UzbekAI

Ўзбекистон Республикаси Вазирлар Маҳкамасининг

қарори

Наманган вилояти Янгиқўрғон туманида картошка уруғчилигига ихтисослашган илмий-таълим ташкилотлари фаолиятини йўлга қўйиш чора-тадбирлари тўғрисида

Ўзбекистон Республикаси Президентининг «Наманган вилоятини ижтимоий-иқтисодий ривожлантириш ҳамда инвестиция ва тадбиркорлик муҳитини янада яхшилаш чора-тадбирлари тўғрисида» 2024 йил 2 декабрдаги ПҚ-414-сон қарорига мувофиқ қишлоқ хўжалиги соҳасида малакали ўрта бўғин кадрларини тайёрлашда дуал таълим тизимини жорий қилиш учун зарур шарт-шароитлар яратиш ҳамда картошка уруғчилигига ихтисослашган илмий-таълим ташкилотлари фаолиятини йўлга қўйиш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Наманган вилоятини ижтимоий-иқтисодий ривожлантириш ҳамда инвестиция ва тадбиркорлик муҳитини янада яхшилаш чора-тадбирлари тўғрисида» 2024 йил 2 декабрдаги ПҚ-414-сон қарорида:

Наманган вилояти Янгиқўрғон туманида картошка уруғчилигига ихтисослашган илмий-таълим ташкилотлари фаолиятини йўлга қўйиш;

Янгиқўрғон касб-ҳунарга ўқитиш маркази ўрнида қишлоқ хўжалиги техникумини ташкил этиш;

Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалигида билим ва инновациялар миллий марказининг Сабзавот, полиз экинлари ва картошкачилик илмий-тадқиқот институти (кейинги ўринларда — Институт) Наманган илмий-тажриба станциясини ташкил этиш;

ташкил этиладиган қишлоқ хўжалиги техникумининг бўш турган биноларига Наманган илмий-тажриба станциясини жойлаштириш;

Наманган илмий-тажриба станциясининг ўқув-тажриба хўжалигини ташкил этиш учун ер майдони ажратиш белгилангани маълумот учун қабул қилинсин.

2. Наманган вилояти Янгиқўрғон туманидаги касб-ҳунарга ўқитиш маркази негизида Янгиқўрғон агротехнологиялар техникуми (кейинги ўринларда — Техникум) ташкил этилсин.

3. Қуйидагилар Техникумнинг асосий вазифалари этиб белгилансин:

қишлоқ хўжалиги соҳаси учун меҳнат бозорида рақобатбардош ҳамда юқори малакага эга ўрта бўғин кадрларини тайёрлаш ва ўқув жараёнига дуал таълим тизимини жорий қилиш;

иш берувчи ташкилотлардаги етакчи маҳаллий ва хорижий мутахассисларни таълим жараёнларига жалб этиш орқали ўқув жараёни сифатини таъминлаш;

битирувчиларнинг касбий кўникмалари иш берувчилар ва холис экспертлар томонидан баҳоланишини йўлга қўйиш;

хорижий таълим муассасалари билан ҳамкорлик қилиш, илғор хорижий агротехнологияларни тадқиқ қилиш, бу борада хорижий лабораторияларни жалб қилиш ва консалтинг-маслаҳатлар бериш, методик семинар ва маҳорат дарсларини ташкил этиш;

халқаро ташкилотларнинг грантларини жалб қилган ҳолда ўқувчиларнинг қишлоқ хўжалиги соҳасидаги илғор хорижий ишлаб чиқариш ташкилотларида малакасини ошириш.

4. Белгилансинки:

Техникум Ўзбекистон Республикаси Олий таълим, фан ва инновациялар вазирлиги тизимидаги касбий таълим ташкилоти ҳисобланади ҳамда амалдаги касбий таълим ташкилотларини молиялаштириш тартиби асосида фаолият кўрсатади;

Техникумни сақлаш харажатлари 2025 йилда Наманган вилоятининг тасдиқланган маҳаллий бюджети маблағларини қайта тақсимлаш ҳисобидан молиялаштирилади, 2026 йилдан бошлаб ҳар йили Ўзбекистон Республикаси Давлат бюджети параметрларида назарда тутилади;

Техникумда 2025/2026 ўқув йилидан бошлаб бошланғич, ўрта ва ўрта махсус касбий таълим дастурлари бўйича икки йилдан кам бўлмаган муддатда кундузги, кечки ва дуал таълим шаклларида давлат буюртмаси ва тўлов-контракт асосида кадрлар тайёрлаш йўлга қўйилади;

Техникумнинг ўқув жараёнида дуал таълим тизимини жорий қилиш ва методик ёрдам кўрсатишга Институт бириктирилади;

тасдиқланган намунавий ўқув режаси доирасида Техникумда Германия давлатининг тажрибаси асосида тадбиркорлик кўникмалари ўқитилиши жорий этилади;

Техникумда таълим жараёнини бошқариш, шу жумладан, дарс жадвали, ўқувчилар баҳоларини қайд қилиш, педагог кадрлар ўқув юкламаларини белгилаш ва гуруҳ журналларини юритиш рақамлаштирилади.

5. Ўзбекистон Республикаси Олий таълим, фан ва инновациялар вазирлиги ҳамда Наманган вилояти ҳокимлиги:

бир ой муддатда Техникумнинг уставини тасдиқласин ва белгиланган тартибда давлат рўйхатидан ўтказсин;

ҳар йили 1 мартга қадар белгиланган тартибда Техникумга ўқувчиларни қабул қилиш параметрларини шакллантириб борсин ва тасдиқласин;

2025/2026 ўқув йилидан бошлаб Техникумда ўқитиладиган фанлар бўйича ўқув адабиётлари ва ўқитиш материаллари тўплами билан таъминлаб борсин;

Қишлоқ хўжалиги вазирлиги билан биргаликда ҳудуддаги қишлоқ хўжалиги бўйича йирик иш берувчиларни шартнома асосида Техникумга саноат ҳамкори сифатида бириктирсин ҳамда Техникумнинг қабул қилиш параметрларига мос равишда битирувчиларнинг бандлигини таъминлаш мақсадида йирик иш берувчилар томонидан ишга қабул қилинишига ҳар томонлама кўмаклашсин;

Мактабгача ва мактаб таълими вазирлиги билан биргаликда доимий равишда умумий ўрта таълим ташкилотларининг 9 — 11-синф ўқувчиларини Техникумда тайёрланадиган касб ва мутахассисликлар бўйича касбга йўналтириш ишларини ташкил қилиб борсин.

6. Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалигида билим ва инновациялар миллий маркази тизимидаги муассасалар, шу жумладан, Институт ва унинг ҳудудий тузилмаларидаги штат бирликларини мақбуллаштириш ҳисобига юридик шахс мақомига эга бўлган илмий ташкилот шаклидаги Сабзавот, полиз экинлари ва картошкачилик илмий-тадқиқот институти Наманган илмий-тажриба станцияси (кейинги ўринларда — Наманган илмий-тажриба станцияси) давлат муассасаси ташкил этилсин.

Бунда Наманган вилояти илмий-тажриба станцияси фаолияти Институт томонидан услубий жиҳатдан мувофиқлаштириб борилади.

7. Наманган вилояти Янгиқўрғон тумани Бекобод маҳалласи Олтинводий кўчаси 73-уй манзилда жойлашган Давлат активларини бошқариш агентлигига тегишли бино ва иншоотлар Техникумга оператив бошқариш ҳуқуқи асосида бепул берилсин.

Наманган илмий-тажриба станцияси ушбу банднинг биринчи хатбошисида кўрсатилган бинонинг умумий фойдаланиш майдони 145 метр квадратдан кам бўлмаган қисмига текин фойдаланиш ҳуқуқи асосида жойлаштирилсин.

8. Ўзбекистон Республикаси Қишлоқ хўжалиги вазирлиги бир ой муддатда:

Наманган илмий-тажриба станцияси уставини тасдиқласин ва белгиланган тартибда давлат рўйхатидан ўтказилишини таъминласин;

Наманган илмий-тажриба станциясининг моддий-техник базасини яратиш ва мустаҳкамлашга доир чора-тадбирлар дастурини тасдиқласин.

9. Наманган илмий-тажриба станциясининг фаолиятини молиялаштириш манбалари этиб қуйидагилар белгилансин:

Ўзбекистон Республикаси Давлат бюджети маблағлари;

илмий фаолиятга оид дастурларни амалга ошириш учун Ўзбекистон Республикаси Олий таълим, фан ва инновациялар вазирлиги томонидан ажратиладиган грантлар;

Ўзбекистон Республикаси Қишлоқ хўжалиги вазирлигининг бюджетдан ташқари маблағлари;

халқаро молия институтлари ва хорижий ҳукумат молия ташкилотлари грантлари;

хўжалик фаолиятидан ҳамда шартнома асосида тадқиқотлар ўтказишдан тушадиган тушумлар;

қонунчилик ҳужжатлари билан тақиқланмаган бошқа манбалар.

Наманган илмий-тажриба станциясини сақлаш харажатлари 2025 йилда Ўзбекистон Республикаси республика бюджетидан биринчи даражали бюджет маблағларини тақсимловчи сифатида Ўзбекистон Республикаси Қишлоқ хўжалиги вазирлигига ажратиладиган маблағлар доирасида молиялаштирилади, 2026 йилдан бошлаб ҳар йили Давлат бюджети параметрларида назарда тутилади.

10. Ўзбекистон Республикаси Қишлоқ хўжалиги вазирлиги ва Наманган вилояти ҳокимлигининг Янгиқўрғон тумани «Поромон Шохрухмирзо» ҳудуди 511-контурдаги 7,5 гектар, «Тикланиш Нанай боғбони» ҳудуди 75-контурдаги 5,7 гектар туман ҳокимлиги захирасида бўлган, бўш турган жами 13,2 гектар қишлоқ хўжалигига мўлжалланган суғориладиган ер участкаларини Наманган илмий-тажриба станциясига тажриба хўжалигини ташкил этиш учун ижара ҳуқуқи асосида ажратиш тўғрисидаги таклифига розилик берилсин.

11. Белгилансинки:

ушбу қарорнинг 10-бандида кўрсатилган ер участкалари Наманган илмий-тажриба станциясига 30 йил муддатга, Ўзбекистон Республикасининг Ер кодексига асосан ижара шартномаси муддати тугагандан кейин узайтириш ҳуқуқи билан ижарага берилади;

Наманган илмий-тажриба станциясига ажратиладиган ер майдонларида қишлоқ хўжалиги экинлари етиштирилади ва қишлоқ хўжалиги тармоқларида эришилган илмий натижалар, илғор тажрибалар, замонавий технология ва усуллар синовдан ўтказилади;

Наманган илмий-тажриба станцияси қишлоқ хўжалигига мўлжалланган ер майдонларини ижарага ёки иккиламчи ижарага бериш ҳуқуқига эга эмас.

12. Ўзбекистон Республикаси Қишлоқ хўжалиги вазирлиги:

Наманган вилояти ҳокимлиги билан биргаликда ўн кун муддатда Наманган илмий-тажриба станциясига ажратиладиган ер майдонлари бўйича ижара шартномаси тузилишини ташкил этсин;

Наманган илмий-тажриба станциясининг ер майдонига бўлган ҳуқуқлари давлат рўйхатидан ўтказилишини таъминласин;

Иқтисодиёт ва молия вазирлиги ҳузуридаги Кадастр агентлиги билан биргаликда Қишлоқ хўжалигида билим ва инновациялар миллий марказининг нав синаш станциялари ва участкаларининг қишлоқ хўжалигига мўлжалланган ер майдонларидан мақсадли фойдаланилиши устидан давлат назоратини ўрнатсин.

13. Ўзбекистон Республикаси Қишлоқ хўжалиги вазирлиги Инвестициялар, саноат ва савдо вазирлиги билан биргаликда Наманган илмий-тажриба станциясида 2025-2026 йилларда:

«in-vitro» лабораториясини ташкил этиш;

иссиқхона комплексини барпо этиш;

томчилатиб суғориш технологияларини жорий қилиш;

қишлоқ хўжалиги техникаларини харид қилиш;

уруғликларни қайта ишловчи цехларни ташкил этиш;

уруғликларни сақлаш учун музлаткичли омборларни қуриш;

тупроқ ва сув таҳлиллари ўтказишда зарур жиҳозларни харид қилиш учун халқаро молия институтлари ва хорижий ҳукумат молия ташкилотларнинг грантларини жалб қилсин.

14. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2025 йил 14 август,

516-сон

(Қонунчилик маълумотлари миллий базаси, 15.08.2025 й., 09/25/516/0739-сон)

lex.uz

Oʻzbekiston Respublikasi Vazirlar Mahkamasining

qarori

Namangan viloyati Yangiqoʻrgʻon tumanida kartoshka urugʻchiligiga ixtisoslashgan ilmiy-taʼlim tashkilotlari faoliyatini yoʻlga qoʻyish chora-tadbirlari toʻgʻrisida

Oʻzbekiston Respublikasi Prezidentining “Namangan viloyatini ijtimoiy-iqtisodiy rivojlantirish hamda investitsiya va tadbirkorlik muhitini yanada yaxshilash chora-tadbirlari toʻgʻrisida” 2024-yil 2-dekabrdagi PQ-414-son qaroriga muvofiq qishloq xoʻjaligi sohasida malakali oʻrta boʻgʻin kadrlarini tayyorlashda dual taʼlim tizimini joriy qilish uchun zarur shart-sharoitlar yaratish hamda kartoshka urugʻchiligiga ixtisoslashgan ilmiy-taʼlim tashkilotlari faoliyatini yoʻlga qoʻyish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Namangan viloyatini ijtimoiy-iqtisodiy rivojlantirish hamda investitsiya va tadbirkorlik muhitini yanada yaxshilash chora-tadbirlari toʻgʻrisida” 2024-yil 2-dekabrdagi PQ-414-son qarorida:

Namangan viloyati Yangiqoʻrgʻon tumanida kartoshka urugʻchiligiga ixtisoslashgan ilmiy-taʼlim tashkilotlari faoliyatini yoʻlga qoʻyish;

Yangiqoʻrgʻon kasb-hunarga oʻqitish markazi oʻrnida qishloq xoʻjaligi texnikumini tashkil etish;

Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazining Sabzavot, poliz ekinlari va kartoshkachilik ilmiy-tadqiqot instituti (keyingi oʻrinlarda — Institut) Namangan ilmiy-tajriba stansiyasini tashkil etish;

tashkil etiladigan qishloq xoʻjaligi texnikumining boʻsh turgan binolariga Namangan ilmiy-tajriba stansiyasini joylashtirish;

Namangan ilmiy-tajriba stansiyasining oʻquv-tajriba xoʻjaligini tashkil etish uchun yer maydoni ajratish belgilangani maʼlumot uchun qabul qilinsin.

2. Namangan viloyati Yangiqoʻrgʻon tumanidagi kasb-hunarga oʻqitish markazi negizida Yangiqoʻrgʻon agrotexnologiyalar texnikumi (keyingi oʻrinlarda — Texnikum) tashkil etilsin.

3. Quyidagilar Texnikumning asosiy vazifalari etib belgilansin:

qishloq xoʻjaligi sohasi uchun mehnat bozorida raqobatbardosh hamda yuqori malakaga ega oʻrta boʻgʻin kadrlarini tayyorlash va oʻquv jarayoniga dual taʼlim tizimini joriy qilish;

ish beruvchi tashkilotlardagi yetakchi mahalliy va xorijiy mutaxassislarni taʼlim jarayonlariga jalb etish orqali oʻquv jarayoni sifatini taʼminlash;

bitiruvchilarning kasbiy koʻnikmalari ish beruvchilar va xolis ekspertlar tomonidan baholanishini yoʻlga qoʻyish;

xorijiy taʼlim muassasalari bilan hamkorlik qilish, ilgʻor xorijiy agrotexnologiyalarni tadqiq qilish, bu borada xorijiy laboratoriyalarni jalb qilish va konsalting-maslahatlar berish, metodik seminar va mahorat darslarini tashkil etish;

xalqaro tashkilotlarning grantlarini jalb qilgan holda oʻquvchilarning qishloq xoʻjaligi sohasidagi ilgʻor xorijiy ishlab chiqarish tashkilotlarida malakasini oshirish.

4. Belgilansinki:

Texnikum Oʻzbekiston Respublikasi Oliy taʼlim, fan va innovatsiyalar vazirligi tizimidagi kasbiy taʼlim tashkiloti hisoblanadi hamda amaldagi kasbiy taʼlim tashkilotlarini moliyalashtirish tartibi asosida faoliyat koʻrsatadi;

Texnikumni saqlash xarajatlari 2025-yilda Namangan viloyatining tasdiqlangan mahalliy budjeti mablagʻlarini qayta taqsimlash hisobidan moliyalashtiriladi, 2026-yildan boshlab har yili Oʻzbekiston Respublikasi Davlat budjeti parametrlarida nazarda tutiladi;

Texnikumda 2025/2026 oʻquv yilidan boshlab boshlangʻich, oʻrta va oʻrta maxsus kasbiy taʼlim dasturlari boʻyicha ikki yildan kam boʻlmagan muddatda kunduzgi, kechki va dual taʼlim shakllarida davlat buyurtmasi va toʻlov-kontrakt asosida kadrlar tayyorlash yoʻlga qoʻyiladi;

Texnikumning oʻquv jarayonida dual taʼlim tizimini joriy qilish va metodik yordam koʻrsatishga Institut biriktiriladi;

tasdiqlangan namunaviy oʻquv rejasi doirasida Texnikumda Germaniya davlatining tajribasi asosida tadbirkorlik koʻnikmalari oʻqitilishi joriy etiladi;

Texnikumda taʼlim jarayonini boshqarish, shu jumladan, dars jadvali, oʻquvchilar baholarini qayd qilish, pedagog kadrlar oʻquv yuklamalarini belgilash va guruh jurnallarini yuritish raqamlashtiriladi.

5. Oʻzbekiston Respublikasi Oliy taʼlim, fan va innovatsiyalar vazirligi hamda Namangan viloyati hokimligi:

bir oy muddatda Texnikumning ustavini tasdiqlasin va belgilangan tartibda davlat roʻyxatidan oʻtkazsin;

har yili 1-martga qadar belgilangan tartibda Texnikumga oʻquvchilarni qabul qilish parametrlarini shakllantirib borsin va tasdiqlasin;

2025/2026 oʻquv yilidan boshlab Texnikumda oʻqitiladigan fanlar boʻyicha oʻquv adabiyotlari va oʻqitish materiallari toʻplami bilan taʼminlab borsin;

Qishloq xoʻjaligi vazirligi bilan birgalikda hududdagi qishloq xoʻjaligi boʻyicha yirik ish beruvchilarni shartnoma asosida Texnikumga sanoat hamkori sifatida biriktirsin hamda Texnikumning qabul qilish parametrlariga mos ravishda bitiruvchilarning bandligini taʼminlash maqsadida yirik ish beruvchilar tomonidan ishga qabul qilinishiga har tomonlama koʻmaklashsin;

Maktabgacha va maktab taʼlimi vazirligi bilan birgalikda doimiy ravishda umumiy oʻrta taʼlim tashkilotlarining 9 — 11-sinf oʻquvchilarini Texnikumda tayyorlanadigan kasb va mutaxassisliklar boʻyicha kasbga yoʻnaltirish ishlarini tashkil qilib borsin.

6. Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi tizimidagi muassasalar, shu jumladan, Institut va uning hududiy tuzilmalaridagi shtat birliklarini maqbullashtirish hisobiga yuridik shaxs maqomiga ega boʻlgan ilmiy tashkilot shaklidagi Sabzavot, poliz ekinlari va kartoshkachilik ilmiy-tadqiqot instituti Namangan ilmiy-tajriba stansiyasi (keyingi oʻrinlarda — Namangan ilmiy-tajriba stansiyasi) davlat muassasasi tashkil etilsin.

Bunda Namangan viloyati ilmiy-tajriba stansiyasi faoliyati Institut tomonidan uslubiy jihatdan muvofiqlashtirib boriladi.

7. Namangan viloyati Yangiqoʻrgʻon tumani Bekobod mahallasi Oltinvodiy koʻchasi 73-uy manzilda joylashgan Davlat aktivlarini boshqarish agentligiga tegishli bino va inshootlar Texnikumga operativ boshqarish huquqi asosida bepul berilsin.

Namangan ilmiy-tajriba stansiyasi ushbu bandning birinchi xatboshisida koʻrsatilgan binoning umumiy foydalanish maydoni 145 metr kvadratdan kam boʻlmagan qismiga tekin foydalanish huquqi asosida joylashtirilsin.

8. Oʻzbekiston Respublikasi Qishloq xoʻjaligi vazirligi bir oy muddatda:

Namangan ilmiy-tajriba stansiyasi ustavini tasdiqlasin va belgilangan tartibda davlat roʻyxatidan oʻtkazilishini taʼminlasin;

Namangan ilmiy-tajriba stansiyasining moddiy-texnik bazasini yaratish va mustahkamlashga doir chora-tadbirlar dasturini tasdiqlasin.

9. Namangan ilmiy-tajriba stansiyasining faoliyatini moliyalashtirish manbalari etib quyidagilar belgilansin:

Oʻzbekiston Respublikasi Davlat budjeti mablagʻlari;

ilmiy faoliyatga oid dasturlarni amalga oshirish uchun Oʻzbekiston Respublikasi Oliy taʼlim, fan va innovatsiyalar vazirligi tomonidan ajratiladigan grantlar;

Oʻzbekiston Respublikasi Qishloq xoʻjaligi vazirligining budjetdan tashqari mablagʻlari;

xalqaro moliya institutlari va xorijiy hukumat moliya tashkilotlari grantlari;

xoʻjalik faoliyatidan hamda shartnoma asosida tadqiqotlar oʻtkazishdan tushadigan tushumlar;

qonunchilik hujjatlari bilan taqiqlanmagan boshqa manbalar.

Namangan ilmiy-tajriba stansiyasini saqlash xarajatlari 2025-yilda Oʻzbekiston Respublikasi respublika budjetidan birinchi darajali budjet mablagʻlarini taqsimlovchi sifatida Oʻzbekiston Respublikasi Qishloq xoʻjaligi vazirligiga ajratiladigan mablagʻlar doirasida moliyalashtiriladi, 2026-yildan boshlab har yili Davlat budjeti parametrlarida nazarda tutiladi.

10. Oʻzbekiston Respublikasi Qishloq xoʻjaligi vazirligi va Namangan viloyati hokimligining Yangiqoʻrgʻon tumani “Poromon Shoxruxmirzo” hududi 511-konturdagi 7,5 gektar, “Tiklanish Nanay bogʻboni” hududi 75-konturdagi 5,7 gektar tuman hokimligi zaxirasida boʻlgan, boʻsh turgan jami 13,2 gektar qishloq xoʻjaligiga moʻljallangan sugʻoriladigan yer uchastkalarini Namangan ilmiy-tajriba stansiyasiga tajriba xoʻjaligini tashkil etish uchun ijara huquqi asosida ajratish toʻgʻrisidagi taklifiga rozilik berilsin.

11. Belgilansinki:

ushbu qarorning 10-bandida koʻrsatilgan yer uchastkalari Namangan ilmiy-tajriba stansiyasiga 30 yil muddatga, Oʻzbekiston Respublikasining Yer kodeksiga asosan ijara shartnomasi muddati tugagandan keyin uzaytirish huquqi bilan ijaraga beriladi;

Namangan ilmiy-tajriba stansiyasiga ajratiladigan yer maydonlarida qishloq xoʻjaligi ekinlari yetishtiriladi va qishloq xoʻjaligi tarmoqlarida erishilgan ilmiy natijalar, ilgʻor tajribalar, zamonaviy texnologiya va usullar sinovdan oʻtkaziladi;

Namangan ilmiy-tajriba stansiyasi qishloq xoʻjaligiga moʻljallangan yer maydonlarini ijaraga yoki ikkilamchi ijaraga berish huquqiga ega emas.

12. Oʻzbekiston Respublikasi Qishloq xoʻjaligi vazirligi:

Namangan viloyati hokimligi bilan birgalikda oʻn kun muddatda Namangan ilmiy-tajriba stansiyasiga ajratiladigan yer maydonlari boʻyicha ijara shartnomasi tuzilishini tashkil etsin;

Namangan ilmiy-tajriba stansiyasining yer maydoniga boʻlgan huquqlari davlat roʻyxatidan oʻtkazilishini taʼminlasin;

Iqtisodiyot va moliya vazirligi huzuridagi Kadastr agentligi bilan birgalikda Qishloq xoʻjaligida bilim va innovatsiyalar milliy markazining nav sinash stansiyalari va uchastkalarining qishloq xoʻjaligiga moʻljallangan yer maydonlaridan maqsadli foydalanilishi ustidan davlat nazoratini oʻrnatsin.

13. Oʻzbekiston Respublikasi Qishloq xoʻjaligi vazirligi Investitsiyalar, sanoat va savdo vazirligi bilan birgalikda Namangan ilmiy-tajriba stansiyasida 2025-2026-yillarda:

“in-vitro” laboratoriyasini tashkil etish;

issiqxona kompleksini barpo etish;

tomchilatib sugʻorish texnologiyalarini joriy qilish;

qishloq xoʻjaligi texnikalarini xarid qilish;

urugʻliklarni qayta ishlovchi sexlarni tashkil etish;

urugʻliklarni saqlash uchun muzlatkichli omborlarni qurish;

tuproq va suv tahlillari oʻtkazishda zarur jihozlarni xarid qilish uchun xalqaro moliya institutlari va xorijiy hukumat moliya tashkilotlarning grantlarini jalb qilsin.

14. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 14-avgust,

516-son

(Qonunchilik maʼlumotlari milliy bazasi, 15.08.2025-y., 09/25/516/0739-son)

lex.uz