UzbekAI

Ўзбекистон Республикаси Вазирлар Маҳкамасининг

қарори

Навоий вилоятининг Хатирчи туманида жамоат эҳтиёжлари учун айрим ер участкаларини олиб қўйиш ва мулкдорларга етказилган зарарларни қоплаш тўғрисида

Ўзбекистон Республикасининг «Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида»ги Қонунига мувофиқ ҳамда Ўзбекистон Республикаси Президентининг «Республика ҳудудларини жадал комплекс ривожлантириш учун танлаб олинган туман (шаҳар)ларда амалий чора-тадбирларни амалга ошириш тўғрисида» 2025 йил 1 апрелдаги ПҚ-132-сон қарори ижросини таъминлаш мақсадида Вазирлар Маҳкамаси қарор қилади:

1. Қуйидагилар:

а) Ўзбекистон Республикаси Президентининг «2024 — 2026 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида» 2023 йил 25 декабрдаги ПҚ-404-сон қарори билан тасдиқланган 2024 йилда Навоий вилоятида объектларни қуриш, реконструкция қилиш, мукаммал таъмирлаш ва жиҳозлаш бўйича манзилли рўйхатга асосан Хатирчи тумани марказидан ўтувчи 4Р56 «Оқтош ш. — Янгиработ ш. — Лангар қ. — Чуя қ.» автомобиль йўлининг 11 — 16 км қисмини реконструкция қилиш белгилангани;

б) Ўзбекистон Республикаси Президентининг «Республика ҳудудларини жадал комплекс ривожлантириш учун танлаб олинган туман (шаҳар)ларда амалий чора-тадбирларни амалга ошириш тўғрисида» 2025 йил 1 апрелдаги ПҚ-132-сон қарори билан тасдиқланган Хатирчи туманини 2025-2026 йилларда жадал комплекс ривожлантириш бўйича қўшимча дастурга мувофиқ:

туман марказидан ўтувчи 4Р56 автомобиль йўлининг 11 — 16 км қисмини реконструкция қилиш (кейинги ўринларда — йўл қурилиши) ишларини якунлаш учун йўл қурилиши таъсир доирасига тушган турар ва нотурар объектларни кўчириш масаласини ҳал этиш;

йўл қурилишини якунлаш учун унинг таъсир доирасига тушган турар ва нотурар объектларга Вазирлар Маҳкамаси ҳузуридаги Жисмоний ва юридик шахсларга етказилган мулкий зарарларни компенсация қилиш бўйича республика мақсадли жамғармасидан (кейинги ўринларда – Республика компенсация жамғармаси) 14,6 млрд сўм маблағ ажратиш назарда тутилгани маълумот учун қабул қилинсин.

2. Навоий вилояти ҳокимлиги бир ой муддатда:

Давлат активларини бошқариш агентлиги билан биргаликда йўл қурилиши ҳудудига тушган кўчмас мулк объектларини белгиланган тартибда баҳолатсин ва баҳолаш ҳужжатларига асосан етказилган зарарларни қоплаш учун зарур бўладиган маблағ миқдорига аниқлик киритсин;

Республика компенсация жамғармасидан маблағ ажратиш учун талаб этиладиган тегишли ҳужжатларни Республика компенсация жамғармаси Кузатув кенгашига тақдим этсин.

3. Иқтисодиёт ва молия вазирлиги Республика компенсация жамғармаси Кузатув кенгашининг маблағ ажратиш тўғрисидаги тегишли қарорига асосан Республика компенсация жамғармасидан Навоий вилояти ҳокимлиги ҳузуридаги Жисмоний ва юридик шахсларга етказилган мулкий зарарларни компенсация қилиш бўйича ҳудудий мақсадли жамғармасига (кейинги ўринларда — ҳудудий компенсация жамғармаси) зарур маблағларни ажратсин.

4. Навоий вилояти ҳокимлиги:

ҳудудий компенсация жамғармасига ажратиладиган маблағларни «Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида»ги Қонунда белгиланган тартибга қатъий риоя қилган ҳолда мулкдорларга тўлаб берсин;

ҳудудий компенсация жамғармасига ажратиладиган маблағларнинг сарфланиши ҳақида Республика компенсация жамғармаси Кузатув кенгаши ва Вазирлар Маҳкамасига ҳисобот киритсин.

5. Давлат молиявий назорати инспекцияси ер участкалари олиб қўйилиши муносабати билан етказилган зарарларни қоплаш учун ажратилган маблағларнинг мақсадли сарфланиши бўйича белгиланган тартибда назорат ўрнатсин.

6. Белгилаб қўйилсинки, ушбу қарорнинг 2-бандида назарда тутилган объектларни белгиланган тартибда баҳоланиши, мулкдорлар билан очиқ муҳокама ўтказилиши ҳамда ҳудудий компенсация жамғармасига ажратиладиган маблағларнинг мақсадли сарфланиши юзасидан Навоий вилояти ҳокими Н.Т. Турсунов шахсан жавобгар ҳисобланади.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда Навоий вилояти ҳокими Н.Т. Турсунов зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2025 йил 28 октябрь,

679-сон

(Қонунчилик маълумотлари миллий базаси, 28.10.2025 й., 09/25/679/0988-сон)

lex.uz

Oʻzbekiston Respublikasi Vazirlar Mahkamasining

qarori

Navoiy viloyatining Xatirchi tumanida jamoat ehtiyojlari uchun ayrim yer uchastkalarini olib qoʻyish va mulkdorlarga yetkazilgan zararlarni qoplash toʻgʻrisida

Oʻzbekiston Respublikasining “Yer uchastkalarini kompensatsiya evaziga jamoat ehtiyojlari uchun olib qoʻyish tartib-taomillari toʻgʻrisida”gi Qonuniga muvofiq hamda Oʻzbekiston Respublikasi Prezidentining “Respublika hududlarini jadal kompleks rivojlantirish uchun tanlab olingan tuman (shahar)larda amaliy chora-tadbirlarni amalga oshirish toʻgʻrisida” 2025-yil 1-apreldagi PQ-132-son qarori ijrosini taʼminlash maqsadida Vazirlar Mahkamasi qaror qiladi:

1. Quyidagilar:

a) Oʻzbekiston Respublikasi Prezidentining “2024 — 2026-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida” 2023-yil 25-dekabrdagi PQ-404-son qarori bilan tasdiqlangan 2024-yilda Navoiy viloyatida obyektlarni qurish, rekonstruksiya qilish, mukammal taʼmirlash va jihozlash boʻyicha manzilli roʻyxatga asosan Xatirchi tumani markazidan oʻtuvchi 4R56 “Oqtosh sh. — Yangirabot sh. — Langar q. — Chuya q.” avtomobil yoʻlining 11 — 16 km qismini rekonstruksiya qilish belgilangani;

b) Oʻzbekiston Respublikasi Prezidentining “Respublika hududlarini jadal kompleks rivojlantirish uchun tanlab olingan tuman (shahar)larda amaliy chora-tadbirlarni amalga oshirish toʻgʻrisida” 2025-yil 1-apreldagi PQ-132-son qarori bilan tasdiqlangan Xatirchi tumanini 2025-2026-yillarda jadal kompleks rivojlantirish boʻyicha qoʻshimcha dasturga muvofiq:

tuman markazidan oʻtuvchi 4R56 avtomobil yoʻlining 11 — 16 km qismini rekonstruksiya qilish (keyingi oʻrinlarda — yoʻl qurilishi) ishlarini yakunlash uchun yoʻl qurilishi taʼsir doirasiga tushgan turar va noturar obyektlarni koʻchirish masalasini hal etish;

yoʻl qurilishini yakunlash uchun uning taʼsir doirasiga tushgan turar va noturar obyektlarga Vazirlar Mahkamasi huzuridagi Jismoniy va yuridik shaxslarga yetkazilgan mulkiy zararlarni kompensatsiya qilish boʻyicha respublika maqsadli jamgʻarmasidan (keyingi oʻrinlarda – Respublika kompensatsiya jamgʻarmasi) 14,6 mlrd soʻm mablagʻ ajratish nazarda tutilgani maʼlumot uchun qabul qilinsin.

2. Navoiy viloyati hokimligi bir oy muddatda:

Davlat aktivlarini boshqarish agentligi bilan birgalikda yoʻl qurilishi hududiga tushgan koʻchmas mulk obyektlarini belgilangan tartibda baholatsin va baholash hujjatlariga asosan yetkazilgan zararlarni qoplash uchun zarur boʻladigan mablagʻ miqdoriga aniqlik kiritsin;

Respublika kompensatsiya jamgʻarmasidan mablagʻ ajratish uchun talab etiladigan tegishli hujjatlarni Respublika kompensatsiya jamgʻarmasi Kuzatuv kengashiga taqdim etsin.

3. Iqtisodiyot va moliya vazirligi Respublika kompensatsiya jamgʻarmasi Kuzatuv kengashining mablagʻ ajratish toʻgʻrisidagi tegishli qaroriga asosan Respublika kompensatsiya jamgʻarmasidan Navoiy viloyati hokimligi huzuridagi Jismoniy va yuridik shaxslarga yetkazilgan mulkiy zararlarni kompensatsiya qilish boʻyicha hududiy maqsadli jamgʻarmasiga (keyingi oʻrinlarda — hududiy kompensatsiya jamgʻarmasi) zarur mablagʻlarni ajratsin.

4. Navoiy viloyati hokimligi:

hududiy kompensatsiya jamgʻarmasiga ajratiladigan mablagʻlarni “Yer uchastkalarini kompensatsiya evaziga jamoat ehtiyojlari uchun olib qoʻyish tartib-taomillari toʻgʻrisida”gi Qonunda belgilangan tartibga qatʼiy rioya qilgan holda mulkdorlarga toʻlab bersin;

hududiy kompensatsiya jamgʻarmasiga ajratiladigan mablagʻlarning sarflanishi haqida Respublika kompensatsiya jamgʻarmasi Kuzatuv kengashi va Vazirlar Mahkamasiga hisobot kiritsin.

5. Davlat moliyaviy nazorati inspeksiyasi yer uchastkalari olib qoʻyilishi munosabati bilan yetkazilgan zararlarni qoplash uchun ajratilgan mablagʻlarning maqsadli sarflanishi boʻyicha belgilangan tartibda nazorat oʻrnatsin.

6. Belgilab qoʻyilsinki, ushbu qarorning 2-bandida nazarda tutilgan obyektlarni belgilangan tartibda baholanishi, mulkdorlar bilan ochiq muhokama oʻtkazilishi hamda hududiy kompensatsiya jamgʻarmasiga ajratiladigan mablagʻlarning maqsadli sarflanishi yuzasidan Navoiy viloyati hokimi N.T. Tursunov shaxsan javobgar hisoblanadi.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda Navoiy viloyati hokimi N.T. Tursunov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 28-oktabr,

679-son

(Qonunchilik maʼlumotlari milliy bazasi, 28.10.2025-y., 09/25/679/0988-son)

lex.uz