📅 2025-yil 4-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 4 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 4 ноября 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 4 November 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Янгиер шаҳар техникуми фаолиятини ташкил этиш тўғрисида
Ўзбекистон Республикаси Президентининг «Касбий таълим тизимида бошқарув самарадорлигини ошириш чора-тадбирлари тўғрисида» 2025 йил 23 октябрдаги ПФ-190-сон Фармони ижросини таъминлаш, шунингдек, Сирдарё вилоятида ёшларни касбий таълим билан қамраб олиш даражасини ошириш, уларни ички ва ташқи меҳнат бозорида талаб юқори бўлган касбларга ўқитиш, ҳудудларни ижтимоий-иқтисодий ривожлантириш дастурлари асосида ташкил этилаётган янги иш ўринларидан келиб чиқиб, уларнинг ўрта бўғин кадрларига бўлган эҳтиёжини қаноатлантириш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Касбий таълим тизимида бошқарув самарадорлигини ошириш чора-тадбирлари тўғрисида» 2025 йил 23 октябрдаги ПФ-190-сон Фармони билан Янгиер педагогика коллежи негизида Янгиер шаҳар техникуми (кейинги ўринларда — Техникум) ташкил этилгани маълумот учун қабул қилинсин.
Техникум Сирдарё вилояти, Янгиер шаҳри, «Шодиёна» МФЙ Янгибоғ кўчаси 15-уй манзилида фаолият кўрсатиши ва собиқ Янгиер педагогика коллежининг бино ва иншоотларига оператив бошқариш ҳуқуқи асосида бепул жойлаштирилиши инобатга олинсин.
2. Белгилаб қўйилсинки:
техникум Олий таълим, фан ва инновациялар вазирлиги тизимидаги давлат касбий таълим ташкилоти ҳисобланади ҳамда унинг фаолияти амалдаги касбий таълим ташкилотларини молиялаштириш тартиби асосида ва қонунчилик ҳужжатларида тақиқланмаган бошқа манбалар ҳисобидан молиялаштирилади;
техникумга умумий ўрта таълим ташкилотининг битирувчилари белгиланган тартибда давлат гранти ва тўлов-контракт асосида ўқишга қабул қилинади ҳамда ўқув жараёни бошланғич, ўрта ва ўрта махсус касбий таълим дастурлари асосида ташкил этилади;
2025 йилда техникумни сақлаш билан боғлиқ харажатлар Сирдарё вилояти маҳаллий бюджетига ажратилган маблағлар доирасида амалга оширилади, 2026 йилдан бошлаб эса Давлат бюджети параметрларида назарда тутилади;
техникумда меҳнат бозори эҳтиёжлари, фуқароларнинг мурожаатлари ҳамда иш берувчи корхона ва ташкилотларнинг таклифлари асосида асосий таълим дастурларига қўшимча равишда квалификация ва компетенцияларни ўзлаштириш ҳамда хорижий тилларни ўқитишга мўлжалланган қисқа муддатли курслар ташкил этилади.
3. Техникумнинг асосий вазифалари этиб қуйидагилар белгилансин:
иқтисодиёт тармоқларида ўрта бўғин кадрларига талаб юқори бўлган касб ва мутахассисликлар бўйича кадрлар тайёрлаш;
ўрта бўғин кадрлари тайёрлашда ички ва ташқи меҳнат бозорида таклифларни ўрганиш ҳамда таълим ва ишлаб чиқариш интеграциясини таъминлаш мақсадида дуал таълим шаклида кадрлар тайёрлашни кенгайтириш;
кадрлар тайёрлаш жараёнига соҳа корхоналаридан амалиётчилар, олий таълим ташкилотларининг профессор-ўқитувчилари ҳамда малакали хорижий мутахассисларни жалб қилиш;
халқаро таълим дастурларини жорий қилиш орқали ташқи меҳнат бозори эҳтиёжи асосида кадрлар тайёрлашни кенгайтириш;
меҳнат бозорида талаб юқори бўлган касблар бўйича ишсиз ва банд бўлмаган аҳолини қисқа муддатли касбларга ҳамда хорижий тилларга ўқитиш;
тегишли касбий таълим даражалари бўйича кадрлар тайёрлаш учун зарур моддий-техник, ўқув-методик базани яратиш ва ўқув жараёнига юқори иш тажрибасига эга бўлган амалиётчи мутахассисларни жалб этиб бориш.
4. Олий таълим, фан ва инновациялар вазирлиги, Сирдарё вилояти ҳокимлиги ҳамда Вазирлар Маҳкамаси ҳузуридаги Миграция агентлиги бир ой муддатда Техникумда янги ўқув йилига тайёргарлик кўриш, ўқув жараёнини ташкил этиш, ички ва ташқи меҳнат бозори учун ўрта бўғин кадрларини тайёрлаш ҳамда ўқувчилар учун зарур шарт-шароитларни яратиш бўйича чора-тадбирлар дастурини ишлаб чиқсин.
5. Олий таълим, фан ва инновациялар вазирлиги:
бир ҳафта муддатда Иқтисодиёт ва молия вазирлиги билан биргаликда Сирдарё вилояти ҳокимлигининг таклифи асосида техникумга ўқувчиларни қабул қилиш параметрларини белгиланган тартибда шакллантирсин ва тасдиқласин;
ўқувчиларни қабул қилиш параметрларига мос равишда юқори малакали мутахассисларни ишга қабул қилишни ташкил этсин;
Мактабгача ва мактаб таълими вазирлиги билан биргаликда мунтазам равишда умумий ўрта таълим ташкилотларининг битирувчиларини техникумдаги мавжуд касбларга йўналтириш чораларини кўрсин;
бир ой муддатда техникум уставини тасдиқласин ҳамда унинг белгиланган тартибда давлат рўйхатидан ўтказилишини таъминласин.
6. Сирдарё вилояти ҳокимлиги:
бир ой муддатда техникумда мавжуд касб ва мутахассисликлар бўйича ҳудуддаги корхона ва ташкилотларни саноат ҳамкори сифатида бириктирсин;
бириктирилган корхона ва ташкилотларнинг буюртмаси асосида ўқувчиларни дуал таълим шаклида ўқитишни йўлга қўйишда кўмаклашсин;
техникум ва иш берувчиларнинг ўзаро уйғунликда фаолият юритишини ҳамда ўқувчиларнинг ишлаб чиқариш амалиёти ҳудуддаги корхона ва ташкилотларда ўтказилишини таъминласин;
2026 йил 1 январдан бошлаб Вазирлар Маҳкамаси ҳузуридаги Миграция агентлиги билан биргаликда техникумга ўқишга қабул қилинган ўқувчиларни ҳамда хорижда ишлаш истагида бўлган фуқароларни хитой, немис, инглиз, рус, корейс ва япон тилларига Миграция жамғармаси маблағлари ҳисобидан ўқитишни йўлга қўйсин;
ҳар йили 1 майга қадар Камбағалликни қисқартириш ва бандлик вазирлиги билан биргаликда техникум битирувчиларининг бандлигини таъминлашга қаратилган дастурларни ишлаб чиқсин ҳамда улар ижросини назорат қилсин;
ҳар йили июль-август ойларида техникум битирувчилари учун иш берувчиларни жалб қилган ҳолда ярмаркалар, ўқув йили давомида ишлаб чиқариш ташкилотларида тасдиқланган режа-графиклар асосида «Очиқ эшиклар куни»ни ташкил қилсин.
7. Ушбу қарорнинг бажарилишини назорат қилиш Ўзбекистон Республикаси олий таълим, фан ва инновациялар вазири К.А. Шарипов ҳамда Сирдарё вилояти ҳокими в.б. Э.О.Турдимов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2025 йил 4 ноябрь,
692-сон
Oʻzbekiston Respublikasi Vazirlar Mahkamasining
qarori
Yangiyer shahar texnikumi faoliyatini tashkil etish toʻgʻrisida
Oʻzbekiston Respublikasi Prezidentining “Kasbiy taʼlim tizimida boshqaruv samaradorligini oshirish chora-tadbirlari toʻgʻrisida” 2025-yil 23-oktabrdagi PF-190-son Farmoni ijrosini taʼminlash, shuningdek, Sirdaryo viloyatida yoshlarni kasbiy taʼlim bilan qamrab olish darajasini oshirish, ularni ichki va tashqi mehnat bozorida talab yuqori boʻlgan kasblarga oʻqitish, hududlarni ijtimoiy-iqtisodiy rivojlantirish dasturlari asosida tashkil etilayotgan yangi ish oʻrinlaridan kelib chiqib, ularning oʻrta boʻgʻin kadrlariga boʻlgan ehtiyojini qanoatlantirish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Kasbiy taʼlim tizimida boshqaruv samaradorligini oshirish chora-tadbirlari toʻgʻrisida” 2025-yil 23-oktabrdagi PF-190-son Farmoni bilan Yangiyer pedagogika kolleji negizida Yangiyer shahar texnikumi (keyingi oʻrinlarda — Texnikum) tashkil etilgani maʼlumot uchun qabul qilinsin.
Texnikum Sirdaryo viloyati, Yangiyer shahri, “Shodiyona” MFY Yangibogʻ koʻchasi 15-uy manzilida faoliyat koʻrsatishi va sobiq Yangiyer pedagogika kollejining bino va inshootlariga operativ boshqarish huquqi asosida bepul joylashtirilishi inobatga olinsin.
2. Belgilab qoʻyilsinki:
texnikum Oliy taʼlim, fan va innovatsiyalar vazirligi tizimidagi davlat kasbiy taʼlim tashkiloti hisoblanadi hamda uning faoliyati amaldagi kasbiy taʼlim tashkilotlarini moliyalashtirish tartibi asosida va qonunchilik hujjatlarida taqiqlanmagan boshqa manbalar hisobidan moliyalashtiriladi;
texnikumga umumiy oʻrta taʼlim tashkilotining bitiruvchilari belgilangan tartibda davlat granti va toʻlov-kontrakt asosida oʻqishga qabul qilinadi hamda oʻquv jarayoni boshlangʻich, oʻrta va oʻrta maxsus kasbiy taʼlim dasturlari asosida tashkil etiladi;
2025-yilda texnikumni saqlash bilan bogʻliq xarajatlar Sirdaryo viloyati mahalliy budjetiga ajratilgan mablagʻlar doirasida amalga oshiriladi, 2026-yildan boshlab esa Davlat budjeti parametrlarida nazarda tutiladi;
texnikumda mehnat bozori ehtiyojlari, fuqarolarning murojaatlari hamda ish beruvchi korxona va tashkilotlarning takliflari asosida asosiy taʼlim dasturlariga qoʻshimcha ravishda kvalifikatsiya va kompetensiyalarni oʻzlashtirish hamda xorijiy tillarni oʻqitishga moʻljallangan qisqa muddatli kurslar tashkil etiladi.
3. Texnikumning asosiy vazifalari etib quyidagilar belgilansin:
iqtisodiyot tarmoqlarida oʻrta boʻgʻin kadrlariga talab yuqori boʻlgan kasb va mutaxassisliklar boʻyicha kadrlar tayyorlash;
oʻrta boʻgʻin kadrlari tayyorlashda ichki va tashqi mehnat bozorida takliflarni oʻrganish hamda taʼlim va ishlab chiqarish integratsiyasini taʼminlash maqsadida dual taʼlim shaklida kadrlar tayyorlashni kengaytirish;
kadrlar tayyorlash jarayoniga soha korxonalaridan amaliyotchilar, oliy taʼlim tashkilotlarining professor-oʻqituvchilari hamda malakali xorijiy mutaxassislarni jalb qilish;
xalqaro taʼlim dasturlarini joriy qilish orqali tashqi mehnat bozori ehtiyoji asosida kadrlar tayyorlashni kengaytirish;
mehnat bozorida talab yuqori boʻlgan kasblar boʻyicha ishsiz va band boʻlmagan aholini qisqa muddatli kasblarga hamda xorijiy tillarga oʻqitish;
tegishli kasbiy taʼlim darajalari boʻyicha kadrlar tayyorlash uchun zarur moddiy-texnik, oʻquv-metodik bazani yaratish va oʻquv jarayoniga yuqori ish tajribasiga ega boʻlgan amaliyotchi mutaxassislarni jalb etib borish.
4. Oliy taʼlim, fan va innovatsiyalar vazirligi, Sirdaryo viloyati hokimligi hamda Vazirlar Mahkamasi huzuridagi Migratsiya agentligi bir oy muddatda Texnikumda yangi oʻquv yiliga tayyorgarlik koʻrish, oʻquv jarayonini tashkil etish, ichki va tashqi mehnat bozori uchun oʻrta boʻgʻin kadrlarini tayyorlash hamda oʻquvchilar uchun zarur shart-sharoitlarni yaratish boʻyicha chora-tadbirlar dasturini ishlab chiqsin.
5. Oliy taʼlim, fan va innovatsiyalar vazirligi:
bir hafta muddatda Iqtisodiyot va moliya vazirligi bilan birgalikda Sirdaryo viloyati hokimligining taklifi asosida texnikumga oʻquvchilarni qabul qilish parametrlarini belgilangan tartibda shakllantirsin va tasdiqlasin;
oʻquvchilarni qabul qilish parametrlariga mos ravishda yuqori malakali mutaxassislarni ishga qabul qilishni tashkil etsin;
Maktabgacha va maktab taʼlimi vazirligi bilan birgalikda muntazam ravishda umumiy oʻrta taʼlim tashkilotlarining bitiruvchilarini texnikumdagi mavjud kasblarga yoʻnaltirish choralarini koʻrsin;
bir oy muddatda texnikum ustavini tasdiqlasin hamda uning belgilangan tartibda davlat roʻyxatidan oʻtkazilishini taʼminlasin.
6. Sirdaryo viloyati hokimligi:
bir oy muddatda texnikumda mavjud kasb va mutaxassisliklar boʻyicha hududdagi korxona va tashkilotlarni sanoat hamkori sifatida biriktirsin;
biriktirilgan korxona va tashkilotlarning buyurtmasi asosida oʻquvchilarni dual taʼlim shaklida oʻqitishni yoʻlga qoʻyishda koʻmaklashsin;
texnikum va ish beruvchilarning oʻzaro uygʻunlikda faoliyat yuritishini hamda oʻquvchilarning ishlab chiqarish amaliyoti hududdagi korxona va tashkilotlarda oʻtkazilishini taʼminlasin;
2026-yil 1-yanvardan boshlab Vazirlar Mahkamasi huzuridagi Migratsiya agentligi bilan birgalikda texnikumga oʻqishga qabul qilingan oʻquvchilarni hamda xorijda ishlash istagida boʻlgan fuqarolarni xitoy, nemis, ingliz, rus, koreys va yapon tillariga Migratsiya jamgʻarmasi mablagʻlari hisobidan oʻqitishni yoʻlga qoʻysin;
har yili 1-mayga qadar Kambagʻallikni qisqartirish va bandlik vazirligi bilan birgalikda texnikum bitiruvchilarining bandligini taʼminlashga qaratilgan dasturlarni ishlab chiqsin hamda ular ijrosini nazorat qilsin;
har yili iyul-avgust oylarida texnikum bitiruvchilari uchun ish beruvchilarni jalb qilgan holda yarmarkalar, oʻquv yili davomida ishlab chiqarish tashkilotlarida tasdiqlangan reja-grafiklar asosida “Ochiq eshiklar kuni”ni tashkil qilsin.
7. Ushbu qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri K.A. Sharipov hamda Sirdaryo viloyati hokimi v.b. E.O.Turdimov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 4-noyabr,
692-son