📅 2025-yil 29-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 29 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 29 сентября 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 29 September 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
РЎЙХАТИ
РЎЙХАТИ
Ихтисослаштирилган таълим муассасалари агентлиги тизимида табиий фанлар йўналишига ихтисослаштирилган мактаблар тармоғини кенгайтириш чора-тадбирлари тўғрисида
Табиий фанлар соҳасида юқори малакали кадрларни тайёрлаш, соҳа бўйича иқтидорли ўқувчиларни аниқлаш ҳамда уларнинг қобилиятларини рўёбга чиқариш тизимини янада такомиллаштириш мақсадида Вазирлар Маҳкамаси қарор қилади:
1. Мактабгача ва мактаб таълими вазирлигининг Ихтисослаштирилган таълим муассасалари агентлиги (кейинги ўринларда — Агентлик) тизимидаги таълим ташкилотлари, шунингдек, вазирликлар ва идоралар тизимидаги умумий ўрта таълим ва касбий таълим ташкилотлари негизида Абу Али ибн Сино номидаги ихтисослаштирилган мактабнинг филиалларини (кейинги ўринларда — филиаллар) ташкил этиш тўғрисидаги таклифига розилик берилсин.
2. Қуйидагилар:
2025 йилда ташкил этиладиган Абу Али ибн Сино номидаги ихтисослаштирилган мактаб филиалларининг рўйхати 1-иловага мувофиқ;
2026-2027 йилларда янгидан қуриладиган ва реконструкция қилинадиган Абу Али ибн Сино номидаги ихтисослаштирилган мактаб филиалларининг манзилли рўйхати 2-иловага мувофиқ тасдиқлансин.
3. Масъул вазирлик, идора ва ташкилотлар бир ой муддатда ушбу қарорга 1-иловада кўрсатилган таълим ташкилотлари фаолияти тугатилиши, уларнинг мол-мулки, бино ва иншоотлари оператив бошқариш ҳуқуқи асосида Агентлик тизимига ўтказилишини таъминласин.
4. Қорақалпоғистон Республикаси Вазирлар Кенгаши, Тошкент ва Фарғона вилоятлари ҳокимликлари 2025 йил 1 ноябрга қадар ушбу қарорга 1-иловага мувофиқ тегишлича Агентлик тизимида ташкил этилаётган Абу Али ибн Сино номидаги ихтисослаштирилган мактаб филиалларининг бино ва иншоотларини таъмирлаш, белгиланган талаблар асосида жиҳозлаш, ўқувчиларга яшаш ва овқатланиш учун зарур шароитларни яратиш чораларини кўрсин.
5. Белгилансинки:
Тошкент шаҳридаги Абу Али ибн Сино номидаги ихтисослаштирилган мактаб табиий фанлар йўналиши бўйича таянч мактаб (кейинги ўринларда — таянч мактаб) ҳисобланади;
таянч мактабнинг директори ҳамда унинг филиали ижрочи директори Агентлик директори томонидан лавозимга тайинланади ва лавозимидан озод этилади;
таянч мактаб ва филиалларга раҳбар кадрлар икки босқичли (саралаш ва суҳбат), педагог кадрлар уч босқичли (саралаш, тест синови ва суҳбат) танлов асосида ишга қабул қилинади;
филиаллар ходимлари меҳнатига Ўзбекистон Республикаси Президентининг «Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ихтисослаштирилган мактаблар тармоғини кенгайтириш тўғрисида» 2022 йил 14 апрелдаги ПФ-106-сон Фармонига мувофиқ ташкил этилган ихтисослаштирилган мактаблар учун белгиланган шартларда ҳақ тўланади;
таянч мактаб ва филиалларга қабул 7-синфдан бошланади, бунда бир синфда ўқувчиларнинг энг кўп сони 24 нафардан ошмаслигини ҳисобга олган ҳолда, қабул параметрлари Агентлик томонидан белгиланади;
филиалларга ўқувчилар таянч мактаб учун белгиланган тартиб асосида саралаб олинади;
филиалларда ўқувчилар учун турар жой ҳамда аутсорсинг асосида белгиланган тартибда бепул соғлом овқатлантириш ташкил этилади;
филиалларнинг қурилиш ишлари таянч мактабнинг шароитидан кам бўлмаган, ягона ёндашув асосида 2026-2027 йилларда Қорақалпоғистон Республикаси Вазирлар Кенгаши, вилоятлар ҳокимликлари томонидан Агентлик билан келишилган ҳолда амалга оширилади;
филиаллар замонавий талабларга мувофиқ пластик қопламали (HPL панел) синф столи, пластик қопламали, эгри елимланган фанерали синф стуллари билан жиҳозланади;
филиаллар битирувчиларига таянч мактаб битирувчилари учун давлат олий таълим ташкилотларига ўқишга кириш бўйича қонунчилик ҳужжатлари билан берилган имтиёзлар татбиқ этилмайди;
филиалларни сақлаш билан боғлиқ харажатлар тегишли маҳаллий бюджет маблағлари ҳисобидан молиялаштирилади.
6. Мактабгача ва мактаб таълими вазирлиги:
а) 2025 йил 15 октябрга қадар таянч мактаб, филиаллар ҳамда Агентлик тизимидаги ихтисослаштирилган мактаблар учун лавозимлар ва штат бирликларининг намунавий штат жадвалини манфаатдор вазирлик ва идоралар билан келишган ҳолда тасдиқласин;
б) белгиланган муддатларда филиаллар фаолиятини ташкил этсин. Бунда:
ўқувчиларнинг инновацион ғоялари ва ишланмаларини ривожлантириш, замонавий касбларга ўргатиш учун уларнинг қизиқиш ва қобилиятларини инобатга олган ҳолда зарур шарт-шароитлар яратсин;
кимё, биология, агротехнология, биотехнология фанлари умумий дарс соатлари фонди доирасида қўшимча ўқув дастурлари асосида ўқитилишини таъминласин;
в) Жиззах, Сурхондарё ва Бухоро вилоятлари ҳокимликлари билан биргаликда ушбу қарорга 1-иловада кўрсатилган ихтисослаштирилган мактаб-интернатларнинг аниқ фанлар йўналишида таълим олаётган ўқувчиларини Агентлик тизимидаги бошқа ихтисослаштирилган мактабларга жойлаштириш чораларини кўрсин;
г) Қурилиш ва уй-жой коммунал хўжалиги вазирлиги, Андижон, Қашқадарё, Навоий, Наманган, Самарқанд, Сирдарё, Фарғона ҳамда Хоразм вилоятлари ҳокимликлари билан биргаликда ушбу қарорга 2-иловада кўрсатилган мактабларнинг қурилиш ва жиҳозлаш ишларини босқичма-босқич 2026-2027 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш дастурига киритиш юзасидан тегишли таклифларни тайёрласин ҳамда Иқтисодиёт ва молия вазирлигига тақдим этсин.
7. Белгилаб қўйилсинки, филиаллар таъминоти билан боғлиқ харажатлар:
2025 йилда биринчи даражали бюджет маблағлари тақсимловчиси сифатида Мактабгача ва мактаб таълими вазирлигига ҳамда Қорақалпоғистон Республикаси, вилоятлар ва Тошкент шаҳри маҳаллий бюджетларига ажратилган маблағлар доирасида амалга оширилади;
2026 йилдан бошлаб Давлат бюджети параметрларида назарда тутилади.
8. Ўзбекистон Республикаси Ҳукуматининг 3-иловага мувофиқ айрим қарорларига қўшимчалар киритилсин.
9. Мактабгача ва мактаб таълими вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.
10. Ушбу қарорнинг бажарилишини назорат қилиш Ўзбекистон Республикаси мактабгача ва мактаб таълими вазири Э.Г. Каримова зиммасига юклансин.
Вазирлар Маҳкамасининг 2025 йил 29 сентябрдаги 608-сон қарорига 1-ИЛОВА
2025 йилда ташкил этиладиган Абу Али ибн Сино номидаги ихтисослаштирилган мактаб филиалларининг
Т/р Туман (шаҳар) номи Негизида ихтисослаштирилган мактаб филиали ташкил этилаётган таълим ташкилоти номи Агентлик тизимида ташкил этилаётган ихтисослаштирилган мактаб филиали номи Қуввати 1. Хўжайли тумани Хўжайли туман 2-сон ихтисослаштирилган мактаб-интернати Абу Али ибн Сино номидаги ихтисослаштирилган мактабнинг Хўжайли филиали 480 2. Бухоро шаҳри Бухоро шаҳар 2-сон ихтисослаштирилган мактаб-интернати Абу Али ибн Сино номидаги ихтисослаштирилган мактабнинг Бухоро филиали 360 3. Жиззах шаҳри Жиззах шаҳар 2-сон ихтисослаштирилган мактаб-интернати Абу Али ибн Сино номидаги ихтисослаштирилган мактабнинг Жиззах филиали 240 4. Термиз шаҳри Термиз шаҳар 2-сон ихтисослаштирилган мактаб-интернати Абу Али ибн Сино номидаги ихтисослаштирилган мактабнинг Термиз филиали 240 5. Фарғона шаҳри Фарғона шаҳар 2-сон ихтисослаштирилган мактаб-интернати Абу Али ибн Сино номидаги ихтисослаштирилган мактабнинг Фарғона филиали 610 6. Чиноз тумани Чиноз туманидаги Республика қиз болалар ўқув-тарбия муассасаси Абу Али ибн Сино номидаги ихтисослаштирилган мактабнинг Чиноз филиали 240
Вазирлар Маҳкамасининг 2025 йил 29 сентябрдаги 608-сон қарорига 2-ИЛОВА
2026-2027 йилларда янгидан қуриладиган ва реконструкция қилинадиган Абу Али ибн Сино номидаги ихтисослаштирилган мактаб филиалларининг манзилли
Т/р Туман (шаҳар) номи 2026 йил 2027 йил Жами 1. Гулистон шаҳри 1 1 2. Қарши шаҳри 1 1 3. Наманган шаҳри 1 1 4. Андижон шаҳри 1 1 5. Навоий шаҳри 1 1 6. Самарқанд шаҳри 1 1 7. Фарғона шаҳри * 1 1 8. Урганч шаҳри 1 1 Ҳаммаси: 3 5 8
Вазирлар Маҳкамасининг 2025 йил 29 сентябрдаги 608-сон қарорига 3-ИЛОВА
Ўзбекистон Республикаси Ҳукуматининг айрим қарорларига киритилаётган қўшимчалар
1. Вазирлар Маҳкамасининг 2017 йил 22 майдаги 304-сон қарори билан тасдиқланган Олий таълимдан кейинги таълим тўғрисидаги низомнинг 1-банди қуйидаги мазмундаги иккинчи хатбоши билан тўлдирилсин:
«Ушбу Низом Ал-Хоразмий университетига нисбатан татбиқ этилмайди».
2. Вазирлар Маҳкамасининг 2017 йил 21 ноябрдаги 930-сон қарори билан тасдиқланган Олий таълим муассасасида сиртқи (махсус сиртқи) таълимни ташкил этиш тартиби тўғрисидаги низомнинг 4-банди «соғлиқни сақлаш,» сўзларидан кейин «Ал-Хоразмий университети,» сўзлари билан тўлдирилсин.
3. Вазирлар Маҳкамасининг 2020 йил 31 декабрдаги 824-сон қарори билан тасдиқланган Олий таълим муассасаларида ўқув жараёнига кредит-модуль тизимини жорий этиш тартиби тўғрисидаги низомнинг 1-банди иккинчи хатбошиси «олий ҳарбий таълим муассасаларига,» сўзларидан кейин «Ал-Хоразмий университетига,» сўзлари билан тўлдирилсин.
Ўзбекистон Республикасининг Бош вазири А. АРИПОВ
Тошкент ш.,
2025 йил 29 сентябрь,
608-сон
Oʻzbekiston Respublikasi Vazirlar Mahkamasining
qarori
ROʻYXATI
ROʻYXATI
Ixtisoslashtirilgan taʼlim muassasalari agentligi tizimida tabiiy fanlar yoʻnalishiga ixtisoslashtirilgan maktablar tarmogʻini kengaytirish chora-tadbirlari toʻgʻrisida
Tabiiy fanlar sohasida yuqori malakali kadrlarni tayyorlash, soha boʻyicha iqtidorli oʻquvchilarni aniqlash hamda ularning qobiliyatlarini roʻyobga chiqarish tizimini yanada takomillashtirish maqsadida Vazirlar Mahkamasi qaror qiladi:
1. Maktabgacha va maktab taʼlimi vazirligining Ixtisoslashtirilgan taʼlim muassasalari agentligi (keyingi oʻrinlarda — Agentlik) tizimidagi taʼlim tashkilotlari, shuningdek, vazirliklar va idoralar tizimidagi umumiy oʻrta taʼlim va kasbiy taʼlim tashkilotlari negizida Abu Ali ibn Sino nomidagi ixtisoslashtirilgan maktabning filiallarini (keyingi oʻrinlarda — filiallar) tashkil etish toʻgʻrisidagi taklifiga rozilik berilsin.
2. Quyidagilar:
2025-yilda tashkil etiladigan Abu Ali ibn Sino nomidagi ixtisoslashtirilgan maktab filiallarining roʻyxati 1-ilovaga muvofiq;
2026-2027-yillarda yangidan quriladigan va rekonstruksiya qilinadigan Abu Ali ibn Sino nomidagi ixtisoslashtirilgan maktab filiallarining manzilli roʻyxati 2-ilovaga muvofiq tasdiqlansin.
3. Masʼul vazirlik, idora va tashkilotlar bir oy muddatda ushbu qarorga 1-ilovada koʻrsatilgan taʼlim tashkilotlari faoliyati tugatilishi, ularning mol-mulki, bino va inshootlari operativ boshqarish huquqi asosida Agentlik tizimiga oʻtkazilishini taʼminlasin.
4. Qoraqalpogʻiston Respublikasi Vazirlar Kengashi, Toshkent va Fargʻona viloyatlari hokimliklari 2025-yil 1-noyabrga qadar ushbu qarorga 1-ilovaga muvofiq tegishlicha Agentlik tizimida tashkil etilayotgan Abu Ali ibn Sino nomidagi ixtisoslashtirilgan maktab filiallarining bino va inshootlarini taʼmirlash, belgilangan talablar asosida jihozlash, oʻquvchilarga yashash va ovqatlanish uchun zarur sharoitlarni yaratish choralarini koʻrsin.
5. Belgilansinki:
Toshkent shahridagi Abu Ali ibn Sino nomidagi ixtisoslashtirilgan maktab tabiiy fanlar yoʻnalishi boʻyicha tayanch maktab (keyingi oʻrinlarda — tayanch maktab) hisoblanadi;
tayanch maktabning direktori hamda uning filiali ijrochi direktori Agentlik direktori tomonidan lavozimga tayinlanadi va lavozimidan ozod etiladi;
tayanch maktab va filiallarga rahbar kadrlar ikki bosqichli (saralash va suhbat), pedagog kadrlar uch bosqichli (saralash, test sinovi va suhbat) tanlov asosida ishga qabul qilinadi;
filiallar xodimlari mehnatiga Oʻzbekiston Respublikasi Prezidentining “Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ixtisoslashtirilgan maktablar tarmogʻini kengaytirish toʻgʻrisida” 2022-yil 14-apreldagi PF-106-son Farmoniga muvofiq tashkil etilgan ixtisoslashtirilgan maktablar uchun belgilangan shartlarda haq toʻlanadi;
tayanch maktab va filiallarga qabul 7-sinfdan boshlanadi, bunda bir sinfda oʻquvchilarning eng koʻp soni 24 nafardan oshmasligini hisobga olgan holda, qabul parametrlari Agentlik tomonidan belgilanadi;
filiallarga oʻquvchilar tayanch maktab uchun belgilangan tartib asosida saralab olinadi;
filiallarda oʻquvchilar uchun turar joy hamda autsorsing asosida belgilangan tartibda bepul sogʻlom ovqatlantirish tashkil etiladi;
filiallarning qurilish ishlari tayanch maktabning sharoitidan kam boʻlmagan, yagona yondashuv asosida 2026-2027-yillarda Qoraqalpogʻiston Respublikasi Vazirlar Kengashi, viloyatlar hokimliklari tomonidan Agentlik bilan kelishilgan holda amalga oshiriladi;
filiallar zamonaviy talablarga muvofiq plastik qoplamali (HPL panel) sinf stoli, plastik qoplamali, egri yelimlangan fanerali sinf stullari bilan jihozlanadi;
filiallar bitiruvchilariga tayanch maktab bitiruvchilari uchun davlat oliy taʼlim tashkilotlariga oʻqishga kirish boʻyicha qonunchilik hujjatlari bilan berilgan imtiyozlar tatbiq etilmaydi;
filiallarni saqlash bilan bogʻliq xarajatlar tegishli mahalliy budjet mablagʻlari hisobidan moliyalashtiriladi.
6. Maktabgacha va maktab taʼlimi vazirligi:
a) 2025-yil 15-oktabrga qadar tayanch maktab, filiallar hamda Agentlik tizimidagi ixtisoslashtirilgan maktablar uchun lavozimlar va shtat birliklarining namunaviy shtat jadvalini manfaatdor vazirlik va idoralar bilan kelishgan holda tasdiqlasin;
b) belgilangan muddatlarda filiallar faoliyatini tashkil etsin. Bunda:
oʻquvchilarning innovatsion gʻoyalari va ishlanmalarini rivojlantirish, zamonaviy kasblarga oʻrgatish uchun ularning qiziqish va qobiliyatlarini inobatga olgan holda zarur shart-sharoitlar yaratsin;
kimyo, biologiya, agrotexnologiya, biotexnologiya fanlari umumiy dars soatlari fondi doirasida qoʻshimcha oʻquv dasturlari asosida oʻqitilishini taʼminlasin;
v) Jizzax, Surxondaryo va Buxoro viloyatlari hokimliklari bilan birgalikda ushbu qarorga 1-ilovada koʻrsatilgan ixtisoslashtirilgan maktab-internatlarning aniq fanlar yoʻnalishida taʼlim olayotgan oʻquvchilarini Agentlik tizimidagi boshqa ixtisoslashtirilgan maktablarga joylashtirish choralarini koʻrsin;
g) Qurilish va uy-joy kommunal xoʻjaligi vazirligi, Andijon, Qashqadaryo, Navoiy, Namangan, Samarqand, Sirdaryo, Fargʻona hamda Xorazm viloyatlari hokimliklari bilan birgalikda ushbu qarorga 2-ilovada koʻrsatilgan maktablarning qurilish va jihozlash ishlarini bosqichma-bosqich 2026-2027-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturiga kiritish yuzasidan tegishli takliflarni tayyorlasin hamda Iqtisodiyot va moliya vazirligiga taqdim etsin.
7. Belgilab qoʻyilsinki, filiallar taʼminoti bilan bogʻliq xarajatlar:
2025-yilda birinchi darajali budjet mablagʻlari taqsimlovchisi sifatida Maktabgacha va maktab taʼlimi vazirligiga hamda Qoraqalpogʻiston Respublikasi, viloyatlar va Toshkent shahri mahalliy budjetlariga ajratilgan mablagʻlar doirasida amalga oshiriladi;
2026-yildan boshlab Davlat budjeti parametrlarida nazarda tutiladi.
8. Oʻzbekiston Respublikasi Hukumatining 3-ilovaga muvofiq ayrim qarorlariga qoʻshimchalar kiritilsin.
9. Maktabgacha va maktab taʼlimi vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
10. Ushbu qarorning bajarilishini nazorat qilish Oʻzbekiston Respublikasi maktabgacha va maktab taʼlimi vaziri E.G. Karimova zimmasiga yuklansin.
Vazirlar Mahkamasining 2025-yil 29-sentabrdagi 608-son qaroriga 1-ILOVA
2025-yilda tashkil etiladigan Abu Ali ibn Sino nomidagi ixtisoslashtirilgan maktab filiallarining
T/r Tuman (shahar) nomi Negizida ixtisoslashtirilgan maktab filiali tashkil etilayotgan taʼlim tashkiloti nomi Agentlik tizimida tashkil etilayotgan ixtisoslashtirilgan maktab filiali nomi Quvvati 1. Xoʻjayli tumani Xoʻjayli tuman 2-son ixtisoslashtirilgan maktab-internati Abu Ali ibn Sino nomidagi ixtisoslashtirilgan maktabning Xoʻjayli filiali 480 2. Buxoro shahri Buxoro shahar 2-son ixtisoslashtirilgan maktab-internati Abu Ali ibn Sino nomidagi ixtisoslashtirilgan maktabning Buxoro filiali 360 3. Jizzax shahri Jizzax shahar 2-son ixtisoslashtirilgan maktab-internati Abu Ali ibn Sino nomidagi ixtisoslashtirilgan maktabning Jizzax filiali 240 4. Termiz shahri Termiz shahar 2-son ixtisoslashtirilgan maktab-internati Abu Ali ibn Sino nomidagi ixtisoslashtirilgan maktabning Termiz filiali 240 5. Fargʻona shahri Fargʻona shahar 2-son ixtisoslashtirilgan maktab-internati Abu Ali ibn Sino nomidagi ixtisoslashtirilgan maktabning Fargʻona filiali 610 6. Chinoz tumani Chinoz tumanidagi Respublika qiz bolalar oʻquv-tarbiya muassasasi Abu Ali ibn Sino nomidagi ixtisoslashtirilgan maktabning Chinoz filiali 240
Vazirlar Mahkamasining 2025-yil 29-sentabrdagi 608-son qaroriga 2-ILOVA
2026-2027-yillarda yangidan quriladigan va rekonstruksiya qilinadigan Abu Ali ibn Sino nomidagi ixtisoslashtirilgan maktab filiallarining manzilli
T/r Tuman (shahar) nomi 2026-yil 2027-yil Jami 1. Guliston shahri 1 1 2. Qarshi shahri 1 1 3. Namangan shahri 1 1 4. Andijon shahri 1 1 5. Navoiy shahri 1 1 6. Samarqand shahri 1 1 7. Fargʻona shahri * 1 1 8. Urganch shahri 1 1 Hammasi: 3 5 8
Vazirlar Mahkamasining 2025-yil 29-sentabrdagi 608-son qaroriga 3-ILOVA
Oʻzbekiston Respublikasi Hukumatining ayrim qarorlariga kiritilayotgan qoʻshimchalar
1. Vazirlar Mahkamasining 2017-yil 22-maydagi 304-son qarori bilan tasdiqlangan Oliy taʼlimdan keyingi taʼlim toʻgʻrisidagi nizomning 1-bandi quyidagi mazmundagi ikkinchi xatboshi bilan toʻldirilsin:
“Ushbu Nizom Al-Xorazmiy universitetiga nisbatan tatbiq etilmaydi”.
2. Vazirlar Mahkamasining 2017-yil 21-noyabrdagi 930-son qarori bilan tasdiqlangan Oliy taʼlim muassasasida sirtqi (maxsus sirtqi) taʼlimni tashkil etish tartibi toʻgʻrisidagi nizomning 4-bandi “sogʻliqni saqlash,” soʻzlaridan keyin “Al-Xorazmiy universiteti,” soʻzlari bilan toʻldirilsin.
3. Vazirlar Mahkamasining 2020-yil 31-dekabrdagi 824-son qarori bilan tasdiqlangan Oliy taʼlim muassasalarida oʻquv jarayoniga kredit-modul tizimini joriy etish tartibi toʻgʻrisidagi nizomning 1-bandi ikkinchi xatboshisi “oliy harbiy taʼlim muassasalariga,” soʻzlaridan keyin “Al-Xorazmiy universitetiga,” soʻzlari bilan toʻldirilsin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 29-sentabr,
608-son