📅 2025-yil 27-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 27 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 октября 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 27 October 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Акциядорлик жамияти шаклидаги «Oʻzbekiston qayta sugʻurta kompaniyasi» миллий қайта суғурта ташкилотини ташкил этиш чора-тадбирлари тўғрисида
Ўзбекистон Республикаси Президентининг «Мамлакатимизда қайта суғурта тизимини янада такомиллаштириш чора-тадбирлари тўғрисида» 2025 йил 23 майдаги ПҚ-191-сон қарори ижросини таъминлаш, қайта суғурта хизматлари экспортини ошириш ҳамда самарали қайта суғурта тизимини ташкил этиш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Мамлакатимизда қайта суғурта тизимини янада такомиллаштириш чора-тадбирлари тўғрисида» 2025 йил 23 майдаги ПҚ-191-сон қарорига мувофиқ:
Истиқболли лойиҳалар миллий агентлиги (кейинги ўринларда — Агентлик), Иқтисодиёт ва молия вазирлигининг «Oʻzbekiston qayta sugʻurta kompaniyasi» миллий қайта суғурта ташкилотини (кейинги ўринларда — Компания) ташкил этиш ва унинг фаолиятининг асосий йўналишларини белгилаш тўғрисидаги таклифлари маъқуллангани;
Компания акциядорлик жамияти шаклида ташкил қилиниши ҳамда қонунчилик ҳужжатларида белгиланган тартибда қайта суғурта фаолиятини амалга ошириши;
Компаниянинг устав капитали 300 миллиард сўмдан кам бўлмаган микдорда шакллантирилиши, унинг эллик фоизини давлат улуши ва эллик фоизини хусусий инвесторлар улуши ташкил этиши белгилангани маълумот учун қабул қилинсин.
2. Агентлик:
Адлия вазирлиги билан биргаликда Компанияни белгиланган тартибда давлат рўйхатидан ўтказиш ҳамда унинг тегишли бошқарув органларини шакллантириш ҳамда Компания фаолиятини ташкил этиш билан боғлиқ бўлган чора-тадбирлари амалга оширилишини таъминласин;
бир ой муддатда Компания устав капиталидаги давлат улушининг беш фоизи Компания ташкил этилганидан сўнг, қолган қисми чораклик тенг улушларда бир йил давомида киритилишини;
Компанияга қонунчилик ҳужжатларида белгиланган тартибда қайта суғурта фаолиятини амалга ошириш учун лицензия берилишини;
қайта суғурта қилиш соҳасида етакчи халқаро компанияларни Компания устав капиталига хусусий инвестор сифатида жалб этиш бўйича амалий чоралар кўрилишини таъминласин.
3. Компанияга:
белгиланган тартибда хорижий банкларда жорий ҳисобварақларни очиш ва банк депозитлари бўйича тўловларни амалга ошириш учун улар бўйича операцияларни ўтказиш, суғурта тўловлари, суғурта ва инвестиция фаолияти билан боғлиқ бошқа операцияларни амалга оширишга;
ўзида қолдирилган улуш миқдоридан ортиқ мажбуриятларни қабул қилишни ўзининг ички ҳужжатларида белгиланган талабларга мувофиқ амалга оширишга;
харид қилиш тартиб-таомилларини электрон шаклда ўтказмасдан, ишлаб чиқарувчи ва етказиб берувчиларнинг энг яхши таклифларини танлаб олиш асосида Компания фаолияти учун зарур бўлган жиҳозлар, техникалар, алоқа ва ахборот коммуникация технологиялари воситаларини, шунингдек, ахборот тизимлари ва анжомларни харид қилишга рухсат берилсин.
4. Белгилансинки, 2031 йил 1 январга қадар Компания акцияларининг давлат улуши бўйича дивидендлари, истисно тариқасида, тўлиқ Агентликка ўтказилади.
5. Давлат активларини бошқариш агентлиги Агентлик билан биргаликда бир ой муддатда Компанияни жойлаштириш учун белгиланган тартибда бино ва иншоотлар ажратилишини таъминласин.
6. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2025 йил 27 октябрь,
678-сон
Oʻzbekiston Respublikasi Vazirlar Mahkamasining
qarori
Aksiyadorlik jamiyati shaklidagi “Oʻzbekiston qayta sugʻurta kompaniyasi” milliy qayta sugʻurta tashkilotini tashkil etish chora-tadbirlari toʻgʻrisida
Oʻzbekiston Respublikasi Prezidentining “Mamlakatimizda qayta sugʻurta tizimini yanada takomillashtirish chora-tadbirlari toʻgʻrisida” 2025-yil 23-maydagi PQ-191-son qarori ijrosini taʼminlash, qayta sugʻurta xizmatlari eksportini oshirish hamda samarali qayta sugʻurta tizimini tashkil etish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Mamlakatimizda qayta sugʻurta tizimini yanada takomillashtirish chora-tadbirlari toʻgʻrisida” 2025-yil 23-maydagi PQ-191-son qaroriga muvofiq:
Istiqbolli loyihalar milliy agentligi (keyingi oʻrinlarda — Agentlik), Iqtisodiyot va moliya vazirligining “Oʻzbekiston qayta sugʻurta kompaniyasi” milliy qayta sugʻurta tashkilotini (keyingi oʻrinlarda — Kompaniya) tashkil etish va uning faoliyatining asosiy yoʻnalishlarini belgilash toʻgʻrisidagi takliflari maʼqullangani;
Kompaniya aksiyadorlik jamiyati shaklida tashkil qilinishi hamda qonunchilik hujjatlarida belgilangan tartibda qayta sugʻurta faoliyatini amalga oshirishi;
Kompaniyaning ustav kapitali 300 milliard soʻmdan kam boʻlmagan mikdorda shakllantirilishi, uning ellik foizini davlat ulushi va ellik foizini xususiy investorlar ulushi tashkil etishi belgilangani maʼlumot uchun qabul qilinsin.
2. Agentlik:
Adliya vazirligi bilan birgalikda Kompaniyani belgilangan tartibda davlat roʻyxatidan oʻtkazish hamda uning tegishli boshqaruv organlarini shakllantirish hamda Kompaniya faoliyatini tashkil etish bilan bogʻliq boʻlgan chora-tadbirlari amalga oshirilishini taʼminlasin;
bir oy muddatda Kompaniya ustav kapitalidagi davlat ulushining besh foizi Kompaniya tashkil etilganidan soʻng, qolgan qismi choraklik teng ulushlarda bir yil davomida kiritilishini;
Kompaniyaga qonunchilik hujjatlarida belgilangan tartibda qayta sugʻurta faoliyatini amalga oshirish uchun litsenziya berilishini;
qayta sugʻurta qilish sohasida yetakchi xalqaro kompaniyalarni Kompaniya ustav kapitaliga xususiy investor sifatida jalb etish boʻyicha amaliy choralar koʻrilishini taʼminlasin.
3. Kompaniyaga:
belgilangan tartibda xorijiy banklarda joriy hisobvaraqlarni ochish va bank depozitlari boʻyicha toʻlovlarni amalga oshirish uchun ular boʻyicha operatsiyalarni oʻtkazish, sugʻurta toʻlovlari, sugʻurta va investitsiya faoliyati bilan bogʻliq boshqa operatsiyalarni amalga oshirishga;
oʻzida qoldirilgan ulush miqdoridan ortiq majburiyatlarni qabul qilishni oʻzining ichki hujjatlarida belgilangan talablarga muvofiq amalga oshirishga;
xarid qilish tartib-taomillarini elektron shaklda oʻtkazmasdan, ishlab chiqaruvchi va yetkazib beruvchilarning eng yaxshi takliflarini tanlab olish asosida Kompaniya faoliyati uchun zarur boʻlgan jihozlar, texnikalar, aloqa va axborot kommunikatsiya texnologiyalari vositalarini, shuningdek, axborot tizimlari va anjomlarni xarid qilishga ruxsat berilsin.
4. Belgilansinki, 2031-yil 1-yanvarga qadar Kompaniya aksiyalarining davlat ulushi boʻyicha dividendlari, istisno tariqasida, toʻliq Agentlikka oʻtkaziladi.
5. Davlat aktivlarini boshqarish agentligi Agentlik bilan birgalikda bir oy muddatda Kompaniyani joylashtirish uchun belgilangan tartibda bino va inshootlar ajratilishini taʼminlasin.
6. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 27-oktabr,
678-son