UzbekAI

Ўзбекистон Республикаси Вазирлар Маҳкамасининг

қарори

НИЗОМ

Мувофиқликни баҳолаш органларини тайинлаш (нотификация қилиш) тартиби тўғрисидаги низомни тасдиқлаш ҳақида

Ўзбекистон Республикасининг «Техник жиҳатдан тартибга солиш тўғрисида»ги Қонуни ижросини таъминлаш мақсадида Вазирлар Маҳкамаси қарор қилади:

1. Қуйидагиларни назарда тутувчи Мувофиқликни баҳолаш органларини тайинлаш (нотификация қилиш) тартиби тўғрисидаги низом иловага мувофиқ тасдиқлансин:

тайинловчи (нотификация қилувчи) органга ва тайинланган (нотификация қилинган) мувофиқликни баҳолаш органларига қўйиладиган талаблар;

тайинланган (нотификация қилинган) мувофиқликни баҳолаш органларининг мажбуриятлари, реестрини юритиш, шунингдек, тайинланган (нотификация қилинган) мувофиқликни баҳолаш органи мақомини олиш ва уни ўзгартириш тартиби.

2. Ушбу қарор расмий эълон қилинган кундан эътиборан уч ой ўтгач кучга киради.

3. Ушбу қарорнинг бажарилишини назорат қилиш Вазирлар Маҳкамаси ҳузуридаги Ўзбекистон техник жиҳатдан тартибга солиш агентлиги директори А.Р. Жуманазаров зиммасига юклансин.

Вазирлар Маҳкамасининг 2025 йил 12 июлдаги 432-сон қарорига ИЛОВА

Мувофиқликни баҳолаш органларини тайинлаш (нотификация қилиш) тартиби тўғрисида

1-боб. Умумий қоидалар

1. Ушбу Низом мувофиқликни баҳолаш органларини тайинлаш (нотификация қилиш) тартибини белгилайди.

2. Тайинланган (нотификация қилинган) мувофиқликни баҳолаш органи тегишли техник регламентга мувофиқ (кейинги ўринларда — техник регламент) учинчи тараф сифатида маҳсулотларнинг мувофиқлигини баҳолайди.

3. Ушбу Низомда қуйидаги асосий тушунчалар қўлланади:

тайинловчи (нотификация қилувчи) орган (кейинги ўринларда — Ваколатли орган) — техник регламентда ёки фаолият соҳасидан келиб чиқиб Вазирлар Маҳкамаси томонидан белгиланадиган мувофиқликни баҳолаш органини тайинловчи (нотификация қилувчи) ваколатли орган;

тайинлаш (нотификация қилиш) — мувофиқликни баҳолаш органларини техник регламентларда белгиланган маҳсулот турларига нисбатан мувофиқликни баҳолаш тартиб-таомилларини бажариш учун Ваколатли орган томонидан баҳолаш, расман тасдиқлаш ва белгиланган талабларга риоя қилишлари устидан мониторинг ўтказиш;

тайинланган (нотификация қилинган) орган — техник регламентда белгиланган маҳсулот турларига нисбатан мувофиқликни баҳолаш тартиб-таомилларини учинчи тараф сифатида бажарувчи мувофиқликни баҳолаш органи;

тайинлаш (нотификация қилиш) соҳаси (кейинги ўринларда — тайинлаш соҳаси) — даъвогар томонидан сўралаётган ёки Ваколатли орган томонидан тасдиқланган мувофиқликни баҳолаш тартиб-таомилларининг ва маҳсулот турларининг рўйхати.

2-боб. Тайинлаш (нотификация қилиш) тартиби

4. Ваколатли орган техник регламент доирасида мувофиқликни баҳолаш ишларини амалга оширувчи мувофиқликни баҳолаш органларини баҳолайди, тайинлайди (нотификация қилади) ва уларни белгиланган талабларга риоя қилишлари устидан мониторинг ўтказади.

5. Ваколатли орган томонидан ушбу Низом, шунингдек, техник регламентларда қўшимча талаблар белгиланган бўлса, мазкур талабларни инобатга олган ҳолда мувофиқликни баҳолаш органини тайинлайди (нотификация қилади).

6. Тайинлаш (нотификация қилиш) тартиб-таомили ва ундан ўтиш кетма-кетлиги, техник регламентлар ва ушбу Низом талабларини ҳисобга олган ҳолда, Ваколатли орган томонидан тасдиқланадиган тайинлаш тартибига мувофиқ белгиланади.

7. Ваколатли орган ушбу Низомнинг 4-бандида назарда тутилган ишларни, ўзининг мавжуд юкламасидан келиб чиқиб чиққан ҳолда самарали ва ўз вақтида йўлга қўйиш мақсадида, Ўзбекистон Республикасининг «Мувофиқликни баҳолаш органларини аккредитация қилиш тўғрисида»ги Қонунида белгиланган аккредитация органи томонидан бажарилиши бўйича тегишли қарорни қабул қилиши мумкин.

8. Агар Ваколатли орган ушбу Низомнинг 4-бандида назарда тутилган баҳолаш, тайинлаш (нотификация қилиш) ёки мониторинг ўтказиш ишларини бошқа ташкилотга (органга) топширса ёки бу ишларни бажаришга ваколат берса, бундай ташкилот (орган) юридик шахс мақомига эга бўлиши ва ушбу Низомнинг 4-бобида белгиланган талабларга риоя қилиши ҳамда ўз фаолиятидан келиб чиқадиган мажбуриятларни тўлиқ бажариши учун зарур ташкилий техник чораларни кўрган бўлиши шарт.

9. Ушбу Низомнинг 8-бандида назарда тутилган ташкилот (орган) томонидан бажарилган ишлар учун жавобгарликни Ваколатли орган ўз зиммасига олади.

10. Тайинлаш соҳасида мувофиқликни баҳолаш фаолияти тўғрисидаги маълумот ҳамда мувофиқликни баҳолаш тартиб-таомили техник регламентда белгиланган маҳсулотларга оид маълумотларда тўлиқ акс эттирилиши лозим.

11. Ваколатли орган нотификация органини тайинлаш (нотификация қилиш) тўғрисидаги қарорда муайян техник регламент доирасида қўлланувчи мувофиқликни баҳолаш тартиб-таомиллари, тегишли маҳсулот(лар) ёки маҳсулотлар гуруҳи, мувофиқликни баҳолаш органининг ваколатини (компетентлик даражасини) тасдиқловчи маълумотларни ҳамда тайинлашнинг (нотификация қилишнинг) амал қилиш муддатини акс эттириши шарт.

12. Агар тайинлаш (нотификация қилиш) ушбу Низомнинг 44-бандида назарда тутилган аккредитацияга асосланмаган бўлса, Ваколатли орган мувофиқликни баҳолаш органининг ваколатини (компетентлик даражасини) тасдиқловчи ҳужжатлаштирилган далилларга эга бўлиши ва мувофиқликни баҳолаш органи белгиланган талабларга доимий риоя қилиши устидан мониторинг ўтказилиши учун зарур чораларни кўрган бўлиши шарт.

13. Ваколатли орган мувофиқликни баҳолаш органига тайинланган (нотификация қилинган) орган мақомини бериш ёки бермаслик тўғрисидаги қарорни ўттиз иш кунида қабул қилиши шарт.

Тайинланган (нотификация қилинган) органлар реестрига киритилган ташкилот, техник регламент талабларига мувофиқ тайинланган (нотификация қилинган) орган сифатида тан олинади.

14. Агар тайинлаш ушбу Низомнинг 44-бандида назарда тутилган аккредитацияга асосланган бўлса, Ваколатли орган аккредитация гувоҳномасининг амал қилиш даврига тенг муддатга, бундан бошқа ҳолларда эса уч йил муддатга мувофиқликни баҳолаш органини тайинлаши (нотификация қилиши) лозим.

15. Ваколатли орган тайинланган (нотификация қилинган) мувофиқликни баҳолаш органи билан тайинлаш талаблари ва шартларини белгилайдиган, шу жумладан, тайинланган органнинг мажбуриятлари, белгиланган талабларга риоя қилиши устидан мониторинг ўтказиши ва бошқа муносабатларни тартибга солувчи, юридик кучга эга шартнома тузиши шарт.

16. Ваколатли орган тайинлаш соҳасига киритилган ўзгаришлар ҳақида Вазирлар Маҳкамаси ҳузуридаги Ўзбекистон техник жиҳатдан тартибга солиш агентлигини (кейинги ўринларда — Агентлик) ва бошқа манфаатдор томонларни уч кун муддатда хабардор қилиши лозим.

3-боб. Ваколатли органга қўйиладиган талаблар

17. Ваколатли орган мувофиқликни баҳолаш органини тайинлашда (нотификация қилишда) қуйидагиларни таъминлаши керак:

мувофиқликни баҳолаш органлари билан манфаатлар тўқнашуви мавжуд бўлмаслигини;

ўз фаолиятини холислик ва беғаразликни таъминлайдиган тарзда ташкил қилиши ва фаолият юритишини;

мувофиқликни баҳолаш органини тайинлашга тааллуқли бўлган ҳар бир қарорнинг мувофиқликни баҳолаш органи билан аффилланмаган ваколатли шахслар томонидан қабул қилинишини;

тайинланаётган (нотификация қилинаётган) мувофиқликни баҳолаш органларидан олинган ахборотнинг махфийлигини.

18. Ваколатли орган мувофиқликни баҳолаш органлари амалга оширадиган фаолият билан шуғулланмаслиги ёхуд маслаҳат хизматларини кўрсатмаслиги ёки бундай хизмат турини таклиф қилмаслиги керак.

19. Ваколатли орган мувофиқликни баҳолаш органларини баҳолаш ва тайинлаш (нотификация қилиш) тартиб-таомилларини ва ушбу тартиб-таомилларга киритилган ҳар қандай ўзгартиришларни ҳамда тайинланган (нотификация қилинган) орган устидан ўтказилган мониторинг натижаларини очиқлаши шарт.

4-боб. Тайинланган (нотификация қилинган) органларга ва уларнинг ходимларига қўйиладиган талаблар

20. Мувофиқликни баҳолаш органи тайинланган (нотификация қилинган) орган мақомини олиши учун мазкур бобда белгиланган талабларга жавоб бериши шарт.

21. Қуйидаги келтирилган барча талаблар ва шартларни бажарган мувофиқликни баҳолаш органлари тайинланиши (нотификация қилиниши) мумкин:

Ўзбекистон Республикасининг резидентлари — юридик шахслар бўлса;

сўнгги уч йил давомида маҳсулотнинг мувофиқлигини баҳолаш ишларини бажариш тажрибасига эга бўлса;

белгиланган соҳа доирасида маҳсулотни синашни амалга ошириш учун аккредитация қилинган ўз синаш лабораторияларига эга бўлса;

мувофиқликни баҳолаш тартиб-таомилларини тайинланган (нотификация қилинган) органларни жалб этган ҳолда қўллаш назарда тутилган техник регламентларда белгиланган махсус талабларга, бундай талаблар техник регламентларда белгиланмаган тақдирда эса Ўзбекистон Республикаси Вазирлар Маҳкамаси томонидан белгиланган махсус талабларга мувофиқ бўлса.

22. Техник регламентларда белгиланган маҳсулотларни лойиҳалаштириш, ишлаб чиқариш, таъминлаш, йиғиш, эксплуатация қилиш ва хизмат кўрсатиш билан боғлиқ фаолият манфаатларини ифодаловчи уюшмаларга аъзо бўлган мувофиқликни баҳолаш органи, ўзининг мустақиллиги ва унда манфаатлар тўқнашуви ҳолатлари мавжуд эмаслигини намойиш қилиши шарти билан мустақил учинчи томон органи сифатида эътироф қилиниши мумкин.

23. Мувофиқликни баҳолаш органи, унинг раҳбарияти ва мувофиқликни баҳолаш вазифаларини бажаришга масъул ходимлари ўзлари баҳолайдиган техник регламентларда белгиланган маҳсулотларнинг лойиҳачиси, ишлаб чиқарувчиси, таъминотчиси, ўрнатувчиси, харидори, эгаси, фойдаланувчиси ёки техник хизмат кўрсатувчиси ёхуд уларнинг вакили бўлмаслиги керак.

24. Мувофиқликни баҳолаш органи, унинг раҳбарияти ва мувофиқликни баҳолаш вазифаларини бажаришга масъул ходимлари бевосита техник регламентларда белгиланган маҳсулотларни лойиҳалаштириш, ишлаб чиқариш ёки йиғиш, маркетинг, ўрнатиш, фойдаланиш ёки техник хизмат кўрсатиш билан боғлиқ фаолиятларда иштирок этмаслиги ёки ушбу фаолият билан шуғулланувчиларга вакиллик қилмаслиги шарт.

25. Мувофиқликни баҳолаш органлари тайинланган соҳа доирасида тегишли қарор қабул қилишдаги мустақилликни ёки мувофиқликни баҳолаш ишларини бажаришдаги ҳаққонийликнинг таъминланишига тўсқинлик қилувчи ҳар қандай фаолият тури билан шуғулланмасликлари шарт.

26. Мувофиқликни баҳолаш органи мувофиқликни баҳолашни амалга оширишда унинг шуъба корхонаси ёки ёрдамчи пудратчи ташкилотларининг ҳаракатлари махфийликка, беғаразликка ёки холисликка таъсир қилмаслигини таъминлаши керак.

27. Мувофиқликни баҳолаш органи ходимлари мувофиқликни баҳолашни юқори профессионал даражада ҳамда муайян соҳадаги зарур техник билим ва малака асосида амалга оширишлари ҳамда мувофиқликни баҳолаш фаолиятида уларнинг қарор қабул қилиш қобилиятига ва мувофиқликни баҳолаш натижаларига таъсир кўрсатувчи, жумладан, ушбу фаолият натижаларидан манфаатдор шахслар ёки гуруҳларнинг ҳар қандай босим ва рағбатлантиришлари, айниқса, молиявий рағбатидан холи бўлишлари шарт.

28. Мувофиқликни баҳолаш органи тайинланган соҳада мувофиқликни баҳолаш тартиб-таомилларида белгиланган вазифаларни бажариши ёки унинг номи ва жавобгарлигида бажарилишини таъминлаши лозим.

29. Мувофиқликни баҳолаш органи доимий равишда ўзи тайинланган ҳар бир мувофиқликни баҳолаш тартиб-таомили ва ҳар бир турдаги ёки тоифадаги техник регламентларда белгиланган маҳсулотларга нисбатан қуйидагиларга эга бўлиши лозим:

а) мувофиқликни баҳолаш учун техник билим ва тажрибага эга ходимларга;

б) техник регламентга мувофиқ ўтказиладиган, шаффофликни таъминловчи ҳамда такроран қайта ўтказиш имконини яратиб берувчи мувофиқликни баҳолаш жараёнининг тўлиқ ёзма тафсилотига;

в) тайинланган мувофиқликни баҳолаш органи сифатида амалга ошириладиган фаолиятни бошқа фаолиятлардан фарқлаб олиш имконини берувчи тегишли сиёсат ва тартиб-таомил ҳужжатларига;

г) бажариладиган ишнинг кўлами, фаолият олиб борилувчи иқтисодиёт тармоғи, ташкилий тузилмаси, фаолиятида қўлланадиган технологиянинг мураккаблик даражаси ҳамда фаолиятнинг оммавий ёки серияли тарзда олиб борилиши хусусиятларини ўзида акс эттирувчи тартиб-таомил ҳужжатларига.

30. Мувофиқликни баҳолаш органи мувофиқликни баҳолаш фаолияти билан боғлиқ техник ва маъмурий вазифаларни белгиланган тартибда бажариши учун зарур техник воситаларга, барча талаб этилувчи ускуналар ёки иншоотлардан фойдаланиш имкониятига эга бўлиши керак.

31. Мувофиқликни баҳолаш учун масъул ходимлар қуйидагиларга эга бўлиши лозим:

а) мувофиқликни баҳолаш органи ўзи тайинланган соҳалардаги барча мувофиқликни баҳолаш фаолиятини қамраб олувчи техник ва касбий малакага;

б) ўзлари бажарадиган баҳолашга қўйиладиган талаблар бўйича билим ва ушбу баҳолашни амалга ошириш учун ваколатга;

в) техник регламентларда белгиланган асосий хавфсизлик талаблари, маҳсулотнинг, уни ишлаб чиқариш жараёнларининг ёки усулларининг техник регламентлар талабларига мувофиқлиги презумпциясини таъминлайдиган стандартлар ва бошқа қонунчилик ҳужжатларидаги талаблар тўғрисида билим ва кўникмага;

г) баҳолаш амалга оширилганини тасдиқловчи ҳисоботлар, тегишли ёзувлар ва хулосаларни расмийлаштириш кўникмасига.

32. Мувофиқликни баҳолаш органининг, унинг раҳбарияти ва мувофиқликни баҳолаш учун масъул ходимларнинг холислиги кафолатланиши шарт.

33. Агар мувофиқликни баҳолаш фаолиятидан келиб чиқадиган мажбуриятлар қонунчилик ҳужжатларига мувофиқ давлат томонидан қопланиши ёки унинг жавобгарлигида бўлиши назарда тутилмаган бўлса, мувофиқликни баҳолаш органи ўз фаолиятидан келиб чиқадиган мажбуриятларни молиявий кафолатлаши (суғурталаши ва бошқа усуллар) шарт.

34. Мувофиқликни баҳолаш тартиб-таомилларига асосан мувофиқликни баҳолаш органи ходимлари ўз вазифаларини бажариши давомида олинган барча маълумотларни, ваколатли давлат назорат органига нисбатан истисно қилган ҳолда, касбий сир сифатида сақлашлари шарт.

35. Мувофиқликни баҳолаш органи ўзи тайинланган тегишли соҳадаги стандартлаштириш бўйича техник қўмита (кейинги ўринларда — Техник қўмита) фаолиятида иштирок этиши ёки мувофиқликни баҳолаш ишларини бажариш учун масъул ходимларининг стандартлаштириш ҳамда Техник қўмита фаолияти натижаларидан доимий хабардор бўлишларини таъминлаши лозим. Мувофиқликни баҳолаш органи Техник қўмита фаолияти доирасида қабул қилинган кўрсатмалар ва ҳужжатларни ўз фаолиятининг умумий бошқарув ҳужжатлари сифатида қабул қилишлари ва амалиётда қўллашлари шарт.

5-боб. Тайинланган (нотификация қилинган) органларнинг шуъбалари ва ёрдамчи пудратчи ташкилотлари

36. Тайинланган (нотификация қилинган) орган мувофиқликни баҳолаш фаолияти билан боғлиқ айрим вазифаларни бажариши учун ёрдамчи пудратчи ташкилотни ёлласа ёки ўзининг шуъба корхонаси хизматидан фойдаланишга эҳтиёжи бўлса, бундай ҳолларда унинг ёрдамчи пудратчи ташкилоти ёки шуъба корхонаси ўз фаолиятини амалга оширишда ушбу Низомнинг 4-бобида белгиланган талабларга жавоб беришини таъминлаши ва бу ҳақида Ваколатли органни хабардор қилиши шарт.

37. Тайинланган (нотификация қилинган) орган, унинг ёрдамчи пудратчи ташкилотлари ёки шуъба корхонаси қаерда ва қандай шартларда ташкил этилганидан қатъи назар, улар томонидан бажарилган ишлар учун тўлиқ жавобгарликни ўз зиммасига олади.

38. Мувофиқликни баҳолаш жараёнидаги тайинланган (нотификация қилинган) органнинг маълум вазифалари ёрдамчи пудратчи ташкилотига берилиши ёки шуъба корхонаси томонидан фақат мижознинг (ишлаб чиқарувчи ва (ёки) унинг ваколатли вакили, импорт қилувчи ва дистрибютор) розилиги билан амалга оширилиши мумкин.

39. Тайинланган (нотификация қилинган) орган, жалб қилинган ёрдамчи пудратчи ташкилотлар ёки шуъба корхонаси малакасини баҳолашга ҳамда улар томонидан мувофиқликни баҳолаш тартиб-таомиллари доирасида бажарилган ишлар бўйича ҳужжатларни Ваколатли орган ихтиёрида сақлаши шарт.

6-боб. Тайинланган (нотификация қилинган) органлар томонидан ишлаб чиқарувчининг (корхонанинг) аккредитациядан ўтган органларини жалб этиш

40. Агар мувофиқликни баҳолаш бўйича қонунчилик ҳужжатларида белгиланган тартиб-таомиллар бунга рухсат берса, ишлаб чиқарувчи (корхона) қошида (ёки унинг бошқарув тизимида) ташкил этилган аккредитациядан ўтган органлар мувофиқликни баҳолашга жалб қилиниши мумкин. Бундай орган ишлаб чиқарувчининг алоҳида ва ажратилган тузилмаси тарзида фаолият юритиши ҳамда ўзи томонидан баҳоланаётган маҳсулотни лойиҳалаштириш, ишлаб чиқариш, таъминлаш, ўрнатиш, эксплуатация қилиш ва хизмат кўрсатиш жараёнларида иштирок этмаслиги шарт.

41. Ишлаб чиқарувчининг аккредитациядан ўтган органи қуйидаги талабларга жавоб бериши шарт:

халқаро аккредитация ташкилотлари томонидан кўп томонлама тан олиш тизимлари иштирокчиси ҳисобланган аккредитация органи томонидан аккредитациядан ўтказилган бўлиши;

ишлаб чиқарувчининг ташкилий тузилмасида ходимларининг маъмурий бошқаруви ҳамда ҳисобот бериш ваколатлари холисликни таъминлайдиган тарзда аниқ белгиланган бўлиши ва буни аккредитация органига тақдим қилган бўлиши;

ходимлари баҳоланаётган маҳсулотларни лойиҳалаштириш, ишлаб чиқариш, таъминлаш, ўрнатиш, эксплуатация қилиш ва хизмат кўрсатиш учун жавобгар бўлмаслиги ёхуд улар томонидан ўтказиладиган баҳолаш натижаларига нисбатан қабул қилинадиган қарорнинг мустақиллиги ёки ҳаққонийлигига салбий таъсир кўрсатувчи ҳар қандай бошқа фаолият билан шуғулланмаслиги;

фақат унинг тасарруфида бўлган ишлаб чиқарувчига хизмат кўрсатиши.

42. Ишлаб чиқарувчининг аккредитациядан ўтган органига тайинланган орган мақомини бериш тақиқланади. Бунда фақат аккредитация органи тайинловчи ваколатли органнинг сўровига мувофиқ унга ишлаб чиқарувчининг ушбу органнинг аккредитация соҳаси тўғрисидаги маълумотларни тақдим этиши мумкин.

7-боб. Тайинланган (нотификация қилинган) орган мақомини олиш учун буюртма бериш

43. Мувофиқликни баҳолаш органи Ваколатли органга техник регламентда белгиланган талаблар бўйича маҳсулотлар мувофиқлигини баҳолашга оид ишларни бажаришга тайинланиши учун Ваколатли орган томонидан белгиланган шаклда буюртма бериши лозим.

44. Тайинланиш учун буюртма билан бирга мувофиқликни баҳолаш органи томонидан қуйидагилар тақдим қилиниши лозим:

мувофиқликни баҳолашга оид фаолияти тўғрисида тўлиқ ёзма тафсилот;

мувофиқликни баҳолаш юзасидан ички тартиб-таомил(лар) бўйича қабул қилинган ҳужжатлар;

тайинланиш сўралаётган тегишли техник регламентлар ва уларда белгиланган маҳсулотларнинг рўйхати;

даъвогар бўлган соҳа доирасида маҳсулотни белгиланган техник регламентлардаги талабларга мувофиқлигини баҳолашни амалга ошириш учун ўз синаш лабораториясига аккредитация органи томонидан расмийлаштирилган гувоҳномасининг нусхаси;

даъвогар бўлган соҳа доирасида маҳсулотнинг мувофиқлигини баҳолашда иштирок этувчи ҳамда синовлар ўтказувчи ходимлар тўғрисидаги маълумотларни ҳамда уларнинг малакасини тасдиқловчи ҳужжатлар;

тайинланиш сўралаётган мувофиқликни баҳолаш фаолиятидан келиб чиқувчи молиявий ва профессионал мажбуриятлар кафолатланганини (суғурталанганини ва бошқа усуллар) тасдиқловчи ҳужжатлар нусхаси;

мувофиқликни баҳолаш органининг ваколатини (компетентлик даражасини) ҳамда ушбу Низомнинг 4-бобида белгиланган талабларга жавоб беришини тасдиқловчи аккредитация органи томонидан расмийлаштирилган аккредитация гувоҳномаси (агар мавжуд бўлса). Агар мувофиқликни баҳолаш органи аккредитация гувоҳномасини тақдим эта олмаса, ушбу Низомнинг 4-бобида назарда тутилган талабларга жавоб беришини тасдиқлаш, эътироф этиш ва доимий равишда даъвогар бўлган соҳага оид белгиланган талабларга риоя қилишни назорат қилиши учун Ваколатли органга ҳужжатлаштирилган далилларни тақдим қилиши шарт.

45. Техник регламентларда тайинланган (нотификация қилинган) орган мақомини олиш учун қўшимча талаблар белгиланган бўлса, мазкур талаблар инобатга олиниши шарт.

8-боб. Тайинланган (нотификация қилинган) органлар ягона реестри

46. Агентлик тайинланган (нотификация қилинган) орган, тайинланиш соҳаси, тайинланганлик мақомига нисбатан ҳар қандай бекор қилиш, тўхтатиб туриш, чеклаш ва тиклаш ҳолатлари тўғрисидаги маълумотлардан иборат электрон ахборот базасини шакллантиради ва ушбу ахборот базаси асосида Техник жиҳатдан тартибга солиш соҳасида тайинланган (нотификация қилинган) органларнинг ягона реестрини (кейинги ўринларда — Тайинланган органлар реестри) юритади.

47. Агентлик Ваколатли органнинг тегишли қарори асосида тайинланган мувофиқликни баҳолаш органини Тайинланган органлар реестрида рўйхатдан ўтказади.

48. Тайинланган (нотификация қилинган) орган, техник жиҳатдан тартибга солишнинг бир неча соҳаларида тайинланган (нотификация қилинган) мақомини олган бўлишидан қатъи назар, Тайинланган органлар реестрида ягона рақам остида қайд қилинади.

49. Тайинланган (нотификация қилинган) органлар, уларнинг тайинланиш соҳаси, тайинланганлик мақомини бекор қилиш, тўхтатиб туриш ва тиклаш тўғрисидаги Тайинланган органлар реестрининг маълумотлари Агентликнинг расмий веб-сайтида эълон қилиб борилиши шарт.

50. Тайинланган органлар реестридаги маълумотлар доимий ва ўз вақтида янгиланиб борилиши шарт.

9-боб. Тайинланган (нотификация қилинган) органлар устидан мониторинг ўтказиш

51. Ваколатли орган тайинланган мувофиқликни баҳолаш органлари тайинлаш талаблари ва шартларига доимий риоя қилишлари устидан мониторинг ўтказиш учун зарур чораларни кўриши шарт.

52. Ваколатли орган аккредитация органи томонидан қонунчилик ҳужжатларида белгиланган даврийликда мувофиқликни баҳолаш органларида ўтказадиган баҳолаш, қайта аккредитация ва бошқа компетентликни тасдиқлашга оид ўрганиш натижаларидан мониторинг ўтказиш мақсадида фойдаланиши мумкин.

Бунда аккредитация органи ўтказилган баҳолаш натижаси, тайинлаш мақомига таъсир кўрсатувчи ҳар қандай омиллар тўғрисидаги маълумотларни Ваколатли орган сўровига мувофиқ тақдим қилиши зарур.

10-боб. Тайинланганлик (нотификация қилинганлик) мақомидаги ўзгаришлар

53. Агар Ваколатли орган, ўзи томонидан тайинланган (нотификация қилинган) органнинг ушбу Низом ва техник регламентнинг белгиланган талабларига риоя қилмаганини ёки юклатилган мажбуриятларни бажармаганини аниқласа ёхуд бундай ҳолатлар ҳақида хабар топса, тайинланган (нотификация қилинган) органнинг талабларни ёки мажбуриятларни бажармаганлик даражасига қараб унинг тайинлаш (нотификация қилиш) мақомини тўхтатиб туриш ёки бекор қилиш чораларини кўради. Ваколатли орган бу ҳақида Агентликни ва бошқа манфаатдор томонларни уч кунлик муддатда хабардор қилиши шарт.

Тайинлаш (нотификация қилиш) мақомини тўхтатиб туриш, тиклаш ёки бекор қилиш муддатлари ва тартиби Ваколатли орган томонидан тасдиқланадиган тайинлаш тартибига мувофиқ белгиланади.

Бунда тайинлаш (нотификация қилиш) мақомини тўхтатиб туриш ўн иш кунидан кўп бўлмаган муддатда, ўн иш кунидан ортиқ муддатга тўхтатиб туриш ёки бекор қилиш суд тартибида амалга оширилади.

54. Агар тайинланган (нотификация қилинган) органнинг тайинланганлик мақоми тўхтатиб турилса ёки бекор қилинса ёхуд тайинланган (нотификация қилинган) орган фаолиятини тугатса, Ваколатли орган ушбу тайинланган (нотификация қилинган) орган ихтиёрида бўлган мувофиқликни баҳолашга оид ишларни бошқа тайинланган (нотификация қилинган) органга ўтказилишини ёки бундай орган бўлмаганда аккредитация қилинган мувофиқликни баҳолаш органлари орасидан танлаб олиши ва уларга ўтказиш чораларини кўриши зарур.

11-боб. Тайинлаш (нотификация қилиш) масалаларида низоларни ҳал этиш

55. Мувофиқликни баҳолаш органларини тайинлаш (нотификация қилиш) масалаларида юзага келиши мумкин бўлган низолар, Ваколатли орган ва тайинланган (нотификация қилинган) органлар фаолияти устидан шикоятлар ҳамда шу каби бошқа ҳолатларни ўрганиш, холис баҳо ва кўрсатмалар бериш мақсадида Агентликда техник регламентлар доирасида мувофиқликни баҳолаш органларини тайинлаш масалалари бўйича комиссия (кейинги ўринларда — комиссия) ташкил этилади.

Комиссия таркиби барча тарафлар манфаатини эътиборга олган ҳолда шакллантирилади. Комиссия таркибига Ваколатли орган, тайинланган (нотификация қилинган) органлар ва ишлаб чиқарувчи ва (ёки) унинг ваколатли вакили, импорт қилувчи ва дистрибютор вакиллари киритилади.

56. Комиссия ўз фаолияти натижасида аниқланган муаммоларни комплекс таҳлил қилиш ва ҳал қилиш учун ваколатли органлар ва ташкилотларга Агентлик орқали асослантирилган таклифлар киритилишини таъминлайди.

57. Тайинланган (нотификация қилинган) органнинг ваколати ёки мунтазам равишда зиммасига юклатилган мажбуриятларни бажармагани ва белгиланган талабларга риоя қилинмагани аниқланса ёки бу ҳақида мурожаат келиб тушса, Комиссия бундай ҳолатлар устидан ўрганиш ўтказади.

58. Ваколатли орган Комиссиянинг сўровига мувофиқ ўрганиш ўтказилаётган органнинг тайинланганига асос бўлувчи ёки унинг ваколатини тасдиқловчи барча маълумотларни тақдим қилиши шарт.

59. Комиссия ўрганиш жараёнида олинган маълумотларнинг махфийлигини таъминлайди.

60. Агар Комиссия ўрганиш натижасида тайинланган (нотификация қилинган) орган тайинланишида белгиланган мажбуриятларини бажармаганлик ва тегишли талабларга риоя қилмаганлик ҳолатларини тасдиқласа, тайинланган (нотификация қилинган) органга нисбатан қонунчиликда белгиланган тегишли чораларини кўриш, шу жумладан, тайинланганлик мақомини бекор қилиш юзасидан Ваколатли органга таклиф киритади.

12-боб. Тайинланган (нотификация қилинган) органнинг мажбуриятлари

61. Тайинланган (нотификация қилинган) орган техник регламентда назарда тутилган мувофиқликни баҳолаш тартиб-таомиллари асосида маҳсулотларнинг мувофиқлигини баҳолашни амалга ошириши шарт.

62. Мувофиқликни баҳолаш мутаносиб равишда ишлаб чиқарувчи, унинг ваколатли вакили, импорт қилувчи ва дистрибюторга ортиқча юкламаларсиз амалга оширилиши керак. Тайинланган (нотификация қилинган) орган бажариладиган ишнинг кўлами, фаолият олиб борилувчи иқтисодиёт тармоғи, ташкилий тузилмаси, фаолиятни амалга ошириш технологиясининг мураккаблик даражаси ҳамда ушбу фаолиятнинг оммавий ёки серияли тарзда олиб борилиши хусусиятларини инобатга олган ҳолда, ўз вазифаларини бажариши шарт.

Ҳар қандай ҳолатда ҳам тайинланган (нотификация қилинган) орган техник регламентда белгиланган маҳсулотлар техник регламентининг талабларига мувофиқ бўлиши учун белгиланган қатъий талабларга (параметрларга) риоя қилиши шарт.

63. Тайинланган (нотификация қилинган) орган техник регламентнинг талаблари ёки тегишли маҳсулотнинг, уни ишлаб чиқариш жараёнларининг ёки усулларининг техник регламентлар талабларига мувофиқлиги презумпциясини таъминлайдиган стандартлар ёхуд бошқа техник шартларнинг талаблари ишлаб чиқарувчи, унинг ваколатли вакили, импорт қилувчи ва дистрибютор томонидан бажарилмаганини аниқласа, бундай ҳолларда улардан тузатиш чораларини кўришни талаб қилиши ва мувофиқликни баҳолаш натижалари бўйича ҳужжат расмийлаштирмаслиги шарт.

64. Техник регламентларга асосан маҳсулотнинг мувофиқликни баҳолаш натижалари бўйича ижобий хулосага кўра ҳужжат қабул қилганидан сўнг, тайинланган (нотификация қилинган) орган мувофиқликни мониторинг қилиш жараёнида, унга нисбатан номувофиқлик аниқласа, бу ҳолларда у ишлаб чиқарувчи, унинг ваколатли вакили, импорт қилувчи ва дистрибютордан тегишли тузатиш чораларини кўришини талаб қилиши ва зарур ҳолларда мувофиқликни баҳолаш натижалари бўйича ҳужжатни тўхтатиб туриши ёки тугатиши зарур.

65. Агар тузатиш чоралари кўрилмаган ёки амалга оширилган тузатиш чоралари талаб қилинган натижани таъминламаган бўлса, тайинланган (нотификация қилинган) орган мувофиқликни баҳолаш натижалари бўйича ижобий хулосага асосан расмийлаштирилган ҳужжатни тўхтатиб туриши ёки тугатиши шарт.

13-боб. Тайинланган (нотификация қилинган) орган қарорларига нисбатан апелляция

66. Тайинланган (нотификация қилинган) органда, у томонидан қабул қилинган қарорлар устидан ишлаб чиқарувчи ва (ёки) унинг ваколатли вакили, импорт қилувчи ва дистрибютор томонидан апелляция бериш тартиби мавжуд бўлиши шарт.

Апелляция комиссиясининг қарори юзасидан қонунчиликда белгиланган тартибда судга шикоят қилиниши мумкин.

14-боб. Тайинланган (нотификация қилинган) органнинг маълумотларни очиқлаш мажбурияти

67. Тайинланган (нотификация қилинган) орган Ваколатли органни қуйидагилар ҳақида хабардор қилиши лозим:

техник регламентларга асосан маҳсулот мувофиқлигини баҳолаш натижалари бўйича ҳужжатларни расмийлаштиришни рад этиш, расмийлаштирилган ҳужжатларга оид қарорни тўхтатиш ёки бекор қилиш;

ўзининг тайинланган соҳаси ёки юритаётган фаолияти шарт-шароитларига таъсир қилувчи ҳар қандай ҳолатлар;

мувофиқликни баҳолаш фаолиятига оид маълумот тақдим қилиш юзасидан тегишли давлат назорати органидан келиб тушган ҳар қандай талабномалар;

сўровга мувофиқ тайинлаш соҳаси доирасида амалга оширилган мувофиқликни баҳолаш фаолияти ва бошқа ҳар қандай фаолиятлар, шу жумладан, ёрдамчи пудратчилик асосидаги фаолиятлар тўғрисидаги маълумотлар.

68. Тайинланган (нотификация қилинган) орган техник регламентларга асосан айнан бир турдаги маҳсулотларни қамраб олган, ўхшаш мувофиқликни баҳолаш фаолияти билан шуғулланувчи техник регламент доирасида бошқа тайинланган (нотификация қилинган) органларга мувофиқликни баҳолашнинг салбий натижалари, шунингдек, уларнинг сўровига кўра ижобий натижалари тўғрисидаги маълумотни тақдим қилиши шарт.

15-боб. Тайинланган (нотификация қилинган) органлар фаолиятини мувофиқлаштириш

69. Техник регламентлар доирасида тайинланган (нотификация қилинган) органлар ва бошқа манфаатдор тарафлар ўртасида ҳамкорликни йўлга қўйиш ҳамда фаолиятларини мувофиқлаштириш мақсадида Ваколатли орган қошида унинг буйруғи асосида мазкур масалаларни мувофиқлаштирувчи Техник қўмита ташкил этилади.

70. Техник қўмита тайинланган (нотификация қилинган) органлар фаолиятини мувофиқлаштириш бўйича маслаҳат органи бўлиб, унинг таркиби Ваколатли орган, стандартлаштириш бўйича миллий орган, аккредитация органи, бозор назорати органи, тайинланган (нотификация қилинган) органлар, иқтисодий операторларнинг вакиллари, тегишли техник регламентларда белгиланган ташкилотлар ва бошқа манфаатдор тарафлардан (келишилган ҳолда) шакллантирилади. Техник қўмитанинг низоми ва таркиби Ваколатли орган томонидан тасдиқланади.

71. Техник қўмитада кўриб чиқилаётган масалалар бўйича қарор оддий кўпчилик овози билан қабул қилинади. Овоз беришда манфаатдор томонларнинг тенглиги таъминланади ва ҳеч бирига устунлик берилишига йўл қўйилмайди, овозлар тенг бўлган тақдирда якуний қарорни қабул қилиш қўмита раиси томонидан амалга оширилади.

16-боб. Якунловчи қоида

72. Ушбу Низом талабларининг бузилишида айбдор бўлган шахслар қонунчилик ҳужжатларига мувофиқ жавоб берадилар.

Ўзбекистон Республикасининг Бош вазири А. АРИПОВ

Тошкент ш.,

2025 йил 12 июль,

432-сон

(Қонунчилик маълумотлари миллий базаси, 14.07.2025 й., 09/25/432/0603-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Muvofiqlikni baholash organlarini tayinlash (notifikatsiya qilish) tartibi toʻgʻrisidagi nizomni tasdiqlash haqida

Oʻzbekiston Respublikasining “Texnik jihatdan tartibga solish toʻgʻrisida”gi Qonuni ijrosini taʼminlash maqsadida Vazirlar Mahkamasi qaror qiladi:

1. Quyidagilarni nazarda tutuvchi Muvofiqlikni baholash organlarini tayinlash (notifikatsiya qilish) tartibi toʻgʻrisidagi nizom ilovaga muvofiq tasdiqlansin:

tayinlovchi (notifikatsiya qiluvchi) organga va tayinlangan (notifikatsiya qilingan) muvofiqlikni baholash organlariga qoʻyiladigan talablar;

tayinlangan (notifikatsiya qilingan) muvofiqlikni baholash organlarining majburiyatlari, reyestrini yuritish, shuningdek, tayinlangan (notifikatsiya qilingan) muvofiqlikni baholash organi maqomini olish va uni oʻzgartirish tartibi.

2. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.

3. Ushbu qarorning bajarilishini nazorat qilish Vazirlar Mahkamasi huzuridagi Oʻzbekiston texnik jihatdan tartibga solish agentligi direktori A.R. Jumanazarov zimmasiga yuklansin.

Vazirlar Mahkamasining 2025-yil 12-iyuldagi 432-son qaroriga ILOVA

Muvofiqlikni baholash organlarini tayinlash (notifikatsiya qilish) tartibi toʻgʻrisida

1-bob. Umumiy qoidalar

1. Ushbu Nizom muvofiqlikni baholash organlarini tayinlash (notifikatsiya qilish) tartibini belgilaydi.

2. Tayinlangan (notifikatsiya qilingan) muvofiqlikni baholash organi tegishli texnik reglamentga muvofiq (keyingi oʻrinlarda — texnik reglament) uchinchi taraf sifatida mahsulotlarning muvofiqligini baholaydi.

3. Ushbu Nizomda quyidagi asosiy tushunchalar qoʻllanadi:

tayinlovchi (notifikatsiya qiluvchi) organ (keyingi oʻrinlarda — Vakolatli organ) — texnik reglamentda yoki faoliyat sohasidan kelib chiqib Vazirlar Mahkamasi tomonidan belgilanadigan muvofiqlikni baholash organini tayinlovchi (notifikatsiya qiluvchi) vakolatli organ;

tayinlash (notifikatsiya qilish) — muvofiqlikni baholash organlarini texnik reglamentlarda belgilangan mahsulot turlariga nisbatan muvofiqlikni baholash tartib-taomillarini bajarish uchun Vakolatli organ tomonidan baholash, rasman tasdiqlash va belgilangan talablarga rioya qilishlari ustidan monitoring oʻtkazish;

tayinlangan (notifikatsiya qilingan) organ — texnik reglamentda belgilangan mahsulot turlariga nisbatan muvofiqlikni baholash tartib-taomillarini uchinchi taraf sifatida bajaruvchi muvofiqlikni baholash organi;

tayinlash (notifikatsiya qilish) sohasi (keyingi oʻrinlarda — tayinlash sohasi) — daʼvogar tomonidan soʻralayotgan yoki Vakolatli organ tomonidan tasdiqlangan muvofiqlikni baholash tartib-taomillarining va mahsulot turlarining roʻyxati.

2-bob. Tayinlash (notifikatsiya qilish) tartibi

4. Vakolatli organ texnik reglament doirasida muvofiqlikni baholash ishlarini amalga oshiruvchi muvofiqlikni baholash organlarini baholaydi, tayinlaydi (notifikatsiya qiladi) va ularni belgilangan talablarga rioya qilishlari ustidan monitoring oʻtkazadi.

5. Vakolatli organ tomonidan ushbu Nizom, shuningdek, texnik reglamentlarda qoʻshimcha talablar belgilangan boʻlsa, mazkur talablarni inobatga olgan holda muvofiqlikni baholash organini tayinlaydi (notifikatsiya qiladi).

6. Tayinlash (notifikatsiya qilish) tartib-taomili va undan oʻtish ketma-ketligi, texnik reglamentlar va ushbu Nizom talablarini hisobga olgan holda, Vakolatli organ tomonidan tasdiqlanadigan tayinlash tartibiga muvofiq belgilanadi.

7. Vakolatli organ ushbu Nizomning 4-bandida nazarda tutilgan ishlarni, oʻzining mavjud yuklamasidan kelib chiqib chiqqan holda samarali va oʻz vaqtida yoʻlga qoʻyish maqsadida, Oʻzbekiston Respublikasining “Muvofiqlikni baholash organlarini akkreditatsiya qilish toʻgʻrisida”gi Qonunida belgilangan akkreditatsiya organi tomonidan bajarilishi boʻyicha tegishli qarorni qabul qilishi mumkin.

8. Agar Vakolatli organ ushbu Nizomning 4-bandida nazarda tutilgan baholash, tayinlash (notifikatsiya qilish) yoki monitoring oʻtkazish ishlarini boshqa tashkilotga (organga) topshirsa yoki bu ishlarni bajarishga vakolat bersa, bunday tashkilot (organ) yuridik shaxs maqomiga ega boʻlishi va ushbu Nizomning 4-bobida belgilangan talablarga rioya qilishi hamda oʻz faoliyatidan kelib chiqadigan majburiyatlarni toʻliq bajarishi uchun zarur tashkiliy texnik choralarni koʻrgan boʻlishi shart.

9. Ushbu Nizomning 8-bandida nazarda tutilgan tashkilot (organ) tomonidan bajarilgan ishlar uchun javobgarlikni Vakolatli organ oʻz zimmasiga oladi.

10. Tayinlash sohasida muvofiqlikni baholash faoliyati toʻgʻrisidagi maʼlumot hamda muvofiqlikni baholash tartib-taomili texnik reglamentda belgilangan mahsulotlarga oid maʼlumotlarda toʻliq aks ettirilishi lozim.

11. Vakolatli organ notifikatsiya organini tayinlash (notifikatsiya qilish) toʻgʻrisidagi qarorda muayyan texnik reglament doirasida qoʻllanuvchi muvofiqlikni baholash tartib-taomillari, tegishli mahsulot(lar) yoki mahsulotlar guruhi, muvofiqlikni baholash organining vakolatini (kompetentlik darajasini) tasdiqlovchi maʼlumotlarni hamda tayinlashning (notifikatsiya qilishning) amal qilish muddatini aks ettirishi shart.

12. Agar tayinlash (notifikatsiya qilish) ushbu Nizomning 44-bandida nazarda tutilgan akkreditatsiyaga asoslanmagan boʻlsa, Vakolatli organ muvofiqlikni baholash organining vakolatini (kompetentlik darajasini) tasdiqlovchi hujjatlashtirilgan dalillarga ega boʻlishi va muvofiqlikni baholash organi belgilangan talablarga doimiy rioya qilishi ustidan monitoring oʻtkazilishi uchun zarur choralarni koʻrgan boʻlishi shart.

13. Vakolatli organ muvofiqlikni baholash organiga tayinlangan (notifikatsiya qilingan) organ maqomini berish yoki bermaslik toʻgʻrisidagi qarorni oʻttiz ish kunida qabul qilishi shart.

Tayinlangan (notifikatsiya qilingan) organlar reyestriga kiritilgan tashkilot, texnik reglament talablariga muvofiq tayinlangan (notifikatsiya qilingan) organ sifatida tan olinadi.

14. Agar tayinlash ushbu Nizomning 44-bandida nazarda tutilgan akkreditatsiyaga asoslangan boʻlsa, Vakolatli organ akkreditatsiya guvohnomasining amal qilish davriga teng muddatga, bundan boshqa hollarda esa uch yil muddatga muvofiqlikni baholash organini tayinlashi (notifikatsiya qilishi) lozim.

15. Vakolatli organ tayinlangan (notifikatsiya qilingan) muvofiqlikni baholash organi bilan tayinlash talablari va shartlarini belgilaydigan, shu jumladan, tayinlangan organning majburiyatlari, belgilangan talablarga rioya qilishi ustidan monitoring oʻtkazishi va boshqa munosabatlarni tartibga soluvchi, yuridik kuchga ega shartnoma tuzishi shart.

16. Vakolatli organ tayinlash sohasiga kiritilgan oʻzgarishlar haqida Vazirlar Mahkamasi huzuridagi Oʻzbekiston texnik jihatdan tartibga solish agentligini (keyingi oʻrinlarda — Agentlik) va boshqa manfaatdor tomonlarni uch kun muddatda xabardor qilishi lozim.

3-bob. Vakolatli organga qoʻyiladigan talablar

17. Vakolatli organ muvofiqlikni baholash organini tayinlashda (notifikatsiya qilishda) quyidagilarni taʼminlashi kerak:

muvofiqlikni baholash organlari bilan manfaatlar toʻqnashuvi mavjud boʻlmasligini;

oʻz faoliyatini xolislik va begʻarazlikni taʼminlaydigan tarzda tashkil qilishi va faoliyat yuritishini;

muvofiqlikni baholash organini tayinlashga taalluqli boʻlgan har bir qarorning muvofiqlikni baholash organi bilan affillanmagan vakolatli shaxslar tomonidan qabul qilinishini;

tayinlanayotgan (notifikatsiya qilinayotgan) muvofiqlikni baholash organlaridan olingan axborotning maxfiyligini.

18. Vakolatli organ muvofiqlikni baholash organlari amalga oshiradigan faoliyat bilan shugʻullanmasligi yoxud maslahat xizmatlarini koʻrsatmasligi yoki bunday xizmat turini taklif qilmasligi kerak.

19. Vakolatli organ muvofiqlikni baholash organlarini baholash va tayinlash (notifikatsiya qilish) tartib-taomillarini va ushbu tartib-taomillarga kiritilgan har qanday oʻzgartirishlarni hamda tayinlangan (notifikatsiya qilingan) organ ustidan oʻtkazilgan monitoring natijalarini ochiqlashi shart.

4-bob. Tayinlangan (notifikatsiya qilingan) organlarga va ularning xodimlariga qoʻyiladigan talablar

20. Muvofiqlikni baholash organi tayinlangan (notifikatsiya qilingan) organ maqomini olishi uchun mazkur bobda belgilangan talablarga javob berishi shart.

21. Quyidagi keltirilgan barcha talablar va shartlarni bajargan muvofiqlikni baholash organlari tayinlanishi (notifikatsiya qilinishi) mumkin:

Oʻzbekiston Respublikasining rezidentlari — yuridik shaxslar boʻlsa;

soʻnggi uch yil davomida mahsulotning muvofiqligini baholash ishlarini bajarish tajribasiga ega boʻlsa;

belgilangan soha doirasida mahsulotni sinashni amalga oshirish uchun akkreditatsiya qilingan oʻz sinash laboratoriyalariga ega boʻlsa;

muvofiqlikni baholash tartib-taomillarini tayinlangan (notifikatsiya qilingan) organlarni jalb etgan holda qoʻllash nazarda tutilgan texnik reglamentlarda belgilangan maxsus talablarga, bunday talablar texnik reglamentlarda belgilanmagan taqdirda esa Oʻzbekiston Respublikasi Vazirlar Mahkamasi tomonidan belgilangan maxsus talablarga muvofiq boʻlsa.

22. Texnik reglamentlarda belgilangan mahsulotlarni loyihalashtirish, ishlab chiqarish, taʼminlash, yigʻish, ekspluatatsiya qilish va xizmat koʻrsatish bilan bogʻliq faoliyat manfaatlarini ifodalovchi uyushmalarga aʼzo boʻlgan muvofiqlikni baholash organi, oʻzining mustaqilligi va unda manfaatlar toʻqnashuvi holatlari mavjud emasligini namoyish qilishi sharti bilan mustaqil uchinchi tomon organi sifatida eʼtirof qilinishi mumkin.

23. Muvofiqlikni baholash organi, uning rahbariyati va muvofiqlikni baholash vazifalarini bajarishga masʼul xodimlari oʻzlari baholaydigan texnik reglamentlarda belgilangan mahsulotlarning loyihachisi, ishlab chiqaruvchisi, taʼminotchisi, oʻrnatuvchisi, xaridori, egasi, foydalanuvchisi yoki texnik xizmat koʻrsatuvchisi yoxud ularning vakili boʻlmasligi kerak.

24. Muvofiqlikni baholash organi, uning rahbariyati va muvofiqlikni baholash vazifalarini bajarishga masʼul xodimlari bevosita texnik reglamentlarda belgilangan mahsulotlarni loyihalashtirish, ishlab chiqarish yoki yigʻish, marketing, oʻrnatish, foydalanish yoki texnik xizmat koʻrsatish bilan bogʻliq faoliyatlarda ishtirok etmasligi yoki ushbu faoliyat bilan shugʻullanuvchilarga vakillik qilmasligi shart.

25. Muvofiqlikni baholash organlari tayinlangan soha doirasida tegishli qaror qabul qilishdagi mustaqillikni yoki muvofiqlikni baholash ishlarini bajarishdagi haqqoniylikning taʼminlanishiga toʻsqinlik qiluvchi har qanday faoliyat turi bilan shugʻullanmasliklari shart.

26. Muvofiqlikni baholash organi muvofiqlikni baholashni amalga oshirishda uning shuʼba korxonasi yoki yordamchi pudratchi tashkilotlarining harakatlari maxfiylikka, begʻarazlikka yoki xolislikka taʼsir qilmasligini taʼminlashi kerak.

27. Muvofiqlikni baholash organi xodimlari muvofiqlikni baholashni yuqori professional darajada hamda muayyan sohadagi zarur texnik bilim va malaka asosida amalga oshirishlari hamda muvofiqlikni baholash faoliyatida ularning qaror qabul qilish qobiliyatiga va muvofiqlikni baholash natijalariga taʼsir koʻrsatuvchi, jumladan, ushbu faoliyat natijalaridan manfaatdor shaxslar yoki guruhlarning har qanday bosim va ragʻbatlantirishlari, ayniqsa, moliyaviy ragʻbatidan xoli boʻlishlari shart.

28. Muvofiqlikni baholash organi tayinlangan sohada muvofiqlikni baholash tartib-taomillarida belgilangan vazifalarni bajarishi yoki uning nomi va javobgarligida bajarilishini taʼminlashi lozim.

29. Muvofiqlikni baholash organi doimiy ravishda oʻzi tayinlangan har bir muvofiqlikni baholash tartib-taomili va har bir turdagi yoki toifadagi texnik reglamentlarda belgilangan mahsulotlarga nisbatan quyidagilarga ega boʻlishi lozim:

a) muvofiqlikni baholash uchun texnik bilim va tajribaga ega xodimlarga;

b) texnik reglamentga muvofiq oʻtkaziladigan, shaffoflikni taʼminlovchi hamda takroran qayta oʻtkazish imkonini yaratib beruvchi muvofiqlikni baholash jarayonining toʻliq yozma tafsilotiga;

v) tayinlangan muvofiqlikni baholash organi sifatida amalga oshiriladigan faoliyatni boshqa faoliyatlardan farqlab olish imkonini beruvchi tegishli siyosat va tartib-taomil hujjatlariga;

g) bajariladigan ishning koʻlami, faoliyat olib boriluvchi iqtisodiyot tarmogʻi, tashkiliy tuzilmasi, faoliyatida qoʻllanadigan texnologiyaning murakkablik darajasi hamda faoliyatning ommaviy yoki seriyali tarzda olib borilishi xususiyatlarini oʻzida aks ettiruvchi tartib-taomil hujjatlariga.

30. Muvofiqlikni baholash organi muvofiqlikni baholash faoliyati bilan bogʻliq texnik va maʼmuriy vazifalarni belgilangan tartibda bajarishi uchun zarur texnik vositalarga, barcha talab etiluvchi uskunalar yoki inshootlardan foydalanish imkoniyatiga ega boʻlishi kerak.

31. Muvofiqlikni baholash uchun masʼul xodimlar quyidagilarga ega boʻlishi lozim:

a) muvofiqlikni baholash organi oʻzi tayinlangan sohalardagi barcha muvofiqlikni baholash faoliyatini qamrab oluvchi texnik va kasbiy malakaga;

b) oʻzlari bajaradigan baholashga qoʻyiladigan talablar boʻyicha bilim va ushbu baholashni amalga oshirish uchun vakolatga;

v) texnik reglamentlarda belgilangan asosiy xavfsizlik talablari, mahsulotning, uni ishlab chiqarish jarayonlarining yoki usullarining texnik reglamentlar talablariga muvofiqligi prezumpsiyasini taʼminlaydigan standartlar va boshqa qonunchilik hujjatlaridagi talablar toʻgʻrisida bilim va koʻnikmaga;

g) baholash amalga oshirilganini tasdiqlovchi hisobotlar, tegishli yozuvlar va xulosalarni rasmiylashtirish koʻnikmasiga.

32. Muvofiqlikni baholash organining, uning rahbariyati va muvofiqlikni baholash uchun masʼul xodimlarning xolisligi kafolatlanishi shart.

33. Agar muvofiqlikni baholash faoliyatidan kelib chiqadigan majburiyatlar qonunchilik hujjatlariga muvofiq davlat tomonidan qoplanishi yoki uning javobgarligida boʻlishi nazarda tutilmagan boʻlsa, muvofiqlikni baholash organi oʻz faoliyatidan kelib chiqadigan majburiyatlarni moliyaviy kafolatlashi (sugʻurtalashi va boshqa usullar) shart.

34. Muvofiqlikni baholash tartib-taomillariga asosan muvofiqlikni baholash organi xodimlari oʻz vazifalarini bajarishi davomida olingan barcha maʼlumotlarni, vakolatli davlat nazorat organiga nisbatan istisno qilgan holda, kasbiy sir sifatida saqlashlari shart.

35. Muvofiqlikni baholash organi oʻzi tayinlangan tegishli sohadagi standartlashtirish boʻyicha texnik qoʻmita (keyingi oʻrinlarda — Texnik qoʻmita) faoliyatida ishtirok etishi yoki muvofiqlikni baholash ishlarini bajarish uchun masʼul xodimlarining standartlashtirish hamda Texnik qoʻmita faoliyati natijalaridan doimiy xabardor boʻlishlarini taʼminlashi lozim. Muvofiqlikni baholash organi Texnik qoʻmita faoliyati doirasida qabul qilingan koʻrsatmalar va hujjatlarni oʻz faoliyatining umumiy boshqaruv hujjatlari sifatida qabul qilishlari va amaliyotda qoʻllashlari shart.

5-bob. Tayinlangan (notifikatsiya qilingan) organlarning shuʼbalari va yordamchi pudratchi tashkilotlari

36. Tayinlangan (notifikatsiya qilingan) organ muvofiqlikni baholash faoliyati bilan bogʻliq ayrim vazifalarni bajarishi uchun yordamchi pudratchi tashkilotni yollasa yoki oʻzining shuʼba korxonasi xizmatidan foydalanishga ehtiyoji boʻlsa, bunday hollarda uning yordamchi pudratchi tashkiloti yoki shuʼba korxonasi oʻz faoliyatini amalga oshirishda ushbu Nizomning 4-bobida belgilangan talablarga javob berishini taʼminlashi va bu haqida Vakolatli organni xabardor qilishi shart.

37. Tayinlangan (notifikatsiya qilingan) organ, uning yordamchi pudratchi tashkilotlari yoki shuʼba korxonasi qayerda va qanday shartlarda tashkil etilganidan qatʼi nazar, ular tomonidan bajarilgan ishlar uchun toʻliq javobgarlikni oʻz zimmasiga oladi.

38. Muvofiqlikni baholash jarayonidagi tayinlangan (notifikatsiya qilingan) organning maʼlum vazifalari yordamchi pudratchi tashkilotiga berilishi yoki shuʼba korxonasi tomonidan faqat mijozning (ishlab chiqaruvchi va (yoki) uning vakolatli vakili, import qiluvchi va distribyutor) roziligi bilan amalga oshirilishi mumkin.

39. Tayinlangan (notifikatsiya qilingan) organ, jalb qilingan yordamchi pudratchi tashkilotlar yoki shuʼba korxonasi malakasini baholashga hamda ular tomonidan muvofiqlikni baholash tartib-taomillari doirasida bajarilgan ishlar boʻyicha hujjatlarni Vakolatli organ ixtiyorida saqlashi shart.

6-bob. Tayinlangan (notifikatsiya qilingan) organlar tomonidan ishlab chiqaruvchining (korxonaning) akkreditatsiyadan oʻtgan organlarini jalb etish

40. Agar muvofiqlikni baholash boʻyicha qonunchilik hujjatlarida belgilangan tartib-taomillar bunga ruxsat bersa, ishlab chiqaruvchi (korxona) qoshida (yoki uning boshqaruv tizimida) tashkil etilgan akkreditatsiyadan oʻtgan organlar muvofiqlikni baholashga jalb qilinishi mumkin. Bunday organ ishlab chiqaruvchining alohida va ajratilgan tuzilmasi tarzida faoliyat yuritishi hamda oʻzi tomonidan baholanayotgan mahsulotni loyihalashtirish, ishlab chiqarish, taʼminlash, oʻrnatish, ekspluatatsiya qilish va xizmat koʻrsatish jarayonlarida ishtirok etmasligi shart.

41. Ishlab chiqaruvchining akkreditatsiyadan oʻtgan organi quyidagi talablarga javob berishi shart:

xalqaro akkreditatsiya tashkilotlari tomonidan koʻp tomonlama tan olish tizimlari ishtirokchisi hisoblangan akkreditatsiya organi tomonidan akkreditatsiyadan oʻtkazilgan boʻlishi;

ishlab chiqaruvchining tashkiliy tuzilmasida xodimlarining maʼmuriy boshqaruvi hamda hisobot berish vakolatlari xolislikni taʼminlaydigan tarzda aniq belgilangan boʻlishi va buni akkreditatsiya organiga taqdim qilgan boʻlishi;

xodimlari baholanayotgan mahsulotlarni loyihalashtirish, ishlab chiqarish, taʼminlash, oʻrnatish, ekspluatatsiya qilish va xizmat koʻrsatish uchun javobgar boʻlmasligi yoxud ular tomonidan oʻtkaziladigan baholash natijalariga nisbatan qabul qilinadigan qarorning mustaqilligi yoki haqqoniyligiga salbiy taʼsir koʻrsatuvchi har qanday boshqa faoliyat bilan shugʻullanmasligi;

faqat uning tasarrufida boʻlgan ishlab chiqaruvchiga xizmat koʻrsatishi.

42. Ishlab chiqaruvchining akkreditatsiyadan oʻtgan organiga tayinlangan organ maqomini berish taqiqlanadi. Bunda faqat akkreditatsiya organi tayinlovchi vakolatli organning soʻroviga muvofiq unga ishlab chiqaruvchining ushbu organning akkreditatsiya sohasi toʻgʻrisidagi maʼlumotlarni taqdim etishi mumkin.

7-bob. Tayinlangan (notifikatsiya qilingan) organ maqomini olish uchun buyurtma berish

43. Muvofiqlikni baholash organi Vakolatli organga texnik reglamentda belgilangan talablar boʻyicha mahsulotlar muvofiqligini baholashga oid ishlarni bajarishga tayinlanishi uchun Vakolatli organ tomonidan belgilangan shaklda buyurtma berishi lozim.

44. Tayinlanish uchun buyurtma bilan birga muvofiqlikni baholash organi tomonidan quyidagilar taqdim qilinishi lozim:

muvofiqlikni baholashga oid faoliyati toʻgʻrisida toʻliq yozma tafsilot;

muvofiqlikni baholash yuzasidan ichki tartib-taomil(lar) boʻyicha qabul qilingan hujjatlar;

tayinlanish soʻralayotgan tegishli texnik reglamentlar va ularda belgilangan mahsulotlarning roʻyxati;

daʼvogar boʻlgan soha doirasida mahsulotni belgilangan texnik reglamentlardagi talablarga muvofiqligini baholashni amalga oshirish uchun oʻz sinash laboratoriyasiga akkreditatsiya organi tomonidan rasmiylashtirilgan guvohnomasining nusxasi;

daʼvogar boʻlgan soha doirasida mahsulotning muvofiqligini baholashda ishtirok etuvchi hamda sinovlar oʻtkazuvchi xodimlar toʻgʻrisidagi maʼlumotlarni hamda ularning malakasini tasdiqlovchi hujjatlar;

tayinlanish soʻralayotgan muvofiqlikni baholash faoliyatidan kelib chiquvchi moliyaviy va professional majburiyatlar kafolatlanganini (sugʻurtalanganini va boshqa usullar) tasdiqlovchi hujjatlar nusxasi;

muvofiqlikni baholash organining vakolatini (kompetentlik darajasini) hamda ushbu Nizomning 4-bobida belgilangan talablarga javob berishini tasdiqlovchi akkreditatsiya organi tomonidan rasmiylashtirilgan akkreditatsiya guvohnomasi (agar mavjud boʻlsa). Agar muvofiqlikni baholash organi akkreditatsiya guvohnomasini taqdim eta olmasa, ushbu Nizomning 4-bobida nazarda tutilgan talablarga javob berishini tasdiqlash, eʼtirof etish va doimiy ravishda daʼvogar boʻlgan sohaga oid belgilangan talablarga rioya qilishni nazorat qilishi uchun Vakolatli organga hujjatlashtirilgan dalillarni taqdim qilishi shart.

45. Texnik reglamentlarda tayinlangan (notifikatsiya qilingan) organ maqomini olish uchun qoʻshimcha talablar belgilangan boʻlsa, mazkur talablar inobatga olinishi shart.

8-bob. Tayinlangan (notifikatsiya qilingan) organlar yagona reyestri

46. Agentlik tayinlangan (notifikatsiya qilingan) organ, tayinlanish sohasi, tayinlanganlik maqomiga nisbatan har qanday bekor qilish, toʻxtatib turish, cheklash va tiklash holatlari toʻgʻrisidagi maʼlumotlardan iborat elektron axborot bazasini shakllantiradi va ushbu axborot bazasi asosida Texnik jihatdan tartibga solish sohasida tayinlangan (notifikatsiya qilingan) organlarning yagona reyestrini (keyingi oʻrinlarda — Tayinlangan organlar reyestri) yuritadi.

47. Agentlik Vakolatli organning tegishli qarori asosida tayinlangan muvofiqlikni baholash organini Tayinlangan organlar reyestrida roʻyxatdan oʻtkazadi.

48. Tayinlangan (notifikatsiya qilingan) organ, texnik jihatdan tartibga solishning bir necha sohalarida tayinlangan (notifikatsiya qilingan) maqomini olgan boʻlishidan qatʼi nazar, Tayinlangan organlar reyestrida yagona raqam ostida qayd qilinadi.

49. Tayinlangan (notifikatsiya qilingan) organlar, ularning tayinlanish sohasi, tayinlanganlik maqomini bekor qilish, toʻxtatib turish va tiklash toʻgʻrisidagi Tayinlangan organlar reyestrining maʼlumotlari Agentlikning rasmiy veb-saytida eʼlon qilib borilishi shart.

50. Tayinlangan organlar reyestridagi maʼlumotlar doimiy va oʻz vaqtida yangilanib borilishi shart.

9-bob. Tayinlangan (notifikatsiya qilingan) organlar ustidan monitoring oʻtkazish

51. Vakolatli organ tayinlangan muvofiqlikni baholash organlari tayinlash talablari va shartlariga doimiy rioya qilishlari ustidan monitoring oʻtkazish uchun zarur choralarni koʻrishi shart.

52. Vakolatli organ akkreditatsiya organi tomonidan qonunchilik hujjatlarida belgilangan davriylikda muvofiqlikni baholash organlarida oʻtkazadigan baholash, qayta akkreditatsiya va boshqa kompetentlikni tasdiqlashga oid oʻrganish natijalaridan monitoring oʻtkazish maqsadida foydalanishi mumkin.

Bunda akkreditatsiya organi oʻtkazilgan baholash natijasi, tayinlash maqomiga taʼsir koʻrsatuvchi har qanday omillar toʻgʻrisidagi maʼlumotlarni Vakolatli organ soʻroviga muvofiq taqdim qilishi zarur.

10-bob. Tayinlanganlik (notifikatsiya qilinganlik) maqomidagi oʻzgarishlar

53. Agar Vakolatli organ, oʻzi tomonidan tayinlangan (notifikatsiya qilingan) organning ushbu Nizom va texnik reglamentning belgilangan talablariga rioya qilmaganini yoki yuklatilgan majburiyatlarni bajarmaganini aniqlasa yoxud bunday holatlar haqida xabar topsa, tayinlangan (notifikatsiya qilingan) organning talablarni yoki majburiyatlarni bajarmaganlik darajasiga qarab uning tayinlash (notifikatsiya qilish) maqomini toʻxtatib turish yoki bekor qilish choralarini koʻradi. Vakolatli organ bu haqida Agentlikni va boshqa manfaatdor tomonlarni uch kunlik muddatda xabardor qilishi shart.

Tayinlash (notifikatsiya qilish) maqomini toʻxtatib turish, tiklash yoki bekor qilish muddatlari va tartibi Vakolatli organ tomonidan tasdiqlanadigan tayinlash tartibiga muvofiq belgilanadi.

Bunda tayinlash (notifikatsiya qilish) maqomini toʻxtatib turish oʻn ish kunidan koʻp boʻlmagan muddatda, oʻn ish kunidan ortiq muddatga toʻxtatib turish yoki bekor qilish sud tartibida amalga oshiriladi.

54. Agar tayinlangan (notifikatsiya qilingan) organning tayinlanganlik maqomi toʻxtatib turilsa yoki bekor qilinsa yoxud tayinlangan (notifikatsiya qilingan) organ faoliyatini tugatsa, Vakolatli organ ushbu tayinlangan (notifikatsiya qilingan) organ ixtiyorida boʻlgan muvofiqlikni baholashga oid ishlarni boshqa tayinlangan (notifikatsiya qilingan) organga oʻtkazilishini yoki bunday organ boʻlmaganda akkreditatsiya qilingan muvofiqlikni baholash organlari orasidan tanlab olishi va ularga oʻtkazish choralarini koʻrishi zarur.

11-bob. Tayinlash (notifikatsiya qilish) masalalarida nizolarni hal etish

55. Muvofiqlikni baholash organlarini tayinlash (notifikatsiya qilish) masalalarida yuzaga kelishi mumkin boʻlgan nizolar, Vakolatli organ va tayinlangan (notifikatsiya qilingan) organlar faoliyati ustidan shikoyatlar hamda shu kabi boshqa holatlarni oʻrganish, xolis baho va koʻrsatmalar berish maqsadida Agentlikda texnik reglamentlar doirasida muvofiqlikni baholash organlarini tayinlash masalalari boʻyicha komissiya (keyingi oʻrinlarda — komissiya) tashkil etiladi.

Komissiya tarkibi barcha taraflar manfaatini eʼtiborga olgan holda shakllantiriladi. Komissiya tarkibiga Vakolatli organ, tayinlangan (notifikatsiya qilingan) organlar va ishlab chiqaruvchi va (yoki) uning vakolatli vakili, import qiluvchi va distribyutor vakillari kiritiladi.

56. Komissiya oʻz faoliyati natijasida aniqlangan muammolarni kompleks tahlil qilish va hal qilish uchun vakolatli organlar va tashkilotlarga Agentlik orqali asoslantirilgan takliflar kiritilishini taʼminlaydi.

57. Tayinlangan (notifikatsiya qilingan) organning vakolati yoki muntazam ravishda zimmasiga yuklatilgan majburiyatlarni bajarmagani va belgilangan talablarga rioya qilinmagani aniqlansa yoki bu haqida murojaat kelib tushsa, Komissiya bunday holatlar ustidan oʻrganish oʻtkazadi.

58. Vakolatli organ Komissiyaning soʻroviga muvofiq oʻrganish oʻtkazilayotgan organning tayinlanganiga asos boʻluvchi yoki uning vakolatini tasdiqlovchi barcha maʼlumotlarni taqdim qilishi shart.

59. Komissiya oʻrganish jarayonida olingan maʼlumotlarning maxfiyligini taʼminlaydi.

60. Agar Komissiya oʻrganish natijasida tayinlangan (notifikatsiya qilingan) organ tayinlanishida belgilangan majburiyatlarini bajarmaganlik va tegishli talablarga rioya qilmaganlik holatlarini tasdiqlasa, tayinlangan (notifikatsiya qilingan) organga nisbatan qonunchilikda belgilangan tegishli choralarini koʻrish, shu jumladan, tayinlanganlik maqomini bekor qilish yuzasidan Vakolatli organga taklif kiritadi.

12-bob. Tayinlangan (notifikatsiya qilingan) organning majburiyatlari

61. Tayinlangan (notifikatsiya qilingan) organ texnik reglamentda nazarda tutilgan muvofiqlikni baholash tartib-taomillari asosida mahsulotlarning muvofiqligini baholashni amalga oshirishi shart.

62. Muvofiqlikni baholash mutanosib ravishda ishlab chiqaruvchi, uning vakolatli vakili, import qiluvchi va distribyutorga ortiqcha yuklamalarsiz amalga oshirilishi kerak. Tayinlangan (notifikatsiya qilingan) organ bajariladigan ishning koʻlami, faoliyat olib boriluvchi iqtisodiyot tarmogʻi, tashkiliy tuzilmasi, faoliyatni amalga oshirish texnologiyasining murakkablik darajasi hamda ushbu faoliyatning ommaviy yoki seriyali tarzda olib borilishi xususiyatlarini inobatga olgan holda, oʻz vazifalarini bajarishi shart.

Har qanday holatda ham tayinlangan (notifikatsiya qilingan) organ texnik reglamentda belgilangan mahsulotlar texnik reglamentining talablariga muvofiq boʻlishi uchun belgilangan qatʼiy talablarga (parametrlarga) rioya qilishi shart.

63. Tayinlangan (notifikatsiya qilingan) organ texnik reglamentning talablari yoki tegishli mahsulotning, uni ishlab chiqarish jarayonlarining yoki usullarining texnik reglamentlar talablariga muvofiqligi prezumpsiyasini taʼminlaydigan standartlar yoxud boshqa texnik shartlarning talablari ishlab chiqaruvchi, uning vakolatli vakili, import qiluvchi va distribyutor tomonidan bajarilmaganini aniqlasa, bunday hollarda ulardan tuzatish choralarini koʻrishni talab qilishi va muvofiqlikni baholash natijalari boʻyicha hujjat rasmiylashtirmasligi shart.

64. Texnik reglamentlarga asosan mahsulotning muvofiqlikni baholash natijalari boʻyicha ijobiy xulosaga koʻra hujjat qabul qilganidan soʻng, tayinlangan (notifikatsiya qilingan) organ muvofiqlikni monitoring qilish jarayonida, unga nisbatan nomuvofiqlik aniqlasa, bu hollarda u ishlab chiqaruvchi, uning vakolatli vakili, import qiluvchi va distribyutordan tegishli tuzatish choralarini koʻrishini talab qilishi va zarur hollarda muvofiqlikni baholash natijalari boʻyicha hujjatni toʻxtatib turishi yoki tugatishi zarur.

65. Agar tuzatish choralari koʻrilmagan yoki amalga oshirilgan tuzatish choralari talab qilingan natijani taʼminlamagan boʻlsa, tayinlangan (notifikatsiya qilingan) organ muvofiqlikni baholash natijalari boʻyicha ijobiy xulosaga asosan rasmiylashtirilgan hujjatni toʻxtatib turishi yoki tugatishi shart.

13-bob. Tayinlangan (notifikatsiya qilingan) organ qarorlariga nisbatan apellyatsiya

66. Tayinlangan (notifikatsiya qilingan) organda, u tomonidan qabul qilingan qarorlar ustidan ishlab chiqaruvchi va (yoki) uning vakolatli vakili, import qiluvchi va distribyutor tomonidan apellyatsiya berish tartibi mavjud boʻlishi shart.

Apellyatsiya komissiyasining qarori yuzasidan qonunchilikda belgilangan tartibda sudga shikoyat qilinishi mumkin.

14-bob. Tayinlangan (notifikatsiya qilingan) organning maʼlumotlarni ochiqlash majburiyati

67. Tayinlangan (notifikatsiya qilingan) organ Vakolatli organni quyidagilar haqida xabardor qilishi lozim:

texnik reglamentlarga asosan mahsulot muvofiqligini baholash natijalari boʻyicha hujjatlarni rasmiylashtirishni rad etish, rasmiylashtirilgan hujjatlarga oid qarorni toʻxtatish yoki bekor qilish;

oʻzining tayinlangan sohasi yoki yuritayotgan faoliyati shart-sharoitlariga taʼsir qiluvchi har qanday holatlar;

muvofiqlikni baholash faoliyatiga oid maʼlumot taqdim qilish yuzasidan tegishli davlat nazorati organidan kelib tushgan har qanday talabnomalar;

soʻrovga muvofiq tayinlash sohasi doirasida amalga oshirilgan muvofiqlikni baholash faoliyati va boshqa har qanday faoliyatlar, shu jumladan, yordamchi pudratchilik asosidagi faoliyatlar toʻgʻrisidagi maʼlumotlar.

68. Tayinlangan (notifikatsiya qilingan) organ texnik reglamentlarga asosan aynan bir turdagi mahsulotlarni qamrab olgan, oʻxshash muvofiqlikni baholash faoliyati bilan shugʻullanuvchi texnik reglament doirasida boshqa tayinlangan (notifikatsiya qilingan) organlarga muvofiqlikni baholashning salbiy natijalari, shuningdek, ularning soʻroviga koʻra ijobiy natijalari toʻgʻrisidagi maʼlumotni taqdim qilishi shart.

15-bob. Tayinlangan (notifikatsiya qilingan) organlar faoliyatini muvofiqlashtirish

69. Texnik reglamentlar doirasida tayinlangan (notifikatsiya qilingan) organlar va boshqa manfaatdor taraflar oʻrtasida hamkorlikni yoʻlga qoʻyish hamda faoliyatlarini muvofiqlashtirish maqsadida Vakolatli organ qoshida uning buyrugʻi asosida mazkur masalalarni muvofiqlashtiruvchi Texnik qoʻmita tashkil etiladi.

70. Texnik qoʻmita tayinlangan (notifikatsiya qilingan) organlar faoliyatini muvofiqlashtirish boʻyicha maslahat organi boʻlib, uning tarkibi Vakolatli organ, standartlashtirish boʻyicha milliy organ, akkreditatsiya organi, bozor nazorati organi, tayinlangan (notifikatsiya qilingan) organlar, iqtisodiy operatorlarning vakillari, tegishli texnik reglamentlarda belgilangan tashkilotlar va boshqa manfaatdor taraflardan (kelishilgan holda) shakllantiriladi. Texnik qoʻmitaning nizomi va tarkibi Vakolatli organ tomonidan tasdiqlanadi.

71. Texnik qoʻmitada koʻrib chiqilayotgan masalalar boʻyicha qaror oddiy koʻpchilik ovozi bilan qabul qilinadi. Ovoz berishda manfaatdor tomonlarning tengligi taʼminlanadi va hech biriga ustunlik berilishiga yoʻl qoʻyilmaydi, ovozlar teng boʻlgan taqdirda yakuniy qarorni qabul qilish qoʻmita raisi tomonidan amalga oshiriladi.

16-bob. Yakunlovchi qoida

72. Ushbu Nizom talablarining buzilishida aybdor boʻlgan shaxslar qonunchilik hujjatlariga muvofiq javob beradilar.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 12-iyul,

432-son

(Qonunchilik maʼlumotlari milliy bazasi, 14.07.2025-y., 09/25/432/0603-son)

lex.uz