UzbekAI

ЎЗБЕКИСТОН РЕСПУБЛИКАСИ ВАЗИРЛАР МАҲКАМАСИНИНГ

ҚАРОРИ

Қашқадарё вилоятида Кўкдала туман 2-сон техникуми фаолиятини ташкил этиш тўғрисида

Қашқадарё вилоятида ёшларни касбий таълимга жалб этиш, уларга касб ва мутахассисликларни эгаллаши учун қулай шароитлар яратиш, ҳудуднинг ижтимоий-иқтисодий ривожланиш тенденциясига мос ўрта бўғин кадрларини тайёрлаш тизимини кенгайтириш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Касбий таълим тизимида бошқарув самарадорлигини ошириш чора-тадбирлари тўғрисида» 2025 йил 23 октябрдаги ПФ-190-сон Фармони билан Кўкдала (Чироқчи) педагогика коллежи негизида Кўкдала туман 2-сон техникуми (кейинги ўринларда — Техникум) ташкил этилгани маълумот учун қабул қилинсин.

Қуйидагилар:

Техникум Қашқадарё вилояти, Кўкдала тумани, Кўкдала МФЙ, Умар Хайём кўчаси 77-уй манзилида фаолият кўрсатиши;

собиқ Кўкдала (Чироқчи) педагогика коллежи ҳудудида жойлашган давлат мактабгача таълим ташкилоти биноси ҳамда унга туташ бўлган 0,5 га ер майдони Мактабгача ва мактаб таълими вазирлиги тизимида қолдирилиши инобатга олинсин.

2. Белгилаб қўйилсинки:

Техникум Олий таълим, фан ва инновациялар вазирлиги ҳузуридаги Касбий таълим агентлиги тизимидаги давлат касбий таълим ташкилоти ҳисобланади ва унинг фаолияти амалдаги касбий таълим ташкилотларини молиялаштириш тартиби асосида ҳамда қонунчилик ҳужжатларида тақиқланмаган бошқа манбалар ҳисобидан амалга оширилади;

Техникумга умумий ўрта таълим ташкилотининг 9 ва 11-синф битирувчилари белгиланган тартибда ўқишга қабул қилинади;

Техникумни сақлаш харажатларига 2025 йилда талаб этиладиган маблағлар Қашқадарё вилояти маҳаллий бюджетига ажратилган маблағлар доирасида амалга оширилади, 2026 йилдан бошлаб эса Давлат бюджети параметрларида назарда тутилади.

3. Техникумнинг асосий вазифалари этиб қуйидагилар белгилансин:

иқтисодиёт тармоқларида ўрта бўғин кадрларига талаб юқори бўлган касб ва мутахассисликлар бўйича ҳамда халқаро таълим дастурларини жорий қилиш орқали ташқи меҳнат бозори эҳтиёжи асосида кадрлар тайёрлаш;

таълим ва ишлаб чиқариш интеграциясини таъминлаш мақсадида дуал таълим шаклида кадрлар тайёрлашни кенгайтириш;

меҳнат бозорида талаб юқори бўлган касблар бўйича ишсиз ва банд бўлмаган аҳолини қисқа муддатли касбларга ҳамда хорижий тилларга ўқитиш, бунда қисқа муддатли ўқув курсларини иш берувчилар талабига мувофиқ ташкил этиш;

тегишли касбий таълим даражалари бўйича кадрлар тайёрлаш учун зарур моддий-техника, ўқув-методик базани яратиш;

ўқув жараёнига юқори иш тажрибасига эга бўлган амалиётчи мутахассисларни ҳамда олий таълим ташкилотларининг профессор-ўқитувчиларини жалб этиб бориш;

нуфузли хорижий таълим ташкилотлари билан ҳамкорликда қўшма таълим дастури асосида мутахассислар тайёрлаш ҳамда ўқувчиларни эгаллаган касб ва мутахассислик бўйича халқаро тан олинган касбий сертификатларини олишларига шарт-шароитлар яратиш.

4. Олий таълим, фан ва инновациялар вазирлиги:

а) бир ой муддатда Техникумда ўқув жараёнини ташкил этиш, таълим сифатини таъминлаш ва ўқувчилар учун зарурий шарт-шароитларни яратиш бўйича чора-тадбирлар дастурини ишлаб чиқсин;

б) Техникумни ўқув-лаборатория жиҳозлари, устахона асбоб-ускуналари ва ўқув техника билан таъминлашда сунъий интеллект ҳамда «яшил иқтисодиёт» тенденцияларини инобатга олсин;

в) 2025 йил 15 ноябрга қадар:

Техникумнинг уставини тасдиқласин ҳамда унинг белгиланган тартибда давлат рўйхатидан ўтказилишини таъминласин;

2025/2026 ўқув йили учун Иқтисодиёт ва молия вазирлиги билан келишилган ҳолда Қашқадарё вилояти ҳокимлигининг таклифи асосида Техникумга ўқувчиларни қабул қилиш параметрларини белгиланган тартибда тасдиқласин.

5. Қашқадарё вилояти ҳокимлиги:

Техникумда тайёрланаётган касб ва мутахассисликлар бўйича ҳудуддаги корхона ва ташкилотларни саноат ҳамкори сифатида жалб этсин ҳамда ўқувчиларнинг ишлаб чиқариш амалиётини ҳудуддаги тадбиркорлик субъектларида ўтказишни таъминласин;

2026/2027 ўқув йили бошлангунга қадар Техникумнинг моддий-техника базасини мустаҳкамлаш, инфратузилмасини яхшилаш чораларини кўрсин;

Вазирлар Маҳкамаси ҳузуридаги Миграция агентлиги билан биргаликда Техникумда 2026 йил 1 январдан бошлаб ўқишга қабул қилинган ўқувчиларни ҳамда хорижда ишлаш истагида бўлган фуқароларни немис, инглиз, рус, корейс ва япон тилларига Миграция жамғармаси маблағлари ҳисобидан ўқитишни йўлга қўйсин;

Олий таълим, фан ва инновациялар вазирлиги билан биргаликда 2026/2027 ўқув йилидан бошлаб Техникумда халқаро таълим дастурини жорий қилиш чораларини кўрсин;

ҳар йили июль-август ойларида Техникум битирувчилари учун вилоятдаги иш берувчиларни жалб қилган ҳолда ярмаркалар, шу жумладан, ўқув йили давомида ишлаб чиқариш ташкилотларида тасдиқланган режа-графиклар асосида «Очиқ эшиклар куни»ни ташкил қилсин.

6. Олий таълим, фан ва инновациялар вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

7. Ушбу қарорнинг бажарилишини назорат қилиш Ўзбекистон Республикаси олий таълим, фан ва инновациялар вазири К.А. Шарипов ҳамда Қашқадарё вилояти ҳокими М.Б. Азимов зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2025 йил 28 октябрь,

680 -сон

(Қонунчилик маълумотлари миллий базаси, 29.10.2025 й., 09/25/680/0993-сон)

lex.uz

OʻZBEKISTON RESPUBLIKASI VAZIRLAR MAHKAMASINING

QARORI

Qashqadaryo viloyatida Koʻkdala tuman 2-son texnikumi faoliyatini tashkil etish toʻgʻrisida

Qashqadaryo viloyatida yoshlarni kasbiy taʼlimga jalb etish, ularga kasb va mutaxassisliklarni egallashi uchun qulay sharoitlar yaratish, hududning ijtimoiy-iqtisodiy rivojlanish tendensiyasiga mos oʻrta boʻgʻin kadrlarini tayyorlash tizimini kengaytirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Kasbiy taʼlim tizimida boshqaruv samaradorligini oshirish chora-tadbirlari toʻgʻrisida” 2025-yil 23-oktabrdagi PF-190-son Farmoni bilan Koʻkdala (Chiroqchi) pedagogika kolleji negizida Koʻkdala tuman 2-son texnikumi (keyingi oʻrinlarda — Texnikum) tashkil etilgani maʼlumot uchun qabul qilinsin.

Quyidagilar:

Texnikum Qashqadaryo viloyati, Koʻkdala tumani, Koʻkdala MFY, Umar Xayyom koʻchasi 77-uy manzilida faoliyat koʻrsatishi;

sobiq Koʻkdala (Chiroqchi) pedagogika kolleji hududida joylashgan davlat maktabgacha taʼlim tashkiloti binosi hamda unga tutash boʻlgan 0,5 ga yer maydoni Maktabgacha va maktab taʼlimi vazirligi tizimida qoldirilishi inobatga olinsin.

2. Belgilab qoʻyilsinki:

Texnikum Oliy taʼlim, fan va innovatsiyalar vazirligi huzuridagi Kasbiy taʼlim agentligi tizimidagi davlat kasbiy taʼlim tashkiloti hisoblanadi va uning faoliyati amaldagi kasbiy taʼlim tashkilotlarini moliyalashtirish tartibi asosida hamda qonunchilik hujjatlarida taqiqlanmagan boshqa manbalar hisobidan amalga oshiriladi;

Texnikumga umumiy oʻrta taʼlim tashkilotining 9 va 11-sinf bitiruvchilari belgilangan tartibda oʻqishga qabul qilinadi;

Texnikumni saqlash xarajatlariga 2025-yilda talab etiladigan mablagʻlar Qashqadaryo viloyati mahalliy budjetiga ajratilgan mablagʻlar doirasida amalga oshiriladi, 2026-yildan boshlab esa Davlat budjeti parametrlarida nazarda tutiladi.

3. Texnikumning asosiy vazifalari etib quyidagilar belgilansin:

iqtisodiyot tarmoqlarida oʻrta boʻgʻin kadrlariga talab yuqori boʻlgan kasb va mutaxassisliklar boʻyicha hamda xalqaro taʼlim dasturlarini joriy qilish orqali tashqi mehnat bozori ehtiyoji asosida kadrlar tayyorlash;

taʼlim va ishlab chiqarish integratsiyasini taʼminlash maqsadida dual taʼlim shaklida kadrlar tayyorlashni kengaytirish;

mehnat bozorida talab yuqori boʻlgan kasblar boʻyicha ishsiz va band boʻlmagan aholini qisqa muddatli kasblarga hamda xorijiy tillarga oʻqitish, bunda qisqa muddatli oʻquv kurslarini ish beruvchilar talabiga muvofiq tashkil etish;

tegishli kasbiy taʼlim darajalari boʻyicha kadrlar tayyorlash uchun zarur moddiy-texnika, oʻquv-metodik bazani yaratish;

oʻquv jarayoniga yuqori ish tajribasiga ega boʻlgan amaliyotchi mutaxassislarni hamda oliy taʼlim tashkilotlarining professor-oʻqituvchilarini jalb etib borish;

nufuzli xorijiy taʼlim tashkilotlari bilan hamkorlikda qoʻshma taʼlim dasturi asosida mutaxassislar tayyorlash hamda oʻquvchilarni egallagan kasb va mutaxassislik boʻyicha xalqaro tan olingan kasbiy sertifikatlarini olishlariga shart-sharoitlar yaratish.

4. Oliy taʼlim, fan va innovatsiyalar vazirligi:

a) bir oy muddatda Texnikumda oʻquv jarayonini tashkil etish, taʼlim sifatini taʼminlash va oʻquvchilar uchun zaruriy shart-sharoitlarni yaratish boʻyicha chora-tadbirlar dasturini ishlab chiqsin;

b) Texnikumni oʻquv-laboratoriya jihozlari, ustaxona asbob-uskunalari va oʻquv texnika bilan taʼminlashda sunʼiy intellekt hamda “yashil iqtisodiyot” tendensiyalarini inobatga olsin;

v) 2025-yil 15-noyabrga qadar:

Texnikumning ustavini tasdiqlasin hamda uning belgilangan tartibda davlat roʻyxatidan oʻtkazilishini taʼminlasin;

2025/2026 oʻquv yili uchun Iqtisodiyot va moliya vazirligi bilan kelishilgan holda Qashqadaryo viloyati hokimligining taklifi asosida Texnikumga oʻquvchilarni qabul qilish parametrlarini belgilangan tartibda tasdiqlasin.

5. Qashqadaryo viloyati hokimligi:

Texnikumda tayyorlanayotgan kasb va mutaxassisliklar boʻyicha hududdagi korxona va tashkilotlarni sanoat hamkori sifatida jalb etsin hamda oʻquvchilarning ishlab chiqarish amaliyotini hududdagi tadbirkorlik subyektlarida oʻtkazishni taʼminlasin;

2026/2027 oʻquv yili boshlangunga qadar Texnikumning moddiy-texnika bazasini mustahkamlash, infratuzilmasini yaxshilash choralarini koʻrsin;

Vazirlar Mahkamasi huzuridagi Migratsiya agentligi bilan birgalikda Texnikumda 2026-yil 1-yanvardan boshlab oʻqishga qabul qilingan oʻquvchilarni hamda xorijda ishlash istagida boʻlgan fuqarolarni nemis, ingliz, rus, koreys va yapon tillariga Migratsiya jamgʻarmasi mablagʻlari hisobidan oʻqitishni yoʻlga qoʻysin;

Oliy taʼlim, fan va innovatsiyalar vazirligi bilan birgalikda 2026/2027 oʻquv yilidan boshlab Texnikumda xalqaro taʼlim dasturini joriy qilish choralarini koʻrsin;

har yili iyul-avgust oylarida Texnikum bitiruvchilari uchun viloyatdagi ish beruvchilarni jalb qilgan holda yarmarkalar, shu jumladan, oʻquv yili davomida ishlab chiqarish tashkilotlarida tasdiqlangan reja-grafiklar asosida “Ochiq eshiklar kuni”ni tashkil qilsin.

6. Oliy taʼlim, fan va innovatsiyalar vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

7. Ushbu qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri K.A. Sharipov hamda Qashqadaryo viloyati hokimi M.B. Azimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 28-oktabr,

680 -son

(Qonunchilik maʼlumotlari milliy bazasi, 29.10.2025-y., 09/25/680/0993-son)

lex.uz