📅 2025-yil 12-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 12 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 12 июля 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 12 July 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
Лифтларни техник кўрикдан ўтказиш тартиби тўғрисидаги низомни тасдиқлаш ҳақида
Республика аҳолисининг лифтлардан фойдаланишда хавфсизлигини таъминлаш ҳамда барча тоифадаги лифтларнинг техник соз ҳолатда сақланиши устидан доимий назорат қилиш тизимини амалиётга жорий этиш мақсадида Вазирлар Маҳкамаси қарор қилади:
1. Қуйидагиларни назарда тутувчи Лифтларни техник кўрикдан ўтказиш тартиби тўғрисидаги низом (кейинги ўринларда — Низом) иловага мувофиқ тасдиқлансин ва 2026 йил 1 июлдан бошлаб амалга киритилсин:
аккредитация қилинган ва тегишли рухсатномага эга бўлган ихтисослашган ташкилотлар томонидан лифтларни техник кўрикдан ўтказиш тартиби;
лифтларни техник кўрикдан ўтказувчи ихтисослашган ташкилотларга қўйиладиган талаблар;
лифтларни техник кўрикдан ўтказувчи мутахассис ходимлар тоифаси ва уларга нисбатан қўйиладиган малака талаблари.
2. Қурилиш ва уй-жой коммунал хўжалиги вазирлиги:
Вазирлар Маҳкамаси ҳузуридаги Саноат, радиация ва ядро хавфсизлиги қўмитаси, Ўзбекистон техник жиҳатдан тартибга солиш агентлиги, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари билан биргаликда 2025 йил якунига қадар республикадаги мавжуд лифтларни хатловдан ўтказсин;
манфаатдор вазирликлар ва идоралар билан биргаликда икки ой муддатда Низом ва Лифт ва лифт хавфсизлик қурилмаларининг хавфсизлиги тўғрисидаги техник регламент талабларидан келиб чиқиб, Лифтлардан хавфсиз фойдаланиш ва техник хизмат кўрсатиш тартибини ишлаб чиқсин ва тасдиқлаш учун Вазирлар Маҳкамасига киритсин;
Вазирлар Маҳкамаси ҳузуридаги Саноат, радиация ва ядро хавфсизлиги қўмитаси, Ўзбекистон техник жиҳатдан тартибга солиш агентлиги, Ўзбекистон Миллий телерадиокомпанияси билан биргаликда ушбу қарорнинг мақсади, мазмуни ва уни қўллаш тартиби тўғрисида аҳоли, вазирликлар, идоралар ва бошқа ташкилотлар ҳамда тадбиркорлик субъектларининг кенг хабардор қилинишини таъминласин.
3. Ушбу қарорнинг бажарилишини назорат қилиш Ўзбекистон Республикаси қурилиш ва уй-жой коммунал хўжалиги вазири Ш.С. Хидоятов, Вазирлар Маҳкамаси ҳузуридаги Саноат, радиация ва ядро хавфсизлиги қўмитаси раиси А.В. Рафиков ҳамда Ўзбекистон техник жиҳатдан тартибга солиш агентлиги директори А.Р. Жуманазаров зиммасига юклансин.
Вазирлар Маҳкамасининг 2025 йил 12 июлдаги 431-сон қарорига ИЛОВА
Лифтларни техник кўрикдан ўтказиш тартиби тўғрисида
1-боб. Умумий қоидалар
1. Ушбу Низом республика ҳудудида фойдаланишда бўлган лифтларни ихтисослашган ташкилотлар томонидан мажбурий техник кўрикдан ўтказиш тартибини белгилайди.
2. Ушбу Низомда қуйидаги асосий тушунчалар қўлланади:
бино ва иншоотга жавобгар — мулкдор томонидан тайинланадиган лифтдан хавфсиз фойдаланишни таъминлаш учун лифтга мунтазам техник хизмат кўрсатиш, даврий назоратдан ўтказилиши ва таъмирланиши учун масъул бўлган шахс;
ваколатли орган — Вазирлар Маҳкамаси ҳузуридаги Саноат, радиация ва ядро хавфсизлиги қўмитаси;
даврий техник кўрик — лифтлардан хавфсиз фойдаланишни таъминлаш ва уларнинг ишлаш ҳолатини баҳолаш мақсадида ўтказиладиган синовлар, инспекция қилиш ва бошқа чоралар мажмуи;
дастлабки техник кўрик — ўрнатилган лифт рўйхатга олинишидан аввал биринчи марта ўтказиладиган синовлар, инспекция ва бошқа чоралар мажмуи;
ихтисослашган ташкилот — лифтларни техник кўрикдан ўтказиш фаолияти билан шуғулланувчи сифатида ISO/IEC 17020 стандартига мувофиқ «А» турдаги инспекция идораси мақомида Миллий аккредитация тизимида аккредитациядан ўтган ва тегишли рухсатномага эга бўлган юридик шахс;
касбий малака сертификати — ўқув муассасалари томонидан расмийлаштириладиган, шахснинг билим, кўникма ва малакаларини ифодаловчи ҳужжат;
лифт пудратчиси — лифт ўрнатиладиган бино ёки иншоотнинг қурилиш ишларини ўз номидан амалга оширадиган шахс;
масъул орган — кўп квартирали уй-жойларда ўрнатилган лифтлар назоратини амалга оширувчи Ўзбекистон Республикаси Қурилиш ва уй-жой коммунал хўжалиги вазирлиги;
мулкдор — лифт жойлашган бино (иншоот, шу жумладан, лифт) ёки унинг бир қисмининг эгаси (эгалари), кўп квартирали уйда умумий улушли мулк ҳуқуқига эга бўлган хонадонлар мулкдорлари;
назорат кўриги — техник кўрик натижасида аниқланган номувофиқликларнинг бартараф этилгани ихтисослашган ташкилот томонидан текширилиши;
техник муҳандис — лифт синови натижаси бўйича хулоса қабул қилиш ваколати берилган шахс;
техник инспектор — техник кўрик ўтказувчи мутахассис;
хавфсизлик бўйича стандарт — одамларни ва (ёки) юкларни кўтариш ёки туширишда фойдаланилаётган лифтларнинг хавфсизлигини таъминлаш қоидаларини белгиловчи стандарт.
3. Лифтларни техник кўрикдан ўтказишни ташкил қилувчи, ўтказувчи ва бевосита жараёнда иштирок этувчилар ишларни Ўзбекистон Республикасининг «Меҳнатни муҳофаза қилиш тўғрисида»ги Қонуни талаблари ва бошқа ўрнатилган меҳнат хавфсизлиги қоидаларига мувофиқ ташкил этилишига жавобгардир.
4. Ихтисослашган ташкилотларнинг фаолияти ушбу Низомга мувофиқ ваколатли орган томонидан назорат қилиб борилади. Ваколатли орган зарур ҳолларда назорат жараёнига бошқа идораларнинг вакилларини жалб этиши мумкин.
5. Мулкдор ўзига тегишли бўлган бинода ва (ёки) иншоотда ўрнатилган лифтнинг ҳар ўн икки ойда камида бир марта техник кўрикдан ўтказилишини таъминлаши шарт.
6. Лифтларни техник кўрикдан ўтказиш ушбу Низомга 1-иловада келтирилган Лифтларни техник кўрикдан ўтказиш схемасига асосан амалга оширилади.
2-боб. Лифтларни техник кўрикдан ўтказиш тартиби
7. Бино ва иншоотларда ўрнатилган, доимий равишда фойдаланишда бўлган лифтлар ўн икки ойдан ошмаган ҳолда камида бир марта ихтисослашган ташкилот томонидан ушбу Низомда назарда тутилган тартибда мажбурий даврий техник кўрикдан ўтказилади.
8. Масъул орган лифтларни техник кўрикдан ўтказиш учун ихтисослашган ташкилотлардан бирини жалб қилади.
9. Масъул орган йиллик режа-дастур тузишдан аввал ушбу Низомда назарда тутилган ихтисослашган ташкилотнинг лифтларни техник кўрикдан ўтказиш бўйича белгиланган талабларга мувофиқ фаолият олиб бориш имкониятини баҳолаб олиши мумкин.
10. Масъул орган ихтисослашган ташкилотнинг лифтларни техник кўрикдан ўтказиш бўйича белгиланган талабларга мувофиқ фаолият олиб бориш имкониятини баҳолашда унинг аккредитация соҳаси, техник кўрик ўтказиш фаолияти натижасида юзага келувчи молиявий жавобгарликни суғурталашнинг кўлами, зарур ходимлар ва ресурслар мавжудлигини инобатга олиши шарт.
11. Баҳолаш натижаларига кўра масъул орган томонидан танлаб олинган ва келишув тузилган ихтисослашган ташкилот тўғрисидаги маълумот жамоатчиликка ва лифт мулкдорига эълон қилинади.
12. Масъул орган ушбу Низом қоидаларига мувофиқ ихтисослашган ташкилот билан томонларнинг ваколатлари ва мажбуриятларини белгилайдиган келишув имзолайди. Агар томонларнинг бири ушбу муддат ичида келишувни бекор қилса, иккинчи томонни бекор қилиш санасидан камида ўн беш иш куни аввал ёзма равишда хабардор қилиши шарт.
13. Агар масъул орган келишув муддати тугаши муносабати билан бошқа ихтисослашган ташкилот билан келишув имзолаган тақдирда, ушбу келишув тузилишидан аввал ўтказилган техник кўрик натижалари бўйича назорат кўригини ўтказиш талаб қилинса, келишув муддати тугалланишига қарамасдан бундай назорат кўригини ўтказишни келишув муддати тугаган ихтисослашган ташкилот зиммасида қолдириши шарт.
14. Агар ваколатли орган ихтисослашган ташкилотнинг тегишли рухсатномасини белгиланган тартибда бекор қилса, масъул орган билан келишув тузган бошқа ихтисослашган ташкилот томонидан назорат кўриги ўтказилишини таъминлайди.
15. Назорат кўриги учун алоҳида тўлов олиш шартлари, тўлов миқдорига оид талаблар масъул орган билан ихтисослашган ташкилот ўртасидаги келишувда белгиланади.
Бунда мулкдор ва (ёки) ўрнатувчи ёки унинг ваколатли хизмат кўрсатувчиси ўз мажбуриятларини бажармагани оқибатида иккинчи ва ундан кейинги назорат кўригини ўтказиши учун ихтисослашган ташкилотга қўшимча тўлов шартлари, тўлов миқдори ва бошқа масалалар масъул орган билан ихтисослашган ташкилот ўртасидаги келишувда аниқ белгиланиши лозим.
16. Агар масъул орган муайян ҳудудда ихтисослашган ташкилот билан лифтларни даврий техник кўрикдан ўтказиш юзасидан келишувга эришмаса ёхуд бундай келишув тузмаган бўлса, ваколатли орган масъул органга нисбатан тегишли чораларни кўриши шарт.
Бунда ваколатли орган мазкур ҳудудга энг яқин жойда техник кўрикдан ўтказиш хизматини кўрсатувчи ҳамда иш кўлами учун етарли асбоб-ускуна ва малакали ходимларга эга ихтисослашган ташкилотнинг жалб қилинишини ва у билан келишув тузилишини таъминлайди.
17. Ихтисослашган ташкилотнинг рухсатномаси тўхтатиб турилган бўлса, масъул орган техник кўрик ўтказиш масаласида бошқа ихтисослашган ташкилот билан вақтинча келишув тузиши лозим.
Бундай ҳолда масъул органнинг бошқа ихтисослашган ташкилот билан тузадиган вақтинча келишувининг амал қилиш муддати асосий ихтисослашган ташкилотнинг рухсатномасини тўхтатиб туриш муддатидан кам бўлмаслиги лозим.
18. Агар масъул орган вақтинча келишувга эришмаса ёхуд бундай келишув тузмаган бўлса, ваколатли орган ушбу Низомнинг 16-бандида назарда тутилган тартибда иш кўриши лозим.
19. Ушбу Низомда белгиланган тартибга мувофиқ ихтисослашган ташкилот лифтларни мажбурий техник кўрикдан ўтказиш фаолияти билан шуғулланиши мумкин.
20. Ихтисослашган ташкилот ушбу Низомда ва бошқа тегишли қонунчилик ҳужжатларида белгиланган талабларга риоя қилиши шарт.
21. Ихтисослашган ташкилот Миллий аккредитация тизимида аккредитация қилинганлик мақомининг узлуксизлигини таъминлаши, бутун рўйхатга олинган давр мобайнида молиявий жавобгарликлари кафолатланган (суғурталанган ва бошқа усуллар) бўлиши, лифтларни техник кўрикдан ўтказиш учун малакали мутахассисларга ва зарурий асбоб-ускуналарга эга бўлиши шарт.
22. Ихтисослашган ташкилот ўзининг фаолиятида меҳнатни муҳофаза қилиш талабларига риоя этилишини таъминлаши, уларнинг бажарилиши устидан назорат қилиш чораларини кўриши шарт.
23. Агар рухсатнома олган ихтисослашган ташкилот Лифт ва лифт қурилмаларининг хавфсизлиги тўғрисидаги техник регламент (кейинги ўринларда — Техник регламент) доирасида мувофиқликни баҳолаш фаолияти билан ҳам шуғулланса, манфаатлар тўқнашувининг олдини олиш учун мувофиқликни баҳолаш жараёнида иштирок этган ходимнинг айни лифтни техник кўрикдан ўтказиш жараёнида иштирок этишига йўл қўймаслиги лозим.
24. Ихтисослашган ташкилот қонунчилик ҳужжатлари талабларига, техник кўрикдан ўтказиш турига ва аккредитация соҳасида белгиланган стандартларга асосан иш фаолиятини ташкил этиши шарт.
25. Ихтисослашган ташкилот масъул орган ваколатлари доирасига кирувчи лифтларни техник кўрикдан ўтказишда у билан келишилган йиллик режа-дастур доирасида фаолият олиб бориши лозим.
26. Ихтисослашган ташкилот меҳнат қонунчилигига мувофиқ меҳнат хавфсизлиги бўйича чора-тадбирларни амалга ошириш учун ўз фаолияти доирасида меҳнатни муҳофаза қилиш бўйича мутахассисга эга бўлиши шарт.
27. Ихтисослашган ташкилотлар вакиллари лифтларни техник кўрикдан ўтказиш амалиётининг яхлит тизимини таъминлаш, юзага келган муаммоларни баҳолаш ва зарур ҳамкорликни ўрнатиш мақсадида, ваколатли орган томонидан ўтказиладиган мувофиқлаштириш йиғилишларида қатнашиши лозим.
28. Ихтисослашган ташкилот ҳар бир техник инспекторини техник кўрикдан ўтказиш жараёнида фойдаланиши учун калибрлашдан ўтган камида қуйидаги ўлчаш воситалари ҳамда шахсий ҳимоя воситалари билан таъминлаши лозим:
люксметр;
тахометр;
мультиметр (электр токи параметрларини ўлчайдиган қурилма);
узунликни ўлчаш воситаси (рулетка);
динамометр (кучни ўлчаш учун қурилма);
штангенциркуль;
паст кучланишли детектор (ac/dc detector) ва фонарь (тизимда ток бор йўқлигини аниқлайдиган қурилма);
махсус электрон ахборот тизими билан боғланиш ва маълумот узатиш имкониятига эга бўлган планшет ёки ушбу функцияларга эга ўхшаш мобиль электрон воситаси.
3-боб. Ихтисослашган ташкилотнинг ходимларига қўйиладиган талаблар
29. Ихтисослашган ташкилот лифтларни техник кўрикдан ўтказиш фаолияти билан шуғулланиши учун лифтларни синовдан ўтказиш бўйича билим ва малакага эга техник муҳандис, техник инспектор ҳамда зарурий асбоб-ускуна, техник воситаларга эга бўлиши шарт.
30. Ихтисослашган ташкилотда камида бир нафар техник муҳандис ва икки нафар техник инспектор ваколатли орган томонидан рухсатнома олинган муддат давомида фаолият олиб бориши лозим.
31. Ихтисослашган ташкилот томонидан меҳнат шартномаси бекор қилинган ходим ўрнига янги ходим қабул қилинмагунга қадар унинг фаолият юритишига йўл қўйилмайди. Янги ходим ишга қабул қилинган тақдирда, аккредитация органини ва ваколатли органни уч кун ичида хабардор қилиши, бунда янги ишга қабул қилинган ходимнинг билим ва малакаси ҳамда ушбу Низом билан ходимга қўйиладиган талаблар бажарилганига оид тасдиқловчи ҳужжатларни тақдим этиши лозим.
32. Ихтисослашган ташкилот бир нафар техник инспектор билан тўлиқ иш куни давомида қуйидагилардан бирини:
энг кўпи билан иккита лифтда дастлабки техник кўрикни;
энг кўпи билан бешта лифтда даврий техник кўрикни;
энг кўпи билан ўнта лифтда назорат кўригини ўтказиши мумкин.
33. Техник муҳандис машинасозлик, механика, электр, электроника соҳаларидан бирида камида уч йиллик соҳага доир ва (ёки) инспекция ўтказиш бўйича касбий малакага эга, техник кўрикни белгиланган талабларга мувофиқ ўтказилишини таъминлашда умумий жавобгарликни олган, ихтисослашган ташкилотнинг штат бирлигидаги ходим бўлиши шарт.
34. Техник инспектор машинасозлик, механика, электр, электроника соҳаларидан бирида соҳага доир ва инспекция ўтказиш бўйича касбий малакага эга ихтисослашган ташкилотнинг штат бирлигидаги ходим бўлиши шарт.
Техник инспектор мустақил ҳолда лифтларни техник кўрикдан ўтказиши учун камида 50 та лифтнинг техник кўригида шогирд сифатида иштирок этган бўлиши керак. Бу каби иштироклар амалга оширилганлигини тасдиқловчи ёзувлар ихтисослашган ташкилот томонидан алоҳида журналда ва электрон шаклда қайд қилиб борилади.
35. Ихтисослашган ташкилот раҳбарияти, маъмурий бошқарув вазифасини бажарувчи ходимлари техник муҳандис ва (ёки) техник инспектор сифатида тайинланиши ва (ёки) уларга бундай вазифанинг юкланишига йўл қўйилмайди.
36. Ихтисослашган ташкилотнинг техник муҳандиси ёки техник инспектори сифатида ишга қабул қилинган ходим бир вақтнинг ўзида бошқа ихтисослашган ташкилотда айни шу касбда меҳнат фаолиятини олиб боришига рухсат этилмайди.
37. Лифтларни техник кўрик ўтказиш жараёнига бевосита ихтисослашган ташкилотнинг жалб қилинадиган ходимлари лифтларни синовдан ўтказиш бўйича касбий малака сертификатига эга бўлиши шарт. Ходимларнинг қайта малака сертификатлашдан ўтишлари ҳар уч йилда амалга оширилиши лозим.
38. Ушбу Низомда белгиланган меъёрга асосан техник кўрикдан ўтказиладиган лифтларнинг сонидан келиб чиққан ҳолда, ихтисослашган ташкилот ресурслар билан таъминланган бўлиши, шу жумладан, техник муҳандислар ва техник инспекторларни техник кўрикдан ўтказиш ишларига тайинлашлари шарт.
39. Ихтисослашган ташкилот томонидан лифтларни техник кўрикдан ўтказишда иштирок этувчи ходимларини аниқлаш ва тегишли ишларни бажариш жараёнларида тизимли мониторингни таъминлаш мақсадида, ушбу ходимлар учун хос идентификациялаш (шахсни тасдиқлаш) тизимини яратиши ва уларга тегишли ҳужжат (гувоҳнома) расмийлаштириши шарт.
40. Ихтисослашган ташкилот ўз ходими томонидан унга расмийлаштирилган идентификациялаш ҳужжатидан фақат лифтларни техник кўрикдан ўтказиш даврида белгиланган мақсаддагина фойдаланишни таъминлаши шарт.
4-боб. Лифтларни дастлабки техник кўрикдан ўтказиш тартиби
41. Техник регламент талаблари доирасида фойдаланишга топширилган ва янги ўрнатилган ҳар қандай лифт махсус электрон ахборот тизимида рўйхатга олинишидан аввал лифт пудратчиси томонидан дастлабки техник кўрикдан ўтказилиши таъминланиши шарт.
42. Дастлабки техник кўрик лифт пудратчисининг мурожаатига биноан 10 иш кунидан кечиктирмай ихтисослашган ташкилот томонидан амалга оширилади.
43. Техник регламент талаблари доирасида лифтни фойдаланишга топширган лифт ўрнатувчиси (ёки унинг ваколатли хизмат кўрсатувчиси) дастлабки техник кўрикдан ўтказишни назорат қилади.
44. Дастлабки техник кўрикдан ўтказиш учун лифт пудратчисидан қуйидаги маълумот ва ҳужжатларнинг нусхаси ихтисослашган ташкилотга тақдим қилиниши талаб этилади:
Техник регламент талабларига мувофиқликни тасдиқловчи ишлаб чиқарувчи (ўрнатувчи) томонидан расмийлаштирилган декларация;
ўрнатилган лифт учун Техник регламент доирасида тайинланган орган томонидан расмийлаштирилган мувофиқлигини тасдиқловчи расмий ҳужжат;
лифтнинг тасдиқланган ва (ёки) бирламчи лойиҳаси;
Кадастр агентлиги томонидан юритиладиган Кўчмас мулк объектлари манзиллари ягона реестридаги лифт ўрнатилган бино (иншоот)ларнинг рақами.
45. Янги ўрнатилган лифтни дастлабки техник кўрикдан ўтказишни ташкил қилиш ва уни ўтказиш билан боғлиқ харажатларни қоплаш лифт пудратчисининг зиммасига юклатилади.
46. Лифтларнинг дастлабки техник кўриги тегишли тасдиқланган стандартда назарда тутилган синаш ва инспекция ўтказиш учун белгиланган тезликда ва юкламада ўтказилади.
47. Дастлабки техник кўрикдан ўтказиш учун фойдаланиладиган юк лифт ўрнатувчиси томонидан тақдим қилинади ва у қуйидагиларга эга бўлиши шарт:
амалдаги калибрлаш сертификати;
тури ва модели тўғрисидаги маълумот, шу жумладан, серия рақами ўчиб кетмайдиган ёрлиқ;
физикавий хусусиятларини йўқотмайдиган, массасини ўзгартирмайдиган материалдан ишлаб чиқарилган ва ташиш учун қулай қилиб ишланган бўлиши.
48. Агар лифтнинг мувофиқлиги Техник регламент талаблари доирасида бир дона лифтнинг мувофиқлигини баҳолаш натижасида тасдиқланган бўлса, айни лифтнинг дастлабки техник кўриги паст тезликда ва юксиз ўтказилишига рухсат берилади.
49. Дастлабки техник кўрик ўтказилган санадан бошлаб унинг натижасига кўра кейинги даврий техник кўрик ўтказиш муддати ихтисослашган ташкилот томонидан режа-жадвал орқали белгиланади.
50. Дастлабки техник кўрикдан ўтказиш босқичида ихтисослашган ташкилот ҳар бир лифт учун идентификация рақамини беради ва махсус электрон ахборот тизимига киритилишини таъминлайди. Лифтнинг мазкур рақами дастлабки ва кейинги даврий техник кўрик ҳисоботларида қайд этилиши шарт.
Дастлабки техник кўрикнинг ижобий натижасига кўра рўйхатга олинган лифтнинг идентификация рақами ушбу Низомга 2-иловада келтирилган Лифт идентификация рақами шаклига мувофиқ лифт кабинасининг бошқарув панели жойлашган қисмида кўриш одамлар учун қулай равишда ва 1 600 mm баландликда алюминий асос ёки ўзи ёпишувчи ва лифтдан фойдаланиш даври давомида ўчиб кетмайдиган мустаҳкам ёрлиқ билан тамғаланади.
51. Ихтисослашган ташкилот лифтнинг идентификация рақамини беришда лифтга ишлаб чиқарувчи томонидан берилган серия рақами ҳамда Кадастр агентлиги томонидан юритиладиган Кўчмас мулк объектлари манзиллари ягона реестридаги бино (иншоот)лар рақамига асосланади.
Агар бинода бир нечта лифт мавжуд бўлса, бинодаги лифтларнинг умумий сонига мувофиқ ҳар бир лифтга берилган бино (иншоот) рақамига навбатдаги тартиб рақами қўшилади.
Ёрлиқ ўлчамлари 85х50 mm, лифтнинг идентификация рақамини ташкил этувчи рақамлар «arial» шрифтда, ўлчами 28 белгидан иборат, кулранг ёки оқ фонда қора рангда белгиланади.
52. Дастлабки техник кўрик натижалари бўйича лифтнинг назоратдан ўтказилгани тўғрисидаги маълумот ушбу Низомга 3-иловага мувофиқ 160х80 mm ўлчамдаги яшил, мовий, сариқ ёки қизил рангдаги Лифт техник кўрикдан ўтказилгани тўғрисидаги маълумот ёрлиғи намунаси шаклида ўзи ёпишувчи ва лифтдан фойдаланиш даври давомида ўчиб кетмайдиган мустаҳкам ёрлиқ кўринишида лифт кабинасининг бошқарув панели жойлашган қисмида одамлар кўриши учун қулай жойда ва 1 700 mm баландликда ёпиштирилади.
53. Агар дастлабки кўрик жараёнида айни лифтга нисбатан мувофиқликни баҳолаш тартиб-таомили нотўғри қўллангани ихтисослашган ташкилот томонидан аниқланса, ушбу лифтга тегишли тайинланган орган томонидан расмийлаштирилган мувофиқликни тасдиқловчи расмий ҳужжатни, ишлаб чиқарувчи (ўрнатувчи) томонидан расмийлаштирилган декларацияни ва ишлаб чиқарувчи (ўрнатувчи) ҳақидаги маълумотларни ўн иш куни давомида ваколатли органга тақдим қилиши шарт.
5-боб. Даврий техник кўрикдан ўтказиш тартиби
54. Лифтда белгиланган даврийликда техник кўрикдан ўтказишнинг таъминланишини назорат қилиш мажбурияти кўп квартирали уй-жойларда масъул орган, кўп квартирали уй-жойлардан ташқари биноларда ваколатли орган зиммасига юклатилади.
Лифтларнинг белгиланган даврийликда техник кўрикдан ўтказилишини таъминлаш бино ва иншоотларга жавобгар томонидан амалга оширилади.
55. Муайян ҳудудда лифт ўрнатувчиси (ёки унинг ваколатли хизмат кўрсатувчиси) томонидан лифтларга ойлик хизмат кўрсатилгани тўғрисидаги маълумот махсус электрон ахборот тизимига киритиб борилиши таъминланиши ҳамда ушбу маълумотлар ихтисослашган ташкилот томонидан танишиш ва фойдаланиш имконияти яратилиши лозим.
56. Ихтисослашган ташкилот режалаштирилган техник кўрик ўтказиш санаси ҳақида мулкдорни (бино учун масъул шахсни), лифт ўрнатувчисини (ёки унинг ваколатли хизмат кўрсатувчиси) камида уч кун аввал хабардор қилиши шарт.
57. Ихтисослашган ташкилот техник жиҳатдан тартибга солиш соҳасидаги норматив ҳужжатларда белгиланган талабларга мувофиқ ишлаб чиқилган чек-листлар (белгиланган мезонлар) асосида лифтларни техник кўрикдан ўтказади.
Ихтисослашган ташкилот чек-листлардан фойдаланиш, уларни тўғри ва аниқ тўлдириш юзасидан йўриқномаларни ишлаб чиқиши, ходимларини тегишли йўриқномалар билан таништириши лозим.
Ихтисослашган ташкилот ходимлари томонидан чек-листлар, ушбу Низомда назарда тутилган бошқа ёзувларнинг тўғри ва аниқ тўлдирилиши ҳамда юритилишини назорат қилиши шарт.
58. Агар дастлабки техник кўрик ушбу Низомнинг 48-бандида назарда тутилган тарзда ўтказилган бўлса, кейинги даврий техник кўрик ёки назорат кўриги ушбу Низомнинг 46-бандида белгиланган тезлик ва юкламада амалга оширилиши шарт.
Бунда даврий техник кўрик нуқтаи назаридан ўтказилган синов ва техник кўрикларни техник инспектор баҳолаганда, айни лифтнинг хавфсизлик қурилмалари, ҳаракатлантириш тизими, шкивлари, лифт кабинаси, занжири ва улаш элементларида шикастланиш ҳолатларини аниқлаши ва зарур маълумотларни техник кўрик ўтказиш ҳисоботида қайд этиши шарт.
59. Агар лифтларнинг номинал юкламаси (нагрузка) ва ёки номинал тезлиги ва (ёки) ҳаракатланиш масофасида ўзгариш бўлса, ихтисослашган ташкилот даврий техник кўрик жараёнида бундай лифтни тегишли хавфсизлик бўйича стандарт талабларига мослигини аниқлаши лозим.
60. Даврий техник кўрик жараёнида ихтисослашган ташкилот томонидан ўтказиладиган синовларнинг такрорланиши лифтни эскиришга олиб келмайдиган ва унинг хавфсизлик хусусиятини камайтирмайдиган тарзда амалга оширилиши лозим.
Ихтисослашган ташкилот техник кўрик жараёнида лифтнинг хавфсизлик қурилмалари ва буферларида синовларни тасдиқланган тегишли стандартларга мувофиқ паст тезликда ва лифт кабинаси бўш ҳолатда ўтказиши лозим.
61. Даврий техник кўрик лифтга техник хизмат кўрсатишни амалга оширувчи лифт ўрнатувчиси (ёки унинг ваколатли хизмат кўрсатувчиси) назорати остида амалга оширилади. Лифт ўрнатувчисининг (ёки унинг ваколатли хизмат кўрсатувчисининг) техник хизмат кўрсатиш ходим(лар)и техник кўрикни ўтказишни назорат қилиши ҳамда бу жараёнда ихтисослашган ташкилот билан ҳамкорлик қилиши шарт.
62. Агар мулкдор билан лифтга хизмат кўрсатиш тўғрисида шартнома тузган лифт ўрнатувчиси (ёки унинг ваколатли хизмат кўрсатувчиси) техник кўрикда иштирок этмаса, хизмат кўрсатиш шартномаси ўз кучини йўқотган бўлса ёки бекор қилинган бўлса, ихтисослашган ташкилот техник кўрик ўтказмаслиги лозим.
63. Техник кўрикни назорат қилувчи лифт ўрнатувчиси (ёки унинг ваколатли техник хизмат кўрсатувчиси) қонунчиликда белгиланган мезонларга мос келмаган ёхуд лифтга хизмат кўрсатиш тўғрисида мулкдор билан лифт ўрнатувчиси (ёки унинг ваколатли техник хизмат кўрсатувчиси) ўртасида шартнома тузилмаган (бекор қилинган, ўз кучини йўқотган) тақдирда, ихтисослашган ташкилот бу ҳақида масъул органни (масъул орган ваколатлари доирасига кирмайдиган лифтлар бўйича эса ваколатли органни) хабардор қилиши шарт.
64. Техник кўрикдан ўтказиш натижасида лифтга шикаст етказилган тақдирда, юзага келган зарар ихтисослашган ташкилотнинг ўз маблағлари ҳисобидан ёки молиявий жавобгарлигини суғурталаш тартиблари асосида қопланиши шарт.
65. Лифтдан фойдаланишда бахтсиз ҳодиса содир бўлган тақдирда, мулкдор (бино ва иншоотлар учун масъул шахсга) бундай ҳодиса юзага келган кундан бошлаб қонунчиликда белгиланган тартибда ваколатли органни хабардор қилади ва бахтсиз ҳодиса текшируви якунланмагунга қадар лифтдан фойдаланишни тақиқлайди.
Ваколатли орган томонидан бахтсиз ҳодисанинг келиб чиқиш сабаблари аниқланади ва келиб чиқишига сабабчи бўлган бино ва иншоотларга жавобгар, сервис хизмат кўрсатувчи ёки ихтисослашган ташкилотларнинг масъулларига қонунчиликда белгиланган чораларни кўради.
Бахтсиз ҳодиса текшируви якунлангандан сўнг лифт мулкдори томонидан уч кун ичида лифтнинг қайта техник кўрикдан ўтказилиши таъминлаши шарт. Бунда ихтисослашган ташкилот томонидан қайта техник кўрик ҳақ олмасдан ўтказилади.
Ихтисослашган ташкилот лифтда даврий техник кўрик ўтказиши учун мулкдор (бино ва иншоотлар учун масъул шахс) тарафидан зарурий шароит яратилмаган (рухсат берилмаган) тақдирда, бу ҳақида масъул органни (масъул орган ваколатлари доирасига кирмайдиган лифтлар бўйича эса ваколатли органни) хабардор қилиши шарт.
Масъул орган (масъул орган ваколатлари доирасига кирмайдиган лифтлар бўйича эса ваколатли орган) лифтда даврий техник кўрик ўтказиши учун мулкдор (бино ва иншоотлар учун масъул шахс) тарафидан зарур шароит яратилиши чораларини кўриши лозим. Бундай шароит ихтисослашган ташкилотдан тегишли хабарнома олинган кундан бошлаб ўттиз кунлик муддатда яратилмаган тақдирда, лифт масъул орган (масъул орган ваколатлари доирасига кирмайдиган лифтлар бўйича эса ваколатли орган) томонидан электр таъминоти тизимидан узилади ва уни муҳрлаш орқали тизим ишлашини тақиқлайди.
6-боб. Техник кўрик натижаларини баҳолаш ва расмийлаштириш
66. Ихтисослашган ташкилот томонидан техник кўрик ўтказишда лифтнинг хавфсизлик даражасини аниқлаш ва тоифалашда хавфсизлик бўйича тегишли стандартда белгиланган мезон асос қилиб олинади.
Бунда ихтисослашган ташкилот мос равишда ушбу Низомнинг 57-бандида назарда тутилган чек-листлардан фойдаланади.
67. Ўтказилган дастлабки, даврий техник кўрик натижаларининг ҳисоботи ушбу Низомга 4-иловада келтирилган Лифтни техник кўрикдан ўтказиш ҳисоботи шаклида, техник кўрик ўтказилган санада махсус электрон тизимига онлайн шаклда техник кўрикни ўтказган техник инспектор томонидан киритилади.
Расмийлаштирилган ҳисобот масъул техник муҳандис томонидан техник кўрик ўтказилган санадан бошлаб уч кун ичида тасдиқланиши шарт.
68. Агар техник кўрик натижасида лифт фойдаланиш учун хавфли ёки носоз деб баҳоланса, техник кўрик бўйича ҳисобот тасдиқланган санадан бир иш кунидан кечиктирмай ихтисослашган ташкилот томонидан ваколатли органга, масъул органга, лифт ўрнатувчисига (ёки унинг ваколатли хизмат кўрсатувчиси) ва мулкдорга тақдим қилиниши шарт.
69. Агар техник кўрик натижасида лифт фойдаланиш учун яроқли ёки қисман носоз деб баҳоланса, техник кўрик бўйича ҳисобот тасдиқланган санадан уч кундан кечиктирмай ихтисослашган ташкилот томонидан лифт ўрнатувчисига (ёки унинг ваколатли хизмат кўрсатувчисига) ва мулкдорга (бино учун масъул шахсга) тақдим қилиниши шарт.
70. Бино ва иншоот учун масъул шахс тайинланмаган ёки тайинланиши мумкин бўлмаган ҳолларда ихтисослашган ташкилот ҳисоботни мулкдорга ва мавжуд ҳолларда хонадон эгаларининг камида 30 фоизига электрон ёки ёзма шаклда тақдим қилиши лозим.
71. Ихтисослашган ташкилот ушбу Низомнинг 69 ва 70-бандларида назарда тутилган манфаатдор томонларга техник кўрик натижаси бўйича ҳисоботни электрон почта орқали жўнатиши, шунингдек, ўзининг расмий веб-сайтига киритиши орқали етказиши мумкин. Бундай ҳолда тегишли ҳисоботлар ва далилий маълумотларни камида уч йил сақлаши шарт.
72. Лифтларнинг техник кўрик натижалари тўрт тоифада — «яроқли», «қисман носоз», «носоз» ёки «фойдаланиш учун хавфли» тарзда баҳоланади.
Бунда техник кўрик натижаларининг тоифасига қараб қуйидаги рангларда маълумот ёрлиғи лифтга ёпиштирилади (жойлаштирилади):
фойдаланишга яроқли лифтга «яшил»;
қисман носоз лифтга «мовий»;
носоз лифтга «сариқ»;
фойдаланиш учун хавфли лифтга «қизил».
73. Техник кўрик натижалари бўйича тегишли маълумот ёрлиқлари ушбу Низомнинг 52-бандида келтирилган тартибда ёпиштирилиши (ўрнатилиши) шарт.
74. Маълумот ёрлиқларини учинчи тараф тайёрлашининг ёки сохталаштирилган маълумот ёрлиқлари лифтларда ёпиштирилмаслигининг олдини олиш мақсадида, ихтисослашган ташкилот томонидан махсус QR-код билан тасдиқланувчи маълумот ёрлиғи яратилиши шарт.
Агар ихтисослашган ташкилот сохта маълумот ёрлиғини ясаган ва лифтларга бундай ёрлиқларни ёпиштирган шахс(лар)дан хабар топса, сохта ёрлиқ(лар)ни далил сифатида кўрсатган ҳолда ваколатли органни хабардор қилиши лозим.
75. Техник кўрик натижасида фойдаланиш учун хавфли ва қизил рангли маълумот ёрлиғи билан белгиланган лифтдан фойдаланишни мулкдор (бино ва иншоот учун масъул шахс) тақиқлаши лозим. Бундай ҳолда мулкдор олтмиш кун ичида мазкур лифтнинг хавфсиз ҳолга келтирилишини таъминлаши шарт.
Белгиланган муддат ўтганидан сўнг ихтисослашган ташкилот томонидан ҳақ олмасдан назорат кўриги ўтказилиши лозим. Агар ўтказилган назорат кўриги натижасида айни лифт фойдаланиш учун хавфли деб баҳоланса, бундай лифт масъул орган (масъул орган ваколатлари доирасига кирмайдиган лифтлар бўйича эса ваколатли орган) томонидан электр таъминоти тизимидан узилади ва уни муҳрлаш орқали тизим ишлашини тақиқлайди.
76. Ушбу Низомнинг 75-бандида келтирилган ҳолат юзасидан масъул орган (масъул орган ваколатлари доирасига кирмайдиган лифтлар бўйича эса ваколатли орган) мазкур Низомга 5-иловада белгиланган Хавфли лифтни электр таъминоти тизимидан узиш ва муҳрлаш далолатномаси шаклига мувофиқ далолатномани уч нусхада расмийлаштириб, бир нусхадан мулкдорга ва ихтисослашган ташкилотга тақдим қилади.
77. Мулкдор (бино ва иншоот учун масъул шахс) ушбу Низомнинг 75-бандида белгиланган муддат ичида лифтнинг хавфсизлигини таъминламаслиги оқибатида ундан фойдаланишда юзага келиши мумкин бўлган мулкка ёки саломатликка етказилган ҳар қандай зарар учун жавобгар бўлади.
78. Мулкдор (бино учун масъул шахс) техник кўрик натижасида носоз деб баҳоланган сариқ ёрлиқли лифтдаги номувофиқликларни ўттиз кун ичида бартараф қилинишини таъминлаши шарт.
Белгиланган муддат ўтганидан сўнг ихтисослашган ташкилот томонидан назорат кўриги ўтказилиши лозим. Агар назорат кўриги натижасида лифт хавфли деб топилса, масъул орган (масъул орган ваколатлари доирасига кирмайдиган лифтлар бўйича эса ваколатли орган) ушбу Низомнинг 75-бандида белгиланган тарзда иш (чоралар) кўриши шарт.
79. Мулкдор (бино учун масъул шахс) муҳрланган ва электр таъминоти тизимидан узиб қўйилган лифтдаги номувофиқликларни бартараф қилиш жараёнини бошлашга рухсат олиш учун масъул органга (масъул орган ваколатлари доирасига кирмайдиган лифтлар бўйича эса ваколатли органга), номувофиқликларни бартараф қилиш жараёнини якунланганидан сўнг эса назорат кўригини ўтказиш юзасидан ихтисослашган ташкилотга ёзма мурожаат қилиши шарт.
80. Масъул орган (масъул орган ваколатлари доирасига кирмайдиган лифтлар бўйича эса ваколатли орган) белгиланган муддат ичида лифтдан фойдаланмасликни таъминлаш тўғрисида мулкдордан ёзма мажбурият олганидан сўнг номувофиқликларни бартараф қилиш жараёнини бошлашга рухсат беради ва ушбу Низомга 6-иловада белгиланган Электр таъминоти тизимига улаш ва муҳрни ечиш далолатнома шаклига мувофиқ далолатнома тузади.
81. Ушбу Низомнинг 80-бандида назарда тутилган далолатнома фақат бир марта тузилиши, унда номувофиқликларни бартараф қилиш учун белгиланган муддат қирқ беш иш кунидан ортиқ бўлмаслиги шарт.
82. Далолатномада белгиланган муддат ичида лифтдаги номувофиқликларни бартараф қилиш шартлари мулкдор билан лифт ўрнатувчиси (ёки унинг ваколатли хизмат кўрсатувчиси) ўртасидан тузилган шартномада акс эттирилиши шарт.
Лифтни хавфсиз ҳолатга келтириш мажбуриятини бажармаган томон, шартлашувчи тарафларнинг ўзаро молиявий мажбуриятларини истисно қилган ҳолда, жавобгар ҳисобланиб, унга нисбатан ваколатли орган томонидан суд тартибида қонунчиликда белгиланган тегишли чора қўлланади.
83. Мулкдор (бино ва иншоот учун масъул шахс) техник кўрик натижасида мовий рангда ёрлиқ ёпиштирилган лифтдаги носозликларнинг кейинги даврий техник кўриккача бартараф этилишини таъминлаши шарт.
7-боб. Назорат кўригини ўтказиш тартиби
84. Фойдаланиш учун хавфли деб баҳоланган қизил ёрлиқли лифтда назорат кўриги даврий кўрик натижасида расмийлаштирилган ҳисобот масъул органга (масъул орган ваколатлари доирасига кирмайдиган лифтлар бўйича эса ваколатли органга) лифт ўрнатувчисига (ёки унинг ваколатли хизмат кўрсатувчисига) ва мулкдорга тақдим қилинган санадан бошлаб олтмиш кун ўтганидан сўнг ихтисослашган ташкилот томонидан ўтказилади.
85. Носоз деб баҳоланган сариқ ёрлиқли лифтда назорат кўриги даврий техник кўрик натижасида расмийлаштирилган ҳисобот масъул органга (масъул орган ваколатлари доирасига кирмайдиган лифтлар бўйича эса ваколатли органга), лифт ўрнатувчисига (ёки унинг ваколатли хизмат кўрсатувчисига) ва мулкдорга тақдим қилинган санадан бошлаб ўттиз кун ўтганидан сўнг ихтисослашган ташкилот томонидан ўтказилади.
86. Қизил ёки сариқ ёрлиқли лифтда назорат кўригини ўтказишда мулкдорнинг (бино учун масъул шахснинг) назорат кўригини ўтказиш юзасидан келиб тушган мурожаати устувор ҳисобланади.
87. Қизил ёки сариқ ёрлиқ бириктирилган лифтда назорат кўриги ўтказилган тақдирда, айни лифтда охирги даврий техник кўрикни ўтказган техник инспектор томонидан ушбу назорат кўриги амалга оширилиши лозим.
88. Техник кўрик натижасида расмийлаштирилган номувофиқликлар бартараф қилинганини текшириш мақсадидаги назорат кўриги лифтга техник хизмат кўрсатишни таъминловчи субъект иштирокида ўтказилиши шарт.
89. Ихтисослашган ташкилот даврий техник кўрик натижаси бўйича ҳисоботни манфаатдор томонларга тақдим этган сана асосида назорат кўригини ўтказиш санасини белгилайди.
90. Назорат кўриги натижалари бўйича ҳисобот ушбу Низомнинг 67-банди талабларига мувофиқ расмийлаштирилади.
8-боб. Лифтларни техник кўрикдан ўтказиш натижаларини юритиш тартиби
91. Ихтисослашган ташкилот даврий техник кўрик натижаларини ваколатли органнинг махсус электрон ахборот тизимига киритиб бориши шарт.
92. Ихтисослашган ташкилот ўзи томонидан техник кўрикдан ўтказилган ҳар бир лифтга тегишли барча маълумотларни, техник кўрик натижаси бўйича ҳисобот тасдиқланган санада махсус электрон ахборот тизимига киритилишини таъминлаши лозим.
93. Ихтисослашган ташкилотнинг ушбу Низомнинг 92-бандида назарда тутилган маълумотлар базаси ваколатли органнинг махсус электрон ахборот тизими билан узлуксиз маълумот алмашинувини таъминлаши, узатилган маълумотларга ўзгартиришлар киритилишига йўл қўймаслиги керак.
94. Ихтисослашган ташкилот лифтда даврий техник кўрик ўтказиши учун мулкдор (бино учун масъул шахс) тарафидан зарур шароит яратилмаган (рухсат берилмаган), ўрнатувчи (ёки унинг ваколатли хизмат кўрсатувчиси) томонидан техник кўрик жараёни назорат қилинмаган ёки ушбу Низомнинг 64-бандида назарда тутилган ҳолат кузатилган тақдирда, мазкур Низомга 7-иловага мувофиқ Лифтларни техник кўрикдан ўтказишга шароит яратиб бермагани тўғрисида хабарнома шакли бўйича тегишли маълумотларни ваколатли органнинг махсус электрон ахборот тизимига киритиши шарт.
95. Ихтисослашган ташкилот амалга оширган техник кўриклари юзасидан ҳар чорак якуни бўйича йиғма ахборотни, кейинги ҳисобот даври биринчи ойининг 5-санасигача электрон шаклда ушбу Низомга 8-иловада келтирилган Лифтни даврий техник кўрикдан ўтказиш натижалари ҳисоботи шаклида ваколатли органга тақдим қилиши лозим.
9-боб. Якунловчи қоидалар
96. Ваколатли орган масъул орган билан ҳамкорликда ихтисослашган ташкилот ушбу Низомда ўрнатилган талабларга мувофиқ фаолият кўрсатиши устидан назорат тадбирларини ўтказишга ҳақли.
97. Техник кўрик ўтказиш жараёнини бевосита кузатиш, техник кўрик ўтказилган лифтни кўздан кечириш орқали ваколатли орган ушбу Низом талабларига риоя қилиш ҳолатларини баҳолаши шарт.
98. Низом талабларининг бузилиш ҳолатлари кузатилганда ваколатли орган ихтисослашган ташкилотга, мулкдорга, лифт ўрнатувчисига (ёки унинг ваколатли хизмат кўрсатувчисига) нисбатан қонунчиликда белгиланган тартибда тегишли таъсир чораларини қўллаши мумкин.
99. Агар ваколатли орган томонидан ихтисослашган ташкилот фаолиятида аккредитация талаблари ва шартлари бузилиши ҳолатлари аниқланганда, тегишли маълумотларни уч кун ичида аккредитация органига тақдим қилиши шарт.
Лифтларни техник кўрикдан ўтказиш тартиби тўғрисидаги низомга 1-ИЛОВА
Лифтларни техник кўрикдан ўтказиш
Босқичлар Субъектлар Тадбирлар Ижро муддати 1-босқич Қурилиш ва уй-жой коммунал хўжалиги вазирлиги (Масъул орган) Кўп квартирали уй-жойларда ўрнатилган лифтлар назоратини амалга оширади. Доимий 2-босқич Саноат, радиация ва ядро хавфсизлиги қўмитаси (Ваколатли орган) Кўп квартирали уй-жойлардан ташқари бўлган биноларда ўрнатилган лифтлар назоратини амалга оширади. Доимий 3-босқич Масъул орган Ихтисослашган ташкилотнинг (лифтларни техник кўрикдан ўтказиш фаолияти билан шуғулланувчи сифатида ISO/IEC 17020 стандартига мувофиқ «А» турдаги инспекция идораси мақомида Миллий аккредитация тизимида аккредитациядан ўтган юридик шахс) лифтларни техник кўрикдан ўтказиш бўйича белгиланган талабларга (стандартларга) мувофиқ фаолият олиб бориш имкониятини баҳолаш режа-дастурини ишлаб чиқади. Ҳар йили 4-босқич Масъул орган Ихтисослашган ташкилотни танлаб олади, келишув имзолайди ва жамоатчиликка эълон қилади. Доимий 5-босқич Лифт жойлашган бино эгаси (Мулкдор) Лифтни техник кўрикдан ўтказиш учун Ихтисослашган ташкилотга мурожаат қилади. Ҳар 12 ойда 6-босқич Ихтисослашган ташкилот Лифтни техник кўрикдан ўтказади. Мурожаатга асосан 7-босқич Ихтисослашган ташкилот Техник кўрик натижалари бўйича лифтни тўрт тоифада баҳолайди: «яроқли» лифт учун — яшил ёрлиқ ёпиштиради ва ишлатишга рухсат беради; Доимий «қисман носоз» лифт учун — мовий ёрлиқ ёпиштиради, кейинги техник кўриккача бартараф этиш шарти билан ишлатишга рухсат беради; Доимий «носоз» лифт учун — сариқ ёрлиқ ёпиштиради, бартараф қилиш шарти билан ишлатишга рухсат беради; 30 кунга «фойдаланиш учун хавфли» лифт учун — қизил ёрлиқ ёпиштиради, ишлатилишини тақиқлайди ва электр таъминотидан узади. 60 кунга 8-босқич Мулкдор Лифт техник кўригида аниқланган камчиликларни бартараф қилади. Белгиланган муддатларда 9-босқич Ихтисослашган ташкилот Камчиликлар бартараф этилгани бўйича назорат кўригини ўтказади. Доимий 10-босқич Ихтисослашган ташкилот Амалга оширган техник кўриклари юзасидан йиғма ахборот ва ҳисоботларни ваколатли органга тақдим қилиб боради. Ҳар чорак якуни бўйича 11-босқич Ваколатли орган, Масъул орган Ихтисослашган ташкилотларнинг белгиланган талабларга мувофиқ фаолият кўрсатиши устидан назорат тадбирларини ўтказади. Доимий
Лифтларни техник кўрикдан ўтказиш тартиби тўғрисидаги низомга 2-ИЛОВА
Лифт идентификация рақами шакли
Лифтларни техник кўрикдан ўтказиш тартиби тўғрисидаги низомга 3-ИЛОВА
Лифт техник кўрикдан ўтказилгани тўғрисидаги маълумот ёрлиғи намунаси
Фойдаланишга яроқли лифт учун «яшил» ёрлиқ ИХТИСОСЛАШГАН ТАШКИЛОТ НОМИ ВА МАНЗИЛИ ВАКОЛАТЛИ ОРГАН ТОМОНИДАН БЕРИЛГАН РЎЙХАТ РАҚАМИ ЛИФТ ИДЕНТИФИКАЦИЯ РАҚАМИ: ЛИФТ ТЕХНИК КЎРИКДАН ЎТКАЗИЛГАН САНА: ЛИФТ ФОЙДАЛАНИШГА ЯРОҚЛИ КЕЙИНГИ ТЕХНИК КЎРИК ЎТКАЗИШ САНАСИ: ОГОҲЛАНТИРИШ! ҲАР ОЙЛИК НАЗОРАТ ВА КЕЙИНГИ ДАВРИЙ ТЕХНИК КЎРИК БЕЛГИЛАНГАН МУДДАТЛАРДА ЎТКАЗИЛИШИ ШАРТ. Қисман носоз лифт учун «мовий» ёрлиқ ИХТИСОСЛАШГАН ТАШКИЛОТ НОМИ ВА МАНЗИЛИ ВАКОЛАТЛИ ОРГАН ТОМОНИДАН БЕРИЛГАН РЎЙХАТ РАҚАМИ ЛИФТ ИДЕНТИФИКАЦИЯ РАҚАМИ: ЛИФТ ТЕХНИК КЎРИКДАН ЎТКАЗИЛГАН САНА: ЛИФТДАН ФОЙДАЛАНИШДА ДИҚҚАТЛИ БЎЛИШ ЛОЗИМ (ҚИСМАН НОСОЗ) ТУЗАТИШ МУДДАТИ: 12 ОЙ КЕЙИНГИ ТЕХНИК КЎРИК ЎТКАЗИШ САНАСИ: ОГОҲЛАНТИРИШ! ЛИФТДА АНИҚЛАНГАН НОМУВОФИҚЛИКЛАР КЕЙИНГИ ДАВРИЙ ТЕКШИРУВГА ҚАДАР БАРТАРАФ ҚИЛИНИШИ ШАРТ. Носоз лифт учун «сариқ» ёрлиқ ИХТИСОСЛАШГАН ТАШКИЛОТ НОМИ ВА МАНЗИЛИ ВАКОЛАТЛИ ОРГАН ТОМОНИДАН БЕРИЛГАН РЎЙХАТ РАҚАМИ ЛИФТ ИДЕНТИФИКАЦИЯ РАҚАМИ: ЛИФТ ТЕХНИК КЎРИКДАН ЎТКАЗИЛГАН САНА: ЛИФТДАН ФОЙДАЛАНИШДА ХАВФ МАВЖУД (НОСОЗ) ТУЗАТИШ МУДДАТИ: 30 КУН КЕЙИНГИ ДАВРИЙ ТЕХНИК КЎРИК ЎТКАЗИШ САНАСИ: ОГОҲЛАНТИРИШ! ЛИФТДА АНИҚЛАНГАН НОМУВОФИҚЛИКЛАР 30 КУН ИЧИДА БАРТАРАФ ҚИЛИНИШИ КЕРАК. УШБУ ДАВРДА НОМУВОФИҚЛИК ТУЗАТИЛМАГАН ТАҚДИРДА ЛИФТДАН ФОЙДАЛАНИШ ТАҚИҚЛАНАДИ. Фойдаланиш учун хавфли лифт учун «қизил» ёрлиқ ИХТИСОСЛАШГАН ТАШКИЛОТ НОМИ ВА МАНЗИЛИ ВАКОЛАТЛИ ОРГАН ТОМОНИДАН БЕРИЛГАН РЎЙХАТ РАҚАМИ ЛИФТ ИДЕНТИФИКАЦИЯ РАҚАМИ: ЛИФТ ТЕХНИКДАН КЎРИК ЎТКАЗИЛГАН САНА: ЛИФТ ФОЙДАЛАНИШ УЧУН ХАВФЛИ ТУЗАТИШ МУДДАТИ: 60 КУН КЕЙИНГИ ТЕХНИК КЎРИКДАН ЎТКАЗИШ САНАСИ: ОГОҲЛАНТИРИШ! ЛИФТДА АНИҚЛАНГАН НОМУВОФИҚЛИКЛАР 60 КУН ИЧИДА БАРТАРАФ ҚИЛИНИШИ КЕРАК. УШБУ ДАВРДА НОМУВОФИҚЛИК ТУЗАТИЛМАГАН ТАҚДИРДА ЛИФТДАН ФОЙДАЛАНИШ ТАҚИҚЛАНАДИ.
Лифтларни техник кўрикдан ўтказиш тартиби тўғрисидаги низомга 4-ИЛОВА
Лифтни техник кўрикдан ўтказиш ҳисоботи шакли
ЛИФТНИ ТЕХНИК КЎРИКДАН ЎТКАЗИШ ҲИСОБОТИ ИХТИСОСЛАШГАН ТАШКИЛОТНИНГ НОМИ, МАНЗИЛИ ВА РУХСАТНОМА РАҚАМИ МАСЪУЛ ОРГАН НОМИ ЛИФТ ИДЕНТИФИКАЦИЯ РАҚАМИ ҲИСОБОТ № / ТАКРОРИЙ ҲИСОБОТ № ТЕХНИК КЎРИК САНАСИ ЛИФТ ҲАҚИДА МАЪЛУМОТ РЎЙХАТ РАҚАМИ РЎЙХАТДАН ЎТКАЗИЛГАН САНАСИ МИЛЛИЙ МУВОФИҚЛИК БЕЛГИСИ СТАНДАРТ/СТАНДАРТЛАР ЛИФТ ТУРИ ЭЛЕКТР ГИДРАВЛИК ЛИФТНИНГ СЕРИЯ РАҚАМИ БЕЛГИЛАНГАН КЎТАРИШ ҚОБИЛИЯТИ (kg) ҚАВАТЛАР СОНИ БЕЛГИЛАНГАН ҲАРАКАТЛАНИШ ТЕЗЛИГИ (m/s) МАНЗИЛИ БИНО (ИНШООТ) ЭГАСИ ҲАҚИДА МАЪЛУМОТ Ф.И.О. МАНЗИЛИ ТЕЛЕФОН РАҚАМИ ТЕХНИК ХИЗМАТ КЎРСАТУВЧИ ТАШКИЛОТ ҲАҚИДА МАЪЛУМОТ ТАШКИЛОТ НОМИ МАНЗИЛИ ТЕЛЕФОН РАҚАМИ ТАШКИЛОТ ХОДИМЛАРИ БАЖАРАДИГАН ВАЗИФАСИ ТАЪМИНОТ КОРХОНАСИ ВА ТЕХНИК ХИЗМАТ КЎРСАТИШ БИЛАН БОҒЛИҚ ҲУЖЖАТЛАР ДЕКЛАРАЦИЯ ШАРТНОМАНИНГ САНАСИ ВА МУДДАТИ МУВОФИҚЛИК БЕЛГИСИ РАҚАМИ ДАВРИЙ ТЕХНИК КЎРИК НАТИЖАСИ ДАВРИЙ КЎРИК БАҲОСИ БАЖАРИШ САНАСИ ФОЙДАЛАНИШГА ЯРОҚЛИ ЙЎҚ ҚИСМАН НОСОЗ 12 ОЙ НОСОЗ 30 КУН ХАВФЛИ 60 КУН ЛИФТДА АНИҚЛАНГАН КАМЧИЛИКЛАР 1 7 2 8 3 9 4 10 5 11 6 12 ТАВСИФЛАР ҲИСОБОТНИ ТАСДИҚЛАШ САНАСИ ТЕХНИК КЎРИК ХОДИМЛАРИ ТЕХНИК КЎРИК УЧУН МАСЪУЛ ШАХСНИНГ Ф.И.О. ВА ИМЗОСИ ТЕХНИК КЎРИКДАН ЎТКАЗУВЧИ ХОДИМ(ЛАР) Ф.И.О. ВА ИМЗОСИ ИХТИСОСЛАШГАН ТАШКИЛОТНИНГ АЛОҚА МАЪЛУМОТЛАРИ, ТЕЛЕФОН РАҚАМИ ВА ЭЛЕКТРОН ПОЧТА МАНЗИЛИ:
Лифтларни техник кўрикдан ўтказиш тартиби тўғрисидаги низомга 5-ИЛОВА
Хавфли лифтни электр таъминотидан узиш ва муҳрлаш далолатномаси шакли
Лифт идентификация рақами Вилоят номи Туман номи Лифт ўрнатилган бино манзили Бино учун масъул шахс (мулкдор) Далолатнома тузилган сана Далолатнома тузилишига асос Далолатномани тузувчилар Ваколатли назорат органи масъул ходимининг исми, фамилияси, имзоси Бино учун масъул шахснинг/мулкдорнинг исми, фамилияси, имзоси
Лифтларни техник кўрикдан ўтказиш тартиби тўғрисидаги низомга 6-ИЛОВА
Электр таъминотига улаш ва муҳрни ечиш далолатномаси шакли
Лифт идентификация рақами Вилоят номи Туман номи Лифт ўрнатилган бино манзили Бино учун масъул шахс (мулкдор) Далолатнома тузилган сана Далолатнома тузилишига асос Далолатномани тузувчилар Ваколатли назорат органи масъул ходимининг исми, фамилияси, имзоси Бино учун масъул шахснинг/мулкдорнинг исми, фамилияси, имзоси
Лифтларни техник кўрикдан ўтказиш тартиби тўғрисидаги низомга 7-ИЛОВА
Лифтларни техник кўрикдан ўтказишга шароит яратиб бермагани тўғрисида хабарнома шакли
ХАБАРНОМА Ихтисослашган ташкилот номи ва манзили Вилоят номи Туман номи Манзили Лифт идентификация рақами Бино номи Хабарнома санаси Хабарнома сабаблари Имзо Техник инспектор
Лифтларни техник кўрикдан ўтказиш тартиби тўғрисидаги низомга 8-ИЛОВА
Лифтни даврий техник кўрикдан ўтказиш натижалари ҳисоботи шакли
ЛИФТНИ ДАВРИЙ ТЕХНИК КЎРИКДАН ЎТКАЗИШ НАТИЖАЛАРИ БУЮРТМА РАҚАМИ ИХТИСОСЛАШГАН ТАШКИЛОТНИНГ НОМИ МАСЪУЛ ОРГАН БИЛАН ТУЗИЛГАН ШАРТНОМА ТАФСИЛОТЛАРИ ХОДИМЛАР СОНИ ҚАБУЛ ҚИЛИНГАН САНАГА КЎРА ЛИФТЛАР СОНИ (ДОНА) ДАВРИЙ ТЕХНИК КЎРИК НАТИЖАСИГА КЎРА ЛИФТ ЁРЛИҒИ (ДОНА) ТАШКИЛОТ НОМИ ШАРТНОМАНИНГ ДАВОМИЙЛИГИ ДАВРИЙ ТЕХНИК КЎРИК ТЎЛОВИ ИНСПЕКЦИЯ ХОДИМЛАРИ ТЕХНИК МЕНЕЖЕР ЭЛЕКТР ЛИФТ ГИДРАВЛИК ЛИФТ БИНО (КВАРТИРА) ЖАМОАТ БИНОСИ ТУРАР ЖОЙ (МУСТАҚИЛ) МАЪМУРИЙ БИНО БОШҚАЛАР ЯШИЛ ЁРЛИҚ МОВИЙ ЁРЛИҚ САРИҚ ЁРЛИҚ ҚИЗИЛ ЁРЛИҚ ЖАМИ
Ўзбекистон Республикасининг Бош вазири А. АРИПОВ
Тошкент ш.,
2025 йил 12 июль,
431-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
Liftlarni texnik koʻrikdan oʻtkazish tartibi toʻgʻrisidagi nizomni tasdiqlash haqida
Respublika aholisining liftlardan foydalanishda xavfsizligini taʼminlash hamda barcha toifadagi liftlarning texnik soz holatda saqlanishi ustidan doimiy nazorat qilish tizimini amaliyotga joriy etish maqsadida Vazirlar Mahkamasi qaror qiladi:
1. Quyidagilarni nazarda tutuvchi Liftlarni texnik koʻrikdan oʻtkazish tartibi toʻgʻrisidagi nizom (keyingi oʻrinlarda — Nizom) ilovaga muvofiq tasdiqlansin va 2026-yil 1-iyuldan boshlab amalga kiritilsin:
akkreditatsiya qilingan va tegishli ruxsatnomaga ega boʻlgan ixtisoslashgan tashkilotlar tomonidan liftlarni texnik koʻrikdan oʻtkazish tartibi;
liftlarni texnik koʻrikdan oʻtkazuvchi ixtisoslashgan tashkilotlarga qoʻyiladigan talablar;
liftlarni texnik koʻrikdan oʻtkazuvchi mutaxassis xodimlar toifasi va ularga nisbatan qoʻyiladigan malaka talablari.
2. Qurilish va uy-joy kommunal xoʻjaligi vazirligi:
Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi, Oʻzbekiston texnik jihatdan tartibga solish agentligi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda 2025-yil yakuniga qadar respublikadagi mavjud liftlarni xatlovdan oʻtkazsin;
manfaatdor vazirliklar va idoralar bilan birgalikda ikki oy muddatda Nizom va Lift va lift xavfsizlik qurilmalarining xavfsizligi toʻgʻrisidagi texnik reglament talablaridan kelib chiqib, Liftlardan xavfsiz foydalanish va texnik xizmat koʻrsatish tartibini ishlab chiqsin va tasdiqlash uchun Vazirlar Mahkamasiga kiritsin;
Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi, Oʻzbekiston texnik jihatdan tartibga solish agentligi, Oʻzbekiston Milliy teleradiokompaniyasi bilan birgalikda ushbu qarorning maqsadi, mazmuni va uni qoʻllash tartibi toʻgʻrisida aholi, vazirliklar, idoralar va boshqa tashkilotlar hamda tadbirkorlik subyektlarining keng xabardor qilinishini taʼminlasin.
3. Ushbu qarorning bajarilishini nazorat qilish Oʻzbekiston Respublikasi qurilish va uy-joy kommunal xoʻjaligi vaziri Sh.S. Xidoyatov, Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi raisi A.V. Rafikov hamda Oʻzbekiston texnik jihatdan tartibga solish agentligi direktori A.R. Jumanazarov zimmasiga yuklansin.
Vazirlar Mahkamasining 2025-yil 12-iyuldagi 431-son qaroriga ILOVA
Liftlarni texnik koʻrikdan oʻtkazish tartibi toʻgʻrisida
1-bob. Umumiy qoidalar
1. Ushbu Nizom respublika hududida foydalanishda boʻlgan liftlarni ixtisoslashgan tashkilotlar tomonidan majburiy texnik koʻrikdan oʻtkazish tartibini belgilaydi.
2. Ushbu Nizomda quyidagi asosiy tushunchalar qoʻllanadi:
bino va inshootga javobgar — mulkdor tomonidan tayinlanadigan liftdan xavfsiz foydalanishni taʼminlash uchun liftga muntazam texnik xizmat koʻrsatish, davriy nazoratdan oʻtkazilishi va taʼmirlanishi uchun masʼul boʻlgan shaxs;
vakolatli organ — Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi;
davriy texnik koʻrik — liftlardan xavfsiz foydalanishni taʼminlash va ularning ishlash holatini baholash maqsadida oʻtkaziladigan sinovlar, inspeksiya qilish va boshqa choralar majmui;
dastlabki texnik koʻrik — oʻrnatilgan lift roʻyxatga olinishidan avval birinchi marta oʻtkaziladigan sinovlar, inspeksiya va boshqa choralar majmui;
ixtisoslashgan tashkilot — liftlarni texnik koʻrikdan oʻtkazish faoliyati bilan shugʻullanuvchi sifatida ISO/IEC 17020 standartiga muvofiq “A” turdagi inspeksiya idorasi maqomida Milliy akkreditatsiya tizimida akkreditatsiyadan oʻtgan va tegishli ruxsatnomaga ega boʻlgan yuridik shaxs;
kasbiy malaka sertifikati — oʻquv muassasalari tomonidan rasmiylashtiriladigan, shaxsning bilim, koʻnikma va malakalarini ifodalovchi hujjat;
lift pudratchisi — lift oʻrnatiladigan bino yoki inshootning qurilish ishlarini oʻz nomidan amalga oshiradigan shaxs;
masʼul organ — koʻp kvartirali uy-joylarda oʻrnatilgan liftlar nazoratini amalga oshiruvchi Oʻzbekiston Respublikasi Qurilish va uy-joy kommunal xoʻjaligi vazirligi;
mulkdor — lift joylashgan bino (inshoot, shu jumladan, lift) yoki uning bir qismining egasi (egalari), koʻp kvartirali uyda umumiy ulushli mulk huquqiga ega boʻlgan xonadonlar mulkdorlari;
nazorat koʻrigi — texnik koʻrik natijasida aniqlangan nomuvofiqliklarning bartaraf etilgani ixtisoslashgan tashkilot tomonidan tekshirilishi;
texnik muhandis — lift sinovi natijasi boʻyicha xulosa qabul qilish vakolati berilgan shaxs;
texnik inspektor — texnik koʻrik oʻtkazuvchi mutaxassis;
xavfsizlik boʻyicha standart — odamlarni va (yoki) yuklarni koʻtarish yoki tushirishda foydalanilayotgan liftlarning xavfsizligini taʼminlash qoidalarini belgilovchi standart.
3. Liftlarni texnik koʻrikdan oʻtkazishni tashkil qiluvchi, oʻtkazuvchi va bevosita jarayonda ishtirok etuvchilar ishlarni Oʻzbekiston Respublikasining “Mehnatni muhofaza qilish toʻgʻrisida”gi Qonuni talablari va boshqa oʻrnatilgan mehnat xavfsizligi qoidalariga muvofiq tashkil etilishiga javobgardir.
4. Ixtisoslashgan tashkilotlarning faoliyati ushbu Nizomga muvofiq vakolatli organ tomonidan nazorat qilib boriladi. Vakolatli organ zarur hollarda nazorat jarayoniga boshqa idoralarning vakillarini jalb etishi mumkin.
5. Mulkdor oʻziga tegishli boʻlgan binoda va (yoki) inshootda oʻrnatilgan liftning har oʻn ikki oyda kamida bir marta texnik koʻrikdan oʻtkazilishini taʼminlashi shart.
6. Liftlarni texnik koʻrikdan oʻtkazish ushbu Nizomga 1-ilovada keltirilgan Liftlarni texnik koʻrikdan oʻtkazish sxemasiga asosan amalga oshiriladi.
2-bob. Liftlarni texnik koʻrikdan oʻtkazish tartibi
7. Bino va inshootlarda oʻrnatilgan, doimiy ravishda foydalanishda boʻlgan liftlar oʻn ikki oydan oshmagan holda kamida bir marta ixtisoslashgan tashkilot tomonidan ushbu Nizomda nazarda tutilgan tartibda majburiy davriy texnik koʻrikdan oʻtkaziladi.
8. Masʼul organ liftlarni texnik koʻrikdan oʻtkazish uchun ixtisoslashgan tashkilotlardan birini jalb qiladi.
9. Masʼul organ yillik reja-dastur tuzishdan avval ushbu Nizomda nazarda tutilgan ixtisoslashgan tashkilotning liftlarni texnik koʻrikdan oʻtkazish boʻyicha belgilangan talablarga muvofiq faoliyat olib borish imkoniyatini baholab olishi mumkin.
10. Masʼul organ ixtisoslashgan tashkilotning liftlarni texnik koʻrikdan oʻtkazish boʻyicha belgilangan talablarga muvofiq faoliyat olib borish imkoniyatini baholashda uning akkreditatsiya sohasi, texnik koʻrik oʻtkazish faoliyati natijasida yuzaga keluvchi moliyaviy javobgarlikni sugʻurtalashning koʻlami, zarur xodimlar va resurslar mavjudligini inobatga olishi shart.
11. Baholash natijalariga koʻra masʼul organ tomonidan tanlab olingan va kelishuv tuzilgan ixtisoslashgan tashkilot toʻgʻrisidagi maʼlumot jamoatchilikka va lift mulkdoriga eʼlon qilinadi.
12. Masʼul organ ushbu Nizom qoidalariga muvofiq ixtisoslashgan tashkilot bilan tomonlarning vakolatlari va majburiyatlarini belgilaydigan kelishuv imzolaydi. Agar tomonlarning biri ushbu muddat ichida kelishuvni bekor qilsa, ikkinchi tomonni bekor qilish sanasidan kamida oʻn besh ish kuni avval yozma ravishda xabardor qilishi shart.
13. Agar masʼul organ kelishuv muddati tugashi munosabati bilan boshqa ixtisoslashgan tashkilot bilan kelishuv imzolagan taqdirda, ushbu kelishuv tuzilishidan avval oʻtkazilgan texnik koʻrik natijalari boʻyicha nazorat koʻrigini oʻtkazish talab qilinsa, kelishuv muddati tugallanishiga qaramasdan bunday nazorat koʻrigini oʻtkazishni kelishuv muddati tugagan ixtisoslashgan tashkilot zimmasida qoldirishi shart.
14. Agar vakolatli organ ixtisoslashgan tashkilotning tegishli ruxsatnomasini belgilangan tartibda bekor qilsa, masʼul organ bilan kelishuv tuzgan boshqa ixtisoslashgan tashkilot tomonidan nazorat koʻrigi oʻtkazilishini taʼminlaydi.
15. Nazorat koʻrigi uchun alohida toʻlov olish shartlari, toʻlov miqdoriga oid talablar masʼul organ bilan ixtisoslashgan tashkilot oʻrtasidagi kelishuvda belgilanadi.
Bunda mulkdor va (yoki) oʻrnatuvchi yoki uning vakolatli xizmat koʻrsatuvchisi oʻz majburiyatlarini bajarmagani oqibatida ikkinchi va undan keyingi nazorat koʻrigini oʻtkazishi uchun ixtisoslashgan tashkilotga qoʻshimcha toʻlov shartlari, toʻlov miqdori va boshqa masalalar masʼul organ bilan ixtisoslashgan tashkilot oʻrtasidagi kelishuvda aniq belgilanishi lozim.
16. Agar masʼul organ muayyan hududda ixtisoslashgan tashkilot bilan liftlarni davriy texnik koʻrikdan oʻtkazish yuzasidan kelishuvga erishmasa yoxud bunday kelishuv tuzmagan boʻlsa, vakolatli organ masʼul organga nisbatan tegishli choralarni koʻrishi shart.
Bunda vakolatli organ mazkur hududga eng yaqin joyda texnik koʻrikdan oʻtkazish xizmatini koʻrsatuvchi hamda ish koʻlami uchun yetarli asbob-uskuna va malakali xodimlarga ega ixtisoslashgan tashkilotning jalb qilinishini va u bilan kelishuv tuzilishini taʼminlaydi.
17. Ixtisoslashgan tashkilotning ruxsatnomasi toʻxtatib turilgan boʻlsa, masʼul organ texnik koʻrik oʻtkazish masalasida boshqa ixtisoslashgan tashkilot bilan vaqtincha kelishuv tuzishi lozim.
Bunday holda masʼul organning boshqa ixtisoslashgan tashkilot bilan tuzadigan vaqtincha kelishuvining amal qilish muddati asosiy ixtisoslashgan tashkilotning ruxsatnomasini toʻxtatib turish muddatidan kam boʻlmasligi lozim.
18. Agar masʼul organ vaqtincha kelishuvga erishmasa yoxud bunday kelishuv tuzmagan boʻlsa, vakolatli organ ushbu Nizomning 16-bandida nazarda tutilgan tartibda ish koʻrishi lozim.
19. Ushbu Nizomda belgilangan tartibga muvofiq ixtisoslashgan tashkilot liftlarni majburiy texnik koʻrikdan oʻtkazish faoliyati bilan shugʻullanishi mumkin.
20. Ixtisoslashgan tashkilot ushbu Nizomda va boshqa tegishli qonunchilik hujjatlarida belgilangan talablarga rioya qilishi shart.
21. Ixtisoslashgan tashkilot Milliy akkreditatsiya tizimida akkreditatsiya qilinganlik maqomining uzluksizligini taʼminlashi, butun roʻyxatga olingan davr mobaynida moliyaviy javobgarliklari kafolatlangan (sugʻurtalangan va boshqa usullar) boʻlishi, liftlarni texnik koʻrikdan oʻtkazish uchun malakali mutaxassislarga va zaruriy asbob-uskunalarga ega boʻlishi shart.
22. Ixtisoslashgan tashkilot oʻzining faoliyatida mehnatni muhofaza qilish talablariga rioya etilishini taʼminlashi, ularning bajarilishi ustidan nazorat qilish choralarini koʻrishi shart.
23. Agar ruxsatnoma olgan ixtisoslashgan tashkilot Lift va lift qurilmalarining xavfsizligi toʻgʻrisidagi texnik reglament (keyingi oʻrinlarda — Texnik reglament) doirasida muvofiqlikni baholash faoliyati bilan ham shugʻullansa, manfaatlar toʻqnashuvining oldini olish uchun muvofiqlikni baholash jarayonida ishtirok etgan xodimning ayni liftni texnik koʻrikdan oʻtkazish jarayonida ishtirok etishiga yoʻl qoʻymasligi lozim.
24. Ixtisoslashgan tashkilot qonunchilik hujjatlari talablariga, texnik koʻrikdan oʻtkazish turiga va akkreditatsiya sohasida belgilangan standartlarga asosan ish faoliyatini tashkil etishi shart.
25. Ixtisoslashgan tashkilot masʼul organ vakolatlari doirasiga kiruvchi liftlarni texnik koʻrikdan oʻtkazishda u bilan kelishilgan yillik reja-dastur doirasida faoliyat olib borishi lozim.
26. Ixtisoslashgan tashkilot mehnat qonunchiligiga muvofiq mehnat xavfsizligi boʻyicha chora-tadbirlarni amalga oshirish uchun oʻz faoliyati doirasida mehnatni muhofaza qilish boʻyicha mutaxassisga ega boʻlishi shart.
27. Ixtisoslashgan tashkilotlar vakillari liftlarni texnik koʻrikdan oʻtkazish amaliyotining yaxlit tizimini taʼminlash, yuzaga kelgan muammolarni baholash va zarur hamkorlikni oʻrnatish maqsadida, vakolatli organ tomonidan oʻtkaziladigan muvofiqlashtirish yigʻilishlarida qatnashishi lozim.
28. Ixtisoslashgan tashkilot har bir texnik inspektorini texnik koʻrikdan oʻtkazish jarayonida foydalanishi uchun kalibrlashdan oʻtgan kamida quyidagi oʻlchash vositalari hamda shaxsiy himoya vositalari bilan taʼminlashi lozim:
lyuksmetr;
taxometr;
multimetr (elektr toki parametrlarini oʻlchaydigan qurilma);
uzunlikni oʻlchash vositasi (ruletka);
dinamometr (kuchni oʻlchash uchun qurilma);
shtangensirkul;
past kuchlanishli detektor (ac/dc detector) va fonar (tizimda tok bor yoʻqligini aniqlaydigan qurilma);
maxsus elektron axborot tizimi bilan bogʻlanish va maʼlumot uzatish imkoniyatiga ega boʻlgan planshet yoki ushbu funksiyalarga ega oʻxshash mobil elektron vositasi.
3-bob. Ixtisoslashgan tashkilotning xodimlariga qoʻyiladigan talablar
29. Ixtisoslashgan tashkilot liftlarni texnik koʻrikdan oʻtkazish faoliyati bilan shugʻullanishi uchun liftlarni sinovdan oʻtkazish boʻyicha bilim va malakaga ega texnik muhandis, texnik inspektor hamda zaruriy asbob-uskuna, texnik vositalarga ega boʻlishi shart.
30. Ixtisoslashgan tashkilotda kamida bir nafar texnik muhandis va ikki nafar texnik inspektor vakolatli organ tomonidan ruxsatnoma olingan muddat davomida faoliyat olib borishi lozim.
31. Ixtisoslashgan tashkilot tomonidan mehnat shartnomasi bekor qilingan xodim oʻrniga yangi xodim qabul qilinmagunga qadar uning faoliyat yuritishiga yoʻl qoʻyilmaydi. Yangi xodim ishga qabul qilingan taqdirda, akkreditatsiya organini va vakolatli organni uch kun ichida xabardor qilishi, bunda yangi ishga qabul qilingan xodimning bilim va malakasi hamda ushbu Nizom bilan xodimga qoʻyiladigan talablar bajarilganiga oid tasdiqlovchi hujjatlarni taqdim etishi lozim.
32. Ixtisoslashgan tashkilot bir nafar texnik inspektor bilan toʻliq ish kuni davomida quyidagilardan birini:
eng koʻpi bilan ikkita liftda dastlabki texnik koʻrikni;
eng koʻpi bilan beshta liftda davriy texnik koʻrikni;
eng koʻpi bilan oʻnta liftda nazorat koʻrigini oʻtkazishi mumkin.
33. Texnik muhandis mashinasozlik, mexanika, elektr, elektronika sohalaridan birida kamida uch yillik sohaga doir va (yoki) inspeksiya oʻtkazish boʻyicha kasbiy malakaga ega, texnik koʻrikni belgilangan talablarga muvofiq oʻtkazilishini taʼminlashda umumiy javobgarlikni olgan, ixtisoslashgan tashkilotning shtat birligidagi xodim boʻlishi shart.
34. Texnik inspektor mashinasozlik, mexanika, elektr, elektronika sohalaridan birida sohaga doir va inspeksiya oʻtkazish boʻyicha kasbiy malakaga ega ixtisoslashgan tashkilotning shtat birligidagi xodim boʻlishi shart.
Texnik inspektor mustaqil holda liftlarni texnik koʻrikdan oʻtkazishi uchun kamida 50 ta liftning texnik koʻrigida shogird sifatida ishtirok etgan boʻlishi kerak. Bu kabi ishtiroklar amalga oshirilganligini tasdiqlovchi yozuvlar ixtisoslashgan tashkilot tomonidan alohida jurnalda va elektron shaklda qayd qilib boriladi.
35. Ixtisoslashgan tashkilot rahbariyati, maʼmuriy boshqaruv vazifasini bajaruvchi xodimlari texnik muhandis va (yoki) texnik inspektor sifatida tayinlanishi va (yoki) ularga bunday vazifaning yuklanishiga yoʻl qoʻyilmaydi.
36. Ixtisoslashgan tashkilotning texnik muhandisi yoki texnik inspektori sifatida ishga qabul qilingan xodim bir vaqtning oʻzida boshqa ixtisoslashgan tashkilotda ayni shu kasbda mehnat faoliyatini olib borishiga ruxsat etilmaydi.
37. Liftlarni texnik koʻrik oʻtkazish jarayoniga bevosita ixtisoslashgan tashkilotning jalb qilinadigan xodimlari liftlarni sinovdan oʻtkazish boʻyicha kasbiy malaka sertifikatiga ega boʻlishi shart. Xodimlarning qayta malaka sertifikatlashdan oʻtishlari har uch yilda amalga oshirilishi lozim.
38. Ushbu Nizomda belgilangan meʼyorga asosan texnik koʻrikdan oʻtkaziladigan liftlarning sonidan kelib chiqqan holda, ixtisoslashgan tashkilot resurslar bilan taʼminlangan boʻlishi, shu jumladan, texnik muhandislar va texnik inspektorlarni texnik koʻrikdan oʻtkazish ishlariga tayinlashlari shart.
39. Ixtisoslashgan tashkilot tomonidan liftlarni texnik koʻrikdan oʻtkazishda ishtirok etuvchi xodimlarini aniqlash va tegishli ishlarni bajarish jarayonlarida tizimli monitoringni taʼminlash maqsadida, ushbu xodimlar uchun xos identifikatsiyalash (shaxsni tasdiqlash) tizimini yaratishi va ularga tegishli hujjat (guvohnoma) rasmiylashtirishi shart.
40. Ixtisoslashgan tashkilot oʻz xodimi tomonidan unga rasmiylashtirilgan identifikatsiyalash hujjatidan faqat liftlarni texnik koʻrikdan oʻtkazish davrida belgilangan maqsaddagina foydalanishni taʼminlashi shart.
4-bob. Liftlarni dastlabki texnik koʻrikdan oʻtkazish tartibi
41. Texnik reglament talablari doirasida foydalanishga topshirilgan va yangi oʻrnatilgan har qanday lift maxsus elektron axborot tizimida roʻyxatga olinishidan avval lift pudratchisi tomonidan dastlabki texnik koʻrikdan oʻtkazilishi taʼminlanishi shart.
42. Dastlabki texnik koʻrik lift pudratchisining murojaatiga binoan 10 ish kunidan kechiktirmay ixtisoslashgan tashkilot tomonidan amalga oshiriladi.
43. Texnik reglament talablari doirasida liftni foydalanishga topshirgan lift oʻrnatuvchisi (yoki uning vakolatli xizmat koʻrsatuvchisi) dastlabki texnik koʻrikdan oʻtkazishni nazorat qiladi.
44. Dastlabki texnik koʻrikdan oʻtkazish uchun lift pudratchisidan quyidagi maʼlumot va hujjatlarning nusxasi ixtisoslashgan tashkilotga taqdim qilinishi talab etiladi:
Texnik reglament talablariga muvofiqlikni tasdiqlovchi ishlab chiqaruvchi (oʻrnatuvchi) tomonidan rasmiylashtirilgan deklaratsiya;
oʻrnatilgan lift uchun Texnik reglament doirasida tayinlangan organ tomonidan rasmiylashtirilgan muvofiqligini tasdiqlovchi rasmiy hujjat;
liftning tasdiqlangan va (yoki) birlamchi loyihasi;
Kadastr agentligi tomonidan yuritiladigan Koʻchmas mulk obyektlari manzillari yagona reyestridagi lift oʻrnatilgan bino (inshoot)larning raqami.
45. Yangi oʻrnatilgan liftni dastlabki texnik koʻrikdan oʻtkazishni tashkil qilish va uni oʻtkazish bilan bogʻliq xarajatlarni qoplash lift pudratchisining zimmasiga yuklatiladi.
46. Liftlarning dastlabki texnik koʻrigi tegishli tasdiqlangan standartda nazarda tutilgan sinash va inspeksiya oʻtkazish uchun belgilangan tezlikda va yuklamada oʻtkaziladi.
47. Dastlabki texnik koʻrikdan oʻtkazish uchun foydalaniladigan yuk lift oʻrnatuvchisi tomonidan taqdim qilinadi va u quyidagilarga ega boʻlishi shart:
amaldagi kalibrlash sertifikati;
turi va modeli toʻgʻrisidagi maʼlumot, shu jumladan, seriya raqami oʻchib ketmaydigan yorliq;
fizikaviy xususiyatlarini yoʻqotmaydigan, massasini oʻzgartirmaydigan materialdan ishlab chiqarilgan va tashish uchun qulay qilib ishlangan boʻlishi.
48. Agar liftning muvofiqligi Texnik reglament talablari doirasida bir dona liftning muvofiqligini baholash natijasida tasdiqlangan boʻlsa, ayni liftning dastlabki texnik koʻrigi past tezlikda va yuksiz oʻtkazilishiga ruxsat beriladi.
49. Dastlabki texnik koʻrik oʻtkazilgan sanadan boshlab uning natijasiga koʻra keyingi davriy texnik koʻrik oʻtkazish muddati ixtisoslashgan tashkilot tomonidan reja-jadval orqali belgilanadi.
50. Dastlabki texnik koʻrikdan oʻtkazish bosqichida ixtisoslashgan tashkilot har bir lift uchun identifikatsiya raqamini beradi va maxsus elektron axborot tizimiga kiritilishini taʼminlaydi. Liftning mazkur raqami dastlabki va keyingi davriy texnik koʻrik hisobotlarida qayd etilishi shart.
Dastlabki texnik koʻrikning ijobiy natijasiga koʻra roʻyxatga olingan liftning identifikatsiya raqami ushbu Nizomga 2-ilovada keltirilgan Lift identifikatsiya raqami shakliga muvofiq lift kabinasining boshqaruv paneli joylashgan qismida koʻrish odamlar uchun qulay ravishda va 1 600 mm balandlikda aluminiy asos yoki oʻzi yopishuvchi va liftdan foydalanish davri davomida oʻchib ketmaydigan mustahkam yorliq bilan tamgʻalanadi.
51. Ixtisoslashgan tashkilot liftning identifikatsiya raqamini berishda liftga ishlab chiqaruvchi tomonidan berilgan seriya raqami hamda Kadastr agentligi tomonidan yuritiladigan Koʻchmas mulk obyektlari manzillari yagona reyestridagi bino (inshoot)lar raqamiga asoslanadi.
Agar binoda bir nechta lift mavjud boʻlsa, binodagi liftlarning umumiy soniga muvofiq har bir liftga berilgan bino (inshoot) raqamiga navbatdagi tartib raqami qoʻshiladi.
Yorliq oʻlchamlari 85x50 mm, liftning identifikatsiya raqamini tashkil etuvchi raqamlar “arial” shriftda, oʻlchami 28 belgidan iborat, kulrang yoki oq fonda qora rangda belgilanadi.
52. Dastlabki texnik koʻrik natijalari boʻyicha liftning nazoratdan oʻtkazilgani toʻgʻrisidagi maʼlumot ushbu Nizomga 3-ilovaga muvofiq 160x80 mm oʻlchamdagi yashil, moviy, sariq yoki qizil rangdagi Lift texnik koʻrikdan oʻtkazilgani toʻgʻrisidagi maʼlumot yorligʻi namunasi shaklida oʻzi yopishuvchi va liftdan foydalanish davri davomida oʻchib ketmaydigan mustahkam yorliq koʻrinishida lift kabinasining boshqaruv paneli joylashgan qismida odamlar koʻrishi uchun qulay joyda va 1 700 mm balandlikda yopishtiriladi.
53. Agar dastlabki koʻrik jarayonida ayni liftga nisbatan muvofiqlikni baholash tartib-taomili notoʻgʻri qoʻllangani ixtisoslashgan tashkilot tomonidan aniqlansa, ushbu liftga tegishli tayinlangan organ tomonidan rasmiylashtirilgan muvofiqlikni tasdiqlovchi rasmiy hujjatni, ishlab chiqaruvchi (oʻrnatuvchi) tomonidan rasmiylashtirilgan deklaratsiyani va ishlab chiqaruvchi (oʻrnatuvchi) haqidagi maʼlumotlarni oʻn ish kuni davomida vakolatli organga taqdim qilishi shart.
5-bob. Davriy texnik koʻrikdan oʻtkazish tartibi
54. Liftda belgilangan davriylikda texnik koʻrikdan oʻtkazishning taʼminlanishini nazorat qilish majburiyati koʻp kvartirali uy-joylarda masʼul organ, koʻp kvartirali uy-joylardan tashqari binolarda vakolatli organ zimmasiga yuklatiladi.
Liftlarning belgilangan davriylikda texnik koʻrikdan oʻtkazilishini taʼminlash bino va inshootlarga javobgar tomonidan amalga oshiriladi.
55. Muayyan hududda lift oʻrnatuvchisi (yoki uning vakolatli xizmat koʻrsatuvchisi) tomonidan liftlarga oylik xizmat koʻrsatilgani toʻgʻrisidagi maʼlumot maxsus elektron axborot tizimiga kiritib borilishi taʼminlanishi hamda ushbu maʼlumotlar ixtisoslashgan tashkilot tomonidan tanishish va foydalanish imkoniyati yaratilishi lozim.
56. Ixtisoslashgan tashkilot rejalashtirilgan texnik koʻrik oʻtkazish sanasi haqida mulkdorni (bino uchun masʼul shaxsni), lift oʻrnatuvchisini (yoki uning vakolatli xizmat koʻrsatuvchisi) kamida uch kun avval xabardor qilishi shart.
57. Ixtisoslashgan tashkilot texnik jihatdan tartibga solish sohasidagi normativ hujjatlarda belgilangan talablarga muvofiq ishlab chiqilgan chek-listlar (belgilangan mezonlar) asosida liftlarni texnik koʻrikdan oʻtkazadi.
Ixtisoslashgan tashkilot chek-listlardan foydalanish, ularni toʻgʻri va aniq toʻldirish yuzasidan yoʻriqnomalarni ishlab chiqishi, xodimlarini tegishli yoʻriqnomalar bilan tanishtirishi lozim.
Ixtisoslashgan tashkilot xodimlari tomonidan chek-listlar, ushbu Nizomda nazarda tutilgan boshqa yozuvlarning toʻgʻri va aniq toʻldirilishi hamda yuritilishini nazorat qilishi shart.
58. Agar dastlabki texnik koʻrik ushbu Nizomning 48-bandida nazarda tutilgan tarzda oʻtkazilgan boʻlsa, keyingi davriy texnik koʻrik yoki nazorat koʻrigi ushbu Nizomning 46-bandida belgilangan tezlik va yuklamada amalga oshirilishi shart.
Bunda davriy texnik koʻrik nuqtai nazaridan oʻtkazilgan sinov va texnik koʻriklarni texnik inspektor baholaganda, ayni liftning xavfsizlik qurilmalari, harakatlantirish tizimi, shkivlari, lift kabinasi, zanjiri va ulash elementlarida shikastlanish holatlarini aniqlashi va zarur maʼlumotlarni texnik koʻrik oʻtkazish hisobotida qayd etishi shart.
59. Agar liftlarning nominal yuklamasi (nagruzka) va yoki nominal tezligi va (yoki) harakatlanish masofasida oʻzgarish boʻlsa, ixtisoslashgan tashkilot davriy texnik koʻrik jarayonida bunday liftni tegishli xavfsizlik boʻyicha standart talablariga mosligini aniqlashi lozim.
60. Davriy texnik koʻrik jarayonida ixtisoslashgan tashkilot tomonidan oʻtkaziladigan sinovlarning takrorlanishi liftni eskirishga olib kelmaydigan va uning xavfsizlik xususiyatini kamaytirmaydigan tarzda amalga oshirilishi lozim.
Ixtisoslashgan tashkilot texnik koʻrik jarayonida liftning xavfsizlik qurilmalari va buferlarida sinovlarni tasdiqlangan tegishli standartlarga muvofiq past tezlikda va lift kabinasi boʻsh holatda oʻtkazishi lozim.
61. Davriy texnik koʻrik liftga texnik xizmat koʻrsatishni amalga oshiruvchi lift oʻrnatuvchisi (yoki uning vakolatli xizmat koʻrsatuvchisi) nazorati ostida amalga oshiriladi. Lift oʻrnatuvchisining (yoki uning vakolatli xizmat koʻrsatuvchisining) texnik xizmat koʻrsatish xodim(lar)i texnik koʻrikni oʻtkazishni nazorat qilishi hamda bu jarayonda ixtisoslashgan tashkilot bilan hamkorlik qilishi shart.
62. Agar mulkdor bilan liftga xizmat koʻrsatish toʻgʻrisida shartnoma tuzgan lift oʻrnatuvchisi (yoki uning vakolatli xizmat koʻrsatuvchisi) texnik koʻrikda ishtirok etmasa, xizmat koʻrsatish shartnomasi oʻz kuchini yoʻqotgan boʻlsa yoki bekor qilingan boʻlsa, ixtisoslashgan tashkilot texnik koʻrik oʻtkazmasligi lozim.
63. Texnik koʻrikni nazorat qiluvchi lift oʻrnatuvchisi (yoki uning vakolatli texnik xizmat koʻrsatuvchisi) qonunchilikda belgilangan mezonlarga mos kelmagan yoxud liftga xizmat koʻrsatish toʻgʻrisida mulkdor bilan lift oʻrnatuvchisi (yoki uning vakolatli texnik xizmat koʻrsatuvchisi) oʻrtasida shartnoma tuzilmagan (bekor qilingan, oʻz kuchini yoʻqotgan) taqdirda, ixtisoslashgan tashkilot bu haqida masʼul organni (masʼul organ vakolatlari doirasiga kirmaydigan liftlar boʻyicha esa vakolatli organni) xabardor qilishi shart.
64. Texnik koʻrikdan oʻtkazish natijasida liftga shikast yetkazilgan taqdirda, yuzaga kelgan zarar ixtisoslashgan tashkilotning oʻz mablagʻlari hisobidan yoki moliyaviy javobgarligini sugʻurtalash tartiblari asosida qoplanishi shart.
65. Liftdan foydalanishda baxtsiz hodisa sodir boʻlgan taqdirda, mulkdor (bino va inshootlar uchun masʼul shaxsga) bunday hodisa yuzaga kelgan kundan boshlab qonunchilikda belgilangan tartibda vakolatli organni xabardor qiladi va baxtsiz hodisa tekshiruvi yakunlanmagunga qadar liftdan foydalanishni taqiqlaydi.
Vakolatli organ tomonidan baxtsiz hodisaning kelib chiqish sabablari aniqlanadi va kelib chiqishiga sababchi boʻlgan bino va inshootlarga javobgar, servis xizmat koʻrsatuvchi yoki ixtisoslashgan tashkilotlarning masʼullariga qonunchilikda belgilangan choralarni koʻradi.
Baxtsiz hodisa tekshiruvi yakunlangandan soʻng lift mulkdori tomonidan uch kun ichida liftning qayta texnik koʻrikdan oʻtkazilishi taʼminlashi shart. Bunda ixtisoslashgan tashkilot tomonidan qayta texnik koʻrik haq olmasdan oʻtkaziladi.
Ixtisoslashgan tashkilot liftda davriy texnik koʻrik oʻtkazishi uchun mulkdor (bino va inshootlar uchun masʼul shaxs) tarafidan zaruriy sharoit yaratilmagan (ruxsat berilmagan) taqdirda, bu haqida masʼul organni (masʼul organ vakolatlari doirasiga kirmaydigan liftlar boʻyicha esa vakolatli organni) xabardor qilishi shart.
Masʼul organ (masʼul organ vakolatlari doirasiga kirmaydigan liftlar boʻyicha esa vakolatli organ) liftda davriy texnik koʻrik oʻtkazishi uchun mulkdor (bino va inshootlar uchun masʼul shaxs) tarafidan zarur sharoit yaratilishi choralarini koʻrishi lozim. Bunday sharoit ixtisoslashgan tashkilotdan tegishli xabarnoma olingan kundan boshlab oʻttiz kunlik muddatda yaratilmagan taqdirda, lift masʼul organ (masʼul organ vakolatlari doirasiga kirmaydigan liftlar boʻyicha esa vakolatli organ) tomonidan elektr taʼminoti tizimidan uziladi va uni muhrlash orqali tizim ishlashini taqiqlaydi.
6-bob. Texnik koʻrik natijalarini baholash va rasmiylashtirish
66. Ixtisoslashgan tashkilot tomonidan texnik koʻrik oʻtkazishda liftning xavfsizlik darajasini aniqlash va toifalashda xavfsizlik boʻyicha tegishli standartda belgilangan mezon asos qilib olinadi.
Bunda ixtisoslashgan tashkilot mos ravishda ushbu Nizomning 57-bandida nazarda tutilgan chek-listlardan foydalanadi.
67. Oʻtkazilgan dastlabki, davriy texnik koʻrik natijalarining hisoboti ushbu Nizomga 4-ilovada keltirilgan Liftni texnik koʻrikdan oʻtkazish hisoboti shaklida, texnik koʻrik oʻtkazilgan sanada maxsus elektron tizimiga onlayn shaklda texnik koʻrikni oʻtkazgan texnik inspektor tomonidan kiritiladi.
Rasmiylashtirilgan hisobot masʼul texnik muhandis tomonidan texnik koʻrik oʻtkazilgan sanadan boshlab uch kun ichida tasdiqlanishi shart.
68. Agar texnik koʻrik natijasida lift foydalanish uchun xavfli yoki nosoz deb baholansa, texnik koʻrik boʻyicha hisobot tasdiqlangan sanadan bir ish kunidan kechiktirmay ixtisoslashgan tashkilot tomonidan vakolatli organga, masʼul organga, lift oʻrnatuvchisiga (yoki uning vakolatli xizmat koʻrsatuvchisi) va mulkdorga taqdim qilinishi shart.
69. Agar texnik koʻrik natijasida lift foydalanish uchun yaroqli yoki qisman nosoz deb baholansa, texnik koʻrik boʻyicha hisobot tasdiqlangan sanadan uch kundan kechiktirmay ixtisoslashgan tashkilot tomonidan lift oʻrnatuvchisiga (yoki uning vakolatli xizmat koʻrsatuvchisiga) va mulkdorga (bino uchun masʼul shaxsga) taqdim qilinishi shart.
70. Bino va inshoot uchun masʼul shaxs tayinlanmagan yoki tayinlanishi mumkin boʻlmagan hollarda ixtisoslashgan tashkilot hisobotni mulkdorga va mavjud hollarda xonadon egalarining kamida 30 foiziga elektron yoki yozma shaklda taqdim qilishi lozim.
71. Ixtisoslashgan tashkilot ushbu Nizomning 69 va 70-bandlarida nazarda tutilgan manfaatdor tomonlarga texnik koʻrik natijasi boʻyicha hisobotni elektron pochta orqali joʻnatishi, shuningdek, oʻzining rasmiy veb-saytiga kiritishi orqali yetkazishi mumkin. Bunday holda tegishli hisobotlar va daliliy maʼlumotlarni kamida uch yil saqlashi shart.
72. Liftlarning texnik koʻrik natijalari toʻrt toifada — “yaroqli”, “qisman nosoz”, “nosoz” yoki “foydalanish uchun xavfli” tarzda baholanadi.
Bunda texnik koʻrik natijalarining toifasiga qarab quyidagi ranglarda maʼlumot yorligʻi liftga yopishtiriladi (joylashtiriladi):
foydalanishga yaroqli liftga “yashil”;
qisman nosoz liftga “moviy”;
nosoz liftga “sariq”;
foydalanish uchun xavfli liftga “qizil”.
73. Texnik koʻrik natijalari boʻyicha tegishli maʼlumot yorliqlari ushbu Nizomning 52-bandida keltirilgan tartibda yopishtirilishi (oʻrnatilishi) shart.
74. Maʼlumot yorliqlarini uchinchi taraf tayyorlashining yoki soxtalashtirilgan maʼlumot yorliqlari liftlarda yopishtirilmasligining oldini olish maqsadida, ixtisoslashgan tashkilot tomonidan maxsus QR-kod bilan tasdiqlanuvchi maʼlumot yorligʻi yaratilishi shart.
Agar ixtisoslashgan tashkilot soxta maʼlumot yorligʻini yasagan va liftlarga bunday yorliqlarni yopishtirgan shaxs(lar)dan xabar topsa, soxta yorliq(lar)ni dalil sifatida koʻrsatgan holda vakolatli organni xabardor qilishi lozim.
75. Texnik koʻrik natijasida foydalanish uchun xavfli va qizil rangli maʼlumot yorligʻi bilan belgilangan liftdan foydalanishni mulkdor (bino va inshoot uchun masʼul shaxs) taqiqlashi lozim. Bunday holda mulkdor oltmish kun ichida mazkur liftning xavfsiz holga keltirilishini taʼminlashi shart.
Belgilangan muddat oʻtganidan soʻng ixtisoslashgan tashkilot tomonidan haq olmasdan nazorat koʻrigi oʻtkazilishi lozim. Agar oʻtkazilgan nazorat koʻrigi natijasida ayni lift foydalanish uchun xavfli deb baholansa, bunday lift masʼul organ (masʼul organ vakolatlari doirasiga kirmaydigan liftlar boʻyicha esa vakolatli organ) tomonidan elektr taʼminoti tizimidan uziladi va uni muhrlash orqali tizim ishlashini taqiqlaydi.
76. Ushbu Nizomning 75-bandida keltirilgan holat yuzasidan masʼul organ (masʼul organ vakolatlari doirasiga kirmaydigan liftlar boʻyicha esa vakolatli organ) mazkur Nizomga 5-ilovada belgilangan Xavfli liftni elektr taʼminoti tizimidan uzish va muhrlash dalolatnomasi shakliga muvofiq dalolatnomani uch nusxada rasmiylashtirib, bir nusxadan mulkdorga va ixtisoslashgan tashkilotga taqdim qiladi.
77. Mulkdor (bino va inshoot uchun masʼul shaxs) ushbu Nizomning 75-bandida belgilangan muddat ichida liftning xavfsizligini taʼminlamasligi oqibatida undan foydalanishda yuzaga kelishi mumkin boʻlgan mulkka yoki salomatlikka yetkazilgan har qanday zarar uchun javobgar boʻladi.
78. Mulkdor (bino uchun masʼul shaxs) texnik koʻrik natijasida nosoz deb baholangan sariq yorliqli liftdagi nomuvofiqliklarni oʻttiz kun ichida bartaraf qilinishini taʼminlashi shart.
Belgilangan muddat oʻtganidan soʻng ixtisoslashgan tashkilot tomonidan nazorat koʻrigi oʻtkazilishi lozim. Agar nazorat koʻrigi natijasida lift xavfli deb topilsa, masʼul organ (masʼul organ vakolatlari doirasiga kirmaydigan liftlar boʻyicha esa vakolatli organ) ushbu Nizomning 75-bandida belgilangan tarzda ish (choralar) koʻrishi shart.
79. Mulkdor (bino uchun masʼul shaxs) muhrlangan va elektr taʼminoti tizimidan uzib qoʻyilgan liftdagi nomuvofiqliklarni bartaraf qilish jarayonini boshlashga ruxsat olish uchun masʼul organga (masʼul organ vakolatlari doirasiga kirmaydigan liftlar boʻyicha esa vakolatli organga), nomuvofiqliklarni bartaraf qilish jarayonini yakunlanganidan soʻng esa nazorat koʻrigini oʻtkazish yuzasidan ixtisoslashgan tashkilotga yozma murojaat qilishi shart.
80. Masʼul organ (masʼul organ vakolatlari doirasiga kirmaydigan liftlar boʻyicha esa vakolatli organ) belgilangan muddat ichida liftdan foydalanmaslikni taʼminlash toʻgʻrisida mulkdordan yozma majburiyat olganidan soʻng nomuvofiqliklarni bartaraf qilish jarayonini boshlashga ruxsat beradi va ushbu Nizomga 6-ilovada belgilangan Elektr taʼminoti tizimiga ulash va muhrni yechish dalolatnoma shakliga muvofiq dalolatnoma tuzadi.
81. Ushbu Nizomning 80-bandida nazarda tutilgan dalolatnoma faqat bir marta tuzilishi, unda nomuvofiqliklarni bartaraf qilish uchun belgilangan muddat qirq besh ish kunidan ortiq boʻlmasligi shart.
82. Dalolatnomada belgilangan muddat ichida liftdagi nomuvofiqliklarni bartaraf qilish shartlari mulkdor bilan lift oʻrnatuvchisi (yoki uning vakolatli xizmat koʻrsatuvchisi) oʻrtasidan tuzilgan shartnomada aks ettirilishi shart.
Liftni xavfsiz holatga keltirish majburiyatini bajarmagan tomon, shartlashuvchi taraflarning oʻzaro moliyaviy majburiyatlarini istisno qilgan holda, javobgar hisoblanib, unga nisbatan vakolatli organ tomonidan sud tartibida qonunchilikda belgilangan tegishli chora qoʻllanadi.
83. Mulkdor (bino va inshoot uchun masʼul shaxs) texnik koʻrik natijasida moviy rangda yorliq yopishtirilgan liftdagi nosozliklarning keyingi davriy texnik koʻrikkacha bartaraf etilishini taʼminlashi shart.
7-bob. Nazorat koʻrigini oʻtkazish tartibi
84. Foydalanish uchun xavfli deb baholangan qizil yorliqli liftda nazorat koʻrigi davriy koʻrik natijasida rasmiylashtirilgan hisobot masʼul organga (masʼul organ vakolatlari doirasiga kirmaydigan liftlar boʻyicha esa vakolatli organga) lift oʻrnatuvchisiga (yoki uning vakolatli xizmat koʻrsatuvchisiga) va mulkdorga taqdim qilingan sanadan boshlab oltmish kun oʻtganidan soʻng ixtisoslashgan tashkilot tomonidan oʻtkaziladi.
85. Nosoz deb baholangan sariq yorliqli liftda nazorat koʻrigi davriy texnik koʻrik natijasida rasmiylashtirilgan hisobot masʼul organga (masʼul organ vakolatlari doirasiga kirmaydigan liftlar boʻyicha esa vakolatli organga), lift oʻrnatuvchisiga (yoki uning vakolatli xizmat koʻrsatuvchisiga) va mulkdorga taqdim qilingan sanadan boshlab oʻttiz kun oʻtganidan soʻng ixtisoslashgan tashkilot tomonidan oʻtkaziladi.
86. Qizil yoki sariq yorliqli liftda nazorat koʻrigini oʻtkazishda mulkdorning (bino uchun masʼul shaxsning) nazorat koʻrigini oʻtkazish yuzasidan kelib tushgan murojaati ustuvor hisoblanadi.
87. Qizil yoki sariq yorliq biriktirilgan liftda nazorat koʻrigi oʻtkazilgan taqdirda, ayni liftda oxirgi davriy texnik koʻrikni oʻtkazgan texnik inspektor tomonidan ushbu nazorat koʻrigi amalga oshirilishi lozim.
88. Texnik koʻrik natijasida rasmiylashtirilgan nomuvofiqliklar bartaraf qilinganini tekshirish maqsadidagi nazorat koʻrigi liftga texnik xizmat koʻrsatishni taʼminlovchi subyekt ishtirokida oʻtkazilishi shart.
89. Ixtisoslashgan tashkilot davriy texnik koʻrik natijasi boʻyicha hisobotni manfaatdor tomonlarga taqdim etgan sana asosida nazorat koʻrigini oʻtkazish sanasini belgilaydi.
90. Nazorat koʻrigi natijalari boʻyicha hisobot ushbu Nizomning 67-bandi talablariga muvofiq rasmiylashtiriladi.
8-bob. Liftlarni texnik koʻrikdan oʻtkazish natijalarini yuritish tartibi
91. Ixtisoslashgan tashkilot davriy texnik koʻrik natijalarini vakolatli organning maxsus elektron axborot tizimiga kiritib borishi shart.
92. Ixtisoslashgan tashkilot oʻzi tomonidan texnik koʻrikdan oʻtkazilgan har bir liftga tegishli barcha maʼlumotlarni, texnik koʻrik natijasi boʻyicha hisobot tasdiqlangan sanada maxsus elektron axborot tizimiga kiritilishini taʼminlashi lozim.
93. Ixtisoslashgan tashkilotning ushbu Nizomning 92-bandida nazarda tutilgan maʼlumotlar bazasi vakolatli organning maxsus elektron axborot tizimi bilan uzluksiz maʼlumot almashinuvini taʼminlashi, uzatilgan maʼlumotlarga oʻzgartirishlar kiritilishiga yoʻl qoʻymasligi kerak.
94. Ixtisoslashgan tashkilot liftda davriy texnik koʻrik oʻtkazishi uchun mulkdor (bino uchun masʼul shaxs) tarafidan zarur sharoit yaratilmagan (ruxsat berilmagan), oʻrnatuvchi (yoki uning vakolatli xizmat koʻrsatuvchisi) tomonidan texnik koʻrik jarayoni nazorat qilinmagan yoki ushbu Nizomning 64-bandida nazarda tutilgan holat kuzatilgan taqdirda, mazkur Nizomga 7-ilovaga muvofiq Liftlarni texnik koʻrikdan oʻtkazishga sharoit yaratib bermagani toʻgʻrisida xabarnoma shakli boʻyicha tegishli maʼlumotlarni vakolatli organning maxsus elektron axborot tizimiga kiritishi shart.
95. Ixtisoslashgan tashkilot amalga oshirgan texnik koʻriklari yuzasidan har chorak yakuni boʻyicha yigʻma axborotni, keyingi hisobot davri birinchi oyining 5-sanasigacha elektron shaklda ushbu Nizomga 8-ilovada keltirilgan Liftni davriy texnik koʻrikdan oʻtkazish natijalari hisoboti shaklida vakolatli organga taqdim qilishi lozim.
9-bob. Yakunlovchi qoidalar
96. Vakolatli organ masʼul organ bilan hamkorlikda ixtisoslashgan tashkilot ushbu Nizomda oʻrnatilgan talablarga muvofiq faoliyat koʻrsatishi ustidan nazorat tadbirlarini oʻtkazishga haqli.
97. Texnik koʻrik oʻtkazish jarayonini bevosita kuzatish, texnik koʻrik oʻtkazilgan liftni koʻzdan kechirish orqali vakolatli organ ushbu Nizom talablariga rioya qilish holatlarini baholashi shart.
98. Nizom talablarining buzilish holatlari kuzatilganda vakolatli organ ixtisoslashgan tashkilotga, mulkdorga, lift oʻrnatuvchisiga (yoki uning vakolatli xizmat koʻrsatuvchisiga) nisbatan qonunchilikda belgilangan tartibda tegishli taʼsir choralarini qoʻllashi mumkin.
99. Agar vakolatli organ tomonidan ixtisoslashgan tashkilot faoliyatida akkreditatsiya talablari va shartlari buzilishi holatlari aniqlanganda, tegishli maʼlumotlarni uch kun ichida akkreditatsiya organiga taqdim qilishi shart.
Liftlarni texnik koʻrikdan oʻtkazish tartibi toʻgʻrisidagi nizomga 1-ILOVA
Liftlarni texnik koʻrikdan oʻtkazish
Bosqichlar Subyektlar Tadbirlar Ijro muddati 1-bosqich Qurilish va uy-joy kommunal xoʻjaligi vazirligi (Masʼul organ) Koʻp kvartirali uy-joylarda oʻrnatilgan liftlar nazoratini amalga oshiradi. Doimiy 2-bosqich Sanoat, radiatsiya va yadro xavfsizligi qoʻmitasi (Vakolatli organ) Koʻp kvartirali uy-joylardan tashqari boʻlgan binolarda oʻrnatilgan liftlar nazoratini amalga oshiradi. Doimiy 3-bosqich Masʼul organ Ixtisoslashgan tashkilotning (liftlarni texnik koʻrikdan oʻtkazish faoliyati bilan shugʻullanuvchi sifatida ISO/IEC 17020 standartiga muvofiq “A” turdagi inspeksiya idorasi maqomida Milliy akkreditatsiya tizimida akkreditatsiyadan oʻtgan yuridik shaxs) liftlarni texnik koʻrikdan oʻtkazish boʻyicha belgilangan talablarga (standartlarga) muvofiq faoliyat olib borish imkoniyatini baholash reja-dasturini ishlab chiqadi. Har yili 4-bosqich Masʼul organ Ixtisoslashgan tashkilotni tanlab oladi, kelishuv imzolaydi va jamoatchilikka eʼlon qiladi. Doimiy 5-bosqich Lift joylashgan bino egasi (Mulkdor) Liftni texnik koʻrikdan oʻtkazish uchun Ixtisoslashgan tashkilotga murojaat qiladi. Har 12 oyda 6-bosqich Ixtisoslashgan tashkilot Liftni texnik koʻrikdan oʻtkazadi. Murojaatga asosan 7-bosqich Ixtisoslashgan tashkilot Texnik koʻrik natijalari boʻyicha liftni toʻrt toifada baholaydi: “yaroqli” lift uchun — yashil yorliq yopishtiradi va ishlatishga ruxsat beradi; Doimiy “qisman nosoz” lift uchun — moviy yorliq yopishtiradi, keyingi texnik koʻrikkacha bartaraf etish sharti bilan ishlatishga ruxsat beradi; Doimiy “nosoz” lift uchun — sariq yorliq yopishtiradi, bartaraf qilish sharti bilan ishlatishga ruxsat beradi; 30 kunga “foydalanish uchun xavfli” lift uchun — qizil yorliq yopishtiradi, ishlatilishini taqiqlaydi va elektr taʼminotidan uzadi. 60 kunga 8-bosqich Mulkdor Lift texnik koʻrigida aniqlangan kamchiliklarni bartaraf qiladi. Belgilangan muddatlarda 9-bosqich Ixtisoslashgan tashkilot Kamchiliklar bartaraf etilgani boʻyicha nazorat koʻrigini oʻtkazadi. Doimiy 10-bosqich Ixtisoslashgan tashkilot Amalga oshirgan texnik koʻriklari yuzasidan yigʻma axborot va hisobotlarni vakolatli organga taqdim qilib boradi. Har chorak yakuni boʻyicha 11-bosqich Vakolatli organ, Masʼul organ Ixtisoslashgan tashkilotlarning belgilangan talablarga muvofiq faoliyat koʻrsatishi ustidan nazorat tadbirlarini oʻtkazadi. Doimiy
Liftlarni texnik koʻrikdan oʻtkazish tartibi toʻgʻrisidagi nizomga 2-ILOVA
Lift identifikatsiya raqami shakli
Liftlarni texnik koʻrikdan oʻtkazish tartibi toʻgʻrisidagi nizomga 3-ILOVA
Lift texnik koʻrikdan oʻtkazilgani toʻgʻrisidagi maʼlumot yorligʻi namunasi
Foydalanishga yaroqli lift uchun “yashil” yorliq IXTISOSLASHGAN TASHKILOT NOMI VA MANZILI VAKOLATLI ORGAN TOMONIDAN BERILGAN ROʻYXAT RAQAMI LIFT IDENTIFIKATSIYA RAQAMI: LIFT TEXNIK KOʻRIKDAN OʻTKAZILGAN SANA: LIFT FOYDALANISHGA YAROQLI KEYINGI TEXNIK KOʻRIK OʻTKAZISH SANASI: OGOHLANTIRISH! HAR OYLIK NAZORAT VA KEYINGI DAVRIY TEXNIK KOʻRIK BELGILANGAN MUDDATLARDA OʻTKAZILISHI SHART. Qisman nosoz lift uchun “moviy” yorliq IXTISOSLASHGAN TASHKILOT NOMI VA MANZILI VAKOLATLI ORGAN TOMONIDAN BERILGAN ROʻYXAT RAQAMI LIFT IDENTIFIKATSIYA RAQAMI: LIFT TEXNIK KOʻRIKDAN OʻTKAZILGAN SANA: LIFTDAN FOYDALANISHDA DIQQATLI BOʻLISH LOZIM (QISMAN NOSOZ) TUZATISH MUDDATI: 12 OY KEYINGI TEXNIK KOʻRIK OʻTKAZISH SANASI: OGOHLANTIRISH! LIFTDA ANIQLANGAN NOMUVOFIQLIKLAR KEYINGI DAVRIY TEKSHIRUVGA QADAR BARTARAF QILINISHI SHART. Nosoz lift uchun “sariq” yorliq IXTISOSLASHGAN TASHKILOT NOMI VA MANZILI VAKOLATLI ORGAN TOMONIDAN BERILGAN ROʻYXAT RAQAMI LIFT IDENTIFIKATSIYA RAQAMI: LIFT TEXNIK KOʻRIKDAN OʻTKAZILGAN SANA: LIFTDAN FOYDALANISHDA XAVF MAVJUD (NOSOZ) TUZATISH MUDDATI: 30 KUN KEYINGI DAVRIY TEXNIK KOʻRIK OʻTKAZISH SANASI: OGOHLANTIRISH! LIFTDA ANIQLANGAN NOMUVOFIQLIKLAR 30 KUN ICHIDA BARTARAF QILINISHI KERAK. USHBU DAVRDA NOMUVOFIQLIK TUZATILMAGAN TAQDIRDA LIFTDAN FOYDALANISH TAQIQLANADI. Foydalanish uchun xavfli lift uchun “qizil” yorliq IXTISOSLASHGAN TASHKILOT NOMI VA MANZILI VAKOLATLI ORGAN TOMONIDAN BERILGAN ROʻYXAT RAQAMI LIFT IDENTIFIKATSIYA RAQAMI: LIFT TEXNIKDAN KOʻRIK OʻTKAZILGAN SANA: LIFT FOYDALANISH UCHUN XAVFLI TUZATISH MUDDATI: 60 KUN KEYINGI TEXNIK KOʻRIKDAN OʻTKAZISH SANASI: OGOHLANTIRISH! LIFTDA ANIQLANGAN NOMUVOFIQLIKLAR 60 KUN ICHIDA BARTARAF QILINISHI KERAK. USHBU DAVRDA NOMUVOFIQLIK TUZATILMAGAN TAQDIRDA LIFTDAN FOYDALANISH TAQIQLANADI.
Liftlarni texnik koʻrikdan oʻtkazish tartibi toʻgʻrisidagi nizomga 4-ILOVA
Liftni texnik koʻrikdan oʻtkazish hisoboti shakli
LIFTNI TEXNIK KOʻRIKDAN OʻTKAZISH HISOBOTI IXTISOSLASHGAN TASHKILOTNING NOMI, MANZILI VA RUXSATNOMA RAQAMI MASʼUL ORGAN NOMI LIFT IDENTIFIKATSIYA RAQAMI HISOBOT № / TAKRORIY HISOBOT № TEXNIK KOʻRIK SANASI LIFT HAQIDA MAʼLUMOT ROʻYXAT RAQAMI ROʻYXATDAN OʻTKAZILGAN SANASI MILLIY MUVOFIQLIK BELGISI STANDART/STANDARTLAR LIFT TURI ELEKTR GIDRAVLIK LIFTNING SERIYA RAQAMI BELGILANGAN KOʻTARISH QOBILIYATI (kg) QAVATLAR SONI BELGILANGAN HARAKATLANISH TEZLIGI (m/s) MANZILI BINO (INSHOOT) EGASI HAQIDA MAʼLUMOT F.I.O. MANZILI TELEFON RAQAMI TEXNIK XIZMAT KOʻRSATUVCHI TASHKILOT HAQIDA MAʼLUMOT TASHKILOT NOMI MANZILI TELEFON RAQAMI TASHKILOT XODIMLARI BAJARADIGAN VAZIFASI TAʼMINOT KORXONASI VA TEXNIK XIZMAT KOʻRSATISH BILAN BOGʻLIQ HUJJATLAR DEKLARATSIYA SHARTNOMANING SANASI VA MUDDATI MUVOFIQLIK BELGISI RAQAMI DAVRIY TEXNIK KOʻRIK NATIJASI DAVRIY KOʻRIK BAHOSI BAJARISH SANASI FOYDALANISHGA YAROQLI YOʻQ QISMAN NOSOZ 12 OY NOSOZ 30 KUN XAVFLI 60 KUN LIFTDA ANIQLANGAN KAMCHILIKLAR 1 7 2 8 3 9 4 10 5 11 6 12 TAVSIFLAR HISOBOTNI TASDIQLASH SANASI TEXNIK KOʻRIK XODIMLARI TEXNIK KOʻRIK UCHUN MASʼUL SHAXSNING F.I.O. VA IMZOSI TEXNIK KOʻRIKDAN OʻTKAZUVCHI XODIM(LAR) F.I.O. VA IMZOSI IXTISOSLASHGAN TASHKILOTNING ALOQA MAʼLUMOTLARI, TELEFON RAQAMI VA ELEKTRON POCHTA MANZILI:
Liftlarni texnik koʻrikdan oʻtkazish tartibi toʻgʻrisidagi nizomga 5-ILOVA
Xavfli liftni elektr taʼminotidan uzish va muhrlash dalolatnomasi shakli
Lift identifikatsiya raqami Viloyat nomi Tuman nomi Lift oʻrnatilgan bino manzili Bino uchun masʼul shaxs (mulkdor) Dalolatnoma tuzilgan sana Dalolatnoma tuzilishiga asos Dalolatnomani tuzuvchilar Vakolatli nazorat organi masʼul xodimining ismi, familiyasi, imzosi Bino uchun masʼul shaxsning/mulkdorning ismi, familiyasi, imzosi
Liftlarni texnik koʻrikdan oʻtkazish tartibi toʻgʻrisidagi nizomga 6-ILOVA
Elektr taʼminotiga ulash va muhrni yechish dalolatnomasi shakli
Lift identifikatsiya raqami Viloyat nomi Tuman nomi Lift oʻrnatilgan bino manzili Bino uchun masʼul shaxs (mulkdor) Dalolatnoma tuzilgan sana Dalolatnoma tuzilishiga asos Dalolatnomani tuzuvchilar Vakolatli nazorat organi masʼul xodimining ismi, familiyasi, imzosi Bino uchun masʼul shaxsning/mulkdorning ismi, familiyasi, imzosi
Liftlarni texnik koʻrikdan oʻtkazish tartibi toʻgʻrisidagi nizomga 7-ILOVA
Liftlarni texnik koʻrikdan oʻtkazishga sharoit yaratib bermagani toʻgʻrisida xabarnoma shakli
XABARNOMA Ixtisoslashgan tashkilot nomi va manzili Viloyat nomi Tuman nomi Manzili Lift identifikatsiya raqami Bino nomi Xabarnoma sanasi Xabarnoma sabablari Imzo Texnik inspektor
Liftlarni texnik koʻrikdan oʻtkazish tartibi toʻgʻrisidagi nizomga 8-ILOVA
Liftni davriy texnik koʻrikdan oʻtkazish natijalari hisoboti shakli
LIFTNI DAVRIY TEXNIK KOʻRIKDAN OʻTKAZISH NATIJALARI BUYURTMA RAQAMI IXTISOSLASHGAN TASHKILOTNING NOMI MASʼUL ORGAN BILAN TUZILGAN SHARTNOMA TAFSILOTLARI XODIMLAR SONI QABUL QILINGAN SANAGA KOʻRA LIFTLAR SONI (DONA) DAVRIY TEXNIK KOʻRIK NATIJASIGA KOʻRA LIFT YORLIGʻI (DONA) TASHKILOT NOMI SHARTNOMANING DAVOMIYLIGI DAVRIY TEXNIK KOʻRIK TOʻLOVI INSPEKSIYA XODIMLARI TEXNIK MENEJER ELEKTR LIFT GIDRAVLIK LIFT BINO (KVARTIRA) JAMOAT BINOSI TURAR JOY (MUSTAQIL) MAʼMURIY BINO BOSHQALAR YASHIL YORLIQ MOVIY YORLIQ SARIQ YORLIQ QIZIL YORLIQ JAMI
Oʻzbekiston Respublikasining Bosh vaziri A. ARIPOV
Toshkent sh.,
2025-yil 12-iyul,
431-son