UzbekAI

Ўзбекистон Республикаси Вазирлар Маҳкамасининг

қарори

НИЗОМ

Ўзбекистон Республикаси Дин ишлари бўйича қўмитаси тўғрисидаги низомни тасдиқлаш ҳақида

Ўзбекистон Республикаси Президентининг «Фуқароларнинг виждон эркинлиги ҳуқуқи кафолатларини янада мустаҳкамлаш ҳамда диний-маърифий соҳадаги ислоҳотларни янги босқичга олиб чиқиш чора-тадбирлари тўғрисида» 2025 йил 21 апрелдаги ПФ-68-сон Фармонига мувофиқ Ўзбекистон Республикаси Дин ишлари бўйича қўмитаси фаолиятини янада такомиллаштириш мақсадида Вазирлар Маҳкамаси қарор қилади:

1. Қуйидагиларни назарда тутувчи Ўзбекистон Республикаси Дин ишлари бўйича қўмитаси тўғрисидаги низом 1-иловага мувофиқ тасдиқлансин:

Дин ишлари бўйича қўмитанинг мақоми, асосий вазифалари ва функциялари;

Дин ишлари бўйича қўмитанинг ҳуқуқлари ҳамда жавобгарлиги, шунингдек, унинг фаолиятини ташкил этиш тартиби;

Дин ишлари бўйича қўмита раҳбариятининг асосий функционал вазифалари ва жавобгарлиги;

Дин ишлари бўйича қўмита фаолиятини молиялаштириш, унинг ходимлари меҳнатига ҳақ тўлаш ва моддий рағбатлантириш тартиби.

2. Вазирлар Маҳкамасининг 2024 йил 12 октябрдаги 668-сон қарори билан тасдиқланган Ўзбекистон Республикаси Дин ишлари бўйича қўмитаси ҳузуридаги «Зиёрат» жамғармаси тўғрисидаги низомга 2-иловага мувофиқ ўзгартириш ва қўшимчалар киритилсин.

3. Вазирлар Маҳкамасининг «Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита тўғрисидаги низомни тасдиқлаш ҳақида» 2021 йил 29 сентябрдаги 612-сон қарори ўз кучини йўқотган деб ҳисоблансин.

4. Дин ишлари бўйича қўмита манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.

5. Мазкур қарорнинг бажарилишини назорат қилиш Ўзбекистон Республикаси Дин ишлари бўйича қўмитаси раиси С.Д. Тошбоев зиммасига юклансин.

Вазирлар Маҳкамасининг 2025 йил 20 августдаги 521-сон қарорига 1-ИЛОВА

Ўзбекистон Республикаси Дин ишлари бўйича қўмитаси тўғрисида

1-боб. Умумий қоидалар

1. Мазкур Низом Ўзбекистон Республикаси Дин ишлари бўйича қўмитасининг (кейинги ўринларда — Қўмита) мақоми, асосий вазифалари ва функциялари, ҳуқуқлари ва жавобгарлигини, шунингдек, фаолиятини ташкил этиш тартибини белгилайди.

2. Қўмита алоҳида мустақил мақомга эга республика ижро этувчи ҳокимият органи ҳисобланиб, дин ишлари соҳасида ягона давлат сиёсатини ишлаб чиқади ва амалга оширади, ушбу йўналишда ижро этувчи ҳокимият органларининг фаолиятини мувофиқлаштиради.

3. Қўмита ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг Фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, шунингдек, ушбу Низомга ва бошқа қонунчилик ҳужжатларига амал қилади.

4. Қўмита ўз фаолиятини республика ижро этувчи ҳокимият органлари, маҳаллий ижро этувчи ҳокимият органлари, хўжалик бирлашмалари ва бошқа ташкилотлар, шу жумладан, халқаро ташкилотлар билан ўзаро ҳамкорликда амалга оширади.

5. Қўмитанинг ўз ваколатлари доирасида қабул қилган қарорлари республика ижро этувчи ҳокимият органлари, маҳаллий ижро этувчи ҳокимият органлари, бошқа ташкилотлар ва уларнинг мансабдор шахслари, шунингдек, фуқаролар томонидан бажарилиши мажбурий ҳисобланади.

6. Қўмита юридик шахс ҳисобланади, Ўзбекистон Республикаси Давлат герби тасвири туширилган ва ўзининг номи давлат тилида ёзилган муҳр ва бланкларга, мустақил балансга, Иқтисодиёт ва молия вазирлиги ҳузуридаги Ғазначилик хизмати қўмитасида шахсий ғазна ҳисобварақларига, шу жумладан, чет эл валютасидаги шахсий ғазна ҳисобварақларига эга бўлади.

7. Қўмитанинг расмий номи:

давлат тилида:

тўлиқ номи — Ўзбекистон Республикаси Дин ишлари бўйича қўмитаси, қисқартирилган номи — Дин ишлари қўмитаси;

рус тилида:

тўлиқ номи — Комитет по делам религий Республики Узбекистан, қисқартирилган номи — КПДР;

инглиз тилида:

тўлиқ номи — Committee of Religious Affairs of the Republic of Uzbekistan, қисқартирилган номи — Committee of Religious Affairs.

8. Қўмитанинг жойлашган ери (почта манзили): 100011, Тошкент шаҳри, Шайхонтоҳур тумани, А. Навоий кўчаси, 12-уй.

2-боб. Қўмитанинг ташкилий тузилмаси

9. Қўмита тизимига қуйидагилар киради:

Қўмитанинг марказий аппарати;

Диний-маърифий соҳада малака ошириш ва қайта тайёрлаш институти;

Қўмитанинг Қорақалпоғистон Республикаси, вилоятлар ва Тошкент шаҳар ҳудудий бошқармалари (кейинги ўринларда — ҳудудий бошқармалар).

10. Ҳудудий бошқармалар юридик шахс ҳисобланмайди ва уларнинг тузилмасида туманлар ва шаҳарлар бўйича бош мутахассислар фаолият юритади.

3-боб. Қўмитанинг асосий вазифалари ва функциялари

11. Қуйидагилар Қўмитанинг асосий вазифалари ҳисобланади:

виждон эркинлиги ва диний ташкилотлар тўғрисидаги қонунчилик ҳужжатларига мувофиқ дин ишлари соҳасида ягона давлат сиёсатини амалга ошириш, ушбу жараёнда давлат ва жамоат ташкилотларининг ўзаро ҳамкорлигини йўлга қўйиш;

Ўзбекистон Республикасининг дунёвий давлат принципини рўёбга чиқариш, фуқароларнинг виждон эркинлиги кафолатларини, аҳолининг дини ва эътиқодидан қатъи назар ҳуқуқлари тўлиқ рўёбга чиқарилишини таъминлаш, виждон эркинлиги бузилишининг ҳар қандай кўринишини олдини олиш;

диний мутаассиблик, экстремизм ва терроризм ғояларини тарқатиш, турли конфессиялар ўртасида адоватни юзага келтиришга қаратилган хатти-ҳаракатларнинг олдини олиш, уларнинг ўзаро аҳил-иноқ ва ҳамжиҳат ҳаёт кечиришини қўллаб-қувватлаш чораларини кўриш;

жамиятда диний-маърифий муҳит барқарорлиги ва эътиқод эркинлигига таҳдид туғдириши мумкин бўлган омилларни ўрганиш, таҳлил қилиш ва уларнинг олдини олиш бўйича таклифлар ишлаб чиқиш, ушбу жараёнларда диний-маърифий соҳа вакилларининг иштирокини кенгайтириш;

давлат органларининг диний ташкилотлар билан ўзаро алоқаси ва ҳамкорлигини мувофиқлаштириш ҳамда давлат сиёсатида диний ташкилотлар манфаатларини акс эттириш;

аҳоли орасида конфессиялараро тотувлик ва диний бағрикенгликни мустаҳкамлаш бўйича тарғибот ва ташвиқот ишларини олиб бориш;

фуқароларнинг хорижий давлатларга ҳамда чет эл фуқароларининг Ўзбекистонга зиёрат туризмини амалга ошириши учун шарт-шароитлар яратишга кўмаклашиш;

экстремизм ва мутаассиблик ғоялари таъсирига тушиб қолган шахсларни соғлом ҳаётга қайтариш, жамиятда тинчлик ва тотувлик муҳитини мустаҳкамлаш, диндан сиёсий мақсадларда фойдаланишга йўл қўймасликка қаратилган маърифий-тарбиявий ишларни олиб бориш, бу борада илғор хорижий тажриба асосида таклифлар тайёрлаш;

оммавий ахборот воситаларида, шу жумладан Интернет жаҳон ахборот тармоғида диний-маърифий соҳадаги ягона давлат сиёсатига нисбатан нохолис маълумотлар тарқалишининг олдини олиш ҳамда диний мутаассиблик ва экстремизм руҳидаги ахборотларга тезкор ва илмий раддиялар бериш;

диний-маърифий соҳада малакали кадрларни тайёрлаш, қайта тайёрлаш ва малакасини ошириш, илмий-тадқиқот марказларининг тадқиқот йўналишларини мувофиқлаштириш;

манфаатдор ташкилотлар билан ҳамкорликда аҳолининг диний-ижтимоий жараёнларга муносабатини ўрганиш бўйича ижтимоий сўровлар ташкил этиш.

12. Қўмита ўзига юкланган вазифаларни бажариш учун қуйидаги функцияларни амалга оширади:

а) виждон эркинлиги ва диний ташкилотлар тўғрисидаги қонунчилик ҳужжатларига мувофиқ дин ишлари соҳасида ягона давлат сиёсатини амалга ошириш, ушбу жараёнда давлат ва жамоат ташкилотларининг ўзаро ҳамкорлигини йўлга қўйиш борасида:

виждон эркинлиги ва диний ташкилотлар тўғрисидаги қонунчилик ҳужжатларига мувофиқ дин ишлари соҳасидаги масалаларни ҳал қилишда ягона давлат сиёсатини амалга оширади;

давлат органларининг диний ташкилотлар билан ўзаро муносабатларини мувофиқлаштиради ҳамда виждон эркинлиги ва диний ташкилотлар тўғрисидаги қонунчилик ҳужжатларининг ижроси юзасидан назоратни амалга оширади;

дин ишлари соҳасидаги давлат сиёсатининг асосий мақсади, вазифалари ва принципларини кенг жамоатчиликка, давлат ва жамоат ташкилотлари раҳбар ва ходимларига тушунтириш, уларнинг фаоллиги, ташаббускорлигини ошириш ишларини олиб боради;

диний ташкилотларни рўйхатдан ўтказиш юзасидан хулоса олиш бўйича мурожаатларни кўриб чиқади, ҳудудий бошқармалар томонидан бундай мурожаатларнинг қонунчилик ҳужжатларига мувофиқлигини жойларда ўрганилишини назорат қилади;

диний таълим муассасалари ҳамда «Умра» тадбирларини ташкил этиш ва ўтказиш фаолиятини белгиланган тартибда лицензияланиши таъминлайди, лицензиатлар томонидан лицензия талаблари ва шартларига риоя этилиши юзасидан назоратни ташкил қилади, лицензиялар реестрини юритади;

диний таълим муассасаларининг фаолиятини, уларнинг ўқув жараёни ва дастурларини, ўқув-тарбиявий ишларни, фанлар бўйича ўқув режаларини, диний мавзудаги илмий-тадқиқот ишларини мувофиқлаштиради, уларга ушбу фаолиятни амалга оширишда ташкилий-ҳуқуқий ва методик ёрдам кўрсатади;

республикада чиқариладиган ёки хориждан келтириладиган диний мазмундаги материалларни (китоблар, рисолалар, журналлар, газеталар, варақалар, бошқа босма нашрлар, белгилар, предметлар, рамзлар, аудиовизуал асарлар (теле, кино ва видеофильмлар, клиплар, концерт дастурларининг ёзувлари, мультфильмлар ва бошқалар), электрон ахборот ташувчиларни (дискетлар, CD, DVD дисклари, ўрнатилган ва ечиб олинадиган хотира карталари, Интернет жаҳон ахборот тармоғида жойлаштирилган материаллар ва бошқалар) экспертизадан ўтказади, хулосалар беради ва мазкур фаолиятни мувофиқлаштиради;

диний мазмундаги материалларни ноқонуний тайёрлаш, олиб кириш ва тарқатиш ҳолатларини аниқлаш ҳамда олдини олиш мақсадида назорат тадбирларини ўтказади ва натижаси бўйича ҳужжатларни кўриб чиқиш учун ҳуқуқни муҳофаза қилувчи органларга тақдим қилади;

виждон эркинлиги ва диний ташкилотлар фаолиятига тааллуқли норматив-ҳуқуқий ҳужжатлар лойиҳаларини ишлаб чиқишда қатнашади;

б) Ўзбекистон Республикасининг дунёвий давлат принципини рўёбга чиқариш, фуқароларнинг виждон эркинлиги кафолатларини, аҳолининг дини ва эътиқодидан қатъи назар ҳуқуқлари тўлиқ рўёбга чиқарилишини таъминлаш, виждон эркинлиги бузилишининг ҳар қандай кўринишини олдини олиш борасида:

Ўзбекистон Республикаси фуқароларининг, шунингдек, диний эътиқодидан қатъи назар, Ўзбекистон Республикаси ҳудудида истиқомат қилувчи чет эл фуқаролари ва фуқаролиги бўлмаган шахсларнинг диний эркинлигини таъминлашнинг қонуний чораларини кўради;

фуқароларнинг виждон эркинлиги кафолатларини ҳимоя қилиш борасида тегишли чораларни белгилайди ҳамда манфаатдор ташкилотлар билан ҳамкорликни йўлга қўяди;

диний ташкилотлар раҳбарларининг дунёвий давлат принциплари, давлатнинг дин ишлари соҳасидаги сиёсатининг моҳияти, амалга оширилаётган ислоҳотлар ҳақидаги тушунча ва дунёқарашини кенгайтириш мақсадида маърифий тадбирлар ташкил этади;

виждон эркинлиги кафолатларининг бузилиши ҳолатларига нисбатан тезкор чора-тадбирлар кўради;

диний ташкилотлар вакилларининг ибодат маросимларида ўқиладиган маърузалари мазмуни Ўзбекистон Республикасининг Конституцияси ва қонунларига ҳамда диний соҳадаги давлат сиёсати принципига мувофиқ бўлишини таъминлайди;

рўйхатдан ўтган диний ташкилот аъзоларининг эркин ибодат қилиши, диний расм-русумларни адо этиши учун шарт-шароитлар яратишга кўмаклашади;

в) диний мутаассиблик, экстремизм ва терроризм ғояларини тарқатиш, турли конфессиялар ўртасида адоватни юзага келтиришга қаратилган хатти-ҳаракатларнинг олдини олиш, уларнинг ўзаро аҳил-иноқ ва ҳамжиҳат ҳаёт кечиришини кўллаб-қувватлаш чораларини кўриш борасида:

диний мутаассиблик, экстремизм ва терроризм ғояларини тарқатиш, турли конфессиялар ўртасида адоватни юзага келтириш ҳамда диний вазиятга салбий таъсир этувчи омилларни ўрганиш ва бартараф этиш чора-тадбирларини ишлаб чиқишда илмий-тадқиқот марказлари, ташкилотлар ва таълим муассасалари билан ҳамкорликни йўлга қўяди;

Ўзбекистонда ва хорижда юз бераётган диний-ижтимоий соҳага оид муҳим воқеаларни чуқур таҳлил қилади ҳамда республикадаги барқарор диний-ижтимоий вазиятга таҳдид солиши мумкин бўлган салбий ҳолатларни аниқлаш ва уларни бартараф этиш мақсадида бошқа ташкилотлар билан ҳамкорлик қилади ва тажриба алмашади, уларни олдини олиш бўйича таклифлар тайёрлаб, киритиб боради;

тайёрлаш, олиб кириш, тарқатиш ман этилган, Ўзбекистон Республикаси ҳудудида муомалада бўлиши тақиқланган диний мазмундаги материалларнинг рўйхатини хизмат доирасида фойдаланиш учун манфаатдор ташкилотларга тақдим қилиб боради;

жамиятда «жаҳолатга қарши маърифат» улуғвор ғояси асосида динларининг асл инсонпарварлик моҳиятини етказиш, диний бағрикенгликни тарғиб қилиш бўйича тарғибот тадбирларини амалга оширади, давлат ва нодавлат нотижорат ташкилотларга бу борадаги фаолиятини амалга оширишга кўмаклашади;

диний ташкилотларнинг диний мутаассиблик, экстремизм ва терроризм ғояларини тарқатиш, турли конфессиялар ўртасида адоватни юзага келтиришининг олдини олишга қаратилган фаолиятини мувофиқлаштиради;

ижтимоий тармоқларда ҳамда диний-маърифий йўналишдаги веб-сайтларда экстремизм ва терроризмга қарши қаратилган тарғибот ишларини амалга оширишни ташкил этади;

г) жамиятда диний-маърифий муҳит барқарорлиги ва эътиқод эркинлигига таҳдид туғдириши мумкин бўлган омилларни ўрганиш, таҳлил қилиш ва уларнинг олдини олиш бўйича таклифлар ишлаб чиқиш, ушбу жараёнларда диний-маърифий соҳа вакилларининг иштирокини кенгайтириш борасида:

республика ҳудудлари ва хорижий давлатлардаги диний-ижтимоий жараёнларни, давлат органлари ва диний ташкилотлар ўртасидаги муносабатларни мунтазам ўрганади, таҳлил қилади ҳамда ижтимоий-маънавий муҳитни барқарорлигини таъминлаш бўйича ахборот-таҳлилий материалларни тайёрлаб, Вазирлар Маҳкамасига ва Ўзбекистон Республикаси Президенти Администрациясига киритиб боради;

республикада диний-ижтимоий вазиятни мониторинг ва таҳлил қилади, диний-маънавий муҳитни яхшилаш, барқарорлигини таъминлаш, янада соғломлаштириш бўйича манзилли «йўл хариталари»ни ишлаб чиқади ҳамда амалга оширади;

диний мавзуларга оид нашрлар, Интернет жаҳон ахборот тармоғи ва оммавий ахборот воситалари материалларини чуқур таҳлил қилади;

диний-маърифий фаолиятни такомиллаштириш бўйича таклифлар тайёрлаш ва киритиб бориш;

диний-маърифий соҳада аҳолининг ҳуқуқий маданияти ва билимини ошириш, жамиятда бағрикенглик ғояларини шакллантириш ва мустаҳкамлаш бўйича чоралар кўради;

жамиятда экстремизм ғоялари тарқалишининг олдини олиш, аҳолини ноанъанавий диний ҳаракатлар ва таҳдидлардан ҳимоя қилиш учун давлат ташкилотлари ва бошқа ташкилотлар фаолиятини мувофиқлаштиришда иштирок этади;

д) давлат органларининг диний ташкилотлар билан ўзаро алоқаси ва ҳамкорлигини мувофиқлаштириш ҳамда давлат сиёсатида диний ташкилотлар манфаатларини акс эттириш борасида:

давлат органлари ва муассасаларининг республика ҳудудида жойлашган диний ташкилотлар билан ўзаро ҳамкорлигини таъминлайди;

диний ташкилотларнинг давлат органлари билан ўзаро алоқаларига кўмаклашади ва ҳал этилиши талаб қилинадиган масалалар бўйича зарур ёрдам кўрсатади;

диний ташкилотлар, шунингдек, хорижий диний ташкилотлар билан ўзаро муносабатларга доир масалалар бўйича ишларни амалга оширади;

диний ташкилотларнинг фаолиятига оид ҳужжатларни тайёрлашда кўмаклашади;

диний ташкилотлар томонидан ўтказиладиган ва уларнинг ўз фаолияти билан боғлиқ тадбирларни амалга оширишда ёрдам беради;

диний ташкилотлар раҳбарлари иштирокида маърифий учрашувлар ташкил этади;

е) аҳоли орасида конфессиялараро тотувлик ва диний бағрикенгликни мустаҳкамлаш бўйича тарғибот ва ташвиқот ишларини олиб бориш борасида:

фуқароларнинг виждон ва дин эркинлиги масалалари юзасидан ҳуқуқий саводхонлигини ошириш бўйича кенг қамровли ишларни амалга оширади;

диний ташкилотларга республикада ва чет элларда ўзаро дўстона муносабатлар ўрнатишга кўмаклашади;

конфессиялараро тотувликни ва диний бағрикенгликни таъминлашда давлат органлари, диний ташкилотлар ва фуқаролик жамиятининг бошқа институтлари ўртасидаги ҳамкорликни таъминлайди;

конфессиялар ва уларнинг аъзолари ўртасида ўзаро дўстлик ҳамда бағрикенгликни мустаҳкамлаш сиёсатини олиб боради, ушбу соҳада ташкилий, маънавий-маърифий ва тарғибот ишларини амалга оширади;

республикада истиқомат қилувчи турли дин вакилларининг Янги Ўзбекистон тараққиётига дахлдорлик ҳиссини ошириш йўналишидаги ташаббусларни қўллаб-қувватлайди;

турли конфессиялар ўртасида ўзаро адоватни юзага келтиришга қаратилган ҳолатлар, материалларни аниқлайди ҳамда бундай салбий ҳолатларнинг олдини олиш бўйича тегишли таклиф ва тавсияларни ишлаб чиқади;

ж) фуқароларнинг хорижий давлатларга ҳамда чет эл фуқароларининг Ўзбекистонга зиёрат туризмини амалга ошириши учун шарт-шароитлар яратиш борасида:

«Ҳаж» ва «Умра» тадбирларини белгиланган тартибда амалга оширилишини ташкил этади;

«Ҳаж ва Умра ягона портали» орқали «Ҳаж» тадбирига борувчи фуқароларнинг ягона электрон навбати ҳамда «Умра» тадбирларига юбориладиган зиёратчиларнинг электрон рўйхати шакллантирилишини таъминлайди, ушбу жараёнда тегишли идораларнинг фаолиятини мувофиқлаштиради ҳамда зиёратларни ташкил қилишда белгиланган тартибга қатъи риоя этилишини таъминлайди;

«Умра» тадбирларини ташкил этиш ва ўтказиш лицензиясига эга юридик шахслар ҳамда Ўзбекистон мусулмонлари идорасининг «Ҳаж ва Умра ягона портали»дан фойдаланиш имкониятини таъминлайди;

зиёратларни ташкил этиш ва ўтказиш жараёнларини кузатиб боради, таҳлил қилади, йўл қўйилган камчиликларни ўз вақтида бартараф этиш бўйича чора-тадбирлар беради;

оммавий ахборот воситаларида, шу жумладан, чет элларда Ўзбекистоннинг ислом цивилизациясининг маданий, тарихий ва илмий-маънавий марказларидан бири сифатидаги ўрни ва ролини, шунингдек, диний-маърифий соҳада амалга оширилаётган ислоҳотларни тарғиб этиш ишларини олиб боради;

республика ва хорижий давлат муассасалари, диний ташкилотлар ўртасида зиёрат туризми соҳасида алоқалар ўрнатиш ва ривожлантириш масаласида ишларни ташкил қилади;

зиёрат туризми тармоғини бошқаришни тубдан такомиллаштириш, миллий зиёрат туризми маҳсулотларини жаҳон бозорларида тарғиб қилиш, зиёрат туризми соҳасида Ўзбекистоннинг ижобий қиёфасини шакллантириш бўйича таҳлилий маълумотларни тайёрлаб, киритиб боради;

з) экстремизм ва мутаассиблик ғоялари таъсирига тушиб қолган шахсларни соғлом ҳаётга қайтариш, диндан сиёсий мақсадларда фойдаланишга йўл қўймасликка қаратилган маърифий-тарбиявий ишларни олиб бориш борасида:

экстремистик гуруҳлар ва мутаассиблик ғоялари таъсирига тушиб қолган шахсларни реабилитация қилиш бўйича комплекс профилактик чора-тадбирларни ишлаб чиқиш ва амалга оширишда ҳамкорлик қилади;

экстремистик гуруҳлар фаолиятини аниқлаш ва унга чек қўйишга кўмаклашади;

терроризм ва экстремизмни тарғиб қилиш мақсадида республика ҳудудига шахсларнинг ноқонуний кириб келишига қарши ҳуқуқни муҳофаза қилувчи идоралар билан ҳамкорликда чоралар кўради;

аҳоли ўртасида оммавий ахборот воситалари ҳамда диний ташкилотлар билан биргаликда ноқонуний диний оқим ва гуруҳларнинг фаолияти, ёт ғоялари динга зид эканлиги ҳақида тушунтириш ишларини ташкил этади;

турли бузғунчи оқимлар таъсирига тушиб қолган шахслар билан ишлаш бўйича хориж тажрибасини ўрганади ва амалиётга жорий этиш юзасидан таклифлар тайёрлайди ва киритиб боради;

аҳоли, шу жумладан, ёшлар, мигрантлар ва хотин-қизлар орасида ёт ғояларга қарши мафкуравий иммунитетни кучайтириш, бундай ғоялар таъсиридан асрашга қаратилган тизимли ва таъсирчан чора-тадбирларни амалга оширади;

миллий ва диний урф-одатлар, қадриятларни асраб-авайлаш ва ривожлантиришга, бағрикенглик ва ҳамжиҳатликни мустаҳкамлашга кўмаклашади ва уларга салбий таъсир кўрсатадиган таҳдидларга қарши қаратилган тизимли тарғибот-ташвиқот ишларини олиб боради;

экстремизм ва мутаассиблик ғоялари таъсирига тушиб қолган хотин-қизларни соғлом ҳаётга қайтариш борасида тадбирлар ўтказади ҳамда илғор хорижий тажриба асосида таклифлар тайёрлаб киритиб боради;

жазо муддатини ўтаётган шахслар орасида диний-маънавий муҳит барқарорлигини таъминлаш чораларини кўради;

и) оммавий ахборот воситаларида, шу жумладан интернет жаҳон ахборот тармоғида диний-маърифий соҳадаги ягона давлат сиёсатига нисбатан нохолис маълумотлар тарқалишининг олдини олиш ҳамда диний мутаассиблик ва экстремизм руҳидаги ахборотларга тезкор ва илмий раддиялар бериш борасида:

диний-маърифий соҳада ягона давлат сиёсатини оммавий ахборот воситалари, шу жумладан Интернет жаҳон ахборот тармоғи орқали тарғиб қилиш фаолиятини ташкил этади;

оммавий ахборот воситаларида, шу жумладан Интернет жаҳон ахборот тармоғида виждон эркинлиги ва диний бағрикенглик тамойилларига зид бўлган материалларни аниқлайди, илмий асосда таҳлил қилади ҳамда хавф-хатар йўналишларини белгилайди;

диний-маърифий соҳадаги илмий-тадқиқот марказлари ҳамда мутасадди ташкилотлар томонидан мавжуд таҳдидларга нисбатан халқчил раддиялар тайёрлаш йўналишидаги фаолиятни мувофиқлаштиради;

жамиятда диний-ижтимоий муҳит барқарорлиги ва эътиқод эркинлигига таҳдид туғдириши мумкин бўлган омилларни ўрганади, таҳлил қилади ва уларнинг олдини олиш чораларини кўради;

Интернет жаҳон алоқа тармоғидаги дин омили билан боғлиқ материалларни мутасадди ташкилотлар билан ҳамкорликда мунтазам мониторинг ва таҳлил қилиб, уларни тизимли бошқариш амалиётини ташкил этиш юзасидан таъсирчан чораларни кўради;

к) диний-маърифий соҳада малакали кадрларни тайёрлаш, қайта тайёрлаш ва малакасини ошириш, илмий-тадқиқот марказларининг тадқиқот йўналишлари бўйича тавсиялар бериш борасида:

диний-маърифий соҳада салоҳиятли кадрлар тайёрлаш, қайта тайёрлаш ва малакасини ошириш жараёнига давлат ва нодавлат ташкилотлар, илмий-тадқиқот марказларининг етук мутахассисларини жалб қилиш орқали илм-фан ҳамда таълимнинг ўзаро интеграциясини ташкил этади;

илм-фан ва жаҳон цивилизацияси ривожига улкан ҳисса қўшган буюк аждодларимизнинг диний-фалсафий меросини чуқур ўрганиш ҳамда кенг тарғиб этиш мақсадида илмий-тадқиқот марказларига тегишли тавсиялар бериб боради;

диний-маърифий соҳадаги муассасалар фаолиятини ўрганиб бориш, ўқув-тарбия жараёнига илғор ахборот-коммуникация ва педагогик технологиялар, инновацион ишланмаларни татбиқ этиш ҳамда илмий ва услубий фаолиятини мувофиқлаштиради;

таълим ва илмий-тадқиқот муассасаларида бажариладиган диний мавзудаги тадқиқотларнинг мавзу ва йўналишларининг аҳамияти, долзарблиги юзасидан тегишли тавсияларни беради;

илмий-тадқиқот марказларининг бой илмий-маънавий мерос, дунёвий ва диний илмлар бўйича тадқиқот натижаларини ўқув-тарбия жараёнида қўллаш ва кенг жамоатчиликка етказишда кўмаклашади;

жаҳондаги нуфузли илмий-тадқиқот марказларининг тажрибасини ўрганиб, Вазирлар Маҳкамасига ва Ўзбекистон Республикаси Президенти Администрациясига таклифлар киритади.

л) тегишли маҳаллий ташкилотлар билан ҳамкорликда аҳолининг диний-ижтимоий жараёнларга муносабатини ўрганиш бўйича ижтимоий сўровлар ташкил этиш борасида:

диний-ижтимоий жараёнларни ўрганади, улар юзасидан ўтказиладиган ижтимоий сўровномаларнинг назарий жиҳатларини ишлаб чиқади;

аҳолининг диний-ижтимоий жараёнларга муносабатини тадқиқ қилиш бўйича хориж тажрибасини ўрганиб боради ҳамда уларнинг ижобий жиҳатларини маҳаллий сўровномаларга жорий этиш бўйича таклифларни ишлаб чиқади;

ўтказилган ижтимоий сўровномаларнинг натижалари бўйича таҳлилий маълумот ва таклифлар тайёрлайди.

4-боб. Қўмита ва унинг ҳудудий бошқармаларининг ҳуқуқлари ва мажбуриятлари

1-§. Қўмитанинг ҳуқуқлари ва мажбуриятлари

13. Қўмита ўзига юкланган вазифалар ва функцияларни бажариш учун қуйидаги ҳуқуқларга эга:

Вазирлар Маҳкамасига ва Ўзбекистон Республикаси Президенти Администрациясига норматив-ҳуқуқий ҳужжатлар лойиҳаларини, шунингдек, Қўмитага юкланган вазифалар ва функцияларни бажариш билан боғлиқ бошқа ҳужжатларни белгиланган тартибда киритиш;

ўз ваколати доирасида республика ва маҳаллий ижро этувчи ҳокимият органлари, хўжалик бирлашмалари, бошқа ташкилотлар ва уларнинг мансабдор шахслари, шунингдек, фуқаролар учун бажарилиши мажбурий бўлган норматив-ҳуқуқий ҳужжатларни қабул қилиш, зарур ҳолларда, бошқа вазирликлар ва идоралар билан биргаликда қўшма қарорлар ва бошқа ҳужжатларни қабул қилиш;

Қўмитанинг ваколатига кирувчи масалаларда республика ва маҳаллий ижро этувчи ҳокимият органлари, хўжалик бирлашмалари фаолиятини мувофиқлаштириш;

ўзига юклатилган вазифалар доирасида республика ижро этувчи ҳокимият органлари ва бошқа ташкилотларда жойларга чиққан ҳолда ўрганишлар ўтказиш;

Қўмитага тегишли вазифаларни амалга ошириш учун, зарур ҳолларда, давлат органлари, илмий муассасалар ва бошқа ташкилотларнинг раҳбарлари ҳамда мутахассисларини жалб қилиш, ишчи гуруҳлар тузиш;

ўз ваколатларига кирувчи масалалар юзасидан давлат органлари ва ташкилотларидан статистика, таҳлилий материаллар, хулосалар ва бошқа маълумотларни сўраш ва бепул олиш;

ўзига юклатилган вазифалар доирасида республика ижро этувчи ҳокимият органлари, маҳаллий давлат ҳокимияти органлари ва бошқа ташкилотларга кўриб чиқилиши мажбурий бўлган тақдимнома, кўрсатма ва ёзма равишда огоҳлантиришлар киритиш;

ўз ваколати доирасида маъмурий жавобгарликни келтириб чиқарадиган ҳолатлар юзасидан маъмурий ҳуқуқбузарликлар тўғрисида баённомалар тузиш;

ўз ваколати доирасида юридик шахсларга нисбатан қонунчиликда белгиланган тартибда жарималар қўллаш;

давлат, юридик ва жисмоний шахслар, шунингдек, Қўмита тизими манфаатларини кўзлаб судларга аризалар ва даъволарни киритиш;

Қўмита фаолиятини самарали ташкил этиш, унга юкланган вазифаларни ўз вақтида ва сифатли амалга ошириш учун хорижий илмий-тадқиқот марказларининг мутахассис ва экспертларини шартнома асосида жалб қилиш;

соҳага доир илмий ва амалий тадқиқотлар ҳамда ишланмаларни амалга ошириш бўйича лойиҳаларни саралаб олиш учун танловлар эълон қилиш ва танлов комиссияларини тузиш;

қонунчилик ҳужжатларида белгиланган тартибда Қўмита ходимларининг меҳнатига ҳақ тўлаш, уларни моддий рағбатлантириш ва бошқа турдаги мукофотлаш тартибини, миқдори ва шартларини белгилаш;

Қўмита ваколатига кирувчи масалалар бўйича таклифларни Ўзбекистон Республикаси Президенти Администрациясига, Вазирлар Маҳкамасига, республика ва маҳаллий ижро этувчи ҳокимият органлари ҳамда хўжалик бирлашмаларига кўриб чиқиш учун киритиш;

Қўмита ваколати доирасида халқаро шартномалар ва идоралараро битимлар тузиш, халқаро, ҳукуматлараро битим лойиҳаларини тақдим этиш;

Қўмита ваколати доирасида Ўзбекистон Республикаси манфаатларини халқаро миқёсда ҳимоя қилиш;

Қўмита ўзига юкланган вазифалар доирасида хорижий давлатлардаги турдош ташкилотлар, илмий ва таълим муассасалари билан ҳамкорлик қилиш;

тегишли маълумотлар базаларидан, давлат ахборот тизимларидан ва ваколатли органлар ресурсларидан белгиланган тартибда фойдаланиш;

диний ташкилотлардан зарур ахборотларни белгиланган тартибда олиш, шунингдек, улар томонидан ўтказиладиган фаолияти билан боғлиқ тадбирларда қатнашиш;

бошқарув ходимларининг белгиланган умумий чекланган сони ва меҳнатга ҳақ тўлаш фонди доирасида Қўмитанинг тасдиқланган тузилмасига ўзгартиришлар киритиш;

таркибий бўлинмаларнинг функционал вазифалари ҳамда бошқа ҳужжатлари, смета ва штат жадвалларини тасдиқлаш;

Қўмита тизимида кадрларни танлаш, тайёрлаш, қайта тайёрлаш ва уларнинг малакасини ошириш жараёнларини самарали ташкил этиш;

Қўмита ваколатига кирадиган масалалар бўйича жорий ва стратегик вазифаларни ёритиш учун белгиланган тартибда ноширлик фаолиятини амалга ошириш, расмий веб-сайтлар, ижтимоий тармоқларда саҳифалар очиш, конференциялар, семинарлар, симпозиумлар, кўргазмалар, ярмаркалар ўтказиш, шунингдек, услубий материаллар ва тавсиялар ишлаб чиқиш;

бюджетдан ташқари маблағларни ҳамда Қўмита тизимининг депозит ҳисобварақларида жойлашган маблағларни Ўзбекистон Республикаси тижорат банкларининг депозит рақамларида миллий ва чет эл валютасида жойлаштириш;

биноларга хизмат кўрсатиш, жиҳоз ва ускуналар, автотранспорт, алоқа ҳамда ҳисоблаш воситалари, компьютер ва ташкилий техника воситаларини сақлаш ва ишлатиш бўйича ишларни бажариш, дастурий таъминотни сотиб олиш тўғрисида белгиланган тартибда шартномалар тузиш;

Қўмита ҳамда идоравий бўйсунувидаги ташкилотларнинг моддий-техника базасини яхшилаш чораларини кўриш;

Қўмита тизимидаги мол-мулкдан бепул фойдаланиш ҳуқуқи билан бир таркибий тузилмадан бошқа тузилмага белгиланган тартибда ўтказиш;

қонунчилик ҳужжатларига мувофиқ Қўмитанинг ижтимоий инфратузилмасини яратиш ва такомиллаштириш ҳамда Қўмита, унинг таркибий ва ҳудудий бўлинмалари ходимларини моддий рағбатлантириш ва мукофотлашнинг ягона тизимини шакллантириш;

юкланган вазифаларни бажариш ва фаолиятни замонавий талабларга мувофиқ такомиллаштириш учун белгиланган тартибда бўлинмалар, кенгашлар, комиссиялар, ишчи гуруҳлар ва жамғармалар ташкил этиш;

Қўмита қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

14. Қўмита қуйидаги мажбуриятларга эга:

ўзига юкланган вазифалар ва функцияларни самарали бажариш, шунингдек, дин ишлари соҳасида ягона давлат сиёсатини самарали амалга ошириш;

ўз фаолияти билан боғлиқ прогноз кўрсаткичларга сўзсиз эришилишини таъминлаш;

Ўзбекистон Республикаси Президенти Администрацияси ва Вазирлар Маҳкамасига киритилаётган норматив-ҳуқуқий ҳужжатлар лойиҳалари ва бошқа ҳужжатлар, шунингдек, Қўмита томонидан қабул қилинаётган қарорларнинг сифати, пировард натижалари ва амалга оширилиши оқибатлари учун жавоб бериш;

ўз фаолияти соҳасини ривожлантириш бўйича дастурлар, чора-тадбирлар режалари, «йўл хариталари» ва бошқа дастурий ҳужжатларнинг самарали бажариш;

тегишли соҳада фуқаролар ва диний ташкилотларнинг ҳуқуқлари ва қонуний манфаатларига риоя этилиши ҳамда муҳофаза қилинишини таъминлаш.

Қўмитанинг қарорлари, унинг мансабдор шахслари хатти-ҳаракатлари бўйича шикоят қилиш қонунчилик ҳужжатларига мувофиқ амалга оширилади.

2-§. Қўмита ҳудудий бошқармаларининг ҳуқуқлари ва мажбуриятлари

15. Қўмитанинг ҳудудий бошқармалари қуйидаги ҳуқуқларга эга:

Қўмита зиммасига юкланган вазифаларни ўз ҳудудларида самарали ташкил этиш мақсадида давлат органлари ва ташкилотларидан статистика, таҳлилий материаллар, хулосалар ва бошқа маълумотларни сўраш ва бепул олиш;

зарур ҳолларда, зиммасига юкланган вазифаларни амалга ошириш учун давлат органлари, илмий муассасалар ва бошқа ташкилотларнинг раҳбарлари ҳамда мутахассисларини жалб қилиш, ишчи гуруҳлар тузиш;

дин ишлари соҳаси бўйича республика ижро этувчи ҳокимият органлари, шунингдек, хўжалик бирлашмаларининг, бошқа ташкилотларнинг ҳудудий бўлинмалари фаолиятини такомиллаштириш бўйича тавсиялар бериш;

соҳа фаолияти билан боғлиқ масалалар юзасидан республика ижро этувчи ҳокимият органлари, хўжалик бирлашмаларининг ҳамда бошқа ташкилотларнинг ҳудудий бўлинмалари раҳбарлари ва масъул ходимлари иштирокида йиғилишлар ўтказиш;

республика ижро этувчи ҳокимият органлари, хўжалик бирлашмаларининг ҳамда бошқа ташкилотларнинг ҳудудий бўлинмалари, шунингдек, илмий ташкилотларнинг малакали мутахассисларини ахборот-таҳлилий материаллар ва дастурий ҳужжатларни тайёрлашга жалб қилиш;

республика ижро этувчи ҳокимият органларининг ҳудудий бўлинмаларининг дин ишлари соҳасига оид масалаларни кўриб чиқиш билан боғлиқ мажлислари ва йиғилишларида иштирок этиш;

жойлардаги диний ташкилотлардан зарур ахборотларни белгиланган тартибда олиш, шунингдек, улар томонидан ўтказиладиган фаолият билан боғлиқ тадбирларда қатнашиш;

ахборот-таҳлилий материалларни тайёрлаш ва дастурий ҳужжатларни ишлаб чиқиш учун республика ижро этувчи ҳокимият органлари ва хўжалик бирлашмаларининг ҳудудий бўлимлари, шунингдек, илмий ташкилотларнинг юқори малакали мутахассисларини жалб қилиш.

Қўмитанинг ҳудудий бошқармалари ўз ваколатлари доирасида ўзларига юкланган вазифалардан келиб чиққан ҳолда бошқа ҳуқуқларга ҳам эга бўлиши мумкин.

16. Қўмитанинг ҳудудий бошқармалари қуйидаги мажбуриятларга эга:

Қўмитага юкланган вазифаларни ҳудудларда сифатли бажарилишини ташкил этиш, таъсирчан назоратни амалга ошириш;

ҳудудларда, дин ишлари соҳасига оид давлат сиёсатининг ҳолати тўғрисида тегишли ахборот, ахборот-таҳлилий ҳужжатлар, ҳисоботларни Қўмитага киритиш;

тегишли ҳудудда дин ишлари соҳасига оид давлат сиёсатининг ҳолати тўғрисида Қўмитага ҳаққоний таҳлилий ва бошқа ахборотни тақдим этиш;

соҳани ривожлантириш ва ҳудудларнинг муаммоли масалаларини ҳал қилиш бўйича дастур, чора-тадбирлар режаси, «йўл хариталари» ва бошқа ҳужжатлар ижросини таъминлаш;

ҳудудда тегишли соҳада фуқаролар ва диний ташкилотларнинг ҳуқуқлари ва қонуний манфаатларига риоя этилиши ҳамда муҳофаза қилинишини таъминлаш.

5-боб. Қўмита раҳбариятининг асосий функционал вазифалари

17. Қўмита раисининг асосий функционал вазифалари:

Ўзбекистон Республикаси Конституцияси ва қонунларига, шунингдек, бошқа норматив-ҳуқуқий ҳужжатлар талабларига риоя қилиш;

Қўмита фаолиятига умумий раҳбарлик қилиш, Қўмитага Ўзбекистон Республикаси Президентининг тегишли фармонлари, қарорлари ва фармойишлари, Вазирлар Маҳкамасининг қарорлари ва фармойишлари, бошқа қонунчилик ҳужжатлари билан юкланган вазифалар ва функцияларнинг бажарилишини таъминлаш;

Ўзбекистон Республикаси Президентининг ҳужжатлари ва Вазирлар Маҳкамасининг қарорлари билан тасдиқланган Қўмита фаолиятини янада такомиллаштириш бўйича концепциялар, комплекс дастурлар ва чора-тадбирлар режаларини амалга ошириш бўйича танқидий ва чуқур таҳлиллар ўтказиш;

Қўмита ва унинг ҳудудий бошқармалари фаолияти билан боғлиқ истиқболдаги кўрсаткичларга эришишни таъминлаш бўйича амалий чора-тадбирларни ишлаб чиқиш ва қабул қилиш;

Ўзбекистон Республикаси Президенти Администрациясининг тегишли таркибий бўлинмалари ва Вазирлар Маҳкамаси, шунингдек, вазирлик ва идоралар билан Қўмита фаолиятига тааллуқли масалалар бўйича ўзаро ҳамкорлик қилиш, Қўмитага оид масалаларнинг Вазирлар Маҳкамаси ва унинг Раёсати мажлисларида кўриб чиқилишида иштирок этиш;

Ўзбекистон Республикаси Президенти, Ўзбекистон Республикаси Президенти Администрацияси таркибий бўлинмаларининг, Бош вазири ва Бош вазир ўринбосарлари топшириқлари ва кўрсатмаларининг ўз вақтида, тўлиқ ва сифатли ижро этилишини ташкил этиш;

ўринбосарлари ва таркибий тузилмалар раҳбарларининг ваколатларини ҳамда шахсий жавобгарлик даражасини белгилаш, мажбуриятларини тақсимлаш;

Қўмита фаолияти режалаштирилишини ташкил этиш, даврий иш режаларини тасдиқлаш, уларнинг бажарилиши юзасидан назоратни таъминлаш;

Қўмита ва тизим идораларида рақамлаштиришни жорий этиш;

Қўмита, унинг таркибий бўлинмалари ва ҳудудий бошқармалари фаолияти билан боғлиқ кўрсаткичлар, мақсадли индикаторлар ва ривожлантириш дастурларининг самарали амалга оширилишига эришишни сўзсиз таъминлаш юзасидан амалий чора-тадбирларни ишлаб чиқиш ва қабул қилиш;

Ўзбекистон Республикаси Президенти ва Вазирлар Маҳкамасининг ҳужжатлари ҳамда топшириқлари ижросини ташкил этиш, уларнинг мониторингини олиб бориш, Қўмита фаолиятида ижро интизомини мустаҳкамлаш бўйича комплекс амалий чора-тадбирларни амалга ошириш, шунингдек, ҳудудий бошқармалар ва идоравий мансуб ташкилотлар раҳбарларининг шахсий масъулиятини ошириш чораларини кўриш;

Қўмита тизимида ходимларни танлаш ва жой-жойига қўйиш, уларнинг самарали фаолияти учун зарур шарт-шароитлар яратиш, кадрлар захирасини шакллантириш;

Ўзбекистон Республикаси Президенти, Ўзбекистон Республикаси Президенти Администрацияси ва Вазирлар Маҳкамаси номенклатурасига кирадиган бўш лавозимларга таклиф этилган кадрларнинг, шунингдек, Қўмитага ишга қабул қилинадиган бошқа кадрларнинг касб маҳорати, ўз ишини билиши, юксак даражадаги ишчанлик ва маънавий-ахлоқий фазилатларга эга бўлишини таъминлашга қаратилган чора-тадбирларни амалга ошириш;

Ўзбекистон Республикаси Президенти ва Вазирлар Маҳкамасининг топшириқларига ҳамда ўз ташаббусига кўра норматив-ҳуқуқий ҳужжатлар лойиҳалари сифатли ишлаб чиқилишини, улар « Норматив-ҳуқуқий ҳужжатлар тўғрисида »ги, « Қонунлар лойиҳаларини тайёрлаш ва Ўзбекистон Республикаси Олий Мажлисининг Қонунчилик палатасига киритиш тартиби тўғрисида »ги Ўзбекистон Республикаси қонунлари, Ўзбекистон Республикаси Президенти Администрацияси Регламенти ва Ўзбекистон Республикаси Вазирлар Маҳкамасининг Регламентига мувофиқ ўз вақтида Вазирлар Маҳкамасига киритилишини ташкил этиш, уларнинг Вазирлар Маҳкамасида пухта ишланиши ва ҳимоя қилинишида, Ўзбекистон Республикаси Президенти Администрациясида кўриб чиқилишида иштирок этиш;

Қўмитага киритилган таклифлар ва тақдим этилган норматив-ҳуқуқий ҳужжатлар лойиҳаларининг тўлиқ ва ҳар томонлама кўриб чиқилишини таъминлаш, шунингдек, Ўзбекистон Республикаси Президенти Администрацияси Регламенти ва Ўзбекистон Республикаси Вазирлар Маҳкамасининг Регламентида белгиланган муддатларда келишиш (виза қўйиш);

Қўмита ваколатига кирувчи масалалар бўйича норматив-ҳуқуқий ҳужжатларни ишлаб чиқиш, зарур ҳолларда, республика ижро этувчи ҳокимият органлари билан биргаликда қарорлар ва бошқа ҳужжатларни қабул қилиш;

Қўмита ходимларининг хизмат сафарларини Ўзбекистон Республикаси Президентининг 2014 йил 5 мартдаги ПҚ-2142-сон ва 2017 йил 3 августдаги ПҚ-3170-сон қарорлари талабларига тўла мувофиқ равишда ташкил этиш, хизмат сафарларининг асосланганлиги, самарадорлиги ва натижадорлигини, уларга ажратиладиган маблағлардан оқилона фойдаланишни таъминлаш;

ўз ўринбосарлари ҳамда таркибий бўлинмалар ва ҳудудий бошқармалар раҳбарлари фаолиятининг самарадорлиги ва натижадорлигини мунтазам танқидий таҳлил қилиш, Қўмита ҳайъат мажлисларида уларнинг шахсий ҳисоботларини эшитиш, муҳокама якунлари бўйича зарур чоралар кўриш;

Қўмита таркибий бўлинмалари ва ҳудудий бошқармалари раҳбарлари фаолиятини мувофиқлаштириш ва назорат қилиш;

Қўмита ходимларини рағбатлантириш ва интизомий жавобгарликка тортиш масалаларини ҳал қилиш, ўз ўринбосарларини рағбатлантириш ва интизомий жавобгарликка тортиш масалаларини, шу жумладан, келгусида уларнинг эгаллаб турган лавозимларига лойиқлиги масалаларини кўриб чиқиш тўғрисида таклифлар киритиш, уларнинг шахсий жавобгарлигини ошириш бўйича тизимли чораларни амалга ошириш;

Қўмита ходимларининг Давлат фуқаролик хизматчиларининг одоб-ахлоқ қоидалари талабларига риоя қилиши бўйича назоратни ташкил этиш;

ҳуқуқни қўллаш амалиётини ва қонунчилик ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали «Коррупцияга қарши курашиш тўғрисида»ги Ўзбекистон Республикаси Қонуни талабларига мувофиқ Қўмита тизимида Коррупция ва бошқа ҳуқуқбузарликларнинг олдини олиш чораларини кўриш, шунингдек, уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

«Манфаатлар тўқнашуви тўғрисида»ги Ўзбекистон Республикаси Қонуни ва манфаатлар тўқнашуви билан боғлиқ муносабатларни тартибга солишга доир ишларга раҳбарлик қилиш ва мувофиқлаштириш;

замонавий ахборот-коммуникация технологияларидан фойдаланиш орқали давлат хизматлари кўрсатишнинг самарадорлиги ва очиқлигини таъминлаш;

жисмоний ва юридик шахсларнинг мурожаатларини кўриб чиқишга доир самарали ишларни ташкил этиш, аҳоли билан тўғридан-тўғри ва очиқ мулоқотни йўлга қўйиш, қонунчилик ҳужжатларида белгиланган муддатларда ва тартибда жисмоний ва юридик шахслар вакилларини мунтазам равишда шахсан қабул қилиш, шу жумладан, жойларга бориб сайёр қабул қилиш;

Ўзбекистон Республикаси Президентининг Халқ қабулхоналари билан самарали ҳамкорликни ташкил этиш, жисмоний ва юридик шахсларнинг Ўзбекистон Республикаси Президентининг Виртуал қабулхонасидан келиб тушган мурожаатларини ўз вақтида ва тўлақонли кўриб чиқилишини таъминлаш;

давлат сирларини ташкил этувчи маълумотлар ва махфий ахборот билан ишлашда қонунчилик ҳужжатлари талабларига риоя қилиш;

Қўмита марказий аппарати ва ҳудудий бошқармалар низомлари, штат жадвали ва харажатлар сметасини, шунингдек, Қўмитанинг идоравий мансуб ташкилотлар уставларини тасдиқлаш;

Қўмитанинг марказий аппарати ва ҳудудий бошқармалари (бошлиқларидан ташқари) ходимларини белгиланган тартибда лавозимга тайинлаш ва лавозимдан озод этиш;

Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳар ҳокимларининг жамоат ва диний ташкилотлар билан алоқалар бўйича ўринбосарлари — ҳудудий бошқармалар бошлиқларини лавозимга тайинлаш ва лавозимдан озод этишга розилик бериш;

Қўмита тизимида кадрлар захирасини шакллантириш, шунингдек, тизим ходимларини қайта тайёрлаш ва уларнинг малакасини ошириш ишларини тизимли асосда ташкил қилиш;

Қўмита фаолияти соҳасида ҳамкорлик тўғрисида битимлар тузиш ва белгиланган тартибда ўзига юкланган вазифалар доирасида хорижий давлатларнинг органлари ва халқаро ташкилотлар билан ҳамкорлик қилиш;

давлат органлари ва бошқа ташкилотларда, Ўзбекистон Республикаси, шунингдек, халқаро ташкилотлар ва хорижий мамлакатлар вакиллари иштирокида ўтказиладиган расмий тадбирларда Қўмита номидан иштирок этиш;

Ўзбекистон Республикаси Олий Мажлиси Қонунчилик палатасининг қонун лойиҳаларини муҳокама қилиш бўйича мажлисларида иштирок этиш ва уларга доир фикр билдириш;

зарур ҳолларда, белгиланган тартибда бошқарув ходимларининг белгиланган умумий чекланган сони ва меҳнатга ҳақ тўлаш фонди доирасида Қўмитанинг тасдиқланган тузилмасига ўзгартиришлар киритиш;

Қўмита ходимлари бажариши мажбурий бўлган буйруқлар ва фармойишлар қабул қилиш ҳамда кўрсатмалар бериш;

Қўмита тизимида фаолият юритаётган ходимларни рағбатлантириш ва интизомий жавобгарликка тортиш масалаларини ҳал этиш, алоҳида ўрнак кўрсатган ходимларни Ўзбекистон Республикасининг давлат мукофотлари билан тақдирлашга тақдим этиш, шунингдек, соҳа тармоқларини ривожлантиришда алоҳида ўрнак кўрсатган ходимларни фахрий ёрлиқлар ҳамда бошқа рағбатлантиришлар билан тақдирлаш;

Қўмитанинг мол-мулкини қонунчилик ҳужжатларида белгиланган тартибда тасарруф этиш;

Қўмита ваколатига кирадиган масалалар юзасидан Ўзбекистон Республикасининг халқаро шартномаларини қонунчиликда белгиланган тартибда тузиш;

Қўмита ҳайъат мажлисларида раислик қилиш.

Қўмита раиси қонунчилик ҳужжатларига мувофиқ бошқа функционал вазифаларга ҳам эга бўлиши мумкин.

18. Қўмита раиси ўринбосарларининг асосий функционал вазифалари:

Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

Қўмита раиси вақтинча бўлмаганда, тегишли буйруқ асосида унинг вазифаларини бажариш;

Қўмитанинг мутасаддилик қилинадиган таркибий бўлинмалари фаолиятини мувофиқлаштириш, назорат қилиш ва бевосита бошқариш, уларнинг ходимлари ўртасида вазифаларни тақсимлаш;

Ўзбекистон Республикаси Президентининг ҳужжатлари ва Вазирлар Маҳкамасининг қарорлари билан тасдиқланган Қўмита фаолиятининг мутасаддилик қилинадиган йўналишларини янада такомиллаштириш бўйича дастур ва чора-тадбирлар ижроси ҳолатини танқидий ва чуқур таҳлил қилиш;

мутасаддилигидаги таркибий бўлинмалар томонидан кўрсаткичларга эришишни сўзсиз таъминлаш бўйича чоралар кўриш, бўлинмалар раҳбарларининг ҳисоботини тизимли эшитиб бориш ва белгиланган кўрсаткичларга эришиш учун уларнинг шахсий жавобгарлигини ошириш;

Ўзбекистон Республикаси Президенти, Ўзбекистон Республикаси Президенти Администрацияси таркибий бўлинмаларининг, Вазирлар Маҳкамасининг ҳужжатлари, топшириқлари ва кўрсатмаларининг ўз вақтида, тўлиқ ва сифатли ижро этилишини ташкил этиш, ижро интизоми мустаҳкамлаш бўйича комплекс чораларни кўриш, шу жумладан, топшириқлар ўз вақтида ижро этилиши учун таркибий бўлинмалар раҳбарларининг шахсий масъулиятини ошириш;

Қўмитанинг ҳайъати қарорлари, Қўмита раисининг буйруқлари ва топшириқларининг ўз вақтида ва сифатли бажарилишини таъминлаш;

Қўмита раисига мутасаддилик қилинадиган бўлинмаларда кадрларни танлаш ва жой-жойига қўйиш бўйича таклифлар тақдим этиш, уларнинг касб маҳорати, ўз ишини билиши, амалий иш тажрибаси, юқори ишчанлик даражаси ва маънавий-ахлоқий сифатлари кафолатланганини таъминлаш, уларнинг касбий малакасини ошириш чораларини кўриш, таркибий бўлинмаларда кадрлар захирасини шакллантириш;

ходимлар томонидан норматив-ҳуқуқий ҳужжатлар лойиҳалари сифатли ишлаб чиқилишини ташкил этиш, Қўмитада тайёрланган норматив-ҳуқуқий ҳужжатлар лойиҳаларини муҳокама этиш, имзолаш (виза қўйиш) учун кўриб чиқиш ва виза қўйиш, уларнинг Ўзбекистон Республикаси Президенти Администрацияси ва Вазирлар Маҳкамаси Регламентлари талабларига қатъий риоя қилган ҳолда Вазирлар Маҳкамасига ўз вақтида киритилишини таъминлаш, Қўмита раиси топшириғига мувофиқ Ўзбекистон Республикаси Президенти Администрацияси ва Вазирлар Маҳкамасида норматив-ҳуқуқий ҳужжатлар лойиҳаларини ишлаб чиқишда иштирок этиш;

Қўмитага тақдим этилган таклифлар ва норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқиш;

хизмат сафарларини Ўзбекистон Республикаси Президентининг 2014 йил 5 мартдаги ПҚ-2142-сон , 2017 йил 3 августдаги ПҚ-3170-сон қарорлари талабларига тўла мувофиқ равишда ташкил этиш, хизмат сафарларининг асосланганлиги, самарадорлиги ва натижадорлигини, хизмат сафарларига ажратиладиган маблағлардан оқилона фойдаланишни таъминлаш;

мутасаддилик қилинадиган таркибий бўлинмалар раҳбарлари ва ходимлари фаолиятининг самарадорлиги ва натижадорлигини доимий танқидий таҳлил қилиб бориш, Қўмитанинг ҳайъат йиғилишларида уларнинг шахсий ҳисоботларини эшитиш, муҳокама якунлари бўйича зарур чоралар кўриш;

Қўмита фаолиятини такомиллаштириш юзасидан амалий чора-тадбирлар қабул қилиш, дин ишлари соҳасидаги қонунчилик ҳужжатларини такомиллаштириш тўғрисида таклифлар ишлаб чиқиш ва уларни кўриб чиқиш учун Қўмита раисига киритиш;

мутасаддилик қилинадиган таркибий бўлинмалар раҳбарлари ва ходимларини рағбатлантириш ва интизомий жавобгарликка тортиш, шу жумладан, уларнинг эгаллаб турган лавозимда қолиш-қолмаслиги мақсадга мувофиқлиги масаласини кўриб чиқиш тўғрисида Қўмита раисига таклифлар киритиш, уларнинг функционал мажбуриятини ва юкланган вазифалар бажарилишида шахсий масъулиятини ошириш юзасидан тизимли чоралар кўриш;

Қўмита ходимлари томонидан Давлат фуқаролик хизматчиларининг одоб-ахлоқ қоидалари талабларига риоя этилиши таъминланишини назорат қилиш;

ҳуқуқни қўллаш амалиётини ва қонунчилик ҳужжатларини такомиллаштиришга доир чора-тадбирларни ишлаб чиқиш ва амалга ошириш, «Коррупцияга қарши курашиш тўғрисида»ги Ўзбекистон Республикаси Қонуни ва коррупцияга қарши курашишга доир бошқа қонунчилик ҳужжатларига ҳамда Ўзбекистон Республикасининг «Манфаатлар тўқнашуви тўғрисида»ги Қонунига риоя қилиш, манфаатлар тўқнашуви билан боғлиқ муносабатларни тартибга солишга доир ишларни мувофиқлаштириш;

Қўмита раисига давлат хизматларини кўрсатиш самарадорлиги, сифати ва улардан эркин фойдаланиш даражасини ошириш бўйича таклифлар киритиш;

жисмоний ва юридик шахсларнинг мурожаатларини кўриб чиқишга доир ишларни самарали ташкил этиш, аҳоли билан тўғридан-тўғри ва очиқ мулоқотни йўлга қўйиш, қонунчилик ҳужжатларида белгиланган муддатларда ва тартибда жисмоний ва юридик шахслар вакилларини мунтазам равишда шахсан қабул қилиш, шу жумладан, жойларга бориб сайёр қабул қилиш;

Ўзбекистон Республикаси Президентининг Халқ қабулхоналари билан самарали ҳамкорлик қилиш, Президентнинг Виртуал қабулхонасидан тушадиган жисмоний ва юридик шахсларнинг мурожаатларини ўз вақтида ва тўлиқ кўриб чиқилишини таъминлаш;

давлат сирини ташкил этувчи маълумотлар ва махфий ахборот билан ишлашда қонунчилик ҳужжатлари талабларига қатъи риоя қилиш;

виждон эркинлиги ва диний ташкилотлар тўғрисидаги норматив-ҳуқуқий ва бошқа соҳавий норматив ҳужжатларнинг ишлаб чиқилишини ташкил этиш;

Қўмита ва тизим идоралари ходимларини тизимли равишда қайта тайёрлаш ва хорижий мамлакатларда уларнинг малакасини ошириш бўйича таклифлар киритиш;

хорижий давлатлар, халқаро ва хорижий ташкилотлар билан ҳамкорликни амалга ошириш.

19. Қўмита таркибий бўлинмалари раҳбарларининг функционал вазифалари:

Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

бўлинмаларга юкланган вазифалар ва функциялар ижросини таъминлаш;

ўз ваколати доирасида идоравий мансуб ташкилотлар фаолиятини мувофиқлаштириш;

таркибий бўлинмалар фаолиятни мунтазам таҳлил қилиб бориш ва улар томонидан қайд этилган кўрсаткичларга сўзсиз эришишни таъминлашга йўналтирилган қўшимча чоралар кўриш юзасидан таклифларни кўриб чиқиш учун Қўмита раисининг мутасаддилик қиладиган ўринбосарига киритиш;

Ўзбекистон Республикаси Президенти, Ўзбекистон Республикаси Президенти Администрацияси таркибий бўлинмаларининг ҳамда Вазирлар Маҳкамасининг ҳужжатлари, топшириқлари ва кўрсатмаларининг ўз вақтида, тўлиқ ва сифатли ижро этилишини таъминлаш, ижро интизоми мустаҳкамлаш бўйича комплекс чораларни кўриш, шу жумладан, топшириқлар ўз вақтида ижро этилиши учун таркибий бўлинмалар раҳбарларининг шахсий масъулиятини ошириш;

ҳайъат қарорлари, Қўмита раиси ва ўринбосарларининг буйруқлари ва топшириқлари ижросининг ўз вақтида ва сифатли бажарилишини таъминлаш;

таркибий бўлинмаларнинг иш режаларини ишлаб чиқиш, тасдиқлаш учун киритиш, уларда қайд этилган вазифалар ва тадбирларнинг ўз вақтида ва сифатли бажарилишини таъминлаш;

таркибий бўлинмаларга юкланган вазифаларнинг ижросини назорат қилиш ва мувофиқлаштириш, идоравий мансуб ташкилотлар фаолиятига амалий ва методик ёрдам кўрсатиш;

таркибий бўлинмалар фаолияти соҳаларига оид қонунчилик ҳужжатлари ва ҳуқуқни қўллаш амалиётини такомиллаштириш бўйича таклифларни ишлаб чиқиш ва уларни кўриб чиқиш учун Қўмита раҳбариятига киритиш;

Қўмита раҳбариятига таркибий бўлинмаларда кадрларни танлаш ва жой-жойига қўйишда таклифлар тақдим этиш, уларнинг профессионаллиги, ўз ишини билиши, амалий тажрибага, юксак ишчанлик ва маънавий-ахлоқий фазилатларга эга эканлиги кафолатини таъминлаш, касбий малакасини ошириш чораларини кўриш, таркибий бўлинмаларда кадрлар захирасини шакллантириш;

таркибий бўлинмалар томонидан норматив-ҳуқуқий ҳужжатлар лойиҳаларининг сифатли ишлаб чиқилишини ташкил этиш, Қўмита раҳбарияти топшириғига мувофиқ Ўзбекистон Республикаси Президенти Администрацияси ва Вазирлар Маҳкамасида норматив-ҳуқуқий ҳужжатлар лойиҳаларини кўриб чиқилишида иштирок этиш;

таркибий бўлинмаларга тақдим этилган таклифлар ва норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқиш;

хизмат сафарларини Ўзбекистон Республикаси Президентининг 2014 йил 5 мартдаги ПҚ-2142-сон , 2017 йил 3 августдаги ПҚ-3170-сон қарорлари талабларига тўла мувофиқ равишда амалга ошириш, хизмат сафарларининг асосланганлиги, самарадорлиги ва натижадорлигини, хизмат сафарларига ажратиладиган маблағлардан оқилона фойдаланишни таъминлаш;

таркибий бўлинмалар ходимлари фаолиятининг самарадорлиги ва натижадорлигини доимий танқидий таҳлил қилиб бориш, йиғилишларда уларнинг шахсий ҳисоботларини эшитиш, уларни кўриб чиқиш якунлари бўйича зарур чораларни кўриш;

ходимларининг Давлат фуқаролик хизматчиларининг одоб-ахлоқ қоидалари талабларига риоя этилишини таъминлаш;

ҳуқуқни қўллаш амалиётини ва қонунчилик ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали «Коррупцияга қарши курашиш тўғрисида»ги Ўзбекистон Республикаси Қонуни талабларига мувофиқ таркибий бўлинмаларда Коррупция ва бошқа ҳуқуқбузарликларнинг олдини олиш чораларини кўриш, шунингдек, уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

Қўмита раҳбариятига давлат хизматларини кўрсатиш самарадорлиги, сифати ва улардан фойдаланиш даражасини ошириш бўйича таклифларни кўриб чиқиш учун киритиш;

жисмоний ва юридик шахсларнинг мурожаатларини қонунчилик ҳужжатларида белгиланган муддатларда ва тартибда кўриб чиқиш, мурожаат билан ишлашни самарали ташкил этиш, аҳоли билан тўғридан-тўғри ва очиқ мулоқотни йўлга қўйиш, жисмоний ва юридик шахслар вакилларини мунтазам равишда шахсан қабул қилиш, шу жумладан, жойларга бориб сайёр қабул қилиш;

давлат сирини ташкил этувчи маълумотлар ва махфий ахборот билан ишлашда қонунчилик талабларига қатъи риоя қилиш.

20. Қўмита ҳудудий бошқармалари раҳбарларининг асосий функционал вазифалари:

Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

ҳудудий бошқармалар фаолиятига умумий раҳбарлик қилиш ва уларга юкланган вазифалар ва функциялар бажарилишини ташкил этиш;

фаолиятни мунтазам таҳлил қилиб бориш ва қайд этилган кўрсаткичларга ҳудудий бошқармалар томонидан сўзсиз эришишни таъминлаш, соҳа фаолияти юзасидан Қўмитага таклифлар киритиб бориш;

Ўзбекистон Республикаси Президенти, Ўзбекистон Республикаси Президенти Администрацияси таркибий бўлинмаларининг ҳамда Вазирлар Маҳкамасининг ҳужжатлари, топшириқлари ва кўрсатмаларининг ўз вақтида, тўлиқ ва сифатли ижро этилишини таъминлаш, ҳудудий бошқармалар ходимларининг ижро интизомини мустаҳкамлаш бўйича комплекс амалий чора-тадбирларни амалга ошириш, топшириқларни ўз вақтида бажарилиши учун шахсий масъулиятини ошириш чораларини кўриш;

Қўмита ҳайъати қарорлари, Қўмита раҳбариятининг буйруқлари, фармойишлари, кўрсатмалари ҳамда топшириқлари ижросини ўз вақтида ва сифатли бажарилишини таъминлаш;

Қўмита фаолияти соҳасига кирадиган масалалар юзасидан маҳаллий ижро этувчи ҳокимият органлари ва комплекс ижтимоий-иқтисодий ривожлантириш бўйича секторлар билан ҳамкорлик қилиш;

ходимларнинг ваколатларини белгилаш, улар ўртасида мажбуриятларни тақсимлаш, ҳудудий бошқармаларни бошқаришда ходимларнинг жавобгарлигини белгилаш;

ҳудудий бошқармалар фаолиятини режалаштиришни ташкил этиш, даврий иш режаларини тасдиқлаш, уларнинг бажарилишини таъминлаш ҳамда ижроси юзасидан Қўмитага ҳисобот киритиб бориш;

Қўмита раҳбариятига ҳудудий бошқармаларда кадрларни танлаш ва жой-жойига қўйишда таклифлар тақдим этиш, уларнинг профессионаллиги, ўз ишини билиши, амалий тажрибага, юксак ишчанлик ва маънавий-ахлоқий фазилатларга эга эканлиги кафолатини таъминлаш, касбий малакасини ошириш чораларини кўриш, таркибий бўлинмаларда кадрлар захирасини шакллантириш бўйича таклифлар киритиш;

ҳудудий бошқармалар ходимларини рағбатлантириш ва интизомий жавобгарликка тортиш, шу жумладан, уларнинг эгаллаб турган лавозимда қолиш-қолмаслиги мақсадга мувофиқлиги масаласини кўриб чиқиш бўйича Қўмита раисига таклифлар киритиш, уларнинг функционал масъулияти ва юкланган вазифалар бажарилишида шахсий масъулиятини ошириш юзасидан тизимли чораларни амалга ошириш;

ҳудудларда ходимларнинг Давлат фуқаролик хизматчиларининг одоб-ахлоқ қоидалари талабларига риоя этилишини таъминлаш;

ҳудудларда ҳуқуқни қўллаш амалиётини ва қонунчилик ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали «Коррупцияга қарши курашиш тўғрисида»ги Ўзбекистон Республикаси Қонуни талабларига мувофиқ Коррупция ва бошқа ҳуқуқбузарликларнинг олдини олиш чораларини кўриш, шунингдек, уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

ҳудудий бошқармалар ходимлари фаолиятининг самарадорлиги ва натижадорлигини доимий танқидий таҳлил қилиб бориш, йиғилишларда уларнинг шахсий ҳисоботларини эшитиш, уларни кўриб чиқиш якунлари бўйича зарур чораларни кўриш;

жисмоний ва юридик шахсларнинг мурожаатларини қонунчилик ҳужжатларида белгиланган муддатларда ва тартибда кўриб чиқиш, мурожаат билан ишлашни самарали ташкил этиш, аҳоли билан тўғридан-тўғри ва очиқ мулоқотни йўлга қўйиш, жисмоний ва юридик шахслар вакилларини мунтазам равишда шахсан қабул қилиш, шу жумладан, жойларга бориб сайёр қабул қилиш;

давлат сирини ташкил этувчи маълумотлар ва махфий ахборот билан ишлашда қонунчилик талабларига қатъий риоя қилиш.

6-боб. Қўмита раҳбарларининг жавобгарлиги

21. Қўмита раиси:

Ўзбекистон Республикаси Президентининг « Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида » 2021 йил 10 февралдаги ПФ-6166-сон ва « Давлат органлари ва ташкилотларда ижро интизомини янада мустаҳкамлашнинг қўшимча чора-тадбирлари тўғрисида » 2025 йил 25 июлдаги ПФ-117-сон фармонлари ҳамда «ijro.gov.uz» ижро интизоми идоралараро ягона электрон тизими самарали фаолият кўрсатишини таъминлашга қаратилган қўшимча чора-тадбирлар тўғрисида» 2021 йил 31 майдаги ПҚ-5132-сон қарори ўз вақтида, тўлиқ ва сифатли ижро этилиши;

мазкур Низом ва бошқа қонунчилик ҳужжатлари билан Қўмитага юкланган вазифаларнинг сифатли ва ўз вақтида бажарилиши, шунингдек, Қўмита ишидаги камчиликларни бартараф этиш бўйича чоралар кўрилиши;

амалга оширилаётган дастурлар, стратегия ва концепцияларда кўзланган натижаларга эришилиши, уларнинг дин ишлари соҳасидаги давлат сиёсатини амалга оширишга таъсири;

тегишли соҳалар ва тармоқларни ривожлантириш бўйича белгиланган параметрлар ва кўрсаткичларга эришишга қаратилган амалий чора-тадбирлар ишлаб чиқилиши ва амалга оширилиши;

Қўмита тизимида ижро интизомига қатъи риоя этилиши учун жавоб беради.

22. Қўмита раисининг ўринбосарлари:

қонунчилик ҳужжатлари билан юкланган йўналишлар ва соҳалар бўйича вазифалар ва функцияларнинг ўз вақтида бажарилиши ҳамда натижадорлиги;

мутасаддилик қилинаётган йўналишлар бўйича соҳаларнинг барқарор ривожланишини таъминлашга оид чора-тадбирларнинг самарадорлиги ва натижадорлиги учун жавоб беради.

23. Қўмита таркибий бўлинмалари раҳбарлари:

тегишли таркибий бўлинмаларга юкланган вазифалар ва функцияларнинг ўз вақтида бажарилиши ҳамда натижадорлиги;

фаолият йўналишларига оид қонунчилик ҳужжатлари, Қўмита раҳбарларининг топшириқлари бажарилишининг ҳолати тўғрисида ҳаққоний таҳлилий ва бошқа ахборотларни сифатли тайёрлаш ва ўз вақтида тақдим этиш юзасидан жавоб беради.

24. Қўмита ҳудудий бошқармалари бошлиқлари:

ҳудудий бошқармаларга юкланган вазифалар ва функцияларнинг ўз вақтида бажарилиши ҳамда натижадорлиги;

тегишли ҳудудда қонунчилик ҳужжатлари, Қўмита раҳбарларининг топшириқлари бажарилишининг ҳолати тўғрисида ҳаққоний таҳлилий ва бошқа ахборотларни сифатли тайёрлаш ва ўз вақтида тақдим этиш юзасидан жавоб беради.

7-боб. Қўмита фаолиятини ташкил этиш

1-§. Қўмита раҳбарияти ҳамда ходимларини лавозимга тайинлаш ва лавозимдан озод этиш тартиби

25. Қўмитага раис раҳбарлик қилади.

Қўмита раиси белгиланган тартибда Ўзбекистон Республикаси Президенти томонидан лавозимга тайинланади ва лавозимдан озод қилинади.

26. Қўмита раисининг Ўзбекистон Республикаси Президенти билан келишилган ҳолда Вазирлар Маҳкамаси томонидан лавозимга тайинланадиган ва лавозимдан озод қилинадиган биринчи ўринбосари ва икки нафар ўринбосари бўлади.

27. Қўмита раиси мақоми, маиший таъминоти, тиббий ва транспорт хизматидан фойдаланиш борасидаги шарт-шароитларига кўра — вазирга, раиснинг биринчи ўринбосари — вазирнинг биринчи ўринбосарига, раис ўринбосарлари — вазир ўринбосарларига тенглаштирилади.

28. Қўмита раиси бўлмаган вақтда, унинг ваколатлари раиснинг биринчи ўринбосари томонидан, у бўлмаган вақтда эса раиснинг тегишли буйруғига асосан бошқа ўринбосар томонидан амалга оширилади.

29. Қуйидагилар:

Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳар ҳокимларининг жамоат ва диний ташкилотлар билан алоқалар бўйича ўринбосарлари — ҳудудий бошқармалар бошлиқлари Қўмита раиси билан келишилган ҳолда, қонунчилик ҳужжатларида белгиланган тартибда лавозимга тайинланади ва лавозимдан озод этилади;

Қўмитанинг марказий аппарати, ҳудудий бошқармалар ходимлари, Қўмитага идоравий мансуб ташкилотлар раҳбарлари Қўмита раиси томонидан лавозимга тайинланади ва лавозимдан озод этилади.

2-§. Қўмита марказий аппарати таркибий бўлинмаларининг ҳудудий бошқармалар ҳамда идоравий мансуб ташкилотлар билан ўзаро ҳамкорлиги тартиби

30. Қўмитанинг марказий аппарати таркибий бўлинмаларининг ҳудудий бошқармалар ҳамда идоравий мансуб ташкилотлар билан ўзаро ҳамкорлигини марказий аппаратнинг таркибий бўлинмалари раҳбарлари таъминлайди.

31. Қўмитанинг марказий аппарати таркибий бўлинмалари ҳудудий бошқармалар билан ўз фаолияти йўналишлари бўйича ўзаро ҳамкорликни амалга оширишда:

топшириқларни ҳудудий бошқармалар ҳамда идоравий мансуб ташкилотларга етказади ҳамда уларнинг ижросини назорат қилиб боради;

ҳудудий бошқармалар ҳамда идоравий мансуб ташкилотларга бевосита таркибий бўлинмалар фаолияти масалалари бўйича сўров жўнатади ва уларнинг ижросини назорат қилиб боради;

ҳудудий бошқармалар ҳамда идоравий мансуб ташкилотлар фаолиятини текширади ва ўрганади, амалиётини умумлаштиради, такомиллаштиришга қаратилган чора-тадбирларни ишлаб чиқади ва амалга оширади;

ҳудудий бошқармалар ҳамда идоравий мансуб ташкилотлар фаолиятининг ташкил этилиши ва натижалари тўғрисида ҳисобот ва ахборот материаллари, статистик ва бошқа маълумотларни ўрганишни ташкил этади;

ҳудудий бошқармалар ҳамда идоравий мансуб ташкилотлар иш режаларини таҳлил қилади, уларнинг фаолиятини режалаштиришни такомиллаштириш бўйича чоралар кўради;

ҳудудий бошқармалар ҳамда идоравий мансуб ташкилотлардан тушган таклифларни кўриб чиқади;

ҳудудий бошқармалар ҳамда идоравий мансуб ташкилотларнинг норматив-ҳуқуқий ҳужжатлар лойиҳаларини тайёрлашда иштирок этишини ташкил этади, уларнинг қонунчилик ҳужжатларини такомиллаштириш юзасидан тушган таклифларини кўриб чиқади.

32. Ҳудудий бошқармалар ҳамда идоравий мансуб ташкилотлар Қўмита марказий аппаратининг таркибий бўлинмалари билан ҳамкорлик қилади, шу жумладан:

Қўмита раҳбарияти топшириқларининг ижроси тўғрисида ахборот беради;

фаолиятнинг белгиланган соҳасидаги қонунчилик ҳужжатларини амалга ошириш бўйича фаолият натижалари тўғрисида марказий аппаратга маълумот тақдим этади;

уларнинг фаолиятини текшириш ва ўрганиш асосида ишда аниқланган камчиликлар ва нуқсонларнинг бартараф этилганлиги натижалари ҳақида ахборот беради;

Қўмитанинг марказий аппаратига белгиланган тартибда ва муддатда ўз фаолияти натижалари тўғрисида ҳисобот тақдим этади;

комплекс ижтимоий-иқтисодий ривожлантириш секторлари билан ҳамкорлик натижалари ҳақида ахборот беради;

ваколатли органлар томонидан ўз фаолиятини текширишлар натижалари ҳақида ахборот беради.

3-§. Қўмитанинг республика ижро этувчи ҳокимият органлари маҳаллий ижро этувчи ҳокимият органлари, хўжалик бирлашмалари ва бошқа ташкилотлар билан ҳамкорлик қилиш тартиби

33. Қўмита ўз вазифалари ва функцияларини амалга оширишда республика ижро этувчи ҳокимият органлари, маҳаллий ижро этувчи ҳокимият органлари, хўжалик бирлашмалари ва бошқа ташкилотлар билан ҳамкорлик қилади.

34. Қўмита фаолияти Вазирлар Маҳкамаси ва Ўзбекистон Республикаси Президенти Администрациясининг тегишли таркибий бўлинмалари томонидан назорат қилинади.

4-§. Қўмитанинг ҳайъати, бошқа кенгаш, маслаҳат, эксперт органлари

35. Қўмитада раис, (ҳайъат раиси), унинг ўринбосарлари, шунингдек, Қўмита фаолиятининг асосий йўналишларини мувофиқлаштирувчи таркибий тузилмалар раҳбарларидан иборат таркибда ҳайъат тузилади.

Ҳайъат таркибининг сони ва шахсий таркиби Қўмита раисининг тақдимномасига биноан Вазирлар Маҳкамаси томонидан тасдиқланади.

36. Ҳайъатга қуйидаги вазифалар юкланади:

Қўмита фаолиятининг ушбу Низомда белгиланган асосий йўналишларини ишлаб чиқиш ва амалга ошириш;

қонунчилик ҳужжатларида, Ўзбекистон Республикаси Президентининг ҳужжатлари ва Вазирлар Маҳкамасининг қарорларида белгиланган вазифалар ўз вақтида ва сифатли амалга оширилишини таъминлаш учун Қўмита тизимидаги ходимлар ва раҳбарларнинг шахсий жавобгарлигини ошириш чораларини кўрган ҳолда таркибий бўлинмалар ҳамда идоравий мансуб ташкилотлар раҳбарларининг ҳисоботлари мунтазам равишда эшитилишини ташкил этиш;

Қўмита фаолияти соҳасидаги ҳудудий ва тармоқ дастурлари амалга оширилишининг натижадорлигини тизимли равишда ҳар чоракда ва мунтазам кўриб чиқиш;

Қўмита фаолияти доирасидаги долзарб масалаларни муҳокама қилишни таъминлаган ҳолда ҳайъатнинг кенгайтирилган, шу жумладан, жойларда сайёр мажлисларини ўтказишни ташкил этиш, шунингдек, юзага келган муаммоларни бартараф этиш бўйича тегишли қарорларни тайёрлаш ва қабул қилиш;

Қўмита ва унинг тизимига кирадиган лавозимлар номенклатурасини кўриб чиқиш ва тасдиқлаш;

Қўмита номенклатурасига кирадиган лавозимларни юклатилган вазифаларга мос, уларни профессионал даражада бажаришга қодир, малакали, зарур назарий билим ва амалий кўникмаларга эга бўлган масъулиятли кадрлар билан жамлаш масалаларини кўриб чиқиш;

Ўзбекистон Республикаси Президенти ҳамда Вазирлар Маҳкамасининг қарор ва топшириқларида белгиланган вазифаларнинг ўз вақтида ва сифатли бажарилишини таъминлаш мақсадида Қўмита раҳбарлари ва ходимларининг ижро интизомини мустаҳкамлаш ва шахсий жавобгарлигини ошириш;

Ҳайъат Қўмита ваколатига киритилган бошқа масалаларни ҳам кўриб чиқишга ҳақли.

37. Ҳайъат мажлисига республика ва маҳаллий ижро этувчи ҳокимият органлари, хўжалик бирлашмалари ва бошқа ташкилотлар раҳбарлари уларнинг ваколатига кирадиган масалалар юзасидан таклиф этилиши мумкин.

38. Ҳайъат, агар унинг мажлисида ҳайъат таркибининг ярмидан кўпи қатнашса, ваколатли ҳисобланади. Кўриб чиқилаётган масалалар юзасидан қарорлар кўпчилик овоз билан қабул қилинади.

39. Ҳайъат қарорлари Ҳайъат раиси томонидан имзоланади ва Қўмита раисининг буйруғи (қарорлари) билан амалга оширилади.

40. Қўмита раиси ва ҳайъат аъзолари ўртасида келишмовчиликлар юзага келган тақдирда, Қўмита раиси юзага келган келишмовчиликлар ҳақида Вазирлар Маҳкамасига ахборот берган ҳолда мустақил равишда қарор қабул қилади. Ҳайъат аъзолари ҳам ўз фикрларини Вазирлар Маҳкамасига маълум қилиши мумкин.

41. Ҳайъат фаолиятининг тартиби унинг ҳайъат томонидан тасдиқланадиган регламенти билан белгиланади.

42. Қўмита ҳузурида кенгаш, маслаҳат ва экспертлик органлари тузилиши мумкин. Уларнинг таркиби ва низомлари раис томонидан тасдиқланади, уларнинг таркиби ва низомлари Ўзбекистон Республикаси Президенти ҳужжатлари билан тасдиқланадиган ҳоллар бундан мустасно.

8-боб. Қўмита фаолиятининг самарадорлиги ва натижадорлигини баҳолаш мезонлари ва иш индикаторлари

43. Қўмита фаолиятининг самарадорлиги мунтазам баҳоланади.

44. Қўмита фаолиятининг самарадорлиги ва натижадорлигини баҳолаш тегишли мезонлар ва ишчи индикаторларга асосланади.

45. Қўмита фаолияти самарадорлиги ва натижадорлигини баҳолаш якунлари бўйича:

Қўмита раҳбарлари ва ходимларини рағбатлантириш (мукофотлаш) ёки уларга нисбатан интизомий жазо чоралари;

Қўмита фаолиятида аниқланган камчиликларни бартараф этиш ва унинг фаолиятини янада такомиллаштириш чоралари кўрилади.

46. Қўмита фаолиятининг самарадорлиги ва натижадорлигини баҳолаш тартиби қонунчилик ҳужжатларида белгиланади.

9-боб. Қўмита фаолиятини молиялаштириш ва моддий-техник таъминлаш, унинг ходимлари меҳнатига ҳақ тўлаш ва моддий рағбатлантириш

47. Қуйидагилар Қўмита фаолиятини молиялаштиришнинг асосий манбалари ҳисобланади:

Ўзбекистон Республикаси Давлат бюджети маблағлари;

Қўмитанинг бюджетдан ташқари маблағлари;

қонунчилик ҳужжатларига мувофиқ пуллик хизмат кўрсатишдан тушадиган маблағлар;

вақтинча бўш маблағларни тижорат банкларининг депозитларига жойлаштиришдан олинган даромадлар;

қонунчилик ҳужжатлари билан тақиқланмаган бошқа манбалар.

48. Қўмита ходимларининг иш ҳақи лавозим маоши, мукофотлар, қўшимча ҳақ, устамалар ва қонунчиликда назарда тутилган бошқа рағбатлантирувчи тўловлардан иборат.

49. Қўмита, унинг идоравий мансуб ташкилотлари ходимларининг лавозим маоши Ягона тариф сеткасининг тасдиқланган разрядлари бўйича белгиланади.

Илмий даражага (PhD, DSc) эга ходимларига амалдаги қонунчиликда белгиланган талаблар асосида тўловлар амалга оширилади.

50. Қўмитанинг бюджетдан ташқари жамғармаси ҳисобидан қонунчиликда белгиланган ишланмайдиган байрам кунларида ва бошқа муҳим саналарда мукофотлаш, шунингдек, устама, рағбатлантириш ва қўшимча ҳақ, мукофотлар ва ижтимоий қўллаб-қувватлаш мақсадида иш ҳақига бошқа тўловлар миқдори Қўмита раиси томонидан белгиланади.

51. Қўмита ходимларига ойлик устамалар, моддий ва кўп йиллик меҳнати учун рағбатлантиришлар тарзидаги лавозим маошларига қўшимча тўловлар қонунчилик ҳужжатларига мувофиқ амалга оширилади.

52. Ўзбекистон Республикаси Дин ишлари бўйича қўмитаси ҳузуридаги «Зиёрат» жамғармаси (кейинги ўринларда — Жамғарма) маблағлари Қўмита ходимларини моддий рағбатлантириш ва ижтимоий муҳофаза қилиш мақсадида қуйидагиларга йўналтирилади:

иш ҳақи (лавозим маоши);

кўп йиллик ишлаганлик учун қўшимча ҳақ ва устамалар тўлаш;

лавозим маошларига ҳар ойлик шахсий устама белгилаш (рағбатлантириш коэффициентини ҳамда қўшимча тўловларни инобатга олган ҳолда);

байрамларда ва муҳим саналарда бир марталик мукофотлаш;

фаолиятда ижобий натижаларга эришганлиги учун мукофотлар;

овқат пули учун тўлов;

йўлкира харажатлари учун тўлов;

ходимларни ижтимоий қўллаб-қувватлаш мақсадида бир марталик моддий ёрдам кўрсатиш;

қишлоқ хўжалиги маҳсулотларини харид қилиш учун бир йилда бир маротаба моддий ёрдам кўрсатиш;

юбилей саналар, пенсияга чиқиш, тўй, фарзандли бўлиш муносабати билан эсдалик совғалар ёки пул маблағлари бериш;

қонунчиликда белгиланган бошқа тўловлар.

53. Шахсий ойлик устамалар лавозим маошига нисбатан фоизда белгиланади.

Қўмитанинг марказий аппарати ходимлари учун шахсий устаманинг энг юқори миқдори (устама ва рағбатлантириш коэффициенти ҳамда кўп йиллик ишлаганлик учун устамани ҳисобга олган ҳолда) —

200 (икки юз) фоизгача, ҳудудий бошқармалар ходимлари учун шахсий устаманинг энг юқори миқдори — 100 (бир юз) фоиздан ошмаслиги лозим.

54. Хизмат вазифаларини виждонан ва ташаббускорлик билан бажарган Қўмита ходимлари қонунчиликда белгиланган ишланмайдиган байрам кунлари муносабати билан лавозим маоши (рағбатлантириш коэффициентлари ҳисобга олинган ҳолда) бир баробаригача миқдорда мукофот билан моддий рағбатлантирилади.

55. Байрам саналарига мукофотлар:

1 январь — Янги йил;

8 март — Хотин-қизлар куни;

21 март — Наврўз байрами;

9 май — Хотира ва қадрлаш куни;

1 сентябрь — Мустақиллик куни;

1 октябрь — Ўқитувчи ва мураббийлар куни;

8 декабрь — Ўзбекистон Республикаси Конституцияси куни;

Рўза ҳайит (Ийд ал-Фитр) диний байрами;

Қурбон ҳайит (Ийд ал-Адҳа) диний байрамлари муносабати билан барча ходимлар рағбатлантирилади. Ушбу мукофотлар миқдорлари ходимларнинг ҳақиқатда ишлаган даврларига боғлиқ бўлмайди.

Болаларни парваришлаш, ўқиш билан боғлиқ ҳамда ижодий таътиллар даврида, сафарбарлик чақируви резервидаги хизматга, ҳарбий йиғинга чақирилган давридаги байрам саналарига мукофотлар берилмайди.

56. Қўмита ходимларини ижтимоий муҳофаза қилиш мақсадида, уларга ҳар ойда ҳар бир штат бирлиги учун базавий ҳисоблаш миқдорининг 5 (беш) бараваридан кўп бўлмаган миқдорда овқат пули, йўлкира харажатларини қоплаш учун базавий ҳисоблаш миқдорининг 3 (уч) бараваридан кўп бўлмаган миқдорда тўловлар амалга оширилади.

Қопланадиган харажатлар миқдори базавий ҳисоблаш миқдори энг кам миқдори ошишига қараб ортиши мумкин.

Транспорт ва овқатланиш харажатларини қоплаш учун тўловларнинг аниқ миқдори Қўмита раисининг буйруғи билан белгиланади.

Мазкур бандда кўрсатилган тўловлар ходимнинг ишлаган даврига мутаносиб равишда тўланади.

57. Қўмита ходимларига қишлоқ хўжалиги маҳсулотларини сотиб олиш учун йилда бир марта (қоида тариқасида куз ойларида) базавий ҳисоблаш миқдорининг 10 (ўн) бараваридан кўп бўлмаган миқдорида моддий ёрдам амалга оширилади.

Қишлоқ хўжалиги маҳсулотларини харид қилиш учун моддий ёрдамнинг аниқ миқдори Қўмита раисининг буйруғига биноан белгиланади.

58. Қўмита ходимларига молия йилида бир марта (меҳнат таътилига чиқиш вақтида соғлигини тиклаш мақсадида ёки меҳнат таътилга чиқмаган ходимларга молия йилининг декабрь ойида) бир ойлик меҳнатга ҳақ тўлаш фонди (лавозим маоши ва рағбатлантириш коэффициентини инобатга олган ҳолда) миқдорида моддий ёрдам кўрсатилади.

Моддий ёрдам кўрсатиш ходимнинг аризаси ёки Касаба уюшмаси қўмитаси илтимосномасига асосан буйруқ билан амалга оширилади.

59. Қўмита раисини мукофотлаш, шахсий устамаларини белгилаш, моддий рағбатлантириш қонунчилик ҳужжатларида белгиланган тартибда амалга оширилади.

60. Ўзбекистон Республикаси Президенти ёки Вазирлар Маҳкамаси қарорлари билан алоҳида соҳа ходимларига устама белгиланган ҳолларда устамалар қонунчиликда белгиланган тартибда амалга оширилади.

10-боб. Қўмитанинг Ўзбекистон Республикаси Президенти, Ўзбекистон Республикаси Президенти Администрацияси ҳамда Вазирлар Маҳкамасига ҳисобот бериши

61. Қўмита раҳбарлари ўз фаолияти тўғрисида Ўзбекистон Республикаси Президентига, Ўзбекистон Республикаси Президенти Администрациясининг тегишли таркибий бўлинмаларига, Вазирлар Маҳкамасига ҳисобот беради.

Қўмита Ўзбекистон Республикаси Президенти Администрацияси ва Вазирлар Маҳкамаси билан ўзаро ҳамкорлик қилиш доирасида:

ўзига юкланган вазифалар ва функцияларни бажариш билан боғлиқ норматив-ҳуқуқий ҳужжатлар ҳамда бошқа ҳужжатлар лойиҳаларини белгиланган тартибда киритади;

Ўзбекистон Республикаси Президенти Администрацияси ва Вазирлар Маҳкамасига тақдим этиш учун республика ва маҳаллий ижро этувчи ҳокимият органлари, хўжалик бирлашмалари билан биргаликда ўз фаолияти соҳасидаги муаммоларни ҳал этиш, давлат бошқаруви тизимини мақбуллаштиришга қаратилган таклиф, тавсия ва таҳлилий маълумотлар тайёрланишини таъминлайди;

дин ишлари соҳасидаги давлат сиёсатини амалга оширишда мавжуд тизимли муаммо ва камчиликларнинг мунтазам равишда кўриб чиқилиши ва бартараф этилишини ташкил қилади;

белгиланган тартибда бошқа функцияларни ҳам амалга оширади.

62. Ўзбекистон Республикаси Президенти Администрациясининг тегишли таркибий бўлинмалари раҳбарлари ҳамда Вазирлар Маҳкамаси Қўмита раҳбарларига юклатилган вазифаларнинг самарали бажарилиши бўйича улар фаолияти устидан доимий мониторинг олиб боради, Қўмита фаолияти самарадорлигини холисона баҳолайди.

63. Мониторинг ва баҳолаш натижаларига кўра Қўмитанинг алоҳида ўрнак кўрсатган раҳбарлари ва ходимларини рағбатлантириш чоралари кўрилади, жиддий камчиликларга йўл қўйганларга нисбатан эгаллаб турган лавозимидан озод этишгача бўлган жавобгарлик чоралари қўлланади.

11-боб. Якунловчи қоида

64. Қўмита қонунчилик ҳужжатларида белгиланган тартибда қайта ташкил этилади ва тугатилади.

Вазирлар Маҳкамасининг 2025 йил 20 августдаги 521-сон қарорига 2-ИЛОВА

Вазирлар Маҳкамасининг 2024 йил 12 октябрдаги 668-сон қарори билан тасдиқланган Ўзбекистон Республикаси Дин ишлари бўйича қўмитаси ҳузуридаги «Зиёрат» жамғармаси тўғрисидаги низомга киритилаётган ўзгартириш ва қўшимчалар

1. 3-банд ўз кучини йўқотган деб ҳисоблансин.

2. 4-банд қуйидаги таҳрирда баён этилсин:

«4. Жамғарма юридик шахс ҳисобланмайди ва унинг маблағлари Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида очилган Ўзбекистон Республикаси Дин ишлари бўйича қўмитаси (кейинги ўринларда — Дин ишлари бўйича қўмита)нинг шахсий ғазна ҳисобварақларида жамланади ва ушбу Низомда белгиланган мақсадларга сарфланади».

3. 5-банд қуйидаги таҳрирда баён этилсин:

«5. Куйидагилар Жамғарма маблағларини шакллантириш манбалари ҳисобланади:

диний мазмундаги материалларни диншунослик экспертизасидан ўтказиш учун ундириладиган тўловлар;

диний таълим муассасалари ҳамда «Умра» тадбирларини ташкил этиш ва ўтказиш фаолиятини лицензиялашда аризани кўриб чиқиш учун ундириладиган йиғимнинг қонунчиликда белгиланган қисми;

диний таълим муассасалари ҳамда «Умра» тадбирларини ташкил этиш фаолиятини лицензиялашда ундириладиган давлат божининг 30 фоизи;

лицензиялаш соҳасидаги ҳуқуқбузарликларни содир этганлик учун юридик шахслардан ундирилган жариманинг 10 фоизи;

жисмоний ва юридик шахсларнинг ҳомийлик хайриялари;

Жамғарманинг вақтинча бўш маблағларини тижорат банкларидаги депозитларга жойлаштиришдан олинадиган даромадлар;

халқаро ташкилотларнинг грантлари;

қонунчилик ҳужжатларида тақиқланмаган бошқа манбалар».

4. 7-банд қуйидаги таҳрирда баён этилсин:

«7. Жамғарманинг вақтинчалик бўш турган маблағлари Дин ишлари бўйича қўмита томонидан Ўзбекистон Республикаси тижорат банкларининг депозит ҳисобварақларига жойлаштирилиши мумкин.

Дин ишлари бўйича қўмита раиси Жамғармага маблағлар тушишининг тўлиқлиги ва сақланишини назорат қилади».

5. 8-банд қуйидаги таҳрирда баён этилсин:

«8. Жамғарма маблағлари қуйидагиларга йўналтирилади:

«Умра» хизматлари сифатсиз кўрсатилишидан жабр кўрган зиёратчиларга етказилган моддий ва маънавий зарар ўрнини қоплаш;

Дин ишлари бўйича қўмитага юклатилган вазифаларни бажариш, жумладан диний-маърифий тадбирларни ташкил этиш ва ўтказиш;

Дин ишлари бўйича қўмита ходимларини моддий рағбатлантириш ва ижтимоий муҳофаза қилиш (санатория, курорт ва тиббий хизмат кўрсатиш, мукофотлар тўлаш, маошларга устамалар белгилаш, моддий ёрдам кўрсатиш);

Дин ишлари бўйича қўмита ходимларининг хизмат сафари харажатлари, шу жумладан хорижий давлатлардаги хизмат сафарлари харажатларини қоплаш;

Дин ишлари бўйича қўмитанинг ходимларини ўқитиш, малакасини ошириш ҳамда стажировка ўташи, шу жумладан, уларнинг хорижий давлатларга ташрифларини ташкил этиш ва хорижий давлатларда ўтказиладиган конференция, семинарлар ва бошқа тадбирларда иштирок этиш харажатларини қоплаш;

Дин ишлари бўйича қўмита фаолияти билан боғлиқ масалалар бўйича Ўзбекистон Республикасига ташриф буюрадиган хорижий давлатлар, халқаро ташкилотлар делегацияларининг ташрифларини ташкил этиш;

Дин ишлари бўйича қўмита бино ва иншоотларини сақлаш ҳамда бошқа жорий харажатлар, ёрдамчи техник ва хизмат кўрсатувчи ходимлари таъминоти, ушбу Қўмита фаолиятини янада яхшилаш билан боғлиқ бошқа тадбирларни ўтказиш;

Дин ишлари бўйича қўмитанинг моддий-техника базасини мустаҳкамлашга ва фаолиятини ривожлантиришга йўналтирилган бошқа тадбирларни амалга ошириш».

6. 10-банд ўз кучини йўқотган деб ҳисоблансин.

7. Қуйидаги мазмундаги 9 1 — 9 4 -бандлар билан тўлдирилсин:

«9 1 . Жамғарма маблағларидан фойдаланиш Дин ишлари бўйича қўмитанинг ривожлантириш дастурларини маблағ билан таъминлаш орқали амалга оширилади ҳамда ушбу дастурлар ҳар йили маблағлар ва эҳтиёжлар прогнози асосида шакллантирилади.

9 2 . Жамғарма маблағларини сарфлаш Дин ишлари бўйича қўмита томонидан тасдиқланган Жамғарманинг даромадлар ва харажатлар сметасига мувофиқ тегишли ғазна ҳисобварақларидан амалга оширилади.

9 3 . Жамғармадан пул маблағларини ажратиш тасдиқланган даромадлар ва харажатлар сметаси доирасида қонунчиликда белгиланган тартибда амалга оширилади.

9 4 . Жамғармадан ажратилган пул маблағларининг сарфланиши тўғрисидаги даромадлар ва харажатлар акс эттирилган ҳисобот ҳар чорак якуни бўйича бухгалтерия балансида акс эттирилади».

8. Қуйидаги мазмундаги 3 1 ва 3 2 -боблар билан тўлдирилсин:

«3 1 -боб. Жамғармани бошқариш

9 5 . Жамғарма маблағларини бошқариш ва тақсимлаш Дин ишлари бўйича қўмита раиси томонидан амалга оширилади.

9 6 . Дин ишлари бўйича қўмитанинг Молия-иқтисод бўлими Жамғарманинг ишчи органи ҳисобланади.

9 7 . Жамғарма маблағларининг ҳисоб ва ҳисоботини юритиш ҳамда жорий хизмат кўрсатиш ишлари Дин ишлари бўйича қўмитанинг Молия-иқтисод бўлими томонидан амалга оширилади. Жумладан:

Жамғарманинг келгуси йил учун даромадлари ва харажатлари прогноз кўрсаткичларини ишлаб чиқади;

Жамғарманинг даромадлар ва харажатлари сметасини тайёрлайди, зарур ҳолларда, тасдиқланган даромадлар ва харажатлар сметасига тузатишлар киритиш бўйича таклифлар киритади;

Жамғарма тушумларини кўпайтириш ва унинг маблағларидан самарали фойдаланиш бўйича таклифлар тайёрлайди;

ушбу Низомда ва қонунчилик ҳужжатларида назарда тутилган харажатларни амалга оширади;

Жамғарма маблағларининг тушуми ва улардан фойдаланиш ҳисобини юритади;

Жамғармадан ажратилган пул маблағларининг сарфланиши тўғрисидаги даромадлар ва харажатларини бухгалтерия балансида акс эттирилишини таъминлайди;

Жамғарма сметасининг ижроси тўғрисидаги ҳисоботни тузади.

Ўзбекистон Республикаси Иқтисодиёт ва молия вазирлигига қонунчилик ҳужжатларида белгиланган тартибда Жамғарма сметасининг ижроси тўғрисида ҳисобот тақдим этилишини таъминлайди.

3 2 -боб. Жамғарманинг ҳисоби ва ҳисоботини юритиш

9 8 . Жамғарма маблағларидан фойдаланиш бўйича ҳисоб ва ҳисоботлар Дин ишлари бўйича қўмитанинг бюджетдан ташқари ғазна ҳисобварақларида алоҳида юритилади.

9 9 . Жамғарманинг жорий йилда фойдаланилмаган маблағлари Ўзбекистон Республикасининг Давлат бюджетига олиб қўйилмайди ва улардан кейинги йилда фойдаланилади.

9 10 . Жамғарманинг даромадлар ва харажатлар сметасининг ижроси тўғрисидаги ҳисоботлар қонунчилик ҳужжатларида белгиланган тартибда тузилади ва Дин ишлари бўйича қўмита раиси томонидан тасдиқланади.

9 11 . Жамғарманинг даромадлар ва харажатлар сметаси ҳамда унинг ижроси тўғрисидаги ҳисоботлар, шунингдек, товарлар (ишлар, хизматлар)ни харид қилиш бўйича тузилган шартномалар рўйхатлари Дин ишлари бўйича қўмитанинг расмий веб-сайтида эълон қилинади.

9 12 . Жамғарма маблағларидан оқилона ва мақсадли фойдаланилиши юзасидан давлат молиявий назорати қонунчилик ҳужжатларида белгиланган тартибда молиявий назорат хизматлари томонидан амалга оширилади».

9. Қуйидаги мазмундаги 12 1 -банд билан тўлдирилсин:

«12 1 . Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади».

Ўзбекистон Республикасининг Бош вазири А. АРИПОВ

Тошкент ш.,

2025 йил 20 август,

521-сон

(Қонунчилик маълумотлари миллий базаси, 20.08.2025 й., 09/25/521/0753-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Oʻzbekiston Respublikasi Din ishlari boʻyicha qoʻmitasi toʻgʻrisidagi nizomni tasdiqlash haqida

Oʻzbekiston Respublikasi Prezidentining “Fuqarolarning vijdon erkinligi huquqi kafolatlarini yanada mustahkamlash hamda diniy-maʼrifiy sohadagi islohotlarni yangi bosqichga olib chiqish chora-tadbirlari toʻgʻrisida” 2025-yil 21-apreldagi PF-68-son Farmoniga muvofiq Oʻzbekiston Respublikasi Din ishlari boʻyicha qoʻmitasi faoliyatini yanada takomillashtirish maqsadida Vazirlar Mahkamasi qaror qiladi:

1. Quyidagilarni nazarda tutuvchi Oʻzbekiston Respublikasi Din ishlari boʻyicha qoʻmitasi toʻgʻrisidagi nizom 1-ilovaga muvofiq tasdiqlansin:

Din ishlari boʻyicha qoʻmitaning maqomi, asosiy vazifalari va funksiyalari;

Din ishlari boʻyicha qoʻmitaning huquqlari hamda javobgarligi, shuningdek, uning faoliyatini tashkil etish tartibi;

Din ishlari boʻyicha qoʻmita rahbariyatining asosiy funksional vazifalari va javobgarligi;

Din ishlari boʻyicha qoʻmita faoliyatini moliyalashtirish, uning xodimlari mehnatiga haq toʻlash va moddiy ragʻbatlantirish tartibi.

2. Vazirlar Mahkamasining 2024-yil 12-oktabrdagi 668-son qarori bilan tasdiqlangan Oʻzbekiston Respublikasi Din ishlari boʻyicha qoʻmitasi huzuridagi “Ziyorat” jamgʻarmasi toʻgʻrisidagi nizomga 2-ilovaga muvofiq oʻzgartirish va qoʻshimchalar kiritilsin.

3. Vazirlar Mahkamasining “Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita toʻgʻrisidagi nizomni tasdiqlash haqida” 2021-yil 29-sentabrdagi 612-son qarori oʻz kuchini yoʻqotgan deb hisoblansin.

4. Din ishlari boʻyicha qoʻmita manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

5. Mazkur qarorning bajarilishini nazorat qilish Oʻzbekiston Respublikasi Din ishlari boʻyicha qoʻmitasi raisi S.D. Toshboyev zimmasiga yuklansin.

Vazirlar Mahkamasining 2025-yil 20-avgustdagi 521-son qaroriga 1-ILOVA

Oʻzbekiston Respublikasi Din ishlari boʻyicha qoʻmitasi toʻgʻrisida

1-bob. Umumiy qoidalar

1. Mazkur Nizom Oʻzbekiston Respublikasi Din ishlari boʻyicha qoʻmitasining (keyingi oʻrinlarda — Qoʻmita) maqomi, asosiy vazifalari va funksiyalari, huquqlari va javobgarligini, shuningdek, faoliyatini tashkil etish tartibini belgilaydi.

2. Qoʻmita alohida mustaqil maqomga ega respublika ijro etuvchi hokimiyat organi hisoblanib, din ishlari sohasida yagona davlat siyosatini ishlab chiqadi va amalga oshiradi, ushbu yoʻnalishda ijro etuvchi hokimiyat organlarining faoliyatini muvofiqlashtiradi.

3. Qoʻmita oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining Farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek, ushbu Nizomga va boshqa qonunchilik hujjatlariga amal qiladi.

4. Qoʻmita oʻz faoliyatini respublika ijro etuvchi hokimiyat organlari, mahalliy ijro etuvchi hokimiyat organlari, xoʻjalik birlashmalari va boshqa tashkilotlar, shu jumladan, xalqaro tashkilotlar bilan oʻzaro hamkorlikda amalga oshiradi.

5. Qoʻmitaning oʻz vakolatlari doirasida qabul qilgan qarorlari respublika ijro etuvchi hokimiyat organlari, mahalliy ijro etuvchi hokimiyat organlari, boshqa tashkilotlar va ularning mansabdor shaxslari, shuningdek, fuqarolar tomonidan bajarilishi majburiy hisoblanadi.

6. Qoʻmita yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻzining nomi davlat tilida yozilgan muhr va blanklarga, mustaqil balansga, Iqtisodiyot va moliya vazirligi huzuridagi Gʻaznachilik xizmati qoʻmitasida shaxsiy gʻazna hisobvaraqlariga, shu jumladan, chet el valyutasidagi shaxsiy gʻazna hisobvaraqlariga ega boʻladi.

7. Qoʻmitaning rasmiy nomi:

davlat tilida:

toʻliq nomi — Oʻzbekiston Respublikasi Din ishlari boʻyicha qoʻmitasi, qisqartirilgan nomi — Din ishlari qoʻmitasi;

rus tilida:

toʻliq nomi — Komitet po delam religiy Respubliki Uzbekistan, qisqartirilgan nomi — KPDR;

ingliz tilida:

toʻliq nomi — Committee of Religious Affairs of the Republic of Uzbekistan, qisqartirilgan nomi — Committee of Religious Affairs.

8. Qoʻmitaning joylashgan yeri (pochta manzili): 100011, Toshkent shahri, Shayxontohur tumani, A. Navoiy koʻchasi, 12-uy.

2-bob. Qoʻmitaning tashkiliy tuzilmasi

9. Qoʻmita tizimiga quyidagilar kiradi:

Qoʻmitaning markaziy apparati;

Diniy-maʼrifiy sohada malaka oshirish va qayta tayyorlash instituti;

Qoʻmitaning Qoraqalpogʻiston Respublikasi, viloyatlar va Toshkent shahar hududiy boshqarmalari (keyingi oʻrinlarda — hududiy boshqarmalar).

10. Hududiy boshqarmalar yuridik shaxs hisoblanmaydi va ularning tuzilmasida tumanlar va shaharlar boʻyicha bosh mutaxassislar faoliyat yuritadi.

3-bob. Qoʻmitaning asosiy vazifalari va funksiyalari

11. Quyidagilar Qoʻmitaning asosiy vazifalari hisoblanadi:

vijdon erkinligi va diniy tashkilotlar toʻgʻrisidagi qonunchilik hujjatlariga muvofiq din ishlari sohasida yagona davlat siyosatini amalga oshirish, ushbu jarayonda davlat va jamoat tashkilotlarining oʻzaro hamkorligini yoʻlga qoʻyish;

Oʻzbekiston Respublikasining dunyoviy davlat prinsipini roʻyobga chiqarish, fuqarolarning vijdon erkinligi kafolatlarini, aholining dini va eʼtiqodidan qatʼi nazar huquqlari toʻliq roʻyobga chiqarilishini taʼminlash, vijdon erkinligi buzilishining har qanday koʻrinishini oldini olish;

diniy mutaassiblik, ekstremizm va terrorizm gʻoyalarini tarqatish, turli konfessiyalar oʻrtasida adovatni yuzaga keltirishga qaratilgan xatti-harakatlarning oldini olish, ularning oʻzaro ahil-inoq va hamjihat hayot kechirishini qoʻllab-quvvatlash choralarini koʻrish;

jamiyatda diniy-maʼrifiy muhit barqarorligi va eʼtiqod erkinligiga tahdid tugʻdirishi mumkin boʻlgan omillarni oʻrganish, tahlil qilish va ularning oldini olish boʻyicha takliflar ishlab chiqish, ushbu jarayonlarda diniy-maʼrifiy soha vakillarining ishtirokini kengaytirish;

davlat organlarining diniy tashkilotlar bilan oʻzaro aloqasi va hamkorligini muvofiqlashtirish hamda davlat siyosatida diniy tashkilotlar manfaatlarini aks ettirish;

aholi orasida konfessiyalararo totuvlik va diniy bagʻrikenglikni mustahkamlash boʻyicha targʻibot va tashviqot ishlarini olib borish;

fuqarolarning xorijiy davlatlarga hamda chet el fuqarolarining Oʻzbekistonga ziyorat turizmini amalga oshirishi uchun shart-sharoitlar yaratishga koʻmaklashish;

ekstremizm va mutaassiblik gʻoyalari taʼsiriga tushib qolgan shaxslarni sogʻlom hayotga qaytarish, jamiyatda tinchlik va totuvlik muhitini mustahkamlash, dindan siyosiy maqsadlarda foydalanishga yoʻl qoʻymaslikka qaratilgan maʼrifiy-tarbiyaviy ishlarni olib borish, bu borada ilgʻor xorijiy tajriba asosida takliflar tayyorlash;

ommaviy axborot vositalarida, shu jumladan Internet jahon axborot tarmogʻida diniy-maʼrifiy sohadagi yagona davlat siyosatiga nisbatan noxolis maʼlumotlar tarqalishining oldini olish hamda diniy mutaassiblik va ekstremizm ruhidagi axborotlarga tezkor va ilmiy raddiyalar berish;

diniy-maʼrifiy sohada malakali kadrlarni tayyorlash, qayta tayyorlash va malakasini oshirish, ilmiy-tadqiqot markazlarining tadqiqot yoʻnalishlarini muvofiqlashtirish;

manfaatdor tashkilotlar bilan hamkorlikda aholining diniy-ijtimoiy jarayonlarga munosabatini oʻrganish boʻyicha ijtimoiy soʻrovlar tashkil etish.

12. Qoʻmita oʻziga yuklangan vazifalarni bajarish uchun quyidagi funksiyalarni amalga oshiradi:

a) vijdon erkinligi va diniy tashkilotlar toʻgʻrisidagi qonunchilik hujjatlariga muvofiq din ishlari sohasida yagona davlat siyosatini amalga oshirish, ushbu jarayonda davlat va jamoat tashkilotlarining oʻzaro hamkorligini yoʻlga qoʻyish borasida:

vijdon erkinligi va diniy tashkilotlar toʻgʻrisidagi qonunchilik hujjatlariga muvofiq din ishlari sohasidagi masalalarni hal qilishda yagona davlat siyosatini amalga oshiradi;

davlat organlarining diniy tashkilotlar bilan oʻzaro munosabatlarini muvofiqlashtiradi hamda vijdon erkinligi va diniy tashkilotlar toʻgʻrisidagi qonunchilik hujjatlarining ijrosi yuzasidan nazoratni amalga oshiradi;

din ishlari sohasidagi davlat siyosatining asosiy maqsadi, vazifalari va prinsiplarini keng jamoatchilikka, davlat va jamoat tashkilotlari rahbar va xodimlariga tushuntirish, ularning faolligi, tashabbuskorligini oshirish ishlarini olib boradi;

diniy tashkilotlarni roʻyxatdan oʻtkazish yuzasidan xulosa olish boʻyicha murojaatlarni koʻrib chiqadi, hududiy boshqarmalar tomonidan bunday murojaatlarning qonunchilik hujjatlariga muvofiqligini joylarda oʻrganilishini nazorat qiladi;

diniy taʼlim muassasalari hamda “Umra” tadbirlarini tashkil etish va oʻtkazish faoliyatini belgilangan tartibda litsenziyalanishi taʼminlaydi, litsenziatlar tomonidan litsenziya talablari va shartlariga rioya etilishi yuzasidan nazoratni tashkil qiladi, litsenziyalar reyestrini yuritadi;

diniy taʼlim muassasalarining faoliyatini, ularning oʻquv jarayoni va dasturlarini, oʻquv-tarbiyaviy ishlarni, fanlar boʻyicha oʻquv rejalarini, diniy mavzudagi ilmiy-tadqiqot ishlarini muvofiqlashtiradi, ularga ushbu faoliyatni amalga oshirishda tashkiliy-huquqiy va metodik yordam koʻrsatadi;

respublikada chiqariladigan yoki xorijdan keltiriladigan diniy mazmundagi materiallarni (kitoblar, risolalar, jurnallar, gazetalar, varaqalar, boshqa bosma nashrlar, belgilar, predmetlar, ramzlar, audiovizual asarlar (tele, kino va videofilmlar, kliplar, konsert dasturlarining yozuvlari, multfilmlar va boshqalar), elektron axborot tashuvchilarni (disketlar, CD, DVD disklari, oʻrnatilgan va yechib olinadigan xotira kartalari, Internet jahon axborot tarmogʻida joylashtirilgan materiallar va boshqalar) ekspertizadan oʻtkazadi, xulosalar beradi va mazkur faoliyatni muvofiqlashtiradi;

diniy mazmundagi materiallarni noqonuniy tayyorlash, olib kirish va tarqatish holatlarini aniqlash hamda oldini olish maqsadida nazorat tadbirlarini oʻtkazadi va natijasi boʻyicha hujjatlarni koʻrib chiqish uchun huquqni muhofaza qiluvchi organlarga taqdim qiladi;

vijdon erkinligi va diniy tashkilotlar faoliyatiga taalluqli normativ-huquqiy hujjatlar loyihalarini ishlab chiqishda qatnashadi;

b) Oʻzbekiston Respublikasining dunyoviy davlat prinsipini roʻyobga chiqarish, fuqarolarning vijdon erkinligi kafolatlarini, aholining dini va eʼtiqodidan qatʼi nazar huquqlari toʻliq roʻyobga chiqarilishini taʼminlash, vijdon erkinligi buzilishining har qanday koʻrinishini oldini olish borasida:

Oʻzbekiston Respublikasi fuqarolarining, shuningdek, diniy eʼtiqodidan qatʼi nazar, Oʻzbekiston Respublikasi hududida istiqomat qiluvchi chet el fuqarolari va fuqaroligi boʻlmagan shaxslarning diniy erkinligini taʼminlashning qonuniy choralarini koʻradi;

fuqarolarning vijdon erkinligi kafolatlarini himoya qilish borasida tegishli choralarni belgilaydi hamda manfaatdor tashkilotlar bilan hamkorlikni yoʻlga qoʻyadi;

diniy tashkilotlar rahbarlarining dunyoviy davlat prinsiplari, davlatning din ishlari sohasidagi siyosatining mohiyati, amalga oshirilayotgan islohotlar haqidagi tushuncha va dunyoqarashini kengaytirish maqsadida maʼrifiy tadbirlar tashkil etadi;

vijdon erkinligi kafolatlarining buzilishi holatlariga nisbatan tezkor chora-tadbirlar koʻradi;

diniy tashkilotlar vakillarining ibodat marosimlarida oʻqiladigan maʼruzalari mazmuni Oʻzbekiston Respublikasining Konstitutsiyasi va qonunlariga hamda diniy sohadagi davlat siyosati prinsipiga muvofiq boʻlishini taʼminlaydi;

roʻyxatdan oʻtgan diniy tashkilot aʼzolarining erkin ibodat qilishi, diniy rasm-rusumlarni ado etishi uchun shart-sharoitlar yaratishga koʻmaklashadi;

v) diniy mutaassiblik, ekstremizm va terrorizm gʻoyalarini tarqatish, turli konfessiyalar oʻrtasida adovatni yuzaga keltirishga qaratilgan xatti-harakatlarning oldini olish, ularning oʻzaro ahil-inoq va hamjihat hayot kechirishini koʻllab-quvvatlash choralarini koʻrish borasida:

diniy mutaassiblik, ekstremizm va terrorizm gʻoyalarini tarqatish, turli konfessiyalar oʻrtasida adovatni yuzaga keltirish hamda diniy vaziyatga salbiy taʼsir etuvchi omillarni oʻrganish va bartaraf etish chora-tadbirlarini ishlab chiqishda ilmiy-tadqiqot markazlari, tashkilotlar va taʼlim muassasalari bilan hamkorlikni yoʻlga qoʻyadi;

Oʻzbekistonda va xorijda yuz berayotgan diniy-ijtimoiy sohaga oid muhim voqealarni chuqur tahlil qiladi hamda respublikadagi barqaror diniy-ijtimoiy vaziyatga tahdid solishi mumkin boʻlgan salbiy holatlarni aniqlash va ularni bartaraf etish maqsadida boshqa tashkilotlar bilan hamkorlik qiladi va tajriba almashadi, ularni oldini olish boʻyicha takliflar tayyorlab, kiritib boradi;

tayyorlash, olib kirish, tarqatish man etilgan, Oʻzbekiston Respublikasi hududida muomalada boʻlishi taqiqlangan diniy mazmundagi materiallarning roʻyxatini xizmat doirasida foydalanish uchun manfaatdor tashkilotlarga taqdim qilib boradi;

jamiyatda “jaholatga qarshi maʼrifat” ulugʻvor gʻoyasi asosida dinlarining asl insonparvarlik mohiyatini yetkazish, diniy bagʻrikenglikni targʻib qilish boʻyicha targʻibot tadbirlarini amalga oshiradi, davlat va nodavlat notijorat tashkilotlarga bu boradagi faoliyatini amalga oshirishga koʻmaklashadi;

diniy tashkilotlarning diniy mutaassiblik, ekstremizm va terrorizm gʻoyalarini tarqatish, turli konfessiyalar oʻrtasida adovatni yuzaga keltirishining oldini olishga qaratilgan faoliyatini muvofiqlashtiradi;

ijtimoiy tarmoqlarda hamda diniy-maʼrifiy yoʻnalishdagi veb-saytlarda ekstremizm va terrorizmga qarshi qaratilgan targʻibot ishlarini amalga oshirishni tashkil etadi;

g) jamiyatda diniy-maʼrifiy muhit barqarorligi va eʼtiqod erkinligiga tahdid tugʻdirishi mumkin boʻlgan omillarni oʻrganish, tahlil qilish va ularning oldini olish boʻyicha takliflar ishlab chiqish, ushbu jarayonlarda diniy-maʼrifiy soha vakillarining ishtirokini kengaytirish borasida:

respublika hududlari va xorijiy davlatlardagi diniy-ijtimoiy jarayonlarni, davlat organlari va diniy tashkilotlar oʻrtasidagi munosabatlarni muntazam oʻrganadi, tahlil qiladi hamda ijtimoiy-maʼnaviy muhitni barqarorligini taʼminlash boʻyicha axborot-tahliliy materiallarni tayyorlab, Vazirlar Mahkamasiga va Oʻzbekiston Respublikasi Prezidenti Administratsiyasiga kiritib boradi;

respublikada diniy-ijtimoiy vaziyatni monitoring va tahlil qiladi, diniy-maʼnaviy muhitni yaxshilash, barqarorligini taʼminlash, yanada sogʻlomlashtirish boʻyicha manzilli “yoʻl xaritalari”ni ishlab chiqadi hamda amalga oshiradi;

diniy mavzularga oid nashrlar, Internet jahon axborot tarmogʻi va ommaviy axborot vositalari materiallarini chuqur tahlil qiladi;

diniy-maʼrifiy faoliyatni takomillashtirish boʻyicha takliflar tayyorlash va kiritib borish;

diniy-maʼrifiy sohada aholining huquqiy madaniyati va bilimini oshirish, jamiyatda bagʻrikenglik gʻoyalarini shakllantirish va mustahkamlash boʻyicha choralar koʻradi;

jamiyatda ekstremizm gʻoyalari tarqalishining oldini olish, aholini noanʼanaviy diniy harakatlar va tahdidlardan himoya qilish uchun davlat tashkilotlari va boshqa tashkilotlar faoliyatini muvofiqlashtirishda ishtirok etadi;

d) davlat organlarining diniy tashkilotlar bilan oʻzaro aloqasi va hamkorligini muvofiqlashtirish hamda davlat siyosatida diniy tashkilotlar manfaatlarini aks ettirish borasida:

davlat organlari va muassasalarining respublika hududida joylashgan diniy tashkilotlar bilan oʻzaro hamkorligini taʼminlaydi;

diniy tashkilotlarning davlat organlari bilan oʻzaro aloqalariga koʻmaklashadi va hal etilishi talab qilinadigan masalalar boʻyicha zarur yordam koʻrsatadi;

diniy tashkilotlar, shuningdek, xorijiy diniy tashkilotlar bilan oʻzaro munosabatlarga doir masalalar boʻyicha ishlarni amalga oshiradi;

diniy tashkilotlarning faoliyatiga oid hujjatlarni tayyorlashda koʻmaklashadi;

diniy tashkilotlar tomonidan oʻtkaziladigan va ularning oʻz faoliyati bilan bogʻliq tadbirlarni amalga oshirishda yordam beradi;

diniy tashkilotlar rahbarlari ishtirokida maʼrifiy uchrashuvlar tashkil etadi;

e) aholi orasida konfessiyalararo totuvlik va diniy bagʻrikenglikni mustahkamlash boʻyicha targʻibot va tashviqot ishlarini olib borish borasida:

fuqarolarning vijdon va din erkinligi masalalari yuzasidan huquqiy savodxonligini oshirish boʻyicha keng qamrovli ishlarni amalga oshiradi;

diniy tashkilotlarga respublikada va chet ellarda oʻzaro doʻstona munosabatlar oʻrnatishga koʻmaklashadi;

konfessiyalararo totuvlikni va diniy bagʻrikenglikni taʼminlashda davlat organlari, diniy tashkilotlar va fuqarolik jamiyatining boshqa institutlari oʻrtasidagi hamkorlikni taʼminlaydi;

konfessiyalar va ularning aʼzolari oʻrtasida oʻzaro doʻstlik hamda bagʻrikenglikni mustahkamlash siyosatini olib boradi, ushbu sohada tashkiliy, maʼnaviy-maʼrifiy va targʻibot ishlarini amalga oshiradi;

respublikada istiqomat qiluvchi turli din vakillarining Yangi Oʻzbekiston taraqqiyotiga daxldorlik hissini oshirish yoʻnalishidagi tashabbuslarni qoʻllab-quvvatlaydi;

turli konfessiyalar oʻrtasida oʻzaro adovatni yuzaga keltirishga qaratilgan holatlar, materiallarni aniqlaydi hamda bunday salbiy holatlarning oldini olish boʻyicha tegishli taklif va tavsiyalarni ishlab chiqadi;

j) fuqarolarning xorijiy davlatlarga hamda chet el fuqarolarining Oʻzbekistonga ziyorat turizmini amalga oshirishi uchun shart-sharoitlar yaratish borasida:

“Haj” va “Umra” tadbirlarini belgilangan tartibda amalga oshirilishini tashkil etadi;

“Haj va Umra yagona portali” orqali “Haj” tadbiriga boruvchi fuqarolarning yagona elektron navbati hamda “Umra” tadbirlariga yuboriladigan ziyoratchilarning elektron roʻyxati shakllantirilishini taʼminlaydi, ushbu jarayonda tegishli idoralarning faoliyatini muvofiqlashtiradi hamda ziyoratlarni tashkil qilishda belgilangan tartibga qatʼi rioya etilishini taʼminlaydi;

“Umra” tadbirlarini tashkil etish va oʻtkazish litsenziyasiga ega yuridik shaxslar hamda Oʻzbekiston musulmonlari idorasining “Haj va Umra yagona portali”dan foydalanish imkoniyatini taʼminlaydi;

ziyoratlarni tashkil etish va oʻtkazish jarayonlarini kuzatib boradi, tahlil qiladi, yoʻl qoʻyilgan kamchiliklarni oʻz vaqtida bartaraf etish boʻyicha chora-tadbirlar beradi;

ommaviy axborot vositalarida, shu jumladan, chet ellarda Oʻzbekistonning islom sivilizatsiyasining madaniy, tarixiy va ilmiy-maʼnaviy markazlaridan biri sifatidagi oʻrni va rolini, shuningdek, diniy-maʼrifiy sohada amalga oshirilayotgan islohotlarni targʻib etish ishlarini olib boradi;

respublika va xorijiy davlat muassasalari, diniy tashkilotlar oʻrtasida ziyorat turizmi sohasida aloqalar oʻrnatish va rivojlantirish masalasida ishlarni tashkil qiladi;

ziyorat turizmi tarmogʻini boshqarishni tubdan takomillashtirish, milliy ziyorat turizmi mahsulotlarini jahon bozorlarida targʻib qilish, ziyorat turizmi sohasida Oʻzbekistonning ijobiy qiyofasini shakllantirish boʻyicha tahliliy maʼlumotlarni tayyorlab, kiritib boradi;

z) ekstremizm va mutaassiblik gʻoyalari taʼsiriga tushib qolgan shaxslarni sogʻlom hayotga qaytarish, dindan siyosiy maqsadlarda foydalanishga yoʻl qoʻymaslikka qaratilgan maʼrifiy-tarbiyaviy ishlarni olib borish borasida:

ekstremistik guruhlar va mutaassiblik gʻoyalari taʼsiriga tushib qolgan shaxslarni reabilitatsiya qilish boʻyicha kompleks profilaktik chora-tadbirlarni ishlab chiqish va amalga oshirishda hamkorlik qiladi;

ekstremistik guruhlar faoliyatini aniqlash va unga chek qoʻyishga koʻmaklashadi;

terrorizm va ekstremizmni targʻib qilish maqsadida respublika hududiga shaxslarning noqonuniy kirib kelishiga qarshi huquqni muhofaza qiluvchi idoralar bilan hamkorlikda choralar koʻradi;

aholi oʻrtasida ommaviy axborot vositalari hamda diniy tashkilotlar bilan birgalikda noqonuniy diniy oqim va guruhlarning faoliyati, yot gʻoyalari dinga zid ekanligi haqida tushuntirish ishlarini tashkil etadi;

turli buzgʻunchi oqimlar taʼsiriga tushib qolgan shaxslar bilan ishlash boʻyicha xorij tajribasini oʻrganadi va amaliyotga joriy etish yuzasidan takliflar tayyorlaydi va kiritib boradi;

aholi, shu jumladan, yoshlar, migrantlar va xotin-qizlar orasida yot gʻoyalarga qarshi mafkuraviy immunitetni kuchaytirish, bunday gʻoyalar taʼsiridan asrashga qaratilgan tizimli va taʼsirchan chora-tadbirlarni amalga oshiradi;

milliy va diniy urf-odatlar, qadriyatlarni asrab-avaylash va rivojlantirishga, bagʻrikenglik va hamjihatlikni mustahkamlashga koʻmaklashadi va ularga salbiy taʼsir koʻrsatadigan tahdidlarga qarshi qaratilgan tizimli targʻibot-tashviqot ishlarini olib boradi;

ekstremizm va mutaassiblik gʻoyalari taʼsiriga tushib qolgan xotin-qizlarni sogʻlom hayotga qaytarish borasida tadbirlar oʻtkazadi hamda ilgʻor xorijiy tajriba asosida takliflar tayyorlab kiritib boradi;

jazo muddatini oʻtayotgan shaxslar orasida diniy-maʼnaviy muhit barqarorligini taʼminlash choralarini koʻradi;

i) ommaviy axborot vositalarida, shu jumladan internet jahon axborot tarmogʻida diniy-maʼrifiy sohadagi yagona davlat siyosatiga nisbatan noxolis maʼlumotlar tarqalishining oldini olish hamda diniy mutaassiblik va ekstremizm ruhidagi axborotlarga tezkor va ilmiy raddiyalar berish borasida:

diniy-maʼrifiy sohada yagona davlat siyosatini ommaviy axborot vositalari, shu jumladan Internet jahon axborot tarmogʻi orqali targʻib qilish faoliyatini tashkil etadi;

ommaviy axborot vositalarida, shu jumladan Internet jahon axborot tarmogʻida vijdon erkinligi va diniy bagʻrikenglik tamoyillariga zid boʻlgan materiallarni aniqlaydi, ilmiy asosda tahlil qiladi hamda xavf-xatar yoʻnalishlarini belgilaydi;

diniy-maʼrifiy sohadagi ilmiy-tadqiqot markazlari hamda mutasaddi tashkilotlar tomonidan mavjud tahdidlarga nisbatan xalqchil raddiyalar tayyorlash yoʻnalishidagi faoliyatni muvofiqlashtiradi;

jamiyatda diniy-ijtimoiy muhit barqarorligi va eʼtiqod erkinligiga tahdid tugʻdirishi mumkin boʻlgan omillarni oʻrganadi, tahlil qiladi va ularning oldini olish choralarini koʻradi;

Internet jahon aloqa tarmogʻidagi din omili bilan bogʻliq materiallarni mutasaddi tashkilotlar bilan hamkorlikda muntazam monitoring va tahlil qilib, ularni tizimli boshqarish amaliyotini tashkil etish yuzasidan taʼsirchan choralarni koʻradi;

k) diniy-maʼrifiy sohada malakali kadrlarni tayyorlash, qayta tayyorlash va malakasini oshirish, ilmiy-tadqiqot markazlarining tadqiqot yoʻnalishlari boʻyicha tavsiyalar berish borasida:

diniy-maʼrifiy sohada salohiyatli kadrlar tayyorlash, qayta tayyorlash va malakasini oshirish jarayoniga davlat va nodavlat tashkilotlar, ilmiy-tadqiqot markazlarining yetuk mutaxassislarini jalb qilish orqali ilm-fan hamda taʼlimning oʻzaro integratsiyasini tashkil etadi;

ilm-fan va jahon sivilizatsiyasi rivojiga ulkan hissa qoʻshgan buyuk ajdodlarimizning diniy-falsafiy merosini chuqur oʻrganish hamda keng targʻib etish maqsadida ilmiy-tadqiqot markazlariga tegishli tavsiyalar berib boradi;

diniy-maʼrifiy sohadagi muassasalar faoliyatini oʻrganib borish, oʻquv-tarbiya jarayoniga ilgʻor axborot-kommunikatsiya va pedagogik texnologiyalar, innovatsion ishlanmalarni tatbiq etish hamda ilmiy va uslubiy faoliyatini muvofiqlashtiradi;

taʼlim va ilmiy-tadqiqot muassasalarida bajariladigan diniy mavzudagi tadqiqotlarning mavzu va yoʻnalishlarining ahamiyati, dolzarbligi yuzasidan tegishli tavsiyalarni beradi;

ilmiy-tadqiqot markazlarining boy ilmiy-maʼnaviy meros, dunyoviy va diniy ilmlar boʻyicha tadqiqot natijalarini oʻquv-tarbiya jarayonida qoʻllash va keng jamoatchilikka yetkazishda koʻmaklashadi;

jahondagi nufuzli ilmiy-tadqiqot markazlarining tajribasini oʻrganib, Vazirlar Mahkamasiga va Oʻzbekiston Respublikasi Prezidenti Administratsiyasiga takliflar kiritadi.

l) tegishli mahalliy tashkilotlar bilan hamkorlikda aholining diniy-ijtimoiy jarayonlarga munosabatini oʻrganish boʻyicha ijtimoiy soʻrovlar tashkil etish borasida:

diniy-ijtimoiy jarayonlarni oʻrganadi, ular yuzasidan oʻtkaziladigan ijtimoiy soʻrovnomalarning nazariy jihatlarini ishlab chiqadi;

aholining diniy-ijtimoiy jarayonlarga munosabatini tadqiq qilish boʻyicha xorij tajribasini oʻrganib boradi hamda ularning ijobiy jihatlarini mahalliy soʻrovnomalarga joriy etish boʻyicha takliflarni ishlab chiqadi;

oʻtkazilgan ijtimoiy soʻrovnomalarning natijalari boʻyicha tahliliy maʼlumot va takliflar tayyorlaydi.

4-bob. Qoʻmita va uning hududiy boshqarmalarining huquqlari va majburiyatlari

1-§. Qoʻmitaning huquqlari va majburiyatlari

13. Qoʻmita oʻziga yuklangan vazifalar va funksiyalarni bajarish uchun quyidagi huquqlarga ega:

Vazirlar Mahkamasiga va Oʻzbekiston Respublikasi Prezidenti Administratsiyasiga normativ-huquqiy hujjatlar loyihalarini, shuningdek, Qoʻmitaga yuklangan vazifalar va funksiyalarni bajarish bilan bogʻliq boshqa hujjatlarni belgilangan tartibda kiritish;

oʻz vakolati doirasida respublika va mahalliy ijro etuvchi hokimiyat organlari, xoʻjalik birlashmalari, boshqa tashkilotlar va ularning mansabdor shaxslari, shuningdek, fuqarolar uchun bajarilishi majburiy boʻlgan normativ-huquqiy hujjatlarni qabul qilish, zarur hollarda, boshqa vazirliklar va idoralar bilan birgalikda qoʻshma qarorlar va boshqa hujjatlarni qabul qilish;

Qoʻmitaning vakolatiga kiruvchi masalalarda respublika va mahalliy ijro etuvchi hokimiyat organlari, xoʻjalik birlashmalari faoliyatini muvofiqlashtirish;

oʻziga yuklatilgan vazifalar doirasida respublika ijro etuvchi hokimiyat organlari va boshqa tashkilotlarda joylarga chiqqan holda oʻrganishlar oʻtkazish;

Qoʻmitaga tegishli vazifalarni amalga oshirish uchun, zarur hollarda, davlat organlari, ilmiy muassasalar va boshqa tashkilotlarning rahbarlari hamda mutaxassislarini jalb qilish, ishchi guruhlar tuzish;

oʻz vakolatlariga kiruvchi masalalar yuzasidan davlat organlari va tashkilotlaridan statistika, tahliliy materiallar, xulosalar va boshqa maʼlumotlarni soʻrash va bepul olish;

oʻziga yuklatilgan vazifalar doirasida respublika ijro etuvchi hokimiyat organlari, mahalliy davlat hokimiyati organlari va boshqa tashkilotlarga koʻrib chiqilishi majburiy boʻlgan taqdimnoma, koʻrsatma va yozma ravishda ogohlantirishlar kiritish;

oʻz vakolati doirasida maʼmuriy javobgarlikni keltirib chiqaradigan holatlar yuzasidan maʼmuriy huquqbuzarliklar toʻgʻrisida bayonnomalar tuzish;

oʻz vakolati doirasida yuridik shaxslarga nisbatan qonunchilikda belgilangan tartibda jarimalar qoʻllash;

davlat, yuridik va jismoniy shaxslar, shuningdek, Qoʻmita tizimi manfaatlarini koʻzlab sudlarga arizalar va daʼvolarni kiritish;

Qoʻmita faoliyatini samarali tashkil etish, unga yuklangan vazifalarni oʻz vaqtida va sifatli amalga oshirish uchun xorijiy ilmiy-tadqiqot markazlarining mutaxassis va ekspertlarini shartnoma asosida jalb qilish;

sohaga doir ilmiy va amaliy tadqiqotlar hamda ishlanmalarni amalga oshirish boʻyicha loyihalarni saralab olish uchun tanlovlar eʼlon qilish va tanlov komissiyalarini tuzish;

qonunchilik hujjatlarida belgilangan tartibda Qoʻmita xodimlarining mehnatiga haq toʻlash, ularni moddiy ragʻbatlantirish va boshqa turdagi mukofotlash tartibini, miqdori va shartlarini belgilash;

Qoʻmita vakolatiga kiruvchi masalalar boʻyicha takliflarni Oʻzbekiston Respublikasi Prezidenti Administratsiyasiga, Vazirlar Mahkamasiga, respublika va mahalliy ijro etuvchi hokimiyat organlari hamda xoʻjalik birlashmalariga koʻrib chiqish uchun kiritish;

Qoʻmita vakolati doirasida xalqaro shartnomalar va idoralararo bitimlar tuzish, xalqaro, hukumatlararo bitim loyihalarini taqdim etish;

Qoʻmita vakolati doirasida Oʻzbekiston Respublikasi manfaatlarini xalqaro miqyosda himoya qilish;

Qoʻmita oʻziga yuklangan vazifalar doirasida xorijiy davlatlardagi turdosh tashkilotlar, ilmiy va taʼlim muassasalari bilan hamkorlik qilish;

tegishli maʼlumotlar bazalaridan, davlat axborot tizimlaridan va vakolatli organlar resurslaridan belgilangan tartibda foydalanish;

diniy tashkilotlardan zarur axborotlarni belgilangan tartibda olish, shuningdek, ular tomonidan oʻtkaziladigan faoliyati bilan bogʻliq tadbirlarda qatnashish;

boshqaruv xodimlarining belgilangan umumiy cheklangan soni va mehnatga haq toʻlash fondi doirasida Qoʻmitaning tasdiqlangan tuzilmasiga oʻzgartirishlar kiritish;

tarkibiy boʻlinmalarning funksional vazifalari hamda boshqa hujjatlari, smeta va shtat jadvallarini tasdiqlash;

Qoʻmita tizimida kadrlarni tanlash, tayyorlash, qayta tayyorlash va ularning malakasini oshirish jarayonlarini samarali tashkil etish;

Qoʻmita vakolatiga kiradigan masalalar boʻyicha joriy va strategik vazifalarni yoritish uchun belgilangan tartibda noshirlik faoliyatini amalga oshirish, rasmiy veb-saytlar, ijtimoiy tarmoqlarda sahifalar ochish, konferensiyalar, seminarlar, simpoziumlar, koʻrgazmalar, yarmarkalar oʻtkazish, shuningdek, uslubiy materiallar va tavsiyalar ishlab chiqish;

budjetdan tashqari mablagʻlarni hamda Qoʻmita tizimining depozit hisobvaraqlarida joylashgan mablagʻlarni Oʻzbekiston Respublikasi tijorat banklarining depozit raqamlarida milliy va chet el valyutasida joylashtirish;

binolarga xizmat koʻrsatish, jihoz va uskunalar, avtotransport, aloqa hamda hisoblash vositalari, kompyuter va tashkiliy texnika vositalarini saqlash va ishlatish boʻyicha ishlarni bajarish, dasturiy taʼminotni sotib olish toʻgʻrisida belgilangan tartibda shartnomalar tuzish;

Qoʻmita hamda idoraviy boʻysunuvidagi tashkilotlarning moddiy-texnika bazasini yaxshilash choralarini koʻrish;

Qoʻmita tizimidagi mol-mulkdan bepul foydalanish huquqi bilan bir tarkibiy tuzilmadan boshqa tuzilmaga belgilangan tartibda oʻtkazish;

qonunchilik hujjatlariga muvofiq Qoʻmitaning ijtimoiy infratuzilmasini yaratish va takomillashtirish hamda Qoʻmita, uning tarkibiy va hududiy boʻlinmalari xodimlarini moddiy ragʻbatlantirish va mukofotlashning yagona tizimini shakllantirish;

yuklangan vazifalarni bajarish va faoliyatni zamonaviy talablarga muvofiq takomillashtirish uchun belgilangan tartibda boʻlinmalar, kengashlar, komissiyalar, ishchi guruhlar va jamgʻarmalar tashkil etish;

Qoʻmita qonunchilik hujjatlariga muvofiq boshqa huquqlarga ham ega boʻlishi mumkin.

14. Qoʻmita quyidagi majburiyatlarga ega:

oʻziga yuklangan vazifalar va funksiyalarni samarali bajarish, shuningdek, din ishlari sohasida yagona davlat siyosatini samarali amalga oshirish;

oʻz faoliyati bilan bogʻliq prognoz koʻrsatkichlarga soʻzsiz erishilishini taʼminlash;

Oʻzbekiston Respublikasi Prezidenti Administratsiyasi va Vazirlar Mahkamasiga kiritilayotgan normativ-huquqiy hujjatlar loyihalari va boshqa hujjatlar, shuningdek, Qoʻmita tomonidan qabul qilinayotgan qarorlarning sifati, pirovard natijalari va amalga oshirilishi oqibatlari uchun javob berish;

oʻz faoliyati sohasini rivojlantirish boʻyicha dasturlar, chora-tadbirlar rejalari, “yoʻl xaritalari” va boshqa dasturiy hujjatlarning samarali bajarish;

tegishli sohada fuqarolar va diniy tashkilotlarning huquqlari va qonuniy manfaatlariga rioya etilishi hamda muhofaza qilinishini taʼminlash.

Qoʻmitaning qarorlari, uning mansabdor shaxslari xatti-harakatlari boʻyicha shikoyat qilish qonunchilik hujjatlariga muvofiq amalga oshiriladi.

2-§. Qoʻmita hududiy boshqarmalarining huquqlari va majburiyatlari

15. Qoʻmitaning hududiy boshqarmalari quyidagi huquqlarga ega:

Qoʻmita zimmasiga yuklangan vazifalarni oʻz hududlarida samarali tashkil etish maqsadida davlat organlari va tashkilotlaridan statistika, tahliliy materiallar, xulosalar va boshqa maʼlumotlarni soʻrash va bepul olish;

zarur hollarda, zimmasiga yuklangan vazifalarni amalga oshirish uchun davlat organlari, ilmiy muassasalar va boshqa tashkilotlarning rahbarlari hamda mutaxassislarini jalb qilish, ishchi guruhlar tuzish;

din ishlari sohasi boʻyicha respublika ijro etuvchi hokimiyat organlari, shuningdek, xoʻjalik birlashmalarining, boshqa tashkilotlarning hududiy boʻlinmalari faoliyatini takomillashtirish boʻyicha tavsiyalar berish;

soha faoliyati bilan bogʻliq masalalar yuzasidan respublika ijro etuvchi hokimiyat organlari, xoʻjalik birlashmalarining hamda boshqa tashkilotlarning hududiy boʻlinmalari rahbarlari va masʼul xodimlari ishtirokida yigʻilishlar oʻtkazish;

respublika ijro etuvchi hokimiyat organlari, xoʻjalik birlashmalarining hamda boshqa tashkilotlarning hududiy boʻlinmalari, shuningdek, ilmiy tashkilotlarning malakali mutaxassislarini axborot-tahliliy materiallar va dasturiy hujjatlarni tayyorlashga jalb qilish;

respublika ijro etuvchi hokimiyat organlarining hududiy boʻlinmalarining din ishlari sohasiga oid masalalarni koʻrib chiqish bilan bogʻliq majlislari va yigʻilishlarida ishtirok etish;

joylardagi diniy tashkilotlardan zarur axborotlarni belgilangan tartibda olish, shuningdek, ular tomonidan oʻtkaziladigan faoliyat bilan bogʻliq tadbirlarda qatnashish;

axborot-tahliliy materiallarni tayyorlash va dasturiy hujjatlarni ishlab chiqish uchun respublika ijro etuvchi hokimiyat organlari va xoʻjalik birlashmalarining hududiy boʻlimlari, shuningdek, ilmiy tashkilotlarning yuqori malakali mutaxassislarini jalb qilish.

Qoʻmitaning hududiy boshqarmalari oʻz vakolatlari doirasida oʻzlariga yuklangan vazifalardan kelib chiqqan holda boshqa huquqlarga ham ega boʻlishi mumkin.

16. Qoʻmitaning hududiy boshqarmalari quyidagi majburiyatlarga ega:

Qoʻmitaga yuklangan vazifalarni hududlarda sifatli bajarilishini tashkil etish, taʼsirchan nazoratni amalga oshirish;

hududlarda, din ishlari sohasiga oid davlat siyosatining holati toʻgʻrisida tegishli axborot, axborot-tahliliy hujjatlar, hisobotlarni Qoʻmitaga kiritish;

tegishli hududda din ishlari sohasiga oid davlat siyosatining holati toʻgʻrisida Qoʻmitaga haqqoniy tahliliy va boshqa axborotni taqdim etish;

sohani rivojlantirish va hududlarning muammoli masalalarini hal qilish boʻyicha dastur, chora-tadbirlar rejasi, “yoʻl xaritalari” va boshqa hujjatlar ijrosini taʼminlash;

hududda tegishli sohada fuqarolar va diniy tashkilotlarning huquqlari va qonuniy manfaatlariga rioya etilishi hamda muhofaza qilinishini taʼminlash.

5-bob. Qoʻmita rahbariyatining asosiy funksional vazifalari

17. Qoʻmita raisining asosiy funksional vazifalari:

Oʻzbekiston Respublikasi Konstitutsiyasi va qonunlariga, shuningdek, boshqa normativ-huquqiy hujjatlar talablariga rioya qilish;

Qoʻmita faoliyatiga umumiy rahbarlik qilish, Qoʻmitaga Oʻzbekiston Respublikasi Prezidentining tegishli farmonlari, qarorlari va farmoyishlari, Vazirlar Mahkamasining qarorlari va farmoyishlari, boshqa qonunchilik hujjatlari bilan yuklangan vazifalar va funksiyalarning bajarilishini taʼminlash;

Oʻzbekiston Respublikasi Prezidentining hujjatlari va Vazirlar Mahkamasining qarorlari bilan tasdiqlangan Qoʻmita faoliyatini yanada takomillashtirish boʻyicha konsepsiyalar, kompleks dasturlar va chora-tadbirlar rejalarini amalga oshirish boʻyicha tanqidiy va chuqur tahlillar oʻtkazish;

Qoʻmita va uning hududiy boshqarmalari faoliyati bilan bogʻliq istiqboldagi koʻrsatkichlarga erishishni taʼminlash boʻyicha amaliy chora-tadbirlarni ishlab chiqish va qabul qilish;

Oʻzbekiston Respublikasi Prezidenti Administratsiyasining tegishli tarkibiy boʻlinmalari va Vazirlar Mahkamasi, shuningdek, vazirlik va idoralar bilan Qoʻmita faoliyatiga taalluqli masalalar boʻyicha oʻzaro hamkorlik qilish, Qoʻmitaga oid masalalarning Vazirlar Mahkamasi va uning Rayosati majlislarida koʻrib chiqilishida ishtirok etish;

Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi tarkibiy boʻlinmalarining, Bosh vaziri va Bosh vazir oʻrinbosarlari topshiriqlari va koʻrsatmalarining oʻz vaqtida, toʻliq va sifatli ijro etilishini tashkil etish;

oʻrinbosarlari va tarkibiy tuzilmalar rahbarlarining vakolatlarini hamda shaxsiy javobgarlik darajasini belgilash, majburiyatlarini taqsimlash;

Qoʻmita faoliyati rejalashtirilishini tashkil etish, davriy ish rejalarini tasdiqlash, ularning bajarilishi yuzasidan nazoratni taʼminlash;

Qoʻmita va tizim idoralarida raqamlashtirishni joriy etish;

Qoʻmita, uning tarkibiy boʻlinmalari va hududiy boshqarmalari faoliyati bilan bogʻliq koʻrsatkichlar, maqsadli indikatorlar va rivojlantirish dasturlarining samarali amalga oshirilishiga erishishni soʻzsiz taʼminlash yuzasidan amaliy chora-tadbirlarni ishlab chiqish va qabul qilish;

Oʻzbekiston Respublikasi Prezidenti va Vazirlar Mahkamasining hujjatlari hamda topshiriqlari ijrosini tashkil etish, ularning monitoringini olib borish, Qoʻmita faoliyatida ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, hududiy boshqarmalar va idoraviy mansub tashkilotlar rahbarlarining shaxsiy masʼuliyatini oshirish choralarini koʻrish;

Qoʻmita tizimida xodimlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, kadrlar zaxirasini shakllantirish;

Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi va Vazirlar Mahkamasi nomenklaturasiga kiradigan boʻsh lavozimlarga taklif etilgan kadrlarning, shuningdek, Qoʻmitaga ishga qabul qilinadigan boshqa kadrlarning kasb mahorati, oʻz ishini bilishi, yuksak darajadagi ishchanlik va maʼnaviy-axloqiy fazilatlarga ega boʻlishini taʼminlashga qaratilgan chora-tadbirlarni amalga oshirish;

Oʻzbekiston Respublikasi Prezidenti va Vazirlar Mahkamasining topshiriqlariga hamda oʻz tashabbusiga koʻra normativ-huquqiy hujjatlar loyihalari sifatli ishlab chiqilishini, ular “ Normativ-huquqiy hujjatlar toʻgʻrisida ”gi, “ Qonunlar loyihalarini tayyorlash va Oʻzbekiston Respublikasi Oliy Majlisining Qonunchilik palatasiga kiritish tartibi toʻgʻrisida ”gi Oʻzbekiston Respublikasi qonunlari, Oʻzbekiston Respublikasi Prezidenti Administratsiyasi Reglamenti va Oʻzbekiston Respublikasi Vazirlar Mahkamasining Reglamentiga muvofiq oʻz vaqtida Vazirlar Mahkamasiga kiritilishini tashkil etish, ularning Vazirlar Mahkamasida puxta ishlanishi va himoya qilinishida, Oʻzbekiston Respublikasi Prezidenti Administratsiyasida koʻrib chiqilishida ishtirok etish;

Qoʻmitaga kiritilgan takliflar va taqdim etilgan normativ-huquqiy hujjatlar loyihalarining toʻliq va har tomonlama koʻrib chiqilishini taʼminlash, shuningdek, Oʻzbekiston Respublikasi Prezidenti Administratsiyasi Reglamenti va Oʻzbekiston Respublikasi Vazirlar Mahkamasining Reglamentida belgilangan muddatlarda kelishish (viza qoʻyish);

Qoʻmita vakolatiga kiruvchi masalalar boʻyicha normativ-huquqiy hujjatlarni ishlab chiqish, zarur hollarda, respublika ijro etuvchi hokimiyat organlari bilan birgalikda qarorlar va boshqa hujjatlarni qabul qilish;

Qoʻmita xodimlarining xizmat safarlarini Oʻzbekiston Respublikasi Prezidentining 2014-yil 5-martdagi PQ-2142-son va 2017-yil 3-avgustdagi PQ-3170-son qarorlari talablariga toʻla muvofiq ravishda tashkil etish, xizmat safarlarining asoslanganligi, samaradorligi va natijadorligini, ularga ajratiladigan mablagʻlardan oqilona foydalanishni taʼminlash;

oʻz oʻrinbosarlari hamda tarkibiy boʻlinmalar va hududiy boshqarmalar rahbarlari faoliyatining samaradorligi va natijadorligini muntazam tanqidiy tahlil qilish, Qoʻmita hayʼat majlislarida ularning shaxsiy hisobotlarini eshitish, muhokama yakunlari boʻyicha zarur choralar koʻrish;

Qoʻmita tarkibiy boʻlinmalari va hududiy boshqarmalari rahbarlari faoliyatini muvofiqlashtirish va nazorat qilish;

Qoʻmita xodimlarini ragʻbatlantirish va intizomiy javobgarlikka tortish masalalarini hal qilish, oʻz oʻrinbosarlarini ragʻbatlantirish va intizomiy javobgarlikka tortish masalalarini, shu jumladan, kelgusida ularning egallab turgan lavozimlariga loyiqligi masalalarini koʻrib chiqish toʻgʻrisida takliflar kiritish, ularning shaxsiy javobgarligini oshirish boʻyicha tizimli choralarni amalga oshirish;

Qoʻmita xodimlarining Davlat fuqarolik xizmatchilarining odob-axloq qoidalari talablariga rioya qilishi boʻyicha nazoratni tashkil etish;

huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Qoʻmita tizimida Korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

“Manfaatlar toʻqnashuvi toʻgʻrisida”gi Oʻzbekiston Respublikasi Qonuni va manfaatlar toʻqnashuvi bilan bogʻliq munosabatlarni tartibga solishga doir ishlarga rahbarlik qilish va muvofiqlashtirish;

zamonaviy axborot-kommunikatsiya texnologiyalaridan foydalanish orqali davlat xizmatlari koʻrsatishning samaradorligi va ochiqligini taʼminlash;

jismoniy va yuridik shaxslarning murojaatlarini koʻrib chiqishga doir samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, qonunchilik hujjatlarida belgilangan muddatlarda va tartibda jismoniy va yuridik shaxslar vakillarini muntazam ravishda shaxsan qabul qilish, shu jumladan, joylarga borib sayyor qabul qilish;

Oʻzbekiston Respublikasi Prezidentining Xalq qabulxonalari bilan samarali hamkorlikni tashkil etish, jismoniy va yuridik shaxslarning Oʻzbekiston Respublikasi Prezidentining Virtual qabulxonasidan kelib tushgan murojaatlarini oʻz vaqtida va toʻlaqonli koʻrib chiqilishini taʼminlash;

davlat sirlarini tashkil etuvchi maʼlumotlar va maxfiy axborot bilan ishlashda qonunchilik hujjatlari talablariga rioya qilish;

Qoʻmita markaziy apparati va hududiy boshqarmalar nizomlari, shtat jadvali va xarajatlar smetasini, shuningdek, Qoʻmitaning idoraviy mansub tashkilotlar ustavlarini tasdiqlash;

Qoʻmitaning markaziy apparati va hududiy boshqarmalari (boshliqlaridan tashqari) xodimlarini belgilangan tartibda lavozimga tayinlash va lavozimdan ozod etish;

Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining jamoat va diniy tashkilotlar bilan aloqalar boʻyicha oʻrinbosarlari — hududiy boshqarmalar boshliqlarini lavozimga tayinlash va lavozimdan ozod etishga rozilik berish;

Qoʻmita tizimida kadrlar zaxirasini shakllantirish, shuningdek, tizim xodimlarini qayta tayyorlash va ularning malakasini oshirish ishlarini tizimli asosda tashkil qilish;

Qoʻmita faoliyati sohasida hamkorlik toʻgʻrisida bitimlar tuzish va belgilangan tartibda oʻziga yuklangan vazifalar doirasida xorijiy davlatlarning organlari va xalqaro tashkilotlar bilan hamkorlik qilish;

davlat organlari va boshqa tashkilotlarda, Oʻzbekiston Respublikasi, shuningdek, xalqaro tashkilotlar va xorijiy mamlakatlar vakillari ishtirokida oʻtkaziladigan rasmiy tadbirlarda Qoʻmita nomidan ishtirok etish;

Oʻzbekiston Respublikasi Oliy Majlisi Qonunchilik palatasining qonun loyihalarini muhokama qilish boʻyicha majlislarida ishtirok etish va ularga doir fikr bildirish;

zarur hollarda, belgilangan tartibda boshqaruv xodimlarining belgilangan umumiy cheklangan soni va mehnatga haq toʻlash fondi doirasida Qoʻmitaning tasdiqlangan tuzilmasiga oʻzgartirishlar kiritish;

Qoʻmita xodimlari bajarishi majburiy boʻlgan buyruqlar va farmoyishlar qabul qilish hamda koʻrsatmalar berish;

Qoʻmita tizimida faoliyat yuritayotgan xodimlarni ragʻbatlantirish va intizomiy javobgarlikka tortish masalalarini hal etish, alohida oʻrnak koʻrsatgan xodimlarni Oʻzbekiston Respublikasining davlat mukofotlari bilan taqdirlashga taqdim etish, shuningdek, soha tarmoqlarini rivojlantirishda alohida oʻrnak koʻrsatgan xodimlarni faxriy yorliqlar hamda boshqa ragʻbatlantirishlar bilan taqdirlash;

Qoʻmitaning mol-mulkini qonunchilik hujjatlarida belgilangan tartibda tasarruf etish;

Qoʻmita vakolatiga kiradigan masalalar yuzasidan Oʻzbekiston Respublikasining xalqaro shartnomalarini qonunchilikda belgilangan tartibda tuzish;

Qoʻmita hayʼat majlislarida raislik qilish.

Qoʻmita raisi qonunchilik hujjatlariga muvofiq boshqa funksional vazifalarga ham ega boʻlishi mumkin.

18. Qoʻmita raisi oʻrinbosarlarining asosiy funksional vazifalari:

Oʻzbekiston Respublikasi Konstitutsiyasi va qonunlari hamda boshqa normativ-huquqiy hujjatlar talablariga rioya etish;

Qoʻmita raisi vaqtincha boʻlmaganda, tegishli buyruq asosida uning vazifalarini bajarish;

Qoʻmitaning mutasaddilik qilinadigan tarkibiy boʻlinmalari faoliyatini muvofiqlashtirish, nazorat qilish va bevosita boshqarish, ularning xodimlari oʻrtasida vazifalarni taqsimlash;

Oʻzbekiston Respublikasi Prezidentining hujjatlari va Vazirlar Mahkamasining qarorlari bilan tasdiqlangan Qoʻmita faoliyatining mutasaddilik qilinadigan yoʻnalishlarini yanada takomillashtirish boʻyicha dastur va chora-tadbirlar ijrosi holatini tanqidiy va chuqur tahlil qilish;

mutasaddiligidagi tarkibiy boʻlinmalar tomonidan koʻrsatkichlarga erishishni soʻzsiz taʼminlash boʻyicha choralar koʻrish, boʻlinmalar rahbarlarining hisobotini tizimli eshitib borish va belgilangan koʻrsatkichlarga erishish uchun ularning shaxsiy javobgarligini oshirish;

Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi tarkibiy boʻlinmalarining, Vazirlar Mahkamasining hujjatlari, topshiriqlari va koʻrsatmalarining oʻz vaqtida, toʻliq va sifatli ijro etilishini tashkil etish, ijro intizomi mustahkamlash boʻyicha kompleks choralarni koʻrish, shu jumladan, topshiriqlar oʻz vaqtida ijro etilishi uchun tarkibiy boʻlinmalar rahbarlarining shaxsiy masʼuliyatini oshirish;

Qoʻmitaning hayʼati qarorlari, Qoʻmita raisining buyruqlari va topshiriqlarining oʻz vaqtida va sifatli bajarilishini taʼminlash;

Qoʻmita raisiga mutasaddilik qilinadigan boʻlinmalarda kadrlarni tanlash va joy-joyiga qoʻyish boʻyicha takliflar taqdim etish, ularning kasb mahorati, oʻz ishini bilishi, amaliy ish tajribasi, yuqori ishchanlik darajasi va maʼnaviy-axloqiy sifatlari kafolatlanganini taʼminlash, ularning kasbiy malakasini oshirish choralarini koʻrish, tarkibiy boʻlinmalarda kadrlar zaxirasini shakllantirish;

xodimlar tomonidan normativ-huquqiy hujjatlar loyihalari sifatli ishlab chiqilishini tashkil etish, Qoʻmitada tayyorlangan normativ-huquqiy hujjatlar loyihalarini muhokama etish, imzolash (viza qoʻyish) uchun koʻrib chiqish va viza qoʻyish, ularning Oʻzbekiston Respublikasi Prezidenti Administratsiyasi va Vazirlar Mahkamasi Reglamentlari talablariga qatʼiy rioya qilgan holda Vazirlar Mahkamasiga oʻz vaqtida kiritilishini taʼminlash, Qoʻmita raisi topshirigʻiga muvofiq Oʻzbekiston Respublikasi Prezidenti Administratsiyasi va Vazirlar Mahkamasida normativ-huquqiy hujjatlar loyihalarini ishlab chiqishda ishtirok etish;

Qoʻmitaga taqdim etilgan takliflar va normativ-huquqiy hujjatlar loyihalarini toʻliq va har tomonlama koʻrib chiqish;

xizmat safarlarini Oʻzbekiston Respublikasi Prezidentining 2014-yil 5-martdagi PQ-2142-son , 2017-yil 3-avgustdagi PQ-3170-son qarorlari talablariga toʻla muvofiq ravishda tashkil etish, xizmat safarlarining asoslanganligi, samaradorligi va natijadorligini, xizmat safarlariga ajratiladigan mablagʻlardan oqilona foydalanishni taʼminlash;

mutasaddilik qilinadigan tarkibiy boʻlinmalar rahbarlari va xodimlari faoliyatining samaradorligi va natijadorligini doimiy tanqidiy tahlil qilib borish, Qoʻmitaning hayʼat yigʻilishlarida ularning shaxsiy hisobotlarini eshitish, muhokama yakunlari boʻyicha zarur choralar koʻrish;

Qoʻmita faoliyatini takomillashtirish yuzasidan amaliy chora-tadbirlar qabul qilish, din ishlari sohasidagi qonunchilik hujjatlarini takomillashtirish toʻgʻrisida takliflar ishlab chiqish va ularni koʻrib chiqish uchun Qoʻmita raisiga kiritish;

mutasaddilik qilinadigan tarkibiy boʻlinmalar rahbarlari va xodimlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimda qolish-qolmasligi maqsadga muvofiqligi masalasini koʻrib chiqish toʻgʻrisida Qoʻmita raisiga takliflar kiritish, ularning funksional majburiyatini va yuklangan vazifalar bajarilishida shaxsiy masʼuliyatini oshirish yuzasidan tizimli choralar koʻrish;

Qoʻmita xodimlari tomonidan Davlat fuqarolik xizmatchilarining odob-axloq qoidalari talablariga rioya etilishi taʼminlanishini nazorat qilish;

huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish, “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni va korrupsiyaga qarshi kurashishga doir boshqa qonunchilik hujjatlariga hamda Oʻzbekiston Respublikasining “Manfaatlar toʻqnashuvi toʻgʻrisida”gi Qonuniga rioya qilish, manfaatlar toʻqnashuvi bilan bogʻliq munosabatlarni tartibga solishga doir ishlarni muvofiqlashtirish;

Qoʻmita raisiga davlat xizmatlarini koʻrsatish samaradorligi, sifati va ulardan erkin foydalanish darajasini oshirish boʻyicha takliflar kiritish;

jismoniy va yuridik shaxslarning murojaatlarini koʻrib chiqishga doir ishlarni samarali tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, qonunchilik hujjatlarida belgilangan muddatlarda va tartibda jismoniy va yuridik shaxslar vakillarini muntazam ravishda shaxsan qabul qilish, shu jumladan, joylarga borib sayyor qabul qilish;

Oʻzbekiston Respublikasi Prezidentining Xalq qabulxonalari bilan samarali hamkorlik qilish, Prezidentning Virtual qabulxonasidan tushadigan jismoniy va yuridik shaxslarning murojaatlarini oʻz vaqtida va toʻliq koʻrib chiqilishini taʼminlash;

davlat sirini tashkil etuvchi maʼlumotlar va maxfiy axborot bilan ishlashda qonunchilik hujjatlari talablariga qatʼi rioya qilish;

vijdon erkinligi va diniy tashkilotlar toʻgʻrisidagi normativ-huquqiy va boshqa sohaviy normativ hujjatlarning ishlab chiqilishini tashkil etish;

Qoʻmita va tizim idoralari xodimlarini tizimli ravishda qayta tayyorlash va xorijiy mamlakatlarda ularning malakasini oshirish boʻyicha takliflar kiritish;

xorijiy davlatlar, xalqaro va xorijiy tashkilotlar bilan hamkorlikni amalga oshirish.

19. Qoʻmita tarkibiy boʻlinmalari rahbarlarining funksional vazifalari:

Oʻzbekiston Respublikasi Konstitutsiyasi va qonunlari hamda boshqa normativ-huquqiy hujjatlar talablariga rioya etish;

boʻlinmalarga yuklangan vazifalar va funksiyalar ijrosini taʼminlash;

oʻz vakolati doirasida idoraviy mansub tashkilotlar faoliyatini muvofiqlashtirish;

tarkibiy boʻlinmalar faoliyatni muntazam tahlil qilib borish va ular tomonidan qayd etilgan koʻrsatkichlarga soʻzsiz erishishni taʼminlashga yoʻnaltirilgan qoʻshimcha choralar koʻrish yuzasidan takliflarni koʻrib chiqish uchun Qoʻmita raisining mutasaddilik qiladigan oʻrinbosariga kiritish;

Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi tarkibiy boʻlinmalarining hamda Vazirlar Mahkamasining hujjatlari, topshiriqlari va koʻrsatmalarining oʻz vaqtida, toʻliq va sifatli ijro etilishini taʼminlash, ijro intizomi mustahkamlash boʻyicha kompleks choralarni koʻrish, shu jumladan, topshiriqlar oʻz vaqtida ijro etilishi uchun tarkibiy boʻlinmalar rahbarlarining shaxsiy masʼuliyatini oshirish;

hayʼat qarorlari, Qoʻmita raisi va oʻrinbosarlarining buyruqlari va topshiriqlari ijrosining oʻz vaqtida va sifatli bajarilishini taʼminlash;

tarkibiy boʻlinmalarning ish rejalarini ishlab chiqish, tasdiqlash uchun kiritish, ularda qayd etilgan vazifalar va tadbirlarning oʻz vaqtida va sifatli bajarilishini taʼminlash;

tarkibiy boʻlinmalarga yuklangan vazifalarning ijrosini nazorat qilish va muvofiqlashtirish, idoraviy mansub tashkilotlar faoliyatiga amaliy va metodik yordam koʻrsatish;

tarkibiy boʻlinmalar faoliyati sohalariga oid qonunchilik hujjatlari va huquqni qoʻllash amaliyotini takomillashtirish boʻyicha takliflarni ishlab chiqish va ularni koʻrib chiqish uchun Qoʻmita rahbariyatiga kiritish;

Qoʻmita rahbariyatiga tarkibiy boʻlinmalarda kadrlarni tanlash va joy-joyiga qoʻyishda takliflar taqdim etish, ularning professionalligi, oʻz ishini bilishi, amaliy tajribaga, yuksak ishchanlik va maʼnaviy-axloqiy fazilatlarga ega ekanligi kafolatini taʼminlash, kasbiy malakasini oshirish choralarini koʻrish, tarkibiy boʻlinmalarda kadrlar zaxirasini shakllantirish;

tarkibiy boʻlinmalar tomonidan normativ-huquqiy hujjatlar loyihalarining sifatli ishlab chiqilishini tashkil etish, Qoʻmita rahbariyati topshirigʻiga muvofiq Oʻzbekiston Respublikasi Prezidenti Administratsiyasi va Vazirlar Mahkamasida normativ-huquqiy hujjatlar loyihalarini koʻrib chiqilishida ishtirok etish;

tarkibiy boʻlinmalarga taqdim etilgan takliflar va normativ-huquqiy hujjatlar loyihalarini toʻliq va har tomonlama koʻrib chiqish;

xizmat safarlarini Oʻzbekiston Respublikasi Prezidentining 2014-yil 5-martdagi PQ-2142-son , 2017-yil 3-avgustdagi PQ-3170-son qarorlari talablariga toʻla muvofiq ravishda amalga oshirish, xizmat safarlarining asoslanganligi, samaradorligi va natijadorligini, xizmat safarlariga ajratiladigan mablagʻlardan oqilona foydalanishni taʼminlash;

tarkibiy boʻlinmalar xodimlari faoliyatining samaradorligi va natijadorligini doimiy tanqidiy tahlil qilib borish, yigʻilishlarda ularning shaxsiy hisobotlarini eshitish, ularni koʻrib chiqish yakunlari boʻyicha zarur choralarni koʻrish;

xodimlarining Davlat fuqarolik xizmatchilarining odob-axloq qoidalari talablariga rioya etilishini taʼminlash;

huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq tarkibiy boʻlinmalarda Korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

Qoʻmita rahbariyatiga davlat xizmatlarini koʻrsatish samaradorligi, sifati va ulardan foydalanish darajasini oshirish boʻyicha takliflarni koʻrib chiqish uchun kiritish;

jismoniy va yuridik shaxslarning murojaatlarini qonunchilik hujjatlarida belgilangan muddatlarda va tartibda koʻrib chiqish, murojaat bilan ishlashni samarali tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy va yuridik shaxslar vakillarini muntazam ravishda shaxsan qabul qilish, shu jumladan, joylarga borib sayyor qabul qilish;

davlat sirini tashkil etuvchi maʼlumotlar va maxfiy axborot bilan ishlashda qonunchilik talablariga qatʼi rioya qilish.

20. Qoʻmita hududiy boshqarmalari rahbarlarining asosiy funksional vazifalari:

Oʻzbekiston Respublikasi Konstitutsiyasi va qonunlari hamda boshqa normativ-huquqiy hujjatlar talablariga rioya etish;

hududiy boshqarmalar faoliyatiga umumiy rahbarlik qilish va ularga yuklangan vazifalar va funksiyalar bajarilishini tashkil etish;

faoliyatni muntazam tahlil qilib borish va qayd etilgan koʻrsatkichlarga hududiy boshqarmalar tomonidan soʻzsiz erishishni taʼminlash, soha faoliyati yuzasidan Qoʻmitaga takliflar kiritib borish;

Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi tarkibiy boʻlinmalarining hamda Vazirlar Mahkamasining hujjatlari, topshiriqlari va koʻrsatmalarining oʻz vaqtida, toʻliq va sifatli ijro etilishini taʼminlash, hududiy boshqarmalar xodimlarining ijro intizomini mustahkamlash boʻyicha kompleks amaliy chora-tadbirlarni amalga oshirish, topshiriqlarni oʻz vaqtida bajarilishi uchun shaxsiy masʼuliyatini oshirish choralarini koʻrish;

Qoʻmita hayʼati qarorlari, Qoʻmita rahbariyatining buyruqlari, farmoyishlari, koʻrsatmalari hamda topshiriqlari ijrosini oʻz vaqtida va sifatli bajarilishini taʼminlash;

Qoʻmita faoliyati sohasiga kiradigan masalalar yuzasidan mahalliy ijro etuvchi hokimiyat organlari va kompleks ijtimoiy-iqtisodiy rivojlantirish boʻyicha sektorlar bilan hamkorlik qilish;

xodimlarning vakolatlarini belgilash, ular oʻrtasida majburiyatlarni taqsimlash, hududiy boshqarmalarni boshqarishda xodimlarning javobgarligini belgilash;

hududiy boshqarmalar faoliyatini rejalashtirishni tashkil etish, davriy ish rejalarini tasdiqlash, ularning bajarilishini taʼminlash hamda ijrosi yuzasidan Qoʻmitaga hisobot kiritib borish;

Qoʻmita rahbariyatiga hududiy boshqarmalarda kadrlarni tanlash va joy-joyiga qoʻyishda takliflar taqdim etish, ularning professionalligi, oʻz ishini bilishi, amaliy tajribaga, yuksak ishchanlik va maʼnaviy-axloqiy fazilatlarga ega ekanligi kafolatini taʼminlash, kasbiy malakasini oshirish choralarini koʻrish, tarkibiy boʻlinmalarda kadrlar zaxirasini shakllantirish boʻyicha takliflar kiritish;

hududiy boshqarmalar xodimlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimda qolish-qolmasligi maqsadga muvofiqligi masalasini koʻrib chiqish boʻyicha Qoʻmita raisiga takliflar kiritish, ularning funksional masʼuliyati va yuklangan vazifalar bajarilishida shaxsiy masʼuliyatini oshirish yuzasidan tizimli choralarni amalga oshirish;

hududlarda xodimlarning Davlat fuqarolik xizmatchilarining odob-axloq qoidalari talablariga rioya etilishini taʼminlash;

hududlarda huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

hududiy boshqarmalar xodimlari faoliyatining samaradorligi va natijadorligini doimiy tanqidiy tahlil qilib borish, yigʻilishlarda ularning shaxsiy hisobotlarini eshitish, ularni koʻrib chiqish yakunlari boʻyicha zarur choralarni koʻrish;

jismoniy va yuridik shaxslarning murojaatlarini qonunchilik hujjatlarida belgilangan muddatlarda va tartibda koʻrib chiqish, murojaat bilan ishlashni samarali tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy va yuridik shaxslar vakillarini muntazam ravishda shaxsan qabul qilish, shu jumladan, joylarga borib sayyor qabul qilish;

davlat sirini tashkil etuvchi maʼlumotlar va maxfiy axborot bilan ishlashda qonunchilik talablariga qatʼiy rioya qilish.

6-bob. Qoʻmita rahbarlarining javobgarligi

21. Qoʻmita raisi:

Oʻzbekiston Respublikasi Prezidentining “ Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida ” 2021-yil 10-fevraldagi PF-6166-son va “ Davlat organlari va tashkilotlarda ijro intizomini yanada mustahkamlashning qoʻshimcha chora-tadbirlari toʻgʻrisida ” 2025-yil 25-iyuldagi PF-117-son farmonlari hamda “ijro.gov.uz” ijro intizomi idoralararo yagona elektron tizimi samarali faoliyat koʻrsatishini taʼminlashga qaratilgan qoʻshimcha chora-tadbirlar toʻgʻrisida” 2021-yil 31-maydagi PQ-5132-son qarori oʻz vaqtida, toʻliq va sifatli ijro etilishi;

mazkur Nizom va boshqa qonunchilik hujjatlari bilan Qoʻmitaga yuklangan vazifalarning sifatli va oʻz vaqtida bajarilishi, shuningdek, Qoʻmita ishidagi kamchiliklarni bartaraf etish boʻyicha choralar koʻrilishi;

amalga oshirilayotgan dasturlar, strategiya va konsepsiyalarda koʻzlangan natijalarga erishilishi, ularning din ishlari sohasidagi davlat siyosatini amalga oshirishga taʼsiri;

tegishli sohalar va tarmoqlarni rivojlantirish boʻyicha belgilangan parametrlar va koʻrsatkichlarga erishishga qaratilgan amaliy chora-tadbirlar ishlab chiqilishi va amalga oshirilishi;

Qoʻmita tizimida ijro intizomiga qatʼi rioya etilishi uchun javob beradi.

22. Qoʻmita raisining oʻrinbosarlari:

qonunchilik hujjatlari bilan yuklangan yoʻnalishlar va sohalar boʻyicha vazifalar va funksiyalarning oʻz vaqtida bajarilishi hamda natijadorligi;

mutasaddilik qilinayotgan yoʻnalishlar boʻyicha sohalarning barqaror rivojlanishini taʼminlashga oid chora-tadbirlarning samaradorligi va natijadorligi uchun javob beradi.

23. Qoʻmita tarkibiy boʻlinmalari rahbarlari:

tegishli tarkibiy boʻlinmalarga yuklangan vazifalar va funksiyalarning oʻz vaqtida bajarilishi hamda natijadorligi;

faoliyat yoʻnalishlariga oid qonunchilik hujjatlari, Qoʻmita rahbarlarining topshiriqlari bajarilishining holati toʻgʻrisida haqqoniy tahliliy va boshqa axborotlarni sifatli tayyorlash va oʻz vaqtida taqdim etish yuzasidan javob beradi.

24. Qoʻmita hududiy boshqarmalari boshliqlari:

hududiy boshqarmalarga yuklangan vazifalar va funksiyalarning oʻz vaqtida bajarilishi hamda natijadorligi;

tegishli hududda qonunchilik hujjatlari, Qoʻmita rahbarlarining topshiriqlari bajarilishining holati toʻgʻrisida haqqoniy tahliliy va boshqa axborotlarni sifatli tayyorlash va oʻz vaqtida taqdim etish yuzasidan javob beradi.

7-bob. Qoʻmita faoliyatini tashkil etish

1-§. Qoʻmita rahbariyati hamda xodimlarini lavozimga tayinlash va lavozimdan ozod etish tartibi

25. Qoʻmitaga rais rahbarlik qiladi.

Qoʻmita raisi belgilangan tartibda Oʻzbekiston Respublikasi Prezidenti tomonidan lavozimga tayinlanadi va lavozimdan ozod qilinadi.

26. Qoʻmita raisining Oʻzbekiston Respublikasi Prezidenti bilan kelishilgan holda Vazirlar Mahkamasi tomonidan lavozimga tayinlanadigan va lavozimdan ozod qilinadigan birinchi oʻrinbosari va ikki nafar oʻrinbosari boʻladi.

27. Qoʻmita raisi maqomi, maishiy taʼminoti, tibbiy va transport xizmatidan foydalanish borasidagi shart-sharoitlariga koʻra — vazirga, raisning birinchi oʻrinbosari — vazirning birinchi oʻrinbosariga, rais oʻrinbosarlari — vazir oʻrinbosarlariga tenglashtiriladi.

28. Qoʻmita raisi boʻlmagan vaqtda, uning vakolatlari raisning birinchi oʻrinbosari tomonidan, u boʻlmagan vaqtda esa raisning tegishli buyrugʻiga asosan boshqa oʻrinbosar tomonidan amalga oshiriladi.

29. Quyidagilar:

Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining jamoat va diniy tashkilotlar bilan aloqalar boʻyicha oʻrinbosarlari — hududiy boshqarmalar boshliqlari Qoʻmita raisi bilan kelishilgan holda, qonunchilik hujjatlarida belgilangan tartibda lavozimga tayinlanadi va lavozimdan ozod etiladi;

Qoʻmitaning markaziy apparati, hududiy boshqarmalar xodimlari, Qoʻmitaga idoraviy mansub tashkilotlar rahbarlari Qoʻmita raisi tomonidan lavozimga tayinlanadi va lavozimdan ozod etiladi.

2-§. Qoʻmita markaziy apparati tarkibiy boʻlinmalarining hududiy boshqarmalar hamda idoraviy mansub tashkilotlar bilan oʻzaro hamkorligi tartibi

30. Qoʻmitaning markaziy apparati tarkibiy boʻlinmalarining hududiy boshqarmalar hamda idoraviy mansub tashkilotlar bilan oʻzaro hamkorligini markaziy apparatning tarkibiy boʻlinmalari rahbarlari taʼminlaydi.

31. Qoʻmitaning markaziy apparati tarkibiy boʻlinmalari hududiy boshqarmalar bilan oʻz faoliyati yoʻnalishlari boʻyicha oʻzaro hamkorlikni amalga oshirishda:

topshiriqlarni hududiy boshqarmalar hamda idoraviy mansub tashkilotlarga yetkazadi hamda ularning ijrosini nazorat qilib boradi;

hududiy boshqarmalar hamda idoraviy mansub tashkilotlarga bevosita tarkibiy boʻlinmalar faoliyati masalalari boʻyicha soʻrov joʻnatadi va ularning ijrosini nazorat qilib boradi;

hududiy boshqarmalar hamda idoraviy mansub tashkilotlar faoliyatini tekshiradi va oʻrganadi, amaliyotini umumlashtiradi, takomillashtirishga qaratilgan chora-tadbirlarni ishlab chiqadi va amalga oshiradi;

hududiy boshqarmalar hamda idoraviy mansub tashkilotlar faoliyatining tashkil etilishi va natijalari toʻgʻrisida hisobot va axborot materiallari, statistik va boshqa maʼlumotlarni oʻrganishni tashkil etadi;

hududiy boshqarmalar hamda idoraviy mansub tashkilotlar ish rejalarini tahlil qiladi, ularning faoliyatini rejalashtirishni takomillashtirish boʻyicha choralar koʻradi;

hududiy boshqarmalar hamda idoraviy mansub tashkilotlardan tushgan takliflarni koʻrib chiqadi;

hududiy boshqarmalar hamda idoraviy mansub tashkilotlarning normativ-huquqiy hujjatlar loyihalarini tayyorlashda ishtirok etishini tashkil etadi, ularning qonunchilik hujjatlarini takomillashtirish yuzasidan tushgan takliflarini koʻrib chiqadi.

32. Hududiy boshqarmalar hamda idoraviy mansub tashkilotlar Qoʻmita markaziy apparatining tarkibiy boʻlinmalari bilan hamkorlik qiladi, shu jumladan:

Qoʻmita rahbariyati topshiriqlarining ijrosi toʻgʻrisida axborot beradi;

faoliyatning belgilangan sohasidagi qonunchilik hujjatlarini amalga oshirish boʻyicha faoliyat natijalari toʻgʻrisida markaziy apparatga maʼlumot taqdim etadi;

ularning faoliyatini tekshirish va oʻrganish asosida ishda aniqlangan kamchiliklar va nuqsonlarning bartaraf etilganligi natijalari haqida axborot beradi;

Qoʻmitaning markaziy apparatiga belgilangan tartibda va muddatda oʻz faoliyati natijalari toʻgʻrisida hisobot taqdim etadi;

kompleks ijtimoiy-iqtisodiy rivojlantirish sektorlari bilan hamkorlik natijalari haqida axborot beradi;

vakolatli organlar tomonidan oʻz faoliyatini tekshirishlar natijalari haqida axborot beradi.

3-§. Qoʻmitaning respublika ijro etuvchi hokimiyat organlari mahalliy ijro etuvchi hokimiyat organlari, xoʻjalik birlashmalari va boshqa tashkilotlar bilan hamkorlik qilish tartibi

33. Qoʻmita oʻz vazifalari va funksiyalarini amalga oshirishda respublika ijro etuvchi hokimiyat organlari, mahalliy ijro etuvchi hokimiyat organlari, xoʻjalik birlashmalari va boshqa tashkilotlar bilan hamkorlik qiladi.

34. Qoʻmita faoliyati Vazirlar Mahkamasi va Oʻzbekiston Respublikasi Prezidenti Administratsiyasining tegishli tarkibiy boʻlinmalari tomonidan nazorat qilinadi.

4-§. Qoʻmitaning hayʼati, boshqa kengash, maslahat, ekspert organlari

35. Qoʻmitada rais, (hayʼat raisi), uning oʻrinbosarlari, shuningdek, Qoʻmita faoliyatining asosiy yoʻnalishlarini muvofiqlashtiruvchi tarkibiy tuzilmalar rahbarlaridan iborat tarkibda hayʼat tuziladi.

Hayʼat tarkibining soni va shaxsiy tarkibi Qoʻmita raisining taqdimnomasiga binoan Vazirlar Mahkamasi tomonidan tasdiqlanadi.

36. Hayʼatga quyidagi vazifalar yuklanadi:

Qoʻmita faoliyatining ushbu Nizomda belgilangan asosiy yoʻnalishlarini ishlab chiqish va amalga oshirish;

qonunchilik hujjatlarida, Oʻzbekiston Respublikasi Prezidentining hujjatlari va Vazirlar Mahkamasining qarorlarida belgilangan vazifalar oʻz vaqtida va sifatli amalga oshirilishini taʼminlash uchun Qoʻmita tizimidagi xodimlar va rahbarlarning shaxsiy javobgarligini oshirish choralarini koʻrgan holda tarkibiy boʻlinmalar hamda idoraviy mansub tashkilotlar rahbarlarining hisobotlari muntazam ravishda eshitilishini tashkil etish;

Qoʻmita faoliyati sohasidagi hududiy va tarmoq dasturlari amalga oshirilishining natijadorligini tizimli ravishda har chorakda va muntazam koʻrib chiqish;

Qoʻmita faoliyati doirasidagi dolzarb masalalarni muhokama qilishni taʼminlagan holda hayʼatning kengaytirilgan, shu jumladan, joylarda sayyor majlislarini oʻtkazishni tashkil etish, shuningdek, yuzaga kelgan muammolarni bartaraf etish boʻyicha tegishli qarorlarni tayyorlash va qabul qilish;

Qoʻmita va uning tizimiga kiradigan lavozimlar nomenklaturasini koʻrib chiqish va tasdiqlash;

Qoʻmita nomenklaturasiga kiradigan lavozimlarni yuklatilgan vazifalarga mos, ularni professional darajada bajarishga qodir, malakali, zarur nazariy bilim va amaliy koʻnikmalarga ega boʻlgan masʼuliyatli kadrlar bilan jamlash masalalarini koʻrib chiqish;

Oʻzbekiston Respublikasi Prezidenti hamda Vazirlar Mahkamasining qaror va topshiriqlarida belgilangan vazifalarning oʻz vaqtida va sifatli bajarilishini taʼminlash maqsadida Qoʻmita rahbarlari va xodimlarining ijro intizomini mustahkamlash va shaxsiy javobgarligini oshirish;

Hayʼat Qoʻmita vakolatiga kiritilgan boshqa masalalarni ham koʻrib chiqishga haqli.

37. Hayʼat majlisiga respublika va mahalliy ijro etuvchi hokimiyat organlari, xoʻjalik birlashmalari va boshqa tashkilotlar rahbarlari ularning vakolatiga kiradigan masalalar yuzasidan taklif etilishi mumkin.

38. Hayʼat, agar uning majlisida hayʼat tarkibining yarmidan koʻpi qatnashsa, vakolatli hisoblanadi. Koʻrib chiqilayotgan masalalar yuzasidan qarorlar koʻpchilik ovoz bilan qabul qilinadi.

39. Hayʼat qarorlari Hayʼat raisi tomonidan imzolanadi va Qoʻmita raisining buyrugʻi (qarorlari) bilan amalga oshiriladi.

40. Qoʻmita raisi va hayʼat aʼzolari oʻrtasida kelishmovchiliklar yuzaga kelgan taqdirda, Qoʻmita raisi yuzaga kelgan kelishmovchiliklar haqida Vazirlar Mahkamasiga axborot bergan holda mustaqil ravishda qaror qabul qiladi. Hayʼat aʼzolari ham oʻz fikrlarini Vazirlar Mahkamasiga maʼlum qilishi mumkin.

41. Hayʼat faoliyatining tartibi uning hayʼat tomonidan tasdiqlanadigan reglamenti bilan belgilanadi.

42. Qoʻmita huzurida kengash, maslahat va ekspertlik organlari tuzilishi mumkin. Ularning tarkibi va nizomlari rais tomonidan tasdiqlanadi, ularning tarkibi va nizomlari Oʻzbekiston Respublikasi Prezidenti hujjatlari bilan tasdiqlanadigan hollar bundan mustasno.

8-bob. Qoʻmita faoliyatining samaradorligi va natijadorligini baholash mezonlari va ish indikatorlari

43. Qoʻmita faoliyatining samaradorligi muntazam baholanadi.

44. Qoʻmita faoliyatining samaradorligi va natijadorligini baholash tegishli mezonlar va ishchi indikatorlarga asoslanadi.

45. Qoʻmita faoliyati samaradorligi va natijadorligini baholash yakunlari boʻyicha:

Qoʻmita rahbarlari va xodimlarini ragʻbatlantirish (mukofotlash) yoki ularga nisbatan intizomiy jazo choralari;

Qoʻmita faoliyatida aniqlangan kamchiliklarni bartaraf etish va uning faoliyatini yanada takomillashtirish choralari koʻriladi.

46. Qoʻmita faoliyatining samaradorligi va natijadorligini baholash tartibi qonunchilik hujjatlarida belgilanadi.

9-bob. Qoʻmita faoliyatini moliyalashtirish va moddiy-texnik taʼminlash, uning xodimlari mehnatiga haq toʻlash va moddiy ragʻbatlantirish

47. Quyidagilar Qoʻmita faoliyatini moliyalashtirishning asosiy manbalari hisoblanadi:

Oʻzbekiston Respublikasi Davlat budjeti mablagʻlari;

Qoʻmitaning budjetdan tashqari mablagʻlari;

qonunchilik hujjatlariga muvofiq pullik xizmat koʻrsatishdan tushadigan mablagʻlar;

vaqtincha boʻsh mablagʻlarni tijorat banklarining depozitlariga joylashtirishdan olingan daromadlar;

qonunchilik hujjatlari bilan taqiqlanmagan boshqa manbalar.

48. Qoʻmita xodimlarining ish haqi lavozim maoshi, mukofotlar, qoʻshimcha haq, ustamalar va qonunchilikda nazarda tutilgan boshqa ragʻbatlantiruvchi toʻlovlardan iborat.

49. Qoʻmita, uning idoraviy mansub tashkilotlari xodimlarining lavozim maoshi Yagona tarif setkasining tasdiqlangan razryadlari boʻyicha belgilanadi.

Ilmiy darajaga (PhD, DSc) ega xodimlariga amaldagi qonunchilikda belgilangan talablar asosida toʻlovlar amalga oshiriladi.

50. Qoʻmitaning budjetdan tashqari jamgʻarmasi hisobidan qonunchilikda belgilangan ishlanmaydigan bayram kunlarida va boshqa muhim sanalarda mukofotlash, shuningdek, ustama, ragʻbatlantirish va qoʻshimcha haq, mukofotlar va ijtimoiy qoʻllab-quvvatlash maqsadida ish haqiga boshqa toʻlovlar miqdori Qoʻmita raisi tomonidan belgilanadi.

51. Qoʻmita xodimlariga oylik ustamalar, moddiy va koʻp yillik mehnati uchun ragʻbatlantirishlar tarzidagi lavozim maoshlariga qoʻshimcha toʻlovlar qonunchilik hujjatlariga muvofiq amalga oshiriladi.

52. Oʻzbekiston Respublikasi Din ishlari boʻyicha qoʻmitasi huzuridagi “Ziyorat” jamgʻarmasi (keyingi oʻrinlarda — Jamgʻarma) mablagʻlari Qoʻmita xodimlarini moddiy ragʻbatlantirish va ijtimoiy muhofaza qilish maqsadida quyidagilarga yoʻnaltiriladi:

ish haqi (lavozim maoshi);

koʻp yillik ishlaganlik uchun qoʻshimcha haq va ustamalar toʻlash;

lavozim maoshlariga har oylik shaxsiy ustama belgilash (ragʻbatlantirish koeffitsiyentini hamda qoʻshimcha toʻlovlarni inobatga olgan holda);

bayramlarda va muhim sanalarda bir martalik mukofotlash;

faoliyatda ijobiy natijalarga erishganligi uchun mukofotlar;

ovqat puli uchun toʻlov;

yoʻlkira xarajatlari uchun toʻlov;

xodimlarni ijtimoiy qoʻllab-quvvatlash maqsadida bir martalik moddiy yordam koʻrsatish;

qishloq xoʻjaligi mahsulotlarini xarid qilish uchun bir yilda bir marotaba moddiy yordam koʻrsatish;

yubiley sanalar, pensiyaga chiqish, toʻy, farzandli boʻlish munosabati bilan esdalik sovgʻalar yoki pul mablagʻlari berish;

qonunchilikda belgilangan boshqa toʻlovlar.

53. Shaxsiy oylik ustamalar lavozim maoshiga nisbatan foizda belgilanadi.

Qoʻmitaning markaziy apparati xodimlari uchun shaxsiy ustamaning eng yuqori miqdori (ustama va ragʻbatlantirish koeffitsiyenti hamda koʻp yillik ishlaganlik uchun ustamani hisobga olgan holda) —

200 (ikki yuz) foizgacha, hududiy boshqarmalar xodimlari uchun shaxsiy ustamaning eng yuqori miqdori — 100 (bir yuz) foizdan oshmasligi lozim.

54. Xizmat vazifalarini vijdonan va tashabbuskorlik bilan bajargan Qoʻmita xodimlari qonunchilikda belgilangan ishlanmaydigan bayram kunlari munosabati bilan lavozim maoshi (ragʻbatlantirish koeffitsiyentlari hisobga olingan holda) bir barobarigacha miqdorda mukofot bilan moddiy ragʻbatlantiriladi.

55. Bayram sanalariga mukofotlar:

1-yanvar — Yangi yil;

8-mart — Xotin-qizlar kuni;

21-mart — Navroʻz bayrami;

9-may — Xotira va qadrlash kuni;

1-sentabr — Mustaqillik kuni;

1-oktabr — Oʻqituvchi va murabbiylar kuni;

8-dekabr — Oʻzbekiston Respublikasi Konstitutsiyasi kuni;

Roʻza hayit (Iyd al-Fitr) diniy bayrami;

Qurbon hayit (Iyd al-Adha) diniy bayramlari munosabati bilan barcha xodimlar ragʻbatlantiriladi. Ushbu mukofotlar miqdorlari xodimlarning haqiqatda ishlagan davrlariga bogʻliq boʻlmaydi.

Bolalarni parvarishlash, oʻqish bilan bogʻliq hamda ijodiy taʼtillar davrida, safarbarlik chaqiruvi rezervidagi xizmatga, harbiy yigʻinga chaqirilgan davridagi bayram sanalariga mukofotlar berilmaydi.

56. Qoʻmita xodimlarini ijtimoiy muhofaza qilish maqsadida, ularga har oyda har bir shtat birligi uchun bazaviy hisoblash miqdorining 5 (besh) baravaridan koʻp boʻlmagan miqdorda ovqat puli, yoʻlkira xarajatlarini qoplash uchun bazaviy hisoblash miqdorining 3 (uch) baravaridan koʻp boʻlmagan miqdorda toʻlovlar amalga oshiriladi.

Qoplanadigan xarajatlar miqdori bazaviy hisoblash miqdori eng kam miqdori oshishiga qarab ortishi mumkin.

Transport va ovqatlanish xarajatlarini qoplash uchun toʻlovlarning aniq miqdori Qoʻmita raisining buyrugʻi bilan belgilanadi.

Mazkur bandda koʻrsatilgan toʻlovlar xodimning ishlagan davriga mutanosib ravishda toʻlanadi.

57. Qoʻmita xodimlariga qishloq xoʻjaligi mahsulotlarini sotib olish uchun yilda bir marta (qoida tariqasida kuz oylarida) bazaviy hisoblash miqdorining 10 (oʻn) baravaridan koʻp boʻlmagan miqdorida moddiy yordam amalga oshiriladi.

Qishloq xoʻjaligi mahsulotlarini xarid qilish uchun moddiy yordamning aniq miqdori Qoʻmita raisining buyrugʻiga binoan belgilanadi.

58. Qoʻmita xodimlariga moliya yilida bir marta (mehnat taʼtiliga chiqish vaqtida sogʻligini tiklash maqsadida yoki mehnat taʼtilga chiqmagan xodimlarga moliya yilining dekabr oyida) bir oylik mehnatga haq toʻlash fondi (lavozim maoshi va ragʻbatlantirish koeffitsiyentini inobatga olgan holda) miqdorida moddiy yordam koʻrsatiladi.

Moddiy yordam koʻrsatish xodimning arizasi yoki Kasaba uyushmasi qoʻmitasi iltimosnomasiga asosan buyruq bilan amalga oshiriladi.

59. Qoʻmita raisini mukofotlash, shaxsiy ustamalarini belgilash, moddiy ragʻbatlantirish qonunchilik hujjatlarida belgilangan tartibda amalga oshiriladi.

60. Oʻzbekiston Respublikasi Prezidenti yoki Vazirlar Mahkamasi qarorlari bilan alohida soha xodimlariga ustama belgilangan hollarda ustamalar qonunchilikda belgilangan tartibda amalga oshiriladi.

10-bob. Qoʻmitaning Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi hamda Vazirlar Mahkamasiga hisobot berishi

61. Qoʻmita rahbarlari oʻz faoliyati toʻgʻrisida Oʻzbekiston Respublikasi Prezidentiga, Oʻzbekiston Respublikasi Prezidenti Administratsiyasining tegishli tarkibiy boʻlinmalariga, Vazirlar Mahkamasiga hisobot beradi.

Qoʻmita Oʻzbekiston Respublikasi Prezidenti Administratsiyasi va Vazirlar Mahkamasi bilan oʻzaro hamkorlik qilish doirasida:

oʻziga yuklangan vazifalar va funksiyalarni bajarish bilan bogʻliq normativ-huquqiy hujjatlar hamda boshqa hujjatlar loyihalarini belgilangan tartibda kiritadi;

Oʻzbekiston Respublikasi Prezidenti Administratsiyasi va Vazirlar Mahkamasiga taqdim etish uchun respublika va mahalliy ijro etuvchi hokimiyat organlari, xoʻjalik birlashmalari bilan birgalikda oʻz faoliyati sohasidagi muammolarni hal etish, davlat boshqaruvi tizimini maqbullashtirishga qaratilgan taklif, tavsiya va tahliliy maʼlumotlar tayyorlanishini taʼminlaydi;

din ishlari sohasidagi davlat siyosatini amalga oshirishda mavjud tizimli muammo va kamchiliklarning muntazam ravishda koʻrib chiqilishi va bartaraf etilishini tashkil qiladi;

belgilangan tartibda boshqa funksiyalarni ham amalga oshiradi.

62. Oʻzbekiston Respublikasi Prezidenti Administratsiyasining tegishli tarkibiy boʻlinmalari rahbarlari hamda Vazirlar Mahkamasi Qoʻmita rahbarlariga yuklatilgan vazifalarning samarali bajarilishi boʻyicha ular faoliyati ustidan doimiy monitoring olib boradi, Qoʻmita faoliyati samaradorligini xolisona baholaydi.

63. Monitoring va baholash natijalariga koʻra Qoʻmitaning alohida oʻrnak koʻrsatgan rahbarlari va xodimlarini ragʻbatlantirish choralari koʻriladi, jiddiy kamchiliklarga yoʻl qoʻyganlarga nisbatan egallab turgan lavozimidan ozod etishgacha boʻlgan javobgarlik choralari qoʻllanadi.

11-bob. Yakunlovchi qoida

64. Qoʻmita qonunchilik hujjatlarida belgilangan tartibda qayta tashkil etiladi va tugatiladi.

Vazirlar Mahkamasining 2025-yil 20-avgustdagi 521-son qaroriga 2-ILOVA

Vazirlar Mahkamasining 2024-yil 12-oktabrdagi 668-son qarori bilan tasdiqlangan Oʻzbekiston Respublikasi Din ishlari boʻyicha qoʻmitasi huzuridagi “Ziyorat” jamgʻarmasi toʻgʻrisidagi nizomga kiritilayotgan oʻzgartirish va qoʻshimchalar

1. 3-band oʻz kuchini yoʻqotgan deb hisoblansin.

2. 4-band quyidagi tahrirda bayon etilsin:

“4. Jamgʻarma yuridik shaxs hisoblanmaydi va uning mablagʻlari Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida ochilgan Oʻzbekiston Respublikasi Din ishlari boʻyicha qoʻmitasi (keyingi oʻrinlarda — Din ishlari boʻyicha qoʻmita)ning shaxsiy gʻazna hisobvaraqlarida jamlanadi va ushbu Nizomda belgilangan maqsadlarga sarflanadi”.

3. 5-band quyidagi tahrirda bayon etilsin:

“5. Kuyidagilar Jamgʻarma mablagʻlarini shakllantirish manbalari hisoblanadi:

diniy mazmundagi materiallarni dinshunoslik ekspertizasidan oʻtkazish uchun undiriladigan toʻlovlar;

diniy taʼlim muassasalari hamda “Umra” tadbirlarini tashkil etish va oʻtkazish faoliyatini litsenziyalashda arizani koʻrib chiqish uchun undiriladigan yigʻimning qonunchilikda belgilangan qismi;

diniy taʼlim muassasalari hamda “Umra” tadbirlarini tashkil etish faoliyatini litsenziyalashda undiriladigan davlat bojining 30 foizi;

litsenziyalash sohasidagi huquqbuzarliklarni sodir etganlik uchun yuridik shaxslardan undirilgan jarimaning 10 foizi;

jismoniy va yuridik shaxslarning homiylik xayriyalari;

Jamgʻarmaning vaqtincha boʻsh mablagʻlarini tijorat banklaridagi depozitlarga joylashtirishdan olinadigan daromadlar;

xalqaro tashkilotlarning grantlari;

qonunchilik hujjatlarida taqiqlanmagan boshqa manbalar”.

4. 7-band quyidagi tahrirda bayon etilsin:

“7. Jamgʻarmaning vaqtinchalik boʻsh turgan mablagʻlari Din ishlari boʻyicha qoʻmita tomonidan Oʻzbekiston Respublikasi tijorat banklarining depozit hisobvaraqlariga joylashtirilishi mumkin.

Din ishlari boʻyicha qoʻmita raisi Jamgʻarmaga mablagʻlar tushishining toʻliqligi va saqlanishini nazorat qiladi”.

5. 8-band quyidagi tahrirda bayon etilsin:

“8. Jamgʻarma mablagʻlari quyidagilarga yoʻnaltiriladi:

“Umra” xizmatlari sifatsiz koʻrsatilishidan jabr koʻrgan ziyoratchilarga yetkazilgan moddiy va maʼnaviy zarar oʻrnini qoplash;

Din ishlari boʻyicha qoʻmitaga yuklatilgan vazifalarni bajarish, jumladan diniy-maʼrifiy tadbirlarni tashkil etish va oʻtkazish;

Din ishlari boʻyicha qoʻmita xodimlarini moddiy ragʻbatlantirish va ijtimoiy muhofaza qilish (sanatoriya, kurort va tibbiy xizmat koʻrsatish, mukofotlar toʻlash, maoshlarga ustamalar belgilash, moddiy yordam koʻrsatish);

Din ishlari boʻyicha qoʻmita xodimlarining xizmat safari xarajatlari, shu jumladan xorijiy davlatlardagi xizmat safarlari xarajatlarini qoplash;

Din ishlari boʻyicha qoʻmitaning xodimlarini oʻqitish, malakasini oshirish hamda stajirovka oʻtashi, shu jumladan, ularning xorijiy davlatlarga tashriflarini tashkil etish va xorijiy davlatlarda oʻtkaziladigan konferensiya, seminarlar va boshqa tadbirlarda ishtirok etish xarajatlarini qoplash;

Din ishlari boʻyicha qoʻmita faoliyati bilan bogʻliq masalalar boʻyicha Oʻzbekiston Respublikasiga tashrif buyuradigan xorijiy davlatlar, xalqaro tashkilotlar delegatsiyalarining tashriflarini tashkil etish;

Din ishlari boʻyicha qoʻmita bino va inshootlarini saqlash hamda boshqa joriy xarajatlar, yordamchi texnik va xizmat koʻrsatuvchi xodimlari taʼminoti, ushbu Qoʻmita faoliyatini yanada yaxshilash bilan bogʻliq boshqa tadbirlarni oʻtkazish;

Din ishlari boʻyicha qoʻmitaning moddiy-texnika bazasini mustahkamlashga va faoliyatini rivojlantirishga yoʻnaltirilgan boshqa tadbirlarni amalga oshirish”.

6. 10-band oʻz kuchini yoʻqotgan deb hisoblansin.

7. Quyidagi mazmundagi 9 1 — 9 4 -bandlar bilan toʻldirilsin:

“9 1 . Jamgʻarma mablagʻlaridan foydalanish Din ishlari boʻyicha qoʻmitaning rivojlantirish dasturlarini mablagʻ bilan taʼminlash orqali amalga oshiriladi hamda ushbu dasturlar har yili mablagʻlar va ehtiyojlar prognozi asosida shakllantiriladi.

9 2 . Jamgʻarma mablagʻlarini sarflash Din ishlari boʻyicha qoʻmita tomonidan tasdiqlangan Jamgʻarmaning daromadlar va xarajatlar smetasiga muvofiq tegishli gʻazna hisobvaraqlaridan amalga oshiriladi.

9 3 . Jamgʻarmadan pul mablagʻlarini ajratish tasdiqlangan daromadlar va xarajatlar smetasi doirasida qonunchilikda belgilangan tartibda amalga oshiriladi.

9 4 . Jamgʻarmadan ajratilgan pul mablagʻlarining sarflanishi toʻgʻrisidagi daromadlar va xarajatlar aks ettirilgan hisobot har chorak yakuni boʻyicha buxgalteriya balansida aks ettiriladi”.

8. Quyidagi mazmundagi 3 1 va 3 2 -boblar bilan toʻldirilsin:

“3 1 -bob. Jamgʻarmani boshqarish

9 5 . Jamgʻarma mablagʻlarini boshqarish va taqsimlash Din ishlari boʻyicha qoʻmita raisi tomonidan amalga oshiriladi.

9 6 . Din ishlari boʻyicha qoʻmitaning Moliya-iqtisod boʻlimi Jamgʻarmaning ishchi organi hisoblanadi.

9 7 . Jamgʻarma mablagʻlarining hisob va hisobotini yuritish hamda joriy xizmat koʻrsatish ishlari Din ishlari boʻyicha qoʻmitaning Moliya-iqtisod boʻlimi tomonidan amalga oshiriladi. Jumladan:

Jamgʻarmaning kelgusi yil uchun daromadlari va xarajatlari prognoz koʻrsatkichlarini ishlab chiqadi;

Jamgʻarmaning daromadlar va xarajatlari smetasini tayyorlaydi, zarur hollarda, tasdiqlangan daromadlar va xarajatlar smetasiga tuzatishlar kiritish boʻyicha takliflar kiritadi;

Jamgʻarma tushumlarini koʻpaytirish va uning mablagʻlaridan samarali foydalanish boʻyicha takliflar tayyorlaydi;

ushbu Nizomda va qonunchilik hujjatlarida nazarda tutilgan xarajatlarni amalga oshiradi;

Jamgʻarma mablagʻlarining tushumi va ulardan foydalanish hisobini yuritadi;

Jamgʻarmadan ajratilgan pul mablagʻlarining sarflanishi toʻgʻrisidagi daromadlar va xarajatlarini buxgalteriya balansida aks ettirilishini taʼminlaydi;

Jamgʻarma smetasining ijrosi toʻgʻrisidagi hisobotni tuzadi.

Oʻzbekiston Respublikasi Iqtisodiyot va moliya vazirligiga qonunchilik hujjatlarida belgilangan tartibda Jamgʻarma smetasining ijrosi toʻgʻrisida hisobot taqdim etilishini taʼminlaydi.

3 2 -bob. Jamgʻarmaning hisobi va hisobotini yuritish

9 8 . Jamgʻarma mablagʻlaridan foydalanish boʻyicha hisob va hisobotlar Din ishlari boʻyicha qoʻmitaning budjetdan tashqari gʻazna hisobvaraqlarida alohida yuritiladi.

9 9 . Jamgʻarmaning joriy yilda foydalanilmagan mablagʻlari Oʻzbekiston Respublikasining Davlat budjetiga olib qoʻyilmaydi va ulardan keyingi yilda foydalaniladi.

9 10 . Jamgʻarmaning daromadlar va xarajatlar smetasining ijrosi toʻgʻrisidagi hisobotlar qonunchilik hujjatlarida belgilangan tartibda tuziladi va Din ishlari boʻyicha qoʻmita raisi tomonidan tasdiqlanadi.

9 11 . Jamgʻarmaning daromadlar va xarajatlar smetasi hamda uning ijrosi toʻgʻrisidagi hisobotlar, shuningdek, tovarlar (ishlar, xizmatlar)ni xarid qilish boʻyicha tuzilgan shartnomalar roʻyxatlari Din ishlari boʻyicha qoʻmitaning rasmiy veb-saytida eʼlon qilinadi.

9 12 . Jamgʻarma mablagʻlaridan oqilona va maqsadli foydalanilishi yuzasidan davlat moliyaviy nazorati qonunchilik hujjatlarida belgilangan tartibda moliyaviy nazorat xizmatlari tomonidan amalga oshiriladi”.

9. Quyidagi mazmundagi 12 1 -band bilan toʻldirilsin:

“12 1 . Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi”.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 20-avgust,

521-son

(Qonunchilik maʼlumotlari milliy bazasi, 20.08.2025-y., 09/25/521/0753-son)

lex.uz