📅 2025-yil 15-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 15 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 15 сентября 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 15 September 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Термит ва бошқа ҳашоратлардан зарарланган уй-жойларни аниқлаш ва яшаш учун яроқсиз деб топиш бўйича давлат хизматини кўрсатишнинг маъмурий регламентига ўзгартириш киритиш тўғрисида
Термит ва бошқа ҳашоратлардан зарарланган ва яроқсиз деб топилган уй-жой мулкдорларини ижтимоий қўллаб-қувватлаш ва уй-жой билан таъминлаш тартибини такомиллаштириш мақсадида Вазирлар Маҳкамаси қарор қилади:
1. Қуйидагилар:
Ўзбекистон Республикаси Уй-жой кодексига мувофиқ уй-жой авария ҳолатида ёки яшаш учун яроқсиз деб топилган бўлса, ушбу уй-жойдан кўчирилаётган фуқароларга маҳаллий давлат ҳокимияти органи қонунчиликда белгиланган тартибда бошқа обод турар жой бериши;
Вазирлар Маҳкамасининг 2024 йил 4 ноябрдаги 734-сон қарорига кўра уй-жойнинг термитлар ва бошқа ҳашоратлардан зарарлангани натижасида уй-жойнинг яроқсиз ҳолатга келганлигини тасдиқлаш бўйича хулоса келгусида уй-жой мулкдорларини белгиланган тартибда давлат томонидан уй-жой билан таъминлаш учун асос ҳисобланиши маълумот учун қабул қилинсин.
2. Вазирлар Маҳкамасининг 2024 йил 4 ноябрдаги 734-сон қарори билан тасдиқланган Термит ва бошқа ҳашоратлардан зарарланган уй-жойларни аниқлаш ва яшаш учун яроқсиз деб топиш бўйича давлат хизматини кўрсатишнинг маъмурий регламентининг 14-банди қуйидаги таҳрирда баён этилсин:
«14. Ариза берувчига берилган хулоса келгусида уни давлат томонидан белгиланган тартибда уй-жой билан таъминлаш учун асос ҳисобланади.
Бунда ушбу банднинг биринчи хатбошисида кўрсатилган тадбирлар маҳаллий бюджет маблағлари ҳисобидан молиялаштирилади».
3. Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари термит ҳамда бошқа ҳашоратлардан зарарланган ва яроқсиз деб топилган уй-жой мулкдорларини белгиланган тартибда 2025 йил учун тасдиқланган Қорақалпоғистон Республикаси бюджети, вилоятлар ҳамда Тошкент шаҳри маҳаллий бюджетларининг иқтисод қилинган маблағлари ва қўшимча манбалари ҳисобидан уй-жой билан таъминлаш чораларини кўрсин.
Қурилиш ва уй-жой коммунал хўжалиги вазирлиги Қишлоқ хўжалиги вазирлиги билан биргаликда уч ой муддатда илғор хорижий тажриба асосида термит ва бошқа ҳашоратлардан зарарланган уй-жойларни замонавий технологиялар асосида олдиндан аниқлаш ва улар билан курашиш (профилактика тадбирлари) бўйича Вазирлар Маҳкамасига асослантирилган таклиф киритсин.
4. Иқтисодиёт ва молия вазирлиги Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларининг сўровига асосан ушбу қарорда белгиланган чора-тадбирларни молиялаштириш учун 2026 йилдан бошлаб маҳаллий бюджет параметрлари шакллантирилишида тегишли маблағлар кўзда тутилишини таъминласин.
5. Адлия вазирлиги икки ой муддатда яшаш учун яроқсиз деб топилган, авария ҳолатида эканлиги ёки табиий офатдан зарар кўрган уй-жой мулкдорларини уй-жой билан таъминлаш тартибини белгиловчи қарор лойиҳасини Вазирлар Маҳкамасига киритсин.
6. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2025 йил 15 сентябрь,
579-сон
Oʻzbekiston Respublikasi Vazirlar Mahkamasining
qarori
Termit va boshqa hashoratlardan zararlangan uy-joylarni aniqlash va yashash uchun yaroqsiz deb topish boʻyicha davlat xizmatini koʻrsatishning maʼmuriy reglamentiga oʻzgartirish kiritish toʻgʻrisida
Termit va boshqa hashoratlardan zararlangan va yaroqsiz deb topilgan uy-joy mulkdorlarini ijtimoiy qoʻllab-quvvatlash va uy-joy bilan taʼminlash tartibini takomillashtirish maqsadida Vazirlar Mahkamasi qaror qiladi:
1. Quyidagilar:
Oʻzbekiston Respublikasi Uy-joy kodeksiga muvofiq uy-joy avariya holatida yoki yashash uchun yaroqsiz deb topilgan boʻlsa, ushbu uy-joydan koʻchirilayotgan fuqarolarga mahalliy davlat hokimiyati organi qonunchilikda belgilangan tartibda boshqa obod turar joy berishi;
Vazirlar Mahkamasining 2024-yil 4-noyabrdagi 734-son qaroriga koʻra uy-joyning termitlar va boshqa hashoratlardan zararlangani natijasida uy-joyning yaroqsiz holatga kelganligini tasdiqlash boʻyicha xulosa kelgusida uy-joy mulkdorlarini belgilangan tartibda davlat tomonidan uy-joy bilan taʼminlash uchun asos hisoblanishi maʼlumot uchun qabul qilinsin.
2. Vazirlar Mahkamasining 2024-yil 4-noyabrdagi 734-son qarori bilan tasdiqlangan Termit va boshqa hashoratlardan zararlangan uy-joylarni aniqlash va yashash uchun yaroqsiz deb topish boʻyicha davlat xizmatini koʻrsatishning maʼmuriy reglamentining 14-bandi quyidagi tahrirda bayon etilsin:
“14. Ariza beruvchiga berilgan xulosa kelgusida uni davlat tomonidan belgilangan tartibda uy-joy bilan taʼminlash uchun asos hisoblanadi.
Bunda ushbu bandning birinchi xatboshisida koʻrsatilgan tadbirlar mahalliy budjet mablagʻlari hisobidan moliyalashtiriladi”.
3. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari termit hamda boshqa hashoratlardan zararlangan va yaroqsiz deb topilgan uy-joy mulkdorlarini belgilangan tartibda 2025-yil uchun tasdiqlangan Qoraqalpogʻiston Respublikasi budjeti, viloyatlar hamda Toshkent shahri mahalliy budjetlarining iqtisod qilingan mablagʻlari va qoʻshimcha manbalari hisobidan uy-joy bilan taʼminlash choralarini koʻrsin.
Qurilish va uy-joy kommunal xoʻjaligi vazirligi Qishloq xoʻjaligi vazirligi bilan birgalikda uch oy muddatda ilgʻor xorijiy tajriba asosida termit va boshqa hashoratlardan zararlangan uy-joylarni zamonaviy texnologiyalar asosida oldindan aniqlash va ular bilan kurashish (profilaktika tadbirlari) boʻyicha Vazirlar Mahkamasiga asoslantirilgan taklif kiritsin.
4. Iqtisodiyot va moliya vazirligi Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining soʻroviga asosan ushbu qarorda belgilangan chora-tadbirlarni moliyalashtirish uchun 2026-yildan boshlab mahalliy budjet parametrlari shakllantirilishida tegishli mablagʻlar koʻzda tutilishini taʼminlasin.
5. Adliya vazirligi ikki oy muddatda yashash uchun yaroqsiz deb topilgan, avariya holatida ekanligi yoki tabiiy ofatdan zarar koʻrgan uy-joy mulkdorlarini uy-joy bilan taʼminlash tartibini belgilovchi qaror loyihasini Vazirlar Mahkamasiga kiritsin.
6. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 15-sentabr,
579-son