UzbekAI

Ўзбекистон Республикаси Мактабгача ва мактаб таълими вазирлиги Ўзбекистон Республикаси Иқтисодиёт ва молия вазирлигининг

Қарори

Умумий ўрта таълим муассасаларининг узайтирилган кун гуруҳларида болалар таъминоти учун ота-оналар тўловини ундириш ва ундан фойдаланиш тартиби тўғрисидаги низомга ўзгартириш ва қўшимча киритиш ҳақида

Ўзбекистон Республикаси Президентининг 2025 йил 8 майдаги ПФ-84-сон «Камбағал оилаларни давлат томонидан ижтимоий қўллаб-қувватлаш тизимини янада такомиллаштириш тўғрисида»ги Фармонига мувофиқ Ўзбекистон Республикаси Мактабгача ва мактаб таълими вазирлиги ҳамда Иқтисодиёт ва молия вазирлиги қарор қилади:

1. Ўзбекистон Республикаси Халқ таълими вазирлиги ҳамда Ўзбекистон Республикаси Молия вазирлигининг 2016 йил 12 июль 7-мҳ, 52-сон қарори (рўйхат рақами 2820, 2016 йил 3 август) (Ўзбекистон Республикаси қонун ҳужжатлари тўплами, 2016 й., 31-сон, 383-модда) билан тасдиқланган Умумий ўрта таълим муассасаларининг узайтирилган кун гуруҳларида болалар таъминоти учун ота-оналар тўловини ундириш ва ундан фойдаланиш тартиби тўғрисидаги низомга иловага мувофиқ ўзгартириш ва қўшимча киритилсин.

2. Мазкур қарор расмий эълон қилинган кундан эътиборан кучга киради.

Ўзбекистон Республикаси Мактабгача ва мактаб таълими вазирлигининг 2025 йил 14 июлдаги 6-мҳ-сон ҳамда Иқтисодиёт ва молия вазирлигининг 2025 йил 9 июлдаги 271-сон қарорига ИЛОВА

Умумий ўрта таълим муассасаларининг узайтирилган кун гуруҳларида болалар таъминоти учун ота-оналар тўловини ундириш ва ундан фойдаланиш тартиби тўғрисидаги низомга киритилаётган ўзгартириш ва қўшимча

1. 17 ва 18-бандлар қуйидаги таҳрирда баён этилсин:

«17. Умумий ўрта таълим муассасасининг узайтирилган кун гуруҳларига қатнайдиган болалар умумий сонининг 15 фоизи доирасида «Ижтимоий ҳимоя ягона реестри» ахборот тизими орқали кам таъминланган ёки «Камбағал оилалар реестри» ахборот модули орқали камбағал деб эътироф этилган оилалар фарзандлари тўловдан озод қилинади. Бунда, биринчи навбатда ота-оналаридан бири ёки ҳар иккисига ногиронликнинг I ёхуд II гуруҳи белгиланган кам таъминланган ёки камбағал оила фарзандларига, шунингдек ўртача ойлик даромади энг паст даражада бўлган кам таъминланган ёки камбағал оила фарзандларига имтиёз берилади.

18. Тўловдан озод қилинадиган ўқувчилар рўйхати кам таъминланган ёки камбағал оилаларнинг фарзандлари учун «Ижтимоий ҳимоя ягона реестри» ахборот тизими орқали берилган оила кам таъминланган деб эътироф этилганлиги тўғрисидаги маълумотнома ёки «Ягона миллий ижтимоий ҳимоя» ахборот тизими орқали берилган шахснинг камбағал деб эътироф этилган оиланинг аъзоси эканлиги ҳақидаги маълумотнома (оиланинг камбағал деб эътироф этилганлиги тўғрисидаги маълумотлар)га асосан шакллантирилади.».

2. 19 ва 20-бандлар «кам таъминланган» деган сўзлардан кейин «ёки камбағал деб эътироф этилган» деган сўзлар билан тўлдирилсин.

Мактабгача ва мактаб таълими вазири Х. УМАРОВА

Иқтисодиёт ва молия вазири Ж. КУЧКАРОВ

Тошкент ш.,

2025 йил 14 июль,

Тошкент ш.,

2025 йил 9 июль,

6-мҳ-сон

271-сон

(Қонунчилик маълумотлари миллий базаси, 11.08.2025 й., 10/25/2820-3/0719-сон)

Oʻzbekiston Respublikasi Maktabgacha va maktab taʼlimi vazirligi Oʻzbekiston Respublikasi Iqtisodiyot va moliya vazirligining

Qarori

Umumiy oʻrta taʼlim muassasalarining uzaytirilgan kun guruhlarida bolalar taʼminoti uchun ota-onalar toʻlovini undirish va undan foydalanish tartibi toʻgʻrisidagi nizomga oʻzgartirish va qoʻshimcha kiritish haqida

Oʻzbekiston Respublikasi Prezidentining 2025-yil 8-maydagi PF-84-son “Kambagʻal oilalarni davlat tomonidan ijtimoiy qoʻllab-quvvatlash tizimini yanada takomillashtirish toʻgʻrisida”gi Farmoniga muvofiq Oʻzbekiston Respublikasi Maktabgacha va maktab taʼlimi vazirligi hamda Iqtisodiyot va moliya vazirligi qaror qiladi:

1. Oʻzbekiston Respublikasi Xalq taʼlimi vazirligi hamda Oʻzbekiston Respublikasi Moliya vazirligining 2016-yil 12-iyul 7-mh, 52-son qarori (roʻyxat raqami 2820, 2016-yil 3-avgust) (Oʻzbekiston Respublikasi qonun hujjatlari toʻplami, 2016-y., 31-son, 383-modda) bilan tasdiqlangan Umumiy oʻrta taʼlim muassasalarining uzaytirilgan kun guruhlarida bolalar taʼminoti uchun ota-onalar toʻlovini undirish va undan foydalanish tartibi toʻgʻrisidagi nizomga ilovaga muvofiq oʻzgartirish va qoʻshimcha kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Oʻzbekiston Respublikasi Maktabgacha va maktab taʼlimi vazirligining 2025-yil 14-iyuldagi 6-mh-son hamda Iqtisodiyot va moliya vazirligining 2025-yil 9-iyuldagi 271-son qaroriga ILOVA

Umumiy oʻrta taʼlim muassasalarining uzaytirilgan kun guruhlarida bolalar taʼminoti uchun ota-onalar toʻlovini undirish va undan foydalanish tartibi toʻgʻrisidagi nizomga kiritilayotgan oʻzgartirish va qoʻshimcha

1. 17 va 18-bandlar quyidagi tahrirda bayon etilsin:

“17. Umumiy oʻrta taʼlim muassasasining uzaytirilgan kun guruhlariga qatnaydigan bolalar umumiy sonining 15 foizi doirasida “Ijtimoiy himoya yagona reyestri” axborot tizimi orqali kam taʼminlangan yoki “Kambagʻal oilalar reyestri” axborot moduli orqali kambagʻal deb eʼtirof etilgan oilalar farzandlari toʻlovdan ozod qilinadi. Bunda, birinchi navbatda ota-onalaridan biri yoki har ikkisiga nogironlikning I yoxud II guruhi belgilangan kam taʼminlangan yoki kambagʻal oila farzandlariga, shuningdek oʻrtacha oylik daromadi eng past darajada boʻlgan kam taʼminlangan yoki kambagʻal oila farzandlariga imtiyoz beriladi.

18. Toʻlovdan ozod qilinadigan oʻquvchilar roʻyxati kam taʼminlangan yoki kambagʻal oilalarning farzandlari uchun “Ijtimoiy himoya yagona reyestri” axborot tizimi orqali berilgan oila kam taʼminlangan deb eʼtirof etilganligi toʻgʻrisidagi maʼlumotnoma yoki “Yagona milliy ijtimoiy himoya” axborot tizimi orqali berilgan shaxsning kambagʻal deb eʼtirof etilgan oilaning aʼzosi ekanligi haqidagi maʼlumotnoma (oilaning kambagʻal deb eʼtirof etilganligi toʻgʻrisidagi maʼlumotlar)ga asosan shakllantiriladi.”.

2. 19 va 20-bandlar “kam taʼminlangan” degan soʻzlardan keyin “yoki kambagʻal deb eʼtirof etilgan” degan soʻzlar bilan toʻldirilsin.

Maktabgacha va maktab taʼlimi vaziri X. UMAROVA

Iqtisodiyot va moliya vaziri J. KUCHKAROV

Toshkent sh.,

2025-yil 14-iyul,

Toshkent sh.,

2025-yil 9-iyul,

6-mh-son

271-son

(Qonunchilik maʼlumotlari milliy bazasi, 11.08.2025-y., 10/25/2820-3/0719-son)