📅 2025-yil 11-iyun · Vazirlik va idoralar hujjatlari · Maktabgacha va maktab taʼlimi vazirligi Kambagʻallikni qisqartirish va bandlik vazirligi
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 11 июнь · Вазирлик ва идоралар ҳужжатлари · Мактабгача ва мактаб таълими вазирлиги Камбағалликни қисқартириш ва бандлик вазирлиги
Расмий матн. Расмий ҳужжат. Таҳририй изоҳлар киритилмаган.
📅 11 июня 2025 г. · Документы министерств и ведомств · Министерства дошкольного и школьного образования Министерства занятости и сокращения бедности
Официальный текст. Официальный документ. Редакционные примечания не включены.
📅 11 June 2025 · Ministry and agency documents · Maktabgacha va maktab taʼlimi vazirligi Kambagʻallikni qisqartirish va bandlik vazirligi
Official text. Official document. Editorial notes are not included.
Ўзбекистон Республикаси Мактабгача ва мактаб таълими вазирлиги Ўзбекистон Республикаси Камбағалликни қисқартириш ва бандлик вазирлигининг
қарори
НИЗОМ
ТАВСИФИ
Умумий ўрта таълим муассасалари битирувчиларини ўрганган касб-ҳунари бўйича амалий имтиҳондан ўтказиш ва уларга электрон сертификат бериш тартиби тўғрисидаги низомни тасдиқлаш ҳақида
Ўзбекистон Республикаси Президентининг 2024 йил 2 февралдаги ПҚ-53-сон «Умумий ўрта таълим муассасалари ўқувчиларини хорижий тил ва замонавий касбларга ўқитиш бўйича қўшимча чора-тадбирлари тўғрисида»ги қарори ҳамда Ўзбекистон Республикаси Вазирлар Маҳкамасининг 2025 йил 11 февралдаги 78-сон «Умумий ўрта таълим муассасаларида ўқувчиларни касб-ҳунарга ўқитишда тадбиркорлик субъектларини жалб этиш чора-тадбирлари тўғрисида»ги қарорига мувофиқ Ўзбекистон Республикаси Мактабгача ва мактаб таълими вазирлиги ҳамда Камбағалликни қисқартириш ва бандлик вазирлиги қарор қилади:
1. Умумий ўрта таълим муассасалари битирувчиларини ўрганган касб-ҳунари бўйича амалий имтиҳондан ўтказиш ва уларга электрон сертификат бериш тартиби тўғрисидаги низом иловага мувофиқ тасдиқлансин.
2. Мазкур қарор расмий эълон қилинган кундан эътиборан кучга киради.
Ўзбекистон Республикаси Мактабгача ва мактаб таълими вазирлигининг 2025 йил 11 июндаги 3-мҳ-сон ҳамда Камбағалликни қисқартириш ва бандлик вазирлигининг 2025 йил 5 июндаги 08/270-сон қарорига ИЛОВА
Умумий ўрта таълим муассасалари битирувчиларини ўрганган касб-ҳунари бўйича амалий имтиҳондан ўтказиш ва уларга электрон сертификат бериш тартиби тўғрисида
Мазкур Низом умумий ўрта таълим муассасалари битирувчиларини ўрганган касб-ҳунари бўйича амалий имтиҳондан ўтказиш ҳамда уларга электрон сертификат (бундан буён матнда сертификат деб юритилади) бериш тартибини белгилайди.
1-боб. Умумий қоидалар
1. Касб-ҳунарга ўқитиш жорий этиладиган умумий ўрта таълим муассасаларининг (бундан буён матнда мактаб деб юритилади) рўйхати Ўзбекистон Республикаси Мактабгача ва мактаб таълими вазирининг (бундан буён матнда Вазирлик деб юритилади) буйруғи билан тасдиқланади.
2. Ушбу Низомда қуйидаги асосий тушунчалардан фойдаланилади:
битирувчи — мактабнинг 11-синфини тамомлайдиган ва касб-ҳунарни ўрганган ўқувчиси;
сертификат — касб-ҳунарга ўқитиш дастури доирасида амалий имтиҳондан муваффақиятли ўтган битирувчиларга бериладиган электрон ҳужжат;
электрон платформа — сўровнома ва тестлар орқали ўқувчиларнинг қизиқишларини аниқлашга мўлжалланган ҳамда сертификат шаклланадиган ахборот тизими;
касбий таълим фани — мактабнинг 10-11-синф ўқувчиларини касб-ҳунарга ўқитиш учун жорий этилган фан.
2-боб. Касбий таълим йўналиши бўйича амалий имтиҳон ўтказиш
3. Касбий таълим йўналиши бўйича амалий имтиҳон (бундан буён матнда амалий имтиҳон деб юритилади) ўтказиладиган кун ва вақт мактабнинг педагогик кенгаши томонидан тасдиқланади ва бу ҳақида амалий имтиҳон бошланишидан камида ўн беш кун олдин ҳудуддаги тегишли касбий таълим ташкилотига расмий хабар берилади ҳамда мактабнинг эълонлар тахтасига жойлаштирилади.
4. Амалий имтиҳонни ўтказиш учун мактаб директорининг буйруғи билан камида 5 кишидан иборат таркибда амалий имтиҳон ўтказиш комиссияси (бундан буён матнда Комиссия деб юритилади) тузилади.
5. Комиссия қуйидаги таркибдан иборат бўлади:
комиссия раиси — мактаб директори (у бўлмаганда, унинг вазифасини бажарувчи шахс);
комиссия аъзолари — мактаб директорининг ўринбосари (комиссия котиби), касбий таълим ташкилоти ходими, икки нафар технология фани ўқитувчилари.
Комиссия таркибига касб-ҳунар йўналиши бўйича тадбиркорлар ва соҳа мутахассислари киритилиши мумкин.
Комиссия унда аъзоларнинг камида учдан икки қисми иштирок этганда ваколатли ҳисобланади.
Амалий имтиҳоннинг ҳар бир касб тури бўйича баҳолаш мезонлари ва амалий имтиҳон саволлари Вазирлик томонидан тасдиқланади.
6. Амалий имтиҳон натижалари имтиҳон якунлангандан сўнг шу куннинг ўзида эълон қилинади.
7. Амалий имтиҳонда узрли сабабларга кўра (битирувчининг ёки яқин қариндошининг бетоблиги (тиббий маълумотнома асосида), йўл-транспорт ҳодисаси, яқин қариндошининг вафоти, яқин қариндошининг никоҳ тузиши, республика ёки халқаро олимпиада ва танловларда мактаб номидан иштирок этганлиги, Ўзбекистон Республикасидан ташқарида бўлиши сабабли) иштирок этмаган ёки амалий имтиҳонда 55 балл ва ундан паст натижа кўрсатган битирувчига амалий имтиҳон якунланган кундан эътиборан Комиссия қарорига асосан икки ҳафта ичида амалий имтиҳонни қайта топширишга рухсат этилади.
Битирувчи амалий имтиҳонни қайта топширишда 55 балл ёки ундан кам балл тўпласа, унга сертификат берилмайди.
8. Узрсиз сабабларга кўра амалий имтиҳонда қатнашмаган битирувчиларга амалий имтиҳонни қайта топширишга рухсат берилмайди.
3-боб. Баҳолаш мезонлари
9. Амалий имтиҳон орқали битирувчиларнинг ўрганган касб-ҳунар таълими дастури бўйича билим ва компетенцияларининг шаклланганлик даражаси аниқланади.
Амалий имтиҳон 10-11-синф ўқувчилари ўрганган касбий таълим фани ўқув дастурлари асосида ўтказилади.
10. Амалий имтиҳонда амалий топшириқни бажариш учун ҳар бир касбнинг мураккаблиги ва хусусиятидан келиб чиқиб, 120 дақиқагача вақт берилади.
11. Амалий имтиҳонда битирувчи битта амалий топшириқни бажаради ва умумий 100 баллик тизимда Комиссия аъзолари томонидан қуйидагича баҳоланади:
86 — 100 аъло 72 — 85 яхши 56 — 71 қониқарли 0 — 55 қониқарсиз
56 ва ундан юқори балл тўплаган битирувчи амалий имтиҳондан ўтган ҳисобланади.
12. Амалий имтиҳон мактабнинг касб-ҳунар ўргатиладиган хоналарида ёки тегишли корхоналарда, касбий таълим ташкилотларида улар билан келишган ҳолда ташкил этилиши мумкин.
13. Амалий имтиҳонларни ўтказиш учун мактаб имтиҳон ўтказиш жойини керакли жиҳозлар, ўлчов асбоб-ускуналари, техник ҳужжатлар ҳамда хомашё материаллари билан таъминлайди.
14. Амалий имтиҳон бошланишидан олдин комиссия аъзоларидан бири битирувчиларни имтиҳон шартлари, техник шартлар, баҳолаш мезонлари, вақт меъёрлари ва хавфсизлик қоидалари билан таништиради.
4-боб. Сертификатни шакллантириш
15. Мактабда электрон платформадан фойдаланиш ҳамда сертификатни шакллантириш бўйича мактаб директорининг буйруғи билан масъул шахс белгиланади.
Масъул шахс бошқа ишга ўтган тақдирда ёки лавозимидан озод этилганда, унинг ўрнига тайинланган ёки вазифасини вақтинча бажариб турган шахсга мазкур вазифа юклатилади.
16. Ўқув йили давомида касбий таълим фанидан битирувчининг чораклик баҳолари касбий таълим устаси томонидан электрон платформага киритиб борилади.
17. Ҳар йили 25 июнга қадар касбий таълим фанидан амалий имтиҳон баҳолари электрон платформага киритилади ҳамда мактабнинг педагогик кенгаши битирувчиларга сертификат бериш тўғрисида қарор қабул қилади.
18. Битирувчи ҳақидаги барча маълумотлар электрон платформага киритилганидан сўнг сертификат автоматик тарзда шаклланади ҳамда мактаб ва касбий таълим ташкилоти директори томонидан электрон платформа орқали тасдиқланади.
19. Битирувчиларга сертификат ҳар йили 30 июнга қадар, амалий имтиҳонни қайта топширган битирувчиларга 10 июлга қадар берилади.
20. Битирувчилар томонидан сертификат электрон платформа орқали бепул юклаб олинади.
21. Мактабда битирувчиларга берилган сертификатларнинг реестри (сертификатларни рўйхатга олиш китоби) юритиб борилади.
Реестрнинг юритилиши ва сақланишига мактаб директори шахсан жавобгар ҳисобланади.
22. Мактабда касб-ҳунар ўрганган битирувчиларга бериладиган сертификатнинг тавсифи ва давлат намунаси мазкур Низомнинг 1 ва 2-иловаларида келтирилган.
5-боб. Битирувчиларнинг апелляция шикоятларини кўриб чиқиш
23. Битирувчиларнинг апелляция шикоятларини кўриб чиқиш учун апелляция комиссияси ташкил этилади.
Апелляция комиссияси таркиби туман (шаҳар) мактабгача ва мактаб таълими бўлими мудирининг буйруғи билан амалий имтиҳон ўтказиш кунидан камида 15 кун олдин тасдиқланади.
Апелляция комиссияси 1 нафар туман (шаҳар) мактабгача ва мактаб таълими бўлими ходими ҳамда ўқитилган касб-ҳунар тури бўйича 2 нафар малакали мутахассислардан иборат таркибда тузилади.
Апелляция комиссияси таркибига Комиссия аъзолари киритилмайди.
24. Амалий имтиҳон натижаларидан норози бўлган битирувчилар амалий имтиҳон натижаси эълон қилинган куннинг ўзида апелляция комиссиясига ёзма шаклда шикоят аризаси бериши мумкин.
25. Шикоят аризаси апелляция комиссияси томонидан шу куннинг ўзида кўриб чиқилади.
Шикоят аризаси билан мурожаат қилган битирувчи мазкур шикоятни кўриб чиқишда иштирок этиш ҳуқуқига эга.
26. Шикоятни кўриб чиқиш натижалари бўйича апелляция комиссияси томонидан қуйидаги қарорлардан бири қабул қилинади:
имтиҳон натижаларини ўзгаришсиз қолдириш;
имтиҳон натижаларига ўзгартириш киритиш.
Шикоят аризасини кўришда битирувчининг имтиҳонда олган баллини пасайтиришга йўл қўйилмайди.
27. Апелляция комиссияси апелляция шикояти билан мурожаат қилган битирувчига ўз қарорини у қабул қилинган куннинг ўзида маълум қилади.
28. Апелляция комиссиясининг амалий имтиҳон натижаларига ўзгартириш киритиш ва битирувчини амалий имтиҳонларни муваффақиятли топширган деб топиш тўғрисидаги қарори асосида битирувчига тегишли сертификат берилади.
29. Апелляция комиссиясининг қарори устидан битирувчи ёки унинг қонуний вакиллари (ота-оналар, фарзандликка олганлар, васийлар, ҳомийлар) юқори турувчи органга ёки судга шикоят қилиши мумкин.
6-боб. Якуний қоида
30. Мазкур Низом талабларининг бузилишида айбдор бўлган шахслар қонунчилик ҳужжатларига мувофиқ жавобгар бўладилар.
Умумий ўрта таълим муассасалари битирувчиларини ўрганган касб-ҳунари бўйича амалий имтиҳондан ўтказиш ва уларга электрон сертификат бериш тартиби тўғрисидаги низомга 1-ИЛОВА
Умумий ўрта таълим муассасаларида касб-ҳунар ўрганган битирувчиларга бериладиган сертификатнинг
Умумий ўрта таълим муассасаларида касб-ҳунар ўрганган битирувчиларга бериладиган электрон сертификат А4 (297х210мм) ўлчамли кўринишга эга.
Унинг юқори қисмига «OʻZBEKISTON RESPUBLIKASI, REPUBLIC OF UZBEKISTAN» сўзлари 24 шрифт ҳажмида ёзилади ва марказига Ўзбекистон Республикаси Давлат гербининг 30 мм диаметрли тасвири туширилади.
Қуйи қисмига «SERTIFIKAT» сўзи кўк рангда 48 шрифт ҳажмида, «CERTIFICATE» кўк рангда 24 шрифт ҳажмида ёзилади. Сертификатда S ҳарфи ва саккизта рақамли тартиб рақами ва матнлар 14 шрифт ҳажмида ёзилади ( фамилияси, исми, отасининг исми, таълим муассасаси сўзлари 10 шрифт ҳажмида ёзилади ). Электрон сертификат мактаб директори ҳамда касбий таълим ташкилоти директори томонидан электрон платформа орқали имзоланади.
Умумий ўрта таълим муассасалари битирувчиларини ўрганган касб-ҳунари бўйича амалий имтиҳондан ўтказиш ва уларга электрон сертификат бериш тартиби тўғрисидаги низомга 2-ИЛОВА
Мактабгача ва мактаб таълими вазири Х. УМАРОВА
Камбағалликни қисқартириш ва бандлик вазири Б. ЗАХИДОВ
Тошкент ш.,
2025 йил 11 июнь,
Тошкент ш.,
2025 йил 5 июнь,
3-мҳ-сон
08/270-сон
Oʻzbekiston Respublikasi Maktabgacha va maktab taʼlimi vazirligi Oʻzbekiston Respublikasi Kambagʻallikni qisqartirish va bandlik vazirligining
qarori
NIZOM
TAVSIFI
Umumiy oʻrta taʼlim muassasalari bitiruvchilarini oʻrgangan kasb-hunari boʻyicha amaliy imtihondan oʻtkazish va ularga elektron sertifikat berish tartibi toʻgʻrisidagi nizomni tasdiqlash haqida
Oʻzbekiston Respublikasi Prezidentining 2024-yil 2-fevraldagi PQ-53-son “Umumiy oʻrta taʼlim muassasalari oʻquvchilarini xorijiy til va zamonaviy kasblarga oʻqitish boʻyicha qoʻshimcha chora-tadbirlari toʻgʻrisida”gi qarori hamda Oʻzbekiston Respublikasi Vazirlar Mahkamasining 2025-yil 11-fevraldagi 78-son “Umumiy oʻrta taʼlim muassasalarida oʻquvchilarni kasb-hunarga oʻqitishda tadbirkorlik subyektlarini jalb etish chora-tadbirlari toʻgʻrisida”gi qaroriga muvofiq Oʻzbekiston Respublikasi Maktabgacha va maktab taʼlimi vazirligi hamda Kambagʻallikni qisqartirish va bandlik vazirligi qaror qiladi:
1. Umumiy oʻrta taʼlim muassasalari bitiruvchilarini oʻrgangan kasb-hunari boʻyicha amaliy imtihondan oʻtkazish va ularga elektron sertifikat berish tartibi toʻgʻrisidagi nizom ilovaga muvofiq tasdiqlansin.
2. Mazkur qaror rasmiy eʼlon qilingan kundan eʼtiboran kuchga kiradi.
Oʻzbekiston Respublikasi Maktabgacha va maktab taʼlimi vazirligining 2025-yil 11-iyundagi 3-mh-son hamda Kambagʻallikni qisqartirish va bandlik vazirligining 2025-yil 5-iyundagi 08/270-son qaroriga ILOVA
Umumiy oʻrta taʼlim muassasalari bitiruvchilarini oʻrgangan kasb-hunari boʻyicha amaliy imtihondan oʻtkazish va ularga elektron sertifikat berish tartibi toʻgʻrisida
Mazkur Nizom umumiy oʻrta taʼlim muassasalari bitiruvchilarini oʻrgangan kasb-hunari boʻyicha amaliy imtihondan oʻtkazish hamda ularga elektron sertifikat (bundan buyon matnda sertifikat deb yuritiladi) berish tartibini belgilaydi.
1-bob. Umumiy qoidalar
1. Kasb-hunarga oʻqitish joriy etiladigan umumiy oʻrta taʼlim muassasalarining (bundan buyon matnda maktab deb yuritiladi) roʻyxati Oʻzbekiston Respublikasi Maktabgacha va maktab taʼlimi vazirining (bundan buyon matnda Vazirlik deb yuritiladi) buyrugʻi bilan tasdiqlanadi.
2. Ushbu Nizomda quyidagi asosiy tushunchalardan foydalaniladi:
bitiruvchi — maktabning 11-sinfini tamomlaydigan va kasb-hunarni oʻrgangan oʻquvchisi;
sertifikat — kasb-hunarga oʻqitish dasturi doirasida amaliy imtihondan muvaffaqiyatli oʻtgan bitiruvchilarga beriladigan elektron hujjat;
elektron platforma — soʻrovnoma va testlar orqali oʻquvchilarning qiziqishlarini aniqlashga moʻljallangan hamda sertifikat shakllanadigan axborot tizimi;
kasbiy taʼlim fani — maktabning 10-11-sinf oʻquvchilarini kasb-hunarga oʻqitish uchun joriy etilgan fan.
2-bob. Kasbiy taʼlim yoʻnalishi boʻyicha amaliy imtihon oʻtkazish
3. Kasbiy taʼlim yoʻnalishi boʻyicha amaliy imtihon (bundan buyon matnda amaliy imtihon deb yuritiladi) oʻtkaziladigan kun va vaqt maktabning pedagogik kengashi tomonidan tasdiqlanadi va bu haqida amaliy imtihon boshlanishidan kamida oʻn besh kun oldin hududdagi tegishli kasbiy taʼlim tashkilotiga rasmiy xabar beriladi hamda maktabning eʼlonlar taxtasiga joylashtiriladi.
4. Amaliy imtihonni oʻtkazish uchun maktab direktorining buyrugʻi bilan kamida 5 kishidan iborat tarkibda amaliy imtihon oʻtkazish komissiyasi (bundan buyon matnda Komissiya deb yuritiladi) tuziladi.
5. Komissiya quyidagi tarkibdan iborat boʻladi:
komissiya raisi — maktab direktori (u boʻlmaganda, uning vazifasini bajaruvchi shaxs);
komissiya aʼzolari — maktab direktorining oʻrinbosari (komissiya kotibi), kasbiy taʼlim tashkiloti xodimi, ikki nafar texnologiya fani oʻqituvchilari.
Komissiya tarkibiga kasb-hunar yoʻnalishi boʻyicha tadbirkorlar va soha mutaxassislari kiritilishi mumkin.
Komissiya unda aʼzolarning kamida uchdan ikki qismi ishtirok etganda vakolatli hisoblanadi.
Amaliy imtihonning har bir kasb turi boʻyicha baholash mezonlari va amaliy imtihon savollari Vazirlik tomonidan tasdiqlanadi.
6. Amaliy imtihon natijalari imtihon yakunlangandan soʻng shu kunning oʻzida eʼlon qilinadi.
7. Amaliy imtihonda uzrli sabablarga koʻra (bitiruvchining yoki yaqin qarindoshining betobligi (tibbiy maʼlumotnoma asosida), yoʻl-transport hodisasi, yaqin qarindoshining vafoti, yaqin qarindoshining nikoh tuzishi, respublika yoki xalqaro olimpiada va tanlovlarda maktab nomidan ishtirok etganligi, Oʻzbekiston Respublikasidan tashqarida boʻlishi sababli) ishtirok etmagan yoki amaliy imtihonda 55 ball va undan past natija koʻrsatgan bitiruvchiga amaliy imtihon yakunlangan kundan eʼtiboran Komissiya qaroriga asosan ikki hafta ichida amaliy imtihonni qayta topshirishga ruxsat etiladi.
Bitiruvchi amaliy imtihonni qayta topshirishda 55 ball yoki undan kam ball toʻplasa, unga sertifikat berilmaydi.
8. Uzrsiz sabablarga koʻra amaliy imtihonda qatnashmagan bitiruvchilarga amaliy imtihonni qayta topshirishga ruxsat berilmaydi.
3-bob. Baholash mezonlari
9. Amaliy imtihon orqali bitiruvchilarning oʻrgangan kasb-hunar taʼlimi dasturi boʻyicha bilim va kompetensiyalarining shakllanganlik darajasi aniqlanadi.
Amaliy imtihon 10-11-sinf oʻquvchilari oʻrgangan kasbiy taʼlim fani oʻquv dasturlari asosida oʻtkaziladi.
10. Amaliy imtihonda amaliy topshiriqni bajarish uchun har bir kasbning murakkabligi va xususiyatidan kelib chiqib, 120 daqiqagacha vaqt beriladi.
11. Amaliy imtihonda bitiruvchi bitta amaliy topshiriqni bajaradi va umumiy 100 ballik tizimda Komissiya aʼzolari tomonidan quyidagicha baholanadi:
86 — 100 aʼlo 72 — 85 yaxshi 56 — 71 qoniqarli 0 — 55 qoniqarsiz
56 va undan yuqori ball toʻplagan bitiruvchi amaliy imtihondan oʻtgan hisoblanadi.
12. Amaliy imtihon maktabning kasb-hunar oʻrgatiladigan xonalarida yoki tegishli korxonalarda, kasbiy taʼlim tashkilotlarida ular bilan kelishgan holda tashkil etilishi mumkin.
13. Amaliy imtihonlarni oʻtkazish uchun maktab imtihon oʻtkazish joyini kerakli jihozlar, oʻlchov asbob-uskunalari, texnik hujjatlar hamda xomashyo materiallari bilan taʼminlaydi.
14. Amaliy imtihon boshlanishidan oldin komissiya aʼzolaridan biri bitiruvchilarni imtihon shartlari, texnik shartlar, baholash mezonlari, vaqt meʼyorlari va xavfsizlik qoidalari bilan tanishtiradi.
4-bob. Sertifikatni shakllantirish
15. Maktabda elektron platformadan foydalanish hamda sertifikatni shakllantirish boʻyicha maktab direktorining buyrugʻi bilan masʼul shaxs belgilanadi.
Masʼul shaxs boshqa ishga oʻtgan taqdirda yoki lavozimidan ozod etilganda, uning oʻrniga tayinlangan yoki vazifasini vaqtincha bajarib turgan shaxsga mazkur vazifa yuklatiladi.
16. Oʻquv yili davomida kasbiy taʼlim fanidan bitiruvchining choraklik baholari kasbiy taʼlim ustasi tomonidan elektron platformaga kiritib boriladi.
17. Har yili 25-iyunga qadar kasbiy taʼlim fanidan amaliy imtihon baholari elektron platformaga kiritiladi hamda maktabning pedagogik kengashi bitiruvchilarga sertifikat berish toʻgʻrisida qaror qabul qiladi.
18. Bitiruvchi haqidagi barcha maʼlumotlar elektron platformaga kiritilganidan soʻng sertifikat avtomatik tarzda shakllanadi hamda maktab va kasbiy taʼlim tashkiloti direktori tomonidan elektron platforma orqali tasdiqlanadi.
19. Bitiruvchilarga sertifikat har yili 30-iyunga qadar, amaliy imtihonni qayta topshirgan bitiruvchilarga 10-iyulga qadar beriladi.
20. Bitiruvchilar tomonidan sertifikat elektron platforma orqali bepul yuklab olinadi.
21. Maktabda bitiruvchilarga berilgan sertifikatlarning reyestri (sertifikatlarni roʻyxatga olish kitobi) yuritib boriladi.
Reyestrning yuritilishi va saqlanishiga maktab direktori shaxsan javobgar hisoblanadi.
22. Maktabda kasb-hunar oʻrgangan bitiruvchilarga beriladigan sertifikatning tavsifi va davlat namunasi mazkur Nizomning 1 va 2-ilovalarida keltirilgan.
5-bob. Bitiruvchilarning apellyatsiya shikoyatlarini koʻrib chiqish
23. Bitiruvchilarning apellyatsiya shikoyatlarini koʻrib chiqish uchun apellyatsiya komissiyasi tashkil etiladi.
Apellyatsiya komissiyasi tarkibi tuman (shahar) maktabgacha va maktab taʼlimi boʻlimi mudirining buyrugʻi bilan amaliy imtihon oʻtkazish kunidan kamida 15 kun oldin tasdiqlanadi.
Apellyatsiya komissiyasi 1 nafar tuman (shahar) maktabgacha va maktab taʼlimi boʻlimi xodimi hamda oʻqitilgan kasb-hunar turi boʻyicha 2 nafar malakali mutaxassislardan iborat tarkibda tuziladi.
Apellyatsiya komissiyasi tarkibiga Komissiya aʼzolari kiritilmaydi.
24. Amaliy imtihon natijalaridan norozi boʻlgan bitiruvchilar amaliy imtihon natijasi eʼlon qilingan kunning oʻzida apellyatsiya komissiyasiga yozma shaklda shikoyat arizasi berishi mumkin.
25. Shikoyat arizasi apellyatsiya komissiyasi tomonidan shu kunning oʻzida koʻrib chiqiladi.
Shikoyat arizasi bilan murojaat qilgan bitiruvchi mazkur shikoyatni koʻrib chiqishda ishtirok etish huquqiga ega.
26. Shikoyatni koʻrib chiqish natijalari boʻyicha apellyatsiya komissiyasi tomonidan quyidagi qarorlardan biri qabul qilinadi:
imtihon natijalarini oʻzgarishsiz qoldirish;
imtihon natijalariga oʻzgartirish kiritish.
Shikoyat arizasini koʻrishda bitiruvchining imtihonda olgan ballini pasaytirishga yoʻl qoʻyilmaydi.
27. Apellyatsiya komissiyasi apellyatsiya shikoyati bilan murojaat qilgan bitiruvchiga oʻz qarorini u qabul qilingan kunning oʻzida maʼlum qiladi.
28. Apellyatsiya komissiyasining amaliy imtihon natijalariga oʻzgartirish kiritish va bitiruvchini amaliy imtihonlarni muvaffaqiyatli topshirgan deb topish toʻgʻrisidagi qarori asosida bitiruvchiga tegishli sertifikat beriladi.
29. Apellyatsiya komissiyasining qarori ustidan bitiruvchi yoki uning qonuniy vakillari (ota-onalar, farzandlikka olganlar, vasiylar, homiylar) yuqori turuvchi organga yoki sudga shikoyat qilishi mumkin.
6-bob. Yakuniy qoida
30. Mazkur Nizom talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladilar.
Umumiy oʻrta taʼlim muassasalari bitiruvchilarini oʻrgangan kasb-hunari boʻyicha amaliy imtihondan oʻtkazish va ularga elektron sertifikat berish tartibi toʻgʻrisidagi nizomga 1-ILOVA
Umumiy oʻrta taʼlim muassasalarida kasb-hunar oʻrgangan bitiruvchilarga beriladigan sertifikatning
Umumiy oʻrta taʼlim muassasalarida kasb-hunar oʻrgangan bitiruvchilarga beriladigan elektron sertifikat A4 (297x210mm) oʻlchamli koʻrinishga ega.
Uning yuqori qismiga “OʻZBEKISTON RESPUBLIKASI, REPUBLIC OF UZBEKISTAN” soʻzlari 24 shrift hajmida yoziladi va markaziga Oʻzbekiston Respublikasi Davlat gerbining 30 mm diametrli tasviri tushiriladi.
Quyi qismiga “SERTIFIKAT” soʻzi koʻk rangda 48 shrift hajmida, “CERTIFICATE” koʻk rangda 24 shrift hajmida yoziladi. Sertifikatda S harfi va sakkizta raqamli tartib raqami va matnlar 14 shrift hajmida yoziladi ( familiyasi, ismi, otasining ismi, taʼlim muassasasi soʻzlari 10 shrift hajmida yoziladi ). Elektron sertifikat maktab direktori hamda kasbiy taʼlim tashkiloti direktori tomonidan elektron platforma orqali imzolanadi.
Umumiy oʻrta taʼlim muassasalari bitiruvchilarini oʻrgangan kasb-hunari boʻyicha amaliy imtihondan oʻtkazish va ularga elektron sertifikat berish tartibi toʻgʻrisidagi nizomga 2-ILOVA
Maktabgacha va maktab taʼlimi vaziri X. UMAROVA
Kambagʻallikni qisqartirish va bandlik vaziri B. ZAXIDOV
Toshkent sh.,
2025-yil 11-iyun,
Toshkent sh.,
2025-yil 5-iyun,
3-mh-son
08/270-son