📅 2025-yil 17-iyun · Vazirlik va idoralar hujjatlari · Sport vaziri
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 17 июнь · Вазирлик ва идоралар ҳужжатлари · Спорт вазири
Расмий матн. Расмий ҳужжат. Таҳририй изоҳлар киритилмаган.
📅 17 июня 2025 г. · Документы министерств и ведомств · Министр Спорта
Официальный текст. Официальный документ. Редакционные примечания не включены.
📅 17 June 2025 · Ministry and agency documents · Sport vaziri
Official text. Official document. Editorial notes are not included.
Ўзбекистон Республикаси Спорт вазирининг
буйруғи
НИЗОМ
РЕЕСТРИ
Спорт федерациялари (уюшмалари) реестрини юритиш ва ундан маълумотлар тақдим этиш тартиби тўғрисидаги низомни тасдиқлаш ҳақидаги қарорга ўзгартиришлар киритиш тўғрисида
Ўзбекистон Республикасининг «Жисмоний тарбия ва спорт тўғрисида»ги Қонуни ва Ўзбекистон Республикаси Президентининг 2024 йил 18 декабрдаги ПҚ-443-сон «Ёшларнинг спорт билан мунтазам шуғулланиши учун қўшимча шарт-шароитлар яратиш тўғрисида»ги қарорига мувофиқ буюраман:
1. Ўзбекистон Республикаси Жисмоний тарбия ва спорт давлат қўмитасининг 2017 йил 9 октябрдаги 11-мҳ-сон «Спорт федерациялари (уюшмалари) реестрини юритиш ва ундан маълумотлар тақдим этиш тартиби тўғрисидаги низомни тасдиқлаш ҳақида»ги қарорига (рўйхат рақами 2939, 2017 йил 23 октябрь) (Қонун ҳужжатлари маълумотлари миллий базаси, 23.10.2017 й., 10/17/2939/0165-сон) иловага мувофиқ ўзгартиришлар киритилсин.
2. Мазкур буйруқ расмий эълон қилинган кундан эътиборан уч ойдан кейин кучга киради.
Ўзбекистон Республикаси спорт вазирининг 2025 йил 17 июндаги 7-мҳ-сон буйруғига ИЛОВА
Спорт федерациялари (уюшмалари) реестрини юритиш ва ундан маълумотлар тақдим этиш тартиби тўғрисидаги низомни тасдиқлаш ҳақидаги қарорга киритилаётган ўзгартиришлар
1. Қарорда :
а) номи қуйидаги таҳрирда баён этилсин:
«Спорт федерациялари (уюшмалари) реестрини шакллантириш, юритиш, реестрдан чиқариш ва ундан маълумотлар тақдим этиш тартиби тўғрисидаги низомни тасдиқлаш ҳақида»;
б) муқаддимадаги «Қонуни ҳамда Ўзбекистон Республикаси Вазирлар Маҳкамасининг 2017 йил 16 мартдаги 148-сон «Ўзбекистон Республикаси Жисмоний тарбия ва спорт давлат қўмитаси тўғрисидаги низомни тасдиқлаш ҳақида»ги қарорига» деган сўзлар «Қонунига» деган сўз билан алмаштирилсин;
в) 1-банд қуйидаги таҳрирда баён этилсин:
«1. «Спорт федерациялари (уюшмалари) реестрини шакллантириш, юритиш, реестрдан чиқариш ва ундан маълумотлар тақдим этиш тартиби тўғрисидаги низом иловага мувофиқ тасдиқлансин.».
2. Низомнинг матни мазкур ўзгартиришларнинг иловасига мувофиқ таҳрирда баён этилсин.
Спорт федерациялари (уюшмалари) реестрини юритиш ва ундан маълумотлар тақдим этиш тартиби тўғрисидаги низомни тасдиқлаш ҳақидаги қарорга киритилаётган ўзгартиришларга ИЛОВА
«Спорт федерациялари (уюшмалари) реестрини шакллантириш, юритиш, реестрдан чиқариш ва ундан маълумотлар тақдим этиш тартиби тўғрисидаги
Мазкур Низом спорт федерациялари (уюшмалари) реестрини (бундан буён матнда Реестр деб юритилади) шакллантириш, юритиш, реестрдан чиқариш ва ундан маълумотлар тақдим этиш тартибини белгилайди.
1-боб. Умумий қоидалар
1. Мазкур Низомда қуйидаги асосий тушунчалардан фойдаланилади:
махсус ваколатли давлат органи — Ўзбекистон Республикаси Спорт вазирлиги;
спорт федерацияси (уюшмаси) — бир ёки бир нечта спорт турини (спорт турининг тармоғини) ривожлантириш, оммалаштириш, шунингдек спорт тадбирларини ўтказишни ташкил этиш ҳамда спортчиларни — Ўзбекистон Республикасининг спорт терма жамоалари аъзоларини спортнинг тегишли тури бўйича тайёрлаш учун аъзолик асосида ташкил этилган ва давлат рўйхатидан ўтказилган нодавлат нотижорат ташкилоти;
ахборот тизими — махсус ваколатли давлат органининг «ERP sport» ягона электрон бошқарув тизими.
2. Спорт федерациялари (уюшмалари) тўғрисидаги маълумотлар улар давлат рўйхатидан ўтказилганидан кейин Реестрга киритилиши керак.
3. Реестрни юритиш махсус ваколатли давлат органи томонидан ахборот тизимида амалга оширилади.
2-боб. Реестрни шакллантириш
4. Реестрни шакллантириш спорт федерациялари (уюшмалари) томонидан тақдим этиладиган ҳужжатлар асосида амалга оширилади.
Бунда, спорт федерациялари (уюшмалари) давлат рўйхатидан ўтказилганидан кейин спорт федерациясини (уюшмасини) Реестрга киритиш ҳақида махсус ваколатли давлат органига ариза билан мурожаат қилади.
5. Спорт федерацияларини (уюшмаларини) Реестрга киритиш учун улар қуйидаги талабларга мос келиши лозим:
ривожлантирилиши мақсад қилинган спорт тури ёки спорт турлари (спорт турининг тармоғи) бўйича халқаро спорт ташкилотига аъзо эканлиги (миллий ва адаптив спорт турлари бундан мустасно);
ривожлантирилиши мақсад қилинган спорт тури ёки спорт турлари (спорт турининг тармоғи) бўйича спорт мусобақаларини ўтказиш ва уларда иштирок этишга доир талаблар, тартиб ва шартлар белгиланадиган қоидалар, низом (регламент) мавжудлиги;
Реестрга киритилган спортфедерацияларини (уюшмаларини) номларидан фарқланувчи ўзининг номига эга бўлиши ҳамда ривожлантирилиши мақсад қилинган спорт тури ёки спорт турлари (спорт турининг тармоғи) бошқа спорт тури ёки спорт турларининг (спорт турининг тармоғи) элементларидан фарқланиши;
Ўзбекистон Республикасида спорт машғулотлари ва спорт мусобақаларини ўтказиш талабларига жавоб берадиган спорт инфратузилмасининг мавжудлиги.
6. Реестрга киритиш ҳақидаги аризага (спорт федерациясининг (уюшмасининг) номи кўрсатилган ҳолда) қуйидаги ҳужжатлар илова қилинади:
спорт федерациясининг (уюшмасининг) давлат рўйхатидан ўтказилганлиги тўғрисидаги гувоҳнома нусхаси;
спорт федерациялари (уюшмалари) қайси спорт турини ёки спорт турларини (спорт турининг тармоғини) ривожлантириш мақсадида ташкил этилган ва ўз фаолиятини амалга ошираётган бўлса, ўша спорт тури ёки спорт турлари (спорт турининг тармоғи) бўйича спорт мусобақаларини ўтказиш ва уларда иштирок этишга доир талаблар, тартиб ва шартлар белгиланадиган қоидаларнинг, низомнинг (регламентнинг) нусхаси;
спорт федерациялари (уюшмалари) раҳбар органларининг шахсий таркиби тўғрисидаги маълумотлар;
спорт федерацияларининг (уюшмаларининг) халқаро спорт ташкилотларига аъзолиги тўғрисидаги маълумотлар (миллий ва адаптив спорт тури ёки спорт турлари (спорт турининг тармоғи) бўйича спорт федерациялари (уюшмалари) бундан мустасно).
7. Спорт федерациялари (уюшмалари) Реестрга кириш тўғрисидаги ариза махсус ваколатли давлат органи раҳбарининг буйруғи билан ташкил этиладиган доимий фаолият юритадиган Спорт федерациялари (уюшмалари) реестрини шакллантириш, юритиш ва реестрдан чиқариш бўйича эксперт комиссияси (бундан буён матнда Эксперт комиссияси деб юритилади) томонидан бир ой муддатда кўриб чиқилиб, спорт федерациясини (уюшмасини) Реестрга киритиш ёки киритишни рад этиш тўғрисида хулоса берилади.
Бунда, Эксперт комиссиясининг хулосаси махсус ваколатли давлат органи Ҳайъатининг навбатдаги йиғилишига киритилади.
8. Эксперт комиссияси 11 нафар кишидан кам бўлмаган таркибда тузилади, унга махсус ваколатли давлат органининг тегишли таркибий бўлинмалари раҳбарлари ёки мутахассислари, Ўзбекистон Миллий олимпия ва паралимпия қўмиталари, спорт федерациялари (уюшмалари) ҳамда бошқа жисмоний тарбия ва спорт ташкилотларининг вакиллари киритилади.
Эксперт комиссиясига махсус ваколатли давлат органи раҳбарининг тегишли ўринбосари раислик қилади.
9. Эксперт комиссиясининг хулосаси асосида махсус ваколатли давлат органи Ҳайъатининг навбатдаги йиғилишида спорт федерацияларини (уюшмаларини) Реестрга киритиш ёки киритишни рад этиш тўғрисида қарор қабул қилинади.
Спорт федерациялари (уюшмалари) Реестрга киритиш тўғрисидаги қарор қабул қилинганидан сўнг мазкур Низом талабларига асосан спорт федерациялари (уюшмалари) Реестрга киритилади.
Қабул қилинган қарордан кўчирма Ҳайъат йиғилишидан сўнг беш иш куни ичида аризачига юборилади.
10. Махсус ваколатли давлат органи томонидан Реестрга истисно тариқасида Ўзбекистон Республикаси Президенти ва Вазирлар Маҳкамасининг ҳужжатлари билан спорт тури ёки спорт турларини (спорт турининг тармоғини) ривожлантириш белгиланган спорт федерациялари (уюшмалари) тўғридан-тўғри киритилади.
11. Спорт федерациясини (уюшмасини) Реестрга киритишни рад этиш учун қуйидагилар асос бўлиб ҳисобланади:
спорт федерациясини (уюшмасини) мазкур Низомнинг 5-бандида белгиланган талабларга мувофиқ эмаслиги;
мазкур Низомнинг 6-бандида кўрсатилган ҳужжатлар тўлиқ тақдим этилмаганлиги ёки тақдим этилган ҳужжатларда нотўғри ёки бузиб кўрсатилган маълумотлар мавжудлиги аниқланганлиги;
муқаддам махсус ваколатли давлат органи Ҳайъати томонидан қабул қилинган спорт федерациясини (уюшмасини) Реестрга киритишни рад этиш тўғрисидаги қарорда кўрсатилган камчиликларнинг бартараф этилмаганлиги.
Спорт федерацияси (уюшмаси) махсус ваколатли давлат органи Ҳайъати қарорида кўрсатилган камчиликларни бартараф этган ҳолда такроран мурожаат қилишга ҳақли.
3-боб. Реестрни юритиш
12. Реестр мазкур Низомнинг иловасида белгиланган шаклга мувофиқ ахборот тизимида электрон шаклда давлат тилида юритилади.
13. Реестрда қуйидаги маълумотлар кўрсатилади:
тегишли спорт федерацияларининг (уюшмаларининг) номлари;
тегишли спорт федерациялари (уюшмалари) қайси спорт турини ёки спорт турларини (спорт турининг тармоғини) ривожлантириш мақсадида ташкил этилган ва ўз фаолиятини амалга ошираётган бўлса, ўша спорт тури ёки спорт турлари (спорт турининг тармоғи);
тегишли спорт федерациялари (уюшмалари) раҳбар органларининг шахсий таркиби тўғрисидаги маълумотлар;
спорт федерацияларининг (уюшмаларининг) тегишли халқаро спорт ташкилотига аъзолиги тўғрисидаги маълумотлар (миллий ва адаптив спорт тури ёки спорт турлари (спорт турининг тармоғи) бўйича спорт федерациялари (уюшмалари) бундан мустасно).
14. Реестрга киритилган маълумотлар ўзгарган тақдирда, спорт федерациялари (уюшмалари) томонидан ушбу ўзгаришлар ҳақида ўн иш куни ичида махсус ваколатли давлат органига ўзгаришларни тасдиқловчи маълумотлар тақдим этилиши лозим. Бундай маълумотлар махсус ваколатли давлат органига тақдим этилганда, Эксперт комиссиясининг хулосаси асосида махсус ваколатли давлат органи томонидан Ҳайъатининг қарори билан Реестрга ўзгартиришлар киритилади.
15. Спорт федерациясининг (уюшмасининг) ваколатли (юқори) органи томонидан спорт федерацияси (уюшмаси) фаолиятини тугатиш ҳақида қарор (ихтиёрий тугатиш) қабул қилинганда, мазкур қарор қабул қилингандан сўнг беш иш куни ичида махсус ваколатли давлат органига спорт федерациясининг (уюшмасининг) фаолиятини тугатиш ҳақидаги қарор нусхаси аризага илова қилинган ҳолда юборилади.
Спорт федерацияси (уюшмаси) суд томонидан тугатилганда (мажбурий тугатиш), тугатувчи суднинг қарори қонуний кучга кирган кундан бошлаб уч иш куни ичида тугатиш ҳақидаги қарор нусхасини махсус ваколатли давлат органига юборилади.
Бундай маълумотлар махсус ваколатли давлат органига тақдим этилганда, спорт федерацияси (уюшмаси) Эксперт комиссияси томонидан берилган хулоса асосида махсус ваколатли давлат органининг Ҳайъат қарорига асосан Реестрдан чиқарилади.
16. Реестрни юритиш давомида тўпланган барча ҳужжатлар қонунчилик ҳужжатларида белгиланган тартибда сақланади.
4-боб. Спорт федерациясини (уюшмасини) Реестрдан чиқариш
17. Қуйидаги ҳолатлар Эксперт комиссиясининг хулосаси асосида махсус ваколатли давлат органи Ҳайъати томонидан спорт федерациясини (уюшмасини) Реестрдан чиқариш бўйича қарор қабул қилинишига учун асос ҳисобланади:
спорт федерацияларининг (уюшмаларининг) Реестрдан чиқариш юзасидан берилган аризалари асосида;
спорт федерациясининг (уюшмасининг) халқаро спорт ташкилоти аъзолигидан чиқиши (чиқарилиши) (миллий ва адаптив спорт тури ёки спорт турлари (спорт турининг тармоғи) бўйича спорт федерациялари (уюшмалари) бундан мустасно);
спорт федерацияси (уюшмаси) Реестрга киритилганидан сўнг мазкур Низомнинг 6-бандида кўрсатилган ҳужжатларда нотўғри ёки бузиб кўрсатилган маълумотлар мавжудлиги аниқланганлиги;
ривожлантирилиши мақсад қилинган спорт тури ёки спорт турлари (спорт турининг тармоғи) бўйича спортчилар, тренерлар ва ўтказилаётган спорт мусобақалари тўғрисидаги маълумотларнинг ахборот тизимига бир йил давомида киритилмаганлиги;
спорт федерацияси (уюшмаси) Реестрга киритилганидан кейин бир йил давомида ушбу спорт федерацияси (уюшмаси) томонидан Спорт ва оммавий жисмоний тарбия тадбирларининг календарь режасига таклиф киритилмаганлиги ёки тасдиқланган календарь режаси асосида спорт тадбирларининг ўтказилмаганлиги;
спорт федерацияси (уюшмаси) Реестрга киритилганидан кейин бир йил давомида ушбу спорт федерацияси (уюшмаси) томонидан Ўзбекистон Республикасининг спорт терма жамоалари ва уларнинг захирасини шакллантириш ва тасдиқлаш учун махсус ваколатли давлат органига тақдимнома киритилмаганлиги;
спорт федерацияси (уюшмаси) Реестрга киритилганидан кейин бир йил давомида фаолият юритмаганлиги ёки фаолияти тугатилганлиги;
Мазкур банднинг бешинчи — еттинчи хатбошиларида келтирилган қоидалар Олимпия ва Паралимпия, Осиё ва Параосиё ўйинлари дастурига киритилган спорт турлари бўйича фаолият олиб бораётган халқаро спорт ташкилотлари аъзоси ҳисобланган спорт федерацияларига (уюшмаларига) нисбатан қўлланилмайди.
18. Махсус ваколатли давлат органи мазкур Низомнинг 17-бандида кўзда тутилган ҳолатлар юзага келган ҳолларда Эксперт комиссиясининг хулосасига кўра махсус ваколатли давлат органи Ҳайъати қарорига асосан спорт федерациясига (уюшмасига) кўрсатиб ўтилган камчиликларни олти ой муддат ичида бартараф этиш бўйича тақдимнома киритади.
19. Тақдимнома киритилганидан кейин олти ой муддат ичида махсус ваколатли давлат органи Ҳайъати қарорида кўрсатиб ўтилган камчиликлар бартараф этилмаган ёки кўрсатиб ўтилган камчиликлар бартараф этилганлиги тўғрисида нотўғри ёки бузиб кўрсатилган маълумотлар тақдим этилган ҳолларда, спорт федерацияси (уюшмаси) Эксперт комиссияси хулосаси асосида махсус ваколатли давлат органи Ҳайъати қарори билан Реестрдан чиқарилади.
5-боб. Реестрдан маълумотлар тақдим этиш
20. Барча маълумотлар, улар Реестрга киритилгандан сўнг, беш кун ичида махсус ваколатли давлат органининг расмий веб-сайтига жойлаштирилади.
21. Реестрда кўрсатилган маълумотлар очиқ бўлади ва улардан ҳамма фойдаланиши мумкин, бундан тегишли спорт федерациялари (уюшмалари) раҳбар органларининг шахсий таркиби тўғрисидаги маълумотлар, агар бу маълумотлар қонунчилик ҳужжатларига мувофиқ очиқ бўлмаса ва ундан ҳамма фойдаланиши мумкин бўлмаса, мустасно.
22. Реестрдан маълумотлар манфаатдор шахсларнинг мурожаатларига асосан ҳам берилиши мумкин.
6-боб. Якуний қоидалар
23. Махсус ваколатли давлат органи мазкур Низом кучга киргунга қадар қонунчилик ҳужжатларида белгиланган тартибда давлат рўйхатидан ўтказилган спорт федерацияларининг (уюшмаларининг) ушбу Низомда белгиланган тартибда Реестрга киритилишини таъминлайди.
24. Спорт федерациялари (уюшмалари) раҳбарлари Реестрга киритилиши лозим бўлган маълумотларнинг махсус ваколатли давлат органига тўғри ва тўлиқ тақдим этилиши учун масъул ҳисобланади.
25. Махсус ваколатли давлат органи маълумотларнинг Реестрга тўғри ва ўз вақтида киритилиши ҳамда ундан доимий равишда маълумотлар олиш имкониятининг яратилиши учун масъул ҳисобланади.
26. Мазкур Низом талабларининг бузилишида айбдор бўлган шахслар қонунчилик ҳужжатларига мувофиқ жавобгарликка тортилади.
Спорт федерациялари (уюшмалари) реестрини шакллантириш, юритиш, реестрдан чиқариш ва ундан маълумотлар тақдим этиш тартиби тўғрисидаги низомга ИЛОВА
Спорт федерациялари (уюшмалари)
Спорт федерациясининг (уюшмасининг) номи Спорт федерациялари (уюшмалари) томонидан ривожлантиришни мақсад қилган спорт тури ёки спорт турлари (спорт турининг тармоғи) Спорт федерациялари (уюшмалари) раҳбар органларининг шахсий таркиби тўғрисидаги маълумотлар * Спорт федерациясининг (уюшмасининг) халқаро спорт ташкилотларига аъзолиги **
Вазир А. ИКРАМОВ
Тошкент ш.,
2025 йил 17 июнь,
7-мҳ-сон
Oʻzbekiston Respublikasi Sport vazirining
buyrugʻi
NIZOM
REYESTRI
Sport federatsiyalari (uyushmalari) reyestrini yuritish va undan maʼlumotlar taqdim etish tartibi toʻgʻrisidagi nizomni tasdiqlash haqidagi qarorga oʻzgartirishlar kiritish toʻgʻrisida
Oʻzbekiston Respublikasining “Jismoniy tarbiya va sport toʻgʻrisida”gi Qonuni va Oʻzbekiston Respublikasi Prezidentining 2024-yil 18-dekabrdagi PQ-443-son “Yoshlarning sport bilan muntazam shugʻullanishi uchun qoʻshimcha shart-sharoitlar yaratish toʻgʻrisida”gi qaroriga muvofiq buyuraman:
1. Oʻzbekiston Respublikasi Jismoniy tarbiya va sport davlat qoʻmitasining 2017-yil 9-oktabrdagi 11-mh-son “Sport federatsiyalari (uyushmalari) reyestrini yuritish va undan maʼlumotlar taqdim etish tartibi toʻgʻrisidagi nizomni tasdiqlash haqida”gi qaroriga (roʻyxat raqami 2939, 2017-yil 23-oktabr) (Qonun hujjatlari maʼlumotlari milliy bazasi, 23.10.2017-y., 10/17/2939/0165-son) ilovaga muvofiq oʻzgartirishlar kiritilsin.
2. Mazkur buyruq rasmiy eʼlon qilingan kundan eʼtiboran uch oydan keyin kuchga kiradi.
Oʻzbekiston Respublikasi sport vazirining 2025-yil 17-iyundagi 7-mh-son buyrugʻiga ILOVA
Sport federatsiyalari (uyushmalari) reyestrini yuritish va undan maʼlumotlar taqdim etish tartibi toʻgʻrisidagi nizomni tasdiqlash haqidagi qarorga kiritilayotgan oʻzgartirishlar
1. Qarorda :
a) nomi quyidagi tahrirda bayon etilsin:
“Sport federatsiyalari (uyushmalari) reyestrini shakllantirish, yuritish, reyestrdan chiqarish va undan maʼlumotlar taqdim etish tartibi toʻgʻrisidagi nizomni tasdiqlash haqida”;
b) muqaddimadagi “Qonuni hamda Oʻzbekiston Respublikasi Vazirlar Mahkamasining 2017-yil 16-martdagi 148-son “Oʻzbekiston Respublikasi Jismoniy tarbiya va sport davlat qoʻmitasi toʻgʻrisidagi nizomni tasdiqlash haqida”gi qaroriga” degan soʻzlar “Qonuniga” degan soʻz bilan almashtirilsin;
v) 1-band quyidagi tahrirda bayon etilsin:
“1. “Sport federatsiyalari (uyushmalari) reyestrini shakllantirish, yuritish, reyestrdan chiqarish va undan maʼlumotlar taqdim etish tartibi toʻgʻrisidagi nizom ilovaga muvofiq tasdiqlansin.”.
2. Nizomning matni mazkur oʻzgartirishlarning ilovasiga muvofiq tahrirda bayon etilsin.
Sport federatsiyalari (uyushmalari) reyestrini yuritish va undan maʼlumotlar taqdim etish tartibi toʻgʻrisidagi nizomni tasdiqlash haqidagi qarorga kiritilayotgan oʻzgartirishlarga ILOVA
“Sport federatsiyalari (uyushmalari) reyestrini shakllantirish, yuritish, reyestrdan chiqarish va undan maʼlumotlar taqdim etish tartibi toʻgʻrisidagi
Mazkur Nizom sport federatsiyalari (uyushmalari) reyestrini (bundan buyon matnda Reyestr deb yuritiladi) shakllantirish, yuritish, reyestrdan chiqarish va undan maʼlumotlar taqdim etish tartibini belgilaydi.
1-bob. Umumiy qoidalar
1. Mazkur Nizomda quyidagi asosiy tushunchalardan foydalaniladi:
maxsus vakolatli davlat organi — Oʻzbekiston Respublikasi Sport vazirligi;
sport federatsiyasi (uyushmasi) — bir yoki bir nechta sport turini (sport turining tarmogʻini) rivojlantirish, ommalashtirish, shuningdek sport tadbirlarini oʻtkazishni tashkil etish hamda sportchilarni — Oʻzbekiston Respublikasining sport terma jamoalari aʼzolarini sportning tegishli turi boʻyicha tayyorlash uchun aʼzolik asosida tashkil etilgan va davlat roʻyxatidan oʻtkazilgan nodavlat notijorat tashkiloti;
axborot tizimi — maxsus vakolatli davlat organining “ERP sport” yagona elektron boshqaruv tizimi.
2. Sport federatsiyalari (uyushmalari) toʻgʻrisidagi maʼlumotlar ular davlat roʻyxatidan oʻtkazilganidan keyin Reyestrga kiritilishi kerak.
3. Reyestrni yuritish maxsus vakolatli davlat organi tomonidan axborot tizimida amalga oshiriladi.
2-bob. Reyestrni shakllantirish
4. Reyestrni shakllantirish sport federatsiyalari (uyushmalari) tomonidan taqdim etiladigan hujjatlar asosida amalga oshiriladi.
Bunda, sport federatsiyalari (uyushmalari) davlat roʻyxatidan oʻtkazilganidan keyin sport federatsiyasini (uyushmasini) Reyestrga kiritish haqida maxsus vakolatli davlat organiga ariza bilan murojaat qiladi.
5. Sport federatsiyalarini (uyushmalarini) Reyestrga kiritish uchun ular quyidagi talablarga mos kelishi lozim:
rivojlantirilishi maqsad qilingan sport turi yoki sport turlari (sport turining tarmogʻi) boʻyicha xalqaro sport tashkilotiga aʼzo ekanligi (milliy va adaptiv sport turlari bundan mustasno);
rivojlantirilishi maqsad qilingan sport turi yoki sport turlari (sport turining tarmogʻi) boʻyicha sport musobaqalarini oʻtkazish va ularda ishtirok etishga doir talablar, tartib va shartlar belgilanadigan qoidalar, nizom (reglament) mavjudligi;
Reyestrga kiritilgan sportfederatsiyalarini (uyushmalarini) nomlaridan farqlanuvchi oʻzining nomiga ega boʻlishi hamda rivojlantirilishi maqsad qilingan sport turi yoki sport turlari (sport turining tarmogʻi) boshqa sport turi yoki sport turlarining (sport turining tarmogʻi) elementlaridan farqlanishi;
Oʻzbekiston Respublikasida sport mashgʻulotlari va sport musobaqalarini oʻtkazish talablariga javob beradigan sport infratuzilmasining mavjudligi.
6. Reyestrga kiritish haqidagi arizaga (sport federatsiyasining (uyushmasining) nomi koʻrsatilgan holda) quyidagi hujjatlar ilova qilinadi:
sport federatsiyasining (uyushmasining) davlat roʻyxatidan oʻtkazilganligi toʻgʻrisidagi guvohnoma nusxasi;
sport federatsiyalari (uyushmalari) qaysi sport turini yoki sport turlarini (sport turining tarmogʻini) rivojlantirish maqsadida tashkil etilgan va oʻz faoliyatini amalga oshirayotgan boʻlsa, oʻsha sport turi yoki sport turlari (sport turining tarmogʻi) boʻyicha sport musobaqalarini oʻtkazish va ularda ishtirok etishga doir talablar, tartib va shartlar belgilanadigan qoidalarning, nizomning (reglamentning) nusxasi;
sport federatsiyalari (uyushmalari) rahbar organlarining shaxsiy tarkibi toʻgʻrisidagi maʼlumotlar;
sport federatsiyalarining (uyushmalarining) xalqaro sport tashkilotlariga aʼzoligi toʻgʻrisidagi maʼlumotlar (milliy va adaptiv sport turi yoki sport turlari (sport turining tarmogʻi) boʻyicha sport federatsiyalari (uyushmalari) bundan mustasno).
7. Sport federatsiyalari (uyushmalari) Reyestrga kirish toʻgʻrisidagi ariza maxsus vakolatli davlat organi rahbarining buyrugʻi bilan tashkil etiladigan doimiy faoliyat yuritadigan Sport federatsiyalari (uyushmalari) reyestrini shakllantirish, yuritish va reyestrdan chiqarish boʻyicha ekspert komissiyasi (bundan buyon matnda Ekspert komissiyasi deb yuritiladi) tomonidan bir oy muddatda koʻrib chiqilib, sport federatsiyasini (uyushmasini) Reyestrga kiritish yoki kiritishni rad etish toʻgʻrisida xulosa beriladi.
Bunda, Ekspert komissiyasining xulosasi maxsus vakolatli davlat organi Hayʼatining navbatdagi yigʻilishiga kiritiladi.
8. Ekspert komissiyasi 11 nafar kishidan kam boʻlmagan tarkibda tuziladi, unga maxsus vakolatli davlat organining tegishli tarkibiy boʻlinmalari rahbarlari yoki mutaxassislari, Oʻzbekiston Milliy olimpiya va paralimpiya qoʻmitalari, sport federatsiyalari (uyushmalari) hamda boshqa jismoniy tarbiya va sport tashkilotlarining vakillari kiritiladi.
Ekspert komissiyasiga maxsus vakolatli davlat organi rahbarining tegishli oʻrinbosari raislik qiladi.
9. Ekspert komissiyasining xulosasi asosida maxsus vakolatli davlat organi Hayʼatining navbatdagi yigʻilishida sport federatsiyalarini (uyushmalarini) Reyestrga kiritish yoki kiritishni rad etish toʻgʻrisida qaror qabul qilinadi.
Sport federatsiyalari (uyushmalari) Reyestrga kiritish toʻgʻrisidagi qaror qabul qilinganidan soʻng mazkur Nizom talablariga asosan sport federatsiyalari (uyushmalari) Reyestrga kiritiladi.
Qabul qilingan qarordan koʻchirma Hayʼat yigʻilishidan soʻng besh ish kuni ichida arizachiga yuboriladi.
10. Maxsus vakolatli davlat organi tomonidan Reyestrga istisno tariqasida Oʻzbekiston Respublikasi Prezidenti va Vazirlar Mahkamasining hujjatlari bilan sport turi yoki sport turlarini (sport turining tarmogʻini) rivojlantirish belgilangan sport federatsiyalari (uyushmalari) toʻgʻridan-toʻgʻri kiritiladi.
11. Sport federatsiyasini (uyushmasini) Reyestrga kiritishni rad etish uchun quyidagilar asos boʻlib hisoblanadi:
sport federatsiyasini (uyushmasini) mazkur Nizomning 5-bandida belgilangan talablarga muvofiq emasligi;
mazkur Nizomning 6-bandida koʻrsatilgan hujjatlar toʻliq taqdim etilmaganligi yoki taqdim etilgan hujjatlarda notoʻgʻri yoki buzib koʻrsatilgan maʼlumotlar mavjudligi aniqlanganligi;
muqaddam maxsus vakolatli davlat organi Hayʼati tomonidan qabul qilingan sport federatsiyasini (uyushmasini) Reyestrga kiritishni rad etish toʻgʻrisidagi qarorda koʻrsatilgan kamchiliklarning bartaraf etilmaganligi.
Sport federatsiyasi (uyushmasi) maxsus vakolatli davlat organi Hayʼati qarorida koʻrsatilgan kamchiliklarni bartaraf etgan holda takroran murojaat qilishga haqli.
3-bob. Reyestrni yuritish
12. Reyestr mazkur Nizomning ilovasida belgilangan shaklga muvofiq axborot tizimida elektron shaklda davlat tilida yuritiladi.
13. Reyestrda quyidagi maʼlumotlar koʻrsatiladi:
tegishli sport federatsiyalarining (uyushmalarining) nomlari;
tegishli sport federatsiyalari (uyushmalari) qaysi sport turini yoki sport turlarini (sport turining tarmogʻini) rivojlantirish maqsadida tashkil etilgan va oʻz faoliyatini amalga oshirayotgan boʻlsa, oʻsha sport turi yoki sport turlari (sport turining tarmogʻi);
tegishli sport federatsiyalari (uyushmalari) rahbar organlarining shaxsiy tarkibi toʻgʻrisidagi maʼlumotlar;
sport federatsiyalarining (uyushmalarining) tegishli xalqaro sport tashkilotiga aʼzoligi toʻgʻrisidagi maʼlumotlar (milliy va adaptiv sport turi yoki sport turlari (sport turining tarmogʻi) boʻyicha sport federatsiyalari (uyushmalari) bundan mustasno).
14. Reyestrga kiritilgan maʼlumotlar oʻzgargan taqdirda, sport federatsiyalari (uyushmalari) tomonidan ushbu oʻzgarishlar haqida oʻn ish kuni ichida maxsus vakolatli davlat organiga oʻzgarishlarni tasdiqlovchi maʼlumotlar taqdim etilishi lozim. Bunday maʼlumotlar maxsus vakolatli davlat organiga taqdim etilganda, Ekspert komissiyasining xulosasi asosida maxsus vakolatli davlat organi tomonidan Hayʼatining qarori bilan Reyestrga oʻzgartirishlar kiritiladi.
15. Sport federatsiyasining (uyushmasining) vakolatli (yuqori) organi tomonidan sport federatsiyasi (uyushmasi) faoliyatini tugatish haqida qaror (ixtiyoriy tugatish) qabul qilinganda, mazkur qaror qabul qilingandan soʻng besh ish kuni ichida maxsus vakolatli davlat organiga sport federatsiyasining (uyushmasining) faoliyatini tugatish haqidagi qaror nusxasi arizaga ilova qilingan holda yuboriladi.
Sport federatsiyasi (uyushmasi) sud tomonidan tugatilganda (majburiy tugatish), tugatuvchi sudning qarori qonuniy kuchga kirgan kundan boshlab uch ish kuni ichida tugatish haqidagi qaror nusxasini maxsus vakolatli davlat organiga yuboriladi.
Bunday maʼlumotlar maxsus vakolatli davlat organiga taqdim etilganda, sport federatsiyasi (uyushmasi) Ekspert komissiyasi tomonidan berilgan xulosa asosida maxsus vakolatli davlat organining Hayʼat qaroriga asosan Reyestrdan chiqariladi.
16. Reyestrni yuritish davomida toʻplangan barcha hujjatlar qonunchilik hujjatlarida belgilangan tartibda saqlanadi.
4-bob. Sport federatsiyasini (uyushmasini) Reyestrdan chiqarish
17. Quyidagi holatlar Ekspert komissiyasining xulosasi asosida maxsus vakolatli davlat organi Hayʼati tomonidan sport federatsiyasini (uyushmasini) Reyestrdan chiqarish boʻyicha qaror qabul qilinishiga uchun asos hisoblanadi:
sport federatsiyalarining (uyushmalarining) Reyestrdan chiqarish yuzasidan berilgan arizalari asosida;
sport federatsiyasining (uyushmasining) xalqaro sport tashkiloti aʼzoligidan chiqishi (chiqarilishi) (milliy va adaptiv sport turi yoki sport turlari (sport turining tarmogʻi) boʻyicha sport federatsiyalari (uyushmalari) bundan mustasno);
sport federatsiyasi (uyushmasi) Reyestrga kiritilganidan soʻng mazkur Nizomning 6-bandida koʻrsatilgan hujjatlarda notoʻgʻri yoki buzib koʻrsatilgan maʼlumotlar mavjudligi aniqlanganligi;
rivojlantirilishi maqsad qilingan sport turi yoki sport turlari (sport turining tarmogʻi) boʻyicha sportchilar, trenerlar va oʻtkazilayotgan sport musobaqalari toʻgʻrisidagi maʼlumotlarning axborot tizimiga bir yil davomida kiritilmaganligi;
sport federatsiyasi (uyushmasi) Reyestrga kiritilganidan keyin bir yil davomida ushbu sport federatsiyasi (uyushmasi) tomonidan Sport va ommaviy jismoniy tarbiya tadbirlarining kalendar rejasiga taklif kiritilmaganligi yoki tasdiqlangan kalendar rejasi asosida sport tadbirlarining oʻtkazilmaganligi;
sport federatsiyasi (uyushmasi) Reyestrga kiritilganidan keyin bir yil davomida ushbu sport federatsiyasi (uyushmasi) tomonidan Oʻzbekiston Respublikasining sport terma jamoalari va ularning zaxirasini shakllantirish va tasdiqlash uchun maxsus vakolatli davlat organiga taqdimnoma kiritilmaganligi;
sport federatsiyasi (uyushmasi) Reyestrga kiritilganidan keyin bir yil davomida faoliyat yuritmaganligi yoki faoliyati tugatilganligi;
Mazkur bandning beshinchi — yettinchi xatboshilarida keltirilgan qoidalar Olimpiya va Paralimpiya, Osiyo va Paraosiyo oʻyinlari dasturiga kiritilgan sport turlari boʻyicha faoliyat olib borayotgan xalqaro sport tashkilotlari aʼzosi hisoblangan sport federatsiyalariga (uyushmalariga) nisbatan qoʻllanilmaydi.
18. Maxsus vakolatli davlat organi mazkur Nizomning 17-bandida koʻzda tutilgan holatlar yuzaga kelgan hollarda Ekspert komissiyasining xulosasiga koʻra maxsus vakolatli davlat organi Hayʼati qaroriga asosan sport federatsiyasiga (uyushmasiga) koʻrsatib oʻtilgan kamchiliklarni olti oy muddat ichida bartaraf etish boʻyicha taqdimnoma kiritadi.
19. Taqdimnoma kiritilganidan keyin olti oy muddat ichida maxsus vakolatli davlat organi Hayʼati qarorida koʻrsatib oʻtilgan kamchiliklar bartaraf etilmagan yoki koʻrsatib oʻtilgan kamchiliklar bartaraf etilganligi toʻgʻrisida notoʻgʻri yoki buzib koʻrsatilgan maʼlumotlar taqdim etilgan hollarda, sport federatsiyasi (uyushmasi) Ekspert komissiyasi xulosasi asosida maxsus vakolatli davlat organi Hayʼati qarori bilan Reyestrdan chiqariladi.
5-bob. Reyestrdan maʼlumotlar taqdim etish
20. Barcha maʼlumotlar, ular Reyestrga kiritilgandan soʻng, besh kun ichida maxsus vakolatli davlat organining rasmiy veb-saytiga joylashtiriladi.
21. Reyestrda koʻrsatilgan maʼlumotlar ochiq boʻladi va ulardan hamma foydalanishi mumkin, bundan tegishli sport federatsiyalari (uyushmalari) rahbar organlarining shaxsiy tarkibi toʻgʻrisidagi maʼlumotlar, agar bu maʼlumotlar qonunchilik hujjatlariga muvofiq ochiq boʻlmasa va undan hamma foydalanishi mumkin boʻlmasa, mustasno.
22. Reyestrdan maʼlumotlar manfaatdor shaxslarning murojaatlariga asosan ham berilishi mumkin.
6-bob. Yakuniy qoidalar
23. Maxsus vakolatli davlat organi mazkur Nizom kuchga kirgunga qadar qonunchilik hujjatlarida belgilangan tartibda davlat roʻyxatidan oʻtkazilgan sport federatsiyalarining (uyushmalarining) ushbu Nizomda belgilangan tartibda Reyestrga kiritilishini taʼminlaydi.
24. Sport federatsiyalari (uyushmalari) rahbarlari Reyestrga kiritilishi lozim boʻlgan maʼlumotlarning maxsus vakolatli davlat organiga toʻgʻri va toʻliq taqdim etilishi uchun masʼul hisoblanadi.
25. Maxsus vakolatli davlat organi maʼlumotlarning Reyestrga toʻgʻri va oʻz vaqtida kiritilishi hamda undan doimiy ravishda maʼlumotlar olish imkoniyatining yaratilishi uchun masʼul hisoblanadi.
26. Mazkur Nizom talablarining buzilishida aybdor boʻlgan shaxslar qonunchilik hujjatlariga muvofiq javobgarlikka tortiladi.
Sport federatsiyalari (uyushmalari) reyestrini shakllantirish, yuritish, reyestrdan chiqarish va undan maʼlumotlar taqdim etish tartibi toʻgʻrisidagi nizomga ILOVA
Sport federatsiyalari (uyushmalari)
Sport federatsiyasining (uyushmasining) nomi Sport federatsiyalari (uyushmalari) tomonidan rivojlantirishni maqsad qilgan sport turi yoki sport turlari (sport turining tarmogʻi) Sport federatsiyalari (uyushmalari) rahbar organlarining shaxsiy tarkibi toʻgʻrisidagi maʼlumotlar * Sport federatsiyasining (uyushmasining) xalqaro sport tashkilotlariga aʼzoligi **
Vazir A. IKRAMOV
Toshkent sh.,
2025-yil 17-iyun,
7-mh-son