UzbekAI

Ўзбекистон Республикаси Вазирлар Маҳкамасининг

қарори

НИЗОМ

НИЗОМ

СХЕМАСИ

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ихтисослаштирилган спорт мактаблари фаолиятини такомиллаштириш тўғрисида

Ўзбекистон Республикаси Президентининг «Тошкент шаҳрида бокс ва гимнастикага ихтисослаштирилган спорт мактаблари фаолиятини ташкил этиш бўйича қўшимча чора-тадбирлар тўғрисида» 2024 йил 22 июндаги ПФ-94-сон Фармони ижросини таъминлаш, шунингдек, ёшларнинг спортга қизиқишини янада рағбатлантириш, юқори натижаларга эришган спортчиларнинг тажрибасини ёшлар ўртасида оммалаштириш ҳамда уларни илғор таълим усуллари асосида ўқитиш ва тайёрлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Тошкент шаҳрида бокс ва гимнастикага ихтисослаштирилган спорт мактаблари фаолиятини ташкил этиш бўйича қўшимча чора-тадбирлар тўғрисида» 2024 йил 22 июндаги ПФ-94-сон Фармонига мувофиқ бокс бўйича Баҳодир Жалолов ҳамда гимнастика бўйича Оксана Чусовитина спорт маҳорати мактаблари Спорт вазирлиги тизимидан Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги (кейинги ўринларда — Агентлик) тизимига ўтказилгани;

Бокс бўйича Баҳодир Жалолов спорт маҳорати мактаби — Баҳодир Жалолов номидаги боксга ихтисослаштирилган спорт мактаби, Гимнастика бўйича Оксана Чусовитина спорт маҳорати мактаби — Оксана Чусовитина номидаги гимнастикага ихтисослаштирилган спорт мактаби (кейинги ўринларда — спорт мактаблари) этиб қайта номлангани маълумот учун қабул қилинсин.

2. Қуйидагилар:

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ихтисослаштирилган спорт мактаблари тўғрисидаги низом 1-иловага мувофиқ;

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ихтисослаштирилган спорт мактабларига ўқувчиларни саралаб олиш, қабул қилиш ҳамда четлаштириш тартиби тўғрисидаги низом 2-иловага мувофиқ тасдиқлансин.

3. Белгилансинки:

а) Агентлик тизимидаги спорт мактаблари битирувчиларига тегишли спорт турлари бўйича касбий таълим тўғрисидаги диплом ҳамда тренерлик фаолияти билан шуғулланиш учун малака сертификати берилади;

б) ўқувчилар Давлат бюджети маблағлари ҳисобидан бепул озиқ-овқат ва бино қуввати доирасида яшаш жойи билан таъминланади;

в) 2025 йил 1 сентябрдан бошлаб:

маъмурий-бошқарув, педагогик, ўқув-ёрдамчи, техник ва хизмат кўрсатувчи ходимлар иш ҳақи фондининг 50 фоизидан кўп бўлмаган миқдорда рағбатлантириш жамғармаси ташкил этилади. Бунда директор, директор ўринбосарлари, тренерлар, тиббиёт ходимлари, йўриқчи-услубчилар, спорт психологларига олимпия ва паралимпия спорт турларига тайёрлаш марказлари учун белгиланган моддий рағбатлантириш шартлари қўлланилганда, мазкур рағбатлантириш жамғармаси орқали тўловлар татбиқ этилмайди;

Агентлик тизимидаги умумтаълим муассасаларида фаолият юритаётган тарбиячиларнинг меҳнатига ҳақ тўлашда уларнинг мутахассислик фани бўйича малака тоифаси ҳамда миллий ёки халқаро сертификатлари учун қонунчилик ҳужжатларида белгиланган шартлар татбиқ этилади;

г) спорт мактабларига фан йўналиши бўйича камида бакалавр даражасидаги олий педагогик маълумот ва камида иккинчи малака тоифасига эга ўқитувчилар танлов асосида жалб этилади. Бунда кимё, биология ва физика фанларидан дарс берадиган педагог кадрларнинг малака тоифалари умумлашган табиий фанга ҳам татбиқ этилади.

4. Мактабгача ва мактаб таълими вазирлиги ҳамда Иқтисодиёт ва молия вазирлигининг 2025 йил 31 декабрга қадар:

спорт мактаблари ўқувчиларининг спорт мусобақаларида хавфсиз иштирокини таъминлаш мақсадида спорт мактабларига Мактабгача ва мактаб таълими вазирлигининг Таълим соҳасидаги ислоҳотларга кўмаклашиш жамғармаси ҳисобидан камида 50 ўринли 1 тадан автобус харид қилиш;

спорт мактабларига Давлат бюджети маблағлари ҳисобидан 1 тадан навбатчи автотранспорт воситасини харид қилиш тўғрисидаги таклифлари маъқуллансин.

Бунда спорт мактабларининг автотранспорт воситаларини сақлаш харажатлари учун 2026 йилдан бошлаб Давлат бюджети параметрларида тегишли маблағлар назарда тутилсин.

5. Иқтисодиёт ва молия вазирлиги ўқувчи-спортчи ва тренерларнинг тадбирларга, маҳаллий ва халқаро мусобақаларга тайёргарлиги ҳамда иштироки билан боғлиқ барча харажатларни ҳар йили Спорт ва оммавий жисмоний тарбия тадбирларининг календарь-режасида назарда тутиб борсин ҳамда Спорт вазирлигига ажратиладиган маблағларни камайтириш ҳисобидан тегишли ўзгартиришлар асосида ушбу спорт мактаблари ҳисобварағига ўтказиб берсин.

6. Мактабгача ва мактаб таълими вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.

7. Ушбу қарорнинг бажарилишини назорат қилиш Ўзбекистон Республикаси мактабгача ва мактаб таълими вазири Э.Г. Каримова зиммасига юклансин.

Вазирлар Маҳкамасининг 2025 йил 20 августдаги 524-сон қарорига 1-ИЛОВА

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ихтисослаштирилган спорт мактаблари тўғрисида

1-боб. Умумий қоидалар

1. Ушбу Низом Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги (кейинги ўринларда — Агентлик) тизимидаги ихтисослаштирилган спорт мактабларининг (кейинги ўринларда — спорт мактаблари) мақоми, асосий вазифалари, ҳуқуқ ва мажбуриятлари, шунингдек, фаолиятини ташкил этиш тартибини белгилайди.

2. Спорт мактаблари ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, ушбу Низомга, шунингдек, ўз уставига ҳамда бошқа қонунчилик ҳужжатларига амал қилади.

3. Агентлик спорт мактаблари фаолиятига умумий раҳбарлик қилади ва уларнинг назоратини амалга оширади.

Спорт мактаблари Агентлик томонидан лавозимга тайинланадиган ҳамда лавозимидан озод этиладиган директор томонидан бошқарилади.

4. Спорт мактаблари спорт турларига қизиқадиган иқтидорли ўқувчи-спортчиларни саралаб олиш орқали 5 — 11-синфлар кесимида уларнинг интеллектуал қобилияти ва спорт тайёргарлигини ривожлантиришга ихтисослашган давлат умумий ўрта таълим муассасаси ҳисобланади.

5. Спорт мактаблари Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга, бланкаларга, мустақил балансга, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитаси бўлинмаларида шахсий ғазна ҳисобварақларига, банк ҳисобварақларига, шу жумладан, хорижий валютадаги шахсий ғазна ҳисобварақларига эга бўлади.

6. Спорт мактаблари белгиланган тартибда ўз номидан мулкий ва шахсий номулкий ҳуқуқларни олиши ва амалга ошириши, шунингдек, зиммасига мажбуриятлар олиши, судда даъвогар ва жавобгар бўлиши мумкин.

7. Спорт мактабларида умумий ўрта таълим олиш бепул амалга оширилади.

Спорт мактаблари хусусиятидан келиб чиқиб, кундузги таълим шаклида фаолият юритади.

2-боб. Спорт мактабларининг мақсади ва асосий вазифалари

8. Давлат таълим стандартлари ҳамда мақбуллаштирилган ўқув режа ва таълим дастурларига мувофиқ спорт турларига иқтидори бўлган ўқувчи-спортчиларнинг таълим-тарбия олишдаги конституциявий ҳуқуқини рўёбга чиқариш спорт мактабларининг мақсади ҳисобланади.

Спорт мактабларида таълим-тарбия жараёнини ташкил этишнинг энг янги усулларини қўллаган ҳолда халқаро спорт майдонларида мамлакат шарафини муносиб ҳимоя қилишга қодир бўлган Ўзбекистон терма жамоалари учун спорт захираси ва юқори маҳоратли спортчилар тайёрланади.

9. Спорт мактабларининг асосий вазифалари қуйидагилардан иборат:

спорт турлари бўйича иқтидорли ёшларни аниқлаш, саралаш ва уларни ҳар томонлама ривожлантириш тизимини яратиш;

ўқувчи-спортчиларни ватанпарварлик ва фидойилик руҳида тарбиялаш, уларда ўз Ватани билан фахрланиш ва миллий маданий-тарихий анъаналарни ҳурмат қилиш туйғусини шакллантириш;

давлат таълим стандартларига мувофиқ спорт турларига, шунингдек, Ўзбекистон тарихи, хорижий тиллар, умумлашган табиий фан ва спорт психологиясини чуқурлаштириб ўқитишга мўлжалланган ўқув режа ва дастурлар ишлаб чиқиш;

ўқувчи-спортчилар учун ўқув-машғулот ҳамда ўқув-машқ жараёнларини халқаро стандартлар даражасида ташкил этиш, шунингдек, илғор тажрибалар асосида назарий ва техник-тактик жиҳатдан тайёрлаш сифатини мунтазам ошириб бориш;

ўқувчи-спортчиларнинг назарий билимини амалиётда қўллаш имкониятини кенгайтириш учун таълим-тарбия жараёнида замонавий педагогик ҳамда ахборот-коммуникация технологияларини жорий этиш;

ўқувчи-спортчиларнинг физиологик ва антропометрик кўрсаткичлари асосида улар билан индивидуал ишлаш ҳамда мобил лаборатория ёрдамида уларнинг натижаларини мунтазам равишда мониторинг қилиб бориш;

ўқувчи-спортчиларнинг профессионал фазилатларини ривожлантириш орқали халқаро талабларга мувофиқ юқори маҳоратли спортчиларни тайёрлаш;

юқори малакали чет эллик ва маҳаллий мутахассис-тренерлар ҳамда психологларни жалб этиш орқали спорт турлари бўйича тренерлар таркибини мустаҳкамлаш;

зарур спорт анжомлари ва ускуналари билан жиҳозланган, замонавий халқаро талаблар ва стандартларга жавоб берадиган моддий-техник ҳамда ўқув-машғулот базаларини яратиш.

3-боб. Спорт мактабларининг ҳуқуқлари ва мажбуриятлари

10. Спорт мактаблари ўзига юкланган вазифаларни бажаришда қуйидаги ҳуқуқларга эга:

ўзига юкланган вазифаларни, функцияларни бажариш билан боғлиқ қарорлар, буйруқлар, кўрсатмалар қабул қилиш, зарур бўлганда, бошқа давлат ташкилотлари билан биргаликда тегишли қарорлар қабул қилиш;

фаолиятга доир масалалар бўйича белгиланган тартибда судларга аризалар ва даъволар киритиш;

қонунчилик ҳужжатларида белгиланган тартибда бюджетдан ташқари жамғармаларга эга бўлиш;

ўз уставида белгиланган фаолиятни амалга ошириш учун қонунчилик ҳужжатларида тақиқланмаган молиявий манбаларни жалб қилиш;

белгиланган тартибда шартномалар тузиш;

ҳузурида Ўзбекистон «Ёшлик» жисмоний тарбия ва спорт жамияти ҳамда Ўзбекистон талабалар спорт ассоциациясининг филиали ҳисобланмайдиган юридик шахс мақомига эга бўлган спорт клублари ташкил этиш;

Агентлик билан биргаликда юқори малакали чет эллик мутахассислар ва бошқа ходимларни спорт мактабларига жалб этиш;

Агентликнинг тегишли таркибий бўлинмалари билан ўзига юкланган вазифаларни ўз вақтида, самарали ва сифатли бажариш учун белгиланган тартибда ўзаро ҳамкорлик қилиш.

Спорт мактаблари қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

11. Қуйидагилар спорт мактабларининг мажбуриятлари ҳисобланади:

ўзига юкланган вазифа ва функцияларни самарали бажариш;

фаолиятини ривожлантириш бўйича тасдиқланган дастурлар, чора-тадбирлар режаси, «йўл хариталари» ва бошқа дастурий ҳужжатлар ижросини таъминлаш;

ўзига бириктирилган мулклар, шу жумладан, кўчмас мулклардан мақсадли ва самарали фойдаланиш;

таълим-тарбия жараёнларини Агентлик томонидан тасдиқланадиган ўқув режалари ва таълим дастурлари асосида сифатли амалга ошириш;

раҳбар ва педагог ходимларни очиқ танлов асосида ишга қабул қилиш;

раҳбар, педагог ва ходимларнинг ҳуқуқлари ҳамда қонуний манфаатларини ҳимоя қилиш;

10-11-синф ўқувчи-спортчиларини касбга йўналтириш бўйича амалий дарслар ташкил этиш.

Спорт мактаблари ўз зиммасига қонунчилик ҳужжатларига мувофиқ бошқа мажбуриятларни ҳам олиши мумкин.

12. Спорт мактаблари давлат активларини, шу жумладан, уларнинг товар-моддий бойликлари ва бошқа мол-мулкларининг бут сақланиши бўйича моддий жавобгар ҳисобланади.

4-боб. Спорт мактабларида ўқув-тарбия жараёнини ташкил этиш

13. Спорт мактабларида спорт турлари бўйича 5 — 11-синфларда таълим берилади.

Бунда гимнастикага ихтисослаштирилган спорт мактабига талаб ва таклифлардан келиб чиқиб, 7 — 11 ёшдаги ўқувчи-спортчиларни 1 — 4-синфларга ўқишга қабул қилишга рухсат этилади.

Таълим жараёни ҳар бирида ўқувчи-спортчилар сони 12 нафардан кам, бироқ 24 нафардан ортиқ бўлмаган синфларда ташкил этилади.

14. Спорт мактабларида ўқувчи-спортчилар ўқув йили давомида икки маротаба (ҳар икки чоракда бир марта) аттестациядан ўтказилади.

Ўтказилган аттестация натижасига мувофиқ ўқувчи-спортчи ўқишни давом эттириши (синфдан-синфга ўтказиш) ёки уни ўқишдан четлаштириш тўғрисида спорт мактаби директорининг буйруғи қабул қилинади.

Ўқувчи-спортчиларни босқичли назорат ҳамда аттестациядан ўтказиш меъёрлари ва баҳолаш мезонлари Агентлик томонидан белгиланади. Бунда ўқувчи-спортчиларнинг фанларни ўзлаштириши, тегишли спорт меъёрларини топширганлиги, спорт натижалари ва тиббий мувофиқлик ҳолати, ички тартиб-қоидаларга амал қилиши, ўқувчилар тураржойида тартиб-интизом талабларига риоя этиши, жамоатчилик ишларида қатнашганлиги назарда тутилади.

15. Таълим-тарбия жараёнини ташкил этишда қуйидаги муддатларга амал қилинади:

ўқув йилининг давомийлиги спорт машғулотлари билан биргаликда — 42 ҳафта;

ўқув ҳафтасининг давомийлиги — 5 кун (спорт машғулотлари бундан мустасно);

дарс машғулотлари давомийлиги — 45 дақиқа;

дарс машғулотлари оралиғидаги танаффуслар давомийлиги — 5 — 10 дақиқа (ўқув куни ўртасидаги танаффуснинг давомийлиги 15 — 60 дақиқа).

16. Ўқувчи-спортчиларнинг спорт маҳорати даражасини ошириш мақсадида жами 60 кун давом этадиган, шу жумладан, қишки таътил вақтида (15 кун), ёзги таътил вақтида (45 кун) ўқув-машқ йиғинларини ўтказган ҳолда уларнинг фаол дам олишлари ташкил этилади.

Ўқувчи-спортчиларнинг мусобақалар жараёнида қолдирилган дарс машғулотлари алоҳида жадвал асосида педагогик соатга ажратилган вақт ҳисобидан ўқитилади.

17. Бир синфда ўқувчи-спортчилар сони 20 нафар ва ундан кам бўлган ҳолларда хорижий тилларни икки гуруҳга бўлиб ўқитишга йўл қўйилмайди.

18. Спорт мактабларининг 9-синф битирувчиларига давлат намунасидаги шаҳодатнома, 11-синф битирувчиларига тегишли спорт турлари бўйича касбий таълим тўғрисидаги диплом ҳамда тренерлик фаолияти билан шуғулланиш учун малака сертификати берилади.

19. Спорт машғулотларининг давомийлиги ва ўқувчи-спортчиларнинг спорт юкламаси тасдиқланган ўқув режасига мувофиқ белгиланади.

20. Спорт машғулотларининг ўқув дастурлари ўқув режасига мувофиқ ишлаб чиқилади ва унинг таркибига ўқув-машқ машғулоти, назарий тайёргарлик, умумий жисмоний тайёргарлик, махсус жисмоний тайёргарлик, техник-тактик тайёргарлик, психологик тайёргарлик, кўчириш (ўтказиш) назорат синовлари, назорат мусобақаларида иштироки, йўриқчилик ва ҳакамлик амалиёти, мусобақаларда иштирок этиш, тикланиш тадбирлари ҳамда тиббий назорат каби шаклларни ўз ичига олади.

21. Ўқувчи-спортчиларга тиббий хизмат спорт мактабларининг тиббиёт ходимлари томонидан кўрсатилади.

Тиббиёт ходимлари спорт мактаблари раҳбарияти ва педагог ходимлар билан бир қаторда даволаш-профилактика тадбирларини ташкил этиш, ўқув ва ўқувчилар тураржойида санитария нормалари, қоидалари ва гигиена нормативларига риоя қилиш, овқатланиш режими ва сифати, ўқувчи-спортчиларни тиббий кўрикдан ўтказиш ва соғломлаштириш учун масъул ҳисобланади.

Спорт мактаблари томонидан тиббиёт ходимларининг фаолият олиб бориши учун зарур шарт-шароитлар яратиб берилади.

22. Ўқувчи-спортчилар Ўзбекистон Республикаси Мактабгача ва мактаб таълими вазирлиги (кейинги ўринларда — Вазирлик) ҳамда Соғлиқни сақлаш вазирлиги томонидан тасдиқланган тартибга мувофиқ ҳар йили икки маротаба (сентябрь — апрель) чуқурлаштирилган тиббий кўрикдан ўтказилади.

5-боб. Спорт мактаблари ходимларининг меҳнатига ҳақ тўлаш

23. Спорт мактаби директори, директор ўринбосарлари, умумтаълим фанлари ўқитувчилари, тарбиячилар меҳнатига ҳақ тўлаш, қўшимча тўловлар ҳамда рағбатлантириш шартлари ва имтиёзлари Вазирлар Маҳкамасининг «Халқ таълими ходимлари меҳнатига ҳақ тўлашнинг такомиллаштирилган тизимини тасдиқлаш тўғрисида» 2005 йил 21 декабрдаги 275-сон қарорига мувофиқ белгиланади.

24. Спорт мактаби директори, директор ўринбосарларига моддий рағбатлантириш ҳамда тренерлари, йўриқчи-услубчиларига олимпия ва паралимпия спорт турларига тайёрлаш марказлари учун белгиланган меҳнатга ҳақ тўлаш ва моддий рағбатлантириш шартлари қўлланади.

Бунда бир нафар ўқувчи-спортчига нисбатан спорт мактаблари тренерларининг меҳнатига ҳақ тўлашда тренернинг базавий тариф ставкасига нисбатан олимпия ва паралимпия спорт турларига тайёрлаш марказлари учун белгиланган фоизлар татбиқ этилади.

25. Тиббиёт ходимлари меҳнатига Вазирлар Маҳкамасининг «Тиббиёт ходимлари меҳнатига ҳақ тўлашнинг такомиллаштирилган тизимини тасдиқлаш тўғрисида» 2005 йил 21 декабрдаги 276-сон қарорига мувофиқ ҳақ тўланади, шунингдек, уларга нисбатан олимпия ва паралимпия спорт турларига тайёрлаш марказлари учун белгиланган моддий рағбатлантириш шартлари татбиқ этилади.

26. Спорт мактаблари ходимларига Мактабгача ва мактаб таълими вазири жамғармаси ҳисобидан ҳар ойлик 100 фоизгача устама тўлаш тартиби жорий этилади.

Бунда ушбу устамаларни спорт мактаблари ходимларига тўлаш тартиби Вазирлик томонидан белгиланади.

6-боб. Тренерларнинг педагогик юкламаларини ҳисоблаш

27. Тренерларнинг педагогик юкламалари қуйидаги жадвал асосида белгиланади:

Ўқувчи-спортчилар тайёргарлигининг даражаси ва босқичлари Ўқув йили Уқув гуруҳлари билан ўқув машғулотининг давомийлиги ( * ҳафтадаги академик соатлар) Ўқув гуруҳларининг тўлдирилиши (Ўқувчи-спортчилар сони) Бошланғич тайёргарлик 1-йил 6 4 — 8 2-йил 8 Ўқув-машқ 1-йил 12 2-йил 14 3-йил 18 3 йилдан кўп 20 Спортда камолотга эришиш 1-йил 24 4 — 6 2-йил 26 2 йилдан кўп 28 Олий спорт маҳорати Бутун даврда 32 3 — 5

7-боб. Спорт мактаблари фаолиятини молиялаштириш ва моддий таъминлаш тартиби

28. Қуйидагилар спорт мактабларини молиялаштириш манбалари ҳисобланади:

Давлат бюджети маблағлари;

Вазирликнинг Мактабгача ва мактаб таълими вазири жамғармаси маблағлари;

Агентликнинг Иқтидорли ёшларни қўллаб-қувватлаш жамғармаси маблағлари;

фаолият ихтисослиги бўйича товарларни (ишларни, хизматларни) реализация қилишдан ва спорт мактабининг уставидаги вазифаларга мувофиқ бўлган бошқа фаолият турларидан олинадиган даромадлар;

асосий машғулотлар ўтказилмайдиган вақтда бўш турган мол-мулкни ижарага беришдан тушган даромадлар;

жисмоний ва юридик шахсларнинг ҳомийлик хайриялари;

пулли хизматлардан тушадиган маблағлар;

қонунчилик ҳужжатларида тақиқланмаган бошқа манбалар.

29. Спорт мактаблари белгиланган тартибда тасдиқланган ва Агентликда рўйхатдан ўтган харажатлар сметаси асосида молиялаштирилади.

30. Спорт мактаблари Агентликка тақдим этиш учун белгиланган тартибда бухгалтерия ҳисоботини юритади.

8-боб. Спорт мактабларининг фаолиятини назорат қилиш

31. Спорт мактаблари қонунчилик ҳужжатларида назарда тутилган ҳолларда ҳар йили ҳисобот даври тугагач, Агентликка фаолияти тўғрисида ҳисобот тақдим этади.

32. Спорт мактабларида бюджет тўғрисидаги қонунчилик талабларига риоя этилиши Вазирликнинг Ички аудит ва молиявий назорат департаменти томонидан назорат қилинади.

33. Қонунчилик ҳужжатларида белгиланган тартибда Агентлик спорт мактаби директори зиммасига юкланган вазифаларнинг самарали бажарилиши юзасидан уларнинг фаолияти устидан мунтазам мониторинг қилиб боради, мониторинг натижаларига кўра спорт мактаблари фаолияти самарадорлигига холисона баҳо беради.

34. Мониторинг ва баҳолаш якунлари бўйича юқори кўрсаткичга эришган спорт мактабларининг раҳбарияти ва ходимлари рағбатлантирилади ёхуд йўл қўйилган камчиликлари учун интизомий жавобгарликка тортилиши мумкин.

35. Спорт мактаби фаолиятига оид ҳужжатларнинг белгиланган тартибда сақлашга берилиши учун спорт мактаби директори жавоб беради.

9-боб. Якунловчи қоидалар

36. Спорт мактаблари қонунчилик талабларига мувофиқ ўқув йили якунида муассис (таъсисчи) томонидан қайта ташкил этилади ёки тугатилади.

Агентлик спорт мактаблари тугатилганда ўқувчи-спортчиларни ота-оналарининг розилиги билан бошқа умумий ўрта таълим ташкилотларига ўтказиш масъулиятини олади.

37. Спорт мактаблари тугатилган тақдирда, унинг пул маблағлари ва мол-мулкидан, унинг мажбуриятларини қоплаш бўйича тўловлар чегирилган ҳолда қонунчилик ҳужжатларига ва спорт мактаблари уставига мувофиқ фойдаланилади.

38. Ушбу Низом қоидалари қўлланиши билан боғлиқ низолар қонунчилик ҳужжатларида белгиланган тартибда ҳал этилади.

39. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Вазирлар Маҳкамасининг 2025 йил 20 августдаги 524-сон қарорига 2-ИЛОВА

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ихтисослаштирилган спорт мактабларига ўқувчиларни саралаб олиш, қабул қилиш ҳамда четлаштириш тартиби тўғрисида

1-боб. Умумий қоидалар

1. Ушбу Низом Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги (кейинги ўринларда — Агентлик) тизимидаги ихтисослаштирилган спорт мактабларига (кейинги ўринларда — спорт мактаблари) ўқувчиларни саралаб олиш, уларни қабул қилиш ва четлаштириш тартибини белгилайди.

2. Спорт мактабларига ўқувчилар Агентлик томонидан белгиланган йиллик қабул квотаси доирасида қабул комиссияси томонидан ўтказиладиган кириш имтиҳонлари натижаларига кўра қабул қилинади.

Спорт мактабларига ўқувчилар икки босқичда (касбий (ижодий) имтиҳонлари ва тест синовлари) ҳар бир синфда ўқувчилар сони 12 нафардан кам бўлмаган, бироқ 24 нафардан ошмаган ҳолда қабул қилинади.

3. Спорт мактабларига ўқувчилар тенг ҳуқуқлилик, очиқлик, адолат ва шаффофлик принциплари асосида ушбу Низомга иловада келтирилган схемага мувофиқ қабул қилинади.

4. Ўзбекистон Республикасида доимий яшаётган фуқаролиги бўлмаган шахслар спорт мактабларида таълим олиш учун Ўзбекистон Республикаси фуқаролари билан тенг ҳуқуқларга эгадир.

5. Чет эл фуқароларининг фарзандлари спорт мактабларига Ўзбекистон Республикасининг «Таълим тўғрисида»ги Қонунига , бошқа қонунчилик ҳужжатларига мувофиқ қабул қилинади.

6. Белгиланган квота доирасида кириш имтиҳонлари натижаларига кўра энг юқори балл олган ўқувчилар баллар кетма-кетлигида ўқишга қабул қилинади.

Талабдан келиб чиқиб, ажратилган квота доирасида Оксана Чусовитина номидаги гимнастикага ихтисослаштирилган спорт мактаби спорт гимнастикаси ва бадиий гимнастика йўналишларига қабул қилиниши мумкин.

Мазкур йўналишлар бўйича квота тақсимоти талабгорлар сонидан келиб чиқиб, Агентлик томонидан тасдиқланади.

2-боб. Қабул комиссияси

7. Спорт мактабларига ҳужжатларни қабул қилиш, кириш имтиҳонларини тенг ҳуқуқлилик, очиқлик, адолат ва шаффофлик принциплари асосида ташкил этиш мақсадида Агентлик, унинг тизимидаги ташкилотлар ҳамда ҳамкор ташкилотлар вакилларидан иборат таркибда қабул комиссияси шакллантирилади.

8. Қабул комиссиясининг таркиби Агентлик директори буйруғи билан тасдиқланади.

Қабул комиссияси таркиби 5 кишидан кам бўлмаган тоқ миқдорда комиссия раиси, комиссия раиси ўринбосари, комиссия котиби ҳамда унинг аъзоларидан иборат таркибда тузилади.

Қабул комиссияси томонидан спорт мактаблари бўйича алоҳида ишчи гуруҳ шакллантирилади ва тасдиқланади.

9. Касбий (ижодий) имтиҳонларнинг умумжисмоний тайёргарлик ҳамда техник-тактик тайёргарлик талаблари ва уларни баҳолаш мезонлари қабул комиссияси томонидан белгиланади.

10. Қабул комиссияси:

кириш имтиҳонларининг баҳолаш мезонлари, ўтказиш вақти ҳамда жойларини белгилайди;

таълим дастурларининг фанлараро ва синфлараро интеграциясидан келиб чиқиб, зарур ҳолларда, кириш имтиҳонларининг йўналишларига, саволлар миқдорига ўзгартириш киритиши мумкин;

ўқувчиларнинг ҳужжатлари ушбу Низом талаблари асосида тақдим этилганини кўриб чиқади;

кўриб чиқиш натижасида ўқувчининг ҳужжатларини қабул қилиш, таҳрирлашга юбориш ёхуд қабул қилишни рад этиш тўғрисида қарор қабул қилади;

ҳужжатлари қабул қилинган ўқувчиларнинг рўйхатини шакллантиради, уларни кириш имтиҳонлари шартларига мос равишда гуруҳларга тақсимлайди;

касбий (ижодий) имтиҳонлар учун ҳакамлар ҳайъати ва апелляция комиссияларига малакали мутахассисларни жалб этади ҳамда уларнинг таркибини тасдиқлайди;

ҳужжатлари таҳрирлашга юборилган ёки қабул қилиниши рад этилган ҳолларда таҳрирлашга юбориш ёки рад этилиш сабабларини аниқ кўрсатган ҳолда, ўқувчиларнинг шахсий кабинетига ёки телефон рақамига SMS шаклида хабар юборади;

кириш имтиҳонлари ўтказиладиган жойларни (биноларни) талаб даражасида тайёрлайди;

ўқувчиларни, уларнинг ота-онаси (қонуний вакили)ни кириш имтиҳонлари шартлари билан таништиради, кириш имтиҳонлари ўтказиладиган жойи ва вақти тўғрисида шахсий кабинет ёки боғланиш учун тақдим этилган телефон рақамига SMS шаклида хабар юбориш орқали огоҳлантиради;

тасдиқланган жадвал асосида спорт мактабларига ўқувчиларни кириш имтиҳонлари юзасидан мурожаат қилган шахсларга маслаҳат бериб боради;

ўқувчилар ва уларнинг ота-онаси (қонуний вакили) томонидан берилаётган саволларга жавоб тайёрлаш ва уларни веб-сайт, ижтимоий тармоқлар орқали кенг оммага тақдим этиш чораларини кўради.

кириш имтиҳонларини ташкил этади, натижаларини эълон қилади.

3-боб. Ҳужжатларни қабул қилиш

11. Ҳужжатларни қабул қилиш бошланишидан камида 10 кун олдин қабул комиссияси томонидан Агентликнинг расмий веб-сайти, ижтимоий тармоқлардаги саҳифаларида қабул қилиш тартиби, ҳужжатларни топшириш муддатлари ва қабул квоталари тўғрисида эълон қилинади.

12. Кириш имтиҳонлари қабул комиссияси томонидан белгиланган жой ва вақтда ўтказилади.

13. Умумий ўрта таълим ташкилотларининг тегишли синфида ўқишни тўлиқ тамомлаган ўқувчилари спорт мактабининг шундай синфида такроран ўқишни талаб қилиш ҳуқуқига эга эмас.

14. Спорт мактабларига ўқувчиларнинг қуйидаги ҳужжатлари онлайн шаклда Агентликнинг расмий веб-сайти орқали қабул қилинади:

кириш имтиҳонлари рухсатномасини шакллантириш жараёнида фойдаланиш учун ўқувчининг охирги 2 ой давомида тушган фотосурати;

ўқувчининг туғилганлик ҳақида гувоҳномаси (мавжуд бўлса, ID-картаси) ва унинг ота-онаси (қонуний вакили) фуқаролик паспорти (ID-картаси) маълумотлари, боғланиш учун телефон рақамлари;

086-У шаклдаги тиббий маълумотнома;

спорт разряди ёки унвонини тасдиқловчи ҳужжатнинг ҳамда спорт разряди ёки унвони тасдиқлангани тўғрисидаги буйруқдан кўчирма нусхалари;

Ўзбекистон чемпионати ва кубокларида қабул йили ва ундан олдинги бир йил давомида ғолиб ва совриндор бўлганини тасдиқловчи диплом.

Ушбу банднинг бешинчи ва олтинчи хатбошиларида кўрсатилган ҳужжатлар ўқувчи томонидан ҳужжат топшириш вақтида тақдим этилмаган ҳолларда инобатга олинмайди.

Қабул комиссияси томонидан қонунчилик ҳужжатларида белгиланган тартибда бошқа ҳужжатлар ҳам талаб этилиши мумкин.

Ҳужжат топшириш жараёнида ўқувчининг ота-онаси (қонуний вакили) кириш имтиҳонлари шартлари ва талаблари билан танишгани тўғрисидаги онлайн офертани тасдиқлайди.

15. Ҳужжатларни белгиланган муддатларда, тўғри ва сифатли тақдим этиш бўйича масъулият ўқувчининг ота-онаси (қонуний вакили) зиммасига юкланади.

16. Ҳужжатларни қабул қилиш, кириш имтиҳонлари юзасидан юборилган (шахсий кабинети ёки телефон рақамига SMS) хабарларни ўқувчи ёки унинг ота-онаси (қонуний вакили) томонидан қабул қилинмаслиги (ўқимаслиги, аризада кўрсатилган телефон рақамининг ишчи ҳолатда бўлмаслиги ва бошқалар) бўйича жавобгарлик қабул комиссияси зиммасига юкланмайди.

17. Ўқувчиларнинг ҳужжатлари қабул комиссияси томонидан (24 соат ичида) кўриб чиқилгандан сўнг уларга ҳужжатлар қабул қилингани, таҳрирлашга юборилгани ёки рад этилгани тўғрисида хабар юборилади.

18. Қуйидаги ҳолларда ҳужжатлар таҳрирлашга юборилади:

ушбу Низомнинг 14-бандида белгиланган ҳужжатлар тўлиқ бўлмаганда;

тақдим этилган ҳужжатларнинг, муҳрдаги ёзувларнинг нусхалари ўқиб бўлмайдиган даражада бўлса.

19. Ҳужжатлари таҳрирлашга юборилганда, ўқувчиларга кўрсатилган камчиликларни бартараф этиш учун ҳужжатлар қабул қилиш муддати тугагунга қадар рухсат берилади.

Ҳужжатларни қабул қилиш муддати тугагандан сўнг маълумотларни ўзгартиришга рухсат берилмайди.

20. Қуйидаги ҳолларда ўқувчиларнинг ҳужжатларини қабул қилиш рад этилади:

белгиланган муддатлардан кейин кириш имтиҳонида иштирок этиш хоҳиши билдирилганда;

тақдим этилган ҳужжатларнинг сохта эканлиги аниқланганда;

умумий ўрта таълим ташкилотининг тегишли синфида ўқишни тўлиқ тамомлаган ўқувчилар томонидан спорт мактабларининг шу синфида такроран ўқиш истаги билдирилганда.

21. Ўқувчиларнинг ота-онаси (қонуний вакили) ҳужжатларни қабул қилиш муддати тугагунга қадар тақдим этилган аризани қайтариб олиш ёки бекор қилиш ҳуқуқига эга.

4-боб. Кириш имтиҳонларини ташкил этиш ва ўтказиш тартиби

22. Кириш имтиҳонлари материаллари Агентлик ҳузуридаги Педагогик маҳорат ва халқаро баҳолаш илмий-амалий маркази томонидан тайёрланади.

23. Кириш имтиҳонларининг биринчи босқичида ўқувчиларнинг жисмоний тайёргарлик бўйича баҳолаш учун қабул комиссияси томонидан ҳамкор ташкилот билан биргаликда ҳар бир спорт мактаби учун 5 нафардан кам бўлмаган тоқ миқдорда ҳакамлар ҳайъати таркиби тасдиқланади.

24. Кириш имтиҳонлари спорт мактабларининг таълим тилида ўтказилади.

25. Кириш имтиҳонлари 1 — 11 синфлар учун қуйидаги тартибда ўтказилади:

биринчи босқич — касбий (ижодий) имтиҳонлар 2 та турда ўтказилади:

умумжисмоний тайёргарлик — 30 балл;

махсус жисмоний тайёргарлик — 70 балл;

касбий (ижодий) имтиҳонларни ўтказишда ўқувчиларга баҳолаш мезонларида белгиланганидан бошқа қўшимча имконият берилмайди.

иккинчи босқич — 5 — 11-синфлар учун психологик тест 15 та, интеллектуал қобилият даражасини аниқлаш бўйича 20 та тест, жами 35 та тест топшириғи берилади.

Ҳар бир тўғри белгиланган тест топшириғига 1 баллдан, жами 35 балл берилади.

26. Ўқувчиларга тест топшириқларини бажариши, жавоблар варақасига белгилаши учун 1 соат (60 дақиқа) вақт берилади.

27. Тест топшириқлари бўйича ўқувчиларнинг билдирган эътирозлари қабул комиссияси томонидан тест топшириғи жараёнида қабул қилинади ва тест натижалари ҳисобланишидан аввал кўриб чиқилади.

28. Ўқувчиларнинг кириш имтиҳонлари натижаларига кўра баллари тенг бўлиб қолган ҳолларда, қуйидагилар устунликка эга бўлади:

биринчи босқичда юқори балл тўплаган ўқувчилар;

иккинчи босқичда энг кўп топшириқ берилган фандан юқори балл тўплаган ўқувчилар.

Ўқувчилар барча тоифада босқичлар бўйича бир хил умумий ва тенг балл тўплаган ҳолларда, улар туғилган санаси бўйича сараланади, бунда ёшроқ ўқувчига устунлик берилади.

Агарда бу ҳолатда ҳам тенглик сақланиб қолса, қабул комиссияси томонидан ўқувчиларга қўшимча топшириқлар берилади.

29. Ўқувчилар имтиҳонга ўз шахсини тасдиқловчи ҳужжатнинг ҳамда 086-У шаклдаги тиббий маълумотноманинг асли ва имтиҳон рухсатномаси билан келиши лозим.

Кириш имтиҳони рухсатномаси имтиҳон бошланишидан камида 3 (уч) кун олдин ўқувчининг шахсий маълумотлари билан бирга имтиҳон ўтказиш жойи ва гуруҳи кўрсатилган ҳолда унинг шахсий кабинетига юборилади.

30. Кириш имтиҳонларига ҳужжат топширмаган, имтиҳонга кечиккан ёки келмаган ўқувчилар учун қўшимча кириш имтиҳони ўтказишга йўл қўйилмайди.

31. Қуйидаги ҳолатлар ўқувчиларни кириш имтиҳони жараёнларидан четлаштиришга асос бўлади:

кириш имтиҳонни жараёнида ички тартиб-қоидаларга риоя қилмаслик;

соғлиғи ёмонлашиши (тиббий хизмат ходими хулосаси асосида);

бошқалардан кўчиришга уриниш ва бошқа ўқувчиларга халақит бериш;

шпаргалка, барча турдаги мобил алоқа воситалари, калькулятор, луғат, китоблардан фойдаланиш.

Юқоридаги ҳолатлар содир этилганда, ўқувчиларга нисбатан тегишли далолатнома расмийлаштирилади ва улар жавоблар варақасини топширган ҳолда кириш имтиҳонини тарк этади. Четлаштирилган ўқувчиларнинг кириш имтиҳони натижалари инобатга олинмайди.

32. Кириш имтиҳонларининг бирон-бир босқичида иштирок этмаган ўқувчининг имтиҳонларнинг навбатдаги босқичида иштирок этишига йўл қўйилмайди.

33. Кириш имтиҳони жараёнида ўқувчиларнинг ўзларига боғлиқ бўлган ҳолда жараёндан четлаштирилиши ёки чиқиб кетиши қайта имтиҳон ўтказишга асос бўлмайди.

5-боб. Кириш имтиҳонлари натижаларини эълон қилиш

34. Кириш имтиҳонларининг якуний натижалари тест синовлари ўтказилган кундан кейин йигирма кун ичида Агентликнинг расмий веб-сайтида эълон қилинади.

35. Ўқувчилар кириш имтиҳонлари натижаларидан норози бўлган тақдирда, ҳар бир босқич натижаси эълон қилинган вақтдан бошлаб уч иш куни ичида апелляция комиссиясига ариза билан мурожаат этишга ҳақли.

36. Кириш имтиҳонлари натижаларидан норози бўлган ўқувчиларнинг мурожаатлари Агентликда тегишли мутахассислардан тузилган апелляция комиссияси томонидан кўриб чиқилади.

Апелляция комиссиясига Агентлик директори ўринбосари раислик қилади.

37. Апелляция комиссияси ўқувчиларнинг мурожаатини ўн кун муддатда кўриб чиқади ва аризани қаноатлантириш ёки рад қилиш тўғрисида мурожаатчига хулоса беради.

38. Апелляция комиссиясининг норозилик аризасини қаноатлантириш тўғрисидаги хулосаси ўқувчиларга аризани кўриб чиқиш натижалари бўйича балл қўшиб берилишига асос бўлади.

39. Апелляция комиссиясига бошқа ўқувчиларнинг ишларини кўриб чиқиш ва мурожаатчининг иши билан солиштиришга рухсат берилмайди.

40. Ўқувчилар ва уларнинг ота-онаси (қонуний вакили) берилган жавоблардан норози бўлган тақдирда, белгиланган тартибда юқори турувчи органларга ёки судга мурожаат этиш ҳуқуқига эга.

6-боб. Ўқувчиларни спорт мактабларига қабул қилиш

41. Кириш имтиҳонларининг умумлаштирилган натижасига кўра энг юқори балл тўплаган ўқувчилар белгиланган қабул квотаси доирасида баллар кетма-кетлигига қатъий амал қилган ҳолда спорт мактаби томонидан ташкил этилган чуқурлаштирилган тиббий кўрик натижасига мувофиқ (ўқувчи соғлом деб топилганда) спорт мактабининг ўқувчилар сафига қабул қилинади.

Чуқурлаштирилган тиббий кўрикда ўқувчиларнинг Ф-026-у шаклдаги мактаб тиббий анкетаси, Ф-063-у шаклдаги профилактик эмлаш картаси, Ф-086-У шаклдаги тиббий маълумотнома, қон, сийдик, гижжа тухуми таҳлили, ЭКГ, 14 ёшдан бошлаб флюорография, тураржойи болалар врачидан кечирган касалликлари тўғрисидаги маълумотнома, яккакураш турлари учун умуртқа поғонасининг кўкрак ва бел қисмларининг икки проекциядаги рентген расми ҳамда травматолог хулосаси талаб этилади.

Ўқувчига юқорида кўрсатилган таҳлиллар бўйича салбий тиббий хулоса берилган ҳолларда, ўқувчилар сафига қабул қилинмаслигига асос бўлади.

42. Агентлик томонидан тасдиқланган қайдномаларга асосан спорт мактаби директорининг буйруғи асосида ўқувчилар мактабга қабул қилинади.

43. Белгиланган квота доирасида кириш имтиҳонлари натижаларига кўра энг юқори балл тўплаган ўқувчилар ўқишга қабул қилинади.

Бунда спорт мактабига кириш имтиҳонларида иштирок этиш учун рўйхатдан ўтган:

Ўзбекистон Республикаси Мактабгача ва мактаб таълими вазирлиги тизимидаги мактабгача таълим ташкилотлари тарбияланувчилари ўртасида гимнастика бўйича ўтказилган спорт мусобақалари ғолиб ва совриндорлари;

Ўзбекистон Республикаси Спорт вазирлиги томонидан ўтказиладиган Ўзбекистон чемпионати ва кубокларида қабул йили ва ундан олдинги бир йил давомида ғолиб ва совриндорлари қабул квотаси доирасида кириш имтиҳонларисиз қабул қилинади.

44. Спорт разряди ёки унвонига эга спортчилар кириш имтиҳонларининг биринчи — умумжисмоний тайёргарлик босқичидан озод этилади. Ўқувчига мазкур босқич учун белгиланган 30 балл тўғридан-тўғри қўшиб берилади.

45. Спорт мактабларига қабул қилиниши белгиланган ўқувчи ўқишни давом эттирмаган ҳолатларда, унинг ўрнига ўқишга кира олмаганлар орасидан баллар кетма-кетлигига қатъий амал қилган ҳолда навбатдаги ўқувчи таклиф қилинади.

Навбатдаги ўқувчи баллар кетма-кетлиги бўйича ундан олдинги ўқувчининг ота-онаси (қонуний вакили) томонидан ўқишни мактабда давом эттириш истаги мавжуд эмаслигини тасдиқловчи ҳужжат олинганидан сўнг қабул қилинади.

Мазкур тартиб ўқув йилининг биринчи ярим йиллиги давомида амалга оширилади.

46. Белгиланган тартибда тегишли ҳужжатларнинг асл нусхаси тақдим этилмаслиги, ўқувчи ўқишни давом эттириш истагини билдирмаслиги, мактаб ходимлари мурожаатларига жавоб бермаслиги ундан кейинги ўқувчининг қабул қилиниши учун асос бўлади. Ушбу ҳолат бўйича спорт мактаби маъмурияти томонидан тегишли далолатнома расмийлаштирилади.

7-боб. Ўқувчилар бўш ўринларини тўлдириш

47. Спорт мактабларида ўқув йили якунлангандан кейин бўшаб қолган ўринлар учун кириш имтиҳонлари ушбу Низом талабларига мувофиқ Агентлик томонидан ўтказилади, мос равишда умумий ўрта таълим ташкилотларининг тегишли синфини тамомлаган ўқувчиларидан ҳужжат қабул қилинади.

48. Спорт мактабларига иқтидорли ўқувчиларни саралаш ва ўқувчилар захирасини шакллантириш мақсадида мусобақалар ўтказиб борилади.

Тегишли спорт турлари бўйича Қорақалпоғистон Республикаси, вилоятлар ва Тошкент шаҳар биринчилиги ғолиб ва совриндорлари ўртасида ўтказилган спорт мусобақаси (спорт клублари вакиллари ҳам таклиф этилиши мумкин) ғолиблари орасидан баллар кетма-кетлигига қатъий амал қилган ҳолда бўш ўқувчи-спортчилар ўрни тўлдирилади.

Мазкур тартиб спорт мусобақаси ўтказилган ўқув йили якунига қадар амал қилади.

Спорт мусобақасини ташкил этиш тартиби Ўзбекистон Республикаси Мактабгача ва мактаб таълими вазирлиги томонидан белгиланади.

49. Белгиланган мезонлар бўйича ўқувчи-спортчилар сафидан чиқарилган ўқувчи-спортчилар ўрни спорт турлари бўйича тасдиқланган ўқувчи-спортчилар контингентидан чиқмаган ҳолда, ўқув йили давомида спорт мактаблари томонидан Агентлик билан келишилган ҳолда тўлдирилади.

50. Ўқувчи-спортчиларнинг ўқиши бир спорт мактабидан бошқасига йўналиш мос келган ва бўш жой бўлган тақдирда, Агентликнинг кўрсатмасига мувофиқ кўчирилади.

51. Бўш ўринларни тўлдиришда спорт мактабларининг ихтисослик йўналиши бўйича Ўзбекистон чемпионати ва кубоги ғолиб ҳамда совриндорларига устунлик берилади.

52. Спорт ва бадиий гимнастикаси турлари бўйича қуйидаги ёш ҳамда разрядларга эга бўлган ўқувчилар ўқув йили чораги якуни бўйича мавжуд бўш ўринларга ушбу низом билан белгиланган махсус жисмоний имтиҳон мезонлари асосида ҳакамлар ҳайъати тавсиясига асосан қабул қилиниши мумкин:

Спорт гимнастикаси тури бўйича:

биринчи, иккинчи, учинчи ўсмирлар спорт разрядига эга 10 ёшгача бўлган қиз ва ўғил болалар;

учинчи спорт разрядига эга 7 ёшдан юқори қизлар, 10 ёшгача бўлган ўғил болалар;

иккинчи спорт разрядига эга бўлган 8 ёшдан юқори қизлар, 11 ёшгача бўлган ўғил болалар;

биринчи спорт разрядига эга бўлган 9 ёшдан юқори қизлар, 11 ёшдан юқори ўғил болалар;

Ўзбекистон спорт усталигига номзод гувоҳномасига эга 13 ёшдан юқори қизлар, 14 ёшдан юқори бўлган ўғил болалар.

Бадиий гимнастика тури бўйича:

биринчи, иккинчи, учинчи ўсмирлар спорт разрядига эга бўлган 7 ёшли қиз болалар;

учинчи спорт разрядига эга бўлган 8 ёшдан юқори қиз болалар;

иккинчи спорт разрядига эга бўлган 9 ёшдан юқори қиз болалар;

биринчи спорт разрядига эга бўлган 10 ёшдан юқори қиз болалар.

8-боб. Ўқувчиларни синфдан-синфга ўтказиш ва ўқувчилар сафидан четлаштириш

53. Ўқувчи-спортчилар Агентлик томонидан тасдиқланган ўқув режадаги фанлардан йиллик баҳоларни (якуний давлат аттестациясини) энг камида сумматив баллар йиғиндиси 46 дан юқори (3 баҳо) бўлганидан сўнг спорт мактаби директорининг буйруғи билан кейинги синфга ўтказилади.

54. Ўқувчи-спортчилар қуйидаги ҳолларда спорт мактабининг ўқувчи-спортчилар сафидан чиқарилади:

ўқувчи-спортчиларнинг чораклик баҳоларида икки ва ундан ортиқ фандан сумматив баллар йиғиндиси 46 дан паст бўлган ҳолларда;

ўз хоҳишига кўра (ота-онасининг ёки уларнинг ўрнини босувчи шахсларнинг ёзма аризаси асосида);

аттестация комиссиясининг қарорига кўра;

тиббий номувофиқлик бўлганда — шифокор хулосасига кўра;

ўқув интизоми ва ички тартиб-қоидаларни бузганда, тегишли норматив талабларни топширмаганда, спорт натижаси пасайганда, шу жумладан спорт одоби, спорт тайёргарлиги режими бузилган, тақиқланган фармокологик, алкоголли ва гиёҳванд воситалар қўлланган тақдирда;

кириш имтиҳонларини топшириш жараёнида ўқувчи-спортчи томонидан тақдим этилган (топширилган) ҳужжатларнинг қалбакилиги аниқланганда.

55. Фанларни ўзлаштириш даражаси 46 баллдан кам бўлган ўқувчи-спортчилар ва уларнинг ота-оналари ёзма равишда огоҳлантирилади, ўқув йилининг биринчи ярми ва якуни бўйича мониторинг натижаларида ҳам мазкур ҳолатлар қайд этилган тақдирда, ушбу ўқувчи-спортчилар спорт мактаби педагогик кенгашининг қарорига асосан аввал ўқиган мактабига тегишли синфга қайтариб юборилади (ўқувчи-спортчининг яшаш жойи ўзгарган тақдирда, ҳудуддаги бошқа мактабга).

Бунда ўқувчи-спортчининг ота-онаси (ота-онасининг ёки уларнинг ўрнини босувчи шахслар) томонидан ихтиёрий равишда ўқишни бошқа мактабга кўчирилмаган тақдирда, ўқувчи-спортчи педагогик кенгаш қарори асосида Болалар масалалари бўйича туман (шаҳар) комиссиялари билан келишилган ҳолда аввал ўқиган мактабига тегишли синфга қайтариб юборилади (ўқувчи-спортчининг яшаш жойи ўзгарган тақдирда, ҳудуддаги бошқа мактабга).

Ўзлаштириш кўрсаткичи инобатга олинадиган фанлар рўйхати ҳар ўқув йили бошланишидан аввал спорт мактабининг педагогик кенгаши қарори билан тасдиқланади ҳамда ўқувчи-спортчилар ва уларнинг ота-оналари (қонуний вакили) таништирилади.

56. Ўқувчи-спортчиларда даволаш-профилактика муассасаларида стационар шароитда узоқ муддат даволанишга муҳтожлик юзага келган тақдирда, улар спорт мактабининг педагогик кенгаши қарори асосида ўқувчи-спортчилар сафидан чиқарилади ҳамда аввал ўқиган мактабига тегишли синфга қайтариб юборилади (ўқувчи-спортчининг яшаш жойи ўзгарган тақдирда, ҳудуддаги бошқа мактабга).

Даволаш-профилактика муассасаларида стационар шароитда узоқ муддат даволанишга муҳтож болаларга белгиланган тартибда аввал ўқиган ёки яшаш жойи ўзгарган ҳудуддаги мактаб томонидан умумий ўрта таълим берилади.

9-боб. Спорт мактабларида таҳсил олувчи ўқувчи-спортчиларни аттестациядан ўтказиш

57. Спорт мактаблари ўқувчи-спортчиларини ўқув йили давомида икки марта (қишки ва ёзги) аттестациядан ўтказиш орқали холисона баҳо бериш ва уларни синфдан-синфга ўтказиш ҳамда ўтказилган аттестация натижасида қайд этилган талабларга жавоб бермаган ўқувчи-спортчилар спорт мактаби директорининг буйруғи асосида тузилган аттестация комиссияси қарорига кўра ўқишдан четлаштирилади.

58. Аттестация спорт мактаблари ўқувчисининг ўқув йили давомидаги спорт тайёргарлиги даражасининг ўсиб боришини таҳлил қилиш, Ўзбекистон Республикаси Спорт вазирлигининг спорт ва оммавий жисмоний тарбия тадбирлари календарь-режасига мувофиқ ўтказиладиган спорт мусобақаларида эришган натижалари, ўқув режасида белгиланган фанларни ўзлаштириши, ўқувчи-спортчилар тураржойида тартиб-интизом талабларига риоя этиши, жамоатчилик ишларида қатнашганини аниқлаш мақсадида ўтказилади.

59. Аттестация комиссияси аъзолари сони 7 нафардан кам бўлмаган тоқ миқдорда ташкил этилади.

Бунда спорт мактаби директори — комиссия раиси, директорнинг спорт ишлари бўйича ўринбосари — комиссия раиси ўринбосари ҳисобланади.

Зарур ҳолларда аттестация комиссияси таркибига бошқа ташкилотлар ҳамда спорт турлари бўйича федерация (уюшма)лар мутахассислари жалб қилиниши мумкин.

60. Спорт турлари бўйича тренерлар аттестация бошланишидан камида ўн кун олдин аттестациядан ўтувчиларнинг аттестацияга оид маълумотлари ва ҳужжатларини тўплайди ҳамда аттестация комиссиясига тақдим этади.

61. Аттестация комиссияси томонидан аттестациядан ўтувчи ўқувчи-спортчиларнинг қуйидаги ҳужжатлари кўриб чиқилади:

йил (ўқув йили) давомида эришган натижалари;

йил бошидаги ва аттестация ўтказилаётган вақтдаги спорт разряди ёки унвони;

йил давомида қатнашган мусобақалари сони ва кўрсатган натижалари таҳлили;

терма жамоага алоқадорлик даражаси;

кўрсатган энг яхши натижаси;

тренерлар жамоасининг тавсияси;

йил (ўқув йили) давомида ўқув фанларини ўзлаштириши;

йил (ўқув йили) давомида ўқувчи-спортчилар тураржойида ички тартиб-қоидаларга риоя этиши;

соғлиғи тўғрисида шифокор хулосаси.

62. Аттестациядан ўтувчи ўқувчи-спортчиларнинг аттестация варақаси ҳужжатлари бўлим инструктор-методисти ҳамда бош тренерлар томонидан аттестация комиссиясига тақдим этилади.

Аттестация комиссияси ҳужжатларни таҳлил қилиб, аттестациядан ўтувчининг спорт, маънавий-маърифий ва ўқиш жараёнидаги фаолиятини таҳлил қилиш ҳамда баҳолаш асосида маълумотнома-аттестация варақасини тайёрлайди.

63. Аттестация варақаси спорт тури бўйича бош тренер, ўқувчининг шахсий тренери, бўлим инструктор-методисти, бўлим тарбиячиси, синф раҳбари ва шифокор томонидан имзоланади.

64. Аттестация натижалари бўйича аттестация комиссиянинг қарори комиссия аъзолари томонидан очиқ овоз бериш йўли билан қабул қилинади. Овозлар тенг бўлиб қолган тақдирда, аттестация комиссияси раисининг овози ҳал қилувчи ҳисобланади.

65. Аттестация комиссияси қарори аттестация варағига ёзилади ва аттестациядан ўтувчига тўғридан-тўғри аттестациядан сўнг эълон қилинади.

66. Аттестация ўтказиш меъёрлари ва баҳолаш мезонларига кўра ижобий натижа бўлса, «лойиқ» қарори қабул қилинади, салбий натижада эса «нолойиқ» хулосаси берилади.

Ўқувчи-спортчиларни босқичли назорат ҳамда аттестациядан ўтказиш меъёрлари ва баҳолаш мезонлари Агентлик томонидан белгиланади.

Аттестация ўтказиладиган ўқиш даврида ўқув фанларидан бирини ўзлаштира олмаган ўқувчи-спортчига нисбатан комиссия «нолойиқ» деб хулоса бериши лозим.

67. Аттестация комиссияси қарори баённомалар билан расмийлаштирилади ва улар асосида тегишли буйруқлар чиқарилиб, ўқувчига ва унинг ота-онасига (қонуний вакилига) маълум қилинади.

68. Аттестациядан ўтувчи аттестацияга узрли сабаб (бетоблиги туфайли ёки яқин қариндоши вафот этган ҳолларда) билан келмаган тақдирда, аттестациядан ўтказиш бошқа муддатга кўчирилади.

69. Аттестациядан ўтувчи аттестацияга узрли сабабларсиз келмаган тақдирда, аттестациядан ўтмаган ҳисобланади ҳамда ўқувчи-спортчилар сафидан четлаштирилади.

10-боб. Якунловчи қоидалар

70. Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.

71. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ихтисослаштирилган спорт мактабларига ўқувчиларни саралаб олиш, қабул қилиш ҳамда четлаштириш тартиби тўғрисида низомга ИЛОВА

Спорт мактабларига ўқувчиларни саралаб олиш ва қабул қилиш

Босқичлар Субъектлар Тадбирлар Бажариш муддатлари 1-босқич Агентлик 1. Ўқувчиларнинг ҳужжатларини қабул қилиш учун қабул комиссияси тузилади. Таркиб Агентлик директори буйруғи билан тасдиқланади. Ҳужжатларни қабул қилиш бошланишидан олдин Қабул комиссияси 2. Кириш имтиҳонларини ўтказиш жадваллари тасдиқланади, Агентликнинг расмий веб-сайти, ижтимоий тармоқлардаги саҳифаларида ҳамда оммавий ахборот воситаларида эълон қилинади. Ҳужжатларни қабул қилиш бошланишидан 10 кун олдин 3. Ўқувчилар томонидан онлайн шаклда тақдим этилган ҳужжатлар кўриб чиқилади. Кўриб чиқиш жараёнида қабул қилинади ёки таҳрирга юборилади ёки рад этилади. 20 кундан кам бўлмаган муддатда 4. Спорт мактабларига ўқувчиларнинг кириш имтиҳонлари юзасидан мурожаат қилган шахсларга маслаҳат бериб борилади. Ҳужжатларни қабул қилиш даврида 2-босқич Қабул комиссияси 1. Кириш имтиҳонларини ўтказиш жойлари тайёрланади. 2. Кириш имтиҳонлари материаллари тайёрланади. Кириш имтиҳонлари бошланишидан олдин 3-босқич Қабул комиссияси маҳаллий ташкилот билан биргаликда 1. Кириш имтиҳони биринчи босқичининг умумжисмоний тайёргарлик тури ўтказилади. 2. Кириш имтиҳони биринчи босқичининг техник-тактик (умумкасбий) тайёргарлик тури ўтказилади. Тасдиқланган жадвал асосида 4-босқич Қабул комиссияси маҳаллий ташкилот билан биргаликда 1. Кириш имтиҳонининг иккинчи (тест) босқичи ўтказилади. Тасдиқланган жадвал асосида 2. Кириш имтиҳонларининг якуний натижалари Агентликнинг расмий веб-сайтида эълон қилинади. Тест синовларидан кейин 20 кун ичида 5-босқич Апелляция комиссияси 1. Кириш имтиҳонлари натижаларидан норози бўлган ўқувчиларнинг аризалари қабул қилинади. Ҳар бир босқич имтиҳон натижалари эълон қилингандан сўнг 3 кун ичида 2. Ўқувчиларнинг мурожаатлари кўриб чиқилади, аризани қаноатлантириш ёки рад қилиш тўғрисида мурожаатчига хулоса берилади. Ариза топширилган кундан бошлаб 10 кун ичида 6-босқич Қабул комиссияси Имтиҳон натижаларига ҳамда чуқурлаштирилган тиббий кўрик хулосасига асосан ўқувчиларни мактабга ўқишга қабул қилиш ҳақида спорт мактаби директорининг ўқишга қабул қилиш ҳақидаги буйруғи чиқарилади. Янги ўқув йили бошлангунга қадар 7-босқич Қабул комиссияси Синфларнинг ҳар биридаги ўқувчилар сони 24 нафардан камайган ҳолларда, мавжуд бўш ўринлар танлов асосида тўлдирилади. Бўш ўринларни тўлдиришда Ўзбекистон чемпионати, кубоги ҳамда Республика турнирлари ғолиб ва совриндорларига устунлик берилади. Ўқув йили якунлангандан сўнг

Ўзбекистон Республикасининг Бош вазири А. АРИПОВ

Тошкент ш.,

2025 йил 20 август,

524-сон

(Қонунчилик маълумотлари миллий базаси, 21.08.2025 й., 09/25/524/0759-сон; 19.12.2025 й., 09/25/797/1181-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

NIZOM

SXEMASI

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ixtisoslashtirilgan sport maktablari faoliyatini takomillashtirish toʻgʻrisida

Oʻzbekiston Respublikasi Prezidentining “Toshkent shahrida boks va gimnastikaga ixtisoslashtirilgan sport maktablari faoliyatini tashkil etish boʻyicha qoʻshimcha chora-tadbirlar toʻgʻrisida” 2024-yil 22-iyundagi PF-94-son Farmoni ijrosini taʼminlash, shuningdek, yoshlarning sportga qiziqishini yanada ragʻbatlantirish, yuqori natijalarga erishgan sportchilarning tajribasini yoshlar oʻrtasida ommalashtirish hamda ularni ilgʻor taʼlim usullari asosida oʻqitish va tayyorlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Toshkent shahrida boks va gimnastikaga ixtisoslashtirilgan sport maktablari faoliyatini tashkil etish boʻyicha qoʻshimcha chora-tadbirlar toʻgʻrisida” 2024-yil 22-iyundagi PF-94-son Farmoniga muvofiq boks boʻyicha Bahodir Jalolov hamda gimnastika boʻyicha Oksana Chusovitina sport mahorati maktablari Sport vazirligi tizimidan Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi (keyingi oʻrinlarda — Agentlik) tizimiga oʻtkazilgani;

Boks boʻyicha Bahodir Jalolov sport mahorati maktabi — Bahodir Jalolov nomidagi boksga ixtisoslashtirilgan sport maktabi, Gimnastika boʻyicha Oksana Chusovitina sport mahorati maktabi — Oksana Chusovitina nomidagi gimnastikaga ixtisoslashtirilgan sport maktabi (keyingi oʻrinlarda — sport maktablari) etib qayta nomlangani maʼlumot uchun qabul qilinsin.

2. Quyidagilar:

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ixtisoslashtirilgan sport maktablari toʻgʻrisidagi nizom 1-ilovaga muvofiq;

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ixtisoslashtirilgan sport maktablariga oʻquvchilarni saralab olish, qabul qilish hamda chetlashtirish tartibi toʻgʻrisidagi nizom 2-ilovaga muvofiq tasdiqlansin.

3. Belgilansinki:

a) Agentlik tizimidagi sport maktablari bitiruvchilariga tegishli sport turlari boʻyicha kasbiy taʼlim toʻgʻrisidagi diplom hamda trenerlik faoliyati bilan shugʻullanish uchun malaka sertifikati beriladi;

b) oʻquvchilar Davlat budjeti mablagʻlari hisobidan bepul oziq-ovqat va bino quvvati doirasida yashash joyi bilan taʼminlanadi;

v) 2025-yil 1-sentabrdan boshlab:

maʼmuriy-boshqaruv, pedagogik, oʻquv-yordamchi, texnik va xizmat koʻrsatuvchi xodimlar ish haqi fondining 50 foizidan koʻp boʻlmagan miqdorda ragʻbatlantirish jamgʻarmasi tashkil etiladi. Bunda direktor, direktor oʻrinbosarlari, trenerlar, tibbiyot xodimlari, yoʻriqchi-uslubchilar, sport psixologlariga olimpiya va paralimpiya sport turlariga tayyorlash markazlari uchun belgilangan moddiy ragʻbatlantirish shartlari qoʻllanilganda, mazkur ragʻbatlantirish jamgʻarmasi orqali toʻlovlar tatbiq etilmaydi;

Agentlik tizimidagi umumtaʼlim muassasalarida faoliyat yuritayotgan tarbiyachilarning mehnatiga haq toʻlashda ularning mutaxassislik fani boʻyicha malaka toifasi hamda milliy yoki xalqaro sertifikatlari uchun qonunchilik hujjatlarida belgilangan shartlar tatbiq etiladi;

g) sport maktablariga fan yoʻnalishi boʻyicha kamida bakalavr darajasidagi oliy pedagogik maʼlumot va kamida ikkinchi malaka toifasiga ega oʻqituvchilar tanlov asosida jalb etiladi. Bunda kimyo, biologiya va fizika fanlaridan dars beradigan pedagog kadrlarning malaka toifalari umumlashgan tabiiy fanga ham tatbiq etiladi.

4. Maktabgacha va maktab taʼlimi vazirligi hamda Iqtisodiyot va moliya vazirligining 2025-yil 31-dekabrga qadar:

sport maktablari oʻquvchilarining sport musobaqalarida xavfsiz ishtirokini taʼminlash maqsadida sport maktablariga Maktabgacha va maktab taʼlimi vazirligining Taʼlim sohasidagi islohotlarga koʻmaklashish jamgʻarmasi hisobidan kamida 50 oʻrinli 1 tadan avtobus xarid qilish;

sport maktablariga Davlat budjeti mablagʻlari hisobidan 1 tadan navbatchi avtotransport vositasini xarid qilish toʻgʻrisidagi takliflari maʼqullansin.

Bunda sport maktablarining avtotransport vositalarini saqlash xarajatlari uchun 2026-yildan boshlab Davlat budjeti parametrlarida tegishli mablagʻlar nazarda tutilsin.

5. Iqtisodiyot va moliya vazirligi oʻquvchi-sportchi va trenerlarning tadbirlarga, mahalliy va xalqaro musobaqalarga tayyorgarligi hamda ishtiroki bilan bogʻliq barcha xarajatlarni har yili Sport va ommaviy jismoniy tarbiya tadbirlarining kalendar-rejasida nazarda tutib borsin hamda Sport vazirligiga ajratiladigan mablagʻlarni kamaytirish hisobidan tegishli oʻzgartirishlar asosida ushbu sport maktablari hisobvaragʻiga oʻtkazib bersin.

6. Maktabgacha va maktab taʼlimi vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

7. Ushbu qarorning bajarilishini nazorat qilish Oʻzbekiston Respublikasi maktabgacha va maktab taʼlimi vaziri E.G. Karimova zimmasiga yuklansin.

Vazirlar Mahkamasining 2025-yil 20-avgustdagi 524-son qaroriga 1-ILOVA

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ixtisoslashtirilgan sport maktablari toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi (keyingi oʻrinlarda — Agentlik) tizimidagi ixtisoslashtirilgan sport maktablarining (keyingi oʻrinlarda — sport maktablari) maqomi, asosiy vazifalari, huquq va majburiyatlari, shuningdek, faoliyatini tashkil etish tartibini belgilaydi.

2. Sport maktablari oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga, shuningdek, oʻz ustaviga hamda boshqa qonunchilik hujjatlariga amal qiladi.

3. Agentlik sport maktablari faoliyatiga umumiy rahbarlik qiladi va ularning nazoratini amalga oshiradi.

Sport maktablari Agentlik tomonidan lavozimga tayinlanadigan hamda lavozimidan ozod etiladigan direktor tomonidan boshqariladi.

4. Sport maktablari sport turlariga qiziqadigan iqtidorli oʻquvchi-sportchilarni saralab olish orqali 5 — 11-sinflar kesimida ularning intellektual qobiliyati va sport tayyorgarligini rivojlantirishga ixtisoslashgan davlat umumiy oʻrta taʼlim muassasasi hisoblanadi.

5. Sport maktablari Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga, blankalarga, mustaqil balansga, Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasi boʻlinmalarida shaxsiy gʻazna hisobvaraqlariga, bank hisobvaraqlariga, shu jumladan, xorijiy valyutadagi shaxsiy gʻazna hisobvaraqlariga ega boʻladi.

6. Sport maktablari belgilangan tartibda oʻz nomidan mulkiy va shaxsiy nomulkiy huquqlarni olishi va amalga oshirishi, shuningdek, zimmasiga majburiyatlar olishi, sudda daʼvogar va javobgar boʻlishi mumkin.

7. Sport maktablarida umumiy oʻrta taʼlim olish bepul amalga oshiriladi.

Sport maktablari xususiyatidan kelib chiqib, kunduzgi taʼlim shaklida faoliyat yuritadi.

2-bob. Sport maktablarining maqsadi va asosiy vazifalari

8. Davlat taʼlim standartlari hamda maqbullashtirilgan oʻquv reja va taʼlim dasturlariga muvofiq sport turlariga iqtidori boʻlgan oʻquvchi-sportchilarning taʼlim-tarbiya olishdagi konstitutsiyaviy huquqini roʻyobga chiqarish sport maktablarining maqsadi hisoblanadi.

Sport maktablarida taʼlim-tarbiya jarayonini tashkil etishning eng yangi usullarini qoʻllagan holda xalqaro sport maydonlarida mamlakat sharafini munosib himoya qilishga qodir boʻlgan Oʻzbekiston terma jamoalari uchun sport zaxirasi va yuqori mahoratli sportchilar tayyorlanadi.

9. Sport maktablarining asosiy vazifalari quyidagilardan iborat:

sport turlari boʻyicha iqtidorli yoshlarni aniqlash, saralash va ularni har tomonlama rivojlantirish tizimini yaratish;

oʻquvchi-sportchilarni vatanparvarlik va fidoyilik ruhida tarbiyalash, ularda oʻz Vatani bilan faxrlanish va milliy madaniy-tarixiy anʼanalarni hurmat qilish tuygʻusini shakllantirish;

davlat taʼlim standartlariga muvofiq sport turlariga, shuningdek, Oʻzbekiston tarixi, xorijiy tillar, umumlashgan tabiiy fan va sport psixologiyasini chuqurlashtirib oʻqitishga moʻljallangan oʻquv reja va dasturlar ishlab chiqish;

oʻquvchi-sportchilar uchun oʻquv-mashgʻulot hamda oʻquv-mashq jarayonlarini xalqaro standartlar darajasida tashkil etish, shuningdek, ilgʻor tajribalar asosida nazariy va texnik-taktik jihatdan tayyorlash sifatini muntazam oshirib borish;

oʻquvchi-sportchilarning nazariy bilimini amaliyotda qoʻllash imkoniyatini kengaytirish uchun taʼlim-tarbiya jarayonida zamonaviy pedagogik hamda axborot-kommunikatsiya texnologiyalarini joriy etish;

oʻquvchi-sportchilarning fiziologik va antropometrik koʻrsatkichlari asosida ular bilan individual ishlash hamda mobil laboratoriya yordamida ularning natijalarini muntazam ravishda monitoring qilib borish;

oʻquvchi-sportchilarning professional fazilatlarini rivojlantirish orqali xalqaro talablarga muvofiq yuqori mahoratli sportchilarni tayyorlash;

yuqori malakali chet ellik va mahalliy mutaxassis-trenerlar hamda psixologlarni jalb etish orqali sport turlari boʻyicha trenerlar tarkibini mustahkamlash;

zarur sport anjomlari va uskunalari bilan jihozlangan, zamonaviy xalqaro talablar va standartlarga javob beradigan moddiy-texnik hamda oʻquv-mashgʻulot bazalarini yaratish.

3-bob. Sport maktablarining huquqlari va majburiyatlari

10. Sport maktablari oʻziga yuklangan vazifalarni bajarishda quyidagi huquqlarga ega:

oʻziga yuklangan vazifalarni, funksiyalarni bajarish bilan bogʻliq qarorlar, buyruqlar, koʻrsatmalar qabul qilish, zarur boʻlganda, boshqa davlat tashkilotlari bilan birgalikda tegishli qarorlar qabul qilish;

faoliyatga doir masalalar boʻyicha belgilangan tartibda sudlarga arizalar va daʼvolar kiritish;

qonunchilik hujjatlarida belgilangan tartibda budjetdan tashqari jamgʻarmalarga ega boʻlish;

oʻz ustavida belgilangan faoliyatni amalga oshirish uchun qonunchilik hujjatlarida taqiqlanmagan moliyaviy manbalarni jalb qilish;

belgilangan tartibda shartnomalar tuzish;

huzurida Oʻzbekiston “Yoshlik” jismoniy tarbiya va sport jamiyati hamda Oʻzbekiston talabalar sport assotsiatsiyasining filiali hisoblanmaydigan yuridik shaxs maqomiga ega boʻlgan sport klublari tashkil etish;

Agentlik bilan birgalikda yuqori malakali chet ellik mutaxassislar va boshqa xodimlarni sport maktablariga jalb etish;

Agentlikning tegishli tarkibiy boʻlinmalari bilan oʻziga yuklangan vazifalarni oʻz vaqtida, samarali va sifatli bajarish uchun belgilangan tartibda oʻzaro hamkorlik qilish.

Sport maktablari qonunchilik hujjatlariga muvofiq boshqa huquqlarga ham ega boʻlishi mumkin.

11. Quyidagilar sport maktablarining majburiyatlari hisoblanadi:

oʻziga yuklangan vazifa va funksiyalarni samarali bajarish;

faoliyatini rivojlantirish boʻyicha tasdiqlangan dasturlar, chora-tadbirlar rejasi, “yoʻl xaritalari” va boshqa dasturiy hujjatlar ijrosini taʼminlash;

oʻziga biriktirilgan mulklar, shu jumladan, koʻchmas mulklardan maqsadli va samarali foydalanish;

taʼlim-tarbiya jarayonlarini Agentlik tomonidan tasdiqlanadigan oʻquv rejalari va taʼlim dasturlari asosida sifatli amalga oshirish;

rahbar va pedagog xodimlarni ochiq tanlov asosida ishga qabul qilish;

rahbar, pedagog va xodimlarning huquqlari hamda qonuniy manfaatlarini himoya qilish;

10-11-sinf oʻquvchi-sportchilarini kasbga yoʻnaltirish boʻyicha amaliy darslar tashkil etish.

Sport maktablari oʻz zimmasiga qonunchilik hujjatlariga muvofiq boshqa majburiyatlarni ham olishi mumkin.

12. Sport maktablari davlat aktivlarini, shu jumladan, ularning tovar-moddiy boyliklari va boshqa mol-mulklarining but saqlanishi boʻyicha moddiy javobgar hisoblanadi.

4-bob. Sport maktablarida oʻquv-tarbiya jarayonini tashkil etish

13. Sport maktablarida sport turlari boʻyicha 5 — 11-sinflarda taʼlim beriladi.

Bunda gimnastikaga ixtisoslashtirilgan sport maktabiga talab va takliflardan kelib chiqib, 7 — 11 yoshdagi oʻquvchi-sportchilarni 1 — 4-sinflarga oʻqishga qabul qilishga ruxsat etiladi.

Taʼlim jarayoni har birida oʻquvchi-sportchilar soni 12 nafardan kam, biroq 24 nafardan ortiq boʻlmagan sinflarda tashkil etiladi.

14. Sport maktablarida oʻquvchi-sportchilar oʻquv yili davomida ikki marotaba (har ikki chorakda bir marta) attestatsiyadan oʻtkaziladi.

Oʻtkazilgan attestatsiya natijasiga muvofiq oʻquvchi-sportchi oʻqishni davom ettirishi (sinfdan-sinfga oʻtkazish) yoki uni oʻqishdan chetlashtirish toʻgʻrisida sport maktabi direktorining buyrugʻi qabul qilinadi.

Oʻquvchi-sportchilarni bosqichli nazorat hamda attestatsiyadan oʻtkazish meʼyorlari va baholash mezonlari Agentlik tomonidan belgilanadi. Bunda oʻquvchi-sportchilarning fanlarni oʻzlashtirishi, tegishli sport meʼyorlarini topshirganligi, sport natijalari va tibbiy muvofiqlik holati, ichki tartib-qoidalarga amal qilishi, oʻquvchilar turarjoyida tartib-intizom talablariga rioya etishi, jamoatchilik ishlarida qatnashganligi nazarda tutiladi.

15. Taʼlim-tarbiya jarayonini tashkil etishda quyidagi muddatlarga amal qilinadi:

oʻquv yilining davomiyligi sport mashgʻulotlari bilan birgalikda — 42 hafta;

oʻquv haftasining davomiyligi — 5 kun (sport mashgʻulotlari bundan mustasno);

dars mashgʻulotlari davomiyligi — 45 daqiqa;

dars mashgʻulotlari oraligʻidagi tanaffuslar davomiyligi — 5 — 10 daqiqa (oʻquv kuni oʻrtasidagi tanaffusning davomiyligi 15 — 60 daqiqa).

16. Oʻquvchi-sportchilarning sport mahorati darajasini oshirish maqsadida jami 60 kun davom etadigan, shu jumladan, qishki taʼtil vaqtida (15 kun), yozgi taʼtil vaqtida (45 kun) oʻquv-mashq yigʻinlarini oʻtkazgan holda ularning faol dam olishlari tashkil etiladi.

Oʻquvchi-sportchilarning musobaqalar jarayonida qoldirilgan dars mashgʻulotlari alohida jadval asosida pedagogik soatga ajratilgan vaqt hisobidan oʻqitiladi.

17. Bir sinfda oʻquvchi-sportchilar soni 20 nafar va undan kam boʻlgan hollarda xorijiy tillarni ikki guruhga boʻlib oʻqitishga yoʻl qoʻyilmaydi.

18. Sport maktablarining 9-sinf bitiruvchilariga davlat namunasidagi shahodatnoma, 11-sinf bitiruvchilariga tegishli sport turlari boʻyicha kasbiy taʼlim toʻgʻrisidagi diplom hamda trenerlik faoliyati bilan shugʻullanish uchun malaka sertifikati beriladi.

19. Sport mashgʻulotlarining davomiyligi va oʻquvchi-sportchilarning sport yuklamasi tasdiqlangan oʻquv rejasiga muvofiq belgilanadi.

20. Sport mashgʻulotlarining oʻquv dasturlari oʻquv rejasiga muvofiq ishlab chiqiladi va uning tarkibiga oʻquv-mashq mashgʻuloti, nazariy tayyorgarlik, umumiy jismoniy tayyorgarlik, maxsus jismoniy tayyorgarlik, texnik-taktik tayyorgarlik, psixologik tayyorgarlik, koʻchirish (oʻtkazish) nazorat sinovlari, nazorat musobaqalarida ishtiroki, yoʻriqchilik va hakamlik amaliyoti, musobaqalarda ishtirok etish, tiklanish tadbirlari hamda tibbiy nazorat kabi shakllarni oʻz ichiga oladi.

21. Oʻquvchi-sportchilarga tibbiy xizmat sport maktablarining tibbiyot xodimlari tomonidan koʻrsatiladi.

Tibbiyot xodimlari sport maktablari rahbariyati va pedagog xodimlar bilan bir qatorda davolash-profilaktika tadbirlarini tashkil etish, oʻquv va oʻquvchilar turarjoyida sanitariya normalari, qoidalari va gigiyena normativlariga rioya qilish, ovqatlanish rejimi va sifati, oʻquvchi-sportchilarni tibbiy koʻrikdan oʻtkazish va sogʻlomlashtirish uchun masʼul hisoblanadi.

Sport maktablari tomonidan tibbiyot xodimlarining faoliyat olib borishi uchun zarur shart-sharoitlar yaratib beriladi.

22. Oʻquvchi-sportchilar Oʻzbekiston Respublikasi Maktabgacha va maktab taʼlimi vazirligi (keyingi oʻrinlarda — Vazirlik) hamda Sogʻliqni saqlash vazirligi tomonidan tasdiqlangan tartibga muvofiq har yili ikki marotaba (sentabr — aprel) chuqurlashtirilgan tibbiy koʻrikdan oʻtkaziladi.

5-bob. Sport maktablari xodimlarining mehnatiga haq toʻlash

23. Sport maktabi direktori, direktor oʻrinbosarlari, umumtaʼlim fanlari oʻqituvchilari, tarbiyachilar mehnatiga haq toʻlash, qoʻshimcha toʻlovlar hamda ragʻbatlantirish shartlari va imtiyozlari Vazirlar Mahkamasining “Xalq taʼlimi xodimlari mehnatiga haq toʻlashning takomillashtirilgan tizimini tasdiqlash toʻgʻrisida” 2005-yil 21-dekabrdagi 275-son qaroriga muvofiq belgilanadi.

24. Sport maktabi direktori, direktor oʻrinbosarlariga moddiy ragʻbatlantirish hamda trenerlari, yoʻriqchi-uslubchilariga olimpiya va paralimpiya sport turlariga tayyorlash markazlari uchun belgilangan mehnatga haq toʻlash va moddiy ragʻbatlantirish shartlari qoʻllanadi.

Bunda bir nafar oʻquvchi-sportchiga nisbatan sport maktablari trenerlarining mehnatiga haq toʻlashda trenerning bazaviy tarif stavkasiga nisbatan olimpiya va paralimpiya sport turlariga tayyorlash markazlari uchun belgilangan foizlar tatbiq etiladi.

25. Tibbiyot xodimlari mehnatiga Vazirlar Mahkamasining “Tibbiyot xodimlari mehnatiga haq toʻlashning takomillashtirilgan tizimini tasdiqlash toʻgʻrisida” 2005-yil 21-dekabrdagi 276-son qaroriga muvofiq haq toʻlanadi, shuningdek, ularga nisbatan olimpiya va paralimpiya sport turlariga tayyorlash markazlari uchun belgilangan moddiy ragʻbatlantirish shartlari tatbiq etiladi.

26. Sport maktablari xodimlariga Maktabgacha va maktab taʼlimi vaziri jamgʻarmasi hisobidan har oylik 100 foizgacha ustama toʻlash tartibi joriy etiladi.

Bunda ushbu ustamalarni sport maktablari xodimlariga toʻlash tartibi Vazirlik tomonidan belgilanadi.

6-bob. Trenerlarning pedagogik yuklamalarini hisoblash

27. Trenerlarning pedagogik yuklamalari quyidagi jadval asosida belgilanadi:

Oʻquvchi-sportchilar tayyorgarligining darajasi va bosqichlari Oʻquv yili Uquv guruhlari bilan oʻquv mashgʻulotining davomiyligi ( * haftadagi akademik soatlar) Oʻquv guruhlarining toʻldirilishi (Oʻquvchi-sportchilar soni) Boshlangʻich tayyorgarlik 1-yil 6 4 — 8 2-yil 8 Oʻquv-mashq 1-yil 12 2-yil 14 3-yil 18 3 yildan koʻp 20 Sportda kamolotga erishish 1-yil 24 4 — 6 2-yil 26 2 yildan koʻp 28 Oliy sport mahorati Butun davrda 32 3 — 5

7-bob. Sport maktablari faoliyatini moliyalashtirish va moddiy taʼminlash tartibi

28. Quyidagilar sport maktablarini moliyalashtirish manbalari hisoblanadi:

Davlat budjeti mablagʻlari;

Vazirlikning Maktabgacha va maktab taʼlimi vaziri jamgʻarmasi mablagʻlari;

Agentlikning Iqtidorli yoshlarni qoʻllab-quvvatlash jamgʻarmasi mablagʻlari;

faoliyat ixtisosligi boʻyicha tovarlarni (ishlarni, xizmatlarni) realizatsiya qilishdan va sport maktabining ustavidagi vazifalarga muvofiq boʻlgan boshqa faoliyat turlaridan olinadigan daromadlar;

asosiy mashgʻulotlar oʻtkazilmaydigan vaqtda boʻsh turgan mol-mulkni ijaraga berishdan tushgan daromadlar;

jismoniy va yuridik shaxslarning homiylik xayriyalari;

pulli xizmatlardan tushadigan mablagʻlar;

qonunchilik hujjatlarida taqiqlanmagan boshqa manbalar.

29. Sport maktablari belgilangan tartibda tasdiqlangan va Agentlikda roʻyxatdan oʻtgan xarajatlar smetasi asosida moliyalashtiriladi.

30. Sport maktablari Agentlikka taqdim etish uchun belgilangan tartibda buxgalteriya hisobotini yuritadi.

8-bob. Sport maktablarining faoliyatini nazorat qilish

31. Sport maktablari qonunchilik hujjatlarida nazarda tutilgan hollarda har yili hisobot davri tugagach, Agentlikka faoliyati toʻgʻrisida hisobot taqdim etadi.

32. Sport maktablarida budjet toʻgʻrisidagi qonunchilik talablariga rioya etilishi Vazirlikning Ichki audit va moliyaviy nazorat departamenti tomonidan nazorat qilinadi.

33. Qonunchilik hujjatlarida belgilangan tartibda Agentlik sport maktabi direktori zimmasiga yuklangan vazifalarning samarali bajarilishi yuzasidan ularning faoliyati ustidan muntazam monitoring qilib boradi, monitoring natijalariga koʻra sport maktablari faoliyati samaradorligiga xolisona baho beradi.

34. Monitoring va baholash yakunlari boʻyicha yuqori koʻrsatkichga erishgan sport maktablarining rahbariyati va xodimlari ragʻbatlantiriladi yoxud yoʻl qoʻyilgan kamchiliklari uchun intizomiy javobgarlikka tortilishi mumkin.

35. Sport maktabi faoliyatiga oid hujjatlarning belgilangan tartibda saqlashga berilishi uchun sport maktabi direktori javob beradi.

9-bob. Yakunlovchi qoidalar

36. Sport maktablari qonunchilik talablariga muvofiq oʻquv yili yakunida muassis (taʼsischi) tomonidan qayta tashkil etiladi yoki tugatiladi.

Agentlik sport maktablari tugatilganda oʻquvchi-sportchilarni ota-onalarining roziligi bilan boshqa umumiy oʻrta taʼlim tashkilotlariga oʻtkazish masʼuliyatini oladi.

37. Sport maktablari tugatilgan taqdirda, uning pul mablagʻlari va mol-mulkidan, uning majburiyatlarini qoplash boʻyicha toʻlovlar chegirilgan holda qonunchilik hujjatlariga va sport maktablari ustaviga muvofiq foydalaniladi.

38. Ushbu Nizom qoidalari qoʻllanishi bilan bogʻliq nizolar qonunchilik hujjatlarida belgilangan tartibda hal etiladi.

39. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Vazirlar Mahkamasining 2025-yil 20-avgustdagi 524-son qaroriga 2-ILOVA

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ixtisoslashtirilgan sport maktablariga oʻquvchilarni saralab olish, qabul qilish hamda chetlashtirish tartibi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi (keyingi oʻrinlarda — Agentlik) tizimidagi ixtisoslashtirilgan sport maktablariga (keyingi oʻrinlarda — sport maktablari) oʻquvchilarni saralab olish, ularni qabul qilish va chetlashtirish tartibini belgilaydi.

2. Sport maktablariga oʻquvchilar Agentlik tomonidan belgilangan yillik qabul kvotasi doirasida qabul komissiyasi tomonidan oʻtkaziladigan kirish imtihonlari natijalariga koʻra qabul qilinadi.

Sport maktablariga oʻquvchilar ikki bosqichda (kasbiy (ijodiy) imtihonlari va test sinovlari) har bir sinfda oʻquvchilar soni 12 nafardan kam boʻlmagan, biroq 24 nafardan oshmagan holda qabul qilinadi.

3. Sport maktablariga oʻquvchilar teng huquqlilik, ochiqlik, adolat va shaffoflik prinsiplari asosida ushbu Nizomga ilovada keltirilgan sxemaga muvofiq qabul qilinadi.

4. Oʻzbekiston Respublikasida doimiy yashayotgan fuqaroligi boʻlmagan shaxslar sport maktablarida taʼlim olish uchun Oʻzbekiston Respublikasi fuqarolari bilan teng huquqlarga egadir.

5. Chet el fuqarolarining farzandlari sport maktablariga Oʻzbekiston Respublikasining “Taʼlim toʻgʻrisida”gi Qonuniga , boshqa qonunchilik hujjatlariga muvofiq qabul qilinadi.

6. Belgilangan kvota doirasida kirish imtihonlari natijalariga koʻra eng yuqori ball olgan oʻquvchilar ballar ketma-ketligida oʻqishga qabul qilinadi.

Talabdan kelib chiqib, ajratilgan kvota doirasida Oksana Chusovitina nomidagi gimnastikaga ixtisoslashtirilgan sport maktabi sport gimnastikasi va badiiy gimnastika yoʻnalishlariga qabul qilinishi mumkin.

Mazkur yoʻnalishlar boʻyicha kvota taqsimoti talabgorlar sonidan kelib chiqib, Agentlik tomonidan tasdiqlanadi.

2-bob. Qabul komissiyasi

7. Sport maktablariga hujjatlarni qabul qilish, kirish imtihonlarini teng huquqlilik, ochiqlik, adolat va shaffoflik prinsiplari asosida tashkil etish maqsadida Agentlik, uning tizimidagi tashkilotlar hamda hamkor tashkilotlar vakillaridan iborat tarkibda qabul komissiyasi shakllantiriladi.

8. Qabul komissiyasining tarkibi Agentlik direktori buyrugʻi bilan tasdiqlanadi.

Qabul komissiyasi tarkibi 5 kishidan kam boʻlmagan toq miqdorda komissiya raisi, komissiya raisi oʻrinbosari, komissiya kotibi hamda uning aʼzolaridan iborat tarkibda tuziladi.

Qabul komissiyasi tomonidan sport maktablari boʻyicha alohida ishchi guruh shakllantiriladi va tasdiqlanadi.

9. Kasbiy (ijodiy) imtihonlarning umumjismoniy tayyorgarlik hamda texnik-taktik tayyorgarlik talablari va ularni baholash mezonlari qabul komissiyasi tomonidan belgilanadi.

10. Qabul komissiyasi:

kirish imtihonlarining baholash mezonlari, oʻtkazish vaqti hamda joylarini belgilaydi;

taʼlim dasturlarining fanlararo va sinflararo integratsiyasidan kelib chiqib, zarur hollarda, kirish imtihonlarining yoʻnalishlariga, savollar miqdoriga oʻzgartirish kiritishi mumkin;

oʻquvchilarning hujjatlari ushbu Nizom talablari asosida taqdim etilganini koʻrib chiqadi;

koʻrib chiqish natijasida oʻquvchining hujjatlarini qabul qilish, tahrirlashga yuborish yoxud qabul qilishni rad etish toʻgʻrisida qaror qabul qiladi;

hujjatlari qabul qilingan oʻquvchilarning roʻyxatini shakllantiradi, ularni kirish imtihonlari shartlariga mos ravishda guruhlarga taqsimlaydi;

kasbiy (ijodiy) imtihonlar uchun hakamlar hayʼati va apellyatsiya komissiyalariga malakali mutaxassislarni jalb etadi hamda ularning tarkibini tasdiqlaydi;

hujjatlari tahrirlashga yuborilgan yoki qabul qilinishi rad etilgan hollarda tahrirlashga yuborish yoki rad etilish sabablarini aniq koʻrsatgan holda, oʻquvchilarning shaxsiy kabinetiga yoki telefon raqamiga SMS shaklida xabar yuboradi;

kirish imtihonlari oʻtkaziladigan joylarni (binolarni) talab darajasida tayyorlaydi;

oʻquvchilarni, ularning ota-onasi (qonuniy vakili)ni kirish imtihonlari shartlari bilan tanishtiradi, kirish imtihonlari oʻtkaziladigan joyi va vaqti toʻgʻrisida shaxsiy kabinet yoki bogʻlanish uchun taqdim etilgan telefon raqamiga SMS shaklida xabar yuborish orqali ogohlantiradi;

tasdiqlangan jadval asosida sport maktablariga oʻquvchilarni kirish imtihonlari yuzasidan murojaat qilgan shaxslarga maslahat berib boradi;

oʻquvchilar va ularning ota-onasi (qonuniy vakili) tomonidan berilayotgan savollarga javob tayyorlash va ularni veb-sayt, ijtimoiy tarmoqlar orqali keng ommaga taqdim etish choralarini koʻradi.

kirish imtihonlarini tashkil etadi, natijalarini eʼlon qiladi.

3-bob. Hujjatlarni qabul qilish

11. Hujjatlarni qabul qilish boshlanishidan kamida 10 kun oldin qabul komissiyasi tomonidan Agentlikning rasmiy veb-sayti, ijtimoiy tarmoqlardagi sahifalarida qabul qilish tartibi, hujjatlarni topshirish muddatlari va qabul kvotalari toʻgʻrisida eʼlon qilinadi.

12. Kirish imtihonlari qabul komissiyasi tomonidan belgilangan joy va vaqtda oʻtkaziladi.

13. Umumiy oʻrta taʼlim tashkilotlarining tegishli sinfida oʻqishni toʻliq tamomlagan oʻquvchilari sport maktabining shunday sinfida takroran oʻqishni talab qilish huquqiga ega emas.

14. Sport maktablariga oʻquvchilarning quyidagi hujjatlari onlayn shaklda Agentlikning rasmiy veb-sayti orqali qabul qilinadi:

kirish imtihonlari ruxsatnomasini shakllantirish jarayonida foydalanish uchun oʻquvchining oxirgi 2 oy davomida tushgan fotosurati;

oʻquvchining tugʻilganlik haqida guvohnomasi (mavjud boʻlsa, ID-kartasi) va uning ota-onasi (qonuniy vakili) fuqarolik pasporti (ID-kartasi) maʼlumotlari, bogʻlanish uchun telefon raqamlari;

086-U shakldagi tibbiy maʼlumotnoma;

sport razryadi yoki unvonini tasdiqlovchi hujjatning hamda sport razryadi yoki unvoni tasdiqlangani toʻgʻrisidagi buyruqdan koʻchirma nusxalari;

Oʻzbekiston chempionati va kuboklarida qabul yili va undan oldingi bir yil davomida gʻolib va sovrindor boʻlganini tasdiqlovchi diplom.

Ushbu bandning beshinchi va oltinchi xatboshilarida koʻrsatilgan hujjatlar oʻquvchi tomonidan hujjat topshirish vaqtida taqdim etilmagan hollarda inobatga olinmaydi.

Qabul komissiyasi tomonidan qonunchilik hujjatlarida belgilangan tartibda boshqa hujjatlar ham talab etilishi mumkin.

Hujjat topshirish jarayonida oʻquvchining ota-onasi (qonuniy vakili) kirish imtihonlari shartlari va talablari bilan tanishgani toʻgʻrisidagi onlayn ofertani tasdiqlaydi.

15. Hujjatlarni belgilangan muddatlarda, toʻgʻri va sifatli taqdim etish boʻyicha masʼuliyat oʻquvchining ota-onasi (qonuniy vakili) zimmasiga yuklanadi.

16. Hujjatlarni qabul qilish, kirish imtihonlari yuzasidan yuborilgan (shaxsiy kabineti yoki telefon raqamiga SMS) xabarlarni oʻquvchi yoki uning ota-onasi (qonuniy vakili) tomonidan qabul qilinmasligi (oʻqimasligi, arizada koʻrsatilgan telefon raqamining ishchi holatda boʻlmasligi va boshqalar) boʻyicha javobgarlik qabul komissiyasi zimmasiga yuklanmaydi.

17. Oʻquvchilarning hujjatlari qabul komissiyasi tomonidan (24 soat ichida) koʻrib chiqilgandan soʻng ularga hujjatlar qabul qilingani, tahrirlashga yuborilgani yoki rad etilgani toʻgʻrisida xabar yuboriladi.

18. Quyidagi hollarda hujjatlar tahrirlashga yuboriladi:

ushbu Nizomning 14-bandida belgilangan hujjatlar toʻliq boʻlmaganda;

taqdim etilgan hujjatlarning, muhrdagi yozuvlarning nusxalari oʻqib boʻlmaydigan darajada boʻlsa.

19. Hujjatlari tahrirlashga yuborilganda, oʻquvchilarga koʻrsatilgan kamchiliklarni bartaraf etish uchun hujjatlar qabul qilish muddati tugagunga qadar ruxsat beriladi.

Hujjatlarni qabul qilish muddati tugagandan soʻng maʼlumotlarni oʻzgartirishga ruxsat berilmaydi.

20. Quyidagi hollarda oʻquvchilarning hujjatlarini qabul qilish rad etiladi:

belgilangan muddatlardan keyin kirish imtihonida ishtirok etish xohishi bildirilganda;

taqdim etilgan hujjatlarning soxta ekanligi aniqlanganda;

umumiy oʻrta taʼlim tashkilotining tegishli sinfida oʻqishni toʻliq tamomlagan oʻquvchilar tomonidan sport maktablarining shu sinfida takroran oʻqish istagi bildirilganda.

21. Oʻquvchilarning ota-onasi (qonuniy vakili) hujjatlarni qabul qilish muddati tugagunga qadar taqdim etilgan arizani qaytarib olish yoki bekor qilish huquqiga ega.

4-bob. Kirish imtihonlarini tashkil etish va oʻtkazish tartibi

22. Kirish imtihonlari materiallari Agentlik huzuridagi Pedagogik mahorat va xalqaro baholash ilmiy-amaliy markazi tomonidan tayyorlanadi.

23. Kirish imtihonlarining birinchi bosqichida oʻquvchilarning jismoniy tayyorgarlik boʻyicha baholash uchun qabul komissiyasi tomonidan hamkor tashkilot bilan birgalikda har bir sport maktabi uchun 5 nafardan kam boʻlmagan toq miqdorda hakamlar hayʼati tarkibi tasdiqlanadi.

24. Kirish imtihonlari sport maktablarining taʼlim tilida oʻtkaziladi.

25. Kirish imtihonlari 1 — 11 sinflar uchun quyidagi tartibda oʻtkaziladi:

birinchi bosqich — kasbiy (ijodiy) imtihonlar 2 ta turda oʻtkaziladi:

umumjismoniy tayyorgarlik — 30 ball;

maxsus jismoniy tayyorgarlik — 70 ball;

kasbiy (ijodiy) imtihonlarni oʻtkazishda oʻquvchilarga baholash mezonlarida belgilanganidan boshqa qoʻshimcha imkoniyat berilmaydi.

ikkinchi bosqich — 5 — 11-sinflar uchun psixologik test 15 ta, intellektual qobiliyat darajasini aniqlash boʻyicha 20 ta test, jami 35 ta test topshirigʻi beriladi.

Har bir toʻgʻri belgilangan test topshirigʻiga 1 balldan, jami 35 ball beriladi.

26. Oʻquvchilarga test topshiriqlarini bajarishi, javoblar varaqasiga belgilashi uchun 1 soat (60 daqiqa) vaqt beriladi.

27. Test topshiriqlari boʻyicha oʻquvchilarning bildirgan eʼtirozlari qabul komissiyasi tomonidan test topshirigʻi jarayonida qabul qilinadi va test natijalari hisoblanishidan avval koʻrib chiqiladi.

28. Oʻquvchilarning kirish imtihonlari natijalariga koʻra ballari teng boʻlib qolgan hollarda, quyidagilar ustunlikka ega boʻladi:

birinchi bosqichda yuqori ball toʻplagan oʻquvchilar;

ikkinchi bosqichda eng koʻp topshiriq berilgan fandan yuqori ball toʻplagan oʻquvchilar.

Oʻquvchilar barcha toifada bosqichlar boʻyicha bir xil umumiy va teng ball toʻplagan hollarda, ular tugʻilgan sanasi boʻyicha saralanadi, bunda yoshroq oʻquvchiga ustunlik beriladi.

Agarda bu holatda ham tenglik saqlanib qolsa, qabul komissiyasi tomonidan oʻquvchilarga qoʻshimcha topshiriqlar beriladi.

29. Oʻquvchilar imtihonga oʻz shaxsini tasdiqlovchi hujjatning hamda 086-U shakldagi tibbiy maʼlumotnomaning asli va imtihon ruxsatnomasi bilan kelishi lozim.

Kirish imtihoni ruxsatnomasi imtihon boshlanishidan kamida 3 (uch) kun oldin oʻquvchining shaxsiy maʼlumotlari bilan birga imtihon oʻtkazish joyi va guruhi koʻrsatilgan holda uning shaxsiy kabinetiga yuboriladi.

30. Kirish imtihonlariga hujjat topshirmagan, imtihonga kechikkan yoki kelmagan oʻquvchilar uchun qoʻshimcha kirish imtihoni oʻtkazishga yoʻl qoʻyilmaydi.

31. Quyidagi holatlar oʻquvchilarni kirish imtihoni jarayonlaridan chetlashtirishga asos boʻladi:

kirish imtihonni jarayonida ichki tartib-qoidalarga rioya qilmaslik;

sogʻligʻi yomonlashishi (tibbiy xizmat xodimi xulosasi asosida);

boshqalardan koʻchirishga urinish va boshqa oʻquvchilarga xalaqit berish;

shpargalka, barcha turdagi mobil aloqa vositalari, kalkulyator, lugʻat, kitoblardan foydalanish.

Yuqoridagi holatlar sodir etilganda, oʻquvchilarga nisbatan tegishli dalolatnoma rasmiylashtiriladi va ular javoblar varaqasini topshirgan holda kirish imtihonini tark etadi. Chetlashtirilgan oʻquvchilarning kirish imtihoni natijalari inobatga olinmaydi.

32. Kirish imtihonlarining biron-bir bosqichida ishtirok etmagan oʻquvchining imtihonlarning navbatdagi bosqichida ishtirok etishiga yoʻl qoʻyilmaydi.

33. Kirish imtihoni jarayonida oʻquvchilarning oʻzlariga bogʻliq boʻlgan holda jarayondan chetlashtirilishi yoki chiqib ketishi qayta imtihon oʻtkazishga asos boʻlmaydi.

5-bob. Kirish imtihonlari natijalarini eʼlon qilish

34. Kirish imtihonlarining yakuniy natijalari test sinovlari oʻtkazilgan kundan keyin yigirma kun ichida Agentlikning rasmiy veb-saytida eʼlon qilinadi.

35. Oʻquvchilar kirish imtihonlari natijalaridan norozi boʻlgan taqdirda, har bir bosqich natijasi eʼlon qilingan vaqtdan boshlab uch ish kuni ichida apellyatsiya komissiyasiga ariza bilan murojaat etishga haqli.

36. Kirish imtihonlari natijalaridan norozi boʻlgan oʻquvchilarning murojaatlari Agentlikda tegishli mutaxassislardan tuzilgan apellyatsiya komissiyasi tomonidan koʻrib chiqiladi.

Apellyatsiya komissiyasiga Agentlik direktori oʻrinbosari raislik qiladi.

37. Apellyatsiya komissiyasi oʻquvchilarning murojaatini oʻn kun muddatda koʻrib chiqadi va arizani qanoatlantirish yoki rad qilish toʻgʻrisida murojaatchiga xulosa beradi.

38. Apellyatsiya komissiyasining norozilik arizasini qanoatlantirish toʻgʻrisidagi xulosasi oʻquvchilarga arizani koʻrib chiqish natijalari boʻyicha ball qoʻshib berilishiga asos boʻladi.

39. Apellyatsiya komissiyasiga boshqa oʻquvchilarning ishlarini koʻrib chiqish va murojaatchining ishi bilan solishtirishga ruxsat berilmaydi.

40. Oʻquvchilar va ularning ota-onasi (qonuniy vakili) berilgan javoblardan norozi boʻlgan taqdirda, belgilangan tartibda yuqori turuvchi organlarga yoki sudga murojaat etish huquqiga ega.

6-bob. Oʻquvchilarni sport maktablariga qabul qilish

41. Kirish imtihonlarining umumlashtirilgan natijasiga koʻra eng yuqori ball toʻplagan oʻquvchilar belgilangan qabul kvotasi doirasida ballar ketma-ketligiga qatʼiy amal qilgan holda sport maktabi tomonidan tashkil etilgan chuqurlashtirilgan tibbiy koʻrik natijasiga muvofiq (oʻquvchi sogʻlom deb topilganda) sport maktabining oʻquvchilar safiga qabul qilinadi.

Chuqurlashtirilgan tibbiy koʻrikda oʻquvchilarning F-026-u shakldagi maktab tibbiy anketasi, F-063-u shakldagi profilaktik emlash kartasi, F-086-U shakldagi tibbiy maʼlumotnoma, qon, siydik, gijja tuxumi tahlili, EKG, 14 yoshdan boshlab flyuorografiya, turarjoyi bolalar vrachidan kechirgan kasalliklari toʻgʻrisidagi maʼlumotnoma, yakkakurash turlari uchun umurtqa pogʻonasining koʻkrak va bel qismlarining ikki proyeksiyadagi rentgen rasmi hamda travmatolog xulosasi talab etiladi.

Oʻquvchiga yuqorida koʻrsatilgan tahlillar boʻyicha salbiy tibbiy xulosa berilgan hollarda, oʻquvchilar safiga qabul qilinmasligiga asos boʻladi.

42. Agentlik tomonidan tasdiqlangan qaydnomalarga asosan sport maktabi direktorining buyrugʻi asosida oʻquvchilar maktabga qabul qilinadi.

43. Belgilangan kvota doirasida kirish imtihonlari natijalariga koʻra eng yuqori ball toʻplagan oʻquvchilar oʻqishga qabul qilinadi.

Bunda sport maktabiga kirish imtihonlarida ishtirok etish uchun roʻyxatdan oʻtgan:

Oʻzbekiston Respublikasi Maktabgacha va maktab taʼlimi vazirligi tizimidagi maktabgacha taʼlim tashkilotlari tarbiyalanuvchilari oʻrtasida gimnastika boʻyicha oʻtkazilgan sport musobaqalari gʻolib va sovrindorlari;

Oʻzbekiston Respublikasi Sport vazirligi tomonidan oʻtkaziladigan Oʻzbekiston chempionati va kuboklarida qabul yili va undan oldingi bir yil davomida gʻolib va sovrindorlari qabul kvotasi doirasida kirish imtihonlarisiz qabul qilinadi.

44. Sport razryadi yoki unvoniga ega sportchilar kirish imtihonlarining birinchi — umumjismoniy tayyorgarlik bosqichidan ozod etiladi. Oʻquvchiga mazkur bosqich uchun belgilangan 30 ball toʻgʻridan-toʻgʻri qoʻshib beriladi.

45. Sport maktablariga qabul qilinishi belgilangan oʻquvchi oʻqishni davom ettirmagan holatlarda, uning oʻrniga oʻqishga kira olmaganlar orasidan ballar ketma-ketligiga qatʼiy amal qilgan holda navbatdagi oʻquvchi taklif qilinadi.

Navbatdagi oʻquvchi ballar ketma-ketligi boʻyicha undan oldingi oʻquvchining ota-onasi (qonuniy vakili) tomonidan oʻqishni maktabda davom ettirish istagi mavjud emasligini tasdiqlovchi hujjat olinganidan soʻng qabul qilinadi.

Mazkur tartib oʻquv yilining birinchi yarim yilligi davomida amalga oshiriladi.

46. Belgilangan tartibda tegishli hujjatlarning asl nusxasi taqdim etilmasligi, oʻquvchi oʻqishni davom ettirish istagini bildirmasligi, maktab xodimlari murojaatlariga javob bermasligi undan keyingi oʻquvchining qabul qilinishi uchun asos boʻladi. Ushbu holat boʻyicha sport maktabi maʼmuriyati tomonidan tegishli dalolatnoma rasmiylashtiriladi.

7-bob. Oʻquvchilar boʻsh oʻrinlarini toʻldirish

47. Sport maktablarida oʻquv yili yakunlangandan keyin boʻshab qolgan oʻrinlar uchun kirish imtihonlari ushbu Nizom talablariga muvofiq Agentlik tomonidan oʻtkaziladi, mos ravishda umumiy oʻrta taʼlim tashkilotlarining tegishli sinfini tamomlagan oʻquvchilaridan hujjat qabul qilinadi.

48. Sport maktablariga iqtidorli oʻquvchilarni saralash va oʻquvchilar zaxirasini shakllantirish maqsadida musobaqalar oʻtkazib boriladi.

Tegishli sport turlari boʻyicha Qoraqalpogʻiston Respublikasi, viloyatlar va Toshkent shahar birinchiligi gʻolib va sovrindorlari oʻrtasida oʻtkazilgan sport musobaqasi (sport klublari vakillari ham taklif etilishi mumkin) gʻoliblari orasidan ballar ketma-ketligiga qatʼiy amal qilgan holda boʻsh oʻquvchi-sportchilar oʻrni toʻldiriladi.

Mazkur tartib sport musobaqasi oʻtkazilgan oʻquv yili yakuniga qadar amal qiladi.

Sport musobaqasini tashkil etish tartibi Oʻzbekiston Respublikasi Maktabgacha va maktab taʼlimi vazirligi tomonidan belgilanadi.

49. Belgilangan mezonlar boʻyicha oʻquvchi-sportchilar safidan chiqarilgan oʻquvchi-sportchilar oʻrni sport turlari boʻyicha tasdiqlangan oʻquvchi-sportchilar kontingentidan chiqmagan holda, oʻquv yili davomida sport maktablari tomonidan Agentlik bilan kelishilgan holda toʻldiriladi.

50. Oʻquvchi-sportchilarning oʻqishi bir sport maktabidan boshqasiga yoʻnalish mos kelgan va boʻsh joy boʻlgan taqdirda, Agentlikning koʻrsatmasiga muvofiq koʻchiriladi.

51. Boʻsh oʻrinlarni toʻldirishda sport maktablarining ixtisoslik yoʻnalishi boʻyicha Oʻzbekiston chempionati va kubogi gʻolib hamda sovrindorlariga ustunlik beriladi.

52. Sport va badiiy gimnastikasi turlari boʻyicha quyidagi yosh hamda razryadlarga ega boʻlgan oʻquvchilar oʻquv yili choragi yakuni boʻyicha mavjud boʻsh oʻrinlarga ushbu nizom bilan belgilangan maxsus jismoniy imtihon mezonlari asosida hakamlar hayʼati tavsiyasiga asosan qabul qilinishi mumkin:

Sport gimnastikasi turi boʻyicha:

birinchi, ikkinchi, uchinchi oʻsmirlar sport razryadiga ega 10 yoshgacha boʻlgan qiz va oʻgʻil bolalar;

uchinchi sport razryadiga ega 7 yoshdan yuqori qizlar, 10 yoshgacha boʻlgan oʻgʻil bolalar;

ikkinchi sport razryadiga ega boʻlgan 8 yoshdan yuqori qizlar, 11 yoshgacha boʻlgan oʻgʻil bolalar;

birinchi sport razryadiga ega boʻlgan 9 yoshdan yuqori qizlar, 11 yoshdan yuqori oʻgʻil bolalar;

Oʻzbekiston sport ustaligiga nomzod guvohnomasiga ega 13 yoshdan yuqori qizlar, 14 yoshdan yuqori boʻlgan oʻgʻil bolalar.

Badiiy gimnastika turi boʻyicha:

birinchi, ikkinchi, uchinchi oʻsmirlar sport razryadiga ega boʻlgan 7 yoshli qiz bolalar;

uchinchi sport razryadiga ega boʻlgan 8 yoshdan yuqori qiz bolalar;

ikkinchi sport razryadiga ega boʻlgan 9 yoshdan yuqori qiz bolalar;

birinchi sport razryadiga ega boʻlgan 10 yoshdan yuqori qiz bolalar.

8-bob. Oʻquvchilarni sinfdan-sinfga oʻtkazish va oʻquvchilar safidan chetlashtirish

53. Oʻquvchi-sportchilar Agentlik tomonidan tasdiqlangan oʻquv rejadagi fanlardan yillik baholarni (yakuniy davlat attestatsiyasini) eng kamida summativ ballar yigʻindisi 46 dan yuqori (3 baho) boʻlganidan soʻng sport maktabi direktorining buyrugʻi bilan keyingi sinfga oʻtkaziladi.

54. Oʻquvchi-sportchilar quyidagi hollarda sport maktabining oʻquvchi-sportchilar safidan chiqariladi:

oʻquvchi-sportchilarning choraklik baholarida ikki va undan ortiq fandan summativ ballar yigʻindisi 46 dan past boʻlgan hollarda;

oʻz xohishiga koʻra (ota-onasining yoki ularning oʻrnini bosuvchi shaxslarning yozma arizasi asosida);

attestatsiya komissiyasining qaroriga koʻra;

tibbiy nomuvofiqlik boʻlganda — shifokor xulosasiga koʻra;

oʻquv intizomi va ichki tartib-qoidalarni buzganda, tegishli normativ talablarni topshirmaganda, sport natijasi pasayganda, shu jumladan sport odobi, sport tayyorgarligi rejimi buzilgan, taqiqlangan farmokologik, alkogolli va giyohvand vositalar qoʻllangan taqdirda;

kirish imtihonlarini topshirish jarayonida oʻquvchi-sportchi tomonidan taqdim etilgan (topshirilgan) hujjatlarning qalbakiligi aniqlanganda.

55. Fanlarni oʻzlashtirish darajasi 46 balldan kam boʻlgan oʻquvchi-sportchilar va ularning ota-onalari yozma ravishda ogohlantiriladi, oʻquv yilining birinchi yarmi va yakuni boʻyicha monitoring natijalarida ham mazkur holatlar qayd etilgan taqdirda, ushbu oʻquvchi-sportchilar sport maktabi pedagogik kengashining qaroriga asosan avval oʻqigan maktabiga tegishli sinfga qaytarib yuboriladi (oʻquvchi-sportchining yashash joyi oʻzgargan taqdirda, hududdagi boshqa maktabga).

Bunda oʻquvchi-sportchining ota-onasi (ota-onasining yoki ularning oʻrnini bosuvchi shaxslar) tomonidan ixtiyoriy ravishda oʻqishni boshqa maktabga koʻchirilmagan taqdirda, oʻquvchi-sportchi pedagogik kengash qarori asosida Bolalar masalalari boʻyicha tuman (shahar) komissiyalari bilan kelishilgan holda avval oʻqigan maktabiga tegishli sinfga qaytarib yuboriladi (oʻquvchi-sportchining yashash joyi oʻzgargan taqdirda, hududdagi boshqa maktabga).

Oʻzlashtirish koʻrsatkichi inobatga olinadigan fanlar roʻyxati har oʻquv yili boshlanishidan avval sport maktabining pedagogik kengashi qarori bilan tasdiqlanadi hamda oʻquvchi-sportchilar va ularning ota-onalari (qonuniy vakili) tanishtiriladi.

56. Oʻquvchi-sportchilarda davolash-profilaktika muassasalarida statsionar sharoitda uzoq muddat davolanishga muhtojlik yuzaga kelgan taqdirda, ular sport maktabining pedagogik kengashi qarori asosida oʻquvchi-sportchilar safidan chiqariladi hamda avval oʻqigan maktabiga tegishli sinfga qaytarib yuboriladi (oʻquvchi-sportchining yashash joyi oʻzgargan taqdirda, hududdagi boshqa maktabga).

Davolash-profilaktika muassasalarida statsionar sharoitda uzoq muddat davolanishga muhtoj bolalarga belgilangan tartibda avval oʻqigan yoki yashash joyi oʻzgargan hududdagi maktab tomonidan umumiy oʻrta taʼlim beriladi.

9-bob. Sport maktablarida tahsil oluvchi oʻquvchi-sportchilarni attestatsiyadan oʻtkazish

57. Sport maktablari oʻquvchi-sportchilarini oʻquv yili davomida ikki marta (qishki va yozgi) attestatsiyadan oʻtkazish orqali xolisona baho berish va ularni sinfdan-sinfga oʻtkazish hamda oʻtkazilgan attestatsiya natijasida qayd etilgan talablarga javob bermagan oʻquvchi-sportchilar sport maktabi direktorining buyrugʻi asosida tuzilgan attestatsiya komissiyasi qaroriga koʻra oʻqishdan chetlashtiriladi.

58. Attestatsiya sport maktablari oʻquvchisining oʻquv yili davomidagi sport tayyorgarligi darajasining oʻsib borishini tahlil qilish, Oʻzbekiston Respublikasi Sport vazirligining sport va ommaviy jismoniy tarbiya tadbirlari kalendar-rejasiga muvofiq oʻtkaziladigan sport musobaqalarida erishgan natijalari, oʻquv rejasida belgilangan fanlarni oʻzlashtirishi, oʻquvchi-sportchilar turarjoyida tartib-intizom talablariga rioya etishi, jamoatchilik ishlarida qatnashganini aniqlash maqsadida oʻtkaziladi.

59. Attestatsiya komissiyasi aʼzolari soni 7 nafardan kam boʻlmagan toq miqdorda tashkil etiladi.

Bunda sport maktabi direktori — komissiya raisi, direktorning sport ishlari boʻyicha oʻrinbosari — komissiya raisi oʻrinbosari hisoblanadi.

Zarur hollarda attestatsiya komissiyasi tarkibiga boshqa tashkilotlar hamda sport turlari boʻyicha federatsiya (uyushma)lar mutaxassislari jalb qilinishi mumkin.

60. Sport turlari boʻyicha trenerlar attestatsiya boshlanishidan kamida oʻn kun oldin attestatsiyadan oʻtuvchilarning attestatsiyaga oid maʼlumotlari va hujjatlarini toʻplaydi hamda attestatsiya komissiyasiga taqdim etadi.

61. Attestatsiya komissiyasi tomonidan attestatsiyadan oʻtuvchi oʻquvchi-sportchilarning quyidagi hujjatlari koʻrib chiqiladi:

yil (oʻquv yili) davomida erishgan natijalari;

yil boshidagi va attestatsiya oʻtkazilayotgan vaqtdagi sport razryadi yoki unvoni;

yil davomida qatnashgan musobaqalari soni va koʻrsatgan natijalari tahlili;

terma jamoaga aloqadorlik darajasi;

koʻrsatgan eng yaxshi natijasi;

trenerlar jamoasining tavsiyasi;

yil (oʻquv yili) davomida oʻquv fanlarini oʻzlashtirishi;

yil (oʻquv yili) davomida oʻquvchi-sportchilar turarjoyida ichki tartib-qoidalarga rioya etishi;

sogʻligʻi toʻgʻrisida shifokor xulosasi.

62. Attestatsiyadan oʻtuvchi oʻquvchi-sportchilarning attestatsiya varaqasi hujjatlari boʻlim instruktor-metodisti hamda bosh trenerlar tomonidan attestatsiya komissiyasiga taqdim etiladi.

Attestatsiya komissiyasi hujjatlarni tahlil qilib, attestatsiyadan oʻtuvchining sport, maʼnaviy-maʼrifiy va oʻqish jarayonidagi faoliyatini tahlil qilish hamda baholash asosida maʼlumotnoma-attestatsiya varaqasini tayyorlaydi.

63. Attestatsiya varaqasi sport turi boʻyicha bosh trener, oʻquvchining shaxsiy treneri, boʻlim instruktor-metodisti, boʻlim tarbiyachisi, sinf rahbari va shifokor tomonidan imzolanadi.

64. Attestatsiya natijalari boʻyicha attestatsiya komissiyaning qarori komissiya aʼzolari tomonidan ochiq ovoz berish yoʻli bilan qabul qilinadi. Ovozlar teng boʻlib qolgan taqdirda, attestatsiya komissiyasi raisining ovozi hal qiluvchi hisoblanadi.

65. Attestatsiya komissiyasi qarori attestatsiya varagʻiga yoziladi va attestatsiyadan oʻtuvchiga toʻgʻridan-toʻgʻri attestatsiyadan soʻng eʼlon qilinadi.

66. Attestatsiya oʻtkazish meʼyorlari va baholash mezonlariga koʻra ijobiy natija boʻlsa, “loyiq” qarori qabul qilinadi, salbiy natijada esa “noloyiq” xulosasi beriladi.

Oʻquvchi-sportchilarni bosqichli nazorat hamda attestatsiyadan oʻtkazish meʼyorlari va baholash mezonlari Agentlik tomonidan belgilanadi.

Attestatsiya oʻtkaziladigan oʻqish davrida oʻquv fanlaridan birini oʻzlashtira olmagan oʻquvchi-sportchiga nisbatan komissiya “noloyiq” deb xulosa berishi lozim.

67. Attestatsiya komissiyasi qarori bayonnomalar bilan rasmiylashtiriladi va ular asosida tegishli buyruqlar chiqarilib, oʻquvchiga va uning ota-onasiga (qonuniy vakiliga) maʼlum qilinadi.

68. Attestatsiyadan oʻtuvchi attestatsiyaga uzrli sabab (betobligi tufayli yoki yaqin qarindoshi vafot etgan hollarda) bilan kelmagan taqdirda, attestatsiyadan oʻtkazish boshqa muddatga koʻchiriladi.

69. Attestatsiyadan oʻtuvchi attestatsiyaga uzrli sabablarsiz kelmagan taqdirda, attestatsiyadan oʻtmagan hisoblanadi hamda oʻquvchi-sportchilar safidan chetlashtiriladi.

10-bob. Yakunlovchi qoidalar

70. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.

71. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ixtisoslashtirilgan sport maktablariga oʻquvchilarni saralab olish, qabul qilish hamda chetlashtirish tartibi toʻgʻrisida nizomga ILOVA

Sport maktablariga oʻquvchilarni saralab olish va qabul qilish

Bosqichlar Subyektlar Tadbirlar Bajarish muddatlari 1-bosqich Agentlik 1. Oʻquvchilarning hujjatlarini qabul qilish uchun qabul komissiyasi tuziladi. Tarkib Agentlik direktori buyrugʻi bilan tasdiqlanadi. Hujjatlarni qabul qilish boshlanishidan oldin Qabul komissiyasi 2. Kirish imtihonlarini oʻtkazish jadvallari tasdiqlanadi, Agentlikning rasmiy veb-sayti, ijtimoiy tarmoqlardagi sahifalarida hamda ommaviy axborot vositalarida eʼlon qilinadi. Hujjatlarni qabul qilish boshlanishidan 10 kun oldin 3. Oʻquvchilar tomonidan onlayn shaklda taqdim etilgan hujjatlar koʻrib chiqiladi. Koʻrib chiqish jarayonida qabul qilinadi yoki tahrirga yuboriladi yoki rad etiladi. 20 kundan kam boʻlmagan muddatda 4. Sport maktablariga oʻquvchilarning kirish imtihonlari yuzasidan murojaat qilgan shaxslarga maslahat berib boriladi. Hujjatlarni qabul qilish davrida 2-bosqich Qabul komissiyasi 1. Kirish imtihonlarini oʻtkazish joylari tayyorlanadi. 2. Kirish imtihonlari materiallari tayyorlanadi. Kirish imtihonlari boshlanishidan oldin 3-bosqich Qabul komissiyasi mahalliy tashkilot bilan birgalikda 1. Kirish imtihoni birinchi bosqichining umumjismoniy tayyorgarlik turi oʻtkaziladi. 2. Kirish imtihoni birinchi bosqichining texnik-taktik (umumkasbiy) tayyorgarlik turi oʻtkaziladi. Tasdiqlangan jadval asosida 4-bosqich Qabul komissiyasi mahalliy tashkilot bilan birgalikda 1. Kirish imtihonining ikkinchi (test) bosqichi oʻtkaziladi. Tasdiqlangan jadval asosida 2. Kirish imtihonlarining yakuniy natijalari Agentlikning rasmiy veb-saytida eʼlon qilinadi. Test sinovlaridan keyin 20 kun ichida 5-bosqich Apellyatsiya komissiyasi 1. Kirish imtihonlari natijalaridan norozi boʻlgan oʻquvchilarning arizalari qabul qilinadi. Har bir bosqich imtihon natijalari eʼlon qilingandan soʻng 3 kun ichida 2. Oʻquvchilarning murojaatlari koʻrib chiqiladi, arizani qanoatlantirish yoki rad qilish toʻgʻrisida murojaatchiga xulosa beriladi. Ariza topshirilgan kundan boshlab 10 kun ichida 6-bosqich Qabul komissiyasi Imtihon natijalariga hamda chuqurlashtirilgan tibbiy koʻrik xulosasiga asosan oʻquvchilarni maktabga oʻqishga qabul qilish haqida sport maktabi direktorining oʻqishga qabul qilish haqidagi buyrugʻi chiqariladi. Yangi oʻquv yili boshlangunga qadar 7-bosqich Qabul komissiyasi Sinflarning har biridagi oʻquvchilar soni 24 nafardan kamaygan hollarda, mavjud boʻsh oʻrinlar tanlov asosida toʻldiriladi. Boʻsh oʻrinlarni toʻldirishda Oʻzbekiston chempionati, kubogi hamda Respublika turnirlari gʻolib va sovrindorlariga ustunlik beriladi. Oʻquv yili yakunlangandan soʻng

Oʻzbekiston Respublikasining Bosh vaziri A. ARIPOV

Toshkent sh.,

2025-yil 20-avgust,

524-son

(Qonunchilik maʼlumotlari milliy bazasi, 21.08.2025-y., 09/25/524/0759-son; 19.12.2025-y., 09/25/797/1181-son)

lex.uz