тизими;

«Е-xabar berish» автоматлаштирилган ахборот тизими (бундан буён матнда «E-xabar berish» тизими деб юритилади) — шахсларни турган жойи бўйича хабардор қилиш тартибида рўйхатдан ўтказишни амалга ошириш учун мўлжалланган автоматлаштирилган ахборот тизими;

«Manzil» автоматлаштирилган ахборот тизими (бундан буён матнда «Manzil» тизими деб юритилади) — шахсларни яшаш жойи бўйича рўйхатдан ўтказишни амалга ошириш учун мўлжалланган автоматлаштирилган ахборот тизими.

6-модда. Яшаш жойи ва турган жой бўйича рўйхатдан ўтказишнинг асосий қоидалари

Ўзбекистон Республикаси фуқаролари, чет эл фуқаролари ва фуқаролиги бўлмаган шахслар яшаш жойи ва турган жойи бўйича рўйхатдан ўтиши шарт.

Шахсларнинг яшаши учун уй-жой майдонини берувчи турар жой мулкдори ёки турар жойни тасарруф этиш ҳуқуқига эга бўлган шахс ушбу шахсларни яшаш жойи ёки турган жойи бўйича ўз вақтида рўйхатдан ўтказиши керак.

Жойлаштириш воситаларида турган шахсларни турган жойи бўйича хабардор қилиш тартибида рўйхатдан ўтказиш жойлаштириш воситаларининг масъул ходимлари томонидан «E-mehmon» тизими орқали амалга оширилади.

Даволаш муассасаларида стационар шароитда даволанаётган шахсларни турган жойи бўйича хабардор қилиш тартибида рўйхатдан ўтказиш ушбу муассасаларнинг масъул ходимлари томонидан «E-mehmon» тизими орқали амалга оширилади.

ФҲДЁ органи томонидан боланинг туғилганлик ҳақидаги далолатнома ёзувини «ФҲДЁнинг ягона электрон архиви» ахборот тизимида рўйхатдан ўтказиш чоғида ушбу маълумотлар мазкур ахборот тизими орқали ота-онасининг (ёлғиз отасининг ёки онасининг) яшаш жойига мувофиқ болани яшаш жойи бўйича рўйхатдан ўтказиш учун автоматик равишда «Manzil» тизимига бир вақтнинг ўзида келиб тушади.

Ўн олти ёшга тўлмаган болани яшаш жойи (турган жойи) бўйича рўйхатдан ўтказиш унинг ота-онасининг (ёлғиз отасининг ёки онасининг), тутинган ота-онасининг ёки васийсининг (ҳомийсининг) аризасига асосан уларнинг яшаш жойи (турган жойи) бўйича амалга оширилади.

Тарбия, даволаш муассасаларида ва бошқа муассасаларда турган етим болалар, ота-она қарамоғидан маҳрум бўлган болалар, шунингдек қариялар уйларидаги шахсларни яшаш жойи бўйича рўйхатдан ўтказиш тегишинча тарбия, даволаш муассасалари ва бошқа муассасалар, шунингдек қариялар уйлари раҳбарларининг хатларига асосан ички ишлар органларининг миграция ва фуқароликни расмийлаштириш бўлинмалари томонидан амалга оширилади.

Жазони ижро этиш муассасаларига жазони ўташ учун келтирилган шахсларни турган жойи бўйича рўйхатдан ўтказиш жазони ижро этиш муассасалари раҳбарларининг хатларига асосан ички ишлар органларининг миграция ва фуқароликни расмийлаштириш бўлинмалари томонидан амалга оширилади.

Ўзбекистон Республикаси фуқароларини, чет эл фуқароларини ва фуқаролиги бўлмаган шахсларни яшаш жойи ва турган жойи бўйича рўйхатдан ўтказганлик учун «Давлат божи тўғрисида»ги Ўзбекистон Республикаси Қонунида белгиланган миқдорда давлат божи ундирилади.

7-модда. Яшаш жойи ва турган жой бўйича рўйхатдан ўтиш зарур бўлган муддатлар

Ўзбекистон Республикаси фуқаролари, шунингдек Ўзбекистон Республикасида доимий яшовчи чет эл фуқаролари ва фуқаролиги бўлмаган шахслар ўз яшаш жойи ёки турган жойи ўзгарган тақдирда, янги яшаш жойига ёки турган жойига келган кундан эътиборан ўн иш кунидан кечиктирмай тегишинча яшаш жойи ёки турган жойи бўйича рўйхатдан ўтиши шарт.

Ўзбекистон Республикасининг хорижда доимий яшовчи фуқаролари Ўзбекистон Республикасига кирган кундан эътиборан ўн иш кунидан кечиктирмай яшаш жойи ёки турган жойи бўйича рўйхатдан ўтиши шарт.

Бошқа давлатлар ҳудудида доимий яшовчи чет эл фуқаролари ва фуқаролиги бўлмаган шахслар Ўзбекистон Республикасига кирган кундан эътиборан, агар Ўзбекистон Республикасининг халқаро шартномалари ёки қонунчилигида бошқача муддат назарда тутилмаган бўлса, уч иш кунидан кечиктирмай турган жойи бўйича рўйхатдан ўтиши шарт.

8-модда. Ўзбекистон Республикаси бўйлаб эркин ҳаракатланиш, турар ва яшаш жойини танлаш ҳуқуқи чекланган ҳудудлар

Ўзбекистон Республикаси қонунчилигига мувофиқ Ўзбекистон Республикасининг қуйидаги ҳудудларида Ўзбекистон Республикаси фуқароларининг, чет эл фуқароларининг ва фуқаролиги бўлмаган шахсларнинг Ўзбекистон Республикаси бўйлаб эркин ҳаракатланиш, турар ва яшаш жойини танлаш ҳуқуқи чекланиши мумкин:

чегара зонасида;

ёпиқ ҳарбий шаҳарчаларда;

ёпиқ маъмурий-ҳудудий тузилмаларда;

табиий ҳамда техноген хусусиятли фавқулодда вазиятлар рўй берган зоналарда, шунингдек фуқароларнинг ҳаёти, соғлиғи ва хавфсизлигига таҳдид соладиган бошқа жойларда;

юқумли касалликларнинг ҳамда юқумли бўлмаган оммавий касалликларнинг тарқалиши, одамларнинг заҳарланиш хавфи мавжуд бўлганлиги муносабати билан аҳолининг яшаши ҳамда хўжалик фаолияти учун алоҳида шартлар ва режимлар жорий этилган айрим ҳудудларда ҳамда аҳоли пунктларида;

ўта муҳим ва тоифаланган объектларда;

фавқулодда ёки ҳарбий ҳолат эълон қилинган ҳудудларда.

2-боб. Яшаш жойи ва турган жой бўйича рўйхатдан ўтказиш соҳасидаги давлат бошқаруви

9-модда. Ўзбекистон Республикаси Вазирлар Маҳкамасининг яшаш жойи ва турган жой бўйича рўйхатдан ўтказиш соҳасидаги ваколатлари

Ўзбекистон Республикаси Вазирлар Маҳкамаси:

яшаш жойи ва турган жой бўйича рўйхатдан ўтказиш соҳасида ягона давлат сиёсати амалга оширилишини таъминлайди;

яшаш жойи ва турган жой бўйича рўйхатдан ўтказиш соҳасидаги давлат дастурларининг ҳамда бошқа дастурларнинг ишлаб чиқилиши, тасдиқланиши ва рўёбга чиқарилишини таъминлайди;

Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш тўғрисидаги қонунчилик талабларига риоя этилиши устидан давлат назоратини амалга ошириш тартибини белгилайди;

яшаш жойи ва турган жой бўйича рўйхатдан ўтказиш соҳасидаги маъмурий регламентларни тасдиқлайди.

Ўзбекистон Республикаси Вазирлар Маҳкамаси қонунчиликка мувофиқ бошқа ваколатларни ҳам амалга ошириши мумкин.

10-модда. Ўзбекистон Республикаси Ички ишлар вазирлигининг яшаш жойи ва турган жой бўйича рўйхатдан ўтказиш соҳасидаги ваколатлари

Ўзбекистон Республикаси Ички ишлар вазирлиги:

яшаш жойи ва турган жой бўйича рўйхатдан ўтказиш соҳасидаги ягона давлат сиёсатини амалга оширади;

яшаш жойи ва турган жой бўйича рўйхатдан ўтказиш соҳасидаги давлат дастурларини ҳамда бошқа дастурларни ишлаб чиқиш ва амалга оширишда иштирок этади;

яшаш жойи ва турган жой бўйича рўйхатдан ўтказиш соҳасидаги фаолиятни амалга оширади ҳамда назорат қилади;

яшаш жойи ва турган жой бўйича рўйхатдан ўтказиш соҳасида мутахассислар тайёрланишини, қайта тайёрланишини ҳамда уларнинг малакаси оширилишини таъминлайди;

яшаш жойи ва турган жой бўйича рўйхатдан ўтказишга доир услубий кўрсатмаларни, тавсияномаларни ишлаб чиқиш ҳамда жорий этишда иштирок этади.

Ўзбекистон Республикаси Ички ишлар вазирлиги қонунчиликка мувофиқ бошқа ваколатларни ҳам амалга ошириши мумкин.

11-модда. Яшаш жойи ва турган жой бўйича рўйхатдан ўтказиш соҳасида давлат органлари, фуқароларнинг ўзини ўзи бошқариш органлари ва бошқа ташкилотлар билан ҳамкорлик

Ички ишлар органлари яшаш жойи ва турган жой бўйича рўйхатдан ўтказиш соҳасида ўз зиммасига юклатилган вазифаларни бажариш мақсадида қонунчиликда белгиланган тартибда давлат органлари, фуқароларнинг ўзини ўзи бошқариш органлари ва бошқа ташкилотлар билан ҳамкорликни амалга оширади.

3-боб. Ўзбекистон Республикаси фуқароларини яшаш жойи ва турган жойи бўйича рўйхатдан ўтказиш

12-модда. Ўзбекистон Республикаси фуқароларини яшаш жойи бўйича рўйхатдан ўтказиш

Ўзбекистон Республикаси фуқароларини яшаш жойи бўйича рўйхатдан ўтказиш:

ички ишлар органларининг миграция ва фуқароликни расмийлаштириш бўлинмаларида (шахсан мурожаат қилинганда);

давлат хизматлари марказларида (шахсан мурожаат қилинганда);

Ягона интерактив давлат хизматлари портали орқали (хабардор қилиш тартибида) амалга оширилади.

Яшаш жойи бўйича рўйхатдан ўтиш масаласида ички ишлар органларининг миграция ва фуқароликни расмийлаштириш бўлинмасига ёки давлат хизматлари марказига мурожаат қилган рўйхатдан ўтаётган шахс қуйидаги ҳужжатларни тақдим этади:

турар жой мулкдорининг (мулкдорларининг) уй-жой майдонини бериш тўғрисидаги аризасини (розилигини), шахсан бориш имкони мавжуд бўлмаганда эса унинг (уларнинг) нотариал тартибда тасдиқланган аризасини (розилигини);

турар жой мулкдорининг (мулкдорларининг) паспортини (яшаш гувоҳномасини) ёки идентификацияловчи картасини;

рўйхатдан ўтаётган шахснинг паспортини ёки идентификацияловчи картасини;

ўн олти ёшга тўлмаган бола аризада кўрсатилган тақдирда, унинг туғилганлик тўғрисидаги гувоҳномасини ёки шахсини тасдиқловчи бошқа ҳужжатларни;

васийликдаги (ҳомийликдаги) бола ёки оилага тарбияга олинган (патронат) бола аризада кўрсатилган тақдирда, васийликни (ҳомийликни) тасдиқловчи ҳужжатларни ёки болани оилага тарбияга олиш тўғрисидаги келишувни.

Ўз ота-онасининг ёки ота-онасидан бирининг (ёлғиз отасининг ёки онасининг) яшаш жойи манзилида болани яшаш жойи бўйича рўйхатдан ўтказишда мулкдорнинг (мулкдорларнинг) турар жой майдони бериш тўғрисидаги аризаси (розилиги) талаб этилмайди.

Ўзбекистон Республикаси фуқароларини корхоналар, муассасалар ва ташкилотлар тасарруфидаги хизмат турар жойида (ётоқхонада) яшаш жойи бўйича рўйхатдан ўтказиш турар жойнинг ҳужжатига (ордерга) ёки мазкур корхоналар, муассасалар ва ташкилотлар раҳбарларининг ёзма рухсатига асосан ички ишлар органларининг миграция ва фуқароликни расмийлаштириш бўлинмаларида (шахсан мурожаат қилинганда) амалга оширилади. Бунда рўйхатдан ўтаётган шахс ушбу модда иккинчи қисмининг тўртинчи , бешинчи ва олтинчи хатбошиларида кўрсатилган ҳужжатларни тақдим этади.

Ҳужжатларни қабул қилган масъул ходим ҳужжатларнинг ҳақиқийлигини текширади ва Ўзбекистон Республикаси фуқаросини яшаш жойи бўйича рўйхатдан ўтказиш тўғрисидаги электрон сўровномани (аризани) шакллантиради, электрон сўровномага (аризага) тақдим этилган ҳужжатларда кўрсатилган маълумотлар киритилади. Бунда электрон сўровнома (ариза) рўйхатдан ўтаётган шахс томонидан фойдаланувчини идентификация ва верификация қилиш воситалари орқали тасдиқланади, зарур бўлган тақдирда эса рўйхатдан ўтаётган шахс томонидан электрон сўровноманинг (аризанинг) қоғоздаги кўчирма нусхаси имзоланади. Шакллантирилган электрон сўровнома (ариза) «Manzil» тизимига юкланади.

Рўйхатдан ўтаётган шахс Ягона интерактив давлат хизматлари портали орқали яшаш жойи бўйича хабардор қилиш тартибида ўзини рўйхатдан ўтказиш учун Ўзбекистон Республикаси фуқаросини яшаш жойи бўйича рўйхатдан ўтказиш тўғрисидаги электрон сўровномани (аризани) шакллантиради, электрон сўровномага (аризага) ушбу модда иккинчи қисмининг тўртинчи, бешинчи ва олтинчи хатбошиларида санаб ўтилган ҳужжатларда кўрсатилган маълумотлар киритилади. Бунда электрон сўровнома (ариза) рўйхатдан ўтаётган шахс ҳамда турар жой мулкдори (мулкдорлари) томонидан фойдаланувчини идентификация ва верификация қилиш воситалари орқали тасдиқланади.

Ўзбекистон Республикаси фуқаросини яшаш жойи бўйича рўйхатдан ўтказиш тўғрисидаги электрон сўровномани (аризани) кўриб чиқиш муддати бир иш кунидан ошмаслиги керак.

Яшаш жойи бўйича рўйхатдан ўтган шахсга яшаш жойи бўйича рўйхатдан ўтганлик тўғрисидаги электрон ва (ёки) қоғоз шаклидаги маълумотнома расмийлаштирилади.

13-модда. Ўзбекистон Республикаси фуқароларини турган жойи бўйича рўйхатдан ўтказиш

Ўзбекистон Республикаси фуқароларини турган жойи бўйича рўйхатдан ўтказиш:

ички ишлар органларининг миграция ва фуқароликни расмийлаштириш бўлинмаларида (шахсан мурожаат қилинганда);

ички ишлар органларининг таянч пунктларида ва маҳалла ҳуқуқ-тартибот масканларида (шахсан мурожаат қилинганда);

давлат хизматлари марказларида (шахсан мурожаат қилинганда);

Ягона интерактив давлат хизматлари портали орқали (хабардор қилиш тартибида);

«E-xabar berish» тизими орқали (хабардор қилиш тартибида);

жойлаштириш воситаларида ёки даволаш муассасаларида «E-mehmon» тизими орқали (хабардор қилиш тартибида) амалга оширилади.

Ўзбекистон Республикаси фуқаросининг яшаш жойи бўйича рўйхатдан ўтганлиги мавжуд эмаслиги уни турган жойи бўйича рўйхатдан ўтказишни рад этиш учун асос бўлмайди.

Турган жойи бўйича рўйхатдан ўтиш масаласида ички ишлар органларининг миграция ва фуқароликни расмийлаштириш бўлинмасига, ички ишлар органларининг таянч пунктига ёки маҳалла ҳуқуқ-тартибот масканига, давлат хизматлари марказига мурожаат қилган рўйхатдан ўтаётган шахс қуйидаги ҳужжатларни тақдим этади:

турар жой мулкдорининг (мулкдорларининг) уй-жой майдонини бериш тўғрисидаги аризасини (розилигини), шахсан бориш имкони мавжуд бўлмаганда эса унинг (уларнинг) нотариал тартибда тасдиқланган аризасини (розилигини);

турар жой мулкдорининг (мулкдорларининг) паспортини (яшаш гувоҳномасини) ёки идентификацияловчи картасини;

рўйхатдан ўтаётган шахснинг паспортини ёки идентификацияловчи картасини;

ўн олти ёшга тўлмаган бола аризада кўрсатилган тақдирда, унинг туғилганлик тўғрисидаги гувоҳномасини ёки шахсини тасдиқловчи бошқа ҳужжатларни;

васийликдаги (ҳомийликдаги) бола ёки оилага тарбияга олинган (патронат) бола аризада кўрсатилган тақдирда, васийликни (ҳомийликни) тасдиқловчи ҳужжатларни ёки болани оилага тарбияга олиш тўғрисидаги келишувни.

Солиқ органларида ҳисобга олинган турар жойнинг ижара шартномаси тақдим этилганда турар жой мулкдорининг (мулкдорларининг) уй-жой майдонини бериш тўғрисидаги аризаси (розилиги) талаб этилмайди.

Ўзбекистон Республикаси фуқаролари турар жой мулкдорининг (мулкдорларининг) аризасида ёки солиқ органларида ҳисобга олинган турар жойнинг ижара шартномасида кўрсатилган, аммо бир йилдан ортиқ бўлмаган муддатга турган жойи бўйича рўйхатдан ўтказилади.

Ўз ота-онасининг ёки ота-онасидан бирининг (ёлғиз отасининг ёки онасининг) турган жойи манзилида болани турган жойи бўйича рўйхатдан ўтказишда мулкдорнинг (мулкдорларнинг) турар жой майдони бериш тўғрисидаги аризаси (розилиги) талаб этилмайди.

Ўзбекистон Республикаси фуқароларини корхоналар, муассасалар ва ташкилотлар тасарруфидаги хизмат турар жойида (ётоқхонада) турган жойи бўйича рўйхатдан ўтказиш мазкур корхоналар, муассасалар ва ташкилотлар раҳбарларининг ёзма рухсатига асосан ички ишлар органларининг миграция ва фуқароликни расмийлаштириш бўлинмаларида (шахсан мурожаат қилинганда) амалга оширилади. Бунда рўйхатдан ўтаётган шахс ушбу модда учинчи қисмининг тўртинчи , бешинчи ва олтинчи хатбошиларида кўрсатилган ҳужжатларни тақдим этади.

Ҳужжатларни қабул қилган масъул ходим ҳужжатларнинг ҳақиқийлигини текширади ва Ўзбекистон Республикаси фуқаросини турган жойи бўйича рўйхатдан ўтказиш тўғрисидаги электрон сўровномани (аризани) шакллантиради, электрон сўровномага (аризага) тақдим этилган ҳужжатларда кўрсатилган маълумотлар киритилади. Бунда электрон сўровнома (ариза) рўйхатдан ўтаётган шахс томонидан фойдаланувчини идентификация ва верификация қилиш воситалари орқали тасдиқланади, зарур бўлган тақдирда эса рўйхатдан ўтаётган шахс томонидан электрон сўровноманинг (аризанинг) қоғоздаги кўчирма нусхаси имзоланади. Шакллантирилган электрон сўровнома (ариза) «E-xabar berish» тизимига юкланади.

Рўйхатдан ўтаётган шахс Ягона интерактив давлат хизматлари портали ёки «E-xabar berish» тизими орқали турган жойи бўйича хабардор қилиш тартибида ўзини рўйхатдан ўтказиш учун Ўзбекистон Республикаси фуқаросини турган жойи бўйича рўйхатдан ўтказиш тўғрисидаги электрон сўровномани (аризани) шакллантиради, электрон сўровномага (аризага) ушбу модда учинчи қисмининг тўртинчи , бешинчи ва олтинчи хатбошиларида санаб ўтилган ҳужжатларда кўрсатилган маълумотлар киритилади. Бунда электрон сўровнома (ариза) рўйхатдан ўтаётган шахс ҳамда турар жой мулкдори (мулкдорлари) томонидан фойдаланувчини идентификация ва верификация қилиш воситалари орқали тасдиқланади. Агар Ўзбекистон Республикаси фуқаросини турган жойи бўйича рўйхатдан ўтказиш тўғрисидаги электрон сўровнома (ариза) солиқ органларида ҳисобга олинган турар жойнинг ижара шартномасига асосан шакллантирилса, турар жой мулкдорининг (мулкдорларининг) тасдиғи талаб этилмайди.

Жойлаштириш воситасида турган Ўзбекистон Республикаси фуқаросини турган жойи бўйича хабардор қилиш тартибида «E-mehmon» тизими орқали рўйхатдан ўтказиш учун жойлаштириш воситасининг масъул ходими томонидан Ўзбекистон Республикаси фуқаросини турган жойи бўйича рўйхатдан ўтказиш тўғрисидаги электрон сўровнома шакллантирилади, электрон сўровномага рўйхатдан ўтаётган шахснинг паспортида ёки идентификацияловчи картасида (боланинг туғилганлик ҳақидаги гувоҳномасида) кўрсатилган маълумотлар киритилади.

Даволаш муассасасида стационар шароитда даволанаётган Ўзбекистон Республикаси фуқаросини турган жойи бўйича хабардор қилиш тартибида «E-mehmon» тизими орқали рўйхатдан ўтказиш учун даволаш муассасасининг масъул ходими томонидан Ўзбекистон Республикаси фуқаросини турган жойи бўйича рўйхатдан ўтказиш тўғрисидаги электрон сўровнома шакллантирилади, электрон сўровномага рўйхатдан ўтаётган шахснинг паспортида ёки идентификацияловчи картасида (боланинг туғилганлик ҳақидаги гувоҳномасида) кўрсатилган маълумотлар киритилади.

Ўзбекистон Республикаси фуқаросини турган жойи бўйича рўйхатдан ўтказиш тўғрисидаги электрон сўровномани (аризани) кўриб чиқиш муддати бир иш кунидан ошмаслиги керак.

Турган жойи бўйича рўйхатдан ўтган шахсга турган жойи бўйича рўйхатдан ўтганлик тўғрисидаги электрон ва (ёки) қоғоз шаклидаги маълумотнома расмийлаштирилади.

Агар турган жойи бўйича рўйхатдан ўтганлик муддати тугаган бўлса, аммо шахс ушбу жойда бўлишни давом эттирса, у ўн иш куни ичида турган жойи бўйича янгидан рўйхатдан ўтиши зарур.

14-модда. Ўзбекистон Республикаси фуқароларининг яшаш жойи бўйича рўйхатдан ўтказилганлигини бекор қилиш

Ўзбекистон Республикаси фуқароларининг яшаш жойи бўйича рўйхатдан ўтказилганлигини бекор қилиш ички ишлар органларининг миграция ва фуқароликни расмийлаштириш бўлинмалари томонидан қуйидаги ҳолларда амалга оширилади:

Ўзбекистон Республикаси фуқароси янги яшаш жойи бўйича рўйхатдан ўтказилганда;

турар жой мулкдорининг аризасига кўра — турар жойга бўлган мулкий ҳуқуқларга ёки турар жой мулкдори билан қариндошлик алоқаларига эга бўлмаган Ўзбекистон Республикаси фуқаросига (бундан мазкур шахсларнинг турар жойдан фойдаланиш ҳуқуқи суд томонидан белгиланганлиги ёки тарафлар ўртасида келишув мавжудлиги ҳоллари мустасно) ёхуд ушбу Қонуннинг 20-моддасида белгиланган уй-жой майдонининг ижтимоий нормасига риоя қилинган ҳолда яшаш жойи бўйича рўйхатдан ўтказилган Ўзбекистон Республикаси фуқаросига нисбатан;

Ўзбекистон Республикаси фуқароси хорижга доимий яшашга кетаётганда;

озодликдан маҳрум этишга ҳукм қилинган Ўзбекистон Республикаси фуқаросининг нотариал тартибда тасдиқланган ишончномаси ёки розилиги асосида;

Ўзбекистон Республикаси фуқаросининг яшаш жойи бўйича рўйхатдан ўтказилганлигини бекор қилиш тўғрисидаги шахсий мурожаати ёки бошқа шахснинг нотариал тартибда тасдиқланган ишончнома асосидаги мурожаати бўйича.

Ўзбекистон Республикаси фуқаросининг яшаш жойи бўйича рўйхатдан ўтказилганлигини бекор қилиш суд томонидан қуйидаги ҳолларда амалга оширилади:

уй-жой майдонининг ижтимоий нормаси қўлланилмаган ҳолда рўйхатдан ўтказилган шахснинг яшаш жойи бўйича рўйхатдан ўтказилганлигини бекор қилиш тўғрисидаги суднинг қонуний кучга кирган қарорига асосан;

шахсни турар жойдан фойдаланиш ҳуқуқини йўқотган деб топиш тўғрисидаги, шахсни бедарак йўқолган деб топиш ҳақидаги, шахсни вафот этган деб эълон қилиш тўғрисидаги ёки шахсни турар жойдан кўчириш ҳақидаги суднинг қонуний кучга кирган қарорига асосан;

шахснинг қалбаки ҳужжатлар ёки ҳақиқатга мос келмайдиган ҳужжатлар асосида яшаш жойи бўйича рўйхатдан ўтказилганлиги, шунингдек Ўзбекистон Республикаси фуқаросини яшаш жойи бўйича рўйхатдан ўтказган мансабдор шахсларнинг ғайриқонуний хатти-ҳаракатлари аниқланганда — суднинг қонуний кучга кирган айблов ҳукмига асосан;

шахсга нисбатан умрбод озодликдан маҳрум этиш тарзидаги жазо тайинланганда — суднинг қонуний кучга кирган айблов ҳукмига асосан.

Турар жойдан фойдаланиш ҳуқуқи суд томонидан белгиланган шахсларнинг розилигисиз уларнинг яшаш жойи бўйича рўйхатдан ўтказилганлигини бекор қилиш фақат суднинг қарорига асосан амалга оширилади.

Ушбу модданинг биринчи, иккинчи ва учинчи қисмларида назарда тутилган ҳолларда Ўзбекистон Республикаси фуқаросининг яшаш жойи бўйича рўйхатдан ўтказилганлигини бекор қилиш тўғрисидаги ахборот тегишинча ички ишлар органларининг миграция ва фуқароликни расмийлаштириш бўлинмалари ҳамда судлар томонидан «Manzil» тизимига киритилади.

Ўзбекистон Республикасининг ўн олти ёшга тўлмаган фуқароларининг яшаш жойи бўйича рўйхатдан ўтказилганлигини бекор қилиш уларнинг ота-онасининг (ёлғиз отасининг ёки онасининг), тутинган ота-онасининг ёки васийларининг (ҳомийларининг) яшаш жойи бўйича рўйхатдан ўтказилганлигини бекор қилиш билан бир вақтда амалга оширилади.

Ўзбекистон Республикаси фуқароси вафот этганда унинг яшаш жойи бўйича рўйхатдан ўтказилганлигини бекор қилиш ўлим ҳақидаги гувоҳномани расмийлаштириш чоғида ФҲДЁ органларидан идоралараро ахборот алмашиш тизими орқали олинган маълумотларга ёки ўлим ҳақидаги гувоҳнома тақдим этилганда турар жой мулкдорининг аризасига асосан ички ишлар органларининг миграция ва фуқароликни расмийлаштириш бўлинмалари томонидан амалга оширилади.

Турар жой мулкдори (мулкдорлари) Ўзбекистон Республикаси фуқаросининг яшаш жойи бўйича рўйхатдан ўтказилганлигини бекор қилиш учун ички ишлар органининг миграция ва фуқароликни расмийлаштириш бўлинмасига қуйидаги ҳужжатларни тақдим этади:

Ўзбекистон Республикаси фуқаросининг яшаш жойи бўйича рўйхатдан ўтказилганлигини бекор қилиш тўғрисидаги аризани;

турар жой мулкдорининг (мулкдорларининг) паспортини (яшаш гувоҳномасини) ёки идентификацияловчи картасини;

турар жойга бўлган мулк ҳуқуқини тасдиқловчи ва яшаш жойи бўйича рўйхатдан ўтказилганликни бекор қилиш учун асос бўлган ҳужжатни.

Ўзбекистон Республикаси фуқароси ўзининг яшаш жойи бўйича рўйхатдан ўтказилганлигини бекор қилиш учун ички ишлар органининг миграция ва фуқароликни расмийлаштириш бўлинмасига қуйидаги ҳужжатларни тақдим этади:

Ўзбекистон Республикаси фуқаросининг яшаш жойи бўйича рўйхатдан ўтказилганлигини бекор қилиш тўғрисидаги аризани;

паспортини ёки идентификацияловчи картасини;

ўн олти ёшга тўлмаган бола аризада кўрсатилган тақдирда, унинг туғилганлик тўғрисидаги гувоҳномасини ёки шахсини тасдиқловчи бошқа ҳужжатларни.

Хорижда доимий яшашга кетиш учун рухсат олган Ўзбекистон Республикаси фуқароси ўзининг яшаш жойи бўйича рўйхатдан ўтказилганлигини бекор қилиш учун ички ишлар органининг миграция ва фуқароликни расмийлаштириш бўлинмасига қуйидаги ҳужжатларни тақдим этади:

Ўзбекистон Республикаси фуқаросининг яшаш жойи бўйича рўйхатдан ўтказилганлигини бекор қилиш тўғрисидаги аризани;

Ўзбекистон Республикаси фуқаросининг хорижга чиқиш учун биометрик паспортини;

ўн олти ёшга тўлмаган бола аризада кўрсатилган тақдирда, Ўзбекистон Республикаси ўн олти ёшга тўлмаган фуқаросининг хорижга чиқиш учун биометрик паспортини.

Ўзбекистон Республикаси фуқаросининг хорижда доимий яшашга кетиш учун рухсатномани расмийлаштириш тартиби Ўзбекистон Республикаси Президенти томонидан белгиланади.

Ушбу модданинг олтинчи , еттинчи , саккизинчи ва тўққизинчи қисмларида кўрсатилган ҳужжатларни қабул қилган масъул ходим ҳужжатларнинг ҳақиқийлигини текширади ва Ўзбекистон Республикаси фуқаросининг яшаш жойи бўйича рўйхатдан ўтказилганлигини бекор қилиш тўғрисидаги электрон сўровномани (аризани) шакллантиради, электрон сўровномага (аризага) тақдим этилган ҳужжатларда кўрсатилган маълумотлар киритилади. Бунда электрон сўровнома (ариза) ариза берувчи томонидан фойдаланувчини идентификация ва верификация қилиш воситалари орқали тасдиқланади, зарур бўлган тақдирда эса мазкур шахс томонидан электрон сўровноманинг (аризанинг) қоғоздаги кўчирма нусхаси имзоланади. Шакллантирилган электрон сўровнома (ариза) «Manzil» тизимига юкланади.

Ўзбекистон Республикаси фуқаросининг яшаш жойи бўйича рўйхатдан ўтказилганлигини бекор қилиш тўғрисидаги электрон сўровномани (аризани) кўриб чиқиш муддати бир иш кунидан ошмаслиги керак.

4-боб. Чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш

15-модда. Ўзбекистон Республикасида доимий яшовчи чет эл фуқароларини ва фуқаролиги бўлмаган шахсларни яшаш жойи бўйича рўйхатдан ўтказиш

Ўзбекистон Республикасида доимий яшовчи чет эл фуқароларини ва фуқаролиги бўлмаган шахсларни яшаш жойи бўйича рўйхатдан ўтказиш ички ишлар органларининг миграция ва фуқароликни расмийлаштириш бўлинмаларида (шахсан мурожаат қилинганда) амалга оширилади.

Яшаш жойи бўйича рўйхатдан ўтиш масаласида ички ишлар органларининг миграция ва фуқароликни расмийлаштириш бўлинмасига мурожаат қилган рўйхатдан ўтаётган шахс қуйидаги ҳужжатларни тақдим этади:

турар жой мулкдорининг (мулкдорларининг) уй-жой майдонини бериш тўғрисидаги аризасини (розилигини), шахсан бориш имкони мавжуд бўлмаганда эса унинг (уларнинг) нотариал тартибда тасдиқланган аризасини (розилигини);

турар жой мулкдорининг (мулкдорларининг) паспортини (яшаш гувоҳномасини) ёки идентификацияловчи картасини;

рўйхатдан ўтаётган шахснинг идентификацияловчи картасини (яшаш гувоҳномасини);

ўн олти ёшга тўлмаган бола аризада кўрсатилган тақдирда, унинг туғилганлик тўғрисидаги гувоҳномасини ёки шахсини тасдиқловчи бошқа ҳужжатларни;

васийликдаги (ҳомийликдаги) бола ёки оилага тарбияга олинган (патронат) бола аризада кўрсатилган тақдирда, васийликни (ҳомийликни) тасдиқловчи ҳужжатларни ёки болани оилага тарбияга олиш тўғрисидаги келишувни.

Ўз ота-онасининг ёки ота-онасидан бирининг (ёлғиз отасининг ёки онасининг) яшаш жойи манзилида болани яшаш жойи бўйича рўйхатдан ўтказишда мулкдорнинг (мулкдорларнинг) турар жой майдони бериш тўғрисидаги аризаси (розилиги) талаб этилмайди.

Ўзбекистон Республикасида доимий яшовчи чет эл фуқароларини ҳамда фуқаролиги бўлмаган шахсларни корхоналар, муассасалар ва ташкилотлар тасарруфидаги хизмат турар жойида (ётоқхонада) яшаш жойи бўйича рўйхатдан ўтказиш турар жойнинг ҳужжатига (ордерга) ёки мазкур корхоналар, муассасалар ва ташкилотлар раҳбарларининг ёзма рухсатига асосан ички ишлар органларининг миграция ва фуқароликни расмийлаштириш бўлинмаларида (шахсан мурожаат қилинганда) амалга оширилади. Бунда рўйхатдан ўтаётган шахс ушбу модда иккинчи қисмининг тўртинчи , бешинчи ва олтинчи хатбошиларида кўрсатилган ҳужжатларни тақдим этади.

Ҳужжатларни қабул қилган масъул ходим ҳужжатларнинг ҳақиқийлигини текширади ва Ўзбекистон Республикасида доимий яшовчи чет эл фуқаросини (фуқаролиги бўлмаган шахсни) яшаш жойи бўйича рўйхатдан ўтказиш тўғрисидаги электрон сўровномани (аризани) шакллантиради, электрон сўровномага (аризага) тақдим этилган ҳужжатларда кўрсатилган маълумотлар киритилади. Бунда электрон сўровнома (ариза) рўйхатдан ўтаётган шахс томонидан фойдаланувчини идентификация ва верификация қилиш воситалари орқали тасдиқланади, зарур бўлган тақдирда эса рўйхатдан ўтаётган шахс томонидан электрон сўровноманинг (аризанинг) қоғоздаги кўчирма нусхаси имзоланади. Шакллантирилган электрон сўровнома (ариза) «Manzil» тизимига юкланади.

Ўзбекистон Республикасида доимий яшовчи чет эл фуқаросини (фуқаролиги бўлмаган шахсни) яшаш жойи бўйича рўйхатдан ўтказиш тўғрисидаги электрон сўровномани (аризани) кўриб чиқиш муддати бир иш кунидан ошмаслиги керак.

Яшаш жойи бўйича рўйхатдан ўтган шахсга яшаш жойи бўйича рўйхатдан ўтганлик тўғрисидаги электрон ва (ёки) қоғоз шаклидаги маълумотнома расмийлаштирилади.

16-модда. Ўзбекистон Республикасида доимий яшовчи чет эл фуқароларини ва фуқаролиги бўлмаган шахсларни турган жойи бўйича рўйхатдан ўтказиш

Ўзбекистон Республикасида доимий яшовчи чет эл фуқароларини ва фуқаролиги бўлмаган шахсларни турган жойи бўйича рўйхатдан ўтказиш:

ички ишлар органларининг миграция ва фуқароликни расмийлаштириш бўлинмаларида (шахсан мурожаат қилинганда);

ички ишлар органларининг таянч пунктлари ва маҳалла ҳуқуқ-тартибот масканларида (шахсан мурожаат қилинганда);

Ягона интерактив давлат хизматлари портали орқали (хабардор қилиш тартибида);

«Е-xabar berish» тизими орқали (хабардор қилиш тартибида);

жойлаштириш воситаларида ёки даволаш муассасаларида «Е-mehmon» тизими орқали (хабардор қилиш тартибида) амалга оширилади.

Турган жойи бўйича рўйхатдан ўтиш масаласида ички ишлар органларининг миграция ва фуқароликни расмийлаштириш бўлинмасига, ички ишлар органларининг таянч пунктига ёки маҳалла ҳуқуқ-тартибот масканига мурожаат қилган рўйхатдан ўтаётган шахс қуйидаги ҳужжатларни тақдим этади:

турар жой мулкдорининг (мулкдорларининг) уй-жой майдонини бериш тўғрисидаги аризасини (розилигини), шахсан бориш имкони мавжуд бўлмаганда эса унинг (уларнинг) нотариал тартибда тасдиқланган аризасини (розилигини);

турар жой мулкдорининг (мулкдорларининг) паспортини (яшаш гувоҳномасини) ёки идентификацияловчи картасини;

рўйхатдан ўтаётган шахснинг идентификацияловчи картасини (яшаш гувоҳномасини);

ўн олти ёшга тўлмаган бола аризада кўрсатилган тақдирда, унинг туғилганлик тўғрисидаги гувоҳномасини ёки шахсини тасдиқловчи бошқа ҳужжатларни;

васийликдаги (ҳомийликдаги) бола ёки оилага тарбияга олинган (патронат) бола аризада кўрсатилган тақдирда, васийликни (ҳомийликни) тасдиқловчи ҳужжатларни ёки болани оилага тарбияга олиш тўғрисидаги келишувни.

Солиқ органларида ҳисобга олинган турар жойнинг ижара шартномаси тақдим этилганда турар жой мулкдорининг (мулкдорларининг) уй-жой майдонини бериш тўғрисидаги аризаси (розилиги) талаб этилмайди.

Ўзбекистон Республикасида доимий яшовчи чет эл фуқаролари ва фуқаролиги бўлмаган шахслар турар жой мулкдорининг (мулкдорларининг) аризасида ёки солиқ органларида ҳисобга олинган турар жойнинг ижара шартномасида кўрсатилган, аммо бир йилдан ортиқ бўлмаган муддатга турган жойи бўйича рўйхатдан ўтказилади.

Ўз ота-онасининг ёки ота-онасидан бирининг (ёлғиз отасининг ёки онасининг) турган жойи манзилида болани турган жойи бўйича рўйхатдан ўтказишда мулкдорнинг (мулкдорларнинг) турар жой майдони бериш тўғрисидаги аризаси (розилиги) талаб этилмайди.

Ўзбекистон Республикасида доимий яшовчи чет эл фуқароларини ва фуқаролиги бўлмаган шахсларни корхоналар, муассасалар ва ташкилотлар тасарруфидаги хизмат турар жойида (ётоқхонада) турган жойи бўйича рўйхатдан ўтказиш мазкур корхоналар, муассасалар ва ташкилотлар раҳбарларининг ёзма рухсатига асосан ички ишлар органларининг миграция ва фуқароликни расмийлаштириш бўлинмаларида (шахсан мурожаат қилинганда) амалга оширилади. Бунда рўйхатдан ўтаётган шахс ушбу модда иккинчи қисмининг тўртинчи , бешинчи ва олтинчи хатбошиларида кўрсатилган ҳужжатларни тақдим этади.

Ҳужжатларни қабул қилган масъул ходим ҳужжатларнинг ҳақиқийлигини текширади ва Ўзбекистон Республикасида доимий яшовчи чет эл фуқаросини (фуқаролиги бўлмаган шахсни) турган жойи бўйича рўйхатдан ўтказиш тўғрисидаги электрон сўровномани (аризани) шакллантиради, электрон сўровномага (аризага) тақдим этилган ҳужжатларда кўрсатилган маълумотлар киритилади. Бунда электрон сўровнома (ариза) рўйхатдан ўтаётган шахс томонидан фойдаланувчини идентификация ва верификация қилиш воситалари орқали тасдиқланади, зарур бўлган тақдирда эса рўйхатдан ўтаётган шахс томонидан электрон сўровноманинг (аризанинг) қоғоздаги кўчирма нусхаси имзоланади. Шакллантирилган электрон сўровнома (ариза) «E-xabar berish» тизимига юкланади.

Рўйхатдан ўтаётган шахс Ягона интерактив давлат хизматлари портали ёки «E-xabar berish» тизими орқали турган жойи бўйича хабардор қилиш тартибида ўзини рўйхатдан ўтказиш учун Ўзбекистон Республикасида доимий яшовчи чет эл фуқаросини (фуқаролиги бўлмаган шахсни) турган жойи бўйича рўйхатдан ўтказиш тўғрисидаги электрон сўровномани (аризани) шакллантиради, электрон сўровномага (аризага) ушбу модда иккинчи қисмининг тўртинчи , бешинчи ва олтинчи хатбошиларида санаб ўтилган ҳужжатларда кўрсатилган маълумотлар киритилади. Бунда электрон сўровнома (ариза) рўйхатдан ўтаётган шахс ҳамда турар жой мулкдори (мулкдорлари) томонидан фойдаланувчини идентификация ва верификация қилиш воситалари орқали тасдиқланади. Агар Ўзбекистон Республикасида доимий яшовчи чет эл фуқаросини (фуқаролиги бўлмаган шахсни) турган жойи бўйича рўйхатдан ўтказиш тўғрисидаги электрон сўровнома (ариза) солиқ органларида ҳисобга олинган турар жойнинг ижара шартномасига асосан шакллантирилса, турар жой мулкдорининг (мулкдорларининг) тасдиғи талаб этилмайди.

Жойлаштириш воситасида турган Ўзбекистон Республикасида доимий яшовчи чет эл фуқаросини ёки фуқаролиги бўлмаган шахсни турган жойи бўйича хабардор қилиш тартибида «E-mehmon» тизими орқали рўйхатдан ўтказиш учун жойлаштириш воситасининг масъул ходими томонидан Ўзбекистон Республикасида доимий яшовчи чет эл фуқаросини (фуқаролиги бўлмаган шахсни) турган жойи бўйича рўйхатдан ўтказиш тўғрисидаги электрон сўровнома шакллантирилади, электрон сўровномага рўйхатдан ўтаётган шахснинг идентификацияловчи картасида ёки яшаш гувоҳномасида (боланинг туғилганлик ҳақидаги гувоҳномасида) кўрсатилган маълумотлар киритилади.

Даволаш муассасасида стационар шароитда даволанаётган Ўзбекистон Республикасида доимий яшовчи чет эл фуқаросини ёки фуқаролиги бўлмаган шахсни турган жойи бўйича хабардор қилиш тартибида «E-mehmon» тизими орқали рўйхатдан ўтказиш учун даволаш муассасасининг масъул ходими томонидан Ўзбекистон Республикасида доимий яшовчи чет эл фуқаросини (фуқаролиги бўлмаган шахсни) турган жойи бўйича рўйхатдан ўтказиш тўғрисидаги электрон сўровнома шакллантирилади, электрон сўровномага рўйхатдан ўтаётган шахснинг идентификацияловчи картасида ёки яшаш гувоҳномасида (боланинг туғилганлик ҳақидаги гувоҳномасида) кўрсатилган маълумотлар киритилади.

Ўзбекистон Республикасида доимий яшовчи чет эл фуқаросини (фуқаролиги бўлмаган шахсни) турган жойи бўйича рўйхатдан ўтказиш тўғрисидаги электрон сўровномани (аризани) кўриб чиқиш муддати бир иш кунидан ошмаслиги керак.

Турган жойи бўйича рўйхатдан ўтган шахсга турган жойи бўйича рўйхатдан ўтганлик тўғрисидаги электрон ва (ёки) қоғоз шаклидаги маълумотнома расмийлаштирилади.

Агар турган жойи бўйича рўйхатдан ўтганлик муддати тугаган бўлса, аммо шахс ушбу жойда бўлишни давом эттирса, у ўн иш куни ичида турган жойи бўйича янгидан рўйхатдан ўтиши зарур.

17-модда. Бошқа давлатлар ҳудудида доимий яшайдиган чет эл фуқароларига ва фуқаролиги бўлмаган шахсларга Ўзбекистон Республикасида доимий яшаш учун рухсатнома бериш

Бошқа давлатлар ҳудудида доимий яшайдиган чет эл фуқароларига ва фуқаролиги бўлмаган шахсларга Ўзбекистон Республикасида доимий яшаш учун рухсатнома бериш ички ишлар органларининг миграция ва фуқароликни расмийлаштириш бўлинмаларида шахсан мурожаат қилинганда амалга оширилади.

Ўзбекистон Республикасида доимий яшаш учун рухсатномага эга бўлмаган, бошқа давлатлар ҳудудида доимий яшайдиган чет эл фуқаролари ва фуқаролиги бўлмаган шахслар яшаш жойи бўйича рўйхатдан ўтказилмайди.

Бошқа давлатлар ҳудудида доимий яшайдиган чет эл фуқароларига ва фуқаролиги бўлмаган шахсларга Ўзбекистон Республикасида доимий яшаш учун рухсатнома Яшаш жойи бўйича рўйхатдан ўтиш ҳуқуқига эга бўлган чет эл фуқаролари ва фуқаролиги бўлмаган шахслар тоифалари рўйхати асосида берилади.

Чет эл фуқароларига ва фуқаролиги бўлмаган шахсларга Ўзбекистон Республикасида доимий яшаш учун рухсатнома бериш тартиби ҳамда Яшаш жойи бўйича рўйхатдан ўтиш ҳуқуқига эга бўлган чет эл фуқаролари ва фуқаролиги бўлмаган шахслар тоифалари рўйхати Ўзбекистон Республикаси Президенти томонидан тасдиқланади.

18-модда. Ўзбекистон Республикасида доимий яшовчи чет эл фуқароларининг ва фуқаролиги бўлмаган шахсларнинг яшаш жойи бўйича рўйхатдан ўтказилганлигини бекор қилиш

Ўзбекистон Республикасида доимий яшовчи чет эл фуқароларининг ва фуқаролиги бўлмаган шахсларнинг яшаш жойи бўйича рўйхатдан ўтказилганлигини бекор қилиш ички ишлар органларининг миграция ва фуқароликни расмийлаштириш бўлинмалари томонидан қуйидаги ҳолларда амалга оширилади:

Ўзбекистон Республикасида доимий яшовчи чет эл фуқароси ёки фуқаролиги бўлмаган шахс Ўзбекистон Республикаси ҳудудида янги яшаш жойи бўйича рўйхатдан ўтганда;

турар жой мулкдорининг аризасига кўра — турар жойга бўлган мулкий ҳуқуқларга ёки турар жой мулкдори билан қариндошлик алоқаларига эга бўлмаган Ўзбекистон Республикасида доимий яшовчи чет эл фуқаросига ёки фуқаролиги бўлмаган шахсга (бундан мазкур шахсларнинг турар жойдан фойдаланиш ҳуқуқи суд томонидан белгиланганлиги ёки тарафлар ўртасида келишув мавжудлиги ҳоллари мустасно) ёхуд ушбу Қонуннинг 20-моддасида белгиланган уй-жой майдонининг ижтимоий нормасига риоя қилинган ҳолда яшаш жойи бўйича рўйхатдан ўтказилган Ўзбекистон Республикасида доимий яшовчи чет эл фуқаросига ёки фуқаролиги бўлмаган шахсга нисбатан;

давлат ҳокимияти органлари, республика ижро этувчи ҳокимият органлари, хўжалик бошқаруви органлари, республика аҳамиятига молик бошқа давлат ташкилотлари раҳбарларининг илтимосномасига асосан чет эл фуқароларига ва фуқаролиги бўлмаган шахсларга берилган Ўзбекистон Республикасида доимий яшаш учун рухсатномаларни бекор қилиш тўғрисидаги мазкур давлат органлари ва ташкилотларининг билдиришномаси асосида;

чет эл фуқароси ёки фуқаролиги бўлмаган шахс қонунчиликда белгиланган тартибда хорижга доимий яшашга кетаётганда;

Ўзбекистон Республикасида доимий яшовчи озодликдан маҳрум этишга ҳукм қилинган чет эл фуқаросининг ёки фуқаролиги бўлмаган шахснинг нотариал тартибда тасдиқланган ишончномаси ёки розилиги асосида;

Ўзбекистон Республикасида доимий яшовчи чет эл фуқаросининг ёки фуқаролиги бўлмаган шахснинг яшаш жойи бўйича рўйхатдан ўтказилганлигини бекор қилиш тўғрисидаги шахсий мурожаати ёки бошқа шахснинг нотариал тартибда тасдиқланган ишончнома асосидаги мурожаати бўйича.

Ўзбекистон Республикасида доимий яшовчи чет эл фуқаросининг ёки фуқаролиги бўлмаган шахснинг яшаш жойи бўйича рўйхатдан ўтказилганлигини бекор қилиш суд томонидан қуйидаги ҳолларда амалга оширилади:

уй-жой майдонининг ижтимоий нормаси қўлланилмаган ҳолда рўйхатдан ўтказилган шахснинг яшаш жойи бўйича рўйхатдан ўтказилганлигини бекор қилиш тўғрисидаги суднинг қонуний кучга кирган қарорига асосан;

шахсни турар жойдан фойдаланиш ҳуқуқини йўқотган деб топиш тўғрисидаги, шахсни бедарак йўқолган деб топиш ҳақидаги, шахсни вафот этган деб эълон қилиш тўғрисидаги ёки шахсни турар жойдан кўчириш ҳақидаги суднинг қонуний кучга кирган қарорига асосан;

шахснинг қалбаки ҳужжатлар ёки ҳақиқатга мос келмайдиган ҳужжатлар асосида яшаш жойи бўйича рўйхатдан ўтказилганлиги, шунингдек чет эл фуқаросини ёки фуқаролиги бўлмаган шахсни яшаш жойи бўйича рўйхатдан ўтказган мансабдор шахсларнинг ғайриқонуний хатти-ҳаракатлари аниқланганда — суднинг қонуний кучга кирган айблов ҳукмига асосан;

шахсга нисбатан умрбод озодликдан маҳрум этиш тарзидаги жазо тайинланганда — суднинг қонуний кучга кирган айблов ҳукмига асосан.

Турар жойдан фойдаланиш ҳуқуқи суд томонидан белгиланган шахсларнинг розилигисиз уларнинг яшаш жойи бўйича рўйхатдан ўтказилганлигини бекор қилиш фақат суднинг қарорига асосан амалга оширилади.

Ушбу модданинг биринчи , иккинчи ва учинчи қисмларида назарда тутилган ҳолларда, Ўзбекистон Республикасида доимий яшовчи чет эл фуқаросининг (фуқаролиги бўлмаган шахснинг) яшаш жойи бўйича рўйхатдан ўтказилганлигини бекор қилиш тўғрисидаги ахборот тегишинча ички ишлар органларининг миграция ва фуқароликни расмийлаштириш бўлинмалари ҳамда судлар томонидан «Manzil» тизимига киритилади.

Ўзбекистон Республикасида доимий яшовчи ўн олти ёшга тўлмаган чет эл фуқароларининг (фуқаролиги бўлмаган шахсларнинг) яшаш жойи бўйича рўйхатдан ўтказилганлигини бекор қилиш уларнинг ота-онасининг (ёлғиз отасининг ёки онасининг), тутинган ота-онасининг ёки васийларининг (ҳомийларининг) яшаш жойи бўйича рўйхатдан ўтказилганлигини бекор қилиш билан бир вақтда амалга оширилади.

Чет эл фуқароси (фуқаролиги бўлмаган шахс) вафот этганда унинг яшаш жойи бўйича рўйхатдан ўтказилганлигини бекор қилиш ўлим ҳақидаги гувоҳномани расмийлаштириш чоғида ФҲДЁ органларидан идоралараро ахборот алмашиш тизими орқали олинган маълумотларга ёки ўлим ҳақидаги гувоҳнома тақдим этилганда турар жой мулкдорининг аризасига асосан ички ишлар органларининг миграция ва фуқароликни расмийлаштириш бўлинмалари томонидан амалга оширилади.

Турар жой мулкдори (мулкдорлари) чет эл фуқаросининг (фуқаролиги бўлмаган шахснинг) яшаш жойи бўйича рўйхатдан ўтказилганлигини бекор қилиш учун ички ишлар органининг миграция ва фуқароликни расмийлаштириш бўлинмасига қуйидаги ҳужжатларни тақдим этади:

чет эл фуқаросининг (фуқаролиги бўлмаган шахснинг) яшаш жойи бўйича рўйхатдан ўтказилганлигини бекор қилиш тўғрисидаги аризани;

турар жой мулкдорининг (мулкдорларининг) паспортини (яшаш гувоҳномасини) ёки идентификацияловчи картасини;

турар жойга бўлган мулк ҳуқуқини тасдиқловчи ва яшаш жойи бўйича рўйхатдан ўтказилганликни бекор қилиш учун асос бўлган ҳужжатни.

Чет эл фуқароси (фуқаролиги бўлмаган шахс) ўзининг яшаш жойи бўйича рўйхатдан ўтказилганлигини бекор қилиш учун ички ишлар органининг миграция ва фуқароликни расмийлаштириш бўлинмасига қуйидаги ҳужжатларни тақдим этади:

чет эл фуқаросининг (фуқаролиги бўлмаган шахснинг) яшаш жойи бўйича рўйхатдан ўтказилганлигини бекор қилиш тўғрисидаги аризани;

идентификацияловчи картасини (яшаш гувоҳномасини);

ўн олти ёшга тўлмаган бола аризада кўрсатилган тақдирда, унинг туғилганлик тўғрисидаги гувоҳномасини ёки шахсини тасдиқловчи бошқа ҳужжатларни.

Ушбу модданинг олтинчи , еттинчи ёки саккизинчи қисмларида кўрсатилган ҳужжатларни қабул қилган масъул ходим ҳужжатларнинг ҳақиқийлигини текширади ва чет эл фуқаросининг (фуқаролиги бўлмаган шахснинг) яшаш жойи бўйича рўйхатдан ўтказилганлигини бекор қилиш тўғрисидаги электрон сўровномани (аризани) шакллантиради, электрон сўровномага (аризага) тақдим этилган ҳужжатларда кўрсатилган маълумотлар киритилади. Бунда электрон сўровнома (ариза) ариза берувчи томонидан фойдаланувчини идентификация ва верификация қилиш воситалари орқали тасдиқланади, зарур бўлган тақдирда эса мазкур шахс томонидан электрон сўровноманинг (аризанинг) қоғоздаги кўчирма нусхаси имзоланади. Шакллантирилган электрон сўровнома (ариза) «Manzil» тизимига юкланади.

Чет эл фуқаросининг (фуқаролиги бўлмаган шахснинг) яшаш жойи бўйича рўйхатдан ўтказилганлигини бекор қилиш тўғрисидаги электрон сўровномани (аризани) кўриб чиқиш муддати бир иш кунидан ошмаслиги керак.

19-модда. Бошқа давлатлар ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқароларини ва фуқаролиги бўлмаган шахсларни турган жойи бўйича рўйхатдан ўтказиш

Бошқа давлатлар ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқароларини ва фуқаролиги бўлмаган шахсларни турган жойи бўйича рўйхатдан ўтказиш:

ички ишлар органларининг миграция ва фуқароликни расмийлаштириш бўлинмаларида (шахсан мурожаат қилинганда);

жойлаштириш воситаларида ёки даволаш муассасаларида «Е-mehmon» тизими орқали (хабардор қилиш тартибида) амалга оширилади.

Бошқа давлатлар ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқароларини ҳамда фуқаролиги бўлмаган шахсларни таклиф қилган (қабул қилаётган) жисмоний ва юридик шахслар уларни турган жойи бўйича рўйхатдан ўтказиш учун ички ишлар органларининг ҳудудий миграция ва фуқароликни расмийлаштириш бўлинмаларига қуйидаги ҳужжатларни тақдим этади:

турар жой мулкдорининг (мулкдорларининг) уй-жой майдонини бериш тўғрисидаги аризасини (розилигини), шахсан бориш имкони мавжуд бўлмаганда эса унинг (уларнинг) нотариал тартибда тасдиқланган аризасини (розилигини);

турар жой мулкдорининг (мулкдорларининг) паспортини (яшаш гувоҳномасини) ёки идентификацияловчи картасини;

рўйхатдан ўтаётган шахснинг ҳаракатланиш ҳужжатини;

ўн олти ёшга тўлмаган бола аризада кўрсатилган тақдирда, унинг ҳаракатланиш ҳужжатини;

агар чет эл фуқаролари ва фуқаролиги бўлмаган шахслар Ўзбекистон Республикасида меҳнат фаолиятини амалга оширса — қабул қилаётган юридик шахснинг белгиланган шаклдаги талабномасини.

Ўзбекистон Республикаси ҳудудида вақтинча турган, Ўзбекистон Республикасига визасиз кириш режими белгиланган Мустақил Давлатлар Ҳамдўстлигига аъзо давлатлар фуқаролари турар жой мулкдорининг (мулкдорларининг) аризасида кўрсатилган, аммо олти ойдан ортиқ бўлмаган муддатга турган жойи бўйича рўйхатдан ўтказилади.

Бошқа давлатлар ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқаролари ва фуқаролиги бўлмаган шахслар турар жой мулкдорининг (мулкдорларининг) аризасида кўрсатилган, аммо визасиз режим ўрнатилган муддатдан ёхуд берилган кириш ёки кириш-чиқиш визасининг амал қилиш муддатидан ортиқ бўлмаган муддатга турган жойи бўйича рўйхатдан ўтказилади.

Ўз ота-онасининг ёки ота-онасидан бирининг (ёлғиз отасининг ёки онасининг) турган жойи манзилида болани турган жойи бўйича рўйхатдан ўтказишда мулкдорнинг (мулкдорларнинг) турар жой майдони бериш тўғрисидаги аризаси (розилиги) талаб этилмайди.

Бошқа давлатлар ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқароларини ва фуқаролиги бўлмаган шахсларни корхоналар, муассасалар ва ташкилотлар тасарруфидаги хизмат турар жойида (ётоқхонада) турган жойи бўйича рўйхатдан ўтказиш мазкур корхоналар, муассасалар ва ташкилотлар раҳбарларининг ёзма рухсатига асосан ички ишлар органларининг миграция ва фуқароликни расмийлаштириш бўлинмаларида (шахсан мурожаат қилинганда) амалга оширилади. Бунда рўйхатдан ўтаётган шахс ушбу модда иккинчи қисмининг тўртинчи , бешинчи ва олтинчи хатбошиларида кўрсатилган ҳужжатларни тақдим этади.

Ҳужжатларни қабул қилган масъул ходим ҳужжатларнинг ҳақиқийлигини текширади ва бошқа давлат ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқаросини (фуқаролиги бўлмаган шахсни) турган жойи бўйича рўйхатдан ўтказиш тўғрисидаги электрон сўровномани (аризани) шакллантиради, электрон сўровномага (аризага) тақдим этилган ҳужжатларда кўрсатилган маълумотлар киритилади. Бунда электрон сўровнома (ариза) мулкдор (мулкдорлар) томонидан фойдаланувчини идентификация ва верификация қилиш воситалари орқали тасдиқланади, зарур бўлган тақдирда эса мулкдор (мулкдорлар) томонидан электрон сўровноманинг (аризанинг) қоғоздаги кўчирма нусхаси имзоланади. Корхоналар, муассасалар ва ташкилотлар тасарруфидаги хизмат турар жойида (ётоқхонада) турган жойи бўйича рўйхатдан ўтказишни амалга ошириш чоғида рўйхатдан ўтаётган шахс томонидан электрон сўровноманинг (аризанинг) қоғоздаги кўчирма нусхаси имзоланади. Шакллантирилган электрон сўровнома (ариза) «E-mehmon» тизимига юкланади.

Жойлаштириш воситасида турган, бошқа давлатлар ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқаросини ёки фуқаролиги бўлмаган шахсни турган жойи бўйича хабардор қилиш тартибида «E-mehmon» тизими орқали рўйхатдан ўтказиш учун жойлаштириш воситасининг масъул ходими томонидан бошқа давлатлар ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқаросини (фуқаролиги бўлмаган шахсни) турган жойи бўйича рўйхатдан ўтказиш тўғрисидаги электрон сўровнома шакллантирилади, электрон сўровномага рўйхатдан ўтаётган шахснинг ҳаракатланиш ҳужжатида кўрсатилган маълумотлар киритилади.

Даволаш муассасаларида стационар шароитда даволанаётган, бошқа давлат ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқаросини ёки фуқаролиги бўлмаган шахсни турган жойи бўйича хабардор қилиш тартибида «E-mehmon» тизими орқали рўйхатдан ўтказиш учун даволаш муассасасининг масъул ходими томонидан бошқа давлатлар ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқаросини (фуқаролиги бўлмаган шахсни) турган жойи бўйича рўйхатдан ўтказиш тўғрисидаги электрон сўровнома шакллантирилади, электрон сўровномага рўйхатдан ўтаётган шахснинг ҳаракатланиш ҳужжатида кўрсатилган маълумотлар киритилади.

Бошқа давлат ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқаросини (фуқаролиги бўлмаган шахсни) турган жойи бўйича рўйхатдан ўтказиш тўғрисидаги электрон сўровномани (аризани) кўриб чиқиш муддати бир иш кунидан ошмаслиги керак.

Турган жойи бўйича рўйхатдан ўтган шахсга турган жойи бўйича рўйхатдан ўтганлик тўғрисидаги электрон ва (ёки) қоғоз шаклидаги маълумотнома расмийлаштирилади.

Бошқа давлатлар ҳудудида доимий яшайдиган ва Ўзбекистон Республикаси ҳудудида вақтинча турган чет эл фуқаролари ва фуқаролиги бўлмаган шахслар Чет эл фуқаролари ва фуқаролиги бўлмаган шахсларнинг Ўзбекистон Республикасида бўлиши қоидаларига риоя этиши, шу жумладан ўзи турган жойи бўйича рўйхатдан ўтган манзилда яшаши, ҳаракатланиш ҳужжатини ёнида олиб юриши, уни ваколатли давлат органлари мансабдор шахсларининг талабига биноан тақдим этиши, шунингдек ҳаракатланиш ҳужжати йўқолганда бу ҳақда ички ишлар органларини ҳамда уларни қабул қилган жисмоний ёки юридик шахсларни дарҳол хабардор қилиши шарт.

Чет эл фуқаролари ва фуқаролиги бўлмаган шахсларнинг Ўзбекистон Республикасида бўлиши қоидалари Ўзбекистон Республикаси Президенти томонидан тасдиқланади.

5-боб. Уй-жой майдонининг ижтимоий нормаси ҳамда яшаш жойи ва турган жой бўйича рўйхатдан ўтказишни рад этиш учун асослар

20-модда. Яшаш жойи ва турган жой бўйича рўйхатдан ўтказишда уй-жой майдонининг ижтимоий нормасига риоя этиш

Яшаш жойи ва турган жой бўйича рўйхатдан ўтказишда уй-жой майдонининг ижтимоий нормасига риоя этиш талаб қилинади, бундан ушбу Қонуннинг 21-моддасида назарда тутилган ҳоллар мустасно.

Уй-жой майдонининг ижтимоий нормаси Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан бир киши ҳисобига ўн олти квадрат метрдан кам бўлмаган умумий майдон ҳажмида, ўриндиқли аравачада ҳаракатланадиган ногиронлар учун эса — йигирма уч квадрат метрдан кам бўлмаган ҳажмда белгиланади.

21-модда. Яшаш жойи бўйича рўйхатдан ўтиши чоғида ўзига нисбатан уй-жой майдонининг ижтимоий нормаси қўлланилмайдиган шахслар рўйхати

Қуйидаги Ўзбекистон Республикаси фуқароларига, Ўзбекистон Республикасида доимий яшовчи чет эл фуқароларига ва фуқаролиги бўлмаган шахсларга нисбатан уларни яшаш жойи бўйича рўйхатдан ўтказиш чоғида ушбу Қонуннинг 20-моддаси қоидалари қўлланилмайди:

эрга (хотинга) нисбатан — бир-бирининг яшаш жойи бўйича уй-жой майдонига;

ота-оналар, фарзандларга нисбатан — бир-бирининг яшаш жойи бўйича уй-жой майдонига;

бува, буви, невараларга нисбатан — бир-бирининг яшаш жойи бўйича уй-жой майдонига;

васийликдаги (ҳомийликдаги), шунингдек оилага тарбияга олинган (патронат) шахсларга нисбатан — васийнинг (ҳомийнинг), тутинган отанинг ёки онанинг яшаш жойи бўйича уй-жой майдонига;

ака-укалар, опа-сингилларга нисбатан — бир-бирининг яшаш жойи бўйича уй-жой майдонига;

озодликдан маҳрум этиш жойларидан озод қилинган шахсларга нисбатан — олдинги яшаш жойига, яъни ўз оила аъзоларининг, қариндошларининг ёки ҳукм қилингунига қадар ўзи биргаликда яшаб турган бошқа шахсларнинг уй-жой майдонига.

22-модда. Яшаш жойи ва турган жой бўйича рўйхатдан ўтказишни рад этиш учун асослар

Яшаш жойи ва турган жой бўйича рўйхатдан ўтказишни рад этиш учун қуйидагилар асос бўлади:

ушбу Қонунда кўрсатилган тегишли ҳужжатларнинг тақдим этилмаганлиги;

тақдим этилган маълумотларнинг ҳақиқатга тўғри келмаслиги;

давлат божини тўламаганлик;

турар жойни ўтказиб бериш учун тақиқ қўйилганлиги ва (ёки) хатлаб қўйилганлиги;

ушбу Қонуннинг 8-моддасида назарда тутилган асосларга кўра, Ўзбекистон Республикаси бўйлаб эркин ҳаракатланишга, турар ва яшаш жойини танлаш ҳуқуқига нисбатан чекловлар жорий этилганлиги;

ушбу Қонун 20-моддасининг биринчи қисмида назарда тутилган талабнинг бузилганлиги.

Яшаш жойи ва турган жой бўйича рўйхатдан ўтказишни бошқа асосларга кўра рад этиш тақиқланади.

Яшаш жойи ва турган жой бўйича рўйхатдан ўтказиш рад этилганлиги устидан суд тартибида шикоят қилиниши мумкин.

Шахснинг яшаш жойи ва турган жойи бўйича рўйхатдан ўтганлиги унда ўзи рўйхатдан ўтган турар жойга (уй-жой майдонига) бўлган мулк ҳуқуқи келиб чиқишига олиб келмайди.

6-боб. Якунловчи қоидалар

23-модда. Яшаш жойи ва турган жой бўйича рўйхатдан ўтиш қоидаларига риоя этилишини таъминлаш

Ички ишлар органларининг таянч пунктлари ҳамда маҳалла ҳуқуқ-тартибот масканлари профилактика катта инспекторлари ва профилактика инспекторлари ўзлари хизмат қилаётган ҳудудда яшаш жойи ва турган жой бўйича рўйхатдан ўтиш қоидаларига риоя этилишини таъминлаш учун жавобгардир.

Яшаш жойи ва турган жой бўйича рўйхатдан ўтиш қоидаларига риоя этилишини таъминлаш бўйича давлат органларининг ҳамда бошқа ташкилотларнинг фаолияти устидан назорат Ўзбекистон Республикаси Бош прокурори ва унга бўйсунувчи прокурорлар томонидан ўз ваколатлари доирасида амалга оширилади.

24-модда. Низоларни ҳал этиш

Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш соҳасидаги низолар қонунчиликда белгиланган тартибда ҳал этилади.

25-модда. Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш тўғрисидаги қонунчиликни бузганлик учун жавобгарлик

Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш тўғрисидаги қонунчиликни бузганликда айбдор шахслар белгиланган тартибда жавобгар бўлади.

26-модда. Ўзбекистон Республикасининг айрим қонун ҳужжатларига ўзгартиришлар киритиш

1. Ўзбекистон Республикасининг 1994 йил 22 сентябрда қабул қилинган 2015-ХII-сонли Қонуни билан тасдиқланган Ўзбекистон Республикасининг Маъмурий жавобгарлик тўғрисидаги кодексига (Ўзбекистон Республикаси Олий Кенгашининг Ахборотномаси, 1995 йил, № 3, 6-модда; Ўзбекистон Республикаси Олий Мажлисининг Ахборотномаси, 1995 йил, № 9, 193-модда, № 12, 269-модда; 1996 йил, № 5-6, 69-модда, № 9, 144-модда; 1997 йил, № 2, 56-модда, № 4-5, 126-модда, № 9, 241-модда; 1998 йил, № 3, 38-модда, № 5-6, 102-модда, № 9, 181-модда; 1999 йил, № 1, 20-модда, № 5, 124-модда, № 9, 229-модда; 2000 йил, № 5-6, 153-модда, № 7-8, 217-модда; 2001 йил, № 1-2, 23-модда, № 9-10, 165, 182-моддалар; 2002 йил, № 1, 20-модда, № 9, 165-модда; 2003 йил, № 1, 8-модда, № 5, 67-модда, № 9-10, 149-модда; 2004 йил, № 1-2, 18-модда, № 5, 90-модда, № 9, 171-модда; 2005 йил, № 1, 18-модда; Ўзбекистон Республикаси Олий Мажлиси палаталарининг Ахборотномаси, 2005 йил, № 9, 312-модда, № 12, 413, 417, 418-моддалар; 2006 йил, № 6, 261-модда, № 9, 498-модда, № 10, 536-модда, № 12, 656, 659-моддалар; 2007 йил, № 4, 158, 159, 164, 165-моддалар, № 9, 416, 421-моддалар, № 12, 596, 604, 607-моддалар; 2008 йил, № 4, 181, 189, 192-моддалар, № 9, 486, 488-моддалар, № 12, 640, 641-моддалар; 2009 йил, № 1, 1-модда, № 9, 334, 335, 337-моддалар, № 10, 380-модда, № 12, 462, 468, 470, 472, 474-моддалар; 2010 йил, № 5, 175, 179-моддалар, № 6, 231-модда, № 9, 335, 339, 341-моддалар, № 10, 380-модда, № 12, 468, 473, 474-моддалар; 2011 йил, № 1, 1-модда, № 4, 104, 105-моддалар, № 9, 247, 252-моддалар, № 12/2, 365-модда; 2012 йил, № 4, 108-модда, № 9/1, 242-модда, № 12, 336-модда; 2013 йил, № 4, 98-модда, № 10, 263-модда; 2014 йил, № 1, 2-модда, № 5, 130-модда, № 9, 244-модда, № 12, 341, 343-моддалар; 2015 йил, № 6, 228-модда, № 8, 310, 312-моддалар, № 12, 452-модда; 2016 йил, № 1, 2-модда, № 4, 125-модда, № 9, 276-модда, № 12, 383, 385-моддалар; 2017 йил, № 4, 137-модда, № 6, 300-модда, № 9, 510-модда, № 10, 605-модда; 2018 йил, № 1, 1, 4, 5-моддалар, № 4, 224-модда, № 7, 430, 431, 432-моддалар, № 10, 671, 673, 679-моддалар; 2019 йил, № 1, 1, 3, 5-моддалар, № 2, 47-модда, № 3, 161, 165, 166-моддалар, № 5, 259, 261, 267, 268-моддалар, № 7, 386-модда, № 8, 469, 471-моддалар, № 9, 591, 592-моддалар, № 10, 674, 676-моддалар, № 11, 787, 791-моддалар, № 12, 880, 891-моддалар; 2020 йил, № 1, 4-модда, № 3, 203, 204-моддалар, № 7, 449-модда, № 9, 539, 540-моддалар, № 10, 593, 596-моддалар, № 11, 651-модда, № 12, 691-модда; 2021 йил, № 1, 5, 7, 12, 13, 14-моддалар, № 2, 142-модда, № 3, 217-модда, № 4, 290, 293-моддалар, 4-сонга илова, № 8, 800, 802, 803-моддалар, № 9, 903-модда, № 10, 966, 967, 968, 973-моддалар, № 11, 1066-модда; 2022 йил, № 1, 1, 2-моддалар, № 2, 80, 81-моддалар, № 3, 215, 216-моддалар, № 4, 337-модда, № 5, 464, 465, 466, 467-моддалар, № 8, 787-модда, № 10, 981, 984-моддалар, № 12, 1188-модда; 2023 йил, № 3, 184, 185, 188, 189-моддалар, № 4, 265, 266, 268-моддалар, № 5, 319, 320-моддалар, № 7, 533, 534, 535, 537, 539-моддалар, № 8, 634-модда, № 10, 798-модда, № 11, 921, 923, 924-моддалар, № 12, 1004-модда; 2024 йил, № 1, 5, 7, 8, 9-моддалар, № 2, 102, 111, 115, 116-моддалар, № 3, 243, 245-моддалар, № 6, 530, 532-моддалар, № 7, 629-модда, № 8, 826, 829, 831-моддалар, № 9, 954, 964, 965-моддалар) қуйидаги ўзгартиришлар киритилсин:

1) 17-модда :

номининг ўзбекча матнидаги «Ажнабий фуқаролар» деган сўзлар «Чет эл фуқаролари» деган сўзлар билан алмаштирилсин;

биринчи қисмининг ўзбекча матнидаги «ажнабий фуқаролар» деган сўзлар «чет эл фуқаролари» деган сўзлар билан алмаштирилсин;

2) 223-модданинг матни қуйидаги таҳрирда баён этилсин:

«Ўзбекистон Республикаси фуқаросининг паспортсиз ёки идентификацияловчи ID-картасиз, амал қилиш муддати тугаганлиги сабабли алмаштирилиши лозим бўлган паспорт ёки идентификацияловчи ID-карта билан яшаши, шунингдек Ўзбекистон Республикасида доимий яшовчи чет эл фуқаросининг ва фуқаролиги бўлмаган шахснинг идентификацияловчи ID-картасиз (яшаш гувоҳномасисиз), амал қилиш муддати тугаганлиги сабабли алмаштирилиши лозим бўлган идентификацияловчи ID-картаси (яшаш гувоҳномаси) билан яшаши, —

базавий ҳисоблаш миқдорининг иккидан бир қисми миқдорида жарима солишга сабаб бўлади.

Ушбу модданинг биринчи қисмида назарда тутилган айни бир ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, —

базавий ҳисоблаш миқдорининг уч баравари миқдорида жарима солишга сабаб бўлади.

Ўзбекистон Республикаси фуқаросининг паспортини ёки идентификацияловчи ID-картасини ёхуд хорижга чиқиш учун биометрик паспортини яроқсизлантириши ёки йўқотиб қўйиши, Ўзбекистон Республикасида доимий яшовчи фуқаролиги бўлмаган шахснинг идентификацияловчи ID-картасини (яшаш гувоҳномасини) ёки ҳаракатланиш ҳужжатини, шунингдек Ўзбекистон Республикасида доимий яшовчи чет эл фуқаросининг идентификацияловчи ID-картасини (яшаш гувоҳномасини) яроқсизлантириши ёхуд йўқотиб қўйиши, —

базавий ҳисоблаш миқдорининг бир баравари миқдорида жарима солишга сабаб бўлади.

Ушбу модданинг учинчи қисмида назарда тутилган айни бир ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, —

базавий ҳисоблаш миқдорининг беш баравари миқдорида жарима солишга сабаб бўлади.

Ўзбекистон Республикаси фуқаросининг, Ўзбекистон Республикасида доимий яшовчи чет эл фуқаросининг ва фуқаролиги бўлмаган шахснинг яшаш жойи ёки турган жойи бўйича рўйхатдан ўтмасдан яшаши, —

базавий ҳисоблаш миқдорининг уч баравари миқдорида жарима солишга сабаб бўлади.

Ушбу модданинг бешинчи қисмида назарда тутилган айни бир ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, —

базавий ҳисоблаш миқдорининг беш баравари миқдорида жарима солишга сабаб бўлади.

Паспорт тизими қоидаларига риоя этиш учун масъул бўлган шахслар томонидан Ўзбекистон Республикаси фуқароларининг, чет эл фуқароларининг ва фуқаролиги бўлмаган шахсларнинг шахсини тасдиқловчи ҳужжатларсиз яшашига йўл қўйилиши, худди шунингдек шахслар томонидан ўз турар жойларида Ўзбекистон Республикаси фуқароларининг, чет эл фуқароларининг ва фуқаролиги бўлмаган шахсларнинг шахсини тасдиқловчи ҳужжатларсиз, яшаш жойи ёки турган жойи бўйича рўйхатдан ўтмасдан яшашига йўл қўйилиши, —

базавий ҳисоблаш миқдорининг беш баравари миқдорида жарима солишга сабаб бўлади.

Ушбу модданинг еттинчи қисмида назарда тутилган айни бир ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, —

базавий ҳисоблаш миқдорининг ўн баравари миқдорида жарима солишга сабаб бўлади.

Шахс ушбу моддада назарда тутилган ҳуқуқбузарликлар учун қуйидаги ҳолларда маъмурий жавобгарликка тортилмайди, агар у:

1) ўн саккиз ёшга тўлмаган бўлса;

2) олтмиш ёшдан ошган бўлса;

3) тўлиқ давлат таъминотида бўлса;

4) Ўзбекистон Республикаси ёки чет давлат ҳудудида табиий ҳамда техноген хусусиятли фавқулодда вазиятлар, шу жумладан маиший тусдаги офатлар (турар жойларнинг ёки яшаш учун мўлжалланмаган жойларнинг ёнғинлари, қулаши, транспорт воситаларининг ёниши) рўй берганлиги натижасида жабрланган бўлса (ушбу модданинг биринчи — олтинчи қисмларида назарда тутилган ҳуқуқбузарликларни содир этганлик учун);

5) қонунга хилоф равишда ҳукм қилинган ёки ишда айбланувчи, судланувчи сифатида иштирок этишга жалб қилинган бўлиб, паспортининг ёки идентификацияловчи ID-картасининг амал қилиши суд ажримига кўра тўхтатиб турилган бўлса (ушбу модданинг биринчи қисмида назарда тутилган ҳуқуқбузарликни содир этганлик учун);

6) жазони ижро этиш муассасасида жазони ўтаётган бўлса ёки жазони ўтаб чиқиб, бир ой ичида идентификацияловчи ID-карта расмийлаштириш учун мурожаат қилса (ушбу модданинг биринчи — олтинчи қисмларида назарда тутилган ҳуқуқбузарликларни содир этганлик учун);

7) учинчи шахсларнинг ғайриҳуқуқий ҳаракатлари ёки жиноят содир этилганлиги оқибатида паспортининг ёки идентификацияловчи ID-картасининг (яшаш гувоҳномасининг) яроқсиз ҳолга келганлиги ёки улар йўқолганлиги тўғрисида ариза берса (ушбу фактлар қонунчилик ҳужжатларида белгиланган тартибда аниқланган ҳолларда);

8) хизмат вазифаларини ёки фуқаролик бурчини бажариш чоғида, шунингдек енгиб бўлмас куч, охирги зарурат ёки зарурий мудофаа оқибатида паспортининг ёки идентификацияловчи ID-картасининг (яшаш гувоҳномасининг) яроқсиз ҳолга келганлиги ёки уларнинг йўқолганлиги тўғрисида ариза берса (ушбу ҳоллар қонунчиликда назарда тутилган тартибда аниқланган тақдирда).

Шахс ушбу моддада назарда тутилган ҳуқуқбузарликлар учун қонунчиликда белгиланган бошқа ҳолларда ҳам жавобгарликдан озод этилиши мумкин»;

3) 223 3 -модда қуйидаги таҳрирда баён этилсин:

«223 3 -модда. Паспортни ёки идентификацияловчи ID-картани гаровга олиш ёхуд паспортни ёки идентификацияловчи ID-картани қонунга хилоф равишда олиб қўйиш

Паспортни ёки идентификацияловчи ID-картани гаровга олиш, —

базавий ҳисоблаш миқдорининг икки баравари миқдорда жарима солишга сабаб бўлади.

Паспортни ёки идентификацияловчи ID-картани шахслардан қонунга хилоф равишда олиб қўйиш, —

базавий ҳисоблаш миқдорининг ўн баравари миқдорда жарима солишга сабаб бўлади»;

4) 225-модда :

биринчи қисмининг диспозицияси қуйидаги таҳрирда баён этилсин:

«Чет эл фуқаросининг ёки фуқаролиги бўлмаган шахснинг Ўзбекистон Республикасида бўлиш қоидаларини бузиши, яъни амал қилиш муддати тугаганлиги сабабли алмаштирилиши лозим бўлган ҳаракатланиш ҳужжатлари билан яшаши, турган жойи бўйича рўйхатдан ўтишнинг, кўчишнинг ёки яшаш жойини танлашнинг белгиланган тартибига риоя этмаганлиги, туриш муддати тугагач чиқиб кетишдан бўйин товлаши, худди шунингдек Ўзбекистон Республикаси ҳудуди орқали транзит ўтиш қоидаларига ўн суткагача риоя этмаганлиги»;

иккинчи қисмининг санкциясидаги «ўн» деган сўз «ўн беш» деган сўзлар билан алмаштирилсин;

учинчи қисмининг санкциясидаги «йигирма» деган сўз «йигирма беш» деган сўзлар билан алмаштирилсин;

тўртинчи қисмининг санкциясидаги «йигирма» деган сўз «йигирма беш» деган сўзлар билан алмаштирилсин;

бешинчи қисмининг :

диспозициясидаги «вақтинча» деган сўз чиқариб ташлансин;

санкциясидаги «ўн» деган сўз «ўн беш» деган сўзлар билан алмаштирилсин;

5) 239-модданинг бешинчи қисмидаги «чет давлатлар фуқароларидан» деган сўзлар «чет эл фуқароларидан» деган сўзлар билан алмаштирилсин;

6) 248-модда иккинчи қисмининг 3 ва 4-бандлари қуйидаги таҳрирда баён этилсин:

«3) ушбу Кодекснинг 54-моддасида назарда тутилган маъмурий ҳуқуқбузарликлар учун — темир йўл вокзаллари ва аэропортлардаги бўлинмаларнинг бошлиқлари ва бошлиқ ўринбосарлари, 223-моддасининг биринчи — саккизинчи қисмларида, 223 1 , 223 3 , 224-моддаларида, 225-моддасининг биринчи — бешинчи қисмларида назарда тутилган маъмурий ҳуқуқбузарликлар учун — темир йўл вокзаллари ва аэропортлардаги бўлинмаларнинг, ички ишлар органларининг миграция ва фуқароликни расмийлаштириш бўлинмаларининг (бўлимларининг, бошқармаларининг) бошлиқлари ҳамда бошлиқ ўринбосарлари, шунингдек ички ишлар органларининг миграция ва фуқароликни расмийлаштириш гуруҳларининг катта мутахассислари;

4) ушбу Кодекснинг 47-моддаси биринчи қисмида, 47 3 , 54, 56 1 -моддаларида, 110-моддасининг биринчи қисмида (фуқароларга нисбатан), 111-моддасининг биринчи қисмида, 113-моддасининг биринчи, иккинчи, тўртинчи ва бешинчи қисмларида, 114, 122, 123-моддаларида, 127-моддасида (товуш сигналини сабабсиз беришга доир қисмида), 128 6 -моддасида, 147-моддасининг биринчи қисмида (автомобиль йўлларини ўзбошимчалик билан қазиш, уларда сунъий нотекисликлар ва тўсиқлар яратганлик, автомобиль йўлида ишларни амалга ошириш учун берилган рухсатнома талабларини бажармаганлик, шунингдек йўлларни сақлаш қоидаларини бузганлик учун), 148-моддасида (ажратилган минтақаларда ва ёғоч кўприклардан 100 метргача бўлган масофада олов ёққанлик, тахта тўшамали кўприкларда чекканлик учун), 161-моддасида (фуқароларга нисбатан), 187-моддасининг биринчи қисмида, 188, 188 2 , 192, 221-моддаларида, 223-моддасининг биринчи — саккизинчи қисмларида, 223 1 , 223 3 -моддаларида, 224-моддасининг биринчи қисмида, 225-моддасининг биринчи — бешинчи қисмларида назарда тутилган маъмурий ҳуқуқбузарликлар учун — ички ишлар органлари таянч пунктларининг профилактика катта инспекторлари ва инспекторлари».

2. Ўзбекистон Республикасининг 2020 йил 6 январда қабул қилинган «Давлат божи тўғрисида»ги ЎРҚ-600-сонли Қонунига (Ўзбекистон Республикаси Олий Мажлиси палаталарининг Ахборотномаси, 2020 йил, № 1, 1-модда, № 3, 201-модда, № 5, 298-модда, № 10, 593-модда, № 12, 691-модда; 2021 йил, № 1, 13-модда, 4-сонга илова, № 7, 661-модда, № 8, 800, 803-моддалар, № 10, 968-модда; 2022 йил, № 2, 76-модда, № 3, 214, 216-моддалар, № 4, 340-модда, № 5, 463, 464, 467-моддалар, № 12, 1186-модда; 2023 йил, № 2, 103-модда, № 3, 186-модда, № 4, 265, 269-моддалар, № 6, 444, 445-моддалар, № 7, 538-модда, № 9, 710-модда; 2024 йил, № 1, 5, 6, 7-моддалар, № 2, 101, 105, 107, 108, 111, 112-моддалар, № 7, 628-модда, № 8, 819, 823, 831-моддалар, № 9, 958-модда) қуйидаги ўзгартиришлар киритилсин:

1) 5-модда :

6-бандидаги «Ўзбекистон Республикаси фуқароларини доимий яшаш ва вақтинча турган жойи бўйича рўйхатга олганлик учун, шунингдек чет эл фуқароларини ҳамда фуқаролиги бўлмаган шахсларни доимий яшаш жойи бўйича рўйхатга олганлик учун» деган сўзлар «Ўзбекистон Республикаси фуқароларини яшаш жойи ва турган жойи бўйича рўйхатга олганлик учун, шунингдек чет эл фуқароларини ҳамда фуқаролиги бўлмаган шахсларни яшаш жойи бўйича рўйхатга олганлик учун» деган сўзлар билан алмаштирилсин;

12-банди қуйидаги таҳрирда баён этилсин:

«12) чет эл фуқароларига ва фуқаролиги бўлмаган шахсларга кириш, чиқиш ёки кириш-чиқиш визаларини берганлик ва уларнинг амал қилиш муддатини узайтирганлик, чет эл фуқароларига ва фуқаролиги бўлмаган шахсларга кўп марталик кириш-чиқиш визаларини расмийлаштирганлик, чет эл фуқароларини ва фуқаролиги бўлмаган шахсларни кириш визасининг амал қилиш муддати даврига вақтинча турган жойи бўйича рўйхатдан ўтказганлик ва визанинг амал қилиш муддати узайтирилган даврда турган жойи бўйича рўйхатга олинган муддатини узайтирганлик учун, МДҲга аъзо давлатлар фуқароларини, шунингдек фуқаролик ҳақида белгилари мавжуд бўлмаган собиқ СССР паспортлари билан МДҲга аъзо давлатлардан келган шахсларни турган жойи бўйича рўйхатдан ўтказганлик, чет эл фуқаросининг, шу жумладан МДҲга аъзо давлатлар фуқаросининг ёки фуқаролиги бўлмаган шахснинг Ўзбекистон Республикасида доимий яшашга оид ҳужжатларини кўриб чиққанлик ва рухсатнома расмийлаштирганлик, чет эл фуқаросига ёки фуқаролиги бўлмаган шахсга паспорт ёки унинг ўрнини босувчи ҳужжат йўқолганлиги ҳақида маълумотномалар берганлик учун»;

2) 13-модда биринчи қисми 4-бандининг ўзбекча матнидаги «хорижга чиқиш учун Ўзбекистон Республикаси фуқаросининг идентификацияловчи ID-картасини ва Ўзбекистон Республикаси фуқаросининг биометрик паспортини» деган сўзлар «Ўзбекистон Республикаси фуқаросининг идентификацияловчи ID-картасини ва Ўзбекистон Республикаси фуқаросининг хорижга чиқиш учун биометрик паспортини» деган сўзлар билан алмаштирилсин;

3) 15-модда биринчи қисмининг биринчи хатбошиси қуйидаги таҳрирда баён этилсин:

«Яшаш жойи ва турган жой бўйича рўйхатдан ўтказганлик учун давлат божини тўлашдан қуйидагилар озод қилинади»;

4) 22-модданинг иккинчи қисмидаги «доимий яшаш ва вақтинча турган жойи» деган сўзлар «яшаш жойи ва турган жойи» деган сўзлар билан алмаштирилсин;

5) илова :

6-позициясининг:

«ж» бандидаги «доимий яшаш ёки вақтинча турган жойи» деган сўзлар «яшаш жойи ёки турган жойи» деган сўзлар билан алмаштирилсин;

«з» бандидаги «Ўзбекистон Республикаси ҳудудида доимий яшовчи чет эл фуқароларини ва фуқаролиги бўлмаган шахсларни доимий яшаш ва вақтинча турган жойи бўйича рўйхатдан ўтказганлик учун» деган сўзлар «Ўзбекистон Республикасида доимий яшовчи чет эл фуқароларини ва фуқаролиги бўлмаган шахсларни яшаш жойи ва турган жойи бўйича рўйхатдан ўтказганлик учун» деган сўзлар билан алмаштирилсин;

19-позицияси:

номидаги «кириш ёки кириш-чиқиш» деган сўзлар «кириш, чиқиш ёки кириш-чиқиш» деган сўзлар билан алмаштирилсин;

«а» бандининг биринчи хатбошисидаги «кириш ёки кириш-чиқиш» деган сўзлар «кириш, чиқиш ёки кириш-чиқиш» деган сўзлар билан алмаштирилсин;

«б» бандининг биринчи хатбошисидаги «кўп маротабали чиқиш-кириш» деган сўзлар «кўп маротабали кириш-чиқиш» деган сўзлар билан алмаштирилсин;

«в» бандининг биринчи хатбошисидаги «вақтинчалик рўйхатдан ўтказганлик ҳамда визанинг амал қилиш муддати узайтирилган даврда вақтинчалик рўйхатдан ўтказишни узайтирганлик учун» деган сўзлар «турган жойи бўйича рўйхатдан ўтказганлик ҳамда визанинг амал қилиш муддати узайтирилган даврда турган жойи бўйича рўйхатдан ўтказишни узайтирганлик учун» деган сўзлар билан алмаштирилсин;

«г» бандининг биринчи хатбошисидаги «вақтинчалик рўйхатдан» деган сўзлар «турган жойи бўйича рўйхатдан» деган сўзлар билан алмаштирилсин;

«д» бандидаги «доимий яшашга оид ҳужжатларини кўриб чиқиш ва расмийлаштирганлик учун» деган сўзлар «доимий яшашга оид ҳужжатларини кўриб чиққанлик ва рухсатномасини расмийлаштирганлик учун» деган сўзлар билан алмаштирилсин.

27-модда. Ўзбекистон Республикасининг айрим қонун ҳужжатларини ўз кучини йўқотган деб топиш

Қуйидагилар ўз кучини йўқотган деб топилсин:

1) Ўзбекистон Республикасининг 2011 йил 14 сентябрда қабул қилинган «Тошкент шаҳри ва Тошкент вилоятида доимий прописка қилиниши лозим бўлган шахслар — Ўзбекистон Республикаси фуқаролари тоифаларининг рўйхати тўғрисида»ги ЎРҚ-296-сонли Қонуни (Ўзбекистон Республикаси Олий Мажлиси палаталарининг Ахборотномаси, 2011 йил, № 9, 249-модда);

2) Ўзбекистон Республикасининг 2016 йил 25 апрелда қабул қилинган «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги ЎРҚ-405-сонли Қонунининг (Ўзбекистон Республикаси Олий Мажлиси палаталарининг Ахборотномаси, 2016 йил, № 4, 125-модда) 23-моддаси ;

3) Ўзбекистон Республикасининг 2016 йил 23 сентябрда қабул қилинган «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги ЎРҚ-411-сонли Қонунининг (Ўзбекистон Республикаси Олий Мажлиси палаталарининг Ахборотномаси, 2016 йил, № 9, 276-модда) 21-моддаси ;

4) Ўзбекистон Республикасининг 2020 йил 13 майда қабул қилинган «Тошкент шаҳри ва Тошкент вилоятида доимий прописка қилиниши лозим бўлган шахслар — Ўзбекистон Республикаси фуқаролари тоифаларининг рўйхати тўғрисида»ги Ўзбекистон Республикаси Қонунига ўзгартишлар ва қўшимча киритиш ҳақида»ги ЎРҚ-616-сонли Қонуни (Ўзбекистон Республикаси Олий Мажлиси палаталарининг Ахборотномаси, 2020 йил, № 5, 295-модда);

5) Ўзбекистон Республикасининг 2021 йил 21 апрелда қабул қилинган «Ўзбекистон Республикасининг айрим қонун ҳужжатларига ўзгартишлар киритиш тўғрисида»ги ЎРҚ-683-сонли Қонунининг (Ўзбекистон Республикаси Олий Мажлиси палаталарининг Ахборотномаси, 2021 йил, 4-сонга илова) 206-моддаси .

28-модда. Ушбу Қонуннинг ижросини, етказилишини, моҳияти ва аҳамияти тушунтирилишини таъминлаш

Ўзбекистон Республикаси Ички ишлар вазирлиги, Ташқи ишлар вазирлиги ва бошқа манфаатдор ташкилотлар ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.

29-модда. Қонунчиликни ушбу Қонунга мувофиқлаштириш

Ўзбекистон Республикаси Вазирлар Маҳкамаси:

ўн олти ёшга тўлган ва Ўзбекистон Республикаси фуқаролари бўлган шахсларга ёхуд Ўзбекистон Республикасида доимий яшовчи фуқаролиги бўлмаган шахсларга ёки чет эл фуқаролари бўлган шахсларга янги идентификацияловчи ID-карталарни уларнинг фамилияси, исми, отасининг исми ёки туғилган санаси ўзгарган, шу жумладан никоҳ қайд этилганлиги ёки никоҳдан ажралганлик муносабати билан фамилияси ўзгарган тақдирда, бир вақтнинг ўзида гербли гувоҳномаларни расмийлаштирган ҳолда мажбурий равишда расмийлаштириш тартибини ушбу Қонун расмий эълон қилинган кундан эътиборан уч ой ичида ишлаб чиқсин ва тасдиқласин;

ҳукумат қарорларини ушбу Қонунга мувофиқлаштирсин;

республика ижро этувчи ҳокимият органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.

30-модда. Ушбу Қонуннинг кучга кириши

Ушбу Қонун расмий эълон қилинган кундан эътиборан уч ой ўтгач кучга киради.

Ушбу Қонун 26-моддаси биринчи қисми 1-бандининг 1 , 2 , 3 , 5 ва 6-кичик бандлари ушбу Қонун расмий эълон қилинган кундан эътиборан амалга киритилади.

Ўзбекистон Республикасининг Президенти Ш. МИРЗИЁЕВ

Тошкент ш.,

2025 йил 10 июль,

ЎРҚ-1074-сон

(Қонунчилик маълумотлари миллий базаси, 11.07.2025 й., 03/25/1074/0596-сон)

lex.uz

Oʻzbekiston Respublikasining Qonuni

Oʻzbekiston Respublikasi fuqarolarini, chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish toʻgʻrisida

Qonunchilik palatasi tomonidan 2024-yil 15-oktabrda qabul qilingan Senat tomonidan 2025-yil 24-yanvarda maʼqullangan

1-bob. Umumiy qoidalar

1-modda. Ushbu Qonunning maqsadi

Ushbu Qonunning maqsadi Oʻzbekiston Respublikasi fuqarolarini, chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish bilan bogʻliq munosabatlarni tartibga solishdan iborat.

2-modda. Oʻzbekiston Respublikasi fuqarolarini, chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish toʻgʻrisidagi qonunchilik

Oʻzbekiston Respublikasi fuqarolarini, chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish toʻgʻrisidagi qonunchilik ushbu Qonun va boshqa qonunchilik hujjatlaridan iboratdir.

Agar Oʻzbekiston Respublikasining xalqaro shartnomasida Oʻzbekiston Respublikasi fuqarolarini, chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish toʻgʻrisidagi Oʻzbekiston Respublikasi qonunchiligida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

3-modda. Oʻzbekiston Respublikasi fuqarolarini, chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish asoslari

Oʻzbekiston Respublikasi fuqarolarining, shuningdek qonuniy asoslarda Oʻzbekiston Respublikasi hududida boʻlib turgan chet el fuqarolarining hamda fuqaroligi boʻlmagan shaxslarning Oʻzbekiston Respublikasi boʻylab erkin harakatlanishga, turar va yashash joyini tanlashga doir konstitutsiyaviy huquqini, boshqa huquqlari va erkinliklarini amalga oshirish uchun zarur shart-sharoitlarni, shuningdek ular tomonidan boshqa shaxslar, davlat va jamiyat oldidagi majburiyatlar bajarilishini taʼminlash maqsadida Oʻzbekiston Respublikasi fuqarolarini, chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish (bundan buyon matnda yashash joyi va turgan joy boʻyicha roʻyxatdan oʻtkazish deb yuritiladi) amalga oshiriladi.

Yashash joyi va turgan joy boʻyicha roʻyxatdan oʻtkazish ruxsat etish xususiyatiga ega emas.

Oʻzbekiston Respublikasi fuqarolarining, chet el fuqarolarining hamda fuqaroligi boʻlmagan shaxslarning yashash joyi yoki turgan joyi boʻyicha roʻyxatdan oʻtmaganligi, agar qonunchilikda boshqacha qoida nazarda tutilmagan boʻlsa, ularning huquqlari va erkinliklarini cheklash uchun asos boʻlmaydi.

4-modda. Yashash joyi va turgan joy tushunchalari

Shaxs mulkdor sifatida, ijara (ikkilamchi ijara), tekin foydalanish shartnomasi boʻyicha yoki qonunchilikda nazarda tutilgan boshqa asoslarga koʻra doimiy ravishda (asosan) yashaydigan hamda oʻzi yashash joyi boʻyicha roʻyxatdan oʻtgan uy, kvartira, xizmat turar joyi, maxsus uy (yotoqxona, vaqtinchalik uy-joy fondi uyi yoki nogironlar, faxriylar, yolgʻiz qariyalar uchun internat-uy, shuningdek bolalar uyi yoki boshqa maxsus maqsadli uy) yoxud boshqa turar joy yashash joyidir.

Shaxs qonunchilikda nazarda tutilgan asoslarda vaqtincha yashaydigan joylashtirish vositasi, davolash muassasasi yoki shaxsning yashash joyi hisoblanmaydigan turar joy turgan joydir.

Oʻn toʻrt yoshga toʻlmagan voyaga yetmagan shaxslarning yoki vasiylikdagi shaxslarning qonuniy vakillari — tegishincha ota-onalari (yolgʻiz otasi yoki onasi), farzandlikka oluvchilari yoki vasiylari yashaydigan joy mazkur voyaga yetmagan shaxslarning yoki vasiylikdagi shaxslarning yashash joyi hisoblanadi.

Oʻn toʻrt yoshdan oʻn olti yoshga qadar boʻlgan voyaga yetmagan shaxslarning yoki homiylikdagi shaxslarning qonuniy vakillari — tegishincha ota-onalari (yolgʻiz otasi yoki onasi), farzandlikka oluvchilari yoki homiylari yashaydigan joy mazkur voyaga yetmagan shaxslarning yoki homiylikdagi shaxslarning yashash joyi hisoblanadi.

5-modda. Asosiy tushunchalar

Ushbu Qonunda quyidagi asosiy tushunchalar qoʻllaniladi:

bola — oʻn sakkiz yoshga toʻlgunga (voyaga yetgunga) qadar boʻlgan shaxs;

vasiylikdagi yoki homiylikdagi bola (bundan buyon matnda vasiylikdagi (homiylikdagi) bola deb yuritiladi) — oʻziga nisbatan vasiylik yoki homiylik belgilangan bola;

davolash muassasalari — sanatoriylar, davolash pansionatlari, davlat klinikalari va xususiy klinikalar, shifoxonalar, kasalxonalar va boshqa tibbiyot muassasalari;

yolgʻiz ota yoki ona — bolani tarbiyalayotgan ota (ona), basharti bolaning tugʻilganligi toʻgʻrisidagi rasmiy hujjatlarda ota-onasidan biri haqidagi maʼlumotlar mavjud boʻlmasa yoxud bunday maʼlumotlar bolani tarbiyalayotgan otaning (onaning) soʻzlariga asosan kiritilgan boʻlsa;

joylashtirish vositalari — mehmonxonalar, turistik bazalar va majmualar, dam olish uylari va zonalari, pansionatlar, kempinglar, motellar, mehmon uylari, oʻtov va chodirli oromgohlar, sanatoriylar hamda mehmonxona xizmatlari (joylashtirish boʻyicha xizmatlar) koʻrsatiladigan boshqa obyektlar;

identifikatsiyalovchi ID-karta (bundan buyon matnda identifikatsiyalovchi karta deb yuritiladi) — Oʻzbekiston Respublikasi hududida identifikatsiyalovchi karta egasining shaxsini va fuqaroligini, yashash joyi boʻyicha roʻyxatdan oʻtkazilganligini tasdiqlaydigan, egasining shaxsiga doir biografik va biometrik maʼlumotlar kiritilgan elektron jismga (chipga) ega boʻlgan, Oʻzbekiston Respublikasi fuqarosiga, chet el fuqarosiga yoki fuqaroligi boʻlmagan shaxsga beriladigan hujjat;

turgan joy boʻyicha roʻyxatdan oʻtkazish — Oʻzbekiston Respublikasi fuqarosining, chet el fuqarosining yoki fuqaroligi boʻlmagan shaxsning turgan joyi toʻgʻrisidagi maʼlumotlarni belgilangan tartibda qayd etish;

fuqaroligi boʻlmagan shaxs — Oʻzbekiston Respublikasining fuqarosi boʻlmagan va oʻzining chet davlat fuqaroligiga mansubligiga doir dalilga ega boʻlmagan shaxs;

chet el fuqarosi — Oʻzbekiston Respublikasining fuqaroligiga ega boʻlmagan, boshqa davlat fuqaroligiga va oʻzining boshqa davlat fuqaroligiga mansubligiga doir dalilga ega boʻlgan shaxs;

yashash joyi boʻyicha roʻyxatdan oʻtkazish — Oʻzbekiston Respublikasi fuqarosining, shuningdek Oʻzbekiston Respublikasida doimiy yashovchi chet el fuqarosining yoki fuqaroligi boʻlmagan shaxsning yashash joyi toʻgʻrisidagi maʼlumotlarni belgilangan tartibda qayd etish;

Oʻzbekiston Respublikasining xorijda doimiy yashovchi fuqarosi — Oʻzbekiston Respublikasidagi yashash joyi boʻyicha roʻyxatdan oʻtganligi bekor qilingan hamda xorijga doimiy yashash uchun chiqib ketishga doir ruxsatnoma rasmiylashtirgan Oʻzbekiston Respublikasi fuqarosi;

harakatlanish hujjatlari — milliy pasportlar, shuningdek ularning oʻrnini bosuvchi boshqa hujjatlar boʻlib, ular asosida chet el fuqarolari va fuqaroligi boʻlmagan shaxslar Oʻzbekiston Respublikasining qonunchiligiga hamda xalqaro shartnomalariga muvofiq Oʻzbekiston Respublikasi hududiga kirish (undan chiqish) va uning hududida boʻlish huquqiga ega boʻladi;

“E-mehmon” avtomatlashtirilgan axborot tizimi (bundan buyon matnda “E-mehmon” tizimi deb yuritiladi) — joylashtirish vositalarida va davolash muassasalarida foydalaniladigan, joylashtirish vositalarida yashovchi yoki davolash muassasalarida statsionar sharoitda davolanayotgan shaxslarni turgan joyi boʻyicha xabardor qilish tartibida roʻyxatdan oʻtkazishni amalga oshirish uchun moʻljallangan avtomatlashtirilgan axborot tizimi;

“E-xabar berish” avtomatlashtirilgan axborot tizimi (bundan buyon matnda “E-xabar berish” tizimi deb yuritiladi) — shaxslarni turgan joyi boʻyicha xabardor qilish tartibida roʻyxatdan oʻtkazishni amalga oshirish uchun moʻljallangan avtomatlashtirilgan axborot tizimi;

“Manzil” avtomatlashtirilgan axborot tizimi (bundan buyon matnda “Manzil” tizimi deb yuritiladi) — shaxslarni yashash joyi boʻyicha roʻyxatdan oʻtkazishni amalga oshirish uchun moʻljallangan avtomatlashtirilgan axborot tizimi.

6-modda. Yashash joyi va turgan joy boʻyicha roʻyxatdan oʻtkazishning asosiy qoidalari

Oʻzbekiston Respublikasi fuqarolari, chet el fuqarolari va fuqaroligi boʻlmagan shaxslar yashash joyi va turgan joyi boʻyicha roʻyxatdan oʻtishi shart.

Shaxslarning yashashi uchun uy-joy maydonini beruvchi turar joy mulkdori yoki turar joyni tasarruf etish huquqiga ega boʻlgan shaxs ushbu shaxslarni yashash joyi yoki turgan joyi boʻyicha oʻz vaqtida roʻyxatdan oʻtkazishi kerak.

Joylashtirish vositalarida turgan shaxslarni turgan joyi boʻyicha xabardor qilish tartibida roʻyxatdan oʻtkazish joylashtirish vositalarining masʼul xodimlari tomonidan “E-mehmon” tizimi orqali amalga oshiriladi.

Davolash muassasalarida statsionar sharoitda davolanayotgan shaxslarni turgan joyi boʻyicha xabardor qilish tartibida roʻyxatdan oʻtkazish ushbu muassasalarning masʼul xodimlari tomonidan “E-mehmon” tizimi orqali amalga oshiriladi.

FHDY organi tomonidan bolaning tugʻilganlik haqidagi dalolatnoma yozuvini “FHDYning yagona elektron arxivi” axborot tizimida roʻyxatdan oʻtkazish chogʻida ushbu maʼlumotlar mazkur axborot tizimi orqali ota-onasining (yolgʻiz otasining yoki onasining) yashash joyiga muvofiq bolani yashash joyi boʻyicha roʻyxatdan oʻtkazish uchun avtomatik ravishda “Manzil” tizimiga bir vaqtning oʻzida kelib tushadi.

Oʻn olti yoshga toʻlmagan bolani yashash joyi (turgan joyi) boʻyicha roʻyxatdan oʻtkazish uning ota-onasining (yolgʻiz otasining yoki onasining), tutingan ota-onasining yoki vasiysining (homiysining) arizasiga asosan ularning yashash joyi (turgan joyi) boʻyicha amalga oshiriladi.

Tarbiya, davolash muassasalarida va boshqa muassasalarda turgan yetim bolalar, ota-ona qaramogʻidan mahrum boʻlgan bolalar, shuningdek qariyalar uylaridagi shaxslarni yashash joyi boʻyicha roʻyxatdan oʻtkazish tegishincha tarbiya, davolash muassasalari va boshqa muassasalar, shuningdek qariyalar uylari rahbarlarining xatlariga asosan ichki ishlar organlarining migratsiya va fuqarolikni rasmiylashtirish boʻlinmalari tomonidan amalga oshiriladi.

Jazoni ijro etish muassasalariga jazoni oʻtash uchun keltirilgan shaxslarni turgan joyi boʻyicha roʻyxatdan oʻtkazish jazoni ijro etish muassasalari rahbarlarining xatlariga asosan ichki ishlar organlarining migratsiya va fuqarolikni rasmiylashtirish boʻlinmalari tomonidan amalga oshiriladi.

Oʻzbekiston Respublikasi fuqarolarini, chet el fuqarolarini va fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazganlik uchun “Davlat boji toʻgʻrisida”gi Oʻzbekiston Respublikasi Qonunida belgilangan miqdorda davlat boji undiriladi.

7-modda. Yashash joyi va turgan joy boʻyicha roʻyxatdan oʻtish zarur boʻlgan muddatlar

Oʻzbekiston Respublikasi fuqarolari, shuningdek Oʻzbekiston Respublikasida doimiy yashovchi chet el fuqarolari va fuqaroligi boʻlmagan shaxslar oʻz yashash joyi yoki turgan joyi oʻzgargan taqdirda, yangi yashash joyiga yoki turgan joyiga kelgan kundan eʼtiboran oʻn ish kunidan kechiktirmay tegishincha yashash joyi yoki turgan joyi boʻyicha roʻyxatdan oʻtishi shart.

Oʻzbekiston Respublikasining xorijda doimiy yashovchi fuqarolari Oʻzbekiston Respublikasiga kirgan kundan eʼtiboran oʻn ish kunidan kechiktirmay yashash joyi yoki turgan joyi boʻyicha roʻyxatdan oʻtishi shart.

Boshqa davlatlar hududida doimiy yashovchi chet el fuqarolari va fuqaroligi boʻlmagan shaxslar Oʻzbekiston Respublikasiga kirgan kundan eʼtiboran, agar Oʻzbekiston Respublikasining xalqaro shartnomalari yoki qonunchiligida boshqacha muddat nazarda tutilmagan boʻlsa, uch ish kunidan kechiktirmay turgan joyi boʻyicha roʻyxatdan oʻtishi shart.

8-modda. Oʻzbekiston Respublikasi boʻylab erkin harakatlanish, turar va yashash joyini tanlash huquqi cheklangan hududlar

Oʻzbekiston Respublikasi qonunchiligiga muvofiq Oʻzbekiston Respublikasining quyidagi hududlarida Oʻzbekiston Respublikasi fuqarolarining, chet el fuqarolarining va fuqaroligi boʻlmagan shaxslarning Oʻzbekiston Respublikasi boʻylab erkin harakatlanish, turar va yashash joyini tanlash huquqi cheklanishi mumkin:

chegara zonasida;

yopiq harbiy shaharchalarda;

yopiq maʼmuriy-hududiy tuzilmalarda;

tabiiy hamda texnogen xususiyatli favqulodda vaziyatlar roʻy bergan zonalarda, shuningdek fuqarolarning hayoti, sogʻligʻi va xavfsizligiga tahdid soladigan boshqa joylarda;

yuqumli kasalliklarning hamda yuqumli boʻlmagan ommaviy kasalliklarning tarqalishi, odamlarning zaharlanish xavfi mavjud boʻlganligi munosabati bilan aholining yashashi hamda xoʻjalik faoliyati uchun alohida shartlar va rejimlar joriy etilgan ayrim hududlarda hamda aholi punktlarida;

oʻta muhim va toifalangan obyektlarda;

favqulodda yoki harbiy holat eʼlon qilingan hududlarda.

2-bob. Yashash joyi va turgan joy boʻyicha roʻyxatdan oʻtkazish sohasidagi davlat boshqaruvi

9-modda. Oʻzbekiston Respublikasi Vazirlar Mahkamasining yashash joyi va turgan joy boʻyicha roʻyxatdan oʻtkazish sohasidagi vakolatlari

Oʻzbekiston Respublikasi Vazirlar Mahkamasi:

yashash joyi va turgan joy boʻyicha roʻyxatdan oʻtkazish sohasida yagona davlat siyosati amalga oshirilishini taʼminlaydi;

yashash joyi va turgan joy boʻyicha roʻyxatdan oʻtkazish sohasidagi davlat dasturlarining hamda boshqa dasturlarning ishlab chiqilishi, tasdiqlanishi va roʻyobga chiqarilishini taʼminlaydi;

Oʻzbekiston Respublikasi fuqarolarini, chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish toʻgʻrisidagi qonunchilik talablariga rioya etilishi ustidan davlat nazoratini amalga oshirish tartibini belgilaydi;

yashash joyi va turgan joy boʻyicha roʻyxatdan oʻtkazish sohasidagi maʼmuriy reglamentlarni tasdiqlaydi.

Oʻzbekiston Respublikasi Vazirlar Mahkamasi qonunchilikka muvofiq boshqa vakolatlarni ham amalga oshirishi mumkin.

10-modda. Oʻzbekiston Respublikasi Ichki ishlar vazirligining yashash joyi va turgan joy boʻyicha roʻyxatdan oʻtkazish sohasidagi vakolatlari

Oʻzbekiston Respublikasi Ichki ishlar vazirligi:

yashash joyi va turgan joy boʻyicha roʻyxatdan oʻtkazish sohasidagi yagona davlat siyosatini amalga oshiradi;

yashash joyi va turgan joy boʻyicha roʻyxatdan oʻtkazish sohasidagi davlat dasturlarini hamda boshqa dasturlarni ishlab chiqish va amalga oshirishda ishtirok etadi;

yashash joyi va turgan joy boʻyicha roʻyxatdan oʻtkazish sohasidagi faoliyatni amalga oshiradi hamda nazorat qiladi;

yashash joyi va turgan joy boʻyicha roʻyxatdan oʻtkazish sohasida mutaxassislar tayyorlanishini, qayta tayyorlanishini hamda ularning malakasi oshirilishini taʼminlaydi;

yashash joyi va turgan joy boʻyicha roʻyxatdan oʻtkazishga doir uslubiy koʻrsatmalarni, tavsiyanomalarni ishlab chiqish hamda joriy etishda ishtirok etadi.

Oʻzbekiston Respublikasi Ichki ishlar vazirligi qonunchilikka muvofiq boshqa vakolatlarni ham amalga oshirishi mumkin.

11-modda. Yashash joyi va turgan joy boʻyicha roʻyxatdan oʻtkazish sohasida davlat organlari, fuqarolarning oʻzini oʻzi boshqarish organlari va boshqa tashkilotlar bilan hamkorlik

Ichki ishlar organlari yashash joyi va turgan joy boʻyicha roʻyxatdan oʻtkazish sohasida oʻz zimmasiga yuklatilgan vazifalarni bajarish maqsadida qonunchilikda belgilangan tartibda davlat organlari, fuqarolarning oʻzini oʻzi boshqarish organlari va boshqa tashkilotlar bilan hamkorlikni amalga oshiradi.

3-bob. Oʻzbekiston Respublikasi fuqarolarini yashash joyi va turgan joyi boʻyicha roʻyxatdan oʻtkazish

12-modda. Oʻzbekiston Respublikasi fuqarolarini yashash joyi boʻyicha roʻyxatdan oʻtkazish

Oʻzbekiston Respublikasi fuqarolarini yashash joyi boʻyicha roʻyxatdan oʻtkazish:

ichki ishlar organlarining migratsiya va fuqarolikni rasmiylashtirish boʻlinmalarida (shaxsan murojaat qilinganda);

davlat xizmatlari markazlarida (shaxsan murojaat qilinganda);

Yagona interaktiv davlat xizmatlari portali orqali (xabardor qilish tartibida) amalga oshiriladi.

Yashash joyi boʻyicha roʻyxatdan oʻtish masalasida ichki ishlar organlarining migratsiya va fuqarolikni rasmiylashtirish boʻlinmasiga yoki davlat xizmatlari markaziga murojaat qilgan roʻyxatdan oʻtayotgan shaxs quyidagi hujjatlarni taqdim etadi:

turar joy mulkdorining (mulkdorlarining) uy-joy maydonini berish toʻgʻrisidagi arizasini (roziligini), shaxsan borish imkoni mavjud boʻlmaganda esa uning (ularning) notarial tartibda tasdiqlangan arizasini (roziligini);

turar joy mulkdorining (mulkdorlarining) pasportini (yashash guvohnomasini) yoki identifikatsiyalovchi kartasini;

roʻyxatdan oʻtayotgan shaxsning pasportini yoki identifikatsiyalovchi kartasini;

oʻn olti yoshga toʻlmagan bola arizada koʻrsatilgan taqdirda, uning tugʻilganlik toʻgʻrisidagi guvohnomasini yoki shaxsini tasdiqlovchi boshqa hujjatlarni;

vasiylikdagi (homiylikdagi) bola yoki oilaga tarbiyaga olingan (patronat) bola arizada koʻrsatilgan taqdirda, vasiylikni (homiylikni) tasdiqlovchi hujjatlarni yoki bolani oilaga tarbiyaga olish toʻgʻrisidagi kelishuvni.

Oʻz ota-onasining yoki ota-onasidan birining (yolgʻiz otasining yoki onasining) yashash joyi manzilida bolani yashash joyi boʻyicha roʻyxatdan oʻtkazishda mulkdorning (mulkdorlarning) turar joy maydoni berish toʻgʻrisidagi arizasi (roziligi) talab etilmaydi.

Oʻzbekiston Respublikasi fuqarolarini korxonalar, muassasalar va tashkilotlar tasarrufidagi xizmat turar joyida (yotoqxonada) yashash joyi boʻyicha roʻyxatdan oʻtkazish turar joyning hujjatiga (orderga) yoki mazkur korxonalar, muassasalar va tashkilotlar rahbarlarining yozma ruxsatiga asosan ichki ishlar organlarining migratsiya va fuqarolikni rasmiylashtirish boʻlinmalarida (shaxsan murojaat qilinganda) amalga oshiriladi. Bunda roʻyxatdan oʻtayotgan shaxs ushbu modda ikkinchi qismining toʻrtinchi , beshinchi va oltinchi xatboshilarida koʻrsatilgan hujjatlarni taqdim etadi.

Hujjatlarni qabul qilgan masʼul xodim hujjatlarning haqiqiyligini tekshiradi va Oʻzbekiston Respublikasi fuqarosini yashash joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) shakllantiradi, elektron soʻrovnomaga (arizaga) taqdim etilgan hujjatlarda koʻrsatilgan maʼlumotlar kiritiladi. Bunda elektron soʻrovnoma (ariza) roʻyxatdan oʻtayotgan shaxs tomonidan foydalanuvchini identifikatsiya va verifikatsiya qilish vositalari orqali tasdiqlanadi, zarur boʻlgan taqdirda esa roʻyxatdan oʻtayotgan shaxs tomonidan elektron soʻrovnomaning (arizaning) qogʻozdagi koʻchirma nusxasi imzolanadi. Shakllantirilgan elektron soʻrovnoma (ariza) “Manzil” tizimiga yuklanadi.

Roʻyxatdan oʻtayotgan shaxs Yagona interaktiv davlat xizmatlari portali orqali yashash joyi boʻyicha xabardor qilish tartibida oʻzini roʻyxatdan oʻtkazish uchun Oʻzbekiston Respublikasi fuqarosini yashash joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) shakllantiradi, elektron soʻrovnomaga (arizaga) ushbu modda ikkinchi qismining toʻrtinchi, beshinchi va oltinchi xatboshilarida sanab oʻtilgan hujjatlarda koʻrsatilgan maʼlumotlar kiritiladi. Bunda elektron soʻrovnoma (ariza) roʻyxatdan oʻtayotgan shaxs hamda turar joy mulkdori (mulkdorlari) tomonidan foydalanuvchini identifikatsiya va verifikatsiya qilish vositalari orqali tasdiqlanadi.

Oʻzbekiston Respublikasi fuqarosini yashash joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) koʻrib chiqish muddati bir ish kunidan oshmasligi kerak.

Yashash joyi boʻyicha roʻyxatdan oʻtgan shaxsga yashash joyi boʻyicha roʻyxatdan oʻtganlik toʻgʻrisidagi elektron va (yoki) qogʻoz shaklidagi maʼlumotnoma rasmiylashtiriladi.

13-modda. Oʻzbekiston Respublikasi fuqarolarini turgan joyi boʻyicha roʻyxatdan oʻtkazish

Oʻzbekiston Respublikasi fuqarolarini turgan joyi boʻyicha roʻyxatdan oʻtkazish:

ichki ishlar organlarining migratsiya va fuqarolikni rasmiylashtirish boʻlinmalarida (shaxsan murojaat qilinganda);

ichki ishlar organlarining tayanch punktlarida va mahalla huquq-tartibot maskanlarida (shaxsan murojaat qilinganda);

davlat xizmatlari markazlarida (shaxsan murojaat qilinganda);

Yagona interaktiv davlat xizmatlari portali orqali (xabardor qilish tartibida);

“E-xabar berish” tizimi orqali (xabardor qilish tartibida);

joylashtirish vositalarida yoki davolash muassasalarida “E-mehmon” tizimi orqali (xabardor qilish tartibida) amalga oshiriladi.

Oʻzbekiston Respublikasi fuqarosining yashash joyi boʻyicha roʻyxatdan oʻtganligi mavjud emasligi uni turgan joyi boʻyicha roʻyxatdan oʻtkazishni rad etish uchun asos boʻlmaydi.

Turgan joyi boʻyicha roʻyxatdan oʻtish masalasida ichki ishlar organlarining migratsiya va fuqarolikni rasmiylashtirish boʻlinmasiga, ichki ishlar organlarining tayanch punktiga yoki mahalla huquq-tartibot maskaniga, davlat xizmatlari markaziga murojaat qilgan roʻyxatdan oʻtayotgan shaxs quyidagi hujjatlarni taqdim etadi:

turar joy mulkdorining (mulkdorlarining) uy-joy maydonini berish toʻgʻrisidagi arizasini (roziligini), shaxsan borish imkoni mavjud boʻlmaganda esa uning (ularning) notarial tartibda tasdiqlangan arizasini (roziligini);

turar joy mulkdorining (mulkdorlarining) pasportini (yashash guvohnomasini) yoki identifikatsiyalovchi kartasini;

roʻyxatdan oʻtayotgan shaxsning pasportini yoki identifikatsiyalovchi kartasini;

oʻn olti yoshga toʻlmagan bola arizada koʻrsatilgan taqdirda, uning tugʻilganlik toʻgʻrisidagi guvohnomasini yoki shaxsini tasdiqlovchi boshqa hujjatlarni;

vasiylikdagi (homiylikdagi) bola yoki oilaga tarbiyaga olingan (patronat) bola arizada koʻrsatilgan taqdirda, vasiylikni (homiylikni) tasdiqlovchi hujjatlarni yoki bolani oilaga tarbiyaga olish toʻgʻrisidagi kelishuvni.

Soliq organlarida hisobga olingan turar joyning ijara shartnomasi taqdim etilganda turar joy mulkdorining (mulkdorlarining) uy-joy maydonini berish toʻgʻrisidagi arizasi (roziligi) talab etilmaydi.

Oʻzbekiston Respublikasi fuqarolari turar joy mulkdorining (mulkdorlarining) arizasida yoki soliq organlarida hisobga olingan turar joyning ijara shartnomasida koʻrsatilgan, ammo bir yildan ortiq boʻlmagan muddatga turgan joyi boʻyicha roʻyxatdan oʻtkaziladi.

Oʻz ota-onasining yoki ota-onasidan birining (yolgʻiz otasining yoki onasining) turgan joyi manzilida bolani turgan joyi boʻyicha roʻyxatdan oʻtkazishda mulkdorning (mulkdorlarning) turar joy maydoni berish toʻgʻrisidagi arizasi (roziligi) talab etilmaydi.

Oʻzbekiston Respublikasi fuqarolarini korxonalar, muassasalar va tashkilotlar tasarrufidagi xizmat turar joyida (yotoqxonada) turgan joyi boʻyicha roʻyxatdan oʻtkazish mazkur korxonalar, muassasalar va tashkilotlar rahbarlarining yozma ruxsatiga asosan ichki ishlar organlarining migratsiya va fuqarolikni rasmiylashtirish boʻlinmalarida (shaxsan murojaat qilinganda) amalga oshiriladi. Bunda roʻyxatdan oʻtayotgan shaxs ushbu modda uchinchi qismining toʻrtinchi , beshinchi va oltinchi xatboshilarida koʻrsatilgan hujjatlarni taqdim etadi.

Hujjatlarni qabul qilgan masʼul xodim hujjatlarning haqiqiyligini tekshiradi va Oʻzbekiston Respublikasi fuqarosini turgan joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) shakllantiradi, elektron soʻrovnomaga (arizaga) taqdim etilgan hujjatlarda koʻrsatilgan maʼlumotlar kiritiladi. Bunda elektron soʻrovnoma (ariza) roʻyxatdan oʻtayotgan shaxs tomonidan foydalanuvchini identifikatsiya va verifikatsiya qilish vositalari orqali tasdiqlanadi, zarur boʻlgan taqdirda esa roʻyxatdan oʻtayotgan shaxs tomonidan elektron soʻrovnomaning (arizaning) qogʻozdagi koʻchirma nusxasi imzolanadi. Shakllantirilgan elektron soʻrovnoma (ariza) “E-xabar berish” tizimiga yuklanadi.

Roʻyxatdan oʻtayotgan shaxs Yagona interaktiv davlat xizmatlari portali yoki “E-xabar berish” tizimi orqali turgan joyi boʻyicha xabardor qilish tartibida oʻzini roʻyxatdan oʻtkazish uchun Oʻzbekiston Respublikasi fuqarosini turgan joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) shakllantiradi, elektron soʻrovnomaga (arizaga) ushbu modda uchinchi qismining toʻrtinchi , beshinchi va oltinchi xatboshilarida sanab oʻtilgan hujjatlarda koʻrsatilgan maʼlumotlar kiritiladi. Bunda elektron soʻrovnoma (ariza) roʻyxatdan oʻtayotgan shaxs hamda turar joy mulkdori (mulkdorlari) tomonidan foydalanuvchini identifikatsiya va verifikatsiya qilish vositalari orqali tasdiqlanadi. Agar Oʻzbekiston Respublikasi fuqarosini turgan joyi boʻyicha roʻyxatdan oʻtkazish toʻgʻrisidagi elektron soʻrovnoma (ariza) soliq organlarida hisobga olingan turar joyning ijara shartnomasiga asosan shakllantirilsa, turar joy mulkdorining (mulkdorlarining) tasdigʻi talab etilmaydi.

Joylashtirish vositasida turgan Oʻzbekiston Respublikasi fuqarosini turgan joyi boʻyicha xabardor qilish tartibida “E-mehmon” tizimi orqali roʻyxatdan oʻtkazish uchun joylashtirish vositasining masʼul xodimi tomonidan Oʻzbekiston Respublikasi fuqarosini turgan joyi boʻyicha roʻyxatdan oʻtkazish toʻgʻrisidagi elektron soʻrovnoma shakllantiriladi, elektron soʻrovnomaga roʻyxatdan oʻtayotgan shaxsning pasportida yoki identifikatsiyalovchi kartasida (bolaning tugʻilganlik haqidagi guvohnomasida) koʻrsatilgan maʼlumotlar kiritiladi.

Davolash muassasasida statsionar sharoitda davolanayotgan Oʻzbekiston Respublikasi fuqarosini turgan joyi boʻyicha xabardor qilish tartibida “E-mehmon” tizimi orqali roʻyxatdan oʻtkazish uchun davolash muassasasining masʼul xodimi tomonidan Oʻzbekiston Respublikasi fuqarosini turgan joyi boʻyicha roʻyxatdan oʻtkazish toʻgʻrisidagi elektron soʻrovnoma shakllantiriladi, elektron soʻrovnomaga roʻyxatdan oʻtayotgan shaxsning pasportida yoki identifikatsiyalovchi kartasida (bolaning tugʻilganlik haqidagi guvohnomasida) koʻrsatilgan maʼlumotlar kiritiladi.

Oʻzbekiston Respublikasi fuqarosini turgan joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) koʻrib chiqish muddati bir ish kunidan oshmasligi kerak.

Turgan joyi boʻyicha roʻyxatdan oʻtgan shaxsga turgan joyi boʻyicha roʻyxatdan oʻtganlik toʻgʻrisidagi elektron va (yoki) qogʻoz shaklidagi maʼlumotnoma rasmiylashtiriladi.

Agar turgan joyi boʻyicha roʻyxatdan oʻtganlik muddati tugagan boʻlsa, ammo shaxs ushbu joyda boʻlishni davom ettirsa, u oʻn ish kuni ichida turgan joyi boʻyicha yangidan roʻyxatdan oʻtishi zarur.

14-modda. Oʻzbekiston Respublikasi fuqarolarining yashash joyi boʻyicha roʻyxatdan oʻtkazilganligini bekor qilish

Oʻzbekiston Respublikasi fuqarolarining yashash joyi boʻyicha roʻyxatdan oʻtkazilganligini bekor qilish ichki ishlar organlarining migratsiya va fuqarolikni rasmiylashtirish boʻlinmalari tomonidan quyidagi hollarda amalga oshiriladi:

Oʻzbekiston Respublikasi fuqarosi yangi yashash joyi boʻyicha roʻyxatdan oʻtkazilganda;

turar joy mulkdorining arizasiga koʻra — turar joyga boʻlgan mulkiy huquqlarga yoki turar joy mulkdori bilan qarindoshlik aloqalariga ega boʻlmagan Oʻzbekiston Respublikasi fuqarosiga (bundan mazkur shaxslarning turar joydan foydalanish huquqi sud tomonidan belgilanganligi yoki taraflar oʻrtasida kelishuv mavjudligi hollari mustasno) yoxud ushbu Qonunning 20-moddasida belgilangan uy-joy maydonining ijtimoiy normasiga rioya qilingan holda yashash joyi boʻyicha roʻyxatdan oʻtkazilgan Oʻzbekiston Respublikasi fuqarosiga nisbatan;

Oʻzbekiston Respublikasi fuqarosi xorijga doimiy yashashga ketayotganda;

ozodlikdan mahrum etishga hukm qilingan Oʻzbekiston Respublikasi fuqarosining notarial tartibda tasdiqlangan ishonchnomasi yoki roziligi asosida;

Oʻzbekiston Respublikasi fuqarosining yashash joyi boʻyicha roʻyxatdan oʻtkazilganligini bekor qilish toʻgʻrisidagi shaxsiy murojaati yoki boshqa shaxsning notarial tartibda tasdiqlangan ishonchnoma asosidagi murojaati boʻyicha.

Oʻzbekiston Respublikasi fuqarosining yashash joyi boʻyicha roʻyxatdan oʻtkazilganligini bekor qilish sud tomonidan quyidagi hollarda amalga oshiriladi:

uy-joy maydonining ijtimoiy normasi qoʻllanilmagan holda roʻyxatdan oʻtkazilgan shaxsning yashash joyi boʻyicha roʻyxatdan oʻtkazilganligini bekor qilish toʻgʻrisidagi sudning qonuniy kuchga kirgan qaroriga asosan;

shaxsni turar joydan foydalanish huquqini yoʻqotgan deb topish toʻgʻrisidagi, shaxsni bedarak yoʻqolgan deb topish haqidagi, shaxsni vafot etgan deb eʼlon qilish toʻgʻrisidagi yoki shaxsni turar joydan koʻchirish haqidagi sudning qonuniy kuchga kirgan qaroriga asosan;

shaxsning qalbaki hujjatlar yoki haqiqatga mos kelmaydigan hujjatlar asosida yashash joyi boʻyicha roʻyxatdan oʻtkazilganligi, shuningdek Oʻzbekiston Respublikasi fuqarosini yashash joyi boʻyicha roʻyxatdan oʻtkazgan mansabdor shaxslarning gʻayriqonuniy xatti-harakatlari aniqlanganda — sudning qonuniy kuchga kirgan ayblov hukmiga asosan;

shaxsga nisbatan umrbod ozodlikdan mahrum etish tarzidagi jazo tayinlanganda — sudning qonuniy kuchga kirgan ayblov hukmiga asosan.

Turar joydan foydalanish huquqi sud tomonidan belgilangan shaxslarning roziligisiz ularning yashash joyi boʻyicha roʻyxatdan oʻtkazilganligini bekor qilish faqat sudning qaroriga asosan amalga oshiriladi.

Ushbu moddaning birinchi, ikkinchi va uchinchi qismlarida nazarda tutilgan hollarda Oʻzbekiston Respublikasi fuqarosining yashash joyi boʻyicha roʻyxatdan oʻtkazilganligini bekor qilish toʻgʻrisidagi axborot tegishincha ichki ishlar organlarining migratsiya va fuqarolikni rasmiylashtirish boʻlinmalari hamda sudlar tomonidan “Manzil” tizimiga kiritiladi.

Oʻzbekiston Respublikasining oʻn olti yoshga toʻlmagan fuqarolarining yashash joyi boʻyicha roʻyxatdan oʻtkazilganligini bekor qilish ularning ota-onasining (yolgʻiz otasining yoki onasining), tutingan ota-onasining yoki vasiylarining (homiylarining) yashash joyi boʻyicha roʻyxatdan oʻtkazilganligini bekor qilish bilan bir vaqtda amalga oshiriladi.

Oʻzbekiston Respublikasi fuqarosi vafot etganda uning yashash joyi boʻyicha roʻyxatdan oʻtkazilganligini bekor qilish oʻlim haqidagi guvohnomani rasmiylashtirish chogʻida FHDY organlaridan idoralararo axborot almashish tizimi orqali olingan maʼlumotlarga yoki oʻlim haqidagi guvohnoma taqdim etilganda turar joy mulkdorining arizasiga asosan ichki ishlar organlarining migratsiya va fuqarolikni rasmiylashtirish boʻlinmalari tomonidan amalga oshiriladi.

Turar joy mulkdori (mulkdorlari) Oʻzbekiston Respublikasi fuqarosining yashash joyi boʻyicha roʻyxatdan oʻtkazilganligini bekor qilish uchun ichki ishlar organining migratsiya va fuqarolikni rasmiylashtirish boʻlinmasiga quyidagi hujjatlarni taqdim etadi:

Oʻzbekiston Respublikasi fuqarosining yashash joyi boʻyicha roʻyxatdan oʻtkazilganligini bekor qilish toʻgʻrisidagi arizani;

turar joy mulkdorining (mulkdorlarining) pasportini (yashash guvohnomasini) yoki identifikatsiyalovchi kartasini;

turar joyga boʻlgan mulk huquqini tasdiqlovchi va yashash joyi boʻyicha roʻyxatdan oʻtkazilganlikni bekor qilish uchun asos boʻlgan hujjatni.

Oʻzbekiston Respublikasi fuqarosi oʻzining yashash joyi boʻyicha roʻyxatdan oʻtkazilganligini bekor qilish uchun ichki ishlar organining migratsiya va fuqarolikni rasmiylashtirish boʻlinmasiga quyidagi hujjatlarni taqdim etadi:

Oʻzbekiston Respublikasi fuqarosining yashash joyi boʻyicha roʻyxatdan oʻtkazilganligini bekor qilish toʻgʻrisidagi arizani;

pasportini yoki identifikatsiyalovchi kartasini;

oʻn olti yoshga toʻlmagan bola arizada koʻrsatilgan taqdirda, uning tugʻilganlik toʻgʻrisidagi guvohnomasini yoki shaxsini tasdiqlovchi boshqa hujjatlarni.

Xorijda doimiy yashashga ketish uchun ruxsat olgan Oʻzbekiston Respublikasi fuqarosi oʻzining yashash joyi boʻyicha roʻyxatdan oʻtkazilganligini bekor qilish uchun ichki ishlar organining migratsiya va fuqarolikni rasmiylashtirish boʻlinmasiga quyidagi hujjatlarni taqdim etadi:

Oʻzbekiston Respublikasi fuqarosining yashash joyi boʻyicha roʻyxatdan oʻtkazilganligini bekor qilish toʻgʻrisidagi arizani;

Oʻzbekiston Respublikasi fuqarosining xorijga chiqish uchun biometrik pasportini;

oʻn olti yoshga toʻlmagan bola arizada koʻrsatilgan taqdirda, Oʻzbekiston Respublikasi oʻn olti yoshga toʻlmagan fuqarosining xorijga chiqish uchun biometrik pasportini.

Oʻzbekiston Respublikasi fuqarosining xorijda doimiy yashashga ketish uchun ruxsatnomani rasmiylashtirish tartibi Oʻzbekiston Respublikasi Prezidenti tomonidan belgilanadi.

Ushbu moddaning oltinchi , yettinchi , sakkizinchi va toʻqqizinchi qismlarida koʻrsatilgan hujjatlarni qabul qilgan masʼul xodim hujjatlarning haqiqiyligini tekshiradi va Oʻzbekiston Respublikasi fuqarosining yashash joyi boʻyicha roʻyxatdan oʻtkazilganligini bekor qilish toʻgʻrisidagi elektron soʻrovnomani (arizani) shakllantiradi, elektron soʻrovnomaga (arizaga) taqdim etilgan hujjatlarda koʻrsatilgan maʼlumotlar kiritiladi. Bunda elektron soʻrovnoma (ariza) ariza beruvchi tomonidan foydalanuvchini identifikatsiya va verifikatsiya qilish vositalari orqali tasdiqlanadi, zarur boʻlgan taqdirda esa mazkur shaxs tomonidan elektron soʻrovnomaning (arizaning) qogʻozdagi koʻchirma nusxasi imzolanadi. Shakllantirilgan elektron soʻrovnoma (ariza) “Manzil” tizimiga yuklanadi.

Oʻzbekiston Respublikasi fuqarosining yashash joyi boʻyicha roʻyxatdan oʻtkazilganligini bekor qilish toʻgʻrisidagi elektron soʻrovnomani (arizani) koʻrib chiqish muddati bir ish kunidan oshmasligi kerak.

4-bob. Chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish

15-modda. Oʻzbekiston Respublikasida doimiy yashovchi chet el fuqarolarini va fuqaroligi boʻlmagan shaxslarni yashash joyi boʻyicha roʻyxatdan oʻtkazish

Oʻzbekiston Respublikasida doimiy yashovchi chet el fuqarolarini va fuqaroligi boʻlmagan shaxslarni yashash joyi boʻyicha roʻyxatdan oʻtkazish ichki ishlar organlarining migratsiya va fuqarolikni rasmiylashtirish boʻlinmalarida (shaxsan murojaat qilinganda) amalga oshiriladi.

Yashash joyi boʻyicha roʻyxatdan oʻtish masalasida ichki ishlar organlarining migratsiya va fuqarolikni rasmiylashtirish boʻlinmasiga murojaat qilgan roʻyxatdan oʻtayotgan shaxs quyidagi hujjatlarni taqdim etadi:

turar joy mulkdorining (mulkdorlarining) uy-joy maydonini berish toʻgʻrisidagi arizasini (roziligini), shaxsan borish imkoni mavjud boʻlmaganda esa uning (ularning) notarial tartibda tasdiqlangan arizasini (roziligini);

turar joy mulkdorining (mulkdorlarining) pasportini (yashash guvohnomasini) yoki identifikatsiyalovchi kartasini;

roʻyxatdan oʻtayotgan shaxsning identifikatsiyalovchi kartasini (yashash guvohnomasini);

oʻn olti yoshga toʻlmagan bola arizada koʻrsatilgan taqdirda, uning tugʻilganlik toʻgʻrisidagi guvohnomasini yoki shaxsini tasdiqlovchi boshqa hujjatlarni;

vasiylikdagi (homiylikdagi) bola yoki oilaga tarbiyaga olingan (patronat) bola arizada koʻrsatilgan taqdirda, vasiylikni (homiylikni) tasdiqlovchi hujjatlarni yoki bolani oilaga tarbiyaga olish toʻgʻrisidagi kelishuvni.

Oʻz ota-onasining yoki ota-onasidan birining (yolgʻiz otasining yoki onasining) yashash joyi manzilida bolani yashash joyi boʻyicha roʻyxatdan oʻtkazishda mulkdorning (mulkdorlarning) turar joy maydoni berish toʻgʻrisidagi arizasi (roziligi) talab etilmaydi.

Oʻzbekiston Respublikasida doimiy yashovchi chet el fuqarolarini hamda fuqaroligi boʻlmagan shaxslarni korxonalar, muassasalar va tashkilotlar tasarrufidagi xizmat turar joyida (yotoqxonada) yashash joyi boʻyicha roʻyxatdan oʻtkazish turar joyning hujjatiga (orderga) yoki mazkur korxonalar, muassasalar va tashkilotlar rahbarlarining yozma ruxsatiga asosan ichki ishlar organlarining migratsiya va fuqarolikni rasmiylashtirish boʻlinmalarida (shaxsan murojaat qilinganda) amalga oshiriladi. Bunda roʻyxatdan oʻtayotgan shaxs ushbu modda ikkinchi qismining toʻrtinchi , beshinchi va oltinchi xatboshilarida koʻrsatilgan hujjatlarni taqdim etadi.

Hujjatlarni qabul qilgan masʼul xodim hujjatlarning haqiqiyligini tekshiradi va Oʻzbekiston Respublikasida doimiy yashovchi chet el fuqarosini (fuqaroligi boʻlmagan shaxsni) yashash joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) shakllantiradi, elektron soʻrovnomaga (arizaga) taqdim etilgan hujjatlarda koʻrsatilgan maʼlumotlar kiritiladi. Bunda elektron soʻrovnoma (ariza) roʻyxatdan oʻtayotgan shaxs tomonidan foydalanuvchini identifikatsiya va verifikatsiya qilish vositalari orqali tasdiqlanadi, zarur boʻlgan taqdirda esa roʻyxatdan oʻtayotgan shaxs tomonidan elektron soʻrovnomaning (arizaning) qogʻozdagi koʻchirma nusxasi imzolanadi. Shakllantirilgan elektron soʻrovnoma (ariza) “Manzil” tizimiga yuklanadi.

Oʻzbekiston Respublikasida doimiy yashovchi chet el fuqarosini (fuqaroligi boʻlmagan shaxsni) yashash joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) koʻrib chiqish muddati bir ish kunidan oshmasligi kerak.

Yashash joyi boʻyicha roʻyxatdan oʻtgan shaxsga yashash joyi boʻyicha roʻyxatdan oʻtganlik toʻgʻrisidagi elektron va (yoki) qogʻoz shaklidagi maʼlumotnoma rasmiylashtiriladi.

16-modda. Oʻzbekiston Respublikasida doimiy yashovchi chet el fuqarolarini va fuqaroligi boʻlmagan shaxslarni turgan joyi boʻyicha roʻyxatdan oʻtkazish

Oʻzbekiston Respublikasida doimiy yashovchi chet el fuqarolarini va fuqaroligi boʻlmagan shaxslarni turgan joyi boʻyicha roʻyxatdan oʻtkazish:

ichki ishlar organlarining migratsiya va fuqarolikni rasmiylashtirish boʻlinmalarida (shaxsan murojaat qilinganda);

ichki ishlar organlarining tayanch punktlari va mahalla huquq-tartibot maskanlarida (shaxsan murojaat qilinganda);

Yagona interaktiv davlat xizmatlari portali orqali (xabardor qilish tartibida);

“E-xabar berish” tizimi orqali (xabardor qilish tartibida);

joylashtirish vositalarida yoki davolash muassasalarida “E-mehmon” tizimi orqali (xabardor qilish tartibida) amalga oshiriladi.

Turgan joyi boʻyicha roʻyxatdan oʻtish masalasida ichki ishlar organlarining migratsiya va fuqarolikni rasmiylashtirish boʻlinmasiga, ichki ishlar organlarining tayanch punktiga yoki mahalla huquq-tartibot maskaniga murojaat qilgan roʻyxatdan oʻtayotgan shaxs quyidagi hujjatlarni taqdim etadi:

turar joy mulkdorining (mulkdorlarining) uy-joy maydonini berish toʻgʻrisidagi arizasini (roziligini), shaxsan borish imkoni mavjud boʻlmaganda esa uning (ularning) notarial tartibda tasdiqlangan arizasini (roziligini);

turar joy mulkdorining (mulkdorlarining) pasportini (yashash guvohnomasini) yoki identifikatsiyalovchi kartasini;

roʻyxatdan oʻtayotgan shaxsning identifikatsiyalovchi kartasini (yashash guvohnomasini);

oʻn olti yoshga toʻlmagan bola arizada koʻrsatilgan taqdirda, uning tugʻilganlik toʻgʻrisidagi guvohnomasini yoki shaxsini tasdiqlovchi boshqa hujjatlarni;

vasiylikdagi (homiylikdagi) bola yoki oilaga tarbiyaga olingan (patronat) bola arizada koʻrsatilgan taqdirda, vasiylikni (homiylikni) tasdiqlovchi hujjatlarni yoki bolani oilaga tarbiyaga olish toʻgʻrisidagi kelishuvni.

Soliq organlarida hisobga olingan turar joyning ijara shartnomasi taqdim etilganda turar joy mulkdorining (mulkdorlarining) uy-joy maydonini berish toʻgʻrisidagi arizasi (roziligi) talab etilmaydi.

Oʻzbekiston Respublikasida doimiy yashovchi chet el fuqarolari va fuqaroligi boʻlmagan shaxslar turar joy mulkdorining (mulkdorlarining) arizasida yoki soliq organlarida hisobga olingan turar joyning ijara shartnomasida koʻrsatilgan, ammo bir yildan ortiq boʻlmagan muddatga turgan joyi boʻyicha roʻyxatdan oʻtkaziladi.

Oʻz ota-onasining yoki ota-onasidan birining (yolgʻiz otasining yoki onasining) turgan joyi manzilida bolani turgan joyi boʻyicha roʻyxatdan oʻtkazishda mulkdorning (mulkdorlarning) turar joy maydoni berish toʻgʻrisidagi arizasi (roziligi) talab etilmaydi.

Oʻzbekiston Respublikasida doimiy yashovchi chet el fuqarolarini va fuqaroligi boʻlmagan shaxslarni korxonalar, muassasalar va tashkilotlar tasarrufidagi xizmat turar joyida (yotoqxonada) turgan joyi boʻyicha roʻyxatdan oʻtkazish mazkur korxonalar, muassasalar va tashkilotlar rahbarlarining yozma ruxsatiga asosan ichki ishlar organlarining migratsiya va fuqarolikni rasmiylashtirish boʻlinmalarida (shaxsan murojaat qilinganda) amalga oshiriladi. Bunda roʻyxatdan oʻtayotgan shaxs ushbu modda ikkinchi qismining toʻrtinchi , beshinchi va oltinchi xatboshilarida koʻrsatilgan hujjatlarni taqdim etadi.

Hujjatlarni qabul qilgan masʼul xodim hujjatlarning haqiqiyligini tekshiradi va Oʻzbekiston Respublikasida doimiy yashovchi chet el fuqarosini (fuqaroligi boʻlmagan shaxsni) turgan joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) shakllantiradi, elektron soʻrovnomaga (arizaga) taqdim etilgan hujjatlarda koʻrsatilgan maʼlumotlar kiritiladi. Bunda elektron soʻrovnoma (ariza) roʻyxatdan oʻtayotgan shaxs tomonidan foydalanuvchini identifikatsiya va verifikatsiya qilish vositalari orqali tasdiqlanadi, zarur boʻlgan taqdirda esa roʻyxatdan oʻtayotgan shaxs tomonidan elektron soʻrovnomaning (arizaning) qogʻozdagi koʻchirma nusxasi imzolanadi. Shakllantirilgan elektron soʻrovnoma (ariza) “E-xabar berish” tizimiga yuklanadi.

Roʻyxatdan oʻtayotgan shaxs Yagona interaktiv davlat xizmatlari portali yoki “E-xabar berish” tizimi orqali turgan joyi boʻyicha xabardor qilish tartibida oʻzini roʻyxatdan oʻtkazish uchun Oʻzbekiston Respublikasida doimiy yashovchi chet el fuqarosini (fuqaroligi boʻlmagan shaxsni) turgan joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) shakllantiradi, elektron soʻrovnomaga (arizaga) ushbu modda ikkinchi qismining toʻrtinchi , beshinchi va oltinchi xatboshilarida sanab oʻtilgan hujjatlarda koʻrsatilgan maʼlumotlar kiritiladi. Bunda elektron soʻrovnoma (ariza) roʻyxatdan oʻtayotgan shaxs hamda turar joy mulkdori (mulkdorlari) tomonidan foydalanuvchini identifikatsiya va verifikatsiya qilish vositalari orqali tasdiqlanadi. Agar Oʻzbekiston Respublikasida doimiy yashovchi chet el fuqarosini (fuqaroligi boʻlmagan shaxsni) turgan joyi boʻyicha roʻyxatdan oʻtkazish toʻgʻrisidagi elektron soʻrovnoma (ariza) soliq organlarida hisobga olingan turar joyning ijara shartnomasiga asosan shakllantirilsa, turar joy mulkdorining (mulkdorlarining) tasdigʻi talab etilmaydi.

Joylashtirish vositasida turgan Oʻzbekiston Respublikasida doimiy yashovchi chet el fuqarosini yoki fuqaroligi boʻlmagan shaxsni turgan joyi boʻyicha xabardor qilish tartibida “E-mehmon” tizimi orqali roʻyxatdan oʻtkazish uchun joylashtirish vositasining masʼul xodimi tomonidan Oʻzbekiston Respublikasida doimiy yashovchi chet el fuqarosini (fuqaroligi boʻlmagan shaxsni) turgan joyi boʻyicha roʻyxatdan oʻtkazish toʻgʻrisidagi elektron soʻrovnoma shakllantiriladi, elektron soʻrovnomaga roʻyxatdan oʻtayotgan shaxsning identifikatsiyalovchi kartasida yoki yashash guvohnomasida (bolaning tugʻilganlik haqidagi guvohnomasida) koʻrsatilgan maʼlumotlar kiritiladi.

Davolash muassasasida statsionar sharoitda davolanayotgan Oʻzbekiston Respublikasida doimiy yashovchi chet el fuqarosini yoki fuqaroligi boʻlmagan shaxsni turgan joyi boʻyicha xabardor qilish tartibida “E-mehmon” tizimi orqali roʻyxatdan oʻtkazish uchun davolash muassasasining masʼul xodimi tomonidan Oʻzbekiston Respublikasida doimiy yashovchi chet el fuqarosini (fuqaroligi boʻlmagan shaxsni) turgan joyi boʻyicha roʻyxatdan oʻtkazish toʻgʻrisidagi elektron soʻrovnoma shakllantiriladi, elektron soʻrovnomaga roʻyxatdan oʻtayotgan shaxsning identifikatsiyalovchi kartasida yoki yashash guvohnomasida (bolaning tugʻilganlik haqidagi guvohnomasida) koʻrsatilgan maʼlumotlar kiritiladi.

Oʻzbekiston Respublikasida doimiy yashovchi chet el fuqarosini (fuqaroligi boʻlmagan shaxsni) turgan joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) koʻrib chiqish muddati bir ish kunidan oshmasligi kerak.

Turgan joyi boʻyicha roʻyxatdan oʻtgan shaxsga turgan joyi boʻyicha roʻyxatdan oʻtganlik toʻgʻrisidagi elektron va (yoki) qogʻoz shaklidagi maʼlumotnoma rasmiylashtiriladi.

Agar turgan joyi boʻyicha roʻyxatdan oʻtganlik muddati tugagan boʻlsa, ammo shaxs ushbu joyda boʻlishni davom ettirsa, u oʻn ish kuni ichida turgan joyi boʻyicha yangidan roʻyxatdan oʻtishi zarur.

17-modda. Boshqa davlatlar hududida doimiy yashaydigan chet el fuqarolariga va fuqaroligi boʻlmagan shaxslarga Oʻzbekiston Respublikasida doimiy yashash uchun ruxsatnoma berish

Boshqa davlatlar hududida doimiy yashaydigan chet el fuqarolariga va fuqaroligi boʻlmagan shaxslarga Oʻzbekiston Respublikasida doimiy yashash uchun ruxsatnoma berish ichki ishlar organlarining migratsiya va fuqarolikni rasmiylashtirish boʻlinmalarida shaxsan murojaat qilinganda amalga oshiriladi.

Oʻzbekiston Respublikasida doimiy yashash uchun ruxsatnomaga ega boʻlmagan, boshqa davlatlar hududida doimiy yashaydigan chet el fuqarolari va fuqaroligi boʻlmagan shaxslar yashash joyi boʻyicha roʻyxatdan oʻtkazilmaydi.

Boshqa davlatlar hududida doimiy yashaydigan chet el fuqarolariga va fuqaroligi boʻlmagan shaxslarga Oʻzbekiston Respublikasida doimiy yashash uchun ruxsatnoma Yashash joyi boʻyicha roʻyxatdan oʻtish huquqiga ega boʻlgan chet el fuqarolari va fuqaroligi boʻlmagan shaxslar toifalari roʻyxati asosida beriladi.

Chet el fuqarolariga va fuqaroligi boʻlmagan shaxslarga Oʻzbekiston Respublikasida doimiy yashash uchun ruxsatnoma berish tartibi hamda Yashash joyi boʻyicha roʻyxatdan oʻtish huquqiga ega boʻlgan chet el fuqarolari va fuqaroligi boʻlmagan shaxslar toifalari roʻyxati Oʻzbekiston Respublikasi Prezidenti tomonidan tasdiqlanadi.

18-modda. Oʻzbekiston Respublikasida doimiy yashovchi chet el fuqarolarining va fuqaroligi boʻlmagan shaxslarning yashash joyi boʻyicha roʻyxatdan oʻtkazilganligini bekor qilish

Oʻzbekiston Respublikasida doimiy yashovchi chet el fuqarolarining va fuqaroligi boʻlmagan shaxslarning yashash joyi boʻyicha roʻyxatdan oʻtkazilganligini bekor qilish ichki ishlar organlarining migratsiya va fuqarolikni rasmiylashtirish boʻlinmalari tomonidan quyidagi hollarda amalga oshiriladi:

Oʻzbekiston Respublikasida doimiy yashovchi chet el fuqarosi yoki fuqaroligi boʻlmagan shaxs Oʻzbekiston Respublikasi hududida yangi yashash joyi boʻyicha roʻyxatdan oʻtganda;

turar joy mulkdorining arizasiga koʻra — turar joyga boʻlgan mulkiy huquqlarga yoki turar joy mulkdori bilan qarindoshlik aloqalariga ega boʻlmagan Oʻzbekiston Respublikasida doimiy yashovchi chet el fuqarosiga yoki fuqaroligi boʻlmagan shaxsga (bundan mazkur shaxslarning turar joydan foydalanish huquqi sud tomonidan belgilanganligi yoki taraflar oʻrtasida kelishuv mavjudligi hollari mustasno) yoxud ushbu Qonunning 20-moddasida belgilangan uy-joy maydonining ijtimoiy normasiga rioya qilingan holda yashash joyi boʻyicha roʻyxatdan oʻtkazilgan Oʻzbekiston Respublikasida doimiy yashovchi chet el fuqarosiga yoki fuqaroligi boʻlmagan shaxsga nisbatan;

davlat hokimiyati organlari, respublika ijro etuvchi hokimiyat organlari, xoʻjalik boshqaruvi organlari, respublika ahamiyatiga molik boshqa davlat tashkilotlari rahbarlarining iltimosnomasiga asosan chet el fuqarolariga va fuqaroligi boʻlmagan shaxslarga berilgan Oʻzbekiston Respublikasida doimiy yashash uchun ruxsatnomalarni bekor qilish toʻgʻrisidagi mazkur davlat organlari va tashkilotlarining bildirishnomasi asosida;

chet el fuqarosi yoki fuqaroligi boʻlmagan shaxs qonunchilikda belgilangan tartibda xorijga doimiy yashashga ketayotganda;

Oʻzbekiston Respublikasida doimiy yashovchi ozodlikdan mahrum etishga hukm qilingan chet el fuqarosining yoki fuqaroligi boʻlmagan shaxsning notarial tartibda tasdiqlangan ishonchnomasi yoki roziligi asosida;

Oʻzbekiston Respublikasida doimiy yashovchi chet el fuqarosining yoki fuqaroligi boʻlmagan shaxsning yashash joyi boʻyicha roʻyxatdan oʻtkazilganligini bekor qilish toʻgʻrisidagi shaxsiy murojaati yoki boshqa shaxsning notarial tartibda tasdiqlangan ishonchnoma asosidagi murojaati boʻyicha.

Oʻzbekiston Respublikasida doimiy yashovchi chet el fuqarosining yoki fuqaroligi boʻlmagan shaxsning yashash joyi boʻyicha roʻyxatdan oʻtkazilganligini bekor qilish sud tomonidan quyidagi hollarda amalga oshiriladi:

uy-joy maydonining ijtimoiy normasi qoʻllanilmagan holda roʻyxatdan oʻtkazilgan shaxsning yashash joyi boʻyicha roʻyxatdan oʻtkazilganligini bekor qilish toʻgʻrisidagi sudning qonuniy kuchga kirgan qaroriga asosan;

shaxsni turar joydan foydalanish huquqini yoʻqotgan deb topish toʻgʻrisidagi, shaxsni bedarak yoʻqolgan deb topish haqidagi, shaxsni vafot etgan deb eʼlon qilish toʻgʻrisidagi yoki shaxsni turar joydan koʻchirish haqidagi sudning qonuniy kuchga kirgan qaroriga asosan;

shaxsning qalbaki hujjatlar yoki haqiqatga mos kelmaydigan hujjatlar asosida yashash joyi boʻyicha roʻyxatdan oʻtkazilganligi, shuningdek chet el fuqarosini yoki fuqaroligi boʻlmagan shaxsni yashash joyi boʻyicha roʻyxatdan oʻtkazgan mansabdor shaxslarning gʻayriqonuniy xatti-harakatlari aniqlanganda — sudning qonuniy kuchga kirgan ayblov hukmiga asosan;

shaxsga nisbatan umrbod ozodlikdan mahrum etish tarzidagi jazo tayinlanganda — sudning qonuniy kuchga kirgan ayblov hukmiga asosan.

Turar joydan foydalanish huquqi sud tomonidan belgilangan shaxslarning roziligisiz ularning yashash joyi boʻyicha roʻyxatdan oʻtkazilganligini bekor qilish faqat sudning qaroriga asosan amalga oshiriladi.

Ushbu moddaning birinchi , ikkinchi va uchinchi qismlarida nazarda tutilgan hollarda, Oʻzbekiston Respublikasida doimiy yashovchi chet el fuqarosining (fuqaroligi boʻlmagan shaxsning) yashash joyi boʻyicha roʻyxatdan oʻtkazilganligini bekor qilish toʻgʻrisidagi axborot tegishincha ichki ishlar organlarining migratsiya va fuqarolikni rasmiylashtirish boʻlinmalari hamda sudlar tomonidan “Manzil” tizimiga kiritiladi.

Oʻzbekiston Respublikasida doimiy yashovchi oʻn olti yoshga toʻlmagan chet el fuqarolarining (fuqaroligi boʻlmagan shaxslarning) yashash joyi boʻyicha roʻyxatdan oʻtkazilganligini bekor qilish ularning ota-onasining (yolgʻiz otasining yoki onasining), tutingan ota-onasining yoki vasiylarining (homiylarining) yashash joyi boʻyicha roʻyxatdan oʻtkazilganligini bekor qilish bilan bir vaqtda amalga oshiriladi.

Chet el fuqarosi (fuqaroligi boʻlmagan shaxs) vafot etganda uning yashash joyi boʻyicha roʻyxatdan oʻtkazilganligini bekor qilish oʻlim haqidagi guvohnomani rasmiylashtirish chogʻida FHDY organlaridan idoralararo axborot almashish tizimi orqali olingan maʼlumotlarga yoki oʻlim haqidagi guvohnoma taqdim etilganda turar joy mulkdorining arizasiga asosan ichki ishlar organlarining migratsiya va fuqarolikni rasmiylashtirish boʻlinmalari tomonidan amalga oshiriladi.

Turar joy mulkdori (mulkdorlari) chet el fuqarosining (fuqaroligi boʻlmagan shaxsning) yashash joyi boʻyicha roʻyxatdan oʻtkazilganligini bekor qilish uchun ichki ishlar organining migratsiya va fuqarolikni rasmiylashtirish boʻlinmasiga quyidagi hujjatlarni taqdim etadi:

chet el fuqarosining (fuqaroligi boʻlmagan shaxsning) yashash joyi boʻyicha roʻyxatdan oʻtkazilganligini bekor qilish toʻgʻrisidagi arizani;

turar joy mulkdorining (mulkdorlarining) pasportini (yashash guvohnomasini) yoki identifikatsiyalovchi kartasini;

turar joyga boʻlgan mulk huquqini tasdiqlovchi va yashash joyi boʻyicha roʻyxatdan oʻtkazilganlikni bekor qilish uchun asos boʻlgan hujjatni.

Chet el fuqarosi (fuqaroligi boʻlmagan shaxs) oʻzining yashash joyi boʻyicha roʻyxatdan oʻtkazilganligini bekor qilish uchun ichki ishlar organining migratsiya va fuqarolikni rasmiylashtirish boʻlinmasiga quyidagi hujjatlarni taqdim etadi:

chet el fuqarosining (fuqaroligi boʻlmagan shaxsning) yashash joyi boʻyicha roʻyxatdan oʻtkazilganligini bekor qilish toʻgʻrisidagi arizani;

identifikatsiyalovchi kartasini (yashash guvohnomasini);

oʻn olti yoshga toʻlmagan bola arizada koʻrsatilgan taqdirda, uning tugʻilganlik toʻgʻrisidagi guvohnomasini yoki shaxsini tasdiqlovchi boshqa hujjatlarni.

Ushbu moddaning oltinchi , yettinchi yoki sakkizinchi qismlarida koʻrsatilgan hujjatlarni qabul qilgan masʼul xodim hujjatlarning haqiqiyligini tekshiradi va chet el fuqarosining (fuqaroligi boʻlmagan shaxsning) yashash joyi boʻyicha roʻyxatdan oʻtkazilganligini bekor qilish toʻgʻrisidagi elektron soʻrovnomani (arizani) shakllantiradi, elektron soʻrovnomaga (arizaga) taqdim etilgan hujjatlarda koʻrsatilgan maʼlumotlar kiritiladi. Bunda elektron soʻrovnoma (ariza) ariza beruvchi tomonidan foydalanuvchini identifikatsiya va verifikatsiya qilish vositalari orqali tasdiqlanadi, zarur boʻlgan taqdirda esa mazkur shaxs tomonidan elektron soʻrovnomaning (arizaning) qogʻozdagi koʻchirma nusxasi imzolanadi. Shakllantirilgan elektron soʻrovnoma (ariza) “Manzil” tizimiga yuklanadi.

Chet el fuqarosining (fuqaroligi boʻlmagan shaxsning) yashash joyi boʻyicha roʻyxatdan oʻtkazilganligini bekor qilish toʻgʻrisidagi elektron soʻrovnomani (arizani) koʻrib chiqish muddati bir ish kunidan oshmasligi kerak.

19-modda. Boshqa davlatlar hududida doimiy yashaydigan va Oʻzbekiston Respublikasi hududida vaqtincha turgan chet el fuqarolarini va fuqaroligi boʻlmagan shaxslarni turgan joyi boʻyicha roʻyxatdan oʻtkazish

Boshqa davlatlar hududida doimiy yashaydigan va Oʻzbekiston Respublikasi hududida vaqtincha turgan chet el fuqarolarini va fuqaroligi boʻlmagan shaxslarni turgan joyi boʻyicha roʻyxatdan oʻtkazish:

ichki ishlar organlarining migratsiya va fuqarolikni rasmiylashtirish boʻlinmalarida (shaxsan murojaat qilinganda);

joylashtirish vositalarida yoki davolash muassasalarida “E-mehmon” tizimi orqali (xabardor qilish tartibida) amalga oshiriladi.

Boshqa davlatlar hududida doimiy yashaydigan va Oʻzbekiston Respublikasi hududida vaqtincha turgan chet el fuqarolarini hamda fuqaroligi boʻlmagan shaxslarni taklif qilgan (qabul qilayotgan) jismoniy va yuridik shaxslar ularni turgan joyi boʻyicha roʻyxatdan oʻtkazish uchun ichki ishlar organlarining hududiy migratsiya va fuqarolikni rasmiylashtirish boʻlinmalariga quyidagi hujjatlarni taqdim etadi:

turar joy mulkdorining (mulkdorlarining) uy-joy maydonini berish toʻgʻrisidagi arizasini (roziligini), shaxsan borish imkoni mavjud boʻlmaganda esa uning (ularning) notarial tartibda tasdiqlangan arizasini (roziligini);

turar joy mulkdorining (mulkdorlarining) pasportini (yashash guvohnomasini) yoki identifikatsiyalovchi kartasini;

roʻyxatdan oʻtayotgan shaxsning harakatlanish hujjatini;

oʻn olti yoshga toʻlmagan bola arizada koʻrsatilgan taqdirda, uning harakatlanish hujjatini;

agar chet el fuqarolari va fuqaroligi boʻlmagan shaxslar Oʻzbekiston Respublikasida mehnat faoliyatini amalga oshirsa — qabul qilayotgan yuridik shaxsning belgilangan shakldagi talabnomasini.

Oʻzbekiston Respublikasi hududida vaqtincha turgan, Oʻzbekiston Respublikasiga vizasiz kirish rejimi belgilangan Mustaqil Davlatlar Hamdoʻstligiga aʼzo davlatlar fuqarolari turar joy mulkdorining (mulkdorlarining) arizasida koʻrsatilgan, ammo olti oydan ortiq boʻlmagan muddatga turgan joyi boʻyicha roʻyxatdan oʻtkaziladi.

Boshqa davlatlar hududida doimiy yashaydigan va Oʻzbekiston Respublikasi hududida vaqtincha turgan chet el fuqarolari va fuqaroligi boʻlmagan shaxslar turar joy mulkdorining (mulkdorlarining) arizasida koʻrsatilgan, ammo vizasiz rejim oʻrnatilgan muddatdan yoxud berilgan kirish yoki kirish-chiqish vizasining amal qilish muddatidan ortiq boʻlmagan muddatga turgan joyi boʻyicha roʻyxatdan oʻtkaziladi.

Oʻz ota-onasining yoki ota-onasidan birining (yolgʻiz otasining yoki onasining) turgan joyi manzilida bolani turgan joyi boʻyicha roʻyxatdan oʻtkazishda mulkdorning (mulkdorlarning) turar joy maydoni berish toʻgʻrisidagi arizasi (roziligi) talab etilmaydi.

Boshqa davlatlar hududida doimiy yashaydigan va Oʻzbekiston Respublikasi hududida vaqtincha turgan chet el fuqarolarini va fuqaroligi boʻlmagan shaxslarni korxonalar, muassasalar va tashkilotlar tasarrufidagi xizmat turar joyida (yotoqxonada) turgan joyi boʻyicha roʻyxatdan oʻtkazish mazkur korxonalar, muassasalar va tashkilotlar rahbarlarining yozma ruxsatiga asosan ichki ishlar organlarining migratsiya va fuqarolikni rasmiylashtirish boʻlinmalarida (shaxsan murojaat qilinganda) amalga oshiriladi. Bunda roʻyxatdan oʻtayotgan shaxs ushbu modda ikkinchi qismining toʻrtinchi , beshinchi va oltinchi xatboshilarida koʻrsatilgan hujjatlarni taqdim etadi.

Hujjatlarni qabul qilgan masʼul xodim hujjatlarning haqiqiyligini tekshiradi va boshqa davlat hududida doimiy yashaydigan va Oʻzbekiston Respublikasi hududida vaqtincha turgan chet el fuqarosini (fuqaroligi boʻlmagan shaxsni) turgan joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) shakllantiradi, elektron soʻrovnomaga (arizaga) taqdim etilgan hujjatlarda koʻrsatilgan maʼlumotlar kiritiladi. Bunda elektron soʻrovnoma (ariza) mulkdor (mulkdorlar) tomonidan foydalanuvchini identifikatsiya va verifikatsiya qilish vositalari orqali tasdiqlanadi, zarur boʻlgan taqdirda esa mulkdor (mulkdorlar) tomonidan elektron soʻrovnomaning (arizaning) qogʻozdagi koʻchirma nusxasi imzolanadi. Korxonalar, muassasalar va tashkilotlar tasarrufidagi xizmat turar joyida (yotoqxonada) turgan joyi boʻyicha roʻyxatdan oʻtkazishni amalga oshirish chogʻida roʻyxatdan oʻtayotgan shaxs tomonidan elektron soʻrovnomaning (arizaning) qogʻozdagi koʻchirma nusxasi imzolanadi. Shakllantirilgan elektron soʻrovnoma (ariza) “E-mehmon” tizimiga yuklanadi.

Joylashtirish vositasida turgan, boshqa davlatlar hududida doimiy yashaydigan va Oʻzbekiston Respublikasi hududida vaqtincha turgan chet el fuqarosini yoki fuqaroligi boʻlmagan shaxsni turgan joyi boʻyicha xabardor qilish tartibida “E-mehmon” tizimi orqali roʻyxatdan oʻtkazish uchun joylashtirish vositasining masʼul xodimi tomonidan boshqa davlatlar hududida doimiy yashaydigan va Oʻzbekiston Respublikasi hududida vaqtincha turgan chet el fuqarosini (fuqaroligi boʻlmagan shaxsni) turgan joyi boʻyicha roʻyxatdan oʻtkazish toʻgʻrisidagi elektron soʻrovnoma shakllantiriladi, elektron soʻrovnomaga roʻyxatdan oʻtayotgan shaxsning harakatlanish hujjatida koʻrsatilgan maʼlumotlar kiritiladi.

Davolash muassasalarida statsionar sharoitda davolanayotgan, boshqa davlat hududida doimiy yashaydigan va Oʻzbekiston Respublikasi hududida vaqtincha turgan chet el fuqarosini yoki fuqaroligi boʻlmagan shaxsni turgan joyi boʻyicha xabardor qilish tartibida “E-mehmon” tizimi orqali roʻyxatdan oʻtkazish uchun davolash muassasasining masʼul xodimi tomonidan boshqa davlatlar hududida doimiy yashaydigan va Oʻzbekiston Respublikasi hududida vaqtincha turgan chet el fuqarosini (fuqaroligi boʻlmagan shaxsni) turgan joyi boʻyicha roʻyxatdan oʻtkazish toʻgʻrisidagi elektron soʻrovnoma shakllantiriladi, elektron soʻrovnomaga roʻyxatdan oʻtayotgan shaxsning harakatlanish hujjatida koʻrsatilgan maʼlumotlar kiritiladi.

Boshqa davlat hududida doimiy yashaydigan va Oʻzbekiston Respublikasi hududida vaqtincha turgan chet el fuqarosini (fuqaroligi boʻlmagan shaxsni) turgan joyi boʻyicha roʻyxatdan oʻtkazish toʻgʻrisidagi elektron soʻrovnomani (arizani) koʻrib chiqish muddati bir ish kunidan oshmasligi kerak.

Turgan joyi boʻyicha roʻyxatdan oʻtgan shaxsga turgan joyi boʻyicha roʻyxatdan oʻtganlik toʻgʻrisidagi elektron va (yoki) qogʻoz shaklidagi maʼlumotnoma rasmiylashtiriladi.

Boshqa davlatlar hududida doimiy yashaydigan va Oʻzbekiston Respublikasi hududida vaqtincha turgan chet el fuqarolari va fuqaroligi boʻlmagan shaxslar Chet el fuqarolari va fuqaroligi boʻlmagan shaxslarning Oʻzbekiston Respublikasida boʻlishi qoidalariga rioya etishi, shu jumladan oʻzi turgan joyi boʻyicha roʻyxatdan oʻtgan manzilda yashashi, harakatlanish hujjatini yonida olib yurishi, uni vakolatli davlat organlari mansabdor shaxslarining talabiga binoan taqdim etishi, shuningdek harakatlanish hujjati yoʻqolganda bu haqda ichki ishlar organlarini hamda ularni qabul qilgan jismoniy yoki yuridik shaxslarni darhol xabardor qilishi shart.

Chet el fuqarolari va fuqaroligi boʻlmagan shaxslarning Oʻzbekiston Respublikasida boʻlishi qoidalari Oʻzbekiston Respublikasi Prezidenti tomonidan tasdiqlanadi.

5-bob. Uy-joy maydonining ijtimoiy normasi hamda yashash joyi va turgan joy boʻyicha roʻyxatdan oʻtkazishni rad etish uchun asoslar

20-modda. Yashash joyi va turgan joy boʻyicha roʻyxatdan oʻtkazishda uy-joy maydonining ijtimoiy normasiga rioya etish

Yashash joyi va turgan joy boʻyicha roʻyxatdan oʻtkazishda uy-joy maydonining ijtimoiy normasiga rioya etish talab qilinadi, bundan ushbu Qonunning 21-moddasida nazarda tutilgan hollar mustasno.

Uy-joy maydonining ijtimoiy normasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan bir kishi hisobiga oʻn olti kvadrat metrdan kam boʻlmagan umumiy maydon hajmida, oʻrindiqli aravachada harakatlanadigan nogironlar uchun esa — yigirma uch kvadrat metrdan kam boʻlmagan hajmda belgilanadi.

21-modda. Yashash joyi boʻyicha roʻyxatdan oʻtishi chogʻida oʻziga nisbatan uy-joy maydonining ijtimoiy normasi qoʻllanilmaydigan shaxslar roʻyxati

Quyidagi Oʻzbekiston Respublikasi fuqarolariga, Oʻzbekiston Respublikasida doimiy yashovchi chet el fuqarolariga va fuqaroligi boʻlmagan shaxslarga nisbatan ularni yashash joyi boʻyicha roʻyxatdan oʻtkazish chogʻida ushbu Qonunning 20-moddasi qoidalari qoʻllanilmaydi:

erga (xotinga) nisbatan — bir-birining yashash joyi boʻyicha uy-joy maydoniga;

ota-onalar, farzandlarga nisbatan — bir-birining yashash joyi boʻyicha uy-joy maydoniga;

buva, buvi, nevaralarga nisbatan — bir-birining yashash joyi boʻyicha uy-joy maydoniga;

vasiylikdagi (homiylikdagi), shuningdek oilaga tarbiyaga olingan (patronat) shaxslarga nisbatan — vasiyning (homiyning), tutingan otaning yoki onaning yashash joyi boʻyicha uy-joy maydoniga;

aka-ukalar, opa-singillarga nisbatan — bir-birining yashash joyi boʻyicha uy-joy maydoniga;

ozodlikdan mahrum etish joylaridan ozod qilingan shaxslarga nisbatan — oldingi yashash joyiga, yaʼni oʻz oila aʼzolarining, qarindoshlarining yoki hukm qilinguniga qadar oʻzi birgalikda yashab turgan boshqa shaxslarning uy-joy maydoniga.

22-modda. Yashash joyi va turgan joy boʻyicha roʻyxatdan oʻtkazishni rad etish uchun asoslar

Yashash joyi va turgan joy boʻyicha roʻyxatdan oʻtkazishni rad etish uchun quyidagilar asos boʻladi:

ushbu Qonunda koʻrsatilgan tegishli hujjatlarning taqdim etilmaganligi;

taqdim etilgan maʼlumotlarning haqiqatga toʻgʻri kelmasligi;

davlat bojini toʻlamaganlik;

turar joyni oʻtkazib berish uchun taqiq qoʻyilganligi va (yoki) xatlab qoʻyilganligi;

ushbu Qonunning 8-moddasida nazarda tutilgan asoslarga koʻra, Oʻzbekiston Respublikasi boʻylab erkin harakatlanishga, turar va yashash joyini tanlash huquqiga nisbatan cheklovlar joriy etilganligi;

ushbu Qonun 20-moddasining birinchi qismida nazarda tutilgan talabning buzilganligi.

Yashash joyi va turgan joy boʻyicha roʻyxatdan oʻtkazishni boshqa asoslarga koʻra rad etish taqiqlanadi.

Yashash joyi va turgan joy boʻyicha roʻyxatdan oʻtkazish rad etilganligi ustidan sud tartibida shikoyat qilinishi mumkin.

Shaxsning yashash joyi va turgan joyi boʻyicha roʻyxatdan oʻtganligi unda oʻzi roʻyxatdan oʻtgan turar joyga (uy-joy maydoniga) boʻlgan mulk huquqi kelib chiqishiga olib kelmaydi.

6-bob. Yakunlovchi qoidalar

23-modda. Yashash joyi va turgan joy boʻyicha roʻyxatdan oʻtish qoidalariga rioya etilishini taʼminlash

Ichki ishlar organlarining tayanch punktlari hamda mahalla huquq-tartibot maskanlari profilaktika katta inspektorlari va profilaktika inspektorlari oʻzlari xizmat qilayotgan hududda yashash joyi va turgan joy boʻyicha roʻyxatdan oʻtish qoidalariga rioya etilishini taʼminlash uchun javobgardir.

Yashash joyi va turgan joy boʻyicha roʻyxatdan oʻtish qoidalariga rioya etilishini taʼminlash boʻyicha davlat organlarining hamda boshqa tashkilotlarning faoliyati ustidan nazorat Oʻzbekiston Respublikasi Bosh prokurori va unga boʻysunuvchi prokurorlar tomonidan oʻz vakolatlari doirasida amalga oshiriladi.

24-modda. Nizolarni hal etish

Oʻzbekiston Respublikasi fuqarolarini, chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish sohasidagi nizolar qonunchilikda belgilangan tartibda hal etiladi.

25-modda. Oʻzbekiston Respublikasi fuqarolarini, chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish toʻgʻrisidagi qonunchilikni buzganlik uchun javobgarlik

Oʻzbekiston Respublikasi fuqarolarini, chet el fuqarolarini hamda fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazish toʻgʻrisidagi qonunchilikni buzganlikda aybdor shaxslar belgilangan tartibda javobgar boʻladi.

26-modda. Oʻzbekiston Respublikasining ayrim qonun hujjatlariga oʻzgartirishlar kiritish

1. Oʻzbekiston Respublikasining 1994-yil 22-sentabrda qabul qilingan 2015-XII-sonli Qonuni bilan tasdiqlangan Oʻzbekiston Respublikasining Maʼmuriy javobgarlik toʻgʻrisidagi kodeksiga (Oʻzbekiston Respublikasi Oliy Kengashining Axborotnomasi, 1995-yil, № 3, 6-modda; Oʻzbekiston Respublikasi Oliy Majlisining Axborotnomasi, 1995-yil, № 9, 193-modda, № 12, 269-modda; 1996-yil, № 5-6, 69-modda, № 9, 144-modda; 1997-yil, № 2, 56-modda, № 4-5, 126-modda, № 9, 241-modda; 1998-yil, № 3, 38-modda, № 5-6, 102-modda, № 9, 181-modda; 1999-yil, № 1, 20-modda, № 5, 124-modda, № 9, 229-modda; 2000-yil, № 5-6, 153-modda, № 7-8, 217-modda; 2001-yil, № 1-2, 23-modda, № 9-10, 165, 182-moddalar; 2002-yil, № 1, 20-modda, № 9, 165-modda; 2003-yil, № 1, 8-modda, № 5, 67-modda, № 9-10, 149-modda; 2004-yil, № 1-2, 18-modda, № 5, 90-modda, № 9, 171-modda; 2005-yil, № 1, 18-modda; Oʻzbekiston Respublikasi Oliy Majlisi palatalarining Axborotnomasi, 2005-yil, № 9, 312-modda, № 12, 413, 417, 418-moddalar; 2006-yil, № 6, 261-modda, № 9, 498-modda, № 10, 536-modda, № 12, 656, 659-moddalar; 2007-yil, № 4, 158, 159, 164, 165-moddalar, № 9, 416, 421-moddalar, № 12, 596, 604, 607-moddalar; 2008-yil, № 4, 181, 189, 192-moddalar, № 9, 486, 488-moddalar, № 12, 640, 641-moddalar; 2009-yil, № 1, 1-modda, № 9, 334, 335, 337-moddalar, № 10, 380-modda, № 12, 462, 468, 470, 472, 474-moddalar; 2010-yil, № 5, 175, 179-moddalar, № 6, 231-modda, № 9, 335, 339, 341-moddalar, № 10, 380-modda, № 12, 468, 473, 474-moddalar; 2011-yil, № 1, 1-modda, № 4, 104, 105-moddalar, № 9, 247, 252-moddalar, № 12/2, 365-modda; 2012-yil, № 4, 108-modda, № 9/1, 242-modda, № 12, 336-modda; 2013-yil, № 4, 98-modda, № 10, 263-modda; 2014-yil, № 1, 2-modda, № 5, 130-modda, № 9, 244-modda, № 12, 341, 343-moddalar; 2015-yil, № 6, 228-modda, № 8, 310, 312-moddalar, № 12, 452-modda; 2016-yil, № 1, 2-modda, № 4, 125-modda, № 9, 276-modda, № 12, 383, 385-moddalar; 2017-yil, № 4, 137-modda, № 6, 300-modda, № 9, 510-modda, № 10, 605-modda; 2018-yil, № 1, 1, 4, 5-moddalar, № 4, 224-modda, № 7, 430, 431, 432-moddalar, № 10, 671, 673, 679-moddalar; 2019-yil, № 1, 1, 3, 5-moddalar, № 2, 47-modda, № 3, 161, 165, 166-moddalar, № 5, 259, 261, 267, 268-moddalar, № 7, 386-modda, № 8, 469, 471-moddalar, № 9, 591, 592-moddalar, № 10, 674, 676-moddalar, № 11, 787, 791-moddalar, № 12, 880, 891-moddalar; 2020-yil, № 1, 4-modda, № 3, 203, 204-moddalar, № 7, 449-modda, № 9, 539, 540-moddalar, № 10, 593, 596-moddalar, № 11, 651-modda, № 12, 691-modda; 2021-yil, № 1, 5, 7, 12, 13, 14-moddalar, № 2, 142-modda, № 3, 217-modda, № 4, 290, 293-moddalar, 4-songa ilova, № 8, 800, 802, 803-moddalar, № 9, 903-modda, № 10, 966, 967, 968, 973-moddalar, № 11, 1066-modda; 2022-yil, № 1, 1, 2-moddalar, № 2, 80, 81-moddalar, № 3, 215, 216-moddalar, № 4, 337-modda, № 5, 464, 465, 466, 467-moddalar, № 8, 787-modda, № 10, 981, 984-moddalar, № 12, 1188-modda; 2023-yil, № 3, 184, 185, 188, 189-moddalar, № 4, 265, 266, 268-moddalar, № 5, 319, 320-moddalar, № 7, 533, 534, 535, 537, 539-moddalar, № 8, 634-modda, № 10, 798-modda, № 11, 921, 923, 924-moddalar, № 12, 1004-modda; 2024-yil, № 1, 5, 7, 8, 9-moddalar, № 2, 102, 111, 115, 116-moddalar, № 3, 243, 245-moddalar, № 6, 530, 532-moddalar, № 7, 629-modda, № 8, 826, 829, 831-moddalar, № 9, 954, 964, 965-moddalar) quyidagi oʻzgartirishlar kiritilsin:

1) 17-modda :

nomining oʻzbekcha matnidagi “Ajnabiy fuqarolar” degan soʻzlar “Chet el fuqarolari” degan soʻzlar bilan almashtirilsin;

birinchi qismining oʻzbekcha matnidagi “ajnabiy fuqarolar” degan soʻzlar “chet el fuqarolari” degan soʻzlar bilan almashtirilsin;

2) 223-moddaning matni quyidagi tahrirda bayon etilsin:

“Oʻzbekiston Respublikasi fuqarosining pasportsiz yoki identifikatsiyalovchi ID-kartasiz, amal qilish muddati tugaganligi sababli almashtirilishi lozim boʻlgan pasport yoki identifikatsiyalovchi ID-karta bilan yashashi, shuningdek Oʻzbekiston Respublikasida doimiy yashovchi chet el fuqarosining va fuqaroligi boʻlmagan shaxsning identifikatsiyalovchi ID-kartasiz (yashash guvohnomasisiz), amal qilish muddati tugaganligi sababli almashtirilishi lozim boʻlgan identifikatsiyalovchi ID-kartasi (yashash guvohnomasi) bilan yashashi, —

bazaviy hisoblash miqdorining ikkidan bir qismi miqdorida jarima solishga sabab boʻladi.

Ushbu moddaning birinchi qismida nazarda tutilgan ayni bir huquqbuzarlik maʼmuriy jazo chorasi qoʻllanilganidan keyin bir yil davomida takror sodir etilgan boʻlsa, —

bazaviy hisoblash miqdorining uch baravari miqdorida jarima solishga sabab boʻladi.

Oʻzbekiston Respublikasi fuqarosining pasportini yoki identifikatsiyalovchi ID-kartasini yoxud xorijga chiqish uchun biometrik pasportini yaroqsizlantirishi yoki yoʻqotib qoʻyishi, Oʻzbekiston Respublikasida doimiy yashovchi fuqaroligi boʻlmagan shaxsning identifikatsiyalovchi ID-kartasini (yashash guvohnomasini) yoki harakatlanish hujjatini, shuningdek Oʻzbekiston Respublikasida doimiy yashovchi chet el fuqarosining identifikatsiyalovchi ID-kartasini (yashash guvohnomasini) yaroqsizlantirishi yoxud yoʻqotib qoʻyishi, —

bazaviy hisoblash miqdorining bir baravari miqdorida jarima solishga sabab boʻladi.

Ushbu moddaning uchinchi qismida nazarda tutilgan ayni bir huquqbuzarlik maʼmuriy jazo chorasi qoʻllanilganidan keyin bir yil davomida takror sodir etilgan boʻlsa, —

bazaviy hisoblash miqdorining besh baravari miqdorida jarima solishga sabab boʻladi.

Oʻzbekiston Respublikasi fuqarosining, Oʻzbekiston Respublikasida doimiy yashovchi chet el fuqarosining va fuqaroligi boʻlmagan shaxsning yashash joyi yoki turgan joyi boʻyicha roʻyxatdan oʻtmasdan yashashi, —

bazaviy hisoblash miqdorining uch baravari miqdorida jarima solishga sabab boʻladi.

Ushbu moddaning beshinchi qismida nazarda tutilgan ayni bir huquqbuzarlik maʼmuriy jazo chorasi qoʻllanilganidan keyin bir yil davomida takror sodir etilgan boʻlsa, —

bazaviy hisoblash miqdorining besh baravari miqdorida jarima solishga sabab boʻladi.

Pasport tizimi qoidalariga rioya etish uchun masʼul boʻlgan shaxslar tomonidan Oʻzbekiston Respublikasi fuqarolarining, chet el fuqarolarining va fuqaroligi boʻlmagan shaxslarning shaxsini tasdiqlovchi hujjatlarsiz yashashiga yoʻl qoʻyilishi, xuddi shuningdek shaxslar tomonidan oʻz turar joylarida Oʻzbekiston Respublikasi fuqarolarining, chet el fuqarolarining va fuqaroligi boʻlmagan shaxslarning shaxsini tasdiqlovchi hujjatlarsiz, yashash joyi yoki turgan joyi boʻyicha roʻyxatdan oʻtmasdan yashashiga yoʻl qoʻyilishi, —

bazaviy hisoblash miqdorining besh baravari miqdorida jarima solishga sabab boʻladi.

Ushbu moddaning yettinchi qismida nazarda tutilgan ayni bir huquqbuzarlik maʼmuriy jazo chorasi qoʻllanilganidan keyin bir yil davomida takror sodir etilgan boʻlsa, —

bazaviy hisoblash miqdorining oʻn baravari miqdorida jarima solishga sabab boʻladi.

Shaxs ushbu moddada nazarda tutilgan huquqbuzarliklar uchun quyidagi hollarda maʼmuriy javobgarlikka tortilmaydi, agar u:

1) oʻn sakkiz yoshga toʻlmagan boʻlsa;

2) oltmish yoshdan oshgan boʻlsa;

3) toʻliq davlat taʼminotida boʻlsa;

4) Oʻzbekiston Respublikasi yoki chet davlat hududida tabiiy hamda texnogen xususiyatli favqulodda vaziyatlar, shu jumladan maishiy tusdagi ofatlar (turar joylarning yoki yashash uchun moʻljallanmagan joylarning yongʻinlari, qulashi, transport vositalarining yonishi) roʻy berganligi natijasida jabrlangan boʻlsa (ushbu moddaning birinchi — oltinchi qismlarida nazarda tutilgan huquqbuzarliklarni sodir etganlik uchun);

5) qonunga xilof ravishda hukm qilingan yoki ishda ayblanuvchi, sudlanuvchi sifatida ishtirok etishga jalb qilingan boʻlib, pasportining yoki identifikatsiyalovchi ID-kartasining amal qilishi sud ajrimiga koʻra toʻxtatib turilgan boʻlsa (ushbu moddaning birinchi qismida nazarda tutilgan huquqbuzarlikni sodir etganlik uchun);

6) jazoni ijro etish muassasasida jazoni oʻtayotgan boʻlsa yoki jazoni oʻtab chiqib, bir oy ichida identifikatsiyalovchi ID-karta rasmiylashtirish uchun murojaat qilsa (ushbu moddaning birinchi — oltinchi qismlarida nazarda tutilgan huquqbuzarliklarni sodir etganlik uchun);

7) uchinchi shaxslarning gʻayrihuquqiy harakatlari yoki jinoyat sodir etilganligi oqibatida pasportining yoki identifikatsiyalovchi ID-kartasining (yashash guvohnomasining) yaroqsiz holga kelganligi yoki ular yoʻqolganligi toʻgʻrisida ariza bersa (ushbu faktlar qonunchilik hujjatlarida belgilangan tartibda aniqlangan hollarda);

8) xizmat vazifalarini yoki fuqarolik burchini bajarish chogʻida, shuningdek yengib boʻlmas kuch, oxirgi zarurat yoki zaruriy mudofaa oqibatida pasportining yoki identifikatsiyalovchi ID-kartasining (yashash guvohnomasining) yaroqsiz holga kelganligi yoki ularning yoʻqolganligi toʻgʻrisida ariza bersa (ushbu hollar qonunchilikda nazarda tutilgan tartibda aniqlangan taqdirda).

Shaxs ushbu moddada nazarda tutilgan huquqbuzarliklar uchun qonunchilikda belgilangan boshqa hollarda ham javobgarlikdan ozod etilishi mumkin”;

3) 223 3 -modda quyidagi tahrirda bayon etilsin:

“223 3 -modda. Pasportni yoki identifikatsiyalovchi ID-kartani garovga olish yoxud pasportni yoki identifikatsiyalovchi ID-kartani qonunga xilof ravishda olib qoʻyish

Pasportni yoki identifikatsiyalovchi ID-kartani garovga olish, —

bazaviy hisoblash miqdorining ikki baravari miqdorda jarima solishga sabab boʻladi.

Pasportni yoki identifikatsiyalovchi ID-kartani shaxslardan qonunga xilof ravishda olib qoʻyish, —

bazaviy hisoblash miqdorining oʻn baravari miqdorda jarima solishga sabab boʻladi”;

4) 225-modda :

birinchi qismining dispozitsiyasi quyidagi tahrirda bayon etilsin:

“Chet el fuqarosining yoki fuqaroligi boʻlmagan shaxsning Oʻzbekiston Respublikasida boʻlish qoidalarini buzishi, yaʼni amal qilish muddati tugaganligi sababli almashtirilishi lozim boʻlgan harakatlanish hujjatlari bilan yashashi, turgan joyi boʻyicha roʻyxatdan oʻtishning, koʻchishning yoki yashash joyini tanlashning belgilangan tartibiga rioya etmaganligi, turish muddati tugagach chiqib ketishdan boʻyin tovlashi, xuddi shuningdek Oʻzbekiston Respublikasi hududi orqali tranzit oʻtish qoidalariga oʻn sutkagacha rioya etmaganligi”;

ikkinchi qismining sanksiyasidagi “oʻn” degan soʻz “oʻn besh” degan soʻzlar bilan almashtirilsin;

uchinchi qismining sanksiyasidagi “yigirma” degan soʻz “yigirma besh” degan soʻzlar bilan almashtirilsin;

toʻrtinchi qismining sanksiyasidagi “yigirma” degan soʻz “yigirma besh” degan soʻzlar bilan almashtirilsin;

beshinchi qismining :

dispozitsiyasidagi “vaqtincha” degan soʻz chiqarib tashlansin;

sanksiyasidagi “oʻn” degan soʻz “oʻn besh” degan soʻzlar bilan almashtirilsin;

5) 239-moddaning beshinchi qismidagi “chet davlatlar fuqarolaridan” degan soʻzlar “chet el fuqarolaridan” degan soʻzlar bilan almashtirilsin;

6) 248-modda ikkinchi qismining 3 va 4-bandlari quyidagi tahrirda bayon etilsin:

“3) ushbu Kodeksning 54-moddasida nazarda tutilgan maʼmuriy huquqbuzarliklar uchun — temir yoʻl vokzallari va aeroportlardagi boʻlinmalarning boshliqlari va boshliq oʻrinbosarlari, 223-moddasining birinchi — sakkizinchi qismlarida, 223 1 , 223 3 , 224-moddalarida, 225-moddasining birinchi — beshinchi qismlarida nazarda tutilgan maʼmuriy huquqbuzarliklar uchun — temir yoʻl vokzallari va aeroportlardagi boʻlinmalarning, ichki ishlar organlarining migratsiya va fuqarolikni rasmiylashtirish boʻlinmalarining (boʻlimlarining, boshqarmalarining) boshliqlari hamda boshliq oʻrinbosarlari, shuningdek ichki ishlar organlarining migratsiya va fuqarolikni rasmiylashtirish guruhlarining katta mutaxassislari;

4) ushbu Kodeksning 47-moddasi birinchi qismida, 47 3 , 54, 56 1 -moddalarida, 110-moddasining birinchi qismida (fuqarolarga nisbatan), 111-moddasining birinchi qismida, 113-moddasining birinchi, ikkinchi, toʻrtinchi va beshinchi qismlarida, 114, 122, 123-moddalarida, 127-moddasida (tovush signalini sababsiz berishga doir qismida), 128 6 -moddasida, 147-moddasining birinchi qismida (avtomobil yoʻllarini oʻzboshimchalik bilan qazish, ularda sunʼiy notekisliklar va toʻsiqlar yaratganlik, avtomobil yoʻlida ishlarni amalga oshirish uchun berilgan ruxsatnoma talablarini bajarmaganlik, shuningdek yoʻllarni saqlash qoidalarini buzganlik uchun), 148-moddasida (ajratilgan mintaqalarda va yogʻoch koʻpriklardan 100 metrgacha boʻlgan masofada olov yoqqanlik, taxta toʻshamali koʻpriklarda chekkanlik uchun), 161-moddasida (fuqarolarga nisbatan), 187-moddasining birinchi qismida, 188, 188 2 , 192, 221-moddalarida, 223-moddasining birinchi — sakkizinchi qismlarida, 223 1 , 223 3 -moddalarida, 224-moddasining birinchi qismida, 225-moddasining birinchi — beshinchi qismlarida nazarda tutilgan maʼmuriy huquqbuzarliklar uchun — ichki ishlar organlari tayanch punktlarining profilaktika katta inspektorlari va inspektorlari”.

2. Oʻzbekiston Respublikasining 2020-yil 6-yanvarda qabul qilingan “Davlat boji toʻgʻrisida”gi OʻRQ-600-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2020-yil, № 1, 1-modda, № 3, 201-modda, № 5, 298-modda, № 10, 593-modda, № 12, 691-modda; 2021-yil, № 1, 13-modda, 4-songa ilova, № 7, 661-modda, № 8, 800, 803-moddalar, № 10, 968-modda; 2022-yil, № 2, 76-modda, № 3, 214, 216-moddalar, № 4, 340-modda, № 5, 463, 464, 467-moddalar, № 12, 1186-modda; 2023-yil, № 2, 103-modda, № 3, 186-modda, № 4, 265, 269-moddalar, № 6, 444, 445-moddalar, № 7, 538-modda, № 9, 710-modda; 2024-yil, № 1, 5, 6, 7-moddalar, № 2, 101, 105, 107, 108, 111, 112-moddalar, № 7, 628-modda, № 8, 819, 823, 831-moddalar, № 9, 958-modda) quyidagi oʻzgartirishlar kiritilsin:

1) 5-modda :

6-bandidagi “Oʻzbekiston Respublikasi fuqarolarini doimiy yashash va vaqtincha turgan joyi boʻyicha roʻyxatga olganlik uchun, shuningdek chet el fuqarolarini hamda fuqaroligi boʻlmagan shaxslarni doimiy yashash joyi boʻyicha roʻyxatga olganlik uchun” degan soʻzlar “Oʻzbekiston Respublikasi fuqarolarini yashash joyi va turgan joyi boʻyicha roʻyxatga olganlik uchun, shuningdek chet el fuqarolarini hamda fuqaroligi boʻlmagan shaxslarni yashash joyi boʻyicha roʻyxatga olganlik uchun” degan soʻzlar bilan almashtirilsin;

12-bandi quyidagi tahrirda bayon etilsin:

“12) chet el fuqarolariga va fuqaroligi boʻlmagan shaxslarga kirish, chiqish yoki kirish-chiqish vizalarini berganlik va ularning amal qilish muddatini uzaytirganlik, chet el fuqarolariga va fuqaroligi boʻlmagan shaxslarga koʻp martalik kirish-chiqish vizalarini rasmiylashtirganlik, chet el fuqarolarini va fuqaroligi boʻlmagan shaxslarni kirish vizasining amal qilish muddati davriga vaqtincha turgan joyi boʻyicha roʻyxatdan oʻtkazganlik va vizaning amal qilish muddati uzaytirilgan davrda turgan joyi boʻyicha roʻyxatga olingan muddatini uzaytirganlik uchun, MDHga aʼzo davlatlar fuqarolarini, shuningdek fuqarolik haqida belgilari mavjud boʻlmagan sobiq SSSR pasportlari bilan MDHga aʼzo davlatlardan kelgan shaxslarni turgan joyi boʻyicha roʻyxatdan oʻtkazganlik, chet el fuqarosining, shu jumladan MDHga aʼzo davlatlar fuqarosining yoki fuqaroligi boʻlmagan shaxsning Oʻzbekiston Respublikasida doimiy yashashga oid hujjatlarini koʻrib chiqqanlik va ruxsatnoma rasmiylashtirganlik, chet el fuqarosiga yoki fuqaroligi boʻlmagan shaxsga pasport yoki uning oʻrnini bosuvchi hujjat yoʻqolganligi haqida maʼlumotnomalar berganlik uchun”;

2) 13-modda birinchi qismi 4-bandining oʻzbekcha matnidagi “xorijga chiqish uchun Oʻzbekiston Respublikasi fuqarosining identifikatsiyalovchi ID-kartasini va Oʻzbekiston Respublikasi fuqarosining biometrik pasportini” degan soʻzlar “Oʻzbekiston Respublikasi fuqarosining identifikatsiyalovchi ID-kartasini va Oʻzbekiston Respublikasi fuqarosining xorijga chiqish uchun biometrik pasportini” degan soʻzlar bilan almashtirilsin;

3) 15-modda birinchi qismining birinchi xatboshisi quyidagi tahrirda bayon etilsin:

“Yashash joyi va turgan joy boʻyicha roʻyxatdan oʻtkazganlik uchun davlat bojini toʻlashdan quyidagilar ozod qilinadi”;

4) 22-moddaning ikkinchi qismidagi “doimiy yashash va vaqtincha turgan joyi” degan soʻzlar “yashash joyi va turgan joyi” degan soʻzlar bilan almashtirilsin;

5) ilova :

6-pozitsiyasining:

“j” bandidagi “doimiy yashash yoki vaqtincha turgan joyi” degan soʻzlar “yashash joyi yoki turgan joyi” degan soʻzlar bilan almashtirilsin;

“z” bandidagi “Oʻzbekiston Respublikasi hududida doimiy yashovchi chet el fuqarolarini va fuqaroligi boʻlmagan shaxslarni doimiy yashash va vaqtincha turgan joyi boʻyicha roʻyxatdan oʻtkazganlik uchun” degan soʻzlar “Oʻzbekiston Respublikasida doimiy yashovchi chet el fuqarolarini va fuqaroligi boʻlmagan shaxslarni yashash joyi va turgan joyi boʻyicha roʻyxatdan oʻtkazganlik uchun” degan soʻzlar bilan almashtirilsin;

19-pozitsiyasi:

nomidagi “kirish yoki kirish-chiqish” degan soʻzlar “kirish, chiqish yoki kirish-chiqish” degan soʻzlar bilan almashtirilsin;

“a” bandining birinchi xatboshisidagi “kirish yoki kirish-chiqish” degan soʻzlar “kirish, chiqish yoki kirish-chiqish” degan soʻzlar bilan almashtirilsin;

“b” bandining birinchi xatboshisidagi “koʻp marotabali chiqish-kirish” degan soʻzlar “koʻp marotabali kirish-chiqish” degan soʻzlar bilan almashtirilsin;

“v” bandining birinchi xatboshisidagi “vaqtinchalik roʻyxatdan oʻtkazganlik hamda vizaning amal qilish muddati uzaytirilgan davrda vaqtinchalik roʻyxatdan oʻtkazishni uzaytirganlik uchun” degan soʻzlar “turgan joyi boʻyicha roʻyxatdan oʻtkazganlik hamda vizaning amal qilish muddati uzaytirilgan davrda turgan joyi boʻyicha roʻyxatdan oʻtkazishni uzaytirganlik uchun” degan soʻzlar bilan almashtirilsin;

“g” bandining birinchi xatboshisidagi “vaqtinchalik roʻyxatdan” degan soʻzlar “turgan joyi boʻyicha roʻyxatdan” degan soʻzlar bilan almashtirilsin;

“d” bandidagi “doimiy yashashga oid hujjatlarini koʻrib chiqish va rasmiylashtirganlik uchun” degan soʻzlar “doimiy yashashga oid hujjatlarini koʻrib chiqqanlik va ruxsatnomasini rasmiylashtirganlik uchun” degan soʻzlar bilan almashtirilsin.

27-modda. Oʻzbekiston Respublikasining ayrim qonun hujjatlarini oʻz kuchini yoʻqotgan deb topish

Quyidagilar oʻz kuchini yoʻqotgan deb topilsin:

1) Oʻzbekiston Respublikasining 2011-yil 14-sentabrda qabul qilingan “Toshkent shahri va Toshkent viloyatida doimiy propiska qilinishi lozim boʻlgan shaxslar — Oʻzbekiston Respublikasi fuqarolari toifalarining roʻyxati toʻgʻrisida”gi OʻRQ-296-sonli Qonuni (Oʻzbekiston Respublikasi Oliy Majlisi palatalarining Axborotnomasi, 2011-yil, № 9, 249-modda);

2) Oʻzbekiston Respublikasining 2016-yil 25-aprelda qabul qilingan “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-405-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2016-yil, № 4, 125-modda) 23-moddasi ;

3) Oʻzbekiston Respublikasining 2016-yil 23-sentabrda qabul qilingan “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-411-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2016-yil, № 9, 276-modda) 21-moddasi ;

4) Oʻzbekiston Respublikasining 2020-yil 13-mayda qabul qilingan “Toshkent shahri va Toshkent viloyatida doimiy propiska qilinishi lozim boʻlgan shaxslar — Oʻzbekiston Respublikasi fuqarolari toifalarining roʻyxati toʻgʻrisida”gi Oʻzbekiston Respublikasi Qonuniga oʻzgartishlar va qoʻshimcha kiritish haqida”gi OʻRQ-616-sonli Qonuni (Oʻzbekiston Respublikasi Oliy Majlisi palatalarining Axborotnomasi, 2020-yil, № 5, 295-modda);

5) Oʻzbekiston Respublikasining 2021-yil 21-aprelda qabul qilingan “Oʻzbekiston Respublikasining ayrim qonun hujjatlariga oʻzgartishlar kiritish toʻgʻrisida”gi OʻRQ-683-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2021-yil, 4-songa ilova) 206-moddasi .

28-modda. Ushbu Qonunning ijrosini, yetkazilishini, mohiyati va ahamiyati tushuntirilishini taʼminlash

Oʻzbekiston Respublikasi Ichki ishlar vazirligi, Tashqi ishlar vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

29-modda. Qonunchilikni ushbu Qonunga muvofiqlashtirish

Oʻzbekiston Respublikasi Vazirlar Mahkamasi:

oʻn olti yoshga toʻlgan va Oʻzbekiston Respublikasi fuqarolari boʻlgan shaxslarga yoxud Oʻzbekiston Respublikasida doimiy yashovchi fuqaroligi boʻlmagan shaxslarga yoki chet el fuqarolari boʻlgan shaxslarga yangi identifikatsiyalovchi ID-kartalarni ularning familiyasi, ismi, otasining ismi yoki tugʻilgan sanasi oʻzgargan, shu jumladan nikoh qayd etilganligi yoki nikohdan ajralganlik munosabati bilan familiyasi oʻzgargan taqdirda, bir vaqtning oʻzida gerbli guvohnomalarni rasmiylashtirgan holda majburiy ravishda rasmiylashtirish tartibini ushbu Qonun rasmiy eʼlon qilingan kundan eʼtiboran uch oy ichida ishlab chiqsin va tasdiqlasin;

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

30-modda. Ushbu Qonunning kuchga kirishi

Ushbu Qonun rasmiy eʼlon qilingan kundan eʼtiboran uch oy oʻtgach kuchga kiradi.

Ushbu Qonun 26-moddasi birinchi qismi 1-bandining 1 , 2 , 3 , 5 va 6-kichik bandlari ushbu Qonun rasmiy eʼlon qilingan kundan eʼtiboran amalga kiritiladi.

Oʻzbekiston Respublikasining Prezidenti Sh. MIRZIYOYEV

Toshkent sh.,

2025-yil 10-iyul,

OʻRQ-1074-son

(Qonunchilik maʼlumotlari milliy bazasi, 11.07.2025-y., 03/25/1074/0596-son)

lex.uz