UzbekAI

Ўзбекистон Республикаси Вазирлар Маҳкамасининг

қарори

Ўзбекистон Республикаси Ҳукуматининг айрим қарорларига автомототранспорт воситалари билан боғлиқ савдо тартибини такомиллаштиришга қаратилган ўзгартириш ва қўшимчалар киритиш тўғрисида

Автомототранспорт воситаларини сотиб олиш ва тасарруф этиш, уларни рўйхатдан ўтказиш тартибини янада такомиллаштириш, автомототранспорт воситалари билан боғлиқ битимлар тузишда фуқаролар ва юридик шахсларга қулай шарт-шароитлар яратиш орқали хизматлар кўламини кенгайтириш мақсадида Вазирлар Маҳкамаси қарор қилади:

1. Ўзбекистон Республикаси Ҳукуматининг иловага мувофиқ айрим қарорларига қуйидагиларни назарда тутувчи ўзгартириш ва қўшимчалар киритилсин:

автомобилсозлик соҳасида дистрибютор ва дилер тушунчаларига аниқлик киритиш;

дистрибютор ва дилер ташкилотлари томонидан илгари фойдаланилган автомототранспорт воситаларини сотиб олиш ва сотиш, шунингдек, илгари фойдаланилган автомототранспорт воситасига алмаштириш имконини берувчи «TRADE-UP» дастурини жорий этиш.

2. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.

Вазирлар Маҳкамасининг 2025 йил 22 августдаги 535-сон қарорига ИЛОВА

Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар

1. Вазирлар Маҳкамасининг 2006 йил 7 мартдаги 38-сон қарори билан тасдиқланган Автомототранспорт воситалари билан боғлиқ битимларни расмийлаштириш тартиби тўғрисидаги низомда :

а) 3-бандда :

иккинчи хатбоши қуйидаги таҳрирда баён этилсин:

«автомототранспорт воситаларини ишлаб чиқарувчи корхоналар, уларнинг дистрибютор ва дилер ташкилотлари, шунингдек, дистрибютор ташкилотларининг дилерлик ташкилотлари»;

бешинчи хатбоши қуйидаги таҳрирда баён этилсин:

«фуқаролар ва юридик шахслар томонидан дистрибютор ва дилер ташкилотларига, шу жумладан, «TRADE-IN» ва «TRADE-UP» дастурлари бўйича;»;

қуйидаги мазмундаги олтинчи хатбоши билан тўлдирилсин:

«дистрибютор ва дилер ташкилотлари томонидан илгари фойдаланишда бўлган автомототранспорт воситаларини сотишда;»;

олтинчи-еттинчи хатбошилар тегишлича еттинчи-саккизинчи хатбошилар деб ҳисоблансин;

б) 7-банд қуйидаги таҳрирда баён этилсин:

«7. Нотариуслар томонидан автомототранспорт воситалари билан боғлиқ битимларни тасдиқлаш (тасарруф этиш ҳуқуқисиз ишончномалар бундан мустасно) дистрибютор ва дилер ташкилотлари томонидан илгари фойдаланишда бўлган автомототранспорт воситаларининг олди-сотди шартномасини, шу жумладан, «TRADE-IN» ва «TRADE-UP» дастурлари бўйича олди-сотди шартномасини расмийлаштириш бошқа шахсга бериш тақиқланмаганлиги ва хатлаб қўйилмаганлиги текширилгандан кейин амалга оширилади.

Нотариуслар томонидан автомототранспорт воситасини бошқа шахсга бериш тўғрисидаги шартномани расмийлаштириш давомида мурожаат қилувчилар томонидан автомототранспорт воситалари агрегатлар рақамларининг рўйхатдан ўтказиш рақамларига мувофиқлиги юзасидан кўздан кечирилади ва бу ҳақда шартномада акс эттирилади.

Дистрибютор ва дилер ташкилотлари томонидан илгари фойдаланишда бўлган автомототранспорт воситаларининг олди-сотди шартномасини, шу жумладан, улар томонидан «TRADE-IN» ва «TRADE-UP» дастурлари бўйича олди-сотди шартномасини расмийлаштиришга қадар автомототранспорт воситалари сотиб олувчининг танловига кўра, хоҳлаган ДЙҲХХ органларида агрегатлар рақамлари рўйхатдан ўтказиш рақамларига мувофиқлиги юзасидан кўздан кечирилиши лозим. Бунда агрегатлар рақамларининг рўйхатдан ўтказиш рақамларига мувофиқлиги юзасидан маълумотнома тақдим этилади ҳамда ушбу маълумотнома кўздан кечирган мансабдор шахснинг фамилияси, исми ва отаси исмининг бош ҳарфлари, кўздан кечирилган сана кўрсатилган ва мансабдор шахс имзоси қўйилган ҳолда штамп билан тасдиқланади. Маълумотнома 10 кун мобайнида амал қилади.

Автомототранспорт воситаси кўздан кечирилганлиги учун тўлов ундирилмайди»;

в) 10-банднинг биринчи ва учинчи хатбошиларидаги «ихтисослаштирилган савдо корхоналари» сўзлари «дистрибютор ёки дилер ташкилотлари» сўзлари билан алмаштирилсин.

2. Вазирлар Маҳкамасининг 2017 йил 31 августдаги 683-сон қарори билан тасдиқланган Автомототранспорт воситаларини давлат рўйхатидан ўтказиш тартиби тўғрисидаги низомда :

а) 2-бандда :

ўн тўртинчи-ўн бешинчи хатбошилар қуйидаги таҳрирда баён этилсин:

«TRADE-IN» — илгари фойдаланишда бўлган автомототранспорт воситасини янги автомототранспорт воситасига нархларидаги фарқни тўлаган (нархларидаги фарқни олган) ҳолда алмаштириш;

дистрибютор ташкилоти — Ўзбекистон Республикаси ҳудудида янги автомототранспорт воситаларини реализация қилиш бўйича ишлаб чиқарувчи билан тегишли дистрибюторлик келишувига эга юридик шахс;

қуйидаги мазмундаги ўн еттинчи-ўн саккизинчи хатбошилар билан тўлдирилсин:

«дилер ташкилоти — Ўзбекистон Республикаси ҳудудида янги автомототранспорт воситаларини реализация қилиш бўйича дистрибютор ташкилоти ёки ишлаб чиқарувчи билан тегишли дилерлик келишувига эга юридик шахс;

«TRADE-UP» — илгари фойдаланишда бўлган автомототранспорт воситасини илгари фойдаланишда бўлган автомототранспорт воситасига нархларидаги фарқни тўлаган (нархларидаги фарқни олган) ҳолда алмаштириш»;

б) 7-бандда :

иккинчи хатбоши қуйидаги мазмундаги иккинчи — тўртинчи хатбошилар билан алмаштирилсин:

«Дистрибютор ва дилер ташкилотлари томонидан илгари фойдаланишда бўлган автомототранспорт воситаларининг олди-сотди шартномасини, шу жумладан, улар томонидан «TRADE-IN» ва «TRADE-UP» дастурлари бўйича олди-сотди шартномасини расмийлаштиришдан олдин:

Ўзбекистон Республикасининг Оила кодекси 24-моддаси тўртинчи қисми талабларига риоя этган ҳолда хотин (эр)нинг нотариал тартибда тасдиқланган розилиги олиниши;

автомототранспорт воситаси рақам агрегатлари ва бошқа техник параметрларининг рўйхатдан ўтказиш маълумотларига мос келиши юзасидан текширилиши учун сотиб олувчининг танловига кўра хоҳлаган ҳудудий ДЙҲХХ органларига тақдим этилиши зарур.»;

учинчи хатбоши бешинчи хатбоши деб ҳисоблансин;

в) 18-бандда :

бешинчи-олтинчи хатбошилар қуйидаги таҳрирда баён этилсин:

«дистрибютор ёки дилер ташкилоти томонидан реализация қилинган янги ва илгари фойдаланишда бўлган автомототранспорт воситаларига, шу жумладан, «TRADE-IN» ва «TRADE-UP» дастурлари бўйича автомототранспорт воситаларига бериладиган электрон ҳисоб-маълумот;

дистрибютор ёки дилер ташкилоти билан тузилган илгари фойдаланишда бўлган автомототранспорт воситаси олди-сотди шартномаси, шу жумладан, «TRADE-IN» ва «TRADE-UP» дастурлари бўйича тузилган илгари фойдаланишда бўлган автомототранспорт воситаси олди-сотди шартномаси»;

қуйидаги мазмундаги ўн учинчи хатбоши билан тўлдирилсин:

«ишлаб чиқарувчи ва дистрибютор ёки дилер ташкилоти, шунингдек, дистрибютор ва дилер ташкилотлари ўртасида автомототранспорт воситасининг олди-сотди шартномаси ва топшириш-қабул қилиш далолатномаси»;

ўн учинчи хатбоши ўн тўртинчи хатбоши деб ҳисоблансин;

г) 33-банднинг «в 1 » кичик банд қуйидаги таҳрирда баён этилсин:

«в 1 ) дистрибютор ёки дилер ташкилоти томонидан, шу жумладан, «TRADE-IN» ва «TRADE-UP» дастурлари бўйича илгари фойдаланишда бўлган автомототранспорт воситаси сотиб олинганда;»;

д) 36-банднинг тўртинчи хатбошисидаги «ихтисослаштирилган савдо корхонаси» сўзлари «дистрибютор ёки дилер ташкилоти» сўзлари билан алмаштирилсин;

е) 36 1 -банд куйидаги таҳрирда баён этилсин:

«36 1 . Дистрибютор ёки дилер ташкилоти томонидан илгари фойдаланишда бўлган автомототранспорт воситаси сотиб олинганда, шу жумладан, «TRADE-IN» ва «TRADE-UP» дастурлари бўйича вақтинча рўйхатдан ўтказиш учун дистрибютор ёки дилер ташкилоти вакили ҳудудий ДЙҲХХ органларига қуйидаги ҳужжатларни тақдим этади:

дистрибютор ёки дилер ташкилотининг аризаси;

дистрибютор ёки дилер ташкилоти вакилининг шахсини тасдиқловчи ҳужжат;

ўрнатилган тартибда расмийлаштирилган дистрибютор ёки дилер ташкилоти вакилининг ишончномаси;

дистрибютор ёки дилер ташкилоти билан автомототранспорт воситасининг эгаси ўртасида тузилган олди-сотди шартномаси;

автомототранспорт воситасининг РЎДРБ ва рўйхатдан ўтказилганлиги ҳақидаги гувоҳномаси.

Дистрибютор ёки дилер ташкилоти томонидан сотиб олинган илгари фойдаланишда бўлган автомототранспорт воситасини, шу жумладан, «TRADE-IN» ва «TRADE-UP» дастурлари бўйича дистрибютор ва дилер ташкилоти томонидан ДЙҲХХ органларида вақтинча рўйхатдан ўтказишда маълумотнома берилади (вақтинча рўйхатдан ўтказилган автомототранспорт воситасига РЎДРБ ва рўйхатдан ўтказилганлиги ҳақидаги гувоҳнома берилмайди).

Мазкур маълумотнома автомототранспорт воситасини бошқариш ҳуқуқини бермайди (дистрибютор ёки дилер ташкилотининг жойлашган манзилига ёки автомототранспорт воситасини сақлаш жойига етиб олиш бундан мустасно).

Дистрибютор ва дилер ташкилотлари томонидан илгари фойдаланишда бўлган автомототранспорт воситаларини сотиб олганлик учун, шу жумладан, «TRADE-IN» ва «TRADE-UP» дастурлари бўйича уларни ДЙҲХХ органларида вақтинча рўйхатдан ўтказиш вақтида йиғим тўланмайди.».

Ўзбекистон Республикасининг Бош вазири А. АРИПОВ

Тошкент ш.,

2025 йил 22 август,

535-сон

(Қонунчилик маълумотлари миллий базаси, 25.08.2025 й., 09/25/535/0776-сон)

lex.uz

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Hukumatining ayrim qarorlariga avtomototransport vositalari bilan bogʻliq savdo tartibini takomillashtirishga qaratilgan oʻzgartirish va qoʻshimchalar kiritish toʻgʻrisida

Avtomototransport vositalarini sotib olish va tasarruf etish, ularni roʻyxatdan oʻtkazish tartibini yanada takomillashtirish, avtomototransport vositalari bilan bogʻliq bitimlar tuzishda fuqarolar va yuridik shaxslarga qulay shart-sharoitlar yaratish orqali xizmatlar koʻlamini kengaytirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga quyidagilarni nazarda tutuvchi oʻzgartirish va qoʻshimchalar kiritilsin:

avtomobilsozlik sohasida distribyutor va diler tushunchalariga aniqlik kiritish;

distribyutor va diler tashkilotlari tomonidan ilgari foydalanilgan avtomototransport vositalarini sotib olish va sotish, shuningdek, ilgari foydalanilgan avtomototransport vositasiga almashtirish imkonini beruvchi “TRADE-UP” dasturini joriy etish.

2. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.

Vazirlar Mahkamasining 2025-yil 22-avgustdagi 535-son qaroriga ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Vazirlar Mahkamasining 2006-yil 7-martdagi 38-son qarori bilan tasdiqlangan Avtomototransport vositalari bilan bogʻliq bitimlarni rasmiylashtirish tartibi toʻgʻrisidagi nizomda :

a) 3-bandda :

ikkinchi xatboshi quyidagi tahrirda bayon etilsin:

“avtomototransport vositalarini ishlab chiqaruvchi korxonalar, ularning distribyutor va diler tashkilotlari, shuningdek, distribyutor tashkilotlarining dilerlik tashkilotlari”;

beshinchi xatboshi quyidagi tahrirda bayon etilsin:

“fuqarolar va yuridik shaxslar tomonidan distribyutor va diler tashkilotlariga, shu jumladan, “TRADE-IN” va “TRADE-UP” dasturlari boʻyicha;”;

quyidagi mazmundagi oltinchi xatboshi bilan toʻldirilsin:

“distribyutor va diler tashkilotlari tomonidan ilgari foydalanishda boʻlgan avtomototransport vositalarini sotishda;”;

oltinchi-yettinchi xatboshilar tegishlicha yettinchi-sakkizinchi xatboshilar deb hisoblansin;

b) 7-band quyidagi tahrirda bayon etilsin:

“7. Notariuslar tomonidan avtomototransport vositalari bilan bogʻliq bitimlarni tasdiqlash (tasarruf etish huquqisiz ishonchnomalar bundan mustasno) distribyutor va diler tashkilotlari tomonidan ilgari foydalanishda boʻlgan avtomototransport vositalarining oldi-sotdi shartnomasini, shu jumladan, “TRADE-IN” va “TRADE-UP” dasturlari boʻyicha oldi-sotdi shartnomasini rasmiylashtirish boshqa shaxsga berish taqiqlanmaganligi va xatlab qoʻyilmaganligi tekshirilgandan keyin amalga oshiriladi.

Notariuslar tomonidan avtomototransport vositasini boshqa shaxsga berish toʻgʻrisidagi shartnomani rasmiylashtirish davomida murojaat qiluvchilar tomonidan avtomototransport vositalari agregatlar raqamlarining roʻyxatdan oʻtkazish raqamlariga muvofiqligi yuzasidan koʻzdan kechiriladi va bu haqda shartnomada aks ettiriladi.

Distribyutor va diler tashkilotlari tomonidan ilgari foydalanishda boʻlgan avtomototransport vositalarining oldi-sotdi shartnomasini, shu jumladan, ular tomonidan “TRADE-IN” va “TRADE-UP” dasturlari boʻyicha oldi-sotdi shartnomasini rasmiylashtirishga qadar avtomototransport vositalari sotib oluvchining tanloviga koʻra, xohlagan DYHXX organlarida agregatlar raqamlari roʻyxatdan oʻtkazish raqamlariga muvofiqligi yuzasidan koʻzdan kechirilishi lozim. Bunda agregatlar raqamlarining roʻyxatdan oʻtkazish raqamlariga muvofiqligi yuzasidan maʼlumotnoma taqdim etiladi hamda ushbu maʼlumotnoma koʻzdan kechirgan mansabdor shaxsning familiyasi, ismi va otasi ismining bosh harflari, koʻzdan kechirilgan sana koʻrsatilgan va mansabdor shaxs imzosi qoʻyilgan holda shtamp bilan tasdiqlanadi. Maʼlumotnoma 10 kun mobaynida amal qiladi.

Avtomototransport vositasi koʻzdan kechirilganligi uchun toʻlov undirilmaydi”;

v) 10-bandning birinchi va uchinchi xatboshilaridagi “ixtisoslashtirilgan savdo korxonalari” soʻzlari “distribyutor yoki diler tashkilotlari” soʻzlari bilan almashtirilsin.

2. Vazirlar Mahkamasining 2017-yil 31-avgustdagi 683-son qarori bilan tasdiqlangan Avtomototransport vositalarini davlat roʻyxatidan oʻtkazish tartibi toʻgʻrisidagi nizomda :

a) 2-bandda :

oʻn toʻrtinchi-oʻn beshinchi xatboshilar quyidagi tahrirda bayon etilsin:

“TRADE-IN” — ilgari foydalanishda boʻlgan avtomototransport vositasini yangi avtomototransport vositasiga narxlaridagi farqni toʻlagan (narxlaridagi farqni olgan) holda almashtirish;

distribyutor tashkiloti — Oʻzbekiston Respublikasi hududida yangi avtomototransport vositalarini realizatsiya qilish boʻyicha ishlab chiqaruvchi bilan tegishli distribyutorlik kelishuviga ega yuridik shaxs;

quyidagi mazmundagi oʻn yettinchi-oʻn sakkizinchi xatboshilar bilan toʻldirilsin:

“diler tashkiloti — Oʻzbekiston Respublikasi hududida yangi avtomototransport vositalarini realizatsiya qilish boʻyicha distribyutor tashkiloti yoki ishlab chiqaruvchi bilan tegishli dilerlik kelishuviga ega yuridik shaxs;

“TRADE-UP” — ilgari foydalanishda boʻlgan avtomototransport vositasini ilgari foydalanishda boʻlgan avtomototransport vositasiga narxlaridagi farqni toʻlagan (narxlaridagi farqni olgan) holda almashtirish”;

b) 7-bandda :

ikkinchi xatboshi quyidagi mazmundagi ikkinchi — toʻrtinchi xatboshilar bilan almashtirilsin:

“Distribyutor va diler tashkilotlari tomonidan ilgari foydalanishda boʻlgan avtomototransport vositalarining oldi-sotdi shartnomasini, shu jumladan, ular tomonidan “TRADE-IN” va “TRADE-UP” dasturlari boʻyicha oldi-sotdi shartnomasini rasmiylashtirishdan oldin:

Oʻzbekiston Respublikasining Oila kodeksi 24-moddasi toʻrtinchi qismi talablariga rioya etgan holda xotin (er)ning notarial tartibda tasdiqlangan roziligi olinishi;

avtomototransport vositasi raqam agregatlari va boshqa texnik parametrlarining roʻyxatdan oʻtkazish maʼlumotlariga mos kelishi yuzasidan tekshirilishi uchun sotib oluvchining tanloviga koʻra xohlagan hududiy DYHXX organlariga taqdim etilishi zarur.”;

uchinchi xatboshi beshinchi xatboshi deb hisoblansin;

v) 18-bandda :

beshinchi-oltinchi xatboshilar quyidagi tahrirda bayon etilsin:

“distribyutor yoki diler tashkiloti tomonidan realizatsiya qilingan yangi va ilgari foydalanishda boʻlgan avtomototransport vositalariga, shu jumladan, “TRADE-IN” va “TRADE-UP” dasturlari boʻyicha avtomototransport vositalariga beriladigan elektron hisob-maʼlumot;

distribyutor yoki diler tashkiloti bilan tuzilgan ilgari foydalanishda boʻlgan avtomototransport vositasi oldi-sotdi shartnomasi, shu jumladan, “TRADE-IN” va “TRADE-UP” dasturlari boʻyicha tuzilgan ilgari foydalanishda boʻlgan avtomototransport vositasi oldi-sotdi shartnomasi”;

quyidagi mazmundagi oʻn uchinchi xatboshi bilan toʻldirilsin:

“ishlab chiqaruvchi va distribyutor yoki diler tashkiloti, shuningdek, distribyutor va diler tashkilotlari oʻrtasida avtomototransport vositasining oldi-sotdi shartnomasi va topshirish-qabul qilish dalolatnomasi”;

oʻn uchinchi xatboshi oʻn toʻrtinchi xatboshi deb hisoblansin;

g) 33-bandning “v 1 ” kichik band quyidagi tahrirda bayon etilsin:

“v 1 ) distribyutor yoki diler tashkiloti tomonidan, shu jumladan, “TRADE-IN” va “TRADE-UP” dasturlari boʻyicha ilgari foydalanishda boʻlgan avtomototransport vositasi sotib olinganda;”;

d) 36-bandning toʻrtinchi xatboshisidagi “ixtisoslashtirilgan savdo korxonasi” soʻzlari “distribyutor yoki diler tashkiloti” soʻzlari bilan almashtirilsin;

e) 36 1 -band kuyidagi tahrirda bayon etilsin:

“36 1 . Distribyutor yoki diler tashkiloti tomonidan ilgari foydalanishda boʻlgan avtomototransport vositasi sotib olinganda, shu jumladan, “TRADE-IN” va “TRADE-UP” dasturlari boʻyicha vaqtincha roʻyxatdan oʻtkazish uchun distribyutor yoki diler tashkiloti vakili hududiy DYHXX organlariga quyidagi hujjatlarni taqdim etadi:

distribyutor yoki diler tashkilotining arizasi;

distribyutor yoki diler tashkiloti vakilining shaxsini tasdiqlovchi hujjat;

oʻrnatilgan tartibda rasmiylashtirilgan distribyutor yoki diler tashkiloti vakilining ishonchnomasi;

distribyutor yoki diler tashkiloti bilan avtomototransport vositasining egasi oʻrtasida tuzilgan oldi-sotdi shartnomasi;

avtomototransport vositasining ROʻDRB va roʻyxatdan oʻtkazilganligi haqidagi guvohnomasi.

Distribyutor yoki diler tashkiloti tomonidan sotib olingan ilgari foydalanishda boʻlgan avtomototransport vositasini, shu jumladan, “TRADE-IN” va “TRADE-UP” dasturlari boʻyicha distribyutor va diler tashkiloti tomonidan DYHXX organlarida vaqtincha roʻyxatdan oʻtkazishda maʼlumotnoma beriladi (vaqtincha roʻyxatdan oʻtkazilgan avtomototransport vositasiga ROʻDRB va roʻyxatdan oʻtkazilganligi haqidagi guvohnoma berilmaydi).

Mazkur maʼlumotnoma avtomototransport vositasini boshqarish huquqini bermaydi (distribyutor yoki diler tashkilotining joylashgan manziliga yoki avtomototransport vositasini saqlash joyiga yetib olish bundan mustasno).

Distribyutor va diler tashkilotlari tomonidan ilgari foydalanishda boʻlgan avtomototransport vositalarini sotib olganlik uchun, shu jumladan, “TRADE-IN” va “TRADE-UP” dasturlari boʻyicha ularni DYHXX organlarida vaqtincha roʻyxatdan oʻtkazish vaqtida yigʻim toʻlanmaydi.”.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 22-avgust,

535-son

(Qonunchilik maʼlumotlari milliy bazasi, 25.08.2025-y., 09/25/535/0776-son)

lex.uz